BTV NEWS

សម្ដេចតេជោ ផ្តាំទៅសារព័ត៌មានថៃថា «បើឆ្កួតសូមឆ្កួតតែពួកឯងចុះ» ខណៈសម្ដេចជាមនុស្សទីពីរបន្ទាប់ពីព្រះមហាក្សត្រចាំបាច់អីទៅធ្វើជាអគ្គបញ្ជាការកងទ័ព

ឯកឧត្តម ប៉ែន បូណា៖ ដើម្បីបណ្តុះបានមនុស្សពូកែ ទាល់តែគ្រូខ្លាំង

សម្ដេចធិបតី៖ កងកម្លាំងនគរបាលជាតិដើរតួនាទី និងបំពេញភារកិច្ចសំខាន់ធានាសន្តិសុខ សុវត្ថិភាព

សម្ដេចធិបតី ហ៊ុន ម៉ាណែត អញ្ជើញប្រគល់សញ្ញាបត្រដល់ជ័យលាភីបញ្ចប់ការសិក្សានៅបណ្ឌិត្យសភានគរបាលជាតិ

នយោបាយ និង ការអភិវឌ្ឍន៍

UNសាទរសម្តេចតេជោ ជាប្រធានអាស៊ានបានដើរតួរនាទីក្នុងស្មារតីជាបន្ទាន់ជួយដោះស្រាយបញ្ហាមីយ៉ាន់ម៉ា

ភ្នំពេញ៖ អគ្គលេខាធិការអង្គការសហប្រជាជាតិ តាមរយៈបេសកជនពិសេសរបស់ខ្លួន បានសម្ដែងនូវការសាទរ និងរីករាយចំពោះសម្តេចតេជោ ហ៊ុន សែន នាយករដ្ឋមន្ដ្រីកម្ពុជា ក្នុងនាមជាប្រធានអាស៊ាន បានដើរតួនាទីក្នុងស្មារតីជាបន្ទាន់ ចូលរួមជួយសម្របសម្រួលដោះស្រាយបញ្ហានៅមីយ៉ាន់ម៉ា។ក្នុងជំនួបតាមប្រព័ន្ធវីដេអូ នាព្រឹកថ្ងៃទី១៣មករា រវាងសម្ដេចតេជោនាយករដ្ឋមន្ត្រីកម្ពុជា ជាមួយលោកជំទាវបណ្ឌិត ណូលីន ហេយហ្សឺ(Noeleen Hayzer) បេសកជនពិសេសរបស់អគ្គលេខាធិការអង្គការសហប្រជាជាតិទទួលបន្ទុកបញ្ហាមីយ៉ាន់ម៉ានេះ បើតាមឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹងថា៖ លោកជំទាវ បណ្ឌិត ណូលីន ហេយហ្សឺ និងសម្ដេចតេជោនាយករដ្ឋមន្ត្រី ធ្លាប់បានជួបគ្នាម្ដងរួចមកហើយកាលពីឆ្នាំ២០១២ ពេលនោះលោកជំទាវបានមកបំពេញទស្សនកិច្ចនៅកម្ពុជាក្នុងក្របខ័ណ្ឌអង្គការ«អេស្កេប» ហើយពេលនេះ គឺជួបក្នុងក្របខណ្ឌកិច្ចសហការរវាងអាស៊ាន និង អង្គការសហប្រជាជាតិ ដោយសារឆ្នាំនេះកម្ពុជាជាប្រធានអាស៊ាន ហើយលោកជំទាវជាបេសកជនពិសេសរបស់អគ្គលេខាធិការអង្គការសហប្រជាជាតិ។លោកជំទាវក៏បានសាទរចំពោះសម្តេចតេជោ ដែលបានដើរតួរនាទីក្នុងស្មារតីជាបន្ទាន់ជួយដោះស្រាយបញ្ហាមីយ៉ាន់ម៉ា ។ឯកឧត្តម បានឱ្យដឹងដែរថា៖ សម្ដេចតេជោក៏បានអរគុណលោកជំទាវបណ្ឌិត ណូលីន ហេយហ្សឺ ដែលកន្លងមកបានធ្វើការជាមួយគ្នា, ហើយលើកនេះ ជាមួយនឹងការសាទរចំពោះលោកជំទាវដែលត្រូវបានតែងតាំងឱ្យដើរតួនាទីជាបេសកជនពិសេសរបស់អគ្គលេខាធិការអង្គការសហប្រជាជាតិស្ដីពីមីយ៉ាន់ម៉ា សម្ដេចក៏មានប្រសាសន៍ថា ដំណើរទស្សនកិច្ចការងាររបស់សម្ដេចទៅមីយ៉ាន់ម៉ាកន្លងទៅនេះ ការងារសំខាន់គឺមិនចេញឆ្ងាយពីធម្មនុញ្ញអាស៊ាន និងកុងសុងស៊ីស៥ចំណុច ដែលអាស៊ានបានឯកភាពគ្នាជាឯកច្ឆន្ទរួចហើយនោះទេ។ សម្ដេច បានគូសបញ្ជាក់ថា ថ្វីត្បិតឆ្នាំ២០២១ ការងាររបស់អាស៊ានមិនបានដើរដោយរលូន ដូច្នេះបញ្ហានៅសល់មកដល់នៅឆ្នាំ២០២២ កម្ពុជាធ្វើជាប្រធានអាស៊ានគោលដៅសំខាន់របស់សម្ដេចគឺទៅកាន់មីយ៉ាន់ម៉ា ដើម្បីរកមធ្យោបាយបញ្ឈប់ហិង្សា និងបទឈប់បាញ់។សម្តេចថា យើងមិនអាចនៅជាប់គាំងក្នុងស្ថានភាពបែបនេះបានទេ គឺត្រូវរកមធ្យោបាយ ដើម្បីទម្លុះទម្លាយស្ថានភាពដែលជាប់គាំង ដោយត្រូវជំរុញការចរចា ជាពិសេសផ្ទៃក្នុងអាស៊ាន គឺត្រូវតែធ្វើការជាមួយគ្នាដើម្បីឲ្យមានការឯកភាព។សម្ដេចនៅតែគូសបញ្ជាក់ អំពីការងារពីរជាអាទិភាព ក្នុងចំណោមកុងសុងស៊ីស៥ចំណុច ,ទី១.គឺផ្តោតជាសំខាន់ទៅលើបទឈប់បាញ់ និងបញ្ឈប់ហិង្សា, និងទី២.ការផ្ដល់ជំនួយមនុស្សធម៌ចូលទៅប្រទេសមីយ៉ាន់ម៉ាដោយគ្មានការរើសរើងសម្រាប់អ្នកដែលត្រូវការជំនួយ។សម្តេច បានគូសបញ្ជាក់ថា អ្វីដែលសំខាន់គឺយើងត្រូវតែធ្វើការជាមួយគ្នាដែលមិនមែនតែអាស៊ានទេគឺពីគ្រប់ភាគីពាក់ព័ន្ធរួមទាំងអង្គការសហប្រជាជាតិតែម្តង។សម្ដេចបន្តថា នឹងធ្វើយ៉ាងណាជំរុញឲ្យមានអាស៊ានមាន«ត្រូយកា»ដែលមានកម្ពុជាជាប្រធានអាស៊ានបច្ចុប្បន្ន, អតីតប្រទេសប្រុយណេប្រធានអាស៊ាន និងអនាគតប្រទេសឥណ្ឌូនេស៊ី ជាប្រធានអាស៊ានបូកនឹងអគ្គលេខាធិការអាស៊ាន ដើម្បីជំរុញការងារសម្របសម្រួលការងារ អំពីបទឈប់បាញ់ និងការងារមនុស្សធម៌ដែលជាការងារអាទិភាព។ សម្ដេច បានមានប្រសាសន៍បន្តថា តួនាទីទាំងនេះ ប្រេសិតពិសេស របស់ប្រធានអាស៊ាន,អគ្គលេខាធិការអាស៊ាន និង មជ្ឈមណ្ឌលអាហារ រួមទាំងការសម្របសម្រួលគ្រប់ភាគីនៅមីយ៉ាន់ម៉ារួមទាំងពីភាគីអង្គការសហប្រជាជាតិធ្វើការជាមួយគ្នា ជាពិសេសក្នុងការិយាល័យណាមួយរបស់អង្គការសហប្រជាជាតិដែលលោកជំទាវអាចចូលរួមចំណែកបាន។លើសពីនេះទៀតសម្ដេចតេជោនិងលោកជំទាវមានការឯកភាពគ្នាត្រូវតែមានការងារបន្ទាន់ ជាពិសេសបញ្ឈប់នឹងបទឈប់បាញ់។ លោកជំទាវបានជាអរគុណថ្មីចំពោះសម្តេចតេជោដែលបាននិងកំពុងធ្វើនេះព្រោះ អង្គការសហប្រជាជាតិបានមើលឃើញតួនាទីដ៏សំខាន់របស់អង្គការតំបន់ដូចជាអាស៊ានជាដើមនេះហើយជំទាវបានប្ដេជ្ញាថា នឹងធ្វើការងារជាមួយអាស៊ាន និងប្រធានអាស៊ាន ជាពិសេសធ្វើយ៉ាងណាកុំឲ្យស្ថានភាពនៅមីយ៉ាន់ម៉ាធ្លាក់ចុះជាងបច្ចុប្បន្ន ជាពិសេសលោកជំទាវនៅតែគិតថាតួនាទីប្រធានអាស៊ាននិងភាគីពាក់ព័ន្ធនឹងខិតខំជំរុញការអភិវឌ្ឍនៅកុងសង់ស៊ីស៥ចំណុច ហើយលោកជំទាវក៏មានប្រសាសន៍ថា យើងត្រូវតែជំរុញធ្វើយ៉ាងណាឱ្យនៅពេលខាងមុខអាស៊ាននិងអង្គការសហប្រជាជាតិនៅធ្វើការជាមួយគ្នាបានជិតស្និទ្ធ។ ជាចុងក្រោយសម្ដេចតេជោ បានស្នើឲ្យលោកជំទាវធ្វើការងារផ្ទាល់ជាមួយប្រេសិតពិសេសរបស់ប្រធានអាស៊ាន គឺ ឯកឧត្តមឧបនាយករដ្ឋមន្ត្រី ប្រាក់ សុខុន ដើម្បីធ្វើការសម្របសម្រួលនិងសហការជាមួយអង្គការសហប្រជាជាតិ ដើម្បីដោះស្រាយវិបត្តិនៅមីយ៉ាន់ម៉ា៕អត្ថបទ៖ មុត សុទ្ធ

អាជ្ញាធរខេត្តពោធិ៍សាត់ គ្រោងរៀបចំទីតាំងចាក់វ៉ាក់សាំងដូសទី៣ នៅតាមភូមិជូនពលរដ្ឋក្នុងមូលដ្ឋាន

ភ្នំពេញ៖ អាជ្ញាធរខេត្តពោធិ៍សាត់ គ្រោងរៀបចំទីតាំងចាក់វ៉ាក់សាំងដូសទី៣ នៅតាមភូមិ ជូនពលរដ្ឋក្នុងមូលដ្ឋាន ខណៈមេរោគបំប្លែងថ្មីអូមីក្រុងកំពុងមានវត្តមាននៅក្នុងប្រទេសកម្ពុជា។លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស និងឯកឧត្តម ជាវ តាយ អភិបាលខេត្តពោធិ៍សាត់ នៅថ្ងៃទី១២ខែមករានេះ បានប្រជុំពិភាក្សាការងារមួយចំនួនពាក់ព័ន្ធ និងដំណើរការចាក់វ៉ាក់សាំងកូវីដ-១៩ ជាពិសេសការជំរុញពលរដ្ឋទៅទទួលការចាក់វ៉ាក់សាំងដូសទី៣ ឬហៅថាដូសជំរុញ និងវិធានការទប់ស្កាត់ជំងឺកូវីដ-១៩។កិច្ចប្រជុំនេះ ធ្វើឡើងនៅសាលាខេត្តពោធិ៍សាត់ ដែលមានការចូលរួមពីមន្រ្តីពាក់ព័ន្ធមួយចំនួនទៀតផងដែរ។នៅក្នុងឱកាសនោះ លោកជំទាវវេជ្ជបណ្ឌិតបានជំរុញដល់អាជ្ញាធខេត្តពោធិ៍សាត់ ត្រូវខិតខំប្រឹងប្រែជំរុញដំណើរការចាក់វ៉ាក់សាំងកូវីដ-១៩ ជាពិសេសដូសទី៣ ជូនពលរដ្ឋឲ្យបានគ្រប់ៗគ្នា ដើម្បីបង្កើនអង់ទីគ័រ ទប់ទល់នឹងការវាយលុកពីជំងឺកូវីដ-១៩ ជាពិសេសមេរោគបំប្លែងថ្មីអូមីក្រុង។ ក្រៅពីការងារចាក់វ៉ាក់សាំង លោកជំទាវវេជ្ជបណ្ឌិត ក៏ស្នើរដល់អាជ្ញាធរខេត្តត្រូវអប់រំផ្សព្វផ្សាយដល់ពលរដ្ឋយល់ដឹងបន្ថែមទៀតពីវិធីការពារខ្លួនពីជំងឺកូវីដ-១៩។ជាការឆ្លើយតប ឯកឧត្តមជាវ តាយ អភិបាលខេត្តពោធិ៍សាត់ បានឲ្យដឹងថា ស្របតាមការណែនាំរបស់រាជរដ្ឋាភិបាល និងគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស អាជ្ញាធរខេត្តបានរៀបចំវិធានការជាបន្តបន្ទាប់ ជាពិសេសតាមការណែនាំរបស់លោកជំទាវឱ វណ្ណឌីននៅពេលនេះ គឺអាជ្ញាធរខេត្ត គ្រោងរៀបចំទីតាំងចាក់វ៉ាក់សាំងដូសទី៣ ឫដូសជំរុញ នៅតាមភូមិ ជូនពលរដ្ឋរស់នៅក្នុងមូលដ្ឋាន ខណៈមេរោគបំប្លែងថ្មីអូមីក្រុងកំពុងមានវត្តមាននៅក្នុងប្រទេសកម្ពុជា។បើតាមរបាយការណ៍របស់រដ្ឋបាលខេត្តពោធិ៍សាត់បានបង្ហាញថា គិតត្រឹមថ្ងៃនេះ លទ្ធផល នៃការផ្តល់វ៉ាក់សាំងដូសជំរុញជូនកុមារអាយុ១២ ដល់ក្រោម១៨ឆ្នាំ មានចំនួន១,៦៣០នាក់, អាយុ១៨ឆ្នាំឡើង មានចំនួនជាង៤ម៉ឺននាក់ ស្មើនឹង១៦.៦៣%។ សរុបទាំងពីរក្រុមគោលដៅ ស្មើនឹង២.២០% មានចំនួន ៤៨,២៩៨នាក់ ស្មើនឹង១៤.០៤%។លទ្ធផល នៃការសម្រេចបានទាំងនេះ គឺក្រោមការដាក់ចេញនូវផែនការ និងចង្អុលការយ៉ាងខ្ពង់ខ្ពស់ និងច្បាស់លាស់ របស់ថ្នាក់ដឹកនាំគ្រប់លំដាប់ថ្នាក់ និងមានការចូលរួមគ្រប់អ្នកពាក់ព័ន្ធជាពិសេសការដាក់ចេញយុទ្ធសាស្ដ្រដឹកនាំរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា៕ អត្ថបទ៖ ទូច សោភ័ណ

បារាំងកោតសរសើរដល់កម្ពុជា បានដឹកនាំគ្រប់គ្រងការរីកដាលជំងឺកូវីដ-១៩ និងអាចដំណើរការបើកប្រទេសឡើងវិញ

ភ្នំពេញ៖ បារាំងបានកោតសរសើរដល់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រី្ត ដែលបានដឹកនាំ គ្រប់គ្រងការរីករាលដាលនៃជំងឺកូវីដ-១៩ អាចឲ្យបើកដំណើរការប្រទេសបានឡើងវិញ។ការថ្លែងរបស់ឯកឧត្តម ហ្សាក់ ប៉ឺឡេ ( Jacques PELLET) ឯកអគ្គរដ្ឋទូតថ្មីនៃសាធារណរដ្ឋបារាំងប្រចាំនៅប្រទេសកម្ពុជាបែបនេះ នាឱកាសដែលឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល បានអនុញ្ញាតឲ្យឯកឧត្តម ឫកអគ្គរដ្ឋទូត និងប្រតិភូ ចូលជួបសម្តែងការគួរសម និងពិភាក្សាការងារទាក់ទងនឹងវិស័យសុខាភិបាល នៅទីស្តីការក្រសួងសុខាភិបាល ព្រឹកថ្ងៃទី១២ ខែមករា ឆ្នាំ២០២២នេះ។ឯកឧត្តម ឯកអគ្គរដ្ឋទូតបារាំង ក៏បានលើកឡើងអំពីកិច្ចសហប្រតិបតិ្តការវិស័យសុខាភិបាលដូចជា៖ កិច្ចសហប្រតិបតិ្តការរវាងវិទ្យាស្ថានប៉ាស្ទ័រកម្ពុជា (IPC) និងសាធារណរដ្ឋបារាំង។ វិទ្យាស្ថានប៉ាស្ទ័រកម្ពុជា ទទួលបានមូលនិធិតាមរយៈ ANRS/AFD/INSERM/ANR/FEI នៅក្នុងឆ្នាំ២០១៥ ដែលថវិកានេះ ត្រូវបានទទួលក្នុងផ្នែក ការអភិវឌ្ឍធនធានមនុស្ស ការស្រាវជ្រាវ។ កិច្ចសហប្រតិបតិ្តការរវាងសាកលវិទ្យាល័យវិទ្យាសាស្រ្តសុខាភិបាល និងសាធារណរដ្ឋបារាំង និងសមិទ្ធផលនៃកិច្ចសហប្រតិបតិ្តការរវាងសាកលវិទ្យាល័យវិទ្យាល័យសុខាភិបាល និងកិច្ចសហប្រតិបតិ្តការរវាងមនី្ទរពេទ្យកាល់ម៉ែត និងសាធារណរដ្ឋបារាំង និងសហប្រតិបតិ្តការបារាំង ផ្នែកមេរោគអេដស៍ និងជំងឺអេដស៍។ជាចុងក្រោយឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលបារាំង ដែលតែងតែផ្តល់នូវការគាំទ្រទាំងថវិកា និងការកសាងធនធានមនុស្ស លើវិស័យសុខាភិបាលដល់វិទ្យាស្ថានប៉ាស្ទ័រកម្ពុជា សាកលវិទ្យាល័យវិទ្យាសាស្រ្តសុខាភិបាល មនី្ទរពេទ្យកាល់ម៉ែត និងការងារប្រយុទ្ធ នឹងមេរោគអេដស៍ និងជំងឺអេដស៍ ក៏ស្នើសុំភាគីបារាំងបន្តការគាំទ្រដល់ផ្នែកពាក់ព័ន្ធទាំងអស់៕ អត្ថបទ រដ្ឋា

ខេត្តកំពតមានករណីវិជ្ជមានកូវីដ១៩ ប្រភេទអូមីក្រុង៥នាក់ កំពុងព្យាបាលនៅមន្ទីរពេទ្យបង្អែកស្រុកអង្គរជ័យ

កំពត៖ បើតាមមន្ត្រីជំនាញរបស់មន្ទីរសុខាភិបាលខេត្តកំពត បានប្រាប់ឲ្យដឹងថា ស្ថានភាពកូវីដ១៩ មានសភាពល្អប្រសើរស្ទើរគ្មានអ្នកឆ្លងថ្មីទេ ប៉ុន្តែប៉ុន្មានថ្ងៃចុងក្រោយនេះ ក្រុមគ្រូពេទ្យបានរកឃើញអ្នកវិជ្ជមានកូវីដ១៩ ប្រភេទអូមីក្រុង ចំនួនប្រាំករណី និងបានយកអ្នកពាក់ព័ន្ធទៅពិនិត្យ ប៉ុន្តែលទ្ធផលអវិជ្ជមានទាំងអស់។ បច្ចុប្បន្នអ្នកជំងឺទាំង៥នាក់ ត្រូវបានដាក់ឲ្យសម្រាកព្យាបាលនៅមន្ទីរពេទ្យបង្អែកស្រុកអង្គរជ័យ។ ប្រធានការិយាល័យបច្ចេកទេស នៃមន្ទីរសុខាភិបាលខេត្តកំពត និងជាប្រធានក្រុមការងារឆ្លើយតបបន្ទាន់កូវីដ១៩ខេត្តកំពត លោក ហេង ចាន់ថា បានប្រាប់ឲ្យដឹងថា រហូតមកដល់ព្រឹកថ្ងៃទី១២ ខែមករា ឆ្នាំ២០២២នេះ ខេត្តកំពតបានរកឃើញអ្នកវិជ្ជមានកូវីដ១៩ ប្រភេទអូមីក្រុងចំនួន៥នាក់។ ហើយក្រុមគ្រូពេទ្យបានដាក់គាត់ឲ្យសម្រាកព្យាបាលនៅមន្ទីរពេទ្យបង្អែកស្រុកអង្គរជ័យ ហើយស្ថានភាពសុខភាពពួកគាត់ទាំង៥នាក់ ល្អជាធម្មតា។លោក បានបញ្ជាក់ថា ចំពោះអ្នកពាក់ព័ន្ធ មកដល់ថ្ងៃនេះ មន្ត្រីជំនាញបានយកសំណាក់មួយចំនួនធំ ហើយមិនមានអ្នកម្នាក់វិជ្ជមាន ឬឆ្លងនោះទេ ។ដោយឡែកចំពោះការត្រៀមរៀបចំកន្លែងព្យាបាល ខេត្តបានយកមន្ទីរពេទ្យបង្អែកទាំងអស់នៅតាមបណ្តាក្រុងស្រុកធ្វើជាមណ្ឌលសម្រាប់ព្យាបាល ប្រសិនបើមានករណីឆ្លងច្រើន ចំណែកមណ្ឌលព្យាបាលអ្នកជំងឺកូវីដ១៩មួយចំនួន ត្រូវបានបិទដោយសារអត់មានអ្នកជំងឺ។លោកមានសុទិដ្ឋិនិយមថា ខេត្តកំពតនឹងមិនមានករណីឆ្លងថ្មីបន្ថែមទៀតនោះទេ ដោយសារពលរដ្ឋបានចាក់វ៉ាក់សាំងកូវីដ១៩ ចំនួន២ដង ឬ៣ដងរួមអស់ហើយ ម្យ៉ាងប្រជាពលរដ្ឋមានការយល់ដឹងច្រើន ពិសេសនៅទីប្រជុំជន និងនៅតាមផ្សារ ប្រពលរដ្ឋ និងអាជីវកររក្សាវិធាន៣ការពារ និង៣កុំបានល្អ។ យ៉ាងណាក៏ដោយ លោកនៅតែបន្តអំពាវនាវ ដល់បងប្អូនប្រជាពលរដ្ឋ សូមបន្តចូលរួមបង្កើនការប្រុងប្រយ័ត្នថែមទៀត ពិសេសត្រូវចេះរស់នៅឲ្យមានអនាម័យ រស់នៅធម្មតាក្នុងបែបគន្លងថ្មី រក្សាឲ្យបាននូវវិធាន៣កុំ និង៣ការពារ។ ប្រធានការិយាល័យបច្ចេកទេស និងជាប្រធានក្រុមការងារឆ្លើយតបបន្ទាន់កូវីដ១៩ខេត្តរូបនេះ បានប្រាប់ឲ្យដឹងផងដែរថា ខេត្តកំពតមានអ្នកជំងឺកូវីដ១៩សរុបចំនួន ៥៥៩០នាក់ ក្នុងនោះមានស្ត្រីចំនួន ៣១២៧នាក់៕

កម្ពុជាមានករណីនាំចូលនិងឆ្លងមេរោគកូវីដ-១៩ បំប្លែងខ្លួនថ្មី ប្រភេទអូមីក្រុង ក្នុងសហគមន៍ជាង ២០០ករណីហើយ

ភ្នំពេញ៖ លោកជំទាវ វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានប្រាប់BTV នាព្រឹកថ្ងៃទី១២ ខែមករា ឆ្នាំ២០២២នេះថា មកទល់ពេលនេះ កម្ពុជាមានករណីនាំចូល និងឆ្លងមេរោគកូវីដ-១៩ បំប្លែងខ្លួនថ្មី ប្រភេទអូមីក្រុង(Omicron) ក្នុងសហគមន៍ជាង២០០ករណីហើយ។លោកវេជ្ជបណ្ឌិត យក់ សម្បតិ្ត បានបន្តទៀតថា មេរោគកូវីដ-១៩ បំប្លែងថ្មី ប្រភេទអូមីក្រុង មានចំនួនជាង២០០ករណីនេះ គឺរាប់ទាំងករណីនាំចូលតាមព្រលានយន្តហោះ និងឆ្លងចូលក្នុងសហគមន៍។ ទន្ទឹមនឹងនោះអ្នកឆ្លងមេរោគកូវីដ-១៩ ប្រភេទអូមីក្រុងទាំងអស់ ដែលកំពុងសម្រាកព្យាបាលទាំងមនី្ទរពេទ្យរដ្ឋ និងឯកជន មិនមានរោគសញ្ញាអ្វីធ្ងន់ធ្ងរនោះទេ ដោយសារពួកគាត់បានចាក់វ៉ាក់សាំងបង្ការជំងឺកូវីដ-១៩ បានត្រឹមត្រូវតាមកាលបរិច្ឆេទ។ ដូច្នេះមកដល់ម៉ោងនេះ គ្មានរោគសញ្ញាអ្វីធ្ងន់ធ្ងរ និងគួរឲ្យព្រួយបារម្ភនោះទេ។លោកវេជ្ជបណ្ឌិត យក់ សម្បតិ្ត បានបញ្ជាក់ទៀតថា យើងបានឃើញហើយថា បច្ចុប្បន្នកម្ពុជា មានករណីមេរោគកូវីដ-១៩ បំប្លែងថ្មី ប្រភេទអូមីក្រុង បានឆ្លងចូលក្នុងសហគមន៍ហើយ។ ដូច្នេះក្រសួងសុខាភិបាលនៅតែបន្តអនុវត្តវិធានការនានា ដូចជាគោលការណ៍សំខាន់ៗជាធរមាន ដែលសម្តេចតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា តែងតែយកចិត្តទុកដាក់ខ្ពស់ ក្នុងការចាត់វិធានការណ៍ទាន់ពេលវេលា និងធ្វើការអង្កេតស្រាវជ្រាវអ្នកពាក់ព័ន្ធ ក៏ដូចជាបញ្ជូនទៅកាន់មនី្ទរពេទ្យរដ្ឋ និងឯកជន ព្យាបាលភ្លាមៗ។ ដូច្នេះនៅចំពោះមុខ គឺយើងគ្រប់គ្រងបាន ដោយចំពោះអ្នកដំណើរដែលចូលមកកាន់ប្រទេសកម្ពុជាទាំងអស់ ត្រូវអនុវត្តវិធានការណ៍សុខាភិបាល ដែលមានជាធរមាន បន្តរឹតបន្តឹង និងផ្សព្វផ្សាយ ពន្យល់ដល់ប្រជាពលរដ្ឋកុំឲ្យមានការធ្វេសប្រហែស ត្រូវតែប្រកាន់ខ្ជាប់៣កុំ ៣ការពារ គឺពាក់ម៉ាស លាងដៃ រក្សាគម្លាតសុវតិ្ថភាពបុគ្គល។ ជាពិសេសថ្មីៗនេះប្រមុខរាជរដ្ឋាភិបាល បានអំពាវនាវ និងផ្សព្វផ្សាយតាមប្រព័ន្ធផ្សព្វផ្សាយនានា ឲ្យប្រជាពលរដ្ឋត្រូវទៅទទួលការចាក់វ៉ាក់សាំងបង្ការជំងឺកូវីដ-១៩ ដូសជំរុញ ឬដូសទី៣ និងប្រជាពលរដ្ឋណា ដែលមិន ទាន់ ទទួលការចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋានគ្រប់គ្រាន់នោះទេ សូមអញ្ជើញទៅទទួលការចាក់វ៉ាក់សាំងឲ្យបាន គ្រប់ៗគ្នា និងកុំធ្វេសប្រហែសឲ្យសោះ នៅពេលទៅទទួលការចាក់វ៉ាក់សាំង ត្រូវពាក់ម៉ាស និងរក្សាគម្លាតឲ្យបានត្រឹមត្រូវ ព្រោះយើងទាំងអស់គ្នា បានដឹងហើយថា មេរោគកូវីដ-១៩បំប្លែងថ្មី ប្រភេទអូមីក្រុង ឆ្លងលឿន។ ដូច្នេះបុគ្គលម្នាក់ៗត្រូវតែខិតខំប្រយ័ត្នប្រយែងពង្រឹងអនុវត្តឲ្យបាន នូវវិធានសុខាភិបាលដែលនៅមានជាធរមាន៕ រូបភាព អត្ថបទ រដ្ឋា

ក្រសួងពាណិជ្ជកម្មបើកសិក្ខាសាលាពិគ្រោះយោបល់ ដើម្បីជំរុញដល់ការអនុវត្តកិច្ចការពារអ្នកប្រើប្រាស់ឲ្យកាន់តែប្រសិទ្ធភាព

ភ្នំពេញ៖ អគ្គនាយកដ្ឋានកិច្ចការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប) នៃក្រសួងពាណិជ្ជកម្ម ក្រោមកិច្ចសហការជាមួយគម្រោងកិច្ចសហប្រតិបត្តិការអាស៊ាន-អាល្លឺម៉ង់ “ការពារអ្នកប្រើប្រាស់ក្នុងតំបន់អាស៊ាន” និងដោយមានការគាំទ្រពីការិយាល័យច្បាប់សិដ្ឋាល័យ នៅព្រឹកថ្ងៃនេះ បានរៀបចំសិក្ខាសាលាពិគ្រោះយោបល់ជាមួយភាគីពាក់ព័ន្ធ ដើម្បីប្រមូលធាតុចូលលើសេចក្តីព្រាងចំនួន៤ ស្តីពីកិច្ចការពារអ្នកប្រើប្រាស់ ធុរកិច្ចសុចរិតគឺការពារអ្នកប្រើប្រាស់។នៅក្នុងពិធីសិក្ខាសាលានាព្រឹកថ្ងៃទី១១ ខែមករា ឆ្នាំ២០២២នេះ នៅរាជធានីភ្នំពេញ ឯកឧត្តម ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកិច្ចការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ បានមានប្រសាសន៍ថា គោលបំណងនៃអង្គពិធីនេះ ដើម្បីប្រមែប្រមូលមតិយោបល់ពីគ្រប់ជ្រុងជ្រោយតាមដែលអាចធ្វើទៅបាន ដើម្បីកែលម្អនូវសេចក្តីព្រាងឯកសារសំខាន់ៗ ដែលនឹងត្រូវប្រើជាមធ្យោបាយសម្រាប់ណែនាំដល់ធុរកិច្ច អាជីវកម្ម ក្នុងកិច្ចការពារសិទ្ធិ និងផលប្រយោជន៍អ្នកប្រើប្រាស់ឲ្យកាន់តែប្រសើរឡើង។ ជាពិសេស នឹងផ្តោតទៅលើការបង្កើតកម្មវិធីជាតិការពារអ្នកប្រើប្រាស់ (NCPP) ដ៏ពេញលេញមួយ។ឯកឧត្តម បានបញ្ជាក់ថា ការបង្កើតឡើងនូវឯកសារគតិតយុត្ត និងការជំរុញឲ្យមានអនុវត្តច្បាប់ការអនុវត្តច្បាប់ពាក់ព័ន្ធនឹងកិច្ចការពារអ្នកប្រើប្រាស់ ឆ្លុះបញ្ចាំងឲ្យឃើញថា រដ្ឋាភិបាលកម្ពុជាមានការប្តេជ្ញាចិត្តយ៉ាងមុតមាំដើម្បីការពារអ្នកប្រើប្រាស់។នេះមិនត្រឹមតែមានសារៈសំខាន់សម្រាប់សេដ្ឋកិច្ចជាតិប៉ុណ្ណោះទេ ប៉ុន្តែក៏ជាតម្រូវការបន្ទាន់សម្រាប់សមាហរណកម្មសេដ្ឋកិច្ចកាន់តែទូលំទូលាយទាំងក្នុងតំបន់ និងអន្តរជាតិផងដែរ។ជាមួយគ្នានេះ លោក Frank Jattke ប្រធានក្រុមការងារអាស៊ាននៃទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ)ប្រចាំកម្ពុជា បានលើកឡើងថា សិក្ខាសាលានេះ ក៏នឹងចែករំលែកនូវលទ្ធផលនៃការសិក្សាស្រាវជ្រាវ និងធ្វើការប្រមូលនូវធាតុចូលពីបុគ្គល ស្ថាប័នពាក់ព័ន្ធ លើសេចក្តីព្រាងឯកសាររដ្ឋាភិបាលសម្រាប់ប្រធានបទចំនួន៤ ដូចជា៖ កម្មវិធីជាតិស្តីពីកិច្ចការពារអ្នកប្រើប្រាស់, គោលការណ៍ណែនាំស្តីពីគម្រោងលក់បែបពីរ៉ាមីដ និងការលក់បែបទីផ្សារពហុកម្រិត, ប្រកាសស្តីពីកិច្ចសន្យាមិនសុចរិត និងប្រកាសស្តីពីការកំណត់អំឡុងពេលនៃការប្រើប្រាស់។សូមជម្រាបជូនថា កម្ពុជា គឺជាប្រទេសមួយក្នុងចំណោមប្រទេសសមាជិកអាស៊ានដំបូងគេ ដែលបានផ្តល់សច្ចាប័នលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ អាសិប(RCEP) ដែលទើបតែចូលជាធរមាននៅដើមខែមករា ឆ្នាំ២០២២។ តាមរយៈកិច្ចព្រមព្រៀងអាសិបនេះ កម្ពុជានឹងទទួលបាននូវផលប្រយោជន៍ច្រើន បូករួមទាំងឱកាសក្នុងការពង្រីវិស័យធុរកិច្ច និងទំនាក់ទំនងពាណិជ្ជកម្មនៅទូទាំងអាស៊ីប៉ាស៊ីហ្វិកទៀតផង ប្រសិនបើកិច្ចការពារអ្នកប្រើប្រាស់ ក៏ដូចជាគោលការណ៍ប្រកួតប្រជែងដោយសុចរិតត្រូវបានអនុវត្តយ៉ាងសកម្ម៕អត្ថបទ៖ ឈិត បូរ៉ាវី

ជប៉ុនផ្តល់ឥណទានសម្បទានជិត ២០០លានដុល្លារបន្ថែមទៀត ដើម្បីឆ្លើយតបវិបត្តិកូវីដ១៩នៅកម្ពុជា

ភ្នំពេញ៖ រដ្ឋាភិបាលជប៉ុន បន្តផ្តល់ឥណទានសម្បទានដល់កម្ពុជាប្រមាណ ១៨៥លានដុល្លារបន្ថែមទៀត ជាមួយការប្រាក់ទាប ដើម្បីគាំទ្រការឆ្លើយតបវិបត្តិជំងឺកូវីដ១៩ ក្នុងដំណាក់កាលទី២។ ពិធីចុះហត្ថលេខាប្រគល់ និងទទួលប្រាក់កម្ចីនេះ ធ្វើឡើងនៅព្រឹកថ្ងៃពុធ ទី១២ ខែមករា ឆ្នាំ២០២២នេះ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅវិមានសន្តិភាព។ពិធីចុះហត្ថលេខាលើឯកសារចំនួន២គឺ ទី១ . ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកឧត្តម មីកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅកម្ពុជា ចុះហត្ថលេខាលើលិខិតប្ដូរសារនិងឯកសារពាក់ព័ន្ធ ស្ដីពីការផ្ដល់ឥណទានសម្បទានដែលមានទឹកប្រាក់សរុប ២០ប៊ីលានយ៉េនស្មើនឹង ១៨៥លានដុល្លារអាម៉េរិក សម្រាប់អនុវត្តន៍គម្រោងគាំទ្របន្ទាន់ ដើម្បីឆ្លើយតបនឹងវិបត្តិជំងឺកូវី១៩ ដំណាក់ការទីពីរនៅកម្ពុជា។ ទី២. ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រីKAMEI Haruko ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (Jica) ចុះហត្ថលេខាលើកិច្ចព្រមព្រៀងឥណទានសម្បទាន សម្រាប់គម្រោងគាំទ្របន្ទាន់ដើម្បីឆ្លើយតបនឹងវិបត្តិជំងឺកូវី១៩ ដំណាក់ការទីពីរនៅកម្ពុជា។យោងតាមក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ថវិកាឥណទានសម្បទាន នេះ ប្រើសម្រាប់គាំទ្រសកម្មភាពនៃការអនុវត្តគោលនយោបាយរបស់រាជរដ្ឋាភិបាលកម្ពុជា ឆ្លើយតបទៅនឹងផលប៉ះពាល់សុខភាព, សង្គម និងសេដ្ឋកិច្ច ដោយសារជំងឺកូវីដ១៩ ជាពិសេសលើជំនួយសង្គមសម្រាប់ពលរដ្ឋក្រីក្រ និងក្រុមជនងាយរងគ្រោះមានដូចជា៖ ប្រជាពលរដ្ឋមានជីវភាពស្ថិតក្រោមបន្ទាប់ភាពក្រីក្រ, ចាស់ជរា, ស្ត្រី, កុមារ និងជនជាតិដើមភាគតិចជាដើម។បើតាមក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា កាលពីឆ្នាំ២០២០ រដ្ឋាភិបាលជប៉ុន បានផ្តល់ឥណទានសម្បទានជាង ២៣៧លានដុល្លារផងដែរ ដើម្បីឆ្លើយតបនឹងវិបត្តិជំងឺកូវីដ១៩ នៅកម្ពុជានេះ។ សរុបទាំងពីរលើកជប៉ុនផ្តល់ឥណទានសម្បទាន ដល់កម្ពុជាជាង ៤២០លានដុល្លារ។ក្រសួងសេដ្ឋកិច្ច និងហិរញ្ញវត្ថុ បានអះអាងថា ថវិកាជាឥណទានសម្បទាន របស់ជប៉ុនកាលពីឆ្នាំ២០២០ ជាង ២៣៧លានដុល្លារនោះ រាជរដ្ឋាភិបាលកម្ពុជា មិនទាន់បានប្រើប្រាស់នៅឡើយទេ។ក្រោមចំណងទំនាក់ទំនងដ៏ជ្រាលជ្រៅជប៉ុន គឺជាប្រទេសមួយ ដែលបានរួមចំណែកយ៉ាងច្រើនឆ្លើយតបនឹងវិបត្តិជំងឺកូវីដ១៩ នៅក្នុងប្រទេសកម្ពុជា។ រដ្ឋាភិបាលជប៉ុន បានផ្តល់ជំនួយវ៉ាក់សាំងបង្ការជំងឺកូវីដ១៩ រថយន្តសង្គ្រោះ ទូដាក់វ៉ាក់សាំង ព្រមទាំងបរិក្ខារពេទ្យជាច្រើនផ្សេងទៀត សរុបជាថវិកាជាង ៦០លានដុល្លារអាមេរិក។ព្រឹត្តិការណ៍ឆ្លងរាតត្បាតជំងឺកូវីដ១៩ នៃព្រឹត្តិការណ៍សហគមន៍២០កុម្ភៈ បានធ្វើឱ្យប៉ះពាល់ខ្លាំងដល់ប្រជាពលរដ្ឋ ជាពិសេសពលរដ្ឋក្រីក្រកម្រិត១ និង២។ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចបញ្ចេញកញ្ចប់ថវិកាជាតិ ជួយទ្រទ្រង់ជីវភាពរបស់ប្រជាពលរដ្ឋរងផលប៉ះពាល់ធ្ងន់ធ្ងរដោយសារជំងឺកូវីដ១៩នេះ។ ចំពោះកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយររងគ្រោះកំឡុងពេលប្រយុទ្ធនឹងជំងឺកូវីដ-១៩នេះ ត្រូវបានរាជរដ្ឋាភិបាល ដាក់ឱ្យអនុវត្តកាលពីខែ មិថុនា ឆ្នាំ ២០២០មកម្លេះ។ គិតចាប់ពីថ្ងៃទី ២៥ ខែមិថុនាឆ្នាំ ២០២០ រហូតដល់ថ្ងៃទី ២៤ ខែធ្នូ ឆ្នាំ២០២១ កម្មវិធីនេះ អនុវត្តបានចំនួន ១៨លើក ដោយបានចំណាយថវិការដ្ឋជាង ៥៣១ លានដុល្លារ ខណៈរាជរដ្ឋាភិបាលកម្ពុជា បានសម្រេចបន្តអនុវត្តកម្មវិធីឧបត្ថម្ភសាច់ប្រាក់ជូនគ្រួសារ ក្រីក្រ ៩ខែបន្តទៀត សម្រាប់ឆ្នាំ ២០២២។ រយៈពេល ៩ខែនៃការបន្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រនេះ រាជរដ្ឋាភិបាល អាចចំណាយថវិកាសរុបប្រមាណ ២៧០លានដុល្លារ។នេះជាការលើកឡើង របស់មន្រ្តីជំនាញក្រសួងសង្គមកិច្ច ដែលអនុវត្តផ្ទាល់លើកម្មវិធីនេះ៕

ចិនប្រកាសគាំទ្រកម្ពុជាយ៉ាងពេញទំហឹង ក្នុងការដើរតួនាទីដោះស្រាយបញ្ហានៅប្រទេសមីយ៉ាន់ម៉ា

ភ្នំពេញ៖ រដ្ឋាភិបាលនៃសាធារណរដ្ឋប្រជាមានិតចិន តាមរយៈក្រសួងការបរទេសខ្លួន បានប្រកាសគាំទ្រកម្ពុជាយ៉ាងពេញទំហឹង ក្នុងការដើរតួនាទីដោះស្រាយបញ្ហានៅប្រទេសមីយ៉ាន់ម៉ា ខណៈដំណោះស្រាយជាជំហានដំបូងរវាងសម្តេចតេជោ ហ៊ុន សែន នាយករដ្ឋមន្រ្តីកម្ពុជា និងមេដឹកនាំរបបយោធាមីយ៉ាន់ម៉ា បានប្រព្រឹត្តិទៅប្រកបដោយផ្លែផ្កាជាវិជ្ជមាន។យោងតាមគេហទំព័ររបស់ក្រសួងការបរទេសចិន ស្តីពីលទ្ធផលសន្និសីទសារព័ត៌មាន កាលពីថ្ងៃទី១០ ខែមករាម្សិលមិញនេះ បានលើកឡើងថា លោក Wang Wenbin អ្នកនាំពាក្យក្រសួងការបរទេសចិន បានថ្លែងថា ប្រទេសចិន គាំទ្រអាស៊ានក្នុងការដោះស្រាយបញ្ហាទាក់ទងនឹងប្រទេសមីយ៉ាន់ម៉ា ឲ្យបានត្រឹមត្រូវស្របតាម «វិធីសាស្ត្ររបស់អាស៊ាន» និងអនុវត្តដោយជោគជ័យ នូវគោលការណ៍កុងសង់ស៊ីស ៥ចំណុច ក្រោមក្របខណ្ឌអាស៊ាន ខណៈមីយ៉ាន់ម៉ាគឺជាសមាជិកនៃគ្រួសារអាស៊ានផងដែរនោះ។លោក Wang Wenbin បានបញ្ជាក់ថា ប្រទេសចិន នឹងគាំទ្រយ៉ាងពេញទំហឹងដល់កម្ពុជា ដែលជាប្រធានប្តូរវេនអាស៊ាន ក្នុងការដើរតួនាទីយ៉ាងសកម្ម និងចូលរួមចំណែកយ៉ាងសំខាន់ ក្នុងការគ្រប់គ្រងការខ្វែងគំនិតគ្នារវាងភាគីនៃប្រទេសមីយ៉ាន់ម៉ា តាមរយៈការសន្ទនានយោបាយ និងការស្តារស្ថិរភាព និងការសម្រេចបាននូវការអភិវឌ្ឍនៅដំណាក់កាលដំបូង។សូមបញ្ជាក់ថា ក្នុងតំណើរទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្រ្តីទៅកាន់ប្រទេសមីយ៉ាន់ម៉ា កាលពីថ្ងៃទី៧កន្លងទៅនេះ ទទួលបានជោគជ័យជាច្រើនក្នុងកិច្ចការសន្ទនា ដើម្បីស្វែងរកដំណោះស្រាយសន្តិភាពប្រទេសនេះ ខណៈលទ្ធផលទទួលបានគឺថ្នាក់ដឹកនាំរបបយោធារបស់មីយ៉ាន់ម៉ា គឺលោក មីន អោងឡាំង សម្រេចទទួលយកការស្នើសុំរបស់សម្តេចតេជោ ពន្យាពេលក្នុងការឈប់បាញ់គ្នា ទទួលយករាល់ជំនួយសម្រាប់ជួយដល់ពលរដ្ឋរបស់ខ្លួន គាំទ្រប្រេសិតពិសេសរបស់ប្រធានអាស៊ានលើ បញ្ហានៅប្រទេសមីយ៉ាន់ម៉ា និងលទ្ធផលជាច្រើនទៀត។យ៉ាងណាក៏ដោយក្នុងដំណើរទស្សនកិច្ចរបស់សម្តេចទៅកាន់ប្រទេសមីយ៉ាន់ម៉ានេះ គឺមានគោលដៅតែ២គត់ដែលសំខាន់ គឺទី១.ស្វែងរកការចរចាឲ្យមានការឈប់បាញ់ និងទី២ គឺដើម្បីផ្តល់ជំនួយមនុស្សធម៌ដល់ជនជាតិមីយ៉ាន់ម៉ា ដែលកំពុងរងគ្រោះដោយសារការប្រឈមនឹងអត់អាហារជាដើមនោះ។ប្រភពពីគេហទំព័ររបស់ក្រសួងការបរទេសចិននេះ បានលើកឡើងទៀតថា ចិនសូមកោតសរសើរចំពោះការត្រៀមខ្លួនរបស់មីយ៉ាន់ម៉ា ក្នុងការបង្កើតលក្ខខណ្ឌអំណោយផលសម្រាប់ប្រេសិតពិសេស របស់អាស៊ាន ក្នុងការបំពេញកាតព្វកិច្ចរបស់ខ្លួន និងធ្វើការឆ្ពោះទៅរកការព្រមព្រៀងប្រកបដោយប្រសិទ្ធភាព រវាងផែនទីបង្ហាញផ្លូវ ៥ចំណុចរបស់មីយ៉ាន់ម៉ា និងគោលការណ៍កុងសង់ស៊ីស ៥ចំណុចរបស់អាស៊ានផងដែរ៕ អត្ថបទ៖ បាន ចក់

ឯកឧត្តម លី ធុជ អញ្ជើញចូលរួមបុណ្យសពអ្នកដោះមីន ៣នាក់ រងគ្រោះថ្នាក់នៅខេត្តព្រះវិហារ

ព្រះវិហារ៖ ក្នុងនាមសម្តេចតេជោ ហ៊ុន សែន នាយករដ្ឋមន្ត្រី និងជាប្រធានអាជ្ញាធរមីន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តមទេសរដ្ឋមន្ត្រី លី ធុជ បានចូលរួមពិធីបុណ្យសពរបស់អ្នកដោះមីនចំនួន៣នាក់ នៃអង្គការដោះមីនកម្ពុជា (CSHD) ដែលបានពលីជីវិតដោយការផ្ទុះមីនតោន ។ក្នុងឱកាសអញ្ជើញចូលរួមពិធីបុណ្យសព នៅថ្ងៃទី១១ ខែមករា ឆ្នាំ២០២២ ឯកឧត្តមទេសរដ្ឋមន្ត្រី មានប្រសាសន៍ថា ហេតុការណ៍នេះ បានកើតឡើងក្នុងពេលជនរងគ្រោះទាំង ៣នាក់ កំពុងប្រតិបត្តិការប្រមូល និងកម្ទេចគ្រាប់កាលពីថ្ងៃទី១០ ខែមករា ស្ថិតក្នុងភូមិសាស្រ្តភូមិសែនតេជៈ ឃុំសែនតេជោ ស្រុកជាំក្សាន្ត ខេត្តព្រះវិហារ ។ ឯកឧត្តមបន្តថា វីរជនក្លាហានទាំង ៣រូប ទី១. ឈ្មោះ ស៊ុន វង្ស, ទី២. ឈ្មោះ ម៉ា ស៊ីម៉េត និងទី៣. ឈ្មោះ ម៉ន ចក់ បានប្រថុយគ្រប់យ៉ាងអស់ជាច្រើនឆ្នាំ ក្នុងការបម្រើប្រទេស និងពលរដ្ឋខ្មែរ ដោយពួកគេបានលះបង់ជីវិតរបស់ខ្លួន ដើម្បីធ្វើឱ្យអ្នកដទៃមានសុវត្ថិភាព ដោយយើងទាំងអស់គ្នា សូមគោរពជីវិត និងការលះបង់របស់ពួកគេ ។ ក្នុងឱកានោះ ឯកឧត្តម លី ធុជ បានសម្ដែងអារម្មណ៍អាណិតអាសូរ សោកស្ដាយ ក្រៀមក្រំ និងអាឡោះអាល័យជាទីបំផុត ការបាត់បង់វីរជនដ៏ឆ្នើមរបស់កម្ពុជា ព្រមទាំងបានពាំនាំនូវការយកចិត្តទុកដាក់ដ៏ខ្ពង់ខ្ពស់របស់សម្តេចតេជោ នាយករដ្ឋមន្រ្តី ចំពោះការបាត់បង់ជីវិត ពិការភាព និងរបួសរបស់បងប្អូនប្រជាពលរដ្ឋ ក៏ដូចជាអ្នកដោះមីនថា “ទោះបីការបាត់បង់ជីវិត ឬពិការប្រជាជន សូម្បីតែម្នាក់ដោយសារមីន និងសំណល់ជាតិផ្ទុះពីសង្គ្រាម គឺជាទុក្ខសោក និងជាការសោកស្តាយបំផុតសម្រាប់ប្រទេសជាតិទាំងមូល” ។គួរបញ្ជាក់ថា គិតចាប់ពីឆ្នាំ១៩៩៧ ដល់បច្ចុប្បន្នអ្នកដោះមីន ដែលគ្រោះថ្នាក់ក្នុងកិច្ចប្រតិបត្តិការ បានបាត់បង់ជីវិត ពិការ និងរបួសសរុបចំនួន ១៥៤នាក់ ក្នុងនោះស្លាប់ចំនួន ៣១នាក់ ៕

ក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្តសម្តេចតេជោសែន បើកកិច្ចប្រជុំបូកសរុបការងារឆ្នាំ២០២១ និងលើកផែនការអនុវត្តឆ្នាំ២០២២

ភ្នំពេញ៖ នៅថ្ងៃទី៨ និងថ្ងៃទី៩ ខែមករាឆ្នាំ២០២២ នៅក្នុងសណ្ឋាគារសុខាបូកគោ ខេត្តកំពត ក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្តសម្តេចតេជោសែន បានបើកកិច្ចប្រជុំបូកសរុបការងារឆ្នាំ២០២១ និងលើកផែនការសម្រាប់អនុវត្តឆ្នាំ២០២២ ។ឯកឧត្តម គី តិច ប្រធានក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្តសម្តេចតេជោសែន បានបញ្ជាក់ជូនថា ក្រោយការអាក់ខានជួបប្រជុំផ្ទាល់មួយរយៈធំ ដោយបញ្ហាកូវីដ ក្រុមមេធាវីបានជ្រើសរើសរកទីតាំងណាដែលធំទូលាយ និងមានបរិយាកាសល្អ ដើម្បីជួបប្រជុំពិភាក្សាផ្ទាល់ ។ ការជួបប្រជុំលើកនេះផ្តោតជាសំខាន់លើការប្រមូលមតិ និងព័ត៌មានពិតអំពីបញ្ហាប្រឈមនានាក្នុងដំណើរការនីតិវិធី ជួបពិគ្រោះផ្តល់យោបល់ និងការពារសិទ្ធិតាមផ្លូវច្បាប់ ស្វែងរកយុត្តិធម៌ ជូនប្រជាពលរដ្ឋដែលមានជីវភាពទន់ខ្សោយ តាមការណែនាំដ៏ខ្ពង់ខ្ពស់ និងការគិតគូរប្រកបដោយគតិបណ្ឌិតរបស់សម្តេចតេជោ និងសម្តេចគតិព្រឹទ្ធបណ្ឌិតប៊ុន រ៉ានី ហ៊ុន សែន ។ ជាមួយគ្នានោះ អង្គប្រជុំក៏បានពិភាក្សាស្វែងរកមធ្យោបាយជាគន្លឹះ ក្នុងគោលបំណងការពារឲ្យមានយុត្តិធម៌ស្មើភាព និងរួមចំណែកកែទម្រង់ លើកកំពស់វិស័យយុត្តិធម៌ ឲ្យបានប្រសើរឡើងថែមទៀត ដើម្បីជាឧត្តមប្រយោជន៍ជាតិ និងប្រជាជនកម្ពុជាយើង ។សូមបញ្ជាក់ជូនថា ក្រុមមេធាវីស្ម័គ្រចិត្តសម្តេចតេជោសែនមានចំនួនសរុប ១៣៧រូប ដោយរាយតាមគ្រប់បណ្តារាជធានី-ខេត្ត នៅទូទាំងប្រទេស ។ ក្រុមមេធាវីស្ម័គ្រចិត្តនេះ ត្រូវបានផ្តួចផ្តើមបង្កើត ដោយប្រើប្រាស់ថវិកាផ្ទាល់របស់សម្តេចតេជោសែន និងសម្តេចគតិព្រឹទ្ធបណ្ឌិត ។បច្ចុប្បន្ន ក្រុមមេធាវីស្ម័គ្រចិត្តសម្តេចតេជោ កំពុងតែទទួលបាននូវការគាំទ្រ និងផ្តល់ជំនឿជឿជាក់ ពីសំណាក់ប្រជាពលរដ្ឋដែលកំពុងទទួលរងនូវការរំលោភបំពាន និងទទួលរងនូវអំពើអយុត្តិធម៌៕

បណ្ដាញសង្គម

ព័ត៌មានថ្មីៗ

បណ្តាប្រទេសនៅតំបន់បាល់កង់ប្រឈមនឹងរលកកម្តៅដ៏សែនក្តៅបំផុតបំបែកកំណត់ត្រា

វិបត្តិទឹកជំរុញឲ្យកសិករអ៊ីរ៉ាក់បោះបង់ចោលដីស្រែចម្ការរបស់ពួកគេនៅខេត្ត Najaf

លោក Lavrov ៖ ការបង្កើនថ្លៃការពារណាតូ នឹងមិនប៉ះពាល់ដល់សន្តិសុខរបស់រុស្ស៊ីនោះទេ

លោក Khamenei ៖ រាល់ការឈ្លានពាននាពេលអនាគតណាមួយលើអ៊ីរ៉ង់ នឹងត្រូវតបស្នងខ្លាំងបំផុត

ការវាយប្រហាររបស់អ៊ីស្រាអែលបានសម្លាប់មនុស្សជាង ៣០នាក់នៅតំបន់ហ្កាហ្សា

ទឹកជំនន់បង្កឡើងដោយសារភ្លៀងធ្លាក់ខ្លាំង បណ្តាលឲ្យខូចខាតទ្រព្យសម្បត្តិនៅតំបន់ភាគខាងជើងឥណ្ឌា

ម្ចាស់ធុរកិច្ចវាយតម្លៃការខូចខាត រយៈពេល ១ថ្ងៃក្រោយបាតុកម្មនៅកេនយ៉ា

ព្យុះបានផ្អាកការជជែកដេញដោលក្នុងសភាបារាំង ខណៈទឹកភ្លៀងលេចជ្រាបចូលអង្គប្រជុំ

ចិនច្រានចោលការផ្គត់ផ្គង់អាវុធដល់ភាគីណាមួយនៅក្នុងសង្រ្គាមអ៊ុយក្រែន

កូរ៉េខាងត្បូង៖កូរ៉េខាងជើងអាចបញ្ជូនទាហានបន្ថែមទៀតទៅកាន់រុស្ស៊ីនៅខែកក្កដាឬសីហាសម្រាប់សង្រ្គាមអ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍

អាជ្ញាធរខេត្តពោធិ៍សាត់ គ្រោងរៀបចំទីតាំងចាក់វ៉ាក់សាំងដូសទី៣ នៅតាមភូមិ​ជូនពលរដ្ឋក្នុងមូលដ្ឋាន

បារាំងកោតសរសើរដល់កម្ពុជា បានដឹកនាំគ្រប់គ្រងការរីកដាលជំងឺកូវីដ-១៩ និង​អាចដំណើរការ​បើក​ប្រទេស​ឡើងវិញ