នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
បន្លែ​ក្នុងស្រុកមានទីផ្សារល្អ ធានាការផ្គត់ផ្គង់ និងលើកកម្ពស់ជីវភាពកសិករ ខណៈ​ពលរដ្ឋ​គាំទ្រ​ច្រើន
ផលិតករក្នុងស្រុកបង្ហាញនូវគោលជំហលក់ផលិតផលមិនទាន់ឡើងថ្លៃនៅឡើយ ទោះបី​តម្លៃ​ប្រេង​ប្រែប្រួល
អ្នកជំនាញហិរញ្ញវត្ថុ៖ ប្រាក់រៀលមានស្ថិរភាពជាងរូបិយប័ណ្ណបរទេសក្នុងស្ថានភាពសកលកំពុងប្រួលប្រែ
NBC និងUNDP ប្រកាសដាក់ឱ្យប្រើប្រាស់របាយការណ៍ស្ដីពី «ដុល្លារូបនីយកម្ម និងការ​ទូទាត់​ប្រាក់​ឈ្នួល​ក្នុង​វិស័យ​នាំ​ចេញ​សំខាន់ៗ» ដើម្បីលើកកម្ពស់ការប្រើប្រាស់ប្រាក់រៀលនៅកម្ពុជា

សេដ្ឋកិច្ច និង កសិកម្ម

មន្រ្តីជាន់ខ្ដស់ CDC៖ ខណៈពិភពលោកកំពុងតានតឹង កម្ពុជា​បាន​កំពុង​បន្ត​ឆ្ពោះ​ទៅ​មុខ​មាន​ទិស​ដៅ​សេដ្ឋកិច្ច​ច្បាស់​លាស់

2026/02/06 01:45:39 pm        215
Facebook Telegram Linkin
មន្រ្តីជាន់ខ្ដស់ក្រុមប្រឹក្សាអភិវឌ្ឍន៍កម្ពុជាថ្លែងថា ទោះបីពិភពលោកកំពុងមានភាពតាន់តឹង ក៏​ប្រទេស​កម្ពុជា​នៅ​តែបន្តឆ្ពោះទៅមុខ ជាមួយនឹងទិសដៅសេដ្ឋកិច្ចច្បាស់លាស់ ក្រោម​ការ​ប្តេជ្ញា​ចិត្ត​យ៉ាង​មុត​មាំ​របស់​រាជរដ្ឋាភិបាល ក្នុងកិច្ចការពារសន្តិភាព និងស្ថិរភាព នយោបាយ ដែល​ជា​មូល​ដ្ឋាន​គ្រឹះ​បង្កើតទំនុកចិត្តវិនិយោគរយៈពេលវែង។ ឯកឧត្តម នុត អ៊ុនវ័ណរ៉ា អគ្គលេខាធិការរងនៃក្រុមប្រឹក្សាវិនិយោគកម្ពុជា លើកឡើងក្នុង «​ពិធី​បើក​ពិព័រណ៍​អ៊ីតាលីកម្ពុជា ឆ្នាំ២០២៦» នៅថ្ងៃទី៥ ខែកុម្ភៈ ឆ្នាំ២០២៦ ថា នៅ​ពេល​ដែល​សេដ្ឋកិច្ច​ពិភពលោកកំពុងប្រឈមមុខនឹងភាពមិនប្រាកដប្រជា កាន់តែ ខ្លាំងឡើង ភាព​តាន​តឹង​នៃ​ភូមិ​សាស្ត្រ​នយោបាយ ជម្លោះក្នុងតំបន់ និងការរឹតបន្តឹងហិរញ្ញវត្ថុជាដើម, ចំពោះ​ការ​រៀប​ចំ​ព្រឹត្តិការណ៍ពិព័រណ៍នេះឡើង មានសារៈសំខាន់ជាងពេលណាៗទាំងអស់ ដោយពិព័រណ៍នេះ​ជា​សញ្ញា​ដ៏​រឹងមាំនៃទំនុកចិត្តនៃវិនិយោគ និងបាន ប្រមូលផ្តុំនូវចំណុចខ្លាំងរបស់អ៊ីតាលី ក្នុង​វិស័យ​បច្ចេក​វិទ្យា គ្រឿងចក្រ ការរចនា នវានុវត្តន៍ និងការអភិវឌ្ឍសហគ្រាសធុនតូច និង មធ្យម ជាមួយ​នឹង​ទីផ្សារ​ដែលកំពុងរីកចម្រើនរបស់កម្ពុជា និងអាទិភាពនៃការធ្វើឱ្យប្រសើរឡើងនៃឧស្សាហកម្ម និង​ឱកាស​ធ្វើសមាហរណកម្មក្នុងតំបន់ តាមរយៈការផ្លាស់​ប្តូរ​បណ្តាញ​ទំនាក់​ទំនង​ទៅ​ជា​ពាណិជ្ជ​កម្ម​ ការវិនិយោគ និងការបណ្តាក់ទុនរួមគ្នា។ឯកឧត្តម បន្តថា ខណៈដែលពិភពលោកកំពុងមានភាពតាន់តឹង, ចំណែក​កម្ពុជា​នៅ​តែ​បន្ត​ឆ្ពោះ​ទៅ​មុខ​ ជាមួយនឹងទិសដៅ សេដ្ឋកិច្ចច្បាស់លាស់ ក្រោមការដឹកនាំ​ដ៏​ឈ្លាស​វៃ​របស់​សម្តេច​អគ្គ​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដោយក្នុង នោះរាជរដ្ឋាភិបាល​បាន​ប្តេជ្ញា​ចិត្ត​យ៉ាង​មុត​មាំ ក្នុងការការពារសន្តិភាព និងស្ថិរភាពនយោបាយ ដែលជាមូលដ្ឋាន​គ្រឹះ​សម្រាប់​ទំនុ​ក​ចិត្ត វិនិយោគរយៈពេលវែង។ ក្នុងពេលជាមួយគ្នានេះ, រដ្ឋាភិបាល​បន្ត​ពង្រឹង​ភាព​ធ​ន់​នៃ​ម៉ាក្រូ​សេដ្ឋ​កិច្ច​ រក្សាគោលនយោបាយហិរញ្ញវត្ថុ និង រូបិយវត្ថុដោយប្រុងប្រយ័ត្ន និងពង្រឹងកំណែទម្រង់ ដើម្បី​ធានាបាននូវបរិយាកាសវិនិយោគដែលបើកចំហ អាចព្យាករណ៍បាន មាន តម្លាភាព និង​មាន​ភាព​ប្រកួត​ប្រជែង។ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម លើកឡើងផងដែរថា ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយនេះ ពាណិជ្ជកម្ម និងការវិនិយោគសកលលោក កាន់តែមានភាពស្មុគស្មាញ និង​ប្រកួតប្រជែង ក្នុងនោះការចូលទីផ្សារតែមួយមុខមិនគ្រប់ គ្រាន់ឡើយ ខណៈដែលប្រទេស និង​ក្រុមហ៊ុននានា ត្រូវតែបង្ហាញពីភាពជឿជាក់ លើការអនុលោមតាមស្តង់ដារ ភាពធន់​នៃ​ខ្សែ​សង្វាក់​ ផ្គត់ផ្គង់ និងសមត្ថភាពក្នុងការផ្តល់គុណភាពស្របគ្នា។ បរិបទនេះចំពោះប្រទេសកម្ពុជា ការ​ពង្រឹងភាពប្រកួតប្រជែង ផ្នែកពាណិជ្ជកម្ម និងការជំរុញការធ្វើពិពិធកម្មសេដ្ឋកិច្ច នៅ​តែ​ជា​គោល​បំណងស្នូលរបស់រាជរដ្ឋាភិបាលកម្ពុជា ក្នុងការជំរញកែលម្អតម្លៃបន្ថែម គុណភាព និង​និរន្តរ​ភាព​ផង​ដែរ៕ អត្ថបទ៖ សុន រ៉ាឌី

អ្នកជំនាញ៖ វិស័យដឹកជញ្ជូនឆ្នាំ២០២៦នេះ នឹងបន្តនិន្នាការល្អ គាំទ្រ​ការ​ងើប​ឡើង​នៃ​អនុវិស័យ​ផ្សេង​ៗ

2026/02/04 04:35:49 pm        296
Facebook Telegram Linkin
អ្នកជំនាញក្នុងវិស័យដឹកជញ្ជូន រំពឹងថា វិស័យដឹកជញ្ជូនក្នុងឆ្នាំ២០២៦នេះ នឹងបន្ត​មាន​និន្នាការ​ល្អ គាំទ្រដោយការងើបឡើងនៃ អនុវិស័យមួយចំនួន ក៏ដូចជាលំហូរនៃការវិនិយោគ ដែល​នឹង​រុញ​ច្រាន​ដល់​សកម្មភាពការរីកចម្រើន នៃខ្សែវាក់ផលិតកម្មក្នុងស្រុក គាំទ្រដល់ទីផ្សារនៃការនាំចេញ។ឧកញ៉ាបណ្ឌិត ស៊ិន ចន្ធី សមាជិកទីប្រឹក្សាសភាពាណិជ្ជកម្មកម្ពុជា និងជា​អនុ​ប្រធាន​សមាគម​ភស្ដុភារ​កម្ម​កម្ពុជា លើកឡើង ក្នុងកិច្ចជាមួយក្រុមសារព័ត៌មាន ស្តីពីបច្ចុប្បន្នភាព​នៃ​វិស័យ​ដឹក​ជញ្ជូននេះថា ទាក់ទងការដឹកជញ្ជូនក្នុងឆ្នាំ២០២៥ ទោះបីកម្ពុជាជួប បញ្ហា ការដំឡើង​អត្រា​ពន្ធ​បដិការ​ពី​សហរដ្ឋអាមេរិក និងជម្លោះព្រំដែនដែលបង្កដោយភាគីថៃ និងមានការបិទ​ខ្ទប់​រវាង​ប្រទេស​ទាំង​ពីរ ក៏សកម្មភាពសេដ្ឋកិច្ចក្នុងស្រុក នៅតែបន្តងើបឡើងយ៉ាងល្អប្រសើរ បានគាំទ្រ​ដល់​វិ​​ស័យដឹកជញ្ជូន នៅក្នុងប្រតិបត្តិការអាជីវកម្មទៅ ដោយរលូន។ឧកញ៉ាបណ្ឌិត បន្តថា ចំណែកទាក់ទងវិស័យដឹកជញ្ជូនក្នុងឆ្នាំ២០២៦នេះ នឹងបន្ត​ក្នុង​ប្រតិបត្តិ​ការ​​សេវាដឹកជញ្ជូនល្អប្រសើរ ជាពិសេសការដឹកជញ្ជូនតាមផ្លូវទឹក និងផ្លូវអាកាស បន្ទាប់​ពី​កម្ពុជា​បា​ន​​បើកជាផ្លូវការ នៃអាកាសយានដ្ឋានអន្តរជាតិតេជោ, ជាពិសេស ការទទួល​លំហូរ​វិនិយោគ​នៅ​ឆ្នាំ​២០២៥​ មកបង្កើតរោងចក្រ សហគ្រាសក្នុងស្រុក គឺជាការជួយគាំទ្រ​ដល់​ការ​រីក​លូត​លាស់​ក្នុង​ខ្សែ ច្រវាក់ផលិតកម្ម ដែលនឹងរុញច្រាន់ដល់សេវានៃការដឹកជញ្ជូនអាចមានភាពកាន់តែសកម្ម ដើម្បី​រួម​ចំណែកដល់ចលនាការនៃចន្ទល់ សេដ្ឋកិច្ចជាតិ។សូមបញ្ជាក់ថា ជុំវិញវិស័យដឹកជញ្ជូននេះ បើយោងតាម​ច្បាប់​ស្តីពី​ហិរញ្ញ​វត្ថុ​សម្រាប់​ការ​គ្រប់​គ្រង​ឆ្នាំ​២០២៦ វិស័យសេវាកម្មបានព្យាករ ថា នឹងមានកំណើនទាបក្នុងរង្វង់ ៣,៧% ដោយសារ​ការ​រំពឹង​ទុក​នៃការអូសបន្លាយផលប៉ះពាល់ពីការបិទខ្ទប់ព្រំដែនគោកកម្ពុជា-ថៃ នៃអនុវិស័​យចន្ទល់​កំណើន​សំខាន់ៗមួយចំនួនដូចជា អនុវិស័យបដិសណ្ឋារកិច្ច និងសេវាកម្មម្ហូបអាហារ (ទេសចរណ៍​), លក់ដុំ-រាយ, ហិរញ្ញវត្ថុ និងធានារ៉ាប់រង។ ចំណែកអនុវិស័យដឹកជញ្ជូននិងស្តុក បើទោះបីមានកំណើនថមថយបន្តិចក្នុងឆ្នាំ២០២៦ ក៏កំណើនក្នុង រយៈពេលមធ្យមខាងមុខ នៅបន្តរក្សាបាននិន្នាការកើនឡើង ដោយសារការបន្តងើបវិញនៃអនុវិស័យគាំទ្រមួយចំនួនដូចជា អនុវិស័យ កាត់ដេរនិងមិនមែនកាត់ដេរ គួបផ្សំនឹងការបន្តកើនឡើងនៃការដឹកជញ្ជូនបញ្ញើរហ័សក្នុងស្រុក៕ អត្ថបទ៖ សុន រ៉ាឌី

កម្ពុជានាំចេញវិស័យកម្មន្តសាលមិនមែនកាត់ដេរក្នុងឆ្នាំ២០២៥ បានបន្តចលន​ការកំណើន​ល្អ​ប្រសើរ

2026/02/04 03:59:56 pm        191
Facebook Telegram Linkin
កម្ពុជានាំចេញទំនិញ ដែលជាប្រភេទកម្មន្តសាលមិនមែនកាត់ដេរ ទៅកាន់​ទីផ្សា​រ​អន្តរជាតិ​ក្នុង​ឆ្នាំ​២០២៥ បានបន្តចលនការ កំណើនល្អប្រសើរ ទោះបីមានការគំរាមគំហែង ពីការដំឡើង​អត្រា​ពន្ធ​បដិការ​ពី​សហរដ្ឋអាមេរិក និងការអូសបន្លាយនៃជម្លោះព្រំដែន កម្ពុជា-ថៃក៏ដោយ។ ជុំវិញការនាំចេញវិស័យកម្មន្តសាលមិនមែនកាត់ដេរនៅក្នុងឆ្នាំ២០២៥, បើយោង​តាម​របាយការណ៍​របស់​អគ្គនាយកដ្ឋានគយ និងរដ្ឋាករកម្ពុជា ចំពោះមុខទំនិញនៅក្នុង​វិស័យកម្មន្ត​សាល​មិន​មែនកាត់ដេរ ដែលជួយគាំទ្រដល់កំណើននៃការនាំចេញមានដូចជា ការនំាចេញ​សំបក​កង់​ឡាន​ មានទឹកប្រាក់ ជាង ១ ៣០០ លានដុល្លារ, ម៉ាស៊ីន បរិធានមេខនិក និងសម្ភារៈអគ្គិសនី ជិត ២២០ លាន ដុល្លារ កើនឡើងជិត ២៧ ភាគរយ, គ្រឿងសង្ហារឹម មានទឹកប្រាក់ជាង ១ ៥០០ លានដុល្លារ កើនជិត ៣៤ ភាគរយ, ប្រដាប់ប្រដា ក្មេងលេង ជាង ៧៣១ លានដុល្លារ កើន​ជាង ១១៥ ភាគរយ, វត្ថុធាតុប្លាស្ទិក កៅស៊ូ និងធ្វើពីកៅស៊ូ ជាង ២៧៨ លានដុល្លារ កើន ១១ ភាគរយ ក្រៅពីនេះនៅមានប្រភេទទំនិញជាច្រើនទៀតនៅក្នុងវិស័យកម្មន្តសាលមិនមែនកាត់ដេរ ដែលបាន​ជួយជ្រោមជ្រែងដល់ ការនាំចេញ។ចំណែកវិស័យឯកជន, អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងថា ជុំវិញទីផ្សារនាំចេញទំនិញ របស់កម្ពុជាក្នុងឆ្នាំ២០២៥ ទោះបីកម្ពុជាជួបបញ្ហានៃការដំឡើងអត្រាពន្ធបដិការពីសហរដ្ឋអាមេរិក និងការអូសបន្លាយនៃជម្លោះ ព្រំដែនកម្ពុជា-ថៃ ក៏ការនាំចេញរបស់កម្ពុជានូវវតែសម្រេចបានកំណើនកើនឡើងល្អប្រសើរ ប៉ុន្តែទោះបីយ៉ាងណាយើងក៏ជួបបញ្ហា ប្រឈម អំពីការរកស៊ីទទួលទានរបស់ប្រជាជននៅតាមព្រំដែនកម្ពុជា-ថៃ ដែលបញ្ហានេះសភាពាណិជ្ជកម្មកម្ពុជា កំពុងគិតគូរយកចិត្ត ទុកដាក់ ដើម្បីដោះស្រាយបញ្ហាប្រឈមរបស់អាជីវករ ក៏ដូចប្រជាជននៅតាមព្រំដែនផងដែរ។សូមបញ្ជាក់ថា ការធ្វើពាណិជ្ជកម្មលើទីផ្សារអន្តរជាតិពេញមួយឆ្នាំ នៅក្នុងបំណាច់ឆ្នាំ ២០២៥ របស់កម្ពុជា, មានទំហំទឹកប្រាក់សរុប ជាង ៦៤ ពាន់លានដុល្លារអាមេរិក កើនជិត ១៧ ភាគរយ ក្នុងនោះការនាំចេញទំនិញរបស់កម្ពុជា មានទឹកប្រាក់ជាង ៣០ ពាន់លាន ដុល្លារ កើនឡើងជិត ១៥ ភាគរយ ខណៈការនាំចូលពីបរទេស មានចំនួនជិត ៣៤ ពាន់លានដុល្លារ កើនឡើងជិត ១៩ ភាគរយ បើធៀបរយៈពេលដូចគ្នាឆ្នាំ២០២៤៕ អត្ថបទ៖ សុន រ៉ាឌី

ឆ្នាំ២០២៥ កម្ពុជាមានរោងចក្រធុនធំចំនួន ៣,០៨៣ ក្នុងទុនវិនិយោគសរុបជាង ២៥ ពាន់លានដុល្លារ

2026/02/03 10:34:53 am        211
Facebook Telegram Linkin
គិតត្រឹមចុងឆ្នាំ២០២៥ កម្ពុជាមានរោងចក្រធុនធំ ដែលបាននិងកំពុងដំណើរការ មានចំនួន ៣,០៨៣ និងមានដើមទុនវិនិយោគ សរុបមានចំនួនជាង ២៥ ពាន់លានដុល្លារអាមេរិក ក្នុងនោះទុនវិនិយោគក្នុងស្រុកមានចំនួន ៣,៩០៦ លានដុល្លារអាមេរិក ស្មើនឹង ១៥ ភាគរយ នៃទុនវិនិយោគសរុប។ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងសិក្ខាសាលា ផ្សព្វផ្សាយ ស្តីពីការដាក់ឱ្យអនុវត្តគោលការណ៍ណែនាំប្លង់បច្ចេកទេសរោងចក្រ និងសិប្បកម្ម និងការគ្រប់គ្រងហានីភ័យរោងចក្រ និង សិប្បកម្ម នៅថ្ងៃទី២ ខែកុម្ភៈ ម្សិលមិញនេះថា វិស័យឧស្សាហកម្មកម្ពុជាបាននិងកំពុងរីកចម្រើនយ៉ាងឆាប់រហ័ស និងបានដើរតួកាន់តែ សំខាន់នៅក្នុងសេដ្ឋកិច្ច និងបានបង្កើតការងារ និងប្រាក់ចំណូលជូនប្រជាពលរដ្ឋ ជាក់ស្តែងគិតត្រឹមចុងឆ្នាំ ២០២៥ វិស័យនេះបាន ស្រូបយកកំលាំងពលកម្ម មានចំនួនប្រមាណជាង ១,២៦ លាននាក់ ក្នុងនោះស្រ្តី ស្មើប្រមាណ ៧១ ភាគរយ កើនឡើងជាង ១០៨ ពាន់នាក់ បើធៀបរយៈពេលដូចគ្នានិងឆ្នាំ២០២៤។ ឯកឧត្តមរដ្ឋមន្រ្តី លើកឡើងឱ្យដឹងថា ជុំវិញវិស័យឧស្សាហកម្មនេះ គិតត្រឹមចុងឆ្នាំ២០២៥ កម្ពុជាមានរោងចក្រធុនធំ ដែល បាននិងកំពុងដំណើរការ មានចំនួនសរុប ៣,០៨៣ កើនឡើង ៦៥៨ មូលដ្ឋាន ស្មើនឹង ២៧ ភាគរយ ធៀបនឹងឆ្នាំ២០២៤ និងមាន ទុនវិនិយោគសរុប ជាង ២៥ ពាន់លានដុល្លារអាមេរិក កើនឡើង ៤,៧១១ លានដុល្លារអាមេរិក ស្មើនឹង ២៣ ភាគរយ ក្នុងនោះទុន វិនិយោគក្នុងស្រុកមានចំនួន ៣,៩០៦ លានដុល្លារអាមេរិក ស្មើនឹង ១៥ ភាគរយ នៃទុនវិនិយោគសរុប។សូមបញ្ជាក់ថា នៅក្នុងឆ្នាំ២០២៤ វិស័យឧស្សាកម្ម មានតម្លៃបរិមាណផលិតផលសរុប ចំនួនជាង ១៥ ពាន់លានដុល្លារអាមេរិក ថយ ចុះជាង ១,២០០ លានដុល្លារអាមេរិក ស្មើ ៧ ភាគរយ បើធៀបទៅនឹងឆ្នាំ២០២៣ ក្នុងនោះតម្លៃបរិមាណផលិតផលបម្រើទីផ្សារក្នុង ស្រុក មានចំនួនជិត ៤ ពាន់លានដុល្លារអាមេរិក ថយចុះ ២៣៣ លានដុល្លារអាមេរិក ស្មើជាង ៥ ភាគរយ ខណៈការនាំចេញមាន ចំនួនជាង ១១ ពាន់លានដុល្លារអាមេរិក មានការថយចុះ ៩៨២ លានដុល្លារអាមេរិក ស្មើ ៨ ភាគរយ។ នៅក្នុងវិស័យឧស្សាហកម្មនេះដែរ, ក្នុងឆ្នាំ២០២៦ ត្រូវបានព្យាករថា នឹងមានកំណើនក្នុងរង្វង់ ៧,២% ដែលជាកំណើនថម ថយបើធៀបនឹងកំណើនឆ្នាំ២០២៥ ដោយសារការថមថយចលនការនៃកំណើនវិស័យបម្រើការនាំចេញ ពោលគឺអនុវិស័យកាត់ដេរ និងកម្មន្តសាលមិនមែនកាត់ដេរ ក្រោមការរំពឹងទុកបច្ច័យនៃការអនុវត្តពន្ធគយបដិការ ដែលនឹងធ្វើឱ្យតម្រូវការសកលមាននិន្នាការថម ថយ ប៉ុន្តែជារួមនៅតែជាកំណើនល្អដោយ សាររោងចក្រ សហគ្រាស មានលទ្ធភាពបន្សុំាខ្លួនបានបន្តិចម្ដងៗ ទៅនឹងរបត់គោលនយោ បាយពាណិជ្ជកម្ម៕ អត្ថបទ៖ សុន រ៉ាឌី,

កម្ពុជាប្រមូលសួយសារអាករ និងពន្ធនាំចេញពីវិស័យថ្មអារមានទឹកប្រាក់ជិត ៤០លានដុល្លារ

2026/02/03 10:24:40 am        256
Facebook Telegram Linkin
នៅក្នុងរយៈ៣ឆ្នាំចុងក្រោយនេះ រាជរដ្ឋាភិបាលបានប្រមូលចំណូលពីសួយសារអាករ និងពន្ធនាំ​ចេញ​ (មិនគិតចំណូលពន្ធដារ) នៅលើ ការធ្វើអាជីវកម្មថ្មអារ មានទឹកប្រាក់សរុបជិត ៤០ លាន​ដុល្លារ​អាម៉េរិក ពីក្រុមហ៊ុនដែលកំពុងមានប្រតិបត្តិកាអាជីវកម្មនៅក្នុងស្រុក។ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើង​ក្នុង​សន្និបាត​បោះឆ្នោត​ជ្រើស​រើស​ក្រុម​ប្រឹក្សា​ភិបាល សមាគម ថ្មអារកម្ពុជា អាណត្តិទី១ នៅល្ងាចថ្ងៃទី២ ខែកុម្ភៈ ឆ្នាំ២០២៦ ថា សម្រាប់​គោលដៅវិនិយោគលើវិស័យរ៉ែ គឺមានសារៈសំខាន់ណាស់ ដោយ​វិស័យ​នេះ​បាន​បង្កើ​ត​ការ​ងារ​ និងចំណូលជូនប្រជាជន ក៏ដូច​រាជ​រដ្ឋាភិបាល​បាន​ចំណូល​មួយ​ចំនួន​សម្រាប់​ការ​អភិវ​ឌ្ឍ​ប្រទេស​ ក្នុងនោះចំពោះវិស័យថ្មអារ ដែលបានបង្កើតសមាគមនៅពេលនេះ គឺមានគោលបំណង ដើម្បី​ឈានទៅជម្រុញអភិវឌ្ឍន៍វិស័យនេះឱ្យ កាន់តែរីកចម្រើន។ឯកឧត្តម បន្តថា ចំពោះការធ្វើអាជីវកម្ម, ក្នុងនោះមិនថាការធ្វើអាជីវកម្មរ៉ែប្រភេទណានោះទេ គឺ​ត្រូវ​មាន​ការអនុញ្ញាត្តិពីក្រសួង បរិស្ថាន ដែលជាក្រសួងជំនាញ ដែលមើលការ​ខុស​ត្រូវ​លើ​ផល​ប៉ះពា​ល់​បរិស្ថានតាមច្បាប់ និងក្រមនៃការអនុត្តស្តីពីបរិស្ថាន ក្នុងនោះ បន្ទាប់ពីក្រុមហ៊ុ​ន​ទទួល​បាន​អាជ្ញា​ប័ណ្ណពីក្រសួងរ៉ែ និងថាមពល ក្រុមហ៊ុនដែលអនុវត្ត ត្រូវមានការឯកភាព​ពី​បរិស្ថាន​បន្ថែម​ ទើបឈាន ដល់ការធ្វើអាជីវកម្ម។ ឯកឧត្តម បន្ថែមថា ជាក់ស្តែងជុំវិញការធ្វើអាជីវកម្មថ្មអារ គិ​ត​មកដល់ពេលនេះក្រសួងរ៉ែ និងថាមពល បានផ្តល់ អាជ្ញាប័ណ្ណមានចំនួនជាង ៦០ ក្រុមហ៊ុន និង​មាន​ក្រុមហ៊ុនដែលកំពុងប្រតិបត្តិកាអាជីវកម្មចំនួនជាង ៤០ ក្រុមហ៊ុន/សហគ្រាស ដែល បាន​និង​កំពុងធ្វើអាជីវកម្មសម្រាប់ផ្គត់ផ្គង់ទីផ្សារក្នុងស្រុក និងការនាំចេញ ក្នុងនោះបើ​គិត​នៅ​ក្នុង​រយៈ​ពេល​៣​ឆ្នាំ​ចុងក្រោយ វិស័យនេះ បានផ្តល់ចំណូលជាសួយសារអាករ និងពន្ធនាំចេញ (ដោយ​មិន​គិត​ចំណូលពន្ធដារ) មានទឹកប្រាក់សរុបជិត ៤០ លានដុល្លារអាម៉េរិក។ឯកឧត្តម កែវ រតនៈ បញ្ជាក់ថា ជុំវិញវិស័យថ្មអារនេះ គឺជាផ្នែកមួយដ៏សំខាន់ ក្នុង​នោះ​ក្រៅ​ពី​ការ​នាំ​ចេញ​ វិស័យនេះអាចបំពេញតម្រូវ ការស្រុកបានជាច្រើន រាប់ទាំងកម្ទេចថ្មជាដើម ជាក់ស្តែង​នា​ពេល​កន្លងមកនេះ រាជរដ្ឋាភិបាលបានចេញសារាចរណ៍លើកទឹកចិត្ត ដល់ ថ្នាក់ក្រោមជាតិ ដែល​វិនិយោគ​គម្រោង​សាធារណៈ គឺត្រូវខិតខំប្រើប្រាស់​កម្ទេច​ថ្ម​ឱ្យ​អស់​លទ្ធភាព​សម្រាប់​ជា​ប្រយោជន៍​នៃ​សេដ្ឋកិច្ច។ ឯកឧត្តម បន្ថែមថា ទាក់ទងវិស័យនេះដែរ ចំពោះមហិច្ឆិតារបស់រាជរដ្ឋាភិបាល គឺច​ង់​ឃើញ​ប្រជាពលរដ្ឋមានការងារធ្វើក្នុងវិស័យនេះ មានកាន់តែច្រើន តាមរយៈកា​រ​បង្កើត​ការ​ងារ​នៅ​នឹងកន្លែង និងការប្រមូលចំណូលចូលថវិកាជាតិ ដើម្បីយកទៅអភិវឌ្ឍន៍ប្រទេស ជាដើម៕ អត្ថបទ៖ សុន រ៉ាឌី

កម្ពុជា-ចិននឹងរៀបចំឱ្យមានវេទិកាសន្ទនារវាងរដ្ឋ និងឯកជន ដើម្បីឆ្លើយ​តប​នឹង​កង្វល់​អ្នក​វិនិយោគ

2026/02/02 01:25:50 pm        197
Facebook Telegram Linkin
កម្ពុជា-ចិននឹងចាប់ផ្តើមរៀបចំវេទិកាសន្ទនា រវាងរដ្ឋនិងវិស័យឯកជនលើកទី១ នៅក្នុង​ខែ​កុម្ភៈ​នេះ ​ដើម្បីឆ្លើយតបទៅនឹងកង្វល់ របស់អ្នកវិនិយោគដោយផ្ទាល់ និងដើម្បីធានាថា អ្នក​វិនិយោគ​នឹង​ទទួល​បាន​នូវបរិយាកាសធុរកិច្ច ដែលងាយស្រួល និងអាចប៉ាន់ ប្រមាណបាន។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.)​ និងឯកឧត្តម Wang Wenbin ឯកអគ្គរដ្ឋទូត​នៃ​សាធារណ​រដ្ឋ​ប្រជា​មានិត​ចិន​ប្រចាំ​កម្ពុជា​ នៅចុងសប្តាហ៍កន្លងមកនេះ បានអញ្ជើញជាអធិបតី ក្នុងកម្មវិធី មហា​សន្និបាត​ប្រចាំ​ឆ្នាំ​២០២៥​ ក្នុងពិធីនោះ, ឯកឧត្តមឧបនាយករដ្ឋមន្ត្រី បានរំលេចនូវមោទនភាពចំពោះទំនាក់ទំនង "មិត្តភាព ដែកថែប" ដែលបានចាក់គ្រឹះយ៉ាងរឹងមាំអស់រយៈពេលជាងបីទសវត្សរ៍ និង​បាន​គូស​បញ្ជាក់​ថា ភាពជោគជ័យនៃចំណងទាក់ទងនេះ មិនត្រឹមតែស្តែងចេញតាមរយៈកិច្ចព្រម ព្រៀង​កម្រិត​រដ្ឋ​ប៉ុណ្ណោះទេ ប៉ុន្តែវាគឺជាការតភ្ជាប់ដោយស្មោះត្រង់ រវាងប្រជាជន និងប្រជាជន ក្នុង​ស្មារ​តី​កសាង​ «សហគមន៍វាសនារួមកម្ពុជា-ចិនក្នុងយុគសម័យថ្មី»។ ការកសាងវាសនារួមនេះ បាន​នាំ​មក​នូវ​ការបង្កើតការងារ ការផ្ទេរចំណេះដឹង និងការកសាងឱកាសសម្រាប់យុវជនកម្ពុជា ខណៈ​សភា​ពាណិជ្ជកម្មចិនត្រូវបានប្រសិទ្ធនាមថា ជាស្ពានតភ្ជាប់ ដ៏មានឥទ្ធិពល ដែលបាន​ជំរុញ​ឱ្យ​សហ​គ្រាស​នៃប្រទេសទាំងពីរ ដើរទន្ទឹមគ្នាលើមាគ៌ាអភិវឌ្ឍន៍ប្រកបដោយបរិយាបន្ន។ឯកឧត្តមឧបនាយករដ្ឋមន្ត្រី បានលើកឡើងពីតួនាទីដ៏សំខាន់នៃគំនិតផ្ដួចផ្ដើម "ខ្សែក្រវាត់និងផ្លូវ" ដែល​ជាកម្លាំងចលករផ្លាស់ ប្តូរកម្ពុជាពី "ប្រទេសដែលមានសក្តានុពល" ទៅជា "ប្រទេស​ដែល​មាន​ការ​រីកចម្រើនពិតប្រាកដ" ព្រមទាំងបានបញ្ជាក់ថា តាមរយៈ កិច្ចសហប្រតិបត្តិការនេះ កម្ពុជា​សម្រេច​បាន​នូវសមិទ្ធផលធំៗជាច្រើនរួមមាន ផ្លូវថ្នល់ជាង ៣ ពាន់គីឡូម៉ែត្រ ស្ពានយុទ្ធសាស្ត្រ អាកាស​យានដ្ឋានទំនើប និងផ្លូវល្បឿនលឿនដែលបានកាត់បន្ថយថ្លៃដើមឡូជីស្ទីក និងបង្កើន​ភាព​ប្រកួត​ប្រជែងរបស់កម្ពុជាក្នុងតំបន់។ លើសពីនេះ, ក្នុងឆ្នាំ២០២៥ ការវិនិយោគ​ផ្ទាល់​ពី​ចិនមា​ន​ចំនួន​រហូតដល់ជាង ៥០% នៃ FDI សរុប ដែលជាសក្ខីភាពបង្ហាញពីទំនុក ចិត្តខ្ពស់​របស់​អ្នក​វិនិយោគ​ចិន​មកលើស្ថិរភាពនយោបាយ និងម៉ាក្រូ​សេដ្ឋ​កិច្ច​របស់​រាជ​រដ្ឋាភិបាល​កម្ពុជា​។ឯកឧត្តម ស៊ុន ចាន់ថុល ក៏បានអំពាវនាវយ៉ាងទទូច ឱ្យមានការវិនិយោគលើវិស័យអាទិភាពខ្ពស់ ដើម្បី​រុញច្រានកម្ពុជាឱ្យកាន់ តែមានភាពធន់ក្នុងយុគសម័យឌីជីថលរួមមាន ការជំរុញ​ផលិត​កម្ម​ដែល​មាន​តម្លៃបន្ថែមខ្ពស់ ការកែច្នៃកសិផលឱ្យមានម៉ាកយីហោ ល្បីៗលើទីផ្សារអន្តរជាតិ ការវិ​និយោគ​លើថាមពលបៃតង និងការកសាងប្រព័ន្ធឡូជីស្ទីកវៃឆ្លាត។ ឯកឧត្តមបានសង្កត់ធ្ងន់ថា ក្នុង​ក្របខ័ណ្ឌនៃសហគមន៍វាសនារួម កម្ពុជាមិនត្រឹមតែចង់បានបរិមាណវិនិយោគប៉ុណ្ណោះទេ ប៉ុន្តែ​គឺ​ផ្ដោតលើគុណភាព និងចីរភាព ដែលអាច ជួយឱ្យកម្ពុជា ក្លាយជាថ្នាល​ឡូជី​ស្ទីក​ដ៏​សំខា​ន់​នៅ​ក្នុងច្រករបៀងមេគង្គ។ឯកឧត្តមឧបនាយករដ្ឋមន្ត្រី បានគូសរំលេចបន្ថែមថា ដើម្បី​គាំ​ទ្រដ​ល់​មហិច្ឆតា​នៃ​ការ​កសាង​អនាគត​រួមគ្នាដ៏រុងរឿងនេះ រាជរដ្ឋាភិបាលកម្ពុជា បានត្រៀមខ្លួនជាស្រេច ក្នុងការដោះ​ស្រាយ​រាល់​បញ្ហា​រាំង​ស្ទះតាមរយៈយន្តការថ្មីៗ, ឯកឧត្តមបានប្រកាសពីការ ដាក់ឱ្យដំណើរការ "វេទិកា​សន្ទនា​រ​វាងរដ្ឋ និងវិស័យឯកជនកម្ពុជា-ចិន" (PPSD) ដែលនឹងចាប់ផ្តើមកិច្ចសន្ទនាលើកទី១ នៅ​ខែ​កុម្ភៈ ខាងមុខនេះ ហើយនឹងត្រូវរៀបចំឡើងរៀងរាល់៦ខែម្តង ដើម្បីឆ្លើយតប​ទៅ​នឹង​កង្វល់​របស់​អ្នក​វិនិយោគដោយផ្ទាល់។ ការប្តេជ្ញាចិត្តនេះ ត្រូវបានពង្រឹង បន្ថែមតាមរយៈ​ការ​ធ្វើ​កំណែ​ទម្រង់​រដ្ឋបាល​ឌីជីថល ការលើកកម្ពស់តម្លាភាព និងការបណ្តុះបណ្តាលជំនាញបច្ចេកទេស (TVET)​ ដើម្បីធានាថាអ្នកវិនិយោគនឹងទទួលបាននូវបរិយាកាសធុរកិច្ចដែលងាយស្រួល និង​អាច​ប៉ាន់​ប្រមាណបាន៕ អត្ថបទ៖ សុន រ៉ាឌី

អតិផរណាឆ្នាំ២០២៦ ស្ថិតក្នុងអត្រា ២,៣% ខណៈម្ហូបអាហារ មុខទំនិញ និង​ប្រេង​ឥន្ធនៈ​រំពឹង​ធ្លាក់​ចុះ

2026/02/02 11:49:59 am        198
Facebook Telegram Linkin
ធនាគារជាតិនៃកម្ពុជា ព្យាករថា អត្រាអតិផរណានៅឆ្នាំ២០២៦ នឹងស្ថិតក្នុងរង្វង់ ២,៣% ទាប​ជាង​ឆ្នាំ​២០២៥ ក្នុងនោះកំណើន ថ្លៃក្រុមម្ហូបអាហារនឹងថមថយមក ៣,៣%, ថ្លៃស្នូល ១,៧%, ស្រប​ពេល​ដែលក្រុមទំនិញ និងសេវាពាក់ព័ន្ធនឹងប្រេងឥន្ធនៈនឹងបន្តធ្លាក់ ថ្លៃ -២,២% បើ​ធៀប​និ​ងឆ្នាំ​២០២៥។ទស្សនវិស័យសេដ្ឋកិច្ច, យោងតាមមូលនិធិរូបិយវត្ថុអន្តរជាតិ សេដ្ឋកិច្ចពិភពលោកឆ្នាំ២០២៦ ត្រូវ​បាន​ព្យាករថា មានកំណើន ៣,១% ទាបជាងឆ្នាំ២០២៥ (៣,២%) ដោយសារភា​ព​តាន​តឹង​ភូមិ​សាស្ត្រនយោបាយនិងសេដ្ឋកិច្ច ភាពផុយស្រួយនៅក្នុងទីផ្សារ ហិរញ្ញវត្ថុអន្តរជាតិ ការព្រួយ​បារម្ភ​ពី​ចីរភាពសារពើពន្ធ និងការកើនឡើងហានិភ័យពីការប្រែប្រួលអាកាសធាតុ។ ចំពោះ​អត្រា​អតិផរណាពិភពលោក ព្យាករថា ថយចុះមក ៣,៧% នាឆ្នាំ២០២៦ (ធៀបនឹង ៤,២% ឆ្នាំ​២០២៥​) ដោយសារតម្រូវការសកលបាន ថមថយ ការថយចុះថ្លៃទំនិញសកល និងឥទ្ធិពល​បន្សល់​ទុ​កនៃការអនុវត្តនយោបាយរូបិយវត្ថុរឹតត្បិត របស់ធនាគារកណ្តាលធំៗ។ ចំពោះសេដ្ឋកិច្ចកម្ពុជា, ទស្សនវិស័យនៅឆ្នាំ២០២៦ ត្រូវបានព្យាករថា នឹង​អាច​សម្រេច​បាន​ក្នុង​អត្រា ៥% កំណើននេះត្រូវ បានគាំទ្រជាចម្បងដោយ៖ កំណើនវិស័យកម្មន្តសាល, វិស័យ​ទេសចរណ៍, កំណើនវិស័យកសិកម្ម និងការងើបឡើងសន្សឹមៗនៃវិស័យ សំណង់​និង​អចលន​ទ្រព្យ។​ ទន្ទឹមនេះសេដ្ឋកិច្ចកម្ពុជាអាចបន្តប្រឈមនឹងហានិភ័យមួយចំនួន ជាពិសេ​ស​ហានិភ័យ​ខាង​ក្រៅដូ​ចជា៖ ភាពតានតឹងនៃភូមិសាស្ត្រនយោបាយ ដែលធ្វើឱ្យប៉ះពាល់​ដល់​ខ្សែ​ច្រវាក់​ផ្គត់​ផ្គង់​, ឥទ្ធិពលនៃការប្រែប្រួលអាកាសធាតុ, និងការឆបោក តាមប្រព័ន្ធអនឡាញ។ ចំពោះ​ហានីភ័យ​ខាង​ក្នុង​រួមមាន៖ ភាពទន់ខ្សោយនៃវិស័យសំណង់និងអចលនទ្រព្យ, ផលប៉ះពាល់ពីការអូស បន្លាយ​នៃ​ជម្លោះព្រំដែនកម្ពុជា-ថៃ និងការកើនឡើងឥណទានមិនដំណើរការ។ចំណែកអត្រាអតិផរណានៅឆ្នាំ២០២៦ ត្រូវបានព្យាករថា នឹងថមថយបន្តិចមក ២,៣% (ធៀប​នឹង ២,៥% នៅឆ្នាំ២០២៥) ដែលក្នុងនោះកំណើនថ្លៃក្រុមម្ហូបអាហារនឹងថមថយមក ៣,៣% (ធៀប​នឹង ៣,៧%) និងអតិផរណាស្នូលនឹងថមថយមក ១,៧% (ធៀបនឹង ១,៩%) ស្រប​ពេល​ដែល​ក្រុមទំនិញនិងសេវាពាក់ព័ន្ធនឹងប្រេងឥន្ធនៈនឹងបន្តធ្លាក់ថ្លៃ -២,២% (ធៀបនឹង -១,៧%)។ ការ ថមថយនេះត្រូវបានព្យាករក្រោមកត្តាសន្មតដូចជា៖ ភាពប្រសើរ​ឡើង​នៃ​វិស័យ​កសិកម្ម និងការស្ដារឡើងវិញនៃខ្សែច្រវាក់ផ្គត់ផ្គង់ ក្រោយការផ្ទុះអាវុធកម្ពុជា-ថៃលើកទី២, ប្រាក់​រៀល​នឹង​មានស្ថិរភាពធៀបនឹងដុល្លារអាមេរិក, និងថ្លៃប្រេងឆៅពិភពលោកនឹងបន្តធ្លាក់ ចុះ ដោយ​សារ​កំណើន​ផលិតកម្មប្រេង ជាពិសេសពីបណ្តាប្រទេសក្រៅពី OPEC+។ ទោះយ៉ាងណា កត្តា​មួយចំនួននឹងចូលរួមបង្កើន សម្ពាធអតិផរណាមួយផ្នែកដែលរួមមាន៖ ការងើប​ឡើង​វិញ​នៃ​សកម្ម​ភាព​សេដ្ឋកិច្ច ជាពិសេសវិស័យទេសចរណ៍ និងវិស័យកម្មន្តសាល ដែលនឹងជំរុញតម្រូវការ ការ​កើន​ឡើង​នៃកម្លាំងទិញរបស់ពលករដែលបានវិលត្រឡប់មកពីប្រទេសថៃ បន្ទាប់ពីទទួល​បាន​ការ​ងា​រ​ធ្វើ និងការរំពឹងទុកនៃការទម្លាក់អត្រា ការប្រាក់គោលរបស់ធនាគារកណ្តាលសហរដ្ឋអាមេរិក ដែល​អាចជំរុញកំណើនឥណទាន៕ អត្ថបទ៖ សុន រ៉ាឌី

៦ឆ្នាំមកនេះ រាជរដ្ឋាភិបាលកម្ពុជាបានជួយកសិករជាច្រើនខាងផ្នែកបច្ចេកទេស និងហិរញ្ញវត្ថុ ដើម្បី​អភិវឌ្ឍន៍វិស័យកសិកម្ម

2026/01/30 11:09:58 am        133
Facebook Telegram Linkin
កឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជា​នាយក​គម្រោង បានបញ្ជាក់ថា គិតក្នុងរយៈពេលជិត ៦ឆ្នាំកន្លងមកនេះ តាមរយៈ​គម្រោង​ពិពិធ​កម្ម​កសិកម្ម​កម្ពុជា (CASDP) រាជរដ្ឋាភិបាលកម្ពុជា បានបង្កើតនូវឱកាសជាច្រើនដល់ប្រជាកសិករ ទាំង​ផ្នែកបច្ចេកទេស និងផ្នែកហិរញ្ញវត្ថុ ជាពិសេសផ្សាភ្ជាប់ទីផ្សារជូនប្រជាកសិករ តាមរយៈ​ការ​រៀប​ចំ​ហេដ្ឋារចនាសម្ព័ន្ធនៅសហគមន៍ ដែលជាការវិនិយោគសាធារណៈរបស់រដ្ឋ ដើម្បីរួម​ចំណែក​អភិវឌ្ឍន៍​វិស័យកសិកម្មនៅកម្ពុជា។ការលើកឡើងដូច្នេះរបស់ ឯកឧត្តម ឃឹម ហ្វីណង់ ខណៈដែលគម្រោងពិពិធកម្មកសិកម្មកម្ពុជា និង​សហគមន៍កសិកម្មចំនួន១៧ មកពី៨ខេត្តផ្សេងៗគ្នា មានដូចជា៖ សៀមរាប កំពង់ចាម ឧត្តរមាន​ជ័យ បន្ទាយមានជ័យ បាត់ដំបង តាកែវ ព្រៃវែង និងពោធិ៍សាត់ បានចុះហត្ថលេខា​លើ​កិច្ច​ព្រម​ព្រៀងក្នុ​ងការទទួលបានហិរញ្ញប្បទានសរុបជាទឹកប្រាក់ចំនួនជិត ៩លានដុល្លារ ក្នុងនោះ ២,៧លានដុល្លារ ជាជំនួយឥតសំណង និងប្រមាណ ៦លានដុល្លារទៀត ជាកម្ចីដើមទុនការប្រាក់ទាប កាលពីថ្មីៗកន្លងទៅនេះ នៅទីស្តីការក្រសួងកសិកម្ម។ឯកឧត្តម បានលើកឡើងថា អ្វីដែលឃើញក្នុងពេលនេះ មិនថាតែ ១៧សហគមន៍ ឬក៏អ្វីដែលមើលរូបភាពជារួមក្នុងអំឡុងពេលដែលគម្រោងពិពិធកម្មកសិកម្មកម្ពុជា បានអនុវត្តពេញ ៦ឆ្នាំកន្លងមកនេះ គឺជាភស្តុតាងមួយដ៏សំខាន់បង្ហាញថា ក្រសួងកសិកម្ម ក៏ដូចរាជរដ្ឋាភិបាលកម្ពុជា មានការយកចិត្តទុកដាក់ច្រើនជាមួយប្រជាកសិករទាំងអស់។ ឯកឧត្តម ឃឹម ហ្វីណង់ បានបញ្ជាក់បន្ថែមថា រហូតមកដល់ពេលនេះ តាមរយៈគម្រោងពិពិធកម្មកសិកម្មកម្ពុជា បានអនុម័តបូកទាំង១៧សហគមន៍ខាងលើនេះ សម្រេចបានចំនួន ១០១ផែនការអាជីវកម្មហើយ ក្នុងនោះប្រមាណជាង៦០ផែនការអាជីវកម្ម ជូនដល់សហគមន៍កសិកម្មទូទៅ និងជាង៤០ផ្សេងទៀត ជូនដល់សហគមន៍កសិកម្មទំនើប។ សូមបញ្ជាក់ថា គម្រោងពិពិធកម្មកសិកម្មកម្ពុជា (CASDP) បានត្រៀមថវិកាសរុបចំនួន ១០០លានដុល្លារ ក្នុងនោះ ថវិការបស់រាជរដ្ឋាភិបាលកម្ពុជា ជាថវិកាទទួលបានហរិញ្ញប្បទានកម្ចីយោគយល់ពីធនាគារពិភពលោក (World Bank) ដើម្បីយកមកប្រើប្រាស់ជាប្រយោជន៍ដល់ប្រជាកសិករ។ សូមជម្រាបជូនទៀតថា ការជួយដល់ប្រជាកសិករទាំងនេះ ដោយសារកង្វះទុនវិនិយោគ ខណៈពីមុនប្រជាកសិករដាំបន្លែនៅទីវាល ដែលធ្វើឱ្យមានការពិបាកក្នុងការដាំនៅរដូវក្ដៅ ពិបាកក្នុងការដាំខែភ្លៀង។ ហើយការដាំដុះភាគច្រើនស្ថិតនៅក្នុងខែត្រជាក់ ដែលនាំឱ្យការប្រមូលផលដំណាលគ្នា ធ្វើឱ្យតម្លៃមិនសូវល្អ។ ដូច្នេះ តាមរយៈគម្រោងនេះ បានផ្ដល់ទុនជាសម្ភារៈ តួយ៉ាងដូចជាការវិនិយោគលើផ្ទះសំណាញ់ និងប្រព័ន្ធស្រោចស្រពជាដើម៕ អត្ថបទ៖ ឈិត បូរ៉ាវី 

កម្ពុជា-កូរ៉េ គ្រោងរៀបចំបេសកកម្មទាក់ទាញវិនិយោគិននៅកូរ៉េ មកវិនិយោគនៅកម្ពុជា

2026/01/30 09:12:17 am        307
Facebook Telegram Linkin
កម្ពុជា-កូរ៉េ គ្រោងរៀបចំបេសកកម្មទាក់ទាញ និងជំរុញវិនិយោគិននៅកូរ៉េ មក​វិនិយោគ​នៅ​កម្ពុជា​បន្ថែម​ និងគ្រោងរៀបចំកម្មវិធី "អាហារពេលព្រឹកការងារ" មួយខែម្តង ជាមួយ​បណ្តា​សភាពាណិជ្ជ​កម្ម​នៅ​កម្ពុជា ដើម្បីពង្រឹងបណ្តាញទំនាក់ទំនង និងផ្លាស់ប្តូរព័ត៌មាន សេដ្ឋកិច្ចនានា។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃ​ទី​២៩ ខែមករា ឆ្នាំ២០២៦ នេះ ទទួលជួបសម្តែងការគួរសម និង​ពិភាក្សា​ការងារ​ជាមួយ​គណៈ​ប្រតិភូ​នៃស​មាគមធុរកិច្ច នៃសាធារណរដ្ឋកូរ៉េនៅកម្ពុជា (KOCHAM) ដឹកនាំដោយលោក Sungsoo Kim អគ្គនាយកប្រតិបត្តិ នៃគ្រឹស្ថានមីក្រូហិរញ្ញវត្ថុព្រែម (Prime MFI) ដើម្បីព​ង្រឹង​ទំនាក់​ទំនង សេដ្ឋកិច្ច និងជំរុញបរិយាកាសវិនិយោគឱ្យកាន់តែប្រសើរឡើង។ ជំនួប​នេះ​បាន​ឆ្លុះ​បញ្ចាំង​ពី​ទំនាក់ទំនងសេដ្ឋកិច្ចដ៏រឹងមាំ រវាងកម្ពុជា និងកូរ៉េ ព្រមទាំងដាក់​ចេញ​នូវ​យន្តការ​ថ្មីៗ​ ដើម្បី​ដោះ​ស្រាយបញ្ហាប្រឈម និងក្តាប់យកឱកាសវិនិយោគ។ឯកឧត្តមឧបនាយករដ្ឋមន្ត្រី បានសង្កត់ធ្ងន់លើសារៈសំខាន់នៃយន្តការ "កិច្ច​សន្ទនា​រវាង​វិស័យ​សាធារណៈ ​និងវិស័យឯកជន កម្ពុជា-កូរ៉េ" ដែលជាវេទិកាដ៏មានប្រសិទ្ធភាពក្នុងការស្តាប់ និង​ដោះ​ស្រាយ​បញ្ហាប្រឈមរបស់វិនិយោគិន និងបានលើកទឹកចិត្តឱ្យ KOCHAM ក៏​ដូច​ជា​ក្រុម​ហ៊ុន​កូរ៉េ​ទាំង​អស់ រាយការណ៍រាល់បញ្ហា ឬឧបសគ្គនានាដែលបានជួបប្រទះ តាមរយៈយន្តការនេះ ដើម្បីឱ្យរាជរដ្ឋាភិបាលអាចជួយសម្របសម្រួលបានទាន់ពេលវេលា។ ឯកឧត្តមឧបនាយករដ្ឋមន្ត្រី បាន​បញ្ជាក់ជាថ្មី អំពីការប្តេជ្ញាចិត្តរបស់ ក.អ.ក. ក្នុងនាម​ជា​ស្ថាប័ន​ផ្តល់​ការ​សម្រប​សម្រួល​រាល់​ការ​វិនិយោគពីបរទេស ផ្តល់ភាពងាយស្រួលក្នុងការចុះបញ្ជី និងការអនុវត្ត គម្រោង ដោយ​កម្ពុជា​មាន​បំណង​ចង់ឃើញវត្តមានវិនិយោគិនកូរ៉េ នៅកម្ពុជាកាន់តែច្រើន និងបានជំរុញឱ្យ KOCHAM ជួយ​ស្វែងរក គម្រោងវិនិយោគដែលមានសក្ដានុពល និងគុណភាព ខ្ពស់ដែល​ស័ក្តិសម​សម្រា​ប់​ក្រុម​ហ៊ុន​ធំៗពីប្រទេសកូរ៉េ។លោក Sungsoo Kim បានជម្រាបជូនថា វិនិយោគិន​កូរ៉េ​កំពុង​មាន​ការ​ចាប់​អារម្មណ៍​ខ្លាំង​លើ​ទីផ្សារ​កម្ពុជា ដោយសារកំណើន នៃការអភិវឌ្ឍសេដ្ឋកិច្ច-សង្គមរបស់កម្ពុជា នាពេលប៉ុន្មាន​ឆ្នាំ​ចុង​ក្រោយ​។ លោកបានបញ្ជាក់បន្ថែមថា KOCHAM នឹងដើរតួនាទីជាស្ពាន ចម្លងដ៏សំខាន់ ក្នុងការ​នាំ​យក​កង្វល់ និងសំណូមពររបស់ធុរជនកូរ៉េ មកកាន់យន្តការពិភាក្សាផ្លូវការ ដើម្បីរួមចំណែក​ដល់​ការ​អភិវឌ្ឍ សេដ្ឋកិច្ចកម្ពុជាឱ្យកាន់តែរីកចម្រើន។ភាគីទាំងពីរ ក៏បានពិភាក្សាបន្ថែមលើសកម្មភាពសំខាន់ៗមួយចំនួន ដើម្បីបង្កើនទំនុកចិត្ត និង​ពង្រីក​បណ្តាញ​ធុរកិច្ចរួមមាន៖ ការ ត្រៀមរៀបចំបេសកកម្មទាក់ទាញ និងជំរុញវិនិយោគនៅកូរ៉េ ដែល​គ្រោងនឹងប្រព្រឹត្តទៅក្នុងត្រីមាសទី២ នៃឆ្នាំ២០២៦ ដោយរំពឹងថា នឹងមានការ​ចូល​រួម​យ៉ាង​សកម្ម​ពី​សំណាក់ KOCHAM ផងដែរ សំដៅទាក់ទាញអ្ន​កវិនិយោគ​ថ្មីៗ​បន្ថែម​ពី​កូរ៉េ​មក​កាន់​កម្ពុជា​។ បន្ថែមពីនោះ ភាគីទាំងពីរបានលើកឡើងពីគំនិតផ្តួចផ្តើមឱ្យមានការរៀបចំកម្មវិធី "អាហារ​ពេល​ព្រឹក​ការងារ" (Working Breakfast) រៀងរាល់មួយខែម្តង ជាមួយ​បណ្តា​សភាពាណិជ្ជ​កម្ម​ទាំង​អស់​នៅ​កម្ពុជា ដើម្បីពង្រឹងទំនាក់ទំនង និងផ្លាស់ប្តូរព័ត៌មានសេដ្ឋកិច្ចនានា៕ អត្ថបទ៖ សុន រ៉ាឌី

សហគមន៍កសិកម្មចំនួន១៧ ទទួលបានហិរញ្ញប្បទានជិត ៩លានដុល្លារ របស់​រាជរដ្ឋាភិបាល ដើម្បី​ពង្រីក​ដើម​ទុន

2026/01/29 01:06:43 pm        160
Facebook Telegram Linkin
គម្រោងពិពិធកម្មកសិកម្មកម្ពុជា(CASDP) នៃក្រសួងកសិកម្ម រុក្ខាប្រមាញ់ និងនេសាទ បាន​ចុះ​កិច្ច​ព្រម​ព្រៀង​ជាមួយនឹងសហគមន៍កសិកម្មទំនើប និងសហគមន៍កសិកម្មចំនួន១៧ ក្នុងការទទួល​បាន​ហិរញ្ញប្ប​ទាន​សរុប​ជាទឹកប្រាក់ជិត ៩លានដុល្លារ ក្នុងនោះ ២,៧លានដុល្លារ ជាជំនួយឥតសំណង និងជាង ៦​លាន​ដុល្លារទៀត ជាកម្ចីដើមទុនការប្រាក់ទាប។ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បាន​មានប្រសាសន៍ប្រាប់ក្រុមអ្នកសារព័ត៌មាន ក្រោយចប់ពិធីចុះហត្ថលេខាលើកិច្ចព្រមព្រៀង កាល​ពី​រសៀល​ថ្ងៃ​ទី២៨ មករា ឆ្នាំ២០២៦កន្លងទៅថា ហិរញ្ញប្បទាននេះ មានគោលបំណង​ពង្រឹង​សមត្ថភាព​ផលិត​កម្ម​កសិកម្ម កែលម្អខ្សែសង្វាក់តម្លៃ និងគាំទ្រដល់ការអភិវឌ្ឍសហគមន៍កសិកម្មទំនើប ដែល​រួម​ចំណែក​ដល់កា​រធ្វើពិពិធកម្ម និងនិរន្តរភាពនៃវិស័យកសិកម្មរបស់ប្រទេសកម្ពុជា។ឯកឧត្តម លើកឡើងបន្តថា គម្រោងពិពិធកម្មកសិកម្មកម្ពុជា (CASDP) ជាគម្រោងរបស់ក្រសួងកសិកម្ម ហើយ​ទទួលបានថវិកាពីធនាគារពិភពលោក។ ការចុះកិច្ចព្រមព្រៀងឥណទានបំពេញបន្ថែមទុនវិនិយោគ ដែល​ជាការជួយគាំទ្រដល់សហគមន៍ដើម្បីទទួលបាននូវជំនួយឥតសំណងផង និងទ​ទួល​បាន​នូវ​កម្ចី​ឥណ​ទាន​ការ​ប្រាក់ទាបផងសម្រាប់ការវិនិយោគរបស់គាត់នៅក្នុងសហគមន៍។ ឯកឧត្តម បានបន្តទៀតថា កិច្ច​ព្រម​ព្រៀងនេះបានចុះជាមួយសហគមន៍ចំនួន១៧ មកពី៨ខេត្ត ដូចជា សៀមរាប កំពង់ចាម តាកែវ និង​ឧត្តរមានជ័យ...។ អ្វីដែលក្រសួងជួយនេះ គឺជួយទៅលើការវិនិយោគ មានន័យថា ជួយទៅលើទុនបង្វិល ប៉ុន្តែ​យើងចែកជាពីររូបភាព ដែលមួយ​ជ្រុង​យើង​ហៅ​ថា​ជំនួយ​ឥត​សំណង​ដែល​ជំនួយ​នេះ​ជួយ​ទៅ​លើ​ការ​វិនិយោគ​លើ​អ្វីដែលជាទ្រព្យ ដូចជាផ្ទះសំណាក់ ម៉ាស៊ីន គ្រឿងចាក់ ឃ្លាំង ទីលានហាលសម្ងួតជាដើម។លោក គង់ វ៉ុង ប្រធានសហគមន៍ចំប៉ាសែនជ័យ ខេត្តតាកែវ បានឱ្យព័ត៌មាន ប៊ីធីវី ដឹងថា លោកពិត​ជា​សប្បាយ​រីករាយខ្លាំង ដោយសារជា​ឱកាសទី១​ដែល​សហគមន៍​របស់​លោក​បាន​ទទួល​នូវ​ហិរញ្ញ​ប្បទាន​សំណង​​រហូតដល់ ៤០ភាគរយ ដែលជួយឱ្យសហគមន៍​របស់​លោក​រុញ​ការ​ផលិត​ឱ្យកាន់​តែ​ប្រសើរ​បន្ថែម​ទៀត។លោកឱ្យដឹងថា ការផលិតបន្លែនៅក្នុងសហគមន៍របស់លោក សម្រាប់ឆ្នាំនេះការផលិតបានទិន្នផលល្អ និង​តម្លៃមានលំនឹងល្អដែលកសិករអាចទទួលយកបាន ដោយ១ថ្ងៃសហគមន៍អាចប្រមូលបានពី ៤ទៅ៥​តោន​។ លោកបានបន្ថែមថាពិតជាសប្បាយ​ចិត្ត ហើយក៏អរគុណដល់រាជរដ្ឋាភិបាល ក៏ដូចជា​ក្រសួង​កសិកម្ម ដែលបានផ្តល់ឱកាសដល់សហគមន៍របស់លោក បានចូល​រួម​និង​ទទួ​ល​បាន​ហិរញ្ញប្បទាន​ឥត​សំណង​នេះ។ លោកបានប្តេជ្ញាធ្វើកិច្ចការនេះឱ្យបានកាន់តែប្រសើរ និងពង្រឹងសេដ្ឋកិច្ច​នៅ​ក្នុង​មូល​ដ្ឋាន​កាន់​តែ​រីកចម្រើនទៅមុខបន្ថែមទៀត។សូមជម្រាបជូនថា សហគមន៍ទាំងនេះ គឺជាក្រុមចុងក្រោយដែលទទួលបានការអនុម័តគាំទ្រការវិនិយោគ មុន​នឹង​គម្រោង​ដែល​ដឹកនាំ​ដោយ​ក្រសួង​កសិកម្ម និង​គាំទ្រ​ហិរញ្ញប្បទាន​ដោយ​ធនាគារ​ពិភព​លោក​មួយ​នេះ​ត្រូវ​បានបិទបញ្ចប់ជាផ្លូវការនៅក្នុងអំឡុងពេល៦ខែទៀត។ ដោយ​ហេតុ​ផល​នេះ​ហើយ​ទើប​ក្រុម​ការ​ងារ​សម្រេច​រៀបចំពិធីចុះហត្ថលេខាលើកិច្ចព្រមព្រៀងរួមគ្នាតែម្តងនៅក្រសួងកសិកម្ម ដើម្បីចំណេញ​ពេល​វេលា និង​បង្កើន​ល្បឿន​អនុវត្ត​ផែន​ការ​វិនិយោគ​នៅ​តាម​សហគមន៍​នីមួយ​ៗ​ឱ្យ​បាន​ទាន់​ពេល​និង​ត្រឹម​ត្រូវទៅ​តាម​នីតិវិធីតម្រូវ៕ អត្ថបទ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

មន្ទីរប្រឆាំងគ្រឿងញៀន បង្ក្រាបសំបុកក្រុមជួញដូរគ្រឿងញៀនយ៉ាងសកម្មក្នុងភូមិសាស្ត្រខេត្តតាកែវ ប្រដាប់ដោយអាវុធ បានបាញ់មកលើកម្លាំងនគរបាល២នាក់របួសធ្ងន់កំពុងសង្គ្រោះបន្ទាន់ ចាប់ខ្លួនជនល្មើសបានចំនួន ៧នាក់
04/02/2026 06:04 PM
Facebook Telegram Linkin
ប្រមុខការពារជាតិកម្ពុជា ទទួលជួបសំណេះសំណាល និងបំពាក់គ្រឿងឥស្សរិយយសជូនក្រុមអ្នកសង្កេតការណ៍អាស៊ាន (AOT) ដែលបញ្ចប់បេសកកម្មនៅកម្ពុជា
04/02/2026 06:04 PM
Facebook Telegram Linkin
កងទ័ពអ៊ីស្រាអែលរាយការណ៍ថាបានវាយប្រហារមូលដ្ឋានទ័ពជើងគោករបស់ IRGC នៅជិតទីក្រុងតេ អេរ៉ង់
04/02/2026 06:04 PM
Facebook Telegram Linkin
កងទ័ពស៊ីរីរកឃើញបណ្តាញផ្លូវរូងក្រោមដី នៅព្រំដែនលីបង់
04/02/2026 06:04 PM
Facebook Telegram Linkin
អំពើហិង្សាបង្កឡើងដោយអ្នកតាំងលំនៅអ៊ីស្រាអែល នៅតំបន់វេសបែង ឈានដល់កម្រិតមិនធ្លាប់មានពីមុនមក
04/02/2026 06:04 PM
Facebook Telegram Linkin
អ៊ីរ៉ង់បដិសេធសេចក្តីថ្លែងការណ៍របស់លោក TRUMP អំពីការបំផ្លាញសមត្ថភាពយោធាអ៊ីរ៉ង់
04/02/2026 05:04 PM
Facebook Telegram Linkin
BREAKING NEWS | តំណាងអយ្យការសម្រេចចោទប្រកាន់កូនស្នងការរងខេត្តបន្ទាយមានជ័យបើកបរបុកស្លាប់មនុស្ស ៦នាក់ នៅស្រុកមោងឫស្សី ចំនួន ២បទល្មើស
04/02/2026 05:04 PM
Facebook Telegram Linkin
សាលាដំបូងរាជធានីភ្នំពេញឃុំខ្លួនឧក្រិដ្ឋជនជាមេឃ្លោង ១៨រូប ពាក់ព័ន្ធឧក្រិដ្ឋកម្មឆបោកតាមប្រព័ន្ធបច្ចេកវិទ្យាដាក់ពន្ធនាគារបណ្តោះអាសន្ន
04/02/2026 05:04 PM
Facebook Telegram Linkin
ប៉ាគីស្ថាន បញ្ជាក់ថា អាហ្វហ្គានីស្ថាន គឺជាអ្នកមានកាតព្វកិច្ចបញ្ចប់អរិភាព
04/02/2026 05:04 PM
Facebook Telegram Linkin
កម្លាំងជំនាញ CMAC ដោះបន្សាបគ្រាប់បែកទម្លាក់ពីយន្តហោះដោយទ័ពអាកាសសៀមឈ្លានពានកាលពីនៅថ្ងៃទី១០ ខែធ្នូ ឆ្នាំ២០២៥ ប្រភេទ MK-82 ទម្ងន់ប្រមាណជាង ២៣០គីឡូក្រាមដោយជោគជ័យ
04/02/2026 05:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.