BTV NEWS

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

សន្តិសុខ និង សង្គម

សហភាពអឺរ៉ុបធ្វើសមយុទ្ធយោធារួមគ្នាលើកដំបូង ក្នុងគោលបំណងពង្រឹងតួនាទីសន្តិសុខពិភពលោក

ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយកាលពីថ្ងៃអង្គារ (១៧ តុលា) ថា សហភាពអឺរ៉ុប បានចាប់ផ្តើមសមយុទ្ធយោធារួមគ្នាលើកដំបូងរបស់ពួកគេ ដើម្បីពង្រឹង «តួនាទីជាអ្នកការពារ និងអ្នកផ្តល់សេវាសន្តិសុខសម្រាប់ពិភពលោក»។ក្រុមទាហានបុរស និងស្ត្រី ជាង២.៨០០នាក់ មកពីប្រទេសអូទ្រីស អេស្ប៉ាញ បារាំង ហុងគ្រី អៀរឡង់ អ៊ីតាលី ម៉ាល់តា ព័រទុយហ្គាល់ និងមកពីប្រទេសរ៉ូម៉ានី កំពុងចូលរួមក្នុងសមយុទ្ធឈ្មោះ ម៉ៃឡេច-២៣ (MILEX-23) នៅឆ្នេរសមុទ្ររ៉ូតា ប្រទេសអេស្ប៉ាញ ដើម្បីបណ្តុះបណ្តាលសមត្ថភាពដាក់ពង្រាយយ៉ាងឆាប់រហ័សរបស់ពួកគេនៅខាងក្រៅសហភាពអឺរ៉ុប។សហភាពអឺរ៉ុប មានគោលបំណងពង្រឹងសមត្ថភាពក្នុងការដាក់ពង្រាយទាហានរហូតដល់ ៥.០០០នាក់យ៉ាងឆាប់រហ័សនៅឆ្នាំ២០២៥ ដើម្បីឆ្លើយតបទៅនឹងការគំរាមកំហែងដែលជិតមកដល់ ព្រមទាំងស្ថានភាពវិបត្តិផ្សេងៗ។ ក្នុងអំឡុងពេលធ្វើសមយុទ្ធនោះ ក្រុមទាហានចូលរួមក្នុងប្រតិបត្តិការវាយប្រហារនិមិត្តតាមអាកាស ដើម្បីធានាសុវត្ថិភាពកំពង់ផែដ៏សំខាន់មួយ៕

តុលាការកំពូលឥណ្ឌា ប្រឆាំងការរៀបការភេទដូចគ្នា ខណៈធ្វើឲ្យសហគមន៍ LGBT អាក់អន់ចិត្តជាខ្លាំង

តុលាការកំពូលរបស់ប្រទេសឥណ្ឌា កាលពីថ្ងៃអង្គារ (១៧ តុលា) បានបដិសេធមិនផ្ដល់ភាពស្របច្បាប់ដល់អាពាហ៍ពិពាហ៍ភេទដូចគ្នានោះទេ ហើយទុកឱ្យសភាធ្វើការសម្រេច ដោយយល់ស្របជាមួយរដ្ឋាភិបាលរបស់លោកនាយករដ្ឋមន្ត្រី Narendra Modi ថា សភា គឺជាវេទិកាត្រឹមត្រូវក្នុងការគ្រប់គ្រងលើបញ្ហាចម្រូងចម្រាសបែបនេះ។ដីកាជាឯកច្ឆ័ន្ទរបស់ចៅក្រមចំនួនប្រាំរូបនេះ បានធ្វើឡើង ខណៈបង្កជាការខកចិត្តយ៉ាងខ្លាំងចំពោះសហគមន៍អ្នកស្រលាញ់ភេទដូចគ្នា (LGBTQ) ដ៏ធំ នៅក្នុងប្រទេសដែលមានប្រជាជនច្រើនជាងគេលើពិភពលោកមួយនេះ រយៈពេលប្រាំឆ្នាំបន្ទាប់ពីតុលាការបានលុបចោលការហាមប្រាមក្នុងសម័យអាណានិគម លើការរួមភេទសម្រាប់អ្នកស្រឡាញ់ភេទដូចគ្នា។រដ្ឋបាលគណបក្សជាតិនិយម BJP របស់លោក Modi បានជំទាស់នឹងញត្តិទៅតុលាការលើបញ្ហានេះ ដោយនិយាយថា ការរៀបអាពាហ៍ពិពាហ៍ភេទដូចគ្នា គឺមិនអាចប្រៀបធៀបជាមួយនឹងគោលគំនិតគ្រួសារឥណ្ឌា ដែលរួមមានប្តី ប្រពន្ធ និងកូន នោះទេ។ការសម្រេចរបស់តុលាការនេះ បានធ្វើឡើងដើម្បីឆ្លើយតបនឹងញត្តិជាង១២ច្បាប់ ដែលបានដាក់តាំងពីឆ្នាំមុន។ តុលាការកំពូល ដែលដឹកនាំដោយលោកប្រធានចៅក្រម D.Y. Chandrachud បានបើកសវនាកាស្តាប់ទឡ្ហីករណ៍កាលពីខែមេសា និងខែឧសភា ហើយបានប្រកាសសាលក្រមប្រឆាំង កាលពីថ្ងៃអង្គារម្សិលមិញនេះ៕

ឃាតករសម្លាប់គ្រូបង្រៀននៅបារាំង ត្រូវបានចោទប្រកាន់ពីបទវាយប្រហារភេរវកម្មឲ្យក្រុមរដ្ឋអ៊ីស្លាម

រដ្ឋអាជ្ញានិយាយថា បុរសដែលបានសម្លាប់គ្រូបង្រៀនម្នាក់ នៅប្រទេសបារាំងភាគខាងជើង កាលពីសប្តាហ៍មុន ត្រូវបានចោទប្រកាន់ពីបទវាយប្រហារភេរវកម្ម កាលពីថ្ងៃអង្គារទី១៧ ខែ តុលា បន្ទាប់ពីបានបង្ហាញថាជននេះបានស្បថភក្តីភាពចំពោះក្រុមនិយមជ្រុលរដ្ឋអ៊ីស្លាម នៅក្នុងការថតសំឡេង មុនពេលការវាយប្រហាររបស់ខ្លួន។ឃាតកម្មកាលពីថ្ងៃសុក្រ កើតឡើងនៅពេលតែមួយ ខណៈសង្គ្រាម រវាងអ៊ីស្រាអែល និងក្រុមហាម៉ាស់ បានអង្រួនឲ្យមានភាពច្របូកច្របល់នៅក្នុងប្រទេសបារាំង និងបានដាក់ប្រទេសនេះលើការប្រុងប្រយ័ត្នខ្ពស់សម្រាប់អំពើហិង្សាបន្ថែមទៀត។ អ្នកវាយប្រហារមានឈ្មោះ Mohammed Moguchkov អាយុ២០ឆ្នាំ មកពីតំបន់មានពលរដ្ឋមូស្លីមរស់នៅភាគច្រើន របស់រុស្ស៊ី ត្រូវបានចោទប្រកាន់ដោយចៅក្រមប្រឆាំងភេរវកម្ម ដោយឃាតកម្មនេះពាក់ព័ន្ធទៅនឹងការឃុបឃិតភេវកម្ម ព្រមទាំងកំពុងមានទំនាក់ទំនងជាមួយឧក្រិដ្ឋជនភេរវកម្ម។ ប្រភពដែលដឹងច្បាស់ពីករណីនេះ បាននិយាយថាជននេះ បានបង្កើតសំណេរ និយាយយោងទៅរកតំបន់ហ្គាហ្សានៅក្នុងវីដេអូមួយ បន្ទាប់ពីការវាយប្រហារលើប្រទេសអ៊ីស្រាអែល ធ្វើឡើងដោយក្រុមហាម៉ាស់។

កំហឹងរាលដាលនៅទូទំាងតំបន់មជ្ឈិមបូព៌ា បន្ទាប់ពីការវាយប្រហារលើមន្ទីរពេទ្យតំបន់ហ្គាហ្សា

ក្រុមអ្នកតវ៉ារាប់ពាន់នាក់បានចេញធ្វើបាតុកម្ម នៅទូទាំងតំបន់មជ្ឈឹមបូព៌ានិងនៅអាហ្វ្រិកខាងជើងកាលពីថ្ងៃអង្គារដើម្បីបង្ហាញ ពីកំហឹងរបស់ពួកគេក្នុងការបំផ្លាញដោយការវាយប្រហារតាមអាកាសរបស់អ៊ីស្រាអែលដ៏ឃោឃៅលើមន្ទីពេទ្យ Al-Ahli al-Arabi ក្នុងតំបន់ហ្គាហ្សា។ ការតវ៉ាព្រមៗគ្នា បានផ្ទុះឡើងនៅក្នុងប្រទេសហ្សកដានី ទួរគី លីបង់ អ៊ីរ៉ង់ និងប្រទេសអ៊ីរ៉ាក់ ព្រមទាំងនៅទីក្រុងជាច្រើនក្នុងតំបន់ West Bank ដូចជាទីក្រុង Ramallah ជាដើម។ការធ្វើបាតុកម្មទាំងនេះ ធ្វើឡើងក្នុងការឆ្លើយតបទៅនឹងការបំផ្ទុះនៅមន្ទីរពេទ្យ ដែលតាមការសន្និដ្ឋានជាការវាយប្រហារដ៏ឃោឃៅបំផុតមួយ ចាប់តាំងពីសង្គ្រាមអ៊ីស្រាអែល-ក្រុមហាម៉ាស់ ចាប់ផ្តើមកាលពីថ្ងៃទី៧ ខែតុលា។ ក្រសួងសុខាភិបាលក្នុងតំបន់ហ្គាហ្សា និយាយថាមនុស្សយ៉ាងហោចណាស់៥០០នាក់ បានស្លាប់ ខណៈគ្រាប់បែកបានធ្លាក់ លើមន្ទីរពេទ្យតំបន់ហ្គាហ្សាភាគកណ្តាល ជាកន្លែងដែលពលរដ្ឋប៉ាឡេស្ទីនជម្លៀសខ្លួន កំពុងស្នាក់នៅក្នុងទីជម្រក។អង្គការសុខភាពពិភពលោកបានថ្កោលទោសការវាយប្រហារទៅលើមន្ទីរពេទ្យកាលពីថ្ងៃអង្គារ និងបានទាមទារឲ្យមានការការពារជនស៊ីវិលនិងបុគ្គលិកសុខាភិបាលជាបន្ទាន់នៅក្នុងតំបន់ហ៊ុមព័ទ្ធប៉ាឡេស្ទីន។ អ្នកឆ្លើយឆ្លងព័ត៌មាន Al Jazeera បានរាយការណ៍ថា យ៉ាងហោចណាស់ទីក្រុងជិត១០ទីក្រុង នៅក្នុងប្រទេសអ៊ីរ៉ង់ បានមើលឃើញការតវ៉ា ផ្ទុះឡើង ភ្លាមៗបន្ទាប់ពីការវាយប្រហារលើមន្ទីរពេទ្យ។មេដឹកនាំជាន់ខ្ពស់អ៊ីរ៉ង់ បាននិយាយកាលពីព្រឹកថ្ងៃអង្គារថាកាលណាបណ្តាប្រទេសមូស្លីម ពលរដ្ឋមូស្លីមមានកំហឹង វាពិបាកក្នុងការទប់ស្កាត់ពីការបញ្ចេញកំហឹងរបស់ពួកគេ។ នោះជារឿងពិតប្រាកដ នូវអ្វីដែលយើងកំពុងមើលឃើញនៅតាមដងផ្លូវ នៅប្រទេសទាំងនេះ និងយ៉ាងពិតប្រាកដនៅក្នុងប្រទេសអ៊ីរ៉ង់ផងដែរ។

ពលរដ្ឋប៉ាឡេស្ទីន ប៉ះទង្គិចជាមួយកងកម្លាំងរបស់លោក Abbas ក្នុងការតវ៉ានៅតំបន់ West Bank

កងកម្លាំងសន្តិសុខប៉ាឡេស្ទីន នៅទីក្រុង Ramallah បានបាញ់ឧស្ម័នបង្ហៀរទឹកភ្នែក និងគ្រាប់បែកផ្សែង ដើម្បីបំបែកក្រុមបាតុករដោយគប់ដុំថ្ម និងស្រែកប្រឆាំងប្រធានាធិបតីលោក Mahmoud Abbas កាលពីថ្ងៃអង្គារ ខណៈកំហឹងដ៏ខ្លាំងបានផ្ទុះឡើងបន្ទាប់ពីការវាយប្រហារលើមន្ទីរពេទ្យតំបន់ Gaza ដ៏ឃៅឃៅដែលប៉ាឡេស្ទីនបានដាក់កំហុសលើអ៊ីស្រាអែល។ការវាយប្រហារទៅលើមន្ទីរពេទ្យ Al-Ahli al-Arabi តំបន់ហ្គាហ្សា ដែលក្រុមមន្ត្រីបាននិយាយថា បណ្តាលឲ្យមនុស្សប្រហែល ៥០០នាក់ស្លាប់ គឺជាឧបទ្ទវហេតុមួយមានមនុស្សស្លាប់ច្រើនបំផុតនៅតំបន់ហ្គាហ្សា ចាប់តាំងពីអ៊ីស្រាអែលចាប់ផ្តើមយុទ្ធនាការក្នុងការសងសឹកចំពោះការវាយប្រហារដោយអាវុធរបស់ក្រុមហាម៉ាស ឆ្លងកាត់សហគមន៍អ៊ីស្រាអែល។នៅទីក្រុង Hebron ក្រុមបាតុករបានចេញធ្វើបាតុកម្មមានកាន់ទង់ជាតិរបស់ក្រុមហាម៉ាស់ និងប្រកាសទីក្រុងនេះសម្រាប់ក្រុមហាម៉ាស់។ យោធាប្រទេសអ៊ីស្រាអែល បានបដិសេធការទទួលខុសត្រូវចំពោះការវាយប្រហារនេះ ដោយដាក់កំហុសលើការបាញ់រ៉ុក្កែតរបស់ក្រុមសកម្មប្រយុទ្ធប៉ាឡេស្ទីនដែលបរាជ័យ។ ការវាយប្រហារនេះ ធ្វើឲ្យមានការថ្កោលទោសពីប្រទេសលោកខាងលិច និងពិភពអារ៉ាប់ ហើយការតវ៉ាជាច្រើនត្រូវបានធ្វើឡើងនៅស្ថានទូតរបស់ប្រទេសអ៊ីស្រាអែលក្នុងប្រទេសទួរគី និងហ្ស៊កដានី និងនៅជិតស្ថានទូតអាមេរិកក្នុងប្រទេសលីបង់។ យោងតាមសាក្សីបានឱ្យដឹងថា ការប៉ះទង្គិចគ្នាជាមួយកងកម្លាំងសន្តិសុខប៉ាឡេស្ទីន ក៏បានផ្ទុះឡើងនៅក្នុងទីក្រុង Nablus, Tubas និងទីក្រុង Jenin តំបន់ West bank ជាទីក្រុងនៅភាគខាងជើងដែលជាគោលដៅផ្តោតសំខាន់នៃប្រតិបត្តិការយោធារបស់អ៊ីស្រាអែលកាលពីដើមឆ្នាំនេះ។ ការផ្ទុះឡើងបាតុកម្មនៅតំបន់ West Bank បង្ហាញពីកំហឹងរបស់ប៉ាឡេស្ទីនដែលកំពុងឆេះជាយូរមកហើយប្រឆាំងលោក Abbas ដែលកងកម្លាំងបានប្រឈមមុខការរិះគន់ចំពោះការសម្របសម្រួលជាមួយអ៊ីស្រាអែល លើបញ្ហាសន្តិសុខនៅលើដែនដីនេះ។

អ៊ុយក្រែនប្រើមីស៊ីលរយៈចម្ងាយឆ្ងាយរបស់អាមេរិក ក្នុងការវាយប្រហារលើទឹកដីដែលកាន់កាប់ដោយរុស្ស៊ី

កងកម្លាំងអ៊ុយក្រែន បានប្រើប្រាស់មីស៊ីលតាកទិចរយៈចម្ងាយឆ្ងាយ ប្រភេទ ATACMS ដែលផ្គត់ផ្គង់ដោយសហរដ្ឋអាមេរិក ជាលើកដំបូង ដោយបានធ្វើឱ្យមានការខូចខាតយ៉ាងធ្ងន់ធ្ងរលើអាកាសយានដ្ឋានចំនួនពីរ នៅក្នុងតំបន់ដែលកាន់កាប់ដោយរុស្ស៊ី ខណៈប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃអង្គារថា អាវុធនោះបាន «បង្ហាញពីភាពខ្លាំងក្លារបស់អ៊ុយក្រែន»។យោធាអ៊ុយក្រែន បានចេញរបាយការណ៍ពេញមួយថ្ងៃ អំពីការវាយប្រហារប្រកបដោយជោគជ័យ និងច្បាស់លាស់ លើអាកាសយានដ្ឋាននៅជិតទីក្រុងលូហាន់ស៍ (Luhansk) នៅភាគខាងកើតនៃប្រទេសអ៊ុយក្រែន និងនៅតំបន់បឺឌៀនស៍ (Berdiansk) ភាគខាងត្បូងនៅលើសមុទ្រអាហ្សូវ (Azov) ហើយតំបន់ទាំងពីរនោះ គឺស្ថិតនៅក្រោមការគ្រប់គ្រងរបស់រុស្ស៊ី។អ៊ុយក្រែនបានស្នើម្តងហើយម្តងទៀត ដល់រដ្ឋបាលសហរដ្ឋអាមេរិក សម្រាប់មីស៊ីល ATACMS (ប្រព័ន្ធមីស៊ីលតាកទិចកងទ័ព)។ ទីក្រុងគីវ បានសន្យាថានឹងមិនប្រើអាវុធទាំងនោះនៅក្នុងទឹកដីរុស្ស៊ីទេ ប៉ុន្តែបាននិយាយថា សព្វាវុធដ៏មានឥទ្ធិពលនេះ នឹងផ្លាស់ប្តូរដំណើរនៃសង្រ្គាមដែលមានរយៈពេល ២០ខែនេះ។មិនមានការអត្ថាធិប្បាយជាផ្លូវការណាមួយពីរុស្ស៊ី ជុំវិញបញ្ហានេះទេ ប៉ុន្តែមន្ត្រីដែលតែងតាំងដោយទីក្រុងមូស្គូនៅក្នុងតំបន់ ហ្សាប៉ូរីហ្សា (Zaporizhzhia) ដែលគ្រប់គ្រងដោយទីក្រុងមូស្គូ និងជាទីតាំងដែលគ្រប់គ្រងទីក្រុងបឺឌៀនស៍ នោះបាននិយាយថា គ្រាប់បែកចង្កោមពីមីស៊ីល ATACMS ត្រូវបានរកឃើញនៅទីនោះកាលពីថ្ងៃអង្គារផងដែរ៕

រុស្ស៊ីនិយាយថា ខ្លួនលែងគោរពតាមការដាក់រឹតត្បិតរបស់UNលើបច្ចេកវិទ្យាមីស៊ីលសម្រាប់អ៊ីរ៉ង់ទៀតហើយ

រុស្ស៊ី បាននិយាយថា ខ្លួនលែងគោរពតាមការដាក់រឹតត្បិតរបស់ក្រុមប្រឹក្សាសន្តិសុខអង្គការសហប្រជាជាតិ លើការផ្តល់បច្ចេកវិទ្យាមីស៊ីលដល់អ៊ីរ៉ង់ ដែលជាសម្ព័ន្ធមិត្តរបស់ខ្លួន នៅពេលដែលពួកគេផុតកំណត់នៅថ្ងៃពុធនេះ ដោយពុំបាននិយាយថា តើឥឡូវនេះខ្លួនមានគម្រោងគាំទ្រដល់ការអភិវឌ្ឍមីស៊ីលរបស់ទីក្រុងតេអេរ៉ង់ ឬយ៉ាងណាទេ។ក្រសួងការបរទេសរុស្ស៊ី បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា៖«ការផ្គត់ផ្គង់ទៅនិងមកពីប្រទេសអ៊ីរ៉ង់នៃផលិតផលដែលស្ថិតនៅក្រោមរបបគ្រប់គ្រងបច្ចេកវិទ្យាមីស៊ីល លែងត្រូវការការយល់ព្រមជាមុនពីក្រុមប្រឹក្សាសន្តិសុខUNទៀតហើយ។ការរឹតបន្តឹងទាំងនោះ ត្រូវបានកំណត់នៅក្នុងសេចក្តីសម្រេចលេខ២២៣១នៃឆ្នាំ២០១៥ ដែលគាំទ្រកិច្ចព្រមព្រៀង ដែលចក្រភពអង់គ្លេស ចិន សហភាពអឺរ៉ុប បារាំង អាល្លឺម៉ង់ រុស្ស៊ី និងសហរដ្ឋអាមេរិក បានដកទណ្ឌកម្មប្រឆាំងនឹងអ៊ីរ៉ង់ ជាថ្នូរនឹងទីក្រុងតេអេរ៉ង់ ដែលកាត់បន្ថយកម្មវិធីនុយក្លេអ៊ែររបស់ខ្លួន។នៅឆ្នាំ ២០១៨ លោកប្រធានាធិបតី ដូណាល់ ត្រាំ បានដកសហរដ្ឋអាមេរិកចេញពីកិច្ចព្រមព្រៀង ដែលត្រូវបានគេស្គាល់ថា ផែនការសកម្មភាពរួមគ្រប់ជ្រុងជ្រោយ (JCPOA) ដោយបន្សល់ទុកទណ្ឌកម្មឯកតោភាគីរបស់សហរដ្ឋអាមេរិក នៅជាធរមាន ហើយអ៊ីរ៉ង់បានពន្លឿនកម្មវិធីនុយក្លេអ៊ែរជាបន្តបន្ទាប់ ដែលខ្លួននិយាយថា សន្តិភាពសុទ្ធសាធ។

ក្រុមគ្រូពេទ្យប៉ាឡេស្ទីន នៅតំបន់ហ្គាហ្សា ប្រញាប់ប្រញាល់ជួយសង្គ្រោះអ្នកនៅរស់ ខណៈការវាយប្រហារនៅតែបន្ត

ប៉ាឡេស្ទីន៖ អស់រយៈពេលជាច្រើនម៉ោង ក្រុមជួយសង្គ្រោះបានបន្តជីករកនៅតាមគំនរបាក់បែកនៃលំនៅឋាន ដែលត្រូវបានកម្ទេច ដើម្បីស្វែងរកអ្នកនៅរស់រានមានជីវិត ពីការវាយប្រហារតាមអាកាសរបស់អ៊ីស្រាអែល ដោយមានការហត់នឿយក្នុងការស្វែងរកមិនចេះចប់ និងក្ដីអស់សង្ឃឹមដោយសារកង្វះខាតការផ្គត់ផ្គង់សំខាន់ៗ ព្រមទាំងវិសាលភាពនៃការបំផ្លិចបំផ្លាញដ៏ធំធេងនៅទូទាំងតំបន់ហ្គាហ្សា ស្រ្ទីប។ក្រុមសង្គ្រោះមានការលំបាកក្នុងការគាស់សាកសពជនរងគ្រោះចេញពីជញ្ជាំងបេតុង និងកំទេចកំទី ដែលបែកបាក់ពីលំនៅឋាន ខណៈចំនួនអ្នកស្លាប់នៅតែបន្តកើនឡើង។ ក្រសួងសុខាភិបាលនៃតំបន់ហ្គាហ្សា បានរាយការណ៍ថា ការទម្លាក់គ្រាប់បែករបស់អ៊ីស្រាអែល ដែលបានចាប់ផ្តើមបន្ទាប់ពីក្រុមហាម៉ាស បានបើកការវាយប្រហារយ៉ាងបង្ហូរឈាម ដែលមិនធ្លាប់មានពីមុនមកលើអ៊ីស្រាអែល កាលពីថ្ងៃទី៧ ខែតុលា នោះ បានសម្លាប់ប្រជាជនប៉ាឡេស្ទីន ជាង៣.០០០នាក់ ដែលភាគច្រើនជាស្ត្រី និងកុមារ។ជនរងគ្រោះជាច្រើននាក់ ដែលកប់នៅក្រោមអគារបែកបាក់ បានបង្ហាញពីភាពលំបាករបស់ក្រុមជួយសង្គ្រោះនៅតំបន់ហ្គហ្សា ដែលកំពុងព្យាយាមជួយសង្គ្រោះជីវិត ខណៈត្រូវបានកាត់ផ្តាច់ពីអ៊ីនធឺណិត និងបណ្តាញទូរស័ព្ទ ការអស់ស្តុកប្រេងឥន្ធនៈ ព្រមទាំងប្រឈមនឹងការវាយប្រហារតាមអាកាសមិនឈប់ឈរផងនោះ។អ៊ីស្រាអែលបានបើកការឡោមព័ទ្ធលើតំបន់ហ្គាហ្សា បន្ទាប់ពីការវាយប្រហាររបស់ក្រុមហាម៉ាស ដោយបានកាត់ផ្តាច់ការប្រើប្រាស់ទឹក ថាមពល និងឥន្ធនៈ។ ក្រុមអាជ្ញាធរសុខាភិបាលបានព្រមានថា បើគ្មានជំនួយមនុស្សធម៌ទេ មន្ទីរពេទ្យ និងសេវាសង្គ្រោះបន្ទាន់ នឹងមិនអាចដំណើរការបានទៀតទេក្នុងពេលឆាប់ៗនេះ។ មន្ទីរពេទ្យជាច្រើន ដែលដំណើរការដោយម៉ាស៊ីនភ្លើងបម្រុង បាននិយាយថា ពួកគេមានប្រេងឥន្ធនៈគ្រប់គ្រាន់សម្រាប់តែប៉ុន្មានថ្ងៃទៀតប៉ុណ្ណោះ៕

ដំណើរទស្សនកិច្ចនៅមជ្ឈិមបូព៌ារបស់លោក Biden ត្រូវបានលុបចោលដោយការវាយប្រហារនៅមន្ទីរពេទ្យ Gaza

អាមេរិក៖ ដំណើរការផ្នែកការទូតនៅមជ្ឈិមបូព៌ារបស់លោក Joe Biden មានភាពស្ទាក់ស្ទើរមុនពេលចាប់ផ្តើមកាលពីថ្ងៃអង្គារ បន្ទាប់ពីដំណើរទស្សនកិច្ចទៅកាន់ប្រទេសហ្ស៊កដានីត្រូវបានលុបចោល ក្រោយការវាយប្រហារលើមន្ទីរពេទ្យនៅតំបន់ហ្គាហ្សា បណ្តាលឲ្យមនុស្សរាប់រយនាក់ស្លាប់។ប្រធានាធិបតីសហរដ្ឋអាមេរិកដែលមានអាយុ ៨០ ឆ្នាំ នៅពេលនេះនឹងធ្វើដំណើរទៅកាន់ប្រទេសអ៊ីស្រាអែលជាសម្ព័ន្ធមិត្ត តែប៉ុណ្ណោះ ដើម្បីបង្ហាញការគាំទ្របន្ទាប់ពីការវាយប្រហាររបស់ក្រុមហាម៉ាសកាលពីថ្ងៃទី ៧ ខែតុលា ដោយលុបចោលនូវអ្វីដែលមានន័យថាជាទង្វើធ្វើឱ្យមានតុល្យភាពក្នុងតំបន់។ព័ត៌មាននៃការផ្ទុះនៅមន្ទីរពេទ្យ ដែលក្រុមហាម៉ាសបានដាក់កំហុសថាជាការវាយប្រហាររបស់អ៊ីស្រាអែល ខណៈ អ៊ីស្រាអែលបាននិយាយថា វាត្រូវបានបង្កឡើងដោយគ្រាប់រ៉ុក្កែតដែលត្រូវបានបាញ់ខុសគោលដៅដោយក្រុមសកម្មប្រយុទ្ធក្នុងតំបន់ហ្គាហ្សា ដែលក្រោយមកបានបង្កឱ្យមានការរំពឹងទុកភាពមិនច្បាស់លាស់អំពីថាតើលោកពិតជានឹងធ្វើដំណើរទៅឬយ៉ាងណា។ អំពីពេលវេលាដែលលោក Biden ឡើងជណ្តើរយន្តហោះ Air Force One ប្រទេសហ្ស៊កដានី បានប្រកាសថា ជំនួបកំពូលបួនភាគី ដែលបានគ្រោងទុក ជាមួយប្រធានាធិបតីប៉ាឡេស្ទីន លោក Mahmud Abbas មហាក្សត្រហ្សកដានីលោក Abdullah II និងប្រធានាធិបតីអេហ្ស៊ីបបានលុបចោល។ រដ្ឋមន្ត្រីការបរទេសលោក Ayman Safadi បាននិយាយថា វានឹងប្រព្រឹត្តទៅ នៅពេលដែលការសម្រេចចិត្តដើម្បីបញ្ឈប់សង្រ្គាម និងបញ្ចប់ការសម្លាប់រង្គាលទាំងនេះត្រូវបានធ្វើឡើង៕

ក្រុមសកម្មប្រយុទ្ធហេស្បូឡា៥នាក់បានស្លាប់ ខណៈអំពើហិង្សារីកកាន់តែធំនៅតាមព្រំដែនអ៊ីស្រាអែល -លីបង់

អ៊ីស្រាអែល៖ ប្រភពកងកម្លាំងសន្តិសុខក្នុងប្រទេសលីបង់ បាននិយាយថា អំពើហិង្សាបានរីកកាន់តែធំនៅព្រំដែនរវាងប្រទេសលីបង់ និងអ៊ីស្រាអែលកាលពីថ្ងៃអង្គារទី១៧ខែតុលា ក្នុងនោះក្រុមយុទ្ធជនរបស់ក្រុមប្រដាប់អាវុធធុនធ្ងន់ ហេស្បូឡា(Hezbollah) របស់ប្រទេសលីបង់ ចំនួន៥នាក់បានស្លាប់ អំឡុងប្រតិបត្តិការប្រឆាំងអ៊ីស្រាអែល ។ ក្នុងការផ្ទុះអំពើហិង្សាដ៏ធ្ងន់ធ្ងរបំផុតនៅសមរភូមិមុខក្នុងរយៈពេល១៧ឆ្នាំមកនេះ ក្រុមហេស្បូឡាគាំទ្រដោយប្រទេសអ៊ីរ៉ង់ និងកម្លាំងអ៊ីស្រាអែល បានបាញ់តបតគ្នាស្ទើររាល់ថ្ងៃ ចាប់តាំងពីក្រុមសកម្មប្រយុទ្ធហាម៉ាសប៉ាឡេស្ទីន វាយប្រហារចូលក្នុងទឹកដីរបស់អ៊ីស្រាអែលកាលពីថ្ងៃទី១៧ខែតុលា ហើយអ៊ីស្រាអែល បានឆ្លើយតបវិញដោយការវាយប្រហារតាមអាកាសដ៏ធ្ងន់ធ្ងរស្រោចលើតំបន់ហ្គាហ្សា។ទាហានអ៊ីស្រាអែល ដែលនិយាយថា ខ្លួននឹងបាញ់អ្នកណាក៏ដោយឲ្យតែទៅជិតព្រំដែន ឬជ្រៀតចូលតាមរបងព្រំដែនរបស់ខ្លួន និងនិយាយថា ខ្លួនបានសម្លាប់មនុស្ស៤នាក់ កាលពិថ្ងៃអង្គារ ដែលបានព្យាយាមឆ្លងចូលរនាំង និងបំផ្ទុះគ្រឿងផ្ទុះ ។ ប្រភពដដែលនេះ ពុំបាននិយាយថា ហេតុការណ៍នោះកើតឡើងនៅទីណានោះទេ។ ក្រុមហេស្បូឡា បានបញ្ជាក់ថា៥នាក់ក្នុងចំណោមក្រុមអ្នកប្រយុទ្ធរបស់ខ្លួន បានស្លាប់ ប៉ុន្តែពុំបានបញ្ជាក់ច្បាស់ភ្លាមៗ ថា តើពួកគេណាម្នាក់ ជាជនដូចគ្នា ដែលអ៊ីស្រាអែល សំដៅដល់នោះ។កងទ័ពអ៊ីស្រាអែលបានរាយការណ៍ការវាយប្រហារនៅក្នុងទីតាំង៣កន្លែង រួមទាំង ទីប្រជុំជន មេទូឡា ( Metula)របស់អ៊ីស្រាអែល និងពុំមានទាហានអ៊ីស្រាអែល រងរបួសនោះទេ៕

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងសាធារណការ៖ ដំណើរការបោះបង្គោលព្រែកជីកហ្វូណនតេជោ គ្រោងបញ្ចប់នៅចុងសប្តាហ៍នេះហើយ

WHO៖ លំនៅឋានបុគ្គលិក និងឃ្លាំង នៅភាគកណ្តាលតំបន់ហ្កាហ្សា ត្រូវបានវាយប្រហារ

តម្លៃប្រេងធ្លាក់ចុះ ខណៈជម្លោះពាណិជ្ជកម្ម ធ្វើឲ្យមានក្ដីបារម្ភកាន់តែខ្ពស់ អំពីតម្រូវការប្រេង

ប្រភព៖ ជំនួយការលោក Trump និងលោក Xi បានពិភាក្សាអំពីកិច្ចប្រជុំ រវាងមេដឹកនាំអាមេរិក និងចិន នៅរដូវស្លឹកឈើជ្រុះ

កូរ៉េខាងត្បូង កំពុងថ្លឹងថ្លែងនូវសម្បទានដ៏ឈឺចាប់ដើម្បីបញ្ចៀសពន្ធ ២៥% របស់លោក Trump

ប្រតិភូអន្តរក្រសួងចុះវាយតម្លៃគុណភាពសំណង់ព្រះវិហារ និងសាលាបាលីវត្តពិជ័យលង្កា ហៅវត្តឈើខ្មៅដើម្បីធ្វើការអភិរក្ស

រដ្ឋមន្ត្រីក្រសួងការងារ ស្នើភាគីពាក់ព័ន្ធពិភាក្សាឱ្យបានផុលផុសលើសេចក្ដីព្រាង “គោលនយោបាយជាតិ ស្ដីពីមុខរបរនិងការងារ ឆ្នាំ២០២៦-២០៣៥”

សមាគមអតីតយុទ្ធជនខេត្តកំពង់ឆ្នាំង សាងសង់ផ្ទះ និងផ្តល់ដីអោយអតីតយុទ្ធជនបាន១០៥ខ្នង និងកំពុងបន្តសាងសង់១០០ខ្នងទៀត

មន្ត្រីវប្បធម៌ជាង១០០នាក់ ទទួលការបណ្តុះបណ្តាលស្តីពីគរុកោសល្យ វិធីសាស្រ្តនៃការបង្រៀន និងការគ្រប់គ្រងថ្នាក់រៀន

ម៉ិកស៊ិក ការពារការប្តូរទីតាំងទំនិញតាមយន្តហោះ ដោយច្រានចោលការដាក់ទណ្ឌកម្មរបស់អាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877