BTV NEWS

ការធ្វើបច្ចុប្បន្នភាព NFIS ដើម្បីធានាដល់គ្រួសារ និងអាជីវកម្មឱ្យទទួលបានសេវាហិរញ្ញវត្ថុសមស្រប

ការដោះដូរពាណិជ្ជកម្មជាមួយ RCEP មានទឹកប្រាក់សរុបជាង ១១ពាន់លានដុល្លារ កើនជាង ១៨%

គណៈកម្មាធិការវិនិយោគ ពិនិត្យសំណើសុំចុះបញ្ជីចំនួនគម្រោងវិនិយោគចំនួន ៨ មានទុន ៤៩០លានដុល្លារ

ក្នុងត្រីមាសទី១ ឆ្នាំ២០២៦ កម្ពុជានាំចេញមុខទំនិញស្ទើរគ្រប់ប្រភេទមានកំណើនកើនឡើងល្អប្រសើរ

សេដ្ឋកិច្ច និង កសិកម្ម

កម្មករកាត់ដេរ ចង់បានការដំឡើងប្រាក់ខែជាង២០០ដុល្លារ ដើម្បីទប់នឹងអតិផរណា និងចំណាយផ្សេងៗ

ភ្នំពេញ៖ កម្មករ កម្មការិនីវិស័យកាត់ដេរ បានសាទរទៅនឹងតួលេខប្រាក់ឈ្នួលដែលស្នើដំឡើងដោយភាគីសហជីប ២១ដុល្លារបន្ថែម សម្រាប់ប្រាក់ឈ្នួលអតិប្បរមាឆ្នាំ២០២៣ ដោយបញ្ជាក់ថា ការដំឡើងប្រាក់ឈ្នួលនេះ នឹងឆ្លើយតបនិងការកើនឡើងនៃអតិផរណាតម្លៃមុខទំនិញ ចំណាយផ្សេងៗ និងលើកកម្ពស់ជីវភាពរស់នៅរបស់កម្មករកម្មការិនីរោងចក្រ។កម្មករ កម្មការិនីរោងចក្រកាត់ដេរសំលៀកបំពាក់ ខ្វាន់ទុម ខ្លូស៊ីង (ខេមបូឌា) លីមីធីត ស្ថិតនៅផ្លូវវេងស្រេង សង្កាត់ចោមចៅ ខ័ណ្ឌពោធិ៍សែន រាជធានីភ្នំពេញ បានលើកឡើងថា ការទាមទារចង់បានប្រាក់ឈ្នួលកើនដល់ជាង ២០០ដុល្លារ ក្នុង១ខែ ដើម្បីទប់ទល់នឹងការចំណាយប្រចាំថ្ងៃ និងទំនិញគ្រប់ប្រភេទឡើងថ្លៃដូចគ្នា ដែលធ្វើឲ្យការចាយវាយរបស់ពួកគាត់ត្រូវត្បិតត្បៀត។ពួកគាត់ បានលើកឡើងស្រដៀងគ្នាទៀតថា ប្រាក់ឈ្នួលអប្បបរមា យ៉ាងហោចណាស់ក៏គួរកើនលើសជាង ២០០ដុល្លារដែរ ដើម្បីឲ្យងាយស្រួលផ្គត់ផ្គង់ក្នុងការចំណាយនានា និងគ្រាន់សល់ប្រាក់កាក់ខ្លះ ដើម្បីដោះបំណុល និងផ្ញើរទៅសាច់ញាតិរស់នៅស្រុកកំណើត។ក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាអាណត្តិទី២ ឆ្នាំទី២ នៅរសៀលថ្ងៃទី២៤ សីហា ឆ្នាំ២០២២ គីសហជីពស្នើដំឡើងចំនួន ២១ដុល្លារ ។ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា បានលើកឡើងថា ឆ្លងកាត់ការពិភាក្សា និងប្រជុំផ្ទៃរបស់ក្រុមសហជីព បានសម្រេចឯកភាពគ្នាទាមទារដំឡើងប្រាក់ឈ្នួលអប្បបរមាដល់កម្មករនិយោជិតចំនួន ២១៥ដុល្លារ ដោយយោងទៅកត្តាអតិផរណា កត្តាផលិតភាព និងកត្តាប្រាក់ចំណេញថ្នាក់វិស័យក៏កើនឡើងដូចគ្នា ។ក្រសួងការងារ និងបណ្ដុះបណ្ដាលវិជ្ជាជីវៈ រៀបចំកិច្ចប្រជុំត្រីភាគីចំនួន ៦ ដងទៀត ដើម្បីពិភាក្សាទៅលើប្រាក់ឈ្នួលក្នុងវិស័យកាត់ដេរ ដោយបានកំណត់យកថ្ងៃទី ២៣ ខែកញ្ញា ជាថ្ងៃកំណត់ចុងក្រោយ ដែលត្រូវប្រកាសប្រាក់ឈ្នួលគោលក្នុងវិស័យកាត់ដេរ សម្រាប់កម្មករនៅឆ្នាំ ២០២៣។ ក្នុងឆ្នាំ២០២២នេះ កម្មករនិយោជិតដែលបំពេញការក្នុងវិស័យឧស្សាហកម្មកាត់ដេរមានចំនួន ១៩៤ ដុល្លារអាម៉េរិក។ បូកទាំងប្រាក់ឈ្នួលអប្បបរមា ប្រាក់ថែមម៉ោងការងារ និងប្រាក់ឧបត្ថម្ភផ្សេងៗទៀត កម្មករនិយោជិតម្នាក់ អាចទទួលប្រាក់ខែចន្លោះ ២៥០ ទៅ ៣០០ដុល្លារ នៅក្នុងមួយខែ៕អត្ថបទ៖ ឈិត បូរ៉ាវី

កម្ពុជា-ចិនពិភាក្សាគ្នាជំរុញការនាំចេញផលិតផលកសិកម្មច្រើនថែមទៀតទៅប្រទេសចិន

ភ្នំពេញ៖ ប្រទេសកម្ពុជា និងប្រទេសចិន បានជួបពិភាក្សាគ្នា ដើម្បីស្វែងយល់ពីកាលានុវត្តភាព និងបញ្ហាប្រឈមនានាក្នុងវិស័យកសិកម្មកម្ពុជា ដើម្បីបង្កើនការនាំចេញផលិតផលកសិកម្មកម្ពុជាទៅទីផ្សារប្រទេសចិនឱ្យបានកាន់តែច្រើនថែមទៀត។នេះជាការលើកឡើង ក្នុងកិច្ចប្រជុំមួយរវាង ឯកឧត្តម ប៊ុន ចន្ធី អនុរដ្ឋលេខាធិការក្រសួងពាណិជ្ជកម្ម និងលោក ZHANG Lubiao អគ្គនាយកនៃមជ្ឈមណ្ឌលសហប្រតិបត្តិការសេដ្ឋកិច្ចក្រៅប្រទេសនៃក្រសួងកសិកម្ម និងកិច្ចការជនបទចិន នៅថ្ងៃទី ២២ ខែសីហា នៅទីស្ដីការក្រសួងពាណិជ្ជកម្ម ។យោងតាមក្រសួងពាណិជ្ជកម្ម ចំណុចសំខាន់ៗចំនួន ៣ ត្រូវបានលើកមកពិភាក្សាក្នុងពេលនោះរួមមាន ការសិក្សាបន្ថែមអំពីស្ថានភាពនៃពាណិជ្ជកម្មនាំចេញ-ចូល ផលិតផលកសិកម្ម និងទីផ្សារផលិតផលកសិកម្មក្នុងស្រុក, ការសិក្សាបន្ថែមអំពីគោលនយោបាយ និងផែនការគាំទ្រការអភិវឌ្ឍវិស័យកសិកម្ម, និងការប្រឹក្សាយោបល់នានាលើគម្រោងផែនការអភិវឌ្ឍន៍វិស័យកសិកម្មសម្រាប់ជាធាតុចូលក្នុងការរៀបចំផែនការទំនើបកម្មវិស័យកសិកម្មកម្ពុជា-ចិនឱ្យចំគោលដៅ សំដៅអភិវឌ្ឍន៍វិស័យកសិកម្មកម្ពុជា និងជំរុញការនាំចេញផលិតផលកសិកម្មកម្ពុជាទៅទីផ្សារអន្តរជាតិ ជាពិសេសទីផ្សារប្រទេសចិន។ឯកឧត្តម ប៊ុន ចន្ធី បានលើកឡើងថា សេដ្ឋកិច្ច និងការធ្វើពាណិជ្ជកម្មជាលក្ខណៈអន្តរជាតិរបស់កម្ពុជា កំពុងមានដំណើរការល្អជាលំដាប់ ហើយច្បាប់វិនិយោគថ្មីរបស់កម្ពុជាក៏មានភាពល្អប្រសើរផងដែរ។ បច្ចុប្បន្នកម្ពុជាមានផលិតផលកសិកម្មសក្ដានុពលជាច្រើនសម្រាប់នាំចេញទៅទីផ្សារចិន មានដូចជាចេក ស្វាយ អង្ករ ពោត ដំឡូងមី និងស្វាយចន្ទី ជាដើម។លោក ZHANG Lubiao បាននិយាយថា គោលបំណងនៃដំណើរបេសកកម្មរបស់លោក គឺផ្តោតសំខាន់លើការស្វែងយល់បន្ថែមអំពីកាលានុវត្តភាព និងបញ្ហាប្រឈមក្នុងវិស័យកសិកម្មរបស់កម្ពុជា ដើម្បីជាមូលដ្ឋានក្នុងការរៀបចំផែនការធ្វើទំនើបកម្មកសិកម្មកម្ពុជា-ចិន ក៏ដូចជាដើម្បីបង្កើនការនាំចេញផលិតផលកសិកម្មកម្ពុជាទៅទីផ្សារអន្តរជាតិ និងប្រទេសចិន។លោក បន្ថែមទៀតថា ដើម្បីជំរុញឱ្យសកម្មភាពពាណិជ្ជកម្មកម្ពុជា-ចិន កាន់តែល្អបន្ថែមទៀត កម្ពុជាគួរពិចារណាចំពោះការបង្កើតក្រុមការងារអន្តរក្រសួងសម្រាប់វិស័យកសិកម្ម, ការរៀបចំឱ្យមានក្រុមការងារប្រចាំនៅស្ថានទូតកម្ពុជាដើម្បីដោះស្រាយបញ្ហាពាក់ព័ន្ធនឹងវិស័យកសិកម្មជាមួយភាគីចិនបានទាន់ពេលវេលា, ការធ្វើឱ្យប្រសើរឡើងខ្សែច្រវាក់ផ្គត់ផ្គង់ និងការបង្កើតឱ្យមានតំបន់អនុគ្រោះពន្ធជាដើម។ ទិន្នន័យអគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ពាណិជ្ជកម្មទ្វេភាគីកម្ពុជា-ចិន ក្នុងរយៈពេល ៧ ខែដំបូង ឆ្នាំ ២០២២ មានទឹកប្រាក់សរុប ៦ ៩៧១ លានដុល្លារ កើនឡើង ១៥.៥ ភាគរយបើធៀបរយៈពេលដូចគ្នាឆ្នាំ ២០២១។ ក្នុងនោះកម្ពុជានាំចេញទំនិញក្នុងទឹកប្រាក់ ៧០១,១៩ លានដុល្លារ ធ្លាក់ចុះ ១៥ ភាគរយ និងការនាំទំនិញពីចិនមកកម្ពុជា មានទឹកប្រាក់ ៦ ២៧០ លានដុល្លារ កើនឡើង ២០.៤ ភាគរយ៕ អត្ថបទ៖ វណ្ណៈ

ក្រសួងការងារបន្តកិច្ចប្រជុំជាលើកទី២ ដើម្បីពិភាក្សាលើប្រាក់ឈ្នួលកម្មករឆ្នាំ២០២៣

ភ្នំពេញ៖ ក្រសួងការងារនិងបណ្តុះបណ្តាលវិជ្ជាជីវៈ នៅព្រឹកថ្ងៃទី២៤ ខែសីហា ឆ្នាំ២០២២នេះ បានបើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាអាណត្តិទី២ ឆ្នាំទី២ ដើម្បីប្រមូលទិន្នន័យ និងព័ត៌មានពីគ្រប់ភាគីពាក់ព័ន្ធដើម្បីធ្វើជាមូលដ្ឋានសម្រាប់ពិភាក្សាស្វែងរកយន្តការឯកភាពមួយ ដែលនឹងលើកយកទៅពិភាក្សាគ្នានៅពេលក្រោយទៀត។កិច្ចប្រជុំពិភាក្សាអំពីប្រាក់ឈ្នួលអប្បបរមា ជូនកម្មករនិយោជិតក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៣ នៅថ្ងៃនេះ ដឹកនាំដោយឯកឧត្តម ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងសមាជិកក្រុមប្រឹក្សាជាតិប្រាក់ឈ្នួលអប្បបរមាដោយមានការចូលរួមជាត្រីភាគី (មួយក្រុមមាន១៧នាក់) រួមមាន ភាគីរដ្ឋាភិបាល ភាគីសហជីពតំណាងកម្មករនិយោជិត និងភាគីនិយោជក។សូមបញ្ជាក់ថា គិតចាប់ពីឆ្នាំ១៩៩៧ កម្មករនិយោជិតដែលបំពេញការក្នុងវិស័យឧស្សាហកម្មកាត់ដេរមានចំនួន ៤៥ដុល្លារអាម៉េរិក និងកើនឡើងជាបន្តបន្ទាប់រហូតដល់ចំនួន ១៩៤ដុល្លារអាម៉េរិក ក្នុងមួយខែ នៅក្នុងឆ្នាំ ២០២១។ គិតជាមធ្យម បូកទាំងប្រាក់ឈ្នួលអប្បបរមា ប្រាក់ថែមម៉ោងការងារ និងប្រាក់ឧបត្ថម្ភផ្សេងៗទៀត កម្មករនិយោជិតក្នុងមួយនាក់ អាចទទួលប្រាក់ខែចន្លោះ ២៥០ទៅ៣០០ដុល្លារ ឬឈានដល់៣៥០ដុល្លារ នៅក្នុងមួយខែៗ។ គិតត្រឹមខែកក្កដា ឆ្នាំ២០២២ បច្ចុប្បន្ន កម្ពុជា មានសហគ្រាស គ្រឹះស្ថាន វិស័យកាត់ដេរ និងផលិតស្បែកជើងចំនួន ១ ១៨២ ដែលស្មើនឹងកម្មករនិយោជិតសរុបចំនួនជាង ៨៣ម៉ឺននាក់៕អត្ថបទ បូរ៉ាវី

ផែនការអភិវឌ្ឍវិស័យថាមពលនឹងដាក់ចេញឆាប់ៗ ដើម្បីឆ្លើយតបតម្រូវការប្រើប្រាស់ និងការអភិវឌ្ឍ

ភ្នំពេញ៖ ក្រសួងរ៉ែ និងថាមពល កំពុងពន្លឿនរៀបចំផែនការអភិវឌ្ឍវិស័យថាមពលរយៈពេលវែង ឆ្នាំ ២០២១-២០៤០ ដោយគ្រោងដាក់ចេញនៅចុងឆ្នាំនេះ ដើម្បីដោះស្រាយនូវសេចក្តីត្រូវការ ជាពិសេសការជម្រុញប្រើប្រាស់អគ្គិសនីឲ្យដើរស្របតាមផែនការអភិវឌ្ឍសេដ្ឋកិច្ច-សង្គម។ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល លើកឡើងពីផែនការនេះនៅក្នុងជំនួបពិភាក្សាការងារជាមួយលោកជំទាវ ជោតសាណា វ៉ាម៉ា (Jyotsana Varma) នាយិកា ADB ប្រចាំកម្ពុជា នៅថ្ងៃទី ២៣ ខែ សីហា ឆ្នាំ ២០២២។ឯកឧត្តមរដ្ឋមន្រ្តី បន្តថា ស្ថិតនៅក្នុងស្ថានភាពនៃការរីករាលដាលជំងឺរាតត្បាតកូវីដ ១៩ ចំពោះកិច្ចសហប្រតិបត្តិការជាដៃគូរ លើការរៀបចំនូវផែនការអភិឌ្ឍវិស័យថាមពលសម្រាប់រយៈពេលវែង ឆ្នាំ ២០២១-២០៤០ សម្រាប់ការផលិត ការបញ្ជូន និងការចែកចាយនៅក្នុងក្របខណ្ឌអគ្គិសនីនៅទូទាំងប្រទេស ក្រសួង និងADB បន្តការសហការល្អ សម្រាប់គម្រោងនេះ ដើម្បីដោះស្រាយនូវសេចក្តីត្រូវការ សម្រាប់ការប្រើប្រាស់អគ្គិសនីនៅកម្ពុជា។ ចំពោះការងារសហប្រតិបត្តិការរវាង ADB នៅក្នុងវិស័យថាមពល ជាពិសេសក្រសួងរ៉ែ និងថាមពល មានរយៈពេលជាច្រើនមកហើយ ក្នុងនោះ ADB តែងតែដើរតួជាដៃគូរ នៅក្នុងការអភិវឌ្ឍវិស័យថាមពល រហូតទទួលបានលទ្ធផលជាផ្លែផ្កាមកដល់សព្វថ្ងៃ។ក្នុងជំនួបនេះ, លោកជំទាវ ជោតសានា វ៉ាម៉ា (Jyotsana Varma) ថ្លែងថា ការអភិវឌ្ឍន៍វិស័យថាមពលគឺជាកត្តាសំខាន់ ដែលទាមទារឲ្យមានការរៀបចំផែនការអភិវឌ្ឍលើវិស័យនេះឲ្យបានច្បាស់លាស់ ក្នុងនោះ ADB គឺជាដៃគូរសហការជាមួយក្រសួងរ៉ែ និងថាមពល ក្រៅពីនេះADBនៅមានតួអង្គពីរផ្សេងទៀត គឺអាជ្ញាធរអគ្គិសនីកម្ពុជា និងក្រុមហ៊ុនអគ្គិសនីកម្ពុជា ដើម្បីរួមគ្នារៀបចំការងារទាំងពីរនេះឲ្យចេញជាលទ្ធផលផ្លែផ្កា សម្រាប់ការអភិវឌ្ឍវិស័យថាមពលនៅព្រះរាជាណាចក្រកម្ពុជាឲ្យប្រកបដោយប្រសិទ្ធភាព៕អត្ថបទ៖ សុន រ៉ាឌី

កម្ពុជាទទួលបានវិនិយោគលើវិស័យសំណង់មានទុនសរុប ៣១ ៤៨៤ លានដុល្លារអាម៉េរិក

ភ្នំពេញ៖ ក្នុងរយៈពេល ៥ឆ្នាំចុងក្រោយនេះ កម្ពុជាទទួលបានការវិនិយោគលើវិស័យសំណង់ មានចំនួនប្រមាណជាង ១៩ ពាន់គម្រោង លើផ្ទៃក្រឡាសំណង់ជាង ៧១ លានម៉ែត្រការ៉េ និងមានទុនវិនិយោគលើវិស័យនេះប្រមាណជា ៣១ ៤៨៤ លានដុល្លារអាម៉េរិក ។ក្រសួងរៀបចំដែនដី នគរូបនីយកម្ម និងសំណង់ បានបង្ហាញរបាយការណ៍ អំពីសមិទ្ធផលសម្រេចបានរយៈពេល ៥ឆ្នាំ កន្លងមក នៅក្នុងវិស័យសំណង់ ក្នុងនោះការអភិវឌ្ឍ និងវិនិយោគក្នុងវិស័យសំណង់ទាំងក្នុងស្រុក និងពីក្រៅប្រទេស មានសន្ទុះខ្លាំងក្លា និងបានរួមចំណែកដ៏សំខាន់ក្នុងការជំរុញកំណើនសេដ្ឋកិច្ចជាតិ។ ជាក់ស្តែងក្នុងរយៈពេល ៥ ឆ្នាំចុងក្រោយ ការវិនិយោគក្នុងវិស័យសំណង់សម្រេចបាន ១៩ ៣២២ គម្រោង លើផ្ទៃក្រឡាសំណង់ជាង ៧១ លានម៉ែត្រការ៉េ និងមានទុនវិនិយោគក្នុងទំហំទឹកប្រាក់ប្រមាណ ៣១ ៤៨៤ លានដុល្លារអាម៉េរិក ក្នុងនោះនៅក្នុងរយៈពេល ៦ ខែ ឆ្នាំ២០២២ ការវិនិយោគលើវិស័យនេះ មានចំនួន ២ ០០០ គម្រោង លើផ្ទៃក្រឡាសំណង់ប្រមាណជាង ២,៨ លានម៉ែត្រការ៉េ និងមានទុនវិនិយោគ ១ ២០៦ លានដុល្លារអាមេរិក។ជុំវិញការអភិវឌ្ឍន៍វិស័យសំណង់នេះ បើគិតពីចាប់ផ្តើមអនុវត្តឆ្នាំ ២០០០ ដល់រយៈពេល ៦ ខែ ឆ្នាំ២០២២ ក្រសួងរៀបចំដែនដី នគរូបនីយកម្ម និងសំណង់ បានចេញលិខិតអនុញ្ញាតសាងសង់នៅទូទាំងប្រទេសចំនួនជាង ៥៧ ពាន់គម្រោង លើផ្ទៃក្រឡាសំណង់សរុបចំនួនជាង ១៦៦ លានម៉ែត្រការ៉េ និងមានទុនវិនិយោគសរុបប្រមាណ ៦៦ ២០៥ លានដុល្លារអាម៉េរិក ក្នុងនោះការអភិវឌ្ឍគម្រោងអគារខ្ពស់ៗ ចាប់ពី៥ជាន់ឡើង នៅទូទាំងប្រទេស មានចំនួន ២ ៤៧២ អគារ គម្រោងបុរីលំនៅឋាន និងបណ្តុំលំនៅឋាន មានលក្ខណៈជាបុរីមានចំនួន ៤៨២ គម្រោង។ចំណែកការផ្ដល់វិញ្ញាបនបត្រប្រកបវិជ្ជាជីវៈសិក្សាគម្រោងប្លង់ដល់អ្នកវិជ្ជាជីវៈ ក្រសួងរៀបចំដែនដី នគរូបនីយកម្ម និងសំណង់ បានចេញវិញ្ញាបនបត្រជូនដល់អ្នកប្រកបវិជ្ជាជីវៈ មានចំនួន ៥៤២រូប ក្នុងនោះមានស្ថាបត្យករ ២៧០ រូប (សញ្ជាតិបរទេស ៥ រូប) និងវិស្វករ ២៧២រូប (វិស្វករសញ្ជាតិបរទេស ៦រូប) និងបានផ្តល់អាជ្ញាបណ្ណត្រួតពិនិត្យនិងបញ្ជាក់សំណង់ ចំនួន ៣ ក្រុមហ៊ុន។សូមបញ្ជាក់ថា ពាក់ព័ន្ធវិស័យសេវាកម្ម នៅក្នុងឆមាសទី ១ ក្រសួងសេដ្ឋកិច្ច និងហិរញ្ញវត្ថុ បានប៉ាន់ស្មានថា នឹងសម្រេចបានកំណើនក្នុងអត្រា ៤,៣% ក្នុងនោះអនុវិស័យអចលនទ្រព្យ ត្រូវបានប៉ាន់ស្មានថា នឹងបន្តនិន្នាការកើនឡើង ប៉ុន្តែក្នុងល្បឿនយឺត ក្នុងអត្រា ២,៥% ដោយសារការបន្តថមថយសកម្មភាពទិញ-លក់អចលនទ្រព្យថ្លៃខ្ពស់ ពិសេសខុនដូ និងអាផាតមិន ខណៈដែលសកម្មភាពទិញ-លក់/ជួលអចលនទ្រព្យថ្លៃទាប និងមធ្យម ជាពិសេសលំនៅឋាន រំពឹងថា នឹងបន្តសកម្មភាព៕ អត្ថបទ៖ សុន រ៉ាឌី

សិប្បករ និងមន្ត្រីជំនាញពាក់ព័ន្ធ កំពុងប្រឹងប្រែងជំរុញទីផ្សារនាំចេញទឹកត្រីកំពត

ភ្នំពេញ៖ សិប្បករ និងមន្ត្រីជំនាញពាក់ព័ន្ធកំពុងប្រឹងប្រែងសម្របសម្រួល នាំចេញទឹកត្រីកំពត ដោយសារទឹកត្រីកំពតត្រូវបានទទួលស្គាល់ទាំងគុណភាព និងស្តងដារនៃការផលិតវេចខ្ចប់ទាំងថ្នាក់ជាតិ និងអន្តរជាតិ ។លោក ចាន់ ស៊ីថា អគ្គនាយកក្រុមហ៊ុន អ៊ីឆេ ង៉ូវហេង ហ្វូដប្រូដាកសិន អូហ្វកំពត បានប្រាប់ឲ្យដឹងថា ទឹកត្រីកំពតផលិតឡើងតាមលក្ខណៈប្រពៃណីតពីដូនតា រាប់ជំនាន់មកហើយ។ វត្ថុធាតុផ្សំ និងឧបករណ៍ផលិតទឹកត្រីកំពត មានដូចជា៖ ត្រីកាកឺមសមុទ្រ អំបិលកំពត និងធុងឈើបុរាណសម្រាប់ធ្វើរំហួតដោយប្រើរយៈពេលមួយឆ្នាំពេញ ដែលជួយដល់ភាពងំឈ្ងុយរបស់ទឹកត្រី និងមានកម្រិតប្រូតេអ៊ីនខ្ពស់ ខុសពីទឹកត្រីផ្សេងៗ។ ចំពោះគុណភាព និងស្តងដានៃការផលិត វេចខ្ចប់ ត្រូវបានទទួលស្គាល់ទាំងថ្នាក់ជាតិ និងអន្តរជាតិ។លោក បានបន្តថា ដោយសារកង្វះ វត្ថុធាតុដើម និងឧបករណ៍វេចខ្ចប់ដែលត្រូវនាំចូលពីក្រៅប្រទេស ទឹកត្រីង៉ូវ ហេង របស់លោក អាចផលិតបានជាង ៥០ម៉ឺនលីត្រក្នុងមួយឆ្នាំ ហើយបរិមាណនេះមិនទាន់អាចផ្តគ់ផ្គង់តម្រូវការទីផ្សារក្នុងស្រុកបាននៅឡើយទេ ប៉ុន្តែយ៉ាងណាក៏ដោយ លោកបាននឹងកំពុងរៀបចំខ្លួន បង្កើនបរិមាណផលិត ដើម្បីឈានទៅសម្រេចគោលដៅ ពង្រីកទីផ្សារក្រៅប្រទេសឲ្យបានក្នុងពេលឆាប់ៗ ព្រោះលោកចង់ឲ្យ បងប្អូនខ្មែរទៅដល់ទីណា ឃើញផលិតផលខ្មែរនៅទីនោះ។លោក សុខ គឹមជឿន ប្រធានមន្ទីរ ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានប្រាប់ឲ្យដឹងថា ខេត្តកំពតមានសិប្បកម្មផលិតទឹកត្រីចំនួន១០ កន្លែង។ លោក បានបញ្ជាក់ថា បច្ចុប្បន្នមន្ត្រីផលិជំនាញពាក់ព័ន្ធកំពុងចងក្រងជាសមាគមផលិតទឹកត្រីកំពត-កែប ដើម្បីធ្វើការចុះបញ្ជីម៉ាក់តផល សម្គាល់ភូមិសាស្ត្រផង និងបង្កភាពងាយស្រួលក្នុងការនាំចេញនៅថ្ងៃមុខផង ។ដោយឡែកចំពោះទឹកត្រី ង៉ូវ ហេង លោក បានបញ្ជាក់ដែរថា ទទួលបាន អាជ្ញាបណ្ណនាំចេញទៅក្រៅប្រទេសរួចហើយ គឺរង់ចាំតែបរិមាណនៃការផលិតឲ្យឆ្លើយតបនឹងការនាំចេញប៉ុណ្ណោះ៕អត្ថបទ៖ អន សារឹម

គ្រឹះស្ថានធនាគារ និងហិរញវត្ថុ កំពុងធ្វើទំនើបកម្ម សេវាហិរញ្ញវត្ថុឌីជីថល

ភ្នំពេញ៖ មន្ត្រីជំនាញធនាគារជាតិនៃកម្ពុជាថា នារយៈកាលប៉ុន្មានឆ្នាំចុងក្រោយនេះ គ្រឹះស្ថានធនាគារ និងហិរញវត្ថុ បាននិងកំពុងគាំទ្រដល់ការជំរុញការប្រើប្រាស់សេវាហិរញ្ញវត្ថុផ្លូវការ តាមរយៈការបន្តអភិវឌ្ឍន៍សេវាហិរញ្ញវត្ថុឲ្យកាន់តែរីកចម្រើន និងមានទំនើបកម្ម ជាពិសេស សេវាហិរញ្ញវត្ថុឌីជីថល។លោក ម៉ែន ភក្តី ប្រធាននាយកដ្ឋានគ្រប់គ្រងទិន្នន័យ និងវិភាគមីក្រូហិរញ្ញវត្ថុ នៃធនាគារជាតិនៃកម្ពុជាលើកឡើងនៅក្នុងកម្មវិធីសិក្ខាសាលាផ្សព្វផ្សាយ ស្តីពីការចាប់ផ្តើមគម្រោង "ការបង្កើតភាពអង់អាចសេដ្ឋកិច្ចដល់ស្ត្រីនៅជនបទ តាមរយៈការលើកកម្ពស់ចំណេះដឹងផ្នែកហិរញ្ញវត្ថុនិងឌីជីថល" នៅថ្ងៃទី២៣ ខែសីហា ឆ្នាំ២០២២នេះថា បរិយាបន្នហិរញ្ញវត្ថុ បាននិងកំពុងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ច កាត់បន្ថយវិសមភាព និងកាត់បន្ថយភាពក្រីក្រនៅកម្ពុជា។ បរិយាបន្នហិរញ្ញវត្ថុ គឺជាលទ្ធភាពទទួលបាននិងប្រើប្រាស់សេវាហិរញ្ញវត្ថុផ្លូវការទាន់ពេលវេលា សមស្របតាមតម្រូវការ មានតម្លៃសមរម្យ និងមានកិច្ចការពារតាមផ្លូវច្បាប់។លោក បន្តថា ដើម្បីជំរុញកម្រិតបរិយាបន្នហិរញ្ញវត្ថុ រាជរដ្ឋាភិបាលកម្ពុជា បានអនុម័តយុទ្ធសាស្ត្រជាតិស្តីពី បរិយាបន្នហិរញ្ញវត្ថុ ឆ្នាំ២០១៩-២០២៥ ក្នុងគោលដៅកាត់បន្ថយអត្រាស្ត្រីដែលមិនទាន់ទទួលបានសេវាហិរញ្ញវត្ថុ ឲ្យបានពាក់កណ្ដាលពី ២៧% មក ១៣% និងពង្រីកការប្រើប្រាស់សេវាហិរញ្ញវត្ថុផ្លូវការពី ៥៩% ទៅ ៧០% ត្រឹមឆ្នាំ២០២៥ ។ លោក ម៉ែន ភក្តី បញ្ជាក់បន្ថែមថា ក្នុងរយៈកាលប៉ុន្មានឆ្នាំចុងក្រោយ គ្រឹះស្ថានធនាគារ និងហិរញវត្ថុ បាននិងកំពុងគាំទ្រដល់ការជំរុញការប្រើប្រាស់សេវាហិរញ្ញវត្ថុផ្លូវការ តាមរយៈការបន្តអភិវឌ្ឍន៍សេវាហិរញ្ញវត្ថុឲ្យកាន់តែរីកចម្រើន និងមានទំនើបកម្ម ជាពិសេស សេវាហិរញ្ញវត្ថុឌីជីថល ក្នុងនោះធនាគារជាតិនៃកម្ពុជាក៏បានរៀបចំឲ្យមាននូវបរិស្ថានអំណោយផលល្អ សម្រាប់ជំរុញការអភិវឌ្ឍនិងការប្រើប្រាស់បច្ចេកវិទ្យាហិរញ្ញវត្ថុ ក្នុងការគាំទ្រនវានុវត្តន៍ក្នុងវិស័យធនាគារ ដែលរួមមាន៖ ការអភិវឌ្ឍហេដ្ឋារចនាសម្ព័ន្ធទូទាត់ឌីជីថល (ជាក់ស្ដែង KHQR កូដ), ការរៀបចំក្របខណ្ឌបទប្បញ្ញត្តិនិងត្រួតពិនិត្យ និងការពង្រឹងកិច្ចសហប្រតិបត្តិការជាមួយភាគីពាក់ព័ន្ធ។ ជាពិសេស ធនាគារជាតិនៃកម្ពុជាបានរៀបចំផែនទីមគ្គុទ្ទេសក៍អភិវឌ្ឍន៍បច្ចេកវិទ្យាហិរញ្ញវត្ថុ ២០២០-២០២៥ ដែលបង្កើតឡើង ដើម្បីតម្រង់ទិសសម្រាប់ការអភិវឌ្ឍបច្ចេកវិទ្យានៅកម្ពុជា៕អត្ថបទ៖ Maen Pheakdey

ទំហំពាណិជ្ជកម្មរវាងកម្ពុជា និងវៀតណាម មានទឹកប្រាក់សរុបជាង ៣.៧ប៊ីលានដុល្លារ ក្នុងរយៈពេល៧ខែ

ភ្នំពេញ៖ ទំហំពាណិជ្ជកម្មទ្វេភាគីរវាងកម្ពុជា និងវៀតណាម សម្រេចបានក្នុងរង្វង់ទឹកប្រាក់ ៣,៧៦ពាន់លានដុល្លារ នៅក្នុងរយៈពេល៧ខែ ឆ្នាំ២០២២នេះ។ ទំហំនេះ បានកើនឡើងរហូតដល់ ២២,២ ភាគរយ បើធៀបនឹងរយៈពេលដូចគ្នាក្នុងឆ្នាំ២០២១។ចាប់ពីខែមករា ដល់ខែកក្កដា កម្ពុជា នាំចេញទំនិញសរុប ទៅកាន់ប្រទេសវៀតណាម មានទឹកប្រាក់ សរុប ១ ៣២៦ លានដុល្លារ កើនឡើង ៣.៤ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមស្ថិតិជញ្ជីងពាណិជ្ជកម្មទំនិញរបស់អគ្គនាយកដ្ឋានគយ និងរដ្ឋាករកម្ពុជា។កម្ពុជា នាំចូលទំនិញពីប្រទេសវៀតណាម មានទឹកប្រាក់សរុប ២ ៤៣៩ លានដុល្លារ មានកំណើន ៣៥ ភាគរយ ធៀបនឹងរយៈ៧ខែឆ្នាំមុន។ក្នុងជំនួបជាមួយលោក ឡេ ហាយជុង សមាជិកមជ្ឈិមបក្ស និងជាប្រធានគណៈទាក់ទងបរទេសមជ្ឈិមបក្សកុម្មុយនីស្តវៀតណាម នាថ្ងៃទី ២២ សីហា នៅវិមានសន្តិភាព សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានជំរុញឱ្យភាគីវៀតណាម ជំរុញទំនាក់ទំនងសេដ្ឋកិច្ចទ្វេភាគី ឲ្យកាន់តែខ្លាំងថែមទៀត ជាពិសេស បន្តកែប្រែតំបន់អតីតសង្គ្រាមនៅតំបន់ព្រំដែន ឲ្យទៅជាតំបន់សន្តិភាព អភិវឌ្ឍន៍និងកិច្ចសហប្រតិបត្តិការ។ ក្នុងជំនួបនេះ សម្តេច ហ៊ុន សែន បានសង្កត់ធ្ងន់ថា ៖«ទំនាក់ទំនងសេដ្ឋកិច្ច គួរគាំទ្រឱ្យទំនាក់ទំនងនយោបាយ»។គួបញ្ជាក់ថា ទំនិញសំខាន់ៗដែលកម្ពុជា នាំចេញទៅកាន់ប្រទេសវៀតណាម ភាគច្រើនជាផលិតផលកសិកម្ម ស្រូវ ស្វាយចន្ទី ដំឡូងមី កៅស៊ូជាដើម ខណៈនាំចូលពីវៀតណាម ដែកថែប ប្រេងឥន្ធនៈ ផលិតផលវាយនភណ្ឌជាដើម។កាលពីឆ្នាំ២០២១កន្លងទៅ ទំហំពាណិជ្ជកម្មទ្វេភាគីរវាងកម្ពុជា និងវៀតណាម សម្រេចបាន ៩ប៊ីលានដុល្លារ។ រដ្ឋាភិបាលទាំងពីរ បានឯកភាពគ្នាជំរុញទំហំពាណិជ្ជកម្មឱ្យកើនដល់ ១០ប៊ីលានដុល្លារ ក្នុងឆ្នាំ២០២២នេះ៕អត្ថបទ៖ វណ្ណៈ

អង់គ្លេសបង្ហាញសេចក្តីលម្អិតលើកែលម្អប្រព័ន្ធអនុគ្រោះពន្ធទូទៅ

ភ្នំពេញ៖ សមាគមរោងចក្រកាត់ដេរនៅកម្ពុជា (GMAC) បានបង្ហាញព័ត៌មានមួយថា រដ្ឋាភិបាលអង់គ្លេសបានចេញសេចក្តីលម្អិតជាងមុនមួយ អំពីសំណើកែលម្អប្រព័ន្ធអនុគ្រោះពន្ធទូទៅ(GSP)។ ប្រព័ន្ធកែលម្អនេះ មានលក្ខណៈធូរជាងមុនសម្រាប់ផលិតផលធ្វើដំណើរ ប៉ុន្តែសម្រាប់ផលិតផលសំលៀកបំពាក់គឺរក្សានៅដដែល។សមាគមរោងចក្រកាត់ដេរនៅកម្ពុជា កាលពីសប្តាហ៍កន្លងទៅនេះ បានលើកឡើងថា កម្ពុជា នៅតែទទួលបានប្រព័ន្ធអនុគ្រោះពន្ធទូលំទូលាយ ដោយគ្មានកំណត់កូតាសម្រាប់គ្រប់មុខទំនិញទាំងអស់ លើកលែងតែគ្រឿងសព្វាវុធសម្រាប់កម្ពុជា និងរាល់ប្រទេសអភិវឌ្ឍន៍តិចតួចបំផុត។បើតាមGMAC ប្រព័ន្ធអនុគ្រោះពន្ធទំលំទូលាយនេះ ស្ថិតក្នុងចំណោមប្រព័ន្ធអនុគ្រោះពន្ធពីរផ្សេងទៀត ការអនុគ្រោះតាមស្តង់ដារ, ការអនុគ្រោះប្រសើរឡើង ដែលរដ្ឋាភិបាលអង់គ្លេសបានកែលម្អ។ ប្រភពខាងលើ បានបន្ថែមថា ផលិតផលធ្វើដំណើរគឺរួចពន្ធក្រោមប្រព័ន្ធគ្រប់ថ្នាក់ទាំងបី ប៉ុន្តែសំលៀកបំពាក់គឺរួចពន្ធតែក្រោមថ្នាក់ប្រសើរឡើង និងថ្នាក់ទូលំទូលាយ។ ឥឡូវនេះ លក្ខណៈវិនិច្ឆ័យសម្រាប់ថ្នាក់ប្រសើរឡើង គឺជាលក្ខណៈវិនិច្ឆ័យភាពងាយរងគ្រោះសេដ្ឋកិច្ចសាមញ្ញ ដែលផ្ទុយពីលក្ខណៈវិនិច្ឆ័យសិទ្ធិមនុស្សនៅក្នុងប្រព័ន្ធ GSP របស់អឺរ៉ុប។ មានន័យថា ស្ទើរតែរាល់ប្រទេសទាំងអស់ដែលមិនមែនជាប្រទេសអភិវឌ្ឍន៍តិចតួចបំផុត ពេលនេះគឺជាផ្នែកនៃថ្នាក់ប្រសើរឡើង។ពាណិជ្ជកម្មទ្វេភាគីរវាងកម្ពុជា និងចក្រភពអង់គ្លេស សម្រេចបាន ៥៨១លានដុល្លារ ក្នុងរយៈពេលប្រាំពីរខែដំបូងនៃឆ្នាំ ២០២២ បានកើនឡើង ៤៥.៥ ភាគរយធៀបនឹងរយៈពេលដូចគ្នាកាលពីឆ្នាំមុន។ការនាំចេញសំខាន់ៗរបស់កម្ពុជាទៅកាន់ចក្រភពអង់គ្លេសរួមមាន សំលៀកបំពាក់ ស្បែកជើង កាបូប កង់ និងផលិតផលកសិកម្ម ខណៈដែលការនាំចូលសំខាន់ៗពីអង់គ្លេសវិញ រួមមាន យានជំនិះ គ្រឿងចក្រ គ្រឿងអេឡិចត្រូនិក និងសម្ភារសំណង់៕ អត្ថបទ៖ ឈិត បូរ៉ាវី

រយៈពេល៧ខែឆ្នាំ២០២២ ទេសចរអន្តរជាតិមកទស្សនាកម្ពុជាមានកំណើន៥៦០%

ភ្នំពេញ៖ ក្នុងរយៈពេល ០៧ ខែដើម ឆ្នាំ២០២២នេះ ភ្ញៀវទេសចរអន្តរជាតិមកទស្សនាកម្ពុជា មានប្រមាណជាង ៧៤ ម៉ឺននាក់ កើនឡើង ៥៦០% ធៀបនឹងរយៈពេលដូចគ្នាឆ្នាំ២០២១ ក្នុងដំណាក់កាលវិបត្តិកូវីដ១៩ គន្លងទៅ។ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានថ្លែងឲ្យដឹងនៅឯខេត្តសៀមរាប នាល្ងាចថ្ងៃទី១៩ ខែសីហានេះថា សម្រាប់ភ្ញៀវទេសចរអន្តរជាតិ ដែលអញ្ជើញមកទស្សនានៅក្នុងអំឡុងពេលនេះ ជាភាគច្រើនភ្ញៀវការទូត ភ្ញៀវមកបំរើការងារ ភ្ញៀវអ្នកវិនិយោគទុន និងភ្ញៀវទេសចរបរទេសនានាទៀត ដែលមកស្វែងការបណ្តាក់ទុនវិនិយោគទុននៅកម្ពុជា នៅក្រោយបរិបទកូវីដធូរស្រាល ឯភ្ញៀវអន្តរជាតិដែលអញ្ជើញមកដើរទស្សនាកម្ពុជាសុទ្ធតែម្តងគឺហាក់នៅមានកម្រិតតិចតួច។ ឯកឧត្តម ថោង ខុន បន្តថា ការបើកដំណើរការសេដ្ឋកិច្ច សង្គមឡើងវិញនេះ បានជំរុញឱ្យមានការកម្សាន្តទេសចរណ៍នៅតាមគោលដៅទេសចរណ៍សំខាន់ៗ ដូចជាក្នុងខេត្តសៀមរាប និងរាជធានីភ្នំពេញ ក៏ដូចជាខេត្តព្រះសីហនុ និងគោលដៅទេសចរណ៍មួយចំនួនទៀត មានសកម្មភាពទេសចរណ៍ជាច្រើនឡើងវិញ។ឯកឧត្តម ថោង ខុន បន្តថា បច្ចុប្បន្នសម្រាប់តែខេត្តសៀមរាបមួយវិញ សំគាល់ឃើញថា រយៈពេល៧ខែឆ្នាំ២០២២នេះ ខេត្តសៀមរាបទាំងមូលទទួលបានភ្ញៀវទេសចរសរុបចំនួន១លាន២សែននាក់ ក្នុងទេសចរអន្តរជាតិចំនួន៨ម៉ឺន៤០០០នាក់ ហើយមានជើងហោះហើរពីក្រៅប្រទេសចូលទៅកាន់ខេត្តសៀមរាបមានចំនួន៥៥០ជើង និងមានអ្នកដំណើរអន្តរជាតិជិត៥ម៉ឺននាក់ ហើយក្រៅពីភ្ញៀវបរទេសជាភ្ញៀវទៅទស្សនាខេត្តសៀមរាបផ្លូវគោគ និងផ្លូវទឹក។ឯកឧត្តម ក្នុងបរិការណ៍នៃការងើបឡើងវិញនៃវិស័យទេសចរណ៍នេះ ក្រសួងទេសចរណ៍ បានគិតគូរ និងយកចិត្តទុកដាក់ខ្ពស់លើការពង្រឹងគុណភាពសេវាកម្មប្រកបដោយគុណភាព និងសុវត្ថិភាពជូនភ្ញៀវទេសចរ តាមគន្លងថ្មី និងបន្តជំរុញផ្សព្វផ្សាយទាក់ទាញទេសចរណ៍ទាំងទេសចរណ៍អន្តរជាតិ និងទេសចរណ៍ក្នុងស្រុក ដែលជាទិសដៅយុទ្ធសាស្រ្តក្នុងដំណាក់កាលទី២ នៃផែនការស្តារ និងអភិវឌ្ឍន៍វិស័យទេសចរណ៍ក្នុង និងក្រោយដំណាក់កាលកូវីដ-១៩ ឆ្នាំ២០២០-២០២៥៕ អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

កិច្ចប្រជុំពេញអង្គគណៈរដ្ឋមន្ត្រីបានអនុម័តសេចក្តីព្រាងច្បាប់ស្តីពីកាតព្វកិច្ចយោធា

ទឹកជំនន់ សម្លាប់មនុស្សយ៉ាងតិច ២៤នាក់ និងប៉ះពាល់ជាង ៣១.០០០គ្រួសារ នៅភាគនិរតីយេម៉ែន

មន្ត្រីអ៊ីរ៉ង់និយាយថា ទីក្រុងតេអេរ៉ង់ទទួលបានប្រាក់ចំណូលដំបូងពីថ្លៃប្រើប្រាស់ច្រកសមុទ្រហ័រមូស

មន្ត្រីប៉ាគីស្ថាន បង្ហាញក្ដីសង្ឃឹមពីការមាន «វឌ្ឍនភាពជាវិជ្ជមាន» ពីអ៊ីរ៉ង់

រថភ្លើងបុកគ្នា នៅដាណឺម៉ាក បណ្តាលឲ្យមនុស្សជាច្រើននាក់រងរបួស ក្នុងនោះ ៤នាក់ធ្ងន់ធ្ងរ

ស្លូវ៉ាគីនិយាយថា ខ្លួនកំពុងទទួលបានប្រេងរបស់រុស្ស៊ី តាមរយៈបំពង់បង្ហូរប្រេងអ៊ុយក្រែនដែលបានជួសជុលរួច

លីបង់ និងអ៊ីស្រាអែល នឹងបន្តកិច្ចចរចាផ្ទាល់ដ៏កម្រនៅទីក្រុងវ៉ាស៊ីនតោន ដើម្បីពង្រីកបទឈប់បាញ់អ៊ីស្រាអែល-ហេសបូឡា

លីបង់ ត្រៀមជួបអ៊ីស្រាអែល នៅទីក្រុងវ៉ាស៊ីនតោននៅថ្ងៃព្រហស្បតិ៍នេះ ដើម្បីស្នើសុំការបន្តបទឈប់បាញ់

ចក្រភពអង់គ្លេសនឹងបង់ប្រាក់ឲ្យបារាំងរហូតដល់៨៩២លានដុល្លារក្នុងកិច្ចព្រមព្រៀងទប់ស្កាត់ការឆ្លងកាត់របស់ជនអន្តោប្រវេសន៍

រូបសំណាកនាគព័ន្ធថ្មី ធ្វើពីស្ពាន់សុទ្ធទម្ងន់ ៨តោ នត្រូវបានដាក់តម្កល់លើផ្លូវជាតិលេខ៧

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877