នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ហ៊ុន សែន ឆ្លៀតវាយកូនគោលនៅថ្ងៃចុងសប្ដាហ៍ ក្រោយខកខានជាង ១ឆ្នាំ
រាជរដ្ឋាភិបាលបង្ហាញលទ្ធផលការងារឆ្នាំ២០២៥ សម្រាប់ការអនុវត្តផែន​ការ​យុទ្ធសាស្ត្រ​អភិវឌ្ឍន៍​ជាតិ
សម្តេចធិបតី ហ៊ុន ម៉ាណែត ណែនាំឱ្យត្រៀមខ្លួនឆ្លើយតប​ផលប៉ះពាល់​ដោយសារ​បាតុភូត​ធម្មជាតិ​អែលនីញ៉ូ
ព្រះមហាក្សត្រ ប្រោសប្រទានលើកលែងទោសបន្ថែមដល់លោក កឹម សុខា បើក​ផ្លូវ​ឱ្យ​ចាក​ចេញ​ទៅ​ក្រៅ​ប្រទេស​បាន

ព័ត៌មានសំខាន់ៗ

សម្ដេចធិបតី នាយករដ្ឋមន្រ្ដី បាន​អំពាវនាវឱ្យមានកិច្ចសហការសុខភាព​សកលឱ្យកាន់​តែរឹងមាំ​នៅកិច្ចប្រជុំ​កំពូលស្តីពីសុខភាពតែមួយនៅប្រទេសបារាំង

2026/04/08 09:02:11 pm        222
Facebook Telegram Linkin
កិច្ចប្រជុំកំពូលស្តីពីសុខភាពតែមួយ ដែលប្រារព្ធឡើងនៅទីក្រុងលីយ៉ុង ប្រទេសបារាំង បានចាប់ផ្តើមកាលពីថ្ងៃទី៧ ខែមេសា ឆ្នាំ២០២៦ម្សិលមិញនេះ។ បន្ទាប់ពីកិច្ចប្រជុំត្រូវបានបើកជាផ្លូវការ មេដឹកនាំនៃបណ្តាប្រទេស និងអង្គការអន្តរជាតិនានា ត្រូវបានផ្តល់ឱកាសឱ្យឡើងចែករំលែកទស្សនទានគន្លឹះ ដើម្បីចូលរួមចំណែកដោះស្រាយបញ្ហាសុខភាពជាសកល។សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏បានចូលរួមកិច្ចពិភាក្សាក្រោមប្រធានបទ ចំនួន៣ រួមមាន៖ (១) អភិបាលកិច្ច និងវិទ្យាសាស្ត្រ (២) ជំងឺឆ្លង និង(៣) ជំងឺមិនឆ្លង ក្រោមការសម្របសម្រួលដោយលោកជំទាវ Eléonore Caroit រដ្ឋមន្ត្រីប្រតិភូនៃក្រសួងអឺរ៉ុប និងការបរទេសបារាំង។ ជាមួយគ្នានេះ សម្ដេចធិបតីក៏បានចូលរួមធ្វើបទអន្តរាគមន៍លើប្រធានបទទី២ ស្តីពី “ជំងឺឆ្លង” ជូនដល់អង្គពិធីនៃកិច្ចប្រជុំកំពូលស្តីពីសុខភាពតែមួយ។ជាកិច្ចចាប់ផ្តើមនៃសុន្ទរកថា សម្តេចប្រមុខរាជរដ្ឋាភិបាលកម្ពុជា បានបង្ហាញនូវកិត្តិយសដែលបានចូលរួមក្នុងកិច្ចប្រជុំកំពូលស្តីពីសុខភាពតែមួយឆ្នាំ២០២៦ នៅទិវាសុខភាពពិភពលោក។ សម្តេចមហាបវរធិបតី ក៏បានកោតសរសើររដ្ឋាភិបាលបារាំង ដែលបានធ្វើជាម្ចាស់ផ្ទះនៃកិច្ចប្រជុំកំពូលនេះនៅពេលវេលាដ៏សំខាន់មួយសម្រាប់មនុស្សជាតិ និងភពផែនដី។សម្តេចធិបតីបានគូសរំលេចពីបញ្ហាជំងឺកូវីដ១៩ ដែលបានចូលអង្រួនសុខភាពរបស់មនុស្សជាតិកាលពីឆ្នាំ២០១៩ ជាពិសេសគូសរំលេចពីការប្រឹងប្រែងរបស់កម្ពុជាក្នុងការប្រយុទ្ធប្រឆាំងជាមួយជំងឺរាតត្បាតជាសកលមួយនេះ។ សម្តេចធិបតីបានលើកឡើងថា ទោះបីជាប្រទេសមានធនធានតិចតួចក៏ដោយការទប់ស្កាត់ជំងឺកូវីដ-១៩ របស់ប្រទេសកម្ពុជា ត្រូវបានចាត់ទុកយ៉ាងទូលំទូលាយថាជាជោគជ័យគួរឱ្យកត់សម្គាល់ពីដំណាក់កាលទប់ស្កាត់យ៉ាងតឹងរ៉ឹង រហូតដល់ដំណាក់កាលស្តារឡើងវិញនៃការចាក់វ៉ាក់សាំងខ្ពស់។សម្តេចធិបតី ក៏បានគូសរំលេចពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការចូលរួមដោះស្រាយបញ្ហាសុខភាពសកល។ ប្រទេសកម្ពុជាបានដោះស្រាយហានិភ័យសុខភាពតែមួយតាមរយៈការឃ្លាំមើល និងការចូលរួមរបស់សហគមន៍នៅទូទាំងពហុភាគីពាក់ព័ន្ធ តាមដានការធ្វើចំណាកស្រុករបស់សត្វស្លាបព្រៃ និងប្រព័ន្ធអេកូឡូស៊ី និងសន្តិសុខជីវសាស្រ្តកម្រិតខ្ពស់ និងវិធីសាស្រ្តផ្អែកលើហានិភ័យចំពោះសុខភាពសត្វ ស្របពេលដែលមានការកែលម្អការឃ្លាំមើលហេដ្ឋារចនាសម្ព័ន្ធនៅក្នុងទីផ្សារ និងភស្តុភារ។នៅលើឆាកអន្តរជាតិវិញកម្ពុជានៅតែប្តេជ្ញាចិត្តចំពោះកិច្ចព្រមព្រៀងជំងឺរាតត្បាតរបស់អង្គការសុខភាពពិភពលោក និងប្រព័ន្ធឃ្លាំមើល AMR របស់ខ្លួន ដែលជាគំនិតផ្តួចផ្តើមបរិស្ថាន រួមមានភាពជាដៃគូសកម្មភាពប្លាស្ទិកសកល ក៏ដូចជាគំនិតផ្តួចផ្តើមសំខាន់ៗផ្សេងទៀតក្រោមក្របខ័ណ្ឌអាស៊ាន។ក្នុងសុន្ទរកថានោះ សម្តេចមហាបវរធិបតី ហ៊ុន ម៉ាណែត ក៏បានចែករំលែកនូវទស្សនទានចំនួន៥ ចូលរួមដោះស្រាយបញ្ហាសុខភាពជាសកល។ ទស្សនទានទាំង៥នោះរួមមាន៖១៖ ភាពជាដៃគូ និងសាមគ្គីភាព៖ សម្តេចមហាបវរធិបតី បានស្នើឱ្យជំរុញបន្ថែមទៀតនូវកិច្ចសហការក្នុងតំបន់ និងសកល ចែករំលែកចំណេះដឹង ធនធាន និងបច្ចេកវិទ្យារវាងរដ្ឋាភិបាល អ្នកវិទ្យាសាស្ត្រ សង្គមស៊ីវិល និងសហគមន៍។២៖ ការឃ្លាំមើលរួមបញ្ចូលគ្នា និងប្រព័ន្ធព្រមានដំបូង៖ សម្តេចមហាបវរធិបតី ស្នើឱ្យបន្តសម្របសម្រួលស្តង់ដារ ពង្រីកលំដាប់ហ្សែន និងធានាការឆ្លើយតបយ៉ាងឆាប់រហ័ស។៣៖ ការផ្តល់ហិរញ្ញប្បទាន និងនវានុវត្តន៍ប្រកបដោយចីរភាព៖ សម្តេចមហាបវរធិបតី ស្នើឱ្យជំរុញយន្តការអន្តរជាតិរយៈពេលវែងបន្ថែមទៀត បង្កើនការវិនិយោគក្នុងស្រុក និងលើកកម្ពស់ភាពជាដៃគូរវាងរដ្ឋ និងឯកជន។៤៖ ការប្រយុទ្ធប្រឆាំងនឹងភាពធន់នឹងភ្នាក់ងារប្រឆាំងមេរោគ (Antimicrobial Resistance -AMR) និងសម្ពាធអាកាសធាតុ៖ សម្តេចប្រមុខរាជរដ្ឋាភិបាលស្នើ លើកកម្ពស់បន្ថែមទៀតនូវការប្រើប្រាស់ថ្នាំអង់ទីប៊ីយ៉ូទិកដែលមានទំនួលខុសត្រូវ បង្កើនការត្រួតពិនិត្យកំណែទម្រង់បទប្បញ្ញត្តិ និងការរួមបញ្ចូលការការពារអាកាសធាតុទៅក្នុងគោលនយោបាយសុខភាព និងកសិកម្ម។៥៖ ការលើកកម្ពស់ចំណេះដឹង សមធម៌ និងការត្រៀមខ្លួន៖ សម្តេចមហាបវរធិបតី បានថ្លែងកាន់វេទិកានៃកិច្ចប្រជុំនោះថា គួរតែធានាគោលនយោបាយផ្អែកលើភស្តុតាង វិនិយោគលើមន្ទីរពិសោធន៍ និងការអភិវឌ្ឍកម្លាំងពលកម្ម ធានាការទទួលបានឧបករណ៍សង្គ្រោះជីវិតដោយសមធម៌ និងលើកតម្កើងសហគមន៍តាមរយៈការយល់ដឹង៕

សម្ដេចតេជោ ហ៊ុន សែន ផ្ដាំផ្ញើ​ដល់​ឯកអគ្គរដ្ឋទូត​តួកគី​យ៉េ​ចប់​អាណត្តិ​ឱ្យបន្ត​ធ្វើ​ជា​ទូត​របស់​កម្ពុជា​ផ្សព្វ​ផ្សាយ​ពី​កម្ពុជា ដើម្បីទាក់ទាញវិនិយោគ និងទេសចរណ៍មកម្ពុជា

2026/04/08 07:12:52 pm        277
Facebook Telegram Linkin
សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បាន​មាន​ប្រសាសន៍​ផ្ដាំ​ផ្ញើ​ដល់លោកជំទាវ អ៊ុលឃូ ខូខាអ៊ីវ (Ülkü Kocaefe) ឯកអគ្គរដ្ឋទូត នៃ​សាធារណ​រដ្ឋ​តួក​គី​យ៉េ ប្រចាំនៅព្រះរាជាណាចក្រកម្ពុជា ចប់អាណត្តិ​ឱ្យបន្ត​ធ្វើ​ជា​ទូត​របស់​កម្ពុជា​ផ្សព្វ​ផ្សាយ​ពី​កម្ពុ​ជា​បន្តទៀតនៅឯប្រទេសតួកគីយ៉េ ខណៈលោក​ជំទាវ​បាន​បង្ហាញ​ពី​ក្ដី​ស្រឡាញ់​ចំពោះ​ប្រជា​ជន ​និងប្រទេសកម្ពុជា និងចាត់ទុកកម្ពុជាគឺជាមិត្តអស់មួយជីវិត។ សម្តេចតេជោ ហ៊ុន សែន បានមានប្រសាសន៍ផ្ដាំផ្ញើបែបនេះ ក្នុងឱកាស អនុញ្ញាតឱ្យលោកជំទាវ អ៊ុល​ឃូ ខូខាអ៊ីវ (Ülkü Kocaefe) ឯកអគ្គរដ្ឋទូត នៃសាធារណរដ្ឋតួកគីយ៉េ ប្រចាំ​កម្ពុជា​ចប់​អាណត្តិ ​ចូលជួបសម្ដែងការគួរ និងជម្រាបលា នៅវិមានសាមគ្គីភាពនៃព្រឹទ្ធសភាជាតិ នៅថ្ងៃទី៨ ខែ​មេសា ឆ្នាំ២០២៦នេះ។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបនេះថា ជាកិច្ច​ចាប់​ផ្ដើម​សម្ដេច​តេជោ ​ហ៊ុន សែន បានសម្ដែងនូវក្ដីរីករាយក្នុងពេលដែលសម្ដេចបានជួបលោកជំទាវ អ៊ុល​ឃូ ខូខាអ៊ីវ សារជាថ្មី បើទោះបី​​ជា​ពេល​នេះ​លោក​ជំទាវ​ត្រូវ​ផុត​អាណត្តិ​បំពេញ​បេសកកម្ម​ជា​ឯកអគ្គ​រដ្ឋ​ទូត​នៅព្រះរាជាណាចក្រកម្ពុជាក្ដី។ សម្ដេចតេជោ បានកោតសរសើរ​ចំពោះ​លោក​ជំទាវ​ក្នុង​រយៈ​ពេល​នៃ​បេសកកម្មរបស់លោកជំទាវជាឯកអគ្គរដ្ឋទូត លោកជំទាវសម្រេចបាន និង​បង្កើត​សមិទ្ធ​ផល​ជា​ច្រើនសម្រាប់ទំនាក់ទំនងរវាងកម្ពុជា និងតួកគីយ៉េ ដែលមកដល់ពេលនេះ ប្រទេស​ទាំង​ពីរ​កំពុង​តែមានទំនាក់ទំនងដ៏ល្អ និងរីកចម្រើនជាបន្តបន្ទាប់។នៅក្នុងឱកាសនោះ លោកជំទាវ អ៊ុលឃូ ខូខាអ៊ីវ បានសម្ដែង​នូវ​ការ​អរគុណ​ជា​អនេកប្បការ​ដែល​សម្ដេច​តេជោ បា​នអនុញ្ញាតឱ្យលោកជំទាវ និងសហការី បានចូលជួបសម្ដែងការគួរ និង​ជម្រា​ប​លា​នៅ​ក្នុង​ឱកាសនេះ។ លោក​ជំទាវក៏បានរាយការណ៍អំពីបេសកកម្មរបស់លោកជំទាវក្នុងបេសកកម្មជាឯកអគ្គរដ្ឋទូតនៅកម្ពុជាកន្លងម​កនេះ ជូនចំពោះសម្ដេចតេជោ ដោយលោកជំទាវ​បាន​លើក​ឡើង​នូវសមិទ្ធផល​ដែល​សម្រេច​​បា​ន​សំខាន់​សម្រាប់ការពង្រីកទំនាក់ទំនងរវាងកម្ពុជា និងតួកគីយ៉េ, ដូច​ជា​ការ​បង្កើត​នូវ​ការិយាល័យ​ពាណិជ្ជ​កម្មរបស់តួកគីយ៉េនៅកម្ពុជា, បង្កើតមជ្ឈ​មណ្ឌល​វប្បធម៌​របស់​តួក​គី​យ៉េ​នៅ​កម្ពុជា ​និងសមិទ្ធផលដ៏សំខាន់ដែលទើបសម្ដេចបាននៅចុងឆ្នាំ២០២៥ គឺ​ការ​បង្កើត​នូវ​ជើង​ហោះ​ហើរ​របស់​តួកគីយ៉េ មកកាន់កម្ពុជា ដែលជាផ្នែកដ៏សំខាន់ក្នុងការពង្រីកទំនាក់ទំនងរវាងកម្ពុជា និង​តួក​គីយ៉េ​ និងទំនាក់ទំនងរវាងប្រជាជននៃប្រទេសទាំងពីរ។ក្នុងឱកាសនោះលោកជំទាវក៏បានសម្ដែងនូវការជាប់ចិត្តចំពោះប្រជាជនកម្ពុជា ជាពិសេស គឺ​ស្មាម​ញញឹម​របស់​ប្រជាជនកម្ពុជាដែលមិនអាចធ្វើឱ្យលោកជំទាវបំភ្លេចបានឡើយ។ លោក​ជំទា​វ​ក៏​បាន​លើក​ឡើង​ថា ​បើទោះបីជាពេលនេះ លោកជំទាវផុតអាណត្តិជាឯកអគ្គរដ្ឋទូតនៅកម្ពុជា ក៏ប៉ុន្ដែ​ក៏​លោក​ជំទាវ​នឹង​នៅ​តែ​ជាមិត្តរបស់កម្ពុជាអស់មួយជីវិត។ នៅក្នុងឱកាសនោះសម្ដេចតេជោ បានសម្ដែងនូវក្ដី​ពេញ​ចិត្ត​យ៉ាង​ក្រៃ​លែង​ចំពោះពា​ក្យ​ពេចន៍​ដ៏​មាន​អត្ថន័យរបស់លោកជំទាវចំពោះការពេញចិត្តប្រជាជនកម្ពុជា ក៏ដូចជាប្រទេសកម្ពុជា។ សម្ដេច​តេជោ បានកោតសរសើរ ចំពោះការខិតខំប្រឹងប្រែងរបស់លោកជំទាវ ក្នុងឋានៈ​ជា​ឯក​អគ្គរ​ដ្ឋ​ទូត​ប្រចាំនៅកម្ពុជាកន្លងមក លោកជំទាវ​បាន​ខិត​ខំ​ប្រឹង​ប្រែង​ខ្លាំង​ណាស់​ក្នុង​ការ​ពង្រីក​នូវ​ទំនាក់​ទំនង​ទ្វេ​ភាគី​រវាង​ប្រទេសទាំងពីរ។ សម្ដេចតេជោ ក៏បា​នកោតសរសើរចំពោះការខិតខំរបស់លោកជំទាវ ក្នុងការបង្កើត​នូវ​ការិយាល័យ​ពាណិជ្ជ​កម្ម​របស់តួកគីយ៉េនៅកម្ពុជា, បង្កើតមជ្ឈមណ្ឌលវប្បធម៌របស់តួកគីយ៉េនៅកម្ពុជា និង​ការ​បង្កើត​នូវ​ជើងហោះហើររបស់តួកគីយ៉េមកកាន់កម្ពុជា ដែលជាចរន្ត​នៃ​ការ​គាំទ្រ​ទំនាក់​ទំនង​ទ្វេ​ភាគី​រវាង​កម្ពុជា និងតួកគីយ៉េឱ្យកាន់តែល្អប្រសើរ។ ជាមួយគ្នានេះសម្ដេចតេជោ ក៏បានអរគុណ​ចំពោះ​ប្រទេស​តួកគី​យ៉េ​ដែល​នា​ពេល​កន្លង​មក​បាន​ចូល​រួម​ចំណែក​ផ្ដល់​ជំនួយ​មនុស្ស​ធម៌​ដល់​ជន​ភៀស​សឹក​កម្ពុជានៅក្នុងបញ្ហាសង្គ្រាមព្រំដែនកម្ពុជា-ថៃ។ សម្ដេចតេជោ ក៏លើកឡើង​អំពី​បញ្ហា​ព្រំដែន​របស់​កម្ពុជា និងថៃ និងជំហររបស់កម្ពុជា គឺក្នុងការរក្សានូវបទឈប់បាញ់ឱ្យបានយូរអង្វែង និង​ការ​ដោះ​ស្រាយបញ្ហាដោយសន្ដិវិធីតាមរយៈការចរចា។ សម្ដេចតេជោ​ក៏បានរម្លឹកនូវពាក្យដ៏មានអត្ថន័យរបស់លោកជំទាវឯកអគ្គរដ្ឋទូតថា «នឹង​នៅ​ជា​មិត្ត​របស់​កម្ពុជាអស់មួយជីវិត» ដោយសម្ដេចតេជោ បានផ្ដាំផ្ញើបន្ថែម​ចំពោះ​លោក​ជំទាវ​ទោះ​បី​ជា​ចប់​អាណត្តិ​ជា​ឯកអគ្គរដ្ឋទូត និងត្រឡប់ទៅតួកគីយ៉េវិញ ក៏សូមឱ្យលោក​ជំទាវ​នៅ​បន្ត​ធ្វើ​ជា​ឯក​អគ្គ​រដ្ឋ​ទូត​របស់​កម្ពុជានៅក្នុងប្រទេសតួកគីយ៉េបន្តទៀត» មានន័យថា បន្តជួយផ្សព្វផ្សាយ​ពី​កម្ពុជា​ដល់​អ្នក​វិនិយោគ ដល់ប្រជាជនតួកគីយ៉េ ដើម្បីមកវិនិយោគ និងទស្សនាកម្ពុជា៕

សម្តេចធិបតី អញ្ជើញចូលរួមកិច្ចពិភាក្សា និង​ថ្លែង​សុន្ទរ​គន្លឹះ​ក្នុង​កិច្ច​ប្រជុំ​កំពូល​ស្តីពី​សុខ​ភាព​តែមួ​យ និងជួ​បជាមួយបណ្ដាថ្នាក់ដឹកនាំប្រទេសមួយចំនួនទៀតនៅបារាំង​

2026/04/08 06:47:49 pm        358
Facebook Telegram Linkin
បន្ទាប់ពីអញ្ជើញចូលរួមក្នុងពិធីបើកជាផ្លូវការនៃកិច្ចប្រជុំកំពូលស្តីពីសុខភាពតែមួយហើយនោះ សម្តេច​ម​ហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាន​អញ្ជើញ​ចូល​រួម​កិច្ច​ពិភាក្សា​ក្រោមប្រធានបទចំនួន៣ រួមមាន៖ ១. អភិបាលកិច្ច និងវិទ្យាសាស្ត្រ, ២ជំងឺឆ្លង និង៣ ជំងឺមិនឆ្លង។ កិច្ចពិភាក្សានេះ ត្រូវបានសម្របសម្រួលដោយលោកស្រី Eléonore Caroit រដ្ឋមន្ត្រី​ប្រតិភូនៃក្រសួងអឺរ៉ុប និងការបរទេសបារាំង។ក្នុងឱកាសនោះ សម្តេចមហាបវរធិបតី ហ៊ុន ម៉ាណែត ក៏បានអញ្ជើញថ្លែងសុន្ទកថាគន្លឹះ លើ​ប្រធាន​បទ​ទី២ ស្តីពី «ជំងឺឆ្លង»ផងដែរ។ក្នុងឱកាស​មុនចូលរួមកិច្ចប្រជុំកំពូលស្ដីពីសុខភាពតែមួយនៅប្រទេសបារាំងនេះ សម្ដចធិបតី នាយក​រដ្ឋមន្រ្ដី ក៏បានអញ្ជើញចូលរួមកិច្ចប្រជុំជាន់ខ្ពស់ស្តីពី «និម្មាបនកម្មសុខភាពសាកល» និង​មាន​ជំនួបក្រៅផ្លូវការជាមួយថ្នាក់ដឹកនាំមកពីបណ្ដាប្រទេសមួយចំនួនទៀតផងដែរ។ក្នុង​នោះ​សម្ដេចធិបតី បានឆ្លៀតជួបពិភាក្សាក្រៅផ្លូវការជាមួយ ឯកឧត្ដម Akihiko Nishio អនុ​ប្រធាន​ធនាគារពិភពលោកទទួលបន្ទុកការអភិវឌ្ឍហិរញ្ញវត្ថុ។ ជួបពិភាក្សា​ក្រៅ​ផ្លូវ​ការ​ជាមួយ​លោក​សាស្ត្រា​ចារ្យបណ្ឌិត Khaled EI Enany អគ្គនាយកអង្គការ UNESCO និងមាន​ជំនួប​ពិភាក្សា​ក្រៅ​ផ្លូវការជាមួយ ឯកឧត្តម Duma Gideon Boko ប្រធានាធិបតីបុតស្វាណា ផងដែរ។ សូមបញ្ជាក់ថា កិច្ចប្រជុំកំពូលស្តីពីសុខភាពតែមួយ ដែលរៀបចំឡើងនៅទីក្រុងលីយ៉ុង ប្រទេស​បារាំង​ ត្រូវ​បាន​បើកជាផ្លូវការនៅថ្ងៃទី៧ ខែមេសា ឆ្នាំ២០២៦នេះ។ កិច្ចប្រ​ជុំ​កំពូលស្តីពីសុខភាពតែមួយ ជាកិច្ចប្រជុំកំពូលលើកទី៩ នៃកិច្ចប្រជុំ​កំពូល​ស្តី​ពី​ភព​ផែន​ដី​តែ​មួ​យ គឺជាព្រឹត្តិការណ៍សំខាន់មួយរបស់ប្រទេសបារាំង ក្នុងនាមជាប្រធានក្រុមប្រទេស G7 នៅ​ឆ្នាំ​២០២៦។ កិច្ចប្រជុំកំពូលនេះ គឺជាវេទិកាកម្រិតខ្ពស់សម្រាប់ការជួបជុំប្រមុខរដ្ឋ/រដ្ឋាភិបាល តំណាង​អង្គការ​អន្តរជាតិ សង្គមស៊ីវិល និងអ្នកវិទ្យាសាស្ត្រ ដើម្បីពិភាក្សាបញ្ហាពាក់ព័ន្ធនឹងសុខភាពមនុស្ស សត្វ និង​ប្រព័ន្ធ​អេកូឡូស៊ី។ សូមបញ្ជាក់ជូនថា សម្តេចធិបតី នាយករដ្ឋមន្ត្រី ក៏នឹងជួបពិភាក្សាការងារជាមួយឯកឧត្តម Emmanuel MACRON ប្រធានាធិបតីនៃសាធារណរដ្ឋបារាំង ដើម្បី​ពិភាក្សា​អំពី​ការ​ពង្រឹង និង​ពង្រីក​បន្ថែម​នូវកិច្ចសហប្រតិបត្តិការទ្វេភាគីដែលកំពុងរីកចម្រើនក្នុងវិស័យនយោបាយ សន្តិសុខ ពាណិជ្ជកម្ម វិនិយោគ និងវប្បធម៌ ក្នុងគោល​បំណង​លើក​កម្ពស់​ទំនាក់​ទំនង​រវាង​ប្រទេស​ទាំង​ពីរ​ឱ្យ​ក្លាយ​ជា​ភាពជាដៃគូយុទ្ធសាស្ត្រនាពេលខាងមុខ។ ថ្នាក់ដឹកនាំ​ទាំង​ពី​រ​ក៏​គ្រោង​នឹង​ផ្លាស់​ប្តូរ​ទស្សនៈ​ជុំវិញ​កិច្ចសហប្រតិបត្តិការពហុភាគីរួមទាំងកិច្ចប្រជុំកំពូលហ្វ្រង់កូហ្វូនី (Francophonie) ដែលនឹងប្រព្រឹត្តទៅនៅរាជធានីភ្នំពេញ នៅខែវិច្ឆិកាឆ្នាំនេះ ព្រមទាំងការ​វិវត្ត​នៅក្នុ​​ងតំបន់ និងពិភពលោក៕

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់សហការីនាំយកអំណោយមនុស្សធម៌សម្រាលទុក្ខលំបាក ជូនលោកតាលោកយាយចាស់ជរាគ្មានទីពឹងនៅក្រុងច្បារមន ខេត្តកំពង់ស្ពឺ

2026/04/08 03:05:05 am        122
Facebook Telegram Linkin
កំពង់ស្ពឺ៖ ដោយក្តីអាណិតអាសូរជាពន់ពេក មាតាមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី៧ ខែមេសា ឆ្នាំ២០២៦ បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា រួមជាមួយសាខាកាកបាទក្រហមកម្ពុជា ខេត្តកំពង់ស្ពឺ ចុះសួរសុខទុក្ខ និងនាំយកអំណោយមនុស្សធម៌ ជាគ្រឿងឧបភោគបរិភោគ និងថវិកាមួយចំនួន ជូនដល់លោកយាយ ខៀវ អែង អាយុ ៨៨ឆ្នាំ ជាចាស់ជរាគ្មានទីពឹង រស់នៅភូមិអង្គសេរី សង្កាត់រកាធំ ក្រុងច្បារមន ខេត្តកំពង់ស្ពឺ និងលោកតា ប៉ែន ប៉ុន អាយុ១០២ឆ្នាំ រស់នៅក្រុងច្បារមន ខេត្តកំពង់ស្ពឺ។ក្នុងឱកាសនោះ លោកជំទាវ អគ្គលេខាធិការរងទី១ កាកបាទក្រហមកម្ពុជា បាននាំយកនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្តាំផ្ញើសួរសុខទុក្ខ ក្តីអាណិតអាសូរ និងការគិតគូរពីជីវភាពរស់នៅរបស់លោកយាយ លោកតា។ លោកជំទាវ បានជម្រាបជូនលោកយាយលោកតា ថា «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែតាមដានជាប់ជានិច្ចពីសុខទុក្ខរបស់បងប្អូនប្រជាពលរដ្ឋ ហើយបន្ទាប់ពីបានឃើញព័ត៌មានអំពីករណីដ៏លំបាកមួយរបស់លោកយាយខៀវ អែង រស់នៅតែម្នាក់ឯង, ឃើញលោកយាយមានសម្លៀកបំពាក់រហែករយាករយ៉ាក និងផ្ទះដែលលោកយាយរស់នៅមានសភាពចាស់ទ្រុឌទ្រោម ពេលភ្លៀងម្តងៗ មានលិចទឹកថែមទៀតនោះ ធ្វើឱ្យសម្តេចកិត្តិព្រឹទ្ធបណ្ឌិត មានអារម្មណ៍ក្តុកក្តួល និងក្តីអាណិតអាសូរ យ៉ាងក្រៃលែង ហើយបានចាត់ឱ្យក្រុមការងារចុះភ្លាមៗដើម្បីជួយសម្រាលការលំបាកក្នុងជីវភាព និងជាការលើកទឹកចិត្តដល់លោកយាយផងដែរ»។លោកជំទាវ ម៉ែន នារីសោភ័គ បានបន្តថាចំពោះករណីលោកតា ប៉ែន ប៉ុន ដែលមានអាយុ១០២ឆ្នាំ រស់នៅជាមួយកូនប្រសារស្រី និងចៅស្រីដែលមានជីវភាពលំបាកខ្លាំង ដោយកូនប្រុសបង្កើតលោកតាបានស្លាប់តាំងពីឆ្នាំ១៩៩៣ មកម្ល៉េះ ។ លោកតា ក៏ទទួលបានអំណោយមនុស្សធម៌ពីកាកបាទក្រហមកម្ពុជាដូចគ្នា ហើយនេះជាលើកទី២របស់លោកតាផងដែរ។លោកជំទាវបានឱ្យដឹងបន្តថា នេះជាសកម្មភាពមួយ ដែលកាកបាទក្រហមកម្ពុជា ក្រោមការដឹកនាំរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានត្រូវតែយកចិត្តទុកដាក់ចំពោះចាស់ឥតទីពឹង ហើយ សម្តេច តែងតែណែនាំដល់កូនចៅនៅទៅតាមសាខា ក៏ដូចជាមន្ត្រីយើងទាំងអស់ឱ្យយកចិត្តទុកដាក់នៅតាមទីកន្លែងណាក៏ដោយ ឱ្យតែបានប្រទះ ឃើញគឺត្រូវតែធ្វើការដោះស្រាយ។លោកជំទាវបន្ថែមថា «ការចុះសួរសុខទុក្ខដល់ចាស់ៗដែលឥតទីពឹង ដូចករណីនៅក្នុងថ្ងៃនេះ និងមានសកម្មភាពចុះទៅតាមមណ្ឌលកុមារកំព្រា ក៏ដូចជាសមាគមតន្ត្រីសំនៀងជនពិការ កន្លែងវិទ្យុ ទូរទស្សន៍អ្នកមានពិការភាពភ្នែក និងកុមារកំព្រាមួយចំនួនដែលយើងតែងតែធ្វើនៅក្នុងឱកាសបុណ្យចូលឆ្នាំខ្មែរ ហើយក៏ជាផ្នែកមួយនៃយុទ្ធនាការនៅក្នុងការរកមូលនិធិក្នុងឱកាសទិវា ៨ ឧសភា ដើម្បីបង្ហាញជូនសប្បុរសជនថា ថវិកាដែលយើងបានទទួលពីសប្បុរសជន គឺតែងតែបានទៅដល់ដៃអ្នករងគ្រោះបំផុត»។សូមបញ្ជាក់ថា អំណោយដែលជូនលោកតាលោកយាយនាឱកាសនេះរួមមាន៖ អង្ករ ៥០គីឡូក្រាម, មី ៥កេស, ត្រីខ ១កេស(មាន១០០កំប៉ុង), ឆៃពៅ ៣កំប៉ុង (ស្មើ៣គីឡូក្រាម), ប្រេងឆា ៣ដប(ស្មើ៣គីឡូក្រាម), ទឹកស៊ីអីវ ២យួរ(ស្មើ១២ដប), ភេសជ្ជះវីកូឡា ២កេស, ទឹកបរិសុទ្ធ ២កេស, កន្ទេល ២រាយ, ឃីត ២កញ្ចប់ និងថវិកា ៥០០.០០០រៀល ព្រមទាំងសម្ភារប្រើប្រាស់មួយចំនួនទៀតផងដែរ។បន្ទាប់ពីទទួលបានអំណោយមនុស្សធម៌ខាងលើ លោកតាលោកយាយ ទាំងពីរនាក់មានក្តីរំភើបរីករាយឥតឧបមា និងបានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានយកចិត្តទុកដាក់គិតគូរ និងលើកដៃប្រណមបួងសួងទេវត្តាឆ្នាំថ្មី តាមថែរក្សាមាតាមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងក្រុមគ្រួសារមានសុខភាពល្អ អាយុយឺនយូរ និងមានសុខសុវត្ថិភាពគ្រប់ទីកន្លែងទាំងអស់៕

សម្ដេចធិបតី នាយករដ្ឋមន្ត្រី អញ្ជើញចូលរួមកិច្ចប្រជុំចង្អៀតជាមួយ ប្រធានាធិបតីបារាំង, អគ្គនាយក WHO និងមេដឹកនាំប្រទេសមួយចំនួនទៀត

2026/04/08 01:10:19 am        28
Facebook Telegram Linkin
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី០៧ ខែមេសា ឆ្នាំ២០២៦នេះ បានអញ្ជើញចូលរួមកិច្ចប្រជុំចង្អៀតជាមួយ លោក Emmanuel Macron ប្រធានាធិបតីបារាំង, លោក Tedros Adhanom Ghebreyesus អគ្គនាយកអង្គការសុខភាពពិភពលោក (WHO) និងប្រមុខរដ្ឋ/រដ្ឋាភិបាលនៃបណ្តាប្រទេសមួយចំនួនទៀត នៅក្នុងប្រទេសបារាំង៕

BREAKING NEWS | ប្រមុខរដ្ឋស្តីទីចេញព្រះរាជក្រមប្រកាសឲ្យប្រើច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា

2026/04/07 01:44:34 am        378
Facebook Telegram Linkin
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា ក្នុងព្រះបរមនាមព្រះករុណាព្រះមហាក្សត្រនៅថ្ងៃទី៦ ខែមេសា ឆ្នាំ២០២៦ នេះ បានចេញព្រះរាជក្រមប្រកាសឱ្យប្រើច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលរដ្ឋសភាបានអនុម័តកាលពីថ្ងៃទី៣០ ខែមីនា ឆ្នាំ២០២៦ នាសម័យប្រជុំរដ្ឋសភាលើកទី៥ នីតិកាលទី៧ ហើយដែលព្រឹទ្ធសភាបានពិនិត្យចប់សព្វគ្រប់លើទម្រង់ និងគតិច្បាប់នេះទាំងស្រុងកាលពីថ្ងៃទី៣ ខែមេសា ឆ្នាំ២០២៦ នាសម័យប្រជុំព្រឹទ្ធសភាជាវិសាមញ្ញ នីតិកាលទី៥។យោងតាមច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យាបានបញ្ជាក់ថា ច្បាប់នេះ កំណត់អំពីវិធានផ្នែកព្រហ្មទណ្ឌដើម្បីលើកកម្ពស់ប្រសិទ្ធភាពនៃការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា សំដៅចូលរួមថែរក្សាការពារសន្តិសុខ និងសណ្តាប់ធ្នាប់សាធារណៈ ព្រមទាំងលើកកម្ពស់ ប្រសិទ្ធភាពនៃកិច្ចសហប្រតិបត្តិការក្នុងការប្រយុទ្ធប្រឆាំងនឹងឧក្រិដ្ឋកម្មនេះ។ ច្បាប់នេះមានវិសាលភាពអនុវត្តចំពោះបទល្មើសឆបោកដែលត្រូវបានប្រព្រឹត្តតាមប្រព័ន្ធបច្ចេកវិទ្យា ឬដែលប្រើប្រាស់ប្រព័ន្ធបច្ចេកវិទ្យាជាមធ្យោបាយដើម្បីប្រព្រឹត្តបទល្មើស ព្រមទាំងចំពោះបទល្មើសដែល ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា។បទល្មើសដែលស្ថិតក្រោមដែនអនុវត្តនៃច្បាប់នេះ គឺជាបទល្មើសដែលត្រូវបានប្រព្រឹត្តក្នុងករណី ដូចខាងក្រោម៖១-បទល្មើសត្រូវបានប្រព្រឹត្ត ឬចាត់ថាបានប្រព្រឹត្តនៅលើដែនដីនៃព្រះរាជាណាចក្រកម្ពុជា ស្របតាម បទប្បញ្ញត្តិនៃក្រមព្រហ្មទណ្ឌជាធរមាន។២-បទល្មើសត្រូវបានប្រព្រឹត្តនៅក្រៅដែនដីនៃព្រះរាជាណាចក្រកម្ពុជា ក្នុងករណីណាមួយដូចខាងក្រោម៖- បទល្មើសត្រូវបានប្រព្រឹត្តដោយពលរដ្ឋខ្មែរ។- បទល្មើសត្រូវបានប្រព្រឹត្តលើពលរដ្ឋខ្មែរ។- ទ្រព្យសម្បត្តិដែលសង្ស័យថាពាក់ព័ន្ធនឹងបទល្មើស ឬផលនៃបទល្មើសដែលមានចែងក្នុង ច្បាប់នេះ បានផ្ទេរចូលមកក្នុង ឬបានផ្ទេរចេញពីព្រះរាជាណាចក្រកម្ពុជា។៣-បទល្មើសត្រូវបានប្រព្រឹត្តដោយប្រើប្រព័ន្ធធនាគារ ឬប្រព័ន្ធហិរញ្ញវត្ថុរបស់ព្រះរាជាណាចក្រកម្ពុជា៕ អត្ថបទ៖ អត្ថបទ៖ វង្ស សុភាព

លោកជំទាវ ហ៊ុន ម៉ាណា អញ្ជើញជាអធិបតីក្នុងពិធីសូត្រមន្តចម្រើនព្រះបរិត្ត ប្រសិទ្ធិពរជ័យ សិរីមង្គលសាទរឆ្នាំថ្មីប្រពៃណីជាតិខ្មែរ ក្រុមហ៊ុន អ័រគីដេ ឌីវែឡុបម៉ិន

2026/04/03 02:05:43 am        261
Facebook Telegram Linkin
ក្រុមហ៊ុន អ័រគីដេ ឌីវែឡុបម៉ិន បានប្រារព្ធពិធីសូត្រមន្តចម្រើនព្រះបរិត្ត ប្រសិទ្ធិពរជ័យ សិរីមង្គល ទទួលអំណរសាទរឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស. ២៥៦៩ ក្រោមអធិបតីភាពដ៏ខ្ពង់ខ្ពស់របស់លោកជំទាវ ហ៊ុន ម៉ាណា អគ្គនាយិកា និងប្រធានក្រុមប្រឹក្សាភិបាល នៃក្រុមហ៊ុនអ័រគីដេ ឌីវែឡុបម៉ិន ព្រមទាំងវត្តមានអញ្ជើញចូលរួមពីអ្នកឧកញ៉ា ជាម ឃុនណាត និងអ្នកឧកញ៉ា តេង ហឿង សមាជិកក្រុមប្រឹក្សាភិបាល និងជាសហនាយកប្រតិបត្តិនៃក្រុមហ៊ុនអ័រគីដេ ឌីវែឡុបម៉ិន ថ្នាក់ដឹកនាំ បុគ្គលិកក្រុមហ៊ុន និងអតិថិជនរបស់បុរីអ័រគីដេផងដែរ។ ពិធីសូត្រមន្តចម្រើនព្រះបរិត្ត បានប្រារព្ធទៅតាមគន្លងប្រពៃណីព្រះពុទ្ធសាសនាដ៏ផូរផង់ ដោយមានការបូជាទៀនធូប ផ្កាភ្ញី គ្រឿងសក្ការៈនានា ថ្វាយព្រះរតនត្រៃ និងបាននិមន្ត ព្រះធម្មវនវាសី ចន្ទមុនី ព្រះសមុហ៍គណខេត្តព្រះសង្ឃាធិបតីវត្តចន្ទប្បជោនារាម (ហៅវត្តតាសុត) ដើម្បីចម្រើនព្រះបរិត្ត ស្វាធ្យាយជយន្តោ ពុទ្ធជ័យមង្គល ជូនដល់លោកជំទាវ ហ៊ុន ម៉ាណា អគ្គនាយិកា អ្នកឧកញ៉ា ជាម ឃុនណាត និងអ្នកឧកញ៉ា តេង ហឿង សហនាយកប្រតិបត្តិ ថ្នាក់ដឹកនាំ បុគ្គលិក នៃក្រុមហ៊ុនអ័រគីដេ ឌីវែឡុបម៉ិន ភ្ញៀវកិត្តិយសទាំងអស់ ព្រមទាំងក្រុមគ្រួសារ ជាកិច្ចទទួលអំណរសាទរឆ្នាំថ្មីប្រពៃណីជាតិខ្មែរ៕

វឌ្ឍនភាពថ្មីគម្រោងគ្រប់គ្រងធនធានទឹកចម្រុះហ្វូណនតេជោ៖ពិធីបើកការដ្ឋានសាងសង់កំណាត់ទី២ នឹងប្រារព្ធឡើងនៅថ្ងៃទី១១ ខែមេសាខាងមុខនេះក្រោមអធិបតីភាពសម្ដេចធិបតីនាយករដ្ឋមន្រ្ដី

2026/04/02 11:57:19 pm        214
Facebook Telegram Linkin
តាកែវ៖នារសៀលថ្ងៃព្រហស្បតិ៍ ទី២ ខែមេសា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាអនុប្រធានប្រចាំការនៃគណៈកម្មាធិការពិសេសដើម្បីជំរុញការរៀបចំ និងការអនុវត្តគម្រោងព្រែកជីកហ្វូណនតេជោ បានអញ្ជើញដឹកនាំគណៈប្រតិភូអន្តរក្រសួងចុះពិនិត្យទីតាំងរៀបចំពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ (ព្រែកពោធិ៍ ខេត្តកណ្តាល - សមុទ្រខេត្តកែប) ដែលគ្រោងនឹងធ្វើឡើងនាថ្ងៃទី១១ ខែមេសា ឆ្នាំ២០២៦ ខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត។ បេសកកម្មនេះមានការអញ្ជើញចូលរួមពី ឯកឧត្តមរដ្ឋមន្ត្រីក្រសួងសាធារណការនិងដឹកជញ្ជូន សមាជិកគណៈកម្មាធិការពិសេស និងជាប្រធានលេខាធិការដ្ឋាន, ឯកឧត្តមរដ្ឋមន្ត្រីក្រសួងធនធានទឹកនិងឧតុនិយម សមាជិកគណៈកម្មាធិការពិសេស, ឯកឧត្តម លោកជំទាវ តំណាងអន្តរក្រសួង ស្ថាប័នពាក់ព័ន្ធ ថ្នាក់ដឹកនាំក្រុមហ៊ុន CRBC និងមន្រ្តីពាក់ព័ន្ធជាច្រើនរូបទៀត។ព្រែកជីកហ្វូណន-តេជោ គ្រោងចំណាយថវិកាប្រមាណ ១,៧០០លានដុល្លា និងប្រើប្រាស់រយៈពេល៤ឆ្នាំ ទើបសាងសង់រួចរាល់។ ព្រែកជីកនេះ បានតភ្ជាប់ផ្លូវទឹករវាងទន្លេមេង្គ ទៅកាន់សមុទ្ររបស់កម្ពុជា ដែលត្រូវឆ្លងកាត់ខេត្តចំនួន៤ រួមមាន៖ខេត្តកណ្តាល តាកែវ កំពត និងកែប។ ព្រែកជីកហ្វូណន-តេជោ មានបណ្តាយប្រវែងប្រមាណ១៨០គីឡូម៉ែត្រ ទទឹងមុខកាត់ផ្នែកខាងលើប្រវែង១០០ម៉ែត្រ និងមុខកាត់ផ្នែកខាងក្រោមប្រមាណ៨០ម៉ែត្រ និងជម្រៅទឹកប្រមាណ ៥,៤ម៉ែត្រ មានគន្លងនាវាចរណ៍ចំនួន ២គន្លង អាចចេញ-ចូល និងជៀសគ្នាបានដោយសុវត្ថិភាព។ព្រែកជីកនេះ ត្រូវបានផ្តួចផ្តើមឡើងដោយសម្តេចតេជោ ហ៊ុន សែន អតីតនាយករដ្ឋមន្រ្តី និងបានបើកការដ្ឋានជាផ្លូវការ កំណាត់ទី១ កាលពីថ្ងៃទី ០៥ ខែសីហា ឆ្នាំ២០២៤ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ គម្រោងប្រវិត្តសាស្រ្តព្រែកជីកហ្វូណននេះ នឹងផ្តល់ផលប្រយោជន៍ជាច្រើនដល់ប្រទេសកម្ពុជាដូចជា៖លើកកម្ពស់សេដ្ឋកិច្ច ជំរុញពាណិជ្ជកម្ម កសិកម្ម និងទេសចរណ៍ជាដើម។អត្ថបទ៖ទូច សោភ័ណ

ផ្ទះទេវតា១ខ្នងដោយមានភ្ជាប់អណ្ដូងទឹកស្អាត និងប្រព័ន្ធភ្លើងសូឡា ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត,សម្ដេធិបតី និងលោកជំទាវបណ្ឌិត ត្រូវបានលោកជំទាវ ហ៊ុន ម៉ាណា ប្រគល់ជូនលោកយាយទុគតជននៅខេត្តកំពង់ធំ

2026/04/02 12:49:07 am        220
Facebook Telegram Linkin
នៅព្រឹកថ្ងៃពុធ ទី១ ខែមេសាឆ្នាំ២០២៦ លោកជំទាវ ហ៊ុន ម៉ាណា អគ្គនាយិកាវិទ្យុ-ទូរទស្សន៍បាយ័ន បានអញ្ជើញប្រគល់អំណោយផ្ទះទេវតាចំនួន១ខ្នងជូនលោកយាយ ឡៃ នឿន អាយុ ៦៧ឆ្នាំ រស់នៅភូមិក្របៅ ឃុំដូង ស្រុកប្រាសាទបល្ល័ង្ក ខេត្តកំពង់ធំ។ លោកយាយមិនមានប្តីនោះទេ សព្វថ្ងៃនេះគាត់រស់នៅចិញ្ចឹមចៅស្រីម្នាក់មានអាយុ៨ឆ្នាំជាកូនរបស់ក្មួយគាត់ ដោយរស់នៅក្នុងជីវភាពខ្វះខាត។ក្នុងឱកាសនោះ លោកជំទាវ ហ៊ុន ម៉ាណា បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន,សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលជានិច្ចកាលលោកទាំង៤ តែងគិតគូរពីសុខទុក្ខដល់ប្រជាពលរដ្ឋគ្រប់ទីកន្លែង និងគ្រប់ពេលវេលា។បន្ថែមលើអំណោយផ្ទះខាងលើ លោកជំទាវ ក៏បានផ្តល់នូវអណ្តូងទឹក,ប្រព័ន្ធទឹកស្អាត និងបំពាក់ភ្លើងសូឡានៅមុខផ្ទះ និងក្នុងផ្ទះជូនដល់លោកយាយទៀតផង។ លោកជំទាវក៏បាននាំយកនូវអំណោយសម្តេចតេជោ និងសម្តេចកិត្តិព្រឹទ្ធបណ្ឌិតបន្ថែមមួយចំនួនទៀតផងដែរ រួមមាន ៖ អង្ករ១០០គីឡូក្រាម, ត្រីខ១កេស, មីចំនួន៥កេស, ទឹកដោះគោខាប់ ១កេស, ពួក១, ប្រេងកូឡូ១ប្រអប់ធំ, ប្រេងខ្យល់១ប្រអប់ធំ ,ចានដែក១, ឆ្នាំងតូច១, ឆ្នាំងធំ១, ខ្ទះឆា១, វែងឆា១, វែងបាយ១, វែងសំឡ១, ស្លាបព្រា និងសម១ឡូ, កំសៀវ១, ចានបាយចំនួន៥, ចានសម្លចំនួន៥, តែ ១ គីឡូក្រាម , ខ្នើយចំនួន២, មុងចំនួន២, ភួយចំនួន២, កន្ទេលចំនួន២, ស្ករសចំនួន៥គីឡូក្រាមទឹកស៊ីអុីវចំនួន៣យួរ, វិទ្យុ FM១គ្រឿង, ថ្មដាក់វិទ្យុចំនួន២ ស្បែកជើងចំនួន២គូរ, ថ្នាំនឹងច្រាសដុសធ្មេញចំនួន៥ឈុត, សាប៊ូដុំចំនួន១២ដុំតូច, ថ្នាំពេទ្យចំនួន៥ប្រអប់តូច, ខោអាវចំនួន២កំប្លេរ និងថវិកាចំនួន ៥០ម៉ឺនរៀល ព្រមទាំងអំណោយរបស់សម្ដេចតេជោ និងសម្ដេចកត្តិព្រឹទ្ធបណ្ឌិត ជាឃីត (កញ្ចប់ៗ) មានជាសម្ភារៈប្រើប្រាស់ សំលៀកបំពាក់ និងថវិកា ចែកជូនលោកយាយ លោកតាដែលបានចូលរួមនាឱកាសនោះ។ចប់ពិធីប្រគល់ផ្ទះទេវតា លោកជំទាវក៏បានអញ្ជើញធ្វើដំណើរមកកាន់សាលាបឋមសិក្សាហ៊ុនសែន ក្របៅ ស្ថិតនៅក្នុងឃុំដូង ស្រុកប្រាសាទបល្ល័ង្ក ខេត្តកំពង់ធំនេះ ដើម្បីជួបជាមួយក្មួយៗសិស្សានុសិស្សចំនួន ៥៨៣នាក់ និងបានចែកកាតាប ដែលមានជាសម្ភារៈសិក្សាជាច្រើនមុខ ជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន,សម្ដេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅដល់ក្មួយៗសិស្សានុសិស្សនៅទីនេះ។ ជាមួយគ្នានោះ ដោយមើលឃើញពីការខ្វះខាត និងតាមរយៈការសំណូមពរពីលោកគ្រូអ្នកគ្រូ លោកជំទាវក៏បានសម្រេចសាងសង់អគារសិក្សាចំនួន២ខ្នង មាន១០បន្ទប់ និងបន្ទប់ទឹកផងដែរ ជាចំណងដៃជូនដល់លោកគ្រូអ្នកគ្រូ និងសិស្សានុសិស្សនៅទីនេះ៕

អគ្គលេខាធិការរង UN៖ កម្ពុជាស្ថិតលើដំណើរផ្លូវត្រឹមត្រូវ​ឈានចាក​ចេញ​ពី​ក្រុម​ប្រទេស​អភិវឌ្ឍន៍​តិច​តួច

2026/04/01 10:44:20 pm        212
Facebook Telegram Linkin
លោកជំទាវ Rabab Fatima អគ្គលេខាធិការរង អង្គការសហប្រជាជាតិ និង​ជា​តំណាង​ជាន់​ខ្ពស់​សម្រាប់​ប្រទេសអភិវឌ្ឍន៍តិចតួច ប្រទេសកំពុងអភិវឌ្ឍន៍ គ្មានព្រំដែនជាប់សមុទ្រ និងប្រទេស​ដី​កោះ​កំពុង​អភិវឌ្ឍន៍តូចៗ បានមើលឃើញថា ប្រទេសកម្ពុជា កំពុងស្ថិតលើដំណើរផ្លូវត្រឹមត្រូវ ដើម្បី​ឈាន​ចាកចេញពីក្រុមប្រទេសអភិវឌ្ឍន៍តិចតួចនៅឆ្នាំ២០២៩។ លោកជំទាវ Rabab Fatima អគ្គលេខាធិការរង អង្គការសហប្រជាជាតិ បានបង្ហាញ​នូវ​ការ​គត់ស​ម្គាល់​ឃើញ​បែបនេះ ក្នុងឱកាសសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះ​រាជា​ណា​ច​ក្រកម្ពុជា បានអនុញ្ញាតឱ្យចូលជួបសម្ដែងការគួរសម និងពិភាក្សាការងារ នៅវិមាន​សន្ដិភាព​​​នា​ព្រឹកថ្ងៃទី១ ខែមេសា ឆ្នាំ២០២៦នេះ។ ក្នុងឱកាសនៃ​ជំនួប លោកជំទាវ Rabab Fatima បានថ្លែងអំណរគុណ​យ៉ាង​ជ្រាល​ជ្រៅ​ចំពោះ​រាជរដ្ឋាភិបាល​ក​ម្ពុជា ដែលបានធ្វើជាម្ចាស់ផ្ទះនៃ «កិច្ចប្រជុំត្រួត​ពិនិត្យ​ពាក់​កណ្ដាល​អាណត្តិ​ថ្នាក់​តំបន់​អាស៊ី​ប៉ាស៊ីហ្វិក នៃកម្មវិធីសកម្មភាពទីក្រុងដូហា (DPoA)»។ លោកជំទាវបានកោតសរសើរចំពោះការរីកចម្រើនយ៉ាងឆាប់រហ័សរបស់កម្ពុជា និង​វាយ​តម្លៃ​ខ្ពស់​ចំពោះ​កម្ពុជា ដែលបានដាក់ចេញនូវផែនការអភិវឌ្ឍ និងការអភិរក្សបេតិកភណ្ឌ។ លោកជំទាវ អគ្គ​លេខាធិការរង បានគូសបញ្ជាក់ថា អង្គការសហប្រជាជាតិ ប្ដេជ្ញា​បន្ត​គាំទ្រ​កម្ពុ​ជា​ក្នុង​ដំណើរ​ការ​ចាក​ចេញ​ពីប្រទេសអភិវឌ្ឍតិចតួច ហើយអង្គការ​សហ​ប្រជាជាតិ​ក៏​បាន​បង្កើត​ក្រុម​ការងារ​ចំពោះ​កិច្ច​ ដើម្បីគាំទ្រដល់ដំណើរការចាកចេញនេះ។ លោកជំទាវអគ្គលេខាធិការរង ក៏បាន​គូស​បញ្ជាក់​ផង​ដែរថា កម្ពុជាបានសម្រេច​តាមលក្ខណៈ​វិនិច្ឆ័យរួច​រាល់​សម្រាប់​ការ​ចាក​ចេញ​ពី​ក្រុម​ប្រទេស​អភិវឌ្ឍន៍តិចតួច (LDC) តាមរយៈការវាយតម្លៃចំនួនពីរលើក កន្លងមក។ ជាមួយគ្នានេះ លោកជំទាវបានគូសបញ្ជាក់ថា កម្ពុជាស្ថិតក្នុងដំណើរផ្លូវ ដើម្បី​ឈាន​ចាក​ចេញ​ពី​ក្រុម​ប្រទេស​អភិវឌ្ឍន៍​តិចតួច នៅឆ្នាំ២០២៩។ ជាការឆ្លើយតប សម្ដេចធិបតីថ្លែងអំណរគុណចំពោះវត្តមានរបស់លោកជំទាវ និងគណៈប្រតិភូ ដែលបានអញ្ជើញចូលរួមកិច្ចប្រជុំត្រួតពិនិត្យពាក់កណ្ដាលអាណត្តិសម្រាប់ថ្នាក់តំបន់ អាស៊ីប៉ាស៊ីហ្វិក នៃកម្មវិធីសកម្មភាពទីក្រុងដូហា DPoA ដែលកម្ពុជាធ្វើជាម្ចាស់ផ្ទះនាឱកាសនេះ និងបានថ្លែងអំណរគុណដល់អង្គការសហប្រជាជាតិ ដែលបានរួមចំណែកដល់ការកសាង ស្ដារ និងអភិវឌ្ឍសង្គម-សេដ្ឋកិច្ចកម្ពុជា។ សម្ដេចធិបតី ក៏បានស្វាគមន៍ចំពោះការបង្កើតក្រុមការងារចំពោះកិច្ចរបស់អង្គការសហប្រជាជាតិ ដើម្បីគាំទ្រដំណើរការចាកចេញពីក្រុមប្រទេស LDC របស់កម្ពុជា។ សម្ដេចធិបតី បានសង្កត់ធ្ងន់ថា រាជរដ្ឋាភិបាលបានដាក់ចេញនូវវិធានការជាក់ស្ដែង ដើម្បីកសាងភាពធន់របស់កម្ពុជា តាមរយៈការដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដែលផ្ដោតលើ ការអភិវឌ្ឍមូលធនមនុស្ស ការដាក់ចេញការកែទម្រង់វិស័យអប់រំ សុខាភិបាល និងការបណ្ដុះបណ្ដាលវិជ្ជាជីវៈ ការពង្រឹងប្រព័ន្ធហិរញ្ញវត្ថុស្របតាមការវិវត្តនៃបច្ចេកវិទ្យារបស់ពិភពលោក និងការជំរុញភាពជាដៃគូជាមួយវិស័យឯកជន ជាដើម។ សម្ដេចធិបតីបានបន្ថែមទៀតថា កម្ពុជានឹងបន្តកិច្ចសហប្រតិបត្តិការយ៉ាងជិតស្និទ្ធជាមួយអង្គការសហប្រជាជាតិ ក្នុងក្របខ័ណ្ឌសន្តិភាព និងក្របខ័ណ្ឌដទៃទៀត៕

បណ្ដាញសង្គម

ព័ត៌មានថ្មីៗ

កម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យរបស់អង្គភាពអ្នកនាំពាក្យ​រាជរដ្ឋាភិបាល រកឃើញអ្នកទទួលបានជ័យលាភីហើយ
07/25/2026 05:07 PM
Facebook Telegram Linkin
ចិនតវ៉ាប្រឆាំងនឹងទណ្ឌកម្មរបស់សហភាពអឺរ៉ុប លើក្រុមហ៊ុនចិន ពាក់ព័ន្ធនឹង​បញ្ហា​រុស្ស៊ី
07/25/2026 05:07 PM
Facebook Telegram Linkin
មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ
07/25/2026 05:07 PM
Facebook Telegram Linkin
ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោក​ជិត​ដល់
07/25/2026 03:07 PM
Facebook Telegram Linkin
លោក Trump៖ នាយករដ្ឋមន្ត្រីអ៊ីស្រាអែល នឹងធ្វើ​ទស្សនកិច្ចនៅ​អាមេរិក នា​សប្តាហ៍ក្រោយ
07/25/2026 03:07 PM
Facebook Telegram Linkin
អគ្គលេខាធិការ UN លោក Guterres ទៅ​ដល់រដ្ឋធានីស៊ីរី ជា​ទស្សនកិច្ចលើកដំបូង គិត​តាំងពីឆ្នាំ២០០៩
07/25/2026 03:07 PM
Facebook Telegram Linkin
លោក Trump បញ្ជាក់​ថា អ៊ីរ៉ង់ «កាន់តែមាន​ភាព​ប្រាកដ​ប្រជា​» ក្នុងដំណើរ​ការចរចា
07/25/2026 03:07 PM
Facebook Telegram Linkin
ក្រុមហ៊ូទីអះអាងពី​ការវាយប្រហារលើអារ៉ាប៊ីសាអូឌីត ខណៈជម្លោះមជ្ឈិមបូព៌ាកាន់តែជ្រៅទៅៗ
07/25/2026 03:07 PM
Facebook Telegram Linkin
ចារកម្មអាមេរិក៖ មេដឹកនាំថ្មីរបស់អ៊ីរ៉ង់ បើក​ចំហជាង ក្នុងការ​ប្រឹង​ប្រែង​ទទួល​​បាន​​អាវុធនុយក្លេអ៊ែរ
07/25/2026 03:07 PM
Facebook Telegram Linkin
ក្រសួងបរិស្ថាន កំពុងរៀបចំ​ហេដ្ឋា​រចនា​សម្ព័ន្ធ​នៅ​សហគមន៍​តំបន់​ការពារ​ធម្មជាតិ​កោដូន្តី ដើម្បី​ទាក់ទាញទេសចរ
07/25/2026 03:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.