នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់
អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង
អាវុធហត្ថរាជធានីភ្នំពេញ បង្ក្រាបទីតាំងលក់សម្ភារៈអាសអាភាសចំនួន ៣កន្លែង ឃាត់​ខ្លួន​ជន​សង្ស័យ​ ៩នាក់
គណៈបញ្ជាការឯកភាពរាជធានី បន្តចុះបង្ក្រាប Online Scams នៅសង្កាត់ចាក់អង្រែលើ ឃាត់មនុស្ស១៦នាក់

សន្តិសុខ និង សង្គម

អគ្គិភ័យឆាបឆេះតូបអាជីវករលក់ដូរក្នុងផ្សារដើមអំពិលអស់ចំនួន ១២តូប ទាំងស្រុង

2022/10/28 07:47:11 pm        402
Facebook Telegram Linkin
ភ្នំពេញ៖ អគ្គិភ័យបានឆាបឆេះតូបលក់ដូររបស់អាជីវករលក់ សំលៀកបំពាក់ សាច់ជ្រូក សាច់គោ មាន់ បន្លែ បង្កឲ្យមានការភ្ញាក់ផ្អើលដល់ពលរដ្ឋនាំគ្នាយកបំពង់ពន្លត់អគ្គិភ័យបាញ់ពន្លត់តែមិនអាចគ្រប់គ្រងបាន រួចរាយការណ៍ទៅអាជ្ញាធរបានចេញរថយន្តជាច្រើនគ្រឿងជួយបាញ់ពន្លត់អន្តរាគមន៍ភ្លាមៗ តែយ៉ាងណាអគ្គិភ័យបានឆាបឆេះតូបអស់ចំនួន១២តូបរងការខូចខាតទាំងស្រុង តែសំណាងល្អមិនបណ្ដាលឱ្យមានមនុស្សរងរបួសឡើយ។ ហេតុការណ៍គ្រោះអគ្គិភ័យនេះ បានកើតឡើងនៅវេលាម៉ោង ០៥ ល្ងាចថ្ងៃទី ២៨ ខែតុលាឆ្នាំ ២០២២ ស្ថិតនៅចំណុចផ្សារដើមអំពិល( ផ្សារលើលូ) ជាប់របងសាលារៀនទួលហ្វាតាមិនដោយផ្លូវលេខ៣១០ កែងនឹងផ្លូវ១៦៣ មូលដ្ឋានសង្កាត់ទួនស្វាយព្រៃទី១ ខណ្ឌបឹងកេងកង រាជធានីភ្នំពេញ។ តាមប្រភពព័ត៌មានពីអាជីវករលក់ដូរក្នុងផ្សារបានឲ្យដឹងថានៅមុនពេលកើតហេតុគឺបានលឺ សំឡេងផ្ទុះចេញពីតូបមួយមានឃើញផ្សែងហុយចេញនិងអណ្ដាតភ្លើង អាជីវករក៏ដូចជាប្រជាពលរដ្ឋបានយកបំពង់ពន្លត់អគ្គិភ័យជួយបាញ់ពន្លត់តែមិនអាចគ្រប់គ្រងបាន អណ្ដាតភ្លើងរាលដាលឆាប់ឆេះលឿន រួចបានរាយការណ៍ទៅអាជ្ញាធរមូលដ្ឋានបានទំនាក់ទំនងទៅកម្លាំងជំនាញការិយាល័យបង្ការ ពន្លត់ និងសង្គ្រោះ បានចេញរថយន្តអគ្គិភ័យចេញជួយអន្តរាគមន៍បាញ់ពន្លត់។ លោកវរៈសេនីយ៍ឯក ព្រហ្ម យ៉ន នាយការិយាល័យបង្ការពន្លត់និងសង្គ្រោះនៃស្នងការរដ្ឋាននគរបាលរាជធានីភ្នំពេញបានឲ្យដឹងថាក្រោយទទួលបានព័ត៌មានកម្លាំងនៃការិយាល័យបានចេញរថយន្តចំនួន១២គ្រឿងមកដល់ទីតាំងនិងប្រើប្រាស់ទឹកបាញ់ពន្លត់ចំនួន ៧រថយន្តទើបជួយអន្តរាគមន៍បាញ់ពន្លត់បានរលត់ជាស្ថាពរ រួមមានការិយាល័យបង្ការពន្លត់និងសង្គ្រោះនៃស្នងការរដ្ឋាននគរបាលរាជធានីភ្នំពេញ ចំនួន០៩គ្រឿង ប្រេីប្រាស់ទឹកអស់ចំនួន ០៥ឡាន រថយន្តក្រុមហ៊ុនស្រាបៀរកម្ពុជាចំនួន ០១គ្រឿង ប្រើប្រាស់ទឹកអស់១ឡាន និងរថយន្តក្រុមហ៊ុនអូឡាំព្យាចំនួន២គ្រឿងប្រើប្រាស់ទឹកអស់១ឡាន។ក្នុងនោះដែរទំហំនៃការខូចខាតរួមមានតូបចំនួន ១២តូប ដែលមានទំហំ ២ ម៉ែត្រគុណនឹង ៣ ម៉ែត្រ ប្រភេទឈើប្រក់សង្ក័សី ដែលជាតូបរបស់អាជីវករលក់ដូរបន្លែត្រីសាច់។ ចំពោះមូលហេតុនៃការឆាបឆេះនេះកម្លាំងសមត្ថកិច្ចជំនាញបានសន្និដ្ឋានជំហានដំបូងថាអាចបណ្ដាមកពីឆ្លងចរន្តអគ្គិសនី៕ អត្ថបទ៖ កុម្ភៈ

អាវុធហត្ថបញ្ជូនខ្លួនជនត្រូវចោទឈ្មោះ សោម សំសក្តិ មកសាលាដំបូងខេត្តកំពង់ចាមហើយ

2022/10/27 03:42:54 pm        339
Facebook Telegram Linkin
កំពង់ចាម៖ នៅព្រឹកថ្ងៃទី២៧ ខែតុលា ឆ្នាំ២០២២នេះ កម្លាំងកងអាវុធហត្ថខេត្តកំពង់ចាម បាន​បញ្ជូនខ្លួនជនត្រូវចោទឈ្មោះ សោម សំសក្ដិ ​មកសាលាដំបូងខេត្តកំពង់ចាម ដើម្បីបន្តនិតិវិធីច្បាប់ ។សូមបញ្ជាក់ថា ទីបំផុតជនជាប់ចោទឈ្មោះ សោម សំសក្តិ មានតួនាទីជានាយកទីចាត់​ការហិរញ្ញវត្ថុ​សាលា​ខេត្តសៀមរាប ដែលជាជនដៃដល់ក្នុងសំណុំរឿង ជេរប្រមាថ​​ជាសាធារណៈ ប្រើអំពើហិង្សា​ដោយ​ចេតនា និងប៉ុនប៉ងមនុស្សឃាត ត្រូវកម្លាំង​កងរាជ​អាវុធហត្ថខេត្តកំពង់ចាម ​សហការ​ជាមួយ​កម្លាំង​កងរាជអាវុធហត្ថរាជធានី​ភ្នំពេញ ​ធ្វើការឃាត់ខ្លួន ​នៅម៉ោងជាង១១ថ្ងៃត្រង់ ថ្ងៃទី២៦ខែតុលាឆ្នាំ ២០២២ ​នៅទីក្រុងភ្នំពេញ​ គ្រាដែលជន​នេះកំពុងរត់ គេចខ្លួនចេញ​ពី​ខេត្តសៀមរាប​ ទៅ​សម្ងំនៅទីនោះ។ទោះបីយ៉ាងណាសមត្ថកិច្ចនៅមិនទាន់បញ្ជាក់លំអិតអំពីនីតិវិធីបន្តនោះទេ ​ប៉ុន្តែសមត្ថកិច្ចក្នុង ហេតុការណ៍បានបង្ហើបឱ្យដឹងថា ជ​នជាប់ចោទឈ្មោះ សោម សំសក្តិ ​នឹងត្រូវ​បញ្ជូន​ទៅ​បន្ត​នីតិវិធី នៅ​ឯ​ខេត្តកំពង់ចាម៕

សមត្ថកិច្ចឃាត់ខ្លួនជនត្រូវចោទឈ្មោះ ម៉ៅ អ៊ូច តាមដីកាបង្គាប់របស់សាលាដំបូងខេត្តកោះកុង

2022/10/27 02:43:15 pm        197
Facebook Telegram Linkin
ភ្នំពេញ៖ កម្លាំងនគរបាលនៃស្នងការនគរបាលខេត្តកោះកុង សហការជាមួយកម្លាំងនគរបាល​នៃ​ស្នងការដ្ឋាននគរបាលរាជធានីភ្នំពេញ បានស្រាវជ្រាវឃាត់ខ្លួនជនត្រូវចោទម្នាក់ឈ្មោះ ម៉ៅ អ៊ូច ឫ ម៉ៅ អ៊ុច តាមដីកាបង្គាប់ឱ្យចាប់ខ្លួនរបស់សាលាដំបូងខេត្តកោះកុង ។ការឃាត់ខ្លួននេះ ធ្វើឡើង​នៅព្រឹកថ្ងៃទី២៧ ខែតុលា ឆ្នាំ២០២២នេះ ស្ថិតនៅក្នុងមូលដ្ឋានខណ្ឌកំបូល រាជធានីភ្នំពេញ ក្រោយពីជនត្រូវចោទព្យាយាមរត់គេចខ្លួនអស់មួយរយៈ ។ បច្ចុប្បន្ន​ជនត្រូវចោទ​រូបនេះ ​ត្រូវបានកម្លាំនជំនាញ នាំខ្លួនទៅកាន់ខេត្តកោះកុង ដើម្បីបន្តនិតិវិធីច្បាប់ ។បើយោងតាមដីកាបង្គាប់ឱ្យចាប់ខ្លួនរបស់សាលាដំបូងខេត្តកោះកុង បានឲ្យដឹងថា ជនត្រូវ​ចោទឈ្មោះ ម៉ៅ អ៊ូច អតីតមេបញ្ជាការរងវរៈ៣០៣ នៅស្រុកមណ្ឌលសីមា ត្រូវបាន​តំណាង​អយ្យការអមសាលាដំបូងខេត្តកោះកុង ​ចេញដីកាបង្គាប់ឱ្យចាប់ខ្លួន​យក​មក​ផ្ដន្ទាទោស ពាក់ព័ន្ធយកឈ្មោះលោកជំទាវ ហ៊ុន ស៊ីណាត ​ទៅប្រើប្រាស់ប្រឌិត​ឡើង​ក្នុង​ចេតនា​ទុច្ចរិត ដើម្បី​ធ្វើឱ្យប្រជាពលរដ្ឋមានការយល់ច្រឡំ ​និង​ឆ្លៀតឱកាសទាញយកផលប្រយោជន៍ពី​ប្រជាពលរដ្ឋ ដើម្បីបម្រើ​ប្រយោជន៍​ឱ្យបក្សពួកខ្លួន​តែប៉ុណ្ណោះ។សូមរំលឹកថា កាលពីថ្ងៃទី២៨ខែឧសភា ឆ្នាំ២០២១លោកជំទាវ ហ៊ុន ស៊ីណាត ​តាមរយៈមេធាវី លោកជំទាវ បានចេញ​លិខិត​បដិសេធ​ជូន​ចំពោះ​សាធារណជន​ និងប្រជាពលរដ្ឋក្នុងខេត្តកោះកុង ដែល​មាន​ជនខិលខូចឈ្មោះ ​គឹម ​វ៉ាន់ធឿន និងបក្សពួកបានយក​ឈ្មោះ​លោកស្រី​ទៅប្រើប្រាស់​ដើម្បី​ជា​ផលប្រយោជន៍របស់ខ្លួន និងបក្សពួក។ លោកជំទាវ ហ៊ុន ស៊ី ណាត បានថ្លែងឲ្យដឹងថា «កាលពីថ្ងៃទី២៥ ​ខែឧសភា ឆ្នាំ២០២១ មានជន​ខិលខូច​ឈ្មោះ គឹម វ៉ាន់ធឿន ​និងបក្សពួក បានធ្វើសកម្មភាពផ្សព្វផ្សាយព័ត៌មាន​ដល់ប្រជាពលរដ្ឋថា ខ្លួនបាន​ប្រមូលឯកសារ ​សៀវភៅគ្រួសារ​ អត្តសញ្ញាណប័ណ្ណ​ ឈ្មោះប្រជាពលរដ្ឋ​បានចំនួន ២៥០គ្រួសារហើយ ​ក្នុងនោះ​មានឃុំអណ្ដូងទឹក ភូមិជីត្រេះចំនួន១៣០គ្រួសារ​ មកពីឃុំខលើ ស្រុកស្រែ​អំបិល​ ២០គ្រួសារ ​និងមកពីក្រុងខេមរភូមិន្ទ ២០គ្រួសារ ថា​គាត់ប្រមូល​ឯកសារ​យកទៅ​ឲ្យ​ឈ្មោះ ម៉ៅ អ៊ូច ភេទប្រុស ៣០៣ វរៈព្រំដែនគោក ​យកទៅជូនដល់លោកជំទាវ ​ហ៊ុន ស៊ីណាត ដើម្បីស្នើសុំគាត់កាត់ឆ្វៀលជូនប្រជាពលរដ្ឋ»។លោកជំទាវ ហ៊ុន ស៊ីណាត បានបញ្ជាក់ច្បាស់ៗថា «ពាក់ព័ន្ធនឹងខ្លឹមសារខាងលើ យើងខ្ញុំសូម​បញ្ជាក់ជូនថា ​រាល់សកម្មភាព និងខ្លឹមសារដែលធ្វើឡើងដោយឈ្មោះ​ គឹម វ៉ាន់ធឿន​ និងបក្សពួក ពុំមាន​ពាក់ព័ន្ធនិងលោកជំទាវ ហ៊ុន ស៊ីណាត​ គឺ​ជននេះ​និងបក្សពួកប្រឌិតឡើង​ក្នុងចេតនា​ទុច្ចរិត ដើម្បីធ្វើអោយ​ប្រជាពលរដ្ឋមានការយល់ច្រឡំ និងឆ្លៀតឱកាស​ទាញយកផលប្រយោជន៍​ពី​ប្រជាពលរដ្ឋ ​ដើម្បីបម្រើប្រយោជន៍​ឲ្យបក្សពួកខ្លួនតែប៉ុណ្ណោះ»។លោកជំទាវ ហ៊ុន ស៊ីណាត​ បានបញ្ជាក់ឲ្យដឹងបន្ថែមថា «លោកស្រីពុំដែលធ្លាប់ស្គាល់ ឬមាន​ទំនាក់ទំនង​អ្វីជាមួយបុគ្គលខាងលើនោះទេ»។លោកវរៈសេនីយ៍ឯក សុខ ផន អធិការនគរបាលស្រុកបូទុមសាគរ បានបង្ហាញលម្អិតថា ​ឈ្មោះ គឹម វ៉ាន់ធឿន ​បានឆ្លើយសារភាព ថ្ងៃទី២៦ ខែឧសភា ឆ្នាំ២០២១ថា ខ្លួនពិតជាបានប្រមូល​ឯកសារ​ពីប្រជាពលរដ្ឋចំនួន ២៧០គ្រួសារមែនហើយ​ ក្នុងនោះ​មាន​ឃុំអណ្តូងទឹក ភូមិជីត្រេះចំនួន ១៣០គ្រួសារ​។ មកពីឃុំជីខលើ ស្រុកស្រែអំបិលចំនួន ២០គ្រួសារ និងមកពីក្រុងខេមរភូមិន្ទ ២០គ្រួសារ។លោក អធិការបន្ថែមថា ជនសង្ស័យឈ្មោះ គឹម វ៉ាន់ធឿន ​នេះអះអាងថា រូបគេប្រមូល​ឯកសារ​ឱ្យទៅឈ្មោះ ម៉ៅ អ៊ូច ​មេបញ្ជាការរងវរៈ៣០៣​ យកទៅជូនដល់លោកស្រី ​ហ៊ុន​ ស៊ីណាត ដើម្បី​ស្នើសុំគាត់កាត់ឆ្វៀល​ជូនប្រជាពលរដ្ឋ៕ អត្ថបទ៖ កុម្ភៈ

ចំណតរថយន្តក្រុងប៉ោយប៉ែត ក្លាយ​ជា​ទីតាំង​ចោលសំរាម​យ៉ាង​អនាធិបតេយ្យ

2022/10/26 04:37:06 pm        106
Facebook Telegram Linkin
បន្ទាយមានជ័យ៖ ចំណតរថយន្តក្រុងប៉ោយប៉ែត ខេត្តបន្ទាយមានជ័យ បច្ចុប្បន្នបានក្លាយទៅ​ជា​ទីតាំង​ផ្ទុក​គំនរសំរាម​ និង​ចោលសំរាម​យ៉ាង​អនាធិបតេយ្យ​នៅ​ចំ​កណ្តាលក្រុងប៉ោយប៉ែតតែម្ដង ។ប្រជាពលរដ្ឋធ្វើដំណើរឆ្លងកាត់ក្បែរផ្លូវចំណតរថយន្តក្រុងប៉ោយប៉ែត បានត្អូញត្អែរ​ពី​បញ្ហា​ក្លិនស្អុយ​សាយភាយ​សំរាម​ នៅតាមដងផ្លូវជុំវិញបរិវេណចំណតរថយន្តក្រុងប៉ោយប៉ែតថា​ អាជ្ញាធរក្រុង ក៏​ដូចជា​ម្ចាស់​ចំណត​រថយន្ត​ហាក់​បី​ដូចជា​មិន​មាន​វិធានការ​ណាមួយ​ធ្វើការ​សំអាត​ឲ្យ​បាន​ស្អាត​និង​មាន​បរិស្ថានល្អ​នៅត្រង់ចំណុច​បរិវេណ​ចំណតរថយន្តក្រុងប៉ោយប៉ែត បើទោះបីជាទីតាំង​ចំណតរថយន្តមួយនេះហាក់បីដូចមិន​មាន​ការអភិវឌ្ឍយ៉ាងណាក្តីនោះ។ប្រជាពលរដ្ឋ បានឲ្យដឹងថា ទីតាំងនេះ ដើមឡើយ​មាន​សភាព​ល្អប្រសើរ​ ប៉ុន្តែ​បច្ចុប្បន្ន​ហាក់បីដូចជា​មាន​ការ​ខ្សត់ខ្សោយ​ចំពោះ​ការ​គ្រប់គ្រង​របស់​ម្ចាស់​ចំណត​ក៏​ដូចជាអាជ្ញាធរក្រុងប៉ោយប៉ែត ហើយ​បច្ចុប្បន្ន​សម្បូរ​ទៅ​ដោយ​សំរាម​ដាក់​គរគ្នា​ជុំវិញ​បរិវេណនេះ​ យ៉ាង​អនាធិបតេយ្យ​ដោយ​គ្មាន​របៀប​រៀប​រយ​នោះឡើយ។បើតាមប្រភពមានពី​បុគ្គលិក​អ្នកប្រមូល​សំរាមរបស់ក្រុមហ៊ុន បានបង្ហើបថា ចំណតរថយន្តនេះ​ពាក់ព័ន្ធបញ្ហា​អនាម័យ​សំរាម​គឺជាភារកិច្ចរបស់ម្ចាស់ចំណត ​និង​អាជ្ញាធរ​ក្រុងប៉ោយប៉ែត​ជា​អ្នក​ទទួលខុសត្រូវក្នុងការសំអាត​ប្រមូលទុកដាក់សំអាតមិនពាក់ព័ន្ធជាមួយក្រុមហ៊ុននោះឡើយ។ក្នុងនោះដែរ​លោក គាត ហុល ​អភិបាលក្រុងប៉ោយប៉ែត BTV News បានធ្វើការទំនាក់ទំនង​តាមរយៈទូរស័ព្ទដើម្បីសុំបកស្រាយពីបញ្ហាសំរាមនៅបរិវេណចំណតរថយន្តក្រុងប៉ោយប៉ែត តែលោកថា ជាប់រវល់ប្រជុំ ។គូសបញ្ជាក់ថា ក្រុងប៉ោយប៉ែតគឺជាក្រុងតំបន់ទេសចរមួយ ដែល​មានភ្ញៀវទេសចរ​ឆ្លងកាត់​ចម្រុះ​គ្រប់​ជាតិសាសន៍ ​អាជ្ញាធរក្រុង​គួរ​យក​ចិត្តទុក​ដាក់​ពី​បញ្ហា​អនាម័យ​ទាំង​អស់នេះ​មិន​ត្រូវ​បណ្ដែត​បណ្ដោយ​ឲ្យ​មាន​ការ​ចោល​សំរាម​ពាសវាល​ពាសកាល​ពេញ​បរិវេណ​ក្រុងយ៉ាង​ដូច្នេះ​នោះទេ។ ទន្ទឹមគ្នានោះដែរ​ម្ចាស់​ចំណត​រថយន្ត​ក្រុង​ប៉ោយប៉ែត​យើង​មិន​អាច​មាន​លេខ​សំរាប់​ធ្វើ​ទំនាក់ទំនង​បាននោះទេ៕ អត្ថបទ៖ ឃិន សារិទ្ធ 

សមត្ថកិច្ចបង្ហាញខ្លួនជនសង្ស័យ ៥នាក់ជាសាធារណៈពាក់ព័ន្ធ ករណីលួច នឹងក្លែងបន្លំឯកសារសាធារណៈ(ធ្វើពន្ធ,កាតគ្រី,ប័ណ្ណបើកបរក្លែងក្លាយ...)

2022/10/26 10:44:08 am        565
Facebook Telegram Linkin
ភ្នំពេញ៖ ជនសង្ស័យចំនួន ៥នាក់ ពាក់ព័ន្ធករណីលួចស្លាកលេខរថយន្ត និងក្លែងបន្លំឯកសារសាធារណៈ (ធ្វើពន្ធ,កាតគ្រី,ប័ណ្ណបើកបរក្លែងក្លាយ) ត្រូវបានកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញបង្ហាញមុខជាសាធារណៈនៅព្រឹកថ្ងៃទី២៦ ខែតុលា ឆ្នាំ ២០២២នេះ និងបញ្ជូនខ្លួនទៅអយ្យការអមសាលាដំបូងរាជធានីភ្នំពេញដើម្បីចាត់ការតាមច្បាប់។គួរបញ្ជាក់ថា កាលពីថ្ងៃទី ០៩ ខែតុលា ឆ្នាំ២០២២ កន្លងទៅ មានករណីជនសង្ស័យលួចស្លាកលេខរថយន្តលេខ ភ្នំពេញ 2BL-0980 របស់បងប្អូនប្រជាពលរដ្ឋ នៅចំណុចផ្ទះលេខ១០១ ផ្លូវB សង្កាត់គោកការ ខណ្ឌព្រែកព្នៅ រាជធានីភ្នំពេញ។ ក្រោយទទួលបានពាក្យបណ្ដឹងរបស់ប្រជាពលរដ្ឋ នៅថ្ងៃទី២៣ ខែតុលា ឆ្នាំ២០២២ កម្លាំងជំនាញការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ បានធ្វើការស្រាវវជ្រាវ រហូតឈានដល់ការឃាត់ខ្លួនជនសង្ស័យចំនួន០២នាក់ នៅខេត្តកំពង់ឆ្នាំង ដែលទទួលផលចោរកម្ម។ រហូតដល់យប់ថ្ងៃទី២៣ ខែតុលាដដែល កម្លាំងនគរបាលព្រហ្មទណ្ឌកម្រិតស្រាល បានបន្តធ្វើការស្រាវជ្រាវ ឃាត់ខ្លួនជនសង្ស័យបាន០២នាក់បន្ថែមទៀត នៅចំណុចស្ថានីយ៍ប្រេងឥន្ធនៈកាល់តិច តាមបណ្ដោយផ្លូវជាតិលេខ៤ សង្កាត់ចោមចៅ៣ ខណ្ឌពោធិ៍សែនជ័យ។កម្លាំងជំនាញបានបន្តការសាកសួរ និងបន្តឃាត់ខ្លួនជនសង្ស័យម្នាក់បន្ថែមទៀតនៅចំណុចប្រេងឥន្ធនៈptt តាមបណ្ដោយផ្លូវជាតិលេខ២ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។ក្នុងប្រតិបត្តិការនេះដែរកម្លាំងនគរបាលបានធ្វើការដោះហូតវត្ថុតាងរួមមាន៖ ស្លាកលេខរថយន្តរបស់ជនរងគ្រោះដែលបាត់ ចំនួន២សន្លឹក ( ភ្នំពេញ 2BL-0980 ) រថយន្តម៉ាក ព្រូស ចំនួន០២គ្រឿង, វិញ្ញាណបនបត្រត្រួតពិនិត្យលក្ខណៈបច្ចេកទេសយានយន្តរបស់អគ្គនាយកដ្ឋានដឹកជញ្ជូនផ្លូវគោក,ឆៀករថយន្តមួយចំនួន,មីញែត មួយចំនួន ,ប័ណ្ណសម្គាល់រថយន្ត និងប័ណ្ណបើកបររថយន្តមួយចំនួន,លតាបត្របង់ពន្ធមធ្យោបាយដឹកជញ្ជូនរបស់គេនាយកដ្ឋានពន្ធដារ(ពន្ធផ្លូវសម្រាប់រថយន្ត) ,ម៉ាស៊ីនព្រីន ម៉ាស៊ីនហ្វូតូ កុំព្យូទ័រ..-ល-។យោងតាមរបាយការណ៍សមត្ថកិច្ចជនសង្ស័យទាំង ០៥នាក់រួមមាន ទី១ ឈ្មោះ ពៅ សំអឿន ភេទប្រុស អាយុ ៣១ឆ្នាំ មុខរបរ ទិញលក់រថយន្ត ស្នាក់នៅផ្ទះជួល ផ្លូវបេតុង ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ។ ទី២ឈ្មោះ ភ័ណ្ឌ ផល្លា ភេទប្រុស អាយុ ២៣ ឆ្នាំ មុខរបរ ជាងមេការនិច ស្នាក់នៅផ្ទះគ្មានលេខ ផ្លូវលំ ភូមិ៨ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង។ ទី៣ឈ្មោះ ឡុង ស៊ុនសាវ៉េត ហៅ វណ្ណ ភេទ ប្រុស អាយុ ៣២ ឆ្នាំ មុខរបរ នៅផ្ទះ ស្នាក់នៅផ្ទះលេខ៤៨ ផ្លូវលេខ០២អា សង្កាត់ព្រែកកំពឹស ខណ្ឌដង្កោ រាជធានីភ្នំពេញ។ ទី៤ ឈ្មោះ សឿង រ៉ាវី ហៅ ពេជ្រ ភេទ ប្រុស អាយុ ៣១ឆ្នាំ មុខរបរ រកស៊ី ស្នាក់នៅផ្ទះគ្មានលេខ ផ្លូវលំ ភូមិព្រែកអញ្ចាញ សង្កាត់ព្រែកឬស្សី ក្រុងតាខ្មៅ ខេត្តកណ្តាល។ ទី៥ឈ្មោះ ឡុង ស៊ុនសត្យា ហៅ យូវ ភេទ ប្រុស អាយុ ២៨ ឆ្នាំ មុខរបរ នៅផ្ទះ ស្នាក់នៅផ្ទះលេខ៩៨ ផ្លូវលេខ០២៣ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។បច្ចុប្បន្នជនសង្ស័យទាំង០៥នាក់ ត្រូវបានកម្លាំងនគរបាលបញ្ជូនខ្លួនទៅអយ្យកាអមសាលាដំបងរាជធានីភ្នំពេញដើម្បីចាត់ការតាមនីតិវិធី៕(ដោយ៖ ម៉ឺន កុម្ភៈ)

សមត្ថកិច្ចបង្ក្រាបករណីដឹកជញ្ជូន ជួញដូរគ្រឿងញៀនឆ្លងដែន ចាប់ខ្លួនជនសង្ស័យ ៣នាក់, គ្រឿងញៀន ១៦០គីឡូក្រាម

2022/10/26 10:26:37 am        330
Facebook Telegram Linkin
ភ្នំពេញ៖ សមត្ថកិច្ចជំនាញ នៃមន្ទីរប្រឆាំងគ្រឿងញៀន អគ្គស្នងការដ្ឋាននគរបាលជាតិ ក្រសួងមហាផ្ទៃ បានបង្ក្រាបករណីដឹកជញ្ជូន ជួញដូរគ្រឿងញៀនឆ្លងដែន ចាប់ខ្លួនជនសង្ស័យ ៣នាក់ និងរឹបអូសគ្រឿងញៀន ១៦០គីឡូក្រាម កាលពីថ្ងៃទី ២៥ ខែតុលា ឆ្នាំ២០២២ ដែលជាករណីជួញដូរគ្រឿងញៀនឆ្លងដែនពីឡាវ មកកម្ពុជា នៅចំណុច ផ្លូវលេខ៥៣ ស្ថិតក្នុង សង្កាត់ផ្សារថ្មី១ ខណ្ឌដូនពេញ រាជធានីភ្នំពេញ ។ ជនសង្ស័យទាំង៣នាក់ ១-ឈ្មោះ ង្វៀន ជុងហឹង ភេទប្រុស អាយុ៣៤ឆ្នាំ ជនជាតិ វៀតណាម។ ២-ឈ្មោះ ប៊ុន ស៊ូកែវអាពុន ភេទប្រុស អាយុ២៣ឆ្នាំ ជនជាតិ ឡាវ។ ៣-ឈ្មោះ លឹម កុយ ភេទប្រុសអាយុ៥៤ឆ្នាំ ជនជាតិ ខ្មែរ។ វត្ថុតាងចាប់យក -មេតំហ្វេតាមីន (ICE) ១៦០ដុំ ទម្ងន់ប្រមាណ ១៦០គីឡូក្រាម ។ចំពោះជនសង្ស័យ និងវត្ថុតាង សមត្ថកិច្ចជំនាញកំពុង កសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីផ្តន្ទាទោសតាមច្បាប់ ៕(ដោយ៖តារាវុទ្ធី)

ដកបញ្ឈរជើងមន្ត្រីនគរបាលចរាចរណ៍៤រូប ដែលហៅអ្នកបើកបរមិនមានបទល្មើសផាកពិន័យ នៅស្តុបទន្លេបាសាក់

2022/10/25 12:08:56 pm        625
Facebook Telegram Linkin
ភ្នំពេញ៖ មន្ត្រីចរាចរណ៍នៅគោលដៅស្តុបទន្លេបាសាក់ លើមហាវិថីម៉ៅសេទុង ដែល​ប្រព្រឹត្តកំហុស ឆ្គងពេលអនុវត្តច្បាប់ចរាចរណ៍ផ្លូវគោក ត្រូវបានដក​ឋានន្តរសក្តិ​មួយកម្រិត និង​ដក​បញ្ឈរជើងរយៈពេល ៣ខែ ​នៅការិយាល័យបុគ្គលិក។លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បាន​ឱ្យ​ដឹងថា មន្ត្រីនៅគោលដៅស្តុបទន្លេបាសាក់ ​លើមហាវិថីម៉ៅសេទុង ដែលប្រព្រឹត្តកំហុស​ឆ្គងពេល​អនុវត្តច្បាប់ចរាចរណ៍ផ្លូវគោក ​ដែលបានហៅឃាត់រថយន្តមកធ្វើការផាកពិន័យ ដោយអ្នកបើកបរ​មិនមានកំហុស ​គឺត្រូវបានដាក់វិន័យហើយ បន្ទាប់ពីបានឃើញវីដេអូផ្សព្វផ្សាយតាម​បណ្តាញ​សង្គមភ្លាម ​លោកឧត្តមសេនីយ៍ឯក ​ស ថេត អគ្គស្នងការរង និងជាស្នងការនគរបាល​រាជធានី​ភ្នំពេញ បានបញ្ជាឱ្យស្នងការរងទទួលផែនធនធានមនុស្ស ​ការិយាល័យបុគ្គលិក​ ផ្នែកវិន័យ ធ្វើការ​កោះហៅមន្ត្រីគោលដៅទាំង៤រូប​ មកសាកសួរនៅការិយាល័យ។ក្រោយធ្វើការសួរនាំរួចមន្ត្រីទាំង៤រូប បានសារភាពកំហុស និងបានទទួលស្គាល់កំហុស​ដែលបាន​ប្រព្រឹត្តដែលបានហៅអ្នកបើកបរធ្វើការផាកពិន័យ មិន​ចេញវិក្កយបត្រ ស្របពេល​ដែល​អ្នក​បើក​បរមិនមាន​កំហុសទាល់តែសោះ ។ លោកវរសេនីយ៍ឯក សាន សុខសីហា បន្ថែមថា ដោយទទួលបានបទបញ្ជា និងការឯកភាពពី​ស្នងការ ផ្នែកវិន័យ ​នៃការិយាល័យបុគ្គលិក បានសម្រេចដកមន្ត្រីទាំង៤រូបនេះមកបញ្ឈរ​ជើង​រយៈពេល៣ខែ ដោយបង្ហាញមុខជាប្រចាំរាល់ម៉ោងធ្វើការនៅការិយាល័យ​បុគ្គលិក ដោយ​ធ្វើកិច្ចសន្យា ជាពិសេសមន្ត្រីដែលប្រព្រឹត្តកំហុសត្រូវបានដកឋាន​ន្តរសក្តិ​មួយកម្រិត ដើម្បីជា​ការ​ព្រមានចំពោះការប្រព្រឹត្តកំហុសនេះ ។សូមបញ្ជាក់ថា កាលពីថ្ងៃទី២១ ខែតុលា ឆ្នាំ២០២២ វេលាម៉ោង ០៩ និង១៥នាទីព្រឹក នៅ​ចំណុច​គោល​ដៅស្តុបទន្លេបាសាក់​ តាមបណ្តោយមហាវិថីម៉ៅសេទុង មានករណីផាកពិន័យ​ពុំត្រឹមត្រូវ និងមិនចេញវិក្កយបត្រ ប្រព្រឹត្តដោយក្រុមមន្ត្រីនៅគោលដៅនោះ​ ទៅលើរថយន្តមួយគ្រឿងម៉ាក ISUZU ពណ៌ទឹកប្រាក់ ខណៈពេលអ្នកបើកបរពុំបានប្រព្រឹត្តល្មើសភ្លើង​សញ្ញាចរាចរណ៍ឡើយ គឺភ្លើង​នៅពណ៌បៃតង ​ដោយមានភស្តុតាងជាវីដេអូកា​មេរ៉ាភ្ជាប់​នៅក្នុងរថយន្ត ពេលកំពុង​បើកបរឆ្លងស្តុប ។ លុះដល់ព្រឹកថ្ងទី២២ ខែតុលា ឆ្នាំ២០២២ ក៏មានបែកនូវសារជាសំឡេងទទួលកំហុស ដែល​លោកអនុសេនីយ៍ទោ ព្រំ ចាន់ដារ៉ា ​បានយក​គណនី​ហ្វេសប៊ុក​របស់លោកអនុសេនីយ៍ឯក ​ថាច ប៊ុនធឿន ផ្ញើសារទៅកាន់ម្ចាស់រថយន្ត ​ដើម្បីផ្ទេរប្រាក់ជូនវិញ និងស្នើ​សុំលុប​វីដេអូដែលបាន​បង្ហោះ​ក្នុងបណ្តាញសង្គម ​ប៉ុន្តែត្រូវបានម្ចាស់រថយន្ត បដិសេធ៕អត្ថបទ ៖ ប្រាក់ តារាវុទ្ធី

អគ្គិភ័យ​ឆាបឆេះ​ផ្ទះ​របស់​ពលរដ្ឋ​ទុកចោល​មួយកន្លែង​ ត្រូវបាន​អាជ្ញាធរ​ប្រើប្រាស់​រថយន្ត​ជាង​ ២០​គ្រឿង​បាញ់​ទឹក​ពន្លត់​

2022/10/21 07:09:46 pm        547
Facebook Telegram Linkin
ភ្នំពេញ​៖ អគ្គិភ័យ​ឆាប់ឆេះ​ផ្ទះ​បងប្អូន​ប្រជាពលរដ្ឋ​ ដែល​ចាក់សោរ​ទុកចោល​មួយកន្លែង​ នៅ​មូលដ្ឋាន​ខណ្ឌ​បឹង​កេងកង បង្ក​ការ​ភ្ញាក់ផ្អើល​ដល់​ប្រជាពលរដ្ឋ​ និង​កម្លាំង​សមត្ថកិច្ច​ចេញ​រថយន្ត​ជាច្រើន​គ្រឿង​ជួយ​បាញ់​ពន្លត់ តែ​សំណាងល្អ​ក្នុងករណី​អគ្គិភ័យ​នេះ​មិន​បង្ក​ឲ្យ​មាន​មនុស្ស​រងរបួស និង​រាលដាល​ដល់​ផ្ទះ​អ្នកជិតខាង​ឡើយ​។​ហេតុ​ការ​គ្រោះ​អគ្គិភ័យ​នេះ​បាន​កើតឡើង​នៅវេលា​ម៉ោង​ ៣និង ៥០​នាទី​ល្ងាច​ថ្ងៃទី២១ ខែតុលា ឆ្នាំ២០២២ ស្ថិតនៅ​ចំណុច​ផ្ទះ​លេខ ១៧២ តាម​បណ្ដោយ​វិថី ព្រះ​ត្រសក់ផ្អែម​កែង​ផ្លូវ​លេខ​២៨២ មូលដ្ឋាន​សង្កាត់​បឹង​កេងកង​ទី​១ ខណ្ឌ​បឹង​កេងកង​រាជធានី​ភ្នំពេញ​។​តាម​ប្រភពព័ត៌មាន​ពី​បងប្អូន​ប្រជាពលរដ្ឋ​បាន​ឲ្យ​ដឹងថា ​មុនពេល​កើតហេតុ​ឃើញ​មាន​ផ្សែង​ហ៊ុយ​ចេញពី​ខាងក្នុង​ផ្ទះ​ដែល​ចាក់​សោរ​ទុកចោលភ្លាមនោះ​ផ្សែង​កាន់តែខ្លាំង​អណ្ដាតភ្លើង​កាន់តែ​ធំ​បង្ក​ការឆាបឆេះ​រាលដាល​យ៉ាង​សន្ធោសន្ធៅ​នៅ​ខាងក្នុង​ផ្ទះ បងប្អូន​ពលរដ្ឋ​បាន​រាយការណ៍​ទៅ​អាជ្ញាធរ​មូលដ្ឋាន​បាន​ទាក់ទង​ទៅ​កម្លាំង​ជំនាញ​ការិយាល័យ​បង្ការ ពន្លត់​អគ្គីភ័យ និង​សង្គ្រោះ​បានចេញ​រថយន្ត​គ្រប់​គោលដៅ​ជាច្រើន​គ្រឿង​បាន​មកដល់​កន្លែងកើតហេតុ​ដើម្បី​ធ្វើការ​បាញ់​ពន្លត់​។​លោក​វរសេនីយ៍ឯក ស៊ឹម ពិសិដ្ឋ អធិការនគរបាល​ខ​ណ្ឌ​បឹង​កេងកង​ បាន​ប្រាប់​ឲ្យ​ដឹងថា ​ទីតាំង​នេះ​គឺជា​ទីតាំង​ដែល​បាន​ចាក់សោ​ទុកចោល​មិន​មាន​បងប្អូន​ពលរដ្ឋ​រស់នៅ គឺ​បណ្ដាល​ឲ្យ​ឆាបឆេះ​ផ្ទះ​អស់ទាំង​ស្រុង តែ​សំណាងល្អ​មិន​បណ្ដាល​ឲ្យ​មាន​មនុស្ស​រងរបួស និង​រាលដាល​ដល់ផ្ទះ​អ្នកជិតខាង​ឡើយ​។​មន្ត្រី​នគរបាល​នៃ​ការិយាល័យ បង្ការ ពន្លត់​និង​សង្គ្រោះ ឲ្យ​បញ្ជាក់​ប្រាប់ថា​ នៅក្នុង​ប្រតិបត្តិ​ការបាញ់​ពន្លត់អគ្គីភ័យ​នេះ​ផងដែរ​រថយន្ត​ពន្លត់អគ្គីភ័យ​បានមក​ដល់ទី​តាំង​ចំនួន​ ២៦​គ្រឿង​កម្លាំង​សមត្ថកិច្ច​បាន​ប្រើប្រាស់​រថយន្ត​ពន្លត់អគ្គីភ័យ​ទាំង​២៦​គ្រឿង​គ្រឿង​ទើប​ជួយ​អន្តរាគមន៍​បាញ់​ពន្លត់​បាន​រលត់​ជា​ស្ថាពរ រួមមាន​រថយន្ត ស្នងការដ្ឋាន​នគរបាល​រាជធានី​ភ្នំពេញ​ចំនួន ១៩ គ្រឿង រថយន្ត​ក្រុមហ៊ុន ocic ទីក្រុង​កោះ​ពេជ្រ​ចំនួន ០៣ គ្រឿង រថយន្ត​ទីក្រុង​កោះនរា​ចំនួន​មួយគ្រឿង រថយន្ត​ផ្សារ​ទំនើប​អូ​ឡាំ​ព្យា​ចំនួន ០២ គ្រឿង រថយន្ត​ក្រុមហ៊ុនស្រា​បៀ​កម្ពុជា ០១ គ្រឿង​។ ការខូចខាត ប្រភេទ​សំណង់ ថ្ម​ក្រោម​ឈើ​លើ​ប្រក់​ស័ង្កសី ទំហំ ១២​ម៉ែត្រ​គុណ ២០​ម៉ែត្រ អស់ទាំង​ស្រុង​។ ចំពោះ​មូលហេតុ​សមត្ថកិច្ច​សន្និដ្ឋាន​ជំហាន​ដំបូង​បណ្ដាលមកពី​ឆ្លង​ចរន្តអគ្គិសនី​៕ អត្ថបទ​៖ កុម្ភៈ​

សមត្ថកិច្ចឃាត់ខ្លួនមេការ២នាក់ និងនារីរងគ្រោះចំនួន០៣នាក់ ពាក់ព័ន្ធករណីប្រព្រឹត្តិ អំពើសញ្ចារកម្ម

2022/10/19 12:48:39 pm        427
Facebook Telegram Linkin
ភ្នំពេញ៖ មនុស្សប្រុសស្រីចំនួនពីរនាក់ ដែលជាមេការមើលការខុសត្រូវនៅទីតាំងម៉ាស្សាកោសជប់ បង្កប់ សេវាផ្លូវភេទ ត្រូវបាននគរបាលនៃស្នងការដ្ឋាននគរបាលរាជធានីភ្នំពេញធ្វើការឃាត់ខ្លួន។កម្លាំងការិយាល័យប្រឆាំងការជួញដូរមនុស្ស និងការពារអនីតិជន សហការជាមួយអាជ្ញាធរមូលដ្ឋាន ចុះបង្ក្រាប ជាក់ស្តែងករណី​ប្រព្រឹត្តិ​អំពើ​សញ្ចារកម្ម ​មានស្ថានទម្ងន់ទោស បើកហាងម៉ាស្សាបង្កប់​បំរើ​សេវាផ្លូវភេទ ដោយបានឃាត់ខ្លួនម្ចាស់ទីតាំងប្រុសស្រី២នាក់ និងនារីរងគ្រោះចំនួន ០៣នាក់ ក្នុងនោះ​មានអនីតិជនចំនួន០១នាក់ និងវត្ថុតាង​ស្រោមប្រើប្រាស់រួចមួយចំនួននិងមិនទាន់​ប្រើប្រាស់មួយចំនួន។មេការទាំង២នាក់ប្ដីប្រពន្ធ មានឈ្មោះ ប៉ែន សុភ័ណ្ឌ អាយុ៤១ឆ្នាំ ជាប្ដី។ និងឈ្មោះ ដន់ ស្រីល័ក្ខ អាយុ៤៣ឆ្នាំ ជាប្រពន្ធ ​ស្នាក់នៅផ្ទះលេខអេ១ ផ្លូវបេតុងលេខ៥០១​ សង្កាត់ក្រាំងធ្នុង ខណ្ឌសែនសុខ រាជធានីភ្នំពេញ។ដោយមានការចង្អុលបង្ហាញពីឯកឧត្តម ​ឧត្តមសេនីយ៍ឯក ស ថេត អគ្គស្នងការរង​និង​ជា​ស្នងការ​នគរបាល​រាជធានី​ភ្នំពេញ និង លោក ​ឧត្តមសេនីយ៍ទោ ចាន់ កិត្តិខុម ស្នងការរងទទួល​ដឹកនាំ​ការងារការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាល​រាជាធានីភ្នំពេញ ​ក្រោមការសម្របសម្រួលដោយលោក វង្ស សាវ៉ាត ព្រះរាជអាជ្ញារង អយ្យការ​អមសាលា​ដំបូងរាជធានីភ្នំពេញ និងលោក វរសេនីយ៍ទោ ផាត់ ផល្លា​ នាយរងការិយាល័យ បានធ្វើការឃាត់ខ្លួនម្ចាស់ទីតាំង ​២នាក់ប្ដីប្រពន្ធ និងនារីរងគ្រោះ ក្មេងៗចំនួន០៣នាក់ នៅវេលាម៉ោង០៨ និង៣០នាទី យប់ថ្ងៃទី១៨ ខែតុលា ឆ្នាំ២០២២ ចំណុចហាងម៉ាស្សា​យីហោ«ស្រីល័ក្ខកំពង់ចាម» ស្ថិតនៅផ្ទះលេខអេ១ ផ្លូវបេតុងលេខ៥០១ សង្កាត់ក្រាំងធ្នុង ខណ្ឌសែនសុខ រាជធានីភ្នំពេញ។តាមប្រភពបានឲ្យដឹងថា ទីតាំងហាងម៉ាស្សាយីហោ«ស្រីល័ក្ខកំពង់ចាម» ​មានម្ចាស់ ២នាក់ប្ដីប្រពន្ធ គឺ​ជាអ្នកមើលការខុសត្រូវ នៅក្នុងហាងនេះមានស្រីៗរង់ចាំទទួលភ្ញៀវម៉ាស្សា ​និងរួមភេទ ចំនួន ០៣នាក់ ​សង្ស័យអនីតិជន ០១នាក់និងមានបន្ទប់សម្រាប់រួមភេទចំនួន ​០២បន្ទប់ តម្លៃម៉ាស្សាធម្មតា ១២.០០០រៀល ក្នុងមួយម៉ោង ​និងតម្លៃនៃការរួមភេទក្នុងមួយដងចាប់ពី​ ២០$ ទៅ ២៥$ ហើយលុយដែលបានមកពីការ រួមភេទ គឺម្ចាស់ទីតាំងចែកស្មើគ្នាជាមួយស្រីៗ​ម៉ាស្សាទាំងនោះ ។ ប្រភពដដែល បានឲ្យដឹងថា ហាងម៉ាស្សានេះ បើកដំណើរការរកស៊ីទទួលភ្ញៀវចាប់ពីម៉ោង ០៩ព្រឹក រហូតដល់ យប់អាធ្រាតទើបបិទទ្វារ រីឯនារីដែលសង្ស័យជាអនីតិជនចំនួន ​០២នាក់ គឺចូល​មកបម្រើការងារចាប់ពីម៉ោង​ ០៧យប់ ​រហូតដល់ម៉ោង ១០យប់ ។ក្រោយប្រតិបត្តិការកម្លាំងជំនាញបាននាំខ្លួនមេការ ​២នាក់ប្ដីប្រពន្ធ ទៅការិយាល័យប្រឆាំង​ការ​ជួញដូរមនុស្ស និងការពារអនីតិជន​ ដើម្បីសួរនាំកសាងសំណុំរឿង​ ចាត់ការតាមនីតិវិធី។ ចំណែក​នារីរងគ្រោះទាំង០៣នាក់ ត្រូវបានប្រគល់ជូនមន្ទីរសង្គមកិច្ចរាចធានីភ្នំពេញធ្វើការអប់រំ៕អត្ថបទ៖ កុម្ភៈ

អ្នកញៀនល្បែងជល់មាន់៣នាក់ ត្រូវបានសមត្ថកិច្ចបញ្ជូនទៅតុលាការ

2022/10/18 03:23:20 pm        1125
Facebook Telegram Linkin
កំពង់ធំ៖ អធិការរដ្ឋាននគរបាលស្រុកកំពង់ស្វាយ បានបញ្ជូនជនសង្ស័យចំនួន៣នាក់ រួមជាមួយវត្ថុតាង ទៅកាន់តុលាការ ពាក់ព័ន្ធករណីប្រព្រឹត្តស្បែងស៊ីសងខុសច្បាប់ (ជល់មាន់)។លោក កែ កញ្ចនា អធិការ នៃអធិការដ្ឋានស្រុកកំពង់ស្វាយ ខេត្តកំពង់ធំ ប្រាប់BTV នៅថ្ងៃទី១៨ ខែតុលានេះថា ក្រោមការចង្អុលបង្ហាញពីលោកឧត្តមសេនីយ៍ទោ ម៉ែន លី ស្នងការ នៃស្នងការដ្ឋាន​គរបាលខេត្តកំពង់ធំ, កម្លាំងអធិការដ្ឋាននគបាលស្រុកកំពង់ស្វាយ បានបញ្ជូនជនសង្ស័យ ញៀនល្បែង​ចំនួន ៣នាក់ ទៅកាន់តុលាខេត្តកំពង់ធំ រួចរាល់ហើយ។ ជនទាំងបីនាក់ មានឈ្មោះ៖ ទី ១-ឈ្មោះឌួង ឡែន ភេទ ប្រុស អាយុ ៣៧ឆ្នាំ មុខរបរ កសិករ រស់នៅភូមិភូមិត្បែង.ក ឃុំត្បែង ស្រុកកំពង់ស្វាយ, ទី ២-ឈ្មោះឡេ ស៊ាន ភេទ ប្រុស អាយុ៣១ឆ្នាំ មុខរបរ កសិករ រស់នៅភូមិភ្នុំដែក ឃុំរម្យទុម ស្រុករវៀង ខេត្តព្រះវិហារ និងទី ៣-ឈ្មោះលី ម៉ូវហួត ភេទប្រុស អាយុ៣៤ឆ្នាំ មុខរបរ បុគ្គលិកធានាគារស្ថាបនា នៅភូមិសាលាឃុំ ឃុំទ្រៀល ស្រុកតាំងគោក ខេត្តកំពង់ធំ។ ជនសង្ស័យទាំងបីនាក់នេះ បានប្រព្រឹត្តបទល្មើសល្បែងស៊ីសងខុសច្បាប់ (ជល់មាន់) ដែលត្រូវ​បាន​កម្លាំងអធិការដ្ឋានស្រុកកំពង់ស្វាយ ចុះបង្រ្កាប កាលពីថ្ងៃទី១៥ ខែតុលា នេះ ។ ក្នុងប្រតិបត្តិការនេះដែរ ​កម្លាំងអធិការដ្ឋានស្រុក បានដកហូតវត្ថុតាងរួមមាន៖ មាន់ចំនួន០៥ក្បាល និងសម្ភារមួយចំនួនទៀត ។ ចំពោះបក្សពួកផ្សេងទៀត ​អធិការរដ្ឋាន ​ធ្វើការកំណត់មុខសញ្ញា ដើម្បីអប់រំនិងណែនាំផងដែរ៕ 

បណ្ដាញសង្គម

ព័ត៌មានថ្មីៗ

UNICEF ៖ សង្រ្គាមអ៊ីរ៉ង់គំរាមកំហែងដល់ការចែកចាយគ្រឿងផ្គត់ផ្គង់សង្រ្គោះជីវិតកុមារ
06/02/2026 08:06 PM
Facebook Telegram Linkin
ក្រុមហ៊ុន Moderna និងក្រុមហ៊ុនផ្សេងទៀត ទទួលបានប្រាក់ ៦០លានដុល្លារ ដើម្បីផលិតវ៉ាក់សាំងបង្ការជំងឺអេបូឡា
06/02/2026 08:06 PM
Facebook Telegram Linkin
កូដកម្មរថភ្លើងក្រោមដីធ្វើឲ្យប៉ះពាល់ដល់អ្នកដំណើរនៅទីក្រុងឡុងដ្រ៍ ចក្រភពអង់គ្លេស
06/02/2026 08:06 PM
Facebook Telegram Linkin
របាយការណ៍៖ EU ពិចារណាដាក់ទណ្ឌកម្មរដ្ឋមន្ត្រីអ៊ីស្រាអែល ជុំវិញ​​ការប្រព្រឹត្តិ ចំពោះ​នាវាមនុស្ស​ធម៌ឆ្ពោះ​ទៅ​ហ្កាហ្សា
06/02/2026 08:06 PM
Facebook Telegram Linkin
WHO៖ ករណីសង្ស័យជំងឺ Ebola ធ្លាក់ចុះ ក្រោយ​មនុស្សរាប់រយនាក់​ត្រូវបាន​ដក​ចេញ
06/02/2026 08:06 PM
Facebook Telegram Linkin
ប្រធានគ្លីនិករងការខូចខាតដោយសារការវាយប្រហាររុស្ស៊ីនិយាយថា ទីក្រុងមូស្គូ មិនចង់បញ្ចប់សង្រ្គាមនោះទេ
06/02/2026 08:06 PM
Facebook Telegram Linkin
អគ្គិភ័យដ៏ធំមួយ បានឆាបឆេះផ្សារមួយកន្លែងស្ថិតក្នុងទីក្រុងហ្សាកាតា ប្រទេសឥណ្ឌូនេស៊ី
06/02/2026 07:06 PM
Facebook Telegram Linkin
មនុស្សយ៉ាង​តិច​ ១៥នាក់រងរបួស ដោយសារ​ព្យុះនៅជប៉ុន ខណៈ​មាន​ការអំពាវនាវឲ្យ​ជម្លៀស
06/02/2026 07:06 PM
Facebook Telegram Linkin
លោក Trump ថាលោកបាននិយាយជាមួយក្រុមហេសបូឡា តាមរយៈអន្តរការី
06/02/2026 07:06 PM
Facebook Telegram Linkin
លោក Netanyahu ប្រាប់លោក Trump ថា អ៊ីស្រាអែលនឹងវាយប្រហារទីក្រុងបេរូត បើសិនការវាយប្រហាររបស់ក្រុមហេសបូឡានៅតែបន្ត
06/02/2026 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.