នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុង​ការចូលរួ​ម​ដោះស្រាយ​បញ្ហារួម​សម្រាប់​ជាតិ
កម្ពុជានឹងមានវត្តមានរោងចក្រដំឡើងរថយន្តអគ្គិសនីថ្មីមួយទៀត នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ ខណៈត្រឹមឆ្នាំ២០២៥ កំណើនរថយន្តអគ្គិសនីចុះបញ្ជីមានចំនួន ៦,១២៩គ្រឿង កើនឡើង ១៧២% បើធៀបឆ្នាំ២០២៤
ទូតចិនអបអរការដាក់ឱ្យពលរដ្ឋឆ្លងកាត់ស្ពានមិត្តភាពកម្ពុជា-ចិន មេគង្គក្រចេះនៅដើមខែក្រោយ ខណៈមិត្តចិនប្រកាសបន្តពង្រីកការសាងសង់ស្ពាន និងផ្លូវនៅកម្ពុជាឥតឈប់ឈរ
គម្រោងពង្រីក និងលើកកម្រិតផ្លូវជាតិលេខ៧ (ស្គន់-ក្រុងកំពង់ចាម) ជាបួនគន្លង សម្រេចលទ្ធផលការងារបានជិត ៩០%ហើយ គិតត្រឹមខែមីនា ឆ្នាំ២០២៦នេះ

នយោបាយ​ និង ការអភិវឌ្ឍន៍

សម្តេចធិបតី ហ៊ុន ម៉ាណែត ដាក់បទបញ្ជាឱ្យអនុវត្តបង្ក្រាបក្មេងទំនើងដូចភ្លៀងរលឹម

2024/06/06 11:28:48 am        167
Facebook Telegram Linkin
អំពីបញ្ហាក្មេងទំនើងដែលគេបានមើលឃើញមានសកម្មភាពកក្រើកនៅតាមទីសាធារណៈរាជធានី ខេត្ត ហើយត្រូវបានរាជរដ្ឋាភិបាលបាននិងកំពុងចាត់វិធានក្តៅបង្ក្រាបដោយមិនលើកលែងនោះ សម្តេចធិបតី ហ៊ុន ម៉ាណែត នាយករដ្ឋមន្ត្រី នៅតែរំលឹកដោយដាក់បទបញ្ជាឱ្យអាជ្ញាធរ កងកម្លាំងមានសមត្ថកិច្ចអនុវត្តបង្ក្រាបដូចភ្លៀងរលឹម។សម្តេចធិបតីនាយករដ្ឋមន្ត្រីដាស់តឿនរម្លឹកទៅកាន់មន្ត្រីមានសមត្ថកិច្ចបែបនេះ ក្នុងពេលសម្តេច​បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការកំពង់ផែពហុបំណងកំពត ក្រោមទុនវិនិយោគរបស់ក្រុមហ៊ុនកំពតផត ​ដែលបានសាងសង់នៅទីតាំងភូមិសាស្ត្រភូមិគីឡូ១២ សង្កាត់កោះតូច និងសង្កាត់បឹងទូក ​ក្រុងបូកគោ ខេត្តកំពត ដំណាក់កាលទី១ នាព្រឹកថ្ងៃទី៦ ខែមិថុនានេះ។សម្តេចបានគូសបញ្ជាក់ថា ដើម្បីជាចំណែកឈានទៅបំបាត់ក្មេងទំនើង គេចសាលាជាដើម សម្តេច​បានសម្រេចឱ្យមានការអនុវត្តសាកល្បង ដើម្បីពង្រឹងការអប់រំថ្នាក់បឋមសិក្សាបន្ថែម​ម៉ោងបំប៉ន​នៅពេលល្ងាច២ម៉ោងទៀត ដើម្បីពង្រឹងវិន័យ និងគុណភាពការសិក្សារបស់​សិស្ស​ចៀងវាង​សិស្សគេចសាលាដើរលេងច្រើន ​ដែលនាំឱ្យកើតមានក្រុមបងធំ បងតូច៕

សម្ដេចធិបតី អំពាវនាវពលរដ្ឋបន្តគាំទ្រគម្រោងព្រែកជីកហ្វូណនតេជោ និងប្រឆាំងបុគ្គលប៉ងធ្វើឱ្យរាំងស្ទះ

2024/06/06 11:22:27 am        81
Facebook Telegram Linkin
ក្នុងឱកាសអញ្ជើញជាអធិបតីពិធីសម្ពោធបើកឲ្យប្រើប្រាស់ជាផ្លូវការកំពង់ផែពហុបំណងកំពត ស្ថិតនៅក្រុងបូកគោ ខេត្តកំពត នៅព្រឹកថ្ងៃទី៦ ខែមិថុនា ឆ្នាំ២០២៤ដែរនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានអំពាវនាវដល់ប្រជាពលរដ្ឋបន្តរួមគ្នាគាំទ្រគម្រោងព្រែកជីកហ្វូណនតេជោ និងរួមគ្នាប្រឆាំងរាល់បុគ្គលណាដែលមានបំណងធ្វើវិទ្ធង្សនា ឬធ្វើឱ្យរាំងស្ទះដល់គម្រោងព្រែកជីកនេះ។សម្ដេចធិបតី នាយករដ្ឋមន្រ្ដី ថ្លែងអំណរគុណដល់ប្រជាពលរដ្ឋនៅទូទាំងពិភពលោកជាពិសេស​ប្រជាពលរដ្ឋនៅតាមបណ្ដាខេត្តស្ថិតក្នុងគម្រោងព្រែកជីកហ្វូណនតេជោនេះដែលបានចេញសារ គាំទ្រដល់គម្រោងព្រែកជីកហ្វូណនតេជោដែលជាសមិទ្ធផលប្រវត្តសាស្រ្ដមួយទៀតរបស់ខ្មែរ។ សម្ដេចធិបតី បញ្ជាក់ថា គម្រោងព្រែកជីកនេះ គឺជាគម្រោងលក្ខណៈឯកជន វិនិយោគិនឯកជន ស្នើសុំសិទ្ធវិនិយោគរយៈពេល៥០ឆ្នាំរួច ប្រគល់មកឱ្យរាជរដ្ឋាភិបាលគ្រប់គ្រងវិញ ហើយការ​វិនិយោគ​លើគម្រោងព្រែកជីកហ្វូណនតេជោនេះ មានវិនិយោគិនខ្មែរភាគច្រើនដែល​បានដាក់ទុនវិនិយោគ។ សម្តេចធិបតី បញ្ជាក់ជូនប្រជាពលរដ្ឋថា គម្រោងព្រែកជីកហ្វូណនតេជោនឹងផ្ដល់ផលប្រយោជន៍​ដល់ប្រជាពលរដ្ឋចាប់ពីពេលបច្ចុប្បន្ន រហូតទៅដល់អនាគត ដូច្នេះសូមពលរដ្ឋកុំជឿការញុះញង់​របស់ក្រុមប្រឆាំងមួយក្ដាប់តូចនៅក្រៅស្រុកដែលតែងតែមានបំណង់ធ្វើឱ្យរាំស្ទះដល់គម្រោងព្រែកជីកនេះ។សូមជម្រាបថា តាមរយៈគម្រោងព្រែកជីកហ្វូណនតេជោនេះ​នឹងផ្ដល់ឯករាជភាព​លើការដឹក​ជញ្ជូនផ្លូវ​ទឹករបស់កម្ពុជា ដោយមិនចាំបាច់ពឹងដង្ហើមរបស់ប្រទេសដទៃឡើយ។ គម្រោងនេះ​ព្រែកជីកនេះ​មានប្រវែង១៨០គីឡូម៉ែត្រ ឆ្លងកាត់ខេត្ត កណ្ដាល តាកែវ កំពត និងកែប។ គម្រោងព្រែកជីកនេះ ត្រូវបានសិក្សាយ៉ាងល្អិតល្អន់ពីក្រុមអ្នកជំនាញបច្ចេកទេសជាតិ ​និងអន្តរជាតិ​ចំនួន៤២រូប ទាំងនៅលើដីផ្ទាល់​ និងប្រើឧបករណ៍សិក្សាពីលើអាកាស។ជាលទ្ធផលនៃការសិក្សាបង្ហាញថា គម្រោងដែលមានតម្លៃវិនិយោគប្រមាណ ១ពាន់៧រយលាន​ដុល្លារ អាចដំណើរការទៅបានដោយគ្មានបង្ករជាផលប៉ះពាល់ដល់បរិស្ថាន ឬលំហូរទឹករវាង​ទន្លេមេគង្គ និងសមុទ្រនោះទេ។ ព្រែកជីកនេះ​អាចអនុញ្ញាតឱ្យនាវាចំណុះ៣ពាន់តោន​ធ្វើចរាចរ​បានហើយនឹងអាចហុចផលដល់សេដ្ឋកិច្ចចន្លោះពី២១% ទៅ៣០% រួមទាំងអត្ថប្រយោជន៍​ជាច្រើនទៀត៕អត្ថបទ៖វ៉ន ដារ៉ា

សម្ដេចធិបតី៖ កំពង់ផែពហុបំណងកំពត នឹងក្លាយជាសរសៃឈាមដ៏សំខាន់សម្រាប់ការដឹកជញ្ជូនផ្លូវសមុទ្រកម្ពុជា

2024/06/06 11:13:39 am        228
Facebook Telegram Linkin
ក្នុងឱកាសអញ្ជើញជាអធិបតីពិធីសម្ពោធបើកឲ្យប្រើប្រាស់ជាផ្លូវការកំពង់ផែពហុបំណងកំពត ស្ថិតនៅក្រុងបូកគោ ខេត្តកំពត នៅព្រឹកថ្ងៃទី៦ ខែមិថុនា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបញ្ជាក់ថា កំពង់ផែពហុបំណងកំពត គឺជាកំពង់ផែស្តង់ដារកម្រិតអន្តរជាតិមុនគេនៅកម្ពុជា ហើយកំពង់ផែនេះនឹងចូលរួមចំណែក ក្លាយជាសរសៃឈាមដ៏សំខាន់ថ្មីមួយទៀតសម្រាប់ការដឹកជញ្ជូនតាមផ្លូវសមុទ្រកម្ពុជា។ ក្នុងឱកាសនោះ សម្ដេចធិបតី នាយករដ្ឋមន្រ្ដី បានបានថ្លែងអំណរគុណក្រសួង ស្ថាប័នពាក់ព័ន្ធ រួមទាំងក្រុមហ៊ុនកំពតផត ដែលបានប្រឹងប្រែងរួមគ្នាសាងសង់កំពង់ផែនេះឱ្យចេញជារូបរាង។ សម្ដេច ថ្លែងថា កំពង់ផែនេះ នឹងចូលរួមចំណែកក្លាយជាសរសៃឈាមដ៏សំខាន់ថ្មីមួយទៀត សម្រាប់ការដឹកជញ្ជូនតាមផ្លូវសមុទ្រកម្ពុជា និងធ្វើឱ្យប្រសើរឡើងនូវសកម្មភាព ពាណិជ្ជកម្ម ការផ្លាស់ប្ដូរទំនិញ រួមទាំងជួយជំរុញកំណើនសេដ្ឋកិច្ចនៅខេត្តកំពត ក៏ដូចជាការអភិវឌ្ឍសង្គម សេដ្ឋកិច្ចកម្ពុជាផងដែរ។សម្តេចធិបតី នាយករដ្ឋមន្រ្ដីថ្លែងថា វិស័យកំពង់ផែ គឺជាវិស័យអាទិភាពមួយ ក្នុងចំណោមវិស័យ អាទិភាពនានា ដែលរាជរដ្ឋាភិបាល យកចិត្តទុកដាក់ជំរុញការអភិវឌ្ឍ ដោយរាជរដ្ឋាភិបាលត្រូវខិតខំ បន្តបង្កើនថវិកាវិនិយោគ និងកៀរគរហិរញ្ញប្បទាន ព្រមទាំងពង្រឹងប្រសិទ្ធភាពនៃការប្រើប្រាស់ ដើម្បីបន្តអភិវឌ្ឍន៍ហេដ្ឋារចនាសម្ព័ន្ធកំពង់ផែឱ្យកាន់តរីកចម្រើនថែមទៀត។សូមជម្រាបថា កំពង់ផែពហុបំណងកំពត មានទីតាំងស្ថិតនៅភូមិគីឡូ១២ សង្កាត់កោះតូច និងសង្កាត់បឹងទូក ក្រុងបូកគោ ខេត្តកំពត។ កំពង់ផែនេះ ត្រូវបានរំពឹងថានឹងក្លាយជាសរសៃឈាម​ដ៏សំខាន់​សម្រាប់ការដឹកជញ្ជូន​តាមផ្លូវសមុទ្ររបស់កម្ពុជា ដែលនឹងចូលរួមចំណែកជំរុញសេដ្ឋកិច្ច​កម្ពុជា​ឱ្យមានកំណើនបន្ថែមទៀត ​ហើយនឹងក្លាយជាកំពង់ផែទឹកជ្រៅមួយបន្ថែមទៀតរបស់កម្ពុជា ដែលនឹងជួយបំពេញបន្ថែមឱ្យកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ។ ការដឹកជញ្ជូនតាមផ្លូវសមុទ្រពីកំពង់ផែពហុបំណងកំពតទៅកាន់ប្រទេសក្នុងតំបន់អាស៊ីប៉ាស៊ីហ្វិក អាចដំណើរការទៅបាន ​ដោយពុំចាំបាច់ប្តូរនាវានៅកំពង់ផែណាមួយឡើយ ​លើកលែងតែការ ដឹកជញ្ជូន​ទំនិញទៅកាន់សហរដ្ឋអាមេរិក និងអឺរ៉ុប ​ដែលតម្រូវឱ្យប្តូរនាវានៅកំពង់ផែធំៗ មុននឹងទៅដល់គោលដៅចុងក្រោយ៕អត្ថបទ៖ វ៉ន ដារ៉ា

រាជរដ្ឋាភិបាលនឹងមិនផ្តល់អាជ្ញាបណ្ណឲ្យបើកក្រុមហ៊ុនកាស៊ីណូ នៅទីរួមខេត្តកំពត និងកែបនោះឡើយ

2024/06/06 11:06:18 am        120
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថា រាជរដ្ឋាភិបាល នឹងមិនផ្តល់អាជ្ញាបណ្ណឲ្យមានការបើកបនល្បែងស៊ីសង ឬក្រុមហ៊ុនកាស៊ីណនៅទីរួមខេត្តកំពត និងខេត្តកែបនោះឡើយ លើកលែងតែក្រុងបូកគោ និងតំបន់ជាប់ព្រំដែន។ក្នុងឱកាសអញ្ជើញជាអធិបតីក្នុងពិធីសម្ពោធបើកឲ្យប្រើប្រាស់ជាផ្លូវការកំពង់ផែពហុបំណងកំពត ស្ថិតនៅក្រុងបូកគោ ខេត្តកំពត នាថ្ងៃទី៦ ខែមិថុនា ឆ្នាំ២០២៤នេះសម្តេចធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលមិនអនុញ្ញាតឲុ្យមានកាស៊ីណូនោះទេ សម្រាប់ ទីប្រជុំជនក្នុងទីរួមខេត្តកំពត និងខេត្តកែប ប៉ុន្តែសម្តេចសូមលើកទឹកចិត្តឲ្យមានការបើកសណ្ឋាគារ កន្លែងកម្សាន្ត និងកម្មន្តសាលនានា ដើម្បីលើកកម្ពស់សេដ្ឋកិច្ចសម្រាប់ខេត្តទាំងពីរ ដែលជាប់សមុទ្រនេះ ឲ្យកាន់តែល្អប្រសើរបន្ថែមទៀត។សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ក៏បានប្រកាសផងដែរថា ខេត្តកំពត នឹងក្លាយ​ជាខេត្តមួយ ដែលសម្បូរកន្លែងទេសចរណ៍ និងរោងចក្រសហគ្រាសច្រើននាពេលខាង មុខនេះឆាប់ៗនេះ​ ខណៈខេត្តនេះ កំពុងមានកំពង់ផែពហុបំណង ប៉ុន្តែទោះជាយ៉ាងណារាជ​រដ្ឋាភិបាល​នឹងមិនឲ្យមានការកសាង​នូវព្រលាន​យន្តហោះសម្រាប់ខេត្តនេះឡើយ៕អត្ថបទបាន ចក់

សម្តេចធិបតី៖ សម្ភារៈសាងសង់ព្រែកជីកហ្វូណនតេជោ ត្រៀមរួចរាល់ហើយ នឹងបើកការដ្ឋានសាងសង់នៅដើមខែសីហា

2024/06/06 10:55:03 am        145
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថា សម្ភារៈសម្រាប់សាងសង់នូវព្រែកជីក ហ្វូណនតេជោ បានត្រៀមរួចរាល់អស់ហើយ ហើយនឹងបើកការដ្ឋានសាងសង់នៅថ្ងៃទី៥ ខែសីហា ឆ្នាំ២០២៤ខាងមុខនេះ ។ក្នុងឱកាសអញ្ជើញជាអធិបតីក្នុងពិធីសម្ពោធបើកឲ្យប្រើប្រាស់ជាផ្លូវការកំពង់ផែពហុបំណងកំពត ស្ថិតនៅក្រុងបូកគោ ខេត្តកំពតនាថ្ងៃទី៦ ខែមិថុនា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់ថា គម្រោងព្រែកជីកហ្វូណននឹងផ្តល់ផលប្រយោជន៍ជូនប្រជាជន និងប្រទេសជាតិរាប់រយឆ្នាំ ទៅខាងមុខនេះ ហើយរាជរដ្ឋាភិបាលនឹងកាន់កាប់ភាគហ៊ុន ច្រើនជាងក្រុមហ៊ុនឯកជនរបស់ចិន សម្រាប់គម្រោងព្រែកជីកហ្វូណនតេជោនេះ ពោលគឺរហូតដល់ជាង៥០ភាគរយ។ជាមួយគ្នានោះដែរ សម្តេចធិបតី ហ៊ុន ម៉ាណែត នាយករដ្ឋមន្រ្តី ​ក៏បានប្រកាសថ្លែងអំណរគុណ​ដល់​បងប្អូនប្រជាពលរដ្ឋខ្មែរទាំងអស់ ដែលបានប្រកាសគាំទ្រ​នូវគម្រោងព្រែកជីកហ្វូណន​តេជោនេះ យ៉ាងភ្លូកទឹកភ្លូកដី ប៉ុន្តែទោះជាយ៉ាងណាសម្តេចធិបតី ក៏បានរំលឹកដល់បងប្អូនមួយចំនួនតូចផងដែរ បើស្រឡាញ់ជាតិពិតប្រាកដ ចង់បានឯករាជ្យភាព​ ក្នុងវិស័យដឹកជញ្ជូន ចង់ឃើញស្នាដៃ​ជាប្រវត្តិ​សាស្រ្តរបស់ខ្មែរពិតប្រាកដ ​សូមគាំទ្រនូវ​គម្រោងនេះ ខណៈគម្រោងនេះ នឹងបម្រើដល់​ផលប្រយោជន៍ជាតិ​ទាំងមូល៕អត្ថបទបាន ចក់

គណបក្សប្រឆាំងប្រទេសឥណ្ឌា និយាយថា នឹងប្រឆាំងការគ្រប់គ្រង របស់លោក ម៉ូឌី

2024/06/06 10:36:28 am        64
Facebook Telegram Linkin
មេដឹកនាំនៃសម្ព័ន្ធអភិវឌ្ឍន៍ជាតិឥណ្ឌា ដែលរួមមានគណបក្សប្រឆាំងយ៉ាងហោចណាស់ជាង២០គណបក្ស បានជួបប្រជុំគ្នា កាលពីថ្ងៃពុធ នៅលំនៅឋានរបស់ប្រធានគណបក្ស Congress លោក ម៉ាលីកាជុន ខាច(Mallikarjun Kharge) ក្នុងទីក្រុង New Delhi ខណៈពួកគេបានដឹកនាំកិច្ចពិភាក្សា ដើម្បីពង្រឹងភាពស្មោះត្រង់របស់ពួកគេ។លោក Kharge បាននិយាយទៅកាន់អ្នកសារព័ត៌មានបន្ទាប់ពីកិច្ចប្រជុំថា ប្លុកសម្ព័ន្ធអភិវឌ្ឍន៍ជាតិឥណ្ឌា នឹងបន្តប្រយុទ្ធប្រឆាំងការគ្រប់គ្រងបែបហ្វាស៊ីសនិយមរបស់គណបក្ស BJP ដឹកនាំដោយ លោក Modi។ យើងនឹងមានចំណាត់ការសមស្របតាមពេលវេលា ដើម្បីបំពេញបំណងប្រាថ្នារបស់ប្រជាជន ដែលមិនត្រូវការការគ្រប់គ្រងដោយរដ្ឋាភិបាលគណបក្ស BJP របស់លោក Modi។សម្ព័ន្ធលទ្ធិប្រជាធិបតេយ្យជាតិ (NDA) របស់នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) បានដាក់ឈ្មោះជាផ្លូវការកាលពីថ្ងៃពុធ ដើម្បីដឹកនាំរដ្ឋាភិបាលចម្រុះថ្មីសម្រាប់អាណត្តិទី៣ជាប់ៗគ្នា មួយថ្ងៃបន្ទាប់ពីសម្ព័ន្ធនេះ ទទួលបានអំណាចជាថ្មី ដោយមានសំឡេងភាគច្រើនគួរឱ្យភ្ញាក់ផ្អើល។លោក Modi ជាប្រជាជននិយម ដែលបានគ្រប់គ្រងនយោបាយឥណ្ឌាចាប់តាំងពីឆ្នាំ២០១៤ នឹងដឹកនាំរដ្ឋាភិបាលដែលពឹងផ្អែកលើការគាំទ្រពីសម្ព័ន្ធក្នុងតំបន់ ដែលភាពស្មោះត្រង់មានភាពស្ទាក់ស្ទើរ អាចធ្វើឱ្យមានភាពស្មុគស្មាញដល់របៀបវារៈកំណែទម្រង់របស់គណៈរដ្ឋមន្ត្រីថ្មី។សម្ព័ន្ធលទ្ធិប្រជាធិបតេយ្យជាតិ (NDA) ដឹកនាំដោយគណបក្ស BJP ទទួលបាន ២៩៣ អាសនៈនៅក្នុងសភាជាន់ទាប ដែលមានសមាជិក៥៤៣រូប ច្រើនជាងអាសនៈសំឡេងភាគច្រើន ២៧២ អាសនៈដែលត្រូវការដើម្បីបង្កើតរដ្ឋាភិបាល។សម្ព័ន្ធអភិវឌ្ឍន៍ជាតិឥណ្ឌា ដឹកនាំដោយគណបក្ស Congress និយមកណ្តាល របស់ លោក រ៉ាហ៊ុល ហ្គានធី(Rahul Gandhi) បានទទួលអាសនៈចំនួន២៣០ ច្រើនជាងការព្យាករណ៍។

ម៉ិកស៊ិក នឹងឈានដល់កិច្ចព្រមព្រៀងជាមួយអាមេរិក សម្រាប់ការនិរទេសជនអន្តោប្រវេសន៍ទៅកាន់ប្រទេសកំណើត

2024/06/06 10:32:14 am        123
Facebook Telegram Linkin
ប្រធានាធិបតីម៉ិកស៊ិក លោក Andres Manuel Lopez Obrador បាននិយាយកាលពីថ្ងៃពុធថា ប្រទេសម៉ិកស៊ិក និងសហរដ្ឋអាមេរិក នឹងឈានដល់កិច្ចព្រមព្រៀងមួយសម្រាប់ជនអន្តោប្រវេសន៍ មិនមែនជាពលរដ្ឋម៉ិកស៊ិក ដែលត្រូវនិរទេសដោយផ្ទាល់ទៅកាន់ប្រទេសកំណើតរបស់ពួកគេ។ មេដឹកនាំប្រទេសម៉ិកស៊ិក បានបញ្ជាក់ថា លោកមានឆន្ទៈក្នុងការធ្វើការជាមួយអាជ្ញាធរសហរដ្ឋអាមេរិក លើគោលនយោបាយ បន្ទាប់ពីក្រិត ដែលបានប្រកាសកាលពីថ្ងៃអង្គារដោយប្រធានាធិបតី លោក Joe Biden ដើម្បីព្យាយាមកាត់បន្ថយលំហូរជនអន្តោប្រវេសន៍ ដែលមានបំណងទៅដល់សហរដ្ឋអាមេរិក នៅមុនការបោះឆ្នោត ខែវិច្ឆិកា។ការរឹតត្បិតសិទ្ធិជ្រកកោនថ្មី ដែលបានចូលជាធរមានកាលពីថ្ងៃពុធ អនុញ្ញាតឱ្យអាជ្ញាធរសហរដ្ឋអាមេរិក និរទេសឬបញ្ជូនត្រឡប់ទៅប្រទេសម៉ិកស៊ិកវិញ នូវជនអន្តោប្រវេសន៍ដែលឆ្លងកាត់ព្រំដែនដោយខុសច្បាប់ និងគ្មានឱកាសទាមទារសិទ្ធិជ្រកកោនឡើយ។លោក Lopez Obrador បាននិយាយថា លោកនឹងទទួលយកជនអន្តោប្រវេសន៍ ដែលត្រូវបានបណ្តេញចេញទៅកាន់ប្រទេសម៉ិកស៊ិក ទោះបីជាលោក យល់ព្រមចំពោះការនិរទេសដោយផ្ទាល់ និងបាន និយាយថា យើងពុំមានបញ្ហានោះទេ នៅក្នុងការឆ្លើយតប។

សកម្មជនកូរ៉េខាងត្បូងបង្ហោះបាឡុង សំដៅលើកូរ៉េខាងជើង ទោះមានភាពតានតឹងកាន់តែខ្លាំងក៏ដោយ

2024/06/06 10:29:18 am        93
Facebook Telegram Linkin
ក្រុមអ្នករត់ចោលស្រុកកូរ៉េខាងជើង និងសកម្មជន នៅក្នុងប្រទេសកូរ៉េខាងត្បូង បាននិយាយថា ពួកគេបានបង្ហោះ បាឡុងផ្ទុកដោយខិត្តប័ណ្ណ ដែលមានសារប្រឆាំងទីក្រុងព្យុងយ៉ាង ឆ្ពោះទៅកាន់ប្រទេសកូរ៉េខាងជើងនៅថ្ងៃព្រហស្បតិ៍ ៦ មិថុនា នេះ ខណៈមានភាពតានតឹងកាន់តែខ្លាំងនៅលើឧបទ្វីបកូរ៉េ។ក្រុមអ្នករត់ចោលស្រុកបាននិយាយនៅក្នុងសេចក្តីថ្លែងការណ៍មួយថា បាឡុងចំនួន១០ផ្ទុកដោយខិត្តប័ណ្ណប្រហែល២០០.០០០សន្លឹក ក្រដាសប្រាក់ចំនួន២.០០០ដុល្លារ និងដ្រាយUSB (USB drives) ដែលមានតន្ត្រីក្រុមចម្រៀងK-pop និងរឿងភាគ ត្រូវបានបង្ហោះនៅទីក្រុងព្រំដែន ផូជុន(Pocheon)។ ក្រុមនេះបានថ្កោលទោសមេដឹកនាំកូរ៉េខាងជើងលោក Kim Jong Un ចំពោះការមិនព្រមសូមអភ័យទោស បន្ទាប់ពីបានបញ្ជូនបាឡុងផ្ទុកសំរាមចូលទៅកូរ៉េខាងត្បូង នាំមកនូវភាពអាម៉ាស់ដ៏ធ្ងន់ធ្ងរបំផុតដល់ប្រជាជន ៥០លាននាក់របស់យើង ។ កូរ៉េខាងជើងបាននិយាយកាលពីថ្ងៃអាទិត្យទី ២ ខែមិថុនាថា ខ្លួននឹងបញ្ឈប់ការបញ្ជូនបាឡុងផ្ទុកសំរាមឆ្លងកាត់ព្រំដែនទៅកាន់កូរ៉េខាងត្បូង ប៉ុន្តែបានប្តេជ្ញាថានឹងបន្តអនុវត្ត ប្រសិនបើខិត្តប័ណ្ណប្រឆាំងកូរ៉េខាងជើង ត្រូវបានហោះហើរម្តងទៀតពីកូរ៉េខាងត្បូង ចូលក្នុងទឹកដីរបស់ខ្លួន៕

សំណុំរឿងជ្រៀតជ្រែកការបោះឆ្នោតសហរដ្ឋអាមេរិក របស់លោក Trump ត្រូវបានផ្អាកនៅរដ្ឋ Georgia

2024/06/06 10:26:11 am        205
Facebook Telegram Linkin
តុលាការឧទ្ធរណ៍ប្រចាំរដ្ឋ ចចា (Georgia) របស់សហរដ្ឋអាមេរិក កាលពីថ្ងៃពុធ (០៥ មិថុនា) បានផ្អាកសំណុំរឿងព្រហ្មទណ្ឌដែលចោទប្រកាន់លោក ដូណាល់ ត្រាំ (Donald Trump) ពីបទជ្រៀតជ្រែកចង់បង្វែរលទ្ធផលបោះឆ្នោតឆ្នាំ២០២០ ខណៈតុលាការពិចារណាលើសំណើរបស់អតីតប្រធានាធិបតីរូបនេះក្នុងការដកសិទ្ធិរដ្ឋអាជ្ញាដឹកនាំសំណុំរឿង លោកស្រី ហ្វានី វីលលីស (Fani Willis)។ដីកានេះបានរារាំងសំណុំរឿងដ៏ចម្រូងចម្រាសនេះប្រឆាំងនឹងលោក ត្រាំ និងសហចុងចោទចំនួន ១៤ នាក់ ពីការឆ្ពោះទៅរកការកាត់ក្តី ខណៈដែលលោក ត្រាំ ប្តឹងឧទ្ធរណ៍ចំពោះសេចក្តីសម្រេចរបស់ចៅក្រម ដែលអនុញ្ញាតឱ្យលោកស្រី វីលលីស ដែលជាមេធាវីតំបន់ ហ្វូលថុន (Fulton County) បន្តសំណុំរឿងនេះ។នៅក្នុងបណ្ដឹងឧទ្ធរណ៍នោះ លោក ត្រាំ និងសហចុងចោទប្រាំបីនាក់ កំពុងស្វះស្វែងរកការដកសិទ្ធិពីតំណែងរបស់ស្រី វីលលីស ជុំវិញការចោទប្រកាន់ថាទំនាក់ទំនងស្នេហាជាមួយអតីតឧបនាយករងជាន់ខ្ពស់ម្នាក់ បង្កជាជម្លោះផលប្រយោជន៍។ នេះគឺជាការបញ្ជាក់មួយផ្សេងទៀតដែលថា សំណុំរឿងមួយក្នុងចំណោមបួន ប្រឆាំងនឹងលោក ត្រាំ នៅពេលលោកស្វះស្វែងជំនួសតំណែងលោកប្រធានាធិបតី ចូ បៃដិន (Joe Biden) នេះ នឹងមិនដំណើរការកាត់ក្តីមុនការបោះឆ្នោតថ្ងៃទី០៥ ខែវិច្ឆិកា នោះទេ។ គណៈវិនិច្ឆ័យនៅទីក្រុងញូវយ៉ក កាលពីសប្តាហ៍មុនបានរកឃើញថាលោក ត្រាំ មានទោសពីបទព្យាយាមបិទបាំងការបង់ប្រាក់បំបិទមាត់ដល់តារាអាសអាភាសម្នាក់ ដោយជាសាលក្រមដែលលោក ត្រាំ បានប្តេជ្ញាប្តឹងឧទ្ធរណ៍។ សំណុំរឿងសហព័ន្ធទាំងពីរប្រឆាំងនឹងលោក សម្រាប់ការព្យាយាមបង្វែរលទ្ធផលឆ្នោត និងការមិនប្រគល់ឯកសារសម្ងាត់បន្ទាប់ពីការចាកចេញពីតំណែង កំពុងត្រូវបានជាប់គាំងដោយការប្រឈមផ្នែកច្បាប់៕

ក្រុមហាម៉ាស ទាមទារឱ្យបញ្ចប់ជម្លោះហ្កាហ្សាទាំងស្រុង ដែលអាចបំផ្លាញផែនការសន្ដិភាពលោក Biden

2024/06/06 10:22:36 am        279
Facebook Telegram Linkin
មេដឹកនាំក្រុមហាម៉ាស បាននិយាយកាលពីថ្ងៃពុធ (០៥ មិថុនា) ថា ក្រុមនេះទាមទារឱ្យបញ្ចប់សង្គ្រាមនៅហ្កាហ្សា ជាអចិន្ត្រៃយ៍ និងការដកទ័ពចេញរបស់អ៊ីស្រាអែល ដែលជាផ្នែកមួយនៃផែនការបទឈប់បាញ់ ដោយនោះអាចការប៉ះទង្គិចជាក់ស្តែងចំពោះសំណើបទឈប់បាញ់ ដែលត្រូវបានលើកឡើងកាលពីសប្តាហ៍មុនដោយប្រធានាធិបតីសហរដ្ឋអាមេរិក លោក ចូ បៃដិន (Joe Biden)។ទន្ទឹមនឹងនេះ អ៊ីស្រាអែល បាននិយាយថានឹងមិនមានការបញ្ឈប់ការប្រយុទ្ធគ្នាក្នុងអំឡុងពេលកិច្ចចរចាបទឈប់បាញ់នោះទេ ហើយខ្លួនក៏បានបើកការវាយលុកថ្មីមួយលើផ្នែកកណ្តាលនៃតំបន់ហ្កាហ្សាស្ទ្រីប នៅជិតទីក្រុងចុងក្រោយដែលមិនទាន់ត្រូវបានវាយប្រហារដោយរថក្រោះរបស់អ៊ីស្រាអែល។ប្រធានក្រុមហាម៉ាស លោក អ៊ីស្មែល ហានីយ៉េ (Ismail Haniyeh) បាននិយាយថា «ចលនា និងបក្សពួកនៃក្រុមតស៊ូនឹងដោះស្រាយយ៉ាងហ្មត់ចត់ និងវិជ្ជមានជាមួយនឹងកិច្ចព្រមព្រៀងណាមួយ ដែលផ្អែកលើការបញ្ចប់ដ៏ទូលំទូលាយនៃការឈ្លានពាន និងការដកខ្លួនចេញទាំងស្រុង រួមនឹងការដោះដូរអ្នកទោស»។ ការលើកឡើងរបស់លោក ហានីយ៉េ នេះហាក់ដូចជាផ្តល់ការឆ្លើយតបរបស់ក្រុមសកម្មប្រយុទ្ធប៉ាឡេស្ទីនទៅនឹងសំណើដែលលោក បៃដិន បានបង្ហាញកាលពីសប្តាហ៍មុន។ ទីក្រុងវ៉ាស៊ីនតោន បាននិយាយថា ខ្លួនកំពុងរង់ចាំស្តាប់ចម្លើយពីក្រុមហាម៉ាស ចំពោះអ្វីដែលលោក បៃដិន ពិពណ៌នាថាជាគំនិតផ្តួចផ្តើមរបស់អ៊ីស្រាអែល។បន្ទាប់ពីមានបទឈប់បាញ់រយៈពេលខ្លីមួយក្នុងខែវិច្ឆិកា មក ការប៉ុនប៉ងទាំងអស់ដើម្បីរៀបចំបទឈប់បាញ់បានបរាជ័យ ដោយក្រុមហាម៉ាស បានទទូចលើការទាមទាររបស់ខ្លួនសម្រាប់ការបញ្ចប់ជម្លោះជាអចិន្ត្រៃយ៍ ខណៈពេលដែលអ៊ីស្រាអែល និយាយថា ខ្លួនបានរៀបចំដើម្បីពិភាក្សាតែការផ្អាកបណ្តោះអាសន្នប៉ុណ្ណោះ រហូតដល់ក្រុមសកម្មប្រយុទ្ធនេះត្រូវបានលុបបំបាត់៕

បណ្ដាញសង្គម

ព័ត៌មានថ្មីៗ

អ៊ីរ៉ង់សន្យាវាយកម្ទេចសហរដ្ឋអាមេរិក និងអ៊ីស្រាអែល ក្រោយការគំរាមកំហែងរបស់លោក Trump
04/02/2026 08:04 PM
Facebook Telegram Linkin
ក្រុមចម្រុះមាន ៤០ប្រទេសដឹកនាំដោយអង់គ្លេស សន្យាចាត់វិធានការលើច្រកសមុទ្រ Hormuz
04/02/2026 08:04 PM
Facebook Telegram Linkin
បេសកជន៖ អ៊ីរ៉ង់មិនមានបំណង «ចាប់ផ្តើមឡើងវិញ» ក្នុងការបង្កើនសារធាតុអ៊ុយរ៉ានីញ៉ូមទេ
04/02/2026 08:04 PM
Facebook Telegram Linkin
នេប៉ាល់រៀបចំសម័យប្រជុំសភាជាលើកដំបូង ក្រោយការបោះឆ្នោត
04/02/2026 08:04 PM
Facebook Telegram Linkin
លោក Macron ៖ វាមិនប្រាកដនិយមនោះទេក្នុងការបើកច្រកសមុទ្រ Hormuz ដោយកម្លាំង
04/02/2026 08:04 PM
Facebook Telegram Linkin
ក្រុមឧទ្ទាមហ៊ូធីសម្របសម្រួលជាមួយអ៊ីរ៉ង់ ប៉ុន្តែនៅតែរក្សាឯករាជ្យភាព បើទោះបីជាមានសង្រ្គាមក៏ដោយ
04/02/2026 08:04 PM
Facebook Telegram Linkin
ប្រទេសចំនួន ៨ ថ្កោលទោសចំពោះទោសប្រហារជីវិតរបស់អ៊ីស្រាអែលលើជនប៉ាឡេស្ទីន
04/02/2026 08:04 PM
Facebook Telegram Linkin
តំបន់ភាគកណ្តាល និងភាគខាងត្បូងអ៊ីតាលី រងការវាយប្រហារដោយព្យុះព្រិល និងអាកាសធាតុអាក្រក់
04/02/2026 08:04 PM
Facebook Telegram Linkin
មនុស្សម្នាក់ស្លាប់ ក្រោយព្យុះវាយប្រហារប្រទេសក្រិកបង្កជាទឹកជំនន់ និងបង្អាក់ការធ្វើដំណើរ
04/02/2026 08:04 PM
Facebook Telegram Linkin
ស្ថានទូសហរដ្ឋអាមេរិក ព្រមានពីលទ្ធភាពនៃការវាយប្រហារជីវពលសម្ព័ន្ធមិត្តអ៊ីរ៉ង់នៅទីក្រុងបាកដាដ ប្រទេសអ៊ីរ៉ាក់
04/02/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.