BTV NEWS

ក្រសួងសន្តិសុខសាធារណៈចិន ចុះពិនិត្យទីតាំងធ្លាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យានៅតំបន់ OP ក្រុងបាវិត

ឧត្តមសេនីយ៍ឯក ជួន ណារិន្ទ ប្រកាសឲ្យអ្នកបើករថយន្ត Range Rover បង្កគ្រោះថ្នាក់ចរាចរណ៍ស្លាប់មនុស្សនៅខណ្ឌជ្រោយចង្វារ ចូលខ្លួនបន្ទាន់ មិនបាច់រកអន្តរាគមន៍ទេ

ករណីគ្រឿងញៀនខុសច្បាប់ជិត ១តោន ៖ ចោទប្រកាន់ជនសង្ស័យចំនួន ១២នាក់

សមត្ថកិច្ចកម្ពុជា និងអាមេរិកសហការបង្ក្រាបទូកនេសាទដឹកជញ្ជូនគ្រឿងញៀនជិត ១តោន និងចាប់ខ្លួនមនុស្សចំនួន ៨ នាក់

សន្តិសុខ និង សង្គម

ជនជាតិដើមភាគតិចប្រេស៊ីល រាប់ពាន់នាក់ចេញតវ៉ាប្រឆាំងការមិនការពារទឹកដីដូនតា

ក្រុមបាតុករជនជាតិដើមភាគតិចជាច្រើនពាន់នាក់ បានដើរដង្ហែក្បួនតវ៉ាកាលពីថ្ងៃព្រហស្បតិ៍ (២៥ មេសា) ក្នុងរដ្ឋធានីរបស់ប្រទេសប្រេស៊ីល ដើម្បីតវ៉ាប្រឆាំងនឹងការបរាជ័យរបស់រដ្ឋាភិបាលក្នុងការការពារទឹកដីដូនតារបស់ពួកគេ។ព្រឹត្តិការណ៍ដង្ហែក្បួនប្រចាំឆ្នាំនៅឆ្នាំនេះ ផ្តោតទៅលើកំហឹងជនជាតិដើមភាគតិចលើគម្រោងសាងសង់ផ្លូវរថភ្លើងដើម្បីដឹកជញ្ជូនគ្រាប់ធញ្ញជាតិពីបណ្ដារដ្ឋកសិកម្មទៅកាន់កំពង់ផែតំបន់ព្រៃអាម៉ាហ្សូន (Amazon) សម្រាប់ការនាំចេញ ដែលពួកគេខ្លាចថានឹងបំផ្លាញបរិស្ថាននៃសហគមន៍កុលសម្ព័ន្ធនៅជិតទន្លេ ថាប៉ាហូស (Tapajos)។លោក ឃ្លេប៊ឺ ខារីពូណា (Kleber Karipuna) ប្រធានអង្គការឆ័ត្រជនជាតិដើមភាគតិចដ៏ធំបំផុតរបស់ប្រទេសប្រេស៊ីល (APIB) បាននិយាយថា សហគមន៍មិនត្រូវបានពិគ្រោះយោបល់លើគម្រោងផ្លូវដែកនោះទេ ដែលការប្រកាសដោយរដ្ឋាភិបាលបានធ្វើឱ្យមានរលកនៃការទន្ទ្រានយកដីនៅតាមផ្លូវដែលបានគ្រោងទុក ដោយនោះជាការរំលោភលើទឹកដីដូនតារបស់សហគមន៍។ពាក្យបណ្តឹងចម្បងរបស់ពួកគេ គឺការបរាជ័យរបស់រដ្ឋាភិបាលរបស់លោកប្រធានាធិបតី លូអ៊ីស អ៊ីណាស៊ីអូ លូឡា ដាស៊ីលវ៉ា (Luiz Inacio Lula da Silva) ដែលមិនបានធានាផ្តល់ការសន្យាទទួលស្គាល់ជាផ្លូវការនូវដីធ្លីរបស់ជនជាតិដើមភាគតិច ដែលបានបញ្ចប់ដំណើរការបោះបង្គោលកំណត់ថាជាដីដូនតា៕

មន្ត្រីក្រុមហាម៉ាសអះអាងថា ក្រុមមានឆន្ទៈក្នុងការរំសាយអាវុធ ប្រសិនបើរដ្ឋប៉ាឡេស្ទីន ត្រូវបានបង្កើតឡើង

មន្ត្រីក្រុមហាម៉ាសមួយចំនួន កំពុងផ្តល់សញ្ញាថា ក្រុមសកម្មប្រយុទ្ធ អាចបោះបង់ការតស៊ូប្រដាប់អាវុធប្រឆាំងនឹងអ៊ីស្រាអែល ប្រសិនបើប៉ាឡេស្ទីនទទួលបានរដ្ឋឯករាជ្យមួយ នៅក្នុងទឹកដីដែលអ៊ីស្រាអែល បានកាន់កាប់ ក្នុងសង្គ្រាមឆ្នាំ ១៩៦៧។សារនេះបង្ហាញពីការបន្ទន់ជំហររបស់ក្រុមហាម៉ាស ខណៈដែលជោគវាសនារបស់ខ្លួន កំពុងប្រឈម ជាមួយនឹងការវាយលុករបស់អ៊ីស្រាអែល ទៅលើតំបន់ហ្កាហ្សាស្ទ្រីប ដែលក្រុមហាម៉ាស បានគ្រប់គ្រងមុនសង្គ្រាម។ ក្រុមសកម្មប្រយុទ្ធប៉ាឡេស្ទីន បានអំពាវនាវជាយូរមកហើយឲ្យរដ្ឋជ្វីហ្វនេះ ត្រូវបានបំផ្លាញ។លោក Basem Naim សមាជិកការិយាល័យនយោបាយរបស់ក្រុមហាម៉ាស ដែលមានមូលដ្ឋាននៅទីក្រុងអ៊ីស្តង់ប៊ុល បានប្រាប់សារព័ត៌មាន CNN កាលពីថ្ងៃព្រហស្បតិ៍ថា ក្រុមនេះ នឹងយល់ព្រមរំសាយអាវុធ ប្រសិនបើរដ្ឋប៉ាឡេស្ទីនឯករាជ្យមួយ ត្រូវបានបង្កើតឡើង។លោកបានបញ្ជាក់ថា៖«ប្រសិនបើរដ្ឋឯករាជ្យមួយដែលមានរដ្ឋធានីរបស់ខ្លួន នៅទីក្រុងហ្ស៊េរុយសាឡឹម ខណៈពេលដែលរក្សាសិទ្ធិនៃការវិលត្រឡប់សម្រាប់ជនភៀសខ្លួន (ត្រូវបានបង្កើតឡើង) កងពលតូច Al Qassam អាចត្រូវបានបញ្ចូលទៅក្នុងកងទ័ពជាតិ ( នាពេលអនាគត)» ដោយសំដៅទៅក្រុមប្រដាប់អាវុធរបស់ក្រុមហាម៉ាស។ក្រុមហាម៉ាសជាប្រពៃណី បានបដិសេធដំណោះស្រាយរដ្ឋពីរដែលនឹងឃើញរដ្ឋប៉ាឡេស្ទីន ត្រូវបានបង្កើតឡើងជាមួយអ៊ីស្រាអែល ហើយជំនួសឲ្យការតស៊ូមតិការបង្កើតរដ្ឋប៉ាឡេស្ទីន នៅក្នុងប្រវត្តិសាស្ត្រប៉ាឡេ ស្ទីនទាំងអស់ ដែលសព្វថ្ងៃនេះ គ្របដណ្តប់លើអ៊ីស្រាអែល គឺតំបន់វេសបែង ទីក្រុងហ៊្សេរុយសាឡឹមខាងកើតដែលកាប់កាប់ដោយអ៊ីស្រាអែល និងតំបន់ហ្កាហ្សា។

កងទ័ពនៅប្រទេស បួគីណា ហ្វាសូ ប្រហារជីវិតអ្នកភូមិជាង ២២០ នាក់កាលពីខែកុម្ភៈ

អង្គការឃ្លាំមើលសិទ្ធិមនុស្ស (HRW) បាននិយាយកាលពីថ្ងៃព្រហស្បតិ៍ (២៥ មេសា) ថាយោធារបស់ប្រទេស បួគីណា ហ្វាសូ ក្នុងខែកុម្ភៈ បានប្រហារជីវិតអ្នកភូមិប្រហែល ២២៣ នាក់ រួមទាំងកុមារយ៉ាងតិច ៥៦ នាក់ ដែលជាផ្នែកមួយនៃយុទ្ធនាការប្រឆាំងនឹងជនស៊ីវិល ដែលត្រូវបានចោទប្រកាន់ពីបទសហការជាមួយពួកសកម្មប្រយុទ្ធជីហាដ។ក្រុមឃ្លាំមើលនេះបានធ្វើការអះអាងនៅក្នុងរបាយការណ៍មួយដោយផ្អែកលើការស៊ើបអង្កេតផ្ទាល់របស់ខ្លួនលើការរាយការណ៍អំពីការប្រហារជីវិតមនុស្សប្រហែល ១៧០ នាក់នៅក្នុងការវាយប្រហារលើភូមិចំនួន ៣ ក្នុងខេត្ត យ៉ាថេនហ្កា (Yatenga) ភាគខាងជើងនៃប្រទេស បួគីណា ហ្វាសូ កាលពីចុងខែកុម្ភៈ។ រដ្ឋអាជ្ញាប្រចាំតំបន់ដែលមានមូលដ្ឋាននៅក្នុងរដ្ឋធានី អ័រហ៊ីហ្គួយ៉ា (Ouahigouya) របស់ខេត្ត ជាលើកដំបូងបានលើកឡើងការសម្លាប់នេះក្នុងសេចក្តីថ្លែងការណ៍មួយកាលពីថ្ងៃទី០១ ខែមីនា។រដ្ឋអាជ្ញាបាននិយាយនៅក្នុងសេចក្តីថ្លែងការណ៍ថា ការវាយប្រហារទៅលើភូមិ ខូមស៊ីលហ្កា (Komsilga) ភូមិ ណូឌីន (Nodin) និងភូមិ សូរ៉ូ (Soro) ត្រូវបានសន្មតថាធ្វើឡើងដោយអ្នកវាយប្រហារមិនស្គាល់អត្តសញ្ញាណ ដោយបន្ថែមថាការស៊ើបអង្កេតមួយត្រូវបានចាប់ផ្តើម។ ដូចករណីមុនៗនៃការសម្លាប់ក្រៅប្រព័ន្ធតុលាការនៅក្នុងប្រទេសនេះដែរ គឺមិនមានការរកឃើញផ្លូវការណាមួយត្រូវបានចេញផ្សាយទេ។ក្រុមសិទ្ធិមនុស្សពីមុនបានចោទប្រកាន់យោធានៅក្នុងប្រទេសបួគីណាហ្វាសូ ដែលគ្រប់គ្រងដោយរបបសឹកនេះថាបានវាយប្រហារ និងសម្លាប់ជនស៊ីវិលរាប់រយនាក់ដែលសង្ស័យថាបានសហការជាមួយពួកសកម្មប្រយុទ្ធក្នុងប្រតិបត្តិការសងសឹក៕

មនុស្សជាង ១៥០ នាក់ស្លាប់ ដោយសារភ្លៀងធ្លាក់ខ្លាំងវាយប្រហារប្រទេសតង់ហ្សានី

នាយករដ្ឋមន្ត្រីប្រទេសតង់ហ្សានី លោក ខាស៊ីម ម៉ាចាលីវ៉ា (Kassim Majaliwa) បានប្រាប់សភាកាលពីថ្ងៃព្រហស្បតិ៍ (២៥ មេសា) ថាទឹកជំនន់ដ៏គំហុកយ៉ាងធ្ងន់ធ្ងរដែលបង្កឡើងដោយភ្លៀងធ្លាក់ខ្លាំង បានបណ្តាលឱ្យមនុស្ស ១៥៥ នាក់ស្លាប់ និងមនុស្ស ២៣៦ នាក់ផ្សេងទៀតរងរបួស។ លោក ម៉ាចាលីវ៉ា បានប្រាប់សភានៅរដ្ឋធានី ដូដូម៉ា (Dodoma) ថាទឹកជំនន់ដ៏គំហុកត្រូវបានគេរាយការណ៍ថាកើតមាននៅក្នុងតំបន់ចំនួន ១៤ ក្នុងចំណោមតំបន់ទាំង ២៦ នៅក្នុងប្រទេសតង់ហ្សានីដីគោក ដែលប៉ះពាល់ដល់មនុស្សចំនួន ២០០.០០០ នាក់ និងបំផ្លាញលំនៅឋានចំនួន ១០.០០០ ខ្នង។លោកបន្តថា «ហេដ្ឋារចនាសម្ព័ន្ធសាលារៀន ដំណាំកសិកម្ម ផ្លូវថ្នល់ ស្ពាន មណ្ឌលថែទាំសុខភាព និងបសុសត្វបានរងផលប៉ះពាល់ដោយទឹកជំនន់។ រដ្ឋាភិបាលបានចាត់វិធានការក្នុងគោលបំណងការពារស្ថានភាពមហន្តរាយបន្ថែមទៀត ដូចជាការបញ្ជាឱ្យបិទសាលារៀននៅក្នុងតំបន់ដែលរងផលប៉ះពាល់យ៉ាងធ្ងន់ធ្ងរដោយទឹកជំនន់»។លោកនាយករដ្ឋមន្ត្រីរូបនេះបន្ថែមថា ទីភ្នាក់ងារផ្លូវជាតិតង់ហ្សានី, ទីភ្នាក់ងារផ្លូវជនបទ និងទីក្រុង, និងសាជីវកម្មផ្លូវដែក ត្រូវបានបញ្ជាឱ្យធ្វើការវាយតម្លៃជាបន្ទាន់លើផ្លូវថ្នល់ និងផ្លូវដែកដែលរងការខូចខាតសម្រាប់ការជួសជុលជាបន្ទាន់។យោងតាមអាជ្ញាធរឧតុនិយមតង់ហ្សានី បានឱ្យដឹងថា ភ្លៀងធ្លាក់ខ្លាំងដែលរងឥទ្ធិពលដោយលក្ខខណ្ឌអាកាសធាតុ អ៊ែលនីញ៉ូ (El-Nino) បែបនេះត្រូវបានគេរំពឹងថានឹងបន្តរហូតដល់ខែឧសភា៕

ប្រជាជនហៃទី និយាយថា សន្តិសុខគឺជាអាទិភាព ខណៈរដ្ឋាភិបាលអន្តរកាលឡើងកាន់អំណាច

ប្រជាជនហៃទីនៅ ទីក្រុង ខេប ហៃទៀន(Cap-Haitien) បានអំពាវនាវឱ្យផ្តល់អាទិភាពចំពោះសន្តិសុខនៅក្នុងប្រទេសនេះ ខណៈក្រុមប្រឹក្សាអន្តរកាល បានចូលកាន់អំណាចនៅប្រទេសហៃទី កាលពីថ្ងៃព្រហស្បតិ៍ ទី២៥ ខែ មេសា។ សកម្មភាពដែលមានបំណងនាំត្រឡប់មកវិញនូវស្ថិរភាព ដល់ប្រទេសជាកន្លែងដែលអំពើហិង្សាដោយក្រុមជនអន្ធពាល បានបង្កភាពចលាចល និងទុក្ខព្រួយ ក៏ត្រូវបានគេមើលឃើញថាមានការមន្ទិលសង្ស័យដោយមនុស្សមួយចំនួនដែលបាននិយាយថាមិនទទួលស្គាល់ក្រុមប្រឹក្សានេះទេ ហើយនឹងព្យាយាមជំរុញឲ្យអតីតមេដឹកនាំរដ្ឋប្រហាររបស់ប្រទេសហៃទី លោក Guy Phillippe ឡើងកាន់តំណែងជាប្រធានាធិបតី។លោក Philippe ដែលបានជួយការដឹកនាំរដ្ឋប្រហារមួយ នៅប្រទេសហៃទី ក្នុងឆ្នាំ ២០០៤ ហើយបានវិលត្រឡប់មកកោះតំបន់សមុទ្រការ៉ាអ៊ីបមួយនេះវិញ កាលពីឆ្នាំមុនបន្ទាប់ពីបានជាប់ពន្ធនាគារនៅសហរដ្ឋអាមេរិក ធ្លាប់បាននិយាយថាលោកមានបំណងក្លាយជាប្រធានាធិបតី។ នាយករដ្ឋមន្ត្រីហៃទី លោក Ariel Henry បានប្រកាសលាលែងពីតំណែងរបស់លោកនៅក្នុងលិខិតមួយ ដែលបានចុះកាលបរិច្ឆេទ ថ្ងៃពុធ ទី២៤ ខែមេសា និងចែករំលែកនៅលើប្រព័ន្ធផ្សព្វផ្សាយសង្គមកាលពីថ្ងៃព្រហស្បតិ៍។យោងតាមសារព័ត៍មានផ្លូវការរបស់ប្រទេសបានឲ្យដឹងថា រដ្ឋមន្ត្រីហិរញ្ញវត្ថុរបស់លោក Henry លោក មីឈែល ប៉ាទ្រីក ប៉យស្វឺត(Michel Patrick Boisvert) គឺជានាយករដ្ឋមន្ត្រីបណ្តោះអាសន្ន។អំពើហិង្សាដោយក្រុមជនអន្ធពាល ជាបញ្ហានៅក្នុងប្រទេសហៃទីជាច្រើនឆ្នាំមកហើយ បានកើនឡើងនៅដើមឆ្នាំនេះ។ ស្ថានភាពសន្តិសុខ បានជម្លៀសប្រជាជនរាប់ពាន់នាក់ និងបានបង្កមហន្តរាយភាពអត់ឃ្លាន។

ប្រមុខ UN អំពាវនាវឱ្យដាក់ពង្រាយបេសកកម្មសន្តិសុខទៅកាន់ហៃទី ឱ្យបានឆាប់រហ័ស

អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរ៉េស (Antonio Guterres) អំពាវនាវឱ្យអាជ្ញាធរថ្មីដែលទើបចូលកាន់តំណែងនៅក្នុងប្រទេសហៃទី «ពន្លឿនការអនុវត្តពេញលេញនៃការរៀបចំអភិបាលកិច្ចអន្តរកាល" និងពន្លឿនការដាក់ពង្រាយយ៉ាងឆាប់រហ័សនៃបេសកកម្មសន្តិសុខពហុជាតិដើម្បីជួយដោះស្រាយស្ថានការណ៍ «ដ៏ធ្ងន់ធ្ងរ» នៅក្នុងប្រទេស នេះបើតាមអ្នកនាំពាក្យរបស់អគ្គលេខាធិការ UN រូបនេះបាននិយាយកាលពីថ្ងៃព្រហស្បតិ៍ (២៥ មេសា)។អ្នកនាំពាក្យអង្គការសហប្រជាជាតិ លោក ស្តេហ្វាន ឌូចារីក (Stephane Dujarric) បាននិយាយថា «អគ្គលេខាធិការអំពាវនាវដល់រដ្ឋជាសមាជិកទាំងអស់ឱ្យធានាថា បេសកកម្មគាំទ្រសន្តិសុខពហុជាតិទទួលបានការគាំទ្រផ្នែកហិរញ្ញវត្ថុ និងភស្តុភារ ដែលខ្លួនត្រូវការដើម្បីទទួលបានជោគជ័យ និងដើម្បីបញ្ជប់អំពើហិង្សាដ៏ឃោរឃៅនៅហៃទី»។ប្រទេសកេនយ៉ា ធ្លាប់បានប្រកាសកាលពីឆ្នាំមុនថា ខ្លួននឹងដឹកនាំកម្លាំងដែលត្រូវបានបង្កើតឡើងដើម្បីជួយនគរបាលជាតិហៃទី ប្រយុទ្ធប្រឆាំងនឹងក្រុមជនអន្ធពាលដ៏មានអំណាចនៅក្នុងប្រទេសនេះ ជាទីដែលកំណើនអំពើហិង្សាយ៉ាងធ្ងន់ធ្ងរ បានជំរុញឱ្យមានគ្រោះមហន្តរាយមនុស្សធម៌ ប៉ុន្តែគំនិតផ្តួចផ្តើមនេះត្រូវបានចងភ្ជាប់នៅក្នុងបញ្ហាប្រឈមរបស់តុលាការកេនយ៉ាចាប់តាំងពីពេលនោះមក ដោយធ្វើឱ្យបេសកកម្មនេះត្រូវបានផ្អាក៕

អ៊ីស្រាអែល បង្កើនការវាយប្រហារតាមអាកាសលើតំបន់រ៉ាហ្វារបស់ហ្កាហ្សា មុនប្រតិបត្តិការថ្មើជើង

អ៊ីស្រាអែលបានបង្កើនការវាយប្រហារតាមអាកាសលើទីក្រុង រ៉ាហ្វា (Rafah) កាលពីយប់រំលេងអាធ្រាត្រឈានចូលថ្ងៃសុក្រសប្ដាហ៍នេះ បន្ទាប់ពីបាននិយាយថា ខ្លួននឹងជម្លៀសជនស៊ីវិលចេញពីទីក្រុង ហ្កាហ្សា ភាគខាងត្បូង ហើយចាប់ផ្តើមការវាយប្រហារទាំងស្រុង ទោះបីជាមានការព្រមានពីសម្ព័ន្ធមិត្តថា ការវាយលុកនេះ អាចបណ្តាលឱ្យមានអ្នកស្លាប់ និងរបួសច្រើនក៏ដោយ។ក្រុមគ្រូពេទ្យនៅក្នុងដែនដីប៉ាឡេស្ទីន ដែលត្រូវបានឡោមព័ទ្ធដោយកងទ័ពអ៊ីស្រាអែល បានរាយការណ៍ពីការវាយប្រហារតាមអាកាសរបស់អ៊ីស្រាអែលចំនួន ៥ លើក លើតំបន់រ៉ាហ្វាកាលពីព្រឹកថ្ងៃព្រហស្បតិ៍ ទី២៥ មេសា សប្ដាហ៍នេះ ដែលបានប៉ះចំផ្ទះចំនួន ៣ ខ្នង បានសម្លាប់មនុស្សយ៉ាងហោចណាស់៦ នាក់រួមទាំងអ្នកសារព័ត៌មានក្នុងស្រុកម្នាក់ផងដែរ។ លោក អ៊ីប្រាហ៊ីម ក្រៃស៊ី (Ibrahim Khraishi) ឯកអគ្គរដ្ឋទូតប៉ាឡេស្ទីនប្រចាំអង្គការសហប្រជាជាតិបានប្រាប់សារព័ត៌មាន Reuters កាលពីថ្ងៃព្រហស្បតិ៍ថា យើងបារម្ភខ្លាំងពីអ្វីដែលនឹងកើតឡើងនៅ តំបន់រ៉ាហ្វា ។ កម្រិតនៃការប្រកាសអាសន្នមានខ្ពស់ណាស់។ អ្នកខ្លះកំពុងចាកចេញ ពួកគេខ្លាចបែកបាក់គ្រួសារ ប៉ុន្តែពួកគេអាចទៅណាបាន? ពួកគេមិនត្រូវបានអនុញ្ញាតឱ្យទៅភាគខាងជើងទេ ដូច្នេះហើយត្រូវបានបង្ខាំងឲ្យនៅក្នុងតំបន់តូចមួយចង្អៀតមួយនេះ។ ដែនដីហ្កាហ្សាស្ទ្រីប មានប្រវែងប្រហែល ៤០ គីឡូម៉ែត្រ -ទទឹងចន្លោះពី ៥គីឡូម៉ែត្រទៅ ១២ គីឡូម៉ែត្រ ហើយជាតំបន់មួយ ក្នុងចំណោមតំបន់ជាច្រើន ដែលមានប្រជាជនច្រើនជាងគេបំផុតនៅលើពិភពលោក។នៅក្នុងខែទី៧រនៃសង្រ្គាមតាមអាកាស និងថ្មើជើងដ៏បំផ្លិចបំផ្លាញ កងកម្លាំងអ៊ីស្រាអែលក៏បានបន្តការទម្លាក់គ្រាប់បែកលើតំបន់ភាគខាងជើង និងកណ្តាលដែលត្រូវបានឡោមព័ទ្ធមួយនេះ ក៏ដូចជាភាគខាងកើតនៃទីក្រុងខាន់យ៉ូនីស(Khan Younis) នៅភាគខាងត្បូងហ្កាហ្សាផងដែរ។ គោលដៅធំរបស់អ៊ីស្រាអែលគឺកម្ទេចក្រុមហាម៉ាស ទោះបីជាមិនច្បាស់ថាតើពួកគេនឹងបំផ្លាញក្រុមសកម្មប្រយុទ្ធនេះដោយរបៀបណាក៏ដោយ៕

សាកលវិទ្យាល័យ Columbia បំផុសចលនាបាតុកម្មទូទាំងអាមេរិក បង្ខំឲ្យអាជ្ញាធរឆ្លើយតបភ្លាមៗ

ការជាប់គាំង និងការប៉ះទង្គិចគ្នា នៅសាកលវិទ្យាល័យ កូឡុំបៀ(Columbia)ជុំវិញការរុះរើជំរំនិស្សិត ដែលកំពុងតវ៉ាប្រឆាំងសង្រ្គាមរបស់អ៊ីស្រាអែលនៅក្នុងដែនដីហ្កាហ្សា បានបង្កឲ្យមានបាតុកម្មស្រដៀងគ្នានេះជាច្រើន នៅតាមបរិវេណសាកលវិទ្យាល័យនានាទូទាំងសហរដ្ឋអាមេរិក ប៉ុន្តែក្រុមអាជ្ញាធរបានបង្ក្រាបជាបន្តបន្ទាប់ មុនពេលស្ថានភាពរីកកាន់តែធំពិបាកទប់ស្កាត់។វីដេអូនៅលើប្រព័ន្ធផ្សព្វផ្សាយសង្គមបានបង្ហាញពីការប៉ះទង្គិចគ្នាក្នុងបរិវេណសាកលវិទ្យាល័យចុងក្រោយនេះ ដែលបង្ខំឲ្យកងកម្លាំងនគរបាលបានឆ្លើយតបភ្លាមៗកាលពីព្រឹកថ្ងៃព្រហស្បតិ៍ ទី២៥ មេសាសប្ដាហ៍នេះ ខណៈក្រុមបាតុករជានិស្សិតនៅសាកលវិទ្យាល័យ ព្រីនស្តុន(Princeton)នៃរដ្ឋនូជើស៊ី(New Jersey) បានចាប់ផ្តើមបោះជំរំ។ គេបានលឺមន្រ្តីម្នាក់និយាយនៅក្នុងវីដេអូដែលបានបង្ហោះនៅលើ X ថា អ្នកទាំងអស់គ្នាកំពុងរំលោភលើគោលការណ៍សាកលវិទ្យាល័យ។ តង់ទាំងនេះត្រូវតែធ្លាក់ដល់ដីឥឡូវនេះ ស្របពេលក្រុមអ្នកតវ៉ាស្រែកថា ដោះលែងប៉ាឡេស្ទីនឲ្យមានសេរីភាព។ ប្រព័ន្ធផ្សព្វផ្សាយ និងនគរបាលបាននិយាយថា ការឆ្លើយតបភ្លាមៗរបស់កងកម្លាំងនគរបាលនៅក្នុងជំរំរបស់សាកលវិទ្យាល័យព្រីនស្តុនបានកើតឡើង ប៉ុន្មានម៉ោងបន្ទាប់ពីនគរបាលក្រុងបូស្តុនបានរុះរើជំរំគាំទ្រពលរដ្ឋប៉ាឡេស្ទីន ដែលបង្កើតឡើងដោយនិស្សិតនៅក្នុងសាកលវិទ្យាល័យ អ៊ីម៉ើសុន (Emerson) កាលពីព្រឹកថ្ងៃព្រហស្បតិ៍ដោយចាប់ខ្លួនមនុស្សជាង ១០០ នាក់។ កងកម្លាំងនគរបាលបាននិយាយថា ជំរំតង់ជាច្រើននៅលើចិញ្ចើមផ្លូវក្បែរសាកលវិទ្យាល័យមួយនេះ នៅកណ្តាលទីក្រុងបូស្តុនត្រូវបានបោសសម្អាតចេញភ្លាមៗបន្ទាប់ពីម៉ោង ១ ព្រឹក។ ក្រុមអ្នករៀបចំការតវ៉ាទាំងនោះបាននិយាយថានៅសាកលវិទ្យាល័យណស វ៉េស្ទើន (Northwestern) និស្សិតបានចាប់ផ្តើមដំឡើងតង់នៅបរិវេណខាងជើងនៃទីក្រុងជីកាហ្គោ(Chicago)ស្របពេលពួកគេបានអំពាវនាវឱ្យសាកលវិទ្យាល័យការពារវាគ្មិនគាំទ្រប៉ាឡេស្ទីន និងបញ្ចប់ទំនាក់ទំនងជាមួយស្ថាប័ននានារបស់អ៊ីស្រាអែល៕

អូស្ត្រាលីចោទប្រកាន់ក្មេងជំទង់ ៥ នាក់ជុំវិញហេតុការណ៍ប្រើកាំបិតចាក់បព្វជិតនៅក្រុងស៊ីដនី

នគរបាលអូស្ត្រាលី បាននិយាយនៅថ្ងៃព្រហស្បតិ៍ (២៥ មេសា) នេះថា ពួកគេបានចោទប្រកាន់ក្មេងជំទង់៥ នាក់ពីបទល្មើសពាក់ព័ន្ធនឹងអំពើភេរវកម្ម នៅក្នុងការស៊ើបអង្កេតបន្ទាប់ពីការចាក់សម្លាប់គណៈសង្ឃជាន់ខ្ពស់ (បុព្វជិត) នៅវិហារសាសនាគ្រិស្ត អាស៊ីរៀន (Assyrian) ខណៈពេលដែលលោកកំពុងផ្តល់ការផ្សាយផ្ទាល់ធម្មទានកាលពីដើមខែនេះ។ក្មេងប្រុសទាំងប្រាំនាក់ ដែលនឹងត្រូវចូលតុលាការកុមារនៅថ្ងៃព្រហស្បតិ៍នោះ ត្រូវបានចាប់ខ្លួនកាលពីថ្ងៃពុធ នៅក្នុងតំបន់ទីក្រុង ស៊ីដនី (Sydney)។ នគរបាលនិយាយថា ពួកគេគឺជាជនសមគំនិតជាមួយក្មេងប្រុសវ័យ ១៦ ឆ្នាំម្នាក់ដែលត្រូវបានចោទប្រកាន់រួចហើយ ក្នុងការប្រើកាំបិតព្យាយាមចាក់សម្លាប់លើបុព្វជិត ម៉ា ម៉ារី អ៊ីម៉ានុយអ៊ែល (Mar Mari Emmanuel) ដែលបានរងរបួសក្នុងហេតុការណ៍ថ្ងៃទី១៥ ខែមេសា នៅឯព្រះវិហារនោះ។នគរបាលរដ្ឋ ញ៉ូវ សៅ វែលស៍ (New South Wales) និយាយថា ការចោទប្រកាន់ចុងក្រោយ រួមមានការកាន់កាប់សម្ភារៈជ្រុលនិយម ឃុបឃិតរៀបចំធ្វើអំពើភេរវកម្ម និងការកាន់កាំបិតនៅទីសាធារណៈ។បុព្វជិត អ៊ីម៉ានុយអ៊ែល ដែលជាគណៈសង្ឃជាន់ខ្ពស់នៅព្រះវិហារសាសនាគ្រិស្ដ អាស៊ីរៀន នៅជាយក្រុង ស៊ីដនី ក្នុងតំបន់ វ៉េកហ្វីល (Wakefield) គឺជាអ្នកមានប្រជាប្រិយភាពក្នុងប្រព័ន្ធផ្សព្វផ្សាយសង្គមមានអ្នកតាមដានជុំវិញពិភពលោក និងជាអ្នករិះគន់យ៉ាងចាស់ដៃចំពោះការស្រលាញ់ភេទដូចគ្នា ការចាក់វ៉ាក់សាំងកូវីដ១៩ សាសនាអ៊ីស្លាម និងការជាប់ឆ្នោតរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden)៕

ផ្នូរធំរួមដ៏រន្ធត់នៅមន្ទីរពេទ្យតំបន់ហ្កាហ្សា ជំរុញឱ្យមានការសើបអង្កេតជាអន្តរជាតិ

ចំនួនដ៏ច្រើននៃស្ថាប័នអន្តរជាតិដែលកំពុងកើនឡើង បានទាមទារឱ្យមានការស៊ើបអង្កេតឯករាជ្យ ទៅលើផ្នូរធំរួម ដែលត្រូវបានរកឃើញកាលពីពេលថ្មីៗនេះ នៅមន្ទីរពេទ្យក្នុងតំបន់ហ្កាហ្សា ដែលត្រូវបានវាយឆ្មក់ដោយកងទ័ពអ៊ីស្រាអែល កំពុងបង្ហាញពីការស្លាប់ពលរដ្ឋប៉ាឡេស្ទីនរាប់រយនាក់បន្ថែមទៀត ខណៈការវាយលុករបស់យោធាអ៊ីស្រាអែលនៅក្នុងតំបន់ហ៊ុមព័ទ្ធ មានរយៈពេលលើសពី ២០០ថ្ងៃ។គិតត្រឹមថ្ងៃពុធម្សិលមិញនេះ មន្ត្រីសុខាភិបាលតំបន់ហ្កាហ្សា បាននិយាយថា ក្រុមគ្រូពេទ្យប៉ាឡេស្ទីនបានរកឃើញសាកសពជាង៣០០ នៅបរិវេណមជ្ឈមណ្ឌលវេជ្ជសាស្ត្រ Nasser នៅទីក្រុង Khan Younis ដែលកងទ័ពអ៊ីស្រាអែលកាន់កាប់រហូតដល់ថ្ងៃទី៧ ខែមេសា។ ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃអង្គារថា ក្រុមគ្រូពេទ្យបានរកឃើញសាកសពកាន់តែច្រើនបន្ថែមទៀតនៅក្នុងផ្នូរធំរួម នៅមន្ទីរពេទ្យ al-Shifa ទីក្រុងហ្កាហ្សា ដែលធ្លាប់ជាបរិវេណមន្ទីពេទ្យធំបំផុតនៅដែនដីនេះ។កងកម្លាំងអ៊ីស្រាអែល បានធ្វើការហ៊ុមព័ទ្ធរយៈពេលពីរសប្តាហ៍ នៅមន្ទីពេទ្យ al-Shifa មុនពេលដកកងទ័ពចេញកាលពីថ្ងៃទី ១ ខែមេសា។ មន្ត្រីជាន់ខ្ពស់ អង្គការលើកលែងទោសអន្តរជាតិ លោកស្រី អ៊ីរីកា ហ្គូវ៉ារ៉ា រ៉ូសាស(Erika Guevara Rosas) បាននិយាយនៅក្នុងសេចក្តីថ្លែងការណ៍កាលពីថ្ងៃពុធថា ការរកឃើញដ៏រន្ធត់នៃផ្នូរធំរួមទាំងនេះ បញ្ជាក់ពីភាពបន្ទាន់នៃការធានាឱ្យមានដំណើរការចូលភ្លាមៗសម្រាប់អ្នកស៊ើបអង្កេតសិទ្ធិមនុស្ស រួមទាំងអ្នកជំនាញផ្នែកកោសល្យវិច្ច័យទៅកាន់តំបន់កាន់កាប់ហ្កាហ្សា ដើម្បីធានាថាភស្តុតាងត្រូវបានរក្សាទុក និងដើម្បីអនុវត្តការស៊ើបអង្កេតឯករាជ្យ និងតម្លាភាព ក្នុងគោលបំណងធានាបានការទទួលខុសត្រូវសម្រាប់ការបំពានណាមួយលើច្បាប់អន្តរជាតិ ។យោធាអ៊ីស្រាអែល បានអះអាងថា អ្នកទាំងឡាយណាដែលពួកគេបានចាប់ខ្លួននិងសម្លាប់ គឺជាអ្នកប្រយុទ្ធរបស់ក្រុមសកម្មប្រយុទ្ធ។ ប៉ុន្តែ អ្នកសារព័ត៌មាន វេជ្ជបណ្ឌិត និងសាក្សីផ្សេងទៀតនិយាយថា ជនរងគ្រោះភាគច្រើន ជាជនស៊ីវិល ឬបុគ្គលិកថែទាំសុខភាព។

បណ្ដាញសង្គម

ព័ត៌មានថ្មីៗ

ប្រធានក្រុមការងារទទួលបន្ទុកជួសជុល និងសាងសង់ឡើងវិញអគារសិក្សាអំណោយសម្ដេចតេជោ បន្តដឹកនាំក្រុមការងារចុះពិនិត្យ និងវាយតម្លៃស្ថានភាពអគារសិក្សាចំនួន ៦ ទីតាំង ក្នុងក្រុងកែប និងស្រុកដំណាក់ចង្អើរ ខេត្តកែប

វត្ថុសិល្បៈចំនួន ១៨ អាយុប្រមាណ ១ពាន់ឆ្នាំ នឹងត្រូវប្រគល់ត្រឡប់មកកម្ពុជាវិញ ពី ចក្រភពអង់គ្លេស

ក្រសួងអប់រំ បើកវេទិកាជាតិលើកទី៣ ស្តីពីការសិក្សាពេញមួយជីវិត ឆ្នាំ២០២៦

ភ្លៀងធ្លាក់ខ្លាំងបង្កជាទឺកជំនន់ដ៏គំហក់នៅតំបន់ភាគខាងជើង និងខាងកើតស៊ីរី សម្លាប់មនុស្ស ៥នាក់ និងមនុស្ស ៥នាក់ផ្សេងទៀតបាត់ខ្លួន

ប្រធានាធិបតី៖ ចិន និងអាល្លឺម៉ង់ គួររួមគ្នាលើកបន្តកម្ពស់សណ្តាប់ធ្នាប់អន្តរជាតិ

អ៊ីស្រាអែលវាយប្រហារតំបន់ហ្កាហ្សា ខណៈក្រសួងសុខាភិបាលតំបន់មួយនេះ ជំរុញឲ្យបើកច្រកព្រំដែន Rafahឡើងវិញ

រុស្ស៊ីវាយប្រហារហេដ្ឋារចនាសម្ព័ន្ធថាមពល នៅទីក្រុងគីវ ខណៈជំនួយឆ្ពោះទៅទីក្រុង Oleshky របស់អ៊ុយក្រែន

ក្រុមរដ្ឋអាជ្ញាកូរ៉េខាងត្បូង ជំរុញឲ្យមានទោសប្រហារជីវិតសម្រាប់លោកអតីតប្រធានាធិបតី Yoon

ប្រភពនយោបាយជាន់ខ្ពស់រិះគន់ខ្លាំងលើលោក Qassem ចំពោះសេចក្តីថ្លែងការណ៍ថ្មីៗរបស់លោក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877