BTV NEWS

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សមត្ថកិច្ចបង្ក្រាបទីតាំង Online Scams ចំនួន៩កន្លែងនៅក្រុងបាវិត ឃាត់ខ្លួនជនបរទេសជាង ៣០០នាក់

កម្លាំងជំនាញបន្តឆ្មក់ចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនបរទេស ២៧នាក់

គណៈបញ្ជាការឯកភាពរាជធានីចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនសង្ស័យ០៨នាក់

សន្តិសុខ និង សង្គម

សម្ព័ន្ធយោធាណាតូ ស្វាគមន៍សមាជិកភាពរបស់អ៊ុយក្រែន ប៉ុន្តែពុំបានផ្ដល់ពេលវេលាជាក់លាក់

ណាតូ៖ ក្រុមមេដឹកនាំសម្ព័ន្ធភាពយោធាណាតូ បាននិយាយកាលពីថ្ងៃអង្គារទី១១កក្កដា ថា អ៊ុយក្រែន គួរតែអាចចូលជាសាជិករបស់សម្ព័ន្ធភាពយោធានេះ នៅថ្ងៃណាមួយ នាពេលអនាគត ប៉ុន្តែមេដឹកនាំទាំងនោះ ពុំបានការផ្ដល់ការអញ្ជើញទីក្រុងគីវ ភ្លាមៗ ដែលធ្វើឲ្យប្រធានាធិបតី អ៊ុយក្រែន លោក Volodymyr Zelenskyy ផ្ទុះកំហឹង។ ក្រុមមេដឹកនាំទាំងនោះ កំពុងជួបប្រជុំនៅឯជំនួបកំពូលក្នុងរដ្ឋធានី វីលនីញូស របស់ប្រទេស លីទុយអានី ខណៈទាហានអ៊ុយក្រែន ព្យាយាមវាយដណ្ដើមដែនដីមកវិញ ក្នុងការវាយបកលើកងកម្លាំងរបស់រុស្ស៊ី ដែលកំពុងកាន់កាប់តំបន់មួយចំនួនរបស់ប្រទេសនេះ ។ ក្រុមមេដឹកនាំណាតូ បាននិយាយនៅក្នុងសេចក្ដីថ្លែងការណ៍មួយថា អនាគតរបស់អ៊ុយក្រែន ស្ថិតក្នុងសម្ព័ន្ធភាពណាតូ ប៉ុន្តែមេដឹកនាំទាំងនោះពុំបានបញ្ជាក់ពីពេលវេលាសម្រាប់ដំណើរការចូលជាសមាជិកនោះទេ។សេចក្ដីថ្លែងការណ៍នោះ បាននិយាយ ដោយពុំបានបញ្ជាក់ច្បាស់ពីលក្ខខណ្ឌរបស់អ៊ុយក្រែន ថា យើងនឹងរក្សាជំហរផ្តល់ការអញ្ជើញ ដល់អ៊ុយក្រែន ដើម្បីចូលរួមជាមួយសម្ព័ន្ធនេះ នៅពេលណាប្រទេសជាសមាជិកសម្ព័ន្ធទាំងអស់ឯកភាព និងលក្ខខណ្ឌនានាត្រូវបានបំពេញ៕

កូរ៉េខាងជើង បាញ់មីស៊ីលបាលីស្ទិករយៈចម្ងាយឆ្ងាយដែលគេមិនស្គាល់ប្រភេទ

កូរ៉េខាងជើង៖ យោងតាមមន្ត្រីរបស់ប្រទេសជិតខាងនឹងគ្នា គឺកូរ៉េខាងត្បូង និងជប៉ុន បានឲ្យដឹងថា ប្រទេសកូរ៉េខាងជើង បានបាញ់មីស៊ីលបាលីស្ទិករយៈចម្ងាយឆ្ងាយដែលគេមិនទាន់ដឹងច្បាស់ថា ជាប្រភេទអ្វី ចេញពីឆ្នេរសមុទ្រភាគខាងកើតរបស់ខ្លួន ដោយទីក្រុងតូក្យូបានធ្វើការតវ៉ាយ៉ាងដាច់អហង្ការ ចំពោះការបាញ់នោះ។ដោយមិនបានផ្ដល់ព័ទ៌មានលម្អិតបន្ថែមនាយសេនាធិការចម្រុះរបស់ទីក្រុងសេអ៊ូល បាននិយាយខ្លីៗ នៅព្រឹកថ្ងៃពុធ (ទី១២ ខែកក្កដា) នេះ ថា៖ «កូរ៉េខាងជើងបានបាញ់មីស៊ីលបាលីស្ទិកមិនស្គាល់អត្តសញ្ញាណមួយ»។ឆ្មាំល្បាតឆ្នេរ និងក្រសួងការពារជាតិរបស់ប្រទេសជប៉ុន ក៏បានឃើញអាវុធនេះផងដែរ ដោយឆ្មាំល្បាតឆ្នេរ បានប្រាប់ថា មីស៊ីលនោះ បានហោះក្នុងល្បឿនប្រហែល ៥៥០គីឡូម៉ែត្រ ហើយបានធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ប្រទេសជប៉ុន នៅវេលាម៉ោងប្រមាណជា ១១:១៣នាទីព្រឹក (ត្រូវនឹងម៉ោង២:១៣នាទី ម៉ោងសកល)។គួរបញ្ជាក់ដែរថា កូរ៉េខាងជើងបានបង្កើនការបង្ហាញនូវអនុភាពរបស់ខ្លួន ក្នុងសប្តាហ៍នេះ ដោយលោកស្រី Kim Yo Jong ដែលជាប្អូនស្រីដ៏មានឥទ្ធិពលរបស់មេដឹកនាំលោក Kim Jong Un បានថ្កោលទោសផែនការរបស់សហរដ្ឋអាមេរិក ក្នុងការដាក់ពង្រាយនាវាមុជទឹកបំពាក់មីស៊ីលនុយក្លេអ៊ែរទៅកាន់ដែនទឹកក្បែរឧបទ្វីបកូរ៉េ ហើយបានគំរាមបាញ់ទម្លាក់យន្តហោះស៊ើបការណ៍ បន្ទាប់ពីអះអាងថា យន្តហោះឈ្លបយកការណ៍របស់សហរដ្ឋអាមេរិក ថ្មីៗនេះ បានរំលោភលើលំហអាកាសរបស់ខ្លួន។ពាក់ព័ន្ធនឹងការបាញ់មីស៊ីលរបស់កូរ៉េខាងជើងនេះ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីជប៉ុន លោក Hirokazu Matsuno បានពណ៌នាការបាញ់នេះថា ជា «ការបង្កហេតុដ៏ធ្ងន់ធ្ងរ» ដោយរំលោភលើទណ្ឌកម្មរបស់អង្គការសហប្រជាជាតិ ហើយបាននិយាយថា «ការតវ៉ាយ៉ាងដាច់អហង្ការ ត្រូវបានធ្វើឡើងតាមរយៈបណ្តាញការទូត ក្នុងទីក្រុងប៉េកាំង។សូមបញ្ជាក់ថា ប្រទេសកូរ៉េខាងជើងត្រូវបានហាមឃាត់មិនឲ្យប្រើប្រាស់បច្ចេកវិទ្យាមីស៊ីលបាលីស្ទិក ក្នុងនោះរួមទាំងការបាញ់បង្ហោះផ្កាយរណបផងដែរ ក្រោមការដាក់ទណ្ឌកម្មរបស់អង្គការសហប្រជាជាតិ ដែលបានធ្វើឡើង ពាក់ព័ន្ធនឹងកម្មវិធីអាវុធនុយក្លេអ៊ែររបស់ប្រទេសនេះ៕

ការបាញ់ផ្លោងមិនកំណត់គោលដៅ បណ្តាលឲ្យមនុស្ស៣៤នាក់ស្លាប់ រួមទាំងកុមារ នៅស៊ូដង់

ស៊ូដង់៖ ក្រសួងសុខាភិបាលរដ្ឋ នៅទីក្រុង Khartoum បាននិយាយកាលពីថ្ងៃអង្គារថា ការបាញ់ផ្លោងមិនកំណត់គោលដៅ បណ្តាលឲ្យមនុស្ស៣៤នាក់ស្លាប់ រួមមានទាំងកុមារ នៅក្នុងផ្សារដ៏ពេញនិយមមួយ នៅក្នុងទីក្រុង Omdurman ប្រទេស៊ូដង់។ យោងតាមអាជ្ញាធរសុខាភិបាល បានឲ្យដឹងថា អ្នកស្លាប់និងរងរបួសភាគច្រើន គឺជាអ្នកលក់ដូរទំនិញនៅផ្សារ Melga និងអ្នកបើកបររថយន្តដឹកទំនិញ។ បន្ទាប់ពីជម្លោះប្រដាប់អាវុធផ្ទុះឡើង នៅក្នុងប្រទេសស៊ូដង់ នៅថ្ងៃទី១៥ ខែមេសា ឆ្នាំ២០២៣ ចំនួនជនស៊ីវិលដ៏ច្រើន បានបង្ខំឲ្យភៀសខ្លួនចេញ រួមមានទាំងអ្នកដែលបានភៀសខ្លួននៅតែក្នុងប្រទេសរួចហើយដោយសាជម្លោះកាលពីពេលមុ ក្នុងប្រទេសស៊ូដង់ និងជនភៀសខ្លួនមកពីប្រទេសផ្សេងៗទៀត ដែលបានគិតថាមានសុវត្ថិភាពនៅក្នុងប្រទេសស៊ូដង់។បន្ថែមលើការភៀសខ្លួនថ្មី នៅក្នុងប្រទេសនេះ មនុស្សជាង៦សែននាក់ រួមទាំងពលរដ្ឋស៊ូដង់ នីងជនភៀសខ្លួនមកពីប្រទេសដទៃដែលទទួលដោយប្រទេសស៊ូដង់បានភៀសខ្លួនចេញពីស៊ូដង់ ទៅកាន់ប្រទេសជិតខាង ឬត្រឡប់ទៅប្រទេសកំណើតវិញក្នុងកាលៈទេសៈដ៏លំបាកដែលតាមការកត់សំគាល់ ទៅកាន់ប្រទេសឆាត ស៊ូដង់ខាងត្បូង សាធារណៈរដ្ឋអាហ្វ្រិកកណ្តាល អេហ្ស៊ីប និងប្រទេសអេត្យូពី៕

ចិន ជំរុញឲ្យជប៉ុនជាថ្មីម្តងទៀតឲ្យបញ្ឈប់ដំណើរការគម្រោងបញ្ចេញទឹក ចូលទៅក្នុងមហាសមុទ្រ

ចិន៖ ប្រទេសចិន កាលពីថ្ងៃចន្ទ (ទី១០ ខែកក្កដា) ជាថ្មីម្តងទៀត បានជំរុញឲ្យប្រទេសជប៉ុនបញ្ឈប់ផែនការរបស់ខ្លួន ក្នុងការបញ្ចេញទឹកកខ្វក់នុយក្លេអ៊ែរ ចូលទៅក្នុងមហាសមុទ្រ នៅឯកិច្ចប្រជុំលើកទី៥៣ នៃក្រុមប្រឹក្សាសិទ្ធិមនុស្សអង្គការសហប្រជាជាតិ។ក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃចន្ទ បានអនុម័តលើលទ្ធផលនៃប្រព័ន្ធត្រួតពិនិត្យជាសកល (UPR) របស់ប្រទេសជប៉ុន។ ដោយថ្លែងនៅក្នុងកិច្ចពិភាក្សាអំពីលទ្ធផលនៃប្រព័ន្ធត្រួតពិនិត្យជាសកល (UPR) របស់ប្រទេសជប៉ុន អ្នកការទូតចិន បានបញ្ជាក់អះអាងជាថ្មីម្ដងទៀតនូវការអំពាវនាវរបស់ប្រទេសចិន ដើម្បីឲ្យប្រទេសជប៉ុនបញ្ឈប់ផែនការបញ្ចេញទឹកកខ្វក់នុយក្លេអ៊ែរចូលទៅក្នុងមហាសមុទ្រ។អ្នកការទូតចិនបានជំរុញឲ្យប្រទេសជប៉ុនបោះបង់ចោលនូវផែនការនេះ តាមលក្ខណៈវិទ្យាសាស្ត្រ សុវត្ថិភាព និងតម្លាភាព ហើយសហការជាមួយទីភ្នាក់ងារថាមពលអាតូមិកអន្តរជាតិ (IAEA) ដើម្បីដាក់ចេញយន្តការត្រួតពិនិត្យអន្តរជាតិរយៈពេលវែង ដែលពាក់ព័ន្ធនឹងប្រទេសជិតខាងរបស់ជប៉ុន និងអ្នកពាក់ព័ន្ធផ្សេងទៀតឲ្យបានឆាប់តាមដែលអាចធ្វើទៅបាន។អ្នកការទូតបានចង្អុលបង្ហាញថា ក្រៅពីមិនគិតគូដល់ការខាតបង់ផ្នែកសេដ្ឋកិច្ច ប្រទេសជប៉ុនធ្វើមិនដឹងមិនលឺនឹងកង្វល់ និងការប្រឆាំងរបស់សហគមន៍អន្តរជាតិ ហើយការបន្តបញ្ចេញទឹកកខ្វក់នុយក្លេអ៊ែរពីរោងចក្រហ្វូគូស៊ីម៉ារាប់លានតោនទៅក្នុងសមុទ្រ ក្នុងរយៈពេល ៣០ឆ្នាំខាងមុខ គឺស្មើនឹងចាត់ទុកមហាសមុទ្រប៉ាស៊ីហ្វិកដូចជា «លូបង្ហូរទឹកសំអុយ»៕

ការវិភាគ៖ ទួរគីផ្អៀងទៅលោកខាងលិចជាថ្មី ក្នុងគោលនយោបាយការបរទេស ខណៈសេដ្ឋកិច្ចមានសម្ពាធ

វិភាគ៖ បន្ទាប់ពីកំណត់គោលនយោបាយដាក់ឲ្យប្រទេសទួរគីនៅឆ្ងាយពីសម្ព័ន្ធមិត្តលោកខាងលិច ប្រធានាធិបតីលោក Tayyip Erdogan បានផ្លាស់ប្ដូរគោលនយោបាយ ជាមួយនឹងការសម្រេច ដែលធ្វើឲ្យសហរដ្ឋអាមេរិកពេញចិត្ត ហើយផ្ដល់ការខកចិត្តដល់រុស្ស៊ី ដែលបញ្ហានេះគឺជាការបត់បែនមួយ ដែលត្រូវបានគេមើលឃើញថា មានគោលបំណងមួយផ្នែក ដើម្បីបង្វែរសេដ្ឋកិច្ចរបស់ប្រទេសដែលកំពុងតែធ្លាក់ចុះ ឲ្យងើបឡើងវិញ និងជំរុញឲ្យមានការវិនិយោគពីបរទេស។ការគិតគូរពីគោលនយោបាយការបរទេសឡើងវិញនេះ គឺជាផ្នែកមួយនៃការកែសម្រួលយ៉ាងទូលំទូលាយរបស់លោក Erdogan រយៈពេល ៦សប្តាហ៍ បន្ទាប់ពីរូបលោកជាប់ឆ្នោតជាប្រធានាធិបតីម្ដងទៀតពោលគឺលោកក៏បានផ្លាស់ប្តូរទិសដៅលើសេដ្ឋកិច្ចផងដែរ ដោយក្រឡាស់គោលនយោបាយហិរញ្ញវត្ថុតឹងរ៉ឹងជ្រុល ដែលត្រូវបានរិះគន់ថា បានធ្វើឲ្យមានអតិផរណាមិននឹងន និងរូបិយប័ណ្ណធ្លាក់ចុះ ក្នុងប្រទេសទួរគី។ចំណងទាក់ទងរបស់លោក Erdogan ជាមួយប្រធានាធិបតីរុស្ស៊ី លោក Vladimir Putin ចាប់ផ្ដើមមានសម្ពាធ ដោយសារទំនាក់ទំនងរបស់ប្រទេសទួរគីជាមួយសម្ព័ន្ធមិត្តលោកខាងលិច ដែលមានរយៈពេលជាច្រើនឆ្នាំ រួមជាមួយនឹងកត្តាផ្សេងៗទៀត ដោយក្នុងនោះរួមទាំងក្ដីបារម្ភអំពីការគ្រប់គ្រងតាមបែបអត្តាធិបតេយ្យដែលកើនឡើងជាលំដាប់របស់លោកផងដែរ។ប៉ុន្តែការយល់ព្រមរបស់លោក Erdogan កាលពីថ្ងៃចន្ទ (ទី១០ ខែកក្កដា) ដើម្បីឲ្យប្រទេសស៊ុយអែតបានចូលរួមជាមួយអង្គការណាតូ ពោលគឺជាការសម្រេចដែលរូបលោកបានប្រឆាំងអស់រយៈជាច្រើនខែនោះ ត្រូវបានស្វាគមន៍ដោយមេដឹកនាំលោកខាងលិច ដែលបានប្រឹងប្រែងពង្រឹងសម្ព័ន្ធភាព បន្ទាប់ពីមានការលុកលុយរបស់ប្រទេសរុស្ស៊ីលើអ៊ុយក្រែន។បន្ទាប់ពីមាននូវការកែប្រែដ៏គួរឲ្យភ្ញាក់ផ្អើលពីសំណាក់ថ្នាក់ដឹកនាំកំពូលរបស់ប្រទេសទួរគី ក្រុមអ្នកវិភាគជឿថា ការសម្រេចរបស់លោក Erdogan ដោយក្នុងនោះរួមទាំងការប្រកាសគាំទ្រដល់ប្រទេសអ៊ុយក្រែន ក្នុងការចូលជាសមាជិករបស់អង្គការណាតូផងដែរ មិនមែនជារឿងចៃដន្យនោះឡើយ។លោក Galip Dalay នៅវិទ្យាស្ថានស្រាវជ្រាវ Chatham House បាននិយាយថា៖ «មានការយល់ឃើញមួយ ក្នុងប៉ុន្មានឆ្នាំថ្មីៗនេះថា ទំនាក់ទំនងរវាងទួរគី និងរុស្ស៊ី កាន់តែមានគម្លាតឆ្ងាយទៅៗហើយ។ នេះបង្ហាញពីការរៀបចំតុល្យភាពថ្មីយ៉ាងច្បាស់លាស់»៕

ទីក្រុងរបស់រដ្ឋវើម៉ិន សហរដ្ឋអាមេរិក ត្រូវបានទឹកជំនន់ជន់លិច ខណៈទំនប់ទឹកឈានជិតដល់កម្រិតហៀរចេញ

អាមេរិក៖ ខ្សែទឹកខាងលើទំបន់ពីទីក្រុងរបស់រដ្ឋវើម៉ិន (Vermont) កំពុងរ៉ាប់រងសមត្ថភាពទឹកដល់កម្រិតអតិប្បរមា កាលពីថ្ងៃអង្គារទី១១ខែកក្កដា បន្ទាប់ពីទឹកជំនន់ដ៏មហន្តរាយបានបិទផ្លូវនានាចេញពីទីក្រុងធំរបស់រដ្ឋវើម៉ិន គឺទីក្រុងម៉ុនប៉ែលយ័រ (Montpelier) និងបណ្ដាលឲ្យមនុស្សជាច្រើនជាប់ក្នុងលំនៅឋានរបស់ពួកគេ។ ក្រុមមន្ត្រីទីក្រុងនេះ បាននិយាយថាទំនប់ទឹក រៃសធ៍ស្វីលដាម (Wrightsville Dam) ដែលផ្ទុកទឹកបម្រុងចំនួន៦,៤គីឡូម៉ែត្រ ស្ថិតនៅភាគខាងជើងទីក្រុងម៉ុនប៉ែលយ័រ ជិតចំណុចដែលផ្លូវទឹកនឹងចាំបាច់ត្រូវបញ្ចេញទឹកចូលក្នុងទន្លេ ណស ប្រែនជ៍(North Branch)។ ខណៈដែលទីក្រុងរបស់រដ្ឋនេះ ស្ថិតក្នុងភាគឦសាននៅក្រោមទឹក សីតុណ្ហភាពនៅមហាសមុទ្រ បានកើនឡើងខ្ពស់ដល់៣២អង្សាសេ នៅក្នុងរដ្ឋហ្វ្លរីដា ជាមួយគ្នានោះ រដ្ឋតិចសាស់ កំពុងទទួលរកកម្ដៅខ្លាំង ហើយរដ្ឋកាលីហ្វ័រនីញ៉ា កំពុងត្រៀមទប់ទល់នឹងការហក់ឡើងនៃសីតុណ្ហភាពខ្ពស់រហូតដល់៤៩អង្សាសេ នៅក្នុងតំបន់វាលខ្សាច់នៅចុងសប្ដាហ៍នេះ។ ភាគច្រើននៃតំបន់ភាគឦសានសហរដ្ឋអាមេរិក រួមទាំងតំបន់មួយចំនួននៃរដ្ឋញ៉ូយ៉ក ម៉ាស្សាឈូសេត និង ខិននីធីខិត បានទទួលរងកម្ពស់ទឹកភ្លៀង២០សង់ទីម៉ែត្ររួចទៅហើយ កាលពីប៉ុន្មានថ្ងៃកន្លងទៅនេះ។ក្រុមមន្ត្រីរដ្ឋវើម៉ិន បានហៅទឹកជំនន់នេះថាជាគ្រោះមហន្តរាយដ៏ធ្ងន់ធ្ងរបំផុត ចាប់តាំងពីព្យុះសង្ឃរា អ៊ីរ៉េន(Irene) បានបោកបក់ដល់រដ្ឋញូវ អ៊ីងគ្លែន (New England) ជាព្យុះតំបន់ត្រូពិក កាលពីឆ្នាំ២០១១ និងបានបណ្ដាលឲ្យខូចខាតទ្រព្យសម្បត្តិប្រមាណ ៧៥០លានដុល្លារអាមេរិក និងសម្លាប់មនុស្ស៧នាក់ នៅក្នុងរដ្ឋមួយនេះ៕

មនុស្ស ៨៦នាក់ស្លាប់ និង១៥១របួសដោយសារភ្លៀងធ្លាក់ខ្លាំងនៅប៉ាគីស្ថានចាប់តាំងពីខែមិថុនាមក

ប៉ាគីស្ថាន៖ សារព័ត៌មាន ARY News ដែលមានមូលដ្ឋាននៅប៉ាគីស្ថានបានរាយការណ៍ដោយសំអាងដល់សម្តីអាជ្ញាធរគ្រប់គ្រងគ្រោះមហន្តរាយជាតិ (NDMA)ថា មនុស្ស៨៦នាក់បានស្លាប់ និង១៥១នាក់ផ្សេងទៀតបានរងរបួសនៅក្នុងភ្លៀងមូសុងនាពេលថ្មីៗនេះចាប់តាំងពីថ្ងៃទី២៥ ខែមិថុនាមក។នៅក្នុងរបាយការណ៍របស់អាជ្ញាធរ NDMA បានបញ្ជាក់ថា មនុស្ស ៦នាក់បានស្លាប់ និង ៩នាក់ផ្សេងទៀត បានរងរបួសនៅក្នុងភ្លៀងធ្លាក់ខ្លាំងនៅទូទាំងប្រទេសប៉ាគីស្ថានក្នុងរយៈពេល ២៤ម៉ោងកន្លងមកនេះ បើយោងតាម ARY News ។យោងតាមទិន្នន័យរបស់ទីភ្នាក់ងារ NDMA បានឲ្យដឹងថា មកទល់បច្ចុប្បន្ននេះ មានអ្នកស្លាប់ចំនួន ៨៦នាក់ និងរបួស ១៥១នាក់ ដែលក្នុងនោះមានស្ត្រី ១៦នាក់ និងកុមារ ៣៧នាក់។ ផ្ទះសម្បែងចំនួន ៩៧ខ្នង ក៏បានរងការខូចខាតដែរ ខណៈភ្លៀងធ្លាក់យ៉ាងគំហុកបន្តធ្វើឲ្យមានការខូចខាតនៅទូទាំងប្រទេស៕

សាជីវកម្ម BBC របស់ចក្រភពអង់គ្លេសបានផ្អាកការងារពិធីករម្នាក់ជុំវិញរឿងអាស្រូវរូបថតក្មេងជំទង់

អង់គ្លេស៖ សាជីវកម្ម BBC របស់ចក្រភពអង់គ្លេសបានផ្អាកការងារបុគ្គលិកប្រុសម្នាក់កាលពីថ្ងៃអាទិត្យ (៩ កក្កដា) បន្ទាប់ពីមានការចោទប្រកាន់ថាតារាពិធីកររបស់ខ្លួនម្នាក់នេះ បានបង់ប្រាក់ឱ្យក្មេងជំទង់ចំនួនរាប់ពាន់ផោនដើម្បីថតរូបអាសអាភាស ដោយចាប់ផ្តើមពីពេលពួកគេមានអាយុ ១៧ឆ្នាំ។ប្រព័ន្ធផ្សព្វផ្សាយនេះបាននិយាយថា ខ្លួនបានដឹងជាលើកដំបូងអំពីពាក្យបណ្តឹងកាលពីខែឧសភា ប៉ុន្តែការចោទប្រកាន់ថ្មីអំពីលក្ខណៈផ្សេងគ្នាត្រូវបានធ្វើឡើងកាលពីថ្ងៃព្រហស្បតិ៍ (៦ កក្កដា) ហើយខ្លួនបានជូនដំណឹងដល់ "ក្រុមអាជ្ញាធរខាងក្រៅ" ។នគរបាលទីក្រុងឡុងដ៍្របាននិយាយថា ខ្លួនបានទទួលទំនាក់ទំនងដំបូងពី BBC ប៉ុន្តែមិនមានការបញ្ជូន ឬការចោទប្រកាន់ជាផ្លូវការណាមួយត្រូវបានធ្វើឡើងនោះទេ។សារជីវកម្ម BBC បាននិយាយថា នេះជា "កាលៈទេសៈដ៏ស្មុគស្មាញ និងឆាប់រហ័សពេក" ហើយខ្លួន "កំពុងធ្វើការឱ្យបានលឿនតាមដែលអាចធ្វើទៅបាន ដើម្បីរកការពិត និងជូនដំណឹងឱ្យបានត្រឹមត្រូវនូវជំហានបន្ទាប់ដ៏សមស្រប"៕

រដ្ឋមន្ត្រីការបរទេសឥណ្ឌូនេស៊ីជំរុញឲ្យតំបន់អាស៊ានគ្មាននុយក្លេអ៊ែរ

ឥណ្ឌូណេស៊ី៖ រដ្ឋមន្ត្រីការបរទេសឥណ្ឌូណេស៊ី Retno Marsudi បានបើកកិច្ចប្រជុំរដ្ឋមន្ត្រីការបរទេសអាស៊ាន (សមាគមប្រជាជាតិអាស៊ីអាគ្នេយ៍) ប្រចាំឆ្នាំនៅថ្ងៃអង្គារ (១១ កក្កដា)នេះ ដោយជំរុញឱ្យតំបន់នេះគ្មានអាវុធនុយក្លេអ៊ែរ។សុន្ទរកថាបើកនៃកិច្ចប្រជុំនេះ ត្រូវបានបន្តដោយសម័យប្រជុំបិទទ្វាររវាងប្រទេសជាសមាជិក ដែលសន្ធិសញ្ញាតំបន់គ្មានអាវុធនុយក្លេអ៊ែរអាស៊ីអាគ្នេយ៍ ដែលមិនមានរដ្ឋណាមួយក្នុងចំណោមរដ្ឋអាវុធនុយក្លេអ៊ែរទាំងប្រាំបានបានព្រមព្រៀងគ្នានោះ ត្រូវបានលើកយកទៅពិភាក្សា។កិច្ចប្រជុំប្រចាំឆ្នាំនេះធ្វើឡើង ស្របពេលមានសម្ពាធដើម្បីដោះស្រាយវិបត្តិនយោបាយបង្ហូរឈាមនៅក្នុងសហភាពមីយ៉ាន់ម៉ា និងដោះស្រាយភាពតានតឹងនៅសមុទ្រចិនខាងត្បូង ដែលសមាជិកអាស៊ានមួយចំនួនមានការទាមទារទឹកដីត្រួតស៊ីគ្នាជាមួយប្រទេសចិន។អាស៊ានក៏នឹងរៀបចំកិច្ចប្រជុំកំពូលអាស៊ីបូព៌ា និងវេទិកាតំបន់អាស៊ាននៅចុងសប្តាហ៍នេះផងដែរ ដោយមានរដ្ឋមន្ត្រីការបរទេសអាមេរិក លោក Antony Blinken និងរដ្ឋមន្ត្រីការបរទេសរុស្ស៊ីលោក Sergei Lavrov សុទ្ធតែបានគ្រោងនឹងចូលរួមក្នុងព្រឹត្តិការណ៍ទាំងនោះ៕

ទីភ្នាក់ងារអាកាសធាតុUN ៖ សប្តាហ៍ទី១ ខែកក្កដានេះ មានអាកាសធាតុក្តៅបំផុតក្នុងកំណត់ត្រា

UN៖ យោងតាមអង្គការឧតុនិយមពិភពលោក (WMO) របស់អង្គការសហប្រជាជាតិកាលពីថ្ងៃច័ន្ទ បានឱ្យដឹងថា សប្តាហ៍ដំបូងនៃខែកក្កដានេះគឺជារយៈពេលដែលមានសីតុណ្ហភាពក្តៅបំផុតក្នុងកំណត់ត្រា ដោយបានព្រមានអំពីសីតុណ្ហភាពពិភពលោកនឹងកើនឡើងនៅពេលដែលឥទ្ធិពលនៃបាតុភូត អ៊ែល នីញ៉ូ (El Nino) កើតមានឡើងនៅចុងឆ្នាំនេះ។យោងតាមទិន្នន័យពីអង្គការ WMO បានឲ្យដឹងថា ភពផែនដីទើបតែជួបប្រទះខែមិថុនាដ៏ក្តៅបំផុតចាប់តាំងពីកំណត់ត្រាបានចាប់ផ្តើម។ សីតុណ្ហភាពជាមធ្យមនៃខែមិថុនាឆ្នាំនេះគឺ ០,៦អង្សាសេខ្ពស់ជាងខែមិថុនា ពីឆ្នាំ១៩៩១ ដល់ឆ្នាំ២០២០។ នៅពេលដែលខែកក្កដាបានចាប់ផ្តើម សីតុណ្ហភាពពិភពលោកនៅតែបន្តកើនឡើង។ដោយសំអាងដល់ទិន្នន័យបឋមរបស់ទីភ្នាក់ងារឧតុនិយមជប៉ុន អង្គការ WMO បាននិយាយថា ថ្ងៃទី ៧ ខែកក្កដា គឺជាថ្ងៃដ៏ក្តៅបំផុត។ សីតុណ្ហភាពជាមធ្យមរបស់ពិភពលោកស្ថិតនៅកម្រិត ១៧,២៤ អង្សាសេ ពោលគឺ ០,៣អង្សារសេខ្ពស់ជាងមុនធៀបនឹងកំណត់ត្រាមុនដែលមានត្រឹម ១៦,៩៤អង្សារសេ ដែលបានកត់ត្រានៅថ្ងៃទី១៦ ខែសីហា ឆ្នាំ២០១៦។សីតុណ្ហភាពក្នុងមហាសមុទ្រនានាក្នុងខែឧសភា និងមិថុនា ក៏បានបំបែកកំណត់ត្រាផងដែរ។ ក្រុមអ្នកឧតុនិយមបានរកឃើញរលកកំដៅសមុទ្រ (MHW) នៅជិតប្រទេសអៀរឡង់ ចក្រភពអង់គ្លេស និងសមុទ្របាល់ទិក។ ទន្ទឹមនឹងនេះដែរ តំបន់ទឹកកកនៃសមុទ្រអង់តាក់ទិកបានរលាយធ្លាក់ចុះដល់កម្រិតទាបបំផុតក្នុងខែមិថុនា គឺតិចជាងជាមធ្យមចំនួន ១៧ភាគរយ។អង្គការ WMO បាននិយាយថា សីតុណ្ហភាពខ្ពស់ដែលបំបែកកំណត់ត្រានេះ អាចបង្កការខូចខាតដល់ប្រព័ន្ធអេកូឡូស៊ី និងបរិស្ថាន។ នេះឆ្លុះបញ្ចាំងពីផលប៉ះពាល់យូរអង្វែងនៃសកម្មភាពរបស់មនុស្សទៅលើអាកាសធាតុនៃភពផែនដីរបស់យើង៕

បណ្ដាញសង្គម

ព័ត៌មានថ្មីៗ

គ្រូព្រះខ័នរាជចាំមើលទ្ធផលជើងទី២ ក្រោយគ្រូ Manila ថាលេងមិនទាន់អស់ ១០០% បន្ទាប់ពីស្មើគ្នា ១-១

កិច្ចព្រមព្រៀងបទឈប់បាញ់រវាងអាមេរិក និងអ៊ីរ៉ង់ បង្ហាញពីភាពតានតឹងមុនការចរចា ខណៈលំហូរប្រេងត្រូវបានរឹតត្បិត

លោកTrump និងនាយករដ្ឋមន្ត្រីអង់គ្លេស ពិភាក្សាអំពីតម្រូវការសម្រាប់ «ផែនការជាក់ស្តែង» ស្តីពីច្រកសមុទ្រ Hormuz

រាជធានី-ខេត្តមួយចំនួននៅកម្ពុជា អាចនឹងមានភ្លៀងធ្លាក់ ជាមួយផ្គររន្ទះ និងខ្យល់កន្ត្រាក់ចាប់ពីថ្ងៃទី១៤ ដល់ថ្ងៃទី២៥ ខែមេសា ដោយសារឥទ្ធិពលព្យុះ «ស៊ីនឡាគូ»

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

អង់គ្លេសចេញការព្រមានដ៏ខ្លាំងក្លាដល់លោក Putin ជុំវិញការរកឃើញនាវាមុជទឹកចារកម្មរុស្ស៊ីនៅអាត្លង់ទិកខាងជើង

ក្រុមប្រឹក្សាធម្មនុញ្ញបើកកិច្ចប្រជុំពេញអង្គពិនិត្យធម្មនុញ្ញភាពច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា

អ្នកស្លាប់ក្នុងការវាយប្រហារពីអ៊ីស្រាអែលលើលីបង់កើនឡើងដល់ជាង៣០០នាក់ខណៈប្រកាសកាន់ទុក្ខទូទាំងប្រទេស

សម្ដេចធិបតី ហ៊ុន ម៉ាណែត អនុញ្ញាតឲ្យប្រធានក្រុមហ៊ុនខ្នាតយក្សមួយរបស់ចិនក្នុងវិស័យវិស្វកម្ម និងហេដ្ឋារចនាសម្ព័ន្ធ ចូលជួបសម្តែងការគួរសម និងពិភាក្សាការងារ

លោក Trump៖ អ៊ីរ៉ង់កំពុងធ្វើការងារមិនល្អដើម្បីអនុញ្ញាតឱ្យប្រេងឆ្លងកាត់ច្រកសមុទ្រ Hormuz

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877