BTV NEWS

រដ្ឋមន្រ្តីក្រសួងកសិកម្ម ស្នើរួមគ្នាអភិរក្សធនធានធម្មជាតិនៅក្នុងប្រទេសកម្ពុជាឱ្យបានគង់វង្ស

វិនិយោគិនថៃបង្ហាញនូវសុទិដ្ឋិនិយមខ្ពស់ លើបរិយាកាសវិនិយោគនៅកម្ពុជា

ឯកឧត្តម ឃឹម ហ្វីណង់៖ វិស័យកសិកម្មកម្ពុជានឹងរឹងមាំជាងមុនប្រសិនបើ «ការធ្វើផលិតកម្មកសិកម្មតាមកិច្ចសន្យា-Contract Farming» អាចអនុវត្តបានដោយប្រសិទ្ធភាព

ចាប់ពីខែធ្នូ២០២៤ដល់ថ្ងៃទី១៧ ខែមីនាឆ្នាំនេះ ក្រសួងធនធានទឹកអន្តរាគមន៍បូមទឹកសង្គ្រោះស្រូវប្រាំង កសិករបានជាង ៩៣១៣៣ ហិកតាក្នុងក្របខ័ណ្ឌទូទាំងប្រទេស

សេដ្ឋកិច្ច និង កសិកម្ម

រាជរដ្ឋាភិបាលដាក់ចេញគោលនយោបាយ ដើម្បីគាំពារដល់ការអភិវឌ្ឍន៍សេដ្ឋកិច្ចក្រៅប្រព័ន្ធ

ភ្នំពេញ៖ រាជរដ្ឋាភិបាលកម្ពុជានៅក្នុងអាណត្តិថ្មី នីតិកាលទី ៧នេះ ដាក់ចេញគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធ ក្នុងគោលដៅលើកកម្ពស់លទ្ធភាពការធ្វើអាជីវកម្មគ្រប់ប្រភេទ ដើម្បីទទួលបានអត្ថប្រយោជន៍ ក៏ដូចជាការគាំពារនៃការទទួលបានហិរញ្ញប្បទានផ្សេងៗ។ លោកជំទាវ គង់ សូរីតា រដ្ឋលេខាធិការក្រសួងកិច្ចការនារី លើកឡើងក្នុងវេទិការសហគ្រិនស្រ្តី ក្នុងការអភិវឌ្ឍអាជីវកម្ម និងពិព័រណ៍ពាណិជ្ជកម្មក្នុងស្រុក នៅចុងសប្តាហ៍កន្លងមកថា ជុំវិញការអភវិឌ្ឍសេដ្ឋកិច្ចក្រៅ ថ្មីៗនេះកម្ពុជាបានបើកកិច្ចប្រជុំអន្តរក្រសួង ដើម្បីជជែកពិភាក្សាលើកិច្ចគាំពារ ក្នុងគោលដៅលើកកម្ពស់អ្នកធ្វើអាជីវកម្មក្រៅប្រព័ន្ធ។ រាជរដ្ឋាភិបាលនិងយកចិត្តទុកដាក់ ជាពិសេសស្រ្តីដែលប្រកបមុខរបរ ឬធ្វើការនៅក្រៅប្រព័ន្ធ មិនថាជាសហគ្រិន ជាម្ចាស់អាជីវកម្ម និងជានយោជិតក៏ដោយ ពួកគេនឹងទទួលបានអត្ថប្រយោជន៍ដូចៗគ្នា ដោយមិនមានត្រូវបោះបង់អ្នកណាម្នាក់។ជុំវិញការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធនេះ លោកជំទាវ លើកឡើងថា នេះជាឱកាសមួយជាពិសេសបងប្អូនជាស្រ្តី ដើម្បីទទួលយកអត្ថប្រយោជន៍ការគាំពារ ឬការផ្តល់នូវហិរញ្ញប្បទានផ្សេងៗ ក្នុងគោលដៅជំរុញឲ្យសហគ្រិនស្រ្តីឲ្យកាន់តែមាននិរន្តភាពថែមទៀត ។ លោកជំទាវ គង់ សូរីតា បន្តលើកឡើងថា ជុំវិញផែនការខាងលើ នេះគឺជាព័ត៌មានល្អ នៃការលើកកម្ពស់លទ្ធភាពរបស់អ្នកធ្វើអាជីវកម្មក្រៅប្រព័ន្ធ និងជាការបង្ហាញនូវការយកចិត្តទុកដាក់ខ្ពស់របស់រាជរដ្ឋាភិបាល នៅក្នុងអាណត្តិថ្មី នីតិកាលទី ៧ នេះ។ជុំវិញការរៀបចំគោលនយោបាយសេដ្ឋកិច្ចក្រៅប្រព័ន្ធនេះដែរ នៅថ្ងៃទី ៣០ ខែ សីហា កន្លងមក ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានបើកកិច្ចប្រជុំលើការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធជាអន្តរក្រសួង ដើម្បីពិភាក្សា និងប្រមូលធាតុចូល សម្រាប់ចងក្រងចេញជាគោលនយោបាយ ដើម្បីគាំទ្រដល់ការអភិវឌ្ឍន៍សេដ្ឋកិច្ចក្រៅប្រព័ន្ធ។សូមបញ្ជាក់ថា នៅក្នុងអាណត្តិថ្មីនេះ រាជរដ្ឋាភិបាលនឹងដាក់ចេញកម្មវិធីគោលនយោបាយ សម្រាប់ការកសាង និងការពារមាតុភូមិឆ្នាំ ២០២៣-២០២៨ សម្រាប់សហគ្រាសធុនតូច និងមធ្យម រួមទាំងវិស័យសេដ្ឋកិច្ចក្រៅប្រព័ន្ធ តាមច្បាប់វិនិយោគថ្មី និងភាពប្រទាក់ក្រឡានៃការរៀបចំច្បាប់ស្តីពីសារពើពន្ធថ្មី ព្រមទាំងការដាក់ចេញនូវវិធានការលើកទឹកចិត្តជាក់លាក់ ដើម្បីកែលម្អបរិយាកាសធុរកិច្ចសម្រាប់សហគ្រាសធុនតូច និងមធ្យម និងការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធ ជំរុញបន្ថែមដល់ការអភិវឌ្ឍន៍វិស័យកសិកម្ម, ទេសចរណ៍, សហគ្រាសធុនតូច និងមធ្យម តាមរយៈ ធនាគារសហគ្រាសធុនតូច និងមធ្យម, ធនាគារអភិវឌ្ឍន៍ជនបទ និងកសិកម្ម, ក្រុមហ៊ុនសាជីវកម្មធានាឥណទានកម្ពុជា, មូលនិធិសហគ្រិន និងមូលនិធិអភិវឌ្ឍន៍ជំនាញជាដើម៕អត្ថបទ៖ សុន រ៉ាឌី

កម្ពុជាមានឱកាសផលិត និងកែច្នៃសម្រាប់នាំចេញកាន់តែច្រើនរួមចំណែកផ្គត់ផ្គង់ស្បៀងសកល

ភ្នំពេញ៖ កម្ពុជាកំពុងមានឱកាសក្នុងការវិនិយោគលើវិស័យកសិកម្ម កសិ-ឧស្សាហកម្ម ការផលិត និងកែច្នៃចំណីអាហារពីកសិកម្ម សម្រាប់បម្រើទីផ្សារក្នុងស្រុក ឬនាំចេញ ខណៈពិភពលោកកំពុងមានវិបត្តិជួបប្រទះបញ្ហាកង្វះខាតស្បៀង។លោកជំទាវឧកញ៉ា កែវ មុំ ប្រធានសមាគមសហគ្រិនស្រ្តីកម្ពុជា និងជាក្រុមប្រឹក្សាភិបាលនៃក្រុមហ៊ុនក្នុងស្រុកមួយ ដែលស្រូបយកផលិតផលក្នុងវិស័យកសិកម្មសម្រាប់កែច្នៃ និងវេចខ្ចប់ បានលើកឡើងថា ប្រទេសកម្ពុជាគឺជាប្រទេសដែលមានសក្តានុពលលើវិស័យកសិកម្ម ដោយកម្ពុជាមិនមានការបង្ករដោយគ្រោះធម្មជាតិណាមួយឡើយ ក្នុងនោះឱកាសវិនិយោគទៅលើការដាំដុះវិស័យកសិកម្ម កសិឧស្សាហកម្ម គឺកម្ពុជាមានឱកាសច្រើន។ ជាក់ស្តែងក្នុងមួយឆ្នាំៗកម្ពុជាបាននាំចេញអង្កររាប់សែនតោន ក្នុងនោះការដាំដុះ និងនាំចេញស្វាយចន្ទី ម្រេច កំពុងមានកំណើនល្អប្រសើរ និងនៅមានកសិផលចេញពីវិស័យកសិកម្មផ្សេងៗជាច្រើនទៀត ដែលកំពុងធ្វើឲ្យកម្ពុជាមានមោទនភាពនៃការនាំចេញលើវិស័យនេះ។លោកជំទាវ បន្តថា ចំពោះការវិនិយោគ ផលិត និងការកែច្នៃ ដែលយកវត្ថុធាតុដើមពីវិស័យកសិកម្ម គឺកម្ពុជាកំពុងដំណើរការ តែមិនទាន់មានទ្រង់ទ្រាយធំនៅឡើយ ដូច្នេះអ្នកដែលមានលទ្ធភាព សមត្ថភាព គួរពិចារណាធ្វើការវិនិយោគលើវិស័យកសិកម្ម និងការបង្កើតសហគ្រាសផលិត និងកែច្នៃឲ្យបានច្រើនថែមទៀត ដើម្បីរកផលចំណេញសម្រាប់ខ្លួនឯងផង និងសម្រាប់ជំរុញការផ្គត់ផ្គង់ចូលទីផ្សារក្នុងស្រុក និងក្រៅស្រុកផង ខណៈពិភពលោកកំពុងជួបប្រទះលើបញ្ហាកង្វះខាតស្បៀង។របាយការណ៍ក្រសួងសេដ្ឋកិច្ច និងហិរញ្ញវត្ថុ បង្ហាញថា បណ្តារដ្ឋាភិបាលលើសកលលោក ទាំងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ បានកំពុងបង្កើនការយកចិត្តទុកដាក់ ក្នុងការពង្រឹងសមត្ថភាពផលិតកម្មក្នុងស្រុក ជាពិសេសលើទំនិញយុទ្ធសាស្ត្រ សំដៅបញ្ចៀសនូវហានិភ័យនានាដូចជា អសន្តិសុខស្បៀង និងអសន្តិសុខថា មពលជាដើម តាមរយៈការបង្កើនធនធាន និងកែសម្រួលគោលនយោបាយ ដើម្បីធានានិរន្តរភាពនៃការអភិវឌ្ឍ ។ វិស័យកសិកម្ម បានព្យាករថា និងមានកំណើន ០,៩% ក្នុងឆ្នាំ ២០២៣ និង ១,១% នៅក្នុងឆ្នាំ ២០២៤ ដោយគាំទ្រដោយអនុវិស័យដំណំា និងអនុវិស័យចិញ្ចឹមសត្វ ស្របពេលអនុវិស័យនេសាទ រំពឹងនឹងងើបឡើងសន្សឹមៗ ខណៈការផលិត និងកៃច្នៃពីវិស័យកសិកម្ម កម្ពុជាកំពុងស្រូបយកក្រុមហ៊ុនធំៗ មកវិនិយោគលើវិស័យនេះជាបណ្តើរៗផងដែរ ៕អត្ថបទ៖ សុន រ៉ាឌី

កម្ពុជាសង្ឃឹមថា ទៅថ្ងៃអនាគតនឹងអាចពង្រីកទីផ្សារនាំចេញស្វាយ កាន់តែធំថែមទៀតទៅកាន់កូរ៉េ

ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ សង្ឃឹមថា នឹងអាចបើកទីផ្សារស្វាយទៅកាន់ប្រទេសកូរ៉េឱ្យកាន់តែធំទូលំទូលាយបន្ថែមទៀត ខណៈឯកឧត្តម ឆុង វ៉ាងគឺន (Chung Hwang-Keun) រដ្ឋមន្ត្រីក្រសួងកសិកម្ម ស្បៀង និងកិច្ចការជនបទ នៃសាធារណរដ្ឋកូរ៉េ បំពេញទស្សនកិច្ចជាលើកដំបូងនៅប្រទេសកម្ពុជា។ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី២៩ សីហា ឆ្នាំ២០២៣នេះ បានឲ្យដឹងថា នៅក្នុងជំនួបការងារជាមួយ រដ្ឋមន្ត្រីក្រសួងកសិកម្ម ស្បៀង និងកិច្ចការជនបទ នៃសាធារណរដ្ឋកូរ៉េ ឯកឧត្តមរដ្ឋមន្ត្រី ឌិត ទីណា បានលើកឡើងអំពីការវិវត្តរបស់កម្ពុជា ដែលបានប្រែក្លាយពីប្រទេសខ្វះខាតស្បៀងបណ្តាលមកពីសង្គ្រាមស៊ីវិលផ្ទៃក្នុង មកជាប្រទេសដែលមានសន្តិសុខស្បៀង និងនាំចេញស្បៀងទៅកាន់ទីផ្សារអន្តរជាតិ។ បើតាមឯកឧត្តម ការប្រែប្រួលជាវិជ្ជមាននេះ មិនអាចសម្រេចបានទេ ប្រសិនបើគ្មានការរួបរួមជាតិ និងសន្តិភាព ដែលនាំទៅរកការអភិវឌ្ឍមួយដ៏ពិតប្រាកដ។ នាឱកាសនោះ ឯកឧត្តមរដ្ឋមន្ដ្រី បានថ្លែងអំណរគុណដល់សាធារណរដ្ឋកូរ៉េ ចំពោះកិច្ចសហប្រតិបត្តិការល្អនាពេលកន្លងមក ជាពិសេសជំនួយរបស់រដ្ឋាភិបាលកូរ៉េមកដល់កម្ពុជានៅក្នុងវិស័យកសិកម្ម។ ចំពោះកិច្ចសហប្រតិបត្តិការបន្តនាពេលអនាគត ឯកឧត្តម បានស្នើដល់ភាគីកូរ៉េជំរុញការបើកទីផ្សារផលិតផលកសិកម្មកម្ពុជាទៅកាន់ប្រទេសកូរ៉េ ដោយចំពោះផលិតផលកសិកម្មដែលមានតម្លៃបន្ថែមខ្ពស់៕

អ្នកជំនាញបង្ហាញពីស្ថានភាពសេដ្ឋកិច្ចនៅកម្ពុជា ខណៈរាជរដ្ឋាភិបាលថ្មីដាក់គោលដៅគន្លឹះ

ភ្នំពេញ៖ លោកសាស្រ្ដាចារ្យបណ្ឌិត អ៊ុយ សុផល អ្នកជំនាញផ្នែកសេដ្ឋកិច្ច និងទីផ្សារ បានថ្លែងថា ស្ថានភាពសេដ្ឋកិច្ចរបស់ប្រទេសកម្ពុជានឹងមានកំណើនជាប្រចាំឆ្នាំចំនួន ៧% ស្របតាមការប្ដេជ្ញាចិត្តរបស់រាជរដ្ឋាភិបាលអាណត្តិទី៧ ខណៈទំហំពាណិជ្ជកម្មកម្ពុជា-ចិនបន្តកើនឡើង ១.៨ ភាគរយក្នុងរយៈពេល ៧ ខែឆ្នាំ២០២៣នេះ។លោកសាស្រ្ដាចារ្យបណ្ឌិត អ៊ុយ សុផល ថ្លែងប្រាប់ទូរទស្សន៍ BTV នាថ្ងៃទី ២៥ ខែសីហា ឆ្នាំ ២០២៣ នេះថា វិបត្តិសេដ្ឋកិច្ចសាកល និងវិបត្តិអតិផរណា ការកើនឡើងថ្លៃទំនិញ និងវិបត្តិធ្លាក់ចុះតម្លៃអចលនទ្រព្យ បានធ្វើឱ្យប៉ះពាល់ដល់អ្នកប្រកបអាជីវកម្មខ្នាតតូច និងមធ្យម ដោយសារតែលំហូសាច់ប្រាក់នៅលើទីផ្សារមានភាពត្បិតត្បៀត និងសន្សំសំចៃ ហើយកំណើនទេសចរមានការថយចុះ។ ប៉ុន្ដែក្នុងអាណត្តិទី៧នេះ ក្រោមការដាក់ចេញនូវយុទ្ធសាស្រ្ដបញ្ចកោណ-ដំណាក់កាលទី១ រួមនឹងកម្មវិធីគោលនយោបាយគន្លឹះជាច្រើនទៀតរបស់រាជរដ្ឋាភិបាលនឹងធ្វើឱ្យសេដ្ឋកិច្ចកម្ពុជាមានកំណើនឡើងរហូតដល់ ៧% ជាប្រចាំឆ្នាំ។លោកសាស្រ្ដាចារ្យបណ្ឌិតលើកឡើងថា ប្រទេសចិននៅតែជាប្រទេសដៃគូរពាណិជ្ជកម្មសំខាន់បំផុតរបស់កម្ពុជាពោលគឺទំហំពាណិជ្ជកម្មកម្ពុជា-ចិន បន្តកើនឡើងរហូត ១.៨% ស្នើនឹងទឹកប្រាក់ប្រមាណជាង ៨០០០ លានដុល្លារ ក្នុងនោះការនាំចូលពីកម្ពុជាទៅចិនរកចំណូលបាន ៨០០ លានដុល្លារ ខណៈចិននាំចូលមកកម្ពុជាទទួលបានចំណូលជាង ៦០០ លានដុល្លារ។សូមជម្រាបថា ថ្ងៃទី ២៤ ខែសីហា ឆ្នាំ ២០២៣នេះ គណៈរដ្ឋមន្រ្ដីថ្មីដែលដឹកនាំដោយឯកឧត្ដម កិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានប្រកាសដាក់ឱ្យអនុវត្តជាផ្លូវការនូវ «យុទ្ធសាស្រ្ដបញ្ចកោណ-ដំណាក់កាលទី១» និង «វិធានការគន្លឹះរបស់រាជរដ្ឋាភិបាលនីតិកាលទី៧ នៃរដ្ឋសភា» ដើម្បីជំរុញកំណើនសេដ្ឋកិច្ច, បង្កើតការងារ, ធានាសមធម៌, បង្កើនប្រសិទ្ធភាព និងរក្សាចីរភាពជូនជាតិ និងប្រជាជន៕ អត្ថបទ៖វ៉ន ដារ៉ា

ការជួញដូរភាគហ៊ុនរបស់កម្ពុជា នៅតែរក្សាបានកំណើនល្អ

ភ្នំពេញ៖ មន្រ្តីជាន់ខ្ពស់នៃនិយ័តករមូលបត្រកម្ពុជា បានបញ្ជាក់ថា ក្នុងវិបត្តិសេដ្ឋកិច្ចដែលបណ្ដាលមកពីកូវីដ១៩ និងវិបត្តិនៃសង្គ្រាម រវាងប្រទេសរុស្ស៊ី និងអ៊ុយក្រែន វិស័យមូលបត្រក្នុងប្រទេសកម្ពុជា នៅតែមានដំណើរដោយរលូន ប៉ុន្តែយ៉ាងណាក្ដីទំហំទឹកប្រាក់ជួញដូរភាគហ៊ុនបានថមថយបន្តិច តែចំនួនអ្នកជួញដូរភាគហ៊ុនមានការកើនឡើង។ ឯកឧត្តម ស៊ូ សុជាតិ អគ្គនាយកនិយ័តករមូលបត្រកម្ពុជា នៅក្នុងពិធីចុះហត្ថលេខាលើអនុស្សរណៈនៃការយោគយល់គ្នា ស្តីពីការផ្តល់ជូនពិសេសលើសេវាកម្មសុខាភិបាលឯកជនដល់និយ័តករមូលបត្រកម្ពុជា នៅថ្ងៃទី២៤ សីហា ២០២៣នេះ បានប្រសាសន៍ប្រាប់ឲ្យដឹងថា ក្នុងពេលប្រទេសទាំងអស់បានទទួលរងនូវភាពប្រឈម និងវឹកវរដោយសារតែវិបត្តិនានា កម្ពុជាក៏មានភាពប៉ះពាល់មួយចំនួនដែរ ជាក់ស្ដែងអ្នកដែលធ្លាប់ជួញដូរធំៗ បានងាកមកជួញដូរក្នុងកម្រិតស្រាល ប៉ុន្តែអ្វីដែលយើងអាចធានាបាននោះគឺជាលំនឹង និងស្ថិរភាពទីផ្សាររបស់យើង។ ឯកឧត្តមអគ្គនាយក បានបន្ថែមថា ទៅថ្ងៃអនាគត ជាពិសេសក្រោយពេលកម្ពុជាផ្លាស់ប្តូរសមាសភាពរាជរដ្ឋាភិបាល វិស័យមូលបត្ររំពឹងថា នឹងមានដំណើរការរីកចម្រើនទៅមុខជាលំដាប់បន្ថែមទៀត ហើយនៅចុងឆ្នាំ២០២៣នេះ នឹងមានក្រុមហ៊ុនមួយចំនួនទៀតចុះបញ្ជីក្នុងក្រុមហ៊ុនមូលបត្រកម្ពុជា ដូចជាក្រុមហ៊ុនចុះបញ្ជីលក់មូលនិធិបំណុល និងក្រុមហ៊ុនចុះបញ្ជីបោះផ្សាយមូលបត្រក្នុងផ្សារមូលបត្រកម្ពុជា ហើយភាពប្រាកដប្រជាយ៉ាងណានោះ អាស្រ័យលើការសម្រេចរបស់ក្រុមហ៊ុន។គិតមកដល់បច្ចុប្បន្ននេះ និយ័តករមូលបត្រកម្ពុជា ជាអាជ្ញាធរដែលមានតួនាទីគ្រប់គ្រង និងត្រួតពិនិត្យលើរាល់សកម្មពាក់ព័ន្ធនឹងវិស័យមូលបត្រនៅកម្ពុជា បានផ្តល់លេខអត្តសញ្ញាណវិនិយោគិនសរុបចំនួនជាង ៤ម៉ឺន ក្នុងនោះវិនិយោគិនជារូបវន្តបុគ្គលមានចំនួនជាង ៩៩% និងវិនិយោគិនសញ្ញាត្តិខ្មែរមានចំនួនជាង ៨៧%៕អត្ថបទ៖ឈិត បូរ៉ាវី

ក្រសួងសេដ្ឋកិច្ច រំពឹងការប្រមូលចំណូលរបស់អគ្គនាយកដ្ឋានពន្ធដារ នឹងលើសផែនការ

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ រំពឹងថា ការប្រមូលចំណូលពន្ធរបស់អគ្គនាយកដ្ឋានពន្ធដារ ក្នុងឆ្នាំ២០២៣នេះ នឹងសម្រេចបានប្រមាណជាង ១០៧ ភាគរយ ពោលគឺលើសផែន នៃច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣។អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ នៅក្នុងព្រិត្តិបត្រព័ត៌មានប្រចាំសប្តាហ៍ បានបង្ហាញថា ចំពោះលទ្ធផលនៃការអនុវត្តថវិកាឆមាសទី ១ និងការវាយតម្លៃការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ របស់ក្រសួងសេដ្ឋកិច្ច និងហិរញ្ញវត្ថុ ក្នុងនោះតាមការប៉ាន់ស្មានរហូតដល់ដំណាច់ឆ្នាំ ២០២៣ ចំណូលពន្ធដារ នឹងសម្រេចបានប្រមាណជាង ១០៧ ភាគរយ នៃផែនការច្បាប់ ដែលឆ្លុះបញ្ចាំងឱ្យឃើញពីប្រសិទ្ធភាពនៃកិច្ចខិតខំប្រឹងប្រែង ក្នុងការអនុវត្តផែនការយុទ្ធសាស្ត្រ និងផែនការប្រតិបត្តិរបស់អគ្គនាយកដ្ឋានពន្ធដារ ជាក់ស្តែងក្នុងរយៈពេល ៧ ខែដើមឆ្នាំ២០២៣នេះ ពន្ធ-អាករសរុបដែលអគ្គនាយកដ្ឋានពន្ធដារ ប្រមូលបានមានចំនួនជាង ៩ ៣៦៧ ប៊ីលានរៀល ត្រូវប្រមាណជាង ២ ៣១២ លានដុល្លារ ស្មើជាង ៦៤ ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ។ជុំវិញការប្រមូលចំណូលនេះដែរ, ខណៈបដិវត្តឧស្សាហកម្ម ៤.០ សេដ្ឋកិច្ចឌីជីថលកំពុងមានការរីកលូតលាស់ឥតឈប់ឈរពីមួយឆ្នាំទៅមួយឆ្នាំ ក្នុងនោះការធ្វើពាណិជ្ជកម្មតាមប្រព័ន្ធអេឡិចត្រូនិក (e-Commerce) ក៏មានការកើនឡើងគួរឱ្យកត់ សម្គាល់ ពិសេសការធ្វើប្រតិបត្តិការពាណិជ្ជកម្ម រួមទាំងប្រតិបត្តិករថ្នាលអេឡិចត្រូនិកចូលមកក្នុងព្រះរាជាណាចក្រកម្ពុជា ជាក់ស្តែង ក្នុងរយៈពេល ៧ ខែ អគ្គនាយកដ្ឋានពន្ធដារ ប្រមូលចំណូលបានជាង ៤៦ លានដុល្លារ។ជុំវិញបញ្ហាប្រឈម, អគ្គនាយកដ្ឋានពន្ធដារ បានបង្ហាញថា បើពិនិត្យពីលទ្ធផលនៃការប្រមូលចំណូលពន្ធ តាមប្រភេទពន្ធវិញ មានប្រភេទពន្ធមួយចំនួននៅតែមានបញ្ហាប្រឈម ជាក់ស្ដែងក្នុងរយៈពេល ៧ ខែនេះ ការប្រមូលពន្ធលើអចលនទ្រព្យសម្រេច បានត្រឹម ៥៧ ប៊ីលានរៀល ត្រូវជាង ១៤ លានដុល្លារ បើប្រៀបធៀបនឹងផែនការប្រចាំឆ្នាំ ២០២៣ សម្រេចបានជិត ៣៧ ភាគរយ ប៉ុណ្ណោះ ។ ដើម្បីជំរុញការប្រមូលពន្ធលើអចលនទ្រព្យ ថ្មីៗនេះអគ្គនាយកដ្ឋានពន្ធដារ បានចេញលិខិតជូនដំណឹង ស្តីពីការរំលឹក លើកទី ២ ការប្រកាសបង់ពន្ធលើអចលនទ្រព្យ ឬពន្ធលើដីធ្លីមិនបានប្រើប្រាស់សម្រាប់ឆ្នាំ ២០២៣ ដើម្បីក្រើនរំលឹក ម្ចាស់អចលន ទ្រព្យមួយចំនួន ដែលមិនទាន់បានបំពេញកាតព្វកិច្ច ប្រកាស និងមកបង់ប្រាក់ពន្ធឲ្យបានរួសរាន់។ សម្រាប់ជាវិធានការណ៍វិញ, ក្នុងឆ្នាំនេះ អគ្គនាយកដ្ឋានពន្ធដារ នឹងបំពាក់បន្ថែមនូវឧបករណ៍ម៉ាស៊ីនស្កែនមុខ កត់វត្តមានរបស់មន្ត្រីទទួលបន្ទុក និងកាមេរ៉ាសុវត្ថិ ភាពនៅតាមចំណុចយុទ្ធសាស្ត្រមួយចំនួន នៅក្នុងរោងចក្រផលិតស្រាបៀរ និងភេសជ្ជៈគ្មានជាតិសុរាទាំងអស់ក្នុងស្រុក។ យុទ្ធនាការ នេះ គឺជាវិធានការមួយជួយពង្រឹងប្រសិទ្ធភាព ស័ក្កិសិទ្ធិភាព និងតម្លាភាពមួយកម្រិតបន្ថែមទៀត សម្រាប់គាំទ្រដល់ការត្រួតពិនិត្យ ការអនុវត្តកាតព្វកិច្ច ដែលជាវិធីសាស្ត្រសម្រាប់ផ្តល់ ជាមូលដ្ឋានជាក់លាក់ និងតម្លាភាពខ្ពស់មួយក្នុងការផ្ទៀងផ្ទាត់ និងតាមដាន ការប្រកាសបង់ប្រាក់ពន្ធរបស់សហគ្រាសពាក់ព័ន្ធ៕អត្ថបទ៖ សុន រ៉ាឌី

វិស័យឯកជន ចុះកិច្ចសន្យាទិញស្រូវសរីរាង្គចំនួន១,២០០តោនពីសហគមន៍កសិកម្ម ខេត្តព្រះវិហារ

ព្រះវិហារ ៖ ពិធីចុះហត្ថលេខាលើកិច្ចសន្យាផលិតកម្មស្តីពីការផលិត និងផ្គត់ផ្គង់ស្រូវសរីរាង្គចំនួន១,២០០តោនពីសហគមន៍ កសិកម្មក្នុងខេត្តព្រះវិហារ ជាមួយក្រុមហ៊ុនហ្គោលដេន រ៉ាយស៍ និងក្រុមហ៊ុនអេមរុ រ៉ាយស៍។កិច្ចសន្យាទិញលក់ស្រូវសរីរាង្គ ត្រូវបានរៀបចំឡើងនៅសាលប្រជុំមន្ទីរកសិកម្ម រុក្ខា ប្រមាញ់ និងនេសាទខេត្តនាព្រឹកថ្ងៃទី២៤ ខែសីហា ឆ្នាំ២០២៣ក្រោមវត្ដមានលោក អ៊ុក គឹមសាន អភិបាលរងខេត្ត លោកឧកញ៉ា សុង សារ៉ន អគ្គនាយកក្រុមហ៊ុនអេមរុរ៉ាយស៍ លោកស្រី សៅ សុនិតា អគ្គនាយករង ក្រុមហ៊ុនហ្គោលដិនរ៉ាយស៍ អង្គការដៃគូរអភិវឌ្ឍន៍ មន្ទីរ ពាណិជ្ជកម្មខេត្ត សហភាពសហគមន៍កសិកម្មព្រះវិហារមានជ័យ ថ្នាក់ដឹកនាំសហគមន៍កសិកម្ម និងកសិករជាក្រុមផលិតជាច្រើនរូបទៀត។ក្នុងពិធីនោះ លោក ពឹង ទ្រីដា ប្រធានមន្ទីរកសិកម្មខេត្តព្រះវិហារ បានបញ្ជាក់ថា សហភាពសហគមន៍ កសិកម្មព្រះវិហារមានជ័យ គឺជាសហភាពដំបូង ដែលបានបង្កើតឡើងក្នុងព្រះរាជាណាចក្រ កម្ពុជា ក្នុងខែមេសា ឆ្នាំ២០១៦ មានសមាជិកសរុបចំនួន ២៥សហគមន៍ ជាមួយនឹងកសិករ ចំនួន ៥,៤០៣គ្រួសារ ដែលមានទីតាំងនៅស្រុកទាំង ០៧នៃខេត្តព្រះវិហារ ហើយទស្សនៈ វិស័យរបស់សហភាពគឺ “កសិករនៅខេត្តព្រះវិហារ នឹងមានជីវភាពធរធារស់នៅ ប្រកបដោយ ភាពរុងរឿង និងសេចក្តីថ្លៃថ្នូរ”។ សម្រាប់ពិធីចុះហត្ថលេខានាពេលនេះ គឺធ្វើឡើងដោយក្រុម ហ៊ុនហ្គោលដេនរ៉ាយស៍នឹងទទួលទិញស្រូវសរីរាង្គចំនួន ១,២០០តោន ពីសហគមន៍កសិកម្ម ចំនួន ០៧ ដែលមានអ្នកផលិត ១,០០០គ្រួសារ និងក្រុមហ៊ុនអេមរុរ៉ាយស៍ នឹងទទួលទិញស្រូវ សរីរាង្គប្រភេទស្រូវស ចំនួនប្រមាណ ១,០០០តោន ពីសហគមន៍កសិកម្មចំនួន៤ ដែលមានអ្នក ផលិត ៥០០គ្រួសារ ដែលជាកិច្ចសន្យាទិញបន្ថែមលើបរិមាណដែលបានចុះហត្ថលេខាកាលពី ខែមិថុនាកន្លងមកថ្មីៗនេះ។លោកឧកញ៉ា សុង សារ៉ន អគ្គនាយកក្រុមហ៊ុនអេមរុរ៉ាយ៍កម្ពុជា បានឲ្យដឹងថា ឆ្នាំ ២០ ២៣នេះ គឺជាឆ្នាំទី៩ហើយ នៃការចុះកិច្ចសន្យាបញ្ជាទិញស្រូវសរីរាង្គពីសហគមន៍កសិកម្មក្នុង ខេត្តព្រះវិហារ។ លោកក៏បានប្ដេជ្ញាខិតខំប្រឹងប្រែង យកចិត្តទុកដាក់ខ្ពស់ ក្នុងការជម្រុញការផ្សព្វ ផ្សាយ និងនាំចេញអង្ករសរីរាង្គខេត្តព្រះវិហារ ឆ្ពោះទៅកាន់ទីផ្សារពិភពលោកឱ្យកាន់តែទូលំ ទូលាយ និងខ្លាំងក្លាបំផុត ក្នុងគោលដៅធ្វើយ៉ាងណាឱ្យអង្ករព្រះវិហារ កាន់តែមានកេរ្ដិ៍ឈ្មោះល្បី នៅឆាកអន្ដរជាតិ។ ហើយទោះបែបនេះក្ដី លោកនៅតែបន្ដទទូចស្នើសុំដល់កសិករផលិតទាំង អស់ សូមមេត្តាបន្ដភាពស្មោះត្រង់របស់ខ្លួន ធ្វើយ៉ាងណាត្រូវគោរពទៅតាមគោលការណ៍ កិច្ច សន្យា ពិសេសស្ដង់ដាសរីរាង្គ។លោក អ៊ុក គឹមសាន អភិបាលរងខេត្តព្រះវិហារ បានឲ្យដឹងថា រាជរដ្ឋាភិបាលបន្តវេន បាននឹងកំពុងសិក្សាលើការធ្វើពាណិជ្ជកម្ម ដើម្បីស្វែងរកទីផ្សារដោយការនាំចេញផលិតផលកសិ កម្ម របស់ព្រះរាជាណាចក្រកម្ពុជាទៅកាន់ទីផ្សារពិភពលោក ហើយកសិកម្ម គឺនៅតែជាឆ្អឹងខ្នង នៃការអភិវឌ្ឍសេដ្ឋកិច្ចជាតិ ហើយខេត្តព្រះវិហារ គឺជាខេត្តគោលដៅនៃវិស័យកសិកម្ម។ សូមបញ្ជាក់ថា នៅទូទាំងខេត្តព្រះវិហារ ការងារបង្ករបង្កើនផលស្រូវរដូវវស្សាឆ្នាំ២០២៣ បានអនុវត្តន៍ផ្ទៃដីភ្ជួររាស់បាន ចំនួន ១០០,០៥៩ហិកតា និងផ្ទៃដីដែលបានព្រោះ ស្ទូង និងបុក ដាំ មានចំនួន ១០០,៣០១ ហិកតា លើផែនការ ៩៩,៨១៧ហិកតា ស្មើនឹង ១០០,៤៨%។ការបង្ករបង្កើនផលដំណាំរួមផ្សំ ដំណាំកសិឧស្សាហកម្ម និងដំណាំឈើហូបផ្លែ គិតត្រឹម ថ្ងៃទី ១៥ ខែសីហា ឆ្នាំ២០២៣ អនុវត្តន៍បាន ៨៤,០៣៧ ហិកតា នៃផែនការ ៨២,៣១៥ ហិកតា ស្មើនឹង ១០២,០៩% ៕

កម្ពុជាកំពុងដើរផ្លូវលើការចាប់យកបច្ចេកវិទ្យាសម្រាប់លើកកម្ពស់វិស័យទេសចរណ៍

ភ្នំពេញ៖ ធុរកិច្ចក្នុងវិស័យបច្ចេកវិទ្យា ចាត់ទុកការអនុវត្តផែនទីបង្ហាញផ្លូវ ដែលប្រើប្រាស់បច្ចេកវិទ្យាក្នុងវិស័យទេសចរណ៍ បានកំពុងដើរទាន់របត់នៃបច្ចេកវិទ្យា និងជាយុទ្ធសាស្រ្តដ៏សំខាន់ នៃការលើកកម្ពស់គោលដៅទេសចរណ៍ក្នុងស្រុក ប្រកបដោយសក្តានុពល ដើម្បីស្រូបយកភ្ញៀវទេសចរណ៍ឲ្យបានកាន់តែច្រើន។លោក ពេជ សូវៀត ស្ថាបនិក CEO នៃក្រុមអួតអេប (Uot App) លើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃទី ២៤ ខែ សីហា ឆ្នាំ២០២៣ នេះថា នៅក្នុងភាវូបនីយកម្មបច្ចេកវិទ្យារីកចម្រើន កំពុងបង្ហាញប្រជាពលរដ្ឋបានយល់ដឹង និងមើលឃើញព្រឹត្តិការណ៍នៅជុំវិញពិភពលោក ជាពិសេសបច្ចេកវិទ្យាបានកំពុងបង្រៀន និងជាផែនទីបង្ហាញផ្លូវដ៏សំខាន់ សម្រាប់ជាគន្លឹះយល់ដឹងផ្សេងៗរបស់មនុស្សលោកទាំងមូល។លោក បន្តថា កម្ពុជាគឺជាប្រទេសមួយបានកំពុងដើរទាន់របត់នៃការរីកចម្រើននៃវិស័យនេះ ក្នុងនោះរាជរដ្ឋាភិបាលក៏បានបង្តើតនូវក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ដែលជាមូលដ្ឋានគ្រឹះជំរុញការទទួលយក និងការធ្វើបដិវត្តកម្មឌីជីថល នៅក្នុងគ្រប់តួអង្គក្នុងសង្គម ទាំងរដ្ឋ ពលរដ្ឋ និងធុរជន។ជាក់ស្តែងការដាក់ចេញផែនទីបង្ហាញផ្លូវបច្ចេកវិទ្យាទេសចរណ៍ ដល់ឆ្នាំ២០៣០ របស់ក្រសួងទេសចរណ៍ បានបង្ហាញអំពីការរីកចម្រើននៃវិស័យបច្ចេកវិទ្យានៅព្រះរាជាណាចក្រកម្ពុជា ដែលការអនុវត្តតាមរបត់នេះ ជាការលើកកម្ពស់ដល់ការប្រកួតប្រជែងក្នុងការអភិវឌ្ឍវិស័យទេសចរណ៍ ផលិ តផលបម្រើវិស័យទេសចរណ៍ និងសេវាកម្មផ្សេងៗ ដោយតាមរយៈនេះ យើងរំពឹងថា ការអនុវត្តផែនទីបង្ហាញផ្លូវបច្ចេកវិទ្យាទេសចរណ៍ នឹងធ្វើឲ្យកម្ពុជាស្របយកភ្ញៀវទេសចរណ៍កាន់តែច្រើនបន្ថែមទៀត។ផែនទីបង្ហាញផ្លូវបច្ចេកវិទ្យាទេសចរណ៍នេះ ត្រូវបានអភិវឌ្ឍន៍ជាមួយនឹងចក្ខុវិស័យ ក្លាយជាគោលដៅទេសចរណ៍កំពូលមួយក្នុងតំបន់ តាមរយៈការចាប់យកនិងការធ្វើបរិវត្តកម្មបច្ចេកវិទ្យា សម្រាប់ការអភិវឌ្ឍន៍វិស័យទេសចរណ៍ប្រកបដោយភាពប្រកួតប្រជែង ចីរភាព និងបរិយាបន្ននៅឆ្នាំ២០៣០ ក្នុងនោះបានកំណត់គោលបំណងចំនួន៤រួមមាន៖ បង្កើនអក្ខរកម្ម និងបំណិនបច្ចេកវិទ្យាលដល់ប្រតិបត្តិករអាជីវកម្ម និងអ្នកប្រើប្រាស់, ពង្រឹងហេដ្ឋារចនាសម្ព័ន្ធ និងគោលនយោបាយគាំទ្រ, ធ្វើឲ្យប្រសើរសន្តិសុខសាយប័រ, និងជំរុញការប្រើប្រាស់បច្ចេកវិទ្យាសម្រាប់ប្រតិបត្តិការអាជីវកម្មទេសចរណ៍។អត្ថបទ៖ សុន រ៉ាឌី

សាជីវកម្មធានាឥណទានកម្ពុជាធានាឥណទានដល់ក្រុមហ៊ុន-អាជីវកម្ម មានទឹកប្រាក់ជិត ១៤០ លានដុល្លារ

ភ្នំពេញ៖ សាជីវកម្មធានាឥណទានកម្ពុជា បានផ្តល់ការធានាឥណទានទំហំទឹកប្រាក់កម្ចីប្រហាក់ប្រហែល ១៣៩.៥ លានដុល្លារ ជូនដល់ជាង ១ ៦៤៨ ក្រុមហ៊ុន/អាជីវកម្ម ដែលគ្មានលទ្ធភាពដាក់ទ្រព្យបញ្ចាំ ដើម្បីទទួលបាននូវកម្ចី សម្រាប់ស្តារ និងពង្រីកអាជីវកម្មក្នុង និងក្រោយដំណាក់កាលរីករាលដាលជំងឺកូវីដ១៩។តាមព្រឹត្តិបត្រវឌ្ឍនភាពនៃការធានាឥទានរបស់សាជីវកម្មធានាឥណទានកម្ពុជាបង្ហាញថា គិតត្រឹមខែកក្កដា ឆ្នាំ២០២៣ មានអាជីវកម្ម សរុបចំនួន ក្រុមហ៊ុន ១ ៦៤៨ ទទួលបានការធានាឥណទានពីសារជីវកម្មធានាឥណទានកម្ពុជា ដែលស្មើនឹងទឹកប្រាក់ធានាសរុបចំនួនជិត ១៣៩.៥លានដុល្លារ ក្នុងនោះប្រភេទអាជីវកម្មខ្នាតមីក្រូ តូច និងមធ្យម មានចំនួន ១ ៥១០ ក្រុមហ៊ុន និងអាជីវកម្មខ្នាតធំចំនួន ១៣៨ ក្រុមហ៊ុន។ ទន្ទឹមនេះ ក្នុងចំណោម ក្រុមហ៊ុនអាជីវកម្មទាំងអស់ មានក្រុមហ៊ុនគ្រប់គ្រងដោយស្ត្រីចំនួន ៦៤០ ក្រុមហ៊ុន និងក្រុមហ៊ុនប្រភេទកម្ចីមានទ្រព្យធានា ៦៧៧ ក្រុមហ៊ុន។សូមជម្រាបថា សាជីវកម្មធានាឥណទានកម្ពុជា គឺជាស្ថាប័នធានាឥណទានដំបូងបង្អស់នៅកម្ពុជា ដែលត្រូវបានបង្កើតឡើង នៅខែសីហា ឆ្នាំ២០២០ នៅក្នុងអំឡុងពេលវិបត្តិជំងឺកូវីដ១៩ កំពុងវាយលុកយ៉ាងខ្លាំងលើកម្ពុជា ក្រោមការប្តេជ្ញាខ្ពស់របស់រាជរដ្ឋាភិបាល ក្នុងការដាក់ឱ្យដំណើរការគម្រោងធានាឥណទានឱ្យបានទាន់ពេលវេលា ដើម្បីគាំទ្រដល់ការស្តារ និងការធានានិរន្តភាពរបស់ក្រុមហ៊ុនអាជីវកម្មក្នុងស្រុក៕

រាជរដ្ឋាភិបាលអាណត្តិថ្មី នឹងដាក់ចេញគោលនយោបាយគន្លឹះ ដើម្បីបន្តអភិវឌ្ឍន៍សង្គមសេដ្ឋកិច្ចកម្ពុជា

ភ្នំពេញ៖ នៅក្នុងនីតិកាលទី ៧ នៃរដ្ឋសភា, រាជរដ្ឋាភិបាល ដាក់ចេញនូវយុទ្ធសាស្ត្រ និងគោលនយោបាយគន្លឹះៗ ដើម្បីធានាឱ្យបាននូវកំណើន, ការងារ, សមធម៌, ប្រសិទ្ធភាព និងចីរភាព សម្រាប់បន្តអភិវឌ្ឍន៍សង្គម សេដ្ឋកិច្ចកម្ពុជា ដោយឈរលើគោលការណ៍រក្សាសមិទ្ធផលចាស់ បង្កើតសមិទ្ធថ្មី។តាមសេចក្តីព្រាងច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ ២០២៤ របស់ក្រសួងសេដ្ឋកិច្ច និងហិរញ្ញវត្ថុ រាជរដ្ឋាភិបាលនឹងបន្តដាក់ចេញនូវយុទ្ធសាស្ត្រ និងគោលនយោបាយគន្លឹះៗ សម្រាប់បន្តអភិវឌ្ឍន៍សង្គម សេដ្ឋកិច្ចកម្ពុជា ដោយឈរលើគោលការណ៍ រក្សាសមិទ្ធផលចាស់បង្កើតសមិទ្ធផលថ្មី និងគិតគូរជាសកល និងអនុវត្តតាមបរិការណ៍ក្នុងប្រទេស ក្នុងគោលដៅឈានទៅសម្រេចឱ្យបាននូវចក្ខុវិស័យ ក្នុងការប្រែក្លាយកម្ពុជាឱ្យទៅជាប្រទេសមានចំណូលមធ្យមកម្រិតខ្ពស់ ២០៣០ និងក្លាយជាទេសមានចំណូលខ្ពស់ នៅឆ្នាំ ២០៥០។ ជុំវិញបញ្ហាសេដ្ឋកិច្ច, សម្រាប់ឆ្នាំ២០២៤ នៃរាជរដ្ឋាភិបាល នីតិកាលទីថ្មី, សេដ្ឋកិច្ចកម្ពុជាត្រូវបានព្យាករថា នឹងសម្រេចបានអត្រាកំណើនក្នុងរង្វង់ ៦,៦% ដោយសារការរំពឹងទុកការត្រឡប់ទៅរកភាពល្អប្រសើរឡើងវិញនៃតម្រូវការខាងក្រៅ និងការងើបឡើងវិញនៃទំនុកចិត្តវិនិយោគ និងពាណិជ្ជកម្ម ស្របពេលដែលសកម្មភាពធុរកិច្ចក្នុងស្រុក នៅបន្តរក្សាបាននូវនិន្នាការកំណើនល្អជាវិជ្ជមាន ។ ទន្ទឹមនេះ ការអនុវត្ត ក្របខណ្ឌយុទ្ធសាស្ត្រនិងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣ ក្នុងរយៈពេលប៉ុន្មានឆ្នាំកន្លងមក បានកំពុងជួយស្តារវិស័យចន្ទល់កំណើនដែលមានស្រាប់និងជំរុញការអភិវឌ្ឍដល់វិស័យសក្តានុពលថ្មីៗ រួមមាន៖ ការអភិវឌ្ឍសហគ្រាសធុនតូច និងមធ្យម, អនុវិស័យកម្មន្តសាលមិនមែនកាត់ដេរ ព្រមទាំងការអភិវឌ្ឍហេដ្ឋារចនាសម្ព័ន្ធឌីជីថល និងបៃតង រួមចំណែកពង្រឹងនូវមូលដ្ឋានគ្រឹះសម្រាប់ការអភិវឌ្ឍ សំដៅបន្តធ្វើការកែទម្រង់ឱ្យកាន់តែស៊ីជម្រៅ ដើម្បីលើកកម្ពស់ភាពធន់នៃសង្គមសេដ្ឋកិច្ចកម្ពុជា ក្នុងរយៈពេលមធ្យម និងវែង។ សូមបញ្ជាក់ថា នៅក្នុងព្រឹកថ្ងៃទី ២១ ខែ សីហា ឆ្នាំ២០២៣ នេះ រដ្ឋសភា នៃព្រះរាជាណាចក្រកម្ពុជា បានបើកសម័យប្រជុំលើកដំបូង នីតិកាលទី ៧ ដោយមានការយាងអញ្ជើញបើកសម័យប្រជុំដំបូងរដ្ឋសភា នីតិកាលទី ៧ ដោយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ប្រធានគោលនយោបាយបរទេស EU៖ គ្មានតួនាទីសម្រាប់ក្រុមហាម៉ាសក្នុងការគ្រប់គ្រងនាពេលអនាគតនៅហ្គាហ្សានោះទេ

Greenland ថ្កោលទោសដំណើរទស្សនកិច្ចគ្រោងទុករបស់ក្រុមមន្រ្តីជាន់ខ្ពស់សហរដ្ឋអាមេរិក

មនុស្សយ៉ាងហោច ៧ពាន់នាក់ ត្រូវបានសម្លាប់ក្នុងជម្លោះនៅសាធារណរដ្ឋប្រជាធិបតេយ្យកុងហ្គោ

កម្ពុជា-កូរ៉េ ពង្រឹងកិច្ចសហប្រតិបត្តិការអភិវឌ្ឍន៍ ដោយបើកកិច្ចប្រជុំទ្វេភាគីឆ្នាំ២០២៥

សារព័ត៌មាន Bloomberg និង WSJ៖ អាមេរិកគ្រោងដកការដំឡើងពន្ធលើវិស័យសំខាន់ៗមួយចំនួន នៅថ្ងៃទី២ ខែមេសា

អាមេរិក និងហ្វីលីពីនចាប់ផ្ដើមសមយុទ្ធយោធារួម ដោយមានទាហាន ៥.០០០នាក់

ឯកឧត្តមអភិសន្តិបណ្ឌិត ស សុខា អញ្ជើញដឹកនាំគណៈប្រតិភូជាន់ខ្ពស់កម្ពុជា ទៅបំពេញទស្សនកិច្ចការងារនៅប្រទេសឡាវ

សម្ដេចធិបតី៖ ការប្រេះស្រាំជាតិសាសន៍ ការរើសអើងជាតិសាសន៍ ជាចំណែកនាំឱ្យបែកបាក់សង្គម

រដ្ឋមន្ត្រីការបរទេស៖ អ៊ីរ៉ង់ច្រានចោលការចរចាដោយផ្ទាល់ ជាមួយអាមេរិក ក្រោមសម្ពាធអតិបរមាបច្ចុប្បន្ន

ក្រុមប្រឹក្សាសិទ្ធិមនុស្សUN គ្រោងនឹងដោះស្រាយកង្វល់ជុំវិញការបញ្ជូនកងទ័ពរបស់កូរ៉េខាងជើង ទៅកាន់ប្រទេសរុស្ស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877