BTV NEWS

រដ្ឋមន្រ្តីក្រសួងឧស្សាហកម្ម និងឯកអគ្គរាជទូតជប៉ុន អញ្ជើញចូលរួមភ្ជាប់បំពង់មេនាំទឹកឆៅកោះនរា

កម្ពុជាពិនិត្យពិភាក្សានៃវឌ្ឍនភាព លើការតភ្ជាប់ប្រព័ន្ធ cdcIPM ទៅថ្នាក់ក្រោមជាតិ

កម្ពុជាមានសុទិដ្ឋិនិយមខ្ពស់ លើការទាក់ទាញវិនិយោគិនពីទីក្រុងសៀងហៃមកធ្វើការវិនិយោគ

កម្ពុជា-ជប៉ុនទស្សនកិច្ចស្ថានីយបូមទឹកឆៅថ្មីកោះនរា និងបើកការដ្ឋានគម្រោងភ្ជាប់បំពង់មេនាំទឹកឆៅ

សេដ្ឋកិច្ច និង កសិកម្ម

សម្ដេចនាយករដ្ឋមន្រ្តី៖ របៀបវារៈវេទិកាសេដ្ឋកិច្ចពិភពលោក និងយុទ្ធសាស្រ្តបញ្ចកោណមានលទ្ធភាពបន្ស៊ីគ្នា

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងថា របៀបវារៈនៃវេទិការសេដ្ឋកិច្ចពិភពលោក និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧នេះ មានលទ្ធភាពបន្ស៊ីគ្នា។ថ្លែងនៅក្នុងកិច្ចជំនួបទ្វេភាគីជាមួយលោកសាស្រ្តាចារ្យ ក្លូស ស្វប់ (Klaus Schwab) ស្ថាបនិក និងជាប្រធានប្រតិបត្តិ នៃវេទិកាសេដ្ឋកិច្ចពិភពលោកនាថ្ងៃទី៦ ខែកញ្ញា ឆ្នាំ២០២៣នេះ នៅទីក្រុងហ្សាការតា ប្រទេសឥណ្ឌូនេស៊ី សម្តេចធិបតី ហ៊ុន ម៉ាណែត បានបញ្ជាក់ថា សម្តេចពិតជាមានសេចក្តី ត្រេកអរ ដែលលោកសាស្រ្តាចារ្យបានបង្ហាញពីបំណង ក្នុងការបង្កើនកិច្ចសហប្រតិបត្តិការបន្ថែមទៀតនៅក្នុងតំបន់អាស៊ាន ក៏ដូចជាប្រទេសកម្ពុជា។សម្តេចនាយករដ្ឋមន្រ្ដី លើកឡើង អំពីសង្គតិភាព និងលទ្ធភាពបន្ស៊ីគ្នាបានរវាងរបៀបវារៈនៃវេទិកាសេដ្ឋកិច្ចពិភពលោក និងយុទ្ធសាស្រ្តបញ្ចកោណ-ដំណាក់កាលទី១ ជាពិសេសត្រង់ការអភិវឌ្ឍវិស័យឯកជន និងការអភិវឌ្ឍសេដ្ឋកិច្ច និងសង្គមឌីជីថល។ សម្តេចធិបតី ក៏បានវាយតម្លៃខ្ពស់ចំពោះតួនាទីដ៏សំខាន់របស់ វេទិកាសេដ្ឋកិច្ចពិភពលោក ក្នុងការផ្សារភ្ជាប់ទំនាក់ទំនងរវាងវិស័យសាធារណៈ និងវិស័យឯកជនឱ្យកាន់តែមានភាពប្រសើរឡើងផងដែរ។ក្នុងឱកាសនោះដែរសម្តេចធិបតី ក៏បានវាយតម្លៃខ្ពស់ផងដែរ ចំពោះវេទិកាសេដ្ឋកិច្ចពិភពលោក ដែលតែងពាំនាំសមិទ្ធផលរបស់រាជរដ្ឋាភិបាល និងសក្តានុពលរបស់កម្ពុជាទៅលើកបង្ហាញ (showcase) នៅលើឆាកអន្តរជាតិ, ក៏ដូចជាក្នុងវេទិកាសេដ្ឋកិច្ចពិភពលោកចូលរួមលើកកម្ពស់របៀបវារៈនៃការអភិវឌ្ឍសង្គម-សេដ្ឋកិច្ចរបស់គ្រប់បណ្តាប្រទេសទាំងអស់, ដោយរាប់ទាំងកម្ពុជានៅក្នុងបរិការណ៍ដ៏លំបាក និង មិនច្បាស់លាស់កន្លងមកនេះ។ តាមរយៈជំនួបទ្វេភាគីនេះដែរលោកសាស្រ្តាចារ្យ បានអបអរសាទរចំពោះ សម្តេចធិបតី ដែលត្រូវបានជ្រើសតាំងជានាយករដ្ឋមន្រ្តីនៃរាជរដ្ឋាភិបាលនីតិកាលទី៧នៃរដ្ឋសភា និងបានផ្តាំផ្ញើសួរសុខទុក្ខប្រកបដោយក្តីនឹករឭកជូនចំពោះ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា។ លោកសាស្រ្តាចារ្យបញ្ជាក់ថា ក្រោយពីបានអញ្ជើញចូលរួមកិច្ចប្រជុំកំពូលអាស៊ាននៅកម្ពុជា កាលពីឆ្នាំទៅ, លោកសាស្រ្តាចារ្យ បានកត់សម្គាល់ និងវាយតម្លៃខ្ពស់ចំពោះកម្ពុជា ជាប្រទេសដែលមានសក្តានុពល និងកំពុងរីកលូតលាស់ទៅមុខយ៉ាងល្អប្រសើរ។ ជាមួយគ្នានោះលោកសាស្រ្តាចារ្យ ក៏បានគោរពអញ្ជើញ សម្តេចធិបតីចូលរួមក្នុងវេទិកាសេដ្ឋកិច្ចពិភពលោក នៅទីក្រុងដាវ៉ូស (Davos) នាពេលឆាប់ៗខាងមុខនេះផងដែរ៕អត្ថបទបាន ចក់

ធនាគារ និងហិរញ្ញវត្ថុប្រមាណ២០ស្ថាប័ន នឹងធ្វើពិព័រណ៍ការងារនៅចុងខែនេះ

ភ្នំពេញ៖ គ្រឹះស្ថានធនាគារ និងហិរញ្ញវត្ថុ ប្រមាណ២០ស្ថាប័ន នឹងរួមគ្នារៀបចំតាំងពិព័រណ៍ការងារ នៅថ្ងៃទី២៩ និងទី៣០ ខែកញ្ញា នេះ នៅទីតាំងសាកលវិទ្យាល័យជាតិគ្របគ្រង (NUM) ដើម្បីផ្ដល់ឱកាសដល់ប្រជាពលរដ្ឋ និងសិស្សនិស្សិត ដែលមានបំណងរកការងារធ្វើក្នុងវិស័យធនាគារ ។ក្នុងសន្និសីទសារព័ត៌មាន ស្តីពីពិព័រណ៍ជំនាញ និងការងារក្នុងវិស័យធនាគារ (JOBS & SKILLS SUMMIT 2023) នៅព្រឹកថ្ងៃទី៦ ខែកញ្ញា នេះ លោក ស៊ូ វិសាល នាយកគ្រប់គ្រងទូទៅវិទ្យាស្ថានធនាគារ (IBF) បានលើកឡើងថា សម្រាប់ស្ថាប័នធនាគារ និងហិរញ្ញវត្ថុ ទាំងប្រាមាណ ២០ស្ថាប័ននោះ នឹងចូល រួមដាក់តាំងស្តង់បង្ហាញពីឱកាសការហាត់ការ និងការងារ ជាង៤០០០មុខតំណែង ហើយក្រៅពីនេះ IBF ក៏បានសហការជាមួយមជ្ឈមណ្ឌលការងារ (NUM Career Center) និងអ្នកជំនាញក្នុងវិស័យរៀបចំ ជាពិសេសវគ្គបណ្តុះបណ្តាលខ្លីៗ ទាក់ទងទៅនឹងជំនាញទន់ និងជំនាញរឹង ក្នុងការត្រៀមចាប់យកឱកាសការ ងារក្នុងវិស័យធនាគារ និងហិរញ្ញវត្ថុ នាពេលខាងមុខ ។លោកបានបន្តថា ហេតុដូចនេះ វិទ្យាស្ថានធនាគារ និងហិរញ្ញវត្ថុ សូមលើកទឹកចិត្តដល់សាកលវិទ្យា ល័យដៃគូទាំងអស់ ស្ថាប័នពាក់ព័ន្ធ សិស្សនិស្សិត និងដៃគូសហការទាំងអស់ ក្នុងការផ្សព្វផ្សាយព័ត៌មាន នេះ ទៅដល់និស្សិត និងមិត្តភក្ដិរបស់ខ្លួន ដើម្បីឱ្យមានការចូលរួមបានច្រើនកុះករ ។សិស្សនិស្សិត បានលើកឡើងថា ពិព័រណ៍នេះ ពិតជាមានសារសំខាន់ខ្លាំងណាស់ ដល់សិស្ស និស្សិត ដែលសិក្សាលើជំនាញពាក់ព័ន្ធនឹងធនាគារ ព្រោះបានផ្ដល់ឱកាសដល់ពួកគេ ក្នុងការស្វែងរកការ ងារធ្វើ ឲ្យត្រូវនឹងជំនាញរបស់ខ្លួន និងគាំទ្រឲ្យមានការរៀបចំបន្តទៀត ។ឯកឧត្តមសាស្រ្តាចារ្យបណ្ឌិត ហោ ប៉េង សាកលវិទ្យាធិការ សាកលវិទ្យាល័យជាតិគ្រប់គ្រង បាន មានប្រសាសន៍ថា ទសវត្សចុងក្រោយនេះ វិស័យធនាគារ និងហិរញ្ញវត្ថុនៅកម្ពុជា មានការរីកចម្រើនគួរឱ្យ កត់សម្គាល់ ហើយតម្រូវការធនធានមនុស្ស ដែលមានភាពឈ្លាសវៃ សកម្ម និងទេពកោសល្យ ប្រកប ដោយគំនិតផ្តួចផ្តើម និងការច្នៃប្រឌិតខ្ពស់ ពិតជាចាំបាច់ ដើម្បីឆ្លើយតបទៅនឹងការវិវឌ្ឍដ៏ឆាប់រហ័ស និងតម្រូវការធនធានយ៉ាងគំហុកក្នុងវិស័យធនាគារ។ ឯកឧត្ដម សម្ដែងនូវការគាំទ្រចំពោះការរៀបចំតាំង ពិព័រណ៍នេះ ៕អត្ថបទ៖ បាន សុខរិទ្ធិ

កម្ពុជានិងហ្វីលីពីន ចុះអនុស្សរណៈយោគយល់គ្នា ក្នុងការអភិវឌ្ឍកសិកម្ម និងសហគ្រាស មីក្រូ-ធុនតូច

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និង ឯកឧត្តម ហ្វឺឌីណាន់ រ៉ូម៉ូលដេស ម៉ាកូស ជេអរ (Ferdinand Romualdez Marcos Jr.) ប្រធានាធិបតីហ្វីលីពីន បានអញ្ជើញធ្វើជាសាក្សីក្នុងពិធីចុះហត្ថលេខាលើអនុស្សរណៈ នៃការយោគយល់គ្នាសម្រាប់ភាពជាដៃគូ ក្នុងការអភិវឌ្ឍកសិកម្ម និងសហគ្រាស មីក្រូ-ធុនតូច និងមធ្យមកម្ពុជា-ហ្វីលីពីន។ការចុះអនុស្សរណៈយោគយល់នេះ ត្រូវបានធ្វើឡើងរវាងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមបឹក្សាពិគ្រោះយោបល់ ធុរកិច្ច អាស៊ាន សម្រាប់កម្ពុជាជាមួយលោក ចូហ្សេ ម៉ា អេ ខនសិបសិន (JOSE MA. A CONCEPCION III) ប្រធានក្រុមប្រឹក្សាពិគ្រោះយោបល់ធុរកិច្ច អាស៊ាន សម្រាប់ហ្វីលីន នៅថ្ងៃទី៥ ខែកញ្ញា ឆ្នាំ២០២៣នេះ នៅទីក្រុងហ្សាការតា ប្រទេសឥណ្ឌូនេស៊ី ដោយផ្តោតជាសំខាន់លើ ការលើកកម្ពស់វិស័យកសិកម្ម និងការជំរុញកាលានុវត្តភាពកសិពាណិជ្ជកម្ម ប្រកបដោយចីរភាព ។ បើយោងតាមឆាណែលតេលេក្រាមរបស់សម្តេចតេជោ ហ៊ុន សែន បានបញ្ជាក់ថា អនុស្សរណៈយោគយល់គ្នានេះ គឺផ្តោតជាសំខាន់លើការពិនិត្យលទ្ធភាពរួមគ្នា ដូចជា ការសិក្សា និងបង្កើតច្រកបង្រៀនអំពីកសិកម្មប្រកបដោយ សក្តានុពល បច្ចេកវិទ្យា កសិកម្ម សន្តិសុខ ស្បៀង ម៉ូឌែល ធុរកិច្ច កសិសហគ្រិន និងការអភិវឌ្ឍ ខ្សែច្រវ៉ាក់តម្លៃរបស់កសិករ សហគ្រាស និងស្ថាប័នរដ្ឋទាំងតូច មធ្យម និងធំ។ កំណត់ នូវតម្រូវការធុរកិច្ចដើម្បីអភិវឌ្ឍន៍កាលានុវត្តភាពពាណិជ្ជកម្ម និងវិនិយោគក្នុងវិស័យស្រូវអង្ករ និងផលិតផល និងសេវាកម្ម កសិកម្ម ផ្សេងទៀត។ លើកកម្ពស់ការស្រាវជ្រាវ និង អភិវឌ្ឍន៍ស្រូវ អង្ករ។ និងជំរុញយុទ្ធសាស្រ្តប្រកបដោយ ប្រសិទ្ធភាពក្នុងការដោះស្រាយបញ្ហា ប្រែប្រួលអាកាសធាតុ និងធានានូវបរិយកាស កសិធុរកិច្ចប្រកបដោយចីរភាពជាដើម៕អត្ថបទ៖ បាន ចក់

ធនាគារ SME មានដៃគូរសហការ ដើម្បីលើកកម្ពស់ការទទួលបានឥណទានសម្រាប់ពង្រីកអាជីវកម្ម

ភ្នំពេញ៖ ធនាគារសហគ្រាសធុនតូច និងមធ្យម មានដៃគូរអាជីវកម្មជាងច្រើន និងកំពុងជំរុញបង្កើតកិច្ចសហប្រតិបត្តិការបន្ត ជាមួយអង្គការ សមាគមពាក់ព័ន្ធ ដើម្បីលើកកម្ពស់ដល់ការធ្វើអាជីវកម្មក្នុងការទទួលបានឥណទានក្នុងលក្ខខណ្ឌអនុគ្រោះ ដែលមានការបញ្ចុះអត្រាការប្រាក់ទាប ដើម្បីឲ្យម្ចាស់សហគ្រាសមានលទ្ធយកឥណទានទៅពង្រីកអាជីវកម្ម។លោក នៀវ សុគន្ធ នាយកប្រតិបត្តិធនាគារសហគ្រាសធុនតូច និងមធ្យមកម្ពុជា លើកឡើងក្នុងកិច្ចសម្ភាសន៍ជាមួយភ្នាក់ងារអ្នកព័ត៌មាន BTV ស្តីពីការបង្កើតកិច្ចសហប្រតិបត្តិការភាពជាដៃគូរជាមួយអង្គការ សមាគមពាក់ព័ន្ធ ដើម្បីលើកកម្ពស់ការទទួលបានហិរញ្ញប្បទាន សម្រាប់ពង្រីកអាជីវកម្មថា ធនាគារសហគ្រាសធុនតូច និងមធ្យមកម្ពុជា គឺជាធនាគាររបស់រដ្ឋ និងជាធនាគារគោលនយោបាយ ដែលបានបង្កើតឡើងក្នុងគោលបំណងផ្តល់ការគាំទ្រ សេវាកម្មហិរញ្ញវត្ថុដែលមានលក្ខខណ្ឌអនុគ្រោះ ជូនដល់សហគ្រាសធុនតូច និងមធ្យមនៅកម្ពុជា ក្នុងគោលដៅដែលបានផ្តល់អាទិភាព ការកែច្នៃកសិកផល, ការកែច្នៃម្ហូបអាហារ និងគាំទ្រដល់ផលិតកម្មនានាជាដើម។លោក បន្តថា ដើម្បីអនុវត្តគោលនយោបាយឲ្យមានប្រសិទ្ធភាព ធនាគារសហគ្រាសធុនតូច និងមធ្យមកម្ពុជា បានសហការជាមួយដៃគូរអាជីវកម្មមួយចំនួន មកដល់ពេលនេះ ធនាគារ SME មានដៃគូរសហការជាង១០ដូចជា៖ សហមាគមអ្នកផលិតចំណីអាហារកម្ពុជា, សមាគមសហគ្រិនស្រ្តី និងសម្ព័ន្ធសមាគមសហគ្រាសធុនតូច និងមធ្យមជាដើម សុទ្ធសឹងជាដៃគូរអាជីវកម្មរបស់ធនាគារ SME ក្នុងនោះចំពោះហិរញ្ញប្បទានដែលផ្តល់ឲ្យសហគ្រាសធុនតូច និងមធ្យម ក៏ត្រូវបានផ្តល់តាមដៃគូរសហការទាំងអស់ ដោយមានលក្ខខណ្ឌអនុគ្រោះ (ដោយមានការបញ្ចុះអត្រាការប្រាក់) ដើម្បីឲ្យម្ចាស់សហគ្រាសមានលទ្ធបានឥណទានទៅពង្រីកអាជីវកម្ម។លោក នៀវ សុគន្ធ បញ្ជាក់ថា ជុំវិញការផ្តល់ហិរញ្ញប្បទានតាមរយៈធនាគារសហគ្រាសធុនតូច និងមធ្យមកម្ពុជា គាំទ្រដល់វិស័យផ្សេងៗ នេះ បច្ចុប្បន្នមានការធ្លាក់ចុះបន្តិចបន្តួច បើធៀបទៅរយៈពេលដូចគ្នាឆ្នាំ ២០២២ គឺមានកំណើនទាបជាង, តែទោះបីយ៉ាងណាក៏ដោយ ការផ្តល់ឥណទានរបស់ធនាគារសហគ្រាសធុនតូច និងមធ្យមកម្ពុជា នៅតែមានកំណើនឥណទាន ដោយសារមានអាជីវកម្មថ្មីៗត្រូវបង្កើនឡើងជាបន្តបន្ទាប់៕អត្ថបទ៖ សុន រ៉ាឌី

កសិករនៅខេត្តបាត់ដំបងរីករាយស្រូវឆ្នាំនេះ មានតម្លៃខ្ពស់ ទោះទិន្នផលធ្លាក់ចុះដោយគ្រោះរាំងស្ងួត

បាត់ដំបង៖ ប្រជាកសិករនៅក្នុងខេត្តបាត់ដំបង បានបង្ហាញអារម្មណ៍សប្បាយរីករាយយ៉ាងខ្លាំង ដែលស្រូវឆ្នាំនេះមានតម្លៃខ្ពស់ជាងបណ្ដាឆ្នាំមុនៗ ទោះបីទិន្នផលស្រូវធ្លាក់ចុះ ដោយសារគ្រោះរាំងស្ងួតក៏ដោយ។សូមបញ្ជាក់ថា តម្លៃស្រូវប្រភេទស្រងែ ក្នុងស្រុកមោងឫស្សី នាពេលបច្ចុប្បន្ននេះ មានតម្លៃចន្លោះពី ១២៥០ទៅ១៣១០រៀល ក្នុងមួយគីឡូក្រាម ខណៈស្រូវប្រភេទអូអឹម និងស្រូវប្រភេទផ្សេងៗទៀតមានតម្លៃចាប់ពី១០០០រៀលឡើង ទៅក្នុងមួយគីឡូក្រាម ដែលជាតម្លៃមួយខ្ពស់គួរសមបើធៀបជាមួយឆ្នាំមុនៗ។ប្រជាកសិកររស់នៅភូមិអង្គ្រង ឃុំជ្រៃ ស្រុកមោងឫស្សី ខេត្តបាត់ដំបង បានបង្ហាញទឹកមុខសប្បាយរីករាយដែលតម្លៃស្រូវក្នុងឆ្នាំ២០២៣នេះ ហក់ឡើងខ្ពស់មិនធ្លាប់មានក្នុងរយៈពេលជាច្រើនឆ្នាំកន្លងមក។ កសិករជឿជាក់ថា ក្រោមការដឹកនាំរបស់សម្ដេចធិបតី ហ៊ុន ម៉ាណែត រាជរដ្ឋាភិបាលនឹងជួយរក្សាតម្លៃស្រូវឱ្យបាននៅខ្ពស់។ទន្ទឹមនឹងភាពសប្បាយរីករាយជាមួយស្រូវបានថ្លៃ ប្រជាកសិករ បានស្នើដល់អាជ្ញាធរ និងសហគមន៍ប្រើប្រាស់ទឹកសូមគិតគូរបែងចែកទឹកឱ្យបានស្មើភាពគ្នាដល់ប្រជាកសិករនៅគ្រប់តំបន់នៅឆ្នាំបន្ទាប់ៗ កុំឱ្យបានតែអ្នករស់នៅប៉ែកខាងលើ ហើយតំបន់ខាងក្រោមអត់ទទួលបានទឹកគ្រប់គ្រាន់នោះ។ជាមួយគ្នានេះ ប្រជាកសិករបានបង្ហាញការសាទរ និងគាំទ្រចំពោះគោលនយោបាយរបស់រាជរដ្ឋាភិបាលអាណត្តិទី៧ ដែលផ្ដល់អាទិភាពដល់ការលើកស្ទួយជីវភាពកសិករ បង្កើនទីផ្សារ និងដំឡើងថ្លៃកសិផលជាដើម ហើយជាពិសេសនោះ គឺការត្រៀមបញ្ជូនអ្នកជំនាញបច្ចេកទេសកសិកម្មមកតាមមូលដ្ឋាន ដើម្បីជួយកសិករ៕

កម្ពុជា-ចិនចុះអនុស្សរណៈចំនួន៣ ពង្រឹងកិច្ចសហការណ៍នៃប្រទេសទាំងពីរ

ភ្នំពេញ៖ ឯកឧត្តមបណ្ឌិត ស៊ាន បូរ៉ាត តំណាងសម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ទទួលជួបពិភាក្សាជាមួយឯកឧត្តម លីវ ជានឆាវ (LIU JIANCHAO) រដ្ឋមន្រ្តីក្រសួងទំនាក់ទំនង អន្តរជាតិ នៃគណៈកម្មាធិការមជ្ឈិមបក្សកុម្មុយនីស្តចិន កាលពីម្សិលមិញ ។ ការជួបពិភាក្សានេះធ្វើឡើង នៅរាជធានីភ្នំពេញ។នៅក្នុងជំនួបនោះ ឯកឧត្តមបណ្ឌិត ស៊ាន បូរ៉ាត បានជួបសន្ទនាជាមួយឯកឧត្តម លីវ ជានឆាវ រដ្ឋមន្រ្តីក្រសួងទំនាក់ទំនងអន្តរជាតិ នៃគណៈកម្មាធិការ មជ្ឈិមបក្សកុម្មុយនីស្តចិន និងចុះហត្ថលេខាលើ អនុស្សរណៈយោគយល់គ្នា ចំនួន៣ រួមមាន៖ទី១. អនុស្សរណៈយោគយល់គ្នា រវាងផ្ទះយុវជនដើម្បីមិត្ត ភាពកម្ពុជា-ចិន ជាមួយទស្សនាវដ្តីពិភពលោកសហសម័យចិន សម្រាប់ឆ្នាំ២០២៣-២០២៥, ទី២. អនុស្សរណៈយោគយល់គ្នា រវាងក្រសួងការងារ និងបណ្តុះបណ្តាលវិជ្ជាជីវៈ នៃព្រះរាជាណាចក្រកម្ពុជា ជាមួយ CIIC International Education Technology (Beijing) Co.,Ltd ស្តីអំពីអំពីកិច្ចសហប្រតិបត្តិ ការអភិវឌ្ឍ ការអប់រំបណ្តុះបណ្តាលបច្ចេកទេស និងវិជ្ជាជីវៈ(TVET) និងទី៣. អនុស្សរណៈយោគយល់គ្នា រវាងសាកលវិទ្យាល័យភូមិន្ទភ្នំពេញ ជាមួយសាកលវិទ្យាល័យបច្ចេកវិទ្យា និងធុរកិច្ចប៉េកាំង នៃសាធារណរដ្ឋប្រជាមានិតចិន ស្តីពីការផ្លាស់ប្តូរនិស្សិត និងបុគ្គលិកអប់រំ ក៏ដូចជាការស្រាវជ្រាវរួមគ្នា ដើម្បីផលប្រយោជន៍ទៅវិញទៅមក ។ទន្ទឹមនឹងនេះ ភាគីទំាងពីរ ក៏បានប្តេជ្ញាក្នុងការទំនាក់ទំនងល្អ និងកិច្ចសហប្រតិបត្តិការទេ្វភាគី កម្ពុជា-ចិន ឱ្យកាន់តែប្រសើរឡើងថែមទៀត ពិសេសបន្តជំរុញកិច្ចសហប្រតិបត្តិការក្រោម ក្របខណ្ឌ នៃគណៈកម្មាធិការអន្តររដ្ឋាភិបាល កម្ពុជា-ចិន ឱ្យកាន់តែមានភាពរលូន និងនាំមកនូវគម្រោងសម្រាប់ អភិវឌ្ឍន៍វិស័យសំខាន់ៗបន្ថែមទៀត ៕អត្ថបទ៖ ទូច សោភ័ណ

រាជរដ្ឋាភិបាលដាក់ចេញគោលនយោបាយ ដើម្បីគាំពារដល់ការអភិវឌ្ឍន៍សេដ្ឋកិច្ចក្រៅប្រព័ន្ធ

ភ្នំពេញ៖ រាជរដ្ឋាភិបាលកម្ពុជានៅក្នុងអាណត្តិថ្មី នីតិកាលទី ៧នេះ ដាក់ចេញគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធ ក្នុងគោលដៅលើកកម្ពស់លទ្ធភាពការធ្វើអាជីវកម្មគ្រប់ប្រភេទ ដើម្បីទទួលបានអត្ថប្រយោជន៍ ក៏ដូចជាការគាំពារនៃការទទួលបានហិរញ្ញប្បទានផ្សេងៗ។ លោកជំទាវ គង់ សូរីតា រដ្ឋលេខាធិការក្រសួងកិច្ចការនារី លើកឡើងក្នុងវេទិការសហគ្រិនស្រ្តី ក្នុងការអភិវឌ្ឍអាជីវកម្ម និងពិព័រណ៍ពាណិជ្ជកម្មក្នុងស្រុក នៅចុងសប្តាហ៍កន្លងមកថា ជុំវិញការអភវិឌ្ឍសេដ្ឋកិច្ចក្រៅ ថ្មីៗនេះកម្ពុជាបានបើកកិច្ចប្រជុំអន្តរក្រសួង ដើម្បីជជែកពិភាក្សាលើកិច្ចគាំពារ ក្នុងគោលដៅលើកកម្ពស់អ្នកធ្វើអាជីវកម្មក្រៅប្រព័ន្ធ។ រាជរដ្ឋាភិបាលនិងយកចិត្តទុកដាក់ ជាពិសេសស្រ្តីដែលប្រកបមុខរបរ ឬធ្វើការនៅក្រៅប្រព័ន្ធ មិនថាជាសហគ្រិន ជាម្ចាស់អាជីវកម្ម និងជានយោជិតក៏ដោយ ពួកគេនឹងទទួលបានអត្ថប្រយោជន៍ដូចៗគ្នា ដោយមិនមានត្រូវបោះបង់អ្នកណាម្នាក់។ជុំវិញការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធនេះ លោកជំទាវ លើកឡើងថា នេះជាឱកាសមួយជាពិសេសបងប្អូនជាស្រ្តី ដើម្បីទទួលយកអត្ថប្រយោជន៍ការគាំពារ ឬការផ្តល់នូវហិរញ្ញប្បទានផ្សេងៗ ក្នុងគោលដៅជំរុញឲ្យសហគ្រិនស្រ្តីឲ្យកាន់តែមាននិរន្តភាពថែមទៀត ។ លោកជំទាវ គង់ សូរីតា បន្តលើកឡើងថា ជុំវិញផែនការខាងលើ នេះគឺជាព័ត៌មានល្អ នៃការលើកកម្ពស់លទ្ធភាពរបស់អ្នកធ្វើអាជីវកម្មក្រៅប្រព័ន្ធ និងជាការបង្ហាញនូវការយកចិត្តទុកដាក់ខ្ពស់របស់រាជរដ្ឋាភិបាល នៅក្នុងអាណត្តិថ្មី នីតិកាលទី ៧ នេះ។ជុំវិញការរៀបចំគោលនយោបាយសេដ្ឋកិច្ចក្រៅប្រព័ន្ធនេះដែរ នៅថ្ងៃទី ៣០ ខែ សីហា កន្លងមក ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានបើកកិច្ចប្រជុំលើការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធជាអន្តរក្រសួង ដើម្បីពិភាក្សា និងប្រមូលធាតុចូល សម្រាប់ចងក្រងចេញជាគោលនយោបាយ ដើម្បីគាំទ្រដល់ការអភិវឌ្ឍន៍សេដ្ឋកិច្ចក្រៅប្រព័ន្ធ។សូមបញ្ជាក់ថា នៅក្នុងអាណត្តិថ្មីនេះ រាជរដ្ឋាភិបាលនឹងដាក់ចេញកម្មវិធីគោលនយោបាយ សម្រាប់ការកសាង និងការពារមាតុភូមិឆ្នាំ ២០២៣-២០២៨ សម្រាប់សហគ្រាសធុនតូច និងមធ្យម រួមទាំងវិស័យសេដ្ឋកិច្ចក្រៅប្រព័ន្ធ តាមច្បាប់វិនិយោគថ្មី និងភាពប្រទាក់ក្រឡានៃការរៀបចំច្បាប់ស្តីពីសារពើពន្ធថ្មី ព្រមទាំងការដាក់ចេញនូវវិធានការលើកទឹកចិត្តជាក់លាក់ ដើម្បីកែលម្អបរិយាកាសធុរកិច្ចសម្រាប់សហគ្រាសធុនតូច និងមធ្យម និងការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធ ជំរុញបន្ថែមដល់ការអភិវឌ្ឍន៍វិស័យកសិកម្ម, ទេសចរណ៍, សហគ្រាសធុនតូច និងមធ្យម តាមរយៈ ធនាគារសហគ្រាសធុនតូច និងមធ្យម, ធនាគារអភិវឌ្ឍន៍ជនបទ និងកសិកម្ម, ក្រុមហ៊ុនសាជីវកម្មធានាឥណទានកម្ពុជា, មូលនិធិសហគ្រិន និងមូលនិធិអភិវឌ្ឍន៍ជំនាញជាដើម៕អត្ថបទ៖ សុន រ៉ាឌី

កម្ពុជាមានឱកាសផលិត និងកែច្នៃសម្រាប់នាំចេញកាន់តែច្រើនរួមចំណែកផ្គត់ផ្គង់ស្បៀងសកល

ភ្នំពេញ៖ កម្ពុជាកំពុងមានឱកាសក្នុងការវិនិយោគលើវិស័យកសិកម្ម កសិ-ឧស្សាហកម្ម ការផលិត និងកែច្នៃចំណីអាហារពីកសិកម្ម សម្រាប់បម្រើទីផ្សារក្នុងស្រុក ឬនាំចេញ ខណៈពិភពលោកកំពុងមានវិបត្តិជួបប្រទះបញ្ហាកង្វះខាតស្បៀង។លោកជំទាវឧកញ៉ា កែវ មុំ ប្រធានសមាគមសហគ្រិនស្រ្តីកម្ពុជា និងជាក្រុមប្រឹក្សាភិបាលនៃក្រុមហ៊ុនក្នុងស្រុកមួយ ដែលស្រូបយកផលិតផលក្នុងវិស័យកសិកម្មសម្រាប់កែច្នៃ និងវេចខ្ចប់ បានលើកឡើងថា ប្រទេសកម្ពុជាគឺជាប្រទេសដែលមានសក្តានុពលលើវិស័យកសិកម្ម ដោយកម្ពុជាមិនមានការបង្ករដោយគ្រោះធម្មជាតិណាមួយឡើយ ក្នុងនោះឱកាសវិនិយោគទៅលើការដាំដុះវិស័យកសិកម្ម កសិឧស្សាហកម្ម គឺកម្ពុជាមានឱកាសច្រើន។ ជាក់ស្តែងក្នុងមួយឆ្នាំៗកម្ពុជាបាននាំចេញអង្កររាប់សែនតោន ក្នុងនោះការដាំដុះ និងនាំចេញស្វាយចន្ទី ម្រេច កំពុងមានកំណើនល្អប្រសើរ និងនៅមានកសិផលចេញពីវិស័យកសិកម្មផ្សេងៗជាច្រើនទៀត ដែលកំពុងធ្វើឲ្យកម្ពុជាមានមោទនភាពនៃការនាំចេញលើវិស័យនេះ។លោកជំទាវ បន្តថា ចំពោះការវិនិយោគ ផលិត និងការកែច្នៃ ដែលយកវត្ថុធាតុដើមពីវិស័យកសិកម្ម គឺកម្ពុជាកំពុងដំណើរការ តែមិនទាន់មានទ្រង់ទ្រាយធំនៅឡើយ ដូច្នេះអ្នកដែលមានលទ្ធភាព សមត្ថភាព គួរពិចារណាធ្វើការវិនិយោគលើវិស័យកសិកម្ម និងការបង្កើតសហគ្រាសផលិត និងកែច្នៃឲ្យបានច្រើនថែមទៀត ដើម្បីរកផលចំណេញសម្រាប់ខ្លួនឯងផង និងសម្រាប់ជំរុញការផ្គត់ផ្គង់ចូលទីផ្សារក្នុងស្រុក និងក្រៅស្រុកផង ខណៈពិភពលោកកំពុងជួបប្រទះលើបញ្ហាកង្វះខាតស្បៀង។របាយការណ៍ក្រសួងសេដ្ឋកិច្ច និងហិរញ្ញវត្ថុ បង្ហាញថា បណ្តារដ្ឋាភិបាលលើសកលលោក ទាំងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ បានកំពុងបង្កើនការយកចិត្តទុកដាក់ ក្នុងការពង្រឹងសមត្ថភាពផលិតកម្មក្នុងស្រុក ជាពិសេសលើទំនិញយុទ្ធសាស្ត្រ សំដៅបញ្ចៀសនូវហានិភ័យនានាដូចជា អសន្តិសុខស្បៀង និងអសន្តិសុខថា មពលជាដើម តាមរយៈការបង្កើនធនធាន និងកែសម្រួលគោលនយោបាយ ដើម្បីធានានិរន្តរភាពនៃការអភិវឌ្ឍ ។ វិស័យកសិកម្ម បានព្យាករថា និងមានកំណើន ០,៩% ក្នុងឆ្នាំ ២០២៣ និង ១,១% នៅក្នុងឆ្នាំ ២០២៤ ដោយគាំទ្រដោយអនុវិស័យដំណំា និងអនុវិស័យចិញ្ចឹមសត្វ ស្របពេលអនុវិស័យនេសាទ រំពឹងនឹងងើបឡើងសន្សឹមៗ ខណៈការផលិត និងកៃច្នៃពីវិស័យកសិកម្ម កម្ពុជាកំពុងស្រូបយកក្រុមហ៊ុនធំៗ មកវិនិយោគលើវិស័យនេះជាបណ្តើរៗផងដែរ ៕អត្ថបទ៖ សុន រ៉ាឌី

កម្ពុជាសង្ឃឹមថា ទៅថ្ងៃអនាគតនឹងអាចពង្រីកទីផ្សារនាំចេញស្វាយ កាន់តែធំថែមទៀតទៅកាន់កូរ៉េ

ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ សង្ឃឹមថា នឹងអាចបើកទីផ្សារស្វាយទៅកាន់ប្រទេសកូរ៉េឱ្យកាន់តែធំទូលំទូលាយបន្ថែមទៀត ខណៈឯកឧត្តម ឆុង វ៉ាងគឺន (Chung Hwang-Keun) រដ្ឋមន្ត្រីក្រសួងកសិកម្ម ស្បៀង និងកិច្ចការជនបទ នៃសាធារណរដ្ឋកូរ៉េ បំពេញទស្សនកិច្ចជាលើកដំបូងនៅប្រទេសកម្ពុជា។ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី២៩ សីហា ឆ្នាំ២០២៣នេះ បានឲ្យដឹងថា នៅក្នុងជំនួបការងារជាមួយ រដ្ឋមន្ត្រីក្រសួងកសិកម្ម ស្បៀង និងកិច្ចការជនបទ នៃសាធារណរដ្ឋកូរ៉េ ឯកឧត្តមរដ្ឋមន្ត្រី ឌិត ទីណា បានលើកឡើងអំពីការវិវត្តរបស់កម្ពុជា ដែលបានប្រែក្លាយពីប្រទេសខ្វះខាតស្បៀងបណ្តាលមកពីសង្គ្រាមស៊ីវិលផ្ទៃក្នុង មកជាប្រទេសដែលមានសន្តិសុខស្បៀង និងនាំចេញស្បៀងទៅកាន់ទីផ្សារអន្តរជាតិ។ បើតាមឯកឧត្តម ការប្រែប្រួលជាវិជ្ជមាននេះ មិនអាចសម្រេចបានទេ ប្រសិនបើគ្មានការរួបរួមជាតិ និងសន្តិភាព ដែលនាំទៅរកការអភិវឌ្ឍមួយដ៏ពិតប្រាកដ។ នាឱកាសនោះ ឯកឧត្តមរដ្ឋមន្ដ្រី បានថ្លែងអំណរគុណដល់សាធារណរដ្ឋកូរ៉េ ចំពោះកិច្ចសហប្រតិបត្តិការល្អនាពេលកន្លងមក ជាពិសេសជំនួយរបស់រដ្ឋាភិបាលកូរ៉េមកដល់កម្ពុជានៅក្នុងវិស័យកសិកម្ម។ ចំពោះកិច្ចសហប្រតិបត្តិការបន្តនាពេលអនាគត ឯកឧត្តម បានស្នើដល់ភាគីកូរ៉េជំរុញការបើកទីផ្សារផលិតផលកសិកម្មកម្ពុជាទៅកាន់ប្រទេសកូរ៉េ ដោយចំពោះផលិតផលកសិកម្មដែលមានតម្លៃបន្ថែមខ្ពស់៕

អ្នកជំនាញបង្ហាញពីស្ថានភាពសេដ្ឋកិច្ចនៅកម្ពុជា ខណៈរាជរដ្ឋាភិបាលថ្មីដាក់គោលដៅគន្លឹះ

ភ្នំពេញ៖ លោកសាស្រ្ដាចារ្យបណ្ឌិត អ៊ុយ សុផល អ្នកជំនាញផ្នែកសេដ្ឋកិច្ច និងទីផ្សារ បានថ្លែងថា ស្ថានភាពសេដ្ឋកិច្ចរបស់ប្រទេសកម្ពុជានឹងមានកំណើនជាប្រចាំឆ្នាំចំនួន ៧% ស្របតាមការប្ដេជ្ញាចិត្តរបស់រាជរដ្ឋាភិបាលអាណត្តិទី៧ ខណៈទំហំពាណិជ្ជកម្មកម្ពុជា-ចិនបន្តកើនឡើង ១.៨ ភាគរយក្នុងរយៈពេល ៧ ខែឆ្នាំ២០២៣នេះ។លោកសាស្រ្ដាចារ្យបណ្ឌិត អ៊ុយ សុផល ថ្លែងប្រាប់ទូរទស្សន៍ BTV នាថ្ងៃទី ២៥ ខែសីហា ឆ្នាំ ២០២៣ នេះថា វិបត្តិសេដ្ឋកិច្ចសាកល និងវិបត្តិអតិផរណា ការកើនឡើងថ្លៃទំនិញ និងវិបត្តិធ្លាក់ចុះតម្លៃអចលនទ្រព្យ បានធ្វើឱ្យប៉ះពាល់ដល់អ្នកប្រកបអាជីវកម្មខ្នាតតូច និងមធ្យម ដោយសារតែលំហូសាច់ប្រាក់នៅលើទីផ្សារមានភាពត្បិតត្បៀត និងសន្សំសំចៃ ហើយកំណើនទេសចរមានការថយចុះ។ ប៉ុន្ដែក្នុងអាណត្តិទី៧នេះ ក្រោមការដាក់ចេញនូវយុទ្ធសាស្រ្ដបញ្ចកោណ-ដំណាក់កាលទី១ រួមនឹងកម្មវិធីគោលនយោបាយគន្លឹះជាច្រើនទៀតរបស់រាជរដ្ឋាភិបាលនឹងធ្វើឱ្យសេដ្ឋកិច្ចកម្ពុជាមានកំណើនឡើងរហូតដល់ ៧% ជាប្រចាំឆ្នាំ។លោកសាស្រ្ដាចារ្យបណ្ឌិតលើកឡើងថា ប្រទេសចិននៅតែជាប្រទេសដៃគូរពាណិជ្ជកម្មសំខាន់បំផុតរបស់កម្ពុជាពោលគឺទំហំពាណិជ្ជកម្មកម្ពុជា-ចិន បន្តកើនឡើងរហូត ១.៨% ស្នើនឹងទឹកប្រាក់ប្រមាណជាង ៨០០០ លានដុល្លារ ក្នុងនោះការនាំចូលពីកម្ពុជាទៅចិនរកចំណូលបាន ៨០០ លានដុល្លារ ខណៈចិននាំចូលមកកម្ពុជាទទួលបានចំណូលជាង ៦០០ លានដុល្លារ។សូមជម្រាបថា ថ្ងៃទី ២៤ ខែសីហា ឆ្នាំ ២០២៣នេះ គណៈរដ្ឋមន្រ្ដីថ្មីដែលដឹកនាំដោយឯកឧត្ដម កិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានប្រកាសដាក់ឱ្យអនុវត្តជាផ្លូវការនូវ «យុទ្ធសាស្រ្ដបញ្ចកោណ-ដំណាក់កាលទី១» និង «វិធានការគន្លឹះរបស់រាជរដ្ឋាភិបាលនីតិកាលទី៧ នៃរដ្ឋសភា» ដើម្បីជំរុញកំណើនសេដ្ឋកិច្ច, បង្កើតការងារ, ធានាសមធម៌, បង្កើនប្រសិទ្ធភាព និងរក្សាចីរភាពជូនជាតិ និងប្រជាជន៕ អត្ថបទ៖វ៉ន ដារ៉ា

បណ្ដាញសង្គម

ព័ត៌មានថ្មីៗ

គណៈកម្មាធិការ និងខេត្តកោះកុងកំពុងពិនិត្យលើគន្លងធ្វើផ្លូវជិះកង់ទេសចរណ៍តាមតំបន់ឆ្នេរក្នុងខេត្តកោះកុង

ឯកឧត្តម ខូយ រីដា អញ្ជើញប្រគល់សញ្ញាបត្រដល់និស្សិតវិទ្យាស្ថាន IMSE ៦៥៧ នាក់ ក្នុងខេត្តពោធិ៍សាត់

ការវាយប្រហាររបស់រុស្ស៊ី សម្លាប់មនុស្ស ២នាក់នៅទីក្រុងភាគអាគ្នេយ៍ Zaporizhzhia ប្រទេសអ៊ុយក្រែន

ភ្នាក់ងារពន្លត់អគ្គិភ័យ ២នាក់ បានស្លាប់ ក្នុងករណីភ្លើងឆេះព្រៃនៅប្រទេសកូរ៉េខាងត្បូង

អ៊ីស្រាអែលវាយប្រហារលីបង់ ក្រោយការបាញ់គ្រាប់រ៉ុក្កែត ធ្វើឲ្យគ្រោះថ្នាក់ដល់បទឈប់បាញ់

ប្រជាពលរដ្ឋចំនួន៤ភូមិ ស្រុកប្រាសាទ ទទួលបានបណ្ណកម្មសិទ្ធិសម្គាល់ម្ចាស់អចលនវត្ថុ

អគារបណ្ណាល័យនៅវិទ្យាល័យតាអោក នឹងផ្តល់អត្ថប្រយោជន៍ដល់សិស្សស្វែងយល់នូវចំណេះដឹងថ្មីៗ

លោក យឿន យឿត ចាត់ទុក «ក្រុមប្រឹក្សាជាតិតស៊ូ» របស់ក្រុមជ្រុលនិយមជាការញុះញង់ និងបោកប្រាស់

ទឹកជំនន់ធ្ងន់ធ្ងរវាយប្រហារទីក្រុង Madrid ប្រទេសអេស្ប៉ាញ ខណៈភ្លៀងនៅតែបន្តបង្អុរចុះឥតឈប់ឈរ

មនុស្ស ៣នាក់ស្លាប់ និង ១៥នាក់រងរបួស ក្នុងហេតុការណ៍បាញ់ប្រហារទ្រង់ទ្រាយធំនៅរដ្ឋ New Mexico សហរដ្ឋអាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877