នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានក្រុមការងារគណបក្សចុះមូលដ្ឋាន អញ្ជើញបើកការដ្ឋានសាងសង់​ផ្លូវលំ​ប្រវែង ៥.៧០០​ម៉ែត្រ ស្ថិតក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេចតេជោ ចាត់ទុក អតីតរដ្ឋមន្ត្រីការពារជាតិវៀតណាម ជាមិត្តចាស់របស់កម្ពុជា
ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម កង ណម នៅគេហដ្ឋាន
មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើ​ការងារ​ស្ថាបនា​ផ្លូវ នៅ​ទីតាំង​ដីសម្បទានសង្គមកិច្ច ខេត្តឧត្តរមានជ័យ

នយោបាយ​ និង ការអភិវឌ្ឍន៍

អត្ថប្រយោជន៍នៃគោលនយោបាយថ្មី សម្រាប់ស្រ្តីមានផ្ទៃពោះ ជាសមាជិក ប.ស.ស.

2023/10/11 12:07:20 pm        376
Facebook Telegram Linkin
ភ្នំពេញ៖ រាជរដ្ឋាភិបាលកម្ពុជា បានប្រកាសដំឡើងផ្តល់ប្រាក់ឧបត្ថម្ភបន្ថែមសម្រាប់ស្ត្រីមានផ្ទៃពោះ ដែលជាសមាជិក ប.ស.ស. ចាប់ពីថ្ងៃទី១ ខែសីហា ឆ្នាំ២០២៣ ដើម្បីបន្តគាំពារស្រ្តី អំឡុងពេលមានផ្ទៃពោះ ពេលសម្រាល និងក្រោយពេលសម្រាលរហូតដល់កូនមានអាយុក្រោម២ឆ្នាំ។បើតាមរបាយការណ៍ថ្មីមួយ គិតពីដើម ខែសីហា ឆ្នាំ២០២៣ ដល់ដើមសប្តាហ៍ទី១ ខែតុលា ឆ្នាំ២០២៣ មានស្ត្រីចំនួនជាង៤ម៉ឺន៣ពាន់នាក់ ​បានទៅពិនិត្យផ្ទៃពោះ និងសម្រាលកូន នៅតាមមូលដ្ឋានសុខាភិបាលសាធារណៈទូទាំងប្រទេស ដោយប្រើប័ណ្ណ ប.ស.ស.។ កម្មការិនីរោងចក្រកាត់ដេរ​សំលៀកបំពាក់​ ឈ្មោះ កួន ស្រីទូច ដែលមកសម្រាលកូនទី២ នៅក្នុងមន្ទីរពេទ្យព្រះអង្គឌួង ដោយប្រើប័ណ្ណសមាជិក ប.ស.ស. ប្រាប់ថា គាត់មិនមានការចំណាយលុយក្នុងការសម្រាលកូន និងសម្រាកក្នុងមន្ទីរពេទ្យនោះទេ ហើយថែមទាំងទទួលបានលុយឧបត្ថម្ភពីរាជរដ្ឋាភិបាល ៨០ម៉ឺនរៀលទៀត។ កម្មការិនីរូបនេះ លើកឡើងថា មុនពេលសម្រាលកូន ​គាត់ក៏ទទួលបានលុយ ៨ម៉ឺនរៀល សម្រាប់ការពិនិត្យផ្ទៃពោះម្តងផងដែរ។ កម្មការិនី កួន ស្រីទូច ប្រាប់ថា ដើម្បីទទួលបានអត្ថប្រយោជន៍ទាំងនេះ គឺមិនពិបាកទេ ដោយមុនដំបូងត្រូវយកឯកសារទៅដាក់នៅការិយាល័យ ប.ស.ស. រួមមាន ប័ណ្ណ ប.ស.ស. អត្តសញ្ញាណប័ណ្ណ សៀវភៅពិនិត្យផ្ទៃពោះ ដើម្បីទទួលឯកសារបញ្ជាក់ពី ប.ស.ស. បន្ទាប់មកគឺភ្ជាប់ឯកសារនោះ យកទៅពិនិត្យផ្ទៃពោះ និងសម្រាលកូន នៅមន្ទីរពេទ្យបានហើយ។ ចំណែកកម្មការិនីរោងចក្រកាត់ដេរសំលៀកបំពាក់ម្នាក់ទៀត ឈ្មោះ ជឹម ហ៊ា ដែលត្រៀម​សម្រាលកូនដំបូង ​នៅមន្ទីរពេទ្យព្រះអង្គឌួងនេះដែរ ប្រាប់ថាគាត់តែងមកពិនិត្យផ្ទៃពោះជាទៀងទាត់​តាម​កាលកំណត់របស់គ្រូពេទ្យ។ កម្មការិនីរូបនេះ សម្តែងភាពរីករាយចំពោះការទទួលបាន​អត្ថប្រយោជន៍បន្ថែមពីការប្រើប័ណ្ណ ប.ស.ស. ​ដោយសារការពិនិត្យផ្ទៃពោះមិនអស់លុយ ហើយថែមទាំងទទួលបានលុយ ៨ម៉ឺនរៀលសម្រាប់ការពិនិត្យផ្ទៃពោះម្តង រួមនិងទទួលបានលុយ ៨០ម៉ឺនរៀល ពេលសម្រាលកូនទៀត។ បន្ថែមពីនេះ ក្រោយពេលសម្រាលកូន គាត់នឹងទទួល​បាន​លុយឧបត្ថម្ភ រហូតដល់កូនអាយុក្រោម២ឆ្នាំផងដែរ។ អនុប្រធានការិយាល័យនៃមន្ទីរពេទ្យព្រះអង្គឌួង ទទួលបន្ទុកផ្នែក ប.ស.ស. លោកស្រី ឃួន វ៉ាន់ឌី បង្ហាញថា រយៈពេល៩ខែ ក្នុងឆ្នាំ២០២៣នេះ មានស្ត្រីមកពិនិត្យផ្ទៃពោះ និងសម្រាលកូន ចំនួនជាង​២ម៉ឺន៦ពាន់នាក់ នៅមន្ទីរពេទ្យព្រះអង្គឌួង តាមរយៈការប្រើប័ណ្ណ ប.ស.ស.។ លោកស្រី លើកទឹកចិត្តចំពោះស្ត្រីមានផ្ទៃពោះ មានប័ណ្ណ ប.ស.ស. មកពិនិត្យផ្ទៃពោះឲ្យ​បាន​ទៀតទាត់​តាមកាលកំណត់របស់គ្រូពេទ្យ​ ដើម្បីធានាបាននូវសុវត្ថិភាពរបស់ម្តាយ និងកូនក្នុងផ្ទៃ ក៏ដូចជាអាចទទួលបានប្រាក់ឧបត្ថម្ភពី ប.ស.ស. បានឆាប់រហ័សផងដែរ។ លោកស្រី បញ្ជាក់ថា ខាង ប.ស.ស. បានផ្តល់កម្មវិធីស្វ័យ ប្រវត្តិកម្មទិន្នន័យ មកខាងមន្ទីរពេទ្យ ដែលមាន​ភាពងាយស្រួលសម្រាប់មន្ទីរពេទ្យអាចបញ្ចូលព័ត៌មានរបស់ស្ត្រីមកពិនិត្យ និងសម្រាល​កូន​នៅក្នុងមន្ទីរពេទ្យ ហើយបញ្ជូនទៅកាន់ផ្នែក ប.ស.ស. វិញ បានឆាប់រហ័ស​ដើម្បីបើកប្រាក់ឧបត្ថម្ភរបស់រាជរដ្ឋាភិបាល ជូនអ្នកជំងឺមានផ្ទៃពោះ។ សូមបញ្ជាក់ថា ក្រោយពេលដែលស្ត្រីមានផ្ទៃពោះ បានបំពេញតាមលក្ខខណ្ឌកំណត់ហើយនោះ ប.ស.ស. នឹងចាប់ផ្ដើមទទួលបានប្រាក់ឧបត្ថម្ភ ​ជា៣ដំណាក់កាល ស្មើនឹងចំនួន ១៥លើក គឺចាប់តាំងពីពិនិត្យផ្ទៃពោះ ​ពេលសម្រាលកូន រហូតដល់កូនមានអាយុក្រោម២ឆ្នាំ។ ក្នុងនោះសម្រាប់ដំណាក់កាលទី១ ជាដំណាក់កាលដែលស្ត្រីទៅពិនិត្យផ្ទៃពោះចំនួន ៤ដង ដោយការពិនិត្យផ្ទៃពោះក្នុងមួយដងៗនឹងទទួលបានប្រាក់ចំនួន ៨ម៉ឺនរៀល។ ដំណាក់កាលទី២ នៅពេលសម្រាល ដែលនឹងទទួលបានប្រាក់ឧបត្ថម្ភចំនួន ៨០ម៉ឺនរៀលសម្រាប់កូនមួយ បើក្នុងករណីកូនភ្លោះពីរ ទទួលបានប្រាក់ឧបត្ថម្ភចំនួន ១លាន២សែនរៀល ហើយបើកូនភ្លោះបី នឹងទទួលបានរហូតដល់ ១លាន៦សែនរៀល ព្រមទាំងប្រាក់ឧបត្ថម្ភផ្ទាល់របស់សម្ដេចតេជោ និងសម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំនួន ៥លានរៀលបន្ថែមទៀត។ ចំណែក ដំណាក់កាលទី៣ ជាដំណាក់ក្រោយសម្រាល រហូតកូនមានអាយុក្រោម២ឆ្នាំ នឹងទទួលបាន​ការឧបត្ថម្ភបន្ថែមចំនួន ១០លើក ដោយក្នុងមួយលើកៗទទួលបានថវិកាចំនួន ៨ម៉ឺនរៀល ក្នុងនោះមានការពិនិត្យសុខភាពសម្រាប់ម្តាយចំនួន៣លើក និងការចាក់វ៉ាក់សាំង​សម្រាប់កូន ចំនួន៧លើក។ លើសពីនេះ ស្រ្តីមានផ្ទៃពោះទាំងអស់ ដែលបានបំពេញគ្រប់លក្ខខណ្ឌរបស់ ប.ស.ស នឹងទទួលបានប្រាក់បំណាច់មាតុភាពចំនួន ១២០ភាគរយ នៃប្រាក់ឈ្នួល ដោយ​៥០ភាគរយ​ទទួលបានពីម្ចាស់រោងចក្រ និង៧០ភាគរយបានពី ប.ស.ស ព្រមទាំង​អត្ថប្រយោជន៍​ផេ្សងៗជាច្រើនទៀត៕

កម្ពុជា-វៀតណាម ឯកភាពលើការបន្តលើកកម្ពស់កិច្ចសហប្រតិបត្តិការលើគ្រប់វិស័យ

2023/10/11 12:03:25 pm        119
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បាន​អនុញ្ញាត​ឱ្យ ឯកឧត្តម ង្វៀន ហ៊ុយតាំង ឯកអគ្គរដ្ឋទូតវៀតណាមប្រចំាកម្ពុជា ចូលជួ​ប​សម្តែង​ការ​គួរ​សម និងពិភាក្សាការងារ នាព្រឹកថ្ងៃទី១១ ខែ តុលា ឆ្នាំ២០២៣ នៅវិមានសន្តិភាព។ ជាកិច្ចចាប់ផ្តើមសម្តេចធិបតីនាយករដ្ឋមន្ត្រី បាន​សម្តែង​នូវ​ការ​ស្វាគមន៍​ចំពោះ​វត្ត​មាន​របស់​ឯកឧត្តម​ ឯកអគ្គរដ្ឋទូតវៀតណាម ក្នុងជំនួបថ្ងៃនេះ ដែល​ជា​ឱកាស​ដើម្បី​ពិភាក្សា​អំពី​ការ​បន្ត​ពង្រឹង​ និងពង្រីកកិច្ចសហប្រតិបត្តិការរវាងកម្ពុជា និងវៀតណាម ដែល​មាន​ទំនាក់​ទំនង​ជា​ប្រវត្តិសាស្ត្រ ។ក្នុងឱកាសនៃជំនួបនេះ ឯកឧត្តម ង្វៀន ហ៊ុយតាំង បានស​ម្តែង​នូវ​ការ​អបអរ​សាទរ​សារ​ជា​ថ្មី​ជូន​សម្តេច​ធិបតី​ចំពោះ​ការ​ចូល​កាន់​មុខ​តំណែង​ជា​នាយករដ្ឋមន្រ្តី​នៃ​ព្រះរាជាណាចក្រកម្ពុជា​ព្រម​ទាំង​បាន​ជូន​ពរ សម្តេចធិបតី ទទួលបាននូវជោគជ័យក្នុងភារកិច្ចដ៏ឧត្តុង្គឧត្តមនេះ។ ឯកឧត្តមឯកអគ្គរដ្ឋទូតក៏បានថ្លែងនូវការកោតសរសើរចំពោះការអភិវឌ្ឍឥតឈប់ឈរលើគ្រប់វិស័យ​របស់ប្រទេសកម្ពុជា ជាពិសេសក្នុងរយៈកាលចុងក្រោយនេះ គឺការ​គ្រប់គ្រង​ប្រកបដោយ​ប្រសិទ្ធភាព​នូវ​ការរីករាលដាលនៃជំងឺកូវីដ-១៩ ដែលពិតជា​បាន​បង្ក​លក្ខណៈ​ដល់​ដំណើរ​ការរៀប​ចំ​ព្រឹត្តិការណ៍ជាតិ និងអន្តរជាតិសំខាន់ៗ ជាអាទិ៍៖ កិច្ចប្រជុំកំពូលអាស៊ានលើកទី៤០ និង៤១ ព្រម​ទាំងកិច្ចប្រជុំកំពូលពាក់ព័ន្ធ, ព្រឹត្តិការណ៍ប្រកួតកីទ្បាអាស៊ីអាគ្នេយ៍លើកទី៣២ និងការ​ប្រកួត​កីឡា​អាស៊ានប៉ារ៉ាហេ្គមលើកទី១២ នៅក្នុងឆ្នាំ២០២៣ និងការបោះឆ្នោតជ្រើសតាំងតំណាងរាស្រ្ត នីតិកាលទី៧ នៃរដ្ឋសភា ជាដើម ។ល។ ឯកឧត្តមអគ្គរដ្ឋទូត ក៏បានសម្តែងផងដែរនូវភាពសប្បាយរីករាយ​ចំពោះ​ទំនាក់​ទំនង​ទ្វេភាគី​កម្ពុជា​-វៀតណាម ដែលមានការរីកចម្រើនលូតលាស់ជាលំដាប់លើគ្រប់វិស័យ ហើយ​រដ្ឋាភិបាល​វៀតណាម​បេ្តជ្ញាពង្រីកកិច្ចសហប្រតិបត្តិការនានាដែលមានស្រាប់នៅគ្រប់កម្រិត ជាពិសេស​វិស័យ​ពាណិជ្ជកម្ម, ទេសចរណ៍, ការពារជាតិ និងសន្តិសុខ ក៏ដូចជានឹ​ង​បន្ត​សំឡឹង​មើល​វិស័យ​សក្តានុ​ពល​ថ្មី​ៗ​បន្ថែមទៀត។ បន្ថែមពីនេះទៀត ឯកឧត្តមឯកអគ្គរដ្ឋទូតវៀតណាម បានបង្ហាញនូវ​បំណង​ក្នុង​ការ​គោរព​អញ្ជើញ​សម្តេច​ធិបតី ទៅបំពេញទស្សនកិច្ចផ្លូវការនៅក្នុងប្រទេសវៀតណាម ក្នុងពេលឆាប់ៗខាងមុខនេះ ។ជាចុងក្រោយ សម្តេចធិបតីនាយករដ្ឋមន្ត្រី និងឯកឧត្តមឯកអគ្គរដ្ឋទូតវៀតណាម បាន​ឯកភាព​លើការបន្តលើកកម្ពស់កិច្ចសហប្រតិបត្តិការលើគ្រប់វិស័យ ជាពិសេសក្នុងវិស័យពាណិជ្ជកម្ម, ទេសចរណ៍ និងការពារជាតិ ។ ដោយឡែក ជំនួបនេះ ក៏បានផ្តោត​ការ​ពិភាក្សា​ផង​ដែរ​អំពីយន្តការ​ត្រី​ភាគី​កម្ពុជា-ឡាវ-វៀតណាម សំដៅពង្រឹង និងពង្រីកកិច្ចសហប្រតិបត្តិការឱ្យកាន់តែជិតស្និទ្ធ និងរឹងមាំបន្ថែមទៀត៕

ប្រធានាធិបតីអ៊ុយក្រែន សាទរដំណឹងល្អពីជំនួយការពារដែនអាកាស បន្ទាប់ពីកិច្ចពិភាក្សានៅប្រទេសរូម៉ានី

2023/10/11 11:52:29 am        116
Facebook Telegram Linkin
ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃអង្គារ (១០ តុលា) ថា លោកមាន «ដំណឹងល្អ» ស្តីពីការផ្គត់ផ្គង់កាំភ្លើងធំ និងប្រព័ន្ធការពារអាកាស បន្ទាប់ពីបានពិភាក្សាជាមួយប្រធានាធិបតីរ៉ូម៉ានី លោក Klaus Iohannis ក្នុងទីក្រុងប៊ុយការ៉េស (Bucharest) ប៉ុន្តែមិនបានផ្តល់ព័ត៌មានលម្អិតនោះទេ។លោក Zelenskiy ក៏បាននិយាយផងដែរថា អ្វីគ្រប់យ៉ាងដែលអាចធ្វើទៅបាន គួរតែត្រូវបានធ្វើ ដើម្បីទប់ស្កាត់ប្រទេសរុស្ស៊ី បង្វែរផ្នែកមួយនៃសមុទ្រខ្មៅ ឬតំបន់ Danube ទៅជាអ្វីដែលលោកបានពិពណ៌នាថា ជា «តំបន់ស្លាប់» នៃដែនសមុទ្រ។ រុស្ស៊ីបានដកខ្លួនចេញពីកិច្ចព្រមព្រៀង ដែលធានាការនាំចេញគ្រាប់ធញ្ញជាតិអ៊ុយក្រែន ប្រកបដោយសុវត្ថិភាពតាមរយៈសមុទ្រខ្មៅ ហើយបាននិងកំពុងវាយប្រហារហេដ្ឋារចនាសម្ព័ន្ធកំពង់ផែអ៊ុយក្រែននៅលើទន្លេ Danube ផងដែរ។លោក Zelenskiy ក៏បានលើកឡើងអំពីជម្លោះរវាងអ៊ីស្រាអែល និងប៉ាឡេស្ទីន ដោយលោកបានរំលឹកឡើងវិញថា លោកជឿថា នោះជាផលប្រយោជន៍របស់រុស្ស៊ី ក្នុងការធ្វើឱ្យមានសង្រ្គាមនៅមជ្ឈិមបូព៌ា។ អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅមុននោះបន្តិចថា ការផ្តល់យោបល់របស់លោក Zelenskiy កាលពីថ្ងៃចន្ទ ថាជាផលប្រយោជន៍របស់រុស្ស៊ី ក្នុងការបង្កសង្គ្រាមនៅមជ្ឈិមបូព៌ា ដើម្បីធ្វើឱ្យការរួបរួមជាសកលចុះខ្សោយនោះ គឺជាការលើកឡើងដោយគ្មានមូលដ្ឋានច្បាស់លាស់ទាល់តែសោះ៕

សហភាពអឺរ៉ុប ព្រមានកម្មវិធីXរបស់លោកMuskជុំវិញការផ្សព្វផ្សាយព័ត៌មានមិនស្របច្បាប់ បន្ទាប់ពីការវាយប្រហាររបស់ក្រុមហាម៉ាស់

2023/10/11 11:47:11 am        103
Facebook Telegram Linkin
ប្រធានផ្នែកឌីជីថលរបស់សហភាពអឺរ៉ុបលោក Thierry Breton បានព្រមានលោក Elon Musk កាលពីថ្ងៃអង្គារថា កម្មវិធី Xរបស់ខ្លួន ដែលពីមុនគេស្គាល់ថាជា Twitter កំពុងផ្សព្វផ្សាយ «ខ្លឹមសារខុសច្បាប់ និងព័ត៌មានមិនពិត»នៅក្នុងលិខិតមួយឃើញដោយសារព័ត៌មានAFP។លិខិតនោះ បានឲ្យដឹងថា ការព្រួយបារម្ភបានកើនឡើង បន្ទាប់ពីការវាយប្រហាររបស់ក្រុមហាម៉ាស់ប្រឆាំងនឹងអ៊ីស្រាអែល ហើយបានទាមទារឲ្យលោក Musk ឆ្លើយតបទៅនឹងពាក្យបណ្តឹងនេះ ក្នុងរយៈពេល២៤ម៉ោង និងទាក់ទងទៅ«អាជ្ញាធរអនុវត្តច្បាប់ដែលពាក់ព័ន្ធ»។ក្នុងនាមជាស្នងការនៃសហភាពអឺរ៉ុបទទួលបន្ទុកឧស្សាហកម្ម និងសេដ្ឋកិច្ចឌីជីថល លោក Breton ត្រូវបានចាត់តាំងឲ្យតាមដានក្រុមហ៊ុនអ៊ីនធឺណិតខ្នាតយក្ស ដែលធ្វើពាណិជ្ជកម្មក្នុងប្លុកនេះ ហើយអាចចាប់ផ្តើមចំណាត់ការតាមច្បាប់។លោក Breton បានសរសេរថា៖«បន្ទាប់ពីការវាយប្រហារភេរវកម្មដែលធ្វើឡើងដោយក្រុមហាម៉ាស់ប្រឆាំងនឹងអ៊ីស្រាអែល យើងមានការបង្ហាញថា កម្មវិធីរបស់អ្នក កំពុងត្រូវបានប្រើប្រាស់ ដើម្បីផ្សព្វផ្សាយខ្លឹមសារខុសច្បាប់ និងព័ត៌មានមិនពិត នៅក្នុងសហភាពអឺរ៉ុប»។

លោក ថេង សុថុល អភិបាលខណ្ឌ៧មករា ជួបសំណេះសំណាលជាមួយមន្ត្រីរាជការគ្រប់ការិយាល័យ

2023/10/11 11:39:19 am        208
Facebook Telegram Linkin
ភ្នំពេញ៖ លោក ថេង សុថុល អភិបាលនៃគណៈអភិបាលខណ្ឌ ៧មករា បានជួបសំណេះសំណាល​ជាមួយ​មន្ត្រីរាជការគ្រប់ការិយាល័យ​ចំណុះខណ្ឌ ខែ៧មករា​ នៅឱកាសបុណ្យភ្ជុំបិណ្ឌ ​និងបាន​ឧបត្ថម្ភ​ប្រាក់​បន្តិចបន្តួច​និងភេសជ្ជៈ​ជូនដល់មន្ត្រីគ្រប់រូប ​និ​ងជូនពរ​សុខសុវត្ថិភាពក្នុងការធ្វើដំណើរ ព្រមទាំងណែនាំឲ្យមន្រ្តីគ្រប់រូបគោរពច្បាប់ចរាចរណ៍ ទាំងអស់គ្នា។ពិធីសំណេះសំណាលនេះ បានធ្វើឡើងនាព្រឹកថ្ងៃទី១១ ខែតុលាឆ្នាំ ២០២៣ នៅសាលប្រជុំសាលា​ខណ្ឌ៧មករា​ ដែលក្រោមវត្ដមាន​លោក ថេង សុថុល អភិបាលខណ្ឌ និងមន្ត្រីក្រោមឱវាទ​គ្រប់ការិយាល័យទាំងអស់ចំណុះអោយរដ្ឋបាលខណ្ឌ។លោក ថេង សុថុល អភិបាលខណ្ឌ៧មករា​ ក្នុងពិធីជួបសំណេះសំណាលជាមួយមន្ត្រីរាជការគ្រប់​ការិយាល័យ​ចំណុះអោយរដ្ឋបាលខណ្ឌសរុបជាង ១០០នាក់ លោកបានលើកឡើងថា ថ្វីត្បិតតែ​កន្លងមក​យើងទទួលបាននូវ​ការ​កោតសសើរពីប្រជាពលរដ្ឋក្នុងការបំរើសេវ៉ា​សាធារណៈផ្សេងៗ​ជូនពួកគាត់យ៉ាណាក៏ដោយ ​សូមបន្តអនុវត្តការងារប្រកបដោយភាពទទួលខុសត្រូវ ប្រកាន់ខ្ជាប់​នូវក្រម​សីលធម៌​ សុជីវធម៌ វិជ្ជាជីវៈ ​ក្នុងការបន្តបំរើសេវ៉ា​សាធារណៈជូនប្រជាពលរដ្ឋ​អោយ​បានល្អប្រសើរឡើងថែម​ទៀតធ្វើអោយលឿន ​ រហ័ស និងមានតម្លាភាព ។ក្នុងពិធីជួបសំណេះសំណាលមុនបុណ្យភ្ជុំបិណ្ឌនេះដែរ លោកអភិបាលខណ្ឌ បានថ្លែងកោតសសើរ​មន្ត្រីទទួលបន្ទុកអនុវត្តការងារគ្រប់ការិយាល័យទាំងអស់​ដែលបានខិតខំបំពេញការងារបំរើសេវ៉ា​សាធារណៈផ្សេងៗ​ជូនបងប្អូនប្រជាពលរដ្ឋរហូតទទួលបានការកោតសសើរតបមកវិញ។ជាក់ស្តែងការិយាល័យច្រកចេញ-ចូល​តែមួយ ​បានខិតខំបំរើសេវ៉ាសាធារណៈជូនប្រជាពលរដ្ឋ​បានលឿន រហ័ស ​និងមានតម្លាភាព រហូតដល់ប្រជាពលរដ្ឋលោកមានការកោតសរសើ ។ ដូច្នេះសូមមន្ត្រីគ្រប់ការិយាល័យទាំងអស់រួមគ្នាបន្តការអនុវត្តន៍​អោយបានល្អប្រសើរឡើងថែមទៀត ក្នុងការ​បំរើសេវ៉ាសាធារណៈផ្សេងៗជូនប្រជាពលរដ្ឋ ​មានសាមគ្គីភាពផ្ទៃក្នុងល្អ រក្សាបាននូវ​ក្រម​សីលធម៌ សុជីវធម៌ វិជ្ជាជីវៈ ​នៅពេលដែលប្រជាពលរដ្ឋមកទទួលសេវ៉ាគ្រប់ការិយាល័យទាំងអស់ ។ជាមួយគ្នានេះដែរលោកអភិបាលខណ្ឌបានឧបត្ថម្ភថវិកា ​និងភេសជ្ជៈ សម្រាប់ចូលរួមបពិធីបុណ្យភ្ជុំ ដល់មន្ត្រីរាជការចំណុះអោយរដ្ឋបាលខណ្ឌគ្រប់ៗគ្នា ៕ អត្ថបទ ៖ កុម្ភៈ

គណបក្សខ្មែរតែមួយប្រកាសគោលបំណងចង់ធ្វើសម្ព័ន្ធភាពជាមួយគណបក្សប្រជាជនកម្ពុជា

2023/10/11 11:31:04 am        195
Facebook Telegram Linkin
ភ្នំពេញ៖ គណបក្សខ្មែរតែមួយ នៅថ្ងៃទី១១ តុលា ឆ្នាំ ២០២៣នេះ បានចេញលិខិត ប្រកាសថា មានគោលបំណងធ្វើសម្ព័ន្ធភាពជាមួយគណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជាប្រធានគណបក្ស ដើម្បីរួមគ្នាការពាររដ្ឋធម្មនុញ្ញឆ្នាំ ១៩៩៣ ព្រមទាំងរួមគ្នាការពាររាជរដ្ឋាភិបាលស្របច្បាប់ដែលបានកើតឡើងតាមរយៈការបោះ ឆ្នោតក្នុងអាណត្តិនីមួយៗ។សេចក្ដីប្រកាសបានបញ្ជាក់ថា ​គណបក្សខ្មែរតែមួយ មានគោលនយោបាយស្រដៀងគ្នា​ជាមួយ​គណបក្សប្រជាជនកម្ពុជា និងជាពិសេស “តម្លៃសន្តិភាព" គឺជាវត្ថុបំណងរួមរបស់ប្រជាពលរដ្ឋខ្មែរ​ដែលត្រូវការ ចូលរួមការពារសុខសន្តិភាពទាំងអស់គ្នា ​ដើម្បីរក្សាស្ថិរភាពនយោបាយ និងធ្វើឱ្យប្រទេសកម្ពុជា ​បន្តការអភិវឌ្ឍរីកចម្រើនជាលំដាប់។គណបក្សខ្មែរតែមួយក៏បានអំពាវនាវដល់គណបក្សនយោបាយនានា ដែលបានចុះបញ្ជី​ស្របច្បាប់​នៅក្នុងក្រសួងមហាផ្ទៃ ​សូមចូលរួមបង្កើតសម្ព័ន្ធភាពជាមួយគណ បក្សប្រជាជនកម្ពុជា ដើម្បីរួមគ្នា​ជាកម្លាំងប៉ូលនយោបាយថ្មីមួយដើម្បីកម្ពុជា ​និងប្រជាពលរដ្ឋខ្មែរ ឆ្ពោះទៅថ្ងៃអនាគត៕

កម្ពុជា-ប្រេស៊ីល ប្តេជ្ញាបន្តពង្រឹង និងពង្រីកទំនាក់ទំនងកិច្ចសហប្រតិបត្តិការល្អរវាង

2023/10/11 11:16:02 am        171
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម ម៉ៅរូ វីអេរ៉ា (Mauro Vieira) រដ្ឋមន្ត្រីការបរទេសនៃសាធារណរដ្ឋសហព័ន្ធប្រេស៊ីស និង​គណៈ​ប្រតិភូ ចូលជួបសម្តែងការគួរសម និងពិភាក្សាការងារ ក្នុងអំទ្បុង​ពេល​នៃ​ដំណើរ​បំពេញ​ទស្សន​កិច្ចផ្លូ​វការចំនួន ៣ ថ្ងៃ នៅព្រះរាជាណាចក្រកម្ពុជា នាព្រឹកថ្ងៃទី១១ ខែតុលា ឆ្នាំ​២០២៣​នេះ​នៅ​វិមានសន្តិភាព។ក្នុង​ជំនួបនេះ សម្តេចធិបតីនាយករដ្ឋមន្ត្រី បាន​សម្តែង​នូវ​ការ​ស្វាគមន៍​ចំពោះ​ការ​អញ្ជើញ​មក​បំពេញ​ទស្សន​កិច្ចផ្លូវការរបស់ ឯកឧត្តមរដ្ឋមន្ត្រីការបរទេសប្រេស៊ីល នាពេលនេះ និង​បាន​ធ្វើ​ការ​វាយ​តម្លៃ​ខ្ពស់ចំពោះលទ្ធផលនៃកិច្ចសហប្រតិបត្តិការកន្លងមករវាងប្រទេសទាំងពីរ ព្រម​ជា​មួយ​នឹង​ក្តី​សង្ឃឹមថា ទំនាក់ទំនងដ៏ល្អនេះនឹងកាន់តែត្រូវបានពង្រឹង និងពង្រីកបន្ថែមទៀត ខ​ណៈ​ពេល​ដែល​កម្ពុជា​មានរាជរដ្ឋាភិបាលថ្មី ប៉ុន្តែគោលនយោបាយការបរទេស ជាពិសេស​ក្នុង​ទំនាក់​ទំនង​រវាង​កម្ពុជា-ប្រេស៊ីល នៅរក្សាដដែល។ក្នុងឱកាសនោះ ឯកឧត្តម ម៉ៅរូ វីអេរ៉ា បានគោរពប្រគល់ជូនសម្តេចធិបតី នូវ​លិខិត​អបអរ​សាទរ​របស់ ឯកឧត្តមប្រធានាធិបតីប្រេស៊ីល ក្នុងឱកាសដែល សម្តេចធិបតី ចូល​កាន់​មុខ​តំណែង​ជា​នាយករដ្ឋ​មន្រ្តី នៃព្រះរាជាណាចក្រកម្ពុជា ហើយក៏បាន​ធ្វើ​ការ​បញ្ជាក់​ផង​ដែរ​នូវ​បំណង​ក្នុង​ការ​បង្កើន​កិច្ច​សហប្រតិបត្តិការលើវិស័យពាណិជ្ជកម្ម, អប់រំ, សុខាភិបាល និងការ​ផ្លាស់​ប្តូរ​វប្បធម៌​រវាង​ប្រទេស​ទាំង​ពីរ ឱ្យកាន់តែខ្លាំងក្លាបន្ថែមទៀត។ ទន្ទឹមនឹងនេះឯកឧត្តមរដ្ឋមន្ត្រី បានសម្តែងនូវ​ក្តី​រីក​រាយ​សាទ​រ​ចំពោះ​ការ​សម្រេច​ចិត្ត​របស់​រាជ​រដ្ឋាភិបាល​កម្ពុជា​ក្នុងការបើកស្ថានឯកអគ្គរាជទូតកម្ពុជានៅក្នុងប្រទេសប្រេស៊ីល ហើយ​ក៏​បាន​ជម្រាប​ផង​ដែរថា ប្រេស៊ីល​ក៏​គ្រោង​នឹង​បើក​ស្ថាន​ឯក​អគ្គ​រដ្ឋទូត​របស់​ខ្លួន​នៅ​រាជ​ធានី​ភ្នំពេញ​ក្នុង​ឆ្នាំ​២០២៤​ ខាងមុខនេះ ស្របពេលនៃខួបអនុស្សាវរីយ៍លើកទី៣០ នៃទំនាក់ទំនងការទូតកម្ពុជា-ប្រេស៊ីល ។ ជាងនេះទៀត ឯកឧត្តម រដ្ឋមន្ត្រីការបរទេសប្រេស៊ីល ក៏បាន​សម្តែង​នូវ​ការ​អរគុណ​ចំពោះ​កម្ពុជា ដែលបានគាំទ្រប្រទេសប្រេស៊ីលឱ្យក្លាយជាដៃគូសន្ទនាតាមវិស័យរបស់អាស៊ាន នៅ​រាជ​ធានី​ភ្នំពេញ ក្នុងអំឡុងពេលដែលកម្ពុជាធ្វើជាប្រធានអាស៊ានឆ្នាំ២០២២ ។ទន្ទឹមនឹងនេះផងដែរ សម្តេចធិបតីនាយករដ្ឋមន្ត្រី និង ឯកឧត្តមរដ្ឋមន្ត្រីការបរទេសប្រេស៊ីល ក៏​បាន​ឯកភាព​គ្នាពង្រីកកិច្ចសហប្រតិបត្តិការក្នុងវិស័យទេសចរណ៍, កសិកម្ម, និងទំនាក់​ទំនង​រវាង​ប្រជាជន និងប្រជាជន ព្រមទាំងបានពិភាក្សាអំពីបញ្ហាមួយចំនួនទៀត ដែលជា​ផល​ប្រយោជន៍​រួម​។ ជាចុងក្រោយ ឯកឧត្តមរដ្ឋមន្ត្រីការបរទេសប្រេស៊ីល បានគោរពអញ្ជើញ សម្តេចធិបតី ទៅ​បំពេញ​ទស្សន​កិច្ច​នៅក្នុងប្រទេសប្រេស៊ីល ក្នុងពេលវេលាសមស្របណាមួយ ។ ជាការឆ្លើយតប សម្តេច​ធិបតី បានទទួលយកការអញ្ជើញនេះដោយក្តីរីករាយ និងបានបង្ហាញអំពីបំណងក្នុងការអញ្ជើញ ឯកឧត្តម​ប្រធានាធិបតីប្រេស៊ីល មកបំពេញទស្សនកិច្ចនៅកម្ពុជាវិញ ជាពិសេស​នៅ​ក្នុង​ឆ្នាំ​២០២៤​ ខាងមុខនេះ ដែលជាឆ្នាំនៃការប្រារព្ធខួបលើកទី៣០ នៃចំណងការទូតផ្លូវការកម្ពុជា-ប្រេស៊ីល ព្រមជាមួយការបើកដំណើរការស្ថានអគ្គរដ្ឋទូតប្រេស៊ីលប្រចាំនៅកម្ពុជាផងដែរ៕

ឯកឧត្តម យឿន យឿត និងលោកជំទាវដឹកនាំក្រុមការងារកាន់បិណ្ឌវេនទី១២ នៅវត្តសុវណ្ណាបុប្ផារាម

2023/10/11 10:40:40 am        203
Facebook Telegram Linkin
ឯកឧត្តម យឿន យឿត ទីប្រឹក្សារាជរដ្ឋាភិបាល និង​ជា​ទីប្រឹក្សា​របស់​សម្តេច​អគ្គ​មហា​សេនា​ធិបតី​តេជោ ​ប្រធានគណបក្សប្រជាជនកម្ពុជា និងលោកជំទាវ ថៅ និម្មល រួមទាំង​ក្រុម​ការងារ​សេនា​សន្តិភាព​ នៅព្រឹកថ្ងៃអង្គារ៍ទី១០ ខែតុលាឆ្នាំ២០២៣នេះ បានប្រារព្ធពិធីកាន់បិណ្ឌវេនទី១២ នៅ​វត្ត​សុវណ្ណ​បុប្ផារាម ហៅវត្តថ្មគោល ឃុំតាពូង ស្រុកថ្មគោល ខេត្តបាត់ដំបង។ ការចូលរួមកាន់បិណ្ឌនេះ គឺធ្វើឡើងតាមទំនៀមទម្លាប់ប្រពៃណីព្រះពុទ្ធសាសនា ហើយក៏ដើម្បីផ្គត់ ផ្គង់​ព្រះសង្ឈគង់ចាំព្រះវស្សា និងប្រមែប្រមូលផល្លានិសង្ឈ ដែលកើត​ចេញ​ពី​សទ្ធាចិត្ត​ជ្រះថ្លា​លើក​ឧទ្ទិស ជូនដល់ញាតិបុព្វការីជនមាន មាតាបិតា ញាតិការទាំងប្រាំពីរសន្តាន ដែល​បាន​ចែក​ឋាន​ទៅ​កាន់​បរលោកនាយជាដើម។ក្រៅពីរាប់បាត ប្រគេនចង្ហាន់ដល់ព្រះសង្ឈឯកឧត្តម យឿន យឿត និងលោកជំទាវ រួម​ទាំង​ក្រុម​ការងារ ក៏បាននាំបច្ច័យមួយចំនួនប្រគេនដល់ព្រះសង្ឈ ដើម្បីកសាងនូវសមិទ្ធផលនានា ក្នុង​វត្តជា​កិច្ច​ទ្រទ្រង់​ព្រះពុទ្ធសាសនាឲ្យបានឋិតថេរចីរកាលគ្រប់៥០០០ព្រះវស្សាផងដែរ។នៅក្នុងឱកាសនោះឯកឧត្តម យឿន យឿត បានលើកឡើងថា បុណ្យ​កាន់​បិណ្ឌ​ និង​ភ្ជុំ​បិណ្ឌ​ជា​ពិធី​បុណ្យ​សាសនា​ធំប្រចាំឆ្នាំ ដែលមានរយៈពេល១៥ថ្ងៃ គឺចាប់ពីថ្ងៃ១រោច ដល់ថ្ងៃ១៥រោច ខែ​ភទ្របទ​។ បុណ្យភ្ជុំបិណ្ឌជាពិធីបុណ្យមួយដែលធំជាងគេ នៅក្នុងចំណោមពិធីបុណ្យទាំងអស់ ចំពោះ​អ្នក​កាន់ព្រះពុទ្ធសាសនា។ ជារៀងរាល់ឆ្នាំនៅពេលដល់ថ្ងៃខែ ដែលត្រូវប្រារព្ធ ពិធី​បុណ្យ​ភ្ជុំ​បិណ្ឌ​ គ្រប់បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែង​តែ​ធ្វើ​ដំណើរ​ទៅ​ជួប​ជុំគ្នា ជាពិសេសឪពុកម្ដាយនៅស្រុកកំណើត ដើម្បីរៀបចំម្ហូបអាហារ បាយសម្ល ចង្ហាន់​យក​ទៅ​ប្រគេន​ព្រះសង្ឃ ដែលគង់នៅវត្តអារាម។ ទាំងនេះគឺជាទម្លាប់មួយដែលគេនិយមធ្វើតៗគ្នា របស់​ជនជាតិខ្មែរជាយូរមកហើយ។យ៉ាងណាក៏ដោយឯ៑កឧត្តម បានលើកឡើងថា ការដែលយើងមានឱកាសជួបជុំគ្នាធ្វើបុណ្យ ជា​ពិសេស​បុណ្យកាន់បិណ្ឌនាពេលនេះ គឺដោយសារប្រទេសមានសុខសន្តិភាព និងការ​អភិវឌ្ឍ​ផង​ដែរ​៕

លោកអេរដូហ្គែន និងលោក ពូទីន ពិភាក្សាអំពីវិធានការ ដើម្បីបញ្ឈប់ជម្លោះអ៊ីស្រាអែល-ប៉ាឡេស្ទីន

2023/10/11 10:33:10 am        166
Facebook Telegram Linkin
ប្រធានាធិបតីទួរគី លោក តាយីប អេរដូហ្គែន ( Tayyip Erdogan) បានពិភាក្សាអំពីជម្លោះអ៊ីស្រាអែល-ប៉ាឡេស្ទីនជាមួយសមភាគីរុស្ស៊ីលោក វ្ល៉ាឌីមៀ ពូទីន នៅក្នុងការសន្ទនាតាមទូរស័ព្ទកាលពីថ្ងៃអង្គារ ដោយវិមានក្រឹមឡាំង បាននិយាយថា ការផ្តោតជាសំខាន់ គឺទៅលើបទឈប់បាញ់ជាបន្ទាន់ និងការបន្តការចរចាឡើងវិញ។នៅក្នុងសេចក្តីថ្លែងការណ៍មួយ ដែលបានបង្ហោះនៅលើបណ្តាញសង្គម X ដែលពីមុនត្រូវបានគេស្គាល់ថាជា Twitter ប្រធានាធិបតីទួរគីរូបនេះ បាននិយាយថា មេដឹកនាំទាំងពីរ បានពិភាក្សាគ្នាអំពីវិធានការ ដើម្បីទប់ស្កាត់ការកើនឡើងភាពតានតឹង និងការផ្តួចផ្តើមគំនិតក្នុងការផ្តល់ជំនួយមនុស្សធម៌។សេចក្តីថ្លែងការណ៍របស់វិមានក្រឹមឡាំង បានសម្តែងការសោកស្តាយចំពោះ«ការកើនឡើងដ៏មហន្តរាយនៃការស្លាប់ក្នុងចំណោមជនស៊ីវិល»។ សេចក្តីថ្លែងការណ៍នោះ បានឲ្យដឹងទៀតថា ជម្លោះអាចត្រូវបានដោះស្រាយបានតែលើមូលដ្ឋាននៃផែនការ «រដ្ឋពីរ» ជាមួយនឹងការបង្កើតរដ្ឋប៉ាឡេស្ទីន ដែលមានទីក្រុងហ្ស៊េរុយសាឡឹមខាងកើតជារដ្ឋធានីរបស់ខ្លួន។សេចក្តីថ្លែងការណ៍របស់ទួរគី បាននិយាយថា ទីក្រុងអង់ការ៉ា នឹងបន្តកិច្ចខិតខំប្រឹងប្រែងរបស់ខ្លួន ដើម្បីធានាបាននូវភាពស្ងប់ស្ងាត់ នៅក្នុងតំបន់។ ចំណែកវិមានក្រឹមឡាំង បាននិយាយថា ទំនាក់ទំនងរវាងមេដឹកនាំទាំងពីរ នឹងនៅបន្ត។

សម្តេចធិបតី អនុញ្ញាតឱ្យរដ្ឋមន្ត្រីការបរទេសប្រេស៊ីល ជួបសម្ដែងការគួរសម និងពិភាក្សាការងារ

2023/10/11 10:22:23 am        110
Facebook Telegram Linkin
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី ១១ ខែតុលា ឆ្នាំ ២០២៣នេះ បានអនុញ្ញាតឱ្យឯកឧត្តម ម៉ៅរូ វីអេរ៉ា (Mauro Vieira) រដ្ឋមន្ត្រី ក្រសួងការបរទេសនៃសាធារណរដ្ឋសហព័ន្ធ ប្រេស៊ីល ចូលជួបសំដែងការគួរសម និងពិភាក្សាការងារ។ក្នុងជំនួបនៅវិមានសន្តិភាពព្រឹកមិញនេះ ភាគីទាំង២ បានបង្ហាញការរីករាយអំពីទំនាក់ទំនងដ៏ល្អរវាងប្រទេសទាំង ២ ជាពិសេសប្តេជ្ញាបន្តពូនជ្រុំកិច្ចព្រមព្រៀង សហប្រតិបត្តិការដែលមានស្រាប់ឱ្យកាន់តែល្អប្រសើរឡើងថែមទៀត។សូមជម្រាបថា វត្តមានរបស់ ឯកឧត្តម ម៉ៅរូ វីអេរ៉ា រដ្ឋមន្ត្រីការ បរទេសនៃសាធារណរដ្ឋសហព័ន្ធប្រេស៊ីល នៅកម្ពុជានាពេលនេះ គឺតបតាមការអញ្ជើញពីឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជាចាប់ពីថ្ងៃទី ១០ ដល់ថ្ងៃទី១២ ខែតុលា ឆ្នាំ២០២៣។ក្នុងអំឡុងពេលទស្សនកិច្ចជាផ្លូវការនេះ ឯកឧត្តមរដ្ឋមន្ត្រីការបរទេសប្រេស៊ីលបានចូលជួប​សម្ដែងការ​គួរសម​ជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជួប​ជាមួយឯកឧត្ដមឧបនាយករដ្ឋមន្ត្រី សុខ ចិន្តាសោភា ដើម្បីដាក់ចេញនូវវិធានការសកម្មភាព ជំរុញ​និងពង្រីកបន្ថែមទៀតនូវកិច្ចសហប្រតិបត្តិការ​ ទ្វេភាគីដែលមានកន្លងមករវាងប្រទេសទាំងពីរ រួមមាន​ពាណិជ្ជកម្ម វិនិយោគ ទេសចរណ៍ និងកិច្ច សហការបច្ចេកទេស ព្រមទាំង​កិច្ច​សហប្រតិបត្តិការ​នៅក្នុងវេទិកាពហុភាគី ផងដែរ។ដំណើរទស្សនកិច្ចនេះនឹងជាជំហានថ្មីសំខាន់មួយទៀត ​ដែលគូសបញ្ជាក់​ពី​ការប្តេជ្ញាចិត្តរួមគ្នា ក្នុងការពង្រឹង និងពង្រីកចំណងមិត្តភាពនិងកិច្ចសហប្រតិបត្តិការរវាងប្រទេសទាំងពីរ៕

បណ្ដាញសង្គម

ព័ត៌មានថ្មីៗ

កូរ៉េខាងជើងច្រានចោលការចោទប្រកាន់របស់អាមេរិកថា ទីក្រុងព្យុងយ៉ាង គឺជាការគំរាមកំហែងតាមប្រព័ន្ធអ៊ីនធឺណិត
05/03/2026 01:05 PM
Facebook Telegram Linkin
ប្រធានាធិបតីគុយបាបរិហារទណ្ឌកម្មថ្មីរបស់សហរដ្ឋអាមេរិកលើប្រទេសរបស់លោក
05/03/2026 01:05 PM
Facebook Telegram Linkin
មនុស្ស ១១នាក់ស្លាប់ ក្នុងហេតុការណ៍ក្រឡាប់រថយន្តក្រុងនៅភាគខាងលិចម៉ិកស៊ិក
05/03/2026 01:05 PM
Facebook Telegram Linkin
ក្រុមមន្រ្តីនិយាយថា សហរដ្ឋអាមេរិកដកទាហាន ៥ពាន់នាក់ចេញពីប្រទេសអាល្លឺម៉ង់
05/03/2026 12:05 PM
Facebook Telegram Linkin
អ្នកនាំពាក្យ៖ កម្មវិធីនយោបាយ និងការអភិវឌ្ឍរបស់កម្ពុជា បាននិងកំពុងដំណើរការទៅមុខជានិច្ច បើទោះបីកម្ពុជារងការឈ្លានពានពីថៃ
05/03/2026 12:05 PM
Facebook Telegram Linkin
ប្រតិភូសភាប្រើភាសាបារាំង ១៧ប្រទេសធ្វើសិក្ខាសាលា អំពីក្របខ័ណ្ឌ និងការប្រើប្រាស់ឌីជីថលក្នុងសភា
05/03/2026 12:05 PM
Facebook Telegram Linkin
ជម្លោះនៅតែកើតមានរវាងក្រុមហេសបូឡា និងអ៊ីស្រាអែលនៅតំបន់ភាគខាងត្បូងលីបង់
05/03/2026 12:05 PM
Facebook Telegram Linkin
លោក Trump និយាយថា មានលទ្ធភាពដែលអាមេរិកអាចចាប់ផ្តើមវាយប្រហារអ៊ីរ៉ង់ម្តងទៀត​
05/03/2026 12:05 PM
Facebook Telegram Linkin
មនុស្សយ៉ាងហោច ៩នាក់ស្លាប់ ក្នុងហេតុការណ៍អគ្គិភ័យនៅទីក្រុងញូវដែល្លី ប្រទេសឥណ្ឌា
05/03/2026 11:05 AM
Facebook Telegram Linkin
សហរដ្ឋអាមេរិកអនុម័តលក់អាវុធតម្លៃ ៨,៦ពាន់លានដុល្លារដល់សម្ព័ន្ធមិត្តមជ្ឈិមបូព៌ា
05/03/2026 11:05 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.