នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម
សម្តេចតេជោ ហ៊ុន សែន អនុញ្ញាតឱ្យ ឯកឧត្តមឯកអគ្គរដ្ឋទូតសហភាពអឺរ៉ុប ប្រចាំកម្ពុជា ចូលជួបសម្តែងការគួរសម
ក្រុមហ៊ុន Huawei វាយតម្លៃខ្ពស់ចំពោះកិច្ចសហការល្អប្រសើររបស់ក្រសួងស្ថាប័នពាក់ព័ន្ធ ក្នុងវិស័យបច្ចេកវិទ្យា

នយោបាយ​ និង ការអភិវឌ្ឍន៍

ហ្វីលីពីន នឹងប្រឆាំងចិន ប្រសិនបើផលប្រយោជន៍ដែនសមុទ្រ មិនទទួលបានការយកចិត្តទុកដាក់

2024/03/05 04:56:12 pm        130
Facebook Telegram Linkin
លោកប្រធានាធិបតីហ្វីលីពីន ហ្វើឌីណាន ម៉ាកូស ជូនៀរ (Ferdinand Marcos Jr) បាននិយាយកាលពីថ្ងៃចន្ទ ទី៤ ខែមីនា ថា ហ្វីលីពីន នឹងសហការជាមួយចិនក្នុងកិច្ចចរចាស្តីពីជម្លោះសមុទ្រចិនខាងត្បូង ប៉ុន្តែនឹងរុញបកទៅចិនវិញ នៅពេលអធិបតេយ្យភាព និងសិទ្ធិដែនសមុទ្ររបស់ខ្លួនមិនត្រូវបានអើពើទេនោះ។ថ្លែងនៅឯវេទិកាវិទ្យាស្ថាន Lowy ក្នុងដំណើរបំពេញទស្សនកិច្ចទៅកាន់ប្រទេសអូស្ត្រាលី លោក Marcos បាននិយាយថា លោកបានប្តេជ្ញាចិត្តក្នុងការធ្វើការជាមួយបណ្តាប្រទេសអាស៊ីអាគ្នេយ៍ និងប្រទេសចិនសម្រាប់ក្រមប្រតិបត្តិ (COC) ដែលបានពន្យារពេលជាយូរមកហើយនៅសមុទ្រចិនខាងត្បូង ស្របតាមច្បាប់អន្តរជាតិ។ លោកប្រធានាធិបតីហ្វីលីពីន រូបនេះ បាននិយាយ ខណៈលោកបានបញ្ជាក់ជាថ្មីថារូបលោកនឹងមិនប្រគល់ទឹកដីហ្វីលីពីនណាមួយទៅឲ្យមហាអំណាចបរទេសនោះទេ ថា កិច្ចខិតខំប្រឹងប្រែងទាំងនេះមិនត្រូវបានអនុវត្តដោយខ្វះចន្លោះនោះទេ។ បរិយាកាសអំណោយផលជាទីដែលភាពតានតឹងត្រូវបានគ្រប់គ្រងប្រកបដោយប្រសិទ្ធភាពគឺ មានសារៈសំខាន់ចំពោះភាពជោគជ័យនៃការចរចាសម្រាប់ក្រមប្រតិបត្តិ ។ ទំនាក់ទំនងរវាងប្រទេសជិតខាងហ្វីលីពីន និងចិន បានធ្លាក់ដុនដាបខ្លាំងភ្លាមៗបន្ទាប់ពីលោក Marcos ឡើងកាន់តំណែងកាលពីឆ្នាំ ២០២២ ចំពេលដែលជម្លោះ បានផ្ទុះឡើងម្តងហើយម្តងទៀតជុំវិញការអះអាងសិទ្ធិគ្រប់គ្រងតំបន់ដែនទឹកថ្មប៉ប្រះទឹក នៅសមុទ្រចិនខាងត្បូង នៅពេលដែលទីក្រុងម៉ានីល បានបង្កើតទំនាក់ទំនងការពារជាតិកាន់តែជិតស្និទ្ធជាមួយសហរដ្ឋអាមេរិក។ លោក Marcos បាននិយាយថាសម្ព័ន្ធភាពរបស់ហ្វីលីពីនជាមួយសហរដ្ឋអាមេរិកត្រូវបានបង្កើតដោយជម្រើសរបស់យើងផ្ទាល់ ហើយយើងបន្តពង្រឹងទំនាក់ទំនងនេះដោយជម្រើសរបស់យើងផ្ទាល់ដែរ៕

កិច្ចប្រជុំកំពូលអាស៊ាន៖ រដ្ឋមន្ត្រីការបរទេសអូស្ត្រាលីព្រមានពីជម្លោះដ៏ធំជាមួយប្រទេសចិន

2024/03/05 03:34:35 pm        159
Facebook Telegram Linkin
រដ្ឋមន្ត្រីការបរទេសអូស្ត្រាលី លោកស្រី ផេននី វង្ស (Penny Wong) បានព្រមានខ្លាំងៗអំពីការកើនឡើងភាពប្រឈមនៃជម្លោះនៅក្នុងសមុទ្រចិនខាងត្បូង និងច្រកសមុទ្រតៃវ៉ាន់ លុះត្រាតែតំបន់នេះ ដើរតាមការទូត និងការការពារស្របច្បាប់ថ្មី។ការថ្លែងបែបនេះរបស់លោកស្រីកើតមាននៅថ្ងៃពិពីបើកកិច្ចប្រជុំអាស៊ានក្នុងទីក្រុង Melbourneនៅពេលលោកនាយរដ្ឋមន្ត្រី អង់តូនី អាល់បានី (Anthony Albanese) ទទួលស្វាគមន៍ក្រុមមរដឹកនាំអាស៊ី-អាគ្នេយ៍ ។ខណៈរបៀបវារៈនៃកិច្ចប្រជុំកំពូលនឹងផ្ដោតសំខាន់លើបញ្ហាសេដ្ឋកិច្ច អូស្ត្រាលី ក៏បារម្ភផងដែរអំពីបញ្ហាសន្តិសុខ ដូចជា សកម្មភាពយោធារបស់ប្រទេសចិន នៅក្នុងសមុទ្រចិនខាងត្បូងជាដើម ។ លោកស្រី វង្ស និយាយថាយើងបានដឹងថាជម្លោះដ៏ធំនៅក្នុងតំបន់របស់យើង នឹងបង្កគ្រោះមហន្តរាយដល់សហគមន៍ និងសេដ្ឋកិច្ច របស់យើង ខណៈមានជម្លោះដ៏ធ្ងន់ធ្ងររ៉ាំរ៉ៃ នៅក្នុបតំបន់ហ្កាហ្សា និងអ៊ុយក្រែន ។ភាពតានតឹងបានកើតឡើងនៅក្នុងសមុទ្រចិនខាងត្បូង រវាងប្រទេសចិន និងប្រទេសផ្សេងទៀតដូចជា ប្រទេសហ្វីលីពីន និងវៀតណាម។ ប្រទេសចិន បានសាងសង់មូលដ្ឋានយោធានៅលើកោះសិប្បនិម្មិតនៅក្នុងសមុទ្រនេះ។លោកស្រី បានព្រមានពីភាពប្រឈមកាន់តែធ្ងន់ធ្ងរនៃជម្លោះ ប៉ុន្តែពុំបានសំដៅដោយផ្ទាល់លើប្រទេសចិនទេ។ លោកស្រីបញ្ជាក់ថាយើងបានមើលឃើញការអះអាង និងសកម្មភាពដែលមិនសមស្របទៅនឹងច្បាប់អន្តរជាតិ ពិសេស អនុសញ្ញាស្ដីពីច្បាប់ដែនសមុទ្ររបស់អង្គការសហប្រជាជាតិ ដែលជាបទបញ្ជាស្របច្បាប់សម្រាប់សមុទ្រនិងមហាសមុទ្រ។យើងប្រឈមនឹងអស្ថិរភាព ការបង្កជម្លោះ និងសកម្មភពបង្ខិតបង្ខំ រួមទាំងការធ្វើនាវាចរណ៍នៅសមុទ្រនិងអាកាស ដែលគ្មានសុវត្ថិភាព៕

ពលរដ្ឋមានបណ្ណសមធម៌ អរគុណដល់រដ្ឋាភិបាល ចំពោះការព្យាបាលដោយពុំគិតថ្លៃនៅតាមមន្ទីរពេទ្យរដ្ឋ

2024/03/04 11:15:32 pm        177
Facebook Telegram Linkin
នៅព្រឹកថ្ងៃទី៤មីនាឆ្នាំ២០២៤នេះ ប្រជាពលរដ្ឋក្នុងខេត្តឧត្តរមានជ័យ ដែលមានបណ្ណសមធម៌ បានសម្តែងនូវការអរគុណចំពោះរាជរដ្ឋាភិបាលកម្ពុជា សម្រាប់ការមកទទួល​សេវាពិនិត្យព្យាបាល​ជំងឺផ្សេងៗ នៅតាមមន្ទីររដ្ឋ ក៏ដូចជានៅតាមមណ្ឌលសុខភាព ក្នុងមូលដ្ឋាននានា ដោយពុំអស់ថ្លៃសេវាពិនិត្យព្យាបាលជំងឺ និងមានការយកចិត្តទុកដាក់គិតគូរខ្ពស់ ពីក្រុមគ្រូពេទ្យ ក្នុងការពិនិត្យព្យាបាលជំងឺដល់ពួកគាត់បានល្អប្រសើរផងដែរ។លោក ពូ សំ ដែលមកទទួលសេវាពិនិត្យព្យាបាលជំងឺនៅមន្ទីរបង្អែកខេត្តឧត្តរមានជ័យ បានសំម្តែង​នូវក្តីសប្បាយរីករាយ និងអរគុណចំពោះរាជរដ្ឋាភិបាលកម្ពុជា ដែលបានផ្តល់បណ្ណ​សមធម៌ដល់​រូបគាត់​ដែល​មានជីវភាពមកពីគ្រួសារក្រីក្ររួមទាំងពលរដ្ឋ​ដទៃទៀត​ បាន​មក​ទទួល​សេវាពិនិត្យ​ព្យាលបាល​ជំងឺនៅមន្ទីរពេទ្យរដ្ឋដោយពុំអស់ថ្លៃសេវាអ្វីទាំងអស់។លោក បានឲ្យដឹងថា អស់រយៈពេលជិត២០ឆ្នាំមកហើយដែលរូបគាត់ពុំធ្លាប់​បាន​មកពិនិត្យព្យាបាល​ជំងឺនៅមន្ទីររដ្ឋ ធ្លាប់តែពិនិត្យនៅតាមមណ្ឌលសុខភាព ក្នុងមូលដ្ឋានរបស់គាត់​ បច្ចុប្បន្ន​មន្ទីរពេទ្យរដ្ឋ​ក្នុងខេត្តឧត្តរមានជ័យ មានអគារថ្មីស្រស់ស្អាតប្រកប​ដោយបរិស្ថានល្អ និង​មាន​ឧបករណ៍​បំពាក់​ដោយ​គ្រឿង​វេជ្ជសាស្រ្ត​ទំនើបៗ​រួមទាំង​ក្រុម​គ្រូពេទ្យ​មាន​ភាព​រាក់ទាក់​រួសរាយ​ចំពោះ​អ្នកជំងឺទូទៅ​មិនចាញ់មន្ទីរពេទ្យប្រទេសជិតខាងនោះឡើយ។យ៉ាងណាម៉ិញ​លោកវេជ្ជបណ្ឌិត អ៊ុក សុមេធា ប្រធានមន្ទីរពេទ្យបង្អែកខេត្តឧត្តរមានជ័យ បាន​ឲ្យដឹងថា បន្ទាប់ពីមានអគារមន្ទីរពេទ្យថ្មីដែល​មាន​លក្ខណៈស្តង់ដា សម្រាប់​ពិនិត្យព្យាបាល​ជំងឺ​មានបំពាក់​ដោយ​គ្រឿង​សំភារៈវេជ្ជសាស្រ្តទំនើបៗ​សម្រាប់​ព្យាបាល​ដែល​ជាអំណោយ​ដ៏​ថ្លៃថ្លា​របស់​សម្តេចតេជោ អតីត​នាយករដ្ឋមន្រ្តី បច្ចុប្បន្នមាន​ប្រជាពលរដ្ឋភាគច្រើន​បានមកទទួល​សេវា​ពិនិត្យព្យាបាលជំងឺ នៅមន្ទីរពេទ្យរដ្ឋមានការកើនឡើង ច្រើនជាងមុនៗ ដោយ​សារ​កន្លងមក ​យើង​ខ្វះ​នូវអគារសម្រាក និងពុំមាន​ឧបករណ៍​គ្រឿងវេជ្ជសាស្រ្តទំនើបៗ​សម្រាប់​ពិនិត្យបាលជំងឺ។លោកវេជ្ជបណ្ឌិត បញ្ជាក់ថា ​សព្វថ្ងៃនេះ​នៅពេលយើងមាន​ឧបករណ៍​សម្ភារៈ​វេជ្ជសាស្រ្តទំនើបៗ​នោះពលរដ្ឋភាគច្រើនមួយចំនួនបែរងាកមករកទទួលសេវាពិនិត្យព្យាបាលជំងឺ​ នៅមន្ទីរពេទ្យរដ្ឋវិញ ជៀសរវាង​ការទៅពិនិត្យព្យាបាលជំងឺនៅឯប្រទេសជិតខាង ដោយ​ត្រូវ​ចំណាយ​ថវិការ​ពិនិត្យ​ព្យាបាល​ជំងឺអស់ថវិកាច្រើន ព្រោះបច្ចុប្បន្នមន្ទីរពេទ្យរដ្ឋ មិនចាញ់មន្ទីរឯកជនប៉ុន្មាន​នោះទេ​ សម្រាប់​ប្រទេស​ជិត​ខាង​នោះ៕

ក្រុមហ៊ុនអាកាសចរណ៍ Air India និង ITA របស់អ៊ីតាលី បន្តជើងហោះហើរទៅអ៊ីស្រាអែល ក្នុងពេលមានជម្លោះ

2024/03/04 10:20:06 pm        329
Facebook Telegram Linkin
ក្រុមហ៊ុនអាកាសចរណ៍ Air India និង ITA អ៊ីតាលី កាលពីថ្ងៃអាទិត្យ បានបន្តជើងហោះហើរ ទៅកាន់ប្រទេសអ៊ីស្រាអែល បន្ទាប់ពីពួកគេបានផ្អាកកាលពីខែតុលាឆ្នាំមុន ក្រោយការផ្ទុះឡើងជម្លោះរវាង អ៊ីស្រាអែល និងក្រុមហាម៉ាស។ ក្រុមហ៊ុនអាកាសចរណ៍ឥណ្ឌា បានបន្តជើងហោះហើរដោយផ្នែករបស់ខ្លួនឡើងវិញ នៅលើផ្លូវហោះហើររវាងអាកាសយានដ្ឋានអន្តរជាតិ អ៊ីនឌីរ៉ា ហ្គានឌី (Indira Gandhi) ក្នុងទីក្រុង Delhi និងអាកាសយានដ្ឋាន បេនហ្គូរីអន(Ben Gurion) ក្បែរទីក្រុង Tel Aviv ។ រហូតដល់មានជម្លោះ ផ្លូវហោះហើរនេះ រួមមានជើងហោះហើរទៅនិងមកប្រចាំសប្តាហ៍ចំនួន៦ជើង។ក្រុមហ៊ុនអាកាសចរណ៍អ៊ីតាលី បានបន្តប្រតិបត្តិការរបស់ខ្លួន ក្នុងប្រទេសអ៊ីស្រាអែល ដោយមានជើងហោះហើរប្រចាំសប្តាហ៍បីជើង រវាងអាកាសយានដ្ឋាន ហ្វីមីជីណូ(Fiumicino) ក្នុងទីក្រុងរ៉ូម(Rome) និងទីក្រុង Tel Aviv។ក្រុមហ៊ុនអាកាសចរណ៍ ITA អ៊ីតាលី បាននិយាយនៅក្នុងសេចក្តីថ្លែងការណ៍ថា ការចាប់ផ្តើមឡើងវិញនៃជើងហោះហើររវាងទីក្រុង Tel Aviv និងទីក្រុង Rome គឺអាចធ្វើទៅបានដោយសារកិច្ចសហប្រតិបត្តិការជាមួយអាជ្ញាធរអ៊ីតាលី និងអ៊ីស្រាអែល ហើយវាមានសារៈសំខាន់ជាយុទ្ធសាស្រ្តសម្រាប់ក្រុមហ៊ុនអាកាសចរណ៍ ITA Airways ខណៈក្រុមហ៊ុនពង្រឹងទំនាក់ទំនងពាណិជ្ជកម្ម សង្គម និងវប្បធម៌ រវាងទីផ្សារនៃប្រទេសទាំងពីរ។ ក្រុមហ៊ុនអាកាសចរណ៍ធំៗចំនួនបីផ្សេងទៀតគឺក្រុមហ៊ុនអាកាសចរណ៍ British Airways, ក្រុមហ៊ុនអាយប៊ីរៀ(Iberia)របស់អេស្បាញ និងក្រុមហ៊ុនអាកាសចរណ៍ហូឡង់ KLM កាលពីពេលថ្មីៗនេះ បានប្រកាសថាពួកគេ នឹងបន្តជើងហោះហើរ ទៅកាន់ប្រទេសអ៊ីស្រាអែល នៅថ្ងៃទី ១ ខែមេសា។

សមាជិកប្រទេសនាំចេញប្រេង OPEC + បន្ថែមពេលកាត់បន្ថយទិន្នផលប្រេងដល់ត្រីមាសទី២

2024/03/04 10:17:07 pm        219
Facebook Telegram Linkin
សមាជិកអង្គការប្រទេសនាំចេញប្រេង OPEC+ បានប្រកាសកាលពីថ្ងៃអាទិត្យ ពីការបន្ថែមពេលកាត់បន្ថយទិន្នផលប្រេង នៅក្នុងត្រីមាសទីពីរ ដើម្បីគាំទ្រដល់ «ស្ថិរភាព និងតុល្យភាពទីផ្សារប្រេង»។ OPEC+ គឺជាក្រុមប្រទេសផលិតប្រេង ដែលរួមមានប្រទេសជាសមាជិកនៃអង្គការប្រទេសនាំចេញប្រេង (OPEC) និងសម្ព័ន្ធមិត្ត។ អង្គការ OPEC បាននិយាយកាលពីយប់ថ្ងៃអាទិត្យថា ទីស្នាក់ការរបស់ខ្លួន បានកត់សម្គាល់ពីសេចក្តីប្រកាសរបស់បណ្តាប្រទេសអង្គការ OPEC + មួយចំនួន ដែលបានបន្ថែមពេលកាត់បន្ថយដោយស្ម័គ្រចិត្តបន្ថែម សរុបចំនួន ២,២ លានបារ៉ែល ក្នុងមួយថ្ងៃ សម្រាប់ត្រីមាសទី ២ ឆ្នាំ ២០២៤។ ការកាត់បន្ថយនេះគឺយកចេញពីកូតា ដែលត្រូវបានបានអនុម័តនៅក្នុងកិច្ចប្រជុំថ្នាក់រដ្ឋមន្ត្រី អង្គការ OPEC+ នៅក្នុងខែមិថុនា ឆ្នាំ ២០២៣។ កាលពីខែវិច្ឆិកាឆ្នាំមុន ប្រទេសអារ៉ាប៊ីសាអូឌីត រុស្ស៊ី និងប្រទេសមួយចំនួនទៀតរបស់អង្គការ OPEC+ បានប្រកាសកាត់បន្ថយការផលិតដោយស្ម័គ្រចិត្ត ដែលសរុបប្រហែល ២,២លានបារ៉ែលក្នុងមួយថ្ងៃ សម្រាប់ត្រីមាសទីមួយនៃឆ្នាំនេះ។ ក្រសួងថាមពលរបស់ប្រទេសអារ៉ាប៊ីសាអូឌីត បាននិយាយកាលពីថ្ងៃអាទិត្យថា ប្រទេសដែលជាមេដឹកនាំអង្គការ OPEC នឹងបន្តកាត់បន្ថយការផលិតដោយស្ម័គ្រចិត្តរបស់ខ្លួនចំនួន ១ លានបារ៉ែល ក្នុងមួយថ្ងៃ រហូតដល់ចុងខែមិថុនា។ យោងតាមក្រសួងបានឱ្យដឹងថា ការផលិតប្រេងរបស់ប្រទេសនេះ នឹងមានប្រហែល ៩ លានបារ៉ែល ក្នុងមួយថ្ងៃ រហូតដល់ចុងត្រីមាសទីពីរ។ ប្រទេសរុស្ស៊ី ដែលជាសម្ព័ន្ធមិត្តឈានមុខគេរបស់អង្គការ OPEC ក៏បានប្រកាសកាត់បន្ថយដោយស្ម័គ្រចិត្តចំនួន ៤៧១.០០០បារ៉ែលក្នុងមួយថ្ងៃពីការផលិត និងការនាំចេញប្រេងឆៅរបស់ខ្លួនសម្រាប់ទីមាស ទី២ ដែលទាបជាងបន្តិចពីការកាត់បន្ថយចំនួន ៥០០.០០០បារ៉ែលក្នុងមួយថ្ងៃ នៅក្នុងតីមាសទី១។ ប្រទេស OPEC+ ផ្សេងទៀត រួមមានប្រទេសអ៊ីរ៉ាក់ អារ៉ាប់រួម គុយវ៉ែត កាហ្សាក់ស្ថាន អាល់ហ្សេរី និងប្រទេសអូម៉ង់ ក៏បានបន្ថែមពេលការកាត់បន្ថយការផលិតដោយស្ម័គ្រចិត្តរបស់ពួកគេទៅក្នុងត្រីមាសទី២ ផងដែរ។

ក្រុមហ៊ុន SunRice Group ចង់វិនិយោគលើការបង្កើតរោងចក្រកែច្នៃអង្ករ ពិសេសអង្ករសរីរាង្គ នៅកម្ពុជា ដើម្បីនាំចេញទៅកាន់ទីផ្សារក្រៅប្រទេស

2024/03/04 09:55:04 pm        317
Facebook Telegram Linkin
នាព្រឹកថ្ងៃទី០៤ ខែមីនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យ លោក Paul Serra នាយកប្រតិបត្តិក្រុមហ៊ុន SunRice Group ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។ក្នុងជំនួបនេះ លោកនាយកប្រតិបត្តិក្រុមហ៊ុន SunRice Group បានថ្លែងអំណរគុណយ៉ាងជ្រាលជ្រៅចំពោះសម្តេចធិបតី ដែលបានអនុញ្ញាតឱ្យរូបលោក និងសហការី បានចូលជួបសម្តែងការគួរសម និងពិភាក្សាការងារ។ លោកនាយកប្រតិបត្តិបានគោរពជម្រាបជូន សម្ដេចធិបតី ថា ក្រុមហ៊ុន SunRice Group ជាក្រុមហ៊ុនអូស្រ្តាលី ទី១ ដែលបាននាំអង្ករពីកម្ពុជាមកកាន់ប្រទេសអូស្រ្តាលី និងប្រទេសនូវ៉ែលសេឡង់។ ព្រមគ្នានេះដែរ លោកនាយកប្រតិបត្តិបានកត់សម្គាល់ឃើញថា កម្ពុជាមានសក្ដានុពលលើវិស័យកសិកម្ម ដោយអង្ករកម្ពុជាមានកេរ្តិ៍ឈ្មោះល្បីល្បាញលើសកលលោក ហើយកម្ពុជាក៏មានគុណសម្បត្តិប្រកួតប្រជែងខ្ពស់លើកម្លាំងពលកម្មវ័យក្មេង ស្ថិរភាពនៃតម្លៃអគ្គីសនី ជាមួយនឹងហេរដ្ឋារចនាសម្ព័ន្ធដឹកជញ្ជូនប្រទាក់ក្រឡា និងឡូជីស្ទីកល្អប្រសើរផងដែរ។ ផ្អែកលើសក្ដានុពលទាំងនេះ ក្រុមហ៊ុនលោកមានចំណាប់អារម្មណ៍ពង្រឹងនិងពង្រីកទំនាក់ទំនងបន្ថែមទៀតជាមួយកម្ពុជាលើវិស័យកសិកម្ម ដោយផ្តោតលើឧស្សាហកម្មកែច្នៃអង្ករ ក្នុងនោះក្រុមហ៊ុនបង្ហាញនូវបំណងវិនិយោគលើការបង្កើតរោងចក្រកែច្នៃអង្ករ ពិសេសអង្ករសរីរាង្គ សម្រាប់នាំចេញទៅក្រៅប្រទេស។ ជាការឆ្លើយតប សម្តេចធិបតី បានសម្តែងនូវការស្វាគមន៍ ចំពោះបំណងរបស់ក្រុមហ៊ុននៅក្នុងពង្រីកសកម្មភាពវិនិយោគរបស់ខ្លួននៅកម្ពុជាលើឧស្សាហកម្មកែច្នៃអង្ករ សម្រាប់បម្រើឱ្យការនាំចេញ ហើយសម្ដេចធិបតីក៏បានបញ្ជាក់ជូនក្រុមហ៊ុនថា វិស័យកសិកម្ម គឺជាវិស័យអាទិភាពមួយ ដែលរដ្ឋាភិបាលបានយកចិត្តទុកដាក់ ហើយបច្ចុប្បន្ននេះ រាជរដ្ឋាភិបាលបានដាក់ចេញនូវគោលនយោបាយដាក់ពង្រាយមន្ត្រីជំនាញកសិកម្មនៅតាមមូលដ្ឋានឃុំ សង្កាត់ទូទាំងប្រទេស ដើម្បីគាំទ្រដល់ប្រជាកសិករដល់មូលដ្ឋាន លើផ្នែកបច្ចេកទេស សំដៅបង្កើនផលិតភាពផលិតផលកសិកម្មនៅតាមមូលដ្ឋាន។ បន្ថែមពីនេះ សម្ដេចធិបតី ក៏បានបញ្ជាក់ជូនលោកនាយកប្រតិបត្តិក្រុមហ៊ុនអំពីការយកចិត្តទុកដាក់របស់រាជរដ្ឋាភិបាលលើការពង្រីកហេដ្ឋារចនាសម្ព័ន្ធដឹកញ្ជូននិងប្រព័ន្ធឡូជីស្ទីក និងគោលនយោបាយអភិវឌ្ឍន៍វិស័យថាមពលអគ្គិសនីនៅកម្ពុជា ដោយសម្ដេចធិបតីបានសង្កត់ថា រាជរដ្ឋាភិបាល ក៏បាននិងកំពុងផ្ដោតអាទិភាពលើការប្រើប្រាស់ថាមពលស្អាត និងថាមពលកកើតឡើងវិញផងដែរ​ដេីម្បី​គាំទ្រ​ដល់សកម្មភាព​ធុរកិច្ច​ និង​ពាណិជ្ជកម្ម​នៅកម្ពុជាកាន់តែមានសមត្ថភាព​ប្រកួតប្រជែង​ និងផ្តល់ភាពងាយស្រួលក្នុង​ការតភ្ជាប់​ ក៍ដូចជាកាត់ថ្លៃដឹកជញ្ជូន​។ សម្តេច​ធិបតី​ ក៍បាន​លេីក​ទឹកចិត្ត​ឱ្យក្រុមហ៊ុន​ទស្សនកិច្ចនៅកម្ពុជា​ដេីម្បី​​ស្វែងរក​ឱកាស​វិនិយោគ​បន្ថែមទៀត​ ដោយសារ​ជាមួយ​ក្រសួង​ស្ថាប័ន​ពាក់ព័ន្ធ​របស់កម្ពុជា ៕ 

ជំនួបកំពូលអាស៊ាន-អូស្ត្រាលី នឹងទាត់ចោលការគំរាមកំហែង ឬការប្រើប្រាស់កម្លាំងនៅក្នុងតំបន់

2024/03/04 09:49:45 pm        357
Facebook Telegram Linkin
ក្រុមមេដឹកនាំមកពីប្រជាជាតិអាស៊ី-អាគ្នេយ៍ និងអូស្ត្រាលីបានជួបជុំគ្នានៅក្នុងទីក្រុងមែលប៊ន (Melbourne) នៅថ្ងៃចន្ទនេះហើយគេរំពឹងថា នឹងទាត់ចោលការគំរាមកំហែងនិងការប្រើប្រាស់កម្លាំងមកដោះស្រាយជម្លោះក្នុងតំបន់ ទប់ទល់ប្រទេសចិន។ សេចក្ដីថ្លែងការណ៍ពង្រាងរួមគ្នាអាស៊ាន -អូស្ត្រាលី ទទួលបានដោយសារព័ត៌មាន AFP និយាយថាយើងព្យាយាមទប់ទល់បញ្ហាសម្រាប់តំបន់ ជាទីដែលអធិបតេយ្យភាពបូរណភាពទឹកដីត្រូវបានគោរព ។យើងត្រូវព្យាយាមទប់ទល់បញ្ហាសម្រាប់តំបន់ ជាទីដែលការខ្វែងគំនិតគ្នា ត្រូវបានគ្រប់គ្រងតាមរយៈការពិភាក្សាដោយការគោរពគ្នា មិនប្រើការគំរាមកំហែងដាក់គ្នា និងកុំប្រើកម្លាំងបាយ។ ការវាទទីរបស់ក្រុងប៉េកាំងនៅក្នុងសមុទ្រចិនខាងត្បូងគឺជាបញ្ហាសំខាន់ក្នុងការពិភាក្សានៅជំនួបកំពូលរយៈពេល៣ថ្ងៃ។ ជម្លោះដែនដី ក្នុងច្រករបៀងពាណិជកម្មដ៏សំខាន់ បានឡើងកម្ដៅក្នុងរយៈពេលប៉ុន្មានខែថ្មីៗនេះ ខណៈការវាទីរបស់ចិនក្នុងតំបន់មួយចំនួនក៏អះអាងដោយប្រទេសជាសមាជិកអាស៊ានដែរដូចជាហ្វីលីពីន និងវៀតណាម។រដ្ឋមន្ត្រីការបរទេសអូស្ត្រាលី លោកស្រីផេនី វង្ស (Penny Wong) ដែលធ្វើជាម្ចាស់ផ្ទះទទួលរដ្ឋមន្ត្រីការបេររទេស បាននិយាយថា យើងទាំងអស់គ្នា ត្រូវតែទទួលខុសត្រូវចំពោះបញ្ហាក្នុងតំបន់ ដែលយើងចង់បានការចែករំលែក សន្តិភាព ស្ថិរភាព និងភាពរីកចម្រើន។លោកស្រីនិយាយថា ការធ្វើបែបនេះ គឺសំខាន់ជាងការប្រកួតប្រជែងរបស់តំបន់។ វិបត្តិនយោបាយនៅសហភាពមីយ៉ាន់ម៉ា ទំនឹងនឹងក្លាយជារបៀបវារៈសម្រាប់ជំនួបនេះ។ សហភាពមីយ៉ាន់ម៉ា មិនត្រូវបានឲ្យចូលរួម ដោយសារបរាជ័យក្នុងការទប់ស្កាត់អំពើហិង្សាក្នុងប្រទេស ចាប់តាំងពីការដណ្ដើមអំណាចដោយយោធាឆ្នាំ២០២១មក៕

មេបញ្ជាការកងទ័ពស៊ូដង់ ជំរុញឲ្យមានសមាជិកភាពឡើងវិញនៅក្នុងសហភាពអាហ្វ្រិក

2024/03/04 09:45:25 pm        223
Facebook Telegram Linkin
លោក អាប់ដែល ហ្វាតា អាល់ ប៊ឺហាន(Abdel Fattah Al-Burhan) ប្រធានក្រុមប្រឹក្សាអធិបតេយ្យភាពបណ្តោះអាសន្នរបស់ប្រទេសស៊ូដង់ បានបញ្ជាក់កាលពីថ្ងៃអាទិត្យអំពី ទំនុកចិត្តរបស់ប្រទេសស៊ូដង់នៅក្នុងសហភាពអាហ្រ្វិក (AU) ដោយអំពាវនាវឱ្យមានការស្តារឡើងវិញនូវសមាជិកភាពពេញលេញរបស់ប្រទេសស៊ូដង់ នៅក្នុងអង្គការប្រចាំតំបន់នេះ។ លោក Al-Burhan បាននិយាយដូច្នេះ នៅពេលលោកបានទទួលគណៈប្រតិភូ នៃគណៈកម្មការជាន់ខ្ពស់របស់សហភាពអាហ្វ្រិក ស្តីពីដំណោះស្រាយនៃជម្លោះនៅប្រទេសស៊ូដង់ ដែលដឹកនាំដោយ លោក ម៉ូហាម៉េដ អាយបន ចាំប៉ាស(Mohamed Ibn Chambas) នៅទីក្រុង Port Sudan ជារដ្ឋធានីនៅរដ្ឋសមុទ្រក្រហម។ សេចក្តីថ្លែងការណ៍បាននិយាយថា លោក Al-Burhan បានសម្តែងនូវទំនុកចិត្តរបស់ប្រទេសស៊ូដង់ ចំពោះសហភាពអាហ្រ្វិក និងដំណោះស្រាយដែលខ្លួនអាចផ្តល់ឲ្យ ដោយបានផ្តល់ថា ប្រទេសស៊ូដង់ ដោះស្រាយជាមួយអង្គការនេះខណៈជាសមាជិកពេញសិទ្ធិ។ លោក Al-Burhan បញ្ជាក់បន្ថែមទៀតថា មូលដ្ឋាននៃដំណោះស្រាយ គឺស្ថិតនៅក្នុងការដកកងកម្លាំងគាំទ្ររហ័សយោធាប៉ារ៉ា (RSF) ចេញពីទីក្រុង និងភូមិនានា ដែលពួកគេបានចូលកាន់កាប់។ យោងតាមសេចក្តីថ្លែងការណ៍បានឲ្យដឹងថា លោក អាយបន ចាំប៉ាស (Ibn Chambas) បានបញ្ជាក់លើតម្រូវការដើម្បីបញ្ឈប់ជម្លោះ សម្រេចបាននូវស្ថិរភាពសម្រាប់ប្រទេសស៊ូដង់ និងប្រជាជនរបស់ខ្លួន។លោកបាននិយាយពីភាពខ្នះខ្នែងរបស់គណៈកម្មការជាន់ខ្ពស់សហភាពអាហ្វ្រិក និងការខិតខំស្វែងរកដំណោះស្រាយចំពោះវិបត្តិ ប្រទេសស៊ូដង់។ កាលពីថ្ងៃទី ១៧ ខែមករា សហភាពអាហ្វ្រិក បានប្រកាសពីការបង្កើតគណៈកម្មាការកម្រិតខ្ពស់ជុំវិញការដោះស្រាយជម្លោះនៅក្នុងប្រទេសស៊ូដង់។ យោងតាមការប៉ាន់ប្រមាណថ្មីៗ ដែលចេញផ្សាយដោយការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌បានឲ្យដឹងថា ប្រទេសស៊ូដង់ បាននិងកំពុងឃើញការប៉ះទង្គិចគ្នាដ៏ឃោឃៅរវាងកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័ស(RSF) ចាប់តាំងពីថ្ងៃទី ១៥ ខែមេសា ឆ្នាំ ២០២៣។ មនុស្សជាង ១៣.០០០នាក់ ត្រូវបានសម្លាប់ចាប់តាំងពីការប្រយុទ្ធគ្នាបានផ្ទុះឡើង ។

រដ្ឋមន្ត្រីការបរទេសទួរគី បញ្ជាក់ថា ដល់ពេលចាប់ផ្តើមកិច្ចចរចា ដើម្បីបទឈប់បាញ់នៅអ៊ុយក្រែនហើយ

2024/03/04 09:03:46 pm        226
Facebook Telegram Linkin
ទីភ្នាក់ងារព័ត៌មានរ៉យទ័រ បានរាយការណ៍ថា រដ្ឋមន្ត្រីការបរទេសតួកគី លោក Hakan Fidan បានអំពាវនាវឲ្យមានការពិភាក្សាស្តីពីបទឈប់បាញ់នៅអ៊ុយក្រែន ដើម្បីចាប់ផ្តើម បន្ទាប់ពីវេទិកាការទូត នៅទីក្រុង អានតាល់យ៉ា (Antalya) របស់ប្រទេសទួរគី។សារព័ត៌មានរ៉យទ័រ បានរាយការណ៍ថា លោក Fidan បាននិយាយកាលពីថ្ងៃទី៣ ខែមីនា៖«ចំពោះបញ្ហាអ៊ុយក្រែន ទស្សនៈរបស់យើង គឺថាភាគីទាំងពីរ បានឈានដល់ដែនកំណត់នៃអ្វីដែលពួកគេអាចទទួលបានដោយសង្រ្គាម។ យើងគិតថា វាដល់ពេលហើយ ដើម្បីចាប់ផ្ដើមកិច្ចពិភាក្សាមួយសម្រាប់បទឈប់បាញ់»។ លោក Fidan បានជួបជាមួយរដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ (Sergei Lavrov) កាលពីថ្ងៃទី១ ខែមីនា ក្នុងអំឡុងវេទិកានេះ ដោយប្រាប់អ្នកសារព័ត៌មានថា អ្នកទាំងពីរ បានពិភាក្សាគ្នាអំពីបញ្ហាជាច្រើន រួមទាំងសង្គ្រាមនៅអ៊ុយក្រែន នេះបើយោងតាមសារព័ត៌មានរ៉យទ័រ។រដ្ឋមន្ត្រីការបរទេសរូបនេះ បានបន្ថែមថា ការបើកកិច្ចចរចាបទឈប់បាញ់ «មិនមែនមានន័យថា ការទទួលស្គាល់ការកាន់កាប់ (ដោយរុស្ស៊ី)នោះទេ ប៉ុន្តែបញ្ហានៃអធិបតេយ្យភាព និងបទឈប់បាញ់ គួរតែត្រូវបានពិភាក្សាដោយឡែកពីគ្នា»។លោកFidan បានបញ្ជាក់ថា៖«ការស្លាប់ និងរបួសរបស់មនុស្សជាង ៥០០.០០០ នាក់ និងការបំផ្លិចបំផ្លាញទាំងស្រុងនៃហេដ្ឋារចនាសម្ព័ន្ធ និងរចនាសម្ព័ន្ធទំនើបរបស់ប្រទេសទាំងមូល មិនមែនជាការពិតដែលពួកយើងអាចទ្រាំទ្របាននោះទេ»។

ក្រុមហ៊ុនអូស្រ្តាលី ចង់វិនិយោគលើការកែច្នៃដំណាំស្ពៅនៅកម្ពុជា

2024/03/04 08:34:53 pm        364
Facebook Telegram Linkin
នាព្រឹកថ្ងៃទី០៤ ខែមីនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យ លោក Tanachat Pochana ប្រធានក្រុមហ៊ុន Enserv Holding Australia ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។ក្នុងឱកាសនៃជំនួប លោកប្រធានក្រុមហ៊ុន បានថ្លែងអំណរគុណចំពោះ សម្តេចធិបតី ដែលបានឆ្លៀតពេលដ៏មមាញឹកអនុញ្ញាតឱ្យរូបលោក និងសហការី បានចូលជួបសម្តែងការគួរសម និងពិភាក្សាការងារ ព្រមទាំងបានគោរពជម្រាបជូន សម្ដេចធិបតី អំពីសកម្មភាពអាជីវកម្មរបស់ ក្រុមហ៊ុន ដែលផ្ដោតលើការដាំដុះដំណាំស្ពៅ (Sorghum) ដែលក្រុមហ៊ុនមានសមត្ថភាពកែច្នៃដំណាំនេះទៅជាអង្ករមានកាឡូរីទាបតែមានប្រូតេអ៊ីនខ្ពស់ និងអាចកែច្នៃយកទៅប្រើប្រាស់ទៅជាជីវៈឧស្ម័ន្ម (Biogas)។ ជាងនេះទៅទៀត លោកប្រធានក្រុមហ៊ុនបានគោរពជម្រាបជូនសម្ដេចធិបតីបន្ថែមទៀតថា ដំណាំស្ពៅ (Sorghum) នេះគឺជាដំណាំដែលផ្តល់ទិន្នផលខ្ពស់ មិនរើសប្រភេទដី និងមិនត្រូវការទឹកច្រើនដូចដំណាំស្រូវ ហើយក៏អាចរួមចំណែក ក្នុងការស្រូបយកឧស្ម័នកាបូនិកពីបរិយាកាសផងដែរ។ លោកប្រធានក្រុមហ៊ុន បន្ថែមទៀតថា ដោយពិនិត្យឃើញអំពីសក្ដានុពលនៃវិស័យកសិកម្ម និងស្ថានភាពដីកសិកម្មនៅកម្ពុជាដែលមានលក្ខណៈអំណោយផលទៅលើប្រភេទដំណាំនេះ លោកប្រធានក្រុមហ៊ុន បានបង្ហាញពីបំណងរបស់ក្រុមហ៊ុនក្នុងការស្វែងរកឱកាស វិនិយោគលើដំណាំនេះនៅកម្ពុជា ដើម្បីកែច្នៃទៅជាផលិតផលសម្រេចសម្រាប់នាំចេញទៅក្រៅប្រទេស។ជាការឆ្លើយតប សម្តេចធិបតី បានសម្តែងនូវការស្វាគមន៍ និងរីករាយដែលបានជួបពិភាក្សាការងារជាមួយលោកប្រធានក្រុមហ៊ុន និងបានបញ្ជាក់ផងដែរថា ដូចនីតិកាលមុនៗដែរ គោលបំណងសំខាន់របស់រាជរដ្ឋាភិបាលកម្ពុជាក្នុងអាណត្តិទី៧នេះ គឺបង្កើននូវប្រាក់ចំណូលសម្រាប់ប្រជាពលរដ្ឋ ហើយរាជរដ្ឋាភិបាលបានដាក់ចេញនូវគោលនយោបាយអភិវឌ្ឍន៍វិស័យកសិកម្មនៅកម្ពុជាបន្ថែមទៀត តាមរយៈការប្រើប្រាស់នូវបច្ចេកវិទ្យាទំនើបៗ ដើម្បីជួយជំរុញដល់វិស័យកសិកម្មនៅកម្ពុជា។ ទន្ទឹមនឹងនោះ សម្ដេចធិបតី ក៏បានបញ្ចាក់ផងដែរថារាជរដ្ឋាភិបាលក៏បានយកចិត្តទុកដាក់ក្នុងការអភិវឌ្ឍវិស័យថាមពលអគ្គិសនី ដូច្នេះការប្រេីប្រាស់បច្ចេកវិទ្យាទំនេីប​ និងថ្មីដេីម្បីផលិតថាមពលអគ្គិសនី​ គឺជាផ្នែកមួយស្របទៅនឹងគោលនយោបាយរបស់រាជរដ្ឋាភិបាលក្នុងការអភិវឌ្ឍវិស័យថាមពល ដោយផ្ដោតទៅលើថាមពលស្អាត។ រាជរដ្ឋាភិបាលក៏បានសម្រេចបញ្ឈប់ការផ្តល់ការអនុញ្ញាតឱ្យបង្កេីតនូវរោងចក្រដំណើរការដោយថាមពលធ្យូងថ្មថ្មីបន្ថែបទៀត​ ផងដែរ។ ដូច្នេះការអភិវឌ្ឍវិស័យថាមពលតាមរយៈការប្រើប្រាស់នូវបច្ចេកវិទ្យាថ្មីៗ និងទំនើប ដើម្បីបង្កើតថាមពលស្អាតនេះ គឺជាផ្នែកមួយនៃគោលនយោបាយរបស់រាជរដ្ឋាភិបាលកម្ពុជាក្នុងការធ្វើ បរិវត្តកម្មថាមពលនៅកម្ពុជា។ បន្ថែមពីនេះ ឆ្លេីយតបទៅនឹងបំណង​វិនិយោគរបស់ក្រុមហ៊ុន​ សម្ដេចធិបតី បានលើកទឹកចិត្តឱ្យក្រុមហ៊ុនបំពេញទស្សនកិច្ចនៅកម្ពុជា ដើម្បីពិនិត្យលទ្ធភាពក្នុងការស្វែងរកឱកាសវិនិយោគនៅក្នុងព្រះរាជាណាចក្រកម្ពុជា ដោយសហការជាមួយក្រសួងស្ថាប័នពាក់ព័ន្ធ ជាពិសេសក្រសួងកសិកម្ម រុក្ខាប្រមាញ់ និងនេសាទ តាមរយៈការសម្របសម្រួលរបស់ក្រុមប្រឹក្សាអភិវឌ្ឍន៍កម្ពុជា និងក្រសួងពាណិជ្ជកម្ម ៕

បណ្ដាញសង្គម

ព័ត៌មានថ្មីៗ

យុវជនដែលចង់បំពេញកាតព្វកិច្ចយោធាអាចទទួលពាក្យស្នើសុំនៅមូលដ្ឋានកងរាជអាវុធក្រុង ស្រុក និងខណ្ឌចាប់ពីថ្ងៃទី១ ខែតុលាខាងនេះតទៅ
09/27/2026 12:09 PM
Facebook Telegram Linkin
ក្រសួងបរិស្ថានអំពាវនាវឱ្យប្រជាពលរដ្ឋចូលរួម ទុកដាក់សំរាមឱ្យបានត្រឹមត្រូវ និង​កាត់​បន្ថយ​ការ​ប្រើ​ប្រាស់​ថង់​ប្លាស្ទិក ក្នុងឱកាសពិធីបុណ្យកាន់បិណ្ឌ ភ្ជុំបិណ្ឌ
09/27/2026 12:09 PM
Facebook Telegram Linkin
សម្តេច ម៉ែន សំអន ថ្លែងអំណរគុណក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលបានចុះពិនិត្យ ព្យាបាលជំងឺ និងផ្តល់ការអប់រំសុខភាព ជូនប្រជាពលរដ្ឋដោយឥតគិតថ្លៃជូនប្រជាពលរដ្ឋ ក្នុងខេត្តស្វាយរៀង
09/27/2026 12:09 PM
Facebook Telegram Linkin
លោក Trump បដិសេធសំណើរបស់អ៊ីរ៉ង់ ក្នុងការបើកច្រកសមុទ្រ Hormuz និងបញ្ចប់ការប្រយុទ្ធគ្នា
09/27/2026 11:09 AM
Facebook Telegram Linkin
ភ្លៀងធ្លាក់ខ្លាំង និងទឹកជំនន់ នៅទីក្រុងបាងកក ជំរុញ​ឱ្យ​ជម្លៀសប្រជាជន ខណៈ​មាន​អ្នក​ស្លាប់ ២នាក់​
09/27/2026 11:09 AM
Facebook Telegram Linkin
ប្រមុខការទូតកម្ពុជាប្រាប់មហាសន្និបាត UN អំពី​កិច្ចខិតខំ​ប្រឹងប្រែង​របស់​កម្ពុជា​ក្នុង​ការ​ប្រយុទ្ធ​ប្រឆាំង​ការ​ឆបោកតាមប្រព័ន្ធបច្ចេកវិទ្យាដែលជាអាទិភាពដ៏សំខាន់បំផុត
09/27/2026 11:09 AM
Facebook Telegram Linkin
ប្រមុខការទូតកម្ពុជាប្រាប់មហាសន្និបាត UN ថា កម្ពុជាជ្រើសយកយន្តការផ្សះផ្សា​ដោយបង្ខំ​ក្រោម​អនុសញ្ញា UNCLOS ដើម្បីការពារអធិបតេយ្យ និងសិទ្ធិលើដែនសមុទ្រ​ស្រប​តាម​ច្បាប់​អន្តរជាតិ
09/27/2026 10:09 AM
Facebook Telegram Linkin
ប្រមុខការទូតកម្ពុជាប្រាប់មហាសន្និបាត UN ថា ជម្លោះកម្ពុជា-ថៃធ្វើ​ឱ្យ​ប៉ះពាល់​យ៉ាង​ធ្ងន់ធ្ងរ​ដល់​ជំនឿ​ទុក​ចិត្តរវាងប្រទេសទាំងពីរ ខណៈសម្រាប់​កម្ពុជា​ការ​ស្តារទំនុក​ចិត្ត​ឡើង​វិញ​ត្រូវ​តែ​ផ្អែក​លើ​ការ​ប្តេជ្ញា​ចិត្ត​ជាក់ស្តែង
09/27/2026 10:09 AM
Facebook Telegram Linkin
រដ្ឋមន្ត្រីការបរទេសកម្ពុជា-នីហ្សេ ចុះហត្ថ​លេខា​លើ​កិច្ច​ព្រមព្រៀង​ស្តីពី​ការ​បង្កើត​ទំនាក់​ទំនង​ការ​ទូត​រវាងប្រទេសទាំងពីរ
09/27/2026 10:09 AM
Facebook Telegram Linkin
ក្រោយមានបទបញ្ជារបស់សម្តេចធិបតី នាយករដ្ឋមន្រ្តី កងពលតូចដឹកជញ្ជូនលេខ៩៩ បាន​ត្រៀម​កម្លាំង និងសម្ភារៈ​រួច​ជា​ស្រេច២៤ម៉ោងលើ២៤ម៉ោង ដើ​ម្បី​ចុះ​អន្តរាគមន៍​ពលរដ្ឋ​រង​គ្រោះដោយទឹកជំនន់
09/27/2026 10:09 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.