BTV NEWS

សម្តេចតេជោ ហ៊ុន សែន ណែនាំដល់មន្ត្រីរក្សាសន្តិសុខសណ្តាប់ធ្នាប់សង្គមឲ្យបានល្អ ពិសេសបទល្មើសអនឡាញត្រូវបង្ក្រាបកុំអោយងើបឡើងវិញអោយសោះ

សម្តេចតេជោ ហ៊ុន សែន ណែនាំដល់មន្ត្រីយកចិត្តទុកដាក់គ្រប់គ្រងនិងមើលថែដល់អតីតយុទ្ធជន និងនិវត្តជននៅតាមមូលដ្ឋាន

សម្តេច ហ៊ុន សែន អញ្ជើញ ជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានាជុំវិញខេត្ត កំពង់ចាម

កម្ពុជា និងលីទុយអានី ប្ដេជ្ញាជំរុញកិច្ចសហប្រតិបត្តិការទ្វេភាគីលើវិស័យសក្តានុពលឱ្យកាន់តែស៊ីជម្រៅ

ព័ត៌មានសំខាន់ៗ

សម្តេចតេជោផ្តល់អនុសាសន៍៦ចំណុចឱ្យមន្ត្រីអប់រំបន្តយកចិត្តទុកដាក់ពង្រឹងគុណភាពអប់រំបន្ថែមទៀត

ភ្នំពេញ ៖ ក្នុងឱកាសអញ្ជើញជាធិបតីបិទសន្និបាតបូកសរុបការងារអប់រំនៃក្រសួងអប់រំ យុវជននិងកីឡា នៅវិទ្យាស្ថានពហុបច្ចេកវិទ្យា(តិចណូ) នារសៀលថ្ងៃទី១២មេសានេះសម្តេចតេជោ ហ៊ុន សែន នាយករដ្ឋមន្ត្រីកម្ពុជាបានផ្តល់អនុសាសន៍៦ចំណុចឱ្យមន្ត្រីអប់រំបន្តយកចិត្តទុកដាក់ជាបន្តទៀត ដើម្បីពង្រឹងគុណភាពអប់រំឱ្យកាន់តែប្រសើរឡើង។អញ្ជើញថ្លែងបិទសន្និបាតនាឱកាសនោះ សម្ដេចបានកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីអប់រំព្រមទាំងដៃគូអភិវឌ្ឍន៍ ដែលបានចូលរួមធ្វើ ឱ្យវិស័យអប់រំមានការរីកចម្រើន ជាពិសេសកិច្ចការកំណែទម្រង់លើវិស័យអប់រំ ដោយជោគជ័យ ហើយសម្ដេចក៏បានផ្ដល់នូវអនុសាសន៍ចំនួន៦ចំណុចបន្ថែមទៀត ជូនដល់មន្ត្រីអប់រំគ្រប់លំដាប់ថ្នាក់ ៖ទី១. បន្តពង្រឹង និងអភិវឌ្ឍន៍ប្រព័ន្ធអប់រំឲ្យកាន់តែរឹងមាំមានភាពបុរេសកម្មនិងឆ្លើយតបទៅនឹងបរិការណ៍ជាតិនិងអន្តរជាតិ។ ជាមួយនេះ ការធានាបានសេវាអប់រំដែលមានប្រសិទ្ធភាព គុណភាពប្រកបដោយសមធម៌និងបរិយាប័ន្ន ព្រមទាំងលើកកម្ពស់ឱកាសក្នុងការសិក្សាពេញមួយជីវិតសម្រាប់ទាំងអស់គ្នា ជាពិសេសត្រូវខិតខំរិះរកវិធានការឲ្យកាន់តែមានប្រសិទ្ធភាពដើម្បីលើកកម្ពស់លទ្ធផលសិក្សារបស់សិស្សនៅគ្រប់កម្រិត។ទី២. ការអភិវឌ្ឍសមត្ថភាពស្ថាប័នព្រមទាំងមន្ត្រីអប់រំឲ្យបានពេញលេញនិងភាពរស់រវើកនិងប្រទាក់ក្រឡាគ្នាតាមរយៈធានាភាពស័ក្តិសិទ្ធនិងភាពជាអ្នកដឹកនាំនិងការគ្រប់គ្រងរបស់មន្ត្រីអប់រំគ្រប់លំដាប់ថ្នាក់រួមទាំងការកែទម្រង់គ្រឹះស្ថានបណ្ដុះបណ្ដាលគ្រូ ការលើកកម្ពស់ប្រសិទ្ធភាពហិរញ្ញប្បទានសហប្រតិបត្តិការ ការកសាងគោលនយោបាយនិងផែនការអប់រំនិងការអភិវឌ្ឍន៍វិជ្ជាជីវៈជាប្រចាំសម្រាប់បុគ្គលិកអប់រំនិងគ្រូបង្រៀន។ទី៣. បន្តអភិវឌ្ឍន៍ការអប់រំ ឌីជីថលសម្រាប់ការបណ្ដុះបណ្ដាល ធនធានមនុស្សនៅក្នុងបរិការណ៍បដិវត្តន៍កម្មសង្គមនិងសេដ្ឋកិច្ចឌីជីថលដោយត្រូវធ្វើសមាហរណកម្មវិស័យបច្ចេកវិទ្យាឌីជីថលនៅក្នុងកម្មវិធីសិក្សាគ្រប់កម្រិតនៃប្រព័ន្ធអប់រំ បំពាក់បន្ទប់ពិសោធន៍ឌីជីថល តភ្ជាប់បណ្ដាញអគ្គិសនីនិងអ៊ីនធឺណិតនៅតាមគ្រឹះស្ថានសិក្សានិង លើកកម្ពស់គុណវឌ្ឍ និងសមត្ថភាពឌីជីថល ដល់គ្រូបង្រៀនការបញ្ចូលការប្រើប្រាស់បច្ចេកវិទ្យាទៅក្នុងការបង្រៀននិងរៀន ការកែលម្អមាតិកាឌីជីថលនិងការបង្កើតមជ្ឈមណ្ឌលអប់រំឌីជីថលនិងផ្សព្វផ្សាយវេទិកាឌីជីថល ឱ្យកាន់តែទូលំទូលាយនិងគ្រប់ជ្រុងជ្រោយ។ទី៤. អនុវត្តឱ្យកាន់តែសកម្មលើការងារកាយរិទ្ធនិងការអភិវឌ្ឍន៍យុវជនដើម្បីឲ្យកុមារនិងយុវជនមានស្មារតីទទួលខុសត្រូវមានជំនឿលើសមត្ថភាពរបស់ខ្លួន និងប្រកាន់ខ្ជាប់នូវទង្វើវិជ្ជមានក្នុងសង្គមមានសីលធម៌ក្នុងការរស់នៅក្នុងភាពជាពលរដ្ឋល្អតាម រយៈការបំផុសចលនាកូនល្អសិស្សល្អមិត្តល្អពលរដ្ឋល្អ។ ជាមួយនេះ ត្រូវជំរុញលើកទឹកចិត្តឲ្យបន្តកម្មវិធីយុវជនស្ម័គ្រចិត្តចុះជួយដល់មូលដ្ឋាននៅតាមសហគមន៍ព្រមទាំងបណ្ដុះបណ្ដាលជំនាញបច្ចេកទេសនិងជំនាញទុនដល់យុវជនសំដៅឆ្លើយតបបានទៅនឹងឱកាសការងារនិងភាពរឹងមាំនៃកោសិកាសង្គម។ទី៥. បន្តលើកកម្ពស់វិស័យកីឡាដើម្បីកសាងមនុស្សគ្រប់រូបឲ្យមានសុខភាពនិងសុខមាលភាពល្អ កាយសម្បទាមាំមួន ឆន្ទៈមោះមុត អំណត់ព្យាយាម មានវិន័យ មានស្មារតីក្រុម គំនិតច្នៃប្រឌិត និងមានការតស៊ូស្វិតស្វាញសំដៅដណ្ដើមបានលទ្ធផលល្អក្នុងការប្រកួតកីឡានៅលើឆាកអន្តរជាតិនិងមានជីវភាពសមស្រប កីឡា ប្រកបដោយភាពសុខដុមរមនាក្នុងសង្គមក្រោមម្លប់សន្តិភាពព្រមទាំងបន្តជំរុញចលនាយុវជនម្នាក់ចេះកីឡាមួយប្រភេទ យ៉ាងតិចប្រចាំជីវិត។ទី៦. បន្តលើកកម្ពស់សុខភាពអនាម័យនៅតាមគ្រឹះស្ថានសិក្សា ត្រៀមវិធានការឆ្លើយតបនិងចូលរួមទប់ស្កាត់ គ្រឿងញៀន និងបង្កើនការអប់រំ អំពីសុវត្ថិភាពសុខភាពសិក្សា សុវត្ថិភាពចំណីអាហារដល់បុគ្គលិកអប់រំនិងសិស្សានុសិស្សកែលម្អហេដ្ឋារចនាសម្ព័ន្ធសុខភាពដូចជារៀបចំបន្ទប់សុខភាព ស្តង់ដារបរិស្ថានសាលារៀនបៃតង សាលាស្អាតគ្មានសំរាម លើកកម្ពស់ការប្រើប្រាស់ទឹកស្អាតនិង អនាម័យផ្ដោតលើទឹកទទួលទាន កន្លែងលាងដៃ បង្គន់អនាម័យលើកកម្ពស់អាហារូបត្ថម្ភដែលផ្ដោតលើសុវត្ថិភាពចំណីអាហារនិងការផ្ដល់អាហារតាមសាលារៀនការអប់រំអំពីសុខភាពសិក្សាការហាត់ប្រាណនិងលេងកីឡា។ទន្ទឹមនេះសម្ដេចបានបង្ហាញសុទិដ្ឋិនិយម ចំពោះសមិទ្ធផលសន្និបាតនិងអនុសាសន៍សំខាន់ៗដែលសម្ដេចបានលើកឡើងខាងលើនេះឲ្យក្លាយទៅជាមូលដ្ឋានប្រកបដោយតម្លាភាពប្រសិទ្ធភាពសម្រាប់អនុវត្តក្នុងវិស័យអប់រំកម្ពុជានៅឆ្នាំសិក្សាថ្មីនិងឆ្នាំសិក្សាជាបន្តបន្ទាប់៕

អបអរសាទរ! កម្ពុជាបានបំបែកឯតទគ្គកម្ម «បេះដូងច្រើនជាងគេនៅលើពិភពលោក» ចំនួន៣,៩១៧,៨០៥ បេះដូង

សៀមរាប ៖ នេះគឺជាមោទកភាពមួយសម្រាប់កម្ពុជា ដែលបានបំបែកកំណត់ត្រាពិភពលោកថ្មីមួយទៀត គឺ «បេះដូងច្រើនជាងគេនៅលើពិភពលោក» ដែលបានរៀបចំធ្វើនៅក្នុងប្រាសាទអង្គរវត្ត ខេត្តសៀមរាប។តាមរយៈការត្រួតពិនិត្យ និងរាប់ដោយអ្នកជំនាញការរបស់ Guinness World Records បានបង្ហាញថា បេះដូងដែលកើតចេញពីទឹកចិត្តរបស់ប្រជាជនកម្ពុជាសម្រាប់បំបែកកំណត់ត្រានាពេលនេះមានចំនួន៣,៩១៧,៨០៥ បេះដូង ដែលចំនួននេះគឺច្រើនជាងការរំពឹងទុករបស់ក្រុមការងារនៃយុទ្ធនាការ Beyond The Games ។គួរជម្រាបជូនថា ឯតទគ្គកម្ម Guinness World Records ដែលកម្ពុជាបំបែកបាននាពេលនេះ គឺបំបែកលើ កំណត់ត្រា ចាស់ របស់ប្រទេសអង់គ្លេសដែលធ្លាប់បំបែកកំណត់ត្រាកាលពីឆ្នាំ ២០១៩ ដែលមានចំនួនបេះដូងត្រឹមតែ ៥៣៧០៤ បេះដូង។ បេះដូងក្រដាសដ៏ច្រើនសន្ធឹងសន្ធាប់នេះ កើតចេញពីទឹកចិត្តរបស់ប្រជាជនខ្មែរគ្រប់ទិសទីដែលបានស្ម័គ្រចិត្តបត់ ដើម្បីរួមចំណែកក្នុងការបំបែកកំណត់របស់ពិភពលោក ដែលនេះសបញ្ជាក់ឱ្យឃើញពី កម្លាំងសាមគ្គីភាព ជាធ្លុងមួយរបស់ខ្មែរ ពោលគឺ «ខ្មែរអាចធ្វើបាន»។ ម្យ៉ាងវិញទៀត តាមរយៈព្រឹត្តិការណ៍ដ៏អស្ចារ្យនេះនឹង ឱ្យពិភពលោ ស្គាល់កាន់តែច្បាស់ពីកម្ពុជា ដ្បិតកម្ពុជាជាប្រទេសតូចតែ កម្ពុជាមានបេះដូងដ៏ធំ។ «បេះដូងច្រើនជាងគេនៅលើពិភពលោក» ដែលបានបំបែកឯតទគ្គកម្មពិភពលោក នេះគឺគំនិតការផ្ដួចផ្ដើមមួយដែលមានឈ្មោះថា បេះដូងនៃក្ដីសង្ឃឹម (Paper Heart) នៃយុទ្ធនាការ Beyond The Games ក្រោមមូលបទ «បេះដូងលោតក្នុងចង្វាក់តែមួយ»។ គោលបំណងនៃយុទ្ធនាការនេះធ្វើឡើង មិនត្រឹមតែបំបែកកំណត់ត្រាពិភពលោកប៉ុណ្ណោះទេ ថែមទាំងដើម្បីចូលរួមអបអរខួប ១០ឆ្នាំនៃព្រឹត្តិការណ៍អង្គរសង្ក្រាន្ត និងដើម្បីលើកទឹកចិត្ត និងបង្ហាញសេចក្ដីស្រឡាញ់ដល់អត្តពលិក កីឡាករ គ្រូបង្វឹក និងអ្នកគាំទ្រផងដែរ សម្រាប់ព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះនៃការប្រកួត៕ អត្ថបទ៖ ចេន សុជាតា

ការបោះឆ្នោតសកលប្រទេសថៃ៖ គណបក្សនយោបាយផ្តល់ការសន្យាមុនការបោះឆ្នោតថ្ងៃទី១៤ ឧសភា

ថៃ៖ ប្រទេសថៃនឹងរៀបចំការបោះឆ្នោតសកលរបស់ខ្លួននៅថ្ងៃទី១៤ ខែឧសភា។ សភារបស់ប្រទេសត្រូវបានរំលាយកាលពីខែមុន ជាការត្រួសត្រាយផ្លូវសម្រាប់អ្វីដែលអាចជាការបោះឆ្នោតប្រជែងដ៏តានតឹង រវាងគណបក្សជាគូប្រជែង។ គណបក្សប្រឆាំងធំគឺគណបក្សភឿថៃ ដែលត្រូវបានគ្រប់គ្រងដោយគ្រួសារមហាសេដ្ឋីលោក ស៊ីណាវ៉ាត់ ត្រូវបានគេរំពឹងថានឹងឡើងប្រជែងជាមួយគណបក្សនានា ដែលស្របទៅតាមការបង្កើតឡើងរបស់ប្រទេសថៃ។ នាយករដ្ឋមន្ត្រីបច្ចុប្បន្នលោក ប្រាយុទ្ធ ចាន់អូចា នឹងឈរឈ្មោះក្នុងការបោះឆ្នោតជាមួយគណបក្សរួមសាងជាតិថៃ (United Thai Nation) ហើយឧបនាយករដ្ឋមន្ត្រីលោក Prawit Wongsuwan នឹងដឹកនាំគណបក្ស Palang Pracharath (PPRP)។ គណបក្សធំៗផ្សេងទៀតដែលចូលរួមក្នុងការបោះឆ្នោតនាពេលខាងមុខ រួមមានគណបក្សប្រឆាំងដែលកំពុងរីកចម្រើនគឺគណបក្សអនាគតឆ្ពោះទៅមុខ (The Move Forward Party) ព្រមទាំងគណបក្សប្រជាធិបតេយ្យ និងគណបក្ស Bhumjaithai។ យោងតាមសារព័ត៌មាន The Nation Thailand បានឲ្យដឹងថា គណបក្សដែលដឹកនាំដោយលោក ប្រាយុទ្ធ បាននិយាយថា គណបក្សនេះនឹងបង្កើតមូលនិធិមួយដើម្បីរក្សាតម្លៃផលិតផលកសិកម្ម ដើម្បីផ្តល់ជំនួយដល់វិស័យនេះ។ កសិករដាំស្រូវនឹងត្រូវផ្តល់ឲ្យនូវការឧបត្ថម្ភធនចំនួន ២ពាន់បាតក្នុងមួយរ៉ៃ ហើយគណបក្សនេះនិយាយថា ខ្លួននឹងដោះស្រាយការទន្ទ្រានលើដីរដ្ឋដោយការបង្កើតផែនទី។ គណបក្សរួមសាងជាតិថៃ (UNITED THAI NATION PARTY) នឹងជួយឲ្យប្រសើរឡើងហេដ្ឋារចនាសម្ព័ន្ធក្នុងច្រករបៀងសេដ្ឋកិច្ច ដើម្បីបំពេញស្តង់ដារអន្តរជាតិ និងជំរុញសក្ដានុពលសេដ្ឋកិច្ចប្រទេស៕អត្ថបទ៖ ប៊ុនថន

មនុស្សជាង ២០០នាក់បានស្លាប់ក្នុងការបាញ់ប្រហារទ្រង់ទ្រាយធំនៅអាមេរិករហូតមកដល់ពេលនេះនៅឆ្នាំនេះ

អាមេរិក៖ មនុស្សជាង ២០០នាក់បានស្លាប់នៅក្នុងការបាញ់ប្រហារទ្រង់ទ្រាយធំ នៅសហរដ្ឋអាមេរិករហូតមកដល់ពេលនេះនៅឆ្នាំនេះ បន្ទាប់ពីការវាយប្រហារកាលពីព្រឹកថ្ងៃចន្ទនៅធនាគារមួយក្នុងទីក្រុង Louisville រដ្ឋ Kentucky ជាការបាញ់ប្រហារទ្រង់ទ្រាយធំបំផុត និងជាការបាញ់ប្រហារមានមនុស្សស្លាប់ច្រើននៅពេលនេះក្នុងឆ្នាំនេះ ក្នុងរយៈពេលយ៉ាងហោចណាស់មួយទសវត្សរ៍មកនេះ។ យោងតាមបណ្ណសារអំពើហិង្សាដោយអាវុធ ដែលបានចាប់ផ្តើមតាមដានទិន្នន័យអំពើហិង្សាដោយអាវុធក្នុងឆ្នាំ២០១៣ និងឯកសារការបាញ់ប្រហារដែលក្នុងនោះមនុស្សយ៉ាងតិច ៤នាក់បានស្លាប់ ឬរបួសមិនរាប់បញ្ចូលអ្នកបាញ់ប្រហារបានឲ្យដឹងថា ការបាញ់ប្រហារកាលពីព្រឹកថ្ងៃចន្ទក្នុងរដ្ឋ Kentucky បានបណ្តាលឲ្យមនុស្ស ៥នាក់ស្លាប់ រួមទាំងជនវាយប្រហារដែលសង្ស័យ បាននាំឱ្យចំនួនជនរងគ្រោះនៃការបាញ់ប្រហារនៅឆ្នាំ២០២៣ នេះកើនឡើងដល់ ២០៩នាក់។ រហូតមកដល់ពេលនេះមានការបាញ់ប្រហារទ្រង់ទ្រាយធំចំនួន ១៤៦លើកនៅទូទាំងប្រទេសក្នុងឆ្នាំនេះ លើសពីការបាញ់ប្រហារចំនួន ១៣០លើកកាលពីឆ្នាំ២០២២ ដែលបានបណ្ដាលឲ្យមនុស្សចំនួន ១៤៥នាក់ស្លាប់ ព្រមទាំងការបាញ់ប្រហារទ្រង់ទ្រាយធំចំនួន ១៣៦លើកដែលបណ្ដាលឱ្យមានអ្នកស្លាប់ចំនួន ១៦៥នាក់កាលពីឆ្នាំ២០២១។ អំពើហិង្សាដោយអាវុធមិនបានថយចុះនោះទេនៅសហរដ្ឋអាមេរិក៕អត្ថបទ៖ ប៊ុនថន

ពលរដ្ឋអ៊ីស្រាអែលរាប់ពាន់នាក់ធ្វើបាតុកម្មទៅកាន់ប៉ុស្តិ៍ជួរមុខខុសច្បាប់នៅតំបន់ West Bank

អ៊ីស្រាអែល៖ ប្រជាជនរបស់ប្រទេសអ៊ីស្រាអែលរាប់ពាន់នាក់ រួមមានទាំងរដ្ឋមន្ត្រីរដ្ឋាភិបាលបានចេញដើរធ្វើបាតុកម្មឆ្ពោះទៅកាន់ប៉ុស្តិ៍ជួរមុខនៅ Evyatar ដែលត្រូវបានជម្លៀសចេញនៅតំបន់ West Bank កាលពីថ្ងៃចន្ទ ដើម្បីគាំទ្រដល់ការពង្រីកការតាំងទីលំនៅឋាន ខណៈភាពតានតឹងបានកើនឡើងរវាងអ៊ីស្រាអែល និងប៉ាឡេស្ទីន។ ដោយមានគ្រវីទង់ជាតិអ៊ីស្រាអែល និងស្រែកពាក្យអំពីសាសនា និងច្រៀងបទចម្រៀង ពលរដ្ឋអ៊ីស្រាអែលមកពីទូទាំងប្រទេសបានចេញដើរធ្វើបាតុកម្មឆ្ពោះទៅកាន់ប៉ុស្តិ៍ជួរមុខ ខណៈការតវ៉ាប្រឆាំងប៉ាឡេស្ទីនត្រូវបានធ្វើឡើងនៅក្បែរនោះ។ អឌ្ឍចន្ទក្រហមដែនដីប៉ាឡេស្ទីនបាននិយាយថា ជនប៉ាឡេស្ទីន ១៩១នាក់បានរងរបួសនៅក្នុងការតវ៉ាប្រឆាំងនេះ។ រលកនៃការវាយប្រហាររបស់ប៉ាឡេស្ទីនប្រឆាំងអ៊ីស្រាអែល បានបណ្តាលឲ្យពលរដ្ឋអ៊ីស្រាអែល និងភ្ញៀវទេសចរ ១៩នាក់ស្លាប់រួចហើយចាប់តាំងពីដើមឆ្នាំមក។ មន្ត្រីមន្ទីរពេទ្យបាននិយាយកាលពីថ្ងៃចន្ទថា ម្តាយរបស់បងប្អូនស្រីជនជាតិអ៊ីស្រាអែល ២នាក់ដែលបានស្លាប់កាលពីសប្តាហ៍មុន នៅក្នុងការការបាញ់ប្រហារនៅតំបន់ West Bank។ គោលនយោបាយជាច្រើនត្រូវបានអនុម័តដោយរដ្ឋាភិបាលអ៊ីស្រាអែលស្តាំនិយមថ្មី ដែលគាំទ្រដល់ការទទួលស្គាល់ និងការពង្រីកការតាំងទីលំនៅ។ កាលពីខែមុន សភាអ៊ីស្រាអែលបានត្រួសត្រាយផ្លូវ សម្រាប់ការវិលត្រឡប់មកវិញរបស់អ្នកតាំងលំនៅជនជាតិជ្វីហ្វ ទៅកាន់ការតាំងទីលំនៅឋានចំនួន ៤កន្លែងនៅតំបន់ West Bank ដោយធ្វើវិសោធនកម្មច្បាប់ឆ្នាំ២០០៥ ដែលបញ្ជាឱ្យមានការជម្លៀសពួកគេ ជាទង្វើមួយត្រូវបានថ្កោលទោសដោយអាជ្ញាធរប៉ាឡេស្ទីន និងសហភាពអឺរ៉ុប។ កងទ័ពអ៊ីស្រាអែលបានបាញ់ឧស្ម័នបង្ហូរទឹកភ្នែកទៅលើពលរដ្ឋប៉ាឡេស្ទីន ខណៈក្រោយមកបានគប់ដុំថ្មនៅក្នុងភូមិ Beita តំបន់ West Bank កាលពីថ្ងៃចន្ទ ខណៈប្រជាជនអ៊ីស្រាអែលរាប់ពាន់នាក់ រួមទាំងរដ្ឋមន្ត្រីរដ្ឋាភិបាលបានដើរក្បួនបាតុកម្មឆ្ពោះទៅកាន់ទីតាំងលំនៅ Evyatar ដែលត្រូវបានជម្លៀសចេញ។ បុរស ស្ត្រី និងកុមារបានដើរដង្ហែគ្នាតាមដងផ្លូវដ៏ច្របូកច្របល់ទៅកាន់ទីតាំងលំនៅខុសច្បាប់ ដោយមួយចំនួនកាន់ទង់ជាតិ ដើម្បីគាំទ្រដល់ការពង្រីកការតាំងទីលំនៅ និងក្នុងការតវ៉ាប្រឆាំងការវាយប្រហារនាពេលថ្មីៗនេះរបស់ប៉ាឡេស្ទីន៕អត្ថបទ៖ ប៊ុនថន

គេរំពឹងថា លោក Trump អាចនឹងអង្គុយស្ដាប់ការបំភ្លឺបណ្ដឹងស៊ីវិលមួយផ្សេងទៀតនៅសប្ដាហ៍នេះ ក្រោយឡើងសវនាការនៅ New York

អាមេរិក៖ ប្រភពមួយចំនួនបានប្រាប់ទូរទស្សន៍ CNN ថា អតីតប្រធានាធិបតីអាមេរិកលោក Donald Trump ត្រូវគេរំពឹងថានឹងវិលត្រឡប់ទៅកាន់ទីក្រុង New York វិញ ដើម្បីប្រឈមការតតាំងផ្លូវច្បាប់មួយផ្សេងទៀតនៅថ្ងៃព្រហស្បតិ៍សប្ដាហ៍នេះ ពេលនេះជាបណ្ដឹងរដ្ឋប្បវេណីដែលត្រូវបានដាក់ទៅតុលាការដោយរដ្ឋអាជ្ញាក្រុង New York លោក Letitia James។ លោក Trump គ្រោងចូលរួមស្ដាប់សម្ដីសាក្សីបំភ្លឺបណ្ដឹងរដ្ឋប្បវេណីប្រឆាំងលើរូបលោក កូនៗរបស់លោក និងអង្គការ Trump ដោយចោទប្រកាន់ថា ពួកគេជាប់ពាក់ព័ន្ធនឹងគម្រោងដែលបានចំណាយប្រាក់យ៉ាងច្រើន សម្រាប់អតីតប្រធានាធិបតីរូបនេះក្នុងការប្រើដើម្បីផលប្រយោជន៍ផ្ទាល់ខ្លួន។ លោក Trump ធ្លាប់បានអង្គុយស្ដាប់ការបំភ្លឺករណីនេះកាលពីខែសីហា ឆ្នាំ២០២២ នៅពេលរូបលោកបានច្រានចោលមិនព្រមផ្ដល់ចម្លើយ ដោយផ្អែកតាមសិទ្ធិវិសោធនកម្មមាត្រាទី៥ ប្រឆាំងការចោទប្រកាន់លើរូបលោកដល់ទៅជាង ៤០០សំណួរ។ មួយខែក្រោយមក ការិយាល័យរដ្ឋអាជ្ញាបានដាក់បណ្ដឹងដើម្បីព្យាយាមស្វែងរកប្រាក់ ២៥០លានដុល្លារអាមេរិក និងបានហាមប្រាមសមត្ថភាពរបស់លោក Trumps ក្នុងកិច្ចការធុរកិច្ចនៅក្នុងសហរដ្ឋអាមេរិក។ ករណីនេះគ្រោងនឹងជំនុំជម្រះនៅខែតុលា។ លោក Trumps បានទាត់ចោលការចោទប្រកាន់នេះ។ កាលពីសប្ដាហ៍មុន អតីតប្រធានាធិបតីរូបនេះត្រូវបានឡើងសវនាការ និងផ្ដល់ចម្លើយពីភាពគ្មានទោសដែលត្រូវបានចោទប្រកាន់ចំនួន ៣៤ករណីនៅ New York ទាក់ទងនឹងការខ្លែងបន្លំឯកសារធុរកិច្ច ក្រោយការស៊ើបអង្កេតក្នុងសំណុំរឿងបង់ប្រាក់បំបិទមាត់ទៅឲ្យតារាភាពយន្តអាសអាភាសនាង Stormy Daniels៕អត្ថបទ៖ សុខមាន

ទស្សនាកម្រងរូបភាព នៃការរាប់បេះដូងបំបែកកំណត់ត្រាឯតទគ្គកម្មពិភពលោក ក្រោមទិសស្លោក “បេះដូងលោតក្នុងចង្វាក់តែមួយ”

គណៈកម្មការកំណត់ត្រាឯតទគ្គកម្មពិភពលោក ចាប់ផ្តើមដំណើរការត្រួតពិនិត្យ និងការរាប់បេះដូងរបស់កម្ពុជា ក្នុងការបំបែកកំណត់ត្រាពិភពលោក ខណៈដែលពិធីប្រកាសផ្លូវការនឹងចាប់ផ្តើមនៅវេលាម៉ោង៤រសៀលថ្ងៃទី១១ ខែមេសា ឆ្នាំ២០២៣ នៅមុខប្រាសាទអង្គរវត្ត។ការរាប់បេះដូងបំបែកកំណត់ត្រាឯតទគ្គកម្មពិភពលោក ក្រោមទិសស្លោក “បេះដូងលោតក្នុងចង្វាក់តែមួយ” ក្នុងន័យគាំទ្រ លើកទឹកចិត្ត និងបង្ហាញសេចក្ដីស្រឡាញ់ដល់កីឡាករ គ្រូបង្វឹក និងអ្នកគាំទ្រផងដែរ គ្រប់ដំណាក់កាលតាំងពីការត្រៀមប្រកួត ការប្រកួត និងក្រោយការប្រកួត នៃព្រឹត្តិការណ៍កីឡាអាស៊ីអាគ្នេយ៍(SEA Games) និងកីឡាអាស៊ានប៉ារ៉ាហ្គេមឆ្នាំ២០២៣។

សមាជិកសភាគណបក្សប្រជាធិបតេយ្យជំរុញឲ្យប្រធានចៅក្រមស៊ើបអង្កេតដំណើរកម្សាន្តរបស់ចៅក្រម Thomas

អាមេរិក៖ គណបក្សប្រជាធិបតេយ្យនៅក្នុងគណៈកម្មាធិការនីតិកម្មព្រឹទ្ធសភា បានអំពាវនាវដល់ប្រធានចៅក្រមតុលាការកំពូលរបស់សហរដ្ឋអាមេរិកលោក John Roberts កាលពីថ្ងៃចន្ទដើម្បីបើកការស៊ើបអង្កេតលើការទទួលយកការធ្វើដំណើរចំណាយប្រាក់ដ៏ច្រើន ដែលមានការលាក់បាំងដោយចៅក្រមលោក Clarence Thomas និងភរិយារបស់លោកដែលត្រូវបានរ៉ាប់រងការចំណាយ ដោយម្ចាស់ជំនួយធំសមាជិកនៃគណបក្សសាធារណរដ្ឋ។ លិខិតនោះនិយាយថា គណៈកម្មការនេះគ្រោងបើកសវនាការក្នុងពេលប៉ុន្មានថ្ងៃខាងមុខ យោងតាមភាពចាំបាច់ក្នុងការស្ដារទំនុកចិត្តឡើងវិញនៅក្នុងក្រមសីលធម៌តុលាការកំពូល។ ហើយប្រសិនបើតុលាការកំពូលមិនដោះស្រាយបញ្ហានេះដោយខ្លួនឯងទេនោះ គណៈកម្មការនេះនឹងពិចារណាបោះឆ្នោតលើច្បាប់នេះ។ វិធាននេះក៏នឹងត្រូវការជាចាំបាច់ផងដែរ នូវការគាំទ្រពីសភាដឹកនាំដោយគណបក្សសាធារណរដ្ឋ ដើម្បីឲ្យក្លាយជាច្បាប់ពេញលេញ។ សមាជិកព្រឹទ្ធសភាមកពីគណបក្សប្រជាធិបតេយ្យចំនួន ១១រូបបានសរសេរលិខិតផ្ញើទៅកាន់លោក Roberts ថា យើងជំរុញឲ្យលោកធ្វើបែបនេះ តែលោកមិនចាំបាច់រង់ចាំសភាទទួលខុសត្រូវ ចំពោះការស៊ើបអង្កេតរបស់លោកលើការប្រព្រឹត្តដែលបានរាយការណ៍ និងធានាថានឹងមិនអាចឲ្យមានករណីនេះកើតឡើងទៀតឡើយ។ សារព័ត៌មាន ProPublica បានរាយការណ៍ថា លោក Thomas វ័យ ៧៤ឆ្នាំ និងភរិយារបស់លោកឈ្មោះ Virginia បានធ្វើដំណើរតាមនាវា និងយន្តហោះឯកជនរបស់ម្ចាស់ជំនួយគឺលោក Crow ព្រមទាំងស្នាក់នៅរមណីយដ្ឋានឯកជនរបស់លោកនៅភ្នំ Adirondack នៃទីក្រុងញូវយ៉ក។ ដំណើរកម្សាន្តទៅកាន់ប្រទេសឥណ្ឌូនេស៊ីក្នុងឆ្នាំ២០១៩ ដែលអាចចំណាយអស់ជាង ៥០ម៉ឺនដុល្លារ ដើម្បីឲ្យលោក Thomas ជួលយន្តហោះ និងជិះនាវាកម្សាន្តដោយខ្លួនឯង៕អត្ថបទ៖ សុខមាន

សម្តេចតេជោ ហ៊ុន សែន បញ្ចប់មុខតំណែងមន្ត្រីជាន់ខ្ពស់ នៃរដ្ឋលេខាធិការដ្ឋានអាកាសចរស៊ីវិល ដែលអាងអំណាចប្រើប្រាស់អាវុធគំរាមកំហែងអ្នកដទៃ

ភ្នំពេញ៖ សម្តចតេជោ ហ៊ុន សែន នាយករដ្ឋមន្រ្តី តាមរយៈតេឡេក្រាមនៅមុននេះបន្តិច បានចេញអនុក្រឹត្យសម្រេចបញ្ចប់មុខតំណែងលោក បែល វ៉ាន់ដែត ពីអគ្គនាយករង នៃអគ្គនាយកដ្ឋានរដ្ឋបាល និងកិច្ចការទូទៅ នៃរដ្ឋលេខាធិការដ្ឋានអាកាសចរស៊ីវិល បន្ទាប់ពីបុគ្គលរូបនេះ អាងអំណាចហើយបានយកអាវុធទៅគំរាមកំហែងអ្នកទន់ខ្សោយកាលពីកន្លងទៅនេះ។បន្ថែមលើអនុក្រឹត្យនោះសម្តេចតេជោ ហ៊ុន សែន មានប្រសាសន៍ថា “បើតុលាការមិនចាត់ការតាមផ្លូវច្បាប់ទេទុកឲ្យខ្ញុំដាក់វិន័យតាមផ្លូវរដ្ឋសិន។ អាងមានអំណាចប្រើប្រាស់អាវុធគំរាមអ្នកទន់ខ្សោយ”។សម្តេចតេជោ ហ៊ុន សែន ព្រមានថា “នេះជាសារព្រមានចំពោះមន្ត្រីទាំងអស់សូមកុំអាងអំណាចធ្វើបាបអ្នកទន់ខ្សោយ ជាពិសេសសូមកុំប្រើប្រាស់អាវុធខុសច្បាប់”។គួរបញ្ជាក់ថា កាលពីយប់ថ្ងៃទី២៩ ខែមីនា ឆ្នាំ២០២៣កន្លងទៅនេះ បុគ្គល បែល វ៉ាន់ដែត បានយកកាំភ្លើងទៅគំរាមកំហែងដល់បុរសម្នាក់បន្ទាប់ពីមានករណីគ្រោះថ្នាក់ចរាចរណ៍រវាងរថយន្ត រ៉េងរ៉ូវើ ពណ៌ស និងរថយន្ត Ford Ranger ពណ៌ខ្មៅ រហូតធ្វើឲ្យម្ចាស់រថយន្ត រ៉េងរ៉ូវើ ខឹងជិះតាមដល់មុខផ្ទះ និងដកកាំភ្លើងភ្ជង់លើម្ចាស់រថយន្ត Ford Ranger តែម្តង។បន្ទាប់ពីមានហេតុការណ៍កើតឡើងជនរងគ្រោះមានឈ្មោះ ឆៃ វ៉ាន់ម៉ូលីវ័ន្ត ភេទប្រុស អាយុ២៣ឆ្នាំ ជានិស្សិត បានប្តឹងទៅនគរបាលក្នុងមូលដ្ឋាន ទើបនគរបាលខណ្ឌឫស្សីកែវ ស្រាវជ្រាវឃាត់ខ្លួន យកមកសួរនាំនៅនគរបាលខណ្ឌ។ បន្ទាប់ពីឃាត់ខ្លួនជនសង្ស័យ សមត្ថកិច្ចបានដកហូតអាវុធខ្លី១ដើម ម៉ាកGlook ពណ៌ខ្មៅ គ្រាប់១៣គ្រាប់ គ្មានច្បាប់អនុញ្ញាត , រថយន្តមួយគ្រឿងម៉ាក រ៉េងរ៉ូវើ ពណ៌ស ពាក់ស្លាកលេខ ភ្នំពេញ 2BL-0199។ ក្រោយពីចាប់ខ្លួនហើយ ភាគីទាំងពីរបានព្យាយាមសម្របសម្រួលបញ្ចប់វិវាទនៅក្រៅប្រព័ន្ធតុលាការ នៅប៉ុស្តិ៍នគបាលរដ្ឋបាលសង្កាត់ ច្រាំងចំរេះទី២ ខណ្ឌឫស្សីកែវ រាជធានីភ្នំពេញ ប៉ុន្តែមិនព្រមព្រៀងគ្នា ទើបនគរបាលសម្រេចកសាងសំណុំរឿងមកតុលាការ ដើម្បីចាត់ការតាមមនីតិវិធី។ បើតាមព័ត៌មានក្នុងស្រុកបានចុះផ្សាយថា លោកស្រី អ៊ុក រ៉េតគន្ធា ចៅក្រមស៊ើបសួរក្នុងសំណុំរឿងខាងលើនេះ បានដោះលែងជនសង្ស័យឈ្មោះ បែល វ៉ាន់ដែតដោយគ្រាន់តែដាក់ជនសង្ស័យរូបនេះ ឲ្យស្ថិតក្រោមការត្រួតពិនិត្យតាមផ្លូវតុលាការតែប៉ុណ្ណោះ ក្រោយពីលោក លឹម ប៊ុនហេង ព្រះរាជអាជ្ញារងអមសាលាដំបូងរាជធានីភ្នំពេញ បានចោទប្រកាន់ជនសង្ស័យនេះពីបទ គំរាមសម្លាប់ និងបទកាន់កាប់អាវុធដោយគ្មានការអនុញ្ញាត កាលពីព្រឹកថ្ងៃទី៣១ ខែមិនា ឆ្នាំ២០២៣កន្លងទៅនេះ។សម្តេចតេជោ ហ៊ុន សែន បញ្ជាឲ្យរដ្ឋមន្រ្តីក្រសួងយុត្តិធម៌ ធ្វើការជាមួយតុលាការកុំឲ្យជនល្មើស ឈ្មោះ បែល វ៉ាន់ដែត រួចផុតពីសំណាញ់ច្បាប់ និងនៅក្រៅឃុំមុនកាត់ទោសឲ្យសោះ ដើម្បីកុំឲ្យជនល្មើសដែលមានឈ្មោះខាងលើនេះ តាមគំរាមកំហែងដល់អ្នកដទៃទៀត៕(ដោយ៖ បាន ចក់)

ប្រសាសន៍សំខាន់ៗសម្ដេចតេជោ ក្នុងឱកាសសំណេះសំណាល និងពិសារអាហារសាមគ្គី ជាមួយម្ចាស់សហគ្រាសធុនតូច និងមធ្យម

ភ្នំពេញ៖ ប្រសាសន៍សំខាន់ៗរបស់ សម្ដេចតេជោ ហ៊ុន សែន នាយករដ្ឋមន្ដ្រី ក្នុងឱកាសអញ្ជើញជួប ជុំ សំណេះសំណាល និង ទទួលទានអាហារសាមគ្គី ជាមួយម្ចាស់សហគ្រាសធុនតូច និងមធ្យម នារសៀលថ្ងៃទី១០ ខែមេសា ឆ្នាំ២០២៣ នេះ។ខាងក្រោមជាខ្លឹមសារសំខាន់ៗរបស់សម្តេចតេជោ ហ៊ុន សែន ៖សម្តេចតេជោ ហ៊ុន សែន មានប្រសាសន៍ថា កាលពីមុនកម្ពុជាធ្លាប់តែ នាំចូលផលិតផល ជាច្រើន ដើម្បីយកមកប្រើប្រាស់នៅកម្ពុជា ប៉ុន្ដែតាមរយៈសហគ្រាសធុនតូច និងមធ្យម និង សិប្បកម្ម នៅ កម្ពុជា បានធ្វើឱ្យកម្ពុជាអាចផលិតសម្ភារប្រើប្រាស់ដែល ជាផលិតផល ក្នុងស្រុកដោយខ្លួនឯង។សម្ដេចតេជោ ហ៊ុន សែន៖ លើកទឹកចិត្តឱ្យមានការជួបជុំជាមួយមហាគ្រួសារ សហគ្រាសធុនតូច ធុនមធ្យម និង សិប្បកម្ម នៅកម្ពុជានៅឆ្នាំក្រោយៗទៀត ដើម្បីពិភាក្សា ផ្លាស់ប្ដូរយោបល់ និងស្វែងរកដំណោះស្រាយ នានារួមគ្នា។សម្តេចតេជោ ហ៊ុន សែន ថ្លែងថា រាជរដ្ឋាភិបាល តែងតែចាត់ទុក សហគ្រាសធុនតូច និងមធ្យម គឺជាដៃគូដ៏សំខាន់ក្នុងការចូលរួមចំណែកដល់ការអភិវឌ្ឍ និងកំណើនសេដ្ឋកិច្ច សង្គមរបស់កម្ពុជា។សម្ដេចតេជោ ហ៊ុន សែន មានប្រសាសន៍ថា រាជរដ្ឋាភិបាលបានរៀបចំច្បាប់ និង បទបញ្ញត្តិនានា ព្រមទាំងពន្ធគយ ដើម្បីជួយសម្រួលទៅដល់ដំណើរការអាជីវកម្ម នានារបស់សហគ្រាសធុនតូច និងមធ្យ ម។សម្តេចតេជោ ហ៊ុន សែន បានលើកទឹកចិត្តឱ្យសហគ្រិន ក្នុងវិស័យ សហគ្រាសធុនតូច និងមធ្យម និងសិប្បកម្មកម្ពុជា បង្កើនសមត្ថភាព ពង្រឹងភាពប្រកួតប្រជែងរបស់ខ្លួន ជាមួយគ្នានេះសម្ដេចតេជោ ជំរុញឱ្យក្រសួងស្ថាប័ន ដោះស្រាយនូវបញ្ហាប្រឈមនានា និងកាត់បន្ថយថ្លៃនៃការធ្វើធុរកិច្ចសំដៅជំរុញផលិតភាព នងភាពប្រកួតប្រជែងនៅកម្ពុជា។សម្តេចតេជោ ហ៊ុន សែន មានប្រសាសន៍ថា វត្តមានរបស់សហគ្រិន នៃសហគ្រាសធុនតូច និងមធ្យម និងសិប្បកម្មកម្ពុជានាពេលនេះគឺជាបណ្ដុំធនធាន សេដ្ឋកិច្ចក្រៅ ប្រព័ន្ធ របស់ កម្ពុជា។ សម្ដេចតេជោរម្លឹកថា កន្លងទៅមានទស្សនមួយចំនួនបានលើកឡើងថា ពួកគេតាំង ខ្លួនជាសមាគមនៃសេដ្ឋកិច្ចក្រៅប្រព័ន្ធ ប៉ុន្ដែពួកគេមិនដឹងទេថា រាជរដ្ឋាភិបាលកំពុងធ្វើអ្វី នោះគឺការផ្ដល់នូវលទ្ធភាពគ្រប់យ៉ាងដើម្បីគាំទ្រដល់សេដ្ឋកិច្ចក្រៅប្រព័ន្ធនោះឯង។សម្តេចតេជោ ហ៊ុន សែន បញ្ជាក់ថា ក្របខណ្ឌជំនួបជាមួយ សហគ្រាសធុនតូច និងមធ្យម និងសិប្បកម្មកម្ពុជា នាថ្ងៃនេះ គឺជាជំនួបរវាងរដ្ឋាភិបាល និងសេដ្ឋកិច្ចក្រៅប្រព័ន្ធ នេះបើនិយាយឱ្យធំទូលាយ។ ដូច្នេះសម្ដេចតេជោបានជំរុញឱ្យ សហគ្រាសធុនតូច និងមធ្យម និងសិប្បកម្មកម្ពុជា យកចិត្តទុកដាក់ជំរុញការកែច្នៃផលិតផលដែលមានស្រាប់នៅក្នុងប្រទេសកម្ពុជា ជាពិសេស សហគ្រាសធុនតូច និងមធ្យម និងសិប្បកម្មកម្ពុជា ដែលពាក់ព័ន្ធនឹងការកែច្នៃ ចំណីអាហាររបស់កម្ពុជាតែម្ដង។សម្តេចតេជោ ហ៊ុន សែន បានជំរុញដល់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ សហការជាមួយក្រសួងការងារ និងបណ្ដុះបណ្ដាលវិជ្ជាជីវៈ សមាគមសហគ្រាសធនតូច និងមធ្យម និងមូលនិធិសម្ដេចតេជោ ដើម្បីអភិវឌ្ឍសហគ្រាសធនតូច និងធម្យមនៅកម្ពុជា និងដើម្បីវាយតម្លៃសេចក្ដីត្រូវការ អភិវឌ្ឍសមត្ថភាពជំនាញ សហគ្រាសធនតូច និងធម្យម សម្របតាមតម្រូវការជាក់ស្ដែងដែលសហគ្រាសបាននឹងកំពុងជួបប្រទះ។

បណ្ដាញសង្គម

ព័ត៌មានថ្មីៗ

FIFA៖ ក្រុមបាល់ទាត់នារីជនភៀសខ្លួនអាហ្វហ្កានីស្ថានអាចចូលរួមប្រកួតអន្តរជាតិបាន

ឯកឧត្តម ហ៊ុន ម៉ានី អញ្ជើញដឹកនាំកិច្ចប្រជុំគណៈកម្មាធិការគ្រប់គ្រងប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ

កម្ពុជាគាំទ្រការប្រើប្រាស់ថាមពលនុយក្លេអ៊ែរដោយសន្តិវិធី

ក្រសួងសាធារណការបើកវគ្គបណ្ដុះបណ្តាលស្តីពី «បច្ចេកទេសសវនកម្មហានិភ័យសុវត្ថិភាពចរាចរណ៍ផ្លូវថ្នល់តាមនីតិវិធី iRAP Star Ratings» ក្រោមជំនួយបច្ចេកទេសរបស់ធនាគារអភិវឌ្ឍន៍អាស៊ី

ខ្សែការពារប្រេស៊ីល Eder Militao របួសសរសៃពួរត្រូវវះកាត់ ហើយនឹងអវត្តមានពី World Cup

មេដឹកនាំអ៊ុយក្រែន ថ្កោលទោសអ៊ីស្រាអែលចំពោះការទិញគ្រាប់ធញ្ញជាតិរបស់ខ្លួនដែលត្រូវបានគេលួច និងត្រៀមដាក់ទណ្ឌកម្ម

អ្នកនាំពាក្យរាជរដ្ឋាភិបាល៖ កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិ កម្ពុជា-ថៃ និងមិនទទួលស្គាល់ដាច់ខាតការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងរបស់ភាគីថៃ

មន្រ្ដីជាន់ខ្ពស់ក្រសួងសុខាភិបាល ណែនាំគ្រូពេទ្យត្រូវរក្សាតម្លៃវិជ្ជាជីវៈរបស់ខ្លួនឲ្យថ្លៃថ្នូរបម្រើសេវាដល់អ្នកជំងឺ

អង្គភាពស្រាវជ្រាវម៉ាក្រូសេដ្ឋកិច្ចអាស៊ាន+៣ សរសើរភាពធន់នៃសេដ្ឋកិច្ចកម្ពុជារក្សាបានអត្រាកំណើនល្អ ដោយសារមូលដ្ឋានសេដ្ឋកិច្ចរឹងមាំ

ក្រសួងការងារលើកទឹកចិត្តឲ្យសហជីព និងអង្គការសង្គមស៊ីវិលចូលរួមបង្កើតវប្បធម៌សុវត្ថិភាព និងសុខភាពការងារ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

សម្តេចតេជោផ្តល់អនុសាសន៍៦ចំណុចឱ្យមន្ត្រីអប់រំបន្តយកចិត្តទុកដាក់ពង្រឹងគុណភាពអប់រំបន្ថែមទៀត

អបអរសាទរ! កម្ពុជាបានបំបែកឯតទគ្គកម្ម «បេះដូងច្រើនជាងគេនៅលើពិភពលោក» ចំនួន៣,៩១៧,៨០៥ បេះដូង

ការបោះឆ្នោត​សកល​ប្រទេស​ថៃ​៖ គណបក្ស​នយោបាយ​ផ្តល់​ការសន្យា​មុន​ការបោះឆ្នោត​ថ្ងៃ​ទី​១៤ ឧសភា

ពលរដ្ឋ​អ៊ីស្រាអែល​រាប់ពាន់នាក់​ធ្វើបាតុកម្ម​ទៅកាន់​ប៉ុស្តិ៍​ជួរមុខ​ខុសច្បាប់​នៅ​តំបន់ West Bank

សមាជិកសភា​គណបក្ស​ប្រជាធិបតេយ្យ​ជំរុញ​ឲ្យ​ប្រធាន​ចៅក្រម​ស៊ើបអង្កេត​ដំណើរ​កម្សាន្ត​របស់​ចៅក្រម Thomas

ប្រសាសន៍សំខាន់ៗសម្ដេចតេជោ​ ក្នុងឱកាសសំណេះសំណាល និងពិសារអាហារសាមគ្គី ជាមួយម្ចាស់សហគ្រាសធុនតូច និងមធ្យម