BTV NEWS

លោកជំទាវបណ្ឌិត ពេជ ចន្ទមុន្នី អញ្ជើញចូលរួមពិធីប្រគល់-ទទួលថវិកាបរិច្ចាគពីគណៈសង្ឃនាយកកម្ពុជាចំនួន ១៦០លានរៀលជូនមូលនិធិគន្ធបុប្ផា

សម្តេចតេជោ ហ៊ុន សែន នឹងបំពេញទស្សនកិច្ចមិត្តភាពផ្លូវការនៅប្រទេសចិនរយៈពេលបីថ្ងៃចាប់ពីថ្ងៃទី២៥ដល់២៧ ខែមិថុនាខាងមុខនេះ

កម្ពុជា-អ៊ីស្រាអែល ឯកភាពបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែរីកចម្រើន

សម្ដេចធិបតី៖ រាជរដ្ឋាភិបាលសម្រេចបន្តផ្តល់ការលើកទឹកចិត្តផ្នែកពន្ធដារ លើផលិតផលស៊ីម៉ងត៍ក្នុងស្រុក សម្រាប់រយៈពេល ២ឆ្នាំទៀត

ព័ត៌មានសំខាន់ៗ

ផ្ទុះឃ្លាំងស្តុកកាំជ្រួចនៅអាមេនីបណ្តាលឲ្យមនុស្ស ៥ស្លាប់ និងរបួស ៤០នាក់

អាមេនី៖ សំឡេងផ្ទុះខ្លាំងនៅទីតាំងស្តុកកាំជ្រួចបានបំផ្លាញទីផ្សារមួយកន្លែង ក្នុងរដ្ឋធានីប្រទេសអាមេនីកាលពីថ្ងៃអាទិត្យបណ្តាលឲ្យមនុស្សយ៉ាងហោចណាស់ ៥នាក់ស្លាប់ និងប្រមាណ ៤0នាក់ផ្សេងទៀតរងរបួស និងបានបង្កឲ្យមានអគ្គិភ័យដ៏ធំ។ ការិយាល័យអភិបាលក្រុងបាននិយាយថា មានមនុស្សមិនស្គាល់អត្តសញ្ញាណមួយចំនួនបានជាប់នៅក្រោមគំនរបាក់បែក។ ការផ្ទុះបង្កឲ្យមានអគ្គិភ័យនៅផ្សារ Surmalu បានបញ្ចេញផ្សែងហុយពាសពេញទីក្រុង Yerevan។ លោក Levon Sardaryan អ្នកនាំពាក្យរបស់អភិបាលក្រុង Yerevan បាននិយាយថា ក្រុមអ្នកជួយសង្គ្រោះបានធ្វើការ ដើម្បីទាញយកជនរងគ្រោះចេញពីគំនរបាក់បែក។ ការផ្ទុះនេះស្ថិតនៅក្នុងតំបន់ដែលមានកាំជ្រួចច្រើនត្រូវបានរក្សាទុក។ ក្រសួងសេវាសង្គ្រោះបន្ទាន់ប្រទេសអាមេនីនិយាយថា យ៉ាងហោចណាស់ ៥នាក់ស្លាប់ និង ៤0នាក់ផ្សេងទៀតបានរងរបួស៕អត្ថបទ៖ ប៊ុនថន

កងកម្លាំងរុស្ស៊ីវាយសន្ធាប់លើតំបន់ Donetsk ខណៈសង្គ្រាមរុស្ស៊ី-អ៊ុយក្រែនបន្តជិត ៦ខែ

អ៊ុយក្រែន៖ កងកម្លាំងអ៊ុយក្រែនបានរាយការណ៍ពីការបាញ់ផ្លោងដ៏ខ្លាំងក្លារបស់កងកម្លាំងរុស្ស៊ី និងការព្យាយាមវាយរុលទៅមុខលើទីក្រុងមួយចំនួននៅក្នុងតំបន់ Donetsk ភាគខាងកើត ដែលបានក្លាយជាការផ្ដោតដ៏សំខាន់នៃសង្គ្រាមរយៈពេលជិត ៦ខែ ប៉ុន្តែបាននិយាយថា ពួកគេបានរារាំងការវាយប្រហារជាច្រើន។ យោងតាមអភិបាលក្រុង ការវាយប្រហារដោយគ្រាប់រ៉ូកែតរបស់រុស្ស៊ីទៅលើទីក្រុង Kramatorsk បានសម្លាប់មនុស្ស ៣នាក់ និង ១៣នាក់រងរបួសកាលពីយប់ថ្ងៃសុក្រ។ ទីក្រុង Kramatorsk គឺជាទីស្នាក់ការកណ្ដាលសម្រាប់កងកម្លាំងអ៊ុយក្រែននៅក្នុងភាគខាងកើត ដែលត្រូវខ្ទេចខ្ទាំដោយសារសង្គ្រាមរបស់ប្រទេសនេះ។ ការវាយប្រហារបានកើតឡើងមិនដល់ ១ថ្ងៃផងទេបន្ទាប់ពីគ្រាប់រ៉ូកែតចំនួន ១១គ្រាប់ផ្សេងទៀតត្រូវបានបាញ់ស្រោចទៅលើទីក្រុងនេះ ដែលជាទីក្រុងមួយក្នុងចំណោមទីក្រុងសំខាន់ចំនួន ២ ដែលត្រូវបានអ៊ុយក្រែនគ្រប់គ្រងនៅក្នុងខេត្ត Donetsk ជាការផ្ដោតលើការវាយរុលទៅមុខនៅតែបន្តរបស់រុស្ស៊ី ដើម្បីដណ្ដើមតំបន់ Donbas ភាគខាងកើតរបស់អ៊ុយក្រែន។ ក្រសួងការពារជាតិរុស្ស៊ីបានអះអាងកាលពីថ្ងៃសៅរ៍ថា កងកម្លាំងរបស់ខ្លួនបានដណ្ដើមយកភូមិ Pisky ជាភូមិមួយនៅជាយក្រុង Donetsk ជាទីក្រុងប្រចាំខេត្តនេះ ដែលក្រុមបំបែកខ្លួនគាំទ្រដោយក្រុង Moscow បានអះអាងគ្រប់គ្រងចាប់តាំងពីឆ្នាំ២០១៤ មក៕អត្ថបទ៖ សុខមាន

មនុស្ស ៤១នាក់ស្លាប់ដោយសារអគ្គិភ័យឆាបឆេះព្រះវិហារកូបទិកក្នុងតំបន់ Giza របស់ប្រទេសអេហ្ស៊ីប

អេហ្ស៊ីប៖ មនុស្សរាប់សិបនាក់បានស្លាប់ បន្ទាប់ពីអគ្គិភ័យឆាបឆេះនៅព្រះវិហារមួយក្នុងប្រទេសអេហ្ស៊ីប ភាគច្រើននៃជនរងគ្រោះបានប្រជ្រៀតគ្នាអំឡុងពេលរត់គេចពោរពេញដោយភាពស្លន់ស្លោ។ ក្រុមមន្ត្រីនិយាយថា ចំនួនអ្នកស្លាប់មានយ៉ាងហោចណាស់ ៤១នាក់ និងរាប់សិបនាក់រងរបួស។ កុមារជាច្រើនត្រូវគេជឿថាស្ថិតក្នុងចំណោមអ្នកស្លាប់ទាំងនោះ។ ប្រភពសន្តិសុខនានាបានប្រាប់សារព័ត៌មាន Reuters ថា ផ្ទុះចរន្តអគ្គិសនីបានបង្កការឆាបឆេះ ខណៈក្រុមអ្នកបួងសួងប្រមាណ ៥ពាន់នាក់បានប្រមូលផ្ដុំគ្នាធ្វើពិធីសាសនាដ៏ធំនៅព្រះវិហារ Coptic Abu Sifin ក្នុងតំបន់ Giza។ ពួកគេនិយាយថា អគ្គិភ័យបានឆាបឆេះបិទច្រកចូលបណ្ដាលឲ្យមនុស្សភ័យប្រជ្រៀតជាន់គ្នា។ អង្គភាពពន្លត់អគ្គិភ័យនិយាយថា អណ្ដាតភ្លើងនេះត្រូវបានពន្លត់ដោយជោគជ័យ។ ចំណែកមូលហេតុពិតប្រាកដយ៉ាងណានោះ គេនៅមិនទាន់បានដឹងច្បាស់នៅឡើយទេ។យ៉ាងណាក៏ដោយលោកឳ Farid Fahmy មកពីព្រះវិហារនៅក្បែរនោះនៅក្នុងស្រុកជិតខាង Imbaba បានប្រាប់ទីភ្នាក់ងារសារព័ត៌មាន AFP ថា អគ្គិភ័យនេះបណ្ដាលមកពីផ្ទុះចរន្តអគ្គិសនី។ លោកថា ភ្លើងបានដាច់ ហើយពួកគេក៏ប្រើម៉ាស៊ីនភ្លើង នៅពេលមានអគ្គិសនីវិញ វាបណ្ដាលឲ្យមានកម្លាំងភ្លើងបុកខ្លាំង។ អ្នកបួងសួងលោក Yasir Munir បានប្រាប់សារព័ត៌មាន Reuters ថា មនុស្សបានកំពុងប្រមូលផ្ដុំគ្នានៅជាន់ទី៣ និងទី៤ ហើយយើងបានមើលឃើញផ្សែងហុយចេញពីជាន់ទី២។ មនុស្សបានប្រញាប់ប្រញាល់ចុះទៅក្រោម និងចាប់ផ្ដើមដួលគរលើគ្នា៕អត្ថបទ៖ សុខមាន

ប្រទេសចំនួន ៤២ អំពាវនាវឲ្យរុស្ស៊ីដកកងទ័ពចេញពីរោងចក្រថាមពលនុយក្លេអ៊ែរនៅអ៊ុយក្រែន

អ៊ុយក្រែន៖ ប្រទេសចំនួន ៤២ បានអំពាវនាវឲ្យរុស្ស៊ីដកកងទ័ពរបស់ខ្លួន ចេញពីរោងចក្រថាមពលនុយក្លេអ៊ែរ Zaporizhzhia ដោយបញ្ជាក់ថា វត្តមានរបស់ពួកគេនៅទីនោះបង្កការគំរាមដល់ប្រតិបត្តិការសុវត្ថិភាព នៅរោងចក្រនុយក្លេអ៊ែរ។ ខណៈដែលសារព័ត៌មាន European Pravda រាយការណ៍ ការអំពាវនាវនេះត្រូវបាននិយាយនៅក្នុងសេចក្ដីថ្លែងការណ៍មួយ ចេញផ្សាយនៅលើគេហទំព័រនៃគណៈប្រតិភូសហភាពអឺរ៉ុប រហូតដល់អង្គការអន្តរជាតិនានានៅក្នុងទីក្រុងវីយ៉ែន (Vienna)។ សេចក្ដីថ្លែងការណ៍នេះត្រូវបានចូលរួមដោយក្រុមសមាជិកសហភាពអឺរ៉ុបទាំងអស់ និងសហភាពអឺរ៉ុបក្នុងនាមជាម្ចាស់ហត្ថលេខីដាច់ដោយឡែកដូចជា៖ ប្រទេសន័រវេស ចក្រភពអង់គ្លេស សហរដ្ឋអាមេរិក កាណាដា ជប៉ុន កូរ៉េខាងត្បូង អូស្ត្រាលី ណូវ៉េហ្ស៊េឡង់ ហ្ស៊កហ្ស៊ី ម៉ូលដូវ៉ា ម៉ាសេដូនីខាងជើង និងទួរគី។ ប្រទេសទាំងនេះបានបញ្ជាក់ជាថ្មីថា ការវាយលុករបស់សហព័ន្ធរុស្ស៊ីលើអ៊ុយក្រែន គឺជាការរំលោភដ៏ធ្ងន់ធ្ងរលើច្បាប់អន្តរជាតិ និងធម្មនុញ្ញរបស់អង្គការសហប្រជាជាតិ ហើយការគ្រប់គ្រងរបស់ប្រទេសរុស្ស៊ីលើរោងចក្រថាមពលនុយក្លេអ៊ែរ បង្កមហន្តរាយដល់គោលការណ៍សុវត្ថិភាពនុយក្លេអ៊ែរ។បណ្ដាប្រទេសទាំងនោះបន្ថែមថា ការវាយប្រហាររបស់រុស្ស៊ីលើអ៊ុយក្រែន និងវត្តមានកងទ័ពរុស្ស៊ីនៅរោងចក្រថាមពលនុយក្លេអ៊ែរ បានបង្កើនឧបទ្ទវហេតុនុយក្លេអ៊ែរកាន់តែខ្លាំង។ កាលពីថ្ងៃព្រហស្បតិ៍សប្ដាហ៍មុនលោក Antonio Guterres អគ្គលេខាធិការអង្គការសហប្រជាជាតិ បានអំពាវនាវឲ្យបញ្ឈប់រាល់សកម្មភាពអរិភាពទាំងអស់ភ្លាមៗ នៅជិតរោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុប និងការបង្កើតតំបន់គ្មានកងទ័ពជុំវិញរោងចក្រនេះ៕អត្ថបទ៖ សុខមាន

កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាចាប់ផ្តើមនៅព្រឹកថ្ងៃនេះ

ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈនៅព្រឹកថ្ងៃទី១៥ ខែសីហា ឆ្នាំ២០២២នេះ បានរៀបចំកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា អាណត្តិទី២ លើកទី២ ស្តីពីការកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបសម្រាប់ឆ្នាំ២០២៣។ កិច្ចប្រជុំនេះ បានប្រារព្ធធ្វើឡើងក្រោមវត្តមានរបស់ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា និងមានការអញ្ជើញចូលរួមតំណាងកម្មករ និយោជិត ភាគីសហជីព តំណាងនិយោជក សមាគមរោងចក្រកាត់ដេរនៅកម្ពុជា (GMAC) ភាគីរដ្ឋាភិបាល និងមន្រ្តីក្រុមប្រឹក្សាជាតិប្រាក់ឈ្នួលអប្បបរមា សរុបចំនួនប្រមាណ ៥០នាក់ ដើម្បីស្តាប់បទបង្ហាញអំពីការធ្វើបច្ចុប្បន្នភាពស្ថិតិនៃលក្ខណវិនិច្ឆ័យបែបសេដ្ឋកិច្ច និងសង្គម ក្នុងការកំណត់ប្រាក់ឈ្នួលអប្បបរមា ដោយឯកឧត្តម ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ព្រមទាំងការពិភាក្សារបស់សមាជិកក្រុមប្រឹក្សាជាតិប្រាក់ឈ្នួលអប្បបរមា ពិនិត្យ និងចុះហត្ថលេខាលើសេចក្តីថ្លែងការណ៍របស់ក្រុមប្រឹក្សាជាតិប្រាក់ឈ្នួលអប្បបរមា។ ឯកឧត្តមបណ្ឌិត អ៊ិត សំហេង មានប្រសាសន៍ថា កិច្ចប្រជុំថ្ងៃនេះ នឹងពិភាក្សាជាលក្ខណៈផ្ទៃក្នុងរបស់ភាគីនីមួយៗ និងជាលក្ខណៈទ្វេភាគី បន្ទាប់មកនឹងចាប់ផ្តើមពិភាក្សាប្រាក់ឈ្នួលអប្បបរមាជាលក្ខណៈត្រីភាគីបន្តទៀត។ ឯកឧត្តមបានបន្តថា កិច្ចប្រជុំនេះដែរ គ្រប់ភាគីទាំងអស់ត្រូវប្រើលក្ខណវិនិច្ឆ័យបែបសង្គម (ស្ថានភាពគ្រួសារ អាត្រាអតិផរណា និងការចំណាយក្នុងការរស់នៅ) និងលក្ខណវិនិច្ឆ័យបែបសេដ្ឋកិច្ច (ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ) ក៏ដូចជាបន្ទាត់ភាពក្រីក្រ សម្រាប់ធ្វើជាមូលដ្ឋានក្នុងការពិភាក្សាប្រាក់ឈ្នួលអប្បបរមានៅកម្ពុជា។គ្រប់ភាគីទាំងអស់ ត្រូវផ្តោតលើទិន្នន័យ និងការស្រាវជ្រាវបែបវិទ្យាសាស្រ្តដោយយោងលើលក្ខណៈវិនិច្ឆ័យទាំង៧ ដូចដែលបានកំណត់ក្នុងមាត្រា៥ នៃច្បាប់ស្តីពីប្រាក់ឈ្នួលអប្បបរមា ដើម្បីធ្វើជាមូលដ្ឋានក្នុងការសម្របសម្រួលផ្ទៃក្នុង និងប្រកាន់គោលជំហររួមជាមួយ។ សូមបញ្ជាក់ថា គិតត្រឹមឆ្នាំ២០២២នេះ ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប មានចំនួន ១៩៤ដុល្លារអាម៉េរិក ក្នុង១ខែៗ៕

ឥណ្ឌូនេស៊ី និងកងកម្លាំងអាមេរិកធ្វើសមយុទ្ធយោធារួមគ្នា

ឥណ្ឌូនេស៊ី៖ កងទ័ពមកពីសហរដ្ឋអាមេរិក និងឥណ្ឌូនេស៊ីបានធ្វើសមយុទ្ធប្រយុទ្ធរួមគ្នាប្រចាំឆ្នាំ កាលពីថ្ងៃសុក្រនៅលើកោះស៊ូម៉ាត្រា ប្រទេសឥណ្ឌូនេស៊ី បន្ទាប់ពីមានសញ្ញានៃការកើនឡើងសកម្មភាពដែនសមុទ្រ របស់ប្រទេសចិននៅក្នុងតំបន់ឥណ្ឌូ-ប៉ាស៊ីហ្វិក។ ទាហានជាង 5,000នាក់មកពីសហរដ្ឋអាមេរិក ឥណ្ឌូនេស៊ី អូស្ត្រាលី ជប៉ុន និងសិង្ហបុរីបានចូលរួមក្នុងសមយុទ្ធនៅឆ្នាំនេះ ដែលធ្វើឱ្យវាក្លាយជាសមយុទ្ធទ្រង់ទ្រាយធំបំផុត ចាប់តាំងពីសមយុទ្ធត្រូវបានបង្កើតឡើងក្នុងឆ្នាំ2009។ សមយុទ្ធរួមគ្នាបានចាប់ផ្តើមកាលដើមខែនេះ ក្នុងប្រទេសឥណ្ឌូនេស៊ីនៅលើកោះស៊ូម៉ាត្រា និងកោះ Borneo។ សមយុទ្ធនេះក៏បានមកជួបប្រជុំគ្នាពីប្រទេសមួយចំនួនរួមមានចក្រភពអង់គ្លេស កាណាដា បារាំង ឥណ្ឌា ម៉ាឡេស៊ី កូរ៉េខាងត្បូង នូវែលសេឡង់ ប៉ាពួញូហ្គីណេ និងទីម័រខាងកើតជាប្រទេសសង្កេតការណ៍។ ប្រព័ន្ធផ្សព្វផ្សាយរដ្ឋរបស់ចិនបានចោទប្រកាន់សហរដ្ឋអាមេរិក ពីការកសាងសម្ព័ន្ធភាពតំបន់ឥណ្ឌូ-ប៉ាស៊ីហ្វិក ស្រដៀងគ្នាទៅនឹងអង្គការណាតូថា ជាមធ្យោបាយបង្កជម្លោះដោយចេតនា។មេបញ្ជាការតំបន់ឥណ្ឌូ-ប៉ាស៊ីហ្វិករបស់សហរដ្ឋអាមេរិកលោក John C. Aquilino បាននិយាយថា ការគំរាមកំហែងគឺជាអ្វីដែលពួកគេកំពុងព្យាយាមបញ្ចៀស ដែលលោកបាននិយាយដូច្នេះនៅក្នុងសន្និសីទសារព័ត៌មានរួម ជាមួយមេបញ្ជាការយោធាឥណ្ឌូនេស៊ីលោក Andika Perkasa កាលពីថ្ងៃសុក្រនៅទីក្រុង Baturaja ជាទីក្រុងឆ្នេរសមុទ្រក្នុងខេត្តស៊ូម៉ាត្រាខាងត្បូង។ លោក Aquilino បាននិយាយថា ប្រទេសចំនួន 14 ដែលបានមកចូលរួមក្នុងសមយុទ្ធជាក់ស្តែងនេះ បានបញ្ជូនកងកម្លាំងអន្តរប្រតិបត្តិការដើម្បីធានាបានថា កងកម្លាំងរបស់ពួកគេអាចមករួមគ្នា និងគាំទ្រនូវអ្វីដែលចាំបាច់ក្នុងគ្រាមានវិបត្តិ។ យើងនឹងបន្តជួយផ្តល់ឲ្យតំបន់ឥណ្ឌូ-ប៉ាស៊ីហ្វិកដោយសេរី និងបើកចំហ ដែលបំណងរបស់យើងគឺដើម្បីកសាងទំនាក់ទំនង កសាងអន្តរប្រតិបត្តិការ និងត្រៀមខ្លួន ប្រសិនបើយើងត្រូវការដើម្បីឆ្លើយតបទៅនឹងឧបទ្ទវហេតុណាមួយ៕អត្ថបទ៖ ប៊ុនថន

អ្នកជំនាញអន្តរជាតិរិះគន់អង្គការណាតូ និងអាមេរិកដែលបន្តបញ្ជូនសព្វាវុធទៅអ៊ុយក្រែន

អ៊ុយក្រែន៖ អ្នកជំនាញអន្តរជាតិបានរិះគន់អង្គការណាតូ និងសហរដ្ឋអាមេរិកដែលបន្តបញ្ជូនអាវុធទៅឲ្យប្រទេសអ៊ុយក្រែន និងកំពុងជំរុញឱ្យមានវិបត្តិកើតមានបន្ថែមទៀត ដើម្បីធ្វើឲ្យឯកោ និងទប់ស្កាត់រុស្ស៊ី។ មូលនិធិអន្តរជាតិដើម្បីសន្តិភាព និងការស្វែងរកសម្រាប់អនាគតនៅទីក្រុង Lund ប្រទេសស៊ុយអែតបានចាត់ទុកអង្គការណាតូថា ជាសម្ព័ន្ធយោធាដ៏គ្រោះថ្នាក់បំផុតរបស់ពិភពលោក ដែលបានបំពានការប្តេជ្ញាចិត្តរបស់ខ្លួនចំពោះរុស្ស៊ី ហើយគួរតែទទួលខុសត្រូវចំពោះជម្លោះរុស្ស៊ី-អ៊ុយក្រែន។ នៅក្នុងបទសម្ភាសន៍ផ្តាច់មុខជាមួយទូរទស្សន៍រដ្ឋចិន (CCTV) សហស្ថាបនិកនៃវិទ្យាស្ថានស្រាវជ្រាវលោក Jan Oberg បានបង្ហាញថា អង្គការ NATO គឺហួសសម័យ ហើយគួតែត្រូវតែបានរំលាយ ព្រោះអង្គការនេះមិនអាចបង្កើតសន្តិភាពបាន។ ដោយសម្លឹងមើលពិភពលោកបច្ចុប្បន្ននេះ យើងគ្មានសន្តិភាពនោះទេ នោះហើយជាមូលហេតុដែលអង្គការ NATO ត្រូវតែរំលាយ។ អង្គការនេះបានបង្ហាញថា អស់រយៈពេល ៧៣ឆ្នាំមកហើយដែលមិនអាចបង្កើតសន្តិភាពបាន។ ជម្លោះរវាងរុស្ស៊ី និងអ៊ុយក្រែនមិនបានបង្ហាញសញ្ញាណាមួយនៃការធូស្រាលឡើយ ទោះបីជារយៈពេលប្រាំខែបានកន្លងផុតទៅដោយអង្គការណាតូ និងសហរដ្ឋអាមេរិកបានបញ្ឆេះវិបត្តិដោយការបញ្ជូនអាវុធទៅឲ្យអ៊ុយក្រែន។លោក John Feffer នាយកផ្នែកគោលនយោបាយបរទេស នៅវិទ្យាស្ថានសិក្សាគោលនយោបាយបាននិយាយទៅកាន់ទូរទស្សន៍ CCTV ថា សហរដ្ឋអាមេរិក និងអង្គការណាតូតែងតែមានមហិច្ឆតាក្នុងការទប់ស្កាត់រុស្ស៊ី។ ទោះបីជាកងកម្លាំងទាំងពីរនេះគ្មានជម្លោះផ្ទាល់ជាមួយរុស្ស៊ីក្នុងរយៈពេលខ្លីក៏ដោយ ប៉ុន្តែការព្យាយាមក្នុងភូមិសាស្ត្រនយោបាយនឹងបន្ត។ លោក Feffer បាននិយាយថា អ៊ុយក្រែននឹងបន្តក្លាយជាគោលដៅមួយនៃសង្គ្រាមអូសបន្លាយរវាងរុស្ស៊ី និងប្រទេសលោកខាងលិច ដូច្នេះអ៊ុយក្រែននឹងបន្តក្លាយជាសមរភូមិរវាងរុស្ស៊ី និងប្រទេសលោកខាងលិច៕អត្ថបទ៖ ប៊ុនថន

អ្នកគាំទ្រក្រុមនិកាយស៊ីអ៊ីតដែលគាំទ្រដោយអ៊ីរ៉ង់ប្រមូលផ្តុំគ្នាក្នុងប្រទេសអ៊ីរ៉ាក់

អ៊ីរ៉ាក់៖ អ្នកគាំទ្រក្រុមនិកាយស៊ីអ៊ីតដែលគាំទ្រដោយប្រទេសអ៊ីរ៉ង់ បានប្រមូលផ្តុំគ្នានៅទីក្រុង Baghdad និង Basra កាលពីថ្ងៃសុក្រដើម្បីរិះគន់គូប្រជែងរបស់ពួកគេ ជាអ្នកប្រតិបត្តិតាមបុព្វជិតនិកាយស៊ីអ៊ីតដ៏មានឥទ្ធិពលម្នាក់ ដែលបានសម្រុកចូលសភាកាលពីខែមុន ហើយចាប់តាំងពីពេលនោះមកបានតវ៉ានៅខាងក្រៅអគារសភា ក្នុងរដ្ឋធានីប្រទេសអ៊ីរ៉ាក់។ ការប្រជែងគ្នារវាងភាគីទាំងពីរបង្ហាញពីការបែងចែក នៅក្នុងសហគមន៍ស៊ីអ៊ីតរបស់ប្រទេសអ៊ីរ៉ាក់ ដែលបង្កើតបានប្រមាណ 60% នៃប្រជាជនអ៊ីរ៉ាក់មានជាង 40លាននាក់។ បុព្វជិតលោក Muqtada al-Sadr ជាអ្នករិះគន់យ៉ាងចាស់ដៃចំពោះអំពើពុករលួយ ដែលកំពុងរាលដាលនៅក្នុងប្រទេសសម្បូរប្រេង ដែលត្រូវបានហែកហួរដោយអំពើហិង្សាជាច្រើនទសវត្សរ៍មកនេះ ដោយហេដ្ឋារចនាសម្ព័ន្ធបានដួលរលំ និងប្រជាជនភាគច្រើនធ្លាក់ក្នុងភាពក្រីក្រ និងកង្វះសេវាជាមូលដ្ឋាន។ក្នុងអំឡុងពេលការប្រមូលផ្តុំគ្នាកាលពីថ្ងៃសុក្រ ក្រុមបាតុករមកពីក្របខណ្ឌសម្របសម្រួលជាសម្ព័ន្ធភាពនៃភាគីគាំទ្រដោយអ៊ីរ៉ង់ មិនបានព្យាយាមចូលទៅក្នុងតំបន់បៃតងដ៏រឹងមាំរបស់ទីក្រុង Baghdad នោះទេ ជាកន្លែងរបស់សភាអ៊ីរ៉ាក់ អគាររដ្ឋាភិបាល និងស្ថានទូតបរទេសនៅទីនោះ។ មុនពេលការប្រមូលផ្តុំគ្នា អាជ្ញាធរបានបិទផ្លូវដែលចូលទៅក្នុងតំបន់បៃតងដោយប្រើប្រាស់រនាំងថ្មធំៗ។ ការតវ៉ាប្រឆាំងបានកើតមានឡើងបន្ទាប់ពីលោក al-Sadr បានចេញកាលបរិច្ឆេទកាលពីថ្ងៃពុធដល់ស្ថាប័នតុលាការ ដោយទុកពេលមួយសប្តាហ៍ដើម្បីរំលាយសភា៕អត្ថបទ៖ ប៊ុនថន

FBI ប្រមូលបានឯកសារសម្ងាត់បំផុតនៅលំនៅឋានរបស់លោក Donald Trump

សហរដ្ឋអាមេរិក៖ យោងតាមរបាយការណ៍របស់តុលាការដែលបានចេញផ្សាយកាលពីថ្ងៃសុក្រ បន្ទាប់ពីចៅក្រមសហព័ន្ធបានចេញដីកាគ្មានត្រា ដែលអនុញ្ញាតឱ្យមានការឆែកឆេរមិនធ្លាប់មានពីមុនមកក្នុងសប្តាហ៍នេះ បានឲ្យដឹងថា ការិយាល័យស៊ើបអង្កេតសហព័ន្ធ (FBI) បានរកឃើញឯកសារដែលត្រូវបានដាក់ស្លាកថា "សម្ងាត់បំផុត" ពីលំនៅឋាននៅរមណីយដ្ឋាន Mar-a-Lago ក្នុងរដ្ឋ Florida របស់អតីតប្រធានាធិបតីសហរដ្ឋអាមេរិកលោក Donald Trump ។ ឯកសារនៅលំនៅឋានដែលមិនបានបោះត្រាដោយតុលាការបង្ហាញថា ភ្នាក់ងារ FBI បានយកឯកសារចំនួន 11ច្បាប់ពីលំនៅឋានក្នុងអំឡុងពេលឆែកឆេរកាលពីថ្ងៃចន្ទ។ឯកសារដែលបានប្រមូលបាន រួមមានឯកសារមួយចំនួនដែលមិនបានដាក់ស្លាក មិនត្រឹមតែជាឯកសារសម្ងាត់បំផុតប៉ុណ្ណោះទេ ប៉ុន្តែក៏មានព័ត៌មានដែលមានលក្ខណៈរសើបបំផុត ជាប្រភេទឯកសារពិសេសដែលមានចេតនាការពារការសម្ងាត់បំផុតរបស់ជាតិ ប្រសិនបើត្រូវបានផ្សព្វផ្សាយជាសាធារណៈ នឹងបង្កឱ្យមានការបំផ្លាញធំធេងបំផុតដល់ផលប្រយោជន៍សហរដ្ឋអាមេរិក។ ឯកសាររបស់តុលាការមិនបានផ្តល់ព័ត៌មានលម្អិតជាក់លាក់ អំពីព័ត៌មានដែលមាននៅក្នុងឯកសារនោះទេ។ ដីកានេះសរសេរថា ភ្នាក់ងារសហព័ន្ធកំពុងស៊ើបអង្កេតការបំពានធ្ងន់ធ្ងរ ចំពោះច្បាប់សហព័ន្ធចំនួនបីដាច់ដោយឡែកពីគ្នា ដែលរួមមានច្បាប់ស្តីពីការប្រមូលទិន្នន័យលើការគ្រប់គ្រង ការផ្ទេរ ឬការធ្វើឲ្យបាត់បង់ព័ត៌មានវិស័យការពារជាតិក្រោមច្បាប់ស្តីពីចារកម្ម។លក្ខន្តិកៈផ្សេងទៀតបញ្ជាក់អំពីការបិទបាំង ការធ្វើឲ្យខូចខាត ឬការដកចេញឯកសារ និងការបំផ្លាញ ការផ្លាស់ប្តូរ ឬការក្លែងបន្លំឯកសារនៅក្នុងការស៊ើបអង្កេតរបស់សហព័ន្ធ។ នៅក្នុងសេចក្តីថ្លែងការណ៍មួយកាលពីព្រឹកថ្ងៃសុក្រ លោក Trump បានអះអាងថា ឯកសារដែលរឹបអូសដោយភ្នាក់ងារ ពុំមែនជាប្រភេទឯកសារត្រូវបានផ្ទៀងផ្ទាត់នោះទេ ហើយបានអះអាងថា លោកនឹងប្រគល់ឯកសារទាំងនោះ ប្រសិនបើក្រសួងយុត្តិធម៌ស្នើសុំ។ ដីកាឆែកឆេរនៅរមណីយដ្ឋាន Mar-a-Lago បានចេញកាលពីថ្ងៃចន្ទ គឺជាផ្នែកមួយនៃការស៊ើបអង្កេតរបស់ក្រសួងយុត្តិធម៌ ដែលកំពុងបន្តក្នុងការរកឃើញឯកសារសេតវិមានត្រូវបានផ្ទៀងផ្ទាត់ ដែលប្រមូលបានពីលំនៅឋានរបស់លោក Trump កាលពីដើមឆ្នាំនេះ៕អត្ថបទ៖ ប៊ុនថន

ប្រធានគណៈចលនាមហាជនបក្សប្រជាជនរម្លឹកសមាជិកត្រូវទប់ស្កាត់ព័ត៌មានក្លែងក្លាយ និងវាយបកឲ្យបានរហ័ស

ភ្នំពេញ៖ ដើម្បីទប់ស្កាត់ព័ត៌មានក្លែងក្លាយផ្ទុយពីការពិត បានវាយប្រហារមកលើរាជរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា ប្រធានគណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជា បានរម្លឹកដល់សមាជិក-សមាជិការទាំងអស់ត្រូវទប់ស្កាត់ព័ត៌មានក្លែងក្លាយ និងវាយបកទៅវិញឲ្យបានរហ័ស ដើម្បីកុំឲ្យប្រជាពលរដ្ឋមានការភ័ន្តច្រឡំ។ ការរម្លឹកនេះធ្វើឡើងនៅក្នុងសិក្ខាសាលាមួយនៅព្រឹកនេះ។ លោកជំទាវកិត្តិសង្គហបណ្ឌិត ម៉ែន សំអន អនុប្រធានគណបក្ស និងជាប្រធានគណៈចលនាមហាជន នៃគណៈកម្មាធិការកណ្តាលគណបក្សប្រជាជនកម្ពុជា អមដំណើរដោយឯកឧត្តម ហ៊ុន ម៉ានី អគ្គលេខានៃអគ្គលេខាធិការដ្ឋានគណៈចលនាមហាជន និងថ្នាក់ដឹកនាំមួយចំនួនទៀតនៅព្រឹកថ្ងៃទី១៣ ខែសីហានេះបានចូលរួមជាអធិបតីភាពបើកសិក្ខាសាលាស្ដីពី "ការចែករំលែក និងការផ្លាស់ប្ដូរបទពិសោធន៍លើការងារព័ត៌មាន និងការផ្សព្វផ្សាយមហាជននៅក្នុងបរិបទឌីជីថល’’។ សិក្ខាសិលានេះធ្វើឡើងនៅទីស្នាក់ការកណ្តាលគណបក្សប្រជាជនកម្ពុជា ដែលមានសិក្ខាកាមមកពីគ្រប់រចនាសម្ព័ន្ធគណបក្សប្រមាណជាង ៧០០នាក់។ នៅក្នុងឱកាសខាងលើនោះ ជំទាវកិត្តិសង្គហបណ្ឌិត ម៉ែន សំអន បានថ្លែងថា ស្ថានភាពនយោបាយបច្ចុប្បន្នរបស់ប្រទេសកម្ពុជាកំពុងស្ថិតក្នុងស្ថានភាពល្អ និងអំណោយផល ដែលតាំងពីឆ្នាំ២០១៨ មកគណបក្សប្រជាជនកម្ពុជាបានក្តាប់នូវអំណាចពេញដៃទាំងស្រុង ក្នុងការដឹកនាំប្រទេស ចាត់ចែងកិច្ចការផ្ទៃក្នុង រៀបចំកំណែទម្រង់ផ្សេងៗ ដើម្បីអភិវឌ្ឍប្រទេសជាតិឱ្យកាន់រីកចម្រើន ហើយលទ្ធផលនៃការបោះឆ្នោតក្រុមប្រឹក្សាឃុំ-សង្កាត់កាលពីខែមិថុនាកន្លងទៅនេះក៏បានបង្ហាញថា ប្រជាជនភាគច្រើនបានគាំទ្រ ជឿជាក់ ទុកចិត្តមកលើការដឹកនាំរបស់គណបក្សប្រជាជនកម្ពុជា និងបន្តគាំទ្រគណបក្សប្រជាជនកម្ពុជា។លោកជំទាវបន្តថា ការពង្រឹងសមត្ថភាពនៃការប្រើប្រាស់ប្រព័ន្ធបច្ចេកវិទ្យា និងឌីជីថលជាពិសេសប្រព័ន្ធបណ្តាញព័ត៌មានសង្គមដែលមានលក្ខណៈងាយស្រួល និងលឿនរហ័សទាំងក្នុងការផ្សព្វផ្សាយ និងចែកចាយបន្ត គឺមានសារៈសំខាន់មិនគួរមើលរំលងដើម្បីឈានទៅពង្រីកវិសាលភាព នៃការផ្សព្វផ្សាយមហាជនឱ្យកាន់តែទូលាយក្នុងមជ្ឈដ្ឋានមហាជន ក៏ដូចជាការប្រើប្រាស់ប្រព័ន្ធនេះក្នុងការពន្យល់បកស្រាយ និងឆ្លើយតបបកភ្លាមៗលើការវាយប្រហារផ្សេងៗឱ្យមានភាពរស់រវើក និងទាន់សភាពការណ៍ ដើម្បីបញ្ជ្រាបឱ្យប្រជាជនយល់ច្បាស់អំពីភាពត្រឹមត្រូវ ការយកចិត្តទុកដាក់ខ្ពស់ និងកិច្ចខិតខំប្រែងប្រែងរបស់រាជរដ្ឋាភិបាល និងគណបក្សប្រជាជនកម្ពុជា ក្នុងការដឹកនាំ ដោះស្រាយបញ្ហាសង្គមនានា សំដៅរក្សាសន្តិភាព ស្ថិរភាពនយោបាយ និងជំរុញការអភិវឌ្ឍនៃប្រទេសជាតិលើគ្រប់វិស័យ។ជាមួយគ្នានេះ ឯកឧត្តម ហ៊ុន ម៉ានី អគ្គលេខានៃអគ្គលេខាធិការដ្ឋានគណៈចលនាមហាជន គណៈកម្មាធិការកណ្តាលគណបក្សប្រជាជនកម្ពុជាមានប្រសាសន៍ដែរថា ដោយសង្កេតឃើញពីភាពចាំបាច់ក្នុងការសិក្សាស្រាវជ្រាវ វាយតម្លៃសមរភូមិសតិអារម្មណ៍ និងសិក្សាពីវិធីសាស្ត្រក្នុងឆ្លើយតបដែលអាចផ្តល់ជាធាតុចូលដល់គណបក្ស គណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជា ដែលមានលោកជំទាវកិត្តិសង្គហបណ្ឌិត ម៉ែន សំអន ជាប្រធានបានសម្រេចកាលពីថ្ងៃទី២០ ខែកក្កដា ឆ្នាំ២០២១ ក្នុងការបង្កើតក្រុមការងាប្រមូលព័ត៌មាន វាយតម្លៃ និងឆ្លើយតបសតិអារម្មណ៍មហាជនចំណុះឲ្យគណៈចលនាមហាជន មានភារៈកិច្ចសំខាន់ៗជាមួយភាគីពាក់ព័ន្ធ ដើម្បីវាយតម្លៃពីសភាពការណ៍សតិអារម្មណ៍មហាជន សហការតាមដានសកម្មភាពមជ្ឈដ្ឋានប្រឆាំងនោះ ដើម្បីជំរុញឆ្លើយតបតាមករណីជាក់ស្តែង ក៏ដូចជាការចូលរួមជាមួយយន្តការគណបក្សគ្រប់ជាន់ថ្នាក់ ដើម្បីផ្សព្វផ្សាយឲ្យបានទូលំទូលាយនៃសម្មតិផល និងគុណូបការៈរបស់គណបក្សប្រជាជនកម្ពុជា។គួរបញ្ជាក់ដែរថា ការរៀបចំសិក្ខាសាលាខាងលើមានគោលបំណងសំខាន់ចំនួន ៤ រួមមាន៖ ទី១. ធ្វើបច្ចុប្បន្នភាពស្ថានភាពនយោបាយ សេដ្ឋកិច្ច សង្គម និងស្វែងយល់អំពីតួនាទីរបស់ការងារផ្សព្វផ្សាយ និងសាធារណមតិ ទី២. ចែករំលែកអំពីវិធីសាស្ត្រនៃការផ្សព្វផ្សាយមហាជនក្នុងបរិបទឌីជីថល ទី៣. បង្កើតឱកាសជួបជុំ និងពង្រីកការទំនាក់ទំនងជាមួយអង្គការចាត់តាំង និងយន្តការផ្សព្វផ្សាយនានារបស់គណបក្ស ជាពិសេសដើម្បីពង្រឹងប្រសិទ្ធភាពភាពប្រទាក់ក្រឡាគ្នាទាំងយន្តការនានានៅថ្នាក់កណ្តាល និងរវាងទំនាក់ទំនងរវាងយន្តការថ្នាក់កណ្តាលជាមួយថ្នាក់មូលដ្ឋាន និងទី៤. បង្កើតឱកាសបានរៀនសូត្រពីគ្នាទៅវិញទៅមកដកស្រង់ទស្សនៈ ចែករំលែកបទពិសោធន៍ និងស្វែងយល់ពីការផ្សព្វផ្សាយនៅតាមមូលដ្ឋាននីមួយៗ និងពីតម្រូវការ៕ អត្ថបទ៖ ទូច សោភ័ណ

បណ្ដាញសង្គម

ព័ត៌មានថ្មីៗ

Cristiano Ronaldo បង្កើតប្រវត្តិសាស្ត្រ! ក្លាយជាកីឡាករដំបូងស៊ុតបញ្ចូលទីនៅ World Cup ៦លើក

ឯកឧត្តមឧបនាយករដ្ឋមន្ដ្រី ហ៊ុន ម៉ានី ចុះពិនិត្យការធ្វើជំរឿនមន្ដ្រីជាក់ស្ដែង នៅទីស្តីការក្រសួងរៀបចំដែនដី នគរូបនីយកម្ម និងសំណង់

លោក Putin៖ រុស្ស៊ីត្រៀមរួចរាល់សម្រាប់ការចរចាជាមួយអ៊ុយក្រែន លុះត្រាផ្អែកលើកិច្ចព្រមព្រៀងទីក្រុងអ៊ីស្តង់ប៊ុលឆ្នាំ២០២២

សមាគមរៀបចំពិធីចាប់ឆ្នោតប្រគល់ផ្ទះជូនអតីតយុទ្ធជនចំនួន ៥១គ្រួសារនៅភូមិប៊ុនរ៉ានីសែនជ័យដំណាក់ទ្រយឹង

សល់តែ៦ថ្ងៃទៀតប៉ុណ្ណោះ សម្រាប់ «យុទ្ធនាការ ១ម៉ឺនរៀល ១ម៉ឺននាក់ ឆ្នាំ២០២៦» របស់មូលនិធិគន្ធបុប្ផាកម្ពុជា, សូមចូលរួមបរិច្ចាគ ដើម្បីមន្ទីរពេទ្យគន្ធបុប្ផា អាចបន្តបេសកកម្មសង្រ្គោះជីវិតទារក និងកុមារនៅកម្ពុជា

រលកកម្ដៅដ៏ក្ដៅបំផុតមិនធ្លាប់មាន បង្កឱ្យមានការព្រមានពីសុខភាពនៅទូទាំងទ្វីបអឺរ៉ុប

ប្រធានាធិបតីរុស្ស៊ី លោក Putin និយាយថា ទីក្រុងគីវ ចង់បង្កអស្ថិរភាពដល់រុស្ស៊ី

សហរដ្ឋអាមេរិក ជំរុញសន្តិភាពយូរអង្វែង ខណៈកិច្ចចរចារវាងអ៊ីស្រាអែលនិងលីបង់ ចាប់ផ្តើម

កម្ពុជាសង្កត់ធ្ងន់ពីសារៈសំខាន់នៃការអនុវត្តសេចក្តីសម្រេចចិត្តរបស់ក្រុមប្រឹក្សាសន្តិសុខ និងការមិនអាចរំលោភបំពានបានលើសាលដីការបស់តុលាការយុត្តិធម៌អន្តរជាតិ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

ផ្ទុះឃ្លាំងស្តុកកាំជ្រួចនៅអាមេនីបណ្តាលឲ្យមនុស្ស ៥ស្លាប់ និងរបួស ៤០នាក់

កងកម្លាំងរុស្ស៊ីវាយសន្ធាប់លើតំបន់ Donetsk ខណៈសង្គ្រាមរុស្ស៊ី-អ៊ុយក្រែនបន្តជិត ៦ខែ

មនុស្ស ៤១នាក់ស្លាប់ដោយសារអគ្គិភ័យឆាបឆេះព្រះវិហារកូបទិកក្នុងតំបន់ Giza របស់ប្រទេសអេហ្ស៊ីប

ប្រទេសចំនួន ៤២ អំពាវនាវឲ្យរុស្ស៊ីដកកងទ័ពចេញពីរោងចក្រថាមពលនុយក្លេអ៊ែរនៅអ៊ុយក្រែន

កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាចាប់ផ្តើមនៅព្រឹកថ្ងៃនេះ

ឥណ្ឌូនេស៊ី និងកងកម្លាំងអាមេរិកធ្វើសមយុទ្ធយោធារួមគ្នា

អ្នកជំនាញអន្តរជាតិរិះគន់អង្គការណាតូ និងអាមេរិកដែលបន្តបញ្ជូនសព្វាវុធទៅអ៊ុយក្រែន

អ្នកគាំទ្រក្រុមនិកាយស៊ីអ៊ីតដែលគាំទ្រដោយអ៊ីរ៉ង់ប្រមូលផ្តុំគ្នាក្នុងប្រទេសអ៊ីរ៉ាក់

FBI ប្រមូលបានឯកសារសម្ងាត់បំផុតនៅលំនៅឋានរបស់លោក Donald Trump

ប្រធានគណៈចលនាមហាជនបក្សប្រជាជនរម្លឹកសមាជិកត្រូវទប់ស្កាត់ព័ត៌មានក្លែងក្លាយ និងវាយបកឲ្យបានរហ័ស

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

ផ្ទុះ​ឃ្លាំង​ស្តុក​កាំជ្រួច​នៅ​អា​មេ​នី​បណ្តាល​ឲ្យ​មនុស្ស ៥​ស្លាប់ និង​របួស ៤០​នាក់​

កងកម្លាំង​រុស្ស៊ី​វាយ​សន្ធាប់​លើ​តំបន់ Donetsk ខណៈ​សង្គ្រាម​រុស្ស៊ី​-​អ៊ុយ​ក្រែ​ន​បន្ត​ជិត​ ៦​ខែ​

ប្រទេស​ចំនួន ​៤២ អំពាវនាវ​ឲ្យ​រុស្ស៊ី​ដក​កងទ័ព​ចេញពី​រោងចក្រ​ថាមពលនុយក្លេអ៊ែរ​នៅ​អ៊ុយ​ក្រែ​ន​

កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាចាប់ផ្តើមនៅព្រឹកថ្ងៃនេះ

ឥណ្ឌូនេស៊ី និង​កងកម្លាំង​អាមេរិកធ្វើ​សមយុទ្ធ​យោធា​រួមគ្នា

អ្នកជំនាញ​អន្តរជាតិ​រិះគន់​អង្គការ​ណា​តូ និង​អាមេរិក​ដែល​បន្ត​បញ្ជូន​សព្វាវុធ​ទៅ​អ៊ុយ​ក្រែ​ន​

អ្នកគាំទ្រ​ក្រុម​និកាយ​ស៊ី​អ៊ី​ត​ដែល​គាំទ្រ​ដោយ​អ៊ីរ៉ង់​ប្រមូលផ្តុំ​គ្នា​ក្នុងប្រទេស​អ៊ីរ៉ាក់

FBI ប្រមូលបាន​ឯកសារ​សម្ងាត់​បំផុត​នៅ​លំនៅឋាន​របស់លោក Donald Trump

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ផ្ទុះឃ្លាំងស្តុកកាំជ្រួចនៅអាមេនីបណ្តាលឲ្យមនុស្ស ៥ស្លាប់ និងរបួស ៤០នាក់

កងកម្លាំងរុស្ស៊ីវាយសន្ធាប់លើតំបន់ Donetsk ខណៈសង្គ្រាមរុស្ស៊ី-អ៊ុយក្រែនបន្តជិត ៦ខែ

ប្រទេសចំនួន ៤២ អំពាវនាវឲ្យរុស្ស៊ីដកកងទ័ពចេញពីរោងចក្រថាមពលនុយក្លេអ៊ែរនៅអ៊ុយក្រែន

ឥណ្ឌូនេស៊ី និងកងកម្លាំងអាមេរិកធ្វើសមយុទ្ធយោធារួមគ្នា

អ្នកជំនាញអន្តរជាតិរិះគន់អង្គការណាតូ និងអាមេរិកដែលបន្តបញ្ជូនសព្វាវុធទៅអ៊ុយក្រែន

អ្នកគាំទ្រក្រុមនិកាយស៊ីអ៊ីតដែលគាំទ្រដោយអ៊ីរ៉ង់ប្រមូលផ្តុំគ្នាក្នុងប្រទេសអ៊ីរ៉ាក់

FBI ប្រមូលបានឯកសារសម្ងាត់បំផុតនៅលំនៅឋានរបស់លោក Donald Trump