សម្តេច​តេ​ជោ ហ៊ុន សែន បង្ហាញ​ទស្សនវិស័យ​ថា សមូហភាព​ដឹកនាំបុគ្គល​ទទួលខុសត្រូវ​

169

ភ្នំពេញ៖ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជា​ណ​ចក្រ​កម្ពុជា បាន​លើកឡើង​នូវ​ទស្សនវិស័យ ដ៏​ត្រឹមត្រូវ របស់​សម្តេច​ថា សមូហភាព ដឹកនាំ បុគ្គល​ទទួលខុសត្រូវ។​

សម្តេច​តេ​ជោ ប្រមុខ​រាជរដ្ឋាភិបាល បាន​មានប្រសាសន៍​លើកឡើង​នូវ​ទស្សន​ដ៏​ត្រឹមត្រូវ​បែបនេះ ខណៈ​សម្តេច និង​សម្តេច​កិត្តិ​ព្រឹទ្ធ​បណ្ឌិត បាន​អញ្ជើញ​ជា​អធិបតី​ក្នុង​ពិធី​បិទ​មហាសន្និបាត​តំណាង​ទូទាំង​ប្រទេស លើក​ទី​៤ របស់​សហភាព សហព័ន្ធ​យុវជន​កម្ពុជា ហៅ​កាត់​ថា « ស ស យ ក​» ដែល​ប្រារព្ធ​នៅ​សណ្ឋាគារ​សុខា ភ្នំពេញ នា​ល្ងាច​ថ្ងៃ​ទី​២៧ ក្នុង​ន័យ​ចែក​រំលែក​បទពិសោធន៍ ដែល​សម្តេច​បាន​ឆ្លងកាត់​ក្នុង​ជីវិត​តស៊ូ ដើម្បី​បុព្វហេតុ​ជាតិ​នៃ​ដំណើរ​តស៊ូ​រំដោះ​ប្រទេសជាតិ​កាលពី​ជាង​៤០​ឆ្នាំមុន និង រហូតមកដល់​សព្វថ្ងៃ​។​

​​សម្តេច​បានផ្តល់​អនុសាសន៍​ថា ការងារ​តូចក្តី​ធំ ក្តី​ត្រូវ​ហាន​ទទួលស្គាល់ និង​កែតម្រូវ ហើយ​យុវជន​របស់​យើង បើ​ចាប់យក​វិជ្ជា​ណាមួយ ត្រូវ​ចាប់យក​ឱ្យ​ច្បាស់លាស់ ត្រូវ​ចេះ​ប្រើប្រាស់​ឱកាស តែ​កុំ​ឱកាសនិយម​ឆ្វេង និង​កុំ​ឱកាសនិយម​ស្តាំ បានសេចក្តីថា កុំ​ឆ្វេង និង​កុំ​ស្តាំ គឺ​ត្រូវ​រក​ចំណុចកណ្តាល​។​

​​ស​.​ស​.​យ​.​ក បើតាម​ឯកឧត្ដម ហ៊ុន ម៉ា​នី បាន​បញ្ជាក់ថា ដោយ​ផ្អែកលើ​មូលដ្ឋាន​ធនធានមនុស្ស យុវជន​កម្ពុជា ដែលមាន​ការទទួលខុសត្រូវ មាន​ឧ​ត្ត​ម​គតិ មនសិការ​ស្នេហា​ជាតិ ដើម្បី​ជាស​រសរ​ទ្រូង នៃ​ឆ្អឹងខ្នង​ដ៏​រឹងមាំ​សម្រាប់​ប្រទេសជាតិ​នាពេល​បច្ចុប្បន្ន និង​អនាគត​។​

​​នៅក្នុង​ទិសដៅ​ការងារ​បន្ដ ដែល​បាន​ដាក់​ចេញ ស​.​ស​.​យ​.​ក ប្ដេជ្ញា​បន្ដ​អនុវត្ត «​ចលនា​យុវជន​ក្នុង​បុព្វហេតុ​ជាតិ​មាតុភូមិ​» ដែល​ភ្ជាប់​ក្នុង​ឧបសម្ពន្ធ នៃ​សេចក្ដីសម្រេចចិត្ត របស់​មហាសន្និបាត​សមាគម​យុវជន​កម្ពុជា ឆ្នាំ​២០១២ និង​ដែល​ត្រូវធ្វើ​បច្ចុប្បន្ន​ភាពជា​ផែនការ​យុទ្ធសាស្ត្រ ឆ្នាំ​២០១២២០២៣​។ ផែនការ​យុទ្ធសាស្ដ្រ «​ចលនា​យុវជន​ក្នុង​បុព្វហេតុ​មាតុភូមិ​» នេះ​ត្រូវធ្វើ​បច្ចុប្បន្នភាព​ជាប្រចាំ ស្របតាម​វិវត្ដន៍​ជាក់ស្ដែង នៃ​សង្គមជាតិ ដោយ​គណៈកម្មាធិការ​ក​ណ្ដា​ល ស​.​ស​.​យ​.​ក​។

ស​.​ស​.​យ​.​ក នឹង​ជំរុញ បន្ដ​ពង្រីក​រចនាសម្ព័ន្ធ និង​ក្រុមការងារ ស​.​ស​.​យ​.​ក ឲ្យ​បានសម្រេច​តាម​លក្ខ​និ្ដ​កៈ​របស់ខ្លួន ដើម្បី​ជា​មូលដ្ឋាន​ក្នុងការ​ពង្រីក​សកម្មភាព និង​ជំរុញ​បេសកកម្ម បុព្វហេតុ​របស់ ស​.​ស​.​យ​.​ក ឲ្យ​កាន់តែ​បាន​ទូលំទូលាយ និង​ជ្រាប​ដល់​បេះដូង​របស់​យុវជន នៅតាម​បណ្ដា​មូលដ្ឋាន​នានា​ក្នុងប្រទេស​។

បន្ដសកម្មភាព​លើក​ស្ទួយ​នូវ​ឧត្តមភាព កិត្តិនាម​ជាតិ និង​ផ្សព្វផ្សាយ​ឲ្យ​បាន​ទូលំទូលាយ​អំពី​ប្រវត្តិសាស្ដ្រ វប្បធម៌ ប្រពៃណី សិល្បៈ ជំនឿ​សាសនា ដែលជា​អត្ដ​សញ្ញាណ​ជាតិ និង​បន្ដ​លើកកម្ពស់​សមត្ថភាព ជំនាញ ផលិតភាព ចំណេះដឹង និង​បំណិន​ជីវិត​របស់​យុវជន​។

បន្ថែម​ពីនេះ បន្ដ​ជំរុញ​យុវជន ឲ្យ​ចូលរួម​កម្មវិធី​ស្ម័គ្រចិត្ត កម្មវិធីសិក្សា កម្មវិធី​មនុស្សធម៌ ឬ​ការងារ​ស្ម័គ្រចិត្ត​នៅតាម​សហគមន៍ ដើម្បី​យុវជន​បាន​សាកល្បង​ចំណេះដឹង ទេពកោសល្យ ការ​ច្នៃប្រឌិត និង​ទទួល​បាន​បទពិសោធន៍​ដើម្បី​ជា​ឧ​ត្ត​ម​ប្រយោជន៍​របស់​ជាតិ​៕