នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តមរដ្ឋមន្ត្រី ថោ ជេដ្ឋា ចុះពិនិត្យការងារអន្តរាគមន៍បូមទឹកជួយសង្គ្រោះស្រូវ​ប្រាំង​ប្រជាកសិករ​​ដែលកំពុងប្រឈមខ្វះទឹកប្រមាណជាង ៤ពាន់ហិកតា ក្នុងស្រុកបាទី ខេត្តតាកែវ
អាជីវករលក់ជី និងថ្នាំកសិកម្មនៅបន្ទាយមានជ័យ​ថា​ ការផ្សព្វផ្សាយអវិជ្ជមានទាក់ទងវិស័យកសិកម្មមិនបានជួយដល់ប្រជាកសិករនោះទេ
CMA និងCGCC បង្កើតភាពជាដៃគូយុទ្ធសាស្ត្រ ដើម្បីពង្រឹងបរិយាបន្នហិរញ្ញវត្ថុ
ឯកឧត្តម យ៉ង សាំងកុមារ៖​ មកដល់ពេលនេះ មានរោងម៉ាស៊ីនកិនស្រូវ៩ សហការ​ជាមួយ​ក្រសួងកសិកម្ម ប្រមូលទិញស្រូវសរុបចំនួន ៥,៤១០តោន

សេដ្ឋកិច្ច និង កសិកម្ម

វិស័យកសិកម្មក្នុងឆ្នាំនេះនឹងមានកំណើនល្អ គាំទ្រដោយអនុវិស័យដំណាំ ការចិញ្ចឹមសត្វ និងការនេសាទ

2025/01/03 11:34:37 am        113
Facebook Telegram Linkin
វិស័យកសិកម្មនៅកម្ពុជាក្នុងឆ្នាំ ២០២៥ នេះ ត្រូវបានព្យាករថា កើនឡើង ១,១ ភាគរយ ដោយសារការរំពឹងទុកនូវកំណើនល្អ នៃអនុវិស័យដំណាំ ការចិញ្ចឹមសត្វ និងការងើបសន្សឹមៗនៃអនុវិស័យនេសាទ ដោយសារវិធានអន្តរាគមន៍របស់រាជរដ្ឋាភិបាល និងការ គាំទ្រពីដៃគូអភិវឌ្ឍន៍នានា។ តាមក្របខ័ណ្ឌនៃការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ របស់រាជរដ្ឋាភិបាល ត្រូវបានរៀប ចំឡើងជាមួយនឹងការគិតគូរថា សេដ្ឋកិច្ចកម្ពុជា ក៏ដូចជាសេដ្ឋកិច្ចសកលលោក និងតំបន់ នឹងបន្តដំណើរលើមាគ៌ាស្ដារ និងជំរុញ កំណើនឡើងវិញ បន្ទាប់ពីទទួលរងការប៉ះទង្គិចផ្ទួនៗពីវិបត្តិបន្តបន្ទាប់ក្នុងឆ្នាំកន្លងមក ប៉ុន្តែកំណើននេះនៅមិនទាន់ឡើងដល់កម្រិត សក្តានុពលនៅឡើយ ទោះបីស្ថានភាពនយោបាយ សេដ្ឋកិច្ចនិងសង្គម ត្រូវបានរំពឹងទុកថានឹងកាន់តែមានភាពប្រសើរឡើងជាមុន។យោងលើការវាយតម្លៃ នៃក្របខ័ណ្ឌហិរញ្ញវត្ថុសាធារណៈរយៈពេលមធ្យមរបស់រាជរដ្ឋាភិបាលសម្រាប់ឆ្នាំ២០២៥ សេដ្ឋកិច្ច កម្ពុជា នឹងបន្តនិន្នាការកើនឡើង ដោយរំពឹងថា នឹងសម្រេចបានកំណើនក្នុងរង្វង់ ៦,៣% ដែលធ្វើឱ្យ ផ.ស.ស. ថ្លៃបច្ចុប្បន្ន ស្ថិតក្នុង រង្វង់ ២០៩ ១៦៣ ប៊ីលានរៀល សមមូលនឹងប្រមាណ ៥១ ៣៩៨ លានដុល្លារអាម៉េរិក ស្របពេលដែល ផ.ស.ស. សម្រាប់មនុស្ស ម្នាក់ត្រូវបានរំពឹងថានឹងកើនឡើងដល់ ២ ៩២៤ ដុល្លារអាម៉េរិក បើធៀបនឹងប្រមាណ២ ៧១៣ដុល្លារអាម៉េរិក ក្នុងឆ្នាំ២០២៤។ចំពោះកំណើនកើនឡើងនេះបានគាំទ្រដោយវិស័យសំខាន់ៗជាច្រើន ក្នុងនោះចំពោះវិស័យកសិកម្មនៅក្នុងឆ្នាំ ២០២៥ នេះ ត្រូវបានរាជរដ្ឋាភិបាលព្យាករថា និងកើនឡើង ១,១ ភាគរយ ដោយសារការរំពឹងទុកនូវកំណើនល្អនៃអនុវិស័យដំណាំ និងចិញ្ចឹមសត្វ និងការងើបសន្សឹមៗនៃអនុវិស័យនេសាទ។ ចំណែកអនុវិស័យដំណាំ ត្រូវបានរំពឹងថា នៅរក្សាកំណើនល្អ ដោយសារការបន្តកើននៃ ការវិនិយោគ ទាំងក្នុងស្រុកនិងពីបរទេស លើការកែច្នៃផលិតផលកសិកម្ម ការបង្កើនការវិនិយោគសាធារណៈ និងអន្តរាគមន៍របស់ រាជរដ្ឋាភិបាលដូចជា៖ ការផ្តល់ហិរញ្ញប្បទានសម្បទាន ក្នុងការជំរុញផលិតកម្មក្នុងស្រុកនិងការអនុវត្តកិច្ចព្រមព្រៀងពាណិជ្ជកម្មសេរី នានា ដែលនឹងបន្តជំរុញដល់ការនាំចេញ។ ចំណែកអនុវិស័យចិញ្ចឹមសត្វ, ត្រូវបានព្យាករថា នឹងបន្តងើបសន្សឹមៗ ដោយសារវិធានអន្តរាគមន៍របស់រាជរដ្ឋាភិបាលលើ ការនាំចូលសាច់បង្កក ដែលនឹងលើកទឹកចិត្តការចិញ្ចឹមក្នុងស្រុក ខណៈអនុវិស័យនេសាទត្រូវបានព្យាករថា នឹងមានកំណើនល្អ ក្រោម ការរំពឹងទុកនូវកំណើនផលត្រីទឹកសាប ដែលនឹងត្រូវបានបន្តស្តារឡើងវិញ ដោយសារការដាក់ចេញនូវគោលនយោបាយបង្ក្រាប បទល្មើសនេសាទ និងការវិនិយោគក្នុងវារីវប្បកម្ម ក្រោមការអនុវត្តវិធានការរបស់រាជរដ្ឋាភិបាល និងការគាំទ្រពីដៃគូអភិវឌ្ឍន៍ សំដៅ ដោះស្រាយបញ្ហាប្រឈមជារចនាសម្ព័ន្ធ ផ្ដល់ការគាំទ្រផ្នែកហិរញ្ញប្បទាន និងជំរុញការផ្សព្វផ្សាយបច្ចេកទេស និងការប្រើប្រាស់ពូជត្រី ប្រកបដោយប្រសិទ្ធភាពខ្ពស់និងគុណភាព៕ អត្ថបទ៖ សុន រ៉ាឌី

កម្ពុជានាំចេញគ្រាប់ស្វាយចន្ទីបានជាង ៨១ម៉ឺនតោន គិតជាទឹកប្រាក់ជាង១ ពាន់លានដុល្លារ

2025/01/03 10:23:22 am        117
Facebook Telegram Linkin
កម្ពុជានាំចេញគ្រប់ស្វាយចន្ទី ក្នុងរយៈពេលជិត ១២ខែ ឆ្នាំ ២០២៤ មានចំនួនសរុប ៨១ ម៉ឺនតោន កើនឡើង ២៦ ភាគរយ បើគិត ជាទឹកប្រាក់មានចំនួនប្រមាណ ១.១៥០ លានដុល្លារអាម៉េរិក កើនឡើង ៣១ ភាគរយ បើធៀបរយៈពេលក្នុងឆ្នាំ ២០២៣។ ក្នុងរយៈពេលជិត ១២ ខែ គិតចាប់ពីខែមករា ដល់ ខែធ្នូ ឆ្នាំ ២០២៤ កម្ពុជាផលិតគ្រាប់ស្វាយចន្ទីក្នុងស្រុក សរុបបានចំនួន ៨៥ ម៉ឺនតោន កើនឡើង ២៦ ភាគរយ បើធៀបនឹងឆ្នាំ ២០២៣ ខណៈការនាំចេញទៅក្រៅប្រទេសមានបរិមាណជាង ៨១ ម៉ឺនតោន ក្នុងនោះកម្ពុជាបាននាំចេញទៅវៀតណាមជាប់លំដាប់ទី១ មានចំនួនប្រមាណជិត ៨០ ម៉ឺនតោន បើគិតជាទឹកប្រាក់សរុបនៃការនាំ ចេញទាំងអស់ មានចំនួន ១.១៥០ លានដុល្លារអាម៉េរិក កើនឡើង ៣១ ភាគរយ បើធៀបនឹងឆ្នាំ ២០២៣ ។ ជុំវិញការផលិតនិងនាំចេញគ្រាប់ស្វាយចន្ទីនៅឆ្នាំ២០២៤នេះ, លោក អួន ស៊ីឡុត ប្រធានសមាគមស្វាយចន្ទីកម្ពុជា បាន ថ្លែងប្រាប់ BTV ឱ្យដឹងថា កម្ពុជាគឺជាប្រទេសដែលផលិតគ្រាប់ស្វាយចន្ទីឆៅធំទី២ នៅលើពិភពលោក ជាក់ស្តែងនៅក្នុងឆ្នាំកន្លងមក នេះ កម្ពុជាទទួលបានការបញ្ជាទិញពីក្រៅប្រទេសជាច្រើន ដែលធ្វើការនាំចេញនៅក្នុងឆ្នាំ ២០២៤ បានកើនឡើងល្អប្រសើរ។ ចំណែក ការប្រមូលផលវិញ, ចំពោះនៅខេត្តកំពង់ធំ កសិករប្រមូលទិន្នផលគ្រាប់ស្វាយចន្ទី បានគ្របដណ្តប់ប្រហែល ៣០ ភាគរយ នៃ ទិន្នផលទូទាំងប្រទេស ខណៈដែលខេត្តកំពង់ធំ គឺជាទីតាំងមានសក្តានុពលជាងគេ នៅលើផ្នែកផលិតកម្មស្វាយចន្ទី ដោយកាលពី ពេលថ្មីៗ ប្រមុខរាជរដ្ឋាភិបាល ក៏ទើបអនុញ្ញាតឱ្យបង្កើតសួនកសិ-ឧស្សាហកម្មស្វាយចន្ទីនៅក្នុងខេត្តកំពង់ធំផងដែរ។ទាក់ទិនការកែច្នៃវិញ, លោក បានឱ្យដឹងថា មកដល់បច្ចុប្បន្នកម្ពុជាមានរោងចក្រកែច្នៃក្នុងស្រុកចំនួន ៥២ សហគ្រាស ដោយ បានកែច្នៃគ្រាប់ស្វាយចន្ទីឆៅនៅក្នុងមួយឆ្នាំៗ បានចំនួន ៥០ ពាន់តោន តែក្នុងនោះចំពោះទំហំនៃការការកែច្នៃជាក់ស្តែង បានចំនួន ជាង ២០ ពាន់តោនប៉ុណ្ណោះ ខណៈដែលសហគ្រាសមួយចំនួនជួបបញ្ហាខ្វះទុនបង្វឹល តែប្រសិនកម្ពុជាអាចកែច្នៃខ្លួនឯងបានក្នុងរង្វង់ ៨០ ភាគរយនៃបរិមាណសរុប កម្ពុជានិងអាចទទួលប្រាក់ចំណេញដល់ ១២០ ភាគរយ។ជុំវិញការនាំចេញវិញ, លោក អួន ស៊ីឡុត មានក្តីរំពឹងថា ការនាំចេញគ្រាប់ស្វាយចន្ទីកែច្នៃ ដែលជាផលិតផលសម្រេចរបស់ កម្ពុជា ទៅទីផ្សារអន្តរជាតិ នឹងមានបរិមាណកាន់តែច្រើន ចាប់ពីដើមឆ្នាំ ២០២៥ តទៅ ខណៈក្រុមហ៊ុនក្នុងស្រុក Unique Noble Trading Co., Ltd បានប្រកាសចាប់ផ្តើមសាងសង់រោងចក្រកែច្នៃគ្រាប់ស្វាយចន្ទីជាផ្លូវការ នៅក្នុងខេត្តកំពង់ធំ ដែលមានសមត្ថភាព កែច្នៃគ្រាប់ស្វាយចន្ទីបាន ៣០ តោន ក្នុង១ថ្ងៃ៕ អត្ថបទ៖ សុន រ៉ាឌី

រដ្ឋបាលជលផល៖ ត្រីចាប់ផ្តើមត្រូវតាមដងទន្លេសាបក្នុងភូមិសាស្រ្តខេត្តកណ្តាល និងភ្នំពេញ ចាប់ពីថ្ងៃទី២ ដល់ទី១០ ខែមករា ឆ្នាំ២០២៥

2025/01/02 02:55:54 pm        81
Facebook Telegram Linkin
រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២ ខែមករា ឆ្នាំ២០២៥នេះ បានអំពាវនាវដល់បងប្អូនប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី រួសរាន់អញ្ជើញមកទិញត្រី ចាប់ពីថ្ងៃទី០២ ដល់ថ្ងៃទី១០ ខែមករា ឆ្នាំ២០២៥ ខណៈត្រីចាប់ផ្តើមត្រូវតាមដងទន្លេសាប ក្នុងភូមិសាស្រ្តខេត្តកណ្តាល និងរាជធានីភ្នំពេញ។ រដ្ឋបាលជលផល បានឱ្យដឹងថា ក្នុងរដូវនេសាទឆ្នាំ២០២៤-២០២៥ តាមការសង្កេត បន្ទាប់ពីខ្នើតខែ មិគសិរកន្លងមកនេះ ត្រីក៏បន្តបន្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដោយត្រីតាមដងទន្លេសាប នៅក្នុងភូមិសាស្ត្រខេត្តកណ្តាលនិងរាជធានីភ្នំពេញ ចាប់ពីថ្ងៃព្រហស្បតិ៍ ៤កើត ដល់ថ្ងៃសុក្រ ១២កើត ខែបុស្ស ត្រូវនឹងថ្ងៃទី២ ដល់ថ្ងៃទី១០ ខែមករា ឆ្នាំ២០២៥ ក្នុងករណីមេឃស្រឡះល្អ គ្មានភ្លៀងកក់ខែ ឬមិនទទួល រងឥទ្ធិពលព្យុះភ្លៀង។ អាស្រ័យដូចបានជម្រាបជូនខាងលើ សូមបងប្អូនប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី សូមរួសរាន់អញ្ជើញមកទិញត្រី តាមពេលវេលានិងទីកន្លែងដូចមានក្នុងសេចក្តីជូនដំណឹងនេះ។ ទន្ទឹមនេះរដ្ឋបាលជលផលសូមសំណូមពរដល់អាជ្ញាធរមូលដ្ឋានឬសមត្ថកិច្ចពាក់ព័ន្ធ មេត្តាជួយ សម្រួលជូនដល់បងប្អូនប្រជាពលរដ្ឋបានធ្វើដំណើរ ស្នាក់នៅ និងដឹកជញ្ជូនផល ផលិតផលត្រី ដោយរលូន តាមការគួរ។

ការធ្វើពាណិជ្ជកម្មអន្តរជាតិក្នុងឆ្នាំ២០២៤ របស់កម្ពុជា មានកំណើនកើនឡើងដល់ជាង ៥០ ពាន់លានដុល្លារ

2025/01/02 01:04:37 pm        87
Facebook Telegram Linkin
ការធ្វើពាណិជ្ជកម្មលើទីផ្សារអន្តរជាតិរបស់កម្ពុជា នៅក្នុងបំណាច់ឆ្នាំ ២០២៤, មានទំហំ​ទឹកប្រាក់សរុបជាង ៥០ ពាន់លានដុល្លារអាមេរិក ខ្ពស់ជាងឆ្នាំ ២០២៣ ក្នុងនោះការនាំចេញទំនិញរបស់កម្ពុជា មានទឹកប្រាក់ជាង ២៤ ពាន់លានដុល្លារ ខណៈការនាំចូល មានចំនួនជាង ២៦ ពាន់លានដុល្លារ។អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញស្ថិតិ​ពាណិជ្ជកម្ម នៃការធ្វើពាណិជ្ជកម្មលើទីផ្សារ អន្តរជាតិរបស់កម្ពុជា នៅក្នុងបំណាច់ឆ្នាំ ២០២៤ កន្លងមកនេះ ក្នុងនោះការធ្វើការពាណិជ្ជកម្មជាមួយប្រទេសដៃគូរសំខាន់ៗរបស់កម្ពុជា និង ជាមួយបណ្តាប្រទេសមួយចំនួនផ្សេងៗទៀត នៅក្នុងរយៈពេល៥ឆ្នាំចុងក្រោយនេះ បានបន្ត​កំណើន​កើនឡើងល្អប្រសើរ ទាំងទំហំនៃការចេញ ទំនិញរបស់កម្ពុជា និងការនំាំទំនិញ​ចូល​មក​ទីផ្សារកម្ពុជាផងដែរ ដែលការកើនឡើងនេះ បានបង្ហាញឱ្យឃើញនៃស្ថានភាពពិភពលោក ស្រប​ពេល​កម្ពុជាកំពុងមានស្ថិរភាពល្អឡើងវិញជាបណ្តើរៗ ក្រោមការខិតខំប្រឹងប្រែងរបស់រាជរដ្ឋាភិបាល ទោះបីស្ថានភាពពិភពលោកមិនទាន់ មានភាព​ប្រាកដ​ប្រជា ក៏ដោយ។ជុំវិញការធ្វើពាណិជ្ជកម្មនេះ, មកដល់បច្ចុប្បន្នសម្រាប់ទំហំនាំចេញ-ចូល មានភាពប្រកៀគប្រកិតគ្នា ដែលនេះបង្ហាញឱ្យឃើញ អំពីការ អភិវឌ្ឍរីកចម្រើននៅក្នុងប្រទេស ជាពិសេសកម្ពុជាបានកំពុងពង្រីកវិសាលភាព មានវត្ថុធាតុដើមសម្រាប់ការផ្គត់ផ្គង់ទៅដល់ខ្សែច្រវាក់ផលិតកម្ម ក្នុងស្រុក ជំនួសការនាំចូលបានជាបណ្តើរៗ ជាពិសេសរាជរដ្ឋាភិបាលបាននិងកំពុងលើកកម្ពស់សហគ្រាសធុនតូច និងមធ្យម ជំរុញពង្រីកខ្លួន ដើម្បីទ្រទ្រង់ទៅដល់ឧស្សាហកម្មធំៗ ក្នុងនោះប្រសិនបើការផ្គត់ផ្គង់វត្ថុធាតុដើម ជំនួសការនាំចូលបានកាន់តែច្រើន កម្ពុជានិងស្រូបយកកំលាំង ពលកម្ម ការពង្រីកតម្លៃបន្ថែម និងប្រាក់ចំណូលសម្រាប់សេដ្ឋកិច្ចកាន់តែខ្ពស់។ជាក់ស្តែងនៅក្នុងរយៈពេល ១២ ខែ ក្នុងឆ្នាំ ២០២៤, ការធ្វើការធ្វើពាណិជ្ជកម្មជាមួយប្រទេសដៃគូរសំខាន់ៗរបស់កម្ពុជា មានទឹក ប្រាក់សរុបមានចំនួនជាង ៥០ ពាន់លានដុល្លារអាមេរិក និងជាង ៤៧ ពាន់លានដុល្លារអាមេរិក នៅក្នុងឆ្នាំ ២០២៣, ក្នុងនោះការនាំចេញ ទំនិញរបស់កម្ពុជា នៅក្នុងឆ្នាំ ២០២៤, មានទំហំទឹកជាង ២៤ ពាន់លានដុល្លារ និង ២៣ ពាន់លានដុល្លារ នៅក្នុងឆ្នាំ ២០២៣។ សម្រាប់ឆ្នាំ ២០២៤ នេះ ចំពោះវិស័យសំខាន់ៗដែលទ្រទ្រង់ដល់កំណើនរួមមាន៖ ការនាំចេញវាយនភណ្ឌ, សម្លៀកបំពាក់, ស្បែកជើង និងសម្ភារៈធ្វើដំណើរជាដើម ។ចំណែការនាំចេញចូល, នៅក្នុងបំណាច់ឆ្នាំ ២០២៤ នេះដែរ, មានទំហំទឹកជាង ២៦ ពាន់លានដុល្លារ ខណៈនៅឆ្នាំ ២០២៣ ការនាំ ចូលមានចំនួនប្រមាណជាង ២៤ ពាន់លានដុល្លារ ពោលគឺការនាំចូលនៅក្នុងរយៈពេល ២ឆ្នាំចុងក្រោយនេះ មានភាពប្រកៀកប្រកិតគ្នា ស្រប ពេលនៅក្នុងឆ្នាំ ២០២៥ នេះ កម្ពុជារំពឹងថា ការធ្វើពាណិជ្ជកម្មអន្តរជាតិ និងមានកំណើនកើនឡើងកាន់តែប្រសើរ ដោយគាំទ្រដល់ការរីកលូត លាស់ខ្សែច្រវាក់ផលិតកម្មក្នុងស្រុក៕ អត្ថបទ៖ សុន រ៉ាឌី

ធនាគារជាតិចេញសេចក្តីជូនដំណឹងដល់សាធារណជន ឱ្យមានការប្រុងប្រយ័ត្នប្រាក់ដុល្លារ​ក្លែងក្លាយ

2025/01/02 10:54:22 am        93
Facebook Telegram Linkin
ធនាគារជាតិនៃកម្ពុជា ចេញសេចក្តីជូនដំណឹងដល់សាធារណជន ឱ្យមានការប្រុងប្រយ័ត្នខ្ពស់ ចំពោះ​ក្រដាសប្រាក់ដុល្លារអាមេរិក ក្លែងក្លាយ ដោយត្រូវពិនិត្យពិច័យឱ្យបានហ្មត់ចត់ មុននឹង​ទទួល​យក​ក្រដាសប្រាក់ដុល្លារអាមេរិក ខណៈដែលក្រដាសប្រាក់នោះ កំពុងចរាចរនៅកម្ពុជា។ធនាគារជាតិ នៃ​កម្ពុជា ចេញសេចក្តីជូនដំណឹង ស្តីពីការទប់ស្កាត់​ការ​ប្រើប្រាស់​ក្រដាស​ប្រាក់​ដុល្លារ​អាមេរិកក្លែងក្លាយ និង បានជម្រាបជូនគ្រឹះស្ថានធនាគារ និងហិរញ្ញវត្ថុ និង​សាធារណ​ជន​ឱ្យ​បាន​ជ្រាប ទន្ទឹមនឹងការចរាចរក្រដាសប្រាក់ដុល្លារអាមេរិកនៅក្នុង ប្រទេសកម្ពុជា, ក្រដាស​ប្រាក់​ដុល្លារ​អាមេរិកក្លែងក្លាយក៏កំពុងត្រូវបានចរាចរផងដែរ ក្នុងគោលបំណងរួមចំណែកទប់ស្កាត់ ការចរាចរ ក្រដាសប្រាក់ដុល្លារអាមេរិកក្លែងក្លាយ តាមសំណើរបស់ភ្នាក់ងារសម្ងាត់អាមេរិក។ជុំវិញបញ្ហានេះ, ធនាគារជាតិនៃកម្ពុជា ស្នើដល់គ្រឹះស្ថានធនាគារ និងហិរញ្ញវត្ថុ ដក​ហូត​ក្រដាស​ប្រាក់​ដុល្លារអាមេរិកក្លែងក្លាយ ពីអតិថិជនដោយគ្មានសំណង រួចបញ្ជូនទៅភ្នាក់ងារ​សម្ងាត់​អាមេរិក ​ជាមួយនឹងរបាយការណ៍ដូចមានភ្ជាប់ក្នុងឧបសម្ព័ន្ធ ដើម្បីភ្នាក់ងារ សម្ងាត់អាមេរិក​ស៊ើប​អង្កេត​បន្ត​។ គ្រឹះស្ថានធនាគារ និងហិរញ្ញវត្ថុ រក្សាទុកព័ត៌មានអំពីអត្តសញ្ញាណអតិថិជន ដែ​ល​ចរាចរ​​ក្រដាសប្រាក់ ដុល្លារអាមេរិកក្លែងក្លាយ ហើយផ្តល់ព័​ត៌​មាន​ទាំង​នេះ​មក​ធនាគារជាតិ នៃ​កម្ពុជា,​ និងសាធារណជនត្រូវមានការប្រុងប្រយ័ត្នខ្ពស់ និង ពិនិត្យពិច័យឱ្យបានហ្មត់ចត់ មុន​នឹង​ទទួល​យក​ក្រដាសប្រាក់ដុល្លារអាមេរិក ហើយក្នុងករណីមានការសង្ស័យថា ក្រដាសប្រាក់ដុល្លារ អាមេរិក​នោះក្លែងក្លាយសូមផ្ដល់ព័ត៌មានជូនធនាគារជាតិនៃកម្ពុជា។បញ្ហានេះ, ធនាគារជាតិនៃកម្ពុជា លើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុ ណែនាំ​អតិថិជន​របស់​ខ្លួន​អំពីរបៀបកំណត់ អត្តសញ្ញាណក្រដាសប្រាក់ដុល្លារអាមេរិកពិត ដើម្បីចូលរួម​ការ​ទប់ស្កាត់​ការ​ប្រើប្រាស់ក្រដាសប្រាក់ដុល្លារអាមេរិកក្លែងក្លាយនេះ៕ អត្ថបទ៖ សុន រ៉ាឌី

រដ្ឋមន្រ្តីកសិកម្ម ជំរុញមន្រ្តីក្រោមឱវាទបន្តយកចិត្តទុកដាក់លើការផ្តល់ផលប្រយោជន៍ដល់ប្រជាកសិករ

2024/12/31 03:42:36 pm        136
Facebook Telegram Linkin
ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានជំរុញឲ្យមន្រ្តីក្រោមឱវាទ ត្រូវចេះសហការគ្នាគ្រប់អនុវិស័យទាំងអស់ ដើម្បីផ្តល់ផលប្រយោជន៍ដល់ប្រជាកសិករ និងតម្កល់ផលប្រយោជន៍ជាតិជាធំ ជាពិសេសការអភិវឌ្ឍលើវិស័យកសិកម្ម ដែលជាផ្នែកមួយដ៏សំខាន់ចូលរួមចំណែកទ្រទ្រង់ដល់កំណើនសេដ្ឋកិច្ចជាតិ។ ក្នុងឱកាសអញ្ជើញជាអធិបតីបិទកិច្ចប្រជុំបូកសរុបលទ្ធផលការងារអនុវិស័យដំណាំប្រចាំឆ្នាំ២០២៤ និងទិសដៅអនុវត្តឆ្នាំ២០២៥ កាលពីរសៀលថ្ងៃទី៣០ ខែធ្នូកន្លងទៅ ឯកឧត្តមរដ្ឋមន្រ្តី បានលើកឡើងពីគោលនយោបាយអាទិភាពរបស់រាជរដ្ឋាភិបា លរួមមានការរក្សាស្ថិរភាពថ្លៃកសិផល ការដាក់ពង្រាយមន្រ្តីកសិកម្មឃុំ និងការកសាងសហគមន៍កសិកម្មទំនើប ដែលអង្គពិធីត្រូវយកចិត្តទុកដាក់ និងអនុវត្តប្រកបដោយប្រសិទ្ធភាព និងប្រសិទ្ធផលខ្ពស់។ លើសពីនេះ ឯកឧត្តមរដ្ឋមន្រ្តី បានណែនាំដល់អង្គពិធីត្រូវផ្តោតទៅលើគុណភាពនៃការផ្គត់ផ្គង់ ទៅលើគ្រប់អនុវិស័យ និងតាមរយៈសហគមន៍កសិកម្មទំនើប ដែលជាចំនុចសំខាន់ដើម្បីអាចឆ្លើយតបបានគ្រប់តម្រូវការទីផ្សារទាំងគុណភាព និងបរិមាណ មានបច្ចេកទេសច្បាស់លាស់ មានសេដ្ឋកិច្ចមាត្រដ្ឋាន ថ្លឹងថ្លែងពីតម្រូវការ និងការផ្គត់ផ្គង់ត្រឹមត្រូវ និងអាចតភ្ជាប់ខ្សែចង្វាក់តម្លៃបានយ៉ាងពិតប្រាកដ។ ពាក់ព័ន្ធនឹងការងារធាតុចូលកសិកម្ម ឯកឧត្តម បានបញ្ជាក់ថា ការងារនេះ ត្រូវបន្តការយកចិត្តទុកដាក់ មានការកំណត់ថ្លៃច្បាស់លាស់ ជាពិសេសត្រូវមានអំណាចនៅក្នុងទីផ្សារ និងមានអំណាចនៃការចរចា។ជាទិសដៅការងារបន្ត ឯកឧត្តមរដ្ឋមន្រ្តី បានគូសបញ្ជាក់ថាក្រសួងនឹងជំរុញការងារបណ្ឌិត្យសភាវិទ្យាសាស្រ្តកសិកម្ម និងមន្ទីរពិសោធន៍ជាតិ ដើម្បីជំរុញការងារស្រាវជ្រាវ និងការងារពិសោធឱ្យមានភាពបន្ស៊ីគ្នា មាននវានុវត្តន៍ខ្ពស់ និងអាចបម្រើគ្រប់អនុវិស័យទាំងអស់ក្នុងវិស័យកសិកម្ម។ ទន្ទឹមនឹងនេះ ឯកឧត្តម បានលើកទឹកចិត្តដល់ថ្នាក់ដឹកនាំ និងមន្រ្តីរាជការទាំងអស់ត្រូវបន្តខិតខំបំពេញការងារ និងចេះផ្សព្វផ្សាយនូវសមិទ្ធផលនានា ដើម្បីទទួលបានការគាំទ្រ និងការទទួលស្គាល់ពិតប្រាកដពីសាធារណជន ដែលជាគុណាធិបតេយ្យនៃមន្រ្តីរាជការគ្រប់លំដាប់ថ្នាក់ សំដៅឈានឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០៕

លោកជំទាវ ចម និម្មល អញ្ជើញជាអធិបតីក្នុងពិធីបើក «ទិវាសហគ្រិនភាពកម្ពុជា ឆ្នាំ២០២៤»

2024/12/30 12:23:22 pm        151
Facebook Telegram Linkin
នាព្រឹកថ្ងៃចន្ទ ទី៣០ ខែធ្នូ ឆ្នាំ២០២៤ នៅវិទ្យាស្ថានបច្ចេកវិទ្យាកម្ពុជា (សាលាតិចណូ) លោក​ជំទាវ ចម និម្មល រដ្ឋមន្ត្រីក្រសួងពាណិជ្ជកម្ម តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បាន​អញ្ជើញ​ជា​អធិបតី​ក្នុង​ពិធី​បើក “ទិវាសហគ្រិនភាពកម្ពុជា ឆ្នាំ២០២៤” ក្រោមប្រធានបទ “វិនិយោគ​លើ​សហគ្រិន​វ័យក្មេង ដើម្បី​សេដ្ឋកិច្ចថាមវន្ត និងបរិយាប័ន្ន” ដែលមានវត្តមានអញ្ជើញចូលរួមដោយ ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា (YEAC) ឧកញ៉ា គួច ផេង តំណាង​អង្គការ​បណ្ដាញ​សហគ្រិនសកលកម្ពុជា (GEN Cambodia) ឯកឧត្តម លោកជំទាវ ជាថ្នាក់​ដឹកនាំ​ក្រសួង-ស្ថាប័នពាក់ព័ន្ធ ភ្ញៀវជាតិ និងអន្តរជាតិ ព្រមទាំងម្ចាស់អាជីវកម្ម ក្រុមហ៊ុន សហគ្រាស ពីវិស័យឯកជន និងសិស្សានុសិស្សជាច្រើនរូប។ជាកិច្ចចាប់ផ្តើម លោកជំទាវរដ្ឋមន្ត្រី បានកោតសរសើរចំពោះសមាគមសហគ្រិនវ័យក្មេងកម្ពុជា (YEAC) និងអង្គការបណ្តាញសហគ្រិនសកលកម្ពុជា (GEN Cambodia) ដែលបាន​សហការ​រៀបចំ​​ទិវាប្រកបដោយអត្ថន័យនេះឡើង និងបាន​វាយ​តម្លៃ​ខ្ពស់​ចំពោះ​សមិទ្ធផល​សម្រេ​ច​បាន​ជា​ច្រើន​របស់ សមាគម ក្នុងរយៈពេលជាង១៥ឆ្នាំមកនេះ ព្រមទាំង​ការ​ចូលរួ​ម​ចំណែក​យ៉ាង​សំខាន់​របស់​សមាគមក្នុងការជំរុញការអភិវឌ្ឍសេដ្ឋកិច្ចជាតិ។លោកជំទាវរដ្ឋមន្ត្រី បន្តថា ប្រធានបទនៃទិវាសហគ្រិនភាពកម្ពុជាឆ្នាំនេះ បាន​សបញ្ជាក់​ពី​តួនាទី​ដ៏​សំខាន់​របស់​សហគ្រិនវ័យក្មេង ក្នុងការបង្កើតការប្រកួតប្រជែងលើអាជីវកម្ម ពាណិជ្ជកម្មប្រកប​ដោយ​ការ​ច្នៃប្រឌិត បណ្តុះនូវឯកទេសនិងជំនាញជាក់លាក់ ក្តាប់បាននូវឱកាសថ្មីៗ នៃ​ការ​ធ្វើ​ធុរកិច្ច និង​វិនិយោគ ជាពិសេសការធ្វើការពាណិជ្ជូបនីយកម្មឌីជីថល។លោកជំទាវរដ្ឋមន្ត្រី បន្ថែមថា វេទិកានេះនឹងផ្តល់នូវសារៈសំខាន់ជាសារវន្ត ទាំងលើការ​ចែក​រំលែក​ព័ត៌មាន បទពិសោធន៍ល្អៗពីវាគ្មិននិងតួអង្គពាក់ព័ន្ធ ព្រមទាំង​កសាង​នូវ​បណ្តាញ​ទំនាក់​ទំនង​គ្នា​កាន់​តែ​ប្រសើរ ដល់អ្នកចូលរួមទាំងអស់ផងដែរ។លោកជំទាវរដ្ឋមន្ត្រី គូសបញ្ជាក់ថា សហគ្រិនវ័យក្មេង ប្រកបដោយថាមវន្ត និងវិស័យឯកជន ដែលរឹងមាំ គឺជាតួអង្គដែលមិនអាចខ្វះបាន ក្នុងការអភិវឌ្ឍសេដ្ឋកិច្ច ព្រោះសហគ្រិន ម្ចាស់​អាជីវកម្ម និងវិស័យឯកជន គឺជាសរសៃឈាមនៃសេដ្ឋកិច្ចកម្ពុជាយើង។មុននឹង​បញ្ចប់ លោកជំទាវរដ្ឋមន្ត្រី បានលើកទឹកចិត្ត និងស្នើឱ្យវិនិយោគិន សមាជិក សហគ្រិន​វ័យក្មេង សហគ្រាសធុនមីក្រូ តូច និងមធ្យម រួមគ្នាសិក្សាស្វែងយល់ពីបញ្ហាប្រឈម និងស្វែងរ​ក​ដំណោះ​ស្រា​យ ព្រមទាំងបន្តអភិវឌ្ឍសមត្ថភាព និងឯកទេសនីយកម្មរបស់ខ្លួន ដោយត្រូវ​តាម​ឱ្យ​ទាន់ការ​វិវត្តន៍របស់វិទ្យាសាស្រ្ត បច្ចេកវិទ្យា សេដ្ឋកិច្ច-សង្គម ដែលមានការប្រែប្រួល​យ៉ាង​ឆាប់​រហ័ស ការប្រកួតប្រជែង ក្នុងយុគ្គសម័យឌីជីថល។ លើសពីនេះ ចាំបាច់ត្រូវ​រួម​សហការ​គ្នាប្រ​កប​ដោយ​ភាព​បុរេសកម្ម និងអន្តរសកម្មបំផុតក្នុងការចាប់យកនូវកាលានុវត្តភាពជាសក្តានុពល ដើម្បី​ជំរុញ​កំណើន​សេដ្ឋកិច្ច-ពាណិជ្ជកម្ម និងលើកកម្ពស់សុខមាលភាពសង្គមឱ្យកាន់តែប្រសើរ៕

វិស័យឧស្សាហកម្មក្នុងឆ្នាំ២០២៥ នឹងមានកំណើន ៨,៦% គាំទ្រដោយវិស័យកាត់ដេរ និងមិនមែនកាត់ដេរ

2024/12/26 03:37:51 pm        171
Facebook Telegram Linkin
វិស័យឧស្សាហកម្មនៅឆ្នាំក្រោយនេះ ត្រូវបានព្យាករថានឹងមានកំណើន ៨,៦% ខ្ពស់ជាង​ឆ្នាំ២០២៤ ដែលគាំទ្រដោយការរក្សាបាន តុល្យភាពនៃអនុវិស័យកាត់ដេរ និងកម្មន្តសាល​មិនមែន​កាត់ដេរ ខណៈអនុវិស័យសំណង់ នៅបន្តមានកំណើនទាបជាងនិន្នាការធម្មតា មុនវិបត្តិជំងឺកូវីដ-១៩។តាមសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ បើយោងលើការវាយតម្លៃ នៃក្របខ័ណ្ឌហិរញ្ញវត្ថុសាធារណៈ រយៈពេលមធ្យម របស់រាជរដ្ឋាភិបាលសម្រាប់ឆ្នាំ២០២៥ សេដ្ឋកិច្ចកម្ពុជានឹងបន្តនិន្នាការកើនឡើង ដោយរំពឹងថា នឹងសម្រេចបាន កំណើនក្នុងរង្វង់ ៦,៣% ដែលធ្វើឱ្យ ផ.ស.ស. ថ្លៃបច្ចុប្បន្នស្ថិតក្នុងរង្វង់ជិត ២១០ ពាន់ប៊ីលានរៀល សមមូលនឹងប្រមាណជាង ៥១ ពាន់លានដុល្លារអាមេរិក ស្របពេលដែល ផ.ស.ស. សម្រាប់មនុស្សម្នាក់ ត្រូវបានរំពឹងថា នឹងកើនឡើងដល់ ២ ៩២៤ ដុល្លារអាមេរិក បើធៀបនឹងប្រមាណ ២ ៧១៣ ដុល្លារអាមេរិក ក្នុងឆ្នាំ២០២៤ ដែលគាំទ្រដោយវិស័យសេដ្ឋកិច្ចសំខាន់ៗរួមមាន វិស័យឧស្សាហកម្ម, សេវា និងវិស័យកសិកម្ម។ ចំណែកទាក់ទិនវិស័យឧស្សាហកម្ម, សម្រាប់ឆ្នាំ ២០២៥ ខាងមុខនេះ ត្រូវបានព្យាករថានឹងមានកំណើន ៨,៦% ដែលគាំទ្រ ដោយការរក្សាបានតុល្យភាព នៃអនុវិស័យកាត់ដេរ និងកម្មន្តសាលមិនមែនកាត់ដេរ ក្នុងនោះសម្រាប់អនុវិស័យកាត់ដេរ ត្រូវបានរំពឹង ថា នៅបន្តរក្សាបានកំណើនប្រហាក់ប្រហែលមុនវិបត្តិជំងឺកូវីដ-១៩, ដោយសារភាពប្រសើរនៃតម្រូវការសកល គួបផ្សំនឹងការពង្រឹងការ អនុវត្តយុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា ២០២២-២០២៧ ដែលនឹងលើកកម្ពស់បរិយាកាស វិនិយោគ និងភាពប្រកួតប្រជែងជាមួយនឹងការបង្កើនផលិតភាពពលកម្ម។ ចំណែកអនុវិស័យកម្មន្តសាលមិនមែនកាត់ដេរ, ត្រូវបានព្យាករថា នឹងបន្តរក្សាបានកំណើនរឹងមាំ ដោយសារការរំពឹងពីការបន្ត កើននៃតម្រូវការខាងក្រៅ ដែលនឹងបន្តជំរុញការនាំចេញផលិតផលកម្មន្តសាលមិនមែនកាត់ដេរ ស្របពេលដែលឧស្សាហកម្មបម្រើឱ្យ ទីផ្សារក្នុងស្រុក ត្រូវបានរំពឹងថា នឹងបន្តកើនក្រោមការដាក់ចេញនូវវិធានការគន្លឹះរបស់រាជរដ្ឋាភិបាល សំដៅជំរុញសហគ្រាសធុនតូច និងមធ្យមក្នុងវិស័យអាទិភាព។ ស្របគ្នានេះ អនុវិស័យផលិតកម្មម្ហូបអាហារ និងភេសជ្ជៈ ក៏ត្រូវបានព្យាករថានឹងបន្តកំណើនល្អ ខណៈ ដែលអនុវិស័យសំណង់ ត្រូវបានព្យាករថាបន្តកំណើនទាបជាងនិន្នាការធម្មតា ដោយសារការរំពឹងពីការងើបវិញយឺត នៃរំហូរវិនិយោគ ទុនពីបរទេស។ចំណែកវិស័យសេវាកម្ម នៅក្នុងឆ្នាំ ២០២៥ ខាងមុខនេះ, ត្រូវបានព្យាករថា នឹងមានកំណើន ៥,៦% ដោយសារការបន្តបាន ចលនានៃការអនុវត្តបដិសណ្ឋារកិច្ច សេវាកម្មម្ហូបអាហារ និងសេវាកម្មទេសចរណ៍គាំទ្រផ្សេងៗ ខណៈដែលអនុវិស័យអចលនទ្រព្យ នៅបន្តមានកំណើនទាប។ ដោយឡែកវិស័យកសិកម្មវិញ, នៅក្នុងឆ្នាំក្រោយនេះដែរ ត្រូវបានព្យាករថា មានកំណើន ១,១% ដោយ សារការរំពឹងទុកនូវកំណើនល្អ នៃអនុវិស័យដំណាំនិងចិញ្ចឹមសត្វ និងការងើបឡើងវិញសន្សឹមៗនៃអនុវិស័យនេសាទ៕ អត្ថបទ៖ សុន រ៉ាឌី

កម្ពុជា-វៀតណាម បើកវេទិកាពិភាក្សាស្វែងយល់ពីកាលានុវត្តភាពធុរកិច្ច និងវិនិយោគនៅកម្ពុជា

2024/12/26 01:57:12 pm        105
Facebook Telegram Linkin
កម្ពុជា-វៀតណាម បើកវេទិកាដើម្បីបង្កលក្ខណៈសម្រាប់វិនិយោគិននៃប្រទេសទាំងពីរ ដើម្បី​បង្កើត​ទំនាក់ទំនង និងបណ្តាញ ព្រមទាំងពិភាក្សាស្វែងយល់ និងផ្លាស់ប្តូរនូវព័ត៌មាន​សំខាន់ៗ​ពាក់​ព័ន្ធ​នឹង​សក្តានុពល និងកាលានុវត្តភាពធុរកិច្ច និងវិនិយោគនៅប្រទេស កម្ពុជា ពិសេស​ពាក់ព័ន្ធ​កិច្ច​សហប្រតិបត្តិការពាណិជ្ជកម្មឆ្លងដែន និងសេដ្ឋកិច្ចឌីជីថល។ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា លើក​ឡើង​នៅ​ក្នុង​វេទិកា​ជំរុញ​ពាណិជ្ជ​កម្ម និងវិនិយោគ កម្ពុជា-វៀតណាម ស្តីពីការបង្កើនកិ​ច្ច​សហ​ប្រតិបត្តិការ​ពាណិជ្ជ​កម្ម​ឆ្លង​ដែន និងសេដ្ឋកិច្ចឌីជីថល នៅរសៀលថ្ងៃទី២៥ ខែធ្នូ ម្សិលមិញ ក្នុងនោះឯកឧត្តមអគ្គលេខាធិការ បាន​គូសបញ្ជាក់អំពីសារៈសំខាន់ នៃពាណិជ្ជកម្មតាមប្រព័ន្ធអេទ្បិចត្រូនិក ដែល​កំពុង​វិវឌ្ឍ​យ៉ាង​ឆាប់រហ័ស នៅក្នុងបរិបទសង្គមនាពេលបច្ចុប្បន្ន និងនិន្នាការសកលនៃយុគសម័យឌីជីថល ហើយ​បានចូលរួមចំណែកក្នុងការកាត់បន្ថយ ថ្លៃដើម និងពេលវេលា, បង្កើនការលក់ និងផលិតភាព ព្រម​ទាំងលទ្ធភាពក្នុងការពង្រីកវិសាលភាពទីផ្សារបានលឿនរហ័ស។ឯកឧត្តម បានលើកទឹកចិត្តដល់វិនិយោគិនវៀតណាម បន្តមកបណ្តាក់ទុនវិនិយោគនៅកម្ពុជា ឬ​ចាប់​ដៃគូវិនិយោគជាមួយ ក្រុមហ៊ុនក្នុងប្រទេសកម្ពុជាឱ្យបានកាន់តែច្រើន ជាពិសេស​លើ​វិស័យ​ដែល​មាន​សក្ដានុពលខ្ពស់ ដែលអាចតភ្ជាប់ខ្សែច្រវាក់ផ្គត់ផ្គង់ ផលិតកម្ម​នៅ​ប្រទេស​វៀតណាម​ដូចជា​៖ កសិកម្ម និងកសិ-ឧស្សាហកម្ម, កម្មន្តសាលគ្រឿងបង្គុំយានយន្ត និងអេឡិចត្រូនិក, បច្ចេកវិទ្យាឌីជីថល បច្ចេកវិទ្យាហិរញ្ញវត្ថុ, និងឧស្សាហកម្មកម្មន្តសាលដទៃទៀត ព្រមទាំង​បាន​អំពាវ​នាវ​ដល់វិនិយោគិន និងធុរជន ដែលមិនទាន់បានវិនិយោគនៅកម្ពុជា ឱ្យអញ្ជើញ​មក​សិក្សា​ស្វែង​យល់​បន្ថែម អំពីសក្តានុពលដ៏សម្បូរបែប និងកាលានុវត្តភាពជាច្រើន និងរួសរាន់​ធ្វើ​ការ​សម្រេច​ចិត្ត​ដើម្បីទាញយកផលប្រយោជន៍ពីការវិនិយោគនៅកម្ពុជា។សូមបញ្ជាក់ជូនផងដែរថា នៅក្នុងរយៈពេល ១១ ខែ ឆ្នាំ២០២៤ ចំពោះអ្ន​ក​វិនិយោគ​មក​ពី​ប្រទេស​វៀតណាម មកបណ្តាក់ទុននៅ កម្ពុជា មានទុនវិនិយោគជាប់ចំណាត់ថ្នាក់ទី៣ ដែល​មាន​ទំហំ​ទឹក​ប្រាក់សរុបប្រមាណ ៥៥៧ លានដុល្លារអាម៉េរិក ខណៈដែលនៅក្នុង វិច្ឆិកា កន្លងមកនេះ, វៀត​ណាមជាប់លំដាប់លេខ១ លើការមកបណ្តាក់ទុកនៅកម្ពុជា៕ អត្ថបទ៖ សុន រ៉ាឌី

អគ្គនាយកដ្ឋានពន្ធដារ បញ្ជ្រាបការយល់ដឹងលើការអនុវត្តច្បាប់ដល់សមាគម និងអង្គការនានា

2024/12/25 12:20:11 pm        77
Facebook Telegram Linkin
អគ្គនាយកដ្ឋានពន្ធដារ បញ្ជ្រាបការយល់ការដឹងបន្ថែម អំពីការអនុវត្តច្បាប់ និង​លិខិត​បទ​ដ្ឋាន​គតិ​យុត្ត​ស្តីពី​ពន្ធដារ ដល់គ្រប់សមាគម និងអង្គការមិនមែនរដ្ឋាភិបាល ក៏ដូចជាអ្នកជាប់ពន្ធទាំងអស់ សំដៅ​ពង្រឹង​អនុលោមភាពសារពើពន្ធ និងលើកកម្ពស់វប្បធម៌បង់ពន្ធ ដើម្បីឆ្លើយតប​ទៅ​នឹង​ការ​វិវត្ត​នៃសង្គម និងសេដ្ឋកិច្ចជាតិ ។ឯកឧត្តមបណ្ឌិត ម៉ិញ បានកុសល អគ្គនាយករងនៃអគ្គនាយកដ្ឋានពន្ធដារ ក្នុងសិក្ខាសាលាស្តីពី “កាតព្វកិច្ច និងនីតិវិធីក្នុង ការធ្វើបច្ចុប្បន្នភាពពន្ធដារ ស្របតាមច្បាប់​ស្ដីពី​សារ​ពើពន្ធ​សម្រាប់​សមាគម និងអង្គការមិនមែនរដ្ឋាភិបាល” នៅថ្ងៃ ២៣ ធ្នូ នេះ, ឯកឧត្តមបណ្ឌិត ក៏បាន​សម្តែង​នូវ​ការ​វាយ​តម្លៃ​ខ្ពស់​ចំពោះ​សិក្ខាកាមទាំងអស់ ដែលមានវត្តមានចូលរួម​នៅក្នុង​កម្ម​វិធី​សិក្ខា​សាលា​នេះ ដែលបានឆ្លុះបញ្ចាំងឱ្យឃើញអំពីការយកចិត្តទុកដាក់ខ្ពស់ក្នុងការពង្រឹង និងបង្កើន​ការ​យល់​ដឹង​បន្ថែម​អំពីច្បាប់ និងលិខិតបទដ្ឋាន គតិយុត្តស្តីពីពន្ធដារ ជាពិសេស​ធ្វើការ​ស្វែង​យល់​ឱ្យ​បាន​កាន់​តែ​ស៊ីជម្រៅថែមទៀត ចំពោះកាតព្វកិច្ចសារពើពន្ធ សម្រាប់សកម្មភាព អាជីវកម្ម ដោយ​ឡែក​បន្ថែម​លើ​សកម្មភាពគោលដៅសុទ្ធសាធរបស់សមាគម និងអង្គការមិនមែនរដ្ឋាភិបាល ដើម្បី​ចូល​រួម​បំពេញកាតព្វកិច្ចសារពើពន្ធ ក្នុងឋានៈជាអ្នកជាប់ពន្ធ និងឋានៈជាភ្នាក់ងារកាត់ទុក ឱ្យ​បាន​ត្រឹម​ត្រូវ​ស្របតាមច្បាប់ និងលិខិតបទដ្ឋាន គតិយុត្តស្តីពីពន្ធដារជាធរមាន។ ឯកឧត្ដមបណ្ឌិតអគ្គនាយករង បានគូស​បញ្ជាក់​អំពី​ការ​ខិតខំ​ប្រឹង​ប្រែង​របស់​អគ្គ​នាយក​ដ្ឋាន​ពន្ធដារ ក្នុងការលើកកម្ពស់ និង បញ្ជ្រាបវប្បធម៌បង់ពន្ធ ឱ្យបានជ្រួតជ្រាបដល់គ្រប់សមាគម និង​អង្គការ​មិន​មែនរដ្ឋាភិបាល ក៏ដូចជាអ្នកជាប់ពន្ធទាំងអស់ ដើម្បីឱ្យយល់ ដឹង​កាន់​តែ​ច្បាស់​អំពី​កាតព្វកិច្ចសារពើពន្ធ និងការវិវត្តឥតឈប់ឈរនៃការធ្វើទំនើបកម្មរដ្ឋបាលសារពើពន្ធ សំដៅ​ធ្វើ​ការ​ប្រែក្លាយ​ស្ថាប័ន ជាតិមួយនេះ ឱ្យមានលក្ខណៈទំនើប ដែលអាចឆ្លើយតបទៅនឹងការវិវត្តនៃសង្គម និង​សេដ្ឋកិច្ចជាតិ ក្នុងដំណាក់កាល ប្រែប្រួលថ្មី ក៏ដូចជា​បរិបទ​នៃ​សមាហរណ​កម្ម​សេដ្ឋកិច្ច​កម្ពុជា​ទៅ​ក្នុង​តំបន់ និងពិភពលោក។ឯកឧត្តមបណ្ឌិត ម៉ិញ បានកុសល បានជំរុញនិងលើកទឹកចិត្តសិក្ខាកាមទាំងអស់ ចូល​រួម​ឱ្យ​បាន​សកម្ម​នៅ​ក្នុងសិក្ខាសាលានេះ តាមរយៈការលើកជាមតិយោបល់ សំណួរមួយចំនួន ដើម្បីផ្តល់ និង​ស្រូប​យក​ធាតុចូល ព្រមទាំងចែករំលែកជាចំណេះដឹង ចំណេះធ្វើ បទពិសោធអនុវត្ត និង​បទ​ប្បញ្ញត្តិ​ ដើម្បីជាប្រយោជន៍​ជា​ចំណេះដឹង​សម្រាប់​បំពេញ​កាតព្វកិច្ច​សារ​ពើ​ពន្ធ​ឱ្យ​បាន​ត្រឹម​ត្រូវ​តាម​ច្បាប់ និងលិខិតបទដ្ឋានគតិយុត្តជាធរមាន សំដៅពង្រឹងវប្បធម៌នៃការបង់ពន្ធ និង​អនុ​លោម​ភាព​សារ​ពើពន្ធ​។សូមបញ្ជាក់ថា នៅក្នុងសិក្ខាសាលានេះ បានធ្វើបទបង្ហាញស្ដីពី "នីតិវិធីចុះបញ្ជី និង​បច្ចុប្បន្ន​កម្ម​ស្រប​តាម​ច្បាប់ស្តីពីសារពើពន្ធ សម្រាប់ សមាគម និងអង្គការ​មិនមែន​រដ្ឋាភិបាល” ដែល​មាន​ចំណុច​សំខាន់​ៗចំនួនបីរួមមាន៖ ១.ច្បាប់ និងលិខិតបទដ្ឋានគតិយុត្តពាក់ព័ន្ធ, ២. បែបបទ​ និង​នីតិ​វិធី​សម្រាប់​ការបំពេញកាតព្វកិច្ចចុះបញ្ជី និងបច្ចុប្បន្នកម្ម, និង៣. មធ្យោបាយដាក់ពាក្យស្នើសុំ និង​ការតាំងឬព្យួរ បង្ហាញឯកសារចុះបញ្ជីពន្ធដារ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

បេសកជនអង្គការសហប្រជាជាតិ ជួបជាមួយមន្ត្រីហ៊ួទី បន្ទាប់ពីបុគ្គលិក ត្រូវបានគេចាប់ឃុំខ្លួន
01/27/2025 02:01 PM
Facebook Telegram Linkin
សម្ព័ន្ធអារ៉ាប់និយាយថា ផែនការជម្លៀសប្រជាជនប៉ាឡេស្ទីនចេញពីហ្កាហ្សា គឺជា«ការបោសសម្អាតជនភាគតិច »
01/27/2025 02:01 PM
Facebook Telegram Linkin
បញ្ហាសន្តិសុខ និងអគ្គិភ័យនៅផ្សារទួលទំពូង ត្រូវបានត្រៀមធានាសុវត្ថិភាពយ៉ាងប្រសើរល្អ ក្នុងឱកាសបុណ្យចូលឆ្នាំចិន-វៀតណាម
01/27/2025 02:01 PM
Facebook Telegram Linkin
អ្នកឃ្លាំមើលសង្គ្រាម ព្រមានពីការកើនឡើងអំពើហិង្សាផ្នែកសាសនាគួរឲ្យព្រួយបារម្ភ នៅប្រទេសស៊ីរី
01/27/2025 02:01 PM
Facebook Telegram Linkin
គណៈប្រតិភូជប៉ុន១២០នាក់ ទស្សនកិច្ចអាកាសយានដ្ឋានអន្តរជាតិតេជោ ខណៈការសាងសង់សម្រេចបានជាង ៩៤%
01/27/2025 02:01 PM
Facebook Telegram Linkin
ក្រុមប្រឹក្សាសន្តិសុខ UN ទាមទារឱ្យក្រុមឧទ្ទាម M23 បញ្ឈប់ការវាយលុកនៅភាគខាងកើតកុងហ្គោ
01/27/2025 02:01 PM
Facebook Telegram Linkin
ទីភ្នាក់ងារសុខភាពសហព័ន្ធសហរដ្ឋអាមេរិក បញ្ឈប់ការធ្វើបច្ចុប្បន្នភាពគេហទំព័រ
01/27/2025 02:01 PM
Facebook Telegram Linkin
ក្រសួងបរិស្ថានសហការជាមួយរដ្ឋបាលថ្នាក់ក្រោមជាតិពង្រឹងវិធានការទប់ស្កាត់ និងកាត់បន្ថយការបំពុលខ្យល់សាធារណៈ
01/27/2025 02:01 PM
Facebook Telegram Linkin
ចិន ហាមឃាត់ការនាំចូលផលិតផលបសុសត្វពីប្រទេសជាច្រើន ដោយសារក្ដីបារម្ភពីជំងឺ
01/27/2025 02:01 PM
Facebook Telegram Linkin
UN៖ កុមារជាង ១៣.០០០នាក់ស្លាប់ និងរាប់ម៉ឺននាក់របួស ក្នុងសង្រ្គាមដ៏បង្ហូរឈាមនៅហ្កាហ្សា
01/27/2025 02:01 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.