BTV NEWS

ព្រះមហាក្សត្រ ប្រោសព្រះរាជទាន ព្រះរាជដំណាក់ចំនួន២ ធ្វើជាសារមន្ទីរជាតិ និងទុកជាសម្បត្តិបេតិកភណ្ឌជាតិ

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្រេចផ្តល់អំណោយមនុស្សធម៌ជូនប្រជាជនងាយរងគ្រោះបំផុតចំនួន ១.៧៨៣គ្រួសារ រស់នៅខេត្តរតនគិរី និងខេត្តមណ្ឌលគិរី ...!!

កម្ពុជា-សហរដ្ឋអាមេរិក បន្តពង្រឹង និងពង្រីកកិច្ចសហប្រតិបត្តិការទ្វេភាគី ឱ្យកាន់តែស៊ីជម្រៅ

សម្ដេចធិបតី ទូរសព្ទជាមួយ នាយក FBI របស់អាមេរិកដោយបានឯកភាពគ្នាបន្តពង្រឹងកិច្ចសហប្រតិបត្តិការរវាងស្ថាប័នសន្តិសុខប្រទេសទាំងពីរ

ព័ត៌មានសំខាន់ៗ

ព្រះករុណា ព្រះមហាក្សត្រ និងសម្តេចព្រះមហាក្សត្រី ស្ដេចយាងទៅទីក្រុងប៉េកាំង ប្រទេសចិន ដើម្បីពិនិត្យព្រះរាជសុខភាព

នៅព្រឹកថ្ងៃទី៣ ខែមីនា ឆ្នាំ២០២៥ នេះ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា, និងសម្តេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ស្តេចយាងទៅទីក្រុងប៉េកាំង សាធារណរដ្ឋប្រជាមានិតចិន ដើម្បីពិនិត្យព្រះរាជសុខភាព។ វត្តមានអញ្ជើញយាងដំណើរព្រះករុណាព្រះមហាក្សត្រនៅព្រឹកនេះ រួមមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ភរិយាដ៏ឧត្តុង្គឧត្តមរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា, សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រួមនឹងវត្តមានសម្ដេច ឯកឧត្តម លោកជំទាវតំណាងក្រសួង ស្ថាប័ននានាជាច្រើនរូបទៀត។ យោងតាមព្រះរាជសាររបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានបញ្ជាក់ថា ព្រះករុណា ព្រះមាហាក្សត្រ ព្រះអង្គនឹងអវត្តមានពីមាតុប្រទេស ចាប់ពី ថ្ងៃទី៣ ខែមីនា ឆ្នាំ២០២៥តទៅ ធ្វើដំណើរទៅទីក្រុងប៉េកាំង នៃសាធារណរដ្ឋប្រជាមានិតចិន ដើម្បីពិនិត្យព្រះរាជសុខភាព។នៅក្នុងឱកាសអវត្តមានរបស់ ព្រះករុណា ព្រះមហាក្សត្រនាពេលនេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នឹងទទួលជួយក្នុងព្រះបរមនាម ព្រះករុណាព្រះមាក្សត្រ ជាប្រមុខរដ្ឋស្តីទី នៃព្រះរាជាណាចក្រកម្ពុជា៕

សម្ដេចតេជោ៖ កម្ពុជាចូលរួមសាទរចំពោះជោគជ័យ នៃការបង្រ្កាបបទល្មើសឆបោកអនឡាញរបស់ថៃ ខណៈរឿងនេះគឺនៅបន្តទៀតទាមទារកិច្ចសហការអន្តររដ្ឋាភិបាលទើបអាចធ្វើទៅមានប្រសិទ្ធភាព

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណចក្រកម្ពុជា នៅយប់ថ្ងៃទី១ ខែមីនា ឆ្នាំ២០២៥នេះ បានបង្ហោះសារតាមបណ្ដាញសង្គមហ្វេសប៊ុក ចូលរួមសាទរចំពោះជោគជ័យនៃការបង្រ្កាបបទល្មើសឆបោកតាមអនឡាញរបស់ប្រទេសថៃ ខណៈរឿងនេះសម្ដេចតេជោ បញ្ជាក់ថា គឺនៅបន្តទៅទៀតដែលទាមទារកិច្ចសហការអន្តររដ្ឋាភិបាលទើបអាចធ្វើទៅមានប្រសិទ្ធភាព។សម្ដេចតេជោបានសរសេរថា មួយរយៈចុងក្រោយនេះ ព្រះរាជាណាចក្រថៃ បានខិតខំយ៉ាងខ្លាំងក្នុងការបង្រ្កាបបទល្មើសឆបោក ដែលកម្ពុជាក៏សូមចូលអបអរសាទរជាមួយជោគជ័យទាំងនេះ។ សម្ដេចតេជោបានថ្លែងថា ជាមួយជោគជ័យរបស់ប្រទេសថៃ ប្រទេសជាប់ព្រំដែនថៃ រាប់ទាំងកម្ពុជាផង ក៏បានប្រឹងប្រែងបង្រ្កាបដូចគ្នាដែរ។ ជាមួយគ្នានេះ សម្ដេចតេជោ ហ៊ុន សែន បានសម្ដែងការសោកស្តាយចំពោះសារព័ត៌មានមួយនិងអ្នកនយោបាយខ្លះចាត់ទុកថា ជោគជ័យរបស់ប្រទេសថៃ ជាបរាជ័យនៃប្រទេសជិតខាងរាប់ទាំងកម្ពុជាផងដែរទៅវិញ។ សម្ដេចតេជោបានបញ្ជាក់ថា៖«រឿងបទល្មើសមិនទាន់ចប់ទេនៅបន្តបង្រ្កាបតទៅទៀត ដែលទាមទារនូវកិច្ចសហការអន្តររដ្ឋាភិបាល ទើបអាចធ្វើទៅមានប្រសិទ្ធភាព»៕

ប្រមាណ ៥ ថ្ងៃទៀតសម្ដេចតេជោនឹងជាពីកូវីដ-១៩ ខណៈឆ្លងកាត់ការរង់ចាំ៣ថ្ងៃពេលនេះបានដឹងកូវីដ-១៩ ដែលសម្ដេចឆ្លង គឺប្រភេទ អូមីក្រុង

ភ្នំពេញ៖ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា នៅយប់ថ្ងៃទី២៨ ខែកុម្ភៈនេះ បានមានប្រសាសន៍បញ្ជាក់តាមបណ្ដាញសង្គមឲ្យដឹងថា តាមការធ្វើតេស្ត នៅសល់ប្រមាណ ៥ ថ្ងៃទៀត សម្ដេចតេជោនឹងជាពីកូវីដ-១៩ ខណៈឆ្លងកាត់ការរង់ចាំ៣ថ្ងៃពេលនេះបានដឹងកូវីដ-១៩ ដែលសម្ដេចឆ្លង គឺប្រភេទ អូមីក្រុង។សម្ដេចតេជោមានប្រសាសន៍ថា បើទោះជាជម្ងឺកូវីដ-១៩ ដែលឆ្លងមកខ្ញុំបានធូរស្រាលក៏ដោយតែខ្ញុំនៅតែចង់ដឹងថាតើកូវីដនេះវាជាប្រភេទពូជអ្វី?។សម្ដេចតេជោ ថ្លែងថា ឆ្លងកាត់ការរង់ចាំ៣ថ្ងៃពេលនេះ បានដឹងថាពូជរបស់វាហើយគឺ អូមីក្រុង(Omicron)ជាប្រភេទដែលខ្ញុំធ្លាប់កើតកាលពីឆ្នាំ២០២២ដែលត្រូវបានរកឃើញពេលខ្ញុំទៅចូលរួមប្រជុំ G20 នៅឥណ្ឌូនេសុីក្នុងនាមប្រធានអាស៊ាន។សម្ដេចតេជោ បានបញ្ជាក់ថា ព្រឹកមុិញបានធ្វើតេស្តឃើញនៅវិជ្ជមានច្រើនតែតិចជាងមុននិងប៉ាន់ស្មានថាអាច៥ថ្ងៃទៀតទើបអស់៕

ក្រុមហ៊ុនសាជីវកម្មធនធានទឹកកូរ៉េ (K-water) ស្វែងរកឱកាសវិនិយោគក្នុងវិស័យគ្រប់គ្រងធនធានទឹក នៅកម្ពុជា

នាព្រឹកថ្ងៃទី២៨ ខែកុម្ភៈ ឆ្នាំ២០២៥, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តមបណ្ឌិត Yun Seogdae នាយកប្រតិបត្តិសាជីវកម្មធនធានទឹកកូរ៉េ (K-water) នៃក្រសួងបរិស្ថានរបស់សាធារណរដ្ឋកូរ៉េ និងជាប្រធានក្រុមប្រឹក្សាទឹកអាស៊ី (AWC) និងគណៈប្រតិភូ ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព។ឯកឧត្តមបណ្ឌិត Yun Seogdae បានថ្លែងអំណរគុណ និងសម្ដែងនូវសេចក្ដីសោមនស្សរីករាយ ដែលបានចូលជួបសម្ដែងការគួរសម និងពិភាក្សាការងារ ជាមួយសម្ដេចបវរធិបតីជាថ្មីម្ដងទៀត បន្ទាប់ពីជំនួបលើកទី១ ក្នុងឱកាសដែលសម្ដេចបវរធិបតីអញ្ជើញបំពេញទស្សនកិច្ចផ្លូវការនៅសាធារណរដ្ឋកូរ៉េ កាលពីខែឧសភា ឆ្នាំ២០២៤។ ឯកឧត្តមបណ្ឌិត បានគោរពជម្រាបជូនសម្ដេចបវរធិបតី អំពីកិច្ចសហប្រតិបត្តិការប្រកបដោយផ្លែផ្កាកន្លងមក រវាងក្រុមហ៊ុន និងក្រសួង-ស្ថាប័នពាក់ព័ន្ធនៃរាជរដ្ឋាភិបាលកម្ពុជា ក៏ដូចជាគោលបំណងរបស់ក្រុមហ៊ុននៅក្នុងការស្វែងរកឱកាសវិនិយោគ ក្នុងវិស័យគ្រប់គ្រងធនធានទឹក នៅកម្ពុជា។ សម្ដេចបវរធិបតីបានវាយតម្លៃខ្ពស់ចំពោះកិច្ចសហប្រតិបត្តិការនាពេលកន្លងមករវាងក្រុមហ៊ុន និងក្រសួង-ស្ថាប័នពាក់ព័ន្ធរបស់រាជរដ្ឋាភិបាល ជាពិសេសចំពោះកិច្ចសហប្រតិបត្តិការលើវិស័យគ្រប់គ្រងធនធានទឹក នៅកម្ពុជា។ សម្ដេចបវរធិបតី ក៏បានលើកទឹកចិត្តឱ្យក្រុមហ៊ុនធ្វើការជាមួយក្រសួង-ស្ថាប័នពាក់ព័ន្ធ ដើម្បីសិក្សាលើការគ្រប់គ្រងធនធានទឹកនៅកម្ពុជា ស្របតាមគោលនយោបាយរបស់រាជរដ្ឋាភិបាល ដោយផ្ដោតទៅលើការវាយតម្លៃឱ្យបានគ្រប់ជ្រុងជ្រោយអំពីភាពខ្លាំង ក៏ដូចជាផលប៉ះពាល់នៃគម្រោងនេះលើសង្គម-សេដ្ឋកិច្ច និងបរិស្ថាន។ សម្ដេចបវរធិបតីបានគូសបញ្ជាក់អំពីគោលបំណងរបស់រាជរដ្ឋាភិបាលក្នុងការធានាឱ្យមានប្រព័ន្ធគ្រប់គ្រងធនធានទឹកប្រកបដោយប្រសិទ្ធភាពខ្ពស់ ធ្វើយ៉ាងណាឱ្យមានធនធានទឹកគ្រប់គ្រាន់ ទាំងនៅរដូវវស្សា និងនៅរដូវប្រាំង សម្រាប់ជាប្រយោជន៍ដល់ប្រជាពលរដ្ឋ, ក៏ដូចជាការរៀបចំចេញជាប្រព័ន្ធអេកូឡូស៊ីបម្រើដល់វិស័យកសិកម្ម និងកសិ-ឧស្សាហកម្ម និងគ្រប់គ្រងហានិភ័យនៃគ្រោះទឹកជំនន់ក្នុងរដូវវស្សា និងគ្រោះរាំងស្ងួត នៅរដូវប្រាំង។ មុននឹងបញ្ចប់, សម្ដេចបវរធិបតីក៏បានលើកទឹកចិត្តឱ្យក្រុមហ៊ុនសាជីវកម្ម បន្តធ្វើការ និងភ្ជាប់ទំនាក់ទំនងឱ្យកាន់តែជិតស្និទ្ធបន្ថែមទៀត ជាមួយក្រសួង-ស្ថាប័នពាក់ព័ន្ធរបស់រាជរដ្ឋាភិបាលកម្ពុជា៕

សម្តេចធិបតី ហ៊ុន ម៉ាណែត អញ្ជើញដឹកនាំកិច្ចប្រជុំត្រួតពិនិត្យ ការរៀបចំពង្រឹងវិទ្យាស្ថានជាតិស្ថិតិចំណុះក្រសួងផែនការ

នៅព្រឹកថ្ងៃសុក្រ ទី២៨ ខែកុម្ភៈ ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញដឹកនាំកិច្ចប្រជុំត្រួតពិនិត្យការរៀបចំពង្រឹងវិទ្យាស្ថានជាតិស្ថិតិចំណុះក្រសួងផែនការ ដើម្បីឱ្យក្លាយជាស្ថាប័នមួយកាន់តែមានសមត្ថភាពទទួលខុសត្រូវលើការងារស្ថិតិរបស់រាជរដ្ឋាភិបាល។វិទ្យាស្ថានជាតិស្ថិតិ ជាគ្រឹះស្ថានសាធារណៈរដ្ឋបាលថ្នាក់ជាតិ ត្រូវបានសម្តេចមហាបវរធិបតី ហ៊ុន ម៉ាណែត សម្រេចបង្កើតកាលពីថ្ងៃទី១៣ ខែមករា ឆ្នាំ២០២៥។ វិទ្យាស្ថាននេះសរសេរជាអក្សរកាត់ «វ.ជ.ស» ស្ថិតនៅក្រោមអាណាព្យាបាលបច្ចេកទេស គឺក្រសួងផែនការ និងស្ថិតនៅក្រោមអាណាព្យាបាលហិរញ្ញវត្ថុ គឺក្រសួងសេដ្ឋកិច្ច និងហិរញ្ញវត្ថុ។វិទ្យាស្ថានជាតិស្ថិតិ ត្រូវដឹកនាំដោយក្រុមប្រឹក្សាភិបាលមួយ ដែលជាអង្គការដឹកនាំខ្ពស់បំផុត និងមានបេសកកម្មតម្រង់ទិសការអនុវត្ត និងត្រួតពិនិត្យសកម្មភាពការងារ។ក្រុមប្រឹក្សាភិបាលនៃវិទ្យាស្ថានជាតិស្ថិតិ មានសមាជិកក្រុមប្រឹក្សាភិបាលចំនួន ១១ រូប ដែលមានតំណាងក្រសួងផែនការ ជាប្រធាន និងមានសមាជិកជាតំណាងមកពីក្រសួងសេដ្ឋកិច្ច និងហិរញ្ញវត្ថុ, ទីស្តីការគណៈរដ្ឋមន្ត្រី សមាជិក, ក្រសួងមុខងារសាធារណៈ, ក្រសួងមហាផ្ទៃ, ក្រសួងកសិកម្ម រុក្ខាប្រមាញ់ និងនេសាទ, ក្រសួងទេសចរណ៍, ធនាគារជាតិនៃកម្ពុជា, គណៈកម្មាធិការសេដ្ឋកិច្ច និងធុរកិច្ចឌីជីថល, នាយកវិទ្យាស្ថានជាតិស្ថិតិ ហើយបុគ្គលិកវិទ្យាស្ថានជាតិស្ថិតិ ជាសមាជិកដោយស្វ័យប្រវត្តិ។វិទ្យាស្ថានជាតិស្ថិតិ មានភារកិច្ច៖ - រៀបចំគោលនយោបាយអភិវឌ្ឍន៍ប្រព័ន្ធស្ថិតិផ្លូវការ ក្នុងការបង្កើតប្រព័ន្ធស្ថិតិជាតិ ដែលរួមបញ្ចូលមួយ ដែលគ្របដណ្តប់ស្ថិតិផ្លូវការដែលបានចាត់ទាំងអស់ និងអង្គភាពស្ថិតិក្នុងក្រសួង ស្ថាប័។ រៀបចំផែនការយុទ្ធសាស្ត្រជាតិសម្រាប់អភិវឌ្ឍន៍ស្ថិតិ។ រៀបចំធ្វើជំរឿនប្រជាជន ជំរឿនសេដ្ឋកិច្ច និងជំរឿនកសិកម្ម។ ប្រមូល កែច្នៃ ចងក្រង វិភាគ បោះពុម្ព និងផ្សព្វផ្សាយទិន្នន័យស្ថិតិគ្រឹះ និងស្ថិតិផ្លូវការ តាមរយៈការធ្វើជំរឿន ការធ្វើអង្កេត ការសិក្សាស្រាវជ្រាវនានា និងការប្រើប្រាស់ប្រភពទិន្នន័យរដ្ឋបាល ព្រមទាំងទិន្នន័យប្រភពផ្សេងៗទៀត ក្នុងគោលបំណង ដើម្បីប្រើប្រាស់ជាធាតុចូលក្នុងការរៀបចំគោលនយោបាយ ការធ្វើផែនការអភិវឌ្ឍន៍ និងការស្រាវជ្រាវក្នុងក្របខ័ណ្ឌជាតិ និងអន្តរជាតិ។ - ប្រមូល កែច្នៃ ចងក្រង វិភាគ និងផ្សព្វផ្សាយទិន្នន័យស្ថិតិម៉ាក្រូសេដ្ឋកិច្ច តាមរយៈការប្រើប្រាស់ ទិន្នន័យដែលផ្តល់ឱ្យដោយអង្គភាពស្ថិតិផ្លូវការដែលបានចាត់តាំង នៅតាមក្រសួង ស្ថាប័ន ពាក់ព័ន្ធ និងរដ្ឋបាលថ្នាក់ក្រោមជាតិ។ ចងក្រងស្ថិតិគណនេយ្យជាតិនិងស្ថិតិថ្លៃ ក៏ដូចជាសូចនាករសេដ្ឋកិច្ច សង្គមកិច្ច បរិស្ថាន ប្រជាសាស្ត្រ ព្រមទាំងសន្ទស្សន៍និងសូចនាករស្ថិតិផ្សេងៗទៀត- ស្រាវជ្រាវ សម្របសម្រួល ចងក្រងវិធីសាស្ត្រ បង្កើតនិងអភិវឌ្ឍន៍ម៉ូដែល និងបច្ចេកទេសស្ថិតិនានា ដើម្បីបង្កើនគុណភាពស្ថិតិផ្លូវការ តាមបទដ្ឋានជាតិ និងអន្តរជាតិ។ រៀបចំផែនការយុទ្ធសាស្ត្រថវិកា និងធនធានមនុស្សសម្រាប់វិទ្យាស្ថានជាតិស្ថិតិ ដើម្បីដឹកនាំ ការធ្វើជំរឿន និង អង្កេតផលិត និងផ្សព្វផ្សាយស្ថិតិផ្លូវការ។ សម្របសម្រួលប្រតិបត្តិការរបស់អង្គភាពស្ថិតិដែលបានចាត់តាំងក្នុងការប្រមូល វិភាគ បោះពុម្ព ផ្សព្វផ្សាយ ស្ថិតិផ្លូវការ និងព័ត៌មានដែលទាក់ទងនឹងការងារស្ថិតិ។ រៀបចំចំណាត់ថ្នាក់ បទដ្ឋានស្ថិតិសម្រាប់ការអនុវត្តឯកភាពគ្នារបស់អង្គភាពស្ថិតិដែលបានចាត់តាំង កែច្នៃ ចងក្រង។ អភិវឌ្ឍកម្មវិធីនិងបច្ចេកវិទ្យានៅក្នុងសកម្មភាពស្ថិតិដោយផ្អែកលើការប្រើប្រាស់បច្ចេកវិទ្យា ទូរគមនាគមន៍និងព័ត៌មានវិទ្យា និងបច្ចេកវិទ្យាឌីជីថលសម្រាប់ការផលិតទិន្នន័យ ការផ្ទេរនិង បញ្ចូលទិន្នន័យ ព្រមទាំង ការផ្សព្វផ្សាយទិន្នន័យស្ថិតិ និងសូចនាករអភិវឌ្ឍន៍។ ធ្វើកិច្ចសហប្រតិបត្តិការស្ថិតិជាមួយការិយាល័យស្ថិតិជាតិនៃបណ្តាប្រទេស អង្គការអន្តរជាតិ និងវិស័យឯកជននានា ទៅតាមបទប្បញ្ញត្តិច្បាប់ជាធរមាន។ ផ្ដល់ការណែនាំ និងជួយគាំទ្រដល់អង្គភាពស្ថិតិដែលបានចាត់តាំងទាក់ទងនឹងស្ថិតិផ្លូវការ ដើម្បីលើកកម្ពស់ធានាការប្រតិបត្តិបទដ្ឋានស្ថិតិ ក្នុងការអនុវត្តគោលនយោបាយស្ថិតិ និងអភិវឌ្ឍន៍ប្រព័ន្ធស្ថិតិជាតិ។ សម្របសម្រួលក្នុងសកម្មភាពនៃដំណើរការអភិវឌ្ឍធនធានមនុស្សក្នុងវិស័យស្ថិតិ ដោយរួមទាំងការផ្តល់ប្រឹក្សា និងជំនួយបច្ចេកទេសដល់ក្រសួង ស្ថាប័ន ទាំងថ្នាក់ជាតិ ទាំងថ្នាក់ក្រោមជាតិ វិស័យឯកជន និងអង្គការក្រៅរដ្ឋាភិបាល។-ប្រើប្រាស់ប្រភពទិន្នន័យធំ និងវិទ្យាសាស្ត្រទិន្នន័យ សម្រាប់ស្ថិតិផ្លូវការ ដោយរួមទាំងការ ផ្សព្វផ្សាយទិន្នន័យស្ថិតិផ្លូវការ តាមរយៈមធ្យោបាយឌីជីថល។ សហការផលិតស្ថិតិយេនឌ័រ និងចូលរួមការបញ្ជ្រាបស្ថិតិយេនឌ័រនៅថ្នាក់ជាតិ និងថ្នាក់ក្រោមជាតិ ប្រមូលផ្ដុំទិន្នន័យស្ថិតិផ្អែកតាមបទដ្ឋានស្តង់ដាជាតិ និងអន្តរជាតិសម្រាប់ផលិតសូចនាករ គោលដៅអភិវឌ្ឍន៍ប្រកបដោយចីរភាពកម្ពុជា (CSDGs)។ រៀបចំ និងចងក្រងចំណាត់ថ្នាក់ និងបទដ្ឋានផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ចូលរួមផ្តល់ទិន្នន័យ និងវិភាគស៊ីជម្រៅអំពីភាពក្រីក្រនៅកម្ពុជា។ រៀបចំជាអត្ថបទវិភាគ និងស្រាវជ្រាវលើប្រធានបទសំខាន់ៗពាក់ព័ន្ធនឹងសង្គម សេដ្ឋកិច្ច បរិស្ថាន បច្ចេកវិទ្យា ពាណិជ្ជកម្ម ដោយប្រើប្រាស់ទិន្នន័យស្ថិតិគ្រឹះ និងទិន្នន័យរដ្ឋបាល ដើម្បីជាមូលដ្ឋាន សម្រាប់ក្រសួង ស្ថាប័នរៀបចំគោលនយោបាយ និងយុទ្ធសាស្ត។ រៀបចំ និងអនុវត្តន៍យន្តការតាមដានត្រួតពិនិត្យ និងវាយតម្លៃលើការអនុវត្តគោលនយោបាយស្ថិតិ ផ្លូវការដើម្បីការអភិវឌ្ឍប្រព័ន្ធស្ថិតិជាតិ។ រៀបចំផែនការសកម្មភាព និងផែនការថវិកាប្រចាំឆ្នាំ ៣ឆ្នាំ និង ៥ឆ្នាំរបស់វិទ្យាស្ថាន ជាតិស្ថិតិ។ បំពេញភារកិច្ចផ្សេងៗទៀតតាមការប្រគល់ជូនរបស់រដ្ឋមន្ត្រីក្រសួងផែនការ៕

សម្តេចធិបតី៖ ភូមិមួយផលិតផលមួយបានជួយបង្កើនប្រាក់ចំណូលដល់ពលរដ្ឋ និងបានជួយកាត់បន្ថយចំណាកស្រុក

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាបានថ្លែងថា ភូមិមួយផលិតផលមួយបានចូលរួមចំណែកយ៉ាងសកម្មក្នុងការជួយបង្កើនប្រាក់ចំណូលដល់ពលរដ្ឋ កាត់បន្ថយចំណាកស្រុក និងពង្រឹងភាពជាម្ចាស់នៃសហគមន៍ ហើយសម្តេចក៏អំពាវនាវដល់ភាគីពាក់ព័ន្ធទាំងអស់បន្តជួយលើកកម្ពស់ផលិតផលខ្មែរឲ្យបានខ្លាំងក្លាបន្ថែមទៀត ដើម្បីមានប្រៀបឈ្នះក្នុងការប្រកួតប្រជែងជាមួយផលិតផលបរទេស។តាមរយៈសារលិខិតគាំទ្រការអនុវត្តយុទ្ធសាស្រ្តជាតិ ស្តីពីការជំរុញចលនាភូមិមួយផលិតផលមួយ ៥ឆ្នាំលើកទី២(២០២៤-២០២៨) នាថ្ងៃទី២៨ ខែកុម្ភៈ ឆ្នាំ២០២៥នេះ សម្តេចធិបតី ហ៊ុន ម៉ាណែត បាន ថ្លែងថា តាមរយៈការដាក់ចេញនូវគោលនយោបាយជាតិ ស្តីពីការជំរុញចលនាភូមិមួយផលិតផលមួយ (២០១៦-២០២៦) និងផែនការយុទ្ធសាស្រ្តជាតិជំរុញចលនាភូមិមួយផលិតផលមួយ៥ឆ្នាំលើកទី១ (២០១៩-២០២៣) នាពេលកន្លងមកបានឃើញអំពីតួនាទីដ៏មានសារៈសំខាន់នៃចលនាភូមិមួយផលិត ផលមួយ«ដែលបានរួមចំណែកយ៉ាងសកម្មក្នុងការជួយបង្កើនប្រាក់ចំណូល តាមរយៈការធ្វើឲ្យសកម្មភាព សេដ្ឋកិច្ចតាមជនបទមានភាពរស់រវើក ការកាត់បន្ថយភាពក្រីក្រ ការកាត់បន្ថយចំណាក់ស្រុក និងការ ពង្រឹងភាពជាម្ចាស់ការនៃសហគមន៍ជាដើម»។តាមរយៈសារលិខិតខាងលើនេះដែរសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងទៀតថា ដំណើរឆ្ពោះទៅកាន់ ការសម្រេចបាននូវចក្ខុវិស័យកម្ពុជា ឆ្នាំ២០៥០ចលនាភូមិមួយផលិតផលមួយ ត្រូវតែដើរតួនាទីឲ្យកាន់តែ សកម្មបន្ថែមទៀត តាមរយៈការគៀរគរប្រជាជនឲ្យខិតខំផលិត កែច្នៃប្រើប្រាស់ឲ្យអស់លទ្ធភាព និងប្រកបដោយនិរន្តរភាពនូ វធនធានសក្តានុពលទាំងឡាយរបស់មូលដ្ឋាន ដើម្បីបង្កើតឡើងនូវផលិតផលសម្បូរបែប និងមានប្រៀបឈ្នះក្នុងការប្រកួតប្រជែងជាមួយផលិតផលបរទេស។ដើម្បីសម្រេចបាននូវសូចនាករទាំងឡាយដែលបានដាក់ចេញក្នុងក្របខ័ណ្ឌ ផែនការយុទ្ធសាស្រ្ត នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអំពាវនាវដល់បណ្តាក្រសួង ស្ថាប័នជាសមា ជិកគណៈកម្មាធិការជាតិជំរុញចលនាភូមិមួយផលិតផលមួយទាំងអស់ទាញយកសកម្មភាពគន្លឹះពាក់ព័ន្ធ នឹងការទទួលខុសត្រូវរបស់ខ្លួន កសាងលម្អិត និងបញ្ជ្រាបចូលក្នុងផែនការយុទ្ធសាស្រ្តរបស់ក្រសួង ស្ថាប័ន ខ្លួន ឲ្យមានប្រសិទ្ធភាពខ្ពស់ និងស្របទៅតាមស្មារតីគណនេយ្យភាពសមិទ្ធកម្ម។ ទន្ទឹមនឹងនេះដែរ សម្តេច ធិបតី ក៏សូមឲ្យមានការចូលរួមគាំទ្រពីបណ្តាដៃគូអភិវឌ្ឍ សង្គមស៊ីវិល វិស័យឯកជន គ្រឹះស្ថានបណ្តុះ បណ្តាល ស្ថាប័នមីក្រូហិរញ្ញវត្ថុ កសិករ សេវាករ ផលិតករគ្រប់ប្រភេទ និងជាពិសេសបងប្អូនប្រជាពលរដ្ឋ ខ្មែរគ្រប់ស្រទាប់វណ្ណៈរួមគ្នាជំរុញ និងលើកកម្ពស់ផលិផលខ្មែរ ផលិតផលភូមិមួយ ផលិតផលភូមិមួយ ផលិតផលមួយ ឲ្យកាន់តែមានភាពខ្លាំងក្លាបន្ថែមទៀតផងដែរ៕ អត្ថបទ៖ បាន ចក់

សម្ដេចធិបតីមិនបានប្រកាសឱ្យបញ្ឈប់សាលាជំនាន់ថ្មីទេ គឺបញ្ឈប់តែមជ្ឈមណ្ឌលសិក្សាទំនើបប៉ុណ្ណោះ

ភ្នំពេញ ៖ ក្នុងឱកាសពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅ ការងារឆ្នាំ២០២៥ របស់ក្រសួងទេសចរណ៍ ថ្ងៃទី២៧ ខែកុម្ភៈ ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជាបានបញ្ជាក់ឡើងវិញថា សម្ដេចមិនបានប្រកាសឱ្យបញ្ឈប់សាលាជំនាន់ថ្មីទេ គឺបញ្ឈប់តែមជ្ឈមណ្ឌលសិក្សាទំនើបមួយប៉ុណ្ណោះ។ សម្ដេចបានមានប្រសាសន៍ថា សាលាជំនាន់ថ្មីអត់មានរំសាយនោះទេ គឺនឹងមានពង្រីកបន្ថែម។ សម្តេចធិបតី បានថ្លែងថា សាលាជំនាន់ថ្មី ខុសពីមជ្ឈមណ្ឌលសិក្សាទំនើប។ សាលាជំនាន់ថ្មី គឺគ្រប់គ្រងដោយរដ្ឋ។សម្តេចបានបន្តថា សាលាជំនាន់ថ្មី មិនមានការបែងចែកកម្មវិធីសិក្សានោះឡើយ ហើយក៏មិនមានតម្រូវឱ្យអាណាព្យាបាលបង់ប្រាក់នោះឡើយ។ សម្តេច បានស្នើសុំការយោគយល់អាណាព្យាបាល ក៏ដូចជាលោកគ្រូ អ្នកគ្រ ដែលមានកូនរៀន និងបង្រៀននៅមជ្ឈមណ្ឌលសិក្សាទំនើប។សាលារៀនជំនាន់ថ្មី គឺជាកម្មវិធីកំណែទម្រង់ប្រព័ន្ធអប់រំរបស់រាជរដ្ឋាភិបាលកម្ពុជាដែលជាមាគ៌ាអភិវឌ្ឍថ្មីមួយនៅក្នុងប្រព័ន្ធអប់រំនាពេលបច្ចុប្បន្នដែលជួយបង្កើតសាលារៀនសាធារណៈស្វយ័ត។ បច្ចុប្បន្ន សាលារៀនជំនាន់ថ្មី កំពុងពង្រីកខ្លួនក្នុងការផ្ដល់ការអប់រំសម័យថ្មី ដែលបញ្ចូលកម្មវិធីបច្ចេកវិទ្យាក្នុងកម្មវិធីសិក្សា។ នេះបើតាមការលើកឡើងនៅក្នុងសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥ របស់ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ដោយបានវាយតម្លៃពីគុណភាពរបស់សាលារៀនជំនាន់ថ្មី។ ឯកឧត្តម មានប្រសាសន៍បែបនេះ សាលារៀនជំនាន់ថ្មី ជាសាលាដែលមានគុណភាព ហើយចំណាយតិច។ បើគិតពីប្រសិទ្ធភាព គឺមានខ្ពស់ណាស់។សូមបញ្ជាក់ថា បច្ចុប្បន្ន កម្ពុជាមានសាលារៀនជំនាន់ថ្មីចំនួន១៣។ ជាមួយគ្នានេះ ក្រសួងអប់រំ កំពុងពិនិត្យពង្រីកបន្ថែមនៅពេលអនាគត។ សាលារៀនជំនាន់ថ្មី មានគោលការណ៍ស្នូល ផ្ដោតសំខាន់លើស្ដង់ដាវិជ្ជាជីវៈខ្ពស់ ស្វ័យភាពក្នុងការប្រតិបត្តិការ គណនេយ្យភាពតឹងរ៉ឺង ប្រព័ន្ធវាយតម្លៃទទួលស្គាល់គុណភាព និងក្របខណ្ឌបែងចែកធនធានប្រកបដោយសនិទានភាព។ សាលារៀនជំនាន់ថ្មី នឹងផ្តល់នូវស្តង់ដាថ្មីមួយនៃការអប់រំនៅក្នុងសាលារៀនសាធារណៈ ដើម្បីយុវជនកម្ពុជារៀបចំខ្លួន ត្រៀមលក្ខណៈសម្បត្តិសម្រាប់សតវត្សទី២១ រាប់ទាំងការជួយសិស្សចេះគិតបែបស៊ីជម្រៅ និងទទួលបានបំណិនចាំបាច់សម្រាប់ទីផ្សារការងារក្នុងសតវត្សទី២១៕

សម្ដេចធិបតីជំរុញដល់ក្រសួងទេសចរណ៍ និងវប្បធម៌ធ្វើឱ្យកម្ពុជាក្លាយជាគោលដៅទេសចរណ៍ភាពយន្ត

ភ្នំពេញ ៖ ក្នុងឱកាសពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅ ការងារឆ្នាំ២០២៥ របស់ក្រសួងទេសចរណ៍ ថ្ងៃទី២៧ ខែកុម្ភៈ ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បាន ជំរុញដល់ក្រសួងទេសចរណ៍ ក្រសួងវប្បធម៌ និងវិចិត្រសិល្បៈ និងបណ្ដារាជធានី-ខេត្ត ធ្វើឱ្យកម្ពុជាក្លាយទៅជាគោលដៅទេសចរណ៍ភាពយន្ត ដោយដៅ គោលដៅណាមួយជាគោលដៅសម្រាប់ថតកុន រៀបកញ្ចប់សេវាល្អ និងការសម្របសម្រួលតម្លៃសមរម្យសម្រាប់ការអនុវត្តការងារនេះឱ្យបានល្អ។ ក្នុងឱកាសនោះ សម្តេចធិបតី ណែនាំឱ្យក្រសួងទេសចរណ៍, ក្រសួងវប្បធម៌ និងវិចិត្រសិល្បៈ និងរដ្ឋបាល រាជធានី ខេត្ត ផ្តល់កិច្ចសហការ ដើម្បីជំរុញការផ្សព្វផ្សាយគោលដៅទេសចរណ៍កម្ពុជា ជាគោលដៅទេសចរណ៍ភាពយន្ត (Film Destination) ក៏ដូចជា ការថតស្ប៉តពាណិជ្ជកម្មជាលក្ខណៈអន្តរជាតិ ដែលទាំងអស់នេះ នឹងជំរុញការផ្សព្វផ្សាយកម្ពុជាលើឆាកអន្តរជាតិ បានលឿន និងមានប្រសិទ្ធភាព។ សម្តេចបានគាំទ្រឱ្យមានការថតភាពយន្តនៅលើទឹកដីអង្គរ ក៏ដូចជានៅទីតាំងនានានៅកម្ពុជា ពីសំណាក់ក្រុមហ៊ុនភាពយន្តបរទេស។ សម្ដេចមានប្រសាសន៍ថា តាមរយៈការថតភាពយន្តនេះ ធ្វើឱ្យកម្ពុជាចំណេញក្នុងការផ្សព្វផ្សាយកម្ពុជាដោយមិនចាំបាច់ចំណាយលុយ ទៅជួលគេផ្សាយនោះឡើយ។ក្នុងឱកាសនោះ សម្តេចធិបតី នាយករដ្ឋមន្រ្ដី ក៏បានណែនាំឱ្យក្រសួង-ស្ថាប័នពាក់ព័ន្ធ ត្រូវបើកចិត្តឱ្យទូលាយក្នុងការទទួលមតិរិះគន់ ក្នុងន័យស្ថាបនា ដើម្បីកែសម្រួល និងកែលម្អបរិយាកាស ក្នុងការទទួលបដិសណ្ឋារកិច្ចភ្ញៀវទេសចរ រាប់តាំងពីនៅច្រកទ្វារអន្តរជាតិ (ទាំងផ្លូវទឹក, ផ្លូវគោក និងផ្លូវអាកាស) បញ្ហាអន្តោប្រវេសន៍ និងផ្នែកពាក់ព័ន្ធនានា ដើម្បីបង្ហាញភាពជាខ្មែរ និងស្នាមញញឹមខ្មែរ តាំងពីពេល ភ្ញៀវទេសចរចូលមកដល់ដំបូង។សម្តេចក៏បានណែនាំអភិបាលរាជធានីខេត្ត បន្ត ជំរុញការរៀបចំគោលដៅទេសចរណ៍នៅក្នុងមូលដ្ឋានរបស់ខ្លួន ឱ្យមាន លក្ខណៈស្តង់ដា និងផ្សព្វផ្សាយឱ្យបានទូលំទូលាយ។ ជាពិសេសក្នុងបរិការណ៍ឌីជីថល និងបច្ចេកវិទ្យាសប្បនិម្មិត (AI) នាពេលបច្ចុប្បន្ននេះ និងត្រូវមានស្មារតីបុរេសកម្ម ម្ចាស់ការដោះស្រាយបញ្ហាក្នុងមូលដ្ឋាន គោលដៅទេសចរណ៍របស់ខ្លួន រាប់តាំងពីបញ្ហាបរិស្ថាន អនាម័យ (ជាពិសេសបង្គន់អនាម័យ) គុណភាពសេវាកម្ម តម្លៃ ចំណត និង បញ្ហាតូចតាចនានា កុំចាំទាល់តែមានការលើកឡើងពីមហាជន ឬ ការបង្ហោះក្នុងបណ្ដាញសង្គមជាដើម៕

សម្ដេចធិបតី អំពាវនាវឱ្យរួមគ្នាថែរក្សាសន្ដិភាពរបស់កម្ពុជា ខណៈមានសន្ដិភាពទើបមានទេសចរ

ភ្នំពេញ ៖ ក្នុងឱកាសពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅ ការងារឆ្នាំ២០២៥ របស់ក្រសួងទេសចរណ៍ ថ្ងៃទី២៧ ខែកុម្ភៈ ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានអំពាវនាវដល់ប្រជាពលរដ្ឋរួមគ្នាថែរក្សាសន្ដិភាពរបស់កម្ពុជា ខណៈមានសន្ដិភាពទើប កម្ពុជាមានការអភិវឌ្ឍ និងមានភ្ញៀវទេសចរមកលេងកម្សាន្ត។ ក្នុងឱកាសនោះសម្ដេចធិបតីមានប្រសាសន៍ថា ជាមួយនឹងការបន្តថែរក្សាបាននូវសុខសន្តិភាព ស្ថិរភាពនយោបាយសន្តិសុខ សណ្តាប់ធ្នាប់សង្គមល្អ កម្ពុជាបានក្លាយជាគោលដៅ ទេសចរណ៍ ដែលមានសុវត្ថិភាព, ឱកាសវិនិយោគ និងពាណិជ្ជកម្ម ដ៏គួរឱ្យទាក់ទាញក្នុងតំបន់អាស៊ី, ជាពិសេស បានធ្វើឱ្យវិស័យទេសចរណ៍ក្លាយជាកម្លាំងចលករដ៏សំខាន់ក្នុងរយៈពេល៣០ឆ្នាំ ចុងក្រោយនេះ។សម្តេចធិបតី បន្តអំពាវនាវឱ្យរួមគ្នាបន្តរក្សាវត្តមានជាអចិន្ត្រៃយ៍នៃសុខសន្តិភាព ដែលកម្ពុជា រកបានដោយលំបាក តាមរយៈការដាក់ចេញនូវគោលនយោបាយឈ្នះ-ឈ្នះរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា។ សម្ដេចថ្លែអថា បើគ្មានសន្តិភាព គ្មានការអភិវឌ្ឍ ហើយក៏គ្មានទេសចរណ៍ ដែលយើងបានឃើញច្បាស់អំពីបញ្ហានេះ នៅតាមបណ្ដាប្រទេសមួយចំនួនក្នុងពិភពលោក។សូមជម្រាបថា តាមរយៈការក្សាបាននូវសុខសន្ដិភាព ស្ថិតិទេសចរណ៍នៅឆ្នាំ២០២៤ កម្ពុជាទទួលបានភ្ញៀវទេសចរអន្តរ ជាតិសរុប ៦.៧ លាននាក់ កើនឡើងប្រមាណ ២៣% ធៀបនឹងឆ្នាំ២០២៣ ជាមួយទេសចរជាតិ ប្រមាណ ២២.៥២ លាននាក់ កើនឡើង ២០,១% ធៀបនឹងឆ្នាំ២០២៣។ អង្គសន្និបាតក្រសយងទេសចរណ៍បានវាយតម្លៃខ្ពស់ពីការចូលរួមរបស់វិស័យទេសចរណ៍ទៅក្នុងសេដ្ឋកិច្ចជាតិ ក្នុងនោះក្នុងឆ្នាំ២០២៣, ចំណូលទេសចរណ៍អន្តរជាតិមានចំនួន ៣.០៨៣ លានដុល្លារ, ក្នុងឆ្នាំ២០២៤ ចំណូលទេសចរណ៍អន្តរជាតិមានចំនួន ៣.៦៣៧ លានដុល្លារ ដោយរួមចំណែកប្រមាណ ៩.៤% នៃផលិតផលក្នុងស្រុកសរុប។ តាមការព្យាករណ៍ក្នុងឆ្នាំ២០២៥ ចំណូលទេសចរណ៍អន្តរជាតិមានចំនួន ៥.១០០ លានដុល្លារអាម៉េរិក ដោយរួមចំណែកប្រមាណ១០.៥% នៃផលិតផលក្នុងស្រុកសរុប។ អង្គសន្និបាតបានវាយតម្លៃខ្ពស់ពីស្ថានភាពកញ្ចប់ទស្សនកិច្ចក្នុងឆ្នាំ២០២៤ និងមានសុទិដ្ឋិនិយមចំពោះឆ្នាំ២០២៥៕

“អ៊ិស្លាម និង ពុទ្ធសាសនា” គឺជាជម្រើសប្រធានបទដ៏ស័ក្តិសមបំផុត សម្រាប់ការរៀបចំកម្មវិធី នៅក្នុងប្រទេសកម្ពុជា ដែលតែងតែលើកស្ទួយកិច្ចសន្ទនាអន្តរសាសនា និង សន្តិសហវិជ្ជមានរវាងជំនឿសាសនា

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងក្នុងពិធីបើកកិច្ចប្រជុំកំពូលអ៊ិស្លាម ក្រោមប្រធានបទ “អ៊ិស្លាម និងពុទ្ធសាសនា” នាព្រឹកថ្ងៃព្រហស្បត្តិ៍ ទី២៧ ខែកុម្ភៈ ឆ្នាំ២០២៥ ថា “អ៊ិស្លាម និង ពុទ្ធសាសនា” ដែលជាជម្រើសប្រធានបទដ៏ស័ក្តិសមបំផុតសម្រាប់ការរៀបចំកម្មវិធី នៅក្នុងប្រទេសកម្ពុជា ដែលតែងតែលើកស្ទួយកិច្ចសន្ទនាអន្តរសាសនា និង សន្តិសហវិជ្ជមានរវាងជំនឿសាសនា, សមាជិករបស់អង្គការសម្ព័ន្ធពិភពអ៊ិស្លាម, បណ្តារដ្ឋសមាជិកទាំង ៥៧ នៃអង្គការសហប្រតិបត្តិការអ៊ិស្លាម(OIC) និង ប្រទេសនានា លើសាកលលោក សុទ្ធតែបានទទួលស្គាល់ថា កម្ពុជា គឺជាប្រទេសគំរូមួយ ក្នុងការបញ្ចប់សង្គ្រាមរ៉ាំរ៉ៃទាំងស្រុង និង ទទួលបានសុខសន្តិភាពពេញលេញ និងបានលើកកម្ពស់សិទ្ធិសេរីភាពជំនឿសាសនារបស់ប្រជាពលរដ្ឋទូទៅ, បូករួមទាំងបងប្អូនសាសនិកអ៊ិស្លាម។ជាមួយគ្នានេះ, សម្តេចបវធិបតីនាយករដ្ឋមន្ត្រី បានគូសបញ្ជាក់បន្តថា ក្រោយ ថ្ងៃរំដោះ ៧ មករា ឆ្នាំ ១៩៧៩, ទើបសេរីភាពនៃជំនឿសាសនានៅកម្ពុជា ត្រូវបានស្ដារ និងសង្គ្រោះឡើងវិញ ។ ក្រោមការដឹកនាំរបស់ សម្តេចតេជោ ហ៊ុន សែន, សហគមន៍ខ្មែរអ៊ិស្លាមមានការរីកចម្រើន និងមានសេរីភាពជំនឿសាសនាយ៉ាងពេញលេញ, ជាពិសេសរាជរដ្ឋាភិបាលបានរៀបចំឱ្យមានស្ថាប័នកំពូលអ៊ិស្លាមឡើងវិញ គឺគណៈដឹកនាំជាន់ខ្ពស់នៃសាសនាអ៊ិស្លាមកម្ពុជា និងបានផ្តល់តួនាទីដល់ថ្នាក់ដឹកនាំសហគមន៍ខ្មែរអ៊ិស្លាមជាច្រើនរូប នៅក្នុងស្ថាប័នកំពូលរបស់ជាតិ និងនៅថ្នាក់ក្រោមជាតិ ។សម្តេចបវរធិបតីនាយករដ្ឋមន្ត្រី បានសង្កត់ធ្ងន់ថា លទ្ធិជ្រុលនិយម គឺជាសត្រូវនៃភាពសុខដុមរមនា និង សន្តិសហវិជ្ជមាន នៅក្នុងសង្គមជាតិ ។ ជាក់ស្តែង, គ្មានសង្គមណាមួយ ដែលមានភាពបរិសុទ្ធឥតខ្ចោះនៃជាតិសាសន៍ និង សាសនា នោះទេ ហើយសង្គមដែលទាមទារភាពបរិសុទ្ធបែបនេះ គឺតែងតែនាំមកនូវសោកនាដកម្ម, ការធ្វើទុក្ខបុកម្នេញ, ការសងសឹកគ្មានទីបញ្ចប់ ហើយដែលអាក្រក់បំផុតនោះ គឺការរុញច្រានទៅរកសកម្មភាពបោសសម្អាតជាតិសាសន៍។ តាមពិត, ពិភពលោកយើងពិតជាមានមេរៀនច្រើនរាប់មិនអស់ ពីសោកនាដកម្ម ដែលមានឫសគល់ចេញពីលទ្ធិជ្រុលនិយម បូករួមទាំងអ្វីដែលកម្ពុជា បានឆ្លងកាត់ ក្នុងរបបប្រល័យពូជសាសន៍ ប៉ុល ពត។ ជាក់ស្តែង, ក្រុមប្រឆាំងជ្រុលនិយម ព្រោះតែមហិច្ឆតានយោបាយរបស់ខ្លួន បានបរិហារដោយបំពានលើតថភាពប្រវត្តិសាស្ត្រ និង គុណតម្លៃមិនអាចកាត់ថ្លៃបាននៃ ថ្ងៃរំដោះ ៧ មករា ១៩៧៩ ដែលជាថ្ងៃកំណើតទី ២ របស់ប្រជាជនកម្ពុជាទូទាំងប្រទេស បូករួមទាំងបងប្អូនខ្មែរអ៊ិស្លាមផងដែរ ។សម្តេចបវរធិបតីនាយករដ្ឋមន្ត្រី បានថ្លែងបន្ថែមថា ការជំរុញសុខដុមនីយកម្មជាតិសាសន៍ និង សាសនា ត្រូវមានការចូលរួមពីប្រជាជនគ្រប់ស្រទាប់ទាំងអស់ មិនមែនរាជរដ្ឋាភិបាល អាចធ្វើឡើងតែម្នាក់ឯងបានឡើយ។ ការរៀបចំរចនាសម្ព័ន្ធគ្រប់គ្រងបានត្រឹមត្រូវ និង ការចូលរួមសហការ ជំរុញកិច្ចសន្ទនាអន្តរសាសនា ដោយគ្មានរើសអើង ដោយគ្មានលទ្ធិជ្រុលនិយម គឺជាកត្តាគាំទ្រដ៏សំខាន់ សម្រាប់ការអនុវត្តគោលនយោបាយ របស់រាជរដ្ឋាភិបាល ដែលធានាភាពសុខដុមរមនា និងសន្តិសហវិជ្ជមានរបស់សង្គមដែលមានភាពចម្រុះ៕

បណ្ដាញសង្គម

ព័ត៌មានថ្មីៗ

ឯកឧត្តម ហ៊ុន ម៉ានី អញ្ជើញដឹកនាំប្រតិភូ ស.ស.យ.ក. ដាក់កម្រងផ្កា និងថ្វាយបង្គំព្រះបរមរូប ព្រះបរមរតនកោដ្ឋ ក្នុងឱកាសខួបលើកទី ៧២ នៃទិវាបុណ្យឯករាជ្យជាតិ

អូស្ត្រាលីគាំទ្រវិស័យស្រូវអង្ករកម្ពុជា

អគ្គិភ័យឆេះឃ្លាំងទឹកអប់នៅភាគពាយ័ព្យប្រទេសទួរគី បណ្តាលឲ្យមនុស្សយ៉ាងតិច ៦នាក់ស្លាប់

ប្រឹក្សាយោធាជាន់ខ្ពស់EU និយាយថា គ្រូបណ្តុះបណ្តាលយោធាអឺរ៉ុប គួរតែជាផ្នែកមួយនៃការធានាសន្តិសុខអ៊ុយក្រែន

ទួរគីកំពុងរៀបចំច្បាប់ ដើម្បីអនុញ្ញាតឲ្យយុទ្ជជន PKK ត្រឡប់មកប្រទេសវិញ ក្រោមផែនការសន្តិភាព

កាសែត៖ អាមេរិកស្នើអ៊ីស្រាអែលឲ្យដោះលែងឲ្យយុទ្ធជនហាម៉ាសប្រហែល ១៥០នាក់ ដែលជាប់នៅក្នុង ផ្លូវរូងក្រោមដី នៅហ្កាហ្សា

ក្រសួងការពារជាតិកម្ពុជាបញ្ជាក់បន្ថែម ៦ ចំណុចអំពីវឌ្ឍនភាពការងារ ដោះមីនមនុស្សធម៌ក្នុងតំបន់អាទិភាពនៅព្រំដែនកម្ពុជា និងថៃ

បេសកជនអារ៉ាប់រួម និយាយថា ជំនួយទៅកាន់តំបន់ហ្កាហ្សា នឹងត្រូវបានបង្កើនឡើង ហើយប្រទេសកោះស៊ីប គឺជាផ្លូវសំខាន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

ក្រុមហ៊ុនសាជីវកម្មធនធានទឹកកូរ៉េ (K-water) ស្វែងរកឱកាសវិនិយោគក្នុងវិស័យគ្រប់គ្រងធនធានទឹក នៅកម្ពុជា

សម្តេចធិបតី៖ ភូមិមួយផលិតផលមួយបានជួយបង្កើនប្រាក់ចំណូលដល់ពលរដ្ឋ និងបានជួយកាត់បន្ថយចំណាកស្រុក

សម្ដេចធិបតីមិនបានប្រកាសឱ្យបញ្ឈប់សាលាជំនាន់ថ្មីទេ គឺបញ្ឈប់តែមជ្ឈមណ្ឌលសិក្សាទំនើបប៉ុណ្ណោះ

សម្ដេចធិបតីជំរុញដល់ក្រសួងទេសចរណ៍ និងវប្បធម៌ធ្វើឱ្យកម្ពុជាក្លាយជាគោលដៅទេសចរណ៍ភាពយន្ត

សម្ដេចធិបតី អំពាវនាវឱ្យរួមគ្នាថែរក្សាសន្ដិភាពរបស់កម្ពុជា ខណៈមានសន្ដិភាពទើបមានទេសចរ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

ក្រុមហ៊ុនសាជីវកម្មធនធានទឹកកូរ៉េ (K-water) ស្វែងរកឱកាសវិនិយោគក្នុងវិស័យគ្រប់គ្រងធនធានទឹក នៅកម្ពុជា

សម្តេចធិបតី៖ ភូមិមួយផលិតផលមួយ​បានជួយ​បង្កើន​ប្រាក់​ចំណូល​ដល់​ពលរដ្ឋ និង​បាន​ជួយ​កាត់​បន្ថយចំណាកស្រុក

សម្ដេចធិបតីមិនបានប្រកាសឱ្យបញ្ឈប់សាលាជំនាន់ថ្មីទេ គឺបញ្ឈប់តែមជ្ឈមណ្ឌលសិក្សាទំនើបប៉ុណ្ណោះ

សម្ដេចធិបតីជំរុញដល់ក្រសួងទេសចរណ៍ និងវប្បធម៌ធ្វើឱ្យកម្ពុជាក្លាយជាគោលដៅទេសចរណ៍ភាពយន្ត

សម្ដេចធិបតី អំពាវនាវឱ្យរួមគ្នាថែរក្សាសន្ដិភាពរបស់កម្ពុជា ខណៈមានសន្ដិភាពទើបមានទេសចរ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សម្តេចធិបតី៖ ភូមិមួយផលិតផលមួយបានជួយបង្កើនប្រាក់ចំណូលដល់ពលរដ្ឋ និងបានជួយកាត់បន្ថយចំណាកស្រុក