នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ

នយោបាយ​ និង ការអភិវឌ្ឍន៍

ពលរដ្ឋក្រីក្រជាង៣០០គ្រួសារ និងសិស្ស៧៥០នាក់ នៅស្រុកគាស់ក្រឡ​ទទួលបានការ​ឧបត្ថម្ភ​ពី​សប្បុរសជនកូរ៉េ

2021/10/31 11:08:33 am        463
Facebook Telegram Linkin
បាត់ដំបង ៖ សប្បុរសជនកូរ៉េ បានផ្ដល់អំណោយមនុស្សធម៌ជូនដល់ប្រជាពលរដ្ឋក្រីក្រ ដែលកំពុងជួបការលំបាកចំនួន៣៥០គ្រួសារ និងផ្ដល់សម្ភារៈសិក្សាដល់សិស្សានុសិស្សថ្នាក់បឋមសិក្សាចំនួន៧៥០នាក់ នៅក្នុងព្រះផុស ស្រុកគាស់ក្រឡ ខេត្តបាត់ដំបង។ពិធីផ្ដល់អំណោយមនុស្សធម៌ដល់ប្រជាពលរដ្ឋក្រីក្រី និងសិស្សានុសិស្ស បានធ្វើឡើងក្រោម​អធិបតីភាព ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ និងជាប្រធានក្រុមការងារគណបក្ស​ប្រជាជនកម្ពុជាចុះជួយស្រុកគាស់ក្រឡ ក្រោមកិច្ចសម្របសម្រួលពីឯកឧត្តម ស្រេង វង្សហៀង អនុរដ្ឋលេខាធិការក្រសួងមហាផ្ទៃ និងជាប្រធានក្រុមការងារគណបក្សប្រជាជនកម្ពុជា​ចុះជួយ​ឃុំព្រះផុស លោកជំទាវ សុត សុវណ្ណដា អនុប្រធានក្រុមការងារចុះជួយឃុំព្រះផុស ព្រមទាំង​អាជ្ញាធស្រុកគាស់ក្រឡ។លោក គីម ជីនវូក តំណាងសប្បុរសជនកូរ៉េ បានថ្លែងថា ក្នុងនាមជាប្រទេសបងប្អូន កម្ពុជានិង​កូរ៉េ​កំពុង​កសាងទំនាក់ទំនងមិត្តភាពយ៉ាងរឹងមាំ ហើយទោះបីជាប្រទេសទាំងពីរជួបការលំបាក​ខ្លាំង​ដោយសារការអូសបន្លាយនៃជំងឺកូវីដ១៩ តែយើងមិនភ្លេចជួយដល់បងប្អូនប្រជាជនដែល​មាន​ជីវភាពលំបាក​នៅក្នុងប្រទេសកម្ពុជាឡើយ។តំណាងសប្បុរសជនកូរ៉េ ថ្លែងបន្ថែមថា ទោះបីជាសកម្មភាពសង្គមទូទៅមានការថយចុះ ហើយការ​ផ្លាស់ប្ដូរ​ពាណិជ្ជកម្មខ្លះត្រូវបានថមថយ ឬផ្អាកក៏ដោយ លោកសន្យាថានឹងបន្តសកម្មភាពចុះជួយ​នៅ​តាមតំបន់ផ្សេងៗទៀតជាបន្តបន្ទាប់ ដើម្បីចែករំលែកសុខទុក្ខរបស់បងប្អូនប្រជាជនកម្ពុជា​ដែល​កំពុងខ្វះខាត ហើយតួអង្គសំខាន់នៅក្នុងសកម្មភាពស្ម័គ្រចិត្តនេះ គឺក្រុមស្ម័គ្រចិត្តដើម្បីស្នាម​ញញឹម​។ក្រុមស្ម័គ្រចិត្តដើម្បីស្នាមញញឹមប្រមូលផ្ដុំដោយសមាជិកអ្នកបកប្រែភាសាខ្មែរ-កូរ៉េដែលពួកគាត់​បាន​ចូលរួមចំណែកយ៉ាងខ្លាំងដល់កិច្ចការផ្លាស់ប្ដូរទៅវិញទៅមករវាងប្រទេសកម្ពុជា-កូរ៉េ ដោយបានរួមគ្នា ដើម្បីចែករំលែកទុក្ខលំបាករបស់បងប្អូនប្រជាពលរដ្ឋក្រីក្រ។ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានមានប្រសាសន៍ទូន្មានដល់ក្មួយៗ​សិស្សានុសិស្ស​ត្រូវខិតខំរៀនសូត្រឲ្យក្លាយជាទំពាំងស្នងឫស្សីដ៏មានគុណភាពសម្រាប់ប្រទេសជាតិ ជាពិសេសត្រូវចៀសឆ្លាយពីគ្រឿងញៀន និងអំពើអប្បាយមុខផ្សេងៗដែលសង្គមស្អប់ខ្ពើម។ឯកឧត្តម ក៏បានថ្លែងអំពាវនាវដល់​បងប្អូនប្រជាពលរដ្ឋទៅចាក់វ៉ាក់សាំង​បង្ការជំងឺកូវីដ១៩​ឲ្យ​បានគ្រប់ៗគ្នា ដើម្បីបង្កើតភាពស៊ាំក្នុងសហគមន៍ដើម្បីបើកដំណើរការសាលារៀន សកម្មភាពសង្គម​ និងសេដ្ឋកិច្ចឡើងវិញ។បន្ថែមពីនេះ ឯកឧត្តម ប៊ុន ហុន បានណែនាំដល់បងប្អូនប្រជាពលរដ្ឋត្រូវរៀនរស់ជាមួយជំងឺកូវីដ១៩ តាមគន្លងប្រក្រតីភាពថ្មី និងត្រូវអនុវត្តន៍វិធានការសុខាភិបាល៣កុំ ៣ការពារឲ្យបានខ្ជាប់ខ្ជួន៕

អំណោយរបស់សម្តេចកិត្តិព្រឹទ្ធបណ្ធិត ត្រូវបានចែកជូនពលរដ្ឋ២០០គ្រួសារ ដែលមានជីវភាពខ្វះខាត ក្នុងឃុំរការខ្នុរ ស្រុកក្រូចឆ្មារ

2021/10/30 01:42:15 pm        383
Facebook Telegram Linkin
ត្បូងឃ្មុំ ៖ ឯកឧត្តម ជាម ច័ន្ទសោភ័ណ អភិបាលខេត្ត និងជាប្រធានគណៈកម្មាធិការសាខាកាកបាទក្រហមខេត្តត្បូងឃ្មុំ បាននាំយកអំណោយដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ចែកជូនពលរដ្ឋ២០០គ្រួសារ ដែលមានជីវភាពខ្វះខាតលំបាក ក្នុងឃុំរការខ្នុរ ស្រុកក្រូចឆ្មារ នៅព្រឹកថ្ងៃទី៣០ ខែតុលានេះ ។មានប្រសាសន៍សំណេះសំណាល ឯកឧត្តម​ ជាម ច័ន្ទសោភ័ណ បានផ្តាំផ្ញើសួរសុខទុក្ខពី​សំណាក់​សម្តេតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាក​បាទក្រហមកម្ពុជា ជូនចំពោះប្រជាពលរដ្ឋដែលមានជីវភាពខ្វះខាតលំបាកទាំងអស់ ដោយ​ក្តី​នឹក​រលឹក​អាណិតអាសូរ និងតែងតែព្រួយបារម្ភ គិតគូរពីសុខទុក​ប្រជាពលរដ្ឋ​គ្រប់ពេល​វេលា។ឯកឧត្តម អភិបាលខេត្ត បានណែនាំដល់អាជ្ញាធរស្រុកឃុំភូមិ ត្រូវបន្តផ្សព្វផ្សាយសារអប់រំ ឱ្យបាន​ជាប់ជាប្រចាំដល់ប្រជាពលរដ្ឋនូវវិធានការ «៣កុំ និង៣ការពារ» ក៏ដូចជាពលរដ្ឋដែលមិន​ទាន់ចាក់​វ៉ាក់សាំងការពារជំងឺកូវីដ១៩ សូមរួសរាន់ទៅចាក់ ដើម្បីបញ្ចៀសការស្លាប់ ពិសេសក្នុងការចូលរួម​ប្រយុទ្ធប្រឆាំង នឹងការឆ្លងរាលដាលនូវជំងឺដ៏កាចសាហាវនេះ។ឆ្លៀតក្នុងឱកាសនោះ ឯកឧត្តម បានថ្លែងប្រាប់បងប្អូនប្រជាពលរដ្ឋ នូវការយកចិត្តទុកដាក់ខ្ពស់​គ្រប់​កាលៈទេសៈ ពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយផ្តល់ជូនអំណោយពលរដ្ឋជនងាយរងគ្រោះទាំងអស់ស្មើៗគ្នា ដោយមិនប្រកាន់ពូជសាសន៍ និងនិន្នាការនយោបាយនោះឡើយ ពិសេសតាមរយៈគោលនយោបាយឧបត្ថម្ភដល់ បងប្អូនក្រ១ ក្រ២ និងស្ត្រីពពោះជាដើម។ដោយឡែកក្នុងបរិបទកូវីដ១៩នេះ សម្តេចតេជោ បានបន្តផ្តល់ភាពកក់ក្តៅ ដោយពលរដ្ឋទទួល​បាន​ការចាក់វ៉ាក់សាំងដោយឥតគិតថ្លៃ, ព្យាបាលមិនយកលុយ ផ្តល់អាហារ៣ពេល ពិសេស ផ្តល់​​២លាន​រៀលគ្រួសារអ្នកស្លាប់ដោយជំងឺកូវីដ១៩ និង១លានរៀល ជូនក្រុមការងារចាត់ចែងសពផងដែរ។បើតាមលោក វង វ៉ាន់នី នាយកសាខាកាកបាទក្រហមខេត្ត បានឱ្យដឹងថា ចំពោះអំណោយ​ដែល​ផ្តល់​ជូនទាំង ២០០គ្រួសារ ក្នុង១គ្រួសារទទួលបាន អង្ករ១បេ មី១កេស ទឹកត្រី១យួរ ទឹកស៊ីអ៊ីវ១យួរ ត្រីខ១យួរ ប្រេងឆា១ដប និងថវិកាមួយចំនួន៕

រដ្ឋបាលក្រុងកោះរ៉ុង ប្រកាន់​យក​ស្ដង់ដារ​សុវត្ថិភាព​សម្រាប់​ការទទួលការ​បើក​ទេសចរណ៍​វ៉ាក់សាំង​ឡើងវិញ

2021/10/30 12:24:04 pm        326
Facebook Telegram Linkin
​ព្រះសីហនុ ៖ នៅថ្ងៃទី៣០ ខែតុលា ឆ្នាំ២០២១ រដ្ឋបាលក្រុងកោះរ៉ុង បានរៀបចំកិច្ចប្រជុំផ្សព្វ ផ្សាយវិធានការសុវត្ថិភាព និងនីតិវិធីប្រតិបត្តិស្តង់ដាអប្បរមា (SOP) ជាមួយប្រតិបត្ដិករទេសចរណ៍ សមាគមដឹកជញ្ជួន ទេសចរណ៍ជលយានខេត្ដព្រះសីហនុ សម្រាប់អាជីវកម្មទេសចរណ៍ក្នុង ខេត្តព្រះសីហនុ និងបន្ដអនុវត្ដតាមសេចក្ដីប្រកាសជា ផ្លូវការដាក់ឱ្យអនុវត្តផែនការយុទ្ធសាស្ត្រ ស្តីពីការបើកទទួលទេសចរណ៍ វ៉ាក់សាំង ។ការផ្សព្វផ្សាយវិធានសុវត្ថិភាព និងនីតិវិធីប្រតិបត្តិស្តង់ដាអប្បរមា (SOP) ប្រតិបត្តិករទេសចរណ៍ ដើម្បី​ជំរុញឱ្យវិស័យ ទេសចរណ៍អាចដំណើរការបាន ក៏ដូចជាការជួយផ្តល់ការងារ និងប្រាក់​ចំណូល​ដល់ប្រជាពលរដ្ឋ និងធានាបាននូវការ ទប់ស្កាត់ការរាលដាលនៃជំងឺកូវីដ-១៩។ វាជាចាំបាច់ត្រូវមានគោលនយោបាយ លិខិតបទដ្ឋានគតិយុត្តនានា និងវិធាន សុវត្ថិភាពទេសចរណ៍ ក៏ដូចជាវិធានសុវត្ថិភាពសុខាភិបាលត្រឹមត្រូវសមស្រប ដើម្បីធ្វើការអប់រំ និងបណ្ដុះបណ្ដាលឱ្យបាន ទូលំទូលាយ ដោយមានការចូលរួមអនុវត្តឱ្យបានត្រឹមត្រូវពីគ្រប់ភាគីពាក់ព័ន្ធ ពិសេសវិស័យឯកជន និងប្រជាពលរដ្ឋផ្ទាល់ ការអនុវត្តឱ្យបានត្រឹមត្រូវខ្ជាប់ខ្ជួន “៣ការពារ និង៣កុំ” តាមអនុសាសន៍​ណែនាំ​ដ៏ខ្ពង់ខ្ពស់របស់សម្ដេចតេជោ នាយករដ្ឋមន្ត្រី។ កាផ្សព្វផ្សាយវិធានសុវត្ថិភាព និងនីតិវិធីប្រតិបត្តិការស្តង់ដារអប្បបរមា (SOP) ពិតជាមាន​សារៈសំខាន់​ណាស់សម្រាប់ ចំណេះដឹងមូលដ្ឋានដល់មន្ត្រី និងវិស័យឯកជននៅក្នុងខេត្តព្រះសីហនុ ដើម្បីចូលរួមជម្រុញវិស័យទេសចរណ៍ប្រកបដោយ គុណភាព និងសុវត្ថិភាព ជាពិសេសត្រៀម​ឆ្ពោះ​ទៅបើកទទួលភ្ញៀវទេសចរអន្តរជាតិឡើងវិញ នៅចុងឆ្នាំ២០២១និងត្រៀមទទួលភ្ញៀវ នៅក្នុងវេទិកា​ទេសចរណ៍អាស៊ាននាពេលខាងមុខ។ នេះជាការលើកឡើងពីលោក នួន ប៊ុនថុល អភិបាល នៃគណៈអភិបាលកោះរ៉ុង។សូមបញ្ជាក់ថា កាលពីថ្ងៃទី២៨ ខែតុលានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ក៏បាន​លើកឡើងពីការចងក្រង ផែនការយុទ្ធសាស្ត្របើកទេសចរណ៍វ៉ាក់សាំង ​គឺផ្អែកតាមអភិក្រម ជាបុរេលក្ខខណ្ឌចំនួន ០៤៖ ទី១.អត្រានៃការចាក់វ៉ាក់សាំង ​សំដៅបង្កើតភាពស៊ាំសហគមន៍ ទី២.អត្រានៃការរីករាលដាលជំងឺកូវីដ-១៩ ទី៣.សមត្ថភាពឆ្លើយតប ​និងគ្រប់គ្រងហានិភ័យ ដែលអាចកើតមានពីវីរុសបំប្លែងថ្មី និងទី៤.ការត្រៀមខ្លួនរបស់ឧស្សាហកម្មទេសចរណ៍។ផែនការយុទ្ធសាស្ត្របើកទេសចរណ៍ វ៉ាក់សាំងអន្តរជាតិ គឺត្រូវបើកជាជំហានចំនួន ៣ជំហាន៖ ជំហានទី១ ជាជំហានចាប់ផ្តើមទទួលទេសចរណ៍អន្តរជាតិឡើងវិញ ដោយកំណត់​យក​គម្រោង​សាកល្បង ​នៅចុងខែវិច្ឆិកា​ ឆ្នាំ២០២១ ​ដោយចាប់ផ្តើមនៅក្រុងព្រះសីហនុ ​និងក្រុងកោះរ៉ុងនៃខេត្ត ព្រះសីហនុ និងតំបន់តារាសាគរនៃខេត្តកោះកុង និងបន្ទាប់មកនៅខេត្តសៀមរាបនៅក្នុងខែមករា ឆ្នាំ២០២២។ ជំហានទី២ ចាប់ផ្តើមទទួលទេសចរណ៍អន្តរជាតិមកតាមតំបន់ទេសចរណ៍សុវត្ថិភាពផ្សេងៗទៀត បន្ទាប់ពីគម្រោង​សាកល្បងនៃជំហាន ទី១ ទទួលបានជោគជ័យ។ ជំហានទី៣ បើកទទួល​ទេសចរណ៍​វ៉ាក់សាំងពេញលេញនៅទូទាំងប្រទេស។សូមបញ្ជាក់បន្ថែមថា ខេត្តព្រះសីហនុ គឺខេត្តមួយដែលមានសក្ដានុពលទេសចរណ៍​ធម្មជាតិ​ច្រើនដូចជាឆ្នេរសមុទ្រជាង ១៧៥គីឡូម៉ែត្រ ដ៏ស្រស់ស្អាតជាងគេលើ ​ពិភពលោក (ឆ្នេរអូត្រេះ ឆ្នេរអូរឈើទាល ឆ្នេរឯករាជ្យ​ ឆ្នេរលម្ហែ ឆ្នេរព្រែកត្រែង) កោះ៣២ ​មានឆ្នេរខ្សាច់ស្អាតល្អសក្បុស ទឹកសមុទ្រពណ៌ខៀវមានផ្កាថ្ម ​រមណីយដ្ឋានធម្មជាតិ​ (ថ្មរូង ទឹកធ្លាក់ក្បាលឆាយ)។ នៅតាម​បណ្ដាកោះ ភ្ញៀវទេសចរ ​អាចមុជទឹកមើលផ្កាថ្ម ស្ទូចត្រី ជិះទូកលម្ហែកម្សាន្តជុំវិញកោះ ។ល៕អត្ថបទ ៖ ប៊ុនថា

អភិបាលខេត្តតាកែវ អំពាវនាវប្រជាពលរដ្ឋរួមគ្នាសម្អាតបរិស្ថានអនាម័យឱ្យស្អាតល្អ

2021/10/30 11:50:02 am        380
Facebook Telegram Linkin
តាកែវ ៖ អភិបាលខេត្តតាកែវ ឯកឧត្តម អ៊ូច ភា បានធ្វើការអំពាវនាវទៅដល់បងប្អូនប្រជាពលរដ្ឋ សូមបន្តចូលរួមទាំងអស់គ្នា ដើម្បីសម្អាតបរិស្ថានអនាម័យឱ្យស្អាតល្អ ពិសេសមិនត្រូវបោះចោល សម្រាមពាសវាលពាសកាល និងនៅតាមទីសាធារណៈ ឬនៅតាមសួនច្បារនោះឡើយ ដោយត្រូវបោះសម្រាមចោលនៅក្នុងធុងសម្រាមជានិច្ច ។នៅក្នុងឱកាសចុះត្រួតពិនិត្យការជួសជុលសួនច្បារមាត់ទន្លេឡើងវិញ នៅក្នុងក្រុងដូនកែវ នៅថ្ងៃទី ៣០ ខែតុលា ឆ្នាំ២០២១ ឯកឧត្តម អ៊ូច ភា អភិបាលខេត្តតាកែវ មានប្រសាសន៍បន្តទៀតថា សួន​ច្បារសាធារណៈនេះ គ្រោងនឹងកសាងបញ្ចប់ជាស្ថាពរនៅដំណាច់ឆ្នាំនេះ ដែលវានឹង​ក្លាយ​ជា​ទី​លំហែកាយ និងដើរកម្សាន្ត ពិសេសក្លាយជាទីន្លែងសម្រាប់បងប្អូនប្រជាពលរដ្ឋ​មក​ធ្វើលំហាត់​ប្រាណទាំងព្រឹក និងពេលល្ងាចផងដែរ។ ដូច្នោះសូមបងប្អូនទាំងអស់គ្នាចូលរួម​សម្អាត​បរិស្ថាន​អនាម័យ​ឱ្យបានស្អាតល្អ ព្រោះមានតែការចូលរួមរបស់បងប្អូននោះទេ ទើបទីក្រុងនិងសួនច្បារ​របស់យើង មិនមានសម្រាម និងថង់ប្លាស្ទិចហើរតាមខ្យល់ ពិសេសគឺមិនមានក្លិនស្អុយ ហើយក្នុង​នោះដែរ យើងក៏អាចទាក់ទាញភ្ញៀវជាតិ អន្តរជាតិមកដើរកម្សាន្តនៅក្នុងខេត្ត​យើងដែល​នឹង​ធ្វើឱ្យ​បងប្អូនយើងមានចំណូលមួយផ្នែកនៃវិស័យទេសចរណ៍។ឯកឧត្តមអភិបាលខេត្ត បន្ថែមទៀតថា បើកាលណាបងប្អូនប្រជាពលរដ្ឋមានទម្លាប់រស់នៅស្អាត ហើយស្រឡាញ់បិរស្ថានល្អ មិនមានធុំក្លិនស្អុយ នោះសហគមន៍របស់យើងនឹងក្លាយ​ជា​សហគមន៍​គំរូ និងស្អាតល្អដោយមិនមានសម្រាមបោះចោលពាសវាលពាសកាលនោះទេ ហើយតាមរយៈការ​ទម្លាប់​របស់បងប្អូនចំពោះបរិស្ថានល្អនេះ ទីក្រុងរបស់យើងក៏ក្លាយជាទីក្រុងបៃតងខៀវស្រងាត់ ទីក្រុងស្អាតស្រស់ល្អ ។ជាមួយគ្នានេះដែរ ឯកឧត្តម អ៊ូច ភា ក៏បានធ្វើការណែនាំបន្ថែមទៅដល់ក្រុងជាង ត្រូវពន្លឿនការ​ជួសជុល​​សួនច្បារនៅផ្នែកខាងកើតឱ្យបានលឿន និងឆាប់រហ័ស ព្រោះសួនច្បារយើង​បច្ចុប្បន្ន​សួនពីខាងលិច គឺយើងបានធ្វើរួចរាល់ហើយដែរ ដោយយើងបានពង្រីកសួនឱ្យ​មានភាព​ធំទូលាយ​សម្រាប់​ឱ្យបងប្អូនប្រជាពលរដ្ឋមកសម្រាកកម្សាន្ត និងដើរហាត់ប្រាណផងដែរ ៕

សាលារៀនមួយចំនួនពន្លឿនការសម្អាតសាលាត្រៀមបើកឡើងវិញ នៅថ្ងៃច័ន្ទសប្តាហ៍ក្រោយ

2021/10/29 01:05:43 pm        423
Facebook Telegram Linkin
កណ្ដាល ៖ មកដល់ថ្ងៃទី២៩ ខែតុលានេះ គឺនៅសល់តែជាង២ថ្ងៃទៀតប៉ុណ្ណោះ បណ្តាគ្រឹះស្ថានសិក្សារដ្ឋនិងឯកជន នឹងបើកដំណើរការបង្រៀន និងការរៀនតាមបណ្តុំនៅគ្រប់កម្រិតសិក្សាទាំងអស់ឡើងវិញជាធម្មតា។ សម្រាប់ត្រៀមបើកសាលារៀនឡើងវិញ សំគាល់ឃើញថា បណ្តាសាលារៀនមួយចំនួន បាននិងកំពុងពន្លឿនការរៀបចំសម្អាតបរិវេណក្នុង និងក្រៅថ្នាក់ ដើម្បីបើកការចូលបង្រៀន និងរៀនប្រកបដោយភាពអនាម័យ និងបរិស្ថានស្អាត។បើតាមសិស្សានុសិស្សដែលសិក្សានៅវិទ្យាល័យ ហ៊ុន សែន សេរីភាពក្រុងតាខ្មៅ ខេត្តកណ្តាល ថ្លែងថា នៅថ្ងៃនេះ បើទោះគ្រប់មន្ត្រីរាជការឈប់សំរាកដើម្បីអបអរសាទរ ថ្ងៃឡើងគ្រង​រាជ​សម្បត្តិ​របស់សម្តេចព្រះ នរោត្តម សីហមុនី ព្រះ​មហា​ក្សត្រ ​នៃព្រះរាជាណាចក្រកម្ពុជា ក៏បណ្តា​សិស្សានុសិស្ស និងលោកគ្រូអ្នកគ្រូ បាន​ស្ម័គ្រ​ចិត្ត​នាំ​គ្នា​មក​សម្អាត​បរិវេណ​ទាំង​នៅ​ក្នុងថ្នាក់ និង​នៅក្រៅថ្នាក់រៀន ដើម្បីអោយធ្វើយ៉ាងណាសាលារៀនមានបរិស្ថានស្អាត ​និងអនាម័យ ​ជាពិសេស​គឺ​នឹង​ចូល​រៀនវិញបានធម្មតានៅថ្ងៃច័ន្ទនេះ។បើតាមលោក ស្រី ស្រឿន នាយករងសាលាវិទ្យាល័យ ហ៊ុន សែន សេរីភាព បានថ្លែងថា មកដល់​ពេលនេះ គ្រូ និង​សិស្ស​បានសហការរៀបចំសំអាតបន្ទប់ ​តុអង្គុយ និងបរិវេណ​ក្រៅថ្នាក់​បាន​ប្រមាណ​ជាង៨០% ហើយការរៀបចំយឺតនេះ ​គឺ​ដោយសារបរិវេណសាលាមានសភាពទំនាប រងទឹកភ្លៀងជនលិចយូរ ។ឯកឧត្តម រស់ សុវាចា អ្នកនាំពាក្យក្រសួងអប់រំយុវជន និងកីឡា ​ថ្លែងថា សម្រាប់ការ​ពង្រីក​វិសាល​ភាពបើក​គ្រឹះ​ស្ថាន​សិក្សា​សម្រាប់ការបង្រៀន និងការរៀនតាមបណ្តុំនៅតាមគ្រឹះស្ថាន​សិក្សា​ចំណេះ​ទូទៅគ្រប់កម្រិត និង​គ្រឹះស្ថាន​ឧត្តម​សិក្សា​រដ្ឋ​ និងឯកជន និងគ្រឹះស្ថានបណ្តុះបណ្តាល​គ្រូនានា​ឡើងវិញ ចាប់ពីថ្ងៃទី១ ខែវិច្ឆិកានេះ ​គឺត្រូវ​អាស្រ័យ​លើ​ស្ថាន​ភាព​ជំងឺ​កូវីដ១៩ចំនួន២គឺ ភូមិសាស្ត្រ​ដែលគ្រប់គ្រងជំងឺកូវីដ១៩បាន និង​ភូមិសាស្ត្រហានីភ័យមធ្យមនឹងខ្ពស់។ ឯកឧត្តម បន្តថា នៅក្នុងអំឡុងពេលបើកសាលារៀន ​ថ្នាក់ដឹកនាំសាលារៀន ឬមន្ទីរអប់រំយុវជន និង​កីឡារាជ​ធានី​ខេត្ត ​អាចធ្វើការផ្អាកដំណើរការបង្រៀន និងការរៀនសម្រាប់តែបន្ទប់ថ្នាក់រៀនណា មាន​សិស្ស ឬគ្រូរងការឆ្លងជំងឺកូវីដ១៩ ​ហើយត្រូវរៀបចំចាត់​ចែង​យកអ្នកវិជ្ជមានកូវីដ១៩ និង​អ្នកពាក់ព័ន្ធទៅព្យាបាល​ និងធ្វើចត្តាឡីស័កចំនួន១៤ថ្ងៃ។​ ដោយ​ឡែក​សាលារៀនទាំងមូល និងក្រុមសិស្សមិនពាក់ព័ន្ធ​អនុញ្ញាត​បន្តដំណើរការរៀននិងបង្រៀនជាធម្មតា៕អត្ថបទ ស៊ុម សុខជា

ជំនន់ទឹកភ្លៀង មិនប៉ះពាល់ដល់រោងចក្រសហគ្រាសនៅរាជធានីភ្នំពេញ និងខេត្តកំពង់ស្ពឺ

2021/10/29 12:39:03 pm        519
Facebook Telegram Linkin
ភ្នំពេញ ៖ ​យោងតាមក្រសួងការងារ និងបណ្តុះបណ្តាលវិជ្ជាជីវៈ គិតមកដល់ពេលនេះ ក្រសួង​មិនទាន់​ទទួល​បានដំណឹង ឬព័ត៌មាន​ណាមួយអំពីរោងចក្រ សហគ្រាស​ស្នើ​សុំផ្អាក​ចង្វាក់​ផលិតកម្ម​ដោយសារជំនន់ទឹកភ្លៀងទេ ពោលគឺនៅតែបន្តដំណើរការធម្មតា។ឯកឧត្តម ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ ​និងបណ្តុះបណ្តាលវិជ្ជាជីវៈ នៅព្រឹកថ្ងៃទី២៩ ខែតុលា ឆ្នាំ២០២១នេះ បានឲ្យទូរទស្សន៍ព័ត៌មាន ​ប៊ីធីវី ដឹងថា ពាក់ព័ន្ធ​បញ្ហាគ្រោះទឹកជំនន់ ក្រសួងអត់ទទួលព័ត៌មានថា រោងចក្រ​ត្រូវបាន​បិទ​ដោយ​សាររងគ្រោះ​ទឹកជំនន់ទេ​ គឺរោងចក្រ និងសហគ្រាសនៅបើកដំណើរការធម្មតា“។ ឯកឧត្តមឲ្យដឹងទៀតថា ធម្មតារោងចក្របិទគាត់ជូនដំណឹង​មកក្រសួង ន្តែមក​ដល់​ពេលនេះ​មិនមានទេ ​ហើយក្រសួងចុះមើលតាមខណ្ឌ ​អត់មានរបាយការណ៍នេះដែរ”។ការលើកឡើងរបស់ក្រសួង គឺធ្វើឡើងបន្ទាប់ពីមានគ្រោះជំន​ន់ទឹកភ្លៀង ​បានកើតឡើង នៅតាម​បណ្តោយ​ស្ទឹងព្រែកត្នោត ចាប់ពីខេត្តកំពង់ស្ពឺ ​ដល់ភាគខាងត្បូងនៃរាជធានីភ្នំពេញ។ ឯកឧត្តម វី សំណាង អភិបាលខេត្តកំពង់ស្ពឺ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី ថា ក្នុងខេត្តកំពង់ស្ពឺ គិតមកដល់ពេលនេះ ​មិនមានការរាយការណ៍ណាមួយដែរអំពីរោងចក្រ សហគ្រាស រងផលប៉ះពាល់ដោយសារគ្រោះទឹកជំនន់​ទេ​ ហើយកម្មករ​និយោជិត​នៅតែ​បន្ត​ធ្វើការធម្មតា។ឯកឧត្តម បានអះអាងទៀតថា “រោងចក្រ សហគ្រាសទាំងអស់អាចនិយាយបានថា កាលពី​ឆ្នាំ២០២០ ក៏អត់មានប៉ះពាល់​ ហើយនៅឆ្នាំ២០២១នេះ ក៏អត់មានប៉ះពាល់ដែរ”។សូមជម្រាបជូនថា​ គ្រោះទឹកជំនន់​ កាលពីឆ្នាំ២០២០កន្លង បានធ្វើឱ្យប៉ះពាល់ដល់ចង្វាក់​ផលិត​កម្ម​តាមបណ្តារោងចក្រសហគ្រាសជាង ៧០កន្លែង ​ដែលមានទីតាំងនៅភាគខាងត្បូង នៃរាជធានី​ភ្នំពេញ​ ខេត្តកំពង់ស្ពឺ ​និងខេត្តកណ្តាល និងផ្លូវមួយចំនួនឆ្លងកាត់តំបន់នេះ ត្រូវ​បាន​ផ្អាកចរាចរណ៍ ដែលប៉ះពាល់ដល់ការធ្វើដំណើររបស់បងប្អូនកម្មករកម្មការនី និងនិយោជក៕អត្ថបទ៖ ឈិត បូរ៉ាវី 

ប្រជានុរាស្ត្រថ្វាយព្រះពរព្រះមហាក្សត្រ ក្នុងឱកាសព្រះរាជពិធីគ្រងរាជសម្បត្តិខួប១៧ឆ្នាំ

2021/10/29 09:12:27 am        542
Facebook Telegram Linkin
ភ្នំពេញ ៖ ថ្ងៃនេះជាគម្រប់ខួប ១៧ឆ្នាំនៃការយាងគ្រងព្រះបរមសិរីរាជសម្បតិ្ត របស់ ព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី។នាឱកាសគម្រប់ខួបព្រះរាជា​ភិសេក​របស់​ព្រះ​អង្គ កូនចៅជាប្រជាពលរដ្ឋ ជ្រកក្រោមម្លប់ព្រះអង្គ បានសម្ដែងនូវការគោរពស្រលាញ់ ថ្វាយព្រះពរ និង​សម្ដែង​នូវ​ការ​ពេញ​ចិត្ត​ចំពោះព្រះរាជ​សកម្មភាពព្រះអង្គដែលតែងមាន ​ព្រះរាជ​សណ្ដោសប្រណីជួយដល់សង្គមជាតិ​ និងរាស្រ្តក្នុង​គ្រា​លំបាក​។២៩ តុលា ឆ្នាំ២០០៤-២៩ ខែតុលា ឆ្នាំ ២០២១ ជាគម្រប់ខួប ១៧ឆ្នាំ នៃការឡើងគ្រងរាជ​សម្បត្តិ​របស់ព្រះបាទ សម្តេចព្រះ បរមនាថ​នរោត្តម សីហមុនី ព្រះមហាក្សត្រកម្ពុជា។ ប្រជានុរាស្ត្របានចូលរួមថ្វាយព្រះពរ និងរំលឹកពីព្រះរាជសកម្មភាព បង្ហាញពីការគោរព​ស្រលាញ់​អង្គ​ព្រះមហាក្សត្រ ​ហើយ​តាម​បណ្តាញសង្គមក៏មានការបង្ហោះរូបព្រះឆាយាលក្ខ័ណ និង​ភ្ជាប់​ដោយ​សារថ្វាយព្រះពរផងដែរ។ព្រះរាជសកម្មភាពរបស់ព្រះអង្គ គឺមានជាបន្តបន្ទាប់សម្រាប់សង្គមជាតិកម្ពុជា និងសម្រាប់​ប្រជារាស្រ្ត​របស់​ព្រះអង្គ​គ្រប់រូប។ ជាក់ស្ដែងកំឡុងពេលដែលកម្ពុជា ​កំពុងប្រយុទ្ធប្រឆាំងជំងឺកូវីដ-១៩ ព្រះករុណាព្រះមហាក្សត្រ ទ្រង់បាន​ព្រះ​សណ្ដោស​ប្រណី ផ្ដល់ជាព្រះរាជអំណោយជាច្រើន ក្នុងនោះ​មានទាំងការ ព្រះរាជទានព្រះរាជជូបត្ថម្ភថវិកា​ជួយ​រដ្ឋា​ភិបាល​ក្នុង​ការ​ប្រយុទ្ធ​ប្រឆាំង​កូវីដ១៩ និងទិញវ៉ាក់សាំង, ព្រះរាជទានព្រះរាជអំណោយ ដល់ក្រុមគ្រូពេទ្យបុគ្គលិកសុខា​ភិបាល បុគ្គលិក​អនាម័យ និងសេវាកម្ម នៅតាមមណ្ឌលព្យាបាលជំងឺកូវីដ-១៩​ សរុបចំនួន១៨មណ្ឌល ក្នុងរាជធានីភ្នំពេញ ស្មើ​នឹងចំនួន២១៦៦នាក់ ​ការប្រទានព្រះរាជអំណោយជូន ប្រជានុរាស្រ្ត​ចាស់ជរា ចំនួន ៤៦៥​នាក់នៅ ស្រុកជលគិរី​ ខេត្ត​កំពង់ឆ្នាំង ព្រះរាជទានព្រះរាជអំណោយ​ជូន​មន្រ្តី​អង្គភាព​ស៊ីម៉ាក់ ចំនួន ១,៧៧៣នាក់ ព្រះរាជ​អំណោយ​ជូន​ជន​មាន​ពិការ​ភាព ចំនួន ៤៤៦នាក់ ការ​ប្រោសព្រះរាជទានព្រះរាជអំណោយសម្រាលការលំបាកជូនសិល្បករចំនួន ២០២នាក់ រួមទាំងព្រះរាជសកម្មភាពជាច្រើនទៀត៕អត្ថបទ ៖ គឹមហុក

ព្រះមហាក្សត្រ និងសម្ដេចព្រះមហាក្សត្រី ប្រទានព្រះរាជអំណោយ​ដល់​ប្រជានុរាស្ត្រ​រងគ្រោះ​ទឹក​ជំនន់

2021/10/29 11:30:39 am        619
Facebook Telegram Linkin
ភ្នំពេញ ៖ ព្រះករុណា អង្គព្រះមហាក្សត្រ និងសម្ដេចព្រះមហាក្សត្រី ប្រទានព្រះរាជអំណោយដ៏ថ្លៃថ្លា ដល់ប្រជានុរាស្ត្រ ដែលរងគ្រោះទឹកជំនន់ស្ទឹងព្រែកត្នោត ក្នុងខណ្ឌដង្កោ រាជធានីភ្នំពេញ នាព្រឹកនាថ្ងៃទី២៩ ខែតុលា ឆ្នាំ២០២១។សម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួង​ព្រះបរមរាជវាំង បាននាំយកព្រះរាជអំណោយដ៏ថ្លៃថ្លារបស់ ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និង​សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈ ដ៏ខ្ពង់ខ្ពស់បំផុត ចែកជូន​ដល់​ប្រជានុរាស្ត្រ ដែលរងគ្រោះដោយសារជំនន់ទឹកភ្លៀងពីស្ទឹងព្រែកត្នោត ចំនួន ៨៣៧ គ្រួសារ ស្ថិតនៅក្នុងសង្កាត់គងនយ និងសង្កាត់ទៀន ខណ្ឌដង្កោ រាជធានីភ្នំពេញ។ឯកឧត្ដម ឃួង ស្រេង អភិបាលរាជធានីភ្នំពេញ បានឡើងគោរពថ្វាយពីស្ថានភាពរដូវវស្សាឆ្នាំនេះ ក៏ដូចជាឆ្នាំកន្លងទៅអាស្រ័យដោយកត្តាការប្រែប្រួលអាកាសធាតុ ដែលជាបញ្ហាប្រឈម​ជា​សកល​គួបផ្សំ នឹងកត្តាភូមិសាស្ត្រសណ្ឋានដី ​បានធ្វើឲ្យតំបន់សណ្តរស្ទឹងព្រែកត្នោត ដែលតភ្ជាប់ពី​ខេត្ត​កំពង់ស្ពឺ មកកាន់ខេត្តកណ្តាល ដោយត្រូវឆ្លងកាត់រាជធានីភ្នំពេញ​រងនូវការ​គំរាមកំហែង​ជាថ្មី​ម្ដងទៀត ដោយសារជំនន់ទឹកភ្លៀង បណ្ដាលមកពីការហូរជន់ ​ដោយគំហុកនូវបរិមាណ​ទឹកភ្លៀង​ដ៏ច្រើន ពីតំបន់ភ្នំភាគនិរតី ជាហេតុធ្វើឲ្យបណ្ដាខណ្ឌជាយក្រុង ជាពិសេសខណ្ឌកំបូល ខណ្ឌដង្កោ ត្រូវលិចលង់ផ្នែកខ្លះដោយចៀសមិនរួច ។ឯកឧត្ដម ឃួង ស្រេង បានបន្ថែមថា កាលពីថ្ងៃទី២៤ ខែតុលាឆ្នាំ២០២១ ទឹកស្ទឹងព្រែកត្នោត​បាន​ហក់​ឡើងយ៉ាងខ្លាំង ធ្វើឲ្យមានការហូរច្រោះក្បាលហុងទឹក ​ហៀរហូរ​ជន់លិចលំនៅឋាន និងបង្ក​ឲ្យ​មានផលប៉ះពាល់ដោយផ្ទាល់ និងដោយប្រយោលដល់បងប្អូនប្រជានុរាស្ត្រជាច្រើនគ្រួសារ ក្នុង​ភូមិចំនួន៤ នៃសង្កាត់គងនយ ហើយនៅថ្ងៃទី២៦ ខែតុលាឆ្នាំ២០២១ ជំនន់ទឹកភ្លៀង​បាន​បន្ត​ហូរ​ជន់លិច ក្នុងភូមិចំនួន៤ផ្សេងទៀត នៃសង្កាត់ទៀន ព្រមទាំងបណ្ដាភូមិនៃសង្កាត់មួយ​ចំនួនទៀត ក្នុងខណ្ឌដង្កោ ។ ស្ថិតក្នុងស្ថានភាពមហន្តរាយនេះ កងកម្លាំងចម្រុះ និងអាជ្ញាធរមូលដ្ឋានគ្រប់លំដាប់ថ្នាក់របស់​រដ្ឋបាល​រាជធានីភ្នំពេញ មានភាពម្ចាស់ការខ្ពស់ បានសហការរួមគ្នាផ្តល់ការសង្គ្រោះ​បាន​ទាន់​ពេលវេលា ដោយ​ជម្លៀសប្រជានុរាស្រ្តចេញពីតំបន់រងគ្រោះទៅកាន់ទីទួលសុវត្ថិភាព និង​បាន​ផ្គត់ផ្គង់ម្ហូបអាហារ ទឹកសុទ្ធ បង្គន់អនាម័យ​ និងទីកន្លែងស្នាក់នៅបណ្ដោះអាសន្នសមរម្យ ពោល​គឺមិនមានប្រជាពលរដ្ឋណាមួយរងគ្រោះដល់អាយុជីវិតឡើយ ។ក្នុងឱកាសនោះ សម្ដេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ព្រះរាជតំណាងដ៏ខ្ពង់ខ្ពស់របស់ព្រះអង្គទាំងទ្វេ​បានពាំនាំ​នូវ​ព្រះរាជ​បណ្ដាំសាកសួរសុខទុក្ខ ​និងព្រះរាជហឫទ័យអាណិត ស្រឡាញ់ និងសេចក្ដីនឹករលឹកយ៉ាង​ជ្រាល​ជ្រៅ​បំផុត​របស់ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណា​ចក្រកម្ពុជា​ និងសម្ដេច ព្រះមហាក្សត្រីព្រះវររាជមាតាជាតិខ្មែរជា​ទី​សក្ការៈដ៏ខ្ពង់​ខ្ពស់​បំផុត ជូនចំពោះប្រជារាស្ត្រ ជាកូនចៅ ចៅទូតនៅទូទាំងប្រទេស ពិសេសព្រះរាជហឫទ័យយក​ចិត្ដ​ទុកដាក់ ចំពោះជីវភាពរស់នៅរបស់បងប្អូនប្រជារាស្រ្ដរបស់ព្រះអង្គ ដែលកំពុង​រង​គ្រោះ​ដោយ​ទឹកជំនន់​នាពេលនេះ។ ព្រះរាជសកម្មភាពដ៏ឧត្ដុងឧត្ដមថ្លៃថ្លា ប្រកបដោយព្រះគុណធម៌ ព្រះមនុស្សធម៌ និង​ព្រះ​ព្រហ្មវិហារធម៌ នាពេលនេះពិតជាបានឆ្លុះបញ្ចាំងឲ្យឃើញ​កាន់តែច្បាស់ពីព្រះទ័យទុក​ដាក់ខ្ពស់​បំផុត អស់ពីកម្លាំងព្រះកាយពល​ និង​ព្រះ​បញ្ញាញាណ​របស់​សម្តេចព្រះមហាក្សត្រី និង​ព្រះករុណាព្រះមហាក្សត្រ។សូមជម្រាបថា ប្រជានុរាស្ត្រដែលបានទទួលព្រះរាជអំណោយដ៏ថ្លៃថ្លានាពេលនេះ គឺជាអ្នករស់​នៅក្នុង​តំបន់រងផលប៉ះពាល់ទឹកជំនន់ពីស្ទឹងព្រែកត្នោត ក្នុងនោះសង្កាត់គងនយ មានចំនួន ៤៩១គ្រួសារ និងសង្កាត់ទៀតមានចំនួន៣៤៦គ្រួសារ ៕អត្ថបទ ៖ ប្រាក់ វ៉ាន់ដា

ពលរដ្ឋរងគ្រោះដោយជំនន់ស្ទឹងព្រែកត្នោត ទទួលអំណោយរបស់សម្ដេចទាំងទ្វេ

2021/10/28 04:45:20 pm        239
Facebook Telegram Linkin
ភ្នំពេញ ៖ ប្រជាពលរដ្ឋជាង៥០០គ្រួសារ ដែលទទួលរងការលិចលង់ដោយទឹកជំនន់​ហូរចេញពីទំនប់​ស្ទឹង​ព្រែកត្នោត ទទួល​បានអំណោយរបស់សម្ដេចតេជោហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។អំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមានដូចជាអង្គរ មី ត្រីខ ទឹកស៊ីអ៊ីវ ត្រូវបាន ឯកឧត្ដម ឃួង ស្រេង អភិបាលរាជធានីភ្នំពេញ នាំយកទៅប្រគល់​ជូន​ដល់​បងប្អូនប្រជាពលរដ្ឋចំនួន ៥១៥គ្រួសារ ដែលទទួល​រងនូវការលិចលង់​ដោយទឹកជំនន់​ហូរ​ចេញ​ពី​ទំនប់​ស្ទឹង​ព្រែកត្នោត ចូលភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ។ពិធីចែកអំណោយនេះ ត្រូវបានធ្វើឡើងនាព្រឹកថ្ងៃទី២៨ ខែតុលា ឆ្នាំ២០២១នេះ នៅក្នុងបរិវេណ​ក្រុមហ៊ុន​ដឹកជញ្ជូន​សំរាម Mizuda Group Co.,Ltd ស្ថិតនៅតាមបណ្ដោយផ្លូវ៣០ម៉ែត្រ ក្នុងសង្កាត់​ស្ពានថ្ម ខណ្ឌដង្កោ រាជធានីភ្នំពេញ ដោយ​មានការអញ្ជើញចូលរួមពីសំណាក់ ឯកឧត្ដម កែប ជុតិមា តំណាងរាស្ត្រមណ្ឌភ្នំពេញ ជាប្រធានក្រុម​ការងារ​ចុះ​ជួយ​ខណ្ឌដង្កោ និង ឯកឧត្ដម ស៊ាង ប៊ុនលាង រដ្ឋលេខាធិការក្រសួងមហាផ្ទៃផងដែរ។ឯកឧត្ដម ឃួង ស្រេង បានបញ្ជាក់ថា អំណោយទាំងនេះ គឺជាអំណោយរបស់សម្តេចតេជោហ៊ុន សែន នាយករដ្ឋមន្ត្រី និង​សម្ដេចគតិព្រឹទ្ធបណ្ឌិតប៊ុនរ៉ានីហ៊ុនសែន ។ សម្ដេចទាំងទ្វេ បានឱ្យរដ្ឋបាលរាជធានីភ្នំពេញ​ នាំ​យកអំណោយ​ទាំង​នេះ មកចែកជូនបងប្អូន ដែលជួបការពិបាក ដោយសារទឹកជំនន់ ។ចំពោះស្ថានភាពទឹកស្ទឹងព្រែកត្នោត ឯកឧត្ដម ឃួង ស្រេង បានបញ្ជាក់ផងដែរថា គិតមកដល់​ព្រឹកថ្ងៃទី២៨ តុលា​នេះ ទឹកស្ទឹងព្រែកត្នោតបានស្រកចុះ៤តឹកហើយ។ ប៉ុន្តែទោះបីជាយ៉ាងណាក្តីទាំងអាជ្ញាធរ ទាំង​កម្លាំង​មាន​សមត្ថកិច្ច និងកងអង្គរក្សសម្ដេចតេជោ នៅតែឈរជើង នៅទីតាំងបញ្ជាការស្រាល ដើម្បីជួយដល់បងប្អូនប្រជាពលរដ្ឋ ខណៈដែល​ពួកគាត់ត្រូវការជួយសង្គ្រោះដោយប្រការផ្សេងៗ។ឯកឧត្ដម ឃួង ស្រេង បានបន្ថែមថា អំណោយជាអង្កររបស់សម្តេចតេជោ ហ៊ុន សែន នាយករដ្ឋមន្ត្រី និង​សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ចំនួន១០០០តោន បានត្រៀមរួចរាល់ហើយ ដើម្បីចែកជូន​បងប្អូន​ប្រជាពលរដ្ឋ ដែលខ្វះខាត។សូមជម្រាបថា ក្នុងភូមិសាស្រ្តខណ្ឌដង្កោជំនន់ទឹកស្ទឹងព្រែកត្នោត បានធ្វើឱ្យប៉ះពាល់ចំនួន១០សង្កាត់ មាន ៣៣ភូមិ មាន២០៧៧ខ្នងផ្ទះ និងផ្ទៃដីកសិកម្មប្រមាណ ១៥២ហិកតា ៕អត្ថបទ ៖ ប្រាក់ វ៉ាន់ដា

សម្តេចពញាចក្រី ហេង សំរិន ជួបពិភាក្សាការងារជាមួយឯកអគ្គរដ្ឋទូតអាមេរិកប្រចំានៅកម្ពុជា

2021/10/28 04:23:45 pm        221
Facebook Telegram Linkin
ភ្នំពេញ ៖ សម្តេចពញាចក្រី ហេង សំរិន ប្រធានរដ្ឋសភា បានអនុញ្ញាតឱ្យឯកឧត្តម Patrick Murphy ឯកអគ្គ រដ្ឋទូតសហរដ្ឋអាមេរិក ប្រចាំនៅកម្ពុជា ចូលជួបពិភាក្សាការងារ នៅវិមានរដ្ឋសភា នាព្រឹកថ្ងៃទី២៨ ខែតុលា នេះ ។សម្តេចអគ្គមហាពញាចក្រី ហេង សំរិន បានសម្តែងការកោតសរសើរ ឯកឧត្តមឯកអគ្គរដ្ឋទូត ដែល បានខិតខំប្រឹងប្រែងនៅក្នុងការបំពេញបេសកកម្មការទូតនៅកម្ពុជា ក្នុងរយៈពេលពីរឆ្នាំមកនេះ ធ្វើឲ្យកិច្ច សហប្រតិបត្តិការជាច្រើនវិស័យ រវាងប្រទេសទំាងពីរបានជំរុញនិងលើកកម្ពស់ មានការវិវត្ដរីកចម្រើន។សម្តេចជឿជាក់ថា ទំនាក់ទំនង ប្រជាជនទំាងពីរប្រទេស ក៏ដូចជាកិច្ចសហប្រតិបត្តិការ រវាងកម្ពុជា និងអាមេរិក ដែលមានជាង៧០ឆ្នាំមកនេះ នឹងកាន់តែរីកលូតលាស់ ប្រកបដោយផ្លែផ្កាថែមទៀត។ឯកឧត្តម Patrick Murphy អបអរសាទរដល់រាជរដ្ឋាភិបាលកម្ពុជា បានខិតខំចាក់វ៉ាក់សំាងប្រឆំាងកូវីដ-១៩ជូនពលរដ្ឋបានក្នុងកម្រិតខ្ពស់ និងឈានដល់ការបើកដំណើរការសកម្មភាពសង្គម និង សេដ្ឋកិច្ចជាបណ្តើរៗឡើងវិញ។ឯកឧត្តម បានបញ្ជាក់ថា សហរដ្ឋអាមេរិក ជាប្រទេសមួយដែលចូលរួមយ៉ាងសកម្មនៅក្នុងវិស័យ សុខាភិបាលនៅកម្ពុជា ពិសេសនៅកំឡុងពេលនៃការរាតត្បាតជំងឺកូវីដ១៩នេះ។ អាមេរិកបានផ្តល់វ៉ាក់សំាង Johnson & Johnson ជូនកម្ពុជាប្រមាណជាង១លានដូស តាមយន្តការអង្គការសុខភាពពិភពលោក។សម្តេចអគ្គមហាពញាចក្រី ហេង សំរិន បានថ្លែងអរគុណយ៉ាងជ្រាលជ្រៅចំពោះសហរដ្ឋអាមេរិក ដែលបានផ្តល់ជំនួយអភិវឌ្ឍន៍ដល់កម្ពុជា មានជាអាទិ៍លើវិស័យសុខាភិបាល អប់រំ បរិស្ថាន វប្បធម៌ កសិកម្ម និងការបោស​សម្អាតមីនជាដើមនោះ ពិសេស វ៉ាក់សាំងប្រឆាំងកូវីដ-១៩។ជាចុងបញ្ចប់ សម្តេចពញាចក្រី បានលើកទឹកចិត្តដល់សហរដ្ឋអាមេរិក បន្តផ្តល់អាហារូបករណ៍ និងឱកាសបណ្តុះបណ្តាល ដល់និស្សិត និងអ្នកដឹកនំាវ័យក្មេងកម្ពុជា ដោយកម្ពុជាផ្តល់អាទិភាព ដល់សេដ្ឋកិច្ចផ្អែកលើចំណេះដឹង៕អត្ថបទ៖ សេក ឧត្ដម

បណ្ដាញសង្គម

ព័ត៌មានថ្មីៗ

ពិធីចុះអនុស្សរណៈនៃការយោគយល់គ្នារវាងសាកលវិទ្យាល័យចេនឡា និងសាកលវិទ្យាល័យ Dongshin University នៃសាធារណៈរដ្ឋកូរ៉េ
08/14/2025 08:08 PM
Facebook Telegram Linkin
UN៖ ឧក្រិដ្ឋកម្មសង្រ្គាមទំនងជាបានប្រព្រឹត្តដោយភាគីទាំង ២នៅក្នុងអំពើហិង្សាតំបន់ឆ្នេរប្រទេសស៊ីរី
08/14/2025 08:08 PM
Facebook Telegram Linkin
កង្វះអាំងស៊ុយលីនធ្វើឲ្យអ្នកជំងឺទឹកនោមផ្អែមកុងហ្គោឈឺចាប់នៅតំបន់ភាគខាងកើតដែលញាំញីដោយភ្លើងសង្រ្គាម
08/14/2025 08:08 PM
Facebook Telegram Linkin
រុស្ស៊ី និងអ៊ុយក្រែន ដោះដូរអ្នកទោសម្ខាងៗចំនួន ៨៤នាក់ដូចគ្នា
08/14/2025 08:08 PM
Facebook Telegram Linkin
ក្រុមគ្រូពេទ្យគ្មានព្រំដែន៖ ជំងឺអាសន្នរោគបានសម្លាប់មនុស្ស ៤០នាក់នៅតំបន់ Darfur ប្រទេសស៊ូដង់ ក្នុងរយៈពេល ១សប្តាហ៍
08/14/2025 08:08 PM
Facebook Telegram Linkin
នគរបាលអេស្ប៉ាញ ចាប់ខ្លួនមនុស្ស ៤នាក់ ពាក់ព័ន្ធនឹងចំហេះព្រៃថ្មី
08/14/2025 08:08 PM
Facebook Telegram Linkin
​ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានីចូលរួមបរិច្ចាគឈាម ដើម្បីសង្គ្រោះជីវិត
08/14/2025 08:08 PM
Facebook Telegram Linkin
ប្រភព៖ ទួរគីជួយស៊ីរីនូវប្រព័ន្ធអាវុធ និងគ្រឿងយុទ្ធោបករណ៍ ក្រោមកិច្ចព្រមព្រៀងថ្មី
08/14/2025 08:08 PM
Facebook Telegram Linkin
សម្តេចតេជោជួបពិភាក្សាជាមួយអគ្គលេខាធិការមជ្ឈឹមបក្សកុម្មុយនីស្តវៀតណាមតាមរយៈវិដេអូពីចម្ងាយ
08/14/2025 08:08 PM
Facebook Telegram Linkin
មេដឹកនាំបារាំង បញ្ជាក់ថា លោក Trump បើកចំហចំពោះការធានាសន្តិសុខ សម្រាប់អ៊ុយក្រែន
08/14/2025 08:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.