នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ

នយោបាយ​ និង ការអភិវឌ្ឍន៍

រដ្ឋាភិបាលឡាវ ថ្លែងអំណរគុណដល់រាជរដ្ឋាភិបាលកម្ពុជា ដែល​ផ្តល់​វ៉ាក់សាំង​ចំនួន២០ម៉ឺន​ដូស​ដល់ខ្លួន

2021/09/28 04:23:47 am        381
Facebook Telegram Linkin
ស្ទឹងត្រែង ៖ លោកបណ្ឌិត ប៊ុនហ្វេង ភូមិម៉ាឡៃស៊ិត (Bounfeng Phommalaysith) រដ្ឋមន្ត្រីក្រសួងសុខាភិបាល និងជាអនុប្រធានគណៈកម្មការការពារគ្រប់គ្រងទប់ស្កាត់ការរីករាលដាលនៃជំងឺកូវីដ១៩ នៃប្រទេសឡាវ បានថ្លែងអំណរអគុណចំពោះរាជរដ្ឋាភិបាល និងប្រជាជនកម្ពុជា ដែលបានផ្តល់ជំនួយនូវវ៉ាក់សាំងការពារមេរោគកូវីដ១៩ ដល់ប្រជាជន និងរដ្ឋាភិបាលឡាវ ដើម្បីចូលរួមចំណែកទប់ស្កាត់មេរោគកូវីដ១៩។ថ្លែងនៅក្នុងពិធីផ្តល់ និងទទួលវ៉ាក់សាំងប្រភេទស៊ីណូវ៉ាក់ ដែលជាជំនួយ​របស់​រាជរដ្ឋាភិបាលកម្ពុជា នាព្រឹកថ្ងៃទី២៨ ខែកញ្ញានេះ នៅច្រកទ្វារព្រំដែនត្រពាំងក្រៀល-ណុងណុកខៀន លោកបណ្ឌិត ប៊ុនហ្វេង ភូមិម៉ាឡៃស៊ិត បានលើកឡើងថា «ក្នុងនាមរដ្ឋាភិបាល និងប្រជាជនឡាវ សូមដឹងគុណ​យ៉ាងជ្រាលជ្រៅចំពោះចំនួយដ៏មានតម្លៃរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងប្រជាជនកម្ពុជានាពេលនេះ»។នៅយប់ថ្ងៃទី២៧ ខែកញ្ញា ឆ្នាំ២០២១ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា បានផ្ញើលិខិតជូនឯកឧត្តម ផាន់ខាំ វីផាវ៉ាន់ នាយករដ្ឋមន្រ្តី នៃសាធារណរដ្ឋ​​ប្រជាធិបតេយ្យ​ប្រជាមានិតឡាវ បញ្ជាក់អំពីការផ្តល់អំណោយជូនរដ្ឋាភិបាលឡាវ នូវវ៉ាក់សាំងកូវីដ១៩ (ប្រភេទស៊ីណូវ៉ាក់) ​ចំនួន២០ម៉ឺនដូស​ ដើម្បីរួមចំណែកក្នុង​ការប្រយុទ្ធប្រឆាំង​នឹង​ជំងឺ​ដ៏សាហាវ​កូវីដ១៩។ក្នុងសារលិខិតនោះ សម្តេចតេជោ ហ៊ុន សែន បានលើកឡើងថា សម្តេចពិតជាមានសេចក្តីរីករាយ​ជាអតិបរិមា ដែលមានឱកាសបានជួបដោយផ្ទាល់ជាមួយឯកឧត្តម ថងលុន ស៊ីសុលីត អគ្គ​លេខាធិការ​បក្សប្រជាជន​បដិវត្តន៍ឡាវ ក្នុងអំឡុងពេលចូលរួមកិច្ច​ពិគ្រោះយោបល់​រវាងថ្នាក់ដឹកនាំ​គណបក្សរបស់ប្រទេសកម្ពុជា ឡាវ និងវៀតណាម កាលពីថ្ងៃទី ២៦ ខែកញ្ញាឆ្នាំ ២០២១ នៅទីក្រុងហាណូយ។ជំនួបដោយផ្ទាល់នេះ បានអនុញ្ញាតឱ្យយើងធ្វើការពិភាក្សា និងផ្លាស់ប្តូរគ្នាបានយ៉ាងស៊ីជម្រៅ និងប្រកបដោយផ្លែផ្កា ស្តីពីការពង្រឹងចំណងមិត្តភាព និងកិច្ចសហប្រតិបត្តិការរវាង ប្រទេសយើង រួមទាំងដើម្បីដោះស្រាយបញ្ហាប្រឈមរួម។សម្តេចតេជោ បានបញ្ជាក់បន្ថែមទៀតថា «វាពិតជាគួរឱ្យក្រៀមក្រំណាស់ ដែលអស់ពេលជិត​ពីរឆ្នាំ​មកហើយ តែប្រទេសនានាជុំវិញពិភពលោក​នៅតែត្រូវតស៊ូទប់ទល់​នឹងការផ្ទុះឡើងវិញ​នៃជំងឺ​កូវីដ១៩ ដែលបានបន្តបង្កការលំបាកផ្នែកសេដ្ឋកិច្ច និងដាក់សម្ពាធបន្ថែមទៀតដល់​សុខុមាលភាព​របស់ប្រជាជន។ ប្រទេសកម្ពុជា និងឡាវ ក៏មិនខុសពីប្រទេសដទៃទៀតដែរ​ ដោយ​មានការឆ្លង​ជំងឺកូវីត១៩ បំប្លែងថ្មីយ៉ាងឆាប់រហ័សនៅក្នុងសហគមន៍។ក្នុងស្មារតីសាមគ្គីភាព និងមិត្តភាពជាប្រពៃណីរវាងប្រទេសបងប្អូនយើងទាំងពីរ រាជរដ្ឋាភិបាល​កម្ពុជា​សូមផ្តល់ជូនរដ្ឋាភិបាលសាធារណរដ្ឋប្រជាធិបតេយ្យប្រជាមានិតឡាវ នូវអំណោយ​វ៉ាក់សាំង(ប្រភេទស៊ីណូវ៉ាក់)ចំនួន ២០០,០០០ដូស បន្ថែមទៀត ដើម្បីរួមចំណែកដល់ការខិតខំ​ប្រឹងប្រែង​របស់ប្រទេស​ឯកឧត្តម ក្នុងការប្រយុទ្ធប្រឆាំងនឹងជំងឺដ៏សាហាវនេះ»។សូមបញ្ជាក់ថា ជំនួយវ៉ាក់សាំងចំនួន២០ម៉ឺនដូស ដែលផ្តល់ជូនដល់ប្រជាជន និងរដ្ឋាភិបាលឡាវ​នេះគឺ បានផ្តល់​ដោយ​ឯកឧត្តម អ៊ុច បូររិទ្ធ រដ្ឋលេខាធិការក្រសួងការបរទេសកម្ពុជា៕អត្ថបទ ៖ បាន ចក់

អាជីវករផ្សារពោធិវង្ស និងពលរដ្ឋសំណូមពរដល់មន្ទីរបរិស្ថានដោះស្រាយរឿងសំរាមស្អុយ ដែលនាំឲ្យប៉ះពាល់ដល់ការរស់នៅពួកគាត់

2021/09/28 10:35:49 am        323
Facebook Telegram Linkin
បាត់ដំបង ៖ អាជីវករលក់ដូរនៅផ្សារពោធិវង្ស ស្ថិតនៅសង្កាត់ចំការសំរោង ក្រុងបាត់ដំបង ខេត្តបាត់ដំបង បានស្នើរឱ្យអាជ្ញាធរ ក៏ដូចជាមន្ទីរបរិស្ថានខេត្តបាត់ដំបង ជួយដោះស្រាយបញ្ហាសំរាមស្អុយរលួយ ដែលនាំឲ្យប៉ះពាល់ដល់សុខភាពរបស់ពួកគាត់ ។ ប្រជាពលរដ្ឋ និងអាជីវករ ដែលស្ថិតនៅទីនោះ បានឲ្យដឹងថា សំរាមដែលគរស្អុយ​ពេញដង​ផ្លូវភ្លោះ​នេះ គឺមានទាំងអ្នកក្រៅភូមិ និងអ្នកនៅក្នុងភូមិ ហើយបានយកមកបោះចោល​ដោយ​គ្មានការ​ពិចារណា និងក្រុមហ៊ុនប្រមូលសំរាមមិនទាន់ពេលវេលាផងនោះ វាបានបណ្តាលឲ្យស្អុយរលួយ ដែលធ្វើឲ្យប៉ះពាល់ដល់សុខភាព និងការរស់នៅរបស់ពួកគាត់ដែលនៅទីនោះទាំងយប់ទាំងថ្ងៃ។ប្រជាពលរដ្ឋ បានលើកឡើងទៀតថា«សំរាមនេះតែងតែជះខ្លិនស្អុយ ហើយវាបាន​ប៉ះពាល់​ដល់​អ្នករស់នៅក្បែរនេះ ក៏ដូចជាអ្នកធ្វើដំណើរទៀតផងដែរ។ មួយវិញទៀត ពេលភ្លៀងម្តងៗ​សំរាម​មួយចំនួន ក៏បានហូចូលទៅក្នុងស្រែរបស់កសិករនៅជាប់ផ្លូវនោះ»។ទាក់ទងនឹងបញ្ហាសំរាមនេះ លោក ផេង សិទ្ធី អភិបាលក្រុងបាត់ដំបង បានថ្លែងថា មន្ត្រី​ការិយាល័យ​បរិស្ថានតែងតែជំរុញទៅកាន់ក្រុមការងារផ្សារពោធិវង្ស ឱ្យចាត់ចែង​ជាមួយ​ក្រុមហ៊ុន​ដែល​ជាដៃគូប្រមូលសំរាមកុំឱ្យមានការកកស្ទះស្អុយរលួយបែបនេះ។លោក ក៏បានបញ្ជាក់ថា«ការគ្រប់គ្រងទូទៅមិនស្ថិតនៅលើអាជ្ញាធរក្រុងអ្នកចាត់ចែងនោះទេ ដោយ​សារផ្សារមួយនេះ ត្រូវបានដាក់ដេញថ្លៃឱ្យក្រុមហ៊ុនឯកជន ហើយចំពោះបញ្ហាបងប្អូន​ប្រជាពលរដ្ឋ​យកសំរាមចោលតាមផ្លូវ ក្នុងសង្កាត់ចំការសំរោងនោះ លោកតែងតែដឹកនាំក្រុមការងារចុះណែនាំ ប្រមូលដុត និងដាក់ផ្លាកសញ្ញាផាកពិន័យហើយ នៅតែគ្មានប្រសិទ្ធភាព ព្រោះពលរដ្ឋគ្មាន​ការ​សហការ​ជាមួយអាជ្ញាធរ»។យ៉ាងណាក៏ដោយបងប្អូនអាជីវករ និងប្រជាពលរដ្ឋដែលនៅទីនោះ​សូម​សំណូម​ពរ​យ៉ាងទទួច​ដល់​មន្ទីរបរិស្ថាន ជួយដោះស្រាយជូនពួកគាត់ឲ្យបានឆាប់រហ័សផងដែរ ខណៈសំរាមនៅ​ពាសវាលពាសកាល​វាមិនសាកសម​ និងទីក្រុងស្អាតជាងគេរបស់ប្រទេសកម្ពុជា ដោយ​នាំមុខ​ក្រុងសៀមរាប ក្រុងកែប និងក្រុងពោធិ៍សាត់ជាដើមនោះ។សូមបញ្ជាក់ថា កាលពីដើមឆ្នាំ២០១៤កន្លងទៅ គណៈកម្មាធិការជាតិវាយតម្លៃទីក្រុងស្អាត​ បានផ្តល់ចំណាត់ថ្នាក់លេខ១ ទៅឱ្យក្រុងបាត់ដំបង ​ដោយផ្អែកលើកត្តាបរិស្ថាន អនាម័យ សណ្តាប់ធ្នាប់ និងហេដ្ឋារចនាសម្ព័ន្ធ ​ដែលអាចផ្តល់នូវភាពកក់ក្តៅ និងមជ្ឈដ្ឋាន​រស់នៅល្អប្រសើរ​សម្រាប់ប្រជាជន​ និងភ្ញៀវទេសចរជាដើមនោះ៕អត្ថបទ បាន ចក់

កិច្ច​ចរចា​ប្រាក់ឈ្នួល​អប្បបរមា​របស់កម្មករនិយោជិតសម្រាប់ឆ្នាំ២០២២ នឹងត្រូវបញ្ចប់នៅថ្ងៃនេះ

2021/09/28 10:12:59 am        416
Facebook Telegram Linkin
ភ្នំពេញ ៖ តាមការកំណត់ ក្រុមប្រឹក្សាជាតិប្រាក់ឈ្នួលអប្បបរមា បានជួបប្រជុំគ្នា ដើម្បីបញ្ចប់ការកំណត់ប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ២០២២ នៅព្រឹកថ្ងៃទី២៨ ខែកញ្ញា ឆ្នាំ២០២១នេះ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ។ផ្អែកតាមកិច្ចប្រជុំត្រីភាគី ដែលមានតំណាងភាគីកម្មករនិយោជិតចំនួន១៧រូប តំណាងភាគី​និយោជក​ចំនួន១៧រូប និងតំណាងភាគីរាជរដ្ឋាភិបាលចំនួន១៧រូប បានប្រជុំពិភាក្សា​ដោយឈរ​លើគោលការណ៍ប្រជាធិបតេយ្យ ស្មារតីមិត្តភាព សហប្រតិបត្តិការ តម្លាភាព និងឈ្នះ ឈ្នះកាលពីសប្តាហ៍កន្លងទៅនេះ ជាលទ្ធផលភាគីទាំង៣ បានបង្ហាញនូវតួលេខរៀងៗខ្លួន ដោយភាគីកម្មករនិយោជិត (សហជីព) ឯភាពចំនួន ២០៤ដុល្លារ, ភាគីនិយោជកឯកភាពចំនួន ១៨៨ដុល្លារ និងភាគីរាជរដ្ឋាភិបាលបានឯកភាពយកតួលេខ ១៩២ដុល្លារអាម៉េរិក។សូមបញ្ជាក់ថា គិតមកដល់ឆ្នាំ២០២១នេះ ប្រាក់ឈ្នួលអប្បបរមារបស់កម្មករ​និយោជិត​ក្នុង​វិស័យ​វាយនភណ័ណ្ឌ កាត់ដេរ​សម្លៀកបំពាក់ និងផលិតស្បែកមានចំនួន១៩២ដុល្លារអាមេរិក ពោលបានកើនឡើងជាបន្តបន្ទាប់ក្នុងឆ្នាំ១៩៩៧ ដែលមានចំនួនសរុបចំនួន ៤៥ដុល្លារអាម៉េរិក៕អត្ថបទ ៖ ឈិត បូរ៉ាវី 

ពលករខ្មែរវិលត្រឡប់មកពីថៃ ចូលតាមច្រកខេត្តបាត់ដំបងជាបន្តបន្ទាប់ ទោះបីករណីឆ្លងក្នុងសហគមន៍ខេត្តមិនទាន់ថមថយ

2021/09/27 01:42:16 pm        342
Facebook Telegram Linkin
បាត់ដំបង ៖ ពលករខ្មែរបានវិលត្រឡប់មកពីប្រទេសថៃ ចូលតាមច្រកព្រំដែននានា ក្នុងភូមិសាស្រ្តខេត្តបាត់ដំបងជាបន្តបន្ទាប់ ទោះបីករណីឆ្លងជំងឺកូវីដ១៩ ក្នុងសហគមន៍ខេត្តមិនទាន់ថមថយនៅឡើយ។លោក សឿម ប៊ុនរិទ្ធិ អភិបាលរងខេត្ត និងជាអ្នកនាំពាក្យរដ្ឋបាលខេត្តបាត់ដំបង បានថ្លែងថា ការវិលត្រឡប់របស់ពលករខ្មែរមកពីប្រទេសថៃចូលតាមច្រកខេត្តបាត់ដំបង មានជារឿយៗ ក្នុងចំនួនមិនទៀងទាត់នោះទេ ថ្ងៃខ្លះតិច ថ្ងៃខ្លះក៏ច្រើន។លោក បានថ្លែងបន្ថែមថា ចំពោះពលករដែលវិលត្រឡប់មកពីប្រទេសថៃទាំងអស់ ត្រូវបាន​ធ្វើតេស្តរហ័ស​នៅតាមច្រកព្រំដែន ក្នុងនោះក៏បានរកឃើញអ្នកឆ្លងកូវីដ១៩ មួយចំនួនផងដែរ ។អ្នកនាំពាក្យរដ្ឋបាលខេត្តបានថ្លែងបន្តថា ថ្មីៗនេះ ចំនួនអ្នកឆ្លងជំងឺកូវីដ១៩ ក្នុងសហគមន៍​ស្រុកជាប់ព្រំដែនថៃ មានការកើនឡើង ហើយមណ្ឌលព្យាបាលមានភាពចង្អៀតណែន អស់​លទ្ធភាពដាក់អ្នកជំងឺ អាជ្ញាធរខេត្តបានផ្ទេរអ្នកជំងឺជាបន្តបន្ទាប់មក​ទទួលការព្យាបាល​នៅក្នុងក្រុងបាត់ដំបង។ដើម្បីឆ្លើយតបនឹងកំណើនអ្នកឆ្លងជំងឺកូវីដ១៩ ក្នុងសហគមន៍នេះ អាជ្ញាធរខេត្តបានសហការ​ជា​មួយភាគីពាក់ព័ន្ធរៀបចំមណ្ឌលព្យាបាលអ្នកជំងឺកូវីដ១៩ បន្ថែមទៀតជាបន្តបន្ទាប់ ទាំងនៅ​តាម​បណ្ដាស្រុកជាប់ព្រំដែន និងក្នុងក្រុងបាត់ដំបង។គួរកត់សម្គាល់ថា ស្ថានភាពនៃការឆ្លងរីករាលដាលជំងឺកូវីដ១៩ ក្នុងសហគមន៍ខេត្តបាត់ដំបង មួយរយៈពេលចុងក្រោយនេះ មានការកើនឡើង រហូតដល់មានការបិទខ្ទប់វត្តអារាម ផ្សារ និង​ទីតាំងមួយចំនួន ខណៈរដ្ឋបាលខេត្តបានដាក់ចេញនូវវិធានការរដ្ឋបាល ដោយផ្អាកជា​បណ្តោះអាសន្ន​ចំពោះសកម្មភាពការងារ មុខរបរ ឬអាជីវកម្ម ដែលមានហានិភ័យខ្ពស់ នៃការ​ឆ្លងរាលដាល​ជំងឺកូវីដ-១៩ និងការជួបជុំ ឬការប្រមូលផ្តុំមនុស្សជាលក្ខណៈឯកជន ៕

រាជធានីភ្នំពេញ មណ្ឌលព្យាបាលកូវីដ-១៩ ប្រភេទអាល់ហ្វា ដែលតា និងធ្វើចត្តាឡីស័ក មានចំនួន១១ទីតាំង

2021/09/27 11:46:12 am        501
Facebook Telegram Linkin
ភ្នំពេញ ៖ ក្នុងរាជធានីភ្នំពេញ មណ្ឌលថែទាំព្យាបាលអ្នកជំងឺកូវីដ-១៩ ប្រភេទអាល់ហ្វា ប្រភេទដែលតា និងធ្វើចត្តាឡីស័ក មានចំនួន១១ទីតាំង។ នេះបើតាមការបញ្ជាក់របស់ឯកឧត្តម វេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV នាព្រឹកថ្ងៃទី២៧ ខែកញ្ញា ឆ្នាំ២០២១នេះ។ឯកឧត្តម វេជ្ជបណ្ឌិត ងី មានហេង ក៏បានថ្លែងប្រាប់BTV ព័ត៌មាន ទៀតថា ក្រៅពីទីតាំងសម្រាប់​ព្យាបាលអ្នកជំងឺកូវីដ-១៩ ដែលមានស្រាប់ហើយនោះ។ រដ្ឋបាលរាជធានីភ្នំពេញ ក៏បានត្រៀម​រួចជាស្រេចនូវទីតាំងមួយចំនួនទៀត ក្នុងករណីបន្ទាន់ណាមួយកើតរីក​រាលដាលជំងឺកូវីដ-១៩។ ប៉ុន្តែរាជរដ្ឋាភិបាលកម្ពុជា បានចេញសេចកី្តសម្រេចស្តីពីការផ្អាក ការរៀបចំពិធីបុណ្យកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ បន្ទាប់ពិនិត្យឃើញថា ពីរថ្ងៃមកនេះ គឺបិណ្ឌទី១ និងបិណ្ឌទី២ (ថ្ងៃទី២២-២៣ ខែកញ្ញា ឆ្នាំ២០២១) មិនអាចធានាបានការអនុវត្ត​ត្រឹមត្រូវ​តាមវិធាន​ការសុវតិ្ថភាពសុខាភិបាល។រដ្ឋបាលរាជធានីភ្នំពេញ បានឆ្លើយតបទាន់ពេលវេលាមិនមានការព្រួយបារម្ភនោះទេ ដោយ​ក្រុមការងារ​គ្រូពេទ្យ បានចុះយកសំណាកលើព្រះសង្ឃ តាជី យាយជី ដោយរកឃើញវិជ្ជមាន​កូវីដ១៩ ក្រុមការងារគ្រូពេទ្យ ក៏បានយកគាត់ទៅកាន់មណ្ឌលព្យាបាលកូវីដ-១៩ និងធ្វើចត្តាឡីស័ក រួចរាល់ហើយដែរ។ បច្ចុប្បន្ននេះក្នុងរាជធានីភ្នំពេញ អ្នកជំងឺកូវីដ-១៩ ប្រភេទដែលតា មានចំនួនកើនឡើង​ជាងអ្នក​ជំងឺកូវីដ-១៩ ប្រភេទអាល់ហ្វា ប៉ុន្តែរាជរដ្ឋា ភិបាលកម្ពុជា ក៏ដូចជាក្រសួងសុខាភិបាល និងរដ្ឋបាលរាជ​ធានី​ភ្នំពេញ បានគិតគូរទុកជាមុន ថាស្ថានភាពនៃការឆ្លងវីរុសកូវីដ១៩បំប្លែងថ្មី ប្រភេទដែលតា នឹងមកដល់។ និយាយដោយឡែកដើម្បីការពារ ទប់ស្កាត់ ការឆ្លងរីករាលដាលមេរោគកូវីដ-១៩ គឺត្រូវអនុវត្តវិធានការសុខាភិបាលឲ្យបានល្អ។ ទន្ទឹមនឹងនោះយើងក៏មានមណ្ឌលថែទាំព្យាបាលជំងឺកូវីដ-១៩ ប្រភេទអាល់ហ្វា ចំនួន៦ទីតាំង មណ្ឌលព្យាបាលកូវីដ-១៩ បំប្លែងថ្មី ប្រភេទដែលតា មានចំនួន០៤ទីតាំង និងមណ្ឌលធ្វើចត្តាឡីស័ករាជធានីភ្នំពេញ ព្រែកព្នៅ ចំនួន០១ទីតាំង។ក្នុងនោះមនី្ទរសុខាភិបាលរាជធានីភ្នំពេញ នៃរដ្ឋបាលរាជធានីភ្នំពេញ មានក្រុមការងារគ្រូពេទ្យ មន្រី្តជាប់កិច្ចសន្យា និងអ្នកស្ម័គ្រចិត្ត មានចំនួនជាង១៥០០នាក់ ក្នុងនោះយើងមានក្រុមឆ្លើយតបបន្ទាន់ជាង៤០០នាក់ និងអ្នកធ្លាប់ចូលព្យាបាលអ្នកជំងឺកូវីដ-១៩ មានចំនួន២០៤នាក់។ឯកឧត្តម វេជ្ជបណ្ឌិត ងី មានហេង បានបញ្ជាក់ទៀតថា ក្នុងមូលដ្ឋានខណ្ឌទាំង១៤ រាជធានីភ្នំពេញ​គិតមកដល់ថ្ងៃនេះ កុមារអាយុចាប់ពី៦ឆ្នាំ រហូតដល់ក្រោម១២ឆ្នាំ បានមកទទួលការចាក់វ៉ាក់សាំង​បង្ការជំងឺកូវីដ-១៩ ដូសទី១ ប្រភេទស៊ីណូវ៉ាក់ បានចំនួនជាង១៥ម៉ឺននាក់ ក្នុងចំណោមកុមារជាង​ ២២ម៉ឺននាក់ ស្ថិតក្រោមរដ្ឋបាលរាជធានីភ្នំពេញ៕អត្ថបទ រដ្ឋា 

អាជ្ញាធរជាតិអប្សរា រកឃើញព្រះសិរមេទេវតា​ព្រះភ័ក្រ្ត​៤ នៅខ្លោងទ្វារតាកាវ

2021/09/27 11:28:29 am        808
Facebook Telegram Linkin
សៀមរាប ៖ រូបចម្លាក់ព្រះសិរមេទេវតា ត្រូវបានក្រុមការងារជួសជុលខ្លោងទ្វារតាកាវ ប្រទះឃើញកប់ក្នុងដីនៅក្បែរខឿនជ្រុងឦសាន នៃខ្លោងទ្វាតាកាវ កាលពីថ្មីៗនេះ។ រូបព្រះសិរមេទេវតាព្រះភ័ក្រ្ត៤ ដែលបានរកឃើញមានព្រះភ័ក្រ្ត២ត្រឹមពាក់កណ្តាលច្រមុះចុះក្រោម។ចំពោះចម្លាក់ព្រះសិរទេវតា ដែលបានរកឃើញនេះ ក្រុមការងារបានយកទៅធ្វើការផ្គុំសាកល្បង​ជាមួយ​នឹងចម្លាក់ស្មាទេវតា ដើម្បីផ្ទៀងផ្ទាត់ ជាលទ្ធផលចម្លាក់ព្រះភ័ក្រ្តដែលបានរកឃើញ​នោះពិតជាត្រូវគ្នាជាមួយនឹងតួខ្លួនមេទេវតាប្រាកដមែន។បន្ទាប់ពីផ្គុំរួចរាល់ហើយ ក្រុមការងារបានសហការជាមួយ​ នឹងនគរបាលការពារបេតិកភណ្ឌ​ក្នុង​តំបន់អង្គរ ដើម្បីយកចម្លាក់ព្រះភ័ក្រ្តនោះ មករក្សាទុកនៅទីតាំងការដ្ឋានខ្លោងទ្វារតាកាវ ដើម្បីធ្វើការជួសជុលឡើងវិញ៕អត្ថបទ ៖ ឈិត សាវី 

កម្ពុជានឹងមានសុវត្ថិភាព និងទំនុកចិត្តពីភ្ញៀវទេសចរណ៍ឡើងវិញ ដោយសារល្បឿន​នៃការ​ចាក់វ៉ាក់​សាំង

2021/09/27 11:21:29 am        847
Facebook Telegram Linkin
ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី បានលើកឡើងថា ដោយសារ​ល្បឿននៃការចាក់វ៉ាក់សាំងនៅកម្ពុជា សម្តេច​មាន​សុទិដ្ឋិនិយមថា គោលដៅ​ទេសចរណ៍​នៅកម្ពុជា នឹងត្រូវធានាបាននូវសុវត្ថិភាព ទំនុកចិត្ត និងភាពជឿជាក់របស់ទេសចរជាតិ និងអន្តរជាតិ ឡើងវិញនាពេលឆាប់ៗ​ខាងមុខនេះ ។យោងតាមសាលិខិតរបស់សម្តេចតេជោ ហ៊ុន សែន នាយករដ្ឋមន្រ្តី ក្នុងឱកាសអប់អរសាទរ​ទិវាទេសចរណ៍​ពិភពលោក ឆ្នាំ២០២១ក្រោមវិធានបទ​«ទេសចរណ៍សម្រាប់​កំណើនប្រកប​ដោយបរិយាប័ន្ន» ដែលបានចេញនាព្រឹកថ្ងៃទី២៧ ខែកញ្ញា ឆ្នាំ២០២១នេះ បានឲ្យដឹងថា «យោងលើល្បឿននៃការចាក់វ៉ាក់សាំងនៅកម្ពុជា យើងជឿជាក់ថា គោលដៅទេសចរណ៍​កម្ពុជា​នឹងត្រូវបានមើលឃើញថា ពិតជាធានាបាននូវ សុវត្ថិភាព ទំនុកចិត្ត និងភាពជឿជាក់របស់​ទេសចរណ៍ជាតិ និងអន្តរជាតិឡើងវិញ។កត្តានេះរួមផ្សំនឹងការទទួលយកនូវការរស់នៅក្នុងគន្លងប្រក្រតីថ្មី ដោយប្រកាន់ខ្ជាប់នូវវិធានការ​ទប់ស្កាត់​នឹងការឆ្លងមេរោគកូវីដ១៩ នឹងជំរុញឲ្យកម្ពុជា​អាចបើកឡើងវិញជាជំហានៗ​នូវសកម្មភាពទេសចរណ៍ផ្ទៃក្នុង និងអន្តរជាតិ ដោយ តម្កល់សុខភាពសាធារណៈជាអាទិភាព»។សម្តេចតេជោ បានបញ្ជាក់បន្ថែមថា ស្ថិតនៅក្នុងភាព​​សុទិដ្ឋិនិយម​នេះ អាជ្ញាធរពាក់ព័ន្ធគ្រប់​លំដាប់ថ្នាក់ ផ្នែកឯកជន និងភាគីពាក់ព័ន្ធនានាត្រូវផ្តល់កិច្ចសហការគាំទ្រ​ចំពោះការរៀបចំ​ផែនការ​យុទ្ធសាស្រ្ត ក្នុង ការត្រៀមបើកទទួលទេសចរណ៍ាសុវត្ថិភាពនាពេលខាងមុខនេះផងដែរ។តាមរយៈសាលិខិតនេះ សម្តេចតេជោ នាយករដ្ឋមន្រ្តី ក៏បានលើកឡើងផងដែរថា បន្ទាប់​ពីវិបត្តិកូវីដ១៩ សម្តេចយល់ឃើញថា និន្នាការ​ទេសចរណ៍នឹងមានសភាពខុសពីមុន ពោល​គឺការគិតគូរអំពីសុវត្ថិភាព និងផាសុកភាពនឹងក្លាយជាកត្តាអាទិភាពក្នុងការសម្រេចិត្ត​ជ្រើសរើស​គោលដៅធ្វើដំណើរកំសាន្ត។ ក្នុងន័យនេះសម្តេចតេជោ បានលើកទឹកចិត្ត និងគាំទ្រនូវការដាក់ចុះយុទ្ធនាការ«កម្ពុជាសុវត្ថិភាព Cambodia safe» ដើម្បីជាមុំយុទ្ធសាស្រ្តទាក់ទាញទេសចរផ្ទៃក្នុង និងអន្តរជាតិក្នុងដំណាក់កាល​នៃការបើកឡើងវិញ និងពេលអនាគតនោះ។យ៉ាងណាក៏ដោយសម្តេចតេជោ ហ៊ុន សែន នាយករដ្ឋមន្រ្តីបានបញ្ជាក់ផងដែរថា បើទោះបីជា​បច្ចុប្បន្ននេះ​ប្រទេសកម្ពុជាមានការជឿនលឿនខ្លាំងលើការចាក់វ៉ាក់សាំងក្តី តែកម្ពុជានៅតែស្ថិតក្នុង​ភាពផុយស្រួយ ហើយយើងទាំងអស់គ្នាត្រូវបន្តចូលរួមអនុវត្តវិធានរដ្ឋបាល និងសុខាភិបាល​តទៅទៀត ដោយសេចក្តីអត់ធ្មត់ ដើម្បីជាគ្រឹះរឹងមាំ​នៃការបើកសកម្មភាពទេសចរណ៍ ក៏ដូចជា​សកម្មភាពសេដ្ឋកិច្ច និងសង្គមផ្សេងៗ ទៀតឡើងវិញប្រកបដោយសុវត្ថិភាព និងការទទួលខុសត្រូវ​ជាដើមនោះ៕អត្ថបទ ៖ បាន ចក់

សម្តេចតេជោ លើកឡើងនូវយុទ្ធសាស្ត្រ៤ ដើម្បីបើកទេសចរណ៍ឡើងវិញ

2021/09/27 10:47:42 am        274
Facebook Telegram Linkin
ភ្នំពេញ ៖ ថ្ងៃទី២៧ខែកញ្ញានេះ ជាទិវាទេសចរណ៍ពិភព លោកឆ្នាំ២០២១ ក្រោមប្រធានបទ​«ទេសចរណ៍សម្រាប់កំណើនប្រកបដោយបរិយាបន្ន» សម្តេចតេជោ ហ៊ុន សែន នាយករដ្ឋមន្ត្រី​ក៏​បានផ្ញើសារលិខិតចូលរួមអបអរសាទរ ហើយក៏បានចែក​រម្លែក​នូវការយល់ឃើញជាយុទ្ធសាស្ត្រ​៤ចំណុច​ដើម្បីបើកទេសចរណ៍ឡើងវិញ។ក្នុងសារលិខិត សម្តេចបាន បញ្ជាក់ថា ជាការពិតណាស់​វិស័យទេសចរណ៍ ដែលជា​វិស័យ​ពឹងផ្អែក​លើការធ្វើដំណើរ បាននិងកំពុងទទួលរង ផលប៉ះពាល់យ៉ាងដំណំពីវិបត្តិជំងឺរាតត្បាតកូវីដ-១៩ លើគ្រប់ផ្នែកទាំងអស់នៃខ្សែសង្វាក់ផ្គត់ផ្គង់ ក្នុងកម្រិតពិភពលោក ឆ្នាំ២០២០ ចំនួនទេសចរ​អន្តរជាតិ​បានធ្លាក់ចុះរហូតដល់ ៧៣% ដែលធ្វើឱ្យប៉ះពាល់ការងារផ្ទាល់ពី១០០ ទៅ១២០លាន និងការងារមិនផ្ទាល់ជាច្រើនរយលាននាក់ថែមទៀត។ ដោយឡែកនៅកម្ពុជា ចំនួនទេសចរអន្តរជាតិបានថយចុះរហូតដល់ ៨០,២%ប៉ះពាល់ការងារផ្ទាល់​ជាង១១ម៉ឺននាក់ និងការងារមិនផ្ទាល់រាប់ម៉ឺននាក់ទៀត ហើយនិន្នាការនេះនឹងបន្តធ្លាក់​ចុះតទៅ​ទៀតក្នុងឆ្នាំ២០២១ នេះ។​​ដើម្បីចូលរួមអបអរសាទរទិវាទេសចរណ៍ពិភពលោកឆ្នាំ២០២១ ក្រោមប្រធានបទ "ទេសចរណ៍​ដើម្បី កំណើនប្រកបដោយបរិយាបន្ន»​សម្តេចក៏បានចែករំលែក​ការយល់ឃើញ​ និង​គូសបញ្ជាក់​នូវយុទ្ធសាស្ត អាទិភាពមួយចំនួន ដើម្បីចាប់ផ្តើមបើកឡើងវិញនូវសកម្មភាពទេសចរណ៍ជាតិ និងអន្តរជាតិនាពេលខាងមុខ ឆ្ពោះទៅការអភិវឌ្ឍទេសចរណ៍កម្ពុជាប្រកបដោយចីរភាព បរិយាបន្ន និងមានភាពធន់នឹងវិបត្តិកាន់តែប្រសើរ ៖១- យោងលើល្បឿននៃការចាក់វ៉ាក់សាំងនៅកម្ពុជា យើងជឿជាក់ថា គោលដៅទេសចរណ៍​កម្ពុជា​នឹង ត្រូវបានមើលឃើញថា ពិតជាធានាបាននូវសុវត្ថិភាព ទំនុកចិត្ត និងភាពជឿជាក់របស់​ទេសចរជាតិ និងអន្តរជាតិ ឡើងវិញ។ កត្តានេះ រួមផ្សំនឹងការទទួលយកនូវការរស់នៅក្នុង​គន្លង​ប្រក្រតីភាពថ្មី ដោយប្រកាន់ខ្ជាប់នូវ វិធានសុខាភិបាលទប់ស្កាត់នឹងការឆ្លងជំងឺកូវីដ-១៩ នឹងជំរុញ​ឱ្យកម្ពុជាអាចបើកឡើងវិញជាជំហានៗនូវសកម្មភាព ទេសចរណ៍ផ្ទៃក្នុងនិងអន្តរជាតិ ដោយតម្កល់​សុខភាពសាធារណៈជាអាទិភាព។ ស្ថិតក្នុងភាពសុទិដ្ឋិនិយមនេះ អាជ្ញាធរពាក់ព័ន្ធ​គ្រប់លំដាប់ថ្នាក់ ផ្នែកឯកជន និងភាគីពាក់ព័ន្ធនានា ត្រូវផ្តល់កិច្ចសហការគាំទ្រចំពោះការរៀបចំផែនការ យុទ្ធសាស្ត្រ ក្នុងការត្រៀមបើកទទួលទេសចរណ៍សុវត្ថិភាព នាពេលខាងមុខ។ ២- កន្លងមកវិស័យទេសចរណ៍បានបំពេញតួនាទីយ៉ាងសកម្ម ជាម៉ាស៊ីនអូសទាញកំណើនសម្រាប់ វិស័យសេដ្ឋកិច្ច-សង្គមដ៏ទៃទៀត តាមរយៈឥទ្ធិពលមេគុណសេដ្ឋកិច្ចពី៤ទៅ៥ដង និងមេគុណឥទ្ធិពលការងារដ៏ខ្ពស់ដោយការងារផ្ទាល់ ១ ក្នុងវិស័យទេសចរណ៍អាចបង្កើតការងារមិនផ្ទាល់ចំនួន ១,៥ (មួយកន្លះ)។ ក្នុងន័យនេះ សម្តេចបានសូមលើកទឹកចិត្តដល់ស្ថាប័នពាក់ព័ន្ធ អាជ្ញាធរមូលដ្ឋាន ផ្នែកឯកជន យុវជន និងដៃគូអភិវឌ្ឍន៍ជាតិនិងអន្តរជាតិ ចូលរួមជំរុញការបង្កើត និងផ្គត់ផ្គង់សេវាកម្មទេស​ចរណ៍ឱ្យកាន់តែសម្បូរបែប តាមរយៈ ការដាក់ចុះនូវកម្មវិធីយុវជននិងធុរកិច្ចក្នុងវិស័យទេសចរណ៍​កម្មវិធីជំរុញការបង្កើតថ្មីនិងនវានុវត្តន៍ទេសចរណ៍ ជនបទ ព្រមទាំងលើកកម្ពស់ការយល់ដឹង​និង​កសាងសមត្ថភាពផ្នែកទេសចរណ៍ឌីជីថលដល់ថ្នាក់មូលដ្ឋាន ក្រោមការសម្របសម្រួល​និងដឹកនាំ​របស់ក្រសួងទេសចរណ៍ និងក្រោមកិច្ចសហប្រតិបត្តិការពីអង្គការទេសចរណ៍ ពិភពលោក សហគមន៍​អន្តរជាតិ និងដៃគូអភិវឌ្ឍនានា។៣- វិបត្តិកូវីដ-១៩ បានធ្វើឱ្យមានការចាកចេញពីការងារ ខ្សែសង្វាក់ផ្គត់ផ្គង់ទេសចរណ៍គ្រប់កម្រិត ត្រូវផ្អាកស្ទើរទាំងស្រុង ដែលទាំងនេះបានបង្កជាឧបសគ្គនៃដំណើរការស្តារឡើងវិញ​នៃវិស័យទេសចរណ៍ នាពេលខាងមុខ។ ក្នុងន័យនេះ សម្តេចបានអំពាវនាវដល់ក្រសួងស្ថាប័នពាក់ព័ន្ធ ត្រូវសហការកាន់តែសកម្មថែម ទៀតជាមួយក្រសួងទេសចរណ៍ ធ្វើការបណ្តុះបណ្តាលជំនាញបន្ថែមនិងជំនាញថ្មីដល់យុវជន ស្របតាម យន្តការអភិវឌ្ឍន៍ជំនាញទេសចរណ៍ប្រកបដោយចីរភាព។៤- បន្ទាប់ពីវិបត្តិកូវីដ-១៩ សម្តេចយល់ឃើញថា និន្នាការទេសចរណ៍នឹងមានសភាពខុសពីមុន ពោលគឺ ការគិតគូរអំពីសុវត្ថិភាពនិងផាសុកភាពនឹងក្លាយជាកត្តាអាទិភាព​ក្នុងការសម្រេច​ចិត្ត​ជ្រើសរើសគោលដៅ ធ្វើដំណើរកំសាន្ត។ ក្នុងន័យនេះ សម្តេចក៏បានលើកទឹកចិត្ត និងគាំទ្រនូវការដាក់ចុះយុទ្ធនាការ "កម្ពុជាសុវត្ថិភាព - Cambodia Safe" ដើម្បីជាមុំយុទ្ធសាស្ត្រទាក់ទាញទេសចរផ្ទៃក្នុង​និងអន្តរជាតិក្នុងដំណាក់​កាល​នៃការបើកឡើងវិញ និងពេលអនាគត។ទោះយ៉ាងណាក៏ដោយ សម្តេចបន្តថា បងប្អូនជនរួមជាតិ ក្មួយៗ ចៅៗ ជាទីស្រឡាញ់ ! បច្ចុប្បន្ន ទោះជាមានការជឿនលឿនខ្លាំងលើការចាក់វ៉ាក់សាំងនៅកម្ពុជាយើងនៅតែស្ថិតក្នុងភាព ផុយស្រួយ ហើយយើងទាំងអស់គ្នាត្រូវបន្តចូលរួមអនុវត្តវិធានរដ្ឋបាលនិងសុខាភិបាលតទៅទៀត ដោយ សេចក្តីអត់ធ្មត់ ដើម្បីជាគ្រឹះរឹងមាំនៃការបើកសកម្មភាពទេសចរណ៍ ក៏ដូចជាសកម្មភាពសេដ្ឋកិច្ច​និងសង្គម ផ្សេងៗទៀតឡើងវិញប្រកបដោយសុវត្ថិភាព និងការទទួលខុសត្រូវ៕អត្ថបទ មុត សុទ្ធ

សម្ដេចតេជោ នាយករដ្ឋមន្រ្តី ទទួលយកការរិះគន់ពីក្រុមប្រឆាំងលើបញ្ហាបិទវត្តមិនឲ្យកាន់បិណ្ឌ និងភ្ជុំបិណ្ឌជាបណ្តោះអាសន្ន

2021/09/25 11:19:38 am        708
Facebook Telegram Linkin
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តី បានទទួលយកការ​តិះដៀល​របស់ក្រុមប្រឆាំង​មួយ​ចំនួន​ដែលគ្មានហេតុផល ក្នុងករណីដែលសម្តេច​ បានសម្រេចបិទវត្តអារាមទូទាំងប្រទេស​មិន​ឲ្យប្រារព្ធ​ពិធីបុណ្យកាន់បិណ្ឌ​ និងភ្ជុំបិណ្ឌនេះ គឺសម្តេចធ្វើឡើងក្នុងគោលបំណងការពារសុខភាព និងអាយុជីវិតរបស់បងប្អូនទាំងអស់ ហើយក៏មិនចង់ឃើញប្រជាពលរដ្ឋខ្មែរយើងស្លាប់​ដោយសារ​មេរោគកូវីដ១៩ ច្រើនដូចប្រទេសដទៃផងដែរ។ថ្លែងតាមរយៈសារពិសេសមួយទៅកាន់ជនរួមជាតិ នាព្រឹកថ្ងៃទី២៥ ខែកញ្ញា ឆ្នាំ២០២១នេះ សម្តេចតេជោ ហ៊ុន សែន បានលើកឡើងថា រាជរដ្ឋាភិបាលកម្ពុជាមិនបានបោះបង់​ចោល​នូវពិធីបុណ្យ ឬប្រពៃណីរបស់ខ្មែរនោះទេ ប៉ុន្តែក្នុងបរិបទនេះ គឺត្រូវបង្ខំចិត្តផ្អាកជាបន្ទាន់ ដើម្បី​សុខភាព និងអាយុជីវិតរបស់បងប្អូនប្រជាពលរដ្ឋខ្មែរទាំងអស់ ដោយមិនបានបិទសិទ្ធ និងហាមប្រាមមិនឲ្យធ្វើបុណ្យទាននោះឡើយ។យ៉ាងណាក៏ដោយសម្តេចតេជោ ហ៊ុន សែន នាយករដ្ឋមន្រ្តី ក៏បានធ្វើការសូម​អភ័យទោស និង​សម្តែង​ការសោកស្តាយចំពោះការផ្អាកមិនឲ្យប្រជាពលរដ្ឋ ​និងពុទ្ធបរិស័ទ ប្រារព្ធពិធីបុណ្យ​កាន់បិណ្ឌ និងភ្ជុំបិណ្ឌ ដោយសារតែបង្ការទប់ស្កាត់ការរីករាលដាលនូវមេរោគកូវីដ១៩នោះ។ សម្តេច បានថ្លែងទៀតថា ប្រសិនបើបងប្អូនប្រជាពលរដ្ឋនៅមានជីវិតបងប្អូនអាច​មាន​លទ្ធភាព​ធ្វើបុណ្យបានយូរអង្វែង និងរាប់សិបឆ្នាំទៅមុខទៀតផងដែរ។បើតាមការអះអាងរបស់សម្តេចតេជោ ហ៊ុន សែន បានឲ្យដឹងផងដែរថា ក្រោយក្រុមគ្រូ ពេទ្យយក​សំណាក​នៅតាមវត្តនានា ក្នុងរាជធានីភ្នំពេញ បានបង្ហាញឲ្យឃើញថា វត្តស្ទើតែពាក់កណ្តាល​បាន​រកឃើញវជ្ជមានមេរោគកូវីដ១៩ ​ហើយក្នុងនោះ ក៏មានវត្តឧណ្ណាឡោម ដែលជាវត្តស្នាក់​នៅ​របស់​សម្តេចសង្ឃផងដែរ៕អត្ថបទ ៖ បាន ចក់

ឯកឧត្តមបណ្ឌិត ហ៊ឺ វីរៈ និងលោកជំទាវ បាន​បរិច្ចាគអង្ករ ១០០តោន ​ជា​ទាន​សប្បុរស ដល់បណ្តាវត្តដែលខ្វះខាតក្នុងបរិបទកូវីដ-១៩

2021/09/25 04:34:37 am        565
Facebook Telegram Linkin
ភ្នំពេញ ៖ ថ្ងៃទី២៤ ខែកញ្ញា ម្សិលមិញនេះ ឯកឧត្តមបណ្ឌិត ហ៊ឺ វីរៈ រដ្ឋលេខាធិការក្រសួងវប្បធម៌ និងវិចិត្រសិល្បៈ និងជាអនុប្រធានគណៈកម្មាធិការជាតិរៀបចំបុណ្យជាតិ-អន្តរជាតិ និងលោកជំទាវ យី សុភា បានបរិច្ចាគអង្ករជាទានរបស់សប្បុរសដល់បណ្ដាលវត្តដែលខ្វះខាតក្នុងបរិបទកូវីដ១៩ ដែលកំពុងរាតត្បាតជាសកល។ដោយបានមើលឃើញពីទុក្ខលំបាកក្នុងវិស័យពុទ្ធសាសនា មានវត្តចំនួន៥,០២៤ វត្ត ព្រះសង្ឃ​មានចំនួន ៧១,៦១០ អង្គ ជាពិសេសក្នុងស្ថានភាពដែលព្រះសង្ឃ​ជួបការ​លំបាក​ខ្វះខាត​ដោយសារកូវីដ១៩ ឯកឧត្តម និងលោកជំទាវ​កើតមានសេចក្តី​សោមនស្ស​ជ្រះថ្លា​បរិច្ចាគ​នូវ​អង្ករ​ចំនួន ១០០តោន គិតជាទឹកប្រាក់ ១៩០.០០០.០០០រៀល។អំណោយជា​ទាន​សប្បុរសទាំងនេះ ប្រគល់ជូន​ តាមរយៈគណៈសង្ឃ​នាយក​គណៈមហានិកាយ​នៃព្រះរាជាណាចក្រកម្ពុជា ​ដែលមានសម្តេចព្រះពោធិវ័ង្ស អំ លឹមហេង ព្រះសង្ឃនាយករងទី១ ជាប្រធានចាត់ចែងទៅតាមទីវត្តអារាមទាំងឡាយ ក្នុងព្រះរាជាណាចក្រកម្ពុជា ដើម្បីជួយ​សម្រាល​បន្ទុក​ដល់រាជរដ្ឋាភិបាលកម្ពុជា ឱ្យទាន់ពេលវេលា បន្ទាប់ពីដាក់ចេញនូវសេចក្តីសម្រេច​ស្តីពី​ការ​​ផ្អាក​ការរៀបចំពិធីបុណ្យកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។ក្នុងកាលៈទេសៈនេះ ឯកឧត្តមបណ្ឌិត និងលោកជំទាវ មានក្តីសង្ឃឹមយ៉ាងមុតមាំថា​ ប្រទេសកម្ពុជា​យើងនឹងឆ្លងផុតពេលវេលាដ៏លំបាកនេះ ក្នុងពេលឆាប់ៗ ក្រោមកិច្ចដឹកនាំដ៏ឈ្លាសវៃ​របស់​សម្តេចតេជោ ហ៊ុន សែន ដែលជាប្រមុខរាជរដ្ឋាភិបាលកម្ពុជានៃយើង។ជាមួយគ្នានេះ ឯកឧត្តមបណ្ឌិត និងលោកជំទាវ សូមប្រគេនជូនជាដំណឹងដល់​គ្រប់ព្រះគ្រូចៅ​ឣធិការវត្ត​ដែលជួបការខ្វះខាតពិតប្រាកដ សូមទំនាក់ទំនង​ទៅកាន់​ព្រះគ្រូឣនុគណគ្រប់ស្រុក ដើម្បី​ទទួល​យកនូវទេយ្យវត្ថុ ដែលបានរៀបរាប់ខាងលើ៕អត្ថបទ ៖ មុត សុទ្ធ

បណ្ដាញសង្គម

ព័ត៌មានថ្មីៗ

ព្រែកជីកប៉ាណាម៉ា នឹងចាប់ផ្តើមដេញថ្លៃសម្រាប់ការសាងសង់ និងប្រតិបត្តិការកំពង់ផែចំនួនពីរ
08/15/2025 04:08 PM
Facebook Telegram Linkin
គណៈកម្មការ UN៖ ទំនងជាមានការប្រព្រឹត្តិឧក្រិដ្ឋកម្មសង្គ្រាម អំឡុងការសម្លាប់រង្គាល នៅឆ្នេររបស់ស៊ីរី
08/15/2025 04:08 PM
Facebook Telegram Linkin
EU ជំរុញឲ្យអ៊ីស្រាអែល «បោះបង់» ផែនការសាងសង់ទីលំនៅ ក្នុងតំបន់ West Bank
08/15/2025 03:08 PM
Facebook Telegram Linkin
នាយករដ្ឋមន្ត្រីជប៉ុន បង្ហាញ «ការសោកស្ដាយ» ក្នុងសម័យសង្រ្គាម តែដើរតាមនយោបាយស្ដាំនិយម
08/15/2025 03:08 PM
Facebook Telegram Linkin
នាយករដ្ឋមន្ត្រីឥណ្ឌា ប្តេជ្ញាការពារកសិករ និងជំរុញការពឹងលើខ្លួនឯង ស្របពេលមានភាពតានតឹងផ្នែកពន្ធគយជាមួយអាមេរិក
08/15/2025 03:08 PM
Facebook Telegram Linkin
រដ្ឋមន្ត្រី៖ មន្ត្រីនគរបាលយ៉ាងតិច ៤២នាក់ រងរបួស និងមនុស្ស ៣៧នាក់ត្រូវឃាត់ខ្លួន អំឡុងពេលកុបកម្មនៅស៊ែរប៊ី
08/15/2025 03:08 PM
Facebook Telegram Linkin
មនុស្សម្នាក់ ស្លាប់និង១០នាក់ រងរបួស ក្នុងការវាយប្រហារដោយដ្រូនរបស់អ៊ុយក្រែន ទៅលើតំបន់Kursk របស់រុស្ស៊ី
08/15/2025 03:08 PM
Facebook Telegram Linkin
រយៈពេល ២០ឆ្នាំ បន្ទាប់ពីដកកងទ័ពចេញពីហ្កាហ្សា អ៊ីស្រាអែលកំពុងជាប់ក្នុងសង្គ្រាមជិត ២ឆ្នាំ ជាមួយក្រុមហាម៉ាស
08/15/2025 03:08 PM
Facebook Telegram Linkin
មន្រ្តីវិមានក្រឹមឡាំង៖ ជំនួបលោក Putin-Trump នៅថ្ងៃសុក្រនេះ ផ្ដោតលើការដោះស្រាយវិបត្តិអ៊ុយក្រែន
08/15/2025 03:08 PM
Facebook Telegram Linkin
នាយឧត្តមសេនីយ៍ ស ថេតរំលឹកឲ្យកម្លាំងបង្កើនការយកចិត្តទុកដាក់ទប់ស្កាត់ និងបង្ក្រាបបទល្មើសគ្រឿងញៀន
08/15/2025 03:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.