BTV NEWS

ការដោះដូរពាណិជ្ជកម្មជាមួយ RCEP មានទឹកប្រាក់សរុបជាង ១១ពាន់លានដុល្លារ កើនជាង ១៨%

គណៈកម្មាធិការវិនិយោគ ពិនិត្យសំណើសុំចុះបញ្ជីចំនួនគម្រោងវិនិយោគចំនួន ៨ មានទុន ៤៩០លានដុល្លារ

ក្នុងត្រីមាសទី១ ឆ្នាំ២០២៦ កម្ពុជានាំចេញមុខទំនិញស្ទើរគ្រប់ប្រភេទមានកំណើនកើនឡើងល្អប្រសើរ

ត្រីមាសទី១ឆ្នាំនេះ CDC ចុះបញ្ជីគម្រោងវិនិយោគចំនួន ១៤៦ មានទុនប្រមាណ ២,៥ ប៊ីលានដុល្លារ

សេដ្ឋកិច្ច និង កសិកម្ម

ធុរជនត្រូវពង្រីក និងពង្រឹងសមត្ថភាពក្នុងការផលិត ដើម្បីទាញយកអត្ថប្រយោជន៍ពីទីផ្សារកូរ៉េ

ភ្នំពេញ៖ មន្រ្តីជាន់ខ្ពស់ក្រសួងពាណិជ្ជកម្ម អំពាវនាដល់ធុរជនក្នុងស្រុក ត្រូវខិតខំប្រឹងប្រែងផលិតទំនិញប្រកដោយគុណភាព ដើម្បីទាញយកអត្ថប្រយោជន៍ឱ្យបានជាអតិបរិមា នៃកិច្ចព្រមព្រៀងពាណិជ្ជកម្មសេរីរវាកម្ពុជា-កូរ៉េ ដែលនឹងចូលធរមានក្នុងពេលឆាប់ៗ ។ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV ថា កម្ពុជាសម្រេចបានជោគជ័យលើកិច្ចព្រមព្រៀងពាណិជ្ជកម្មសេរី ដោយបានផ្តល់អត្ថប្រយោជន៍ជាច្រើនដល់ធុរជនក្នុងស្រុក ក្នុងនោះមានកិច្ចព្រមព្រៀងពាណិជ្ជកម្មសេរីទ្វេភាគីជាមួយចិន កិច្ចព្រមព្រៀងអាសិប និងកិច្ចព្រមព្រៀងពាណិជ្ជកម្មសេរីជាមួយកូរ៉េ ដែលត្រៀមចូលជាធរមាននៅថ្ងៃទី១ ខែ ធ្នូ ឆ្នំា ២០២២ ខាងមុខ។ឯកឧត្តម បន្តថា ការបើកទីផ្សារនីមួយៗ និងផ្តល់អត្ថប្រយោជន៍ដល់ធុរជនក្នុងស្រុកកាន់តែច្រើនបន្ថែមទៀត តែទោះជាយ៉ាងនេះក្តី ធុរជនដែលជាអ្នកនាំចេញ ត្រូវតែខិតខំប្រឹងប្រែង ទាញយកអត្ថប្រយោជន៍ឱ្យបានជាអតិបរិមា និងត្រូវស្វែងយល់ពីឯកសាររវាងកិច្ចព្រមព្រៀងនេះ និងខិតខំផលិតទំនិញឱ្យមានគុណភាពខ្ពស់ ដើម្បីឆ្លើយតតម្រូវការទីផ្សារ ខណៈការនាំចេញទៅប្រទេសមួយនេះ ទាមទារនូវលក្ខណៈតម្រូវមានស្តង់ដារខ្ពស់។ធុរជនត្រូវជំរុញការផលិតឲ្យបានជាបរិមាណប្រកបដោយនិរន្តរភាព ដើម្បីធ្វើឱ្យប្រទេសកម្ពុជាក្លាយជាប្រភពមួយ នៃចំណែកមួយក្នុងខ្សែសង្វាក់ផ្គត់ផ្គង់ទីផ្សារសកល។ឯកឧត្តម បញ្ជាក់បន្ថែមថា បន្ទាប់ពីកម្ពុជាបានអនុវត្តនៅកិច្ចព្រមព្រៀងពាណិជ្ជកម្មសេរីចំនួនពីរ មានកិច្ចព្រមព្រៀងពាណិជ្ជកម្មសេរីកម្ពុជាជាមួយចិន និងកិច្ចព្រមព្រៀងភាពជាដៃគូថ្នាក់តំបន់គ្រប់ជ្រុងជ្រោយអាសិបរួចមក ឃើញថាកំណើនៃការនាំចេញរបស់កម្ពុជាទៅទីផ្សារអាសិប ក្នុងនោះមានទីផ្សារចិន កូរ៉េ ជប៉ុន អូស្ត្រាលី ណូវេហ្សេឡង់ជាដើម ឃើញថា មានកំណើនគួរឱ្យកត់សម្គាល់ ។ លើសពីនេះក្តីរំពឹងធំរបស់កម្ពុជា ទីផ្សារចិន គឺជាទីផ្សារធំមួយ ដែលស្រូបយកមុខទំនិញ ទំាងទំនិញចំណីអាហារ និងទំនិញកែច្នៃ រួមទំាងទំនិញវាយនភណ្ឌ ។ ចំណែកទីផ្សារកូរ៉េ ដែលកិច្ចព្រមព្រៀងពាណិជ្ជកម្មសេរីទ្វេភាគី នឹងចូលជាធរមានក្នុងពេលខាងមុខនេះ ធ្វើឱ្យកម្ពុជារំពឹងថា ការនាំចេញទំនិញទៅទីផ្សារកូរ៉េ នឹងនាំទៅទំាងផលិតផលសំលៀកបំពាក់ ស្បែកជើង កង់ កាបូបសម្រាប់ធ្វើដំណើរ និងផលិតផលកសិកម្មផងដែរ៕អត្ថបទ៖ សុន រ៉ាឌី

World Bank៖ ជំងឺរាតត្បាត បំផ្លាញវឌ្ឍនភាពរបស់កម្ពុជា ក្នុងការកាត់បន្ថយភាពក្រីក្រ

ភ្នំពេញ៖ របាយការណ៍មួយដែលចេញផ្សាយដោយធនាគារពិភពលោក ដែលBTV ទទួលនៅថ្ងៃទី២៨ ខែវិច្ឆិកានេះបង្ហាញថា អត្រាភាពក្រីក្រនៅកម្ពុជា បានធ្លាក់ចុះសឹងតែពាក់កណ្តាលក្នុងចន្លោះឆ្នាំ២០០៩ និងឆ្នាំ២០១៩ ប៉ុន្តែដោយការរាតត្បាតជំងឺកូវីដ-១៩ បានធ្វើឱ្យអត្រាភាពក្រីក្រនេះបានកើនឡើងវិញក្នុងពេលថ្មីៗនេះ។ របាយការណ៍វាយតម្លៃភាពក្រីក្រក្រោមចំណងជើង “ស្តារសេដ្ឋកិច្ចកម្ពុជាឱ្យកាន់តែមានភាពបរិយាបន្ននិងភាពធន់ជាងមុន” របស់ធនាគារពិភពលោក បានឱ្យដឹងថា នៅក្នុងរយៈពេល១០ឆ្នាំ គិតមកដល់ឆ្នាំ២០១៩/២០២០ អត្រាភាពក្រីក្ររបស់កម្ពុជាបានធ្លាក់ចុះពីកម្រិត ៣៣,៨% មកនៅត្រឹម ១៧,៨% ដោយជួយឱ្យប្រជាជនកម្ពុជាជិត ២លាននាក់បានរួចផុតពីភាពក្រីក្រ។ ប៉ុន្តែ ចាប់តាំងពីឆ្នាំ២០២០មក អត្រានេះបានកើនឡើង ២,៨ភាគរយ ដែលមានន័យថា ប្រជាជនប្រហែល ៤៦០ ០០០នាក់បានធ្លាក់ទៅស្ថិតនៅក្រោមកម្រិតប្រាក់ចំណូលនៃភាពក្រីក្រវិញ។ ចន្លោះឆ្នាំ២០០៩ ដល់ឆ្នាំ២០១៩ ជាទសវត្សរ៍ដែលប្រទេសកម្ពុជាទទួលបានកំណើនសេដ្ឋកិច្ចឥតឈប់ឈរ និងការកើនឡើងនៃប្រាក់ចំណូលយ៉ាងទូលំទូលាយ។ ការពង្រីកសេដ្ឋកិច្ចយ៉ាងឆាប់រហ័ស រួមផ្សំជាមួយនឹងការផ្លាស់ប្តូររចនាសម្ព័ន្ធ បាននាំឱ្យមានការកើនឡើងប្រាក់ឈ្នួល និងកម្រិតជីវភាពរស់នៅកាន់តែប្រសើរ។ របាយការណ៍បានរកឃើញថា ការកើនឡើងប្រាក់ចំណូលមិនមែនកសិកម្ម ជាឧទាហរណ៍ នៅក្នុងវិស័យទេសចរណ៍ កាត់ដេរ និងសំណង់ មានចំណែកធំក្នុងការកាត់បន្ថយភាពក្រីក្រ។ កំណើនដែលនាំមុខដោយពាណិជ្ជកម្ម និងការវិនិយោគ បានជួយទ្រទ្រង់ដល់ការផ្លាស់ប្តូរជារចនាសម្ព័ន្ធឆ្ពោះទៅរកវិស័យមានផលិតភាពកាន់តែខ្ពស់ ជួយបង្កើតបានការងារដែលមានប្រាក់ខែកាន់តែប្រសើរនៅក្នុងផ្នែកផលិតកម្ម និងផ្នែកសេវាកម្ម។កម្មករមានលទ្ធភាពផ្លាស់ចេញពីវិស័យកសិកម្មដែលមានប្រាក់កម្រៃទាប ទៅធ្វើការនៅតាមវិស័យដែលមានប្រាក់កម្រៃខ្ពស់ជាង និងបង្កើនប្រាក់ចំណូលរបស់ពួកគេ។ ទន្ទឹមគ្នានេះដែរ លក្ខខណ្ឌជីវភាព និងលទ្ធភាពទទួលបានសេវាមូលដ្ឋាន មានដូចជា អគ្គិសនី ការផ្គត់ផ្គង់ទឹកស្អាត អនាម័យ សុខភាព និងការអប់រំជាដើម មានភាពប្រសើរឡើងសម្រាប់មួយភាគធំនៅក្នុងចំណោមប្រជាជនទូទៅ។ការកែលម្អនៃស្ថានភាពនេះបានធ្វើឱ្យគម្លាតរវាងស្តង់ដាជីវភាពរបស់គ្រួសារនៅទីជនបទ និងនៅទីប្រជុំជន រួមតូចជាងមុន។ របាយការណ៍នេះ លើកអនុសាសន៍ថា កម្ពុជា គួរពិចារណាលើអន្តរាគមន៍ផ្នែកគោលនយោបាយមួយចំនួនដើម្បីគាំទ្រដល់ការស្តារសេដ្ឋកិច្ចឡើងវិញប្រកបដោយបរិយាបន្ននិងធន់ជាងមុន ពីការប៉ះទង្គិចរបស់ជំងឺរាតត្បាតនិងវិបត្តិសេដ្ឋកិច្ចដែលមានមកជាមួយវា។អន្តរាគមន៍ទាំងនោះអាចរួមមាន ការផ្ទេរសាច់ប្រាក់តាមគោលដៅកំណត់ វិធានការពង្រឹងកិច្ចគាំពារសង្គម និងការវិនិយោគលើវិស័យសុខាភិបាល និងការអប់រំ ជាដើម៕ អត្ថបទ៖ សន រ៉ាឌី

ការធ្វើពិពិធកម្មទំនិញ និងទីផ្សារនាំចេញ នឹងធ្វើឱ្យកំណើនសេដ្ឋកិច្ចរក្សាបានស្ថិរភាព

ភ្នំពេញ៖ អ្នកជំនាញសេដ្ឋកិច្ច លើកឡើងថា ការធ្វើពិពិធកម្មទំនិញសម្រាប់នាំចេញ និងទីផ្សារ មានសារៈសំខាន់សម្រាប់រក្សាស្ថិរភាពកំណើនសេដ្ឋកិច្ច និងកាត់បន្ថយហានិភ័យពីកត្តាខាងក្រៅ។នេះជាការលើកឡើងរបស់សេដ្ឋកិច្ចវិទូ និងស្រាវជ្រាវ បានជួបប្រជុំគ្នាក្នុងសន្និសីទម៉ាក្រូសេដ្ឋកិច្ចប្រចាំឆ្នាំលើកទី៩ ស្តីពី "ដំណើរឆ្ពោះទៅកាន់ការស្ដារឡើងវិញនិងភាពធន់ក្រោយកូវីដ-១៩ នៅថ្ងៃទី ២៤ ខែវិច្ឆិកា ឆ្នាំ ២០២២ ។លោក ស៊ាន មនោរិទ្ធ សេដ្ឋកិច្ចវិទូ នៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា ប្រទេសកំពុងអភិវឌ្ឍន៍ និងប្រទេសអភិវឌ្ឍន៍តិចតួច ជាទូទៅមានមូលដ្ឋានសេដ្ឋកិច្ចតូចជាង ជាមួយនឹងផលប៉ះពាល់ម៉ាក្រូសេដ្ឋកិច្ចខ្ពស់ជាងប្រទេសអភិវឌ្ឍន៍ដែលមានពិពិធកម្មសេដ្ឋកិច្ចធំជាង។ ដូច្នេះ ការធ្វើពិពិធកម្មសេដ្ឋកិច្ចដើរតួនាទីយ៉ាងសំខាន់ក្នុងការពង្រីកមូលដ្ឋានសេដ្ឋកិច្ច ដើម្បីកាត់បន្ថយផលប៉ះពាល់នៃកត្តាហានិភ័យខាងក្រៅ។សេដ្ឋកិច្ចវិទូដដែល លើកឡើងថា ក្នុងរយៈពេលពីរទសវត្សរ៍ចុងក្រោយនេះ ការនាំចេញរបស់ប្រទេសបានកើនឡើងជាលំដាប់ ដែលឆ្លុះបញ្ចាំងពីនិន្នាការដែលកំពុងរីកចម្រើននៅក្នុងវិស័យផលិតកម្ម។ផលិតផលវាយនភណ្ឌបានក្លាយទៅជាកន្លែងឈរជើងដ៏យូរអង្វែងនៃការនាំចេញរបស់ប្រទេស ដែលស្មើនឹងជាង ៧០ភាគរយនៃការនាំចេញរបស់ប្រទេស។បើតាមសេដ្ឋកិច្ចវិទូ បញ្ហាប្រឈមសំខាន់ៗមួយចំនួនដែលនៅសេសសល់ ក្នុងចំណោមបញ្ហាជាច្រើនទៀត គឺការចំណាយខ្ពស់ក្នុងការធ្វើអាជីវកម្ម ពលកម្មជំនាញទាប បរិយាកាសធុរកិច្ចមិនល្អ ដែលរារាំងទំនាក់ទំនងរវាង FDI និងក្រុមហ៊ុនក្នុងស្រុក និងការទទួលយកឌីជីថលទាប ។បញ្ហាទាំងនេះ គួរត្រូវបានលើកឡើង និងដោះស្រាយ ដើម្បីធានាបានពីពីការធ្វើពិពិធកម្មទំនិញ និងទីផ្សាររបស់កម្ពុជា សំដៅដល់កំណើនសេដ្ឋកិច្ច មានចីរភា និងភាពធន់។ ដើម្បីពន្លឿន និងកសាងមាគ៌ានៃកំណើនមានភាពធន់ ជាពិសេសនៅក្នុងអំឡុងពេលនិងក្រោយកូវីដ-១៩ បញ្ហាប្រឈមរ៉ាំរ៉ៃទាំងនេះគួរត្រូវបានដោះស្រាយតាមពហុវិស័យ។លោកជំទាវបណ្ឌិត ជា សិរី អគ្គនាយកបច្ចេកទេសនៃធនាគារជាតិនៃកម្ពុជា ថ្លែងលើកឡើងក្នុងពិធីបើកសន្និសីទម៉ាក្រូសេដ្ឋកិច្ចថា សន្និសីទម៉ាក្រូសេដ្ឋកិច្ចដែលរៀបចំនៅពេលនេះ បានផ្ដោតលើ “បញ្ហាប្រឈម និងគោលនយោបាយអភិវឌ្ឍន៍សហគ្រាសធុនតូច និងមធ្យមនៅកម្ពុជា” នៅពេលនោះលទ្ធផលស្រាវជ្រាវ និងអនុសាសន៍ជាច្រើនត្រូវបានផ្ដល់ ដើម្បីដោះស្រាយបញ្ហាប្រឈមរបស់សហគ្រាសធុនតូច និងមធ្យមក្នុងអំឡុងវិបត្តិជំងឺកូវីដ-១៩ ស្របពេលដែលសក្តានុពលរបស់វិស័យនេះក្នុងការជួយស្ដារកំណើនឡើងវិញ ក៏ត្រូវបានលើកយកមកពិភាក្សាផងដែរ៕ អត្ថបទ៖ វណ្ណៈ

ការប្រមូលចំណូលថវិការជាតិ នឹងសម្រេចតាមផែនការ គាំទ្រដោយសកម្មភាពសង្គម-សេដ្ឋកិច្ចបើកឡើងវិញ

ភ្នំពេញ៖ អ្នកជំនាញសេដ្ឋកិច្ច រំពឹងថា ការប្រមូលចំណូលចូលថវិកាជាតិឆ្នាំ ២០២៣ របស់រាជរដ្ឋាភិបាល នឹងសម្រេចបានតាមផែនការគ្រោងទុក ខណៈវិស័យក្នុងស្រុកជាច្រើន អាចបន្តលទ្ធភាពដល់ការប្រមូលចំណូល ។ឯកឧត្តមបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា មានប្រសាសន៍នៅថ្ងៃទី ២៥ ខែវិច្ឆិកា ឆ្នាំ២០២២នេះថា ក្របខណ្ឌគោលនយោបាយឆ្នាំ២០២៣ របស់រាជរដ្ឋាភិបាល ដែលបានរៀបចំឡើង គឺឈរលើមូលដ្ឋាននៃគោលនយោបាយម៉ាក្រូសេដ្ឋកិច្ច និងការដាក់ចេញនូវយុទ្ធសាស្រ្ត ផែនការជាច្រើន ដើម្បីធ្វើឲ្យសម្រេចគោលបំណង ជាពិសេសប្រសិទ្ធភាពនៃការប្រមូលចំណូលចូលថវិកាជាតិ។ឯកឧត្តមបណ្ឌិត នៅឆ្នាំ ២០២៣ រាជរដ្ឋាភិបាលគ្រោងបង្កើនចំណូលថវិការដ្ឋខ្ពស់ជាងឆ្នាំ ២០២២ នេះ ទោះបីការបង្កើនខ្ពស់ក៏ដោយ រាជរដ្ឋាភិបាលនឹងអាចសម្រេចការប្រមូលចំណូលបានតាមការគ្រោងទុក ខណៈវិស័យក្នុងស្រុកជាច្រើន អាចបន្តលទ្ធភាពដល់ការប្រមូលចំណូលជូនរដ្ឋ ជាពិសេសអាជីវកម្មជាច្រើន ដែលមិនទាន់បានបង់ពន្ធ ប្រសិនវិស័យទាំងនេះចូលមកក្នុងប្រព័ន្ធ ហើយក្រុមហ៊ុន រោងចក្រ សហគ្រាស អាចប្រកួតប្រជែងគ្នា ប្រកបដោយយុត្តិធម៌ និងបរិយាបន្ន។សូមបញ្ជាក់ថា យោងតាមសេចក្តីព្រៀងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ រាជរដ្ឋាភិបាលគ្រោងប្រមូលចំណូលក្នុងប្រទេសថវិការដ្ឋ ឬថវិកាជាតិ ត្រូវបានគ្រោងប្រមាណជាង ២២ ភាគរយ នៃផសស, មានកំណើនជាង ១៤ ភាគរយ ធៀបនឹងច្បាប់ឆ្នាំ ២០២២ ។ ចំណែកការចំណាយសរុបថវិការដ្ឋ ឬថវិកាជាតិ ក៏ត្រូវបានគ្រោង ស្មើជិត ៣០ នៃ ផសស, មានកំណើន ១៣ ភាគរយ ធៀបនឹងច្បាប់ឆ្នាំ២០២២៕អត្ថបទ៖ សុន រ៉ាឌី

ពានរង្វាន់សហគ្រិនថ្នាក់ជាតិ ឆ្នាំ២០២២ ត្រៀមប្រកាសនៅល្ងាចថ្ងៃនេះ

ភ្នំពេញ៖ តាមការកំណត់ នៅល្ងាចថ្ងៃទី២៣ ខែវិច្ឆិកា ឆ្នាំ២០២២នេះ ក្រសួងការងារ និងបណ្តុះបណ្តាលវិជ្ជាជីវៈ នឹងប្រកាសជាផ្លូវការអំពីម្ចាស់ជ័យលាភី វិទ្យាស្ថានជាតិសហគ្រិនភាព និងនវានុវត្តន៍ និងសហគ្រិនខ្មែរ បន្ទាប់ពីឆ្លងកាត់ការវាយតម្លៃសមត្ថភាពដ៏សុក្រិតពីគណៈកម្មការថ្នាក់ជាតិយ៉ាងត្រឹមត្រូវបំផុត។កម្មវិធីពានរង្វាន់សហគ្រិនថ្នាក់ជាតិឆ្នាំ២០២២នៅល្ងាចថ្ងៃនេះ នឹងប្រាព្ធធ្វេីឡេីងក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត ពេជ សោភ័ណ រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ ដែលប្រព្រឹត្តទៅនៅសណ្ឋាគារហុីម៉ាវារី រាជធានីភ្នំពេញ។ សូមជម្រាបជូនថា កម្មវិធីប្រកួតប្រជែងពានរង្វាន់សហគ្រិនថ្នាក់ជាតិ រៀបចំឡើងដោយវិទ្យាស្ថានជាតិសហគ្រិនភាព និងនវានុវត្តន៍ ដែលជាគ្រឹះស្ថានសាធារណៈ កំពុងបំពេញការងារយ៉ាងសកម្មក្នុងការកសាងសហគ្រិនថ្មី អភិវឌ្ឍសហគ្រិនដែលមានស្រាប់ និងជាអ្នកអនុវត្តសហគ្រិនភាពសង្គម ដែលស្ថិតក្រោមការគ្រប់គ្រងរបស់ក្រសួងការងារ និងបណ្តុះបណ្តាលវិជ្ជាជីវៈ។ កម្មវិធីនេះដែរ ប្រព្រឹត្តទៅក្រោមកិច្ចសហការជាមួយសហគ្រិនខ្មែរ (Khmer Enterprise) តាមរយៈជំនួយរដ្ឋាភិបាលកម្ពុជា និងធនាគារព្រីនស៍ ដើម្បីធ្វើការងាររួមគ្នាជាមួយសហគ្រិន អ្នកបង្កើតគំនិតថ្មីៗ នវានុវត្តន៍ និងអ្នកដឹកនាំអាជីវកម្មក្នុងការរៀបចំការប្រកួតប្រជែងលើប្រធានបទជាក់លាក់ជារៀងរាល់ឆ្នាំ តាមរយៈការរៀបចំឲ្យមានការប្រកួតប្រជែងនៅថ្នាក់ខេត្ត និងថ្នាក់ជាតិក្នុងប្រទេសកម្ពុជា។កម្មវិធីពានរង្វាន់សហគ្រិនថ្នាក់ជាតិ សម្រាប់ម្ចាស់ជ័យលាភីលេខ១ នឹងទទួលបានទឹកប្រាក់ចំនួន ១ម៉ឺនដុល្លារអាម៉េរិក, លេខ២ នឹងទទួលបានទឹកប្រាក់ចំនួន ៥ពាន់ដុល្លារអាម៉េរិក, លេខ៣ នឹងទទួលបានទឹកប្រាក់ចំនួន ៣ពាន់ដុល្លារអាម៉េរិក និងលេខ៤ នឹងទទួលបានទឹកប្រាក់ចំនួន ២ពាន់ដុល្លារអាម៉េរិក៕ អត្ថបទ ៖ បូរ៉ាវី

កម្ពុជាស្នើការងារមួយចំនួនពីបង់ក្លាដែស ដើម្បីលើកម្ពស់កិច្ចសហប្រតិបត្តិការសេដ្ឋកិច្ច-ពាណិជ្ជកម្ម

ភ្នំពេញ៖ ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម បានស្នើដល់ភាគីបង់ក្លាដែស លើការងារសំខាន់ៗមួយចំនួន ដើម្បីលើកម្ពស់កិច្ចសហប្រតិបត្តិការសេដ្ឋកិច្ច-ពាណិជ្ជកម្ម ស្របតាមការចង្អុលបង្ហាញពីប្រមុខដឹកនាំនៃប្រទេសទាំងពីរកាលពីពេលកន្លងទៅ។ នៅក្រោយចប់ជំនួបការងាររវាង ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងឯកឧត្តម Sadhan Chandra Majumder រដ្ឋមន្រ្តីក្រសួងស្បៀងអាហារបង់ក្លាដែស ក្រសួងពាណិជ្ជកម្មកម្ពុជា កាលពីរាត្រីថ្ងៃទី២២ វិច្ឆិកា ឆ្នាំ២០២២កន្លងទៅ បានឲ្យដឹងថា ការងារមួយចំនួនដែលកម្ពុជាស្នើដល់បង់ក្លាដែស រួមមាន៖ ការចុះហត្ថលេខាលើកិច្ចព្រមព្រៀងពាណិជ្ជកម្មរវាងកម្ពុជា-បង់ក្លាដែស និងការធានាបាននូវការអនុវត្តដោយពេញលេញ និងមានប្រសិទ្ធភាព, ការរៀបចំកិច្ចប្រជុំលើកទី១ នៃក្រុមប្រឹក្សាពាណិជ្ជកម្មចម្រុះរវាងកម្ពុជា-បង់ក្លាដែស ដើម្បីពិនិត្យនិងតាមដានវឌ្ឍនភាពកិច្ចសហប្រតិបត្តិការលើគ្រប់វិស័យ និងការពិនិត្យលទ្ធភាពបន្តអនុស្សរណៈនៃការយោគយល់គ្នា ស្តីពីពាណិជ្ជកម្មអង្កររវាងកម្ពុជា-បង់ក្លាដែស ជាដើម។ប្រភពដដែល បានឲ្យដឹងទៀតថា តាមរយៈជំនួបការងារនេះ ឯកឧត្តមរដ្ឋមន្រ្តីពាណិជ្ជកម្ម បានសម្តែងនូវសុដ្ឋិនិយមចំពោះកំណើនជាវិជ្ជមាននៃពាណិជ្ជកម្មទ្វេភាគីដែលសម្រេចបានក្នុងរយៈពេល៩ខែ ក្នុងឆ្នាំ២០២២ ដែលមានទំហំទឹកប្រាក់ប្រមាណ ២២លានដុល្លារសហរដ្ឋអាម៉េរិក កើនឡើងប្រមាណ ៥៦% បើប្រៀបធៀបនឹងរយៈពេលដូចគ្នាក្នុងឆ្នាំ២០២១។ ឯកឧត្តម ក៏បានគូសបញ្ជាក់អំពីសក្តានុពលនៃកិច្ចសហប្រតិបត្តិការទ្វេភាគីក្នុងការជំរុញកំណើនពាណិជកម្មទ្វេភាគីឱ្យកាន់តែប្រសើរទ្បើងបន្ថែមទៀត។ជាការឆ្លើយតប ភាគីបង់ក្លាដែស បានគូសបញ្ជាក់អំពីទំនាក់ទំនងដ៏ល្អប្រសើររវាងប្រទេសទាំងពីរ ជាពិសេសសារៈសំខាន់នៃការលើកម្ពស់កិច្ចសហប្រតិបត្តិការសេដ្ឋកិច្ច-ពាណិជ្ជកម្ម។ ក្នុងនោះ ភាគីបង់ក្លាដែស បានឯកភាពក្នុងការចុះហត្ថលេខាលើកិច្ចព្រមព្រៀងពាណិជ្ជកម្មរវាងកម្ពុជា-បង់ក្លាដែស, ការបន្តអនុស្សរណៈនៃការយោគយល់គ្នាស្តីពីពាណិជ្ជកម្មអង្កររវាងកម្ពុជា-បង់ក្លាដែស និងការរៀបចំកិច្ចប្រជុំលើកទី១នៃក្រុមប្រឹក្សាពាណិជ្ជកម្មចម្រុះរវាងកម្ពុជា-បង់ក្លាដែស។ លើសពីនេះភាគីទាំងពីរ បានឯកភាពគ្នាចាត់តាំងមន្រ្តីបង្គោល ដើម្បីបន្តអនុវត្តទិសដៅការងារដែលជាលទ្ធផលនៃកិច្ចប្រជុំពិភាក្សាថ្ងៃនេះ រួមទាំងការពិនិត្យលទ្ធភាពរៀបចំការសិក្សាសមិទ្ធិភាពរួមគ្នា (Joint Feasibility Study) សម្រាប់ការចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគី ផងដែរ។ក្រសួងពាណិជ្ជកម្ម បានបញ្ជាក់ថា នៅកិច្ចបញ្ចប់ ភាគីទាំងពីរបានបញ្ជាក់សារជាថ្មីនូវការប្តេជ្ញាចិត្តបន្តកិច្ចសហប្រតិបត្តិការឱ្យកាន់តែជិតស្និទ្ធិ សំដៅជំរុញការអភិវឌ្ឍវិស័យសេដ្ឋកិច្ច-ពាណិជ្ជកម្ម និងវិនិយោគ ឱ្យកាន់តែរីកចម្រើនបន្ថែមទៀត ៕អត្ថបទ៖បូរ៉ាវី

កម្ពុជារំពឹង នឹងទទួលបានភ្ញៀវទេសចរណ៍ផ្ទៃក្នុង១៤ លាននាក់នៅឆ្នាំក្រោយ

ភ្នំពេញ៖ រដ្ឋមន្រ្តីក្រសួងទេសចរណ៍ រំពឹងថា នៅក្នុងឆ្នាំ ២០២៣ កម្ពុជានឹងទទួលបានភ្ញៀវទេសចរណ៍ផ្ទៃក្នុងប្រមាណ ១៤ លាននាក់ តាមផែនការដែលបានដាក់ចេញ និងភ្ញៀវទេសចរអន្តរជាតិប្រមាណ ៣ លាននាក់ រហូតដល់ឆ្នាំ ២០២៧។ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ លើកឡើងនៅក្នុងពិធីបិទ «វេទិកាជាតិអេកូទេសចរណ៍លើកទី៣» នៅថ្ងៃទី២២ ខែវិច្ឆិកា ឆ្នាំ២០២២ នេះថា កម្ពុជាត្រូវបានទទួលស្គាល់ជាលក្ខណៈអន្តរជាតិលើការងារសហគមន៍ និងអេកូទេសចរណ៍ ពិសេសក្នុងក្របខណ្ឌអាស៊ាន តាមរយៈការអនុវត្តគំរូអភិវឌ្ឍន៍សហគមន៍ទេសចរណ៍ ក្រោមរូបភាពជាដៃគូរ រដ្ឋ និងប្រជាជន ក្នុងការផ្តល់សិទ្ធអំណាចដល់សហគមន៍ ដល់ជាប្រយោជន៍អតិប្បរមាក្នុងមូលដ្ឋាន កាត់បន្ថយភាពក្រីក្រ និងគោរពតាមគោលការណ៍ជាជំហាន និងទទួលខុសត្រូវស្របតាមទស្សនទាន ការអភិរក្សបម្រើដល់ការអភិវឌ្ឍ និងស្របតាមគៅលការណ៍នៃការបែងចែកផលប្រយោជន៍ ប្រកបដោយសមធម៌។ឈរលើមូលដ្ឋានទាំងអស់នេះ រាជរដ្ឋាភិបាលបានអនុវត្តដាក់ឲ្យប្រើប្រាស់ផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍ កម្ពុជាក្រោយវិបត្តិជំងឺកូវីដ ១៩ ដោយក្នុងនោះអនុវិស័យអេកូទេសចេណ៍ គឺជាសរស្តម្ភមួយ ក្នុងចំណោមសរស្តម្ភទាំង៤ គឺទេសចរណ៍វប្បធម៌, ទេសចរណ៍ឆ្នេរ, អេកូទេសចរណ៍ និងភាពជាខ្មែរ ក្នុងការស្តារ និងលើកស្ទួយវិស័យទេសចរណ៍កម្ពុជ។ បញ្ហានេះ ឯកឧត្តមរំពឹងថា កម្ពុជានឹងទទួលបានភ្ញៀវទេសចរណ៍ផ្ទៃក្នុង ប្រមាណ ១៤ លាននាក់ នៅក្នុងឆ្នាំ២០២៣ តាមផែនការដែលបានដាក់ចេញ និងភ្ញៀវទេសចរអន្តរជាតិប្រមាណ ៣លាននាក់ រហូតដល់ឆ្នាំ ២០២៦ ឬឆ្នាំ២០២៧ ជាមួយភាពប្រកដប្រជានៃវិបត្តិកូវីដ ១៩ និងវិបត្តិសកលលោកនានា ខណៈដែល ១០ ខែ ឆ្នាំ ២០២២ នេះ កម្ពុជាទទួលបានភ្ញៀវទេសចរណ៍ ប្រមាណ ១,៥ លាននាក់រួចហើយ និងរំពឹងថា ក្នុងឆ្នាំនេះ នឹងទទួលបានភ្ញៀវទេសចរណ៍ប្រមាណ ២ លាននាក់ផងដែរ។ទាក់ទងបញ្ហាទេសចរណ៍នេះ, លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា លើកឡើងថា ជុំវិញការរំពឹងទុក នៃការកើនឡើងភ្ញៀវទេសចរណ៍នេះ បើយើងក្រឡែកមើលបច្ចុប្បន្ន ភ្ញៀវទេសចរណ៍បានចេញកម្សាន្តជាហូរហែរ បន្ទាប់ពីវិបត្តិនៃជំងឺកូវីដ ១៩ បានធូរស្រាល ដែលក្នុងនោះអនុវិស័យអេកូទេសចរណ៍ រួមជាមួយសេវាកម្មសហគមន៍ភ្ញៀវទេសចរណ៍បានកំពុងទាក់ទាញផងដែរ ខណៈវិបត្តិនៃជំងឺកូវីដ ១៩ ហាក់ដូចជាបណ្តុះគំនិតឲ្យពួកគាត់កាន់តែស្រឡាញ់ និងគាំទ្រ អភិរក្សធនធានធម្មជាតិ អេកូទេសចរណ៍កាន់តែខ្លាំង ដូច្នេះរបត់នៃការកើនឡើងភ្ញៀវទេសចរណ៍នេះ កម្ពុជានឹងអាចសម្រេចបានតាមការគ្រោងទុក។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសម្តែងនូវការគាំទ្រយ៉ាងពេញទំហឹង ចំពោះការបន្តអភិវឌ្ឍសហគមន៍ទេសចរណ៍ និងអេកូទេសចរណ៍ ប្រកបដោយចីរភាព និងបរិយាប័ន្ន សម្រាប់វិស័យទេសចរណ៍ទាំងមូល សម្រាប់បញ្ហានេះ ឯកឧត្តមស្នើរបន្តពង្រឹង និងពង្រីកសក្តានុពលនៃការអភិវឌ្ឍសហគមន៍ទេសចរណ៍ និងអេកូទេសចរណ៍ជាច្រើនទៀត ជាពិសេសការដោះស្រាយបញ្ហាក្នុងសហគមន៍ដូចជា ការកសាងហេដ្ឋរចនាសម្ព័ន្ធតភ្ជាប់ និងការផ្តល់សេវាសាធារណៈនានា, ការបន្តសិក្សារៀបចំបញ្ជីសហគមន៍អាទិភាព ដើម្បីដាក់បញ្ចូលក្នុងផែនការអាទិភាពរបស់ក្រសួង-ស្ថាប័នពាក់ព័ន្ធ និងការគាំទ្រឱ្យមានការរៀបចំពិធីបុណ្យអេកូទេសចរណ៍ប្រចាំឆ្នាំ នៅតាមតំបន់អេកូទេសចរណ៍អាទិភាពជាដើម៕អត្ថបទ៖ សុន រ៉ាឌី

គម្រោងសហហិរញ្ញប្បទានលើវិស័យទេសចណ៍ នៅមានកញ្ចប់ថវិការជាច្រើនសម្រាប់គាំទ្រអាជីវកម្ម

ភ្នំពេញ៖ គម្រោងសហហិរញ្ញប្បទានរវាងធនាគារដៃគូរ និងធនាគារសហគ្រាសធុនតូច និងមធ្យមកម្ពុជា សម្រាប់ការស្តារ និងជំរុញកំណើនក្នុងវិស័យទេសចរណ៍ គិតមកដល់ពេលនេះ បានបញ្ចេញឥណទានក្នុងរង្វង់ ២២ ភាគរយ នៃទំហំថវិការសហហិរញ្ញប្បទានសរុប ដោយនៅមានកញ្ចប់ថវិកាជាច្រើនទៀត សម្រាប់គាំទ្រ និងជួយជ្រោមជ្រែងដល់ម្ចាស់អាជីវកម្ម។លោក នៀវ សុគន្ធ នាយកប្រតិបត្តិនៃធនាគារសហគ្រាសធុនតូច និងមធ្យមកម្ពុជា លើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV ស្តីពីបង្ហាញ ស្តីពីការផ្តល់កម្ចីក្នុងគម្រោងសហហិរញ្ញប្បទាន សម្រាប់ការស្តារ និងជម្រុញកំណើនក្នុងវិស័យទេសចរណ៍ នៅថ្ងៃទី ២២ ខែ វិច្ឆិកា ឆ្នាំ ២០២២ នេះថា រាជរដ្ឋាភិបាល បានសម្រេចដាក់អនុវត្តគម្រោងសហហិរញ្ញប្បទាន សម្រាប់វិស័យទេសចរណ៍នេះ គឺជួយដោះស្រាយបញ្ហាប្រឈម នៃការកង្វះហិរញ្ញប្បទាន សម្រាប់អាជីវកម្មក្នុងវិស័យទេសចរណ៍ ដែលទទួលរងផលប៉ះពាល់ ការរៀបចំដំណើរការអាជីវកម្មឡើងវិញ និងធ្វើទំនើបកម្ម ពិពិធកម្ម សេវាកម្ម និងផលិតផលផ្សេងៗ គិតមកដល់ពេលនេះ គម្រោងជួយជ្រោមជ្រែងក្នុងវិស័យទេសចរណ៍ បានដំណើរជិតកន្លះឆ្នាំហើយ ក្នុងនោះបើធៀបទៅគម្រោងទី ១ និង ២ ឃើញថា មានល្បឿនយឺតយ៉ាវបន្តិចបន្តួច។ជាក់ស្តែងគិតមកដល់ពេលនេះ គម្រោងសហហិរញ្ញប្បទានសម្រាប់ការស្តារ និងជំរុញកំណើនក្នុងវិស័យទេសចរណ៍ ទើបទម្លាក់ថវិការអស់ប្រមាណ ២២ ភាគរយ ក្នុងទំហំសហហិរញ្ញប្បទានសរុប ១៥០ លានដុល្លារ ដោយនៅមានកញ្ចប់ថវិកាជាច្រើនទៀត ក្នុងនោះប្រសិនម្ចាស់អាជីវកម្ម សេវាកម្ម មានតម្រូវការ អាចទាក់ទងមកធនាគារដៃគូរ ឬធនាគារសហគ្រាសធុនតូច និងមធ្យមកម្ពុជាផ្ទាល់ ដែលមានលក្ខណៈងាយៗ និងមានអត្រាការប្រាក់សមរម្យ។សូមបញ្ជាក់ថា រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ ដែលសហការជាមួយធនាគារជាដៃគូរ បានបង្កើតគម្រោងសហហិរញ្ញប្បទានជំហានបន្ទាប់នេះឡើង ដើម្បីផ្តល់ជូននូវអត្រាការប្រាក់ពិសេស ជូនដល់សហគ្រាស ឬអាជីវកម្មដែលកំពុងរងនូវផលប៉ះពាល់ ដោយបានសម្រេចផ្តល់ការប្រាក់អតិបរមា ៦.៥ ភាគរយ ក្នុងមួយឆ្នាំ ក្នុងនោះម្ចាស់អាជីវកម្មអាចកម្ចីទំហំឥណទានត្រឹម ៤០ ម៉ឺនដុល្លារ សម្រាប់ជាទុកបង្វឹលក្នុងអាជីវកម្ម ។ចំណែកការការសង់ត្រឡប់ឥណទានមកវិញ រាជរដ្ឋាភិវបាលបានកំណត់ការកម្ចីមានរយៈពេល ៧ឆ្នាំ, ចំពោះគោលដៅដែលផ្តល់ជូន គឺផ្តោតទៅលើអាជីវកម្មដែលទាក់ទងទៅលើវិស័យទេសចរណ៍ដូចជា៖ វិស័យសណ្ឋាគារ, ផ្ទះសំណាក់, ភោជនីយដ្ឋាន ក្រុមហ៊ុនទីភ្នាក់ងារទេសចរណ៍ជាដើម ក្នុងនោះចំពោះអាជីវកម្មបើកថ្មីក្នុងវិស័យទេសចរណ៍ គឺមិនអនុញ្ញាតផ្តល់គម្រោងនេះជូនឡើយ៕អត្ថបទ៖ សុន រ៉ាឌី

កម្ពុជារកចំណូលបាន ៣ ពាន់លានដុល្លារពីការនាំចេញកសិផលក្នុងរយៈពេល ១០ ខែដំបូង

ភ្នំពេញ៖ កម្ពុជាបាននាំចេញកសិផលសរុបចំនួន ៧,៦២ លានតោនក្នុងរយៈពេល ១០ ខែដំបូងនៃឆ្នាំ ២០២២ ដោយទទួលបានប្រាក់ចំណូលចំនួន ៣,០៧ ពាន់លានដុល្លារអាមេរិក។យោងតាមរបាយការណ៍ចេញផ្សាយដោយក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃសៅរ៍ទី១៩ ខែវិច្ឆិកានេះ បានឱ្យដឹងថា ផលិតផលសំខាន់ៗដែលកម្ពុជានាំចេញរួមមាន អង្ករ ចេក ស្វាយ ដំឡូងមី គ្រាប់ស្វាយចន្ទី ពោត ប្រេងដូង ម្រេច និងថ្នាំជក់ ក្នុងចំណោមផលិតផលផ្សេងទៀត។ របាយការណ៍ បានបន្ថែមថា ប្រទេសចិនគឺជាអ្នកទិញដ៏សំខាន់មួយនៃផលិតផលរបស់ព្រះរាជាណាចក្រកម្ពុជា។ឯកឧត្តម ងិន ឆាយ អគ្គនាយកនៃអគ្គនាយកដ្ឋានកសិកម្ម លើកឡើងកាលពីថ្មីៗនេះថា កំណើននៃការនាំចេញកសិផលកម្ពុជាទៅកាន់ទីផ្សារក្រៅប្រទេស មានការកើនឡើងគួរឱ្យកត់សម្គាល់។ឯកឧត្តម បន្តថា ក្រៅពីការអនុវត្តវិធានការអនាម័យ និងភូតគាមអនាម័យ នៅមានបញ្ហាប្រឈមសំខាន់ៗមួយចំនួនដូចជា កង្វះហេដ្ឋារចនាសម្ព័ន្ធគាំទ្រសម្រាប់មន្ទីរពិសោធន៍ការពាររុក្ខជាតិ និងភូតគាមអនាម័យ ស្ថានីយពិសោធន៍ស្រាវជ្រាវ ហេដ្ឋារចនាសម្ព័ន្ធកសាងទិន្នន័យវិទ្យាសាស្ត្រ វិទ្យាស្ថានការពាររុក្ខជាតិ និងភូតគាមអនាម័យជាដើម។ កសិកម្មគឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចកម្ពុជា។ យោងតាមក្រសួង បានឱ្យដឹងថា វិស័យនេះបានរួមចំណែក ២៤,៤ ភាគរយដល់ផលិតផលក្នុងស្រុកសរុប ក្នុងឆ្នាំ២០២១ ។ស្រូវគឺជាដំណាំសាច់ប្រាក់ដ៏សំខាន់នៅក្នុងប្រជាជាតិអាស៊ីអាគ្នេយ៍ ដែលអង្ករប្រហែល ១២,២ លានតោនត្រូវបានផលិតនៅឆ្នាំ ២០២១ កើនឡើង ១១,៦ ភាគរយពីមួយឆ្នាំទៅមួយឆ្នាំ៕ អត្ថបទ៖ វណ្ណៈ

ប្រធានសមាគមម្រេចកំពត រំពឹងថា ការនាំចេញម្រេចមានកំណើនល្អនៅឆ្នាំក្រោយ

ភ្នំពេញ៖ ប្រធានសមាគមលើកស្ទួយម្រេចកំពត រំពឹងថា នៅក្នុងឆ្នាំ ២០២៣ ការនាំចេញផលិតផលម្រេចនឹងងើបឡើងល្អប្រសើរវិញ ដោយការរំពឹងទុកនៃការប្រមូលផលម្រេចឆ្នាំក្រោយ នឹងទទួលបានទិន្នផលខ្ពស់ជាងឆ្នាំនេះ ព្រមទាំងមានទីផ្សារថ្មីៗបន្ថែមទៀត ជួយគាំទ្រដល់ការនាំចេញម្រេចកម្ពុជា។លោក ងួន ឡាយ ប្រធានសមាគមលើកស្ទួយម្រេចកំពត លើកឡើងនៅថ្ងៃទី ២១ ខែ វិច្ឆិកានេះថា នៅក្នុងឆ្នាំនេះ ការប្រមូលផលម្រេចរបស់កសិករទទួលបានទិន្នផលទាបជាងឆ្នាំ ២០២១ ចំណែកទីផ្សារនាំចេញក៏ជួបបញ្ហាខ្លះៗផងដែរ ដោយសារការកើនឡើងនៃប្រាក់ដុល្លារ ខណៈការនាំចេញម្រេចភាគច្រើនគិតជាតម្លៃអឺរ៉ូ ហើយបច្ចុប្បន្នអត្រាប្តូរប្រាក់អឺរ៉ូនេះកំពុងធ្លាក់ចុះ ដែលបញ្ហាទាំងនេះ ធ្វើឲ្យអ្នកបញ្ជាទិញមានការស្ទាក់ស្ទើរ។ទោះបីឆ្នាំនេះមានការធ្លាក់ចុះ តែនៅឆ្នាំ ២០២៣ លោក រំពឹងថា ទីផ្សារនាំចេញម្រេចរបស់កម្ពុជា នឹងអាចងើបល្អប្រសើរឡើងវិញ និងស្របពេលកម្ពុជាក៏មានទីផ្សារថ្មីខ្លះៗបន្ថែម ដែលជាការរួមចំណែកដល់ការនាំចេញ លើទីផ្សារដែលមានស្រាប់ផងដែរ។ ជុំវិញការនាំចេញម្រេច, ក្រសួងកសិកម្ម រុក្ខាប្រមាញ់ និងនេសាទ បង្ហាញឲ្យដឹងថា នៅក្នុងរយៈពេល ១០ ឆ្នាំ២០២២ នេះ ការនាំចេញ ម្រេច សម្រេចបានមានចំនួនជាង ៧,៧ ពាន់តោន ថយចុះ ៧២ ភាគរយ ក្នុងនោះនាំចេញទៅប្រទេសវៀតណាមជាង ៦,៦ ពាន់តោន៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

អ្នកគំាទ្របង្ហាញការគាំទ្រ និងផ្ដល់កម្លាំងចិត្តយ៉ាងខ្លាំងដល់ព្រះខ័នរាជស្វាយរៀង

លោក Trump និយាយថា កិច្ចចរចារវាងអាមេរិក និងអ៊ីរ៉ង់អាចធ្វើទៅបានក្នុងរយៈពេល ៣៦ទៅ៧២ម៉ោង

ក្រសួងបរិស្ថានរកឃើញថាក្រុមហ៊ុន បៃ ស៊ីង សេង បញ្ចេញសំណល់រាវ បង្កឱ្យមានការបំពុលទឹក ងាប់ត្រី និងបំពុលបរិស្ថាននៅក្នុងអូរត្រែង ខេត្តបាត់ដំបង

ក្រសួងធម្មការកម្ពុជា តវ៉ាយ៉ាងដាច់អហង្ការ ចំពោះវត្តមានរបស់អាជ្ញាធរ និងប្រជាជនថៃ ដែលបន្តបង្កសកម្មភាពខុសច្បាប់ ធ្វើពិធីបួងសួងបែបជំនឿសាសនា នៅប្រាសាទតាក្របី និងតំបន់ជុំវិញ ក្នុងដែនអធិបតេយ្យភាពរបស់កម្ពុជា

កម្ពុជា-ចិន ប្ដេជ្ញាបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ

ចៅក្រម ICC បដិសេធសំណើសុំដោះលែងអតីតប្រធានាធិបតីហ្វីលីពីន លោក Duterte

អ៊ីរ៉ង់និយាយថា ការទូតពឹងផ្អែកលើផលប្រយោជន៍ជាតិ ពុំមែនការសម្រេចចិត្តលើការចរចាទេ

អ្នកការទូត បញ្ជាក់ថា អ៊ីរ៉ង់ «នឹងមិនចរចាក្រោមការគំរាមកំហែង» នោះឡើយ

ប្រទេសលីបង់ និងរុស្ស៊ី ចុះហត្ថលេខាលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងពិសេស

លីបង់នឹងស្នើសុំការបន្តបទឈប់បាញ់រយៈពេលមួយខែ ក្នុងជំនួបជាមួយអ៊ីស្រាអែល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877