FBI​ នឹង​ពង្រាយ​កម្លាំង​ឆ្មាំ​ជាតិ​ ២៥.០០០​នាក់​នៅ​ថ្ងៃ​ស្បថ​ចូល​កាន់​តំណែង​ព្រោះ​បារម្ភ​ពី​ការ​វាយ​ប្រហារ​ផ្ទៃ​ក្នុង

961

អាមេរិក៖ ក្រុម​មន្ត្រី​ការពារ​ជាតិ​សហរដ្ឋអាមេរិក​និយាយ​ថា​ ពួកគេ​មានការ​ព្រួយបារម្ភ​អំពី​ការ​វាយ​ប្រហារ​នៅ​ផ្ទៃក្នុង ​ឬ​ការ​គំរាម​កំហែង​ផ្សេងទៀត​ពី​ទាហាន​ ដែល​ពាក់ព័ន្ធ​នឹង​ការធានា​សុវត្ថិភាព​នៅ​ពិធី​ស្បថ​ចូលកាន់​តំណែង ​លោក​ប្រធានាធិបតី​ជាប់ឆ្នោត Joe Biden ដែល​ជំរុញ​ឲ្យ​ភ្នាក់ងារ FBI បញ្ជូន​កង​ឆ្មាំ​ជាតិ​ចំនួន ២៥.០០០​នាក់​ចូល​មក​ក្នុង​ទីក្រុង​វ៉ាស៊ីនតោន​សម្រាប់​ព្រឹត្តិការណ៍​នោះ​។

សកម្មភាព​ដ៏​ធំ​នេះ​ ឆ្លុះបញ្ចាំង​ពី​ការ​ព្រួយបារម្ភ​អំពី​សន្តិសុខ​យ៉ាងខ្លាំង​ ដែល​បានធ្វើ​ឲ្យ​រង្គោះរង្គើរ​ទីក្រុង​វ៉ាស៊ីន​តោន ​បន្ទាប់ពី​ការបះបោរ​ដ៏​ច្របូកច្របល់​កាលពី​ថ្ងៃទី​ពុធ​ទី​៦ ខែមករា​នៅ​វិមាន​កា​ពី​តូ​លពី​សំណាក់​ក្រុមបាតុករ​គាំទ្រ​លោក Trump។ ហើយ​វា​បង្ហាញ​ពី​ការព្រួយបារម្ភ​ថា ​មនុស្ស​មួយចំនួន​ដែល​ត្រូវបានចាត់តាំង​ឱ្យ​ការពារ​ទីក្រុង ​ក្នុង​រយៈពេល​ប៉ុន្មាន​ថ្ងៃ​ខាងមុខ​អាច​បង្ក​ការគំរាមកំហែង ​ដល់​ប្រធានាធិបតី​ដែល​ចូលកាន់​តំណែង​ក្នុងពេល​ខាងមុខ​ដ៏​ខ្លី ​និង​សមាជិក​សំខាន់ៗ​ដទៃទៀត​ដែល​នឹង​ចូលរួម​។​ រដ្ឋមន្ត្រី​យោធា​លោក Ryan McCarthy ​បាន​ប្រាប់​សារព័ត៌មាន AP ​កាល​ពី​ថ្ងៃអាទិត្យ​ថា ​ក្រុមមន្ត្រី​បានដឹង​អំពី​ការគំរាមកំហែង​ដែល​អាច​កើតមាន​ ហើយ​លោក​បាន​ព្រមាន​ដល់​ក្រុម​មេបញ្ជាការឲ្យប្រយ័ត្នប្រយែង​ ចំពោះ​បញ្ហា​ណាមួយ​នៅក្នុង​ជួរ​របស់​ពួកគេ  ខណៈ​ដែល​ពិធី​ស្បថ​ចូលកាន់​តំណែង​ជិត​មកដល់​។

ទោះយ៉ាងណា​រហូតមកដល់​ពេលនេះ​ លោក ​និង​មេដឹកនាំ​ដទៃទៀត​និយាយថា​ ពួកគេ​ពុំបាន​ឃើញ​ភ័ស្តុតាង​នៃ​ការគំរាមកំហែង​ណាមួយ​ទេ ​ហើយ​ក្រុមមន្ត្រី​បាន​និយាយថា​ ការត្រួតពិនិត្យ​នេះ​មិនបាន​បង្ហាញ​ពី​បញ្ហា​ណាមួយ​នៅឡើយ​ទេ​។ បរិវេណ​អគារ​កា​ពី​តូ​ល​សហរដ្ឋអាមេរិក​ បាន​បិទ​ជា​បណ្តោះ​អាសន្នកាល​ពីថ្ងៃ​ច័ន្ទ​ ក្នុងអំឡុង​ការហាត់​សម​សម្រាប់​ពិធី​ស្បថ​ចូលកាន់​តំណែង ​លោក​ប្រធានាធិបតី​ជាប់ឆ្នោត ​Joe Biden ​បន្ទាប់ពី​មាន​អគ្គិភ័យ​នៅក្នុង​ជំរំ​អ្នក​គ្មាន​ទីជម្រក​មួយ ​នៅ​ចម្ងាយ​ប្រហែល ១​ម៉ា​យល៍បាន​ហុយផ្សែង​ឡើងលើ​អាកាស ​និង​បង្ក​ការព្រួយបារម្ភ​ដល់​សន្តិសុខ​៕

អត្ថបទ៖ សុខ​មាន