BTV NEWS

រដ្ឋមន្រ្តីក្រសួងឧស្សាហកម្ម និងឯកអគ្គរាជទូតជប៉ុន អញ្ជើញចូលរួមភ្ជាប់បំពង់មេនាំទឹកឆៅកោះនរា

កម្ពុជាពិនិត្យពិភាក្សានៃវឌ្ឍនភាព លើការតភ្ជាប់ប្រព័ន្ធ cdcIPM ទៅថ្នាក់ក្រោមជាតិ

កម្ពុជាមានសុទិដ្ឋិនិយមខ្ពស់ លើការទាក់ទាញវិនិយោគិនពីទីក្រុងសៀងហៃមកធ្វើការវិនិយោគ

កម្ពុជា-ជប៉ុនទស្សនកិច្ចស្ថានីយបូមទឹកឆៅថ្មីកោះនរា និងបើកការដ្ឋានគម្រោងភ្ជាប់បំពង់មេនាំទឹកឆៅ

សេដ្ឋកិច្ច និង កសិកម្ម

ទីផ្សារនាំចេញស្វាយកែវរមៀតស្រស់ នឹងងើបឡើងល្អប្រសើរវិញនៅចុងឆ្នាំនេះ

ភ្នំពេញ៖ អ្នកនាំចេញស្វាយកម្ពុជា រំពឹងថា ទីផ្សារនាំចេញស្វាយកែវរមៀតស្រស់ទៅកាន់ប្រទេសចិន នឹងងើបល្អប្រសើរឡើងវិញ នៅចុងឆ្នាំនេះ ខណៈវិបត្តិជំងឺកូវីដ ១៩ នៅប្រទេសចិនមានស្ថានភាពល្អប្រសើរ និងស្របពេលក្រុមអ្នកសម្របស្រួលរបស់កម្ពុជា កំពុងខិតខំផ្សារភ្ជាប់រវាងអ្នកលក់ និងអ្នកទិញនៃប្រទេសទាំងពីរ។លោកស្រី ច្រាន់ ប៉ុន្នី ប្រធានក្រុមប្រឹក្សាភិបាលសមាគមកសិកម្មដំណាំស្វាយកម្ពុជា និងជាអ្នកនាំចេញស្វាយកែវរមៀតទៅកាន់ទីផ្សារចិន លើកឡើងក្នុងកិច្ចសម្ភាសជាមួយសារព័ត៌មាន ស្តីពីការដាំដុះ និងការនាំចេញស្វាយកែវរមៀតស្រស់របស់កម្ពុជា នៅថ្ងៃទី១៣ខែកញ្ញាឆ្នាំ២០២៣នេះថា ជុំវិញការនាំចេញស្វាយកែវរមៀតនេះ នៅក្នុងវិបត្តិនៃការរីករាលដាលជំងឺកូវីដ ១៩ ការនាំចេញស្វាយកែវ រមៀតស្រស់របស់កម្ពុជាទៅកាន់ទីផ្សារចិន បានធ្លាក់ចុះជាបន្តបន្ទាប់ ខណៈដែលចិនបានរឹតត្បិតចំពោះការធ្វើដំណើរ ទាំងការនាំចូលផលិតផល និងកសិផលទៅកាន់ប្រទេសរបស់ខ្លួនជាដើម ដែលបញ្ហានេះសម្រាប់កម្ពុជា បានធ្វើឲ្យកសិករបាក់ទឹកចិត្តក្នុងការដាំដុះ និងការថែទាំស្វាយរបស់ខ្លួនផងដែរ។ទាក់ទិនការនាំចេញស្វាយ, លោកស្រី បន្តថា កម្ពុជាមានក្រុមការងារសម្របសម្រួលទីផ្សារនាំចេញ បច្ចុប្បន្នបានកំពុងធ្វើការទំនាក់ទំនង ដើម្បីជំរុញការនាំចេញស្វាយទៅកាន់ទីផ្សារចិន ក្នុងនោះតាមរយៈនៃកិច្ចសហប្រតិបត្តិការនេះ និងស្របពេលវិបត្តិជំងឺកូវីដ ១៩ នៅប្រទេសចិន មានស្ថានភាពល្អប្រសើរឡើងវិញ ទាំងទីផ្សារ និងមនុស្សចរាចរណ៍ឡើងវិញជាធម្មតានោះ, លោកស្រីរំពឹងថា ទីផ្សារនាំចេញស្វាយកែវរមៀតស្រស់របស់កម្ពុជា ទៅកាន់ទីផ្សារប្រទេសចិន នឹងងើបល្អប្រសើរឡើងវិញចាប់ពីបំណាច់ចុងឆ្នាំ ២០២៣ នេះតទៅ។ ពាក់ព័ន្ធការនាំចេញស្វាយរបស់កម្ពុជានេះដែរ, ឧកញ៉ាបណ្ឌិត ឈិន កេន អ្នកសម្របសម្រួលទីផ្សារនាំចេញ និងជាតំណាង Alibaba នៅកម្ពុជា លើកឡើងថា ក្នុងនាមអ្នកសម្របស្រួលផ្សារភ្ជាប់រវាងអ្នកលក់ និងអ្នកទិញ ឧកញ៉ាបានខិតខំប្រឹងប្រែងយ៉ាងខ្លាំង ជាពិសេសការកៀគរស្វែងរកអ្នកទិញនៅប្រទេសចិន ដែលកំពុងរកស៊ីទទួលទាននៅក្នុងវិស័យកសិកម្មអាចផ្សារភ្ជាប់គ្នា ដើម្បីធ្វើយ៉ាងណាជួយជំរុញនាំចេញកសិផលរបស់កម្ពុជាទៅកាន់ទីផ្សារចិនឲ្យបានច្រើន ជាពិសេសស្វាយកែវរមៀតស្រស់ និងមៀនប៉ៃលិនជាដើម។ជុំវិញការនាំចេញស្វាយ, បើតាមរបាយការណ៍របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានបង្ហាញឲ្យដឹងថា នៅក្នុងរយៈពេល ៨ ខែ ឆ្នាំ ២០២៣ នេះ កម្ពុជាបាននាំចេញកសិផល មានបរិមាណសរុបជាង ៥ លានតោន មានទំហំទឹកប្រាក់ប្រមាណជិត ៣ ពាន់លានដុល្លារអាមេរិក ក្នុងនោះសម្រាប់ការនាំចេញផ្លែស្វាយស្រស់ មានចំនួនជាង ៩៥ ពាន់តោន ថយចុះ ២១ ភាគរយ ខណៈការនាំចេញដំណាប់ស្វាយ មានជាង ១៩ ពាន់តោន កើនឡើង ៣៧ ភាគរយ៕អត្ថបទ៖ សុន រ៉ាឌី

តំបន់សេដ្ឋកិច្ចពិសេសកំពុងដំណើរការមានចំនួន២៤ ជាមួយនឹងទុនជាង៨ពាន់លានដុល្លារ

ភ្នំពេញ៖ ប្រទេសកម្ពុជាមានតំបន់សេដ្ឋកិច្ចពិសេសកំពុងដំណើរការចំនួន២៤ ដោយគិតចាប់តាំងពីឆ្នាំ ២០០៦ ដល់ដំណាច់ឆមាសទី ១ ឆ្នាំ ២០២៣ ជាមួយនឹងទុនវិនិយោគជាង៨ ពាន់លានដុល្លារ។ សកម្មភាពចម្បងនៃតំបន់សេដ្ឋកិច្ច ផ្តោតលើផលិតកម្ម នៃវិស័យកាត់ដេរសំលៀកបំពាក់ ស្បែកជើង សម្ភារធ្វើដំណើរ វិស័យគ្រឿងបង្គុំរថយន្ត គ្រឿងអេឡិចត្រូនិក រោងចក្រផលិតសម្បកកង់ ឧស្សាហកម្មដំឡើងរថយន្ត និងកង់។យោងតាមរបាយការណ៍ក្រុមប្រឹក្សាអភិវឌ្ឍន៍កម្ពុជា ក្នុងចំណោមតំបន់សេដ្ឋកិច្ចពិសេសទាំង ២៤ គឺមានរោងចក្រ/ក្រុមហ៊ុនដែលចុះបញ្ជីនៅក្នុងតំបន់សេដ្ឋកិច្ចពិសេសនោះរហូតដល់ ៦៥៥ គម្រោង ដែលស្មើទុនវិនិយោគប្រមាណ ៨,១ ពាន់លានដុល្លារ។ ការនាំចេញចាប់ពីឆ្នាំ ២០១១ រហូតដល់ខែមិថុនា ឆ្នាំ ២០២៣ មានប្រមាណ ២៥,៧ ពាន់លានដុល្លារ និងបង្កើតការងារបាន ១៧៤ ពាន់កន្លែង។ឯកឧត្តម ជា វុទ្ធី អគ្គលេខាធិការ CDC បានលើកឡើងក្នុងវេទិកាមួយកាលពីពេលថ្មីៗនេះថា ចាប់តាំងពីរដ្ឋាភិបាលកម្ពុជាផ្ដួចផ្ដើមឱ្យមានការតាក់តែងបទប្បញ្ញត្តិ និងច្បាប់ តាំងពីឆ្នាំ ២០០៥ មកគិតត្រឹមដំណាច់ខែមិថុនា ឆ្នាំ ២០២៣ កម្ពុជាមានតំបន់សេដ្ឋកិច្ចពិសេសកំពុងដំណើរការចំនួន ២៤។លោក បន្តថា តំបន់សេដ្ឋកិច្ចពិសេសបានដើរតួយ៉ាងសំខាន់ក្នុងការធ្វើពិពិធកម្មសេដ្ឋកិច្ចកម្ពុជា ការធ្វើពិពិធកម្មឧស្សាហកម្ម និងការធ្វើពិពិធកម្មប្រភពទុនវិនិយោគពីប្រទេសនានា។ វិស័យផលិតកម្មសំលៀកបំពាក់ ស្បែកជើង និងសម្ភារធ្វើដំណើរ មានប្រមាណជាង ៩០ ភាគរយដែលបានវិនិយោគក្នុងតំបន់សេដ្ឋកិច្ចពិសេស។របាយការណ៍របស់ធនាគារជាតិនៃកម្ពុជា បង្ហាញថា គិតត្រឹមចុងឆ្នាំ ២០២១ ការវិនិយោគផ្ទាល់បរទេសនៅកម្ពុជា មានទឹកប្រាក់សរុប ៤១ ពាន់លានដុល្លារ កើនឡើង ១១,២ ភាគរយបើធៀបឆ្នាំ ២០២០។ក្នុងនោះវិស័យហិរញ្ញវត្ថុ ៩,៤ ពាន់លានដុល្លារ ស្មើ ២២,៩ ភាគរយ, កម្មន្តសាល ៨,៥ ពាន់លានដុល្លារ ស្មើ ២០,៨ ភាគរយ, អចលនទ្រព្យ ៤,៩ ពាន់លានដុល្លារ ស្មើ ១២ ភាគរយ, សណ្ឋាគារ និងភោជនីយដ្ឋាន ៤,៤ ពាន់លានដុល្លារ ស្មើ ១០,៧ ភាគរយ, កសិកម្ម ៤,២ លានដុល្លារ ស្មើ ១០,៣ ភាគរយ, អគ្គិសនី ២,៦ ពាន់លានដុល្លារ ស្មើ ៦,២ ភាគរយ, សំណង់ ១,៦ ពាន់លានដុល្លារ ស្មើ ៤,១ ភាគរយ និងផ្នែកផ្សេងៗ ៥,៣ ពាន់លានដុល្លារ ស្មើនឹង ១៣ ភាគរយ៕អត្ថបទ៖ វណ្ណៈ

ក្រុមហ៊ុនចិន និងកម្ពុជា ចុះMOUវិនិយោគចិញ្ចឹមសត្វ និងដាំដំណាំលើផ្ទៃដីរាប់ពាន់ហិកតាក្នុងខេត្តពីរ

ភ្នំពេញ៖ ក្រុមហ៊ុន Danong Aricultural Development Group របស់ប្រទេសចិន បានចុះកិច្ចព្រមព្រៀង (MOU) ជាមួយក្រុមហ៊ុន និងដៃគូពាក់ព័ន្ធនានារបស់កម្ពុជា ដើម្បីធ្វើការវិនិយោគទៅលើវិស័យកសិ-ឧស្សាហកម្ម នៅក្នុងខេត្តចំនួន២ គឺខេត្តកំពត និងខេត្តកំពង់ធំ ។នៅក្នុងពិធីចុះហត្ថលេខាលើគម្រោងវិនិយោគលើវិស័យកសិកម្មនៅកម្ពុជា នៅថ្ងៃទី១២ ខែកញ្ញា នេះ លោក សៅ ស៊ូជី ប្រធានក្រុមហ៊ុនដាណុង ឌីវេឡុបមែន គ្រុប បានលើកឡើងថា សម្រាប់គម្រោងកសិ-ឧស្សាហកម្មបែបពាណិជ្ជកម្មទំនើបនេះ គឺដំណាក់កាលទី១ នៃគម្រោងនេះ នឹងបង្កើតជាតំបន់គំរូមួយ នៅលើផ្ទៃដីប្រហែលជាង១ម៉ឺនហិកតា ដែលក្នុងនោះមានការបង្កាត់ពូជពោត ការដាំស្មៅចំបើង ស្មៅប្រូតេ អ៊ីនខ្ពស់ មានការចិញ្ចឹមគោយកសាច់ រួមទាំងការសាងសង់រោងចក្រកែច្នៃ សម្រាប់ផលិតផលកសិកម្ម ។លោកបន្តថា សម្រាប់ទីផ្សារធំ នៃផលិតផល ដែលផលិតបាន គឺនៅប្រទេសចិន ខណៈនៅទីនោះ កំពុងមានតម្រូវការស្បៀងច្រើន ហើយការវិនិយោគនេះ ក៏នឹងបានជួយផងដែរដល់ពលរដ្ឋកម្ពុជា ក្នុងការទទួលបានប្រាក់ចំណូលពីគម្រោងនេះ ដែលគម្រោងទាំងអស់នេះ អាចនឹងបានអនុវត្តឆាប់រហ័ស ទៅតាមការកិច្ចសហការបន្ថែមពីរាជរដ្ឋាភិបាល និងដៃគូផ្សេងៗនៅកម្ពុជា ។ឯកឧត្តម ដួង ដារ៉ា រដ្ឋលេខាធិការទីស្ដីការគណៈរដ្ឋមន្ត្រី បានបញ្ជាក់ថា ការនិយោគលើវិស័យកសិកម្ម របស់ក្រុមហ៊ុន Danong នេះ បានបង្ហាញពីការយកចិត្តទុកដាក់ជួយជំរុញការរីកចម្រើន របស់កសិករ នៅក្នុងប្រទេសកម្ពុជា ។ឯកឧត្តម បានបន្តថា ការវិនិយោគនេះ ជាតម្រូវការចាំបាច់ផងដែររបស់ប្រទេសកម្ពុជា ក្នុងការអភិវឌ្ឍវិស័យកសិកម្មឲ្យមានភាពទូលំទូលាយ ដើម្បីកាត់បន្ថយភាពក្រីក្រ ជួយកសិករឲ្យមានការងារធ្វើ មានចំណូលខ្ពស់ នេះគឺជាគោលដៅរបស់រាជរដ្ឋាភិបាលកម្ពុជា ហើយបន្ទាប់ពីចុះកិច្ចព្រមព្រៀងនេះ ក្រុមហ៊ុន នឹងទៅជួបជាមួយក្រុមប្រឹក្សាអភិវឌ្ឍន៍កម្ពុជា (CDC) ដើម្បីធ្វើការចុះបញ្ជីវិនិយោគ ។គួរបញ្ជាក់ថា ក្រុមហ៊ុន Danong Development Group គ្រោងបោះទុន ប្រមាណ១២,៧ពាន់ ដុល្លារ ធ្វើការវិនិយោគលើវិស័យកសិ-ឧស្សាហកម្មបែបទំនើប លើផ្ទៃដីចំនួន៧៥ម៉ឺនហិកតា ក្នុងខេត្តបាត់ដំបង ពោធិ៍សាត់ សៀមរាប កំពង់ធំ និងខេត្តកំពត ៕ អត្ថបទ៖ បាន សុខរិទ្ធិ

បណ្តាញកសិករ នឹងបង្កើនការដាំដុះស្រូវអត្តសញ្ញាណខ្មែរ ដើម្បីជំរុញនាំចេញ

កណ្ដាល៖ ក្រោយពេលរដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានណែនាំឲ្យប្រជាកសិករនាំគ្នាធ្វើស្រូវសែនក្រអូប និងស្រូវផ្ការំដួលជាប្រភេទស្រូវប្រណិតសម្រាប់នាំចេញលក់នៅក្រៅប្រទេស នៅពេលបណ្តាញកសិករថា នឹងនាំគ្នាធ្វើការដាំដុះប្រភេទពូជស្រូវទាំងនេះ ដើម្បីជំរុញបង្កើនការនាំចេញលក់នៅទីផ្សារក្រៅប្រទេស និងបង្ហាញអត្តសញ្ញាណខ្មែរនៅលើឆាកអន្តរជាតិ។ប្រជាសហគមន៍កសិករ នៅខេត្តកណ្តាល បានថ្លែងប្រាប់ BTV នៅថ្ងៃទី១២ ខែកញ្ញានេះថា ដើម្បីជំរុញការនាំចេញ និងទទួលបានប្រាក់ចំនិញខ្ពស់ ពីការប្រកបរបរដំណាំ ពួកគេនឹងនាំគ្នាបង្កើនការដាំដុះស្រូវ សែនក្រអូប និងស្រូវផ្ការំដួលរបស់ខ្មែរបន្ថែមទៀត ខណៈប្រភេទពូជស្រូវទាំងនេះ ងាយស្រួលដាំដុះ មិនរើសដី និងអាកាសធាតុជាដើម។លោក ថែង សារឿន ប្រធានសមាគមន៍សម្ព័ន្ធ សហគមន៍កសិករកម្ពុជា CCFC បានថ្លែងថា សមាគមលោកមានពេញចិត្តជាខ្លាំងរាជរដ្ឋាភិបាលប្រកាសជំរុញឲ្យកសិករនាំដាំដុះពូជស្រូវអត្តសញ្ញាណខ្មែរ ស្រូវសែនក្រអូប និងស្រូវផ្ការំដួល ដោយសារស្រូវទាំងនេះជាប្រភេទស្រូវប្រណិត មានគុណភាពល្អ ក្លិនក្រអូប បាយឆ្ងាញ់ និងមានការលក់ដាច់បំផុតនៅលើទីផ្សារអន្តរជាតិ។ លោកក៏ណែនាំឲ្យប្រជាកសិករនាំគ្នាដាំដុះពូជស្រូវទាំងនេះ និងស្នើរាជរដ្ឋាភិបាលជួយផ្តល់ពូជស្រូវទាំងនេះ បែងចែកទៅដល់ប្រជាកសិករឲ្យបានច្រើន ដើម្បីឲ្យកសិករនាំគ្នាបង្កើនការដាំ។ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ ថ្លែងថា បច្ចុប្បន្នក្រសួងកសិកម្មកំពុងផ្តល់ការលើកទឹកចិត្តឲ្យកសិករបង្កើនផលិតស្រូវសែនក្រអូប និងស្រូវផ្ការំដួល។ ក្រសួងក៏មានក្រុមហ៊ុនដៃគូសហការធំៗជាច្រើនដែលអ្នកធានាទទួលទិញស្រូវពីកសិករទាំងអស់គ្នា ទៅតាមកិច្ចសន្យា ដើម្បីរួមចំណែកជួយកាត់បន្ថយថ្លៃដើមផលិត និងសម្រេចគោលនយោបាយនៃការនាំចេញ។ឯកឧត្តម បញ្ជាក់ថា ក្រៅពីនេះក្រសួងកសិកម្ម ក៏ជំរុញឲ្យកសិករដាំដុះ ពូជស្រូវខ្មែរប្រភេទថ្មីដែលកំពុងសាកល្បងដាំដុះ គឺពូជស្រូវចំប៉ី ស ៧០ ដែលពូជនេះដាំឆាប់បានប្រមូលផល មានភាពស៊ាំខ្លាំងនឹងអាកាសធាតុ ចំណាយថ្លៃដើមតិចថែមទៀត៕អត្ថបទ ស៊ុម សុខជា

វៀតណាម និងហ្វីលីពីន នឹងចុះហត្ថលេខាលើកិច្ចព្រមព្រៀងអង្ករ ខណៈតម្លៃអង្ករពិភពលោកកើនឡើង

ក្រុមអាជ្ញាធរវៀតណាមបាននិយាយកាលពីថ្ងៃព្រហស្បតិ៍ (៧ កញ្ញា)ថា រដ្ឋាភិបាលនៃប្រទេសវៀតណាម និងហ្វីលីពីន នឹងចុះហត្ថលេខាលើកិច្ចព្រមព្រៀងពាណិជ្ជកម្មអង្ករក្នុងពេលឆាប់ៗនេះ ដើម្បីធានាសន្តិសុខស្បៀង។ កិច្ចព្រមព្រៀងនេះ កើតឡើងស្របពេលតម្លៃអង្ករកំពុងកើនឡើងក្នុងប្រទេសហ្វីលីពីន ដែលជំរុញអតិផរណានៅក្នុងប្រទេស ខណៈតម្លៃប្រេងឥន្ធនៈឡើងថ្លៃ ទោះបីជារដ្ឋាភិបាលនិយាយថាការផ្គត់ផ្គង់គ្រាប់ធញ្ញជាតិក្នុងស្រុកមានច្រើនហើយក៏ដោយ។ព័ត៌មានស្តីពីកិច្ចព្រមព្រៀងនេះ បានកើតឡើងនៅក្នុងសេចក្តីថ្លែងការណ៍មួយ ដែលបានចេញផ្សាយបន្ទាប់ពីនាយករដ្ឋមន្រ្តីវៀតណាម លោក Pham Minh Chinh( ផាម មិញ ជិញ) និងប្រធានាធិបតីហ្វីលីពីន លោក Ferdinand Marcos Jr. បានជួបគ្នានៅក្រៅវេទិកាកិច្ចប្រជុំកំពូលអាស៊ាននៅប្រទេសឥណ្ឌូនេស៊ី ប៉ុន្តែពុំមានព័ត៌មានលម្អិតបន្ថែមទៀតនោះទេ។វៀតណាម ធ្លាប់ជាប្រទេសនាំចេញអង្ករធំជាងគេទី៣ របស់ពិភពលោកកាលពីឆ្នាំមុនបន្ទាប់ពីឥណ្ឌា និងថៃ ហើយហ្វីលីពីនគឺជាអ្នកទិញធំបំផុតរបស់ប្រទេសនេះ ដោយបំពេញតម្រូវការនាំចូលជិត៩០% របស់ខ្លួន។ លោក Marcos ដែលជាលេខាធិការកសិកម្មហ្វីលីពីនផងដែរនោះ បានស្វាគមន៍ការផ្តល់ជូនរបស់ប្រទេសជិតខាងមួយនេះ នៃកិច្ចព្រមព្រៀងផ្គត់ផ្គង់រយៈពេលប្រាំឆ្នាំ។តម្លៃអង្ករពិភពលោកបានកើនឡើងដល់កម្រិតខ្ពស់ក្នុងរយៈពេល១៥ឆ្នាំ បន្ទាប់ពីប្រទេសឥណ្ឌាដែលមានពាណិជ្ជកម្មអង្ករច្រើនជាង៤០% របស់ពិភពលោក បានបញ្ជាឱ្យផ្អាកចំពោះប្រភេទនៃការនាំចេញដ៏ធំបំផុតរបស់ខ្លួនកាលពីខែកក្កដា ក្នុងគោលបំណងធ្វើឱ្យតម្លៃអង្ករក្នុងស្រុកធ្លាក់ចុះ៕

ពិព័រណ៍ចិន-អាស៊ាននៅប្រទេសចិន ផ្តល់ឱកាសឱ្យកម្ពុជាផ្សព្វផ្សាយផលិតផល និងទាក់ទាញវិនិយោគ

ភ្នំពេញ៖ ការចូលរួមក្នុងពិព័រណ៍ចិន-អាស៊ាន លើកទី២០ (CAEXPO ) នៅប្រទេសចិន បានផ្តល់ឱកាសឱ្យកម្ពុជា ផ្សព្វផ្សាយពីផលិតផលសក្តានុពលរបស់កម្ពុជា ទីកាន់ទីផ្សារប្រទេសចិន ក៏ដូចបណ្តាប្រទេសផ្សេងទៀត ដែលចូលរួមនិងទាក់ទាញវិនិយោគពីបរទេសចូលមកកម្ពុជា។ពិព័រណ៍ចិន-អាស៊ាន លើកទី២០ “The 20th China-ASEAN Expo” នឹងប្រព្រឹត្ត ទៅចាប់ពីថ្ងៃទី១៦-២០ ខែកញ្ញា ឆ្នាំ២០២៣ នៅមជ្ឈមណ្ឌលសន្និសីទ និងពិព័រណ៍អន្តរជាតិ នាទីក្រុងណាននីង តំបន់ស្វយ័តក្វាងស៊ី សាធារណរដ្ឋប្រជាមានិតចិន។លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងថា ពិព័រណ៌អាស៊ាន ចិន គឺសំខាន់ណាស់ សម្រាប់ប្រទេសក្នុងតំបន់អាស៊ាន ជាពិសេសប្រទេសកម្ពុជា ដែលនាំយកផលិតផលថ្មីៗ ក៏ដូចជាផលិតកសិកម្មរកទីផ្សារនៅប្រទេសចិន។ លោកឧកញ៉ា បន្តថា៖ “ទន្ទឹមកម្ពុជាមានFTA ជាមួយចិន និងកិច្ចព្រមព្រៀង RCEP ពិព័រណ៍ចិន-អាស៊ាន លើកទី២០ នឹងជំរុញបន្ថែមកិច្ចសហប្រតិបត្តិការសេដ្ឋកិច្ច ជំរុញការដោះដូរទំនិញ និងទាក់ទាញវិនិយោគរវាងកម្ពុជាតំបន់អាស៊ាន និងចិន”។សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នឹងដឹកនាំគណប្រតិភូកម្ពុជា អញ្ជើញចូលរួមពិព័រណ៍ចិន-អាស៊ាន លើកទី២០ (CAEXPO ) នៅប្រទេសចិននាពាក់កណ្តាលខែកញ្ញានេះ។ពិព័រណ៍ចិន-អាស៊ាន ជាវេទិកានៃការផ្លាស់ប្តូរពាណិជ្ជកម្ម និងវិនិយោគដ៏សំខាន់រវាងបណ្តាប្រទេសជាសមាជិក អាស៊ាន និងប្រទេសចិន។គណៈកម្មការរៀបចំពិព័រណ៍បានអញ្ជើញប្រទេសជាសមាជិកអាស៊ានទាំងអស់រួមទាំងកម្ពុជា រៀបចំដឹកនាំប្រតិភូពាណិជ្ជកម្មដែលមានរួមមានអ្នកតាំងពិព័រណ៍ អ្នកទស្សនាពិព័រណ៍ដើម្បីជួបដៃគូពាណិជ្ជកម្ម ទៅចូលរួមដោយផ្ទាល់ និងចូលរួមក្នុងកម្មវិធីសំខាន់ៗ ដូចជា វេទិធុរកិច្ច វិនិយោគ និងទេសចរណ៍កម្ពុជា-ចិន វេទិកាធុរកិច្ចនិងវិនិយោគ ចិន-អាស៊ានជាដើម ៕ អត្ថបទ៖ វណ្ណៈ

អគ្គនាយកពន្ធដារ អំពាវនាវដល់ប្រជាពលរដ្ឋបង់ពន្ធលើមធ្យោបាយដឹកជញ្ជូន

ភ្នំពេញ៖ អគ្គនាយកនៃអគ្គនាយកដ្ឋានពន្ធដារ អំពាវនាវដល់ប្រជាពលរដ្ឋដែលប្រើប្រាស់យានយន្តគ្រប់ប្រភេទ អញ្ជើញទៅបង់ពន្ធលើមធ្យោបាយដឹកជញ្ជូនឲ្យបានរួសរាន់ ដោយសូមកុំចាំដល់ចុងខែដែលត្រូវបិទបញ្ចប់ ដែលនាំឲ្យខកខាន ឬការកកស្ទះដោយប្រការណាមួយមិនបានបង់ពន្ធ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្រ្តី និងទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លើកឡើងក្នុងក្នុងវេទិកាស្តីពីពន្ធដារ (Tax Forum 2023) រៀបចំដោយអគ្គនាយកដ្ឋានពន្ធដារ សហការជាមួយសភាពាណិជ្ជកម្មម៉ាឡេស៊ី នៅថ្ងៃទី ៦ខែកញ្ញាឆ្នាំ ២០២៣ នេះថា អគ្គនាយកដ្ឋានពន្ធដារ បានបង្កើត App មួយដែលមានឈ្មោះថា កម្មវិធីគណនាពន្ធមធ្យោបាយ សម្រាប់ការបង់ពន្ធលើមធ្យោបាយដឹកជញ្ជូន និងយានយន្តគ្រប់ប្រភេទ នឹងមានសេវាដឹកជញ្ជូនសាលកបត្រទៅដល់គេហដ្ឋានរបស់អស់លោកអ្នកផងដែរ។ App នេះ គឺបានផ្តល់នូវភាពងាយស្រួលដល់បងប្អូនប្រជាពលរដ្ឋ ក្នុងការបង់ពន្ធលើយានយន្តរបស់ខ្លួន ដោយមិនចំណាយពេលវេលាធ្វើដំណើរទៅទិញសាលកបត្រនោះឡើយ។ឯកឧត្តម បានបញ្ជាក់ឲ្យដឹងថា គិតមកដល់ពេលនេះ ការបង់ពន្ធលើមធ្យោបាយដឹកជញ្ជូន ទើបអនុវត្តបានជិត ៥០ ភាគរយប៉ុណ្ណោះ ដោយនៅមានចំនួនច្រើនទៀត។ បងប្អូនប្រជាពលរដ្ឋដែលប្រើប្រាស់យានយន្ត សូមអញ្ជើញមកបង់ពន្ធលើមធ្យោបាយដឹកជញ្ជូនឲ្យបានរួសរាន់ឲ្យបានមុនកាលកំណត់ នៅតាមសាខាពន្ធដារ ឬនៅតាមធនាគារជាដៃគូរក្តី ដែលការបង់ពន្ធនឹងត្រូវបញ្ចប់នៅចុងខែ វិច្ឆិកាខាងមុខ។សូមបញ្ជាក់ថា ជុំវិញការបង់ពន្ធលើមធ្យោបាយដឹកជញ្ជូន នៅក្នុងឆ្នាំ ២០២២ កន្លងមកនេះ អគ្គនាយកដ្ឋានពន្ធដារ អនុវត្តការប្រមូលចំណូលពន្ធលើមធ្យោបាយដឹកជញ្ជូន និងយានយន្តគ្រប់ប្រភេទ បានចំនួនជាង ៨៨ ម៉ឺនគ្រឿង សរុបជាថវិកាមានចំនួនជាង ៤២២ ប៊ីលានរៀល ត្រូវប្រមាណជាង ១០៥ លានដុល្លារ ស្មើជាង ១៣០ ភាគរយនៃផែនការប្រចាំឆ្នាំ ៕ អត្ថបទ៖ សុន រ៉ាឌី

កម្ពុជា-ជប៉ុន សហការបង្កើតកម្មវិធីគាំទ្រសហគ្រិនស្រ្តីលើការធ្វើអាជីវកម្ម

ភ្នំពេញ៖ កម្ពុជា-ជប៉ុន គ្រោងសហការបង្កើតជំហានថ្មីនៃគម្រោងគាំទ្រលើការអភិវឌ្ឍសហគ្រិនស្រ្តី សម្រាប់ស្រ្តីធ្វើអាជីវកម្មកម្រិតមីក្រូ តូច និងមធ្យម តាមរយៈគម្រោងគាំទ្រនៃការបង្កើត និងដំណើរការមជ្ឈមណ្ឌលអភិវឌ្ឍន៍សហគ្រិនស្រ្តី ឲ្យក្លាយទៅជាមណ្ឌលតែមួយ សម្រាប់គាំទ្រស្រ្តីដែលចង់ផ្តើមអាជីវកម្ម និងកំពុងដំណើរការអាជីវកម្ម។ឯកឧត្តម UENO Atsushi ឯកអគ្គរាជទូតជប៉ុន ប្រចាំនៅព្រះរាជាណាចក្រកម្ពុជា លើកឡើងនៅក្នុងជំនួបពិភាក្សាការងារជាមួយលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នៅថ្ងៃទី ៧ ខែ កញ្ញា ឆ្នាំ ២០២៣ នេះថា តាមរយៈស្ថានទូត និងទីភ្នាក់ងារសហប្រតិបត្តិការអន្តរជាតិជប៉ុន (JICA) បានចាប់ផ្តើមគម្រោងគាំទ្រដល់ស្រ្តីនៅកម្ពុជាមុនគេ នៃការងារផ្តល់ព័ត៌មានទាក់ទងនិងស្រ្តី និងមានគម្រោងជាច្រើនផ្សេងទៀតផងដែរ ដែលបានអនុវត្តកន្លងមកដូចជា ការពង្រឹងភាពអង់អាចដល់ស្រ្តីនៅតាមសហគមន៍ និងគម្រោងបង្កើត App សម្រាប់ជួយជនរងគ្រោះ ឬផ្តល់ព័ត៌ មានសម្រាប់អំពើហិង្សាជាដើម។សម្រាប់ជំហានថ្មីនេះ គម្រោងគាំទ្រនៃការបង្កើត និងដំណើរការមជ្ឈមណ្ឌលអភិវឌ្ឍន៍សហគ្រិនស្រ្តី ជប៉ុននឹងធ្វើការសិក្សាដើម្បីបម្លែងអគារដែលកំពុងដំណើរការបច្ចុប្បន្ន ឲ្យក្លាយទៅជាអគារទំនើបសម្រាប់ជាមជ្ឈមណ្ឌលសហគ្រិនភាពស្រ្តីនៅកម្ពុជា ។ជប៉ុននឹងអាចផ្តល់លទ្ធភាពជំនួយជាមួយថវិការដ្ឋ ដើម្បីកែលម្អធ្វើទំនើបកម្មឲ្យប្រសើរជាមុន, ហើយចំពោះគម្រោងនេះដែរ ភាគីទាំងពីរនិងសិក្សាលទ្ធភាពនៃការសាងសង់ប្រហាក់ប្រហែលនិងអគារ CJCC របស់ជប៉ុន ជាកន្លែងទំនើប ទាក់ទាញមហាជន និងសម្រាប់អ្នករកស៊ីទទួលទានទូទៅ និងមួយផ្នែកទៀត ជប៉ុននិងអាចផ្តល់ជាសម្ភារៈសម្រាប់បំពាក់នៅក្នុងមជ្ឈមណ្ឌលនោះដោយផ្ទាល់ ដើម្បីបម្រើតាមតម្រូវការឲ្យបានគ្រប់គ្រាន់។លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី លើកឡើងថា តាមរយៈនៃគម្រោងនេះ ក្រសួងគោលបំណងធ្វើយ៉ាងណា ជំរុញដល់ស្រ្តីជាអាជីវករ ឬអ្នកធ្វើអាជីវកម្ម ដែលបានបញ្ចប់សិក្សាក្នុងមួយឆ្នាំទៅមួយឆ្នាំ អាចចេញពីមជ្ឈមណ្ឌលនេះឲ្យបានច្រើន ដើម្បីយកចំណេះ ជំនាញ ទៅអភិវឌ្ឍន៍ក្នុងអាជីវកម្មឲ្យកាន់តែរីកចម្រើន៕ អត្ថបទ៖ សុន រ៉ាឌី

ប្រទេសចិន ហាមប្រាមមន្ត្រីរដ្ឋាភិបាលមិនឲ្យប្រើប្រាស់ទូរស័ព្ទ iPhone សម្រាប់ការងារ

សារព័ត៌មាន Wall Street Journal (WSJ) បានរាយការណ៍កាលពីថ្ងៃពុធ (៦កញ្ញា) ថា ប្រទេសចិនបានបញ្ជាឱ្យក្រុមមន្ត្រីនៅទីភ្នាក់ងារកណ្តាលរបស់រដ្ឋាភិបាល មិនឲ្យប្រើប្រាស់ទូរស័ព្ទ iPhone របស់ក្រុមហ៊ុន Apple និងឧបករណ៍ដែលមានម៉ាកបរទេសផ្សេងទៀតសម្រាប់ការងារ ឬនាំយកឧបករណ៍ទាំងនោះចូលទៅក្នុងការិយាល័យឡើយ។ក្នុងប៉ុន្មានសប្តាហ៍ថ្មីៗនេះ បុគ្គលិករដ្ឋាភិបាល ត្រូវបានផ្តល់ការណែនាំបែបនេះដោយថ្នាក់លើរបស់ពួកគេ នៅក្នុងក្រុមជជែក ឬកិច្ចប្រជុំនៅកន្លែងធ្វើការ នេះបើយោងតាមរបាយការណ៍ ដែលបានបន្ថែមថា គេមិនច្បាស់ទេថា តើបម្រាមនោះត្រូវបានចែកចាយទូលំទូលាយប៉ុណ្ណានោះទេ។ការហាមឃាត់នេះធ្វើឡើងនៅមុនព្រឹត្តិការណ៍របស់ក្រុមហ៊ុន Apple នៅសប្តាហ៍ក្រោយ ដែលក្រុមអ្នកវិភាគជឿថា នឹងនិយាយអំពីការចេញលក់ទូរស័ព្ទ iPhone ស៊េរីថ្មី ហើយអាចបង្កឱ្យមានការព្រួយបារម្ភក្នុងចំណោមក្រុមហ៊ុនបរទេស ដែលកំពុងប្រតិបត្តិការនៅក្នុងប្រទេសចិន នៅពេលដែលភាពតានតឹងរវាងចិន និងសហរដ្ឋអាមេរិកកើនឡើងកាន់តែខ្លាំង។របាយការណ៍ WSJ នេះ មិនបានបញ្ចេញឈ្មោះក្រុមហ៊ុនផលិតទូរស័ព្ទផ្សេងទៀតក្រៅពីក្រុមហ៊ុន Apple ឡើយ។ ការិយាល័យព័ត៌មានក្រុមប្រឹក្សារដ្ឋរបស់ប្រទេសចិន និងក្រុមហ៊ុន Apple ដែលដោះស្រាយសំណួរប្រព័ន្ធផ្សព្វផ្សាយក្នុងនាមរដ្ឋាភិបាលចិន មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់សារព័ត៌មាន រ៉យទ័រ ទាក់ទងនឹងបញ្ហានេះនោះទេ៕

គម្រោងសហហិរញ្ញប្បទានផ្តល់កម្ចីជាង ៥៤ លានដុល្លារ ដើម្បីគាំទ្រការស្តារកំណើនវិស័យទេសចរណ៍

ភ្នំពេញ៖ សហហិរញ្ញប្បទានសម្រាប់ការស្តារ និងជំរុញកំណើនក្នុងវិស័យទេសចរណ៍ គិតមកដល់ថ្ងៃទី ៣១ សីហា នេះ បានបញ្ចេញឥណទានមានទំហំជាង ៥៤ លានដុល្លារអាមេរិក ដោយបានគាំទ្រដល់សហគ្រាសចំនួន ៣៥០ សម្រាប់ការពង្រីកអាជីវកម្មក្នុងវិស័យទេសចរណ៍។ធនាគារសហគ្រាសធុនតូច និងមធ្យមកម្ពុជា បានបង្ហាញវឌ្ឍនភាពគម្រោងសហហិរញ្ញប្បទានសម្រាប់ការស្តារ និងជំរុញកំណើន ក្នុងវិស័យទេសចរណ៍ ដើម្បីជួយដោះស្រាយបញ្ហាប្រឈម នៃការកង្វះហិរញ្ញប្បទាន សម្រាប់អាជីវកម្មក្នុងវិស័យទេសចរណ៍ ដើម្បីគ្រាំទ្រ និងជួយជ្រោមជ្រែង កែលម្អអាជីវកម្ម ដែលទទួលរងផលប៉ះពាល់ ឲ្យបានរៀបចំដំណើរការអាជីវកម្មឡើងវិញ និងធ្វើទំនើបកម្ម ពិពិធកម្ម សេវាកម្ម និងផលិតផលរបស់ខ្លួន នៃគម្រោងត្រៀមទទួលភ្ញៀវទេសចរណ៍ជាតិ និងអន្តរជាតិ បន្ទាប់ពីវិបត្តិជំងឺកូវីដ ១៩ បានធូរស្រាល។សហគ្រាសកំពុងទទួលបានឥណទានសម្រាប់ការពង្រីកអាជីវកម្មរួមមាន៖ អាជីវកម្មសណ្ឋាគារ ២៩ ភាគរយ, អាជីវកម្មផ្ទះសំណាក់ ២៥ ភាគរយ, ភោជនីយដ្ឋាន ៣១ ភាគរយ, អាជីវកម្មគាំទ្រវិស័យទេសចរណ៍ ១៥ ភាគរយ, និងសហគ្រិនស្រ្តី ៤១ ភាគរយ ។សូមបញ្ជាក់ថា គម្រោង សហហិរញ្ញប្បទានសម្រាប់ការស្តារ និងជំរុញកំណើនក្នុងវិស័យទេសចរណ៍ បានចាប់ផ្តើមអនុវត្តចាប់ពីពាក់កណ្តាលឆ្នាំ ២០២២ របស់រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ ដែលសហការជាមួយគ្រឹះស្ថានហិរញ្ញវត្ថុជាដៃគូរ ដោយបង្កើតគម្រោងសហហិរញ្ញប្បទាននេះឡើង ដើម្បីផ្តល់ជូននូវអត្រាការប្រាក់ពិសេសជូនដល់សហគ្រាស ឬអាជីវកម្មដែលរងនូវផលប៉ះពាល់ ដោយបានសម្រេចផ្តល់ការប្រាក់អតិបរមា ៦.៥% ក្នុងមួយឆ្នាំ ក្នុងនោះម្ចាស់អាជីវកម្មអាចកម្ចីក្នុងទំហំអតិបរមា ៦០ ម៉ឺនដុល្លារ មានរយៈពេលអនុគ្រោះប្រាក់ដើមរហូតដល់ ២៤ ខែ និងមានរយៈពេលកម្ចីឥណទានរហូតដល់ ៨ឆ្នាំ៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ឯកឧត្តមសាស្ត្រាចារ្យរដ្ឋមន្ត្រី ចុះពិនិត្យ និងសួរសុខទុក្ខប្រជាពលរដ្ឋ ដែលមកទទួលសេវាសុខភាព នៅមន្ទីរពេទ្យកាល់ម៉ែត

ឯកឧត្តមសាស្រ្តាចារ្យ ឈាង រ៉ា «អ្នកផ្តល់ឈាមទាំងអស់ គឺជាវីរៈបុរស ហើយការផ្តល់ឈាម គឺជាការធ្វើអំពើល្អ»

ឯកឧត្តម ទេសរដ្ឋមន្ត្រី គន់ គីម ណែនាំឱ្យរដ្ឋបាលថ្នាក់ក្រោមជាតិតាមដានជាប់ជាប្រចាំនូវបាតុភាពកើតឡើងដោយសារគ្រោះមហន្តរាយ

យុវជនត្រូវរៀបចំឥរិយាបទដើម្បីត្រៀមបន្តវេនក្នុងកិច្ចការការពារប្រទេសនិងអភិវឌ្ឍន៏ជាតិ

UN ៖ ការរលាយផ្ទាំងទឹកកកលឿនជាងពេលណាៗទាំងអស់ បង្កហានិភ័យនៃផលវិបាកទឹកជំនន់

ក្រសួងថាមពល៖ គុយបាស្ថិតក្នុងដំណើរការដំឡើងកម្ការផ្ទាំងស្រូបពន្លឺព្រះអាទិត្យ ៥០កន្លែងក្នុងឆ្នាំនេះ

រុស្ស៊ីការពារសិទ្ធិរបស់អ៊ីរ៉ង់ ក្នុងការបន្តកម្មវិធីនុយក្លេអ៊ែរដោយសន្តិវិធី នៅមុនមានការចរចា រវាងអាមេរិក និងអ៊ីស្រាអែល

អ៊ីស្រាអែលគំរាមដាក់បញ្ចូលតំបន់ហ្កាហ្សាស្រ្ទីបជាឧបសម្ព័ន្ធរបស់ខ្លួន ក្រោយការវាយប្រហារថ្មី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877