BTV NEWS

ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់

ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុនបន្តស្មារតីសាមគ្គីភាព ដើម្បីទទួលផលចំណេញទាំងអស់គ្នាថែមទៀត

កម្ពុជា និងកូរ៉េ រួមគ្នាជំរុញការកាត់បន្ថយឧស្ម័នផ្ទះកញ្ចក់តាមរយៈការវិនិយោគមធ្យោបាយដឹកជញ្ជូន-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០

កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

សេដ្ឋកិច្ច និង កសិកម្ម

ធនាគារជាតិកម្ពុជា បង្ហាញវឌ្ឍនភាពការអភិវឌ្ឍប្រព័ន្ធទូទាត់ទំនើបសម្រួលការទូទាត់ទាំងក្នុងស្រុក និងក្នុងតំបន់

ភ្នំពេញ ៖ ធនាគារជាតិនៃកម្ពុជា បានគាំទ្រការអភិវឌ្ឍប្រព័ន្ធទូទាត់ទំនើប និងបានដាក់ចេញប្រព័ន្ធទូទាត់បាគង ដោយប្រើប្រាស់បច្ចេកវិទ្យា Blockchain សម្រាប់ជាប្រព័ន្ធទូទាត់កន្លោង ដើម្បីលើកកម្ពស់បរិយាបន្នហិរញ្ញវត្ថុ តម្លាភាព គណនេយ្យភាព និងអាចទូទាត់ឆ្លងគ្រឹះស្ថានបាន (interoperability) ដើម្បីសម្រួលការទូទាត់ទាំង ក្នុងស្រុក និងសមាហរណកម្មទៅក្នុងតំបន់។ឯកឧត្តម ស៊ុ សន្និសិទ្ធ ទេសាភិបាលរង ធនាគារជាតិនៃកម្ពុជា បានលើកឡើងបែបនេះ ថ្ងៃទី២៦ ខែតុលា ឆ្នាំ២០២១ បានចូលរួមវេទិកា ប្រចាំឆ្នាំរបស់ធនាគារពិភពលោក ស្តីពី ភាពជាដៃគូនៃការគ្រប់គ្រង និងប្រឹក្សាលើទុនបម្រុងអន្តរជាតិ (RAMP) ដែលបានចូលរួមដោយថ្នាក់ដឹកនាំធនាគារកណ្ដាល នាយកប្រតិបត្តិផ្នែកហិរញ្ញវត្ថុ និងមន្ត្រីជំនាញ គ្រប់គ្រងទុនបម្រុងអន្តរជាតិ។ គោលបំណងនៃការរៀបចំវេទិកានេះ គឺដើម្បីផ្តល់ជាឱកាសពិភាក្សាលើស្ថានភាពសេដ្ឋកិច្ចពិភពលោក បទពិសោធន៍នៃការគ្រប់គ្រងទុនបម្រុងអន្តរជាតិ និងទស្សនវិស័យនាពេលខាងមុខ។ វេទិកានេះ បានលើកយកបទពិភាក្សានូវប្រធានបទបច្ចុប្បន្នភាពសំខាន់ៗ រួមមាន ៖ ការកើនឡើងនៃអត្រា អតិផរណាក្នុងប្រទេសអភិវឌ្ឍន៍ ការធ្វើប្រក្រតីកម្មនយោបាយរូបិយវត្ថុ ការកើនឡើងកម្រិតបំណុល ការប្រែប្រួល អាកាសធាតុ និងបច្ចេកវិទ្យាហិរញ្ញវត្ថុ។ អត្រាអតិផរណានៅសហរដ្ឋអាមេរិក បានកើនឡើងខ្ពស់ក្នុងរយៈពេល ប៉ុន្មានទសវត្សរ៍កន្លងមកនេះ។ កិច្ចពិភាក្សា ក៏បានលើកឡើងពីសារៈសំខាន់នៃការបញ្ចូលបញ្ហាផ្លាស់ប្តូរអាកាសធាតុទៅក្នុងនយោបាយរូបិយវត្ថុ និងការគ្រប់គ្រងទុនបម្រុង ដែលនឹងជួយដល់កិច្ចខិតខំប្រឹងប្រែងទប់ទល់នឹងការប្រែប្រួលអាកាសធាតុ ដែលអាចនាំឱ្យប៉ះពាល់ដល់កំណើន និងការអភិវឌ្ឍ។ ជាមួយនឹងការរីកចម្រើនផ្នែកបច្ចេកវិទ្យា កិច្ចពិភាក្សាបានលើកឡើងពីការកើនឡើងនូវការប្រើប្រាស់បច្ចេកវិទ្យាហិរញ្ញវត្ថុ ដែលជំរុញឱ្យមានការបង្កើតនូវរូបិយប័ណ្ណអេឡិចត្រូនិក ជាពិសេសផ្អែកលើបច្ចេកវិទ្យា Blockchain ដូចជា Crytocurrencies និងរូបិយវត្ថុអេឡិចត្រូនិករបស់ធនាគារកណ្ដាល (CBDC) ដែលកំពុងក្លាយជាជំហានថ្មីនៃការវិវត្តនៃរូបិយប័ណ្ណ។គួរបញ្ជាក់ថា ធនាគារជាតិនៃកម្ពុជាមានកិច្ចសហប្រតិបត្តិការល្អ ជាមួយធនាគារពិភពលោក ដែលក្នុងនោះ មានការគ្រប់គ្រងទុនបម្រុងអន្តរជាតិផងដែរ ហើយធនាគារពិភពលោក បានផ្តល់ជំនួយបច្ចេកទេស និងកសាងសមត្ថភាពជំនាញ ដល់មន្ត្រីធនាគារជាតិនៃកម្ពុជា។ បច្ចុប្បន្ន ទុនបម្រុងអន្តរជាតិរបស់កម្ពុជាមានចំនួនប្រមាណ ២១ ប៊ីលានដុល្លារអាមេរិក ដែលជាកម្រិតខ្ពស់ជាងកម្រិតអប្បបរមាដែលប្រទេសកំពុងអភិវឌ្ឍន៍គួរមាន។ ធនាគារជាតិនៃកម្ពុជា ក៏បានយកចិត្តទុកដាក់លើការប្រែប្រួលអាកាសធាតុ ដោយបានវិនិយោគទុនបម្រុងមួយផ្នែកលើវិស័យដែលគិតគូរពីបរិស្ថាន សង្គម និងអភិបាលកិច្ច (ESG) និងបានបញ្ចូល ESG ទៅក្នុងការណែនាំនៃការវិនិយោគ៕អត្ថបទ៖ យ៉ាម៉ង់

កម្ពុជានាំចេញកសិផលទៅទីផ្សារកូរ៉េខាងត្បូងជាងមួយពាន់តោន ក្នុងរយៈពេលបីត្រីមាសឆ្នាំនេះ

ភ្នំពេញ ៖ ក្រៅពីផលិតឧស្សាហកម្ម មានសំលៀកបំពាក់ និងគ្រឿងបង្គុំអគ្គិសនី កម្ពុជាបាននាំចេញផលិតផលកសិកម្មក្នុងបរិមាណ ១ ២០០ តោន ទៅទីផ្សារប្រទេសកូរ៉េខាងត្បូង ក្នុងរយៈពេល ៩ខែឆ្នាំ២០២១នេះ ។ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានបង្ហាញរបាយការណ៍លទ្ធផលនៃការនាំចេញកសិផលទៅកាន់សាធារណរដ្ឋកូរ៉េ នៅឆ្នាំ២០១៩ ឆ្នាំ២០២០ និង ៩ខែឆ្នាំ២០២១។សម្រាប់ការនាំចេញក្នុងរយៈពេល៩ខែ ឆ្នាំ២០២១ បរិមាណផលិតផលកសិកម្មទៅទីផ្សារប្រទេសកូរ៉េខាងត្បូង កើនឡើង ប្រមាណ ១០៦ភាគរយ ធៀបនឹងរយពេលដូចគ្នាកាលពីឆ្នាំមុន។ផលិតផលកសិកម្មដែលនាំមុខគេ ទៅទីផ្សារប្រទេសកូរ៉េខាងត្បូង គឺជ័រកៅស៊ូ និងស្វាយស្រស់ ដែលមានបរិមាណ ៩៥០តោន និង១២៩តោន។ ផលិតផលកសិកម្មដទៃទៀត មានដូចជា ស្ករត្នោត គ្រាប់ស្វាយចន្ទី ពោត ដំណាប់ស្វាយ ជាដើម។ដោយឡែកសម្រាប់ការនាំចេញសរុប នៃផលិតផលកសិកម្ម កាលពីឆ្នាំ២០២០កន្លងទៅ សម្រេចបានប្រមាណតែជា៥០០តោនប៉ុណ្ណោះ ធ្លាក់ចុះពីបរិមាណនៃការនាំចេញសរុប កាលពីឆ្នាំ២០១៩ ដែលមានសម្រេចបាន ជាង៦ពាន់តោន។ទាំងរាជរដ្ឋាភិបាល និងវិស័យឯកជន បានដាក់ក្តីរំពឹងថា បរិមាណនៃនាំការនាំចេញរបស់កម្ពុជា នឹងកើនឡើង ដោយសារកម្ពុជានិងប្រទេសកូរ៉េខាងត្បូង ទើបតែបានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី។ ក្នុងរយៈពេល៩ខែ ឆ្នាំ២០២១នេះ ទំហំពាណិជ្ជកម្មទ្វេភាគីកម្ពុជាកូរ៉េ មានចំនួនទឹកប្រាក់ជាង ៥៧៨ លានដុល្លារអាមេរិក កើនឡើងជាង១១ភាគរយ ក្នុងនោះទីផ្សារនាំចេញរបស់កម្ពុជាមានចំនួនជិត ១៤៤ លានដុល្លារអាមេរិក កើនឡើងជិត ៤ ភាគរយ ខណៈការនាំចូលមានចំនួនជាង ៤៣៤ លានដុល្លារអាមេរិក កើនឡើងជាង ១៤ភាគរយ បើរយៈពេលដូចគ្នាឆ្នាំ ២០២០ ៕អត្ថបទ៖ វណ្ណៈ

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងចូលជាធរមាននៅដើមឆ្នាំ២០២២

ភ្នំពេញ ៖ ប្រទេសកម្ពុជា និងសាធារណរដ្ឋកូរ៉េ បានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីនៅព្រឹក ថ្ងៃទី២៦ ខែតុលានេះ។ គិតចាប់ពីចុះហត្ថលេខាជាផ្លូវការលើកិច្ចព្រមព្រៀងពាណិជ្ជកម្មសេរីរវាងកម្ពុជា-កូរ៉េ គ្រោងនឹងចូលជាធរមាន នៅដើមឆ្នាំ២០២២ខាងមុខ ពោលគឺរយៈពេល៦០ថ្ងៃ ដែលភាគីទាំងពីរត្រូវ បញ្ចប់នីតិវិធីផ្ទៃក្នុងរៀងៗខ្លួន។ពិធីចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី កម្ពុជា កូរ៉េខាងត្បូង ត្រូវបានធ្វើឡើងតាម ប្រព័ន្ធអនឡាញ ដោយភាគីកម្ពុជា តំណាងដោយឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា និងឯកឧត្តម YEO Han-Koo រដ្ឋមន្ត្រីពាណិជ្ជកម្ម និងឧស្សាហកម្ម ថាមពល តំណាងសាធារណរដ្ឋកូរ៉េ។ឯកឧត្តម ប៉ែន សុវិជាតិ អនុរដ្ឋលេខាធិការ និងជាមន្រ្តីអ្នកនាំពាក្យក្រសួងពាណិជ្ជកម្ម បានមានប្រសាសន៍ ប្រាប់ទូរទស្សន៍ព័ត៌មាន ប៊ីធីវីថា កិច្ចព្រមព្រៀងនេះ មានចំនួន ១០ជំពូក និង ១៣១មាត្រា រួមទាំងបុព្វកថា និងឧបសម្ព័ន្ធដែលគ្របដណ្តប់លើ ពាណិជ្ជកម្មទំនិញ រួមមានស្តង់ដារ បទប្បញ្ញត្តិបច្ចេកទេស និងនីតិវិធីវាយ តម្លៃភាពអនុលោម វិធានការអនាម័យ និងភូតគាមអនាម័យ និងគ្របដណ្តប់ផងដែរលើឧបាស្រ័យពាណិជ្ជកម្ម វិធានដើមកំណើត នីតិវិធីគយ និងកិច្ច សម្រួលពាណិជ្ជកម្ម កិច្ចសហប្រតិបត្តិការសេដ្ឋកិច្ច តម្លាភាព យន្តការដោះ ស្រាយវិវាទ អញ្ញត្រកម្ម ការរៀបចំស្ថាប័ន និងអវសានប្បញ្ញត្តិ។ឯកឧត្តមបានបន្ថែមថា តាមរយៈកិច្ចព្រមព្រៀងនេះដែរ នឹងជំរុញកំណើននៃការនាំចេញ កំណើនផលទុន សរុបក្នុងស្រុក និងកំណើនឱកាសការងារ ព្រមទាំងជួយស្តារឡើងវិញនូវសេដ្ឋកិច្ចរបស់ប្រទេសទាំងពីរ បានឆាប់រហ័ស ដែលទទួលរងផលប៉ះពាល់ជំងឺកូវីដ-១៩។ ជាមួយគ្នានេះ ឯកឧត្តមអំពាវនាវដល់វិស័យឯកជន និងធុរកិច្ចជន ឲ្យខិតខំធ្វើយ៉ាងណាពង្រឹងសមត្ថភាពនូវការ ផលិត ជាពិសេសគុណភាពទំនិញ ពីព្រោះយើងនឹង អាចឈានទៅរកគុណភាពជាលក្ខណៈអន្តរជាតិនាពេល អនាគត។សូមបញ្ជាក់ថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ មានគោលបំណងពង្រឹងភាពជាដៃគូសេដ្ឋកិច្ច និងពង្រីក ការធ្វើសេរីភាវូបនីយកម្មពាណិជ្ជកម្មទ្វេភាគីឲ្យកាន់តែទំលំទូលាយ ដោយផ្ដល់ប្រយោជន៍ឲ្យគ្នាទៅវិញទៅមក សំដៅ បង្កើនផលប្រយោជន៍សេដ្ឋកិច្ច និងសុខមាលភាព ប្រជាជន និងធុរកិច្ចនៃប្រទេសទាំងពីរ។គិតត្រឹមរយៈពេល ៨ខែ ឆ្នាំ២០២១នេះ ទំហំពាណិជ្ជកម្មទ្វេរភាគីកម្ពុជា-កូរ៉េ សម្រេចបានចំនួនប្រមាណជាង ៥១៤លានដុល្លារ កើនឡើងជាង ១១% ប្រៀបធៀបនឹងរយៈពេលដូចគ្នានៅឆ្នាំ២០២០ ដោយក្នុងនោះទំនិញ ដែលនាំចេញពីកម្ពុជា មានដូចជា ភេសជ្ជៈ ឱសថ រថយន្តដឹកទំនិញ គ្រឿងអេឡិកត្រូនិក គ្រឿងសំអាង គ្រឿងម៉ាស៊ីន និងផលិតផលប្លាស្ទិកជាដើម។កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ក្លាយជាកិច្ចព្រមព្រៀងពាណិជ្ជកម្មសេរីទ្វេភាគីទីពីរ របស់ប្រទេសកម្ពុជា បន្ទាប់ពីកិច្ចព្រមព្រៀងពាណិជ្ជកម្មសេរីកម្ពុជា ជាមួយនឹងសាធារណរដ្ឋប្រជាមានិតចិន ដែលទើបតែត្រូវបានផ្តល់ សច្ចាប័នកាលពីពេលថ្មីៗនេះ៕ អត្ថបទ ៖ ឈិត បូរ៉ាវី

កូរ៉េខាងត្បូង នឹងក្លាយជាទីផ្សារធំមួយសម្រាប់នាំចេញទំនិញពីកម្ពុជា

ភ្នំពេញ ៖ វិស័យឯកជន ចាត់ទុកប្រទេសកូរ៉េ ជាទីផ្សារធំមួយបន្ទាប់ពីប្រទេសចិន សម្រាប់ទំនិញរបស់កម្ពុជា ដែលជាផ្នែកមួយជួយលើកកម្ពស់ខ្សែផលិតកម្មក្នុងស្រុក និងកសិករជាអ្នកដាំដុះបន្ថែមទៀត។ ការលើកឡើង បែបនេះ គឺបន្ទាប់ពីប្រទេសកម្ពុជា និងប្រទេសកូរ៉េខាងត្បូង បានចុះកិច្ចព្រមព្រៀងពាណិជ្ជកម្មសេរីទ្វេភាគជា ផ្លូវការនៅថ្ងៃទី២៦ ខែតុលានេះ។ឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុន អេមរុរាយ៍ ថ្លែងប្រាប់ភ្នាក់ ងារអ្នកយកព័ត៌មាន BTV នៅថ្ងៃទី២៦ ខែតុលា ឆ្នាំ២០២២ នេះថា ពាក់ព័ន្ធការនាំអង្ករទៅកាន់ប្រទេសកូរ៉េ កម្ពុជា អនុវត្តតាមកូតានៃការបង់ពន្ធ ប៉ុន្តែបន្ទាប់កិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េខាងត្បូងនេះតទៅ គឺបានបង្ហាញនូវចំណុចវិជ្ជមាន ដើម្បីឲ្យយើងមានលទ្ធភាពចរចានៅថ្ងៃខាងមុខ និងមានលទ្ធភាពដេញថ្លៃផ្គត់ផ្គង់អង្ករទៅកាន់ប្រទេសកូរ៉េ ព្រោះទីផ្សារកូរ៉េគឺជាទីផ្សារធំមួយបន្ទាប់ពីទីផ្សារចិន។ចំណែកលោក ងួន ឡាយ ប្រធានសមាគមលើកកម្ពស់ម្រេចកំពត សាទរចំពោះរាជរដ្ឋាភិបាល ដែលបានខិតខំ ប្រឹងប្រែងពង្រីកទីផ្សារ ដើម្បីជម្រុញនាំចេញផលិតផលរបស់កម្ពុជា និងផ្នែកមួយជួយលើកកម្ពស់ផលិតផលក្នុង ស្រុក ជាពិសេសផលិតផលម្រេចទៅកាន់ទីផ្សារកូរ៉េឲ្យបានកាន់តែច្រើនថែមទៀត។ដោយឡែកពាក់ព័ន្ធវិស័យឧស្សាហកម្ម, លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា GMAC បានថ្លែងថា ស្ថិតនៅក្នុងរយៈពេលប៉ុន្មានខែចុងក្រោយនេះ ចំពោះវិស័យឧស្សាហកម្មកាត់ដេរកម្ពុជា ទទួលបានការកុម្ម៉ង់ទិញពីខាងក្រៅយ៉ាងច្រើន ដែលធ្វើឲ្យកំណើននៃការនាំចេញក៏បានហក់ឡើង។ដោយឡែកទីផ្សារកូរ៉េវិញ សម្រាប់ការនាំចេញកន្លងមានទ្រង់ទ្រាយតិចតូច ដោយកម្ពុជាបានអនុវត្តនៃការនាំចេញ តាមកិច្ចព្រមព្រៀងពាណិជ្ជកម្មសេរីតំបន់អាស៊ាន-កូរ៉េ។ ចំណែកការចុះកិច្ចព្រៀងពាណិជ្ជកម្មសេរីរវាងកម្ពុជា-កូរ៉េនេះវិញ នឹងអាចជួយជំរុញថែមទៀត នៃការនាំចេញផលិតផលកាត់ដេរទៅកាន់ប្រទេសនោះ។សូមបញ្ជាក់ថា កិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េខាងត្បូងនេះ នឹងជំរុញកំណើននៃការនាំចេញកំណើនផលទុនសរុបក្នុងស្រុក និងកំណើនឱកាសការងារ ព្រមទាំងជួយស្តារឡើងវិញនូវសេដ្ឋកិច្ចរបស់ប្រទេសទាំងពីរបានឆាប់រហ័ស ដែលទទួលរងផលប៉ះពាល់ជំងឺកូវីដ-១៩ នឹងពង្រីកបន្ថែមការធ្វើសេរីភាវូបនីយកម្មទីផ្សារ បន្ថែមពីលើកិច្ចព្រមព្រៀងពាណិជ្ជកម្មសេរីអាស៊ាន-កូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។នៅក្នុងរយៈពេលបីត្រីមាសឆ្នាំ២០២១នេះ ទំហំពាណិជ្ជកម្មទ្វេភាគីកម្ពុជាកូរ៉េ មានចំនួនទឹកប្រាក់ ជាង ៥៧៨ លានដុល្លារអាមេរិក កើនឡើងជាង ១១ភាគរយ ក្នុងនោះ កម្ពុជានាំចេញទំនិញសរុប ១៤៤ លានដុល្លារអាមេរិក កើនឡើងជិត ៤ ភាគរយ ទៅប្រទេសកូរ៉េខាងត្បូង ខណៈការនាំចូលមានចំនួនជាង ៤៣៤ លានដុល្លារអាមេរិក កើនឡើងជាង ១៤ភាគរយ បើរយៈពេលដូចគ្នាឆ្នាំ ២០២០ ៕ អត្ថបទ៖ សុន រ៉ាឌី

រាជរដ្ឋាភិបាល គ្រោងបោះប័ណ្ណបំណុលរដ្ឋក្នុងទំហំ៣០០លានដុល្លារ នៅឆ្នាំក្រោយ

ភ្នំពេញ ៖ នៅឆ្នាំ២០២២ រាជរដ្ឋាភិបាល គ្រោងនឹងបោះផ្សាយលក់មូលបត្ររដ្ឋជាលើកដំបូងចំនួន៣០០លានដុល្លារ ដើម្បីធ្វើហិរញ្ញប្បទានគាំទ្រគម្រោងវិនិយោគសាធារណៈ សំដៅលើស្ទួយកំណើន និងផលិតភាពសេដ្ឋកិច្ច។ក្រសួងសេដ្ឋកិច្ច និងហិរញ្ញវត្ថុ បានផ្សព្វផ្សាយនូវខ្លឹមសារសង្ខេបប្រតិបត្តិនៃសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២ ដែលត្រូវបានកិច្ចប្រជុំពេញអង្គក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា អនុម័តទាំងស្រុង កាលពីថ្ងៃទី២២ ខែតុលា ឆ្នាំ២០២១។ការបោះលក់មូលបត្របំណុលរដ្ឋលើកដំបូងនេះ គឺជាការចូលរួមកាត់បន្ថយកម្ចីឥណទានពីក្រៅប្រទេស ដោយរាជរដ្ឋាភិបាល ផ្តោតលើការគៀង គរប្រភពហិរញ្ញប្បទានពីខាងក្នុងប្រទេស។ទន្ទឹមនឹងនេះ រាជរដ្ឋាភិបាល បានកំណត់ទំហំនៃការខ្ចីប្រាក់ពីដៃគូអភិវឌ្ឍន៍សម្រាប់ឆ្នាំ២០២២ ក្នុងកម្រិត ១ ៦០០ លាន SDR ។ការបោះពុម្ពផ្សាយលក់មូលបត្ររដ្ឋលើកដំបូង និងការខ្ចីក្នុងទំហំខាងលើនេះ នឹងមិនបង្កើតជាបន្ទុកបំណុលវ័ណ្ឌករដល់កម្ពុជទេ ពោលគីជាទិដ្ឋភាពបច្ចេកទេស ស្ថានភាពបំណុលសាធារណៈកម្ពុជានៅតែត្រូវបានវាយតម្លៃថាមាន ចីរភាព និងហានិភ័យកម្រិតទាប ដដែល ដោយរាល់សូចនាករបំណុលគន្លឹះៗរបស់កម្ពុជា សុទ្ធតែស្ថិតនៅក្រោមអនុបាតគោលទាំងអស់។សេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២ ត្រូវបានរៀបចំឡើងនៅក្នុងបរិការណ៍ ដែលកម្ពុជាកំពុងស្ថិតនៅកណ្តាលនៃវិបត្តិកូវីដ-១៩ នៅឡើយ បន្ទាប់ពី ព្រឹត្តិការណ៍សហគមន៍ ២០ កុម្ភៈ ២០២១ និងការបន្តរីករាលដាលនៃមេរោគកូរ៉ូណាបំប្លែងថ្មីជាបន្តបន្ទាប់ ដែលបានបង្កឱ្យមានផលប៉ះពាល់អវិជ្ជមានធ្ងន់ធ្ងរដល់សុខភាព សង្គម សេដ្ឋកិច្ច និងជីវភាពរស់នៅរបស់ប្រជាពលរដ្ឋ។រាជរដ្ឋាភិបាលបាន និងកំពុងបញ្ចេញចំណាយអន្តរាគមន៍យ៉ាងច្រើនទប់ទល់នឹងវិបត្តិនេះ ព្រមជាមួយនឹងការត្រៀមដាក់ចេញនូវ «យុទ្ធសាស្ត្រស្ដារ និង ជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីថ្មី» សំដៅលើកស្ទួយជីវភាពរបស់ប្រជាជនទូទៅ៕អត្ថបទ៖ វណ្ណៈ

វិស័យសេវាកម្ម រំពឹងនឹងងើបទៅរកប្រក្រតីភាព និងមានកំណើនល្អឡើងវិញ

ភ្នំពេញ ៖ វិស័យឯកជន សង្ឃឹមជឿជាក់យ៉ាងមុតមាំថា វិស័យសេវាកម្មនៅកម្ពុជា នឹងអាចងើបវិលត្រឡប់ទៅរកប្រក្រតីភាព និងមានកំណើនល្អឡើងវិញ គាំទ្រដោយលើផ្នែកសណ្ឋាគារ ភោជនីយដ្ឋាន វិស័យទេសចរណ៍ និងការគាំទ្រដោយវិស័យផ្សេងៗទៀត ។លោក ឌិន សុមេធារិទ្ធ ប្រធានសមាគមសណ្ឋាគារកម្ពុជា ថ្លែងប្រាប់ភ្នាក់ងារអ្នកយកព័ត៌មាន ជុំវិញការត្រៀមខ្លួន និងការបើកវិស័យសេវាកម្មឡើងវិញ នៅថ្ងៃទី ២៥ ខែ តុលា ឆ្នាំ២០២១ នេះថា វិស័យសេវានៅកម្ពុជា ជាពិសេសលើផ្នែកសណ្ឋាគារ ភោជនីយដ្ឋាន និងវិស័យទេសចរណ៍ផ្សេងៗទៀត នឹងចាប់ផ្តើមងើបឡើងវិញជាបណ្តើរៗ បន្ទាប់ពីរាជរដ្ឋាភិបាលបានបើកប្រទេសកម្ពុជាឡើងវិញ តាមគន្លងប្រក្រតីភាពថ្មី ដោយបានសម្រួលការធ្វើចត្តាឡីស័កពីរយៈពេល ១៤ថ្ងៃ មកនៅត្រឹម ៣ថ្ងៃ។ វិស័យនេះរំពឹងនឹងកើនឡើងល្អថែមទៀត ខណៈប្រទេសថៃនឹងបើកប្រទេសរបស់ខ្លួនឡើងវិញ នៅថ្ងៃទី ១ វិច្ឆិកា ខាងមុខនេះ ហើយតាមរយៈនៃការបើកប្រទេសនោះ កម្ពុជានឹងសម្រួលទិសដៅឲ្យស្របនឹងប្រទេសថៃ ដែលហៅថា (Visa two country) មានន័យថា ភ្ញៀវទេសចរណ៍សុំវីសារមកប្រទេសកម្ពុជា អាចបន្តទៅប្រទេសថៃ និងពីប្រទេសថៃអាចបន្តមកប្រទេសកម្ពុជាបាន ។កម្ពុជាសង្ឃឹមថា វិស័យសេវាកម្មនឹងមានសញ្ញាល្អ និងអាចងើបឡើងវិលត្រឡប់ទៅរកភាពប្រក្រតីឡើងវិញ ដែលគាំទ្រដោយការងើបឡើងវិញលើផ្នែកសណ្ឋាគារ និងភោជនីយដ្ឋាន វិស័យទេសចរណ៍ និងវិស័យសេវាកម្មផ្សេងៗទៀត។ក្នុងនោះចំពោះផ្នែកសណ្ឋាគារដែលបានបិទទ្វារជាច្រើនខែកន្លងមកនេះ បច្ចុប្បន្នបានកំពុងរៀបចំត្រៀមខ្លួនជាបណ្តើរៗឡើងវិញ បន្ទាប់ពីរាជរដ្ឋាភិបាលបើកប្រទេសកម្ពុជាជាបណ្តើរៗ និងស្របពេលរាជរដ្ឋាភិបាលសម្រេចអនុញ្ញាតឲ្យមានជើងហោះហើរត្រង់ ពីប្រទេសម៉ាឡេស៊ី ឥណ្ឌូនេស៊ី និងហ្វីលីពីន មកប្រទេសកម្ពុជានេះផងដែរ។លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ថ្លែងថា បន្ទាប់ពីមានសេចក្តីប្រកាស ពីប្រមុខរាជរដ្ឋាភិបាល ប្រតិបត្តិករកម្ពុជាបានផ្ញើសេចក្តីប្រកាសព័ត៌មានទាំងនោះ ជូនទៅដៃគូរក្រៅប្រទេស ក្នុងនោះ ពួកគេបានចាប់អារម្មណ៍យ៉ាងខ្លាំង អំពីការមកទស្សនានៅកម្ពុជា ហើយបច្ចុប្បន្នយើងក៏មាន ភ្ញៀវទេសចរនៅក្នុងដៃខ្លះៗផងដែរ ដោយពួកគាត់ទាំងនោះរង់ចាំតែពេលវេលាចូលមកទស្សនានៅកម្ពុជា តែប៉ុណ្ណោះ។សូមបញ្ជាក់ថា តាមសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២២ រំពឹងថា វិស័យសេវាកម្មនឹងបន្តកើនឡើងក្នុងអត្រា៤,១% ក្នុងឆ្នាំ ២០២២ ពីកំណើនត្រឹម ០,៣% ក្នុងឆ្នាំ ២០២១ ដោយសារការងើបឡើងវិញសន្សឹមៗនៃអនុវិស័យសណ្ឋាគារ និងភោជនីយដ្ឋាននិងវិស័យគាំទ្រទេសចរណ៍ផ្សេងទៀត៕អត្ថបទ៖ សុន រ៉ាឌី

ការនាំចេញ-នាំចូលនៃតំបន់សេដ្ឋកិច្ចពិសេសព្រះសីហនុ កើនឡើងក្នុងរយៈពេល៩ខែ

ព្រះសីហនុ ៖ តំបន់សេដ្ឋកិច្ចពិសេសព្រះសីហនុកំពុងអភិវឌ្ឍន៍ស្ថិតស្ថេរដោយឆ្លុះបញ្ចាំងពីកំណើននាំការនាំទំនិញចេញ-ចូល ក្នុងតំបន់សេដ្ឋកិច្ចនេះ មានកំណើន នៅក្នុងរយៈពេលបីត្រីមាសឆ្នាំ២០២១។យោងតាមស្ថិតិចុងក្រោយចាប់ពីខែមករាដល់ខែកញ្ញា ឆ្នាំនេះ សហគ្រាសនៅតំបន់សេដ្ឋកិច្ចពិសេស ក្រុងព្រះសីហនុទទួលបានបរិមាណ នាំចូលនិង នាំចេញសរុបចំនួន ១,៥ ពាន់លានដុល្លារអាមេរិកពោល គឺកើនឡើង៤០,៩ បើធៀបនឹងរយៈពេលដូចគ្នានៃឆ្នាំកន្លងមក។ទិន្នន័យឱ្យដឹងថា តម្លៃនៃការនាំចេញ និងនាំចូល ផលិតផលកើនឡើងដល់ ១,៥ ពាន់លានដុល្លារ បើធៀបនឹងរយៈពេលដូចគ្នាឆ្នាំ ២០២០ ដែលមានចំនួន ១,១ ពាន់លានដុល្លារ។យោងតាម SSEZ សមិទ្ធផលទាំងនេះ គឺមិនអាចកាត់ផ្តាច់ចេញពីវិធានការទប់ស្កាត់ជំងឺកូវីដ ១៩ ដ៏មានប្រសិទ្ធភាពរបស់រដ្ឋាភិបាលកម្ពុជា និងការខំប្រឹងប្រែងរបស់សហគ្រាស និងបុគ្គលិកកម្មករក្នុងតំបន់សេដ្ឋកិច្ចពិសេសក្រុងព្រះសីហនុនោះទេ។ក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ១៨ ខែតុលា ឆ្នាំ ២០២១ បានចុះហត្ថលេខាលើកិច្ចសន្យាផ្តល់សេវាកម្មរៀបចំផែនការមេ ដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណងនៅកម្ពុជា។ផែនការមេនេះ ក៏នឹងក្លាយជាផែនទីចង្អុលផ្លូវសម្រាប់សម្របសម្រួលការអនុវត្តរាល់សកម្មភាពរវាងភាគីពាក់ព័ន្ធរួមទាំងរដ្ឋ ឯកជន និងដៃគូអភិវឌ្ឍន៍នានាដោយឈរលើគោលដៅរួម និងការទទួលខុសត្រូវច្បាស់លាស់តាមរយៈការកំណត់ទិសដៅសម្រាប់ការកៀរគរ, ទាក់ទាញ និងប្រមូលផ្តុំប្រភពធនធាន សកម្មភាពធុរកិច្ច និងការវិនិយោគ ដើម្បីសម្រេចឱ្យបាននូវចក្ខុវិស័យរយៈពេលវែងរបស់រាជរដ្ឋាភិបាល។មានទីតាំងស្ថិតនៅជិតអាកាសយានដ្ឋានអន្តរជាតិព្រះសីហនុ និងកំពង់ផែស្វ័យតទឹកជ្រៅព្រះសីហនុ តំបន់សេដ្ឋកិច្ចពិសេសព្រះសីហនុ ទទួលបានគម្រោងវិនិយោគរោងចក្រប្រមាណ ១០០រោងចក្រ សម្រាប់ផលិតនាំចេញទៅក្រៅប្រទេស៕អត្ថបទ៖ វណ្ណៈ

កម្ពុជានាំចេញផលិតផលមិនមែនកាត់ដេរកើនឡើងជាង ៥០ភាគរយ រយៈពេលបីត្រីមាស

ភ្នំពេញ ៖ កម្ពុជា បាននាំចេញទំនិញជាផលិតផលមិនមែនកាត់ដេរ មានទឹកប្រាក់ប្រមាណជាង ៣,៣៧ ពាន់លានក្នុងរយៈពេល ៩ខែឆ្នាំ ២០២១ កើនជាង ៥០ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលភាគច្រើនបានពីចំណែកទីផ្សារនៅអាមេរិក និងសហគមន៍អឺរ៉ុប។សេចក្តីប្រកាសព័ត៌មាននៃកិច្ចប្រជុំរបស់អគ្គនាយកដ្ឋានគយ និងរដ្ឋាករកម្ពុជា កាលពីសប្តាហ៍មុន បង្ហាញថា ចាប់ពីខែមករា-ខែកញ្ញា ឆ្នាំ ២០២១ កម្ពុជាបាននាំចេញផលិតផលវិនិយោគមិនមែនកាត់ដេរក្នុងតម្លៃសរុប ៣ ៣៧៩លានដុល្លារ កើនឡើង ១ ១៤០ លានដុល្លារ ឬស្មើនឹង ៥០,៩ ភាគរយបើធៀបនឹងរយៈពេលដូចគ្នាឆ្នាំ ២០២០។អគ្គនាយកដ្ឋានគយ និងរដ្ឋាករកម្ពុជា លើកឡើងថា តួលេខកំណើននៃការនាំចេញផលិតផលវិនិយោគមិនមែនកាត់ដេរ បានឆ្លុះបញ្ចាំងពីលទ្ធផលនៃការអនុវត្តគោលនយោបាយរបស់រាជរដ្ឋាភិបាលក្នុងការធ្វើពិពិធកម្មមូលដ្ឋានវិស័យឧស្សាហកម្មនៅកម្ពុជា និងការវិលត្រឡប់មករកភាពល្អប្រសើរនៃទីផ្សារសហរដ្ឋអាមេរិក និងសហគមន៍អឺរ៉ុប។ ផលិតផលមិនមែនកាត់ដេរ រួមមាន កង់ គ្រឿងបំណែកអេឡិចត្រូនិក បង្គុំខ្សែភ្លើង និងគ្រឿងបន្លាស់រថយន្ត អំពូលលម្អ ផលិតផលឈើប្រណីត ផលិតផលប្លាស្ទិក ស្បែកសត្វកែច្នៃ និងផលិតផលផ្សេងៗទៀត។ក្នុងរយៈពេល ៩ ខែឆ្នាំ ២០២១ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគសរុប ១៣៤ ដែលមានទុនវិនិយោគសរុប ៣,៣ ពាន់លានដុល្លារ ក្នុងនោះ ការវិនិយោគនៅក្រៅតំបន់សេដ្ឋកិច្ចពិសេស មាន ១០១ គម្រោង ក្រោមទុនវិនិយោគ ១,៤ ពាន់លានដុល្លារ និងក្នុងតំបន់សេដ្ឋកិច្ចពិសេស ៣៣ គម្រោង ស្មើនឹងទឹកប្រាក់ ១,៩ ពាន់លានដុល្លារ។CDC បានឱ្យដឹងទៀតថា គម្រោងភាគច្រើនគឺផ្តោតលើវិស័យកសិកម្ម និងកសិឧស្សាហកម្ម ឧស្សាហកម្ម ទេសចរណ៍ និងហេដ្ឋារចនាសម្ព័ន្ធ។ ក្នុងឆ្នាំ ២០២០ កម្ពុជាបាននាំចេញក្នុងទឹកប្រាក់ ១៧ ២១៥ លានដុល្លារ កើនឡើង ១៦,៧ ភាគរយធៀបនឹងឆ្នាំ ២០១៩ ដែលមាន ១៤ ៧៤៨ លានដុល្លារ៕អត្ថបទ៖ វណ្ណៈ

ពាណិជ្ជកម្មទ្វេភាគីកម្ពុជា កូរ៉េខាងត្បូង សម្រេចបានជាង៧២០លានដុល្លាររយៈពេលបីត្រីមាស

ភ្នំពេញ ៖ ការដោះដូរពាណិជ្ជកម្មទ្វេភាគីរវាងប្រទេសកម្ពុជា និងប្រទេសកូរ៉េខាងត្បូង សម្រេចបានទឹកប្រាក់សរុប ៧២០លានដុល្លារ ក្នុងរយៈពេលបីត្រីមាស ឆ្នាំ២០២១ កើនឡើង ១០,៣ភាគរយ ធៀបនឹងរយៈពេលដូចគ្នាកាលពីឆ្នាំមុន។តួលេខពាណិជ្ជកម្មរបស់សមាគមពាណិជ្ជកម្មអន្តរជាតិកូរ៉េ (KITA) បង្ហាញថា ចាប់ពីខែមករា ដល់ខែកញ្ញាកម្ពុជា បាននាំចេញទំនិញសរុប ទៅកាន់ទីផ្សារប្រទេសកូរ៉េខាងត្បូង មានតម្លៃ ២៥៩ លានដុល្លារ កើនឡើង ៥,២ភាគរយ ធៀបនឹងរយៈពេលដូចគ្នាកាលពីឆ្នាំមុន។ដោយឡែក កម្ពុជា នាំចូលទំនិញពីកូរ៉េខាងត្បូង កើនឡើង ១៣,៤ភាគរយ ដែលមានទឹកប្រាក់សរុប ៤៦១លានដុល្លារ។ការដោះដូរពាណិជ្ជកម្មនេះ ធ្វើឱ្យកម្ពុជា ឱនភាពជញ្ជីងពាណិជ្ជកម្មជាមួយប្រទេសកូរ៉េខាងត្បូង ២០២លានដុល្លារ។រដ្ឋាភិបាលប្រទេសទាំងពីរ គ្រោងនឹងចុះហត្ថលេខាលើសេចក្តីព្រាងកិច្ចព្រមព្រៀងពាណិជ្ជកម្មសេរីទ្វេភាគីនៅសប្តាហ៍ក្រោយនេះ។កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងក្លាយជាកិច្ចព្រមព្រៀងពាណិជ្ជកម្មសេរីទី២ បន្ទាប់ពីកិច្ចព្រមព្រៀងពាណិជ្ជកម្មសេរីកម្ពុជា-ចិន។កម្ពុជាគឺជាគោលដៅនាំចេញទី៦០ របស់កូរ៉េដែលមានទំនិញសំខាន់ៗដូចជា ភេសជ្ជៈ គ្រឿងអេឡិចត្រូនិក ឱសថ និងរថយន្តដឹកទំនិញ។ ចំណែកឯកម្ពុជា វិញបាននាំទំនិញទៅកូរ៉េខាងត្បូងភាគច្រើនគឺជា សំលៀកបំពាក់ ផលិតផលស្បែកជើង និងកាបូបជាដើម៕អត្ថបទ ៖ វណ្ណៈ

ខេត្តព្រះសីហនុ នឹងក្លាយជាក្បាលម៉ាស៊ីនថ្មីមួយទៀត ដើម្បីជំរុញកំណើនសេដ្ឋកិច្ចជាតិកាន់តែរីកចម្រើន

ភ្នំពេញ ៖ ដោយពិនិត្យឃើញពីសក្ដានុពលរបស់ខេត្តជាប់មាត់សមុទ្រពិសេសខេត្តព្រះសីហនុ រដ្ឋាភិបាលកម្ពុជាបានកំណត់ចក្ខុវិស័យប្រែក្លាយខេត្តនេះ ឱ្យទៅជាតំបន់សេដ្ឋកិច្ចគំរូពហុបំណង និងជាប៉ូលសេដ្ឋកិច្ចដ៏សំខាន់មួយក្នុងការទាក់ទាញ និងស្រូបយកការវិនិយោគពីបរទេស ដែលអាចឈានឆ្ពោះទៅជាក្បាលម៉ាស៊ីនមួយថ្មី សម្រាប់ជំរុញកំណើនសេដ្ឋកិច្ចជាតិឲ្យរីកលូតលាស់ទៅមុខឥតឈប់ឈរ។ប្រភពពីក្រសួងពាណិជ្ជកម្ម កាលពីល្ងាចថ្ងៃទី១៩ តុលា ឆ្នាំ២០២១កន្លងទៅ ក្រោយចប់ពិធីចុះហត្ថលេខាលើកិច្ចសន្យាផ្តល់សេវាកម្មរៀបចំផែនការមេ ដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង ក្រោមវត្តមានរបស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលធ្វើឡើងតាមរយៈប្រព័ន្ធវីដេអូហ្សូម បានឲ្យដឹងថា ការរៀបចំផែនការមេដើម្បីអភិវឌ្ឍខេត្តព្រះសីហនុ គឺជាផ្នែកមួយនៃការគិតគូរជាយុទ្ធសាស្ត្រក្នុងរយៈពេលមធ្យម និងវែងរបស់រដ្ឋាភិបាលកម្ពុជា ដើម្បីជំរុញកិច្ចអភិវឌ្ឍប្រកបដោយចីរភាព និងបរិយាប័ន្ន ស្របតាមគោលនយោបាយអភិវឌ្ឍវិស័យឧស្សាហកម្មកម្ពុជា២០១៥-២០២៥, ដើម្បីសម្រេចឱ្យបាននូវចក្ខុវិស័យកម្ពុជាក្នុងការប្រែក្លាយជាប្រទេសចំណូលមធ្យមកម្រិតខ្ពស់ក្នុងឆ្នាំ២០៣០ និងជាប្រទេសចំណូលខ្ពស់ក្នុងឆ្នាំ២០៥០។មានប្រសាសន៍ក្នុងពិធីចុះហត្ថលេខានាឱកាសនោះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបញ្ជាក់ថា រដ្ឋាភិបាលបានជ្រើសយកវិទ្យាស្ថាននគរូបនីយកម្ម និងឌីសាញស៊ិនជិន ឲ្យរៀបចំផែនការមេអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង ដោយសារវិទ្យាស្ថាននេះ មានបទពិសោធន៍ជាង៣០ឆ្នាំ និងបានរៀបចំប្រមាណ ៥ ៨០០ គម្រោងនៅលើពិភពលោក ជាពិសេសជាស្ថាប័នដឹកមុខក្នុងការរៀបចំផែនការអភិវឌ្ឍទីក្រុងស៊ិនជិនផងដែរ។ ឯកឧត្តម បន្តថា ដើម្បីសម្រេចឱ្យបាននូវចក្ខុវិស័យនេះ វិទ្យាស្ថាននគរូបនីយកម្ម និងឌីសាញស៊ិនជិនបានកំណត់គោលដៅអភិវឌ្ឍប្រែក្លាយខេត្តព្រះសីហនុឲ្យក្លាយទៅជាទីក្រុងដ៏ល្បីនិងសំខាន់មួយនៅក្នុងតំបន់អាស៊ីអាគ្នេយ៍, ជាតំបន់ដែលប្រើប្រាស់បច្ចេកវិទ្យាវ័យឆ្លាត និងបំពាក់ដោយសេវាសាធារណៈ/បរិក្ខា សម្រាប់រស់នៅលំដាប់ពិភពលោក, ជាតំបន់ប្រកបដោយបរិស្ថានបៃតង និងតំបន់ឧស្សាហកម្មដែលមានតម្លៃបន្ថែមខ្ពស់ ចូលរួមបម្រើឱ្យខ្សែច្រវាក់ផលិតកម្មក្នុងតំបន់ និងសកលលោក និងជាពិសេសក្លាយជាប៉ូលសេដ្ឋកិច្ចដ៏សំខាន់ ក្នុងការផ្តល់ការងារជូនដល់ប្រជាពលរដ្ឋ និងជាប្រភពចំណូលជាតិ សម្រាប់ការអភិវឌ្ឍសេដ្ឋកិច្ចកម្ពុជាទាំងមូល ។ជាមួយគ្នានេះ ឯកឧត្តមរដ្ឋមន្ត្រី អូន ព័ន្ធមុនីរ័ត្ន បានស្នើគ្រប់ក្រសួងស្ថាប័នពាក់ព័ន្ធ ដៃគូអភិវឌ្ឍន៍ ដៃគូហិរញ្ញប្បទាន វិស័យឯកជន និងសមាគមពាណិជ្ជកម្ម បន្តចូលរួមផ្តល់ការគាំទ្រដល់ការរៀបចំ និងការអនុវត្តផែនការមេ ឱ្យបានសម្រេចដូចការរំពឹងទុក៕អត្ថបទ ឈិត បូរ៉ាវី

បណ្ដាញសង្គម

ព័ត៌មានថ្មីៗ

ក្រសួងការងារ ព្រមានចាត់វិធានការម៉ឺងម៉ាត់បំផុត ចំពោះបុគ្គលណាទារប្រាក់ពីពលរដ្ឋជាថ្នូរនឹងការទទួលបានការងារ

កោះ Solomon Islands មិនអញ្ជើញអាមេរិក ចិន និងកោះតៃវ៉ាន់ ចូលរួមកិច្ចប្រជុំនយោបាយរបស់ប៉ាស៊ីហ្វិក

ការិយាល័យនៃក្រុមហ៊ុនអាកាសចរណ៍អ៊ីស្រាអែល El Al នៅក្រុងប៉ារីស ត្រូវបានបំផ្លាញទ្រព្យសម្បត្តិ

សម្ដេចធិបតី៖ស្របតាមសំណូមពរពលរដ្ឋខ្មែរគាំទ្របេក្ខភាពឯកឧត្តម Donald Trump សម្រាប់ពានរង្វាន់ណូបែលសន្តិភាព រាជរដ្ឋាភិបាលផ្ញើលិខិតជាផ្លូវការទៅគណៈកម្មការពានរង្វាន់ណូបែលសន្តិភាព

សារព័ត៌មាន Ifax៖ លោក Putin នឹងទៅបំពេញទស្សនកិច្ច នៅឥណ្ឌា នាចុងឆ្នាំ២០២៥

អាល្លឺម៉ង់នឹងពង្រីកការគ្រប់គ្រងព្រំដែន ពាក់ព័ន្ធនឹងវិធានការបង្ក្រាបជនអន្តោប្រវេសន៍

សេចក្ដីរាយការណ៍៖ អគ្គិភ័យនៅរោងចក្រចម្រាញ់ប្រេង Afipsky របស់រុស្ស៊ី ត្រូវបានពន្លត់ ក្រោយត្រូវយានដ្រូនវាយប្រហារ

ប្រព័ន្ធផ្សព្វផ្សាយរដ្ឋ៖ បុរសដែលត្រូវបានអ៊ីរ៉ង់ប្រហារជីវិតពីបទចារកម្ម គឺជាអ្នកវិទ្យាសាស្ត្រនុយក្លេអ៊ែរ

មន្ត្រីជាន់ខ្ពស់ EU៖ ការសម្លាប់ នៅហ្កាហ្សា មើលទៅដូចអំពើប្រល័យពូជសាសន៍ខ្លាំងណាស់

នាយករដ្ឋមន្ត្រីស៊ូដង់ ទៅបំពេញទស្សនកិច្ចអេហ្ស៊ីប ជាលើកដំបូង ចាប់តាំងពីឡើងកាន់តំណែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

កម្ពុជានាំចេញកសិផលទៅទីផ្សារកូរ៉េខាងត្បូងជាងមួយពាន់តោន ក្នុងរយៈពេលបីត្រីមាសឆ្នាំនេះ

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងចូលជាធរមាននៅដើមឆ្នាំ២០២២

កូរ៉េខាងត្បូង នឹងក្លាយជាទីផ្សារធំមួយសម្រាប់នាំចេញទំនិញពីកម្ពុជា

រាជរដ្ឋាភិបាល គ្រោង​បោះ​ប័ណ្ណ​បំណុល​រដ្ឋ​ក្នុង​ទំហំ​៣០០​លាន​ដុល្លារ នៅ​ឆ្នាំក្រោយ​

វិស័យ​សេវាកម្ម រំពឹង​នឹង​ងើប​ទៅរក​ប្រក្រតីភាព និង​មាន​កំណើន​ល្អ​ឡើងវិញ

ការនាំចេញ​-​នាំចូល​នៃ​តំបន់​សេដ្ឋកិច្ច​ពិសេស​ព្រះសីហនុ​ កើនឡើង​ក្នុង​រយៈពេល​៩​ខែ​

កម្ពុជានាំចេញ​ផលិតផល​មិនមែន​កាត់ដេរ​កើនឡើង​ជាង ៥០​ភាគរយ រយៈពេល​បី​ត្រីមាស

ពាណិជ្ជកម្ម​ទ្វេភាគី​កម្ពុជា កូរ៉េខាងត្បូង សម្រេច​បាន​ជាង​៧២០​លាន​ដុល្លារ​រយៈពេល​បី​ត្រីមាស