នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រាជរដ្ឋាភិបាលបន្តយកចិត្តទុកដាក់ជួយសង្គ្រោះប្រជាពលរដ្ឋរងគ្រោះដោយទឹកជំនន់
អ្នកជំនាញសេដ្ឋកិច្ច៖ វេទិកាពាណិជ្ជកម្មស្វាយចន្ទី និងម្រេច នឹង​ជួយ​បើក​ទីផ្សារ​ពីរ​ច្រក​សម្រាប់​កសិករ
ក្រុមអាជីវករ៖ ការគាំទ្រផលិតផលក្នុងស្រុក គឺ​ជា​កម្លាំង​ចលករ​រុញ​ច្រាន​សេដ្ឋកិច្ច​ជាតិ​ឱ្យ​កាន់​តែ​រឹងមាំ
កម្ពុជា-អាល្លឺម៉ង់ ប្តេជ្ញាពង្រឹងកិច្ចសហប្រតិបត្តិការកសិកម្ម ឆ្ពោះទៅខួបទំនាក់ទំនងការទូត លើកទី៦០

សេដ្ឋកិច្ច និង កសិកម្ម

កម្ពុជាទាក់ទាញការវិនិយោគប្រកបដោយគុណភាព ដើម្បីជំរុញសេដ្ឋកិច្ចឲ្យខ្លាំងក្លា

2023/03/03 06:14:43 pm        385
Facebook Telegram Linkin
ភ្នំពេញ៖ មន្រ្តីជាន់ខ្ពស់ក្រសួងសេដ្ឋកិច្ច លើកឡើងថា កម្ពុជាមានភាពចាំបាច់ ត្រូវការទាក់ទាញការវិនិយោគប្រកបដោយគុណភាព ដើម្បីបង្កើនជំនាញ, បង្កើនការងារដែលមាន ប្រាក់ឈ្នូលសមរម្យ, ស្តងដារការងារល្អ, មានតម្លៃបន្ថែមខ្ពស់ ​និងជំរុញការធ្វើពិពិធកម្មក្នុងសេដ្ឋកិច្ច ក៏ដូចជាការវិនិយោគបៃតង ​ដើម្បីជំរុញការងើបឡើងវិញនៃសេដ្ឋកិច្ចឱ្យកាន់តែខ្លាំងក្លា។ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងសេដ្ឋកិច្ច និង​ហិរញ្ញវត្ថុលើកឡើង នៅក្នុងជំនួបពិភាក្សាការងារ ជាមួយលោក Sebastian Eckardt មន្រ្តីជាន់ខ្ពស់ WB ទទួលបន្ទុកកិច្ចការម៉ាក្រូសេដ្ឋកិច្ច, ពាណិជ្ជកម្ម និងវិនិយោគ ប្រចាំតំបន់អាស៊ីខាងកើត និងប៉ាស៊ីហ្វិក​ និងលោកស្រី Maryam Salim នាយិកាគ្រប់គ្រងWB ប្រចាំកម្ពុជា នៅថ្ងៃទី២ ខែកុម្ភៈ ថា កំណើន សេដ្ឋកិច្ចកម្ពុជាឆ្នាំ ២០២៣ ត្រូវបានព្យាការថា អាចនឹងសម្រេចបានក្នុងអត្រាខ្ពស់​ជាងរំពឹងទុកកាលពីពេលកន្លងទៅ ក្នុងអត្រា ៥,៦% ហើយការព្យាករណ៍នេះ ក៏មានកម្រិតប្រហាក់ប្រហែលទៅនឹងការវាយតម្លៃចុងក្រោយរបស់ដៃគូអភិវឌ្ឍន៍នានាផងដែរ។កំណើននេះ ដោយសារការនាំចេញផលិតផលកម្មន្តសាលមិនមែនកាត់ដេរ និងកសិកម្ម ត្រូវបាន​រំពឹងថា នឹងបន្តមានកំណើន ល្អ ដែលឆ្លុះបញ្ចាំងពីសក្តានុពលខ្ពស់ ​ជាពិសេសតម្រូវការពីទីផ្សារចិន ដែលទើបតែបានបើកប្រទេសឡើងវិញ និងអាចបំពេញបន្ថែមការនាំ ចេញផលិតផលកាត់ដេរ ដែលមាននិន្នាការថមថយ។ ឯកឧត្តម បានបន្តថា ជាទស្សនវិស័យ សម្រាប់រយៈពេលមធ្យម និងវែងខាងមុខ, កម្ពុជាមានភាព​ចាំបាច់ក្នុងការទាក់ ទាញ នូវការវិនិយោគប្រកបដោយគុណភាព ដើម្បីបង្កើនជំនាញ, បង្កើនការងារ​ដែលមានប្រាក់ឈ្នូលសមរម្យ, ស្តងដារការងារល្អ, មានតម្លៃបន្ថែមខ្ពស់ និងជំរុញការធ្វើពិពិធកម្ម​ក្នុងសេដ្ឋកិច្ច ។ កន្លងមក កម្ពុជាបានធ្វើកិច្ចការនេះជាច្រើនរួចមកហើយ ដូចជាការអនុវត្តច្បាប់វិនិយោគថ្មីជាដើម។ ទន្ទឹមនេះ ការដកកម្ពុជាចេញពីបញ្ជីប្រផេះ នៃក្រុមប្រទេសដែលមានហានិភ័យខាង លាងលុយ​កខ្វក់ ដោយអង្គការឃ្លាំមើលការលាងលុយ និងឧក្រិដ្ឋកម្មហិរញ្ញវត្ថុអន្តរជាតិ (FATF) ក៏នឹងជួយ​ទាក់ទាញការវិនិយោគ ពីក្រៅប្រទេសបន្ថែមទៀតផងដែរ ហើយកម្ពុជានៅមានលំហរច្រើន​នៅ​ឡើយ ដើម្បីជំរុញការអនុវត្តសកម្មភាព ឱ្យបានល្អជាងនេះ ដើម្បីអាចទាក់ទាញការវិនិយោគពីក្រៅ ដែលមានគុណភាពឱ្យបានច្រើន ពិសេសនៅក្នុងការបរិការណ៍ការផ្លាស់ប្តូទីតាំងវិនិយោគ ក្នុងតំបន់៕អត្ថបទ៖ សុន រ៉ាឌី

ឯកឧត្តម ហ៊ុន ម៉ាណែត លើកទឹកចិត្តដល់ក្រុមហ៊ុនអាមេរិកបន្តវិនិយោគនិងធ្វើធុរកិច្ចនៅកម្ពុជា

2023/03/02 04:41:56 pm        456
Facebook Telegram Linkin
ភ្នំពេញ៖ ឯកឧត្តម ហ៊ុន ម៉ាណែត លើកទឹកចិត្តដល់ក្រុមហ៊ុនអាមេរិកទាំងអស់ឱ្យបន្តវិនិយោគនិងធ្វើធុរកិច្ចនៅកម្ពុជា ខណៈដែលកម្ពុជាជាប្រទេសកំពុងអភិវឌ្ឍន៍ក្នុងល្បឿនយ៉ាងលឿនស្ទើរគ្រប់វិស័យ។ ឯកឧត្តម ហ៊ុន ម៉ាណែត បានថ្លែងបែបនេះក្នុងឱកាសអនុញ្ញាតឱ្យគណៈប្រតិភូ ក្រុមប្រឹក្សាធុរកិច្ចអាមេរិកអាស៊ាន ដឹកនាំដោយឯកឧត្តម Michael Malacka ឯកអគ្គរដ្ឋទូតអាមេរិក និងជាអនុប្រធាន និងនាយកប្រតិបត្តិប្រចាំតំបន់ក្រុមប្រឹក្សាធុរកិច្ចអាមេរិកអាស៊ាន ចូលជួបពិភាក្សាការងារធុរកិច្ច និងវិនិយោគនៅសណ្ឋាគារ Hyatt Regency រាជធានីភ្នំពេញនៅដើមសប្តាហ៍នេះ។ឯកឧត្តម ហ៊ុន ម៉ាណែត បានស្វាគមន៍យ៉ាងកក់ក្តៅដល់គណៈប្រតិភូក្រុមប្រឹក្សា​ធុរកិច្ចអាមេរិក​អាស៊ាន ដែលបានដឹកនាំក្រុមការងារ ដែលជាក្រុមហ៊ុនរបស់សហរដ្ឋអាមេរិកមកទស្សនកិច្ច​ជារៀងរាល់ឆ្នាំនៅកម្ពុជា ដើម្បីផ្តល់ដំណោះស្រាយធុរកិច្ច និងបង្កើនឱកាសវិនិយោគពីអាមេរិក​មកកម្ពុជា។ឯកឧត្តមបានលើកទឹកចិត្តបន្ថែមទៀតដល់ក្រុមហ៊ុនអាមេរិកទាំងអស់ឱយបន្តវិនិយោគនិងធ្វើធុរកិច្ចនៅកម្ពុជា ដែលជាប្រទេសកំពុងអភិវឌ្ឍន៍ក្នុងល្បឿនយ៉ាងលឿនស្ទើរគ្រប់វិស័យ។ឯកឧត្តមឯកអគ្គរដ្ឋទូត Michael Malacka អនុប្រធាន និងនាយកប្រតិបត្តិប្រចាំតំបន់ របស់ក្រុមប្រឹក្សា​ធុរកិច្ចអាមេរិក-អាស៊ាន បានថ្លែងអំណរគុណចំពោះឯកឧត្តម ហ៊ុន ម៉ាណែត ដែលបានផ្តល់ឱកាស​លើកដំបូងបំផុតដល់គណៈប្រតិភូក្រុមប្រឹក្សាធុរកិច្ចបានជួបសំដែងការគួរសម និងពិភាក្សាការងារ​បន្ទាប់ពីឯកឧត្តមត្រូវបានគណៈកម្មាធិការកណ្តាល នៃគណបក្សប្រជាជនកម្ពុជាផ្តល់សេចក្តីទុក​ចិត្តជ្រើសតាំងជាបេក្ខភាពនាយករដ្ឋមន្ត្រីបន្តវេននាពេលអនាគត។ ឯកឧត្តមបានអបអរសាទរកម្ពុជា ដែលបានទទួលជោគជ័យយ៉ាងធំធេងជាប្រវត្តិសាស្ត្រ ក្នុងការរៀបចំកិច្ចប្រជុំកំពូលអាស៊ាន កិច្ចប្រជុំកំពូលអាស៊ាន-អាមេរិក និងកិច្ចប្រជុំពាក់ព័ន្ធ​ផ្សេងៗទៀតកាលពីឆ្នាំ២០២២ កន្លងទៅ ដែលនេះបាននាំកិច្ចទំនាក់ទំនង​អាមេរិក-កម្ពុជា ឱ្យកាន់តែជិតស្និទ្ធទ្វេឡើងថែមទៀត។ ឯកឧត្តមឯកអគ្គរដ្ឋទូត បានឱ្យដឹងថា ក្រុមប្រឹក្សាធុរកិច្ចអាមេរិក-អាស៊ានមានអាយុកាលជាង ៣៧ ឆ្នាំ និងមានសមាជិកដែលជាក្រុមហ៊ុនយក្សអាមេរិកជាង ១៨០ ក្រុមហ៊ុន បានទទួលការសម្រប​សម្រួល និងជួយជ្រោមជ្រែងដល់ការធ្វើធុរកិច្ច និងវិនិយោគនៅអាស៊ានហើយបច្ចុប្បន្នក្រុមហ៊ុនជាង ១០ បានចូលរួមជាមួយគណៈប្រតិភូ ដើម្បីពង្រីកការធ្វើធុរកិច្ច និងវិនិយោគនៅកម្ពុជា​ជាពិសេស​ជួយដល់ផែនការងើបឡើងវិញនៃសេដ្ឋកិច្ចកម្ពុជា, បច្ចេកវិទ្យា និងនវានុវត្តន៍, លទ្ធភាពទទួល​ហិរញ្ញប្បទាន របស់ SME, ថាមពល និងហេដ្ឋារចនាសម្ព័ន្ធ, ផលិតផលដែលមានតម្លៃបន្ថែមខ្ពស់, និងការបណ្តុះបណ្តាលធនធានមនុស្ស, យុវជននិង SME ជាដើម៕អត្ថបទ៖ វ៉ន ដារ៉ា

រដ្ឋមន្ត្រី​ពាណិជ្ជកម្ម​ជំរុញ​ផលិតករ​បង្កើន​គំនិត​ច្នៃប្រឌិត​ថ្មីៗ ខណៈ​ទីផ្សារ​ប្រកួតប្រជែង​កាន់តែ​ខ្ពស់​

2023/02/25 04:19:31 pm        561
Facebook Telegram Linkin
សៀមរាប៖ ឯកឧត្តម ប៉ាន សូរ​ស័ក្តិ រដ្ឋមន្ត្រី​ក្រសួង​ពាណិជ្ជកម្ម បាន​ជំរុញ​ដល់​ផលិតករ ពាណិជ្ជករ​កម្ពុជា ត្រូវ​ខិតខំ​បង្កើត​គំនិត​ច្នៃប្រឌិត​ថ្មីៗ​បន្ថែម​ទៀត និង​រៀបចំ​ទំនិញ​សម្រាប់​បម្រើ​ទីផ្សារ​ត្រូវ​តែ​មាន​គុណភាព មាន​សុវត្ថិភាព​ដល់​អ្នកប្រើប្រាស់ ដោយ​អនុលោម​តាម​ស្តង់ដារ​អនាម័យ និង​មាន​តម្លៃ​សមរម្យ ទើប​អាច​ចូលរួម​ប្រកួតប្រជែង​ក្នុង​ទីផ្សារ​សេរី​បាន​។ការ​អំពាវនាវ​ខាងលើនេះ ធ្វើឡើង​ក្នុងឱកាស​ឯកឧត្តម​រដ្ឋមន្ត្រី​អញ្ជើញ​បើក​ពិធី​សម្ពោធ​ពិព័រណ៍​ផលិត​ផល​ខ្មែរ និង​បន្លែ​ផ្លែឈើ​លើក​ទី​១៦ ក្នុង​ឱកាស​យុទ្ធនា​ការទិញ​ផលិតផល​ខ្មែរ​រដូវ​កាល​ទី​៨ ឆ្នាំ​២០២៣ កាលពី​រសៀល​ថ្ងៃ​ទី​២៤ ខែ​កុម្ភៈ​កន្លងទៅ​នៅ​ខេត្ត​សៀមរាប ដោយមាន​ការ​អញ្ជើញ​ចូលរួម​ពី​ថ្នាក់ដឹកនាំ​ក្រសួង​, អភិបាលរង​ខេត្ត​សៀមរាប ផលិតករ ពាណិជ្ជករ កសិករ និស្សិត និង​ភ្ញៀវកិត្តិយស​ជាតិ និង​អន្តរជាតិ​សរុប​ប្រមាណ ៣០០​នាក់​។ នៅ​ក្នុង​ឱកាស​នោះ ឯកឧត្តម ប៉ាន សូរ​ស័ក្តិ បញ្ជាក់​ថា យុទ្ធនា​ការទិញ​ផលិតផល​ខ្មែរ​គឺជា​ផ្នែក​មួយ​ដ៏​សំខាន់ ​នៃ​ការអនុវត្ត​គោលនយោបាយ​អភិវឌ្ឍន៍​វិស័យ​ពាណិជ្ជកម្ម ​របស់​ក្រសួងពាណិជ្ជកម្ម​។ យុទ្ធនាការ​នេះ​គឺជា​សំឡេង​ជួយ​ដាស់​ស្មារតី​ប្រជាជន​កម្ពុជា ឱ្យ​ងាក​មក​ចូលរួម​គាំទ្រ និង​ប្រើប្រាស់​ផលិតផល​ក្នុងស្រុក​ជំនួស​ទំនិញ​នាំចូល​ពី​បរទេស​ជា​ជំហាន​ៗ​។ឯកឧត្តម​បាន​បន្តថា តាមរយៈ​ការ​រៀបចំ​យុទ្ធនា​ការទិញ​ផលិតផល​ខ្មែរ​ចំនួន ៧​រដូវ​កាល​កន្លងមកនេះ​បាន​ជួយ​ពង្រឹង​ខ្សែ​សង្វាក់​ផលិត​កម្ម​ក្នុងស្រុក​ជា​បណ្តើរៗ ហើយ​ផលិតករ​កម្ពុជា​ក៏មាន​ចំណេះដឹង ចំណេះ​ធ្វើ និង​ទទួល​បាន​បទពិសោធន៍​ល្អៗ​ជាច្រើន សម្រាប់​ពង្រឹង និង​ពង្រីក​ផលិតកម្ម អភិវឌ្ឍន៍​ផលិតផល និង​សេវា​របស់​ខ្លួន​បម្រើ​ឱ្យ​ទីផ្សារ​។ ជា​លទ្ធផល​សង្កេតឃើញ​ថា ផលិតផល​ខ្មែរ​មាន​វត្តមាន​នៅលើ​ទីផ្សារ​កាន់​តែ​ច្រើន ទាំង​ទីផ្សារ​ក្នុងស្រុក ហាង​លក់ទំនិញ​ក្នុង​អាកាសយានដ្ឋាន និង​ទីផ្សារ​នៅ​បរទេស និង​មាន​ការ​រីកចម្រើន​ទៅមុខ​ទាំង​គុណភាព សុវត្ថិភាព សោភ័ណភាព និង​អនាម័យ ដែល​អាច​ទុក​ចិត្ត​បាន​សម្រាប់​អ្នកប្រើប្រាស់​ទូទៅ​។ ជាមួយ​គ្នា​នេះ ឯកឧត្តម​រដ្ឋមន្ត្រី​បាន​អំពាវនាវ​ដល់​គ្រប់ភាគី​ពាក់ព័ន្ធ​ទាំងអស់ ​ត្រូវ​រួមគ្នា​ជួយ​លើក​កម្ពស់​ផលិតផល​ក្នុងស្រុក ជំរុញ​ការផ្សព្វផ្សាយ និង​ប្រើប្រាស់​ឱ្យបាន​ទូលំទូលាយ ខណៈដែល​ក្រសួងពាណិជ្ជកម្ម​កំពុង​ខិតខំ​ធ្វើ​ពិពិធ​កម្ម​ទីផ្សារ​បន្ថែម​លើ​ទីផ្សារ​ដែលមាន​ស្រាប់ តាមរយៈ​ការចរចា​បង្កើត​តំបន់​ពាណិជ្ជកម្ម​សេរី​ទ្វេភាគី​កម្ពុជា​-​ចិន​, កម្ពុជា​-​កូរ៉េ​, កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​តំបន់​(RCEP) កិច្ចព្រមព្រៀង​ពាណិជ្ជកម្ម​សេរី​កម្ពុជា​-​អេ​មី​រ៉ាត់​អារ៉ាប់​រួម ដែល​នឹង​បញ្ចប់​នៅពេល​ឆាប់ៗ​នេះ និង​កិច្ចព្រមព្រៀង​ពាណិជ្ជកម្ម​សេរី​ពហុភាគី​ជាមួយ​ដៃគូ​ពាណិជ្ជកម្ម​នានា​ជាច្រើន​ទៀត ដែល​ធ្វើឱ្យ​ទីផ្សារ​ទំនិញ សេវាកម្ម និង​វិនិយោគ​កម្ពុជា​កាន់តែ​ទូលំទូលាយ​។​សូម​ជម្រាប​ថា ពិព័រណ៍​ផលិតផល​ខ្មែរ និង​បន្លែ​ផ្លែឈើ​លើក​ទី​១៦ ធ្វើឡើង​រយៈពេល ៤​ថ្ងៃ​ចាប់ពី​ថ្ងៃ​ទី​២៤ ដល់​២៧ ខែកុម្ភៈ ឆ្នាំ​២០២៣ នៅ​ក្រុង​/​ខេត្តសៀមរាប ដោយមាន​ការដាក់​តាំង​បង្ហាញ និង​លក់​ផលិតផល​ខ្មែរ បន្លែ ផ្លែឈើ វត្ថុ​អនុស្សាវរីយ៍ ផលិតផល​របស់​សហគមន៍ និង​ផលិតផល​ភូមិ​១ ផលិត​ផល​១ មកពី​រាជធានី​-​ខេត្ត​ចំនួន​១២ ដោយមាន​ក្រុមហ៊ុន សហគ្រាស និង​អាជីករ​ក្នុងស្រុក​ចូលរួម​ចំនួន​ជាង​១០០​។ ក្នុងអំឡុងពេល​នេះ​ដែរ ក្រសួងពាណិជ្ជកម្ម​ក៏​មាន​រៀបចំ​ព្រឹត្តិការណ៍​អម​មួយ​ចំនួន​ទៀត​ផង​ដែរ ដូចជា ការ​ចម្អិន​ម្ហូបអាហារ​ខ្មែរ កម្មវិធី​សិក្ខាសាលា​ស្តីពី​ការកំណត់​អត្តសញ្ញាណ និង​ការ​ផ្សព្វផ្សាយ​ផលិតផល​សក្កានុព​ល​កម្ពុជា កម្មវិធី​ផ្គូផ្គង​ពាណិជ្ជកម្ម កិច្ចពិភាក្សា​ស្តីពី​បន្លែ​សុវត្ថិភាព​សម្រាប់​កុមារ និង​ការ​លេង​សិល្បៈ​ខ្មែរ​កំដរ​ក្នុង​ពេល​រាត្រី​ផងដែរ​៕

ទំហំពាណិជ្ជកម្មទ្វេភាគីរវាង កម្ពុជា-ឥណ្ឌា រំពឹងបន្តកើនឡើង

2023/02/23 09:46:45 pm        302
Facebook Telegram Linkin
ភ្នំពេញ៖ ឯកអគ្គរដ្ឋទូតឥណ្ឌាប្រចំាកម្ពុជា បង្ហាញនូវក្តីរំពឹងថា ការធ្វើពាណិជ្ជកម្មទ្វេភាគីរវាងកម្ពុជា-ឥណ្ឌា នៅឆ្នាំនេះ នឹងបន្តកើនឡើងថែមទៀត ពោលគឺទំហំពាណិជ្ជកម្មនៃប្រទេសទំាងពីរ នឹង​កើនឡើងលើស ២៥០ លានដុល្លារអាមេរិក ដែលសម្រេចបានក្នុងឆ្នាំ២០២២។លោកជំទាវ Dr. Devyani Khobragade ឯកអគ្គរដ្ឋទូតឥណ្ឌាប្រចាំប្រទេសកម្ពុជា លើកឡើងនៅក្នុង​ពិធីសម្ពោធមជ្ឈមណ្ឌលព័ត៌មានវិទ្យា នៃពុទ្ធិកសាកលវិទ្យាល័យព្រះសីហនុរាជ (ព.ស.ស) នៅថ្ងៃទី ២១ ខែកុម្ភៈ ឆ្នាំ ២០២៣ នេះថា ទំនាក់ទំនង់សេដ្ឋកិច្ច និងពាណិជ្ជកម្មរវាងកម្ពុជា និងឥណ្ឌា ពិតជាមានភាពរីកលូតលាស់ល្អប្រសើរ ​ជាក់ស្តែងទំហំពាណិជ្ជកម្មទ្វេភាគីនៅឆ្នាំ ២០២២ កន្លងទៅនេះ មានប្រមាណ ២៥០លានដុល្លារអាមេរិក ។លោកជំទាវ បន្តថា មានក្រុមហ៊ុនឥណ្ឌា ដែលបានចូលមករកស៊ីនៅកម្ពុជា ​មានចំនួនកើន​ឡើង​ល្អប្រសើរ បច្ចុប្បន្នមានចំនួនប្រហែល ៥០ ក្រុមហ៊ុន ដែលបានចុះបញ្ជីនៅស្ថានទូតប្រចំានៅកម្ពុជា ហើយប្រសិនបើមានការទំនាក់ទំនងផ្សារភ្ជាប់ នៅការកសាងផ្លូវកាន់តែល្អប្រសើរនោះ នឹងធ្វើឱ្យ​ទំហំពាណិជ្ជកម្មនៃប្រទេសទំាងពីរ ​កាន់តែមានការកើនឡើងថែមទៀត នៅក្នុងរយៈពេលខាង​មុខជា​បន្តបន្ទាប់។សូមបញ្ជាក់ថា ពាក់ព័ន្ធនិងការធ្វើពាណិជ្ជកម្មរវាងកម្ពុជា​ និងឥណ្ឌា ​បើតាមរបាយការណ៍គយ និង​រដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ ​នៅក្នុងខែ​ មករា ឆ្នំា២០២៣ នេះ កម្ពុជាបាន​នាំ​ចេញផលិតផលទៅប្រទេសឥណ្ឌា​ មានទំហំទឹកប្រាក់ប្រមាណជាង ២២ ​លានដុល្លារអាមេរិក កើន​ឡើងជាង ១០០ ភាគរយ ក្នុងនោះភាគីឥណ្ឌានាំចូលមកវិញ ​មានទឹកប្រាកប្រមាណ ១៥ លាន​ដុល្លារអាមេរិក ធ្លាក់ចុះជិត ២០ ភាគរយ បើធៀបរយៈពេលដូចគ្នានឹងឆ្នាំ ២០២២ ៕អត្ថបទ៖ សុន រ៉ាឌី

ខេត្តប៉ៃលិន កំពុងទទួលការវិនិយោគ លើការសម្ងួតផ្លែស្វាយ និងមៀន

2023/02/23 06:56:15 pm        448
Facebook Telegram Linkin
ភ្នំពេញ៖ លោកជំទាវ បាន ស្រីមុំ អភិបាលខេត្តប៉ៃលិន បានថ្លែងថា អ្នកវិនិយោគចិនបានបោះទុន ធ្វើការវិនិយោគរោងចក្រសម្ងួតផ្លែស្វាយ និងផ្លែមៀន នៅក្នុងខេត្តប៉ៃលិន ដែលអាចនាំចេញទៅទីផ្សារខាងក្រៅ ។ក្នុងសន្និសីទសារព័ត៌មាន ស្ដីពីភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋបាលខេត្តប៉ៃលិន នៅថ្ងៃទី២៣ ខែកុម្ភៈ ឆ្នាំ២០២៣ លោកជំទាវ បាន ស្រីមុំ មានប្រសាសន៍ថា ក្រៅពីដំណាំស្រូវ ខេត្តប៉ៃលិន សម្រាប់វិស័យកសិកម្ម គឺមានដំណាំដំឡូងមី ពោតក្រហម និងស្វាយកែវរមៀត ហើយដំណាំដែលល្បី គឺមៀនប៉ៃលិន ហើយតម្លៃកសិផលទាំងអស់នេះ មានការកើតឡើងគួរឲ្យកត់សម្គាល់ ។លោកជំទាវ បានបន្តថា នៅខេត្តប៉ៃលិន មានវិនិយោគចិន បានបោះទុនវិនិយោគ ដើម្បី​សម្ងួតផ្លែមៀន និងផ្លែស្វាយ ហើយកែច្នៃផ្លែស្វាយ និងមៀន ធ្វើជាដំណាប់ ធ្វើស្រាជាដើម ដែល​បច្ចុប្បន្នខេត្តក៏មានខ្វះខាតនូវកសិផលទាំងអស់នេះ ដើម្បីធ្វើការកែច្នៃផងដែរ និងកំពុងប្រមូល​ទិញពីខេត្តខាងក្រៅ ដោយរោងចក្រកែច្នៃកសិផលទាំងអស់នេះ បានបង្កើតជាការងារដល់​ពលរដ្ឋជាច្រើននាក់ផងដែរ ។លោកជំទាវអភិបាលខេត្ត បន្ថែមថា ក្នុងរយៈពេល៥ឆ្នាំ ការនាំចេញកសិកផលកសិកម្ម ពីខេត្តប៉ៃលិន ទៅទីផ្សារក្រៅប្រទេសបានជាង ២លានតោន ក្នុងនោះស្វាយកែវរមៀត បានប្រមាណជាង ៥២ម៉ឺនតោន ដែលតម្លៃបច្ចុប្បន្ន ១គីឡូក្រាម បានតម្លៃ៥បាត និងផ្លែស្វាយរមៀតខ្ចប់តម្លៃ១២បាត ។ ចំណែកផ្លែមៀនប៉ៃលិន បាននាំចេញត្រឹមរយៈពេល ឆ្នាំ២០១៨ ដល់ឆ្នាំ២០១៩ បានចំនួន ៦ ៩០៧តោន ។ លោកជំទាវ បាន ស្រីមុំ បានបញ្ជាក់ថា ខេត្តប៉ៃលិន មានផ្ទៃដីដំណាំស្រូវជិត ៩ពាន់ហិកតា, ដំណាំសាវប្បកម្មចំនួនជាង ១២ ០០០ហិកតា និងផ្ទៃដីដំណាំឧស្សាហកម្មចំនួនជាង ៥ពាន់ហិកតា ហើយរដ្ឋបាលខេត្តកំពុងជំរុញនូវយន្តការអភិវឌ្ឍ ដូចជាអប់រំ បណ្ដុះបណ្ដាលបច្ចេកទេស​ក្នុងការប្រើប្រាស់ជី ថ្នាំកសិកម្ម និងជំរុញការប្រើប្រាស់ពូជប្រកបដោយគុណភាព ដល់ប្រជាកសិករ ក្នុងគោលបំណងបង្កើនទិន្នផល និងលើកកម្ពស់សេដ្ឋកិច្ចគ្រួសារ កាត់បន្ថយភាពក្រីក្រ ៕ អត្ថបទ បាន សុខរិទ្ធិ

សប្ដាហ៍ទី៣ខែកុម្ភៈកម្ពុជាទទួលបានទេសចរជាង ៣៦ ម៉ឺននាក់ ភ្ញៀវបរទេសផ្ទៃក្នុងជិត ៥ ម៉ឺននាក់

2023/02/22 06:09:06 pm        546
Facebook Telegram Linkin
ព្រះសីហនុ ៖ នាវាទេសចរណ៍បរទេសមួយគ្រឿង ឈ្មោះ Nautica សញ្ជាតិ MARSHALL ISLAND ផ្ទុកមនុស្សចម្រុះជាតិសាសន៍ជិត ១ ពាន់នាក់ ចេញដំណើរមកពីប្រទេសថៃបានចូលចតនៅកំពង់ផែស្វយ័តក្រុងព្រះសីហនុនៅថ្ងៃទី២២ ខែកុម្ភៈដើម្បីទស្សនាប្រទេសកម្ពុជារយៈពេល១ថ្ងៃ ខណៈក្នុងសប្ដាហ៍ទី៣ នៃខែកុម្ភៈនេះកម្ពុជាទទួលបានទេសចរជាង ៣៦ ម៉ឺននាក់ ភ្ញៀវបរទេសផ្ទៃក្នុងជិត ៥ ម៉ឺននាក់។បើតាមរបាយការណ៍ក្រសួងទេសចរណ៍ សប្ដាហ៍ទី៣ខែកុម្ភៈ ចាប់ពីថ្ងៃទី១៣-១៩ ខែកុម្ភៈ ឆ្នាំ២០២៣ នៅទូទាំងប្រទេសទទួលបានភ្ញៀវទេសចរសរុប ៣៦០,១៣៥ នាក់ ក្នុងនោះភ្ញៀវជាតិ ៣១៣,៦៨២ នាក់ ភ្ញៀវបរទេសផ្ទៃក្នុង ៤៦,៤៥៣ នាក់។ របាយការណ៍បានឱ្យដឹងថា គោលដៅទេសចរណ៍សំខាន់ៗ ដែលភ្ញៀវទេសចរជាតិ និងអន្តរជាតិបានទៅលេងកម្សាន្តនោះរួមមាន ខេត្តព្រះសីហនុ ៧២,០៥៦ នាក់, ខេត្តត្បូងឃ្មុំ ៦៥,៣៨៥ នាក់, ខេត្តសៀមរាប ៣៩,៨០០ នាក់, រាជធានីភ្នំពេញ ៣៤,២៦៩នាក់, ខេត្តកំពត ២៥,១៣២ នាក់, ខេត្តបាត់ដំបង ២១,១៩២ នាក់, ខេត្តកំពង់ចាម ១៧,៨៨៤ នាក់, ខេត្តស្វាយរៀង ១៧,៨៦៩ នាក់។បើតាមក្រសួងទេសចរណ៍ ចរន្តភ្ញៀវទេសចរក្នុងស្រុកនៅតែបន្តបង្ហាញសញ្ញាវិជ្ជមាន ប្រកបដោយ​ភាពសុទិដ្ឋិនិយមជាមួយចំនួនជាង ៣៦ ម៉ឺននាក់ក្នុងសប្តាហ៍នេះ ខណៈដែលសប្តាហ៍កន្លងមក​កម្ពុជាទទួលបានភ្ញៀវសរុបប្រមាណ ២៩ ម៉ឺននាក់។ដោយឡែកនៅថ្ងៃទី២២ ខែកុម្ភៈ ឆ្នាំ២០២៣នេះ នាវាទេសចរណ៍បរទេស ផ្ទុកមនុស្សចម្រុះជាតិ​សាសន៍​ជិត ១.០០០ នាក់ចូលចតធ្វើទស្សនកិច្ចនៅក្នុងខេត្តព្រះសីហនុផងដែរ៕ អត្ថបទ៖ វ៉ន ដារ៉ា

កម្ពុជា និងអារ៉ាប់រួម​ បើកកិច្ចចចារនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយជុំទីបី

2023/02/21 10:01:50 pm        955
Facebook Telegram Linkin
ភ្នំពេញ៖ រាជរដ្ឋាភិបាលកម្ពុជា និងរដ្ឋាភិបាលអេមីរ៉ាតអារ៉ាប់រួម បានបើកការចរចាជុំទី៣ នៃ​កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងប្រទេសទាំងពីរ ដែលប្រព្រឹត្តទៅ​ចាប់ពីថ្ងៃទី២០ ដល់ថ្ងៃទី២២ ខែកុម្ភៈ ​ឆ្នាំ២០២៣ ​នៅទីក្រុងឌុយបៃ ​អេមីរ៉ាតអារ៉ាប់រួម។ ប្រភពពីក្រសួងពាណិជ្ជកម្ម កាលពីរាត្រីថ្ងៃទី២០ ខែកុម្ភៈនេះ បានឲ្យដឹងថា កិច្ចចចារនេះបាន​ប្រព្រឹត្ត​ក្រោមវត្តមាន​របស់លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម និងជា​ប្រធាន​ក្រុមចរចាពាណិជ្ជកម្មសម្រាប់ភាគីកម្ពុជា​ និងឯកឧត្តម ជូម៉ា អាល់ កាត (Juma AI Kait) អនុរដ្ឋមន្រ្តីទទួលបន្ទុកពាណិជ្ជកម្មអន្តរជាតិ និងជាប្រធានក្រុមចរចាពាណិជ្ជកម្មសម្រាប់​ភាគី​អេមីរ៉ាតអារ៉ាប់រួម ដោយ​មានការ​អញ្ជើញ​ចូលរួមរបស់​ក្រុមការងារចរចារបស់​ភាគីទាំងពីរសរុប​ប្រមាណ ១០០រូប។ ក្នុងអង្គប្រជុំនេះ លោកជំទាវ ​បានកោតសរសើរ និងបង្ហាញនូវក្តីសោមនស្សរីករាយ ដែលដំណើរ​ការចរចាលើកិច្ចព្រមព្រៀង ​បានឈានដល់ការចរចាជុំទី៣ បន្ទាប់ពីភាគីទាំងពីរសម្រេចបាន​នូវ​លទ្ធផលជាផ្លែផ្កាក្នុងការចរចាជុំទី១ ​នៅអាប៊ុយដាប៊ី និងជុំទី២​ នៅភ្នំពេញកន្លងទៅ។ ទន្ទឹមនោះ ​ភាគីទាំងពីរបានគាំទ្រចំពោះបំណង ដែលភាគីទាំងពីរគ្រោងនឹងបញ្ចប់​ការចរចាកិច្ច​ព្រមព្រៀងខាងលើ ​ឱ្យបានត្រឹមជុំទី៣នេះ ​និងឈានដល់ការប្រកាសបិទ​បញ្ចប់ការចរចាជាផ្លូវការ​នាពេលឆាប់ៗ​ខាងមុខ។ តាមក្រសួងពាណិជ្ជកម្ម បានបញ្ជាក់បន្ថែមថា ភាគីទាំងពីរក៏បានទទួលស្គាល់ថា កិច្ចព្រមព្រៀងភាព​ជាដៃគូ​សេដ្ឋកិច្ចគ្រប់ជ្រុងជ្រោយកម្ពុជា ​និងអេមីរ៉ាតអារ៉ាប់រួម នឹងក្លាយជាកម្លាំងចលករ​ជំរុញ​ទំនាក់ទំនង​កិច្ចសហប្រតិបត្តិការទូលំទូលាយរវាងប្រទេសទាំងពីរ ដែលនឹងជំរុញកំណើន​សេដ្ឋកិច្ចជាតិ ​និងការអភិវឌ្ឍប្រកបដោយចីរភាព ​និងបរិយាប័ន្ន។ ស្របគ្នានោះដែរ ឯកឧត្តម ជូម៉ា អាល់ កាត បានស្វាគមន៍គណៈប្រតិភូកម្ពុជា និងថ្លែងអំណរគុណ​យ៉ាងជ្រាលជ្រៅចំពោះការគាំទ្រ ​និងកិច្ចសហប្រតិបត្តិការជិតស្និទ្ធផ្តល់ដោយភាគីកម្ពុជាកន្លងមក។ឯកឧត្តម ​បានកត់សម្គាល់នូវ​សញ្ញាណ​ជាវិជ្ជមានក្នុងពាណិជ្ជកម្មទ្វេភាគី ​ដែលសម្រេចបានប្រមាណ ៤០០ ​លានដុលា្លរអាម៉េរិកក្នុងឆ្នាំ២០២២ ​កើនឡើងប្រមាណ ​៣០% ធៀបនឹងឆ្នាំ២០២១ និងរំពឹងថាកិច្ចព្រមព្រៀងនេះ នឹងបន្តជំរុញទំហំពាណិជ្ជកម្មទ្វេភាគីឱ្យកាន់​កើនតែប្រសើរ​ថែមទៀត៕ អត្ថបទ៖ ឈិត បូរ៉ាវី

វិស័យហិរញ្ញវត្ថុឆ្នាំ២០២៣នេះ នៅតែមានកំណើនល្អប្រសើរ ទោះប្រឈមនឹងវិបត្តិសកល

2023/02/21 09:42:24 pm        725
Facebook Telegram Linkin
ភ្នំពេញ៖ មន្រ្តីជាន់ខ្ពស់ធនាគារជាតិនៃកម្ពុជា រំពឹងថា ស្ថានភាពវិស័យហិរញ្ញវត្ថុនៅកម្ពុជា ក្នុងឆ្នាំ ២០២៣នេះ នឹងមានភាពរីកចម្រើន ​ល្អប្រសើរជាងមុន​ បើទោះបីជាវិបត្តិសកល សង្រ្គាមនៅ​អ៊ុយក្រែន នៅបន្តអូសបន្លាយ ។លោកជំទាវបណ្ឌិត ជា សិរី ឧបការីទេសាភិបាល និងជាអគ្គនាយក បច្ចេកទេសធនាគារជាតិ​នៃកម្ពុជា លើកឡើងនៅក្នុងពិធី​សម្ពោធ​ដាក់ឱ្យប្រើប្រាស់ជាផ្លូវការ តំណភ្ជាប់សម្រាប់ស្វែងរក​មើលព័ត៌មានចាក់វាក់សាំងកូវីដ-១៩​ របស់សាមីបុគ្គលតាមរយៈប្រព័ន្ធបាគង ​នៅថ្ងៃទី ២០ ខែ កុម្ភៈ ឆ្នាំ ២០២៣ នេះថា ​ក្នុងឆ្នាំ ២០២៣ រំពឹងថា ស្ថានភាពវិស័យហិរញ្ញវត្ថុនៅកម្ពុជា នឹងមានភាព​រីកចម្រើន​ល្អប្រសើរជាមុន ខណៈដែលទំនោទីផ្សារថ្លៃប្រេងឥន្ធនៈ ​បានថយចុះ ដែលជួយសម្រួល​ដល់ប្រតិបត្តិការផ្សេងៗ ជាពិសេសថ្លៃម្ហូបអាហារ តែទោះបីយ៉ាងណាក៏នៅប្រឈមនឹងភាព​មិនច្បាស់លាស់ដូចជា ​សង្គ្រាមរុស្សី-អ៊ុយក្រែន​ និងការ​គំរាមកំហែង​នៅ​បែកអាស៊ីជាដើម ប៉ុន្តែប្រសិន​ការប៉ះពាល់នេះវាតូច ​វានឹងអាចជួយដល់ការរីកចម្រើនរបស់កម្ពុជា។ជុំវិញស្ថានភាពហិរញ្ញវត្ថុនេះ ​តាមទស្សនវិស័យ ​និងទិសដៅរបស់ធនាគារជាតិនៃកម្ពុជា តាមការ​រំពឹងទុក​ ប្រកបដោយភាព​សុទិដ្ឋិនិយម ការវិលទៅរកភាពប្រក្រតីឡើងវិញ​នៃ​សកម្មភាព​សេដ្ឋកិច្ចក្នុងស្រុក និងកំណើនតម្រូវការពីខាងក្រៅ​ នឹងបន្តគាំទ្រកំណើនសេដ្ឋកិច្ចកម្ពុជា​ឱ្យសម្រេច​បានក្នុងរង្វង់ ៦% នៅឆ្នាំ២០២៣, កំណើននេះ អាចរួមចំណែកដោយវិស័យចម្បងៗដូចជា៖ វិស័យកាត់ដេរត្រូវបានរំពឹងថា មានកំណើន ៦,៩%, វិស័យទេសចរណ៍ត្រូវបានរំពឹងថា​នឹង​បន្តមាន​កំណើនខ្ពស់ ១៨,៥%, និងវិស័យកសិកម្មត្រូវបានព្យាករថានឹងមានកំណើនប្រមាណ ១,១% ។ ស្ថិតក្នុងដំណាក់កាលនៃការស្ដារសេដ្ឋកិច្ចឡើងវិញក្រោយវិបត្តិកូវីដ-១៩ ប្រព័ន្ធធនាគារត្រូវ​បានរំពឹងថា ​នឹងនៅតែបន្តដើរតួនាទីយ៉ាងសំខាន់ក្នុងការចូលរួមគាំទ្រកំណើន​វិស័យសំខាន់ៗ​នៃសេដ្ឋកិច្ច តាមរយៈការផ្តល់ហិរញ្ញប្បទាន និងសេវាហិរញ្ញវត្ថុនានា ដោយឥណទាន ត្រូវបាន​រំពឹងថា នឹងមានកំណើនក្នុងអត្រា ២២% គួបផ្សំនឹងការបន្តអនុវត្តវិធានការគាំទ្រដទៃទៀត៕អត្ថបទ៖ សុន រ៉ាឌី

រដ្ឋាករទឹកស្វយ័តក្រុងភ្នំពេញ តភ្ជាប់បំពង់មេក្រោមបាតទន្លេ បង្កើនការផ្គត់ផ្គង់ទឹកនៅរាជធានីភ្នំពេញ

2023/02/21 09:36:35 pm        781
Facebook Telegram Linkin
ភ្នំពេញ៖ រដ្ឋាករទឹកស្វយ័តក្រុងភ្នំពេញ បានកំពុងចាប់ផ្តើមដាក់បំពង់បណ្តោះអាសន្ន ទំហំ ១,៤ ម៉ែត្រ ឆ្លងកាត់ទន្លេសាប ពីត្រើយខាតកើតឆ្ពោះមកត្រើយខាងលិច ក្នុងគោលដៅជំរុញការផ្គត់ផ្គង់​ទឹកនៅតំបន់ដែលមានសម្ពោធទឹកទាប ឲ្យទាន់តាមផែនការ។ឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ ​លើកឡើង​នៅ​ក្នុងពិធី​រៀបចំ​ខួង​ដាក់​ទុយោមេទំហំ ២ ម៉ែត្រ ឆ្លងកាត់ទន្លេសាបពីត្រើយខាតកើតឆ្ពោះមកត្រើយខាងលិច​ នៅថ្ងៃទី២០ ខែកុម្ភៈ ​ឆ្នាំ២០២៣ នេះថា​ បើតាមផែនការនៅថ្ងៃទី៥ ខែឧសភា ​ខាងមុខនេះ រដ្ឋាករទឹកស្វយ័ត​ក្រុងភ្នំពេញ ​នឹងដាក់ឲ្យដំណើររោងចក្របាក់ខែងជំហានទី​ ១ ដើម្បីផ្គត់ផ្គង់បន្ថែមលើតំបន់ ដែលមាន​សម្ពោធទឹកទាប​ ឬប្រើប្រាស់មិនគ្រប់គ្រាន់ ជាពិសេសស្ថិតនៅតំបន់ជាយក្រុងប៉ែក​ខាងលិច ​និងខាងត្បូង ​រាជធានីភ្នំពេញ ​ដើម្បីឆ្លើយតបទៅនឹងតម្រូវការជូនប្រជាពលរដ្ឋ។ឯកឧត្តម ឡុង ណារ៉ូ បន្តឲ្យដឹងថា ​ក្រសួងឧស្សាហកម្ម វិទ្យាសាស្ត្រ​ បច្ចេកវិទ្យា និងនវានុវត្តន៍ បាន​ខិតខំប្រឹងប្រែង ​ស្នើសុំទៅរាជរដ្ឋាភិបាល ​និងដៃគូរអភិវឌ្ឍន៍ ដើម្បីដាក់បំពង់បណ្តោះអាសន្ន និងក្លាយជាអចិន្ត្រយ៍ ទំហំ ១,៤ ម៉ែត្រ ​ដែលបច្ចុប្បន្នអនុវត្តសម្រេចបាន ៩៨ ភាគរយ ដើម្បីធានា​ដល់ការផ្គត់ផ្គង់ទឹកជូនប្រជាពលរដ្ឋឲ្យបានតាមផែនការ​ ក្នុងជំហានទី១, ដោយឡែកបំពង់មេនាំ​ទឹកទំហំ ២ ម៉ែត្រ អាចនឹងដំណើរនៅក្នុងដំណាក់កាលទី ២ ដែលនឹងរុញទឹកស្អាតស្របគ្នា​ទៅភាគខាងលិច ។ជុំវិញវិស័យទឹកស្អាតនេះ, ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា ​និងនវានុវត្តន៍ លើកឡើងថា គម្រោងអភិវឌ្ឍន៍ទឹកស្អាតបាក់ខែង កម្ពុជាបានកម្ខីឥណទានពី AFD ចំនួន ៨៥ លានដុល្លារ និងពីធនាគារអឺរ៉ុប ចំនួន ១០០ លានដុល្លារ ក្នុងនោះសហគមន៍អឺរ៉ុប បានផ្តល់ចំនួន ១៥ លានដុល្លារ គឺជាឥណទានឥតសំណង។សូមបញ្ជាក់ថា នៅក្នុងថ្ងៃម្សិលមិញនេះ គណៈប្រតិភូប្រទេសបារាំងរួមមាន មន្រ្តីជាន់ខ្ពស់​សមាជិក​សភាបារាំង និង AFD, សហគមន៍អឺរ៉ុប, និងមន្រ្តីជាន់ខ្ពស់រាជរដ្ឋាភិបាលកម្ពុជាមាន គណៈកម្មាធិការ​សភាកម្ពុជា ព្រឹទ្ធសភា និងក្រសួងឧស្សាហកម្ម ​វិទ្យាសាស្ត្រ ​បច្ចេកវិទ្យា ​និងនវានុវត្តន៍ បានអញ្ជើញ​ទស្សនកិច្ចពិនិត្យវឌ្ឍនភាព ​នៅការដ្ឋានសាងសង់រោងចក្រប្រព្រឹត្តកម្មទឹកស្អាតបាក់ខែង ក្នុង​នោះគណៈប្រតិភូបានអញ្ជើញទស្សនកិច្ចស្ថានីយមូមទឹកឆៅបាក់ខែង ​នៅទន្លេមេគង្គ, ការទស្សនកិច្ចគម្រោងទឹកស្អាតបាក់ខែង​ និងការចូលរួមបើកការដ្ឋានខួង ដាក់បំពង់មេនាំទឹក​ស្អាតទំហំ ២ ម៉ែត្រក្រោមបាតទន្លសាប៕អត្ថបទ៖ សុន រ៉ាឌី

អគ្គនាយកដ្ឋានពន្ធដារ ប្រមូលចំណូលពន្ធបានជាង ៣០០ លានដុល្លារ នៅដើមឆ្នាំនេះ

2023/02/17 09:46:21 pm        981
Facebook Telegram Linkin
ភ្នំពេញ៖ នៅដើមឆ្នាំ២០២៣នេះ អគ្គនាយកដ្ឋានពន្ធដារ ប្រមូលចំណូលប្រភេទពន្ធ-អាករគ្រប់ប្រភេទ តាមប្រព័ន្ធគ្រប់គ្រងទិន្នន័យចំណូលអនឡាញ ​បានមានចំនួនជាង ១ ២១៧ ប៊ីលានរៀល ត្រូវប្រមាណជាង ៣០០ លានដុល្លារ ស្មើជាង ៨ ភាគរយ នៃផែនការច្បាប់​ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។សេចក្តីប្រកាសព័ត៌មានរបស់អគ្គនាយកដ្ឋានពន្ធដារ ស្តីពីកិច្ចប្រជុំបូកសរុបលទ្ធផលប្រមូលចំណូល​ពន្ធប្រចាំខែមករា ឆ្នាំ២០២៣ នៅថ្ងៃទី១៦ ខែកុម្ភៈ ឆ្នាំ២០២៣នេះ បានបង្ហាញឲ្យដឹងថា​ ក្នុងខែមករា ឆ្នាំ២០២៣ ចំណូលពីប្រភេទពន្ធសំខាន់ៗបានរក្សាកំណើន​ ធៀបនឹងរយៈពេលដូចគ្នាក្នុងឆ្នាំ២០២២ ក្នុងនោះពន្ធលើប្រាក់ចំណូលជាង​ ២០ ភាគរយ អាករលើតម្លៃបន្ថែមជាង​ ៨ ភាគរយ និងពន្ធលើប្រាក់​បៀវត្សជាង ១៨ ភាករយ។ចំណែកការប្រមូលចំណូលពន្ធ ពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce) ប្រមូលបានចំនួនជាង ៣៦ ប៊ីលានរៀល ​ត្រូវប្រមាណជាង ៩ លានដុល្លារ​ និងគិតចាប់ពីខែឧសភា ឆ្នាំ២០២២ ​រហូតមកដល់បច្ចុប្បន្ន ចំណូលពន្ធពី E-Commerce ប្រមូលបានសរុបចំនួនជាង ២១៤ ប៊ីលានរៀល ត្រូវប្រមាណជា ៥៣ លានដុល្លារ ។សម្រាប់ទិសដៅអនុវត្តបន្តក្នុងឆ្នាំ ២០២៣, អគ្គនាយកដ្ឋានពន្ធដារ នឹងយកចិត្តទុកដាក់ បន្ត​អនុវត្តវិធាន​ការបន្ថែមរបស់រាជរដ្ឋាភិបាល ​សម្រាប់បន្តគ្រប់គ្រងផលប៉ះពាល់ និងគាំទ្រការងើប​ឡើង​វិញនៃវិស័យទេសចរណ៍ ក្នុងគោលបំណងបន្តកាត់បន្ថយផលប៉ះពាល់មកលើ​ស្ថានភាព​សង្គម-សេដ្ឋកិច្ច ព្រមទាំងបន្តជួយទ្រទ្រង់ និងស្តារអាជីវកម្ម ​និងធុរកិច្ចឱ្យងើបឡើងវិញ។ ពន្ធដារ នឹងបន្តជំរុញបញ្ចប់ការពិនិត្យរៀបចំសេចក្តីព្រាងច្បាប់ស្តីពីសារពើពន្ធថ្មី​ ដែលការរៀបចំនេះ នឹង​អាចធានាបាននូវភាពប្រទាក់ក្រឡា និងបច្ចុប្បន្នភាពបទប្បញ្ញត្តិស្តីពីពន្ធដារ និងបន្តពង្រឹងការ​ផ្សព្វផ្សាយ និងអនុវត្តការគ្រប់គ្រងប្រមូលចំណូលពន្ធពីវិស័យល្បង ​និងកាស៊ីណូ ។ ឯកឧត្តម គង់ វិបុល អគ្គនាយកពន្ធដារ មានប្រសាសន៍កាលពីពេលថ្មីៗនេះថា​ ស្ថានភាព​នៃ​ការប្រមូល​ពន្ធ​ល្អប្រសើរ​ដោយសារ​ការរៀបចំ​កំណែទម្រង់​យ៉ាង​មុត​ស្រួច​របស់​អគ្គនាយកដ្ឋាន​ពន្ធដារ​ ដោយបាន​ចាប់ផ្តើម​តាំងពី​ឆ្នាំ​២០១៣​ ទាំង​ហេដ្ឋារចនាសម្ព័ន្ធ ការគ្រប់គ្រង​ធនធានមនុស្ស ការធ្វើ​បច្ចុប្បន្នភាព និង​ការចុះបញ្ជី​ក្នុង​ប្រព័ន្ធ ការពង្រឹង​ការផ្តល់សេវា​ដល់​អ្នកជា​ប់ព​ន្ធ ការដាក់​លិខិត​ប្រកាស​ពន្ធ ការធ្វើ​សវនកម្ម ការគ្រប់គ្រង​បំណុល និង​ការវិនិយោគ​ទៅលើ​បច្ចេកវិទ្យា​ព័ត៌មាន បានធ្វើឱ្យ​ការប្រមូល​មាន​ភាពល្អប្រសើរ​ក្នុង​រយៈពេល​កន្លងមក​នេះ​។ឯកឧត្តម គង់ វិបុល បានលើកឡើងថា លទ្ធផល​នៃ​ការប្រមូល​ចំណូល​របស់​ពន្ធដារ​នៅក្នុង​រយៈពេល ​៥ ​ឆ្នាំ​ចុងក្រោយនេះ ​នៅតែមាន​ស្ថានភាព​ល្អប្រសើរ​លើស​ការ​គ្រោងទុក បើទោះបី​ជាមានវិបត្តិកូវីដ-១៩​៕ ​អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

កម្ពុជា-រវ៉ាន់ដា ឯកភាពពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែទូលំទូលាយ​
11/13/2026 10:11 PM
Facebook Telegram Linkin
សម្ដេចតេជោ អបអរសាទរ និងកោតសរសើរចំពោះ ចៅស្រី ល្អហួស ដែលបានខិតខំព្យាហាម រហូតសម្រេចក្តីស្រមៃ និងក្លាយជាម្ចាស់មកុដ Miss Teen Icon International 2026
11/13/2026 10:11 PM
Facebook Telegram Linkin
ការវិនិយោគផ្លូវនៅជនបទ ជាការឆ្លើយតបទៅនិងការស់នៅដ៏ចាំបាច់របស់ប្រជាជន
11/13/2026 07:11 PM
Facebook Telegram Linkin
រាជធានីភ្នំពេញរៀបចំកិច្ចពិភាក្សាថ្នាក់ដឹកនាំរាជធានី រដ្ឋធានី ទីក្រុង ខេត្ត និងអង្គភាពជាសមាជិកសមាគម AIMF តាមរយៈសន្និសីទកម្រិតអភិបាល និងតំណាងអាជ្ញាធរមូលដ្ឋានស្តីពី ទំនាក់ទំនងការទូតរវាងទីក្រុង ដើម្បីសន្តិភាព និងការអភិវឌ្ឍមូលដ្ឋាន
11/13/2026 06:11 PM
Facebook Telegram Linkin
ទីក្រុងឌែលី វ៉ាដាច់ទីក្រុងឡាហ័រ ក្លាយជាទីក្រុងមានការបំពុលខ្យល់ខ្លាំងបំផុតក្នុងពិភពលោក
11/13/2026 06:11 PM
Facebook Telegram Linkin
របាយការណ៍៖ ក្រុងវ៉ាស៊ីនតោនទាមទារឱ្យជប៉ុនបង្កើនការចំណាយ ៣ដង ដល់ ១៩ពាន់លានដុល្លារ លើ​កងទ័ពអាមេរិក
11/13/2026 06:11 PM
Facebook Telegram Linkin
ការកាត់មូលនិធិទីភ្នាក់ងារ UNRWA ធ្វើឱ្យជនភៀសខ្លួនប៉ាឡេស្ទីននៅលីបង់កាន់តែលំបាកខ្លាំង
11/13/2026 06:11 PM
Facebook Telegram Linkin
របាយការណ៍៖ រុស្ស៊ីទាមទារឱ្យហ្វាំងឡង់ចាកចេញពីអង្គការណាតូ អំឡុង​កិច្ចចរចា នៅអារ៉ាប់រួម
11/13/2026 06:11 PM
Facebook Telegram Linkin
សម្តេចប្រធានរដ្ឋសភា ស្នើប្រធានាធិបតី រវ៉ាន់ដា លើកកម្ពស់ផលប្រយោជន៍ប្រជាពលរដ្ឋប្រទេសទាំងពីរ តាមរយៈការបង្កើនកិច្ចសហប្រតិបត្តិការរដ្ឋសភា ពាណិជ្ជកម្ម និងទេសចរណ៍
11/13/2026 05:11 PM
Facebook Telegram Linkin
ប្រទេសអ៊ីរ៉ង់ បង្ហាញមីស៊ីលនិងយានដ្រូនផលិតក្នុងស្រុក នៅទីក្រុងតេអេរ៉ង់
11/13/2026 05:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.