ទ័ព​មួក​ខៀវ​កម្ពុ​ជាជាង​ ៤០០​នាក់ ត្រៀម​ប្តូរ​វេន​ចូលរួម​ថែរក្សា​សន្តិភាព​នៅ​ប្រទេស​លី​បង់ និង​អា​ហ្វ្រី​ក​កណ្តាល​

326

ភ្នំពេញ៖ កងកម្លាំង​ទ័ព​មួក​ខៀវ​កម្ពុជា ប្រមាណ​ជាង​៤០០​នាក់ មកដល់ពេលនេះ បាន​រៀបចំ​ខ្លួន​រួចរាល់​អស់ហើយ ត្រៀមខ្លួន​ប្តូរ​វេន​ចូលរួម​បំពេញបេសកកម្ម​ថែរក្សា​សន្តិភាព​អង្គការសហប្រជាជាតិ​នៅ​ប្រទេស​លី​បង់​នៅ​ចុងខែ​មករា និង​នៅ​សាធារណរដ្ឋ​អា​ហ្វ្រឹ​ក​កណ្តាល ​នៅ​ខែ​ចុងខែ​កុម្ភៈ ឆ្នាំ​២០២១​នេះ​។​

បើ​តាម​នាយ​ឧ​ត្ត​ម​សេនីយ សែម សុវណ្ណនី អគ្គនាយក​មជ្ឈមណ្ឌល​ជាតិ​គ្រប់គ្រង​កម្លាំង​រក្សា​សន្តិភាព ថ្លែង​ក្នុង​ឱកាស​ចុះ​ត្រួតពិនិត្យ​ការ​ហ្វឹកហ្វឺន​ជំនាញ​ថែរក្សា​សន្តិភាព​ថ្ងៃទី​១៣ ខែមករា​នេះ ថា នៅ​ពេលនេះ កងកម្លាំង​ទ័ព​មួក​ខៀវ​កម្ពុជា ប្រមាណ​ជាង​១៨៤​នាក់ បានធ្វើ​ហ្វឹកហ្វឺន​ជំនាញ​ របស់ខ្លួន​រួចរាល់​អស់ហើយ ដើម្បី​ត្រៀមខ្លួន​ប្តូរ​វេន​ចូលរួម​ថែរក្សា​សន្តិភាព​UN នៅ​ប្រទេស​លី​បង់​នៅ​ថ្ងៃទី​៣០ ខែមករា​ខាងមុខនេះ ដោយឡែក​កម្លាំង​មួក​ខៀវ​២១៦​រូប​ទៀត បាននិងកំពុង​បន្ត​ហ្វឹកហ្វឺន​ជំនាញ​របស់ខ្លួន ដើម្បី​ត្រៀមខ្លួន​ប្តូរ​វេន​ទៅ​បំពេញបេសកកម្ម​ថែរក្សា​សន្តិភាព UN នៅ​អា​ហ្វ្រឹ​ក​កណ្តាល​នៅ​ចុងខែ​កុម្ភៈ​។​

ឯកឧត្ដម បន្តថា សម្រាប់​ការបញ្ជូន​ប្តូរ​វេន​នេះ គឺ​យើង​ធ្វើឡើង​ដោយមាន​ការប្រុងប្រយ័ត្ន​បំផុត ជាពិសេស គ្រប់​កងកម្លាំង​ដែល​ចាត់​បញ្ជូន​ចេញ​បេសកកម្ម​នេះ​គឺ​ធានាថា​គ្មាន​ផ្ទុកមេរោគ​កូ​វីដ​១៩ និង​មិន​មាន​ផ្ទុកមេរោគ​ឆ្លង​នានា​ទៀត​។​

ថ្លែង​ក្នុង​ពិធី​សំណេះសំណាល​ជា​ជាមួយ​កងកម្លាំង នាយ​ឧ​ត្ត​ម​សេនីយ៍ សែម សុវណ្ណនី បាន​ថ្លែងថា ចាប់តាំងពី​ពិភពលោក​ជួប​ការ​រាតត្បាត​កូ​វីដ​១៩​មក គឺ​មានតែ​កងកម្លាំង​មួក​ខៀវ​កម្ពុជា​ដែល​បំពេញបេសកកម្ម​ថែរក្សា​សន្តិភាព​នៅ​ប្រទេស​លី​បង់ និង​នៅ​អា​ហ្វ្រឹ​ក​កណ្តាល​នេះ​ទេ បាន​ការពារ​ខ្លួន​រួច​ផុតពី​ការឆ្លង​កូ​វីដ​១៩​ចូលក្នុង​អង្គភាព ហើយ​ឯកឧត្តម ក៏បាន​ស្នើអោយ​កងកម្លាំង​ប្តូរ​វេន​បញ្ជូន​ចេញ​នៅពេល​ខាងមុខ គឺ​ត្រូវ​បង្កើន​ការប្រុងប្រយ័ត្ន​អោយ​ខ្លាំង​ថែមទៀត ដើម្បី​រួចផុត​ពី​ការ​រា​ត្បា​ត​កូ​វីដ​១៩​នេះ​។​

សូមបញ្ជាក់ថា នៅក្នុង​រយៈពេល​ជាង ​១១​ឆ្នាំ​កន្លងមកនេះ កម្ពុជា​បាន​បញ្ជូន​បញ្ជូន​ទ័ព​មួក​ខៀវ​ចូល​បំពេញបេសកកម្ម​ថែរក្សា​សន្តិភាព​អង្គការសហប្រជាជាតិ​នៅតាម​បណ្តា​ប្រទេស​កំពុងមាន​ជំលោះ​សង្គ្រាម​ចំនួន​៩​ប្រទេស និង​មាន​កងកម្លាំង​សរុប​ប្រមាណ​ជាង​៧០០០​នាក់ ។​

សម្រាប់​បច្ចុប្បន្ន​នេះ កម្ពុ​ជាមាន​ទ័ព​មួក​ខៀវ​ចំនួន​ជិត​៨០០​នាក់ បាន​កំពុង​ឈរជើង​បំពេញបេសកកម្ម​ថែរក្សា​សន្តិភាព​អង្គ​សហប្រជាជាតិ នៅតាម​បណ្តា​ប្រទេស​ចំនួន​៤ រួមមាន​៖​ប្រទេស​លី​បង់ សាធារណរដ្ឋ​អា​ហ្វ្រឹ​ក​កណ្តាល ស៊ូដង់​ខាងត្បូង និង​ប្រទេស​ម៉ាលី ហើយ​គ្រប់គ្រង​កម្លាំង​ គឺ​បាន​ការពារ​ខ្លួន ពុំមាន​កម្លាំង​ណា​ឆ្លង​មេរោគ​កូ​វីដ​១៩​នោះទេ​៕ ​​អត្ថបទ៖ ស៊ុម សុខ​ជា​