នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធាន​ក្រុមការងារ​ចុះមូលដ្ឋាន ប្រកាស​បញ្ចូលសមាជិកថ្មី​​គណបក្សប្រជាជនកម្ពុជាចំនួន ៦៩០០នាក់ ក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេច​តេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន
ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី
ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ​ និង ការអភិវឌ្ឍន៍

ពាណិជ្ជកម្មតាមអនឡាញ កំពុងមាន​និន្នាការ​កើនឡើង​នៅកម្ពុជា ខណៈរដ្ឋាភិបាលជំរុញសេដ្ឋកិច្ចឌីជីថល

2021/12/10 01:48:13 pm        398
Facebook Telegram Linkin
ភ្នំពេញ៖ រដ្ឋមន្ត្រីក្រសួងពាណិជ្ជកម្មឯកឧត្តម ប៉ាន សូរស័ក្តិ បានលើកឡើងថា សេដ្ឋកិច្ចឌីជីថល ឬពាណិជ្ជកម្មតាមប្រព័ន្ធអេឡិចត្រូនិក បាននិងកំពុងក្លាយជាទិដ្ឋភាពដ៏សំខាន់ សម្រាប់ការរស់នៅប្រចាំថ្ងៃរបស់ប្រជាពលរដ្ឋ។ឯកឧត្តម រដ្ឋមន្ត្រី ប៉ាន សូរស័ក្តិ បានគូសបញ្ជាក់បែបនេះ ក្នុងឱកាសថ្លែងសុន្ទរកថា បើកសិក្ខាសាលាស្តីពី «ការប្រែក្លាយអាស៊ានទៅជាសហគមន៍ឌីជីថលឈានមុខ៖ ការត្រួតពិនិត្យលើផែនការការងារ ស្តីពីការអនុវត្តកិច្ចព្រមព្រៀងអាស៊ាន ស្តីពីពាណិជ្ជកម្មតាមប្រព័ន្ធអេឡិចត្រូនិក» ធ្វើឡើងតាមប្រព័ន្ធវីដេអូ នៅថ្ងៃទី០៩ ខែធ្នូ ឆ្នាំ២០២១។ សិក្ខាសាលានេះរៀបចំឡើងដោយមជ្ឈមណ្ឌលពាណិជ្ជកម្មអាស៊ី និងក្រុមហ៊ុន​ផ្តល់​ប្រឹក្សា​យោបល់​ពាណិជ្ជកម្ម និងវិយោគ Trade Worthy ដោយមានការអញ្ជើញចូលរួមពីមន្ត្រីជាន់ខ្ពស់​មក​ពី​បណ្តា​រដ្ឋសមាជិកអាស៊ាន តំណាងមកពីអង្គការ ​និងវិស័យឯកជននានាជាច្រើនរូប។ក្នុងសុន្ទរកថា បើកសិក្ខាសាលានេះ ឯកឧត្តម រដ្ឋមន្ត្រី ប៉ាន សូរស័ក្តិ បានលើកឡើងថា សិក្ខា​សាលា​នេះ ធ្វើឡើងក្នុងគោលបំណងបង្ហាញជូនភាគីពាក់ព័ន្ធ​ទាំងអស់​អំពី​ផែនការ​ការងារ​លើកិច្ចព្រម​ព្រៀង​អាស៊ាន ស្តីពីពាណិជ្ជកម្មតាមប្រព័ន្ធអេឡិចត្រូនិក និងប្រសិទ្ធភាពនៃការអនុវត្តផែនការនេះ ដែលនឹងជួយដោះស្រាយនូវគំលាតទាំងឡាយទាក់ទង​នឹងបទប្បញ្ញត្តិ និងលើកកម្ពស់ក្របខ័ណ្ឌ​គោលនយោបាយរួមសម្រាប់ពាណិជ្ជកម្មតាមប្រព័ន្ធអេឡិចត្រូនិកក្នុងតំបន់ ក៏ដូចជាដោះស្រាយ​បញ្ហាទូទៅចំពោះការចូលរួមរបស់សហគ្រាសមីក្រូ ធុនតូច​ និងមធ្យមក្នុងវិស័យសេដ្ឋកិច្ចឌីជីថល ព្រមទាំងគាំទ្រដល់កិច្ចខិតខំប្រឹងប្រែងរបស់កម្ពុជា ក្នុងនាមជាប្រធានអាស៊ាន ក្នុងការជំរុញ​សមាហរណកម្មតំបន់នៃសេដ្ឋកិច្ចឌីជីថលជាដើម។ឯកឧត្តម រដ្ឋមន្ត្រីបន្តថា សេដ្ឋកិច្ចឌីជីថល ឬពាណិជ្ជកម្មតាមប្រព័ន្ធអេឡិចត្រូនិក បាននិងកំពុង​ក្លាយ​ជាទិដ្ឋភាពដ៏សំខាន់សម្រាប់ការរស់នៅប្រចាំថ្ងៃរបស់ប្រជាពលរដ្ឋ។ ឯកឧត្តម ប៉ាន សូរស័ក្តិ បានបញ្ជាក់ទៀតថា កម្ពុជាបានខិតខំប្រឹងប្រែងយ៉ាងយកចិត្តទុក​ដាក់ក្នុង​ការ​អភិវឌ្ឍវិស័យពាណិជ្ជកម្មតាមប្រព័ន្ធអេឡិចត្រូនិក និងបានប្តេជ្ញាចិត្តក្នុងការអនុវត្ត​តាម​កិច្ចព្រមព្រៀង​អាស៊ានស្ពីពីពាណិជ្ជកម្មកម្ពុជាតាមប្រព័ន្ធអេឡិចត្រូនិក ជាក់ស្ដែងកម្ពុជា​បាន​ប្រកាសឱ្យប្រើប្រាស់ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក កាលពីថ្ងៃទី២ ខែធ្នូ ឆ្នាំ២០១៩ និងបានផ្តល់សច្ចាប័នលើកិច្ចព្រមព្រៀងអាស៊ានស្ពីពីពាណិជ្ជកម្មកម្ពុជាតាមប្រព័ន្ធអេឡិចត្រូនិក កាលពីថ្ងៃទី៦ ខែធ្នូ ឆ្នាំ២០១៩។ បន្ថែមពីនេះ កាលពីខែវិច្ឆិកា ឆ្នាំ២០២០ កន្លងទៅ កម្ពុជាបានដាក់ឱ្យដំណើរការជាផ្លូវការនូវ​យុទ្ធ​សាស្ត្រ​ពាណិជ្ជកម្មតាមប្រព័ន្ធអេឡិចត្រូនិក ដែលឯកសារនេះត្រូវបានប្រើប្រាស់​ជា​ឯកសារ​យុទ្ធសាស្ត្រ​ក្នុងការបន្តបង្កើតគោលនយោបាយសេដ្ឋកិច្ច​ និងសង្គមឌីជីថល ២០២១-២០២៥៕អត្ថបទ៖ វណ្ណៈ

ព្រះសង្ឃទូទាំងប្រទេសចំនួន ៦៩,៤៣២អង្គ ក្នុងនោះព្រះសង្ឃបានចាក់វ៉ាក់សាំងមាន​ចំនួន ៦៦,៩៥១អង្គ

2021/12/10 01:37:50 pm        532
Facebook Telegram Linkin
ភ្នំពេញ៖ ឯកឧត្តម ផ្លោក ផន រដ្ឋលេខាធិការប្រចាំការក្រសួងធម្មការ និងសាសនា បានបញ្ជាក់ថា ព្រះសង្ឃទូទាំងប្រទេសចំនួន ៦៩,៤៣២អង្គ ក្នុងនោះព្រះសង្ឃ ដែលបានចាក់វ៉ាក់សាំងការពារជំងឺកូវីដ-១៩ មានចំនួន ៦៦,៩៥១អង្គ ស្មើនឹងចំនួន៩៦%។ការថ្លែងរបស់​ឯកឧត្តម ផ្លោក ផន យ៉ាងដូច្នេះក្នុងកិច្ចប្រជុំប្រចាំខែធ្នូ និងលើកទិសដៅ​អនុវត្ត​ការងារ​សម្រាប់​ខែ​បន្ទាប់​ក្រោមវត្តមានឯកឧត្តម ឈិត សុខុន រដ្ឋមន្ត្រីក្រសួងធម្មការ ​និងសាសនា និង​ថ្នាក់ដឹកនាំ​មន្ទីរធម្មការ ​និងសាសនា ​ទាំង២៥រាជធានី-ខេត្ត, នាថ្ងៃទី៩ ខែធ្នូ ឆ្នាំ២០២១។ឯកឧត្តម រដ្ឋលេខាធិការប្រចាំការ ​បានឲ្យដឹងទៀតថា ព្រះសង្ឃដែលបានឆ្លងជំងឺកូវីដ-១៩ ចំនួន​១,២៤៥​អង្គ បានជាសះស្បើយចំនួន១,២៣៣អង្គ ក្នុងនោះអនិច្ចធម្មចំនួន១៦អង្គ។ ថ្នាក់ដឹកនាំពាហិរសាសនា ដែល​បាន​ចាក់​វ៉ាក់​សាំង​ការពារ​ជំងឺកូវីដ-១៩ចំនួន៤,០៧៨រូប ថ្នាក់ដឹកនាំ ឥស្លាមសាសនាចំនួន១,៤៨៧រូប។ ថ្នាក់ដឹកនាំ គ្រិស្ដ សាសនា ចំនួន២,៣៤៣រូប និងថ្នាក់ដឹកនាំសាសនាផ្សេងៗចំនួន២៤៨រូប។ ថ្នាក់ដឹកនាំពាហិរសាសនា ដែលបាន​ឆ្លង​ជំងឺ​កូវីដ-១៩ ចំនួន៤៧៥រូប ជាសះស្បើយចំនួន៤៥៩រូប មរណភាពចំនួន៧រូប ក្នុងនោះរួមមាន៖ សាសនា​ឥស្លាម ចំនួន៣១៥រូប ជាសះស្បើយចំនួន៣០៥រូប មរណភាពចំនួន៦រូប គ្រិស្ដសាសនា​ចំនួន ១២២រូប ជាសះស្បើយ​ចំនួន​១១៦រូប មរណ​ភាព​ចំនួន១រូប។ ចំពោះវិស័យពុទ្ធិកសិក្សា ​សម្តេចព្រះអគ្គាធិការ បានខិតខំប្រឹងប្រែង ​យកព្រះទ័យ​ទុក​ដាក់ បណ្តុះ​បណ្តាល​តាម​ប្រព័ន្ធអនឡាញ (Zoom)។ ក្នុងអង្គប្រជុំប្រចាំខែនោះផងដែរ ក៏មាន​ការ​ឡើងធ្វើ​បទ​អន្តរាគន៍​ពី​សំណាក់ប្រធានមន្ទីរធម្មការ និង​សាសនាស្តីពីការលានុវត្តន៍ភាពវិស័យសាសនា ​ក៏ដូចបញ្ហា​ប្រឈម​នានា​ជូន​អង្គប្រជុំដើម្បីបានដោះស្រាយ។បន្ទាប់ពីបានស្តាប់បទអន្តរាគន៍រួចមក ឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា មាន​ប្រសាសន៍​ថា ក្រសួងនឹងទទួលយកសំណើរ ​និងបញ្ហាប្រឈមនានា ​ដើម្បីដោះស្រាយ និងធ្វើ​របាយ​ការណ៍ជូន​ប្រមុខ​ដឹក​​នាំ​រាជរដ្ឋាភិបាល​កម្ពុជា​ និង​សូមឱ្យមន្ត្រីក្រោមឱវាទទាំងអស់ខិតខំបន្ត យកចិត្តទុក​ដាក់អនុវត្តការងារ​ដែល​រាជរដ្ឋាភិបាល ក្រសួង ​ក៏ដូច​អាជ្ញាធរ ខេត្ត ​ប្រគល់ជូន ជាពិសេសបន្តការអប់រំតាមបណ្តាវត្ត វិហារ ​ស្នាក់ការថ្វាយបង្គំ ស្តីពី​គ្រឿងញៀន និងវិធាន​ការ​ការពារ បង្ការ ទប់ស្កាត់ការរីករាលដាលនៃជំងឺកូវីដ-១៩ ​ជាពិសេស វីរុស​បំប្លែងខ្លួនថ្មី (អូមីក្រុង) ដែល​មានប្រភព​ចេញពីតំបន់អាហ្រ្វិកខាងត្បូង ​តាមការណែនាំរបស់រាជរដ្ឋាភិបាល និងក្រសួង​សុខាភិបាល ​ដោយបង្កើនការប្រុងប្រយ័ត្ន ​និងអនុវត្តនូវវិធានការ​ «៣ការពារ» និង «៣កុំ»៕អត្ថបទ រដ្ឋា

សហគមន៍អ្នកស្រលាញ់ភេទដូចគ្នាចង់មានច្បាប់រៀបការ ខណៈប្រធានសិទ្ធិមនុស្សកម្ពុជាគាំទ្រ

2021/12/10 06:52:32 am        1701
Facebook Telegram Linkin
ភ្នំពេញ៖ ស្របពេលថ្ងៃនេះ ជាទិវាសិទ្ធិមនុស្សអន្តរជាតិលើកទី ៧៣ អង្គការសហគមន៍ដែលគាំទ្រអ្នកស្រលាញ់ភេទដូចគ្នា ស្នើរាជរដ្ឋាភិបាលបង្កើតច្បាប់អាពាហ៍ពិពាហ៍ស្របច្បាប់ ដើម្បីកាត់បន្ថយការរើសអើងក្នុងសង្គម។ សំណើរនេះ ក៏ទទួលបានការគាំទ្រពីប្រធានគណៈកម្មាធិការសិទ្ធិមនុស្សកម្ពុជាផងដែរ។តាមយៈកិច្ចសម្ភាសន៍ជាមួយទូរទស្សន៍ BTV នៅថ្ងៃទី១០ ខែធ្នូ ឆ្នាំ២០២១ អ្នកនាង ជ័យ សុខដុម មន្រ្តីផ្នែកច្បាប់នៃអង្គការសហគមន៍ឥន្ធធនូ បានឲ្យដឹងថា មកដល់ពេលនេះអ្នកជុំវិញ​បញ្ហា​សិទ្ធិ​មនុស្ស ​ឬការរើសអើងនៃអ្នកស្រលាញ់ភេទដូចគ្នា បានកាត់បន្ថយតិចតួចនៅឡើយ ដោយ​សារ​បញ្ហា​ប្រឈម​សម្រាប់អ្នកស្រលាញ់ភេទដូចគ្នា ដែលកំពុងជួបប្រទះ គឺការមិនមានច្បាប់​អាពាហ៍​ពិពាហ៍​អនុញ្ញាតដើម្បីឲ្យពួកគេបង្កើតគ្រួសារដោយបញ្ជាក់មានជាសៀវភៅគ្រួសារឡើយ។អ្នកនាង បន្តថា ក្រៅពីនេះពាក់ព័ន្ធនឹងច្បាប់ស្មុំកូន ដើម្បីឲ្យកូនដែលពួកគេចិញ្ចឹម​មានសិទ្ធិពេញ​លេញ​ដែលបញ្ជាក់ជាឪពុក ឬម្តាយក៏ជាកត្តាប្រឈមផងដែរ។មន្រ្តីផ្នែកច្បាប់ អង្គការសហគមន៍ឥន្ធធនូរូបនេះ បញ្ជាក់ថា ​ដើម្បីដោះស្រាយបញ្ហាទាំងអស់នេះ រាជរដ្ឋាភិបាលគួរបង្កើតច្បាប់អាពាហ៍ពិពាហ៍ ដើម្បីឲ្យសង្គមកាន់តែកាត់បន្ថយការរើសអើង​ចំពោះ​អ្នកស្រលាញ់ភេទដូចគ្នា។ទន្ទឹមគ្នានោះ លោក សន នឿន សមាជិក អង្គការសហគមន៍ឥន្ធធនូ និងជាអ្នកស្រលាញ់ភេទដូចគ្នា បានលើកឡើងថា ការរស់នៅក្នុងសង្គមបច្ចុប្បន្នបានកាត់បន្ថយ​ការរើសអើង​មួយ​ចំនួន​ពី​សំណាក់​ប្រជាពលរដ្ឋ ប៉ុន្តែលោកទទូចដល់រាជរដ្ឋាភិបាលស្នើឲ្យបង្កើតច្បាប់​អាពាហ៍​ពិពាហ៍​ដែល​ជាដំណោះស្រាយជំរុញបញ្ហាអ្នកស្រលាញ់ភេទដូចគ្នា ឲ្យកាន់តែប្រសើរជាងមុន។ទាក់ទងនឹងបញ្ហានេះ នៅក្នុងកម្មវិធីស្តីពី ការបង្កើនកិច្ចការការពារផ្លូវច្បាប់​សម្រាប់ដៃគូអ្នក​ស្រឡាញ់​ភេទដូចគ្នា​នៅប្រទេសកម្ពុជា ​កាលពីថ្ងៃទី៩ ម្សិលមិញ​ ឯកឧត្តម កែវ រ៉េមី ប្រធាន​គណៈកម្មាធិការ​សិទ្ធិមនុស្សកម្ពុជា​ បានប្រកាសគាំទ្រឱ្យបង្កើតច្បាប់ ឬកែតម្រូវច្បាប់ធ្វើសំបុត្រ​អាពាហ៍ពិពាហ៍ស្របច្បាប់ជូនអ្នកស្រឡាញ់ភេទដូចគ្នា ​ខណៈអ្នកស្រឡាញ់ភេទដូចគ្នា កំពុង​ជួប​បញ្ហា​ប្រឈមជាច្រើន ​ពាក់ព័ន្ធនឹងការធ្វើឯកសារផ្សេងៗ។ប្រធានគណៈកម្មាធិការសិទ្ធិមនុស្សកម្ពុជា ក៏បានស្នើឱ្យបងប្អូនប្រជាពលរដ្ឋទូទៅ សូមកុំរើសអើស​អ្នកស្រឡាញ់ភេទដូចគ្នា ​ព្រោះអ្នកស្រឡាញ់ភេទដូចគ្នា ក៏ជា​មនុស្សដែលមានសិទ្ធិជ្រើសរើស​បុគ្គល​ដែលខ្លួន​ស្រឡាញ់ពេញចិត្ត​ដូចមនុស្សទូទៅដែរ៕អត្ថបទ សេក ឧត្តម 

សម្តេចតេជោ៖ សិទ្ធិសេរីភាព បានធ្វើឲ្យកម្ពុជារីកចម្រើនមកដល់សព្វថ្ងៃ

2021/12/10 12:52:43 pm        636
Facebook Telegram Linkin
ភ្នំពេញ៖ សម្ដេចតេជោ ហ៊ុន សែន បានថ្លែងសារថា បច្ចុប្បន្នសិទ្ធិសេរីភាព សម្រាប់ប្រជាពលរដ្ឋកម្ពុជា គឺមានពេញលេញហើយសិទ្ធិសេរីភាពនេះ បានធ្វើឲ្យកម្ពុជាកាន់តែរីកចម្រើនជឿនលឿនទៅមុខមកដល់សព្វថ្ងៃនេះ។ខណៈថ្ងៃនេះជាខួបលើកទី៧៣ នៃទិវាសិទ្ធិមនុស្សអន្តរជាតិ១០ ធ្នូ១៩៤៨-១០ ធ្នូ ២០២១ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានបង្ហោះសារនៅលើទំព័រសង្គម​ហ៊្វេសប៊ុក​ថា បច្ចុប្បន្នសិទ្ធិសេរីភាពគឺបានធ្វើឲ្យប្រជាពលរដ្ឋរស់នៅ និងប្រកបការងារតូចធំ ជ្រើសរើស​ជំនឿ​សាសនា និងសិទ្ធិបោះឆ្នោតជ្រើសតាំងមេដឹកនាំ​ ដែលខ្លួនពេញចិត្តដោយសេរី ហើយសិទ្ធិសេរីភាព ក៏បានធ្វើឲ្យកម្ពុជាកាន់ តែរីកចម្រើនជឿនលឿនទៅមុខ។សម្ដេចបានរំលឹកថា កាលពីប្រទេសកម្ពុជាឋិតក្នុងរបបប៉ុល ពត គឺប្រជាពលរដ្ឋ គ្មាន​សិទ្ធិសេរីភាព​អ្វីទាំងអស់ ​សូម្បីតែសិទ្ធិរស់រានមានជីវិត ​សិទ្ធិទទួលទានអាហារ ​សិទ្ធិពិនិត្យព្យាបាលជំងឺ សិទ្ធិ​ជំនឿសាសនា សិទ្ធិសិក្សាអប់រំ សិទ្ធិជ្រើសរើសតំណាង ​និងសិទ្ធិបញ្ចេញមតិ សិទ្ធិរៀប​អាពាហ៍ពិពាហ៍ និង​សិទ្ធិប្រកបការងារជាដើម ។ល។សម្តេចតេជោ បានបន្តថា របបប្រល័យពូជសាសន៍ប៉ុល ពត បានដកហូតសិទ្ធិសេរីភាពទាំងអស់ ហើយ​បាន​បង្ខំឱ្យពលរដ្ឋទាំងក្មេងចាស់ប្រុសស្រីធ្វើការហួសកម្លាំង ​ឈឺស្លាប់​ដោយគ្មានពេទ្យ និង​ថ្នាំព្យាបាល ព្រមទាំងបានបណ្ដាលឱ្យប្រជាពលរដ្ឋជាង ៣លាននាក់បានស្លាប់ ក្នុង​រយៈពេលតែ៣ឆ្នាំ ៨ខែ ២០ថ្ងៃ។សម្តេចតេជោ បានបញ្ជាក់ថា សិទ្ធិសេរីភាពរបស់កម្ពុជា​ ដែលមានដូចពេលបច្ចុប្បន្ននេះ គឺត្រូវ​បាន​រំដោះយកមកវិញនៅក្រោយពេលដែលរបបប្រល័យពូជសាសន៍ប៉ុល ពត ត្រូវបាន​វាយ​ផ្តួល​រំលំទាំង​ស្រុង​នៅថ្ងៃទី០៧ ខែមករា ឆ្នាំ១៩៧៩៕អត្ថបទ៖ មុត សុទ្ធ

កម្ពុជាមិនទាន់ទទួលអ្នកដំណើរអន្តរជាតិធ្វើ​ទិដ្ឋាការ​ពេលមកដល់ទេ ទោះបើកប្រទេសឡើងវិញក្តី

2021/12/10 05:25:10 am        455
Facebook Telegram Linkin
ភ្នំពេញ៖ ខណៈដែលរាជរដ្ឋាភិបាលកម្ពុជា បានធ្វើការបើកប្រទេសឡើងវិញនេះ សំគាល់ឃើញថា អ្នកដំណើរ និងភ្ញៀវទេសចរអន្តរជាតិ ចាប់ផ្តើមមានកម្រើកច្រើនធ្វើដំណើរចេញចូលប្រទេសកម្ពុជាច្រើន ខណៈមកដល់ពេលនេះ កម្ពុជា នៅមិនទាន់ប្រកាសបើកទទួលដំណើរអន្តរជាតិដែលតម្រូវអោយធ្វើ VISA ON ARRIVAL នៅឡើយទេ។បើតាមមន្ត្រីនៃក្រសួងទេសចរណ៍ បានថ្លែងប្រាប់BTV នៅថ្ងៃទី១០ ខែធ្នូនេះថា នៅពេលបច្ចុប្បន្ន នៅ​គ្រប់​បណ្តា​ច្រក​ទា្វរ​ព្រំដែនអន្តរជាតិទាំងផ្លូវអាកាស ផ្លូវគោក ​និងផ្លូវទឹកនានានៃទូទាំងប្រទេស គឺមិន​ទាន់​ប្រកាស​បើក​ទទួល​ធ្វើ VISA ON ARRIVAL ឬទទួលអ្នកដំណើរអន្តរជាតិ និងភ្ញៀវទេសចរ​អន្តរជាតិ​ធ្វើ​ទិដ្ឋាការ​ឆ្លងដែន​នៅពេល​គេមិន​ដល់​ច្រកទ្វារព្រំដែន​កម្ពុជានោះទេ ពោលគឺគ្រប់ពលរដ្ឋ​នៅតាមបណ្តាប្រទេស ​ដែលរាជរដ្ឋាភិបាលកម្ពុជាមិនបានផ្តល់​ការ​លើកលែង​ទិដ្ឋាការ គឺត្រូវ​ធ្វើ​ទិដ្ឋាការ​ចូលមកកម្ពុជានៅតាមបណ្តាស្ថាទូតកម្ពុជា​ប្រចាំ​នៅ​តាម​បណ្តា​ប្រទេស​សាមី​ជាមុនសិន ទើប​កម្ពុជាអនុញ្ញាតអោយឆ្លងដែនចូល។បើតាមឯកឧត្តម ថោង ខុន រដ្ឋមន្ត្រីក្រសួងទេសចរណ៍ នៅក្នុងកិច្ចប្រជុំអន្តរក្រសួងកាល​ពី​ពេលថ្មីៗ​នេះថា​ ក្នុង​អំឡុង​ពេលនេះ ​ប្រសិនបើកម្ពុជា ​ប្រកាសបើកទទួលអ្នកដំណើរអន្តរជាតិ និង​ទេសចរ​អន្តរជាតិធ្វើ Visa on Arrivalនេះ ចំនួនភ្ញៀវបរទេស នឹងមានសន្ទស្សន៍កើនឡើងខ្លាំងមកកម្ពុជា ប៉ុន្តែបញ្ហានេះ រាជរដ្ឋាភិបាល​កម្ពុជា​អនុញ្ញាត​អោយអ្នកដំណើរអន្តរជាតិធ្វើជា E- VISA ដើម្បីឆ្លងដែនមកវិញដែរ។ឯកឧត្តម ថោង ខុន បន្តថា តាមរយៈក្រសួងការបរទេស និងកិច្ចសហប្រតិបត្តិការអន្តរជាតិ បច្ចុប្បន្ន​កម្ពុជា បាន​បើក​អ្នកដំណើរអន្តរជាតិនៅក្នុងតំបន់អាស៊ានទាំងមូលដោយមិនបាច់ធ្វើទិដ្ឋាការនោះទេ ហើយក៏មាន​បណ្តា​ប្រទេស​នៅ​ក្រៅតំបន់ផ្សេងៗទៀតជាច្រើន ដែលបានចុះកិច្ចព្រមព្រៀង​ការ​លើក​លែង​ការ​ធ្វើ​ទិដ្ឋាការ​ជាមួយ​កម្ពុជា​កន្លង​មក ​ក៏យើងកម្ពុជាបានបើកទទួលចូលផងដែរ។បើតាមឯកឧត្តម គៀត ច័ន្ទថារិទ្ធ អគ្គនាយកអគ្គនាយកដ្ឋានអន្តរជាតិប្រវេសន៍​ក្រសួង​មហា​ផ្ទៃ​ថ្លែងថា ចាប់ពី​រាជរដ្ឋាភិបាលកម្ពុជា ​បានប្រកាសបើកទេសចរណ៍ និងបើកប្រទេសឡើងវិញមក បើគិតចាប់ថ្ងៃទី១ ដល់​ថ្ងៃទី៣០ ខែវិច្ឆិកា​ចុងក្រោយនេះមានអ្នកដំណើរនិងទេសចរអន្តរជាតិចេញ​ចូលកម្ពុជាសរុបជា ១២,២០០នាក់ ស្មើនឹង​ ៥៦​សញ្ជាតិ។ឯកឧត្តម បន្តថា នៅក្នុងចំណោមអ្នកដំណើរនិងភ្ញៀវទេសចរអន្តរជាតិ​ដែល​មកដល់​ព្រំដែនកម្ពុជា​នោះដែរ ​ក៏មាន​ដំណើរ​អន្តរជាតិជិត២០០នាក់​ ស្មើនឹង៣១សញ្ជាតិ ត្រូវបានមន្ត្រី​នគរបាល​អន្តោប្រវេសន៍​ជួរ​មុខ​យើង​ណែនាំ​អោយ​ត្រឡប់​ទៅ​ប្រទេស​ដើមវិញ ​ដោយសារ ការ​មិន​គោរពគោល​ការណ៍​លក្ខន្តិក​សុខាភិបាល ​និង​មិន​មាន​ទិដ្ឋាការ​ចូល​មក​កម្ពុជា៕អត្ថបទ៖ ស៊ុម សុខជា

ចិនហួសចិត្តចំពោះការលាបពណ៌ដដែលៗពីអាមេរិក មកលើកម្ពុជាទាក់ទងនឹងមូលដ្ឋានសមុទ្ររាម

2021/12/10 11:56:24 am        1636
Facebook Telegram Linkin
ភ្នំពេញ៖ មិត្តចិនបានសម្តែងការហួសចិត្ត និងជ្រេញចំពោះរដ្ឋាភិបាលអាមេរិក ដែលបានបន្តបង្ខូចឈ្មោះ លាបពណ៌មកលើប្រទេសកម្ពុជាច្រំដែលៗ ទាក់ទងនឹងទំនាក់ទំនងរវាងកម្ពុជានិងចិន ពិសេសការចោទប្រកាន់ អំពីវត្តមានកងទ័ពចិននៅកម្ពុជា។នៅក្នុងផេកហ្វេសប៊ុកផ្លូវការរបស់ស្ថានទូតចិនប្រចាំនៅកម្ពុជា នាយប់ថ្ងៃទី៩ ខែធ្នូនេះ បានលើក​ឡើងថា ក្រសួងពាណិជ្ជកម្មអាមេរិក បានប្រកាសថា «អាមេរិក នឹងបន្ថែមវិធានការកំណត់ថ្មី​ឡើង​វិញ​លើការនាំចេញនូវប្រភេទទំនិញរសើបរបស់ខ្លួនមកកាន់កម្ពុជា និងព្រមទាំងមានការ​ហាមឃាត់​លក់អាវុធ ​និងសម្ភារយោធាដល់កម្ពុជា» ដោយក្រោមហេតុផលថា មានអំពើរំលោភបំពាន​សិទ្ធិ​មនុស្ស អំពើពុករលួយ និង​ការអនុញ្ញាត​បង្កើនវត្តមាន​យោធាចិនក្នុងប្រទេសកម្ពុជាជាដើម។ចិន បានហៅការគំរាមកំហែងដាក់សម្ពាធ ​និងការដាក់ទណ្ឌកម្មមកលើកម្ពុជានេះ ថាជាទង្វើដែល​ប្រើ​អំណាចកៀប​សង្កត់​លើអ្នកដទៃយ៉ាងពិតប្រាកដ និងច្បាស់លាស់ ហើយបានល្មើសនឹងក្រម​ប្រតិបត្តិ​មូល​ដ្ឋាន នៃទំនាក់ទំនងអន្តរជាតិផងដែរ។ផេកហ្វេសប៊ុកដដែល បានបញ្ជាក់ថា អ្នកនាំពាក្យក្រសួងការបរទេសចិន បានលើកឡើងថា ថ្មីៗនេះ អាមេរិក បន្តបង្ខូចឈ្មោះ ​និងលាបពណ៌លើទំនាក់ទំនង ​និងកិច្ចសហប្រតិបត្តិការរវាងចិន​ និងកម្ពុជា គំរាមកំហែងដាក់សម្ពាធ​ និងការដាក់ទណ្ឌកម្មមកលើកម្ពុជា។ នេះគឺជាទង្វើ ដែលប្រើអំណាចកៀប​សង្កត់​លើអ្នកដទៃយ៉ាងពិតប្រាកដ និងច្បាស់លាស់។ ​ទង្វើនេះ​ បានល្មើសនឹងក្រមប្រតិបត្តិមូលដ្ឋាន នៃទំនាក់ទំនងអន្តរជាតិផងដែរ។ ​ភាគីចិន ​ប្រឆាំងជាដាច់ខាតចំពោះទង្វើបែបនេះ»។ប្រភពដដែលបានលើកឡើងទៀតថា ចិន និងកម្ពុជា គឺជាដៃគូកិច្ចសហប្រតិបត្តិការយុទ្ធ​សាស្ត្រ​គ្រប់​ជ្រុងជ្រោយ ជាមិត្តដែកថែប និងជាសហគមន៍វាសនារួម។ ចំណងមិត្តភាពជាប្រពៃណី នៃ​ប្រទេស​ទាំងពីរ ឆ្លងកាត់ការសាកល្បងតាមគ្រប់រូបភាព ធ្វើឱ្យកាន់តែរឹងមាំ មិនអាចបំបែកបាន។ គំនិតអាក្រក់ប៉ុនប៉ងរបស់អាមេរិកលើទំនាក់ទំនងចិន ​និងកម្ពុជា​ នឹងទទួលបរាជ័យ ខណៈភាគីចិន គាំទ្រកម្ពុជាយ៉ាងម៉ឺងម៉ាត់ ​ក្នុងការការពារអធិបតេយ្យភាពជាតិ ​និងសេចក្តីថ្លៃថ្នូរនៃជាតិ និង​គាំទ្រ​ឈរជាមួយប្រជាជនកម្ពុជាជារៀងរហូត៕អត្ថបទ៖ បាន ចក់

ឧត្តមសេនីយ៍ឯក ហ៊ុន ម៉ាណែត ផ្ញើសារ​រំលែក​ទុក្ខ​ជូនចំពោះការស្លាប់របស់អគ្គមេបញ្ជាការកងទ័ព នៃសាធារណរដ្ឋឥណ្ឌា

2021/12/10 11:16:32 am        439
Facebook Telegram Linkin
ភ្នំពេញ៖ នៅថ្ងៃទី០៩ខែធ្នូ ឆ្នាំ២០២១នេះ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង មេបញ្ជាការកងទ័ពជើងគោក បានផ្ញើសាររំលែកទុក្ខជូនចំពោះគ្រួសារសព ព្រមទាំងកងទ័ព និងប្រជាជនឥណ្ឌា ចំពោះការស្លាប់របស់ឯកឧត្តមនាយឧត្តមសេនីយ៍ Bipin Rawat អគ្គមេបញ្ជាការកងទ័ពឥណ្ឌា រួមជាមួយនឹងភរិយារបស់គាត់ ក៏ដូចជានាយទាហានអមដំណើរចំនួន ១១ រូបផ្សេងៗទៀត នៅក្នុងឧបទ្ទវហេតុធ្លាក់ឧទ្ធម្ភាគចក្រនៅក្នុងរដ្ឋ Namil Nadu។យោងតាមលិខិតនេះ ឯកឧត្តម ឧត្តមសេនីយ៍ឯក ហ៊ុន ម៉ាណែត ​បានលើកឡើងអំពីភក្តីភាព និងវីរភាពរបស់សពឯកឧត្តម នាយឧត្តមសេនីយ៍ Bipin Rawat និងនាយទាហានទាំង ១១ រូប នៅក្នុងការបំពេញភារកិច្ចបម្រើជាតិ ហើយការស្លាប់ដ៏អកុសលនេះ ​គឺជាការបាត់បង់មួយដ៏ធំធេង​របស់​កងទ័ព និងប្រជាជនឥណ្ឌា។ ទន្ទឹមនឹងនេះ ឯកឧត្តម ឧត្តមសេនីយ៍ឯក ហ៊ុន ម៉ាណែត ក៏បាន​រំឭក​ផងដែរអំពីកិច្ចខិតខំប្រឹងប្រែង​របស់សពឯកឧត្តមនាយឧត្តមសេនីយ៍ Bipin Rawat នៅក្នុងការជំរុញ និងលើកកម្ពស់ទំនាក់ទំនង​កិច្ច​សហប្រតិបត្តិការរវាងកងទ័ពជើងគោក នៃប្រទេសទាំងពីរ។ ក្នុងនោះ​ឯកឧត្តមឧត្តមសេនីយ៍ ហ៊ុន ម៉ាណែត ធ្លាប់ត្រូវបានអញ្ជើញទៅបំពេញទស្សនកិច្ច​ការងារ​នៅ​សាធារណរដ្ឋឥណ្ឌា ​កាលពីខែមេសា ឆ្នាំ២០២០ ​កន្លងទៅ ប៉ុន្តែត្រូវ​អាក់ខាន​វិញ​ដោយសារ​បញ្ហា​ជំងឺកូវីដ-១៩ ហើយគ្រោងនឹងរៀបចំឡើងវិញនៅក្នុងឆ្នាំ២០២២ ខាងមុខនេះ៕

ក្រសួងពាណិជ្ជកម្ម បញ្ចប់ការពិភាក្សាសេចក្តីព្រាងច្បាប់ស្តីពីវិធានពាណិជ្ជកម្ម​និង​សហគ្រាស​ពាណិជ្ជកម្ម

2021/12/09 04:41:13 pm        347
Facebook Telegram Linkin
ភ្នំពេញ៖ សេចក្តីព្រាងច្បាប់ស្តីពីវិសោធនកម្មច្បាប់ស្ដីពីវិធានពាណិជ្ជកម្ម និងបញ្ជីពាណិជ្ជកម្ម និង​សេចក្តីព្រាងច្បាប់ស្តីពីវិសោធនកម្មច្បាប់ ស្តីពីសហគ្រាសពាណិជ្ជកម្ម ត្រូវបានពិភាក្សាចប់ជា​ស្ថាពរ។ ក្រសួងពាណិជ្ជកម្មគ្រោងដាក់សេចក្តីព្រាងច្បាប់ទាំងពីរនេះ ជូន​អង្គប្រជុំ​គណៈរដ្ឋមន្ត្រី​ផ្តល់​ការអនុម័តយល់ព្រម។ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មតំណាង ឯកឧត្តម ប៉ាន សូរស័ក្តិ រដ្ឋមន្ត្រី​ក្រសួងពាណិជ្ជកម្ម បានដឹកនាំក្រុមការងារជំនាញនៃក្រសួងពាណិជ្ជកម្មចូលរួមកិច្ចប្រជុំ រយៈពេល​ពីរថ្ងៃ ចាប់ពីថ្ងៃទី៧ ដល់ទី៨ ខែធ្នូ ដើម្បីពិនិត្យលើសេចក្តីព្រាងច្បាប់ស្តីពីវិសោធនកម្មច្បាប់​ស្ដីពី​វិធានពាណិជ្ជកម្មនិងបញ្ជីពាណិជ្ជកម្ម និងសេចក្តីព្រាងច្បាប់ស្តីពីវិសោធនកម្មច្បាប់​ស្តីពី​សហគ្រាស​ពាណិជ្ជកម្ម ​តាមរយៈប្រព័ន្ធវីដេអូ។កិច្ចប្រជុំពិភាក្សានេះ បានចូលរួមដោយតំណាងក្រុមប្រឹក្សាអ្នកច្បាប់ ​ដែលដឹកនាំដោយ ឯកឧត្តម អ៊ុត ស៊ីណាត អគ្គលេខាធិការរងនៃក្រុមប្រឹក្សាអ្នកច្បាប់ ​និងមានការចូលរួមពីមន្ត្រីនៃទីស្តី​ការ​គណៈរដ្ឋមន្ត្រីនិងអ្នកច្បាប់។ជាលទ្ធផលអង្គប្រជុំបានឯកភាពទាំងស្រុងលើសេចក្តីព្រាងនៃឯកសារខាងលើ និងរៀបចំ​បន្ត​នីតិវិធី​តាម​ការចាំបាច់។អង្គប្រជុំបានពិភាក្សាលើនីតិវិធីបែបបទ ​និងសេចក្តីព្រាងច្បាប់ ព្រមទាំងសេចក្តីថ្លែងហេតុ សម្រាប់​ដាក់​ជូនអង្គប្រជុំគណៈរដ្ឋមន្ត្រីផ្តល់ការអនុម័តយល់ព្រម ដែលគ្រោងធ្វើនៅថ្ងៃទី១៦ ខែធ្នូ ឆ្នាំ២០២១ ខាងមុខនេះ ដើម្បីសុំការពិនិត្យនិងអនុម័តពីរដ្ឋសភា និងព្រឹទ្ធសភា។ឯកឧត្តមរដ្ឋលេខាធិការ បានថ្លែងអំណរគុណដល់​តំណាង​ក្រុម​ប្រឹក្សាអ្នកច្បាប់​ដែលបាន​ចំណាយ​ពេលវេលា​ចូលរួ​ម​កិច្ចប្រជុំពិនិត្យ ​និងកែសម្រួល​លើសេចក្តីព្រាងច្បាប់​ស្តីពីវិសោធនកម្ម​ច្បាប់​ទាំងពីរនេះ ​និងសេចក្តីថ្លែងហេតុឱ្យកាន់តែមានភាពល្អប្រសើរបន្ថែមទៀត៕អត្ថបទ៖ វណ្ណៈ

ដីរដ្ឋជាង១០០ហិកតា ត្រូវបានអតីតសមាជិកក្រុមប្រឹក្សាសង្កាត់អូរស្មាច់ និង​បក្ស​ពួក​ឃុបឃិត កាប់ទន្ទ្រានលក់ជាបន្ដបន្ទាប់ រហូតកើតមានរឿងប្ដឹងផ្ដល់ជាមួយពលរដ្ឋ

2021/12/09 08:32:21 am        1373
Facebook Telegram Linkin
ឧត្តរមានជ័យ៖ ដីរដ្ឋជាង១០០ហិកតា ដែលមានទីតាំងនៅចំណុចអូរពី ភ្នំគីងគួក ក្នុងភូមិរួតចំប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ បច្ចុប្បន្ននេះ​ ត្រូវ​បាន​អតីត​សមាជិក​ក្រុមប្រឹក្សា​សង្កាត់​អូរស្មាច់​រួមទាំង​បក្សពួក​កំពុង​តែ​ចូល​កាប់​ទន្ទ្រានដីបោះបង្គោល​ព្រំដីចែកគ្នា​លក់ជាបន្ដបន្ទាប់ រហូត​កើត​មាន​ជម្លោះ​ប្តឹង​ផ្តល់​ពលរដ្ឋ​ទៅ​ប្រព័ន្ធតុលាការផងដែរ។ប្រជាពលរដ្ឋរស់នៅភូមិរួតចំប៉ី សង្កាត់អូរស្មាច់ បានបញ្ជាក់និងអះអាងថា ដីនៅតំបន់នេះលោក បានមកកាប់គាស់​និង​អាស្រ័យ​ផល​ដាំដំណាំ ចេក តាំងពីឆ្នាំ២០០២មកម្ល៉េះ ស្រាប់តែមក​ដល់​ពេល​នេះ​ លេចលឺថា​ដី​នៅតំបន់នេះ​មានតំម្លៃ ឃើញ​មានឈ្មោះ ពៅ ជាយោធាភូមិភាគទី៤ និងឈ្មោះ និត សុវណ្ណារ៉ា ​ជា​អតីត​សមាជិក​ក្រុម​ប្រឹក្សា​សង្កាត់​អូរស្មាច់​ យកត្រាក់ទ័រ មក​ឈូក​ឆាយ​កាប់ទន្ទ្រានដីព្រៃ​ និងបោះបង្គោលព្រំរបង ​រំលោភមកលើដីពួកគាត់តែម្តង។ប្រជាពលរដ្ឋ បានបន្ដទៀតថា ក្រុមពួកនេះ តែងតែដើរទន្ទ្រានកាប់ដីព្រៃម្ដុំនេះ លក់ជាបន្ដបន្ទាប់ មិន​មាន​អាជ្ញាធរ និងមន្ដ្រីជំនាញណាមួយទៅហាមឃាត់នោះទេ ​។​ដូច្នេះ​ពាក់ព័ន្ធ​បញ្ហា​ប្រជាពលរដ្ឋ បាន​សំណូម​ពរ​ទៅ​អាជ្ញាធរខេត្ត​ឯកឧត្តម ​ប៉ែន កុសល្យ ​អភិបាល នៃគណៈអភិបាលខេត្ត​ឧត្តរមានជ័យ ​និង​មន្ត្រី​ជំនាញ​ពាក់ព័ន្ធ ​សូម​មេត្តាចុះស្រាវជ្រាវ​ស៊ើប​អង្កេត​ទៅ​លើ​ក្រុមបក្សពួកនេះ​ឲ្យបាន​ម៉ត់ចត់​ ជៀសវាង​ក្រុមបក្សពួកនេះ​ដើរ​ទន្ទ្រាន ​តាម​តែ​អំពើ​ចិត្ត​យ៉ាង​ដូច្នេះ។ពាក់ព័ន្ធការទន្ទ្រានដីរដ្ឋពីបក្សពួកក្រុមនេះ លោក និត សុវណ្ណារ៉ា​ ដែល​ជា​អតីត​ក្រុម​ប្រឹក្សា​សង្កាត់អូរស្មាច់ ​បានអះអាងថា ដីនៅតំបន់ទីនេះ​ជា​ដី​របស់​គាត់​ មាន​​ការទទួល​ស្គាល់​ពី​អតីត​ចៅ​សង្កាត់​ចាស់ ​ផេម សំអាត ។ពាក់ព័ន្ធករណីដីធ្លីខាងលើនេះ ដែរ លោក អ៊ុក ប៊ុនហេង ចៅសង្កាត់អូរស្មាច់ បច្ចុប្បន្ន បានបញ្ជាក់ប្រាប់ថា ភាគីជម្លោះដីធ្លី នៅតំបន់អូរពីរ ភ្នំគីងគួកនេះ​ខាងអាជ្ញាធរសង្កាត់​បាន​ចុះ​ហាមឃាត់​ជាច្រើនលើកច្រើនសារ ​ក៏ប៉ុន្តែពលរដ្ឋ ​នឹងយោធា រួមទាំងអតីតសមាជិកក្រុមប្រឹក្សា​សង្កាត់ ​នៅតែចូលទៅកាប់ទន្ទ្រាន ​បោះបង្គោលរបង​ហ៊ុមព័ទ្ធ​ដីនៅតំបន់ នេះរហូត​ដល់​មានជម្លោះឈ្លោះប្រកែកគ្នា​ ឈាន​ដល់ការប្តឹងផ្តល់គ្នាទៅតុលាការ។លោក បញ្ជាក់ថា ក្នុងនាមលោកជាអាជ្ញាធរសង្កាត់បាន ដាក់​រាយការណ៍​ជូន​អាជ្ញាធរក្រុង​នឹងមន្ទីរកសិកម្មរុក្ខាប្រមាញ់ និងនេសាទខេត្តរួចរាល់ហើយ​ដីនៅតំបន់នេះ​ជាដី​របស់រដ្ឋជាង ១០០​ហិកតា ជាប្រភេទដីចំណីអូរ បឹង ជ្រោះ ភ្នំ និង​ដីសហគមន៍ផងដែរ​ មិន​មានអាជ្ញាធរណាម្នាក់ មាន​សិទ្ធចេញប័ណ្ណកម្មសិទ្ធិដីធ្លីបាននោះទេ។គួរបញ្ជាក់ផងដែរថា បុគ្គលដែលហ៊ានចេញប្លង់ដីនៅតំបន់ខាងលើនេះ​គឺ​លោក និត សុវណ្ណារ៉ា អតីតនៅមានតួនាទីជាមេភូមិ និងចៅសង្កាត់រងទី១​ ក្នុង​ជំនាន់លោក ផេម សំអាត នៅជាចៅសង្កាត់ ហើយ​បច្ចុប្បន្នចូលនិវត្តន៍ ​ចេញ​ប្លង់​ឲ្យបក្សពួក ​និងគ្រួសាររបស់ខ្លួន និត ម៉ារ៉ាឌី ​មានដីទំហំ ៥០២៤០ ម៉ែត្រក្រឡា) ,មានឈ្មោះ សេង សុគន្ធា មានទំហំទទឹង១០០ម៉ែត្រ និង​បណ្ដោយ ៥០០ម៉ែត្រ មាន​ចុះ​ទទួលស្គាល់ដោយលោក និត សុវណ្ណារ៉ា នេះតែម្ដង និងមានឈ្មោះ និត សុវណ្ណារ៉ា ​ខ្លួនឯង​មិន​ដាក់​បណ្ដោយ​ទទឹង​ដាក់ទំហំសរុប ១៣៣២៥០ ម៉ែត្រក្រឡា ទៅលើដីរដ្ឋ​ដែលអ្នកផ្សេងគេធ្វើអត់បាន តែក្រុមគាត់ធ្វើបាន (ប្លង់គូសដោយដៃ គ្មានការទទួលស្គាល់ពីមន្ទីរជំនាញ)៕រូបលោក និត សុវណ្ណារ៉ា

ព្រឹតិ្តការណ៍វប្បធម៌ នឹងប្រារព្ធពិធីអបអរទីក្រុងសៀមរាបវប្បធម៌អាស៊ាន នៅថ្ងៃស្អែកនេះ

2021/12/09 12:36:19 pm        582
Facebook Telegram Linkin
ភ្នំពេញ៖ ក្រសួងវប្បធម៌ និងវិចិត្រសិល្បៈ នឹងរៀបចំព្រឹតិ្តការណ៍វប្បធម៌ជាច្រើន ទាំងនៅរាជធានីភ្នំពេញ និងនៅខេត្តសៀមរាប នាថ្ងៃទី១០ ខែធ្នូ ឆ្នាំ២០២១ស្អែកនេះ ដើម្បីអបអរសាទរទីក្រុងសៀមរាប ជាទីក្រុងវប្បធម៌អាស៊ាន។បើតាមលោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម នៃក្រសួងវប្បធម៌ និងវិចិត្រសិល្បៈ បានប្រាប់BTV ព័ត៌មាន នាព្រឹកថ្ងៃទី៩ ខែធ្នូ ឆ្នាំ២០២១នេះថា សម្រាប់​កម្មវិធី​ប្រារព្ធឡើង​នាថ្ងៃស្អែកនេះ​ គឺ​ដើម្បី​អបអរសាទរ​ការ​ដាក់​បញ្ចូល​ទីក្រុងសៀមរាប ជា​ទីក្រុង​វប្បធម៌អាស៊ាន។ សកម្មភាពនេះ​ប្រារព្ធឡើងចំនួន ២ទីកន្លែង គឺ​នៅ​រាជធានីភ្នំពេញ និង​ខេត្តសៀមរាប។ ដោយឡែកនៅរាជធានីភ្នំពេញ ប្រារព្ធឡើង២សកម្មភាព (សិក្ខាសាលា​ពិគ្រោះ​យោបល់​ស្តីពី​សិល្បៈសហសម័យ​នៅកម្ពុជា ​និងការ​តាំង​ពិព័រណ៍​ស្នាដៃសិល្បៈសហសម័យរបស់សិល្បករ) រីឯ​នៅទីក្រុង​សៀ​មរាប មានសកម្មភាពជាច្រើន​ ដូចជា ​ការតាំងពិព័រណ៍សិល្បៈតម្បាញសូត្រ, ពិព័រណ៍​សិល្បៈគំនូរបុរាណ ស្តីពី​ព្រះពុទ្ធ​គង់​លើ​នាគមុចលិន្ទ, មហោស្រព និងពិព័រណ៍​ម្ហូបអាហារ​សហគមន៍, បង្ហោះខ្លែងឯក និងពិព័រណ៍សិល្បៈសិប្បកម្មផ្សេងៗ ព្រមទាំងមាន​អង្គការ​សមាគម​ជាច្រើន ​បានចូលរួមក្នុងព្រឹតិ្តការណ៍នេះផងដែរ​ ដូចជា​សមាគមកាហ្វេ ​បានចូលរួមរៀប​ចំ​ការ​រចនា និង​សម្តែងតាមដងផ្លូវ​ រួមមានសៀក ​និងគំនូរ​ជូនមហាជនបានទស្សនា។ តាមរយៈព្រឹតិ្តការណ៍វប្បធម៌ ​អបអរសាទរទីក្រុងសៀមរាប ​ជាទីក្រុងវប្បធម៌អាស៊ាន សម្រាប់​ឆ្នាំ២០២០-២០២២​នេះ លោក ឈឹម សុធី ​ក៏បានអំពាវនាវដល់យុវជន ​និងមហាជនទាំងអស់ សូម​អញ្ជើញ​ចូលរួមឲ្យបានច្រើន ប៉ុន្តែ​សូម​ចូល​រួម​ដោយ​អនុវត្តវិធានការរបស់ក្រសួងសុខាភិបាល គឺ៣កុំ ៣ការពារ ​ទន្ទឹមនឹងនោះក្រុមការងារ ​ក៏មានដាក់ឧបករណ៍​អនាម័យ​ដូចជាម៉ាស់ ​អាល់កុល និងជែល រួមទាំង​ម៉ាស៊ីនវ៉ាស់កម្តៅទាំងអស់នេះ ​នៅផ្នែកខាងក្រៅ​ មុនចូលមកក្នុង​ទី​កន្លែង​នៃកម្មវិធី ដើម្បី​ការពារទាំងអស់គ្នា។ បើទោះបីជាមេរោគកូវីដ-១៩ ​បានធូរស្រាលបន្តិចមែន​ ហើយមានមេរោគកូវីដ-១៩ ​បំប្លែងថ្មី ប៉ុន្តែយើង​ត្រូវប្រយ័ត្នប្រយែងបន្ថែមទៀត ​ហើយសម្រាប់ការតាំងពិព័រណ៍នេះ ​នឹងបើកជូនមហាជន សិស្សានុសិស្សឲ្យចូលមកទស្សនាដោយសេរី រយៈពេល១ខែ​ ចាប់ពីថ្ងៃទី១០ ខែធ្នូ ឆ្នាំ២០២១ រហូតដល់ថ្ងៃទី១០ ខែមករា ឆ្នាំ២០២២៕អត្ថបទ៖ រដ្ឋា

បណ្ដាញសង្គម

ព័ត៌មានថ្មីៗ

UNICEF ៖ សង្រ្គាមអ៊ីរ៉ង់គំរាមកំហែងដល់ការចែកចាយគ្រឿងផ្គត់ផ្គង់សង្រ្គោះជីវិតកុមារ
06/02/2026 08:06 PM
Facebook Telegram Linkin
ក្រុមហ៊ុន Moderna និងក្រុមហ៊ុនផ្សេងទៀត ទទួលបានប្រាក់ ៦០លានដុល្លារ ដើម្បីផលិតវ៉ាក់សាំងបង្ការជំងឺអេបូឡា
06/02/2026 08:06 PM
Facebook Telegram Linkin
កូដកម្មរថភ្លើងក្រោមដីធ្វើឲ្យប៉ះពាល់ដល់អ្នកដំណើរនៅទីក្រុងឡុងដ្រ៍ ចក្រភពអង់គ្លេស
06/02/2026 08:06 PM
Facebook Telegram Linkin
របាយការណ៍៖ EU ពិចារណាដាក់ទណ្ឌកម្មរដ្ឋមន្ត្រីអ៊ីស្រាអែល ជុំវិញ​​ការប្រព្រឹត្តិ ចំពោះ​នាវាមនុស្ស​ធម៌ឆ្ពោះ​ទៅ​ហ្កាហ្សា
06/02/2026 08:06 PM
Facebook Telegram Linkin
WHO៖ ករណីសង្ស័យជំងឺ Ebola ធ្លាក់ចុះ ក្រោយ​មនុស្សរាប់រយនាក់​ត្រូវបាន​ដក​ចេញ
06/02/2026 08:06 PM
Facebook Telegram Linkin
ប្រធានគ្លីនិករងការខូចខាតដោយសារការវាយប្រហាររុស្ស៊ីនិយាយថា ទីក្រុងមូស្គូ មិនចង់បញ្ចប់សង្រ្គាមនោះទេ
06/02/2026 08:06 PM
Facebook Telegram Linkin
អគ្គិភ័យដ៏ធំមួយ បានឆាបឆេះផ្សារមួយកន្លែងស្ថិតក្នុងទីក្រុងហ្សាកាតា ប្រទេសឥណ្ឌូនេស៊ី
06/02/2026 07:06 PM
Facebook Telegram Linkin
មនុស្សយ៉ាង​តិច​ ១៥នាក់រងរបួស ដោយសារ​ព្យុះនៅជប៉ុន ខណៈ​មាន​ការអំពាវនាវឲ្យ​ជម្លៀស
06/02/2026 07:06 PM
Facebook Telegram Linkin
លោក Trump ថាលោកបាននិយាយជាមួយក្រុមហេសបូឡា តាមរយៈអន្តរការី
06/02/2026 07:06 PM
Facebook Telegram Linkin
លោក Netanyahu ប្រាប់លោក Trump ថា អ៊ីស្រាអែលនឹងវាយប្រហារទីក្រុងបេរូត បើសិនការវាយប្រហាររបស់ក្រុមហេសបូឡានៅតែបន្ត
06/02/2026 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.