BTV NEWS

រដ្ឋមន្ត្រីក្រសួងកសិកម្មអំពាវនាវកសិកររួបរួមជាសហគមន៍ និងងាកមកដាំពូជស្រូវក្នុងស្រុក

អគ្គនាយក CGCC ៖ វិស័យស្រូវអង្ករត្រូវបានចាត់ទុកជាវិស័យអាទិភាព សម្រាប់ការជួយធានាឥណទាន

រោងម៉ាស៊ីនកិនស្រូវចំនួនពីរកន្លែងនៅកម្ពុជា ប្រកាសទទួលទិញស្រូវពីកសិករជាមួយនឹងតម្លៃសមរម្យ

កម្ពុជានឹងទម្លុះនូវរបាំងភូតគ្គាមអនាម័យ ជំរុញនាំចេញទឹកមាត់ត្រចៀកកាំចូលទៅទីផ្សារចិនឆាប់ៗ

សេដ្ឋកិច្ច និង កសិកម្ម

រយៈពេល១០ខែ កម្ពុជានាំចេញអង្ករមានទំហំទឹកប្រាក់ជាង ៣៧៦ លានដុល្លារអាមេរិក

កម្ពុជាបាននាំចេញអង្ករ នៅក្នុងរយៈពេល ១០ ខែ ឆ្នាំ ២០២៤, មានបរិមាណសរុបប្រមាណជាង ៥០៧ ពាន់តោន គិតជាទឹក ប្រាក់មានចំនួនជាង ៣៧៦ លានដុល្លារអាមេរិក ក្នុងនោះការនាំចេញទៅកាន់ទីផ្សារអឺរ៉ុប មានកំណើនកើនឡើងខ្ពស់ជាងទីផ្សារ ផ្សេងៗ។ជុំវិញការនាំចេញអង្ករនេះ, បើតាមរបាយការណ៍របស់សហព័ន្ធស្រូវអង្ករកម្ពុជា បង្ហាញឱ្យដឹងថា នៅក្នុងរយៈពេល ១០ ខែ ឆ្នាំ ២០២៤ កម្ពុជាបាននាំចេញអង្ករ មានបរិមាណប្រមាណជាង ៥០៧ ពាន់តោន ក្នុងនោះមានក្រុមហ៊ុនចំនួន ៥៥ បាននាំអង្ករចេញ ទៅកាន់ប្រទេសគោលដៅសំខាន់ចំនួន៦៦ ។ ចំណែកទីផ្សារចែកចាយវិញ, ការនាំចេញអង្ករទៅបណ្តាប្រទេសនៅក្នុងតំបន់អឺរ៉ុប ចំនួន ២៦, មានបរិមាណអង្ករជាង ២៥៤ ពាន់តោន គិតជាទឹកប្រាក់ជាង ១៩៦ លានដុល្លារសហរដ្ឋអាមេរិក។ ប្រទេសចិន រួមទាំង ហុងកុង និងម៉ាកាវ ជាង ៩៣ ពាន់តោន មានទឹកប្រាក់ជាង ៩១ លានដុល្លារសហរដ្ឋអាមេរិក។ដោយឡែកការនាំចេញប្រទេសក្នុងអាស៊ានវិញ, នៅក្នុងរយៈពេលនេះដែរ កម្ពុជាបាននាំចេញអង្ករទៅប្រទេសចំនួន ៧ មានបរិមាណសរុបជាង ១០០ ពាន់តោន គិតជាទឹកប្រាក់ចំនួន ៦៦ លានដុល្លារសហរដ្ឋអាមេរិក។ ក្រៅពីនេះកម្ពុជាក៏បាននាំចេញទៅ កាន់គោលដៅចំនួន ៣០ ប្រទេសផ្សេងទៀត មានបរិមាណសរុបជាង ៥៧ ពាន់តោន ក្នុងទំហំទឹកប្រាក់ជាង ៥១ លានដុល្លារអាមេរិក , ចំពោះប្រភេទអង្ករដែលបាននាំចេញរួមមាន៖ អង្ករក្រអូបគ្រប់ប្រភេទ ចំនួន ៧៧ ភាគរយ ប្រភេទអង្ករសគ្រាប់ជាង ២១ ភាគរយ អង្ករចំហ៊ុយ ៣ ភាគរយ អង្ករសរីរាង្គជិត ២ ភាគរយ និងរួមមានអង្ករផ្សេងៗទៀតផងដែរ។ដោយឡែកការនាំចេញស្រូវវិញ, នៅក្នុងរយៈពេល ១០ ខែនេះដែរ កម្ពុជាបាននាំចេញស្រូវទៅកាន់ប្រទេសជិតខាង ជា ប្រភេទស្រូវសើម មានបរិមាណសរុបជាង ៤ លានតោន គិតជាទឹកប្រាក់ប៉ាន់ស្មាន មានចំនួនប្រមាណជាង ១ ១៨៤ លានដុល្លារ អាមេរិក ក្នុងនោះចំនួន ៨៦ ភាគរយ បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច។សូមបញ្ជាក់ថា នៅក្នុងរយៈពេល ១០ ខែ ក្នុងឆ្នាំ ២០២៣ កន្លងមកនេះ បើតាមរបាយការណ៍អគ្គនាយកដ្ឋានកសិកម្ម, កម្ពុជាបាន នាំចេញអង្ករមានបរិមាណសរុបជិត ៥៣០ ពាន់តោន ទៅកាន់ប្រទេសគោលដៅចំនួន ៧១ គិតជាទឹកប្រាក់មានចំនួនជាង ៤៥៨ លានដុល្លារអាមេរិក៕ អត្ថបទ៖ សុន រ៉ាឌី

អង្កររបស់ខ្មែរ បានជាប់ពានរង្វាន់ជាអង្ករល្អដាច់គេលើពិភពលោក ជាថ្មីម្ដងទៀតក្នុងឆ្នាំ២០២៤នេះ នៅទីក្រុងម៉ានីល

ភ្នំពេញ៖ អង្កររបស់ខ្មែរ បានជាប់ពានរង្វាន់ជាអង្ករល្អដាច់គេលើពិភពលោកជាថ្មីម្ដងទៀត ក្នុងឆ្នាំ២០២៤នេះ នៅទីក្រុងម៉ានីល ប្រទេសហ្វីលីពីន។ នេះបើតាមការបញ្ជាក់របស់លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យនៃក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី៧ ខែវិច្ឆិកា ឆ្នាំ២០២៤នេះ។លោកជំទាវបានឱ្យដឹងថា ក្រសួងកសិកម្ម រុក្ខាប្រមាញ់ និងនេសាទ មានក្ដីសោមនស្ស សូមជូនដំណឹងដល់បងប្អូនអ្នកសារព័ត៌មាន និងសាធារណជនជ្រាបថា អង្កររបស់ខ្មែរ បានជាប់ពានរង្វាន់ជាអង្ករល្អដាច់គេលើពិភពលោកជាថ្មីម្ដងទៀត ក្នុងឆ្នាំ២០២៤នេះ នៅទីក្រុងម៉ានីល ប្រទេសហ្វីលីពីន។លោកជំទាវបញ្ជាក់ថា «នេះគឺជាលើកទី៦ហើយ ដែលអង្ករខ្មែរបានទទួលពានរង្វាន់ជាអង្ករល្អដាច់គេលើលោក ដោយលើកទី១ ទទួលបាននៅឆ្នាំ២០១២, លើកទី២ នៅឆ្នាំ ២០១៣, លើកទី៣ នៅឆ្នាំ២០១៤, លើកទី៤ នៅឆ្នាំ២០១៨, លើកទី៥ នៅឆ្នាំ២០២២, និងលើកទី៦ នៅឆ្នាំ២០២៤»។បើតាមលោកជំទាវ អ៊ឹម រចនា ក្រសួងកសិកម្ម រុក្ខាប្រមាញ់ និងនេសាទ លើកទឹកចិត្តដល់បងប្អូនប្រជាកសិករ ងាកមកដាំស្រូវផ្ការំដួល និងសែនក្រអូប ដែលជាពូជរបស់ខ្មែរ ដែលមានរសជាតិឆ្ងាញ់ មានទីផ្សារ និងកិត្តិនាមល្អ ទាំងនៅក្នុងតំបន់ និងពិភពលោក៕

ក្រសួងសេដ្ឋកិច្ចពង្រឹងការប្រមូលចំណូលពន្ធអាករ លើការផ្គត់ផ្គង់មានថែមទំនិញ ឬផ្តល់ជារង្វាន់

ក្រសួងសេដ្ឋកិច្ច និងហិរញ្ញវត្ថុ ពង្រឹងការគ្រប់គ្រងប្រមូលចំណូលពន្ធអាករ ចំពោះការផ្គត់ផ្គង់ទំនិញដោយមានថែមទំនិញ ឬផ្តល់ជា រង្វាន់ទំនិញជាស្តុកសម្រាប់លក់, ការថែមទំនិញ ឬផ្តល់ជារង្វាន់ទំនិញមិនមែនជាស្ដុកសម្រាប់លក់ ឬរង្វាន់ផ្សេងៗក្រៅពីទំនិញជាដើម។ក្រសួងសេដ្ឋកិច្ច និងហិរញ្ញវត្ថុ ចេញសេចក្តីណែនាំ ស្តីពីកាតព្វកិច្ចបង់ពន្ធអាករ ចំពោះការផ្គត់ផ្គង់ទំនិញដោយមានថែមទំទិញ ឬផ្តល់ជារង្វាន់ របស់សហគ្រាសផ្គត់ផ្គង់ទំនិញក្នុងស្រុក ដែលមានថែមទំនិញរបស់សហគ្រាស ឬទំនិញដទៃ ឬផ្តល់ជារង្វាន់តាមរយៈ ក្រវិលកំប៉ុង គម្របដប ឬវិធីផ្សេងទៀតផ្តល់ជូនអតិថិជនរបស់ខ្លួន។ ដើម្បីពង្រឹងការគ្រប់គ្រងប្រមូល ចំណូលពន្ធអាករ ប្រកបដោយប្រសិទ្ធភាព ក្រសួងណែនាំដល់សហគ្រាសផ្គត់ផ្គង់ទំនិញក្នុងស្រុកអំពីកាតព្វកិច្ចបង់ពន្ធអាករ ចំពោះការផ្គត់ផ្គង់ទំនិញដោយមានថែម ទំនិញ ឬផ្តល់ជារង្វាន់ជាដើម។ចំពោះការផ្គត់ផ្គង់ទំនិញដោយមានថែមទំនិញ ឬផ្តល់រង្វាន់នូវទំនិញជាស្តុកសម្រាប់លក់ ត្រូវចាត់ទុកជាការផ្គត់ផ្គង់ជាប់អាករ ដែលសហគ្រាសត្រូវបំពេញកាតព្វកិច្ច ក្នុងនោះសហគ្រាសផលិតក្នុងស្រុកនូវទំនិញជាប់អាករពិសេស និងអាករសម្រាប់បំភ្លឺសាធារណៈ ត្រូវជាប់អាករពិសេស និងអាករសម្រាប់បំភ្លឺសាធារណៈ ចំពោះការថែមទំនិញឬផ្តល់ជារង្វាន់នូវទំនិញផលិតក្នុងស្រុក ជាប់អាករពិសេស ផង និងអាករសម្រាប់បំភ្លឺសាធារណៈផង។ ក្នុងករណីទំនិញផលិតក្នុងស្រុកមិនជាប់អាករសម្រាប់បំភ្លឺសាធារណៈនោះ សហគ្រាសបង់ តែអាករពិសេសប៉ុណ្ណោះ និងត្រូវជាប់អាករសម្រាប់បំភ្លឺសាធារណៈ ក្នុងករណីការថែមទំនិញ ឬផ្តល់ជារង្វាន់នូវទំនិញជាប់អាករសម្រាប់ បំភ្លឺសាធារណៈ ដែលសហគ្រាសបាននាំចូលដោយផ្ទាល់។ ជាប់អាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ដោយ អនុញ្ញាតឱ្យយកមូលដ្ឋានគិតអាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ស្មើនឹងថ្លៃដើមនៃទំនិញជាប់អាករនោះ។ ត្រូវជាប់ពន្ធលើប្រាក់ចំណូល ដោយអនុញ្ញាតឱ្យទទួលស្គាល់ ចំណូលស្មើនឹងចំណាយថ្លៃដើម។ចំពោះសហគ្រាសនាំចូលទំនិញជាប់អាករសម្រាប់បំភ្លឺសាធារណៈ៖ ត្រូវជាប់អាករសម្រាប់បំភ្លឺសាធារណៈ ដោយមូលដ្ឋានគិត អាករ ត្រូវផ្អែកតាមតម្លៃទីផ្សារនៃការផ្គត់ផ្គង់ទំនិញជាប់អាករនោះ, ត្រូវជាប់អាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ដោយអនុញ្ញាតឱ្យយកមូលដ្ឋានគិតអាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ស្មើនឹងថ្លៃដើមនៃការនាំចូលទំនិញជាប់អាករនោះ, ត្រូវជាប់ពន្ធលើប្រាក់ចំណូល ដោយអនុញ្ញាតឱ្យទទួលស្គាល់ចំណូលស្មើនឹងចំណាយថ្លៃដើម។ ចំណែកសហគ្រាសផ្គត់ផ្គង់ ទំនិញដែលមិនជាប់អាករពិសេស និងអាករសម្រាប់បំភ្លឺសាធារណៈ៖ ត្រូវជាប់អាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ដោយអនុញ្ញាតឱ្យយកមូលដ្ឋានគិតអាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ស្មើនឹងថ្លៃដើមនៃទំនិញជាប់អាករនោះ។ដោយឡែកការថែមទំនិញ ឬផ្តល់ជារង្វាន់នូវទំនិញដែលមិនមែនជាស្ដុក សម្រាប់លក់ឬរង្វាន់ផ្សេងៗក្រៅពីទំនិញ, សហគ្រាស ត្រូវអនុវត្តដូចជា៖ មិនត្រូវបានចាត់ទុកជាការផ្គត់ផ្គង់ដែលជាកម្មវត្ថុនៃអាករលើតម្លៃបន្ថែម ប្រាក់រំដោះពន្ធលើប្រាក់ចំណូល និងពន្ធលើ ប្រាក់ចំណូលឡើយ, អាករលើតម្លៃបន្ថែមដែលសហគ្រាសបានបង់ លើការទិញទំនិញយកមកប្រើប្រាស់សម្រាប់ការលក់ដោយមានថែមទំនិញឬផ្តល់ជារង្វាន់, មិនត្រូវបានអនុញ្ញាតជាឥណទានអាករលើធាតុចូលឡើយ ប៉ុន្តែត្រូវបានអនុញ្ញាតជាចំណាយកាត់កងបាន, ចំណែកការអនុញ្ញាតជាចំណាយវិញ, ត្រូវបានអនុញ្ញាតជាចំណាយកាត់កងបាន សម្រាប់គោលដៅពន្ធលើប្រាក់ចំណូល និងត្រូវកត់ត្រា ឱ្យច្បាស់លាស់ក្នុងបញ្ជីគណនេយ្យ ដោយត្រូវមានសក្ខីបត្រគាំទ្រដូចមានចែងក្នុង បទប្បញ្ញត្តិស្តីពីពន្ធលើប្រាក់ចំណូលជាដើម៕ អត្ថបទ៖ សុន រ៉ាឌី

កម្ពុជាកំពុងអភិវឌ្ឍន៍ប្រព័ន្ធ Data Center សម្រាប់គាំទ្រ និងការដោះស្រាយក្នុងអាជីវកម្ម

កម្ពុជាទទួលបានការវិនិយោគលើប្រព័ន្ធគ្រប់គ្រងទិន្នន័យ មានទំហំទឹកប្រាក់ប្រមាណ ១៣៧ លានដុល្លារអាមេរិក, ដែលតាមរយៈនេះ កម្ពុជាសង្ឃឹមថា នឹងជំរុញគាំទ្រ និងបង្កើតការងារថ្មីៗផ្សេងទៀត សម្រាប់ជាដំដោះស្រាយក្នុងអាជីវកម្ម ជាពិសេសការជំរុញអភិវឌ្ឍន៍ ទៅជា មជ្ឈ-មណ្ឌលដ៏ធំមួយនៅអាស៊ីផងដែរ។ឯកឧត្តម ហ៊ាង សុទ្ធាយុត្តិ អគ្គលេខាធិការរងនៃអគ្គលេខាធិការដ្ឋាន ក្រុមប្រឹក្សាអភិវឌ្ឍន៍កម្ពុជា លើកឡើងនៅក្នុងកិច្ចពិភាក្សា លើប្រធានបទ៖ ឆ្ពោះទៅរកសេដ្ឋកិច្ចឌីជីថលនៅកម្ពុជា នេះថា ការវិនិយោគលើហេដ្ឋារចនាសម្ព័ន្ធឌីជីថល នៃការឆ្ពោះទៅរកកំណើន សេដ្ឋកិច្ចប្រកបដោយបរិយាបន្ននៅក្នុងសង្គមនេះ កម្ពុជាបានកំពុងអភិវឌ្ឍន៍ នៃការចាប់យកប្រព័ន្ធឌីជីថលមកអនុវត្តជាបណ្តើរៗ ក្នុង នោះកម្ពុជាមានមជ្ឈមណ្ឌលបណ្តុះធុរកិច្ចថ្មី "តេជោ" បានកំពុងគាំទ្រដល់ការបង្កើតធុរកិច្ច និងប្រព័ន្ធចុះបញ្ជីអាជីវកម្មថ្នាលបច្ចេកវិទ្យា ព័ត៌មាន ក៏កំពុងជំរុញការចុះបញ្ជីពន្ធដារ និងក្រសួងពាណិជ្ជកម្មជាដើម។ ក្រៅពីនេះកម្ពុជាក៏មានក្របខណ្ឌគោលនយោបាយសេដ្ឋកិច្ច និងសង្គមឌីជិថលកម្ពុជាឆ្នាំ ២០២១-២០៣៥ ស្របពេលដែល CDC ក៏មានប្រព័ន្ធគ្រប់គ្រងគម្រោងវិនិយោគកម្ពុជា (cdcIPM) ដែលផ្ដល់លទ្ធភាពជូនដល់វិនិយោគិន អាចស្នើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (QIP) ពីគ្រប់ទីកន្លែង តាមរយៈប្រព័ន្ធអនឡាញជាដើម នេះជាការត្រៀមលក្ខណៈក្នុងការគាំទ្រសេដ្ឋកិច្ចឌីជីថលនៅកម្ពុជា។ឯកឧត្តម បន្តឱ្យដឹងថា នៅក្នុងរយៈពេលថ្មីៗនេះ ក្រុមប្រឹក្សាអភិវឌ្ឍន៍កម្ពុជាបានអនុម័តនូវគម្រោងចំនួនពីរ នៃការវិនិយោគ លើប្រព័ន្ធគ្រប់គ្រងទិន្នន័យ (Data Center) មានទំហំទឹកប្រាក់ប្រមាណជា ១៣៧ លានដុល្លារអាមេរិក ដែលតាមរយៈនេះ នឹងជំរុញ គាំទ្រនិងទាក់ទាញដល់ការវិនិយោគលើវិស័យផ្សេងៗទៀត អាចចូលរួមបង្កើតការងារកាន់តែច្រើន ជាពិសេសតាមរយៈនៃគម្រោងនេះដែរ និងអាចជំរុញឱ្យកម្ពុជាមានមជ្ឈមណ្ឌលដ៏ធំមួយនៅអាស៊ី។ទាក់ទិនសេដ្ឋកិច្ចឌីជីថលនេះដែរ, ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី "តេជោ" បានវាយតម្លៃថា ប្រព័ន្ធ ICT គឺមានសារៈសំខាន់ណាស់ សម្រាប់ឆ្លើយតបទៅនិងសេដ្ឋកិច្ចឌីជីថល ប៉ុន្តែកិច្ចការទាំងនោះត្រូវគាំទ្រ បន្ថែម ទាក់ទងប្រព័ន្ធអ៊ិនធ័រណេត ខ្សែកាបអុបទិច ដើម្បីជំរុញឱ្យមានល្បឿនលឿន ឆ្លើយតបទៅនិងការធ្វើអាជីវកម្មផ្សេងៗដូចជា ការលក់ និងការទិញជាដើម ខណៈកម្ពុជាកំពុងធ្វើដំណើរទៅមុខ ដែលត្រូវការគាំទ្រច្រើន តាមរយៈកិច្ចសហការប្រតិបត្តិការផ្សេងៗ ដូចជាប្រទេសចិនជាដើម ដើម្បីជំរុញអភិវឌ្ឍន៍ឱ្យកាន់តែខ្លាំងក្លា ជាពិសេសការបង្កើតនូវប្រព័ន្ធទិន្នន័យ (Data) សម្រាប់ចែករំលែកពី គ្នាទៅវិញទៅមក ដើម្បីជំរុញការផ្តល់សេវាកម្មឱ្យកាន់តែងាយស្រួល ជាពិសេសសម្រាប់អ្នកធុរកិច្ច។ជុំវិញប្រព័ន្ធឌីជីថលនេះដែរ, លោកស្រី ចេន ហ្វូលីង (Gan Qiuling) លើកឡើងថា ដើម្បីគាំទ្រដល់ប្រព័ន្ធឌីជីថល, បើតាម បទពិសោធន៍នៃប្រទេសចិន ជាដំបូងគឺយើងត្រូវកសាងហេដ្ឋរចនាសម្ព័ន្ធសេដ្ឋកិច្ចឌីជីថល ដើម្បីជាមូលដ្ឋានគ្រឹះសម្រាប់ការអភិវឌ្ឍន៍ វិស័យសេដ្ឋកិច្ច ក្នុងនោះសេដ្ឋកិច្ចឌីជីថល គឺត្រូវឱ្យមានកិច្ចសហប្រតិបត្តិការឱ្យស្អិតរមួតាមមួយភាគីពាក់ព័ន្ធទាំងអស់ ដើម្បីដើរឈាន ទៅមុខរួមគ្នា ។ ដោយសារតែសង្គមឌីជីថល យើងត្រូវបង្កើតវេទិកាអេឡិចត្រូនិច ដើម្បីជួយដល់ប្រជាជនទូទៅបានស្វែងយល់ ហើយ បញ្ហានេះ តើប្រជាជន ឬអ្នកធុរកិច្ចទទួលយកសេដ្ឋកិច្ចឌីជីថលបានរបៀបណាខ្លះ? ដូច្នេះមានតែតាមរយៈវេទិកានេះទេ ដើម្បីឱ្យ ប្រជាជនងាយទទួលយកបាន ដែលជាតំណររុញផលិតផលរបស់គាត់ឱ្យទៅកាន់ទីផ្សារអន្តរជាតិ ។ លោកស្រី បន្តថា បញ្ហានេះ កម្ពុជាត្រូវអូសទាញដល់ក្រុមហ៊ុនដែលមានឧត្តមភាពលើអន្តរជាតិ មកវិនិយោគនៅប្រទេសកម្ពុជា ដើម្បីកម្ពស់ដល់សមត្ថភាពប្រកួត ប្រជែងទាំងនៅក្នុងស្រុក និងទៅកាន់លើឆាកអន្តរជាតិ៕ អត្ថបទ៖ សុន រ៉ាឌី

ខែតុលាកន្លងទៅនេះ កម្ពុជាទទួលបានគម្រោងវិនិយោគចំនួន៣១គម្រោងបន្ថែម មានទុនសរុបជាង ២២៦ លានដុល្លារ

ក្រុមប្រឹក្សាអភិវឌ្ឍន៍កម្ពុជា ក្នុងខែតុលា ឆ្នាំ២០២៤ នេះ បានអនុម័តគម្រោងថ្មីចំនួន៣១ និងគម្រោងពង្រីកផលិតកម្មចំនួន១ មានទុនវិនិយោគសរុបជាង ២២៦ លានដុល្លារអាមេរិក ក្នុងនោះចិនវិនិយោគជាប់លំដាប់លេខរៀងទី១ បានរួមចំណែកជាង ៥៣% ភាគរយ ខណៈការវិនិយោគក្នុងស្រុកគ្របដណ្តប់ជាង ២៩ ភាគរយ នៃទុនវិនិយោគសរុប។ក្រុមប្រឹក្សាអភិវឌ្ឍន៍កម្ពុជា បានបង្ហាញរបាយការណ៍វិនិយោគ នៅក្នុងខែតុលា ឆ្នាំ២០២៤ ក្នុងនោះបានអនុម័តគម្រោងថ្មី ចំនួន៣០ គម្រោង និងគម្រោងពង្រីកផលិតកម្មចំនួន ១ គម្រោង ដែលមានទុនវិនិយោគសរុបប្រមាណជាង ២២៦ ពាន់លានដុល្លារ អាមេរិក ដោយអាចបង្កើតការងារបានប្រមាណ ១៦ ពាន់កន្លែង។ ក្នុងចំណោមគម្រោងវិនិយោគសរុប, គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេស មានចំនួន ២១ គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ច ពិសេសមានចំនួន ១០ គម្រោងផងដែរ។ចំពោះគម្រោងវិនិយោគដែលមានភាពលេចធ្លោជាងគេ ប្រចាំខែតុលានេះ នៅក្រៅតំបន់សេដ្ឋកិច្ចពិសេសរួមមាន៖ គម្រោង វិនិយោគក្នុងវិស័យហេដ្ឋារចនាសម្ព័ន្ធចំនួន ១, គម្រោងបង្កើតរោងចក្រកាត់ដេរសម្លៀកបំពាក់, ស្បែកជើង និងកាបូប, គម្រោងបង្កើត រោងចក្រផលិតសម្ភារៈប្រើប្រាស់ក្នុងផ្ទះ, សម្ភារៈបរិក្ខាសម្រាប់បោះតង់, គ្រឿងសង្ហារឹម, គ្រឿងតុបតែងលម្អ និងមានគម្រោងជាច្រើនផ្សេងៗទៀតផងដែរ។សូមបញ្ជាក់ថា ក្នុងរយៈពេលពេញមួយឆ្នាំនេះ ប្រភពទុនវិនិយោគមកពីប្រទេសចិនឈរនៅលំដាប់លេខរៀងទី ១ ដោយបានរួម ចំណែកជាង ៦០ ភាគរយ នៃទុនវិនិយោគសរុប ខណៈពេលដែលការវិនិយោគក្នុងស្រុកគ្របដណ្តប់ជាង ៣២ ភាគរយ នៃទុន វិនិយោគសរុបផងដែរ៕ អត្ថបទ៖ សុនរ៉ាឌី

ឆ្នាំនេះប្រជាកសិករក្នុងខេត្តកំពង់ឆ្នាំង ប្រមូលផលស្រូវវស្សាបាន ១១ម៉ឺនតោន ខណៈស្រូវកំពុងដុះលូតលាស់ល្អ មិនមានផលរំខានពីជំនន់ទឹកភ្លៀងនោះឡើយ

កំពង់ឆ្នាំង៖ ប្រជាកសិករខេត្តកំពង់ឆ្នាំងក្នុងឆ្នាំ២០២៤នេះ ធ្វើស្រែវស្សាបានលើសផែនការ ខណៈស្រូវវស្សាកំពុងដុះលូតលាស់ល្អប្រសើរ និងមិនមានការរងផលប៉ះពាល់ដោយសារជំនន់ទឹកភ្លៀងនោះឡើយ។ ដោយឡែកការប្រមូលផលស្រូវវស្សា គិតមកដល់ថ្ងៃនេះបានចំនួន២៦៧១៩ហិកតា និងទទួលផលបាន១១៦២១៥តោន។ នេះបើតាមការបញ្ជាក់អោយដឹង ពីលោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង នាថ្ងៃទី០៦ ខែវិច្ឆិកា ឆ្នាំ២០២៤នេះ ។លោក ងិន ហ៊ុន បានថ្លែងឲ្យដឹងទៀតថា៖ នៅឆ្នាំ២០២៤នេះ ប្រជាកសិករខេត្តកំពង់ឆ្នាំង បានប្រមូលផលស្រូវវស្សាលើផ្ទៃដីស្រែចំនួន២៦៧១៩ហិកតា លើផ្ទៃដីស្រែវស្សាសរុបចំនួន១៤០៦០០ហិកតា ។ ក្នុងចំណោមផ្ទៃដីដែលប្រមូលផលជាង២ម៉ឺនហិកតានេះ ផលដែលទទួលបានចំនួន១១៦២១៥តោន។ ដោយឡែកតម្លៃស្រូវក្នុងសប្តាហ៍នេះ គឺស្រូវក្រអូប(ហាលស្ងួត) តម្លៃ១៦៥០រៀល ក្នុង១គីឡូក្រាម, ដែលតម្លៃនេះខ្ពស់ជាងតម្លៃស្រូវឆ្នាំ២០២៣ចំនួន៦០រៀលក្នុង១គីឡូក្រាម, ស្រូវចំរុះស្ងួតមានតម្លៃ១៣០០រៀលក្នុង១គីឡូក្រាម ទាបជាងឆ្នាំ២០២៣ប្រមាណ៨០រៀលក្នុង១គីឡូក្រាម, និងស្រូវOMសើម មានតម្លៃ៩៦០រៀលក្នុង១គីឡូក្រាម ខ្ពស់ជាងឆ្នាំ២០២៣ ប្រមាណ៤០រៀលក្នុង១គីឡូក្រាម។ ក្នុងចំណោមស្រូវវស្សាទាំងនោះ ប្រជាកសិករបានដាំដុះស្រូវស្រាលមានចំនួន២៩ ៤៥០ហិកតា, ស្រូវកណ្តាលមានចំនួន៦៥ ៦៤៤ហិកតា, និងស្រូវធ្ងន់ធ្វើបានចំនួន ៤៥ ៥០៦ ហិកតា ។ លោកបានបន្តថា ដោយសារមានទឹកភ្លៀងគ្រប់គ្រាន់ ស្រូវវស្សាឆ្នាំនេះ កំពុងដុះលូតលាស់ល្អប្រសើរ ក្នុងនោះ រយះពេលប៉ុន្មានថ្ងៃនេះភ្លៀងបានបន្តធ្លាក់ចុះនៅតាមតំបន់ភ្នំ ប៉ុន្តែស្រែវស្សារបស់បងប្អូនប្រជាកសិករ មិនទាន់រងផលប៉ះពាល់ដោយសារជំនន់ទឹកភ្លៀងនៅឡើយទេ។ ក្រៅពីដាំដុះស្រូវវស្សាហើយ ប្រជាកសិករបានខិតខំដាំដុះដំណាំរួមផ្សំផ្សេងៗទៀតផងដែរ និងចិញ្ចឹមសត្វបន្ថែម ដើម្បីបង្កើនផ្គត់ផ្គង់ជីវភាពក្នុងគ្រួសារអោយធូរធារថែមមួយកម្រឹតទៀត ៕ កាំង ហុងវាស្នា

ធនាគារជាតិ និងក្រសួងពាណិជ្ជកម្ម ប្រកាសពីការបើកគណនីធនាគារជាប្រាក់រៀល ជូនអាជីវកម្មទាំងអស់ដែលចុះបញ្ជីស្របច្បាប់នៅកម្ពុជា

ធនាគារជាតិនៃកម្ពុជា និងក្រសួងពាណិជ្ជកម្ម បានចេញសេចក្តីជូនដំណឹងរួមគ្នាចុះថ្ងៃទី១ ខែវិច្ឆិកា ឆ្នាំ២០២៤ ដោយប្រកាសពីការបើកគណនីធនាគារជាប្រាក់រៀល ជូនអាជីវកម្មទាំងអស់ដែលចុះបញ្ជីស្របច្បាប់នៅក្នុងព្រះរាជាណាចក្រកម្ពុជា។ ដើម្បីពង្រឹងការអនុវត្តច្បាប់ ស្តីពីសហគ្រាសពាណិជ្ជកម្ម និងការលើកកម្ពស់ការប្រើប្រាស់ប្រាក់រៀល ក្នុងវិស័យធុរកិច្ច ក៏ដូចជាចូលរួមរក្សាស្ថិរភាពហិរញ្ញវត្ថុ ស្របតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងមុំទី៥ នៃបញ្ចកោណទី៣ របស់យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សូមគ្រឹះស្ថានធនាគារ និងហិរញ្ញវត្ថុទាំងអស់ មេត្តាចូលរួមសហការសម្របសម្រួលក្នុង ការបង្កើតគណនីធនាគារជាប្រាក់រៀល ជូនគ្រប់អាជីវកម្មដែលចុះបញ្ជីស្របច្បាប់នៅក្នុង ព្រះរាជាណាចក្រកម្ពុជា។ការប្រើប្រាស់ប្រាក់រៀល មានសារៈសំខាន់ក្នុងការពង្រឹងប្រសិទ្ធភាព ការអនុវត្តនយោបាយម៉ាក្រូ សេដ្ឋកិច្ចជាតិ ជាពិសេសក្នុងការរក្សាស្ថិរភាពថ្លៃនៅក្នុងទីផ្សារ កាត់បន្ថយចំណាយប្រតិបត្តិការដុល្លារូបនីយកម្ម គាំទ្រការនាំចេញ និងការវិនិយោគ គរពូនទុនបម្រុងអន្តរជាតិ បង្កើនសុខុមាលភាពសង្គម ទទួលចំណូលពីការបោះពុម្ពក្រដាសប្រាក់ ព្រមទាំងពង្រឹង អត្តសញ្ញាណជាតិ និងអធិបតេយ្យជាតិជាដើម៕

ចិនកំពុងជំរុញកសាងប្រព័ន្ធបណ្ដាញទូរស័ព្ទចល័តល្បឿនលឿននៅកម្ពុជា ឱ្យចប់នៅឆ្នាំ២០២៥ ខាងមុខ

ចិនបានកំពុងចូលរួមចំណែក កសាងប្រព័ន្ធបណ្ដាញទូរស័ព្ទចល័តនៅកម្ពុជាយ៉ាងសកម្ម និងគ្រោងបញ្ចប់នៅឆ្នាំ២០២៥ ខាងមុខ ដើម្បីជំរុញឱ្យសម្រេចបានតាមអត្រាគោលដៅ គ្របដណ្ដប់ប្រព័ន្ធអ៊ីនធឺណេតល្បឿនលឿន ដោយក្នុងតំបន់ទីក្រុងឱ្យបាន ១០០% និង តំបន់ជនបទ ៧០% ។ឯកឧត្តម វ៉ង ចិនពីន (Wang Wenbin)ឯកអគ្គរដ្ឋទូត វិសាមញ្ញនិងពេញសមត្ថភាព នៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា លើកឡើងក្នុង «វេទិកាសហប្រតិបត្តិការសេដ្ឋកិច្ចឌីជីថល ចិន-កម្ពុជា ឆ្នាំ ២០២៤» នៅថ្ងៃទី ៤ ខែ វិច្ឆិកា នេះថា, ក្រោមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ប្រជាជនបានយល់ដឹងគ្រប់ជ្រុង អំពីការអភិវឌ្ឍខ្លាំងក្លានៃសេដ្ឋកិច្ចឌីជីថលរបស់ ប្រទេសកម្ពុជា ដើរលើវិថីគ្រប់ច្រកល្ហក, ហេដ្ឋារចនាសម្ព័ន្ធឌីជីថលបានអភិវឌ្ឍឥតឈប់ឈរ និងបានឃើញមាននៅលើអេក្រង់អេឡិច ត្រូនិក និងអេក្រង់ Touch Screen គ្រប់ទីកន្លែង។ ទោះបីនៅផ្សារទំនើបធំៗ ឬក៏ហាងបាយតូចៗ ប្រើប្រាស់ទូរស័ព្ទដៃ ធ្វើការទូទាត់ អេឡិចត្រូនិក បានក្លាយទៅជាទំលាប់ធម្មតា ក្នុងនោះវេទិកាពាណិជ្ជកម្មតាមប្រព័ន្ធអេឡិចត្រូនិកកាន់តែច្រើន បានដាក់ឱ្យដំណើរការ នៅកម្ពុជា ព្រមទាំងដំណើរការអាជីវកម្មប្រកបដោយភាពជោគជ័យ បានផ្ដល់ភាពកាន់តែងាយស្រួលដល់ជីវភាពរស់នៅប្រចាំថ្ងៃរបស់ ប្រជាជនកម្ពុជា។ ឯកឧត្តមឯកអគ្គរដ្ឋទូត លើកឡើងបន្ថែមថា បញ្ហានេះ រាជរដ្ឋាភិបាលកម្ពុជាបានផ្តល់សារៈសំខាន់ លើការបណ្តុះបណ្តាល ធនធានមនុស្សវិស័យឌីជីថល ជំរុញការបង្កើតវិទ្យាស្ថានបច្ចេកវិទ្យាឌីជីថល ដើម្បីបង្កើតលក្ខខណ្ឌកាន់តែល្អប្រសើរ ដល់ការជំរុញការប្រើ ប្រាស់បច្ចេកវិទ្យាឌីជីថល។ ទាក់ទិនបញ្ហានេះដែរ, ឯកឧត្តម វ៉ាង វិនពីន បានថ្លែងនូវការរីករាយ ដែលបានមើលឃើញសេដ្ឋកិច្ចឌីជីថល រវាងចិននិងកម្ពុជា កំពុងទទួលបានការរីកចម្រើនយ៉ាងខ្លាំងក្លា។ ឯកឧត្តម វ៉ាង វិនពីន បានបង្ហាញឱ្យដឹងថា ជុំវិញប្រព័ន្ធបច្ចេកវិទ្យានេះដែរ, ភាគីចិនបានកំពុងចូលរួមចំណែកការកសាងប្រព័ន្ធ បណ្ដាញទូរស័ព្ទចល័តនៅក្នុងប្រទេសកម្ពុជាយ៉ាងសកម្ម ដោយបានកំពុងលើកកម្ពស់ការគ្របដណ្តាប់ប្រព័ន្ធទូទាំងប្រទេសគួរគត់សម្គាល់ ជួយកម្ពុជាឱ្យសម្រេចបានគោលដៅនូវអត្រាគ្របដណ្ដប់ប្រព័ន្ធអ៊ីនធឺណេតល្បឿនលឿន នៅតំបន់ទីក្រុងឱ្យបាន និងជនបទនៅត្រឹមឆ្នាំ ២០២៥ខាងមុខ ។ ទន្ទឹមនឹងនេះ, ក្រុមហ៊ុនចិនដែលវិនិយោគនៅកម្ពុជា បានកំពុងបញ្ចេញអស់សមត្ថភាពរបស់ខ្លួន ដែលមានឧត្តមភាព ខាងបច្ចេកវិទ្យា ជំរុញដាក់ឱ្យអនុវត្ត និងប្រើប្រាស់បច្ចេកវិទ្យាបញ្ញាសិប្បនិម្មិត (AI) បច្ចេកវិទ្យាក្លោង (Cloud Technology) និងការ ទូទាត់ប្រាក់ចល័តជាដើម ដែលជាបច្ចេកវិទ្យាបែបថ្មី នៅគ្រប់មុខរបរ និងគ្រប់វិស័យនៅកម្ពុជា ជួយប្រទេសកម្ពុជាក្នុងការលើកកម្ពស់ កម្រិតបច្ចេកវិទ្យាឌីជីថល និងសម្រេចបានបរិវត្តកម្មឌីជីថល (Digital Transformation) ជាបន្តបន្ទាប់។ជុំវិញបញ្ហានេះដែរ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្តី, រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើក ឡើងផងដែរថា ក្នុងរយៈពេលប៉ុន្មានឆ្នាំចុងក្រោយនេះ, បច្ចេកវិទ្យាឌីជីថល មានការរីកចម្រើនយ៉ាងរហ័ស និង បានក្លាយជាចន្ទល់មួយថ្មី បន្ថែមទៀត សម្រាប់គាំទ្រកំណើន និងធានាដល់ភាពធន់នៃសេដ្ឋកិច្ច ។ បច្ចេកវិទ្យាឌីជីថលទាំងនេះ បានជំរុញនវានុវត្តន៍ថ្មីៗ ដែលចូលរួម ចំណែកបង្កើតតម្លៃបន្ថែម, បង្កើនផលិតភាព និងប្រសិទ្ធភាពការងារ, ព្រមទាំងបានក្លាយជាកត្តាជំរុញការតភ្ជាប់ពាណិជ្ជកម្ម ជាមួយ សេដ្ឋកិច្ចសកលផងដែរ ។ សម្រាប់កម្ពុជា, ការអភិវឌ្ឍសេដ្ឋកិច្ចឌីជីថល ត្រូវបានចាត់ទុកជាចលករដ៏សំខាន់មួយ ក្នុងដំណើរការអភិវឌ្ឍ សេដ្ឋកិច្ច ក្នុងនោះរាជរដ្ឋាភិបាល នីតិកាលទី ៦ នៃរដ្ឋសភា, ក្រោមការដឹកនាំប្រកបដោយគតិបណ្ឌិត និងភាពប្រាកដនិយមរបស់សម្តេច អគ្គមហាសេនាបតីតេជោ ហ៊ុន សែន, អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា, បានប្រកាសដាក់ឱ្យអនុវត្ត នូវ «ក្របខណ្ឌ គោលនយោបាយសេដ្ឋកិច្ច និង ង្គមឌីជីថលកម្ពុជា ២០២១-២០៣៥» និង «គោលនយោបាយរដ្ឋាភិបាលឌីជីថល ២០២២-២០៣៥», ដែលជាឯកសារគោលនយោបាយរយៈពេលវែង សម្រាប់ធ្វើជាត្រីវិស័យ ក្នុងការរៀបចំបរិវត្តកម្មឌីជីថលរបស់កម្ពុជា៕ អត្ថបទ៖ សុន រ៉ាឌី

សហគ្រិនកម្ពុជាចាត់ទុកការពង្រីកចំណេះជំនាញ ជាមូលដ្ឋានគ្រឹះឈានទៅអភិវឌ្ឍន៍អាជីវកម្មឱ្យរីកចម្រើន

សហគ្រិនកម្ពុជា ចាត់ទុកការពង្រីកចំណេះដឹង ជំនាញ និងការទទួលនូវបទពិសោធន៍ផ្សេងៗ គឺជាមូលដ្ឋានគ្រឹះដ៏សំខាន់ សម្រាប់ ការគ្រប់គ្រង និងការរៀបចំផែនការសកម្មភាពអាជីវកម្ម ដើម្បីឈានទៅអភិវឌ្ឍន៍ខ្សែច្រវាក់ផលិតកម្មឱ្យកាន់តែរីកចម្រើន។សហគ្រិនកម្ពុជាជាច្រើនរូប លើកឡើងនៅក្នុងជំនួបអាជីវកម្ម និងការផ្គូផ្គងពាណិជ្ជកម្ម ក្រោមប្រធានបទ (ផ្នត់គំនិត និង ការអភិវឌ្ឍន៍ជាយុទ្ធសាស្រ្តជួយដល់សហគ្រិនកម្ពុជា) ដែលរៀបចំដោយសមាគមសហគ្រិនវីម៉ូកម្ពុជា នៅចុងសប្តាហ៍កន្លងមកថា ជុំវិញការអភិវឌ្ឍន៍ និងការងារនេះ, រាជរដ្ឋាភិបាលបានផ្តោតការយកចិត្តទុកដាក់យ៉ាងខ្លាំង លើកការអភិវឌ្ឍន៍ទីផ្សារការងារ, ការលើក ស្ទួយសហគ្រាសធុនមីក្រូ តូច និងមធ្យម, ធុរកិច្ចបង្កើតថ្មី, សហគ្រិនភាពថ្មី, ការពង្រីកភាពប្រកួតប្រជែង និងការពង្រឹងប្រព័ន្ធធនាគារ និងវិស័យហិរញ្ញវត្ថុមិនមែនធនាគារជាដើម។សហគ្រិនទាំងនេះបានលើកឡើងបន្ថែមថា ស្របពេលសកម្មភាពរាជរដ្ឋាភិបាលកំពុងអនុវត្តនេះ បច្ចុប្បន្នយើងឃើញថា វិស័យឯកជនបានក៏បាននិងកំពុងយកចិត្តទុកដាក់យ៉ាងខ្លាំងផងដែរ តាមរយៈការពង្រឹងចំណេះ ជំនាញ ការផ្លាស់ប្តូរនូវបទពិសោធន៍ ផ្សេងៗ ជាពិសេសការផ្គូផ្គងស្វែងរកដៃគូពាណិជ្ជកម្ម ដែលជាគោលដៅដ៏សំខាន់នៃការជំរុញដល់ខ្សែច្រវាក់ផលិតកម្ម, និងការស្រូប យកវត្ថុធាតុដើមសម្រាប់ផ្គត់ផ្គង់ ដែលនេះជាការរួមចំណែកលើកកម្ពស់ផលិតភាពជាប្រព័ន្ធ។ទាក់ទិនសហគ្រិននេះដែរ, លោក សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងថា ជុំវិញភាពជាសហគ្រិននេះ សមាគមមានចក្ខុវិស័យវែងឆ្ងាយ ក្នុងការត្រួសត្រាយផ្លូវជូនដល់ពួកគាត់ តាមរយៈការបណ្តុះបណ្តាល ការផ្គូផ្គងដៃគូពាណិជ្ជកម្ម និង ការលើកទឹកចិត្តឱ្យពួកគាត់ចុះបញ្ជីអាជីវកម្មជាដើម ដើម្បីឱ្យទៅជាហគ្រាសដែលមានស្តង់ដារ ក្នុងគោលដៅឈានទៅប្រកួតប្រជែង ផលិតផលលើទីផ្សារប្រកបដោយបរិយាបន្ន។ សូមបញ្ជាក់ថា ទាក់ទិននិងសេដ្ឋកិច្ចនេះ, រាជរដ្ឋាភិបាលបានកំពុងជំរុញធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែងដោយ ផ្តោតលើការអភិវឌ្ឍវិស័យគន្លឹះ និងប្រភពថ្មីនៃកំណើនសេដ្ឋកិច្ច ការកែលម្អបរិយាកាស ធុរកិច្ច និងការវិនិយោគ ការពង្រឹងប្រសិទ្ធភាព និងភាពទាក់ទាញនៃតំបន់សេដ្ឋកិច្ច ពិសេសរួមបញ្ចូលទាំងសួនឧស្សាហកម្ម សួនកសិឧស្សាហកម្ម និងតំបន់ពាណិជ្ជកម្មសេរីក្នុងស្រុក និងការធ្វើនវានុវត្តន៍យន្តការហិរញ្ញប្បទាន និងផលិតហិរញ្ញវត្ថុ សម្រាប់គាំទ្រដល់ការវិនិយោគជាដើម ដែលប្រការទាំងនេះ គឺជាមូល ដ្ឋានគ្រឹះគាំទ្រដល់ដំណើរសេដ្ឋកិច្ច និងភាពរីកលូតលាស់នៃវិស័យឯកជន៕ អត្ថបទ៖ សុន រ៉ាឌី

ADB ផ្តល់ជំនួយឥតសំណង ១០លានដុល្លារ ដើម្បីឆ្លើយតបនឹង អំពើហិង្សាដែលទាក់ទងនឹងយេនឌ័រនៅកម្ពុជា

ធនាគារអភិវឌ្ឍន៍អាស៊ី (ADB) បានអនុម័តហិរញ្ញប្បទានឥតសំណងចំនួន ១០ លានដុល្លារ ដើម្បីគាំទ្រការឆ្លើយតបនឹងអំពើហិង្សាដែល ទាក់ទងនឹងយេនឌ័រ (GBV) នៅកម្ពុជា ក្នុងគោលបំណងជួយកម្ពុជាសម្រេចគោលដៅជា ប្រទេសគ្មាន អំពើហិង្សាដែលទាក់ទងនឹងយេនឌ័រ នៅឆ្នាំ២០៣០។គម្រោងពង្រឹងប្រព័ន្ធសម្រាប់ប្រទេសដើម្បីការបង្ការ និងឆ្លើយតបនឹងអំពើហិង្សាដែលទាក់ទងនឹង យេនឌ័រ ជាគំនិតផ្តួចផ្តើមដោយឡែកដំបូងរបស់មូលនិធិអភិវឌ្ឍន៍អាស៊ី (ADF) ដែលផ្តោតជាពិសេសលើសមភាពយេនឌ័រក្នុងតំបន់អាស៊ីអាគ្នេយ៍ ហើយបង្កើតទំនាក់ទំនងច្បាស់លាស់រវាងប្រព័ន្ធអភិបាលកិច្ចការគ្រប់គ្រងហិរញ្ញវត្ថុសាធារណៈ ព្រមទាំងគុណភាព និងលទ្ធភាពទទួលបានសេវាកម្ម ឆ្លើយតបនឹង GBV ។គម្រោងនេះនឹង ពង្រឹងក្របខណ្ឌច្បាប់និងស្ថាប័នតាមរយៈការធ្វើបច្ចុប្បន្នភាពច្បាប់របស់កម្ពុជាស្តីពីអំពើហិង្សាក្នុងគ្រួសារ ធ្វើអោយប្រសើរឡើងនូវការផ្តល់សេវានៅថ្នាក់មូលដ្ឋានដោយពង្រឹងគុណភាព និងលទ្ធភាពទទួលបានសេវាឆ្លើយតបនឹងចាត់ចែងជម្រកសុវត្ថិភាពសម្រាប់ជនរងគ្រោះ ជាពិសេសនៅតំបន់ជនបទ និង ជំរុញការប្រើប្រាស់ដំណោះស្រាយឌីជីថលនៅក្នុងកម្មវិធីមានមូលដ្ឋាននៅសាលារៀន និងនៅសហគមន៍សម្រាប់មនុស្សវ័យជំទង់ ដើម្បីពង្រឹងសេវាការពារ។ វានឹងលើកកម្ពស់ដំណោះស្រាយឌីជីថលសម្រាប់ការទទួលបានព័ត៌មាន ការអប់រំ និងធនធានទំនាក់ទំនង ២៤/៧ (២៤ម៉ោងក្នុង១ថ្ងៃ និង៧ថ្ងៃក្នុង១សប្តាហ៍) អំពី GBV ដែលជាកិច្ចខិតខំប្រឹងប្រែង ដើម្បីភ្ជាប់កិច្ចការពារ និងការឆ្លើយតបជាបន្តសំដៅទទួលបានផលជះវិជ្ជមានជាអតិបរមា។លោកស្រី Jyotsana Varma នាយិកា ធនាគារអភិវឌ្ឍន៍អាស៊ីប្រចាំកម្ពុជា មានប្រសាសន៍ថា «គម្រោងដ៏សំខាន់នេះ នឹងពង្រឹងយន្តការឆ្លើយតបជាប្រព័ន្ធ ពង្រីកលទ្ធភាពទទួលបានជម្រកសុវត្ថិភាព និងធានាថាជនរងគ្រោះទទួលបានការថែទាំដែលពួកគាត់ត្រូវការ។ គម្រោងក៏នឹងលើកកម្ពស់កម្មវិធីការ ពារមានមូលដ្ឋាននៅសហគមន៍ដែលផ្តល់សិទ្ធិអំណាចដល់សហគមន៍មូលដ្ឋាន ដើម្បីដើរតួនាទីសំខាន់ក្នុងការបង្កើនការយល់ដឹង និងបញ្ឈប់អំពើហិង្សា មុនពេលវាកើតឡើង។ ADB បន្តប្តេជ្ញាគាំទ្រកម្ពុជាក្នុង ការកសាងសង្គមដែលមានសុវត្ថិភាព និងបរិយាបន្នកាន់តែច្រើនសម្រាប់ទាំងអស់គ្នា។»ចំនួនករណី GBV នៅតែបន្តមានច្រើន ទោះបីជាប្រទេសកម្ពុជាបានបោះជំហានយ៉ាងសំខាន់ក្នុង ការប្រយុទ្ធប្រឆាំងនឹង GBV ដែលក្នុងនោះរាជរដ្ឋាភិបាល និងអង្គការសង្គមស៊ីវិលបានធ្វើការសាកល្បង វិធីសាស្ត្របង្ការប្រកបដោយជោគជ័យក៏ដោយ។ ចាប់តាំងពីឆ្នាំ ២០១៤ កម្រិតអត្រាករណីអំពើហឹង្សាបង្ក ដោយដៃគូស្និទ្ធស្នាលបានថយចុះ ៨ ពិន្ទុភាគរយ មក ២១% សម្រាប់ចំនួនស្ត្រី (អាយុ ១៥ ដល់ ៤៩ ឆ្នាំ) ដែលទទួលរងអំពើហិង្សាយ៉ាងហោចណាស់ម្តងក្នុងជីវិតពួកគាត់ នេះបើយោងតាមអង្គការសុខភាពពិភព លោក។ ទោះបីកម្រិតនេះប្រសើរជាងកម្រិតមធ្យមភាគពិភពលោក និងអាស៊ីអាគ្នេយ៍ដែលមាន ៣០% កម្ពុជា នៅតែប្រឈមមុខនឹងឧបសគ្គ ដោយសារការឆ្លើយតបមិនទាន់រលូន បណ្តាលមកពី ភ្នាក់ងារ សាធារណៈច្រើន និងសេវាថែទាំដែលផ្តោតលើជនរងគ្រោះ នៅមានកម្រិត។ដោយផ្អែកលើមេរៀនពីគម្រោង GBV មុនៗនៅអាស៊ី គំនិតផ្តួចផ្តើមនេះលើកកម្ពស់ វិធីសាស្ត្រ ដែលមានការចូលរួមសកម្មពីគ្រប់ភ្នាក់ងាររដ្ឋាភិបាលដោយរួមបញ្ចូលសមភាពយេនឌ័រ និងការយកចិត្តទុក ដាក់លើ GBV ពីក្រសួងសំខាន់ៗ រួមមានក្រសួងកិច្ចការស្ត្រី ក្រសួងមហាផ្ទៃ និង ក្រសួងសេដ្ឋកិច្ចនិង ហិរញ្ញវត្ថុ ដើម្បីធានាបាននូវការឆ្លើយតបប្រកបដោយកិច្ចសហការ។គម្រោង១០ លានដុល្លារនេះ ត្រូវបានផ្តល់ហិរញ្ញប្បទានជាជំនួយឥតសំណងពីមូលនិធិអភិវឌ្ឍន៍ អាស៊ី ដែលគាំទ្រដល់ប្រទេសសមាជិកកំពុងអភិវឌ្ឍ របស់ ADB ដែលត្រូវការជំនួយគាំទ្រនេះបំផុត។ធនាគារអភិវឌ្ឍន៍អាស៊ី ប្តេជ្ញាថានឹងសម្រេចឱ្យបាននូវ វិបុលភាព បរិយាបន្ន ភាពធន់ និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង។ បង្កើតឡើងនៅឆ្នាំ១៩៦៦ ធនាគារនេះគ្រប់គ្រងដោយសមាជិកចំនួន ៦៩ ប្រទេស ដែល ក្នុងនោះមាន ៤៩ ប្រទេស មកពីតំបន់អាស៊ីនិងប៉ាស៊ីហ្វិក៕

បណ្ដាញសង្គម

ព័ត៌មានថ្មីៗ

ភូមិប៊ុនរ៉ានីសែនជ័យដំណាក់ទ្រយឹងខេត្តពោធិ៍សាត់កំពុងប្រែមុខមាត់ថ្មីហើយ

ក្រុមប្រឹក្សារដ្ឋាភិបាលជប៉ុន៖ លទ្ធភាពអាចកើតមាន «គ្រោះរញ្ជួយដីធំខ្លាំង» ខ្ពស់ដល់ ៨២%

គម្រោងប្រព័ន្ធធារាសាស្រ្ត និងកាត់បន្ថយទឹកជំនន់ក្នុងខេត្តបន្ទាយមានជ័យសម្រេចបានប្រមាណ៦៤%

អាមេរិក ចោទអតីតប្រធានពន្ធនាគារស៊ីរី ពីបទក្លែងបន្លំឯកសារអន្តោប្រវេសន៍

នាយករដ្ឋមន្ត្រីប៉ាឡេស្ទីន៖ ពិភពលោក ត្រូវតែរក្សាសម្ពាធលើអ៊ីស្រាអែល បន្ទាប់ពីបទឈប់បាញ់ នៅតំបន់ហ្កាហ្សា

នាយករដ្ឋមន្ត្រីអង់គ្លេស បង្ហាញវត្តមាននៅអ៊ុយក្រែន ដើម្បីកម្ពស់ការគាំទ្រការពារជាតិ និងវប្បធម៌

រដ្ឋមន្ត្រីការបរទេសអេស្ប៉ាញ ប្រកាសផ្តល់ជំនួយចំនួន ១០លានអឺរ៉ូ ដល់កងទ័ពលីបង់

គ.វ.រ. បើកកិច្ចប្រជុំលើកទី ៣ដើម្បីតាមដាន ពិនិត្យ និងធ្វើវឌ្ឍនភាពការងារកែទម្រង់រដ្ឋបាលសាធារណៈ

សមាជិកសភាជាន់ខ្ពស់ស្លូវ៉ាគី៖ លោក Zelensky កំពុងធ្វើបាបបណ្តាប្រទេស នៅអឺរ៉ុបខាងកើត

ចំនួនអ្នកស្លាប់ដោយសារការវាយប្រហាររបស់អ៊ីស្រាអែលលើហ្កាហ្សា កើនឡើងលើស ៤៦.៧០០នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

រយៈពេល១០ខែ កម្ពុជានាំចេញអង្ករមានទំហំទឹកប្រាក់ជាង ៣៧៦ លានដុល្លារអាមេរិក

ក្រសួងសេដ្ឋកិច្ចពង្រឹងការប្រមូលចំណូលពន្ធអាករ លើការផ្គត់ផ្គង់មានថែមទំនិញ ឬផ្តល់ជារង្វាន់

កម្ពុជាកំពុងអភិវឌ្ឍន៍ប្រព័ន្ធ Data Center សម្រាប់គាំទ្រ និងការដោះស្រាយក្នុងអាជីវកម្ម

ខែតុលាកន្លងទៅនេះ កម្ពុជាទទួលបានគម្រោងវិនិយោគចំនួន៣១គម្រោងបន្ថែម មានទុនសរុបជាង ២២៦ លានដុល្លារ

ចិនកំពុងជំរុញកសាងប្រព័ន្ធបណ្ដាញទូរស័ព្ទចល័តល្បឿនលឿននៅកម្ពុជា ឱ្យចប់នៅឆ្នាំ២០២៥ ខាងមុខ

សហគ្រិនកម្ពុជាចាត់ទុកការពង្រីកចំណេះជំនាញ ជាមូលដ្ឋានគ្រឹះឈានទៅអភិវឌ្ឍន៍អាជីវកម្មឱ្យរីកចម្រើន

ADB ផ្តល់ជំនួយឥតសំណង ១០លានដុល្លារ ដើម្បីឆ្លើយតបនឹង អំពើហិង្សាដែលទាក់ទងនឹងយេនឌ័រនៅកម្ពុជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សេដ្ឋកិច្ច និង កសិកម្ម

រយៈពេល១០ខែ កម្ពុជានាំចេញអង្ករមានទំហំទឹកប្រាក់ជាង ៣៧៦ លានដុល្លារអាមេរិក

ក្រសួងសេដ្ឋកិច្ចពង្រឹងការប្រមូលចំណូលពន្ធអាករ លើការផ្គត់ផ្គង់មានថែមទំនិញ ឬផ្តល់ជារង្វាន់

កម្ពុជាកំពុងអភិវឌ្ឍន៍ប្រព័ន្ធ Data Center សម្រាប់គាំទ្រ និងការដោះស្រាយក្នុងអាជីវកម្ម

ខែតុលាកន្លងទៅនេះ កម្ពុជាទទួលបានគម្រោងវិនិយោគចំនួន៣១គម្រោងបន្ថែម មានទុនសរុបជាង ២២៦ លានដុល្លារ

ចិនកំពុងជំរុញកសាងប្រព័ន្ធបណ្ដាញទូរស័ព្ទចល័តល្បឿនលឿននៅកម្ពុជា ឱ្យចប់នៅឆ្នាំ២០២៥ ខាងមុខ

សហគ្រិនកម្ពុជាចាត់ទុកការពង្រីកចំណេះជំនាញ ជាមូលដ្ឋានគ្រឹះឈានទៅអភិវឌ្ឍន៍​អាជីវកម្មឱ្យរីកចម្រើន

ADB ផ្តល់ជំនួយឥតសំណង ១០លានដុល្លារ ដើម្បីឆ្លើយតបនឹង អំពើហិង្សាដែលទាក់ទង​នឹងយេនឌ័រនៅកម្ពុជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សហគ្រិនកម្ពុជាចាត់ទុកការពង្រីកចំណេះជំនាញ ជាមូលដ្ឋានគ្រឹះឈានទៅអភិវឌ្ឍន៍អាជីវកម្មឱ្យរីកចម្រើន

ADB ផ្តល់ជំនួយឥតសំណង ១០លានដុល្លារ ដើម្បីឆ្លើយតបនឹង អំពើហិង្សាដែលទាក់ទងនឹងយេនឌ័រនៅកម្ពុជា