នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រដ្ឋមន្ត្រីក្រសួងអភិវឌ្ឍន៍ជនបទចុះពិនិត្យវឌ្ឍនភាពការងារសាងសង់ស្ពានភ្នំក្រវាញ និង​ផ្លូវកៅ​ស៊ូ​ក្នុង​​ខេត្តពោធិ៍សាត់
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់

នយោបាយ​ និង ការអភិវឌ្ឍន៍

ACUបញ្ចប់ការកសាងសំណុំរឿងពីរករណី ពាក់ព័ន្ធការទន្រ្ទានយកដីព្រៃលិចទឹកនៅតំបន់បឹងទន្លេសាប

2021/12/22 04:21:06 pm        650
Facebook Telegram Linkin
ភ្នំពេញ៖ គិតត្រឹមថ្ងៃទី២២ ខែធ្នូនេះ អង្គភាពប្រឆាំងអំពើពុករលួយ ( ACU ) បានបញ្ចប់ការកសាងសំណុំរឿងពីរករណី ពាក់ព័ន្ធការទន្ទ្រានយកដីព្រៃលិចទៅតំបន់ទន្លេសាប។ឯកឧត្តម ឱម យ៉ិនទៀង ទេសរដ្ឋមន្រ្តី និងជាប្រធានអង្គភាពប្រឆាំងអំពើពុករលួយ នៅថ្ងៃទី ២២ខែធ្នូនេះ បានប្រាប់BTVឱ្យដឹងថា គិតត្រឹមថ្ងៃនេះ អង្គភាពប្រឆាំងពើពុករលួយ បាន​បញ្ចប់​ការ​កសាង​សំណុំរឿង២ប៉ុណ្ណោះ ​ពាក់ព័ន្ធនឹងការកាន់កាប់ព្រៃលិចទឹក នៅតំបន់ទន្លេសាប។សំណុំរឿងទាំងពីរករណីនោះ​រួមមាន៖​ ទី១.ករណីឈ្មោះ កែវ ណារុន ប្រធាន​ការិយា​ល័យ​អន្តរាគមន៍​ និង​តម្រួត​បទបញ្ជា ​នៃស្នងការដ្ឋាននគរបាលខេត្តកំពង់ឆ្នាំង ​និងទី២.ករណីលោក ស៊ុំ សុជាតិ ស្នងការរងនៃស្នងការដ្ឋាននគរបាលខេត្តកំពង់ឆ្នាំង។ក្រៅពីនេះឯកឧត្តម បន្តថា ចំពោះករណីផ្សេងៗទៀត ក្រៅពីករណីទាំងពីរនេះ អង្គភាព​ប្រឆាំង​អំពើ​ពុក​រលួយនឹងជូនព័ត៌មាននៅក្រោយ បន្ទាប់ពីមានលទ្ធផលច្បាស់លាស់។កន្លងទៅថ្មីៗនេះសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បាន​ចេញ​បទ​បញ្ជា​យ៉ាងម៉ឺងម៉ាត់ ​ឱ្យក្រសួងស្ថាប័នពាក់ព័ន្ធ ​និងអភិបាលខេត្តជាប់បឹងទន្លេសាប ត្រូវធ្វើការ​ទប់ស្កាត់​ និង​បង្រ្កាបជាបន្ទាន់​ចំពោះការលួចកាប់ព្រៃលិចទឹក ​និង​វាទ​ទីយកដីនៅតាមបឹងទន្លេសាប ជាពិសេសនៅខេត្តកំពង់ឆ្នាំង។ ក្រៅពីនេះសម្តេចតេជោបានបញ្ជាទៅឧបនាយករដ្ឋមន្ត្រីជា សុផារ៉ា ឱ្យដឹកនាំកិច្ចប្រជុំក្រសួង​ស្ថាប័ន​ពាក់ព័ន្ធនេះ ដើម្បីបែងចែកភារកិច្ច​ ក្នុងការចុះពិនិត្យបង្ក្រាប និងរឹបអូសដីដែល​បាន​កាប់​ទន្ទ្រាន​នោះ​មកវិញ។បន្ទាប់ពីទទួលបានបញ្ជានេះ ​ក្រុមការងារដែលដឹកនាំ​ដោយ​ឯកឧត្តម ជា សុផារ៉ា បាន​ដាក់​ចេញ​វិធានការ​ច្រើន ​ព្រមទាំងរកឃើញអ្នកប្រព្រឹត្តបទល្មើសព្រៃឈើជាបន្តបន្ទាប់ផងដែរ៕អត្ថបទ៖ ទូច សោភ័ណ

ប្រតិបត្តិករទេសចរណ៍ខេត្តកោះកុង ត្រៀមខ្លួនរួចរាល់ទទួលស្វាគមន៍ទេសចរនៅថ្ងៃឆ្លងឆ្នាំ

2021/12/22 01:21:04 pm        414
Facebook Telegram Linkin
កោះកុង៖ ប្រតិបត្តិករទេសចរណ៍ នៅស្រុកស្រែអំបិល ខេត្តកោះកុង កំពុងតុបតែងសម្អិតសម្អាងតំបន់រមណីយដ្ឋានរបស់ខ្លួន ត្រៀមទទួលភ្ញៀវទេសចរ ក្នុងឱកាសថ្ងៃឆ្លងឆ្នាំថ្មីនៅសប្ដាហ៍ក្រោយនេះ។ជាង២ខែមកនេះស្ថានភាពជំងឺកូវីដ-១៩បានធូរស្រាល ដោយប្រមុខរាជរដ្ឋាភិបាល ក៏បានបើកភ្លើងខៀវសម្រាប់អ្នកទេសចរ ដែលមានបំណងចង់ទៅកម្សាន្តលេងតំបន់រមណីយដ្ឋាននានាដែលពួកគេចង់ទៅ។ក្នុងចំណោមអ្នកវិនិយោគ និងប្រតិបត្តិករនៅស្រុកស្រែអំបិល ជេតស៍ ឧត្តម រីហ្សត (Jet’s Oudom Resort) បាននឹងកំពុងពង្រឹងគុណភាពសេវាកម្មតាមលទ្ធភាពរបស់ពួកគេរៀងៗខ្លួន រង់ចាំទទួលភ្ញៀវទេសចរពីគ្រប់ទិសទីមកស្នាក់នៅលម្ហែ ក្រោយស្ថានភាពជំងឺកូវីដធូរស្រាល ពិសេសសម្រាប់ឱកាសថ្ងៃឆ្លងឆ្នាំ។លោក ពែង សៃ អ្នកគ្រប់គ្រងទូទៅ Jet’s Oudom Resort បានប្រាប់BTVថា លោកថ្លែងអំណរ អរគុណ​​ចំពោះរាជរដ្ឋាភិបាលដែលបានបើកប្រទេសឡើងវិញ បន្ទាប់ពីរងគ្រោះដោយសារតែជំងឺ​កូវីដកន្លងទៅនិងផ្តល់ឱកាសរូបលោក​ ក៏ដូចជាបណ្តាអ្នកបម្រើការអាជីវកម្មនានា ​ស្តារសេដ្ឋកិច្ច តាមរយៈបម្រើសេវាកម្មវិស័យទេសចរណ៍។លោកបានអះអាងថា ក្រុមការងាររបស់លោកត្រៀមខ្លួនរួចជាស្រេចហើយសម្រាប់ទទួលភ្ញៀវ ទេសចរ​មកស្នាក់នៅបរិភោគអាហារស្រស់មានគុណភាព ​និង​ដឹក​ជញ្ជូន​ភ្ញៀវ​កម្សាន្តតាមតំបន់អេកូ ទេសចរធម្មជាតិដ៏មានសក្តានុពល ​នៅក្នុងស្រុកស្រែអំបិល ​នាឱកាសថ្ងៃបុណ្យណូអែល និងថ្ងៃឆ្លងឆ្នាំថ្មីខាងមុខនេះ។អ្នកទេសចរដែលទៅស្នាក់នៅកម្សាន្តនៅJet’s Oudom Resort ជាលក្ខណៈក្រុមហ៊ុន​ក៏បានបង្ហាញ​ចំណាប់​អារម្មណ៍​របស់​ពួក​គេផងដែរ ​អំឡុងពេលសម្រាកលំហែកាយ​ជុំវិញ​តំបន់ទេសចរណ៍គោល ដៅ បន្ទាប់ពីខកខានដំណើរកម្សាន្ត២ឆ្នាំមកនេះ។ដើម្បីទទួលបានចំណូលពីការផ្តល់សេវាទេសចរណ៍ឡើងវិញ លោក ជា ច័ន្ទកញ្ញា អភិបាលស្រុក ស្រែអំបិល បានជំរុញដល់ក្រុមប្រតិបត្តិករ និងសេវាករទាំងអស់រក្សាគុណភាពចំណីអាហារ ពង្រឹង​សេវាកម្មទេសចរណ៍ដែលខ្លួនកំពុងតែមានសម្រាប់។ ត្បិតបានចាក់វ៉ាក់សាំងបង្ការ ឬមានការបើកអាជីវកម្មទេសចរណ៍ក៏ដោយ ក៏លោកអភិបាល​ស្រុក​ស្រែ​អំបិល ស្នើសុំឱ្យអ្នកទេសចរបន្តចូលរួមអនុវត្តវិធានការសុខាភិ បាលគ្រប់ៗគ្នាថែមទៀត៕អត្ថបទ៖ ឈឹម មករា 

សហគមន៍ជ្រោយស្វាយ ចង់បានកិច្ចគាំទ្រអភិវឌ្ឍន៍ជាតំបន់អេកូទេសចរណ៍ធម្មជាតិមួយ

2021/12/22 01:12:11 pm        386
Facebook Telegram Linkin
កោះកុង៖ ប្រជាសហគមន៍ភូមិជ្រោយស្វាយ ស្រុកស្រែអំបិល ខេត្តកោះកុង ចង់បានកិច្ចគាំទ្រពីអាជ្ញាធរ និងជំនាញ ដើម្បីបង្កើតជាតំបន់អេកូទេសចរណ៍ធម្មជាតិមួយក្នុងមូលដ្ឋាន ដើម្បីរកស្វែងរកប្រាក់ចំណូលបន្ថែម។ប្រជាសហគមន៍ភូមិជ្រោយស្វាយខាងលិច ឃុំជ្រោយស្វាយ បានប្រាប់BTV Newsថា ពួកគេមាន​បង្ហាញ​ក្តីបារម្ភ អំពីទិន្នផលនេសាទពុំសូវទទួលបានផលច្រើនដូចឆ្នាំមុន ​ដោយសារតែមានទូក នេសាទជាច្រើនកំពុងប្រើប្រាស់​ឧបករណ៍នេសាទខុសច្បាប់ លើផ្ទៃទឹកសមុទ្រ។ពួកគេបានមើលឃើញពីសក្តានុពល នៃវិស័យទេសចរណ៍ក្នុងមូលដ្ឋានជំនួសវិញ រួមមាន ទេសភាពបៃតងខ្ចី នៃព្រៃកោងកាងគួរជាទីគយគន់ ខ្យល់អាកាសបរិសុទ្ធល្អ ឆ្នេរសមុទ្រខៀវស្រងាត់ ការជិះទូក ស្ទូចត្រីកម្សាន្ត ព្រមទាំងអាចលក់ផលិតផលអាហារស្រស់ៗជូនអ្នកទេសចរ មិនចាំបាច់ដឹកទៅលក់នៅទីផ្សារ។ព្រោះតែការសម្លឹងមើលឃើញពីអាជីវកម្មគ្មានផ្សែងនេះហើយ ទើបពួកគេចង់បានកិច្ចគាំទ្រពី​អាជ្ញាធរខេត្ត មន្ទីរជំនាញ អង្គការដៃគូ ឱ្យមានការបង្កើតជាតំបន់អេកូទេសចរណ៍ធម្មជាតិ​មួយ​ក្នុងមូលដ្ឋាន។លោក ហាវ ឡាញ់ ប្រធានសហគមន៍ឆ្នេរនេសាទ ក្នុងភូមិជ្រោយស្វាយខាងលិច ​បានអះអាងថា កន្លងទៅ សហគមន៍របស់ពួកគេ ធ្លាប់បើកទ្វារទទួលអ្នកទេសចរ ដែលមានបំណង​មកលេង​កម្សាន្តដែរ​ ត្បិតបើកដំណើរការយូរឆ្នាំហើយក៏ដោយ តែព្រោះតែខ្វះធនធាន​អភិវឌ្ឍន៍​ហេដ្ឋា​រចនា​សម្ព័ន្ធ​បម្រើដល់វិស័យទេសចរណ៍ គ្រាមានអ្នកទេសចរស្គាល់ទីតាំងនេះតិចតួច។ពាក់ព័ន្ធបញ្ហានេះ ត្រូវបានលោក ជា ចាន់កញ្ញា អភិបាលស្រុកស្រែអំបិល ពន្យល់ថា លោកពុំជំ ទាស់បដិសេធពីបំណង ដែលថា​ពលរដ្ឋចង់បង្កើតឱ្យ​មានជាតំបន់អេកូទេសចរណ៍​ធម្មជាតិ​ក្នុងមូលដ្ឋាននោះទេ។ដូច្នេះលោកស្នើសុំប្រជាសហគមន៍ធ្វើលិខិតសំណើមកកាន់អាជ្ញាធរឃុំ ​និងរដ្ឋបាលស្រុក ដើម្បី ពិចារណាចុះពិនិត្យទីតាំងសម្រេច ដោយមិនទាន់ក្តាប់​ព័ត៌មានច្បាស់លាស់ថា​ទីតាំងនោះ​នៅ​ទីណា។ អ្វីដែលលោកបារម្ភ ខ្លាចតែតំបន់នោះ ជា​ទីតាំងរដ្ឋហាមឃាត់ ឬជាប់ពាក់ព័ន្ធ​គម្រោង​ការ​វិនិយោគទុន​របស់ឯកជន៕ អត្ថបទ៖ ឈឹម មករា

អាជ្ញាធរបើកយុទ្ធនាការចាក់វ៉ាក់សាំងដូសទី៣ ជូនព្រះសង្ឃក្នុងក្រុងបាត់ដំបង

2021/12/22 01:00:27 pm        263
Facebook Telegram Linkin
បាត់ដំបង៖ អាជ្ញាធរខេត្តបាត់ដំបង នៅថ្ងៃនេះ បានបើកយុទ្ធនាការចាក់វ៉ាក់សាំងកូវីដ-១៩ ដូសទី៣ ប្រគេនព្រះសង្ឃ នៅទូទាំងក្រុងបាត់ដំបងដែលមានចំនួនប្រមាណជិត១ពាន់អង្គ ។ក្នុងពិធីបើកយុទ្ធនាការចាក់វ៉ាក់សាំងដូសជំរុញ ប្រគេនព្រះសង្ឃនៅក្នុងក្រុងបាត់ដំបង នាព្រឹកនេះ ឯកឧត្តម សុខ លូ អភិបាលខេត្តបាត់ដំបង បានលើកឡើងថា ទោះបីជារាជរដ្ឋាភិបាល បានបិទ​បញ្ចប់​ព្រឹត្តិការណ៍ ២០កុម្ភៈ ប៉ុន្តែមិនមែនបានន័យថាលែងមានការឆ្លងរីករាលដាលជំងឺកូវីដ-១៩នោះទេ ដូច្នេះការ ចាក់វ៉ាក់សាំងពិតជាសំខាន់ណាស់ ហើយត្រូវមានការប្រុងប្រយ័ត្នខ្ពស់ រក្សាគម្លាតសុវត្ថិភាព និងបន្តអនុវត្តវិធានការសុខាភិបាល ៣កុំ ៣ការពារឱ្យបានខ្ជាប់ខ្ជួន ។ឯកឧត្តម បានសង្កេតឃើញថា បច្ចុប្បន្ននេះ សីលធម៌សង្គម បានធ្លាក់ចុះគួរឱ្យកត់សម្គាល់ និង ព្រួយបារម្ភ ដែលទាមទារឱ្យមានការចូលរួមចំណែកពីព្រះសង្ឃ ក្នុងការជួយកិច្ចការងារសង្គម ព្រោះព្រះសង្ឃ ដើរតួនាទីសំខាន់ណាស់ក្នុងសង្គម។ឯកឧត្តមអភិបាលខេត្ត បានអំពាវនាវដល់ព្រះសង្ឃ ​ឱ្យចូលរួមជួយការងារសង្គម ​តាមរយៈការ ទេសនាបញ្រ្ជាបការយល់ដឹងពីបញ្ហាគ្រោះថ្នាក់ចរាចរណ៍​ គ្រឿងញៀន​ និងបញ្ហាផ្សេងៗ ជាពិសេសជួយជំរុញប្រជាពលរដ្ឋឱ្យទៅទទួលការចាក់វ៉ាក់សាំង។ឯកឧត្តម សុខ លូ បានណែនាំដល់អាជ្ញាធរក្រុង ស្រុក ឃុំ សង្កាត់ទាំងអស់ ត្រូវជំរុញនិងអំពាវនាវ​ដល់​ប្រជាពលរដ្ឋ​ឱ្យទៅទទួលការចាក់វាក់សាំង​ឱ្យបានគ្រប់ៗគ្នា ខណៈដំណើរការចាក់វ៉ាក់សាំង​ដូសទី១​ បាននឹងកំពុងបន្តនៅទូទាំងខេត្ត៕អត្ថបទ៖ នឿត សុភក្ត្រ

Omicron មិនទាន់រកឃើញឆ្លងលើពលករខ្មែរមកពីថៃ តាមច្រកខេត្តឧត្ដរមានជ័យនោះទេ

2021/12/22 12:32:35 pm        432
Facebook Telegram Linkin
ឧត្ដរមានជ័យ៖ ប្រធានមន្ទីរសុខាភិបាលខេត្តឧត្តរមានជ័យ បានបញ្ជាក់ថា មកទល់ពេលនេះ បើទោះជាក្នុងសហគមន៍ប្រទេសថៃ មានការឆ្លងមេរោគបំប្លែងថ្មី អូមីក្រុង តែមិនទាន់ត្រូវបានរកឃើញឆ្លងលើពលករខ្មែរ ដែលបានវិលមកពីប្រទេសថៃនៅឡើយទេ ខណៈវិធានការទប់ស្កាត់ការនាំចូលជំងឺនេះ កាន់តែត្រូវបានរឹតបន្តឹង។លោកវេជ្ជបណ្ឌិត ឃ្លោក ហួត បានឲ្យដឹងថា មួយរយៈចុងក្រោយនេះ ខណៈពេលដែលមេរោគ​បំប្លែងខ្លួនថ្មី អូមីក្រុង កំពុងតែវាយប្រហារសហគមន៍ក្នុងប្រទេសថៃ មានពលករខ្មែរ ជិតពីររយនាក់ បានធ្វើដំណើរចាកចេញពីប្រទេសថៃជារៀងរាល់ថ្ងៃ តាមច្រកព្រំដែនខេត្តឧត្ដរមានជ័យ ពិសេស​ច្រកអូរស្មាច់ ប៉ុន្តែក្នុងចំនួននេះ មិនមានអ្នកវិជ្ជមានកូវីដ-១៩ទេ ពិសេសគឺ អូមីក្រុង។លោកបានបញ្ជាក់ថា ខណៈមិនទាន់មានការឆ្លងលើពលករខ្មែរក៏ដោយ តែវិធានកាសុខាភិបាល កាន់តែ​ត្រូវបានពង្រឹង ​ដើម្បីធានាថា អូមីក្រុង មិនត្រូវបាននាំចូលមកចម្លងក្នុងសហគមន៍​ប្រទេស​កម្ពុជានោះទេ។លោកវេជ្ជបណ្ឌិត បានធ្វើការអំពាវនាវដល់ប្រជាពលរដ្ឋ ក៏ដូចជាពលករ ​ដែលកំពុងតែស្នាក់នៅធ្វើ ការក្នុងប្រទេសថៃ​ បើទោះជាបានចាក់វ៉ាក់សាំងហើយក្ដី ​ត្រូវបន្តមានការប្រុងប្រយ័ត្នបន្ថែមទៀត ដើម្បីកុំឱ្យ អូមីក្រុង​ ឆ្លងមកលើខ្លួនបាន ដោយអនុវត្តឱ្យបានខ្ជាប់ខ្ជួននូវវិធានការសុខាភិបាល៕ អត្ថបទ៖ ឃិន សារិទ្ធ

ក្នុងជំនួបជាមួយសម្តេចសង្ឃ ប្រធានរដ្ឋវៀតណាមសន្យាជំរុញមិត្តភាពកម្ពុជា-វៀតណាមឲ្យកាន់តែល្អប្រសើរ

2021/12/22 12:02:10 pm        1579
Facebook Telegram Linkin
ភ្នំពេញ៖ ក្នុងពេលអញ្ជើញក្រាបបង្គំសម្តេចព្រះមហាសង្ឃរាជទាំងពីរគណៈនៃព្រះរាជាណាចក្រកម្ពុជា ឯកឧត្តម ង្វៀន សួនហ៊្វុក ប្រធានរដ្ឋវៀតណាម សន្យាជំរុញមិត្តភាពកម្ពុជា-វៀតណាមឲ្យកាន់តែល្អប្រសើរ។មុនពេល ឯកឧត្តម ង្វៀន សួនហ៊្វុក ប្រធានរដ្ឋវៀតណាម បញ្ចប់ការបំពេញទស្សនកិច្ចផ្លូវការ​នៅ​កម្ពុជា ពេញមួយព្រឹកនៅថ្ងៃទី២២ ខែធ្នូ ឆ្នាំ២០២១ ឯកឧត្តម បានអញ្ជើញក្រាបបង្គំសម្តេច​ព្រះ​អគ្គមហាសង្ឃរាជាធិបតី ទេព វង្ស ព្រះមហាសង្ឃរាជនៃព្រះរាណាចក្រកម្ពុជា និង​សម្តេចព្រះអភិសិរីសុគន្ធាមហាសង្ឃរាជាធិបតី បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយ​នៃព្រះរាជាណាចក្រកម្ពុជា។សម្តេចមហាសង្ឃរាជាធិបតី បួរ គ្រី បានស្វាគមន៍យ៉ាងកក់ក្តៅចំពោះវត្តមានដ៏ខ្ពង់ខ្ពស់ ឯកឧត្ដម ង្វៀន សួនហ៊្វុក និងបានវាយតម្លៃខ្ពស់ចំពោះដំណើរទស្សនកិច្ចផ្លូវរដ្ឋរបស់ឯកឧត្តម ដែល​ជា​ចំណង​ការទូតរវាងកម្ពុជា​ និងវៀតណាម។សម្តេចមហាសង្ឃរាជាធិបតី បួរ គ្រី មានព្រះសង្ឃដីកាថា ទំនាក់ទំនងរបស់​ប្រទេសទាំងពីរ​រក្សា​បាន​នូវ​ទំនាក់​ដល់ប្រជាជាតិកម្ពុជា​ និងប្រជាជាតិវៀតណាម​ដែលមានពីយូរអង្វែង និងបានផ្សារភ្ជាប់​ជា​មហាមិត្តដែលជួយពីអតីតកាលផងដែរ។សម្តេចមហាសង្ឃរាជាធិបតី បួរ គ្រី បានមានព្រះសង្ឃដេកាទៀតថា ​សូមឲ្យមិត្តភាពកម្ពុជា-វៀតណាម​មានភាពល្អប្រសើរយូរអង្វែង។នាឱកាសនោះ ឯកឧត្តម ង្វៀន សួនហ៊្វុក ប្រធានរដ្ឋវៀតណាម បានថ្លែងអំណរគុណ​ចំពោះការ​ទទួល​ស្វាគមន៍​ក្នុងការបំពេញទស្សនកិច្ចមកកាន់កម្ពុជា។ ឯកឧត្តម មានប្រសាសន៍ក្នុងជំនួប​សវនាការថា​ វៀតណាមនឹងជំរុញមិត្តភាពកម្ពុជា-វៀតណាម​ ឲ្យកាន់តែល្អប្រសើរបន្ថែមទៀត។សូមបញ្ជាក់ថា ​នៅព្រឹកមិញនេះដែរ នៅមុនពេលឯកឧត្តម ង្វៀន សួនហ៊្វុក ធ្វើដំណើរ​មកចូល​គាល់​សម្តេចព្រះមហាសង្ឃរាជទាំងពីរគណៈ​ សម្តេចអគ្គមហាសេនាបតីតេជោ ហ៊ុន សែន ​បានរៀបចំ ពិធី​ទទួលទានអាហារពេលព្រឹកការងារជូនឯកឧត្តម ង្វៀន សួនហ៊្វុក ប្រធានរដ្ឋ នៃសាធារណរដ្ឋ​សង្គម​និយមវៀតណាម និងគណៈប្រតិភូជាន់ខ្ពស់​ នៅភូមិគ្រឹះរបស់សម្តេច។ក្នុងពិធីទទួលទានអាហារការងារពេលព្រឹកនេះ​ មានវត្តមានកូនប្រុសទាំងបីរបស់សម្តេច ​គឺឯកឧត្តម ហ៊ុន ម៉ាណែត ឯកឧត្តម ហ៊ុន ម៉ានិត និងឯកឧត្តម ហ៊ុន ម៉ានី៕ អត្ថបទ៖ សេក ឧត្តម 

ក្រសួងទេសចរណ៍ ជំរុញមន្ទីរទេសចរណ៍រៀបចំសៀវភៅមុខម្ហូបប្រចាំតំបន់ ដើម្បីទាក់ទាញទេសចរ

2021/12/22 11:53:50 am        322
Facebook Telegram Linkin
ភ្នំពេញ៖ ក្រសួងទេសចរណ៍ បានណែនាំឲ្យមន្ទីរទេសចរណ៍ខេត្តរាជធានីនានា រៀបចំសៀវភៅវិធីចំអិនម្ហូបអាហារតំណាងអត្តសញ្ញាណប្រចាំតំបន់នៅក្នុងខេត្តរាជធានីរបស់ខ្លួន ដើម្បីបង្កើនភាពទាក់ទាញភ្ញៀវទេសចរជាតិអន្តរជាតិ ខណៈសៀវភៅមានចំណងជើងថាThe Taste of Angkor ដែលបានជាប់ពានរង្វាន់ជាប្រភេទសៀវភៅមុខម្ហូបពិភពលោកល្អផ្តាច់គេ ឆ្នាំ២០២១ ត្រូវបានកម្ពុជា បាននិងកំពុងបង្កើនការផ្សព្វផ្សាយបានដល់ ៤២ប្រទេសលើពិភពលោក។ឯកឧត្តម ថោង រដ្ឋស័ក អគ្គនាយកនៃអគ្គនាយកដ្ឋានអភិវឌ្ឍន៍ទេសចរណ៍ និង​កិច្ចសហប្រតិបត្តិការ​អន្តរជាតិនៃក្រសួងទេសចរណ៍ បានថ្លែងអោយBTV ដឹងនៅថ្ងៃទី២២ ខែធ្នូនេះ ថ្លែងថា បច្ចុប្បន្ន​ក្រសួង​ការបរទេស និងកិច្ចសហប្រតិបត្តិការអន្តរជាតិ ​បាននិងកំពុងធ្វើការផ្សព្វផ្សាយសៀវភៅ The Taste of Angkor ​បានទៅដល់បណ្តាប្រទេសចំនួន៤២លើពិភពលោក ខណៈសៀវភៅរបៀប​ធ្វើ​ម្ហូបខ្មែរ ​ដែលបានជាប់ពានរង្វាន់ជាប្រភេទសៀវភៅអាស៊ីល្អផ្តាច់គេ នៅក្នុងការប្រកួត​ពានរង្វាន់​ហ្គ័រម៉ង់ សៀវភៅមុខម្ហូបពិភពលោកប្រចាំ ឆ្នាំ២០២១ ដែលមានការចូលរួមពីសៀវភៅប្រមាណ ៤០០០ច្បាប់មកពីប្រទេសចំនួន១៩៨ កាលពីអំឡុងចុងខែវិច្ឆិកានេះ។ឯកឧត្តម ថោង រដ្ឋស័ក បន្តថា តាមរយៈខិតខំពង្រីកផ្សព្វផ្សាយសៀវភៅThe Taste of Angkorនេះ នឹងជំរុញអោយប្រទេសកម្ពុជា ក្លាយជាគោលដៅទេសចរណ៍​ដែលមានភាពទាក់ទាញ​នៃ​ភ្ញៀវទេសចរ​អន្តរជាតិមកទស្សនាកម្ពុជា នឹងចង់ស្គាល់រសជាតិដើមម្ហូបខ្មែរទាំងនោះ ។ ឯកឧត្តម ស្នើអោយបណ្តាថ្នាក់ដឹកនាំមន្ទីរទេសចរណ៍រាជធានីខេត្ត សហការជាមួយចុងភៅ​ជំនាញ​ប្រចាំ​ខេត្តរបស់ខ្លួន រៀបចំចងក្រងសៀវភៅនិងចំអិនមុខម្ហូបប្រចាំតំបន់​ក្នុងខេត្តរបស់ខ្លួន​ ដើម្បី​ត្រៀម​ទទួលភ្ញៀវទេសចរអន្តរជាតិនៅពេលគេទៅកាន់ខេត្តរបស់ខ្លួន។សូមបញ្ជាក់ថា សៀវភៅមុខម្ហូបខ្មែរ (The Taste of Angkor) ដែលបានជាប់ជ័យលាភី សៀវភៅមុខម្ហូប​អាស៊ីដ៏ល្អផ្តាច់គេកាលពីរសៀលថ្ងៃទី៣០ ខែ វិច្ឆិកា ឆ្នាំ២០២១ នៅទីក្រុងប៉ារីស ​ប្រទេសបារាំង នៅក្នុងកម្មវិធីតាំង​ពិព័រណ៍ Gourmand World Cookbook Award 2021 ​គឺមានចងក្រងរបៀបធ្វើ មុខម្ហូប និង​បង្អែមខ្មែរថ្នាក់ជាតិចំនួន ៣៨មុខ ​ព្រមទាំងបានរំលេច ​និងផ្សព្វផ្សាយពីផលិតផលកម្ពុជា ដូចជា ម្រេចកំពត​ អង្ករផ្កាម្លិះ ​និងស្ករត្នោតផងដែរ៕អត្ថបទ ស៊ុម សុខជា

រដ្ឋបាលរាជធានីភ្នំពេញ បង្រួមមណ្ឌលព្យាបាលជំងឺកូវីដ-១៩ ដើម្បីប្រគល់ជូនវិស័យឯកជនវិញ

2021/12/22 11:43:01 am        225
Facebook Telegram Linkin
ភ្នំពេញ៖ ដោយស្ថានភាពជំងឺកូវីដ-១៩ នាពេលបច្ចុប្បន្ននេះ មានការធូរស្រាល ព្រមទាំងបើកដំណើរការប្រទេសឡើងវិញ ជាពិសេសថ្មីៗនេះប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្រី្ត បានប្រកាសបិទបញ្ចប់ព្រឹតិ្តការណ៍ឆ្លងកូវីដ-១៩ ក្នុងសហគមន៍២០កុម្ភៈ កាលពីថ្ងៃទី២០ ខែធ្នូ ឆ្នាំ២០២១ គឺរដ្ឋបាលរាជធានីភ្នំពេញ បន្តបង្រួមមណ្ឌលព្យាបាលជំងឺកូវីដ-១៩ ដើម្បីប្រគល់ជូនវិស័យឯកជនវិញ។បើតាមលោកវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាននាព្រឹកថ្ងៃទី២២ ខែធ្នូ ឆ្នាំ២០២១នេះថា ការបង្រួមមណ្ឌលព្យាបាលជំងឺកូវីដ-១៩នេះ ធ្វើ​ឡើង​តាមស្ថានភាពជាក់ស្តែងរបស់ជំងឺកូវីដ-១៩ ។ដោយករណីឆ្លងថ្មី ​និងករណីស្លាប់នៃជំងឺកូវីដ-១៩ ថយចុះខ្លាំង ក្នុងនោះនៅតាមទីតាំង​មណ្ឌលព្យាបាល ស្ទើរគ្មានអ្នកជំងឺត្រូវចូលមកទទួលការ​ព្យាបាល។ ដូច្នេះថ្នាក់ដឹកនាំក្រសួង​សុខា​ភិបាល ក៏ដូចជារដ្ឋបាលរាជធានីភ្នំពេញ មនី្ទរសុខាភិបាលរាជធានីភ្នំពេញ បានរៀបចំចាត់ចែង​ផ្ទេរអ្នកជំងឺនៅតាមមណ្ឌលព្យាបាលជំងឺកូវីដ-១៩ (ទីតាំងរបស់វិស័យឯកជន) មកកាន់ទីតាំង​មណ្ឌលព្យាបាល​ជំងឺកូវីដ-១៩ ស្តាតអូឡាំពិក។ដោយឡែកមណ្ឌលព្យាបាលជំងឺកូវីដ-១៩ សែនសុខ១ (ពិភពថ្មីសែនសុខ) បានផ្ទេរអ្នកជំងឺជាង​២០នាក់ មកកាន់មណ្ឌលព្យាបាលជំងឺកូវីដ-១៩ ស្តាតអូឡាំពិក ព្រមទាំងស្អាតបាញ់ថ្នាំ​សម្លាប់​មេរោគ និងប្រគល់ជូនវិស័យឯកជនវិញ ​កាលពីថ្ងៃទី១៩ ខែធ្នូ ឆ្នាំ២០២១។ ហើយមណ្ឌលព្យាបាលជំងឺកូវីដ-១៩ សែនសុខ២ (ដឺព្រីមៀរសែនសុខ)​ក៏​កំពុង​ត្រៀម​ប្រគល់​ជូន​វិស័យ​ឯកជន​នាពេលខាងមុខនេះ។ សរុបជារួមគិតត្រឹមព្រឹកនេះ ក្នុងរាជធានីភ្នំពេញ មនី្ទរពេទ្យព្យាបាល និងទីកន្លែងព្យាបាលជំងឺកូវីដ-១៩ មានចំនួន៨ទីតាំង។លោកវេជ្ជបណ្ឌិត ងី មានហេង បានបញ្ជាក់ទៀតថា សព្វថ្ងៃក្នុងរាជធានីភ្នំពេញ មានអ្នកជំងឺកូវីដ-១៩ ជាង៣០០នាក់ កំពុងសម្រាកព្យាបាលនៅតាមមណ្ឌលព្យាបាលជំងឺកូវីដ-១៩ និងអ្នកជំងឺកូវីដ-១៩ ព្យាបាលតាមខ្នងផ្ទះ មានចំនួនប្រមាណ២០០នាក់ប៉ុណ្ណោះ។និយាយដោយឡែកសម្រាប់យុទ្ធនាការចាក់វ៉ាក់សាំងកូវីដ-១៩ ប្រភេទស៊ីណូវ៉ាក់ ដូសជំរុញ ឬដូសទី៣ ជូនដល់កុមារ និងយុវវ័យ ដែលមានអាយុចាប់ពី១២ឆ្នាំ ដល់អាយុក្រោម១៨ឆ្នាំ ក្នុងមូលដ្ឋានរាជធានីភ្នំពេញ និងចាប់ដំណើរការចាក់វ៉ាក់សាំងជូនចាប់ពីថ្ងៃទី៣ ខែមករា ឆ្នាំ២០២២ខាងមុខនេះ មានចំនួន៤២ទីតាំង និងមានក្រុមការងារគ្រូពេទ្យក្រោមឱវាទ​មនី្ទរ​សុខាភិបាល​រាជ​ធានីភ្នំពេញ ជិត៥០០នាក់ សម្រាប់ចាក់វ៉ាក់សាំងជូនកុមារ និងយុវវ័យ៕អត្ថបទ៖ ហួត​ រដ្ឋា

អាជ្ញាធរខេត្ដសៀមរាបបួងសួង សុំឱ្យ​បារមី​វត្ថុសក្ដិសិទ្ធិ​នៅប្រាសាទអង្គរវត្ដ ផ្ដល់​សេចក្តី​សុខ​ដល់​ពលរដ្ឋកម្ពុជា

2021/12/21 04:08:05 pm        763
Facebook Telegram Linkin
សៀមរាប៖ នៅព្រឹកថ្ងៃទី២១ ខែធ្នូឆ្នាំ២០២១នេះ អាជ្ញាធរខេត្តសៀមរាប បានរៀបចំពិធីបួងសួងនៅខាងមុខប្រាសាទអង្គរវត្ដ ព្រះអង្គរគោលធ្លក ព្រះអង្គងោក និងព្រះអង្គចេក ព្រះអង្គចម ដើម្បីសុំឱ្យបាមរីវត្ថុសក្ដិសិទ្ធិជួយថែរក្សា និងជួយផ្ដល់សេចក្ដីសុខដល់ប្រជាពលរដ្ឋខ្មែរ ជាពិសេសប្រជាជននៅក្នុងខេត្ដសៀមរាប។ពិធីដឹកនាំដោយឯកឧត្តម ទៀ សីហា អភិបាលខេត្តសៀមរាប និងលោកជំទាវ ព្រមទាំងប្រធាន​ក្រុមប្រឹក្សាខេត្ដ ​អាជ្ញាធរជាតិអប្សារា មន្តី្ររាជការ ​ស្ថាប័នពាក់ព័ន្ធនានា និងអង្គភាពជុំវិញខេត្តជា​ច្រើន​នាក់​បាន​អញ្ជើញ​ចូលរួមផងដែរ។ឯកឧត្ដម ទៀ សីហា ក៏​បាន​អុចធូប​បួងសួង​សូម​ការប្រោសព្រំពីវត្ថុ​ស័ក្ដិសិទ្ធិ​នៅ​តំបន់អង្គរ ក៏ដូចជា​ដួងព្រះវិញ្ញាណក្ខន្ធអតីតព្រះមហាក្សត្រខ្មែរ ​ក៏ដូចជាដួងវិញ្ញាណក្ខន្ធរបស់បុព្វបុរសខ្មែរ ផ្តល់​នូវ​ពរជ័យ​សិរីមង្គល វិបុលសុខគ្រប់ប្រការដល់ប្រជាពលរដ្ឋនៅខេត្ដសៀមរាប ក៏ដូចជាការរក្សា​បាន​នូវសុខសន្តិភាពសម្រាប់ជាតិ ​និងប្រជាជនកម្ពុជា​លើដែនដីអច្ឆរិយរបស់ខ្មែរ ដែលពួកគេ​ត្រូវបាន​ប្រព្រឹទ្ធទៅតាមលំអានប្រពៃណី​ ទំនៀបទម្លាប់​សាសនាខ្មែរ ​ខណៈដែលគ្រឿងរណ្តាប់ ផ្លែឈើ​ជា​ច្រើន​មុខត្រូវ​បានរៀបចំឡើងដើម្បី​ជា​ដង្វាយ​ដល់វត្ថុ​ស័ក្តិសិទ្ធ​ផងដែរ។ពិធីនោះក៏បានសុំឱ្យបារមីព្រះអង្គថែរក្សាប្រាង្គប្រាសាទ ជួយឱ្យឱ្យកូចចៅខ្មែរ បានរួចចាក​ផុត​ពី​ជំងឺផ្សេងៗ​ផងដែរ ​ជាពិសេសជំងឺកូវីដ១៩។ឯកឧត្ដម ក៏បានរំលឹកគុណដល់បារមីគ្រប់ទិសទី​ដែល​ជួយ​តាមថែរក្សាប្រជាពលរដ្ឋខ្មែរមាន​សេចក្ដី​សុខ​មកដល់ថ្ងៃនេះ ​ក្នុងពេលវិបត្ដិជំងឺកូវីដ១៩ ក្នុងរយៈពេលជិត២ឆ្នាំកន្លងមក ​ហើយខេត្ដសៀមរាប នឹងវិលត្រឡប់ទៅសភាពដើមវិញ​ ដូចមុនឆ្នាំ២០២០កន្លងមក ។ជាមួយគ្នានោះ លោកតាអាចារ្យ បានសូត្របួងសួងដល់​វត្ថុ​ស័ក្តិសិទ្ធ​ ដួងព្រះវិញ្ញាណក្ខន្ធ​អតីត​ព្រះមហាក្សត្រខ្មែរ ​និងដួងវិញ្ញាណក្ខន្ធបុព្វបុរសខ្មែរ ​ឲ្យតាមជួយឃុំគ្រងបីបាច់ថែរក្សាជាតិកម្ពុជា ឲ្យបន្តមាន​សុខសន្តិភាព រក្សាបានការអភិវឌ្ឍ ​និងភាពរីកចម្រើនតរៀងទៅ ចៀសផុតពី​គ្រោះកាច​ទាំងឡាយ។ ហើយក៏បានអំពាវនាវដល់បារមីវត្ថុ​សក្តិសិទ្ធ តាមបីបាច់ថែរក្សាថ្នាក់ដឹកនាំ​កំពូលៗ​នៅ​កម្ពុជា និងអាជ្ញាធរខេត្ត មន្ត្រីរាជការ ប្រជាពលរដ្ឋទូទាំងប្រទេសកម្ពុជា ជាពិសេសប្រជាពលរដ្ឋ​ខេត្តសៀមរាប ​និងបងប្អូន​ដែលបានអញ្ជើញមកកម្សាន្ត ​នៅលើទឹកដីអង្គរ ។ក្នុងពិធីបួងសួងនោះផងដែរ ​ក៏​មានប្រជាពលរដ្ឋបានចូលរួមជាច្រើនកុះករផងដែរ ពួកគេសុទ្ធតែបាន​បង្ហាញក្តីរីករាយជាមួយពិធីបួងសួងនេះ​ និងចាត់ទុកជាពិធីដ៏ល្អមួយសម្រាប់សូមសេចក្តីសុខ​សេចក្តី​ចម្រើនជូនប្រជាពលរដ្ឋ និងជាតិកម្ពុជា។ បងប្អូនប្រជាពលរដ្ឋ ដែលចូលរួមសុទ្ធតែបានផ្តល់ និង​តម្កល់​តម្លៃខ្ពស់បំផុតចំពោះសុខសន្តិភាព​កំពុង​មាននៅកម្ពុជានាពេលបច្ចុប្បន្ន ​ដែល​ទាមទារ​រក្សាឲ្យបាន។ពួកគាត់បានយល់ឃើញថា បើគ្មានសន្តិភាព នឹងមិនអាចឲ្យកម្ពុជាអភិវឌ្ឍន៍រីកចម្រើនលូតលាស់​ទៅ​មុខបាននោះឡើយ។សូមជម្រាបថា​ពិធីបួងសួងនេះ​ ធ្វើឡើងចំនួន៤ទីតាំងក្នុងថ្ងៃតែមួយ ​រួមមាននៅចំណុចលោកតារាជ ខាងមុខប្រាសាទអង្គរវត្ត​ នៅព្រះអង្គគោកធ្លក ​និងព្រះអង្គងោគ ​នៅព្រះអង្គចេក ព្រះអង្គចម ស្ថិតក្នុង​ក្រុងសៀមរាប ​ដែលធ្វើឡើងបន្ទាប់ពីសម្តេចតេជោ ហ៊ុន សែន ​នាយករដ្ឋមន្ត្រីនៃប្រទេស​កម្ពុជា ​បានប្រកាសបិទបញ្ចប់ព្រឹត្តិការណ៍សហគមន៍​ ២០កុម្ភៈ កាលពីថ្ងទី២០ខែធ្នូឆ្នាំ២០២១នេះ៕

ប្រមុខរាជរដ្ឋាភិបាលកម្ពុជានិងប្រធានរដ្ឋវៀតណាម ឯកភាពគ្នាលើកកំពស់វិនិយោគ និង​ចៀសវាង​យកពន្ធត្រួតគ្នា

2021/12/21 03:48:53 pm        528
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងឯកឧត្តម ង្វៀន សួនហ៊្វុក ប្រធានរដ្ឋវៀតណាម បានឯកភាពគ្នាជំរុញការអនុវត្តកិច្ចព្រមព្រៀង ស្តីពីការលើកកម្ពស់និងការការពារវិនិយោគ និងកិច្ចព្រមព្រៀងចៀសវាងការយកពន្ធត្រួតគ្នា និងជួយសម្រួលដល់ការអភិវឌ្ឍពាណិជ្ជកម្មតាមបែបថ្មី។ក្នុងឱកាសអញ្ជើញមកបំពេញទស្សនកិច្ចផ្លូវរដ្ឋនៅកម្ពុជា រយៈពេល២ថ្ងៃនៅកម្ពុជា នៅ​ព្រឹកថ្ងៃទី ២១ធ្នូនេះ ​ឯកឧត្តមប្រធានរដ្ឋវៀតណាម ត្រូវបានសម្តេចតេជោ ហ៊ុន សែន ប្រមុខ​រាជ​រដ្ឋាភិបាល​កម្ពុជា​អញ្ជើញ​ទទួល​បដិសណ្ឋារកិច្ចយ៉ាងរីករាយ​ និងស្និតស្នាល ​និង​បាន​អញ្ជើញ​ជួប​ចរចា​ទ្វេភាគី​នៅវិមាន​សន្តិភាព។បន្ទាប់កិច្ចប្រជុំចង្អៀតនិងកិច្ចប្រជុំទូលាយបានបញ្ចប់ ឯកឧត្តម អ៊ាង សុផល្លែត ជំនួយការផ្ទាល់​សម្តេចតេជោ បានប្រាប់ក្រុមអ្នកសារព័ត៌មានថា៖ ក្នុងជំនួបនោះ ភាគីទាំងពីរ​បានវាយតម្លៃខ្ពស់អំពី​សារ​សំខាន់នៃដំណើរទស្សនកិច្ចរបស់ឯកឧត្តម ង្វៀន សួនហ៊្វុក មកកាន់កម្ពុជា​ក្នុង​តួនាទីជាប្រធានរដ្ឋនៃសាធារណរដ្ឋសង្គមនិយមវៀតណាម ដោយដំណើរទស្សនកិច្ចនេះ គឺជា​ដំណើរទស្សនកិច្ច​បើកឆ្នាំមិត្តភាពរវាងប្រទេសទាំង២ឆ្នាំ ២០២២ គឺខួប៥៥ឆ្នាំ។ភាគីទាំងពីរក៏បានអបអរសាទរចំពោះកិច្ចសហប្រតិបត្តិការទ្វេភាគីលើវិស័យសេដ្ឋកិច្ច ពាណិជ្ជកម្ម និងវិនិយោគនិងបានឯកភាពគ្នាជំរុញការអនុវត្តកិច្ចព្រមព្រៀងស្តីពីការលើកកម្ពស់ និងការការពារ​វិនិយោគ និងកិច្ចព្រមព្រៀង​ចៀសវាង​ការយកពន្ធត្រួតគ្នាជាពិសេសជួយ​សម្រួល​ដល់​ការអភិវឌ្ឍ​ពាណិជ្ជកម្មតាមបែបថ្មី។ឯកឧត្តម ង្វៀនស៊ុន ហ៊្វុក បានសាទរចំពោះសមិទ្ធផលជាប្រវត្តិសាស្រ្ត​និងសំខាន់ៗ​ដែល​រដ្ឋាភិបាល​ និងប្រជាជនកម្ពុជា​សម្រេចបាន ​ជាពិសេសការអភិវឌ្ឍជាតិ ស្ថេរភាពនយោបាយ ​សន្តិសុខសង្គម លើកកម្ពស់តួនាទី និងមុខមាត់របស់ប្រទេសកម្ពុជា នៅក្នុងតំបន់ និងនៅលើឆាកអន្តរជាតិ។ភាគីទាំងពីរ ក៏បានសម្ដែងនូវការពេញចិត្តចំពោះការរីកចម្រើននៃ​ទំនាក់ទំនង​រវាងប្រទេសទាំងពីរ​ដោយ​គ្រប់ជ្រុងជ្រោយ​និង​ជិតស្និទ្ធ នឹងកាន់តែមានប្រសិទ្ធភាពទោះបីជាស្ថិតនៅក្នុង​បរិបទ​ការ​រីករាល​ដាលកូវីដ-១៩ ក៏ដោយ។ ភាគីទាំងពីរក៏បានឯកភាពគ្នាក្នុងការពន្លឿន​ការចុះ​ហត្ថ​លេខា​លើកិច្ច​ព្រម​ព្រៀង​ស្តីពីពាណិជ្ជកម្ម​តាមព្រំដែន ឯកភាពគ្នាក្នុងការពន្លឿនកិច្ច​ពិភាក្សា​ឆ្ពោះទៅ​ទទួល​ស្គាល់គ្នា​ទៅវិញទៅមកលើលិខិតឆ្លងដែន​ និងវិញ្ញាបនបត្រ​ចាក់វ៉ាក់សាំង​ដើម្បីសម្រួលដល់​ការធ្វើ​ដំណើរ​របស់ប្រជាជនទាំងសងខាងផង​ និងសម្រួលដល់ការធ្វើពាណិជ្ជកម្មរវាង​ប្រទេសទាំងពីរ​ផង​ ហើយក៏បានឯកភាពគ្នាក្នុងការជំរុញពង្រឹងបន្ថែមទៀតនូវកិច្ចសហប្រតិបត្តិការលើវិស័យការពារជាតិ សុខាភិបាល អប់រំ យុត្តិធម៌ក្នុងការតភ្ជាប់គ្នារវាងប្រទេសទាំងពីរ​និងរវាងប្រជាជនទាំងពីរក៏ដូច​ជា​កិច្ច​សហប្រតិបត្តិការនៅលើឆាកអន្តរជាតិឆាកតំបន់។ជាទីបញ្ចប់នៅក្នុងជំនួបនេះសម្ដេចតេជោបានថ្លែងអំណរគុណចំពោះឯកឧត្តមប្រធានរដ្ឋវៀតណាមដែលកន្លងមកបានគាំទ្រជួយដល់កម្ពុជាធ្វើឲ្យកម្ពុជាទទួលបានជោគជ័យក្នុងកិច្ចប្រជុំអាស៊ីអឺរ៉ុបនិងថ្លែងអំណរគុណជូនចំពោះឯកឧត្តមប្រធានរដ្ឋវៀតណាមដែលមានប្រសាសន៍គាំទ្រកម្ពុជាធ្វើយ៉ាងណាឱ្យកម្ពុជាទទួលបានជោគជ័យក្នុងកិច្ចប្រជុំអាស៊ាននាពេលខាងមុខក្នុងនាមកម្ពុជាជាប្រធានអាស៊ានឆ្នាំ២០២២។ក្រោយជំនួបបញ្ចប់ សម្តេចតេជោនិងឯកឧត្តម ង្វៀន សួនហ៊្វុក ក៏បានអញ្ជើញជាអធិបតីដ៏ខ្ពង់ខ្ពស់ ក្នុងពិធីចុះហត្ថលេខាលើឯកសារចំនួន៧ រួមមាន៖-ផែនការសហប្រតិបត្តិការឆ្នាំ២០២២ រវាងក្រសួងមហាផ្ទៃនៃព្រះរាជាណាចក្រកម្ពុជា និងក្រសួង​នគរបាល​នៃសាធារណរដ្ឋសង្គមនិយមវៀតណាម។-ផែនការសហប្រតិបត្តិការ ប្រចាំឆ្នាំ២០២២ រវាងក្រសួងការពារជាតិកម្ពុជា និងក្រសួងការពារជាតិ​វៀតណាម។-កំណត់ហេតុនៃកិច្ចប្រជុំលើកទី១៩ របស់គណៈកម្មការចម្រុះកម្ពុជា-វៀតណាម ស្តីពីកិច្ច​សហប្រតិបត្តិការ​លើវិស័យសេដ្ឋកិច្ច វប្បធម៌ វិទ្យាសាស្ត្រ និង បច្ចេកវិទ្យា។-កំណត់ហេតុនៃកិច្ចប្រជុំរវាងប្រធានគណៈកម្មការព្រំដែនចម្រុះកម្ពុជា-វៀត ណាម។-អនុស្សារណៈនៃកិច្ចព្រមព្រៀងស្ដីពីកិច្ចសហប្រតិបត្តិការលើវិស័យអប់រំសម្រាប់ឆ្នាំ​២០២១-២០២៥។-អនុស្សារណៈនៃការយោគយល់គ្នារវាងព្រះរាជាណាចក្រកម្ពុជា​ និងសាធារណរដ្ឋ​សង្គមនិយម​វៀតណាម ស្តីពី​ការ​បញ្ចប់​ការចរចាបង្កើតកិច្ចព្រមព្រៀងពាណិជ្ជកម្មតាមព្រំដែន​រវាង រាជរដ្ឋាភិបាល​នៃព្រះរាជាណាចក្រកម្ពុជា ​និងរដ្ឋាភិបាលនៃសាធារណរដ្ឋសង្គមនិយមវៀតណាម។-ផែនការសកម្មភាពសម្រាប់ឆ្នាំ ២០២២-២០២៣ រវាងក្រសួងយុត្តិធម៌នៃព្រះរាជាណាចក្រកម្ពុជា និង​ក្រសួងយុត្តិធម៌នៃសាធារណរដ្ឋសង្គមនិយមវៀតណាម៕អត្ថបទ៖ មុត សុទ្ធ

បណ្ដាញសង្គម

ព័ត៌មានថ្មីៗ

ពិធីប្រកាសតែងតាំងនាយទាហាន នាយទាហានរង តំបន់ប្រតិបត្តិការសឹករងកោះកុង
08/27/2025 03:08 PM
Facebook Telegram Linkin
ប្រមុខការទូត៖ អ៊ីរ៉ង់ត្រៀមបន្តការចរចាដោយប្រយោលជាមួយអាមេរិក លើបញ្ហានុយក្លេអ៊ែរ
08/27/2025 03:08 PM
Facebook Telegram Linkin
រដ្ឋមន្រ្តីក្រសួងបរិស្ថានដឹកនាំកិច្ចប្រជុំបូកសរុបលទ្ធផលការងារបរិស្ថានប្រចាំឆមាសទី១ និងលើកទិសដៅបន្ត
08/27/2025 03:08 PM
Facebook Telegram Linkin
អង្គការសហប្រជាជាតិ បង្កើតក្រុមប្រឹក្សាយោបល់ដើម្បីគ្រប់គ្រងបច្ចេកវិទ្យាបញ្ញាសិប្បនិម្មិត
08/27/2025 03:08 PM
Facebook Telegram Linkin
រុស្ស៊ីមើលឃើញសក្តានុពលសម្រាប់កិច្ចសហប្រតិបត្តិការជាមួយអាមេរិក ក្នុងវិស័យថាមពលនុយក្លេអ៊ែរ និងលោហៈកម្រ
08/27/2025 03:08 PM
Facebook Telegram Linkin
រដ្ឋបាលខណ្ឌ៧មករា​ រៀបចំពិធីដេញថ្លៃគម្រោងមូលនិធិអភិវឌ្ឍន៍សង្កាត់ទាំង៨ ឆ្នាំ២០២៥ ដែលមានក្រុមហ៊ុនចំនួន៦ក្រុមហ៊ុនចូលរួម
08/27/2025 03:08 PM
Facebook Telegram Linkin
ទួរគីថ្កោលទោសចំពោះការវាយប្រហារដោយយោធារបស់អ៊ីស្រាអែលនៅស៊ីរី ខណៈចំនួនអ្នកស្លាប់ កើនដល់ ៦នាក់
08/27/2025 03:08 PM
Facebook Telegram Linkin
អតីតឯកអគ្គរដ្ឋទូតអឺរ៉ុបជាង ២០០រូប រិះគន់ការឆ្លើយតបរបស់សហភាពអឺរ៉ុប នៅតំបន់ហ្កាហ្សា
08/27/2025 03:08 PM
Facebook Telegram Linkin
ទិដ្ឋភាព​ទូទៅ​នៃ​ការពិនិត្យបញ្ជី​ឈ្មោះ​បេក្ខជន​ប្រឡង​សញ្ញាបត្រ​មធ្យម​សិក្សា​ទុតិយភូមិ​សម័យ​ប្រឡង៖ ២៨ សីហា ២០២៥
08/27/2025 03:08 PM
Facebook Telegram Linkin
ក្រុមការងារចម្រុះខេត្តកំពង់ឆ្នាំង ផ្សព្វផ្សាយសេចក្តីជូនដំណឹងរបស់រាជរដ្ឋាភិបាល​ស្តីពីការបន្លាស់ទីផ្ទះទឹក​ដល់ប្រជាពលរដ្ឋក្នុងមូលដ្ឋានឃុំចំនួន២ ក្នុងស្រុកកំពង់លែង
08/27/2025 02:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.