នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ គាំទ្រកម្ពុជា-វៀតណាម ចៀសវាងកុំឱ្យមានការប្រើប្រាស់កម្លាំងនៅក្នុងប្រទេសមួយ ប្រឆាំងនឹងប្រទេសណាមួយទៀត
សម្តេចតេជោ ហ៊ុន សែន អនុញ្ញាតឱ្យរដ្ឋមន្ត្រីសន្តិសុខសាធារណៈវៀតណាម ចូលជួបសម្តែងការគួរសម
សម្តេចធិបតីលើកទឹកចិត្តឱ្យក្រសួងមហាផ្ទៃកម្ពុជា ក្រសួងសន្តិសុខសាធារណៈឡាវ និងក្រសួងនគរបាលវៀតណាម បន្តពង្រឹងកិច្ចសហប្រតិបត្តិការឱ្យកាន់តែរីកចម្រើនបន្ថែមទៀត
ផ្ទះទេវតាទី៣៣៥ មួយខ្នងទៀត ដោយមានភ្ជាប់ប្រព័ន្ធទឹកស្អាត និងភ្លើងសូឡា ជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត, សម្ដេចធិបតី និងលោកជំទាវត្រូវបានលោកជំទាវ ហ៊ុន ម៉ាណា ប្រគល់ជូនលោកយាយចាស់ជរានៅខេត្តតាកែវ

ព័ត៌មានសំខាន់ៗ

កម្ពុជា-អាម៉េរិក ពិភាក្សាលើកិច្ចសហប្រតិបត្តិការក្នុងវិស័យយោធា នៃប្រទេសទាំងពីរ

2022/05/19 08:39:35 pm        330
Facebook Telegram Linkin
ភ្នំពេញ ៖ នារសៀលថ្ងៃទី១៨ ខែឧសភា ឆ្នាំ២០២២ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង កងយោធពលខេមរភូមិន្ទ មេបញ្ជាការកងទ័ពជើងគោក បានទទួលជួបលោកស្រី Lori Abele នាយកគោលនយោបាយអាស៊ីខាងត្បូង និងអាស៊ីអាគ្នេយ៍ នៃក្រសួងការពារជាតិ សហរដ្ឋអាម៉េរិក។ក្នុងជំនួបនោះ ភាគីទាំងពីរបានពិភាក្សាគ្នាពីកិច្ចសហប្រតិបត្តិការមួយចំនួន និងជាពិសេសកិច្ចសហប្រតិបត្តិការយោធារវាងកងទ័ពនៃប្រទេសទាំងពីរ។ បន្ថែមពីនេះ ភាគីទាំងពីរបានវាយតម្លៃខ្ពស់លើកិច្ចសហប្រតិបត្តិការដែលមានកន្លងមក និងបានបង្ហា ញឆន្ទ:ក្នុងការរក្សាពង្រឹង និងពង្រីកកិច្ចសហប្រតិបត្តិការយោធាបន្ថែមទៀតនៅពេលខាងមុខ និងការបន្តបង្កើនភាពជឿទុកចិត្តរវាងកងទ័ពនៃប្រទេសទាំងពីរផងដែរ។ ឯកឧត្តមអគ្គមេបញ្ជាការរង បានថ្លែងអំណរគុណ រដ្ឋាភិបាល ក្រសួងការពារជាតិ សហរដ្ឋអាម៉េរិក ដែលបានជួយឧបត្ថម្ភ និងបណ្តុះបណ្តាល ដល់កងទ័ពកម្ពុជាកន្លងមក។លោកស្រី Lori Abele បានថ្លែងអំណរគុណដល់ប្រទេសកម្ពុជា ដែលបានចូលរួមជាមួយសហរដ្ឋអាម៉េ រិក ក្នុងកិច្ចការសន្តិសុខកន្លងមក៕ដោយ៖ គង់ ឌិន

BREAKING NEWS: សហរដ្ឋអាមេរិកនឹងបើកការស៊ើបអង្កេតលើករណីលោក អ៊ុក ទូច ដែលគប់ស្បែកជើងតម្រង់មកនាយករដ្ឋមន្ត្រីកម្ពុជា

2022/05/19 07:39:39 pm        1676
Facebook Telegram Linkin
ភ្នំពេញ៖ អ្នកនាំពាក្យស្ថានទូតអាមេរិកបានប្រាប់សារព័ត៌មានក្នុងស្រុកនៅថ្ងៃព្រហស្បតិ៍ទី១៩ ខែឧសភានេះ ថាសហរដ្ឋអាមេរិកកំពុងធ្វើការស៊ើបអង្កេតទៅលើករណីហេតុការណ៍គប់ស្បែកជើងដែលប្រព្រឹត្តដោយលោក អ៊ុក ទូច តម្រង់មកលើនាយករដ្ឋមន្ត្រី ហ៊ុន សែន កាលពីថ្ងៃទី១១ ខែឧសភា ឆ្នាំ២០២២ នៅរដ្ឋធានីវ៉ាស៊ីនតោន។ក្នុងសារអេឡិចត្រូនិកដែលឆ្លើយតបមកកាន់សារព័ត៌មានក្នុងស្រុកនោះ អ្នកនាំពាក្យស្ថានទូតអាមេរិកប្រចាំកម្ពុជា លោក Chad Roedemeierបានឱ្យដឹងថាទាក់ទងជាមួយនឹងឧប្បត្តិហេតុនៅថ្ងៃទី១១ ខែឧសភា សហរដ្ឋអាមេរិកនឹងបើកការស៊ើបអង្កេតដោយហ្មត់ចត់តាមច្បាប់របស់ខ្លួន។លោក Chad ឆ្លើយថា៖ «ទាក់ទងទៅនឹងហេតុការណ៍ដែលបានកើតឡើងកាលពីថ្ងៃទី១១ ខែឧសភា កន្លងទៅ ក្រុមការងារអនុវត្តច្បាប់របស់សហរដ្ឋអាមេរិកកំពុងស៊ើបអង្កេតលើរឿងនេះ។ វានឹងត្រូវតាមដានដោយហ្មត់ចត់ស្របតាមផ្លូវច្បាប់របស់សហរដ្ឋអាមេរិក»។លោក Chad ក៏បានបន្ថែមថា សហរដ្ឋអាមេរិកយកចិត្តទុកដាក់លើសុវត្ថិភាព និងសន្តិសុខរបស់អ្នកការទូត និងឥស្សរជនដែលមកទស្សនកិច្ចនៅអាមេរិកយ៉ាងយកចិត្តទុកដាក់បំផុត។ការបញ្ជាក់របស់ស្ថានតំណាងអាមេរិកប្រចាំកម្ពុជានៅពេលនេះគឺតែប៉ុន្មានថ្ងៃប៉ុណ្ណោះបន្ទាប់ពីនាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានស្នើដល់សហអាមេរិកបកស្រាយចំពោះករណីគប់ស្បែកជើងមកលើថ្នាក់ដឹកនាំមួយ ថាតើវាជាសិទ្ធិបញ្ចេញមតិឬអំពើហិង្សា។ថ្លែងនៅក្នុងពិធីជួបសំណេះសំណាលជាមួយក្រុមគ្រូពេទ្យសម្តេចតេជោប្រឆាំងកូវីដ-១៩ ធ្វើឡើងនៅសាលពិព័ណ៍ជ្រោយចង្វារ រាជធានីភ្នំពេញ សម្តេចតេជោ ហ៊ុន សែន បានថ្លែងថា៖ «បើសិនជាអាមេរិកចាត់ទុកថារឿងនេះជាសិទ្ធិបញ្ចេញមតិ ចឹងរឿងនេះនឹងកើតនៅគ្រប់ប្រទេសទាំងអស់រាប់ទាំងកម្ពុជា ចឹងក្រុមប្រឆាំងទាំងអស់ នឹងត្រូវក្បាលនឹងស្បែកជើង។ នៅលើពិភពលោកនេះគ្មានច្បាប់ទម្លាប់ទៀតទេ»។ក្រមសហរដ្ឋអាមេរិក ក្នុងគន្ថី១៨ ផ្នែកទី១១២ មានចែងអំពីការការពារជាពិសេសចំពោះ «មន្ត្រីបរទេស ភ្ញៀវផ្លូវការ និងជនការពារដោយអន្តរជាតិ»។ សាស្រ្តាចារ្យផ្នែកច្បាប់នៅសាកលវិទ្យាល័យ Columbia Law School លោក Daniel C. Richman បានលើកឡើងថា បុគ្គលណាដែលប្រព្រឹត្តអំពើ "ហិង្សា (Assault), វាយ (Strike), បង្ករបួសស្នាម (Wound), ឃុំឃាំង (Imprisoned) ឬបង្កហិង្សា (Offer Violence)" ចំពោះមន្រ្តីបរទេស, ភ្ញៀវផ្លូវការ និងបុគ្គលដែលត្រូវបានការពារជាអន្តរជាតិ អាចត្រូវបានផ្តន្ទាទោសដាក់ពន្ធនាគាររហូតដល់ ៣ឆ្នាំ ឬពិន័យជាប្រាក់ ឬត្រូវទទួលទោសទាំងពីរនេះរួមគ្នា ទាំងទោសពិន័យ ទាំងទោសដាក់ពន្ធនាគារ។ ប្រសិនបើទង្វើនៃការគប់ស្បែកជើង (ប៉ុន្តែគប់មិនត្រូវ) មិនទាន់គ្រប់គ្រាន់សម្រាប់ការផ្តន្ទាទោសពីបទអំពើហិង្សាក៏ដោយចុះ, ក៏តុលាការនៅតែសម្រេចថា ជននោះអាចនឹងមានទោសពីបទបំពានចំពោះមន្រ្តីបរទេស ឬរំខានមិនឱ្យមន្រ្តីនោះបំពេញការងាររបស់ខ្លួនបានដែរ ដែលបទល្មើសនេះអាចត្រូវបានផ្តន្ទាទោសដាក់ពន្ធនាគារមិនលើសពី ៦ខែឬពិន័យជាប្រាក់៕

សម្តេចតេជោ៖យើងមិនអាចបោះបង់ ឬងាកចេញពីយន្តការពហុភាគីនិយមបានទេខណៈពិភពលោកកំពុងស្មុគស្មាញ

2022/05/19 07:07:55 pm        383
Facebook Telegram Linkin
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា ភាគីទាំងអស់មិនគួរបោះបង់ ឬងាកចេញពីយន្តការពហុភាគីនិយមនោះទេ ខណៈដែលពិភពលោកទាំងមូលកំពុងជួបបញ្ហាស្មុគស្មាញជាច្រើនមានការប្រែប្រួល និងមិនច្បាស់លាស់ជាដើមនោះ។ថ្លែងនៅក្នុង «វេទិកាលើកទី២ នៃគណបក្សនយោបាយ ក្រុមស្រាវជ្រាវ និងអង្គការសង្គមស៊ីវិល មកពីបណ្តាប្រទេសប្រ៊ីក(BRICS)» ក្រោមមូលបទ«សាមគ្គីភាព និងកិច្ចសហប្រតិបត្តិការឆ្ពោះទៅរកការអភិវឌ្ឍរួម និងអនាគតដ៏ភ្លឺស្វាង»នាថ្ងៃទី១៩ ខែឧសភា ឆ្នាំណ២០២២នេះ សម្តេចតេជោ ហ៊ុន សែន បានលើកឡើងថា« នៅក្នុងបរិបទដែលពិភពលោកទាំងមូលកំពុងមានការប្រែប្រួលយ៉ាងឆាប់រហ័ស, មិនច្បាស់លាស់ និងស្មុគស្មាញនេះ, យើងមិនអាចបោះបង់ ឬងាកចេញពីយន្តការពហុភាគីនិយមបានទេ ប្រសិនបើយើងពិតជាមានបំណងដោះស្រាយបញ្ហាប្រឈមរួមនាពេលបច្ចុប្បន្ន។ ក្នុងន័យនេះ អាស៊ាន និង ប្រ៊ីក (BRICS) ក៏ដូចជាសហគមន៍អន្តរជាតិទាំងមូល ចាំបាច់ត្រូវខិតខំប្រឹងប្រែងទ្វេរដង ដើម្បីស្តារឡើងវិញនូវពហុភាគីនិយម ដែលផ្តល់អាទិភាពដល់ការរួបរួមគ្នាក្នុងការដោះស្រាយបញ្ហាប្រឈមនានានោះ»។សម្តេចតេជោ ហ៊ុន សែន នាយករដ្ឋមន្រ្តី ក៏បានអំពាវនាវឲ្យពិភពលោកទាំងមូលគប្បីយកចិត្តទុក ដាក់ឲ្យកាន់តែខ្លាំងបន្ថែមទៀតផងដែរ ចំពោះការលើកកម្ពស់កិច្ចសហប្រតិបត្តិការរួមគ្នា ប្រសើជាងការប្រឈម មុខដាក់គ្នា។​តាមរយៈវេទិកានេះដែរ សម្តេចតេជោ ហ៊ុន សែន ក៏បានលើកឡើងផងដែរថា ក្នុងនាមជាប្រធានអាស៊ានសម្រាប់ឆ្នាំ២០២២ ដែលមានមូលបទ “អាស៊ានរួមគ្នាធ្វើ៖ ដោះស្រាយបញ្ហាប្រឈមទំាងអស់គ្នា” រួមជាមួយនឹងបណ្តាប្រទេសសមាជិកជាអាស៊ានផ្សេងទៀតខិតប្រឹងប្រែង ដើរតួនាទីយ៉ាងសកម្មបន្ថែមទៀត ដើម្បីកសាងអនាគតភ្លឺស្វាងជាងមុនសម្រាប់អាស៊ី និងពិភពលោក។ ក្នុងន័យនេះសម្តេចតេជោនាយករដ្ឋមន្រ្តីបានលើកឡើងទៀតថា កម្ពុជាក៏ដូចជាអាស៊ាននឹងបង្កើនការខិតខំប្រឹងប្រែងឱ្យបានទ្វេដងលើការពង្រឹងនូវភាពជាកណ្តាល និងភាពធន់របស់អាស៊ាន ។សម្តេចបានបន្ថែមថា «យើងក៏កំពុងជំរុញការអនុវត្តប្រកបដោយប្រសិទ្ធភាពនូវរាល់គំនិតផ្តួចផ្តើម និងវិធានការដែលយើងបានព្រមព្រៀងគ្នា រួមមាន ក្របខ័ណ្ឌស្តារឡើងវិញគ្រប់ជ្រុងជ្រោយអាស៊ាន, កិច្ចព្រមព្រៀងពាណិជ្ជកម្មសេរី, ការតភ្ជាប់ទាំងរូបវ័ន្ត និងឌីជីថល, សមត្ថភាពរបស់សហគ្រាសធុនតូច និងមធ្យម, និងការអភិវឌ្ឍធនធានមនុស្ស ដើម្បីបំពេញតម្រូវការនៃយុគសម័យឌីជីថល និងបដិវត្តន៍ឧស្សាហកម្មទីបួន»៕អត្ថបទ ៖ បាន ចក់​

អាធ្រាតឆ្លងចូលថ្ងៃទី២១ ខែឧសភា សម្តេចតេជោ ហ៊ុន សែន នឹងដឹកនាំគណៈប្រតិភូចូលរួមវេទិការសេដ្ឋកិច្ចពិភពលោកនៅដាវ៉ូស

2022/05/19 03:15:11 pm        289
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានប្រកាសថា នៅវេលាម៉ោង១និង៣០ រំលងអាធ្រាត ឆ្លងចូលថ្ងៃទី២១ ខែឧសភា ឆ្នាំ២០២១ខានស្អែកនេះ សម្តេចនឹងដឹកនាំ គណៈប្រតិភូកម្ពុជា ដើម្បីចូលរួមវេទិការសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស។សម្តេចតេជោ ហ៊ុន សែន ប្រកាសថ្លែងអំណរគុណចំពោះបងប្អូនជនរួមជាតិដែលកំពុងរស់នៅបណ្តាប្រទេសនៅទ្វីបអឺរ៉ុបដែលបានចេញវីដេអូអបអរសាទរដំណើររបស់សម្តេចទៅកាន់តំបន់អឺរ៉ុប។សម្តេចបញ្ជាក់ថា តាមការគ្រោងទុកសម្តេចនឹងជួបបងប្អូនខ្មែរនៅសូរិក ប្រទេសស្វីស នាល្ងាចថ្ងៃទី២១ឧសភា២០២២។សម្តេចសូមជំរាបលាបងប្អូនជនរួមជាតិនៅក្នុងប្រទេសមួយរយះខ្លីហើយនិងជួបបងប្អូនជនរួមជាតិនៅតំបន់អឺរ៉ុបក្នុងពេលប្រម៉ាន៦០ម៉ោងទៀត៕

កូរ៉េខាងជើងមានករណីគ្រុនក្តៅជាង ២៦ម៉ឺនករណីបន្ថែមទៀត ខណៈអ្នកស្លាប់ឡើងដល់ ៦៣នាក់​

2022/05/19 02:49:42 pm        1081
Facebook Telegram Linkin
​កូរ៉េខាងជើង៖ ប្រទេស​កូរ៉េខាងជើងបាន​រាយការណ៍​ករណី​ថ្មី​វីរុស​កូ​រ៉ូ​ណា​ដែល​សង្ស័យ​ចំនួន ២៦០,០០០​ករណី​បន្ថែមទៀត​ក្នុងអំឡុង​ពេល​តែមួយ​ថ្ងៃ​។ សារព័ត៌មាន​របស់​គ​ណ​បក្ស​ពលករ​ដែល​កំពុងកាន់​អំណាច Rodong Sinmun បាន​រាយការណ៍​នៅ​ថ្ងៃ​ព្រហស្បតិ៍​នេះ​ថា ករណី​ថ្មី​នៃ​ជំងឺ​គ្រុនក្តៅ​ ២៦២,២០០​ករណី និង​ស្លាប់​ម្នាក់ត្រូវបាន​បញ្ជាក់​រយៈពេល​ជាង ​២៤​ម៉ោង​រហូតមក​ត្រឹម​ម៉ោង ​៦​ល្ងាច​ថ្ងៃ​ពុធ​។ ​កូរ៉េខាងជើង​បានបញ្ជាក់​ពី​ករណី​ជំងឺ​គ្រុនក្តៅ​ចំនួន​ ២​សែន​ទៅ​ ៣​សែន​ករណី​ជា​មូលដ្ឋាន​ប្រចាំថ្ងៃ ចាប់តាំងពី​ការផ្ទុះ​ឡើង​វីរុស​កូ​រ៉ូ​ណាដែល​ត្រូវបាន​រាយការណ៍​កាលពី​ថ្ងៃ​ព្រហស្បតិ៍​មុន​។ ​មនុស្ស​ប្រមាណ​ជិត ​២​លាន​នាក់ តាម​សេចក្តីរាយការណ៍មាន​រោគសញ្ញា​គ្រុនក្តៅចាប់តាំងពី​ចុងខែមេសា និង​អ្នកស្លាប់​កើនឡើង​ដល់​ ៦៣​នាក់​។​ ​អាជ្ញាធរ​សុខាភិបាល​និយាយថា មន្ទីរពេទ្យ​កំពុង​ត្រូវបាន​បង្កើតឡើង​នៅ​ទូទាំងប្រទេស ដើម្បីដាក់​អ្នកជំងឺ​ឲ្យ​នៅ​ដោយឡែក ប៉ុន្តែ​មនុស្ស​កាន់តែច្រើន តាម​សេចក្តី​រាយ​កាណ៍កំពុង​ដាក់ខ្លួនឲ្យ​នៅ​ដោយឡែក ​ដោយ​ខ្លួនឯង​នៅតាម​លំនៅឋាន​។ អាជ្ញាធរ​និយាយថា ​អំបិល​រាប់ពាន់​តោនត្រូវបាន​បញ្ជូន​បន្ទាន់​ទៅកាន់​រដ្ឋធានី​ព្យុងយ៉ាង ដើម្បី​ព​ន្លឿ​ន​ការផលិតសម្រាប់​ការសម្លាប់​មេរោគ​។​​ទោះជា​យ៉ាងណាមានការ​ព្រួយបារម្ភ​ថា ​មនុស្ស​កាន់តែច្រើន​នឹង​ធ្លាក់ខ្លួន​ឈឺ​ដោយសារតែ​ប្រព័ន្ធថែទាំ​សុខភាព​ដ៏​ផុយស្រួយ និង​កង្វះ​វ៉ាក់សាំង​។ ប្រទេស​កូរ៉េខាងជើងកំពុង​ព​ន្លឿ​ន​ការផលិត​ឱសថ និង​ការផ្គត់ផ្គង់​ឱសថ ខណៈ​ប្រទេសនេះ​ប្រយុទ្ធប្រឆាំង​ការផ្ទុះ​ឡើង​វីរុស​កូ​រ៉ូ​ណា​។ ប្រទេស​ឯកោ​មួយនេះដែល​បានដាក់​វិធាន​ការបិទ​ខ្ទប់​ទូទាំងប្រទេស ក៏​កំពុង​បង្កើន​ការផលិត​ថ្នាំបុរាណ​កូរ៉េដែល​ត្រូវបាន​ប្រើប្រាស់ ​ដើម្បី​បន្ធូរបន្ថយ​គ្រុនក្តៅ និង​ឈឺចាប់៕អត្ថបទ៖ ប៊ុនថន

អង្គការសហប្រជាជាតិ​និយាយ​ថា​ ជន​ស៊ីវិល​ជាង​ ៣៧០០​នាក់​ស្លាប់​ក្នុង​ការ​វាយប្រហារ​ពី​រុស្ស៊ី​នៅ​អ៊ុយ​ក្រែ​ន

2022/05/19 11:55:43 am        1108
Facebook Telegram Linkin
​អ៊ុយក្រែន៖ ការិយាល័យ​ឧត្ដមស្នងការ​ទទួលបន្ទុក​សិទ្ធិមនុស្ស​របស់​អង្គការសហប្រជាជាតិ ឬ OHCHR និយាយ​ថា គិត​ត្រឹម​ថ្ងៃ​អង្គារ​សប្ដាហ៍​នេះ​ ជន​ស៊ីវិល​យ៉ាងហោចណាស់​ 3,778​នាក់​បាន​ស្លាប់​ក្នុង​ប្រទេស​អ៊ុយ​ក្រែ​ន ចាប់តាំងពី​ការវាយលុក​របស់​រុស្ស៊ី​បានចាប់ផ្ដើម​កាលពី​ថ្ងៃទី​24 ​ខែកុម្ភៈ​។​ ​ទិន្នន័យ​នេះ​រួម​ទាំង​កុមារ​ចំនួន 251​នាក់​ផង​ដែរ​។ ​ការិយាល័យ​ឧត្ដមស្នងការ​ទទួលបន្ទុក​សិទ្ធិមនុស្ស ​របស់​អង្គការសហប្រជាជាតិ​ខាងលើ​និយាយ​ថា មនុស្ស​ស្លាប់​ចំនួន 2,070​នាក់​នៅក្នុង​តំបន់​ភាគ​ខាងកើត Donetsk និង Luhansk ចំណែក​អ្នក​ស្លាប់​ចំនួន 1,708​នាក់​នៅក្នុង​តំបន់​នានា​រួមទាំង​រដ្ឋធានី Kyiv ទីក្រុង Kharkiv នៅក្នុង​តំបន់​ភាគ​ខាងកើត និង​កន្លែង​ផ្សេងទៀត​។ អង្គការ​នេះក៏បាន​និយាយ​ផងដែរ​ថា ជន​ស៊ីវិល​ចំនួន 4​,186នាក់បាន​រង​របួស​។ ​ទីភ្នាក់ងារ​ដដែល​នេះ​និយាយ​ថា ​ខ្លួន​ជឿ​ថា ចំនួន​អ្នក​ស្លាប់ និង​របួស​ពិតប្រាកដ​មាន​ចំនួន​ខ្ពស់ជាង​នេះ។ ទីភ្នាក់ងារ​នេះ​បានលើកឡើង​ពី​ការលំបាក​ ក្នុងការ​បញ្ជាក់​ពី​របាយការណ៍​ផ្សេងៗពី​ទីក្រុង Mariupol នៅក្នុង​ភាគ​ខាងកើត និង​តំបន់​ផ្សេងៗ​របស់​ប្រទេស​អ៊ុយ​ក្រែ​ន​។ ​យោងតាម​អង្គការ​សហប្រជាជាតិ​ឲ្យ​ដឹង​ថា មនុស្ស​ជិត 13​​លាន​នាក់​ត្រូវគេ​ជឿថាបាន​ភៀសខ្លួន​ចេញពីផ្ទះ​សម្បែង ​ក្នុង​ប្រទេស​អ៊ុយ​ក្រែ​នចាប់តាំងពី​ជម្លោះ​បានចាប់ផ្ដើម​។​មនុស្ស​ជាង​ 6​លាន​នាក់បាន​ភៀសខ្លួន​ចូលទៅក្នុង​ប្រទេសជិតខាង និងយ៉ាងហោចណាស់​ 6.5​លាន​នាក់​ផ្សេងទៀត ត្រូវគេ​គិតថា​ បាន​ភៀសខ្លួន​នៅក្នុង​ប្រទេស​រង​ការ​ហែកហួរ​ដោយ​សង្គ្រាម​មួយ​នេះ​​។ ​អង្គការ​សហ​ប្រជា​ជាត​និយាយ​ថា គិត​ត្រឹម​ថ្ងៃ​ទី​១៧ ​ខែ​ឧសភា មនុស្ស​ប្រមាណ​ 6.3​លាន​នាក់​បាន​ភៀសខ្លួន​ចេញពី​អ៊ុយ​ក្រែ​ន​ចូល​ទៅ​ប្រទេស​ជាច្រើន​ដូចជា​ប៉ូឡូញ​ចំនួន 3,396,792នាក់, រ៉ូម៉ានី​ចំនួន 930,341​នាក់, រុស្ស៊ី​ចំនួន 863,086​នាក់, ហុងគ្រី​ចំនួន 615,256​នាក់, ម៉ុលដូវ៉ា​ចំនួន 465,435​នាក់, ស្លូវ៉ាគី​ចំនួន 426,605នាក់ និងបេឡារុស​ចំនួន 27,308​នាក់​៕អត្ថបទ៖ សុខមាន

ឯកឧត្ដម​ វង​ សូត​ ៖​ គណបក្សប្រជាជនកម្ពុជាបានសង្គ្រោះជាតិឲ្យរស់ឡើងវិញ​ និងបន្តអភិវឌ្ឍន៍ប្រទេសជាតិ

2022/05/19 11:15:03 am        610
Facebook Telegram Linkin
ត្បូង​ឃ្មុំ​៖​ ឯកឧត្ដម​ វង​ សូត​ ថ្លែងថា​ បច្ចុប្បន្ន​នេះ មេីលឃេីញយ៉ាងច្បាស់ នូវការដឹកនាំប្រទេស និងគុណបំណាច់ដ៏មហាធំធេងរបស់សម្តេចតេជោ ហ៊ុន សែន និងគណបក្សប្រជាជនកម្ពុជា បានសង្គ្រោះជាតិឲ្យរស់ឡើងវិញ រួចផុតពីរបបប្រល័យពូជសាសន៍ ប៉ុល​ ពត​ មក​ដល់សព្វមានភាពសុខសាន្តពេញផ្ទៃប្រទេស។ ការថ្លែងបែបនេះ​ក្នុងពេលដែរ​ ឯកឧត្ដម​ វង​ សូត​ រដ្ឋមន្ត្រី​ក្រសួង​សង្គមកិច្ច​អតីត​យុទ្ធជន​ និងយុវនីតិសម្បទា ​និងជាប្រធានក្រុមការងារថ្នាក់ជាតិ​ចុះជួយស្រុកពញាក្រែក​ ខេត្ត​ត្បូង​ឃ្មុំ​ និងឃុំជាច​ស្រុកកំចាយមារ​ ខេត្តព្រៃវែង​ និងលោកជំទាវ​ បានអញ្ជេីញ​ជាគណៈអធិបតី ក្នុងពិធីសម្ភោធដាក់ឲ្យប្រេីប្រាស់ជាផ្លូវការនូវសាលាបាលី​ និងសមិទ្ធផលនានា​ក្នុងវត្តសុវណ្ណរាម​ ហៅវត្តក្រែក​ ស្ថិតក្នុងភូមិក្រែកត្បូងឃ្មុំ​ ឃុំក្រែក​ ស្រុកពញាក្រែក​ ខេត្ត​ត្បូង​ឃ្មុំ​ នាព្រឹក​ថ្ងៃទី​១៩​ ខែឧសភា​ ឆ្នាំ​២០២២នេះ។ឯកឧត្ដម​ បានបន្ត​ទៀតថា​ រាជរដ្ឋាភិបាល​កម្ពុជា​ បានទប់ស្កាត់មិនឲ្យរបបដ៏យង់ឃ្នង​ ប្រល័យពូជសាសន៍​ ប៉ុល​ពត​ វិលត្រឡប់មកវិញ និងបានផ្តល់សិទ្ធិសេរីភាពគ្រប់យ៉ាង សេចក្ដីថ្លៃថ្នូរ និងស្តារអភិវឌ្ឍន៍សមិទ្ធផលថ្មីៗជាបន្តបន្ទាប់ទៀត។ជាក់ស្ដែង​ សាលាបាលី ដែលត្រូវសម្ភោធដាក់ឲ្យប្រេីប្រាស់នៅពេលនេះ​ អស់ជិត៣០ម៉ឺន​ដុល្លារ​សហរដ្ឋ​អាមេរិក​ ថែមទាំង វិស័យ​ពុទ្ធិចក្រ​មានសមិទ្ធផលនានាដែលកំពុងរីកចម្រើន​ ទាំងអស់នេះគឺកេីតចេញពីកត្តាសន្តិភាព។ ឯកឧត្ដម​ វង​ សូត​ ជម្រុញដល់បងប្អូនប្រជាពលរដ្ឋ​ត្រូវចូលរួមការពារ​ និងថែរទាំសុខភាព តាមគ្រួសារឲ្យល្អ​ ហេីយកុំភ្លេចទៅទទួលវ៉ាក់សាំងបង្ការជំងឺកូវីដ-១៩ពីរាជរដ្ឋាភិបាលកម្ពុជា​បន្ថែមទៀត​ ប្រសិនបេីបងប្អូនបានចាក់ដូសទី១​ ដូសទី២រួច​ ត្រូវទៅបន្តចាក់ដូសជំរុញបន្តទៀត​ ដេីម្បីទប់ស្កាត់​ បង្ការការពារជម្ងឺដ៍កាចសាហាវនេះ។ ទន្ទឹមនឹងនេះដែរ​ ឯកឧត្ដម​ វង​ សូត​​​ បានអំពាវនាវដល់ប្រជាពលរដ្ឋទាំងអស់ មានសិទ្ធិ ជ្រើសរើសជីវភាពនយោបាយ ទៅតាមការពេញចិត្ត​ និងទៅបោះឆ្នោតជ្រើសរើស ក្រុមប្រឹក្សាសង្កាត់អាណត្តិទី៥ នៅថ្ងៃទី៥ ខែឧសភា ឆ្នាំ២០២២ ខាងមុខនេះឲ្យបានគ្រប់ៗគ្នា៕

ឯកឧត្ដម ឧបនាយករដ្ឋមន្ត្រី ជា សុផារ៉ា តំណាងសម្តេចតេជោ ហ៊ុន សែន សម្ពោធដាក់ឱ្យដំណើរការសួនរុក្ខជាតិអង្គរជាផ្លូវការ

2022/05/19 10:35:29 am        1169
Facebook Telegram Linkin
សៀមរាប៖ ឯកឧត្ដម ជា សុផារ៉ា ឧបនាយករដ្ឋមន្ដ្រី រដ្ឋមន្រ្ដីក្រសួងរៀបចំដែនដី នគររូបនីយកម្ម និងសំណង់ តំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី បានសម្ពោធដាក់ឱ្យដំណើរការសួនរុក្ខជាតិអង្គរជាផ្លូវការ នៅព្រឹកថ្ងៃទី១៩ ខែឧសភា ឆ្នាំ២០២២នេះ។សួនរុក្ខជាតិអង្គរ មានឈ្មោះដើមជាសួនគ្រឿងទេស បង្កើតឡើងពីឆ្នាំ ២០០៥ កាលណោះមានផ្ទៃដីប្រមាណ២ហិកតាប៉ុណ្ណោះ ប៉ុន្ដែចាប់ពីឆ្នាំ២០១៨មក សួននេះត្រូវបានរៀបចំកែលម្អ និងពង្រីករហូតដល់ជាង ១៥ហិកតា ក្រោមការឧបត្ថម្ភ និងគំនិតផ្តួចផ្តើមរបស់ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគររូបនីយកម្ម និងសំណង់ ក្នុងគោលបំណងចង់ឃើញសួនមានភាពទាក់ទាញ និងសក្តានុពលខ្លាំងជាងមុន សម្រាប់ជាប្រយោជន៍ប្រជាជន និងទេសចរជាតិ-អន្តរជាតិ។សួនរុក្ខជាតិអង្គរនេះ ត្រូវបានរៀបចំជា ៥សួនធំៗប្លែកពីគ្នា។ ទី១ សួនគ្រឿងទេស និងសួនឱសថ ដែលប្រមូលផ្តុំរុក្ខជាតិឱសថចម្រុះជាច្រើន ដែលដូនតាខ្មែរ ឬប្រជាពលរដ្ឋមានជំនឿយកទៅព្យាបាលរោគផ្សេងៗ រួមនិងដំណាំយកធ្វើជាគ្រឿងទេសដាំស្ល។ ទី២ សួនផ្កាស្មៅ និងផ្កាចម្រុះ ប្រមូលផ្តុំនូវផ្កាចម្រុះតាមរដូវកាល និងផ្កាស្មៅ។ ទី៣ សួនអំបូរត្នោត រួមមាន ដើមប្រង់ ស្លា ល្មើ ដូងប្រេង។ល។ ទី៤ សួនខ្មែរ ប្រមូលផ្តុំរុក្ខជាតិហូបផ្លែច្រើនមុខ ហើយក្នុងនោះក៏មានការរៀបចំជាស្រែខ្នាតតូច និងការរចនាបែបខ្មែរផងដែរ។ និងទី៥ សួនព្រៃឈើ និងសត្វព្រៃអង្គរ ដែលជាផ្នែកមួយធំនៃព្រៃឈើអង្គរ ប្រមូលផ្តុំដោយដើមឈើប្រណិត សត្វព្រៃ និងសត្វចិញ្ចឹមមួយចំនួន ដើម្បីទាក់ទាញទេសចរ។ ក្រៅពីរុក្ខជាតិខាងលើនេះ សួននេះក៏រៀបចំជាកូនភ្នំតូចៗ ទឹកធ្លាក់ ការបាញ់ទឹក និងការរចនាផ្សេងៗ ដើម្បីទាក់ទាញផងដែរ៕

រុស្ស៊ី​៖ ក្រុម​យុទ្ធជន​នៅ​ទីក្រុង Mariupol ជិត ៧០០​នាក់​ទៀត​បាន​ប្រគល់​ខ្លួន ​ខណៈ​ថ្នាក់​ដឹក​នាំ​មួយ​ចំនួន​នៅតែ​បន្ត​ពួន​សំងំ

2022/05/19 10:32:41 am        2016
Facebook Telegram Linkin
​រុស្ស៊ី៖ រុស្ស៊ី​បាន​និយាយ​កាលពី​ថ្ងៃ​ពុធ​ថា ក្រុម​យុទ្ធជន​អ៊ុយ​ក្រែ​ន​ជិត ៧០០​នាក់​ទៀត​បាន​ទម្លាក់​អាវុធ​ចុះ​ប្រគល់​ខ្លួន​នៅ​រោងចក្រ​ផលិត​ដែកថែប​ក្នុង​ទីក្រុង ​Mariupol ក្នុង​រយៈពេល ២៤ម៉ោង​កន្លង​មក ប៉ុន្តែ​មាន​សេចក្ដីរាយការណ៍​ថា ​ ក្រុម​មេដឹកនាំ​នៅតែ​បន្ត​លាក់ខ្លួន​នៅ​ខាងក្នុង​ ជា​ការ​ពន្យារ​ពេល​ចុង​បញ្ចប់​នៃ​ការ​វាយ​ប្រយុទ្ធ​គ្នា​ដ៏​បង្ហូរ​ឈាម​យូរ​បំផុត របស់​អឺរ៉ុប ​រយៈកាល​ជាច្រើន​ទសវត្សរ៍​មកនេះ​។ ​ប្រទេស​ហ្វាំ​ង​ឡង់ និង​ស៊ុយអែត​បាន​ដាក់​ពាក្យ​ជា​ផ្លូវ​ការ​ចូល​ជា​សមាជិក​អង្គការ​ណា​តូ ដែល​នាំមក​នូវ​ការពង្រីក​ឥទ្ធិពល​យោធា​យ៉ាង​ខ្លាំង​ដែល​ប្រធានាធិបតី​រុស្ស៊ី​លោក Vladimir Putin បាន​លើក​ឡើង​ជា​យូរ​មក​ហើយ​ថា ​ជា​ហេតុផល​ចម្បង​មួយ​របស់​លោក​សម្រាប់​ការ​ចាប់ផ្ដើម "​ប្រតិបត្តិការ​សឹក​ពិសេស​" ចូល​អ៊ុយ​ក្រែ​ន​កាលពី​ថ្ងៃ​ទី​២៤​ ខែ​កុម្ភៈ​។​ ក្រសួង​ការពារជាតិ​រុស្ស៊ី​បាន​និយាយ​ថា ការ​ប្រគល់​ខ្លួន​របស់​ក្រុម​អ្នក​ប្រយុទ្ធ​អ៊ុយ​ក្រែ​ន ៦៩៤​នាក់​ទៀត​មាន​ន័យថា មនុស្ស​សរុប​ចំនួន ៩៥៩​នាក់​បាន​ទម្លាក់​អាវុធ​របស់​ពួកគេ​ចុះ​នៅ​រោងចក្រ​ដែកថែប​ដ៏​ធំ Azovstal ជា​មូលដ្ឋាន​រឹងមាំ​ចុងក្រោយ​របស់​ក្រុម​អ្នកការពារ​អ៊ុយ​ក្រែ​ន​នៅ​ក្នុង​ទីក្រុង​នោះ​។​​ប្រសិនបើ​មានការ​បញ្ជាក់ សេចក្តី​ប្រកាស​របស់​រុស្ស៊ី​នឹង​ដោះស្រាយ​អាថ៌កំបាំង​ជាច្រើន ​ជុំវិញ​ជោគ​វាសនា​របស់​យុទ្ធជន​រាប់​រយ​នាក់​នៅ​ក្នុង​រោងចក្រ​នេះ ចាប់​តាំង​ពី​អ៊ុយ​ក្រែ​ន​បាន​ប្រកាស​កាលពី​ថ្ងៃ​អង្គា​រថា ខ្លួន​បាន​បញ្ជា​ឲ្យ​កងកម្លាំង​ស្នេហា​ជាតិ​ទាំងអស់​ឈប់​ប្រយុទ្ធ​តទៅទៀត​៕ អត្ថបទ៖ សុខមាន

រុស្ស៊ី​បណ្ដេញ​ក្រុម​អ្នកការទូត​រាប់​សិប​នាក់​របស់​ប្រទេស​បារាំង អ៊ីតាលី និង​អេ​ស្ប៉ា​ញ​

2022/05/19 10:04:53 am        984
Facebook Telegram Linkin
​រុស្ស៊ី៖ ក្រុង Moscow បាន​បណ្ដេញ​ក្រុម​អ្នកការទូត​ជាច្រើន​នាក់​របស់​ប្រទេស​បារាំង អ៊ីតាលី និង​អេ​ស្ប៉ា​ញ ជា​ការ​សងសឹក​ចំពោះ​ការ​បណ្ដេញ​ក្រុម​អ្នកការទូត​រុស្ស៊ី​ពី​បណ្ដា​ប្រទេស​សហភាព​អឺរ៉ុប ជា​ផ្នែក​មួយ​នៃ​ចំណាត់​ការ​រួមគ្នា​ប្រឆាំង​យុទ្ធនាការ​របស់​រុស្ស៊ី​នៅ​អ៊ុយ​ក្រែ​ន​។ ​ក្រសួង​ការបរទេស​រុស្ស៊ី​បាន​និយាយ​ក្នុង​សេចក្ដីថ្លែងការណ៍​មួយ​កាលពី​ថ្ងៃ​ពុធ​ថា ខ្លួន​បាន​បណ្ដេញ​បុគ្គលិក​បេសក​កម្ម​ការទូត​បារាំង​ចំនួន ៣៤​នាក់​នៅ​ក្នុង​ប្រទេស​រុស្ស៊ី និង​បាន​ទុក​រយៈពេល​ ២សប្ដាហ៍​ឲ្យ​ពួកគេ​ចាក​ចេញពី​ប្រទេស​រុស្ស៊ី​។ ​សេចក្ដីថ្លែងការណ៍​ខាងលើនេះ​និយាយថា ក្រុង Moscow បាន​ចេញ​សេចក្ដីប្រកាស​នេះ បន្ទាប់ពី​ការ​កោះ​អញ្ជើញ​ឯកអគ្គរដ្ឋទូត​បារាំង​ប្រចាំ​ប្រទេស​រុស្ស៊ីលោក Pierre Levy និង​បាន​ប្រាប់​លោក​ថា ការ​បណ្ដេញ​បុគ្គលិក​បេសកកម្ម​ការទូត​រុស្ស៊ី​ចំនួន ៤១នាក់​នា​ពេល​កន្លងមក​គឺជា​សកម្មភាព​បង្ករឿង និង​ជា​ការ​សម្រេចចិត្ត​ខ្វះ​ការពិចារណា​។​​ក្រោយមក​ក្រសួង​ដដែល​របស់​រុស្ស៊ី​បាន​និយាយ​ថា បុគ្គលិក​ស្ថានទូត​ចំនួន ២៧​នាក់​របស់​អេ​ស្ប៉ា​ញប្រចាំ​នៅ​ទីក្រុង Moscow និង​អគ្គ​កុងស៊ុល​អេ​ស្ប៉ា​ញ​ប្រចាំ​ក្នុង​ទីក្រុង Saint Petersburg ត្រូវ​បាន​ប្រកាស​ឈប់​ស្វាគមន៍​ទៀតហើយ និង​ទុក​ពេល​ឲ្យ ៧​ថ្ងៃ​ក្នុង​ការ​ចាកចេញ​ពី​ប្រទេស​រុស្ស៊ី​។ ​ខណៈ​ពុំ​មាន​ការចេញ​សេចក្ដីថ្លែងការណ៍​ផ្លូវការ អ្នកនាំពាក្យ​ក្រសួងការបរទេស​រុស្ស៊ី​លោកស្រី Maria Zakharova បាន​បញ្ជាក់​ទៅកាន់​ទីភ្នាក់ងារសារព័ត៌មាន​ផ្សេងៗ​របស់​រុស្ស៊ី​ថា អ្នកការទូត​អ៊ីតាលី​ចំនួន ២៤​នាក់​ក៏​ត្រូវ​បាន​បណ្ដេញចេញ​ពី​ប្រទេស​រុស្ស៊ី​ដូចគ្នា​ដែរ៕អត្ថបទ៖ សុខមាន

បណ្ដាញសង្គម

ព័ត៌មានថ្មីៗ

អ៊ីរ៉ង់ថាខ្លួននឹងមិនជួបបេសកជនអាមេរិកទេ ដែលធ្វើឲ្យប៉ះពាល់ដល់ការរំពឹងទុកសម្រាប់កិច្ចព្រមព្រៀងសន្តិភាព
07/01/2026 08:07 AM
Facebook Telegram Linkin
អ៊ីរ៉ង់បញ្ជាក់​ថា នឹងធ្វើកិច្ចចរចាជាមួយកាតា ជុំវិញ​ទ្រព្យសម្បត្តិដែលត្រូវបានបង្កក
06/30/2026 08:06 PM
Facebook Telegram Linkin
អគារផ្ទះល្វែងមួយ ​ដួលរលំ នៅទីក្រុងអាតែន​របស់​ក្រិក​ ខណៈ​ក្រុមអ្នកជួយសង្គ្រោះស្វែងរកអ្នកជាប់ក្នុង​នោះ​
06/30/2026 08:06 PM
Facebook Telegram Linkin
កូរ៉េខាងត្បូង និងអ៊ុយក្រែន ធ្វើកិច្ចពិភាក្សា «ប្រកប​ដោយ​ការ​ស្ថាបនា» អំពីទាហាន​កូរ៉េខាងជើង
06/30/2026 08:06 PM
Facebook Telegram Linkin
នាយករដ្ឋមន្ត្រី​ជប៉ុន ស្វែងរកទំនាក់​ទំនង​កាន់តែស៊ីជម្រៅជាមួយ​ឥណ្ឌា លើផ្នែក​​ពាណិជ្ជកម្ម និងសន្តិសុខ
06/30/2026 07:06 PM
Facebook Telegram Linkin
មន្ត្រី៖ បេសកជនអាមេរិក លោក Witkoff និងលោក Kushner នឹងស្ថិត​​នៅ​កាតា តែ​គ្មាន​ជំនួប​ជាមួយអ៊ីរ៉ង់ទេ
06/30/2026 07:06 PM
Facebook Telegram Linkin
ទីភ្នាក់ងារពាណិជ្ជកម្ម UN៖ វិបត្តិ​​ច្រកសមុទ្រ Hormuz អាចប៉ះពាល់សេដ្ឋកិច្ចងាយរងគ្រោះ រយៈពេល​យូរ
06/30/2026 07:06 PM
Facebook Telegram Linkin
លោក Zelenskyy៖ អ៊ុយក្រែនវាយប្រហារជាលើកទី ២ លើ​ទីតាំងផ្កាយរណប Dubna របស់រុស្ស៊ី
06/30/2026 07:06 PM
Facebook Telegram Linkin
ទិន្នន័យផ្កាយរណប៖ អគារជាង ៥៨.០០០ខ្នង ទំនងរងការខូចខាត ឬ​បំផ្លាញ នៅវ៉េណេស៊ុយអេឡា
06/30/2026 07:06 PM
Facebook Telegram Linkin
កម្ពុជា-ចិនពិនិត្យវឌ្ឍនភាព និងជំរុញអនុវត្តគម្រោងសំខាន់ៗ ដែលបានចុះ MoU កន្លងមក
06/30/2026 06:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.