BTV NEWS

សម្តេចតេជោ ហ៊ុន សែន ណែនាំដល់មន្ត្រីរក្សាសន្តិសុខសណ្តាប់ធ្នាប់សង្គមឲ្យបានល្អ ពិសេសបទល្មើសអនឡាញត្រូវបង្ក្រាបកុំអោយងើបឡើងវិញអោយសោះ

សម្តេចតេជោ ហ៊ុន សែន ណែនាំដល់មន្ត្រីយកចិត្តទុកដាក់គ្រប់គ្រងនិងមើលថែដល់អតីតយុទ្ធជន និងនិវត្តជននៅតាមមូលដ្ឋាន

សម្តេច ហ៊ុន សែន អញ្ជើញ ជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានាជុំវិញខេត្ត កំពង់ចាម

កម្ពុជា និងលីទុយអានី ប្ដេជ្ញាជំរុញកិច្ចសហប្រតិបត្តិការទ្វេភាគីលើវិស័យសក្តានុពលឱ្យកាន់តែស៊ីជម្រៅ

ព័ត៌មានសំខាន់ៗ

រាជរដ្ឋាភិបាលអញ្ជើញគ្រួសារងាយរងហានិភ័យក្នុងអំឡុងសម្ពាធអតិផរណាទៅបើកប្រាក់ឧបត្ថម្ភចាប់ពីថ្ងៃទី១០ ខែមេសា ឆ្នាំ២០២៣តទៅ

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី អញ្ជើញគ្រួសារងាយ រងហានិភ័យ ក្នុងអំឡុងពេលមានសម្ពាធអតិផរណា ដែលបានកំណត់អត្តសញ្ញាណរួច ទៅបើកប្រាក់ឧបត្ថម្ភចាប់ពីថ្ងៃទី១០ ខែមេសា ឆ្នាំ២០២៣ នេះតទៅ។ សូមបញ្ជាក់ថា កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា គឺជាកម្មវិធីជាតិគាំពារសង្គមមួយទៀត សម្រាប់ជួយគាំពារគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា ប្រមាណ ៥០ម៉ឺនគ្រួសារ ដែលមានបើកផ្តល់ចំនួន ៣ លើក ដោយលើកទីមួយ បានបើកផ្តល់រួចរាល់ នៅថ្ងៃទី ១០ ខែធ្នូ ឆ្នាំ២០២២ លើកទី២ ថ្ងៃទី១០ ខែមេសា និង លើកទី ៣ នៅថ្ងៃទី១០ ខែកក្កដា ឆ្នាំ២០២៣៕

ការបោះបង្គោលព្រំដែនកម្ពុជា-ឡាវ នៅសល់ប្រមាណជាង ១៤ភាគរយ

ភ្នំពេញ៖ ប្រទេសកម្ពុជា និងប្រទេសឡាវ បានព្រមព្រៀងគ្នា បោះបង្គោលព្រំដែនសម្រេចបានប្រមាណ ៨៦ភាគរយហើយ គឺនៅសល់តែជាង ១៤ភាគរយប៉ុណ្ណោះ ដោយភាគីទាំងពីរ ចង់ឲ្យព្រំដែនមានកិច្ចសហប្រតិបត្តិការល្អ សន្តិភាព សេដ្ឋកិច្ច និងការអភិវឌ្ឍជាដើម ។ឯកឧត្តម ម៉ម ប៊ុននាង អ្នកនាំពាក្យព្រឹទ្ធសភា មានប្រសាសន៍ថា នៅថ្ងៃទី៧ ខែមេសា ឆ្នាំ២០២៣នេះ គណៈកម្មាធិការអចិន្ត្រៃយ៍ព្រឹទ្ធសភា ក្រោមអធិបភាពសម្ដេចវិបុលសេនាភក្តី សាយ ឈុំ ប្រធានព្រឹទ្ធសភា បានពិនិត្យ សេចក្តីព្រាងច្បាប់ស្តីពី ការអនុម័តយល់ព្រមលើសន្ធិសញ្ញាកំណត់ព្រំដែនរដ្ឋ រវាងកម្ពុជា និងឡាវ ។ ឯកឧត្តមបានបន្តថា សេចក្តីព្រាងច្បាប់នេះ រៀបចំឡើងក្នុងគោលបំណងកសាងខ្សែព្រំដែនសន្តិភាព ស្ថិរភាព មិត្តភាព សហប្រតិបត្តិការ និងការអភិវឌ្ឍយូរអង្វែង ឈរលើមូលដ្ឋានគោរពឯករាជ្យ អធិបតេយ្យភាព និងបូរណភាពដែនដី សាមគ្គីភាពជាប្រពៃណីរវាងកម្ពុជា និងឡាវ ។ ឯកឧត្តមបានបន្តថា សេចក្តីព្រាងច្បាប់នេះ គឺជាកំណត់ត្រាទទួលយកលទ្ធផល នៃការត្រួតពិនិត្យខ្សែព្រំដែនរួម ប្រមាណ៨៦ភាគរយ ដែលប្រទេសទាំងពីរសម្រេចបានលើការងារព្រំដែន ដែលត្រូវបានរដ្ឋាភិបាលប្រទេសទាំងពីរ បានចុះហត្ថលេខា កាលពីថ្ងៃទី១៣ ខែកុម្ភៈ ឆ្នាំ២០២៣ នៅទីក្រុងវៀងច័ន្ទ នៃប្រទេសឡាវ ។ អ្នកនាំពាក្យព្រឹទ្ធសភា បានបន្ថែមថា ក្រៅពីទទួលយកសមិទ្ធផលដែលសម្រេចបានខាងលើ សន្ធិសញ្ញានេះ ក៏ជាឯកសារផ្លូវការដ៏មានសារៈសំខាន់បំផុត ដែលនឹងយកធ្វើជាមូលដ្ឋានក្នុងការបន្តចរចារ រកដំណោះស្រាយតំបន់ព្រំដែន ដែលនៅសល់ប្រមាណជាង ១៤ភាគរយ ដែលភាគីទាំងពីរ មិនទាន់សម្រេចបាន ។ គួរបញ្ជាក់ថា គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃទី១០ ខែមេសា ឆ្នាំ២០២៣ ដើម្បីបើកកិច្ចប្រជុំពេញអង្គ ពិនិត្យ និងឲ្យយោបល់ លើសេចក្តីព្រាងច្បាប់នេះផងដែរ ៕ អត្ថបទ បាន សុខរិទ្ធិ

រដ្ឋបាលរបស់លោក Biden ស្ដីបន្ទោសលោក Trump ចំពោះការដកទ័ពដ៏ចលាចលចេញពីប្រទេសអាហ្វហ្គានីស្ថាន

អាមេរិក៖ រដ្ឋបាលរបស់លោកប្រធានាធិបតីសហរដ្ឋអាមេរិក Joe Biden បានស្ដីបន្ទោសការដកកងទ័ពដ៏ចលាចលចេញពីប្រទេសអាហ្វហ្គានីស្ថាន លើអ្នកកាន់តំណែងមុនរបស់លោកគឺលោក Donald Trump នៅក្នុងរបាយការណ៍ថ្មីមួយ។ របាយការណ៍សង្ខេបកម្រាស់ ១២ទំព័រនិយាយថា លោក Biden ត្រូវបានរងបន្ទុកយ៉ាងធ្ងន់ធ្ងរដោយសារតែការសម្រេចចិត្តរបស់លោក Trump រួមទាំងកិច្ចព្រមព្រៀងឆ្នាំ២០២០ ជាមួយក្រុមតាលីបង់ក្នុងការបញ្ចប់សង្គ្រាម។ ប៉ុន្តែរបាយការណ៍នោះក៏បានទទួលស្គាល់ផងដែរថា រដ្ឋាភិបាលនេះគួរតែចាប់ផ្ដើមការជម្លៀសជនស៊ីវិលឲ្យបានឆាប់រហ័សជាងនេះ។ លោក Trump បានឆ្លើយតបថា សេតវិមានកំពុងលេងល្បែងបំភ័ន្តព័ត៌មាន។ ការដកកងទ័ពយ៉ាងច្របូកច្របល់កាលពីខែសីហា ឆ្នាំ២០២១ ពីប្រទេសអាហ្វហ្គានីស្ថាន បានបញ្ចប់សង្គ្រាមដ៏យូរបំផុតរបស់សហរដ្ឋអាមេរិក។ ទាហានសហរដ្ឋអាមេរិក ១៣នាក់ និងទាហានអាហ្វហ្គានីស្ថានជិត ២០០នាក់បានស្លាប់ ខណៈទាហានអាមេរិកប្រញាប់ប្រញាល់ជម្លៀសមនុស្សជាង ១២ម៉ឺននាក់ ក្នុងអំឡុងមានភាពចលាចលរយៈពេលប៉ុន្មានថ្ងៃ។ ក្រុមតំណាងរាស្ត្រមកពីគណបក្សសាធារណរដ្ឋនៅក្នុងសភាអាមេរិក ដែលកំពុងស៊ើបអង្កេតការដកកងទ័ពនោះបានទាមទារមើលរបាយការណ៍នោះជាច្រើនសប្ដាហ៍មកហើយ។ គួររម្លឹកថា កាលពីថ្ងៃទី២៦ ខែសីហា ឆ្នាំ២០២១ ការវាយប្រហារមួយនៅអាកាសយានដ្ឋានក្រុងកាប៊ុល ដោយខ្មាន់បំផ្ទុះគ្រាប់បែក ២នាក់បានសម្លាប់ជនជាតិអាហ្វហ្គានីស្ថានចំនួន ១៧០នាក់ និងទាហានអាមេរិក ១៣នាក់៕អត្ថបទ៖ សុខមាន

គណៈរដ្ឋមន្ត្រីបន្តលើកយកសេចក្តីព្រាងផែនការចរាចរណ៍ និងគម្រោងសាងសង់វារីអគ្គិសនីមកពិភាក្សា

ភ្នំពេញ៖នៅវិមានសន្តិភាព ទីស្តីការនាយករដ្ឋមន្ត្រី នាព្រឹកថ្ងៃទី៧មេសានេះ គណៈរដ្ឋមន្រ្តី បានបន្តបើកកិច្ចប្រជុំពេញអង្គ គណៈរដ្ឋមន្រ្តី ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីពិភាក្សា និងឆ្លងរបៀបវារៈចំនួន៣ ដែលបានលើកពេលកាលពីថ្ងៃសុក្រសប្តាហ៍មុន។គួរបញ្ជាក់ថា កិច្ចប្រជុំពេញអង្គគណៈរដ្ឋមន្ត្រី កាលពីថ្ងៃសុក្រសប្តាហ៍មុន គឺបានសម្រេចលើកយករបៀបវារៈដែលបានគ្រោងចំនួន៣ទៀត សម្រាប់ការពិភាក្សានៅក្នុងសម័យប្រជុំពេញអង្គគណៈរដ្ឋមន្ដ្រី នាថ្ងៃសុក្រ ២រោច ខែចេត្រ ឆ្នាំខាល ចត្វាស័ក ពស.២៥៦៦ ត្រូវនឹងថ្ងៃទី៧ ខែមេសា ឆ្នាំ២០២៣ នេះ រួមមាន៖-សេចក្តីព្រាងផែនការជាតិទសវត្សសកម្មភាពសុវត្ថិភាពចរាចរណ៍ផ្លូវគោក ឆ្នាំ២០២១-២០៣០។ -ការអភិវឌ្ឍគម្រោងវារីអគ្គិសនីស្ទឹងឬស្សីជ្រុំកណ្តាល អានុភាព ៧០ មេហ្គាវ៉ាត់ នៅ ស្រុកមណ្ឌលសីមា និងគម្រោងវារីអគ្គិសនីស្ទឹងវាលថ្មកំបុត អានុភាព ១០០ មេហ្គាវ៉ាត់ នៅស្រុកថ្មបាំង ខេត្តកោះកុង ផ្គួបគ្នា។-គម្រោងវិនិយោគស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព១៥០ មេហ្គាវ៉ាត់ ខេត្តពោធិ៍សាត់ , អានុភាព ៦០ មេហ្គាវ៉ាត់ ខេត្តកំពង់ឆ្នាំង, អានុភាព ៦០ មេហ្គាវ៉ាត់ ខេត្តស្វាយរៀង និងអានុភាព ៨០ មេហ្គាវ៉ាត់ ខេត្តព្រៃវែង៕

កូនស្រីរបស់លោក ថាក់ស៊ីន លោកស្រី ផៃថងថាន ស្ថិតក្នុងចំណោមបេក្ខជន ៣នាក់ដែលត្រូវតែងតាំងរបស់គណបក្សភឿថៃ

ថៃ៖ គណបក្សប្រឆាំងដែលនាំមុខគេក្នុងការស្ទង់មតិរបស់ប្រទេសថៃ បានតែងតាំងជាផ្លូវការលោកស្រី ផៃថងថាន ស៊ីណាវ៉ាត់ (Paetongtarn Shinawatra) ដែលជាសមាជិកនៃគ្រួសារស៊ីណាវ៉ាត់ ជាបេក្ខភាពនាយករដ្ឋមន្ត្រីម្នាក់ក្នុងចំណោមបេក្ខភាពនាយករដ្ឋមន្ត្រីចំនួន ៣នាក់របស់ខ្លួនតាមការរំពឹងទុកយ៉ាងទូលំទូលាយ ដោយធ្វើឲ្យលោកស្រីត្រូវប្រជែងជាមួយអតីតឧត្តមសេនីយ៍ ដែលកំពុងស្វែងរកការបន្តការគ្រប់គ្រងគាំទ្រដោយយោធាមានរយៈពេលជិតមួយទសវត្សរ៍។ លោកស្រី Paetongtarn ដែលជាកូនស្រីពៅរបស់អតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត់ និងត្រូវបានគេស្គាល់ថាលោកស្រី អ៊ុង អ៊ីង ត្រូវបានបញ្ជាក់ក្នុងការតែងតាំង រួមជាមួយមហាសេដ្ឋីអចលនទ្រព្យលោក Srettha Thavisin និងអតីតរដ្ឋមន្ត្រីក្រសួងយុត្តិធម៌ដែលត្រូវបានតែងតាំង ២ដងគឺលោក Chaikasem Nitisiri ជាបេក្ខភាពនាយករដ្ឋមន្ត្រីរបស់គណបក្សភឿថៃ នៅក្នុងព្រឹត្តិការណ៍មួយនៅទីក្រុងបាងកកកាលពីថ្ងៃពុធ។ អ្នកនយោបាយវ័យ ៣៦ឆ្នាំរូបនេះត្រូវបានគេមើលឃើញថា ជាអ្នកនាំមុខគេសម្រាប់តំណែងកំពូល ខណៈលោកស្រីបាននាំមុខគេសម្រាប់អ្នកចូលរួមប្រកួតប្រជែងផ្សេងទៀត រួមទាំងលោក Prayuth Chan-Ocha អតីតមេបញ្ជាការទ័ពដែលបានដណ្តើមអំណាចពីរដ្ឋាភិបាលគណបក្សភឿថៃក្នុងឆ្នាំ២០១៤ និងមេដឹកនាំគណបក្សអនាគតថ្មី (Move Forward) លោក Pita Limjaroenrat។ លោកស្រី Paetongtarn បានប្រាប់អ្នកគាំទ្ររាប់ពាន់នាក់ថា យើងនឹងនាំត្រឡប់មកវិញនូវលទ្ធិប្រជាធិបតេយ្យ និងភាពរុងរឿងរបស់ប្រទេសដែលបានបាត់បង់រយៈពេលជិត ១ទសវត្សរ៍មកហើយ។ យើងជឿថា បទពិសោធន៍ក្រោយរដ្ឋប្រហារគឺជាសុបិនដ៏អាក្រក់សម្រាប់ប្រជាជន។ អ្នកបានឆ្លងកាត់ទុក្ខលំបាកជាច្រើន។ យើងមិនចង់បានវាទៀតទេ យើងមិនចង់បានរដ្ឋប្រហារទៀតឡើយ។ ការបោះឆ្នោតសកលរបស់ថៃនៅថ្ងៃទី១៤ ខែឧសភា កំពុងតែក្លាយជាការប្រកួតប្រជែងរវាងក្រុមគាំទ្រលទ្ធិប្រជាធិបតេយ្យដឹកនាំដោយគណបក្សភឿថៃ និងគណបក្សអភិរក្សនិយមដឹកនាំដោយឧត្តមសេនីយ៍កំពុងកាន់អំណាច និងសម្ព័ន្ធមិត្តរបស់ពួកគេ៕អត្ថបទ៖ ប៊ុនថន

សម្តេចតេជោ ហ៊ុន សែន ណែនាំដល់សមាគមឧកញ៉ាកម្ពុជារួមចំណែកជាមួយរាជរដ្ឋាភិបាលអភិវឌ្ឍសេដ្ឋកិច្ច សង្គម និងកាត់បន្ថយភាពក្រីក្រប្រជាពលរដ្ឋ

ភ្នំពេញ៖ នៅព្រឹកថ្ងៃទី៦ ខែមេសា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រី បានអនុញ្ញាតឲ្យអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា ចូលជួបសំដែងការគួរសម។សម្តេចតេជោនាយករដ្ឋមន្ត្រី បានស្វាគមន៍យ៉ាងកក់ក្តៅ ចំពោះការផ្តួចផ្តើមបង្កើតឡើង នូវសមាគមឧកញ៉ាកម្ពុជា។ សម្តេចតេជោនាយករដ្ឋមន្ត្រី ក៏បានផ្តល់អនុសាសន៍ និងការណែនាំមួយចំនួនដល់សមាគមឧកញ៉ាកម្ពុជា ធ្វើយ៉ាងណាចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍសេដ្ឋកិច្ច និងសង្គម ពិសេសការកាត់បន្ថយភាពក្រីក្ររបស់ប្រជាពលរដ្ឋ។សម្តេចតេជោបានលើកទឹកចិត្តឱ្យឧកញ៉ាទាំងអស់ត្រូវពង្រឹងសាមគ្គីភាព រួមគ្នាជួយដល់កិច្ចការសង្គម ធ្វើសកម្មភាពមនុស្សធម៌ និងចេះជួយដល់ការលំបាករបស់ប្រជាពលរដ្ឋ។សម្តេចតេជោ ហ៊ុន សែន បានរំលឹកថា ការរស់នៅក្នុងសង្គមមួយបាន មិនអាចកាត់ផ្តាច់គ្នាឡើយរវាងអ្នកមាន និងអ្នកខ្សត់ខ្សោយ គឺត្រូវចេះយកអាសាគ្នា ដូចពាក្យចាស់បុរាណទូន្មានថា «អ្នកមានរក្សាខ្សត់ ដូចសំពត់ព័ទ្ធពីក្រៅ អ្នកប្រាជ្ញរក្សាខ្លៅ ដូចសំពៅពឹងសំប៉ាន»។សម្តេចតេជោនាយករដ្ឋមន្ត្រី បានយល់ព្រមធ្វើជាប្រធានកិត្តិយសរបស់សមាគម តាមការគោរពអញ្ជើញរបស់អ្នកឧកញ៉ា ប្រធានសមាគម និងទទួលស្គាល់ សមាគមឧកញ៉ាកម្ពុជា ជាស្ថាប័នឯកជនតែមួយគត់ ដែលតំណាងឲ្យអ្នកមានគោរមងារឧកញ៉ាទាំងអស់នៅកម្ពុជា។អ្នកឧកញ៉ា លី យ៉ុងផាត់ មានប្រសាសន៍ជំរាបជូនសម្តេចតេជោ អំពីការបង្កើតឡើងនូវសមាគមឧកញ៉ាកម្ពុជា ព្រមទាំងទស្សនវិស័យ និងបេសកកម្មរបស់សមាគម និងបានគោរពថ្លែងអំណរគុណយ៉ាងជ្រាលជ្រៅ ជូនចំពោះសម្តេចតេជោនាយករដ្ឋមន្ត្រី ដែលបានយល់ព្រមធ្វើជាប្រធានកិត្តិយស នៃសមាគមឧកញ៉ាកម្ពុជា។អ្នកឧកញ៉ា លី យ៉ុងផាត់ បានចាត់ទុកវត្តមានសម្តេចតេជោ ប្រធានកិត្តិយសរបស់សមាគ គឺជាការបង្ហាញនូវកាយវិការដ៏ថ្លៃថ្លារបស់សម្តេចតេជោក្នុងការយកចិត្តទុកដាក់ និងលើកស្ទួយដល់សមាគម ដើម្បីចូលរួមចំណែកជាមួយរាជរដ្ឋាភិបាល ធ្វើការអភិវឌ្ឍន៍សេដ្ឋកិច្ចជាតិ និងកសាងជាតិមាតុភូមិកម្ពុជាឱ្យកាន់តែរីកចម្រើន។អ្នកឧកញ៉ា លី យ៉ុងផាត់ ក៏បានគោរពថ្លែងអំណរគុណសម្តេចតេជោ ដែលបានឆ្លៀតពីការងារដ៏មមាញឹកអនុញ្ញាតឱ្យក្រុមប្រឹក្សាភិបាល សមាជិក សមាជិកាសមាគមឧកញ៉ាកម្ពុជា បានជួបសម្តែងការគួរសម ជាពិសេសបានផ្តល់នូវអនុសាសន៍ល្អៗ ដើម្បីសមាគមធ្វើសកម្មភាពបានត្រឹមត្រូវ និងជាចំណែកជួយដល់សង្គមជាតិ ក្រោមការដឹកនាំដ៏គតិបណ្ឌិតរបស់សម្តេចតេជោ៕

ចិនប្ដេជ្ញាឆ្លើយតបពេញទំហឹងចំពោះជំនួបរវាងមេដឹកនាំកោះតៃវ៉ាន់ និងប្រធានសភាអាមេរិកលោក Kevin McCarthy

ចិន៖ សារព័ត៌មានរដ្ឋ Xinhua បានរាយការណ៍ថា ក្រសួងការបរទេសចិននៅថ្ងៃព្រហស្បតិ៍ ទី៦មេសានេះបានថ្កោលទោសជំនួបរវាងប្រធានសភាអាមេរិកលោក Kevin McCarthy និងមេដឹកនាំកោះតៃវ៉ាន់លោកស្រី Tsai Ing-wen នៅក្នុងរដ្ឋ California។ លោកស្រី Tsai បានជួបគណៈប្រតិភូនៃក្រុមអ្នកនយោបាយអាមេរិកមកពីគណបក្សសាធារណរដ្ឋ និងប្រជាធិបតេយ្យ អំឡុងឈប់សំចតនៅក្នុងសហរដ្ឋអាមេរិកកាលពីថ្ងៃពុធ បន្ទាប់ពីដំណើរទស្សនកិច្ចទៅកាន់ប្រទេសហ្គាតេម៉ាឡា ប្រទេសប៊ើលីសនៅអាមេរិកកណ្ដាលដែលជាប្រទេសសម្ព័ន្ធមិត្តរបស់ទីក្រុងតៃប៉ិ។ ក្រសួងនេះបាននិយាយនៅក្នុងសេចក្ដីថ្លែងការណ៍មួយចេញផ្សាយដោយសារព័ត៌មាន Xinhua ថា ជាការឆ្លើយតបទៅនឹងសកម្មភាពខុសឆ្គងយ៉ាងខ្លាំង នៃការឃុបឃិតគ្នារវាងសហរដ្ឋអាមេរិក និងកោះតៃវ៉ាន់ ដែលប្រទេសចិននឹងត្រូវចាត់វិធានការតបវិញយ៉ាងពេញទំហឹង និងប្រកបដោយប្រសិទ្ធភាពដើម្បីការពារអធិបតេយ្យភាព និងបូរណភាពរបស់ជាតិ។ ទីក្រុងប៉េកាំងអះអាងថា កោះតៃវ៉ាន់គឺជាខេត្តមួយរបស់ចិន និងតែងតែប្រឆាំងចំពោះទំនាក់ទំនងផ្លូវការណាមួយ ដែលទីក្រុងតៃប៉ិមានជាមួយប្រទេសផ្សេងទៀត។ ក្រសួងនេះបាននិយាយដោយសំដៅទៅលើគោលនយោបាយ ទទួលស្គាល់ជាផ្លូវការដោយសហរដ្ឋអាមេរិករយៈពេលជាច្រើនទសវត្សរ៍មកហើយនោះថា ជំនួបកាលពីថ្ងៃពុធបានបំពានយ៉ាងធ្ងន់ធ្ងរលើគោលនយោបាយចិនតែមួយ៕អត្ថបទ៖ សុខមាន

អ្នកវិភាគ៖ បន្ទាប់ពីការនាំខ្លួនឡើងតុលាការ មេធាវីរបស់លោក Trump ពុំមានអ្វីត្រូវពឹងផ្អែក

អាមេរិក៖ មួយថ្ងៃបន្ទាប់ពីអតីតប្រធានាធិបតីលោក Donald Trump បានចូលផ្តល់ចម្លើយពីភាពគ្មានទោសកំហុស ក្នុងអំឡុងពេលការនាំខ្លួនឡើងតុលាការជាប្រវត្តិសាស្ត្រលើបទឧក្រិដ្ឋចំនួន ៣៤ករណីនៃការក្លែងបន្លំឯកសារពាណិជ្ជកម្ម រដ្ឋអាជ្ញាទីក្រុងញូវយ៉កពេលនេះប្រឈមនឹងបន្ទុកដ៏ធ្ងន់នៃការបង្ហាញថា លោក Trump បានព្យាយាមលាក់បាំងបទឧក្រិដ្ឋដោយចេតនា ដោយលាក់ការបង់ប្រាក់ទៅឱ្យស្ត្រី ២នាក់មុនការបោះឆ្នោតឆ្នាំ២០១៦។ នៅក្នុងសន្និសីទសារព័ត៌មានមេធាវីតំបន់ Manhattan លោក Alvin Bragg បានប្រាប់អ្នកសារព័ត៌មានថា លោក Trump បានក្លែងបន្លំឯកសារជាផ្នែកនៃផែនការដែលបំពានច្បាប់បោះឆ្នោតរដ្ឋ និងសហព័ន្ធ។ សាស្ត្រាចារ្យផ្នែកច្បាប់នៃសាកលវិទ្យាល័យ George Washington ម្នាក់បាននិយាយថា ករណីមួយក្នុងចំណោមករណីតានតឹង និងមិនប្រាកដគឺថា តើរដ្ឋញូវយ៉កអាចពឹងផ្អែកលើបទឧក្រិដ្ឋសហព័ន្ធ ដែលរដ្ឋាភិបាលសហព័ន្ធពុំបានដំណើរការរឿងក្តី ដើម្បីបង្ហាញថាមានបទឧក្រិដ្ឋទាក់ទងនឹងការក្លែងបន្លំនៅក្នុងឯកសារពាណិជ្ជកម្មដែរ ឬទេ។ ដូច្នេះអ្វីដែលលោកស្រីគិត លោក Bragg ធ្វើបានល្អដែលត្រូវបង្កើតការចោទប្រកាន់ចម្រុះ ប្រសិនបើតុលាការនិយាយថា អ្នកមិនអាចពឹងផ្អែកលើបទឧក្រិដ្ឋសហព័ន្ធនោះទេ។ យើងក៏មានបទឧក្រិដ្ឋរដ្ឋ New York ផងដែរ។ ហើយពុំគួរមានការងឿងឆ្ងល់នោះទេថា រដ្ឋញូវយ៉កអាចភ្ជាប់ការរំលោភឯកសារពាណិជ្ជកម្មទៅនឹងបទឧក្រិដ្ឋរបស់ខ្លួន ហើយមិនចាំបាច់កាត់ទោសបទឧក្រិដ្ឋទាំងនោះទេ ប្រសិនបើវាអាចផ្តល់ភស្តុតាងអំពីចេតនាការប្រព្រឹត្តបទឧក្រិដ្ឋ។ បន្ទាប់ពីការនាំខ្លួនឡើងតុលាការ មេធាវីរបស់លោក Trump បានឈរនៅមុខកាមេរ៉ា ដើម្បីស្វែងរកការបន្ទាបនូវភាពខ្លាំងនៃសំណុំរឿងលើលោក Trump។ ប៉ុន្តែសាស្ត្រាចារ្យរូបនេះនិយាយថា ករណីនេះទំនងជាមិនទន់ខ្សោយដូចការបង្ហាញនោះទេ។ ខណៈលោក Trump អាចមានការទប់ទល់នៅតុលាការដ៏តឹងតែង លោកហាក់ដូចជាមានសាធារណជនតិចតួចនៅខាងលោក នៅពេលនិយាយអំពីទស្សនៈរបស់លោកដែលថា ការកាត់ទោសគឺជារឿងនយោបាយ។ ការស្ទង់មតិរបស់សារព័ត៌មាន Reuters និង Ipsos ដែលបានចេញផ្សាយកាលពីថ្ងៃចន្ទបានរកឃើញថា ៥១% នៃពលរដ្ឋអាមេរិករួមទាំង ៨០% នៃគណបក្សសាធារណរដ្ឋបាននិយាយថា ពួកគេជឿថាការចោទប្រកាន់នេះគឺមានហេតុផលនយោបាយ៕អត្ថបទ៖ ប៊ុនថន

ពលរដ្ឋទួរគី និងហ្សកដានីប្រមូលផ្ដុំគ្នាតវ៉ានៅក្នុងប្រទេសពួកគេប្រឆាំងនឹងអំពើហិង្សានៅវិហារ Al-Aqsa

ទួរគី៖ ក្រុមអ្នកតវ៉ាជាច្រើនបានប្រមូលផ្ដុំគ្នានៅខាងក្រៅការិយាល័យបេសកកម្ម របស់ប្រទេសអ៊ីស្រាអែលនៅក្នុងទីក្រុង Ankara និងទីក្រុង Istanbul ប្រទេសទួរគីកាលពីថ្ងៃពុធ ទី៥មេសា ដោយស្រែកពាក្យស្លោកប្រឆាំងនឹងការឆ្មក់ចូលរបស់នគរបាលអ៊ីស្រាអែលនៅវិហារអ៊ីស្លាម Al-Aqsa។ ដោយគ្រវីទង់ជាតិទួរគី និងប៉ាឡេស្ទីន ក្រុមអ្នកតវ៉ាបានអំពាវនាវឲ្យបញ្ចប់អំពើហិង្សាជាបន្ទាន់ ដែលបានផ្ទុះឡើងជាថ្មីនៅបរិវេណវិហារ Al-Aqsa ប៉ុន្មានម៉ោងបន្ទាប់ពីការវាយឆ្មក់ដំបូងកាលពីព្រឹកថ្ងៃពុធ។ ក្រុមអ្នកបួងសួងរាប់រយនាក់បានបញ្ឈប់ពិធីស្រាយបួសបុណ្យរ៉ាម៉ាដាន់ ដើម្បីតវ៉ានៅខាងក្រៅវិហារ Fatih របស់ទីក្រុងអ៊ីស្តង់ប៊ុល បន្ទាប់ពីលោកប្រធានាធិបតី Tayyip Erdogan បានថ្កោលទោសការវាយឆ្មក់នេះ ដោយហៅបរិវេណវិហារនោះថាជាបន្ទាត់ក្រហមសម្រាប់ប្រទេសទួរគី។ ឧបទ្ទវហេតុកាលពីដំបូងកើតឡើងដោយសារតែការចាប់ខ្លួន និងការនាំមនុស្សចេញជាង ៣៥០នាក់ដោយនគរបាលអ៊ីស្រាអែល ហើយក្រោយមកការប៉ះទង្គិចគ្នាជាបន្តបន្ទាប់បានផ្ទុះឡើងកាលពីល្ងាចថ្ងៃពុធ ទោះបីសហរដ្ឋអាមេរិកអំពាវនាវឲ្យបន្ធូរបន្ថយភាពតានតឹងក៏ដោយ។ ការប្រឈមដាក់គ្នាជាច្រើនអំឡុងខែពិសិដ្ឋបុណ្យ Ramadan របស់ម៉ូស្លីម និងនៅមុនថ្ងៃឈប់សម្រាកពិធីបុណ្យសាសនារបស់ជនជាតិជ្វីស បានបណ្ដាលឲ្យមានការផ្ទុះអាវុធតបតគ្នាឆ្លងព្រំដែននៅក្នុងតំបន់ Gaza និងបានបង្កឲ្យអំពើហិង្សាបន្ថែមទៀត។ ចំណែកនៅក្នុងហ្ស៊កដានីវិញ មនុស្សប្រហែល ៣០០នាក់បានប្រមូលផ្ដុំគ្នានៅព្រះវិហារ Al-Kalouti ជិតស្ថានទូតអ៊ីស្រាអែលនៅក្នុងទីក្រុងអាម៉ង់ (Amman) កាលពីថ្ងៃពុធ ទី១៥មីនាក្នុងការតវ៉ាទាំងយប់ប្រឆាំងនឹងអំពើហិង្សារបស់អ៊ីស្រាអែល ក្នុងការបះទង្គិចជាមួយជនជាតិប៉ាឡេស្ទីននៅព្រះវិហារ Al-Aqsa ក្នុងទីក្រុងហ្សេរ៉ុយសាឡឹម៕អត្ថបទ៖ សុខមាន

ការតវ៉ានៅតំបន់ហ្កាហ្សាប្រឆាំងអំពើហិង្សានៅបរិវេណវិហារ Al-Aqsa របស់ទីក្រុងហ្សេរុយសាឡឹម

ហ្កាហ្សា៖ ពលរដ្ឋប៉ាឡេស្ទីនបានតវ៉ាកាលពីថ្ងៃពុធ ប្រឆាំងការប៉ះទង្គិចគ្នារវាងនគរបាលអ៊ីស្រាអែល និងពលរដ្ឋប៉ាឡេស្ទីននៅវិហារអ៊ីស្លាម Al-Aqsa ទីក្រុងក្រុងហ្សេរុយសាឡឹម បន្ទាប់ពីការអធិដ្ឋាននៅពេលព្រឹក និងពេលល្ងាច។ អំឡុងការតវ៉ានៅតំបន់ហ្កាហ្សា ក្រុមបាតុករត្រូវបានគេឃើញគ្រវីទង់ជាតិក្រុមហាម៉ាស និងកំពុងកាន់បដា និងដុតកង់រថយន្ត។ ការប៉ះទង្គិចគ្នាបានកើតឡើងនៅបរិវេណវិហារឥស្លាមមួយកន្លែងកាលពីយប់ថ្ងៃពុធ ប៉ុន្មានម៉ោងបន្ទាប់ពីការចាប់ខ្លួន និងបណ្តេញចេញមនុស្សជាង ៣៥០នាក់នៅក្នុងការវាយឆ្មក់របស់នគរបាល ហើយទោះបីជាមានការអំពាវនាវរបស់សហរដ្ឋអាមេរិក ដើម្បីបន្ធូរបន្ថយភាពតានតឹងក៏ដោយ។ ការប្រឈមមុខដាក់គ្នាក្នុងអំឡុងខែពិសិដ្ឋ Ramadan របស់ពលរដ្ឋមូស្លីម និងនៅមុនថ្ងៃបុណ្យសាសនារបស់ជនជាតិជ្វីហ្វ បានបង្កឱ្យមានការផ្ទុះអាវុធតបតគ្នាឆ្លងកាត់ព្រំដែននៅក្នុងតំបន់ហ្គាហ្សា និងបង្កឱ្យមានការព្រួយបារម្ភអំពើហិង្សាបន្ថែមទៀត។ អឌ្ឍចន្ទក្រហមប៉ាឡេស្ទីនបាននិយាយថា មនុស្សប្រាំមួយនាក់បានរងរបួស។ នៅក្នុងសេចក្តីថ្លែងការណ៍មួយនគរបាលបាននិយាយថា យុវជនជាច្រើននាក់បានយកដុំថ្ម និងផាវចូលទៅក្នុងវិហារ ហើយបានព្យាយាមរារាំងពួកគេមិនឲ្យចូលទៅខាងក្នុង។ ទោះជាយ៉ាងណា នគរបាលបានចូលទៅក្នុងវិហារអ៊ីស្លាម មុនពេលការអធិដ្ឋានត្រូវបានបញ្ចប់។ មិនដល់ ២៤ម៉ោងនោះទេ នគរបាលបានឆ្មក់ចូលវិហារឥស្លាម ដើម្បីព្យាយាមបណ្តេញចេញនូវអ្វីដែលពួកគេបាននិយាយថា អ្នកបង្កភាពចលាចលមានបិទបាំងមុខ ដែលបានចាក់សោពីខាងក្នុង បន្ទាប់ពីការប៉ុនប៉ងបណ្តេញពួកគេចេញដោយការសន្ទនាមិនទទួលបានផល។ អឌ្ឍចន្ទក្រហមប៉ាឡេស្ទីនបាននិយាយថា ជនប៉ាឡេស្ទីន ១២នាក់បានរងរបួសក្នុងឧបទ្ទវហេតុនេះ រួមទាំងដោយសារបាញ់កាំភ្លើងគ្រាប់ជ័រ និងការវាយដំ។ អ្នកនាំពាក្យសន្តិសុខជាតិរបស់សេតវិមានលោក John Kirby បានបង្ហាញការព្រួយបារម្ភអំពីអំពើហិង្សានៅវិហារអ៊ីស្លាម ហើយបាននិយាយថា វាជារឿងចាំបាច់ដែលអ៊ីស្រាអែល និងប៉ាឡេស្ទីនកាត់បន្ថយភាពតានតឹង៕អត្ថបទ៖ ប៊ុនថន

បណ្ដាញសង្គម

ព័ត៌មានថ្មីៗ

រដ្ឋមន្ត្រីការបរទេសកម្ពុជា ចូលគាល់ ព្រះមហាក្សត្រ ប្រទេសព្រុយណេដារូស្សាឡាម

អនុប្រធាន សមាគមអតីតយុទ្ធជន អញ្ជើញចុះសួរសុខទុក្ខអតីតយុទ្ធជន និងក្រុមគ្រួសារ ក្នុងខេត្តឧត្តរមានជ័យ

ប្រធានគណៈកម្មការ eSafety របស់អូស្ត្រាលី រងការគំរាមសម្លាប់ ក្រោយមានបម្រាមបណ្ដាញសង្គម

ប្រធានគណៈកម្មការអឺរ៉ុប ជំរុញឲ្យមានឯករាជ្យភាពថាមពល បន្ទាប់ពីវិបត្តិនៅអ៊ីរ៉ង់

កសិករម្នាក់ផ្ទុះស្លាប់លេីដីស្រែចម្ការខ្លួនឯងដោយសារសំណល់យុទ្ធភណ្ឌសង្គ្រាម នៅស្រុករតនមណ្ឌល

ម៉ិកស៊ិកដាក់ពង្រាយកងទ័ពជាង ១៣០.០០០នាក់ ក្រោយចាប់ខ្លួនមេក្រុមជួញដូរគ្រឿងញៀន

អតីតប្រធាន FBI ត្រូវបានចោទប្រកាន់ពីបទគំរាមកំហែងដល់អាយុជីវិតរបស់លោក TRUMP

ជប៉ុនប្រកាសបន្តខិតខំប្រឹងប្រែងជំរុញការអនុវត្តកិច្ចព្រមព្រៀងបទឈប់បាញ់ និងបន្ថយភាពតានតឹង រវាងកម្ពុជា-ថៃ ដោយសហការជាមួយបណ្តាប្រទេសពាក់ព័ន្ធនានា

វិស័យអប់រំកម្រិតបឋមសិក្សាសម្រេចសមិទ្ធកម្ម ១០០% ក្រោមការអនុវត្តប្រព័ន្ធលើកទឹកចិត្តគាំទ្រសមិទ្ធកម្មរបស់រាជរដ្ឋាភិបាល

សកម្មភាពក្រុមកីឡាករគុនល្បុក្កតោ និងព្រះសង្ឃសៅលីង ធ្វើការហាត់សម ដើម្បីត្រៀមចូលរួមសម្តែងក្នុង «មហោស្រពក្បាច់គុនចម្រុះ កម្ពុជា-ចិន» នៅថ្ងៃស្អែក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

ការបោះបង្គោលព្រំដែនកម្ពុជា-ឡាវ នៅសល់ប្រមាណជាង ១៤ភាគរយ

រដ្ឋបាលរបស់លោក Biden ស្ដីបន្ទោសលោក Trump ចំពោះការដកទ័ពដ៏ចលាចលចេញពីប្រទេសអាហ្វហ្គានីស្ថាន

គណៈរដ្ឋមន្ត្រីបន្តលើកយកសេចក្តីព្រាងផែនការចរាចរណ៍ និងគម្រោងសាងសង់វារីអគ្គិសនីមកពិភាក្សា

កូនស្រីរបស់លោក ថាក់ស៊ីន លោកស្រី ផៃថងថាន ស្ថិតក្នុងចំណោមបេក្ខជន ៣នាក់ដែលត្រូវតែងតាំងរបស់គណបក្សភឿថៃ

ចិនប្ដេជ្ញាឆ្លើយតបពេញទំហឹងចំពោះជំនួបរវាងមេដឹកនាំកោះតៃវ៉ាន់ និងប្រធានសភាអាមេរិកលោក Kevin McCarthy

អ្នកវិភាគ៖ បន្ទាប់ពីការនាំខ្លួនឡើងតុលាការ មេធាវីរបស់លោក Trump ពុំមានអ្វីត្រូវពឹងផ្អែក

ពលរដ្ឋទួរគី និងហ្សកដានីប្រមូលផ្ដុំគ្នាតវ៉ានៅក្នុងប្រទេសពួកគេប្រឆាំងនឹងអំពើហិង្សានៅវិហារ Al-Aqsa

ការតវ៉ានៅតំបន់ហ្កាហ្សាប្រឆាំងអំពើហិង្សានៅបរិវេណវិហារ Al-Aqsa របស់ទីក្រុងហ្សេរុយសាឡឹម

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

ការបោះបង្គោលព្រំដែនកម្ពុជា-ឡាវ នៅសល់ប្រមាណជាង ១៤ភាគរយ

រដ្ឋបាល​របស់លោក Biden ​ស្ដីបន្ទោស​លោក ​Trump ចំពោះ​ការ​ដក​ទ័ព​ដ៏​ចលាចល​ចេញពី​ប្រទេស​អា​ហ្វ​ហ្គា​នី​ស្ថាន

គណៈរដ្ឋមន្ត្រីបន្តលើកយកសេចក្តីព្រាងផែនការចរាចរណ៍ និងគម្រោងសាងសង់វារីអគ្គិសនីមកពិភាក្សា

កូនស្រីរបស់លោក ថាក់ស៊ីន លោកស្រី ផៃថងថាន ស្ថិតក្នុងចំណោមបេក្ខជន ៣នាក់ដែលត្រូវតែងតាំងរបស់គណបក្សភឿថៃ

ចិន​ប្ដេជ្ញា​ឆ្លើយតប​ពេញទំហឹង​ចំពោះ​ជំនួប​រវាង​មេដឹកនាំ​កោះ​តៃវ៉ាន់ និង​ប្រធានសភា​អាមេរិក​លោក Kevin McCarthy

អ្នកវិភាគ​៖ បន្ទាប់ពី​ការនាំ​ខ្លួន​ឡើង​តុលាការ មេធាវី​របស់លោក Trump ពុំមាន​អ្វី​ត្រូវ​ពឹងផ្អែក​

ការ​តវ៉ា​នៅ​តំបន់​ហ្កា​ហ្សា​ប្រឆាំង​អំពើហិង្សា​នៅ​បរិវេណ​វិហារ Al-Aqsa របស់​ទីក្រុង​ហ្សេ​រុយ​សា​ឡឹម​

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

រដ្ឋបាលរបស់លោក Biden ស្ដីបន្ទោសលោក Trump ចំពោះការដកទ័ពដ៏ចលាចលចេញពីប្រទេសអាហ្វហ្គានីស្ថាន

ចិនប្ដេជ្ញាឆ្លើយតបពេញទំហឹងចំពោះជំនួបរវាងមេដឹកនាំកោះតៃវ៉ាន់ និងប្រធានសភាអាមេរិកលោក Kevin McCarthy

អ្នកវិភាគ៖ បន្ទាប់ពីការនាំខ្លួនឡើងតុលាការ មេធាវីរបស់លោក Trump ពុំមានអ្វីត្រូវពឹងផ្អែក

ការតវ៉ានៅតំបន់ហ្កាហ្សាប្រឆាំងអំពើហិង្សានៅបរិវេណវិហារ Al-Aqsa របស់ទីក្រុងហ្សេរុយសាឡឹម