BTV NEWS

អគ្គិសនីកម្ពុជាកំពុងគាំទ្រស្ថានីយបញ្ជូលថាមពលយានយន្តអគ្គិសនីជាង ៤០០កន្លែង នៅទូទាំងប្រទេស

មន្រ្តីជាន់ខ្ពស់បង្ហាញការប្តេជ្ញាចិត្តរបស់កម្ពុជាលើកកម្ពស់សន្តិសុខ និងបរិកាសល្អដល់ដៃគូអន្តរជាតិ

រយៈពេល១ឆ្នាំ TIA រួមចំណែកជំរុញកំណើនសេដ្ឋកិច្ចកម្ពុជាប្រមាណ ៥ភាគរយ

កម្ពុជាស្វែងយល់ពីបច្ចេកវិទ្យានវានុវត្តន៍ និងផ្លាស់ប្តូរទស្សនៈជាមួយដៃគូអន្តរជាតិនៅទីក្រុងសៀមិន

សេដ្ឋកិច្ច និង កសិកម្ម

កម្ចីឥណទានប្រើប្រាស់ចំគោលដៅ នឹងជួយបង្កើនចំណូលដល់ជីវភាពក្នុងគ្រួសារប្រសើរឡើង

ភ្នំពេញ៖ មន្រ្តីជាន់ខ្ពស់ធនាគារជាតិនៃកម្ពុជា លើកឡើងថា ការខ្ចីប្រាក់ពីបណ្ដាគ្រឹះស្ថានធនាគារ និងមីក្រូហិរញ្ញវត្ថុ ដែលមានច្បាប់ត្រឹមត្រូវមិនមែនជារឿងអាក្រក់នោះទេ ក្នុងនោះប្រសិន បើកម្ចីទៅប្រើប្រាស់ចំគោលដៅ មិនត្រឹមតែមានលទ្ធភាពក្នុងការសងត្រឡប់នោះទេ ថែមទាំងជួយបង្កើនចំណូលដែលអាចជួយដល់ជីវភាពក្រុមគ្រួសារបានល្អប្រសើរផងដែរ។លោកជំទាវបណ្ឌិត ជា សិរី ទេសាភិបាលរងធនាគារជាតិនៃកម្ពុជា លើកឡើងក្នុងកម្មវិធីជំនួបជាមួយអ្នកសារព័ត៌មាន ក្រោមប្រធានបទ៖ ការត្រួតពិនិត្យស្ថិរភាពប្រព័ន្ធហិរញ្ញវត្ថុ នៅថ្ងៃទី ៥ ខែកក្កដា ឆ្នាំ២០២៣ សាលាបច្ចេកទេសធនាគារ (CBS) ថ្ងៃទី៥ ខែកក្កដា ឆ្នាំ ២០២៣ នេះថា ជុំវិញការខ្ចីប្រាក់របស់ប្រជាពលរដ្ឋនៅតាមគ្រឹះស្ថានធនាគារ ក៏ដូចគ្រឹះស្ថានមីក្រូហិរញ្ញវត្ថុ ធនា គារជាតិនៃកម្ពុជា តែងតែបញ្ជ្រាបចំណេះដឹងដល់ប្រជាពលរដ្ឋក្នុងការប្រើប្រាស់កម្ចីចំគោលដៅ ពីការកម្ចីពីធនាគារ និងគ្រឹះស្ថានមីក្រូហិរញ្ញវត្ថុបានត្រឹមត្រូវ ដោយមានការថ្លឹងថ្លែងឲ្យបានច្បាស់លាស់ ដើម្បីយកប្រាក់ទាំងនោះប្រើប្រាស់ឲ្យមានតម្លាភាព ពោលគឺការប្រាក់ទៅអាចរកចំណូល និងមានលទ្ធភាពសង់ត្រឡប់។ លោកជំទាវបណ្ឌិត បន្តថា ទាក់ទងបញ្ហានេះ ធនាគារជាតិនៃកម្ពុជា បានចែករំលែកចំណេះដឹងអំពីផ្នែកហិរញ្ញវត្ថុបន្ថែមទៀតដល់ក្រុមអ្នកសារព័ត៌មាន ក្នុងគោលបំណងដើម្បីផ្សាយបន្តប្រាប់ដល់ពលរដ្ឋ អំពីការដាក់ប្រាក់សន្សំតាមធនាគារ និងហិរញ្ញវត្ថុ ដែលផ្ដល់ទាំងសុវត្ថិភាព និងការប្រាក់ ពោលគឺចៀសជាងការខ្ចីលុយមានការប្រាក់ខ្ពស់ពេក និងគ្មានច្បាប់ត្រឹមត្រូវ ដែលអាចបង្កជាហានិភ័យ។ លោកជំទាវបណ្ឌិត ជា សិរី បានបន្ថែមថា ជុំវិញការខ្ចីនេះ ធនាគារជាតិនៃកម្ពុជា តែងតែលើកទឹកចិត្តប្រជាពលរដ្ឋឲ្យសន្សំលុយ តាមរយៈគ្រឹះស្ថានមីក្រូហិរញ្ញវត្ថុ និងធនាគារផ្លូវការ ដោយមានការចុះកិច្ចសន្យាត្រឹមត្រូវ ក្នុងនោះចំពោះការសន្សំលុយនៅធនាគារពាណិជ្ជ នឹងទទួលបានការប្រាក់ទៀតផង។ សម្រាប់បញ្ហានេះ ប្រសិនបើកម្ចីទៅលើការរកស៊ី ដើម្បីបានចំណូល បង្កើនចំណូល ហើយមានលទ្ធភាពសងត្រឡប់ទៅកាន់ម្ចាស់បំណុល នោះការជំពាក់ ឬខ្ចីលុយគេជារឿងល្អ ក៏ប៉ុន្ដែប្រសិនបើការខ្ចីលុយយកទៅប្រើប្រាស់ខុសគោលដៅដូចជា ឡើងស៊េរីទូរស័ព្ទ, ទិញម៉ូតូ ឬឡានថ្មី ទាំងនេះជាហានិភ័យ បង្កគ្រោះថ្នាក់ឈានដល់ការជាប់បំណុលវ័ណ្ឌក៕អត្ថបទ៖ សុន រ៉ាឌី

សេដ្ឋកិច្ចកម្ពុជា រំពឹងសម្រេចបានអត្រាកំណើនក្នុងរង្វង់ ៦,៦% នៅឆ្នាំក្រោយ

ភ្នំពេញ៖ សេដ្ឋកិច្ចកម្ពុជាសម្រាប់ឆ្នាំ ២០២៤ ត្រូវបានព្យាករថា នឹងសម្រេចបានអត្រាកំណើនក្នុងរង្វង់ ៦,៦% ដោយសារការរំពឹងទុកការត្រឡប់ទៅរកភាពល្អប្រសើរឡើងវិញនៃតម្រូវការខាងក្រៅ និងការងើបឡើងវិញនៃទំនុកចិត្តវិនិយោគ និងពាណិជ្ជកម្ម ស្របពេលដែលសកម្មភាពធុរកិច្ចក្នុងស្រុក នៅបន្តរក្សាបាននូវនិន្នាការកំណើនល្អជាវិជ្ជមាន ។ក្រសួងសេដ្ឋកិច្ច និងហិរញ្ញវត្ថុ បានបង្ហាញក្របខណ្ឌគោលនយោបាយហិរញ្ញវត្ថុ និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៤, ជុំវិញវិស័យសេដ្ឋកិច្ច ក្នុងឆ្នាំ ២០២៣ នេះ សេដ្ឋកិច្ចកម្ពុជាត្រូវបានប៉ាន់ស្មានឡើងវិញថា នឹងសម្រេចបានកំណើនក្នុងអត្រា ៥,៦%, ដោយអនុវិស័យគាំទ្រកំណើនមានការប្រែប្រួល បើធៀបនឹងការរំពឹងទុកកាលពីដើមឆ្នាំ ។ ចំណែកសេដ្ឋកិច្ចកម្ពុជាឆ្នាំ២០២៤ វិញ ត្រូវបានព្យាករថា នឹងសម្រេចបានអត្រាកំណើនក្នុងរង្វង់ ៦,៦% ស្របពេលការអនុវត្តក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣ ។ទន្ទឹមនេះ, ការបន្តអនុវត្តគោលនយោបាយអភិវឌ្ឍន៍វិស័យកសិកម្មឆ្នាំ ២០២១-២០៣០ និងការដាក់ពង្រាយអ្នកជំនាញកសិកម្ម នៅគ្រប់ឃុំទូទាំងប្រទេស ដើម្បីជួយប្រជាកសិករ នឹងជួយជំរុញកំណើន ជារួម តាមរយៈការធ្វើទំនើបកម្មកសិកម្មកម្ពុជាឱ្យកាន់តែមានភាពប្រកួតប្រជែង, បរិយាបន្ន និងភាពធន់ទៅនឹងការប្រែប្រួលអាកាសធាតុ ។ចំណែកវិស័យឧស្សាហកម្ម ក្នុងឆ្នាំ ២០២៣ នេះ រាជរដ្ឋាភិបាលរំពឹងថា នឹងសម្រេចបានកំណើន ៥,០% ដោយសារការថមថយកំណើនអនុវិស័យកាត់ដេរ និងការបន្តកំណើនទាបនៃអនុវិស័យសំណង់ ខណៈដែលអនុវិស័យកម្មន្តសាលមិនមែនកាត់ដេរនៅបន្តរក្សាបានកំណើនល្អប្រសើរ ។ សម្រាប់ឆ្នាំ ២០២៤ វិញ, វិស័យឧស្សាហកម្មនេះ ត្រូវបានព្យាករថា សម្រេចបានកំណើនក្នុងអត្រា ៨,៥% ទ្រទ្រង់ដោយកំណើនល្អប្រសើរនៃអនុវិស័យកាត់ដេរ និងកម្មន្តសាលមិនមែនកាត់ដេរ ខណៈដែលអនុវិស័យសំណង់បន្តសម្រេចបានកំណើនទាបជាងនិន្នាការមុនវិបត្តិជំងឺកូវីដ-១៩ ។ដោយឡែកវិស័យសេវាកម្មវិញ ត្រូវបានព្យាករថា នឹងបន្តនិន្នាការកើនឡើង ក្នុងអត្រា ៨,១% ក្នុងឆ្នាំ ២០២៣ និង ៦,៩% ក្នុងឆ្នាំ ២០២៤ ដោយការបន្តកើនឡើងនូវសកម្មភាពក្នុងអនុវិស័យសណ្ឋាគារ និងភោជនីយដ្ឋាន និងសេវាកម្មគាំទ្រផ្សេងទៀតដូចជា អនុវិស័យលក់ដុំ-រាយ និងអនុវិស័យដឹកជញ្ចូន និងគមនាគមន៍ ខណៈដែលអនុវិស័យអចលនទ្រព្យរំពឹងថា នៅបន្តសម្រេចបានកំណើនទាបជាងនិន្នាការធម្មតា៕អត្ថបទ៖ សុន រ៉ាឌី

ដំណើរសេដ្ឋកិច្ចនៅកម្ពុជាមានសភាពជាប្រក្រតី នៅអំឡុងយុទ្ធនាការឃោសនាបោះឆ្នោត

ភ្នំពេញ៖ ធនាគារជាតិនៃកម្ពុជា លើកឡើងថា លំហូររូបិយវត្ថុ ការវិនិយោគ ក៏ដូចជាធ្វើពាណិជ្ជកម្ម មានដំណើរការធម្មតា អំឡុងពេលយុទ្ធនាការឃោសនាបោះឆ្នោត ដែលប្រការទាំងនេះបង្ហាញឲ្យឃើញនូវមោទនភាព អំពីស្ថិរភាពនយោបាយ និងសុខសន្តិភាពពេញលេញនៃប្រទេសកម្ពុជាទាំងមូល។លោកជំទាវ ជា សិរី ទេសាភិបាលរងនៃធនាគារជាតិនៃកម្ពុជា បានលើកឡើង នៅថ្ងៃទី ៤ ខែកក្កដា ឆ្នាំ២០២៣នេះថា ប្រសិនមានព្រឹត្តិការណ៍អ្វីកើតឡើង ទោះបីមិនមានការប៉ះពាល់ដល់រូបិយវត្ថុក៏ដោយ អ្នកវិនិយោគ ជាពិសេសប្រជាពលរដ្ឋដែលដាក់ប្រាក់បញ្ញើរ តែងតែមានសភាពជ្រួលជ្រាល ដើម្បីដកប្រាក់យកទៅទុកផ្ទាល់ខ្លួន។ បើតាមការសង្កេតមើលឃើញជាក់ស្តែង ជាពិសេសនៅពេលមានការបោះឆ្នោតនៅអណត្តិមុនៗ បញ្ហានេះតែងតែកើតឡើង ប៉ុន្តែនៅក្នុងប៉ុន្មានអាណត្តិចុងក្រោយនេះ គឺកិច្ចដំណើរសេដ្ឋកិច្ចនៅកម្ពុជាមានសភាពជាប្រក្រតី ក្នុងនោះលំហូរសាច់នៅក្នុងសេដ្ឋកិច្ច មានចរន្តជាធម្មតាផងដែរ។លោកជំទាវ ថ្លែងបន្តថា ជាក់ស្តែងនៅក្នុងអាណត្តិនេះជាដើម បរិយាប័ន្នរូបិយវត្ថុ ការវិនិយោគ និងការធ្វើពាណិជ្ជកម្មផ្សេងៗ មានលំហូរសាច់ប្រាក់ចេញ-ចូលជាធម្មតា ដែលប្រការទាំងនេះបានបង្ហាញឲ្យឃើញនូវមោទនភាព សុខសុវត្ថិភាព ស្ថិរភាពនយោបាយរបស់កម្ពុជា ដែលបញ្ហាទាំងនេះ បានផ្តល់នូវបរិយាកាសវិនិយោគ ការរកស៊ីទទួលទានផ្សេងៗបានដំណើរការទៅដោយរលូន ពោលគឺមិនមានប៉ះពាល់ដល់លំហូររូបិយវត្ថុ ឬចរន្តនៃសេដ្ឋកិច្ចនោះឡើយ។ទាក់ទិនបញ្ហានេះដែរ,លោកបណ្ឌិត ហុង វណ្ណៈ ជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា មើលឃើញថា ជុំវិញព្រឹត្តិការណ៍ចេញឃោសនារកសំឡេងឆ្នោត របស់បក្សនយោបាយក្នុងអណត្តិនេះនៅកម្ពុជា ក្នុងនោះពាក់ព័ន្ធស្ថានភាពសេដ្ឋកិច្ច ពាណិជ្ជកម្ម ការវិនិយោគ ទេសចរណ៍ និងការនាំចេញ-ចូលជាដើម មានសភាពប្រក្រតីជាធម្មតា, ពោលគឺជុំវិញការធ្វើពាណិជ្ជកម្ម វិនិយោគ ក៏ដូចជាទេសចរណ៍នេះ ពួកគេសម្លឹងមើលអំពីស្ថានភាពយោបាយ និងការអភិវឌ្ឍនៅកម្ពុជារួចជាស្រាច់ ទើបពួកគេហ៊ានចេញ-ចូល ជាក់ស្តែងដូចនៅក្នុងពេលនេះជាដើម វិនិយោគិនបានបន្តវិនិយោគបណ្តាក់ទុនរកស៊ីទទួលទានជាធម្មតា៕អត្ថបទ៖ សុន រ៉ាឌី

NBCដាក់ឲ្យដំណើរការ ប្រព័ន្ធខេមបូឌានស៊ែស្វីច សម្រាប់ប្រតិបត្តិការសាច់ប្រាក់

ភ្នំពេញ៖ធនាគារជាតិនៃកម្ពុជា ការដាក់ឲ្យដំណើរការជាផ្លូវការ ប្រព័ន្ធខេមបូឌានស៊ែស្វីច ហៅកាត់ថា CSS ជាប្រព័ន្ធទូទាត់យ៉ាងសំខាន់ ដោយបានចូលរួមចំណែកដល់ការអភិវឌ្ឍសេដ្ឋកិច្ច តាមរយៈផ្តល់នូវការទូទាត់ប្រកបដោយប្រសិទ្ធភាព សម្រាប់ពាណិជ្ជកម្ម និងការផ្ទេរប្រាក់ជាដើម។ធនាគារជាតិនៃកម្ពុជា ដាក់ឲ្យដំណើរការជាផ្លូវការ ប្រព័ន្ធខេមបូឌានស៊ែស្វីច នៅថ្ងៃទី ៤ ខែកក្តដា ឆ្នាំ ២០២៣ នេះ ដោយប្រព័ន្ធ CSS នេះ បានដំណើរការទូទាត់លើឧបករណ៍ទូទាត់ប័ណ្ណឥណពន្ធ ក្នុងនោះប្រតិបត្តិការផ្ទេរមូលនិធិនៃឧបករណ៍នេះ កើតឡើងដោយប្រើប្រាស់ម៉ាស៊ីនដក និងដាក់ប្រាក់ស្វ័យប្រវត្តិ (ATM) និងម៉ាស៊ីន POS ជាភ្នាក់ងារប្រតិបត្តិការ។ ប្រព័ន្ធខេមបូឌានស៊ែស្វីច CSS បានដំណើរការទូទាត់លើប្រតិបត្តិការចំនួន ៣ ប្រភេទធំៗគឺ៖ ប្រតិបត្តិការផ្ទេរប្រាក់ (ATM) ប្រតិបត្តិការដកប្រាក់ (ATM និង POS) ប្រតិបត្តិការទិញទំនិញ (POS) និងមានប្រតិបត្តិការមិនមែនហិរញ្ញវត្ថុចំនួន ៣ ផ្សេងទៀតដូចជា៖ ប្រតិបត្តិការពិនិត្យសមតុល្យ ប្រតិបត្តិការរបាយការណ៍សង្ខេប និងប្រតិបត្តិការប្ដូរលេខសម្ងាត់ ។សូមបញ្ជាក់ថា ប្រព័ន្ធខេមបូឌានស៊ែស្វីច (CSS) គឺជាប្រព័ន្ធមួយសម្រាប់ជួយសម្រួលដល់សាធារណជន ក្នុងការដកប្រាក់ឆ្លងធនាគារបានដោយមិនអស់សេវា។ប្រព័ន្ធខេមបូឌានស៊ែស្វីច (CSS) ជំរុញការអនុវត្តសន្ធានកម្មប្រព័ន្ធរបស់គ្រឹះស្ថានសមាជិក ផ្តល់ភាពងាយស្រួល និងសុវត្ថិភាពដល់អ្នកប្រើប្រាស់តាមរយៈការកាន់ប័ណ្ណទូទាត់តែមួយ ដែលអាចប្រើប្រាស់ទាំងក្នុងស្រុក និងអន្តរជាតិ ក៏ដូចជាចូលរួមចំណែកក្នុងការសម្រេចបានសេដ្ឋកិច្ចឌីជីថល ប្រកបដោយបរិយាបន្ន និងស្ថិរភាព៕អត្ថបទ៖ សុន រ៉ាឌី

ការចំណាយលើយុទ្ធនាការឃោសនាបោះឆ្នោតរបស់បក្សនយោបាយ ចាក់ចូលក្នុងចរន្តសេដ្ឋកិច្ច

ភ្នំពេញ៖ អ្នកជំនាញសេដ្ឋកិច្ច មើលឃើញថា នៅក្នុងយុទ្ធនាការឃោសនារកសំឡេងនេះ ថវិកាដ៏ច្រើនសន្ធឹកសន្ធាប់ ដែលត្រូវបានចំណាយដោយគណបក្សនយោបាយ បានចាក់ចូលក្នុងចរន្តសេដ្ឋកិច្ច និងសង្គម ជាពិសេសបានជួយដល់អាជីវកម្ម សិប្បកម្មមួយចំនួន ដែលផលិត ឬវេចខ្ចប់សម្ភារៈផ្សេងៗសម្រាប់បម្រើដល់យុទ្ធនាការនេះ។លោកបណ្ឌិត ហុង វណ្ណៈ ជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាលើកឡើងក្នុងកិច្ចសម្ភាសន៍ជាភ្នាក់ងារអ្នកយកព័ត៌មាន BTV ស្តីពីកិច្ចដំណើរការសេដ្ឋកិច្ច និងសង្គម ក្នុងយុទ្ធនាការឃោសនាបោះឆ្នោត នៅថ្ងៃទី ៣ខែកក្កដា ឆ្នាំ២០២៣នេះថា ព្រឹត្តិការណ៍ឃោសនារកសំឡេងឆ្នោត របស់បក្សនយោបាយក្នុងនីតិកាលទី ៧ ឆ្នាំ ២០២៣ នេះ គណបក្សនយោបាយ ត្រូវការជាចាំបាច់នូវឧបករណ៍ ឬសម្ភារៈផ្សេងៗ ដើម្បីចេញឃោសនារកសំឡេងគាំទ្រ ដែលតាមរយៈនេះ ថវិកា ដ៏ច្រើនសន្ធឹកសន្ធាប់ បានចាក់ចូលក្នុងចរន្តសេដ្ឋកិច្ច និងសង្គម ដោយបានជួយជ្រោមជ្រែងដល់អាជីវកម្ម សិប្បកម្ម សេវាកម្ម អ្នកផលិត និងវេចខ្ចប់នានា ក៏ដូចជាអ្នកលក់ដូរនូវមុខទំនិញមួយចំនួន ដោយអាចរកចំណូលបានសមរម្យផងដែរ។លោកបណ្ឌិត ហុង វណ្ណៈ បានបញ្ជាក់បន្ថែមថា ទាក់ទិននិងសកម្មភាពសេដ្ឋកិច្ចនេះ នៅក្នុងការចេញឃោសនាបោះឆ្នោតរបស់គណបក្សនយោបាយ នារយៈពេលប៉ុន្មានថ្ងៃមកនេះ គឺមិនមានប៉ះពាល់ ការបង្កើតចលាចល ឬភាពអសកម្មណាមួយដល់ដំណើរអភិវឌ្ឍន៍សេដ្ឋកិច្ចនោះឡើយ ទាំងការធ្វើអាជីវកម្មក្នុងស្រុក ក៏ដូចជាការវិនិយោគផងដែរ ពោលគឺសកម្មភាពក្នុងសេដ្ឋកិច្ច និងសង្គម បានប្រព្រឹត្តទៅដោយរលូន ប្រកបដោយបរិយាកាសល្អប្រសើរ។ចំណែក ឧកញ៉ា លឹម ហេង អនុប្រធានសភាពពាណិជ្ជកម្មកម្ពុជា លើកឡើងថា ស្ថិតក្នុងការឃោសនារកសំឡេងនេះ ចំពោះសកម្មភាពនៃកិច្ចដំណើរការអភិវឌ្ឍរបស់រោងចក្រ សហគ្រាស បានដំណើរជាធម្មតា ហើយចំណែកការធ្វើពាណិជ្ជកម្ម និងការវិនិយោគ បានប្រាស្រ័យទាក់ទងគ្នាជាធម្មតា ។ ឧកញ៉ា លឹម ហេងបន្តថា ក្រៅពីនេះ ផ្នែកសេវាកម្មក៏បានប្រព្រឹត្តទៅដោយរលូនផងដែរ ដែលកត្តាទាំងនេះ បង្ហាញឲ្យឃើញពីការយល់ដឹងរបស់ប្រជាពលរដ្ឋ អំពីលទ្ធិប្រជាធិបតេយ្យ ដែលកំពុងជ្រកក្រោមដំបូលនៃសន្តិភាព៕ អត្ថបទ៖ សុន រ៉ាឌី

ធនាគារជាតិ ពង្រីកប្រព័ន្ធទូទាត់បន្ថែមជាមួយប្រទេស វៀតណាម ឡាវ មីយ៉ាន់ម៉ា ចិន និងឥណ្ឌា

ភ្នំពេញ៖ ធនាគារជាតិនៃកម្ពុជា បាននិងកំពុង ពង្រីកការអភិវឌ្ឍប្រព័ន្ធទូទាត់ជាមួយប្រទេស វៀតណាម ឡាវ មីយ៉ាន់ម៉ា ចិន និងឥណ្ឌា ដើម្បីជំរុញការប្រើប្រាស់រូបិយវត្ថុក្នុងស្រុកជំនួសឱ្យប្រាក់ដុល្លារអាមេរិក នៅក្នុងពាណិជ្ជកម្ម និងការវិនិយោគរវាងបណ្តាប្រទេសដៃគូពាណិជ្ជកម្ម។ ក្នុងសិក្ខាសាលាផ្សព្វផ្សាយ ស្តីពី “ប្រាក់រៀល ចំណេះដឹងហិរញ្ញវត្ថុនិងប្រព័ន្ធបាគង” នៅថ្ងៃទី៣០ ខែមិថុនា ឆ្នាំ២០២៣ នៅស្រុកសន្ទុក ខេត្តកំពង់ធំ លោកជំទាវបណ្ឌិត ជា សិរី ទេសាភិបាលរង ធនាគារជាតិនៃកម្ពុជា លើកឡើងថា កម្ពុជា បានតភ្ជាប់ជាមួយប្រទេសថៃ និងម៉ាឡេស៊ី ដោយប្រជាជនកម្ពុជាអាចស្កេនទូទាត់នៅប្រទេសថៃ ចេញពីគណនីលុយរៀលរបស់ខ្លួននៅកម្ពុជាបាន ហើយប្រជាជនថៃ ក៏អាចស្កេនទូទាត់ជាប្រាក់រៀលនៅកម្ពុជាផងដែរ។ ទេសាភិបាលរង បន្តថា យន្តការនេះ តម្រូវឱ្យអ្នកទិញនិងអ្នកលក់ជាប្រជាជនកម្ពុជាមានគណនីជាប្រាក់រៀល ជាកត្តាជំរុញការប្រើប្រាស់ប្រាក់រៀលនៅកម្ពុជា។ បន្ថែមពីលើនេះ លោកជំទាវបណ្ឌិត ជា សិរី លើកឡើងថា ធនាគារជាតិនៃកម្ពុជា ក៏បាននិងកំពុង សហការជាមួយប្រទេសជាច្រើនទៀត ទាំងក្នុងតំបន់អាស៊ី អាហ្វ្រិក អាមេរិកឡាទីន និងអឺរ៉ុប ដើម្បីបង្កើនវិសាលភាពក្នុងការប្រើប្រាស់ប្រព័ន្ធទូទាត់ដែលមានសុវត្ថិភាព ចំណាយទាប និងទទួលបានប្រាក់ឆាប់រហ័ស សំដៅគាំទ្រនិងជំរុញវិស័យទេសចរណ៍ ការវិនិយោគ ពាណិជ្ជកម្ម និងការផ្ទេរប្រាក់របស់ប្រជាជនខ្មែរ ជាពិសេសពលករដែលកំពុងបម្រើការនៅក្រៅប្រទេស។ ទាក់ទងនឹងការលើកកម្ពស់ប្រាក់រៀលវិញ លោកជំទាវបណ្ឌិត ជា សិរី បញ្ជាក់ថា តម្រូវការប្រាក់រៀល បានកើនឡើងជាលំដាប់ ដែលឆ្លុះបញ្ចាំងតាមរយៈកំណើនប្រាក់រៀលក្នុងចរាចរណ៍ ជាមួយអត្រាកំណើនមធ្យមប្រចាំឆ្នាំ ១៦,៦% ពីប្រមាណ ៣៥៦ប៊ីលានរៀល នៅឆ្នាំ១៩៩៨ រហូតដល់១៤,១ទ្រីលានរៀល នៅឆ្នាំ២០២២៕ អត្ថបទ៖ ជា វណ្ណៈ

ក្រសួងពាណិជ្ជកម្ម ចង់លុបបំបាត់ការប្រកួតប្រជែងដែលមិនស្មោះត្រង់

ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា បានស្នើសុំដល់សមាជិក សមាជិកា ចូលរួមពិនិត្យ និងផ្តល់ធាតុចូលបន្ថែមលើសេចក្តីព្រាងអនុក្រឹត្យស្តីពីវិធានការរដ្ឋបាលសម្រាប់ការអនុវត្តសិទ្ធិកម្មសិទ្ធិបញ្ញា ដើម្បីជំរុញដល់ការធ្វើពាណិជ្ជកម្មស្មើភាព និងទាក់ទាញវិនិយោគ។ក្នុងកិច្ចប្រជុំបូកសរុបលទ្ធផលការងារកម្មសិទ្ធិបញ្ញាឆ្នាំ២០២២ និងលើកទិសដៅការងារឆ្នាំ២០២៣ របស់គណៈកម្មាធិការជាតិគ្រប់គ្រងកម្មសិទ្ធិបញ្ញា ដើម្បីគោរពរាយការណ៍ជូនសម្តេចនាយករដ្ឋមន្រ្តី និងពិនិត្យលើសេចក្តីព្រាងអនុក្រឹត្យស្តីពីវិធានការរដ្ឋបាលសម្រាប់ការអនុវត្ដសិទ្ធិកម្មសិទ្ធិបញ្ញា កាលពីថ្ងៃទី២៩ ខែមិថុនាកន្លងទៅ ឯកឧត្តមរដ្ឋមន្ត្រី បានមានប្រសាសន៍ថា ការស្នើសុំឲ្យចូលរួមការងារខាងលើនេះ ដើម្បីធានាបានកិច្ចការពារឱ្យមានប្រសិទ្ធភាព នៃសិទ្ធិរបស់ម្ចាស់កម្មសិទ្ធិបញ្ញា ព្រមទាំងការពារផលប្រយោជន៍អ្នកប្រើប្រាស់ប្រឆាំងនឹងការធ្វើចរាចរនៃផលិតផលក្លែងក្លាយ ជាពិសេសការអនុវត្តសិទ្ធិកម្មសិទ្ធិបញ្ញា ដើម្បីលុបបំបាត់អំពើនៃការប្រកួតប្រជែងមិនស្មោះត្រង់ ដោយជំរុញឱ្យមានការគោរពកម្មសិទ្ធិបញ្ញាចំណោមសាធារណៈទូទៅ បង្កើនជំនឿទុកចិត្តពីអតិថិជន ពាណិជ្ជកម្មស្មើភាព និងទាក់ទាញវិនិយោគ។ក្នុងឱកាសនេះ ឯកឧត្តមរដ្ឋមន្ត្រី បានថ្លែងអំណរគុណ និងកោតសរសើរចំពោះសមាជិកគណៈកម្មាធិការជាតិគ្រប់គ្រងកម្មសិទ្ធិបញ្ញា និងសមាជិកលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា ដែលបានខិតខំបំពេញការងារអស់ពីកម្លាំងកាយចិត្ត រហូតទទួលបានលទ្ធផលការងារគួរជាទីមោទន ដោយសម្រេចបាននូវសមិទ្ធផលសំខាន់ៗជាច្រើន រួមមាន៖ ការចុះបញ្ជីកម្មសិទ្ធិបញ្ញា ជាពិសេសការចុះបញ្ជីម៉ាកសម្គាល់ភូមិសាស្រ្តទំនិញ និងម៉ាកសមូហភាពទាំងនៅកម្ពុជា និងបណ្តាប្រទេសសំខាន់ៗ , ការចូលជាសមាជិកនៃកិច្ចព្រមព្រៀងអនុសញ្ញា និងសន្ធិសញ្ញាអន្តរជាតិ និងទទួលជោគជ័យក្នុងការបង្រ្កាប និងទប់ស្កាត់បទល្មើសកម្មសិទ្ធិបញ្ញា ដែលមានលទ្ធផលជាច្រើនគួរឱ្យកត់សម្គាល់ជាដើម។ឯកឧត្តមរដ្ឋមន្ត្រី បានបញ្ជាក់ទៀតថា កម្ពុជាសម្រេចបាននូវលទ្ធផលគួរជាទីមោទនលើវិស័យកម្មសិទ្ធិបញ្ញា ដោយឆ្នាំកន្លងទៅក្រុមការងារចរចាជំពូកកម្មសិទ្ធិបញ្ញា បានចូលរួមយ៉ាងសកម្មនៅក្នុងកិច្ចចរចា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ (RCEP) ដែលទើបនឹងចូលជាធរមានកាលពីឆ្នាំ២០២២ និងកិច្ចចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម ដែលបានចាប់ផ្តើមចរចាក្នុងឆ្នាំ២០២២ និងទើបបានចុះហត្ថលេខាក្រោមអធិបតីភាពដ៏ខ្ពង់ខ្ពស់បំផុតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី៨ ខែមិថុនាកន្លងទៅថ្មីនេះផងដែរ៕

គិតត្រឹមខែឧសភា ការលើកលែងពន្ធប្រថាប់ត្រាអចលនទ្រព្យមានទឹកប្រាក់ ជិត២លានដុល្លារ

ភ្នំពេញ៖ គិតមកដល់ខែឧសភា ឆ្នាំ ២០២៣ បានលើកលែងពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ មានចំនួនជាង១ ពាន់ឯកសារ គិតជាប្រាក់ពន្ធសរុបជិត ៨ ប៊ីលានរៀល ត្រូវប្រមាណជិត ២ លានដុល្លារ។អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានបង្ហាញនៅក្នុងព្រឹត្តិបត្រព័ត៌មានប្រចាំសប្តាហ៍ ដែលបានចុះផ្សាយ នៅថ្ងៃទី២៩ខែមិថុនា ឆ្នាំ២០២៣ បានឲ្យដឹងថា គិតចាប់ពីការសម្រេចផ្តល់គោលការណ៍លើកលែងពន្ធប្រថាប់ត្រា ចំពោះអចលនទ្រព្យដែលមាន តម្លៃក្រោម ឬស្មើ ៧ ម៉ឺនដុល្លារ ដោយរាជរដ្ឋាភិបាលកម្ពុជា គិតពីថ្ងៃទី ២៥ ខែកុម្ភៈ ឆ្នាំ២០២០ មកដល់ខែ ឧសភា ឆ្នាំ ២០២៣នេះ អគ្គនាយកដ្ឋានពន្ធដារ បានផ្ដល់ការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ មានចំនួនជា ១ ០២២ ឯកសារ ដែលមានប្រាក់ពន្ធសរុបចំនួន ៧,៩៩ ប៊ីលានរៀល គិតជាប្រាក់ដុល្លារត្រូវប្រមាណជិត ២ លានដុល្លារ។រាជរដ្ឋាភិបាល បានសម្រេចបន្តលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ សម្រាប់លំនៅឋានគ្រប់ប្រភេទ ដែលមាន តម្លៃក្រោម ឬស្មើ ៧ ម៉ឺនដុល្លារ រហូតដល់ដំណាច់ឆ្នាំ ២០២៤ ដើម្បីលើកទឹកចិត្តដល់ប្រជាពលរដ្ឋ ឲ្យមានលំនៅឋានរស់នៅសមរម្យ។ សូមបញ្ជាក់ថា ចំពោះការទិញ-លក់ លំនៅឋានគ្រប់ប្រភេទ ដែលទទួលបានការលើកលែងនេះ អនុវត្តស្របតាមលក្ខខណ្ឌនានាកំណត់ របស់ក្រសួងសេដ្ឋកិច្ច និងហិរញ្ញវត្ថុរួមមាន៖ ការទទួលសិទ្ធិ ឬសិទ្ធិកាន់កាប់អចលនទ្រព្យ (លំនៅឋានគ្រប់ប្រភេទ) ដែលមានតម្លៃ ក្រោម ឬស្មើ ៧ ម៉ឺនដុល្លារ តាមតម្លៃទីផ្សារជាក់ស្ដែង ដែលមានចែងក្នុងកិច្ចសន្យាទិញ-លក់, ការទទួលសិទ្ធិ ឬសិទ្ធិកាន់កាប់អចលន ទ្រព្យ (លំនៅឋានគ្រប់ប្រភេទ) ពីក្រុមហ៊ុនអភិវឌ្ឍន៍លំនៅឋានដែលបានចុះបញ្ជីនៅក្រសួងសេដ្ឋកិច្ច និងហិរញ្ញវត្ថុ។និយ័តករអាជីវកម្មអចលនវត្ថុ និងបញ្ចាំ ឬនៅតាមមន្ទីរសេដ្ឋកិច្ច និងហិរញ្ញវត្ថុ, ក្រុមហ៊ុនអភិវឌ្ឍន៍លំនៅឋានទាំងអស់ ត្រូវធ្វើកិច្ច សន្យាទិញ-លក់ឱ្យបានត្រឹមត្រូវ ដោយផ្អែកលើតម្លៃទីផ្សារជាក់ស្ដែង។ ក្នុងករណីចាំបាច់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ នឹងធ្វើការត្រួតពិនិត្យឡើងវិញ ចំពោះក្រុមហ៊ុនអភិវឌ្ឍន៍លំនៅឋានដែល ឆ្លៀតឱកាសបន្ថយតម្លៃទិញ-លក់ខុសពីតម្លៃ ទីផ្សារជាក់ស្តែង៕អត្ថបទ៖ សុន រ៉ាឌី

ក្រុមហ៊ុនរថយន្ត Volkswagen បញ្ឈប់ខ្សែសង្វាក់ផលិតកម្មនៅប្រេស៊ីល ដោយសារការស្ទះទីផ្សារ

ប្រេស៊ីល៖ ក្រុមហ៊ុនផលិតរថយន្តអាល្លឺម៉ង់ Volkswagen និយាយថា ពួកគេនឹងបញ្ឈប់ខ្សែសង្វាក់ផលិតកម្មរថយន្តនៅតាមរោងចក្រ ៣កន្លែង នៅក្នុងប្រទេសប្រេស៊ីល ដោយសារតែការស្ទះទីផ្សារ ។ ការផ្អាកខ្សែសង្វាក់ផលិតកម្មនេះ នឹងធ្វើឡើងនៅតាមរោងច្រ Sao Jose dos Pinhais, Taubate និងរោងចក្រ Sao Bernardo do Campo ។ នៅរោងចក្រ Sao Jose dos Pinhais និងរោងចក្រ Tabaute វេនខ្លះត្រូវបានអាក់ខានអំឡុងម៉ោងការងារ ។ ខណៈពេលនោះដែរ នៅរោងចក្រ Sao Bernardo do Campoក្រុមហ៊ុន Volkswagenបានអនុញ្ញាតឲ្យឈប់សម្រាករួមរយៈពេល ១០ថ្ងៃសម្រាប់ខ្សែសង្វាក់ផលិតកម្ម ២វេនរបស់ខ្លួន ចាប់ពីថ្ងៃទី ១០ ខែកក្កដាខាងមុខនេះតទៅ ។ ក្រុមហ៊ុន បាននិយាយបន្តទៀតថា សម្ភារៈទាំងអស់ នឹងត្រូវបានផ្តល់ជូននៅក្នុងកិច្ចព្រមព្រៀងរួម ដែលបានចុះហត្ថលេខាដោយសហជីពកម្មករ និងនិយោជិកក្រុមហ៊ុន Volkswagen ៕

ក្រសួងពាណិជ្ជកម្ម ជំរុញសហគ្រិនអភិវឌ្ឍន៍កេរ្តិ៍ឈ្មោះម៉ាកផលិតផល ដើម្បីទាញចំណែកទីផ្សារកាន់តែធំ

ភ្នំពេញ៖ ក្រសួងពាណិជ្ជកម្ម ជំរុញអ្នកផលិតអភិវឌ្ឍន៍កេរ្តិ៍ឈ្មោះម៉ាកផលិតផលឱ្យមានការទទួលស្គាល់ពីអ្នកប្រើប្រាស់ និងមានភាពល្បីល្បាញ ដើម្បីទាញយកចំណែកទីផ្សារឱ្យបានកាន់តែធំ។ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម ជាប្រធានលេខាធិការដ្ឋាននៃគណៈកម្មាធិកាជាតិគ្រប់គ្រងកម្មសិទ្ធិបញ្ញា និងជាប្រធាននាយកដ្ឋានកម្មសិទ្ធិបញ្ញា បានលើកឡើងក្នុង ពិធីបើកសិក្ខាសាលាស្តីពី “ការលើកកម្ពស់ចំណេះដឹងនៃការប្រើប្រាស់កម្មសិទ្ធិបញ្ញាសម្រាប់សហគ្រិនស្រ្តី៖ ការកសាងម៉ាកយីហោ និងការអភិវឌ្ឍន៍ផលិតផល” ដែលត្រូវរៀបចំឡើងនៅខេត្តសៀមរាប ថ្ងៃទី២៨ ខែមិថុនា ។ ឯកឧត្តម សួន វិជ្ជា លើកឡើងថា ក្នុងបរិការណ៍នៃការប្រកួតប្រជែងនៅលើទីផ្សាមានលក្ខណៈខ្លាំងក្លាផងដែរ តម្រូវឱ្យសហគ្រិនគ្រប់រូបមិនត្រឹមតែ មានភាពច្នៃប្រឌិតក្នុងការអភិវឌ្ឍផលិតផលទំនិញ និងសេវាប៉ុណ្ណោះទេ ប៉ុន្តែត្រូវមានចំណេះដឹងផ្នែកអភិវឌ្ឍន៍កេរ្តិ៍ឈ្មោះម៉ាកផលិតផលឱ្យមានការទទួលស្គាល់ពីអ្នកប្រើប្រាស់ និងមានភាពល្បីល្បាញដើម្បីទាញយកចំណែកទីផ្សារឱ្យបានកាន់តែធំ។ ឯកឧត្តម សួន វិជ្ជា បន្តថា ម៉ាកសម្គាល់ផលិតផលជាសញ្ញាមួយដែលភ្ជាប់ទំនាក់ទងរវាងផលិតផលជាមួយអ្នកប្រើប្រាស់ឱ្យសម្គាល់បាននូវ គុណភាព ស្តង់ដារ ប្រភពផលិតផល និងព័ត៌មានផ្សេងៗដែលជួយដល់ការសម្រេចចិត្តនៅពេលជ្រើសរើសផលិតផលមកប្រើប្រាស់។ ជាពិសេស ស្ថិតនៅក្នុងសម័យកាលនៃការធ្វើពាណិជ្ជកម្មតាមប្រព័ន្ធអេឡិចត្រូនិចដូច្នេះ ការបំពាក់ម៉ាកផលិតផលឱ្យបានត្រឹមត្រូវ និងការរៀបចំយុទ្ធសាស្ត្រកសាងកេរ្តិ៍ឈ្មោះម៉ាក ជាផ្នែកមួយមិនអាចខ្វះបាននៅក្នុងការឈានចូលទៅកាន់ទីផ្សារ។ ការកំណត់យកប្រធានបទសិក្ខាសាលា ដោយផ្តោតលើ “ការលើកកម្ពស់ចំណេះដឹងនៃការប្រើប្រាស់កម្មសិទ្ធិបញ្ញាសម្រាប់សហគ្រិនស្រ្តី៖ ការកសាងម៉ាកយីហោ និងការអភិវឌ្ឍផលិតផល” នាពេលនេះនឹងរួមចំណែកជំរុញសហគ្រិនស្ត្រីក្នុងគ្រប់វិស័យឱ្យយល់ដឹងពីកម្មសិទ្ធិបញ្ញា ទាំងក្នុងក្របខ័ណ្ឌជាតិ និងអន្តរជាតិ ព្រមទាំងធ្វើការការរៀបចំយុទ្ធសាស្ត្រកសាងម៉ាកផលិតផលរបស់ខ្លួនឱ្យមានភាពប្រកួតប្រជែងលើទីផ្សារ។ក្រោមជំនួយបច្ចេកទេសរបស់ដៃគូអភិវឌ្ឍ នាយកដ្ឋានបានគាំទ្រដល់សមាគមក្នុងការ ចុះបញ្ជីម៉ាកសម្គាល់ភូមិសាស្ត្រទំនិញបន្ថែមចំនួន៤ ដូចជា “ទឹកឃ្មុំព្រៃមណ្ឌលគិរី” “អំបិលកំពតកែប” “បង្កងតាកែវ” និង“ទឹកត្រីកំពតកែប និងបានចុះបញ្ជីម៉ាកសមូហភាពបន្ថែមចំនួន៤ “អំបុកកំពង់ធំ” “អង្ករព្រះវិហារ” “នំបញ្ចុកសៀមរាប” “ដូងខ្ទិះបាត់ដំបងដែលសមិទ្ធផលទាំងអស់ខាងលើនេះ បានរួមចំណែក យ៉ាងសំខាន់ដល់ការលើកកម្ពស់កេរ្តិ៍ឈ្មោះផលិតផលខ្មែរ ថែរក្សាវប្បធម៌ និងលើកកម្ពស់ជីវភាពរស់នៅរបស់ប្រជាពលរដ្ឋស្របតាមទិសដៅរបស់ក្រសួងពាណិជ្ជកម្ម និងយុទ្ធសាស្ត្ររបស់រាជរដ្ឋាភិបាលកម្ពុជាក្នុងការកាត់បន្ថយភាពក្រីក្រ៕ អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

រដ្ឋមន្ត្រីក្រសួងព័ត៌មាន៖ ការលើកឡើងការចោទប្រកាន់ច្រើនរបស់ថៃ មិនមានន័យថា មានទឡ្ហីករណ៍ផ្លូវច្បាប់ខ្លាំងជាងនោះទេ

ឯកអគ្គរដ្ឋទូតតែងតាំងថ្មីអាល្លឺម៉ង់កម្ពុជាប្ដេជ្ញាខិតខំលើកកម្ពស់ទំនាក់ទំនងរវាងកម្ពុជា និងអាល្លឺម៉ង់ឲ្យកាន់តែរឹងមាំបន្ថែមទៀត

រុស្ស៊ីបន្តវាយប្រហារលើហេដ្ឋារចនាសម្ព័ន្ធថាមពលអ៊ុយក្រែននៅទីក្រុងគីវ

ក្រសួងវប្បធម៌កម្ពុជាអះអាងថា ទាហានថៃបានលួចវត្ថុបុរាណមួយចំនួនចេញពីប្រាសាទខ្មាររបស់ខ្មែរ

យន្តហោះចម្បាំងអង្គការណាតូបាញ់ទម្លាក់យានដ្រូន ១គ្រឿងនៅប្រទេសលីទុយអានី

UNICEF៖ ការកើនឡើងនៃការប្រយុទ្ធគ្នា នៅយេម៉ែន ប៉ះពាល់ការសិក្សារបស់កុមារជិត ១៤០.០០០នាក់

UN ព្រមានពីការជម្លៀសខ្លួន និងគ្រោះថ្នាក់ដល់ជនស៊ីវិល ស្របពេលជម្លោះឡើងកម្តៅខ្លាំងនៅយេម៉ែន

ទួរគីនឹងបាញ់បង្ហោះយានអវកាសគោចរជុំវិញឋានព្រះចន្ទនៅដើមឆ្នាំ ២០២៧

ភ្លៀងធ្លាក់ខ្លាំង និងទឹកទន្លេឡើង បង្កការជន់លិចនៅតាមតំបន់ជាច្រើនរបស់ប្រទេសឥណ្ឌា

ពលរដ្ឋរស់នៅក្នុងទីក្រុងដាម៉ាស ថ្កោលទោសការដំឡើងតម្លៃប្រេងរបស់រដ្ឋាភិបាលស៊ីរី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877