នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រយៈពេល១ឆ្នាំ TIA រួមចំណែកជំរុញកំណើនសេដ្ឋកិច្ចកម្ពុជាប្រមាណ ៥ភាគរយ
កម្ពុជាស្វែងយល់ពីបច្ចេកវិទ្យានវានុវត្តន៍ និងផ្លាស់ប្តូរ​ទស្សនៈ​ជាមួយ​ដៃ​គូ​អន្តរជាតិ​នៅ​ទីក្រុង​សៀមិន
កម្ពុជាដាក់ចេញវិធានការបន្ទាន់ ដើម្បីទប់ការកើនឡើងនៃសម្ពាធអតិផរណា រក្សាស្ថិរភាព​ម៉ាក្រូ​សេដ្ឋកិច្ច​ជាតិ
រាជរដ្ឋាភិបាលនឹងទម្លាក់កញ្ចប់ថវិកា ៥៣ លានដុល្លារ សម្រាប់បន្តអភិវឌ្ឍន៍ជំនាញគាំទ្រ MSMEs

សេដ្ឋកិច្ច និង កសិកម្ម

គិតត្រឹមខែកក្កដា កម្ពុជាមានរោងចក្រដំណើរការចំនួន ៣.៣៥៧ មានទុនវិនិយោគ ២៨ ប៊ីលានដុល្លារ

2026/08/13 03:13:13 pm        375
Facebook Telegram Linkin
គិតត្រឹមដំណាច់ខែកក្កដា ឆ្នាំ២០២៦នេះ កម្ពុជាមានរោងចក្រកំពុងដំណើរការដែលចុះបញ្ជីនៅក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានចំនួនសរុប ៣.៣៥៧ រោងចក្រ ដោយមានទុនវិនិយោគសរុបប្រមាណ ២៨ ប៊ីលានដុល្លារ អាមេរិក កើនឡើង ៦,២ ប៊ីលានដុល្លារអាមេរិក ធៀបរយៈពេលដូចគ្នាឆ្នាំមុន។ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងក្នុងពិធីសម្ពោធជាផ្លូវ ការ ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ, ពិព័រណ៍ឧស្សាហកម្មសម្លៀកបំពាក់​ និងវាយនភណ្ឌអន្តរជាតិ, ពិព័រណ៍ឧស្សាហ- កម្មប្លាស្ទិក កៅស៊ូ ការវេចខ្ចប់ និងបោះពុម្ភកម្ពុជាអន្តរជាតិ លើកទី១០ នៅថ្ងៃទី១៣ ខែសីហា ឆ្នាំ២០២៦ នេះថា ការអភិវឌ្ឍ ឧស្សាហកម្មបច្ចុប្បន្នកំពុងឈានចូលដំណាក់កាលថ្មីមួយ ជាមួយកំណើនគួរឱ្យកត់សម្គាល់ ទាំងកំណើនចំនួនរោងក្រ ទុនវិនិយោគ តម្លៃផលិតកម្ម និងចំនួនការងារ ដែលទាំងអស់នេះបង្ហាញអំពីទំនុកចិត្តដល់អ្នកវិនិយោគ ជំនួសស្ថិរភាព សក្តានុពល និងអនាគត នៃឧស្សាហកម្មនៅកម្ពុជា។ ឯកឧត្តមរដ្ឋមន្ត្រី បន្តថា ជុំវិញឧស្សាហកម្មនេះ បើគិតត្រឹមដំណាច់ខែកក្កដា ឆ្នាំ២០២៦នេះ កម្ពុជាមានរោងចក្រកំពុង ដំណើរការ ដែលបានចុះបញ្ជីនៅក្រសួង សរុបមានចំនួន ៣.៣៥៧ រោងចក្រ, កម្លាំងពលកម្មជាង ១,៣ លាននាក់ ក្នុងនោះស្រីមាន ជាង ៩៥ ម៉ឺននាក់ ស្មើនឹង ៧០%។ ទុនវិនិយោគសរុបមានប្រមាណ ២៨ ប៊ីលានដុល្លារអាមេរិក កើនឡើងប្រមាណ ៦,២ ប៊ីលាន ដុល្លារអាមេរិក ស្មើនឹងជាង ២៩% បើធៀបនឹងរយៈពេលដូចគ្នាកាលពីឆ្នាំមុន។ លោក អាកៃ លីន (Akai Lin) នាយកទទួលបន្ទុកកិច្ចការក្រៅប្រទេស លើកឡើងថា ជុំវិញការអភិវឌ្ឍនេះ កម្ពុជាមានការរីក ចម្រើនគួរកត់សម្គាល់ ក្នុងនោះកម្ពុជាក៏កំពុងត្រៀមចាកចេញពីចំណាត់ថ្នាក់ប្រទេសដែលមានការអភិវឌ្ឍតិចតួចនៅឆ្នាំ២០២៩ ខាង មុខ បញ្ហានេះអ្នកផលិតមួយចំនួនកំពុងដោះស្រាយបញ្ហានៅក្នុងផលិតកម្មរបស់ខ្លួន ដើម្បីបង្កើនប្រសិទ្ធភាពពង្រីកជាសកល លើការ ប្រើប្រាស់បច្ចេកវិទ្យា និងនវានុវត្តន៍ និងដំណោះស្រាយរោងចក្រដ៏ឆ្លាតវៃជាដើម។ លោកបន្តថា ការផ្លាស់ប្តូរនេះមិនមែនជាភាពងាយ ស្រួលប៉ុន្មាននោះទេ ប៉ុន្តែនេះជាការបង្កើតនូវឱកាសសម្រាប់ធុរកិច្ចដើម្បីវិនិយោគ ពង្រីកទីផ្សារក្នុងស្រុកនិងអន្តរជាតិ។ លោក បន្តថា គោលបំណងនៃការរៀបចំពិព័រណ៍ឧស្សាហកម្មគ្រឿងយន្តកម្ពុជាអន្តរជាតិនេះ ដើម្បីបំបែកនូវគម្លាតរវាង ទីផ្សារក្នុងស្រុក និងអន្តរជាតិ ក្នុងគោលដៅបង្កើននូវឱកាសថ្មី ដើម្បីផ្តល់ដល់ធុរកិច្ចនៅក្នុងប្រទេសកម្ពុជា គាំទ្រដល់ការរីកចម្រើន ជាសកល។ លោកក៏រំពឹងថា ព្រឹត្តិការណ៍ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ ដែលប្រព្រឹត្តទៅរយៈពេល ៤ថ្ងៃនេះ នឹងជួយ ដល់ម្ចាស់ផលិតកម្ម អាជីវកម្ម និងការស្វែងរកនូវលទ្ធភាពថ្មី អាចតភ្ជាប់រវាងឧស្សាហកម្មក្រៅស្រុកនិងក្នុងស្រុក ដើម្បីការរីកចម្រើន ទាំងអស់គ្នា៕ អត្ថបទ៖ សុន រ៉ាឌី 

ប្រធានគណៈកម្មាធិការសេដ្ឋកិច្ច និងធុរកិច្ចឌីជីថល ជំរុញឱ្យវិស័យឯកជន​ចាប់យក​ឌីជីថល​បម្រើ​ក្នុងអាជីវកម្ម

2026/08/12 03:58:44 pm        391
Facebook Telegram Linkin
ប្រធានគណៈកម្មាធិការសេដ្ឋកិច្ច និងធុរកិច្ចឌីជីថល ជំរុញឱ្យវិស័យ​ឯកជន​ចាប់​យក​បច្ចេក​វិទ្យា​ឌីជីថល​ ដែលមានលក្ខណៈកាន់តែ នវានុវត្តន៍ ដើម្បីលើកកម្ពស់ប្រសិទ្ធភាព សមត្ថភាព និង​គុណ​ភាព​នៃផលិតកម្ម កាត់បន្ថយថ្លៃដើម តភ្ជាប់ខ្សែច្រវាក់ផលិតកម្ម និងធានា នូវភាពប្រកួត​ប្រជែង​ក្នុង​ទីផ្សារ។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង​ហិរញ្ញវត្ថុ និងជាប្រធាន គណៈកម្មាធិការសេដ្ឋកិច្ច និងធុរកិច្ចឌីជីថល លើក​ឡើង​នៅ​ក្នុង​ពិធី​ប្រកាស​ដាក់​ឱ្យ​អនុវត្តជាផ្លូវការ និងសិក្ខាសាលាផ្សព្វផ្សាយស្តីពី «យុទ្ធសាស្រ្តជាតិស្តីពី​ការ​អភិវឌ្ឍ​ធុរកិច្ច​ថ្មី​ឆ្នាំ​២០២៦-២០៣០» នៅថ្ងៃទី១១ សីហា នេះថា រាជរដ្ឋាភិបាលជំរុញ និងការ​លើក​កម្ពស់​ ការធ្វើធុរកិច្ចគ្រប់ប្រភេទ ពិសេសធុរកិច្ចថ្មីដែលមានលក្ខណៈនវានុវត្តន៍ និងប្រើប្រាស់​បច្ចេក​វិទ្យាឌីជីថលជា «ស្នូល» សំដៅបង្កើន សមត្ថភាព និងឧត្តមភាពប្រកួតប្រជែងរបស់កម្ពុជា ក្នុងបរិការណ៍ដែលស្ថានភាពតំបន់ និងសកល មានភាពមិនប្រាកដប្រជាកាន់តែ ខ្ពស់ និងស្របពេលដែលតំបន់ និងពិភពលោកទាំងមូលកំពុងផ្តល់អាទិភាពខ្ពស់ លើការលើកកម្ពស់ការប្រើប្រាស់បច្ចេកវិទ្យាឌីជីថល ជាពិសេសវឌ្ឍនភាពចុងក្រោយនៃបញ្ញាសិប្បនិម្មិត AI ។ ឯកឧត្តមឧបនាយករដ្ឋមន្រ្តី បន្តថា បច្ចេកវិទ្យាឌីជីថលបានក្លាយជាផ្នែកមួយដ៏សំខាន់នៃការរស់នៅ ការរៀនសូត្រ ការប្រកប អាជីវកម្ម និងការផ្តល់សេវាសាធារណៈជូនធុរជន ក៏ដូចជាជូនប្រជាជនទូទៅក្នុងយុគសម័យទំនើបនេះ ពោលគឺបច្ចេកវិទ្យាឌីជីថល បានចាក់ស្រេះក្នុងគ្រប់សកម្មភាពសង្គម-សេដ្ឋកិច្ច ហើយបានក្លាយជាកាតាលីករដ៏សំខាន់ និងមិនអាចខ្វះបាន ក្នុងការជំរុញនវានុវត្តន៍ និង កណើន ក៏ដូចជាការពង្រឹងភាពធន់នៃសេដ្ឋកិច្ច ។ សម្រាប់វិស័យឯកជនការចាប់យក និងការប្រើប្រាស់បច្ចេកវិទ្យាឌីជីថល ដែល មានលក្ខណៈកាន់តែនវានុវត្តន៍ គឺជាឧត្តមភាពមួយថ្មី និងជួយលើកកម្ពស់ប្រសិទ្ធភាព សមត្ថភាព និងគុណភាពនៃផលិតកម្ម កាត់ បន្ថយថ្លៃដើម តភ្ជាប់ខ្សែច្រវាក់ផលិតកម្ម និងធានានូវភាពប្រកួតប្រជែងក្នុងទីផ្សារ ។ ទាក់ទិនបច្ចេកវិទ្យាឌីជីថល, បណ្ឌិត សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងថា ជាទិសដៅរបស់សមាគម គឺ មានផែនការពង្រឹង និងពង្រីកចំណេះដឹងដល់សហគ្រិនលើផ្នែកបច្ចេកវិទ្យាឌីជីថល ដើម្បីទាញយកសក្តានុពលនៃបរិវត្តកម្មឌីជីថល សម្រាប់ជាមូលដ្ឋានគ្រឹះពង្រឹងអាជីវកម្ម និងការធ្វើពាណិជ្ជកម្ម។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន លើកឡើងបន្ថែមថា ជុំវិញបច្ចេកវិទ្យាឌីជីថលនេះដែរ ចំពោះវិស័យសាធារណៈ បាននិងកំពុងដើរតួនាទីជាគន្លឹះដ៏សំខាន់ ក្នុងការជំរុញការកែទម្រង់ដ៏មុតស្រួច និងស៊ីជម្រៅនៅកម្ពុជា ជាពិសេសពាក់ព័ន្ធនឹងការ- ផ្តល់សេវាសាធារណៈសម្រាប់ធុរកិច្ចថ្មី ដើម្បីកាត់បន្ថយភាពស្មុគស្មាញនៃការិយាធិបតេយ្យ បង្កើនប្រសិទ្ធភាពនៃរដ្ឋបាលសាធារណៈ ពង្រឹងអនុលោមភាព និងកែលម្អបរិយាកាសធុរកិច្ចក្នុងប្រទេសឲ្យកាន់តែប្រសើរឡើង សំដៅឆ្លើយតបទៅនឹងតម្រូវការសំណូមពរ និង បំណងប្រាថ្នាដ៏ពិសិដ្ឋរបស់ប្រជាជន និងធុរជន៕ អត្ថបទ៖ សុន រ៉ាឌី 

រាជរដ្ឋាភិបាលទម្លាក់ការព្យាករសេដ្ឋកិច្ចនៅត្រឹម ៤,១% ក្រោមសម្មតិកម្ម និងសូចនាករ​ម៉ាក្រូសេដ្ឋកិច្ច​ឆមាសទី១

2026/08/12 03:30:57 pm        312
Facebook Telegram Linkin
រាជរដ្ឋាភិបាលបានទម្លាក់ការព្យាករសេដ្ឋកិច្ចឆ្នាំ២០២៦ មកនៅត្រឹមរង្វង់ ៤,១% ក្រោម​មូលដ្ឋាន​សម្មតិកម្ម និងសូចនាករម៉ាក្រូ សេដ្ឋកិច្ច ក្នុងរយៈពេល៦ខែ ឆ្នាំ២០២៦ និងការគួបផ្សំ​នៃការ​ពិគ្រោះ​យោបល់​ជាមួយក្រសួង-ស្ថាប័ន និងវិស័យឯកជនពាក់ព័ន្ធនានា។ក្រសួងសេដ្ឋកិច្ច និងហិរញ្ញវត្ថុ បង្ហាញរបាយការណ៍ស្តីពីលទ្ធផលនៃការអនុវត្តថវិកាឆមាសទី១ និងការវាយតម្លៃលើការអនុវត្ត ច្បាប់ស្តីពីហិរញ្ញវត្ថុសម្រាប់ការគ្រប់គ្រង់ឆ្នាំ២០២៦ ឱ្យដឹងថា តាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ កំណើនសេដ្ឋ កិច្ចកម្ពុជាត្រូវបានព្យាករ នឹងសម្រេចបានក្នុងអត្រា ៥,០%, ដែលការវាយតម្លៃនេះត្រូវបានធ្វើឡើងនៅមុនពេលកម្ពុជាទទួលរងនូវកម្ម វិបាកផ្ទួនៗ ពោលគឺមុនការផ្ទុះឡើងនៃសង្គ្រាមឈ្លានពានពីប្រទេសថៃជាលើកទី២, និងការផ្ទុះឡើងនៃសង្គ្រាមនៅតំបន់មជ្ឈិមបូព៌ា ដែលរំពឹងគាំទ្រដោយ៖ (១)-ការបន្តរក្សាបាននូវចលនការរឹងមាំនៃវិស័យបម្រើដល់ការនាំចេញ ជាពិសេសវិស័យកម្មន្តសាលកាត់ដេរ និងកម្មន្តសាលមិនមែនកាត់ដេរ, (២)- ការបន្តងើបឡើងនៃអនុវិស័យបដិសណ្ឋារកិច្ច និងសេវាកម្មម្ហូបអាហារ, អនុវិស័យលក់ដុំ-រាយ, និងអនុវិស័យសំណង់-អចលនទ្រព្យ ដែលរំពឹងថាបន្តមាននិន្នាការវិជ្ជមាន និង (៣) វិស័យកសិកម្ម នឹងបន្តរក្សាបានស្ថិរភាពនៃ កំណើន។ សេដ្ឋកិច្ចកម្ពុជានៅបន្តជួបប្រឈមនឹងអន្តរកាលនៃពហុវិបត្តិ ក្នុងន័យថា ខណៈដែលការប្រែប្រួលរបបពាណិជ្ជកម្មសកល, ការបង្ក្រាបសកម្មភាពទឆបោកតាមប្រព័ន្ធបច្ចេកវិទ្យា បញ្ហាព្រំដែនកម្ពុជា-ថៃ បញ្ហាសង្គ្រាមនៅតំបន់មជ្ឈិមបូព៌ាបានកំពុងផ្ទុះឡើង។ ផ្អែកលើការវិវត្តនេះ, ការវាយតម្លៃស្ថានភាពសេដ្ឋកិច្ចក្នុងឯកសារក្របខ័ណ្ឌហិរញ្ញវត្ថុសាធារណៈរយៈពេលមធ្យមឆ្នាំ២០២៧- ២០២៩ បានកែសម្រួលការព្យាករកំណើនសេដ្ឋកិច្ចឆ្នាំ២០២៦ ពីអត្រា ៥,០% មកត្រឹមអត្រា ៤,២% ដោយសារ (១)-ផលប៉ះពាល់ ជាអវិជ្ជមាននៃការកើនថ្លៃប្រេងឥន្ធនៈសកល មកលើសកម្មភាពសេដ្ឋកិច្ចមួយចំនួនមាន វិស័យកសិកម្ម, ទេសចរណ៍, និងដឹកជញ្ជូន ខណៈការកើនឡើងសម្ពាធអតិផរណា បានបន្ទច់បង្អាក់ដល់សកម្មភាពចាយ និងប្រើប្រាស់ក្នុងស្រុក, (២)-កម្មវិបាកនៃការបន្តបិទខ្ទប់ ព្រំដែនកម្ពុជា-ថៃ មកលើវិស័យទេសចរណ៍, ការនាំចេញកសិផល និងប្រាក់បង្វែរឯកជន, និង (៣)- ផលប៉ះពាល់ជាអវិជ្ជមានក្នុង រយៈពេលខ្លី នៃការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា មកលើវិស័យសំណង់-អចលនទ្រព្យ និងវិស័យទេសចរណ៍។ គិតត្រឹមពាក់កណ្តាលឆ្នាំ២០២៦នេះ, ខណៈស្ថានភាពសេដ្ឋកិច្ចជារួម មានការវិវត្តទៅក្នុងទិសដៅដូចការរំពឹងទុកពីដើមឆ្នាំ ក្នុងក្របខ័ណ្ឌហិរញ្ញវត្ថុសាធារណៈរយៈពេលមធ្យមក៏ដោយ, ប៉ុន្តែនិន្នាការកំណើនតាមវិស័យ និងអនុវិស័យមួយចំនួនមានការប្រែប្រួល ខ្លាំង ដោយសារការទទួលរងនូវកម្មវិបាកក្នុងទំហំធំជាងការរំពឹងទុក ពិសេសវិស័យទេសចរណ៍ដែលទទួលកម្មវិបាកជាអវិជ្ជមានពេញ ទំហឹង ពីការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា និងសង្គ្រាមក្នុងតំបន់មជ្ឈិមបូព៌ា ក្នុងខណៈដែលវិស័យកសិកម្ម ក៏ទទួល រងនូវផលប៉ះពាល់ជាងការរំពឹងទុក ការកើនឡើងថ្លៃប្រេងឥន្ធនៈ និងធាតុចូលកសិកម្មមួយចំនួនដូចជាជីកសិកម្ម និងប្រេងជាដើម។ ក្រោមមូលដ្ឋានសម្មតិកម្ម និងសូចនាករម៉ាក្រូសេដ្ឋកិច្ច ក្នុងរយៈពេល៦ខែ គួបផ្សំនឹងការពិគ្រោះយោបល់ជាមួយក្រសួង-ស្ថាប័ន និងវិស័យឯកជនពាក់ព័ន្ធ, កំណើនសេដ្ឋកិច្ចកម្ពុជាក្នុងឆ្នាំ២០២៦នេះ ត្រូវបានវាយតម្លៃឡើងវិញថា នឹងសម្រេចបានក្នុងអត្រា ៤,១% ប៉ុណ្ណោះ។ កំណើនជារួម ទាបជាងការរំពឹងទុកបន្តិច ដោយសារការថមថយជាងការគ្រោងទុកនូវកំណើននៃវិស័យកសិកម្ម និង ទេសចរណ៍ និងការថមថយបន្តិចនូវកំណើននៃវិស័យកាត់ដេរ ខណៈដែលវិស័យលក់ដុំ-រាយ, ហិរញ្ញវត្ថុ, និងសំណង់-អចលនទ្រព្យ រក្សាបានកំណើនដូចការគ្រោងទុក។ ដោយឡែកវិស័យបម្រើការនាំចេញ ពិសេសវិស័យកម្មន្តសាលមិនមែនកាត់ដេរ ត្រូវបានវាយតម្លៃ ថា សម្រេចបានកំណើនល្អជាងការរំពឹងទុក ដែលនឹងជួយយឺតយោងកំណើនសេដ្ឋកិច្ចកម្ពុជាក្នុងឆ្នាំ២០២៦ជារួម៕ អត្ថបទ៖ សុន រ៉ាឌី 

សមាគមធនាគារ​នៅកម្ពុជា និងសមាគមមីក្រូហិរញ្ញវត្ថុកម្ពុជា សេចក្តីថ្លែងការណ៍រួមស្តីពី វីដេអូ​ឯកសារ​ពាក់ព័ន្ធ​នឹងករណីអតិថិជនឥណទាន ដែលត្រូវបានផ្សព្វផ្សាយនាពេលថ្មីៗនេះ

2026/08/12 02:14:51 pm        512
Facebook Telegram Linkin
ភ្នំពេញ៖ សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុ កម្ពុជា (CMA) ថ្ងៃ​ទី១២ ខែសីហា ឆ្នាំ២០២៦ បានសង្កេតឃើញថា នាពេលថ្មីៗនេះ អង្គការលីកាដូ (LICADHO) និង​បណ្តាញសារព័ត៌មានមួយ ចំនួនបន្តចេញផ្សាយ និងចែករំលែក​វីដេអូ​ឯកសារ​ពាក់​ព័ន្ធ​នឹង​ករណី​អតិថិជន​មួយចំនួនរបស់គ្រឹះស្ថានធនាគារ និងហិរញ្ញវត្ថុ ដែលបានកើតឡើងកន្លងមក។ សមាគមទាំងពីរ គោរពតួនាទីរបស់អង្គការសង្គមស៊ីវិល និងប្រព័ន្ធផ្សព្វផ្សាយ ក្នុងការលើកកម្ពស់ការយល់ ដឹងរបស់សាធារណជន និងការពារផលប្រយោជន៍ស្របច្បាប់របស់ប្រជាពលរដ្ឋ។ ទោះជាយ៉ាងណា វីដេអូឯកសារ ទាំងនោះបានបង្ហាញតែទិដ្ឋភាពមួយផ្នែកនៃអង្គហេតុ ដោយពុំបានឆ្លុះបញ្ចាំងពេញលេញអំពីវិធានការដែលបាន អនុវត្តជាបន្តបន្ទាប់ វឌ្ឍនភាព និងស្ថានភាពបច្ចុប្បន្ននៃករណីនីមួយៗឡើយ។ ការបង្ហាញព័ត៌មានដោយខ្វះ បរិបទពេញលេញបែបនេះ អាចធ្វើឱ្យសាធារណជនមានការភ័ន្តច្រឡំ ឬយល់ខុសពីស្ថានភាពជាក់ស្តែង ព្រមទាំង ប៉ះពាល់ដល់ទំនុកចិត្តរបស់សាធារណជនចំពោះវិស័យធនាគារ និងហិរញ្ញវត្ថុ។ ដូច្នេះ សមាគមទាំងពីរ សូមលើកទឹក ចិត្តឱ្យការផ្សព្វផ្សាយព័ត៌មានពាក់ព័ន្ធនឹងករណីទាំងនេះ ធ្វើឡើងឱ្យបានពេញលេញ ត្រឹមត្រូវ និងមានតុល្យភាព ដោយផ្អែកលើព័ត៌មានដែលបានផ្ទៀងផ្ទាត់ និងរួមបញ្ចូលទាំងបរិបទ ពេលវេលា ការវិវត្ត វិធានការដែលបានអនុវត្តជា បន្តបន្ទាប់ និងស្ថានភាពចុងក្រោយនៃករណីនីមួយៗ។ សមាគមទាំងពីរ បន្តយកចិត្តទុកដាក់តាមដានយ៉ាងហ្មត់ចត់ចំពោះការពិនិត្យ និងដោះស្រាយបណ្ដឹងប្រកបដោយគោលការណ៍យុត្តិធម៌ តម្លាភាព ទាន់ពេលវេលា និងរក្សាការសម្ងាត់ស្របតាមច្បាប់និងបទប្បញ្ញត្តិជាធរមាន។ ផ្នែកតាមព័ត៌មានដែលបានបញ្ជាក់ដោយគ្រឹះស្ថានពាក់ព័ន្ធ ករណីដែលត្រូវបានលើកយកមកបង្ហាញក្នុង វីដេអូទាំងនេះ ត្រូវបានសម្របសម្រួល ពិនិត្យ តាមដាន និងដោះស្រាយតាមនីតិវិធីជាធរមាន ដោយមានការព្រម ព្រៀងរវាងអតិថិជន និងគ្រឹះស្ថានពាក់ព័ន្ធផងដែរ។ កន្លងមក សមាគមទាំងពីរ ធ្លាប់បានអញ្ជើញអង្គការលីកាដូ ព្រម ទាំងអង្គការសង្គមស៊ីវិលផ្សេងៗទៀត មកចូលរួមកិច្ចសន្ទនាជាមួយភាគីពាក់ព័ន្ធ ជាពិសេសក្នុងកិច្ចសន្ទនាកម្រិត ខ្ពស់រវាងពហុភាគីពាក់ព័ន្ធស្តីពី «មីក្រូហិរញ្ញវត្ថុនៅកម្ពុជា» ដើម្បីស្វែងរកដំណោះស្រាយ និងការពារផលប្រយោជន៍ ជូនប្រជាជន ប៉ុន្តែអង្គការលីកាដូពុំបានចូលរួមឡើយ ហើយនៅតែបន្តផ្សព្វផ្សាយវីដេអូឯកសារជាបន្តបន្ទាប់ ក្នុង ចេតនាបម្រើផលប្រយោជន៍អង្គការ និងពុំបានចូលរួមដោះស្រាយបញ្ហាជូនប្រជាពលរដ្ឋដែលពាក់ព័ន្ធ។ គួរបញ្ជាក់ជូនថា ក្នុងកិច្ចសន្ទនាកម្រិតខ្ពស់រវាងពហុភាគីពាក់ព័ន្ធស្តីពី «មីក្រូហិរញ្ញវត្ថុនៅកម្ពុជា» បានដាក់ចេញនូវសកម្មភាព អាទិភាពចំនួន ២២ សម្រាប់ភាគីពាក់ព័ន្ធរួមទាំងស្ថាប័នរាជរដ្ឋាភិបាល វិស័យឯកជន និងអង្គការសង្គមស៊ីវិល ដើម្បីអនុវត្ត ជាពិសេសទៅលើកិច្ចការពារអតិថិជន។ ក្នុងចំណោមសកម្មភាពអាទិភាពនោះ ភាគីពាក់ព័ន្ធបានអនុវត្តបញ្ចប់ចំនួន ១៤សកម្មភាពអាទិភាព និង៨សកម្មភាពអាទិភាពកំពុងអនុវត្តបន្ត។ សមាគមទាំងពីរ បន្តប្តេជ្ញាចិត្តអនុវត្តស្របតាមច្បាប់ និងបទប្បញ្ញត្តិជាធរមាន ព្រមទាំងសហការជាមួយភាគី ពាក់ព័ន្ធ ដើម្បីពង្រឹងការផ្តល់សេវាហិរញ្ញវត្ថុប្រកបដោយការទទួលខុសត្រូវ កិច្ចការពារអតិថិជន ការដោះស្រាយ បណ្ដឹង និងការអប់រំផ្នែកហិរញ្ញវត្ថុ។ សមាគមទាំងពីរ នៅតែបន្តកិច្ចសន្ទនាប្រកបដោយការស្ថាបនា ជាមួយភាគីពាក់ ព័ន្ធទាំងអស់ ដើម្បីសម្រេចបានដំណោះស្រាយជាក់ស្តែង កិច្ចការពារអតិថិជន និងពង្រឹងទំនុកចិត្តសាធារណជន មក លើប្រព័ន្ធធនាគារ៕ អត្ថបទ៖ ធូ វិរៈ 

គិតត្រឹមខែឧសភាឆ្នាំនេះ CGCC បានធានាឥណទានមានទំហំជាង ៥៧៥លានដុល្លារ គាំទ្រ​ដល់​អាជីវកម្ម និងពាណិជ្ជកម្ម

2026/08/06 02:35:43 pm        223
Facebook Telegram Linkin
សាជីវកម្មធានាឥណទានកម្ពុជា (CGCC) គិតត្រឹមខែឧសភា ឆ្នាំ២០២៦នេះ បានធានា​ឥណទាន​​មាន​ទំហំទឹកប្រាក់សរុបជាង ៥៧៥ លានដុល្លារអាមេរិក នៃកម្ចី​របស់​សហគ្រាស​ក្នុង​ស្រុក ពីគ្រឹះស្ថានធនាគារនិងហិរញ្ញវត្ថុ ដើម្បីគាំទ្រដល់ការធ្វើអាជីវកម្ម និង ពាណិជ្ជកម្ម។  លោក ណូ លីដា អគ្គនាយកសាជីវកម្មធានាឥណទានកម្ពុជា (CGCC) លើកឡើងក្នុងកិច្ចពិភាក្សា ស្តីពីអត្ថប្រយោជន៍ និង ឱកាសនៃការទទួលបានការគាំទ្រហិរញប្បទានសម្រាប់ធុរកិច្ច នៅក្នុងវេទិកាថ្នាក់ជាតិស្ដីពីហិរញ្ញប្បទានសម្រាប់ធុរកិច្ចឆ្នាំ២០២៦ថា CGCC គឺជាស្ថាប័នគាំទ្រលើការធានាឥណទានរបស់រាជរដ្ឋាភិបាល ពោលគឺ ការធានាលើប្រាក់កម្ចីដែលធនាគារផ្តល់ឱ្យម្ចាស់ អាជីវកម្ម ដោយ CGCC ធានាទៅលើហានីភ័យឥណទាន ក្នុងនោះប្រសិនបើ CGCC ធានាលើកម្ចីណាមួយ ហើយកម្ចីនោះត្រូវខូច ខាត (អ្នកខ្ចីអត់មានលទ្ធភាពសងត្រឡប់មកធនាគារ) ធនាគារដែលជាដៃគូអាចមកទារសំណងពី CGCC ដោយផ្ទាល់។ លោក បន្តថា តាមរយៈនៃការធានាឥណទារបស់ CGCC នេះ គឹបានបង្កើតទំនុកចិត្តដល់ធនាគារ ក្នុងការផ្តល់ឥណទានទៅ ម្ចាស់អាជីវកម្ម ដែលតាមរយៈនេះ គឺការចូលរួមបង្កើនលទ្ធភាពនៃការផ្តល់ឥណទាន ដោយបញ្ចេញឥណទានច្រើនជាងមុន និងម្ខាង ទៀតគឺគាំទ្រដល់ម្ចាស់អាជីវកម្មក្នុងការទទួលបានឥណទានសម្រាប់ពង្រីកអាជីវកម្ម ជាក់ស្តែងតាមរយៈនៃការទទួលបានឥណទាន នេះ បានកាត់បន្ថយនូវលក្ខខណ្ឌតម្រូវជាច្រើន ធ្វើឱ្យម្ចាស់អាជីវកម្មទទួលបានឥណទានងាយជាងមុនផងដែរ។ លោក ណូ លីដា បន្តឱ្យដឹងថា ជុំវិញការធានាឥណទាននេះ CGCC មានផែនការធានាឥណទានក្នុងមួយឆ្នាំឱ្យបានជាង ២០០ លានដុល្លារអាមេរិក ជាក់ស្តែងគិតត្រឹមរយៈពេល ៧ ខែ ឆ្នាំ២០២៦នេះ សាជីវកម្មធានាឥណទានកម្ពុជា បានអនុវត្តជិត ៥០ ភាគរយរួចចហើយ ក្នុងនោះបើគិតសរុបទំហំឥណទានដែលសាជីវកម្មធានាឥណទានកម្ពុជាបានធានា ត្រឹមខែឧសភា ឆ្នាំ២០២៦ នេះ, មានចំនួនប្រមាណជាង ៥៧៥ លានដុល្លារអាមេរិក ដែលថវិកាទាំងនេះត្រូវបានចាក់បញ្ជូលទៅក្នុងទុនបង្វឹលរបស់ម្ចាស់ អាជីវកម្មជិត ១ ម៉ឺនក្រុមហ៊ុន/សហគ្រាស។ តាមរយៈនៃវេទិកានេះដែរ, លោក ណូ លីដា ក៏បានអំពាវនាវដល់ម្ចាស់អាជីវកម្មរួមមាន សហគ្រាសមីក្រូ តូច មធ្យម និងធំ ដែលគិតថាសហគ្រាសរបស់ខ្លួនមានសក្តានុពល និងមិនទាន់ទទួលបានព័ត៌មានលើការធានាឥណទាន សូមទាក់ទងទៅកាន់ សាជីវកម្មធានាឥណទានកម្ពុជា (CGCC) ដើម្បីទទួលបានការពិគ្រោះយោបល់ និងណែនាំធនាគាដែលជាដៃគូ ក្នុងការទទួលបាន ឥណទានសម្រាប់ការស្តារអាជីវកម្ម ក៏ដូចជាពង្រឹងអាជីវកម្មឱ្យរីកចម្រើន ព្រោះ CGCC ធានានូវគ្រប់ប្រភេទឥណទានទាំងអស់ ដូចជា ឥណទានសម្រាប់ទុនបង្វឹង និងឥណទានសម្រាប់ការវិនិយោគរយៈពេលខ្លី និងវែងជាដើម៕ អត្ថបទ៖ សុន រ៉ាឌី​

វិស័យឯកជន៖ ការវិនិយោគលើកម្លាំងពលកម្មជំនាញ កាន់តែទាក់ទាញវិនិយោគិន​ឱ្យមក​បណ្តាក់ទុន​នៅកម្ពុជា

2026/08/05 03:05:01 pm        325
Facebook Telegram Linkin
ភ្នំពេញ៖ ក្រុមហ៊ុនឯកជនក្នុងវិស័យយានយន្តនៅកម្ពុជា បានលើកឡើងថា ជាការកត់សម្គាល់ទៅលើការវិនិយោគកម្លាំងពលកម្មជំនាញរបស់រាជរដ្ឋាភិបាល ជាពិសេសតាមរយៈកម្មវិធីបណ្តុះបណ្តាលបច្ចេកទេស និងវិជ្ជាជីវៈ (TVET) គឺជាកត្តាស្នូលក្នុងការកសាងទំនុកចិត្ត និងទាក់ទាញវិនិយោគិនបរទេសមកបណ្តាក់ទុនលើឧស្សាហកម្មបច្ចេកវិទ្យា និងទំនើបកម្មនៅកម្ពុជា។ ក្នុងបទសម្ភាសន៍ជាមួយ លោក សាយ រតនៈ ប្រធាននាយកដ្ឋានបណ្តុះបណ្តាលធនធានមនុស្ស តំណាងក្រុមហ៊ុន អ អឹម អេ (ខេមបូឌា) នាព្រឹកថ្ងៃទី៥ ខែសីហានេះ លោកបានឱ្យព័ត៍មាន ប៊ីធីវី ដឹងថា រហូតមកដល់បច្ចុប្បន្ននេះ ពិតជាមានមោទនភាពដែលក្រុមហ៊ុនបានពាំនាំនូវការវិនិយោគមួយដ៏ធំ ជាពិសេសការបើករោងចក្រដំឡើងនិងផលិតរថយន្តនៅកម្ពុជា។ លោកបានបន្តថា សម្រាប់ក្រុមហ៊ុនក៏រីករាយសហការជាមួយរាជរដ្ឋាភិបាល ដែលមានក្រសួងការងារ និងបណ្តុះបណ្តាលវិជ្ជាជីវៈ ជាសេនាធិការក្នុងការបណ្តុះបណ្តាលធនធានមនុស្សដើម្បីឆ្លើយតបតម្រូវការលើវិស័យយានយន្តនេះ។ លោកបានឱ្យដឹងទៀតថា ជាមហិច្ឆតារបស់ក្រុមហ៊ុន ក៏ដូចជាមហិច្ឆតារបស់រាជរដ្ឋាភិបាល គឺចង់ឱ្យ កម្ពុជាក្លាយជាប្រទេសផលិតរថយន្ត ពោលមិនមែនផលិតតែក្នុងស្រុកទេ គឺអាចនាំចេញទៅក្រៅថែមទៀត ហើយក្រុមហ៊ុនក៏គ្រោងនឹងផលិតគ្រឿងបន្លាស់មួយចំនួនទៀត ដូច្នេះតម្រូវការកម្លាំងពលកម្មជំនាញក៏កាន់តែមានខ្ពស់ដែរដើម្បីឆ្លើយតបទៅនឹងត​ម្រូវការផលិត និងបំពេញចំណុចខ្វះខាតនៅក្នុងវិស័យឧស្សាហកម្មនានា ជាពិសេសវិស័យយានយន្តនេះតែម្តង។ លោកបន្តថា ក្នុងរយៈពេល ៥ឆ្នាំចុងក្រោយនេះ បាន​មើលឃើញថា ក្រសួងការងារ និងបណ្តុះបណ្តាលវិជ្ជាជីវៈ ក៏ដូចជាវិស័យបណ្តុះបណ្តាលជំនាញបច្ចេកទេស និងវិជ្ជាជីវៈ (ធីវ៉េត) ទាំងមូល គឺបានចូលរួមយ៉ាងសកម្មជាមួយឧស្សាហកម្ម​យានយន្តនៅកម្ពុជាតែម្តង។ អញ្ចឹងសង្ឃឹមថា ប្រទេសកម្ពុជាមិនមែនត្រឹមតែផលិតតែរថយន្តទេ គឺអាចផលិតជាគ្រឿងបន្លាស់ផ្សេងៗទៀត ដែលបង្កើតឱកាសការងារជាច្រើនដល់ប្រជាពលរដ្ឋក្នុងស្រុកុ។ លោក សាយ រតនៈ បានបញ្ជាក់ថា ទាក់ទិនកម្លាំងពលកម្មជំនាញនេះដែរ បើសិនជាកម្ពុជាមានធនធានច្រើន ទី១.អាចជំរុញឱ្យកម្ពុជា ជាកន្លែងទាក់ទាញវិនិយោគធំៗ ទី២.ប្រជាពលរដ្ឋដែលមានជំនាញច្បាស់លាស់មួយក្នុងជីវិត គឺអាចងាយស្រួលរកប្រាក់ចំណូលបានខ្ពស់ចិញ្ចឹមជីវិតបានយ៉ាងល្អ។ ដោយឡែក វិស័យឯកជនក៏សប្បាយចិត្ត ដោយសារមានធនធានល្អៗវិនិយោគលើធនធានមនុស្ស។ និយាយជារួម ភាគីដែលទទួលផលចំណេញចុងក្រោយគេ គឺប្រទេសកម្ពុជាទំាងមូលតែម្តង ដែលធ្វើឱ្យសេដ្ឋកិច្ចជាតិឈានទៅរកភាពរីកចម្រើន។ នេះតាមការបញ្ជាក់បន្ថែមរបស់លោក រតនៈ។ ជាមួយនេះ លោកបានអំពាវនាវដល់យុវជន ឱ្យងាកចាប់យកជំនាញមួយច្បាស់លាស់ ពិសេសចូលរៀនជំនាញវិស័យបច្ចេកទេស និងវិជ្ជាជីវៈ ដែលរៀនរយៈពេលខ្លី ងាយស្រួលស្វែងរកការងារ និងមានចំណូលបានច្រើន។ និងបានអំពាវនាវបន្ថែមទៀតទៅដល់អាណាព្យបាលទាំងអស់ ជំរុញកូនចៅចាប់យកជំនាញបច្ចេកទេស និងវិជ្ជាជីវៈ។ លោកបានបញ្ជាក់ដដែលទៀតថា មានតែវិស័យបច្ចេកទេស និងវិជ្ជាជីវៈ ដែលជាច្រកដ៏សំខាន់ក្នុងការជំរុញឱ្យការរៀនត្រឹមរយៈពេលខ្លី តែអាចរកចំណូលបានលឿន និងច្រើនទៅតាមសមត្ថភាពជាក់ស្តែង ខណៈរាជរដ្ឋាភិបាលក៏បានខិតខំប្រឹងប្រែងណាស់ និងគ្រប់សកម្មភាពដើម្បីទាក់ទាញអ្នកវិនិយោគិនពីបរទេស និងស្វែងរកទីផ្សារពាណិជ្ជកម្មអន្តរជាតិមកបណ្តាក់ទុនរកស៊ីនៅកម្ពុជា ក្នុងគោលបំណងជំរុញកំណើនសេដ្ឋកិច្ច និងបង្កើតការងារជូនប្រជាពលរដ្ឋ។ យោងតាមក្រសួងការងារ និងបណ្តុះបណ្តាលវិជ្ជាជីវៈ គិតក្នុងរយៈពេលឆមាសទី១ ឆ្នាំ២០២៦នេះរោងចក្រ សហគ្រាសនៅកម្ពុជា បានកើនឡើងចំនួនជាង ៨០០រោងចក្រ សហគ្រាស និងបានបង្កើតឱកាសការងារជាង ៩ម៉ឺនកន្លែង ជូនដល់ប្រជាពលរដ្ឋ ដែលភាគច្រើននៅក្នុងវិស័យឧស្សាហកម្ម ក្នុងនោះរោងចក្រក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប៕

ប្រធាន IDI៖ កម្ពុជានឹងបន្តស្រូបយកការវិនិយោគបន្ថែម ខណៈក្រុមហ៊ុនជាច្រើន​កំពុង​ចាប់​អារម្មណ៍​ការធ្វើធុរកិច្ចនៅកម្ពុជា

2026/08/05 11:00:48 am        362
Facebook Telegram Linkin
ប្រធានក្រុមប្រឹក្សាភិបាលសមាគម (IDI) រំពឹងថាកម្ពុជា​នឹង​បន្ត​ស្រូប​យក​វិនិយោគិន​បរទេស​មក​បណ្តាក់​ទុន​បន្ថែមទៀត ជាពិសេស លើឧស្សាហកម្មធុនកណ្តាល និងធុនធ្ងន់ និងត្រូវការ​កម្លាំង​ពលកម្ម​ច្រើន ខណៈក្រុមហ៊ុនមេមួយដែលមានបុត្រសម្ព័ន្ធជាង ១ ៨០០ សហគ្រាស បានកំពុង​សម្លឹង​មើល​ឱកាសវិនិយោគនៅកម្ពុជា។ ឧកញ៉ាបណ្ឌិត ហោ សេរីវឌ្ឍន៍ ប្រធានក្រុមប្រឹក្សាភិបាលសមាគមវិនិយោគ នវានុវត្តន៍ និង​អភិវឌ្ឍន៍​ (IDI) លើកឡើងក្នុង កិច្ចសម្ភាសន៍ជាមួយ BTV ស្តីអំពីបរិយាកាសវិនិយោគ និងការ​ធ្វើ​ធុរកិច្ច​ផ្សេង​ៗនៅកម្ពុជាថា ជុំវិញបរិយាកាសវិនិយោគ, រាជរដ្ឋាភិបាល កម្ពុជាបានដា​ក់​ចេញ​នូវ​ច្បាប់​ស្តីពី​វិនិយោគថ្មី និងអនុក្រឹត្យពាក់ព័ន្ធដែលសម្របសម្រួលដោយ ក្រុមប្រឹក្សាអភិវឌ្ឍន៍កម្ពុជា (CDC) តាមរយៈយន្តការលើកទឹកចិត្តផ្នែកសារពើពន្ធ ការលើកលែងពន្ធលើប្រាក់ចំណូល និង​ការ​លើក​លែងពន្ធនាំចូលលើធាតុចូលផលិតកម្ម រួមជាមួយការប្រើប្រាស់យន្តការច្រកចេញ-ចូល​តែ​មួយ ដើម្បីទាក់ទាញ និងជំរុញវឌ្ឍនភាពធុរកិច្ចជាដើម។ ឧកញ៉ាបណ្ឌិត បន្តថា តាមរយៈឱកាសវិនិយោគនេះដែរ សមាគម IDI ក្នុងនាមជាវិស័យឯកជន បានកំពុងយកចិត្តទុកដាក់ រួមចំណែកជាមួយរាជរដ្ឋាភិបាល ដោយបានសហការជាមួយក្រុមហ៊ុន ញូវតាចេន ដែលក្រុមហ៊ុនមួយនោះមានបុត្រសម្ព័ន្ធជាង ១ ៨០០ សហគ្រាស ទាំងនៅក្នុងប្រទេសចិន និងក្រៅប្រទេសផងដែរ។ តាមរយៈនេះ ក្រុមហ៊ុន ញូវតាចេន គឺជាស្ពានផ្សារភ្ជាប់ទៅដល់ សហគ្រាសទាំងនោះយ៉ាងសំខាន់ ក្នុងការអូសទាញមកវវិនិយោគនៅកម្ពុជា។ ឧកញ៉ាបណ្ឌិត បន្តឱ្យដឹងថា ក្រុមហ៊ុន ញូវតាចេន បាន ចុះមកសិក្សានៅកម្ពុជា ពីឱកាសវវិនិយោគច្រើនលើករួចមកហើយ នឹងបានឱ្យតម្លៃខ្ពស់អំពីសក្តានុពលវវិនិយោគនៅកម្ពុជាផងដែរ ហើយតាមរយៈនេះ ឧកញ៉ាបណ្ឌិត រំពឹងថា កម្ពុជានឹងស្រូបយកឱកាសវិនិយោគបន្ថែមទៀត ជាពិសេសលើឧស្សាហកម្មកណ្តាលធុន ធ្ងន់ និងធុនធ្ងន់ផ្សេងៗទៀត ដើម្បីឱ្យកម្ពុជាឈានទៅប្រកួតប្រជែងខ្សែច្រវាក់ផលិតកម្មសកល។  ទាក់ទិនកាវិនិយោគ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លើកឡើងក្នុងវេទិកាថ្នាក់ជាតិស្ដីពីហិរញ្ញប្បទានសម្រាប់ធុរកិច្ចឆ្នាំ២០២៦ ថា រាជរដ្ឋាភិបាលបានដាក់ចេញ និងកំពុងជំរុញអនុវត្តនូវ កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ចក្នុងបរិការណ៍សកល ដែល មានមិនប្រាកដប្រជាខ្ពស់ ដើម្បីគាំពារកំណើនសេដ្ឋកិច្ច ជាពិសេសក្នុងវិស័យដែលរំពឹងទុកនឹងមានកំណើនយឺត លើកកម្ពស់ភាពប្រ កួតប្រជែងបង្កើនពិពិធកម្ម និងការសម្របខ្លួនទៅនិងការប្រែប្រួលនៃរបរពាណិជ្ជកម្មអន្តរជាតិ។ ជុំវិញការវិនិយោគនេះ, នៅក្នុងឆមាសទី១​ ឆ្នាំ២០២៦ បើតាមរបាយការណ៍ក្រុមប្រឹក្សាអភិវឌ្ឍន៍កម្ពុជា អនុម័តគម្រោងវិនិយោគបាន ចំនួន ២៧៦ គម្រោង មានទំហំទុនវិនិយោគប្រមាណ ៤,៤ ពាន់លានដុល្លារអាមេរិក បើធៀបរយៈពេលដូចគ្នានិងឆ្នាំ២០២៥ មាន ការថមថយ គឺដោយបញ្ហាប្រឈមទាំងខាងក្នុងនិងខាងក្រៅ៕ អត្ថបទ៖ សុន រ៉ាឌី

ឆ្នាំ២០២៧ ធនាគារ SME គ្រោងបញ្ចេញថវិកា ១០០លានដុល្លារ គាំទ្រដល់វិស័យអាទិភាព និង​ធុរកិច្ច​បង្កើតថ្មី

2026/08/04 12:30:09 pm        638
Facebook Telegram Linkin
ធនាគារសហគ្រាសធុនតូច និងមធ្យមកម្ពុជា ដែលជាធនាគារគោលនយោបាយ នៅក្នុង​ឆ្នាំ​២០២៧ ​ខាងមុខនេះ គ្រោងបញ្ចេញ ឥណទាន ១០០ លានដុល្លារ ខ្ពស់ជាង​ទំហំ​ឥណទាន​ឆ្នាំ​២០២៦​ គាំទ្រដល់វិស័យអាទិភាពផ្នែកកែច្នៃ និងវិស័យកម្មន្តសាល និងគម្រោងដល់​ធុរកិច្ច​បង្កើត​ថ្មី។​ លោក ជា សុភ័ក្ត អគ្គនាយកធនាគារសហគ្រាសធុនតូច និងមធ្យម​កម្ពុជា​លើ​ក​ឡើង​ក្នុង​កិច្ច​ពិភាក្សា​ ស្តីពីអត្ថប្រយោជន៍ និងឱកាសនៃការទទួលបានការគាំទ្រហិរញប្បទានសម្រាប់ធុរកិច្ច ក្នុង​វេទិកាថ្នាក់ជាតិ ស្ដីពីហិរញ្ញប្បទានសម្រាប់ធុរកិច្ចឆ្នាំ២០២៦ ថា ធនាគារសហគ្រាសធុនតូច និង​មធ្យមកម្ពុជា បានបង្កើតឡើងមានចំនួន៧ទីតាំង នៅតាមបណ្តារាជធានី-ខេត្ត និងបាន បញ្ចេញ​ឥណទានសរុបមានចំនួនជាង ២៤០ លានដុល្លារអាមេរិក ក្នុងនោះបើបូក​សរុប​ជាមួយ​សហ​ធនាគារដៃគូ បានបញ្ចេញ ប្រមាណជាង ៦០០ លានដុល្លារអាមេរិក ទៅលើអាតិថិជនជាង ៣ ពាន់នាក់។ លោក បន្តថា ចំពោះការផ្តល់ឥណទាននេះ ធនាគារ SME បានអនុវត្ត៣ឆ្នាំរំកិល ក្នុងនោះ​សម្រាប់​ឆ្នាំ​២០២៦នេះ ធនាគារ SME មានបញ្ចប់ឥណទាន ៨០ លានដុល្លារ គិតនៅក្នុង​រយៈ​ពេល​៦​ខែ ឆ្នាំ២០២៦នេះ បានបញ្ចេញឥណទានអស់ប្រមាណ ៥៥ ភាគរយរួចហើយ។ ចំណែក​នៅ​ឆ្នាំ​២០២៧ ធនាគារ SME គ្រោងកញ្ចប់ឥណទានប្រមាណ ១០០ លានដុល្លារ និងនៅក្នុងឆ្នាំ ២០២៨ ត្រូវបានគ្រោងចំនួន ១២០ លានដុល្លារ ដើម្បីគាំទ្រដល់វិស័យអាទិភាព ជាពិសេស​ការ​កែច្នៃ​ និងវិស័យកម្មន្តសាល នឹង គម្រោងគាំទ្រដល់ធុរកិច្ចបង្កើតថ្មីផងដែរ។ លោក ជា សុភ័ក្ត បន្ថែមថា ជុំវិញការផ្តល់ឥណទាននេះ ធនាគារ SME បាន​កែ​សម្រួល​នូវ​នីតិវិធី​មួយ​ចំនួន​ ក្នុងនោះសម្រាប់ គម្រោងដែលកំពុងអនុវត្ត នឹងត្រូវពិនិត្យឡើងវិញផងដែរ ប្រសិនក្នុង​ករណី​ដែល​អាចសម្រួលបាន គឺមានការបន្ធូបន្ថយ ដោយផ្តល់ នូវលក្ខខណ្ឌកាន់តែងាយស្រួល, ក្រៅ​ពី​នេះ ធនាគារ SME ក៏គ្រោងពង្រីកវិសាលភាពផ្តល់ឥណទានដល់ធុរកិច្ចបង្កើតថ្មី ជា​ពិសេស ​ការគិតគូរលើការផ្តល់ឥណទានដែលមានទ្រព្យបញ្ចាំ ទៅជាការ​ផ្តល់​ឥណទាន​ដែល​គ្មាន​ទ្រព្យ​បញ្ចាំ ​ដែលនឹងអនុវត្តទៅតាមកម្រិត នៃសេដ្ឋកិច្ចរបស់កម្ពុជាជាក់ស្តែង។ ជុំវិញការ​ផ្តល់ឥណទាននេះ ឯកឧត្តមបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច និង​ហិរញ្ញ​វត្ថុ​ លើកឡើងឱ្យដឹងថា គិត​មកដល់ពេលនេះ ធនាគារសហគ្រាសធុនតូច និងមធ្យមកម្ពុជា បាន​បញ្ចេញ​នូវ​ឥណទានសរុបប្រមាណ ៦៤៧ លានដុល្លារអា មេរិក ដល់សហគ្រាសមានចំនួនជិត ៤ ពាន់ ដោយក្នុងនោះធនាគារសហគ្រាសធុនតូច និងមធ្យមកម្ពុជា បានបញ្ចេញឥណទាន ផ្ទាល់​ខ្លួន​ មានទំហំប្រមាណ ២៤២ លានដុល្លារអាមេរិក ដល់សហគ្រាសជិត ៩០០ សហគ្រាស​សរុប​ផ​​ង​ដែរ​៕ អត្ថបទ៖ សុន រ៉ាឌី​

ប្រធានសហព័ន្ធស្រូវអង្ករ៖ ការនំាចេញកម្ពុជាក្នុងឆ្នាំ២០២៦នេះ នឹងអាចសម្រេចបាន ១ លានតោន

2026/08/03 11:29:47 am        384
Facebook Telegram Linkin
ប្រធានសហព័ន្ធស្រូវអង្ករកម្ពុជា រំពឹងថា ការនាំចេញអង្កររបស់កម្ពុជានៅក្នុងឆ្នាំ២០២៦នេះ នឹង​អាច​សម្រេច​បាន​តាមគោលដៅ ១លានតោន ខណៈនៅក្នុងរយៈពេល ៧ខែមកនេះ កម្ពុជា​បាន​នាំ​ចេញ​អង្ករ​បាន​ជិត ៧០ម៉ឺនតោនរួចហើយ កៀកនឹងគោលដៅកំណត់ ដែល​ដាក់​ចេញ​ដោយ​រាជ​រដ្ឋាភិបាល​។ឧកញ៉ាបណ្ឌិត ឡាយ ឈុនហួ ប្រធានសហព័ន្ធស្រូវអង្ករកម្ពុជា លើកឡើង​ក្នុង​កិច្ច​ពិភាក្សា​ស្តីពី​អត្ថ​ប្រយោជន៍ និងឱកាស នៃការទទួលបានការគាំទ្រហិរញប្បទានសម្រាប់ធុរកិច្ច នៅក្នុង​វេទិកា​ថ្នាក់​ជាតិ​ ស្ដីពីហិរញ្ញប្បទានសម្រាប់ធុរកិច្ចឆ្នាំ២០២៦ថា សហព័ន្ធស្រូវអង្ករកម្ពុជា មាន​សមាជិក​ប្រមាណ​ជាង​២៤០ ដែលមានប្រតិបត្តិការនៅលើរោងម៉ាស៊ីនខ្នាតតូច មធ្យម រោងម៉ាស៊ីន ខ្នាតធំ និង​អ្នក​នាំចេញខ្នាតធំ រួមជាមួយសេវាករពាក់ព័ន្ធនានា ដោយមានបេសកកម្ម គឺការ​ពង្រឹង​ភាព​ប្រកួត​ប្រជែង ​និងផ្សារភ្ជាប់ជាមួយទីផ្សារ ក្នុងនោះបើសម្លឹងទៅទីផ្សារពិភពលោក សហព័ន្ធ​ស្រូវ​អង្ក​រ​កម្ពុជា​ គឺជាសហព័ន្ធដែលមានវ័យក្មេង បានកំពុងឈរជើង យ៉ាងរឹង​មាំ​នៃ​ការ​នាំ​ចេញ​អង្ករ​របស់​កម្ពុជា​។ឧកញ៉ាបណ្ឌិត បន្តឱ្យដឹងថា ចំពោះទីផ្សារនាំចេញ, នៅក្នុងឆ្នាំ២០២៥ កន្លងមកនេះ កម្ពុជា​បាន​នាំ​ចេញ​អង្ករស​ម្រេច​បានប្រមាណ ៩៤ ម៉ឺនតោន ចំណែកនៅក្នុងរយៈពេល ៧ខែ ឆ្នាំ២០២៦នេះ យើង​បាននាំចេញទៅកាន់ទីផ្សារអន្តរជាតិសម្រេចបាន ប្រមាណជិត ៧០ ម៉ឺនតោនរួចហើយ។ ដូច្នេះ​នៅ​ក្នុង​ឆ្នាំ២​០២៦​នេះ ​ឧកញ៉ាបណ្ឌិតរំពឹងថា ការនាំចេញអង្កររបស់កម្ពុជានឹងអាច សម្រេច​បាន​តាម​ការ​ដាក់​ចេញ​នូវ​គោល​ដៅ​យុទ្ធ​សាស្ត្រ ក្នុងការជំរុញការនាំចេញអង្ករឱ្យបាន ១ លាន​តោន​ក្នុ​ង​មួយ​ឆ្នាំ​ ក្នុងការពង្រីក ទីផ្សារអន្តរជាតិ និងលើកកម្ពស់សេដ្ឋកិច្ចជាតិ។ឧកញ៉ាបណ្ឌិត ឡាយ ឈុនហួ បន្ថែមថា អ្វីដែលអាច​ធ្វើ​ឱ្យ​ស្រូវ​អង្ករ​កម្ពុជា​ទទួល​បាន​ជោគ​ជ័យ​ជា​បន្ត​បន្ទាប់​ គឺបានកើតចេញពីកត្តាជាច្រើន ជាពិសេសកិច្ចសហការរវាងរដ្ឋ​ និងឯកជន៖ ការ​ពង្រឹង​ភាព​ជា​ដៃគូ​រវាង​រាជរដ្ឋាភិបាល និងវិស័យឯកជន ដើម្បីដោះស្រាយបញ្ហាប្រឈម និង​ស្វែង​រក​ទី​ផ្សារ​ថ្មីៗ​។ ចំណែកការផ្តល់ហិរញ្ញប្បទានសម្រាប់ស្រូវអង្ករវិញឃើញថា នៅមានភាពស្មុគ ស្មាញ​លើ​ការ​ដាក់​ទ្រព្យ​បញ្ចាំ ការកម្ចីមានរយៈពេលខ្លី និងមានទំហំកម្ចីតូចជាដើម។ឯកឧត្តមបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងឱ្យដឹងថា ជុំវិញ​ការ​ផ្តល់ឥណទានេះ ធនាគារអភិវឌ្ឍន៍ជនបទ និងកសិកម្ម គិតមកដល់ពេលនេះ បានផ្តល់​ឥណ​ទាន​សរុប​ប្រមាណ ៥៣១ លានដុល្លារអាមេរិក ដល់ សហគ្រាសធុនតូច និងមធ្យម ក្រុមហ៊ុន សហ​គមន៍​កសិកម្ម និងតួអង្គក្នុងវិស័យច្រវាក់តម្លៃកសិកម្ម និងកសិ-ឧស្សាហកម្ម ដោយ ក្នុង​នោះ​ឥណ​ទាន​គាំទ្រ​ដល់វិស័យស្រូវអង្ករកម្ពុជាមានចំនួនច្រើនជាងគេ ដោយមានប្រមាណ ៣៥ ភាគ​រយ​នៃ​ឥណទាន​សរុប​៕ អត្ថបទ៖ សុន រ៉ាឌី​

ឆមាសទី១ឆ្នាំ២០២៦ កម្ពុជានាំចេញគ្រាប់ស្វាយចន្ទី មានទឹកប្រាក់ជាង ១,១ ពាន់លានដុល្លារអាមេរិក

2026/07/31 11:50:27 am        418
Facebook Telegram Linkin
កម្ពុជានាំចេញគ្រាប់ស្វាយចន្ទីមិនទាន់កែច្នៃ នៅក្នុងឆមាសទី១ ឆ្នាំ២០២៦ មានទំហំទឹកប្រាក់សរុបប្រមាណជាង ១,១ ពាន់លាន ដុល្លារអាមេរិក កើនឡើងជាង ៤៨ ភាគរយ ធៀបរយៈពេលដូចគ្នានិងឆ្នាំមុន នេះជាផលិតផលមួយកំពុងនាំមុខ នៃការនាំចេញក្នុងវិស័យ កសិកម្មកម្ពុជា។ ជុំវិញផលិតផលគ្រាប់ស្វាយចន្ទីនេះ, បើយោងតាមរបាយការណ៍ប្រចាំឆមាសទី១ ឆ្នាំ២០២៦ របស់ធនាគារជាតិនៃកម្ពុជា បានបង្ហាញឱ្យឃើញថា ការនាំចេញគ្រាប់ស្វាយចន្ទីមិនទាន់កែច្នៃរបស់កម្ពុជា មានទឹកប្រាក់សរុបប្រមាណជាង ១,១ ពាន់លានដុល្លារ អាមេរិក កើនឡើងជាង ៤៨ ភាគរយ ធៀបរយៈពេលដូចគ្នានិងឆ្នាំ២០២៥ ដែលការកើនឡើងនេះ បានបង្ហាញអំពីការរីកលូតលាស់ នៅក្នុងវិស័យកសិកម្មរបស់កម្ពុជា ជាពិសេសផលិតផលគ្រាប់ស្វាយចន្ទីនេះជាដើម ដោយបាននិងកំពុងរួមចំណែកដល់ការនាំចេញ និងគាំទ្រដល់កំណើនសេដ្ឋកិច្ចក​ម្ពុជា។ទាក់ទងគ្រាប់ស្វាយចន្ទីនេះ, លោក ស៊ុយ កុកធាន អនុប្រធានសមាគមស្វាយចន្ទីកម្ពុជា លើកឡើងក្នុងកិច្ចសម្ភាសន៍ជាមួយ BTV ស្តីពីការដាំដុះ និងការនាំចេញគ្រាប់ស្វាយចន្ទីនេះថា ជុំវិញការដាំដុះស្វាយចន្ទីកម្ពុជា គឺជាប្រទេសដែលផលិតគ្រាប់ស្វាយចន្ទីឆៅ ធំនៅលើពិភពលោក ហើយនៅក្នុងឆ្នាំ២០២៦នេះ ដោយសារកសិករបានដាំស្វាយចន្ទីថ្មី ធ្វើឱ្យពួកគាត់ប្រមូលផលបានគួរសម ទោះបីជួបបញ្ហាអាកាសធាតុ ខ្លះៗក៏ដោយ។លោកបន្តថា ស្របពេលកម្ពុជាទទួលបានទិន្នផលល្អប្រសើរ, ចំពោះកា​រ​លក់​លើ​ទីផ្សារ​ក៏​មាន​តម្លៃ​ល្អ​ផង​ដែរ ដោយសារមាន តម្រូវការខ្ពស់នៅប្រទេសវៀតណាម ឥណ្ឌា និងមួយចំនួន​នៅ​ប្រទេស​ចិន ​ខណៈនៅតំបន់អាហ្រ្វិចត្រូវបានបិតមិនឱ្យនាំចេញច្រើន ធ្វើឱ្យអ្នកកែច្នៃ​នៃ​ប្រទេស​ខាង​លើ​នេះ ​បានបញ្ជាទិញនៅកម្ពុជាយ៉ាងផុលផុស ហើយមកដល់ពេលនេះនៅតែមានការដើរប្រមូល បញ្ជា​ទិញ ក្នុងនោះតម្លៃលក់ចេញនៅដើមរដូវ ក្នុងមួយគីឡូក្រាម មានតម្លៃជាង ៦ ពាន់រៀល (គ្រាប់​ចន្ទី​ស្រស់) និងមកដល់ចុង រដូវនេះ មានតម្លៃជាង ៨ ពាន់រៀល (គ្រាប់ចន្ទីស្ងួត)។ លោក​ប​​ន្ត​ថា ជុំវិញការផលិតផលស្វាយចន្ទីនេះ ក្នុងនាមលោកតំណាងឱ្យ សមាគម និង​ក្នុង​នាម​ជា​កសិករ​ លោកពិតជាមានមោទនភាព ខណៈដែល​ផលិតផល​នេះ​បាន​និង​កំពុង​គាំទ្រ​ដល់​ការ​នាំ​ចេញ​របស់កម្ពុជា និងចូលរួមក្នុងកំណើនសេដ្ឋកិច្ច និងធ្វើឱ្យកសិករមានជីវភាពធូរធារ ជា​ពិសេស​ការ​ជំរុញ​ឱ្យកសិករអាចក្លាយទៅជាកសិ-ពាណិជ្ជករនៅពេលខាងមុខ។ សូម​បញ្ជាក់ថា បច្ចុប្បន្នខេត្តកំពង់ធំ មានរោងចក្រមួយកំពុងដំណើរ ដែលមានឈ្មោះថា MIRARTH Agritech ដោយរោងចក្រនោះ កែច្នៃគ្រាប់ស្វាយចន្ទី និងបាន​កំពុង​ស្រូប​យក​គ្រាប់​ស្វាយ​ចន្ទី​ស្រស់ក្នុងស្រុកប្រមាណ ៦ តោន នៅក្នុង១ថ្ងៃៗ សម្រាប់ការកែច្នៃ ហើយ ក្រុមហ៊ុន​មួយ​នេះ​ក៏​មាន​មហិច្ឆិតា ពង្រីកសមត្ថភាពកែច្នៃបន្ថែមទៀតឱ្យបានជាង ២ ម៉ឺនតោន ក្នុង១ឆ្នាំ សម្រាប់​បម្រើ​ទីផ្សារនាំចេញ ផងដែរ។ ក្រៅពីនេះខេត្តកំពង់ធំ ក៏មានគម្រោងបង្កើត «សួន​ឧស្សា​ហកម្ម​ស្វាយ​ចន្ទី» ដោយការបង្កើតសួនឧស្សាហកម្មបែបនេះ គឺដើម្បី ប្រមូលផ្ដុំរោងចក្រកែច្នៃតូច-ធំ​គ្រប់ប្រភេទ ដោយមានការគាំទ្រផ្នែកហេដ្ឋារចនាសម្ព័ន្ធផ្សេងៗពីរដ្ឋ។ ការ​បង្កើត​សួន​ឧស្សាហ​កម្ម​បែបនេះ គឺដើម្បីប្រមូលផ្ដុំរោងចក្រកែច្នៃតូច-ធំគ្រប់ប្រភេទ ដោយមាន​ការ​គាំទ្រ​ផ្នែក​ហេ​ដ្ឋា​រចនា​សម្ព័ន្ធ​ផ្សេងៗពីរដ្ឋ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

គណៈបញ្ជាការឯកភាពរាជធានី បន្តបង្ក្រាបអនឡាញស្គេម នៅទីតាំងមួយកន្លែង ខណ្ឌពោធិ៍សែនជ័យ ឃាត់ជនបរទេស១៧នាក់
09/08/2026 10:09 PM
Facebook Telegram Linkin
កម្ពុជាតវ៉ាចំពោះការរំលោភបំពានជាបន្តបន្ទាប់របស់ថៃលើអធិបតេយ្យ និងបូរណភាពទឹកដីកម្ពុជា
09/08/2026 08:09 PM
Facebook Telegram Linkin
ស្នងការខេត្តកំពតបន្តតាមដានមន្ត្រីនគរបាល២រូបចំពោះរបាយការណ៍មិនប្រក្រតីអំពីគ្រោះថ្នាក់ចរាចរ
09/08/2026 08:09 PM
Facebook Telegram Linkin
មន្រ្តីជាន់ខ្ពស់ គ.ជ.គ.ម. ចុះពិនិត្យការងារគ្រោះមហន្តរាយ និងសួរសុខទុក្ខភៀសសឹក ក្នុងខេត្តបន្ទាយមានជ័យ និងខេត្តឧត្តរមានជ័យ
09/08/2026 08:09 PM
Facebook Telegram Linkin
ពលរដ្ឋអេក្វាឌ័ររាប់ម៉ឺននាក់បោះបង់ចោលផ្ទះសម្បែងរបស់ខ្លួនស្របពេលអំពើហិង្សាជនអន្ធពាលកើនឡើង
09/08/2026 07:09 PM
Facebook Telegram Linkin
លោកLavrov និយាយប្រាប់សមភាគីអារ៉ាប៊ីសាអ៊ូឌីតថា រុស្ស៊ីត្រៀមខ្លួនរួចរាល់ ដើម្បីជួយដោះស្រាយស្ថានភាពនៅមជ្ឈិមបូព៌ា
09/08/2026 06:09 PM
Facebook Telegram Linkin
ជ័យជម្នះរបស់គណបក្ស​ AfD ធ្វើ​ឱ្យ​​របៀបវារៈកំណែទម្រង់របស់លោក Merz កាន់តែ​មិន​ច្បាស់លាស់​
09/08/2026 06:09 PM
Facebook Telegram Linkin
រដ្ឋមន្រ្តីការបរទេសគុយបាច្រានចោលការចរចារបស់អាមេរិក បើទោះបីជាមានការបិទច្រកក៏ដោយ
09/08/2026 06:09 PM
Facebook Telegram Linkin
ប៉ាគីស្ថានបង្ហាញប្រព័ន្ធមីស៊ីលដែល​អាច​ជារបស់​ចិន ខណៈទំនាក់ទំនងកាន់តែស៊ីជម្រៅ
09/08/2026 06:09 PM
Facebook Telegram Linkin
កោះហាវ៉ៃប្រកាសដាក់រដ្ឋក្នុងគ្រាអាសន្ន ខណៈព្យុះសង្ឃរា Lowell បោកបក់ជិតមកដល់
09/08/2026 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.