BTV NEWS

សម្តេចធិបតី៖កម្ពុជាគាំទ្រពេញទំហឹង និងបន្តប្តេជ្ញាចិត្តធ្វើការយ៉ាងជិតស្និទ្ធជាមួយរដ្ឋសមាជិកអាស៊ាន ប្រទេសបូកបី និងដៃគូសន្ទនាដើម្បីបំប្លែងឯកសារទៅជាសកម្មភាពជាក់ស្តែង

សម្តេចធិបតី ហ៊ុន ម៉ាណែត៖នៅទូទាំងពិភពលោកនិន្នាការផ្លាស់ប្តូរចំនួនបីកំពុងរៀបចំរដ្ឋបាលសាធារណៈឡើងវិញទោះបីជាក្នុងកម្រិត និងល្បឿនខុសៗគ្នាក៏ដោយ

កិច្ចប្រជុំ ACCSM និង ACCSM+3 ជំរុញនវានុវត្តន៍ការផ្ដល់សេវាសាធារណៈកាន់តែប្រសើរនៅក្នុងតំបន់

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញប្រគល់ផ្ទះថ្មីចំនួន ៣ខ្នង ជូនក្រុមគ្រួសាររបស់វីរកងទ័ពពលី

ព័ត៌មានសំខាន់ៗ

រុស្ស៊ី៖ ខ្លួនបានវាយប្រហារចំគោលដៅនៅអ៊ុយក្រែន ខណៈបេឡារុសនិយាយថា ទាហានរុស្ស៊ីនៅតែមកដល់ប្រទេសនេះ

រុស្ស៊ី៖ ក្រសួងការពារជាតិរុស្ស៊ីនិយាយនៅក្នុងសេចក្តីថ្លែងការណ៍ថា រុស្ស៊ីបានបន្តវាយប្រហារទៅលើតំបន់នានារបស់អ៊ុយក្រែនកាលពីថ្ងៃអាទិត្យ។ អ្នកនាំពាក្យក្រសួងការពារជាតិលោក Igor Konashenkov និយាយថា ក្នុងអំឡុងពេល ២៤ម៉ោងកន្លងទៅនេះ កងកម្លាំងប្រដាប់អាវុធរុស្ស៊ីបានបន្តវាយប្រហារដោយអាវុធបាញ់តាមអាកាស រយៈចម្ងាយឆ្ងាយស៊ីបគោលដៅទៅលើទីបញ្ជាការយោធា និងទីតាំងត្រួតពិនិត្យ ព្រមទាំងប្រព័ន្ធថាមពលរបស់អ៊ុយក្រែន។ លោក Konashenkov និយាយថា គោលដៅនៃការវាយប្រហារទទួលបានជោគជ័យ ខណៈគោលដៅដែលបានកំណត់ទាំងអស់ត្រូវបានវាយប្រហារ។ កងទ័ពអ៊ុយក្រែនបានព្យាយាមរុលចូលវាយសម្រុកលើកងទ័ពរុស្ស៊ីនៅក្នុងតំបន់ Kherson ប៉ុន្តែមិនទទួលបានជោគជ័យនោះទេ។ លោក Konashenkov និយាយថា ការប៉ុនប៉ងវាយប្រហារមួយទៀតរបស់កងទ័ពអ៊ុយក្រែនត្រូវបានរារាំងនៅក្នុងតំបន់ Kharkiv។ កាលពីថ្ងៃអាទិត្យ ក្រសួងការពារជាតិបេឡារុសបានបញ្ចេញវីដេអូជាអ្វីដែលខ្លួនបាននិយាយថា ទាហានរុស្ស៊ីបានបន្តមកដល់ប្រទេសបេឡារុស។យោងតាមអង្គភាពសារព័ត៌មានរបស់ក្រសួងបានឲ្យដឹងថា ការសម្រេចបង្កើតក្រុមកងទ័ពប្រចាំតំបន់ត្រូវបានធ្វើឡើង ហើយកំពុងត្រូវបានអនុវត្តតែនៅក្នុងផលប្រយោជន៍នៃការពង្រឹងការការពារ និងការពារព្រំដែនរដ្ឋនៅលើទឹកដីប្រទេសបេឡារុស្ស។ ក្រសួងនិយាយតាមបណ្តាញ Telegam ថា ការសម្រេចចិត្តបង្កើតកងទ័ពប្រចាំតំបន់ គឺបណ្ដាលមកពីសកម្មភាពនៅបន្តនៅតាមតំបន់ព្រំដែនរបស់ប្រទេស៕អត្ថបទ៖ ប៊ុនថន

ជនអន្តោប្រវេសន៍វេណេស៊ុយអេឡាដើរកាត់ព្រៃដ៏គ្រោះថ្នាក់ក្នុងបំណងទៅដល់សហរដ្ឋអាមេរិក

កូឡុំប៊ី៖ ក្រុមជនអន្តោប្រវេសន៍មួយក្រុមធំបានបន្តដំណើរឆ្លងកាត់ព្រៃ Darien របស់ប្រទេសកូឡុំប៊ីក្នុងគោលបំណងទៅដល់សហរដ្ឋអាមេរិក ទោះបីជាទីក្រុងវ៉ាស៊ីនតោនពង្រីងវិធានការរឹតត្បិតសិទ្ធិជ្រកកោន ដល់ប្រជាជនវេណេស៊ុយអេឡាក៏ដោយ។ រដ្ឋបាលរបស់លោក Biden បានប្រកាសកាលពីពេលថ្មីៗនេះថា នឹងផ្តល់ការអនុញ្ញាតផ្នែកមនុស្សធម៌ចំនួន ២៤,០០០នាក់ មួយភាគនៃចំនួនជនអន្តោប្រវេសន៍ជាង ១០៧,០០០នាក់ដែលបានចូលមកប្រទេសប៉ាណាម៉ាក្នុងឆ្នាំ២០២២នេះ។ សេចក្តីប្រកាសបាននិយាយថា ប្រជាជនវេណេស៊ុយអេឡាដែលបានមកដល់តាមផ្លូវគោក នៅព្រំដែនប្រទេសម៉ិកស៊ិក-អាមេរិកនឹងត្រូវឲ្យត្រឡប់ទៅវិញ ប៉ុន្តែការប្រកាសនេះមិនបានរារាំងជនអន្តោប្រវេសន៍ច្រើននាក់ដែលសង្ឃឹមថា នឹងទៅដល់ទឹកដីសហរដ្ឋអាមេរិកនោះទេ។ លោក Andres Rodriguez ជាជនអន្តោប្រវេសន៍វេណេស៊ុយអេឡាដែលកំពុងធ្វើដំណើរជាមួយប្រពន្ធ និងកូនប្រុសរបស់លោកនិយាយថា ការធ្វើដំណើរនេះគឺដើម្បីអនាគតរបស់កូនៗ និងគ្រួសាររបស់លោក។ជនអន្តោប្រវេសន៍ប្រមាណ ៨០% ដែលកំពុងធ្វើដំណើរគឺជាប្រជាជនវេណេហ្ស៊ុយអេឡា ២០% ទៀតមកពីប្រទេសអេក្វាឌ័រ ហើយនៅសល់គឺមកពីប្រទេសផ្សេងទៀតរួមទាំងប្រទេសកាមេរូន។ បន្ទាប់ពីឆ្លងកាត់ព្រៃ Darien Gap ជនអន្តោប្រវេសន៍កំពុងធ្វើដំណើរតាមដីគោកនៅអាមេរិកកណ្តាល កាត់តាមប្រទេសម៉ិកស៊ិកឆ្ពោះទៅកាន់សហរដ្ឋអាមេរិក។ យោងតាមរបាយការណ៍ដែលបានចេញផ្សាយ ដោយអង្គការទេសន្តប្រវេសន៍អន្តរជាតិនិងអង្គការ UNHCR បានឲ្យដឹងថា ប្រជាជនវេណេហ្ស៊ុយអេឡាជាង ៧,១លាននាក់បានចាកចេញពីប្រទេសរបស់ពួកគេដោយសារតែវិបត្តិសង្គម និងសេដ្ឋកិច្ច៕អត្ថបទ៖ ប៊ុនថន

បាតុករនៅទីក្រុងប៉ារីសតវ៉ាប្រឆាំងតម្លៃទំនិញឡើងខ្ពស់ដែលធ្វើឲ្យប៉ះពាល់ដល់ជីវភាពរស់នៅ

បារាំង៖ ក្រុមបាតុកររាប់ពាន់នាក់បានប្រមូលផ្តុំគ្នានៅតាមដងផ្លូវ ក្នុងទីក្រុងប៉ារីស ប្រទេសបារាំងកាលពីថ្ងៃអាទិត្យ ក្នុងការបង្ហាញកំហឹងប្រឆាំងការកើនឡើងតម្លៃទំនិញ ដែលបានធ្វើឲ្យប៉ះពាល់ដល់ជីវភាពរស់នៅរបស់ពួកគេ និងបានដាក់សម្ពាធលើរដ្ឋាភិបាលរបស់ប្រធានាធិបតីលោក Emmanuel Macron។ ការចេញដើរធ្វើបាតុកម្មគឺដើម្បីទាមទារដំឡើងប្រាក់ឈ្នួល និងការទាមទារផ្សេងទៀតត្រូវបានរៀបចំឡើងដោយគូប្រជែងឆ្វេងនិយមរបស់លោក Macron។ ក្នុងសុន្ទរកថាទៅកាន់ក្រុមបាតុករនៅទីក្រុងប៉ារីស មេដឹកនាំឆ្វេងនិយមលោក Jean-Luc Mélenchon បានចោទប្រកាន់ថា ការដឹកនាំរបស់លោក Macron កំពុងធ្វើឲ្យប្រទេសបារាំងធ្លាក់ចូលក្នុងភាពវឹកវរ។ អ្នករៀបចំបាតុកម្មបានអះអាងថា បាតុករជាង ១៤ម៉ឺននាក់បានចេញដើរក្នុងក្បួនបាតុកម្មនេះ។នគរបាលទីក្រុងប៉ារីសបាននិយាយថា ពួកគេមិនទាន់បានប៉ាន់ប្រមាណភ្លាមៗ សម្រាប់ទំហំនៃហ្វូងមនុស្សគ្រវីទង់ជាតិដែលនៅពេញទីលាន និងនៅតាមដងផ្លូវនោះទេ។ មានការផ្ទុះបំផ្លាញមួយចំនួន ដោយធុងសំរាមត្រូវភ្លើងឆេះ ហើយម៉ាស៊ីនដកប្រាក់ធនាគារត្រូវបានគេវាយកម្ទេច ប៉ុន្តែនគរបាលបង្ក្រាបកុប្បកម្មបានរក្សាសណ្តាប់ធ្នាប់៕អត្ថបទ៖ ប៊ុនថន

លោក Biden នឹងចាត់វិធានការតាមវិធីសាស្ត្រវាយតម្លៃឡើងវិញលើទំនាក់ទំនងជាមួយអារ៉ាប៊ីសាអ៊ូឌីត

សហរដ្ឋអាមេរិក៖ លោក Jake Sullivan ទីប្រឹក្សាសន្តិសុខជាតិរបស់សេតវិមានបាននិយាយកាលពីថ្ងៃអាទិត្យថា ប្រធានាធិបតីអាមេរិកលោក Joe Biden នឹងចាត់វិធានការតាមវិធីសាស្ត្រជាក់ស្ដែងក្នុងការសម្រេចចិត្ត ពីរបៀបត្រូវឆ្លើយតបទៅនឹងប្រទេសអារ៉ាប៊ីសាអ៊ូឌីតជុំវិញការកាត់បន្ថយទិន្នផលប្រេង ប៉ុន្តែជម្រើសរួមទាំងការផ្លាស់ប្តូរជំនួយសន្តិសុខរបស់សហរដ្ឋអាមេរិកផងដែរ។ថ្លែងប្រាប់ទូរទស្សន៍ CNN លោក Sullivan បាននិយាយថា ពុំទាន់មានការផ្លាស់ប្ដូរជាក់ស្ដែងភ្លាមៗចំពោះទំនាក់ទំនងរវាងអាមេរិក និងអារ៉ាប៊ីសាអ៊ូឌីតទេ ខណៈលោក Biden បានវាយតម្លៃជាថ្មីលើបញ្ហានេះ។ លោក Sullivan បាននិយាយថា ដូច្នេះប្រធានាធិបតីនឹងមិនចាត់វិធានការយ៉ាងតក់ក្រហល់នោះទេ។ លោកនឹងចាត់វិធានការតាមវិធីសាស្ត្រ យុទ្ធសាស្ត្រ ហើយលោកនឹងរកពេលវេលាពិភាក្សាជាមួយបណ្ដាសមាជិកសភាទ្វេនៃបក្ស ហើយក៏នឹងរកឱកាសជជែកគ្នាដោយផ្ទាល់ និងធ្វើការតាមរយៈជម្រើសនានា។មួយថ្ងៃបន្ទាប់ពីក្រុមប្រទេសផលិតប្រេង OPEC+ កាលពីសប្ដាហ៍មុនបានប្រកាសពីការកាត់បន្ថយទិន្នផល ជុំវិញការជំទាស់របស់សហរដ្ឋអាមេរិក លោក Biden បានប្ដេជ្ញាថា នឹងជំរុញឲ្យមានផលវិបាកនានាសម្រាប់អារ៉ាប៊ីសាអ៊ូឌីត ដែលឈរនៅខាងរុស្ស៊ីគាំទ្រដល់ការកាត់បន្ថយទិន្នផលផលិតប្រេងនេះ។ វិធានការរបស់ OPEC+ រំខានដល់ផែនការរបស់លោកខាងលិចក្នុងការកំណត់តម្លៃនាំចេញប្រេងរបស់រុស្ស៊ី ឆ្លើយតបទៅនឹងសង្គ្រាមរបស់ទីក្រុង Moscow នៅអ៊ុយក្រែន៕អត្ថបទ៖ សុខមាន

អ៊ីរ៉ង់ចោទប្រកាន់សហរដ្ឋអាមេរិកថា ជាសាតាំងដ៏ធំនៃការញុះញង់ឲ្យមានភាពចលាចល និងអំពើភេរវកម្ម

អ៊ីរ៉ង់៖ ប្រធានាធិបតីអ៊ីរ៉ង់លោក Ebrahim Raisi បានចោទប្រកាន់ប្រធានាធិបតីសហរដ្ឋអាមេរិកលោក Joe Biden ពីបទញុះញង់ឲ្យមានភាពចលាចល បន្ទាប់ពីលោកបានបង្ហាញការគាំទ្រការតវ៉ាប្រឆាំងនឹងការស្លាប់របស់ស្ត្រីវ័យក្មេង Mahsa Amini ជាស្ត្រីម្នាក់ដែលបានស្លាប់ក្នុងពេលរដ្ឋាភិបាលអ៊ីរ៉ង់ ឃាត់ខ្លួនសាកសួរជិតមួយខែមកនេះ។ ការតវ៉ាបានចាប់ផ្ដើមកាលពីពាក់កណ្ដាលខែកញ្ញា បន្ទាប់ពីនាង Amini វ័យ ២២ឆ្នាំបានស្លាប់ក្រោយការឃាត់ខ្លួន ៣ថ្ងៃរបស់នគរបាលផ្នែកសីលធម៌អ៊ីរ៉ង់ ពីបទបំពានច្បាប់ស្លៀកពាក់ដ៏តឹងរ៉ឹងសម្រាប់ស្ត្រី។ លោក Raisi បាននិយាយថា ការធ្វើអត្ថាធិប្បាយរបស់ប្រធានាធិបតីអាមេរិក ដែលកំពុងញុះញង់ឲ្យមានភាពចលាចល ភេរវកម្ម និងការបំផ្លិចបំផ្លាញប្រទេសដទៃ គឺចង់រំឭកដល់ពាក្យសម្ដីគ្មានព្រំដែនរបស់ស្ថាបនិកសាធារណរដ្ឋអ៊ីស្លាម ដែលហៅបានអាមេរិកថាជាសាតាំងដ៏ធំ (Great Satan) ដោយចង់សំដៅដល់សម្ដីដែលលើកឡើងដោយអតីតមេដឹកនាំកំពូលអ៊ីរ៉ង់លោក Ayatollah Ruhollah Khomenei។យោងតាមសេចក្ដីថ្លែងការណ៍មួយចេញពីការិយាល័យប្រធានាធិបតីលោក Raisi បាននិយាយថា ផែនការរបស់សត្រូវត្រូវតែទប់ទល់ដោយវិធានការមានប្រសិទ្ធភាព ក្នុងដោះស្រាយបញ្ហារបស់ប្រជាជន។ ក្រុមអ្នកឃ្លាំមើលសិទ្ធិមនុស្សបាននិយាយកាលពីថ្ងៃសុក្រសប្ដាហ៍មុនថា កងកម្លាំងសន្តិសុខអ៊ីរ៉ង់បានសម្លាប់មនុស្ស ២២៤នាក់រួមទាំងអនីតិជន ២៩នាក់ក្នុងការតវ៉ាប្រឆាំងរដ្ឋាភិបាល ដែលបានផ្ទុះឡើងកាលពីខែមុន ក្រោយការស្លាប់របស់នាង Mahsa Amini៕អត្ថបទ៖ សុខមាន

ថៅកែទូក និងអ្នកបើកបរទូក-ដ ត្រូវតំណាងអយ្យការឱ្យនៅក្រៅឃុំបណ្ដោះអាសន្ន

កណ្ដាល៖ ឧបទ្ទវហេតុលិចទូកចម្លងនៅកោះចំរើន ដែលបណ្ដាលឲ្យកុមារ១១នាក់ស្លាប់ ថៅកែទូក និងអ្នកបើកបរទូក-ដ ត្រូវបានតំណាងអយ្យការសម្រេចឲ្យនៅក្រៅឃុំបណ្ដោះអាសន្ន។គិតមកដល់ថ្ងៃចន្ទទី១៧ ខែតុលា ឆ្នាំ២០២២ សំណុំរឿងនៃឧបទ្ទវហេតុលិចទូកចម្លងនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល បានឈានដល់ដំណាក់កាលស្ថាប័នតុលាការហើយ បន្ទាប់ពីនគរបាលខេត្តកណ្ដាលបានឃាត់ខ្លួនថៅកែទូក និងអ្នកបើកទូក សរុបមនុស្សចំនួន៣នាក់ យកទៅសាកសួរ។ប៉ុន្តែសំណុំរឿងនេះ ត្រូវបានតំណាងអយ្យការដាក់ឲ្យស្ថិតនៅក្រៅឃុំបណ្ដោះអាសន្នចំពោះថៅកែទូក និងអ្នកបើកទូក-ដ។ឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាលបានប្រាប់ BTV នៅថ្ងៃទី១៧ តុលាថា ការបន្តនីតិវិធីនៅក្នុងសំណុំរឿងនេះ គឺឯកឧត្តមព្រះរាជអាជ្ញានៃអយ្យកាអមសាលាដំបូងខេត្តកណ្ដាល បានសម្រេចដាក់ឲ្យស្ថិតនៅក្រៅឃុំបណ្ដោះអាសន្ន ចំពោះថៅកែទូក-ដទាំងពីរនាក់ និងអ្នកបើកបរម្នាក់។ឧត្តមសេនីយ៍ទោ ឈឿន សុចិត្ត បានបន្ថែមថា ក្នុងករណីនេះ ក្រុមគ្រួសាររងគ្រោះនៃឧបទ្ទវហេតុលិចទូកចម្លងទាំងអស់ មិនបានដាក់ពាក្យបណ្ដឹងនោះទេ។ឧបទ្ទវហេតុលិចទូកចម្លងនៅកោះចំរើន បានកើតឡើងកាលពីវេលាម៉ោង១៩យប់ថ្ងៃទី១៣ ខែតុលា ឆ្នាំ២០២២ ខណៈដែលទូកបានបើកដឹកចម្លងសិស្សចេញពីភូមិអំពិលទឹក ទៅភូមិកោះចំរើន ក្នុងឃុំកំពង់ភ្នំ ហើយទូកហៀបនឹងដល់ច្រាំងទៅហើយ សល់ប្រមាណចម្ងាយ៥០ម៉ែត្រទៀតប៉ុណ្ណោះ ទូកក៏លិច បណ្ដាលឲ្យកុមារ១១នាក់បានស្លាប់ និង៤នាក់បានរួចផុតពីគ្រោះថ្នាក់ដល់អាយុជីវិត ក្នុងនោះមានម្នាក់ជាអ្នកបើកទូកចម្លងផងដែរ។ ទោះយ៉ាងណា ការសម្រេចពីតំណាងអយ្យការនេះ គឺមិនទាន់បិទបញ្ចប់សំណុំរឿងទាំងស្រុងនោះទេ ព្រោះជាការសម្រេចឲ្យនៅក្រៅឃុំបណ្ដោះអាសន្នប៉ុណ្ណោះ ការបន្តនីតិវិធីបែបណាទៀតនោះ គឺស្ថាប័នតុលាការនឹងសម្រេចនាពេលក្រោយ៕

សម្តេចតេជោ ហ៊ុន សែន ហៅទណ្ឌិតរត់ចោលស្រុកជា«អាក្បត់ជាតិ ៣ជំនាន់»

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានប្រកាសជាថ្មីដល់បក្សនយោបាយនានាក្នុងស្រុក ដែលភ្ជាប់ខ្លួនជាមួយជនមានទោស ឈ្មោះ សម រង្ស៊ី នឹងត្រូវមានវិធានការតាមច្បាប់ដោយគ្មានការលើកលែង។ សម្តេចតេជោ ហ៊ុន សែន បញ្ជាក់ថា «ត្រកូលអាក្បត់ជាតិ៣ជំនាន់ នឹងមិនត្រូវលើកលែង អត់ឱនឡើយ»។ថ្លែងក្នុងពិធីសំណេះសំណាល និងប្រគល់សញ្ញាបត្រដល់សាកលវិទ្យាល័ជាតិគ្រប់គ្រងនៅព្រឹកថ្ងៃទី១៧ ខែតុលា ឆ្នាំ២០២២នេះ សម្តេចតេជោ ហ៊ុន សែន ព្រមានដល់ក្រុមប្រឆាំងក្រៅស្រុកដឹកនាំដោយបុគ្គលទណ្ឌិតរត់ចោលស្រុកឈ្មោះ សម រង្ស៊ី បើចិត្តសឿងសូមតតាំងគ្នានៅអឺរ៉ុប ក្នុងពេលសម្តេចធ្វើដំណើរទៅព្រុចសែល ប្រទេសប៊ែលហ្សិក នាពេលឆាប់ៗខាងមុខនេះ។សម្តេចតេជោ ហ៊ុន សែន ប្រកាសថា សម្តេចមិនដែលហាមឃាត់មិនឱ្យមានយន្តហោះដឹកទណ្ឌិត សម រង្ស៊ី មកកម្ពុជានោះទេ តែបើមកដល់កម្ពុជាពេលណា ទណ្ឌិតរូបនោះនឹងត្រូវចាប់បញ្ជូនចូលគុកតែម្តង ព្រោះសាលក្រមតុលាការស្ថាបពរនៅមានជាធរមាននៅឡើយទេ។ សម្តេចតេជោ ហ៊ុន សែន ប្រកាសថា សម្តេចមិនចង់និយាយដល់បុគ្គលទណ្ឌិតរូបនោះឡើយ តែអ្វីដែលសម្តេចលើកឡើងនាពេលនេះ ដើម្បីពន្យល់ទៅកាន់ប្រជាពលរដ្ឋកម្ពុជា អំពីពុតត្បុតដ៏មហាអាក្រក់របស់បុគ្គលនោះចំពោះជាតិ និងប្រជាជនកម្ពុជាតែប៉ុណ្ណោះ៕

លោក Xi Jinping និយាយថា ការគ្រប់គ្រងលើដែនដីហុងកុងសម្រេចបានហើយ និងប្តេជ្ញាបន្តលើកោះតៃវ៉ាន់

ចិន៖ លោកប្រធានាធិបតីចិន Xi Jinping បាននិយាយនៅក្នុងសុន្ទរកថាកាលពីថ្ងៃអាទិត្យ នៅឯពិធីបើកសមាជបក្សកុំម្មុយនីសចិន ៥ឆ្នាំម្ដងនៅក្នុងទីក្រុងប៉េកាំងថា ប្រទេសចិនសម្រេចបានការគ្រប់គ្រងយ៉ាងទូលំទូលាយលើទីក្រុងហុងកុង ដោយនាំទីក្រុងនេះចេញពីភាពចលាចលទៅកាន់អភិបាលកិច្ចល្អ។ លោក Xi បាននិយាយថា ប្រទេសចិនក៏តស៊ូដ៏ខ្លាំងក្លាប្រឆាំងនឹងការបំបែកខ្លួនរបស់តៃវ៉ាន់ផងដែរ និងបានប្ដេជ្ញា និងអាចប្រឆាំងទៅនឹងបូរណភាពទឹកដី។ លោក Xi Jinping កាលពីថ្ងៃអាទិត្យបានចាប់ផ្ដើមសមាជលើកទី២០ នៃបក្សកុំម្មុយនីសចិនដែលកំពុងកាន់អំណាច ជាព្រឹត្តិការណ៍ពេញ ១សប្ដាហ៍ដែលត្រូវបានគេមើលឃើញជាទូទៅថា នឹងទទួលការគ្រប់គ្រងអាណត្តិទី៣ ជាការពង្រឹងអំណាចរបស់ខ្លួនក្នុងនាមជាមេដឹកនាំដ៏មានឥទ្ធិពលបំផុតរបស់ប្រទេសនេះ ចាប់តាំងពីលោក Mao Zedong មក។ការជួបជុំនៃគណៈប្រតិភូប្រហែល ២,៣០០នាក់មកពីទូទាំងប្រទេស បានចាប់ផ្ដើមនៅក្នុងមហាសាលប្រជាជននៅប៉ែកខាងលិចនៃទីលានចតុរង្គ Tiananmen ស្របពេលមានការរឹតបន្តឹងសន្តិសុខដ៏តឹងរ៉ឹង និងក្រោមផ្ទៃមេឃពណ៌ខៀវ បន្ទាប់ពីចុះផ្សែងអ័ព្ទរយៈពេលប៉ុន្មានថ្ងៃនៅក្នុងរដ្ឋធានីរបស់ចិនមួយនេះ៕អត្ថបទ៖ សុខមាន

ប្រសាសន៍សំខាន់ៗរបស់សម្ដេចតេជោ ហ៊ុន សែន នាយករដ្ឋមន្ត្រី ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យជាតិគ្រប់គ្រង

ភ្នំពេញ៖ នៅព្រឹកថ្ងៃទី១៧ ខែតុលា ឆ្នាំ២០២២នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រកម្ពុជាបានអញ្ជើញប្រគល់សញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រងប្រមាណជាង ៦ពាន់នាក់ នៅព្រឹកថ្ងៃទី១៧ ខែតុលា ឆ្នាំ២០២២នេះ។ក្នុងចំណោម និស្សិតជ័យលាភីថ្ងៃនេះ និស្សិតជ័យលាភីថ្នាក់បរិញ្ញាបត្រចំនួន ៩៦ ភាគរយ, ថ្នាក់បរិញ្ញាបត្រជាន់ខ្ពស់ ៩៩.៥ ភាគរយ, និងថ្នាក់បណ្ឌិត ១០០ ភាគរយ កំពុងមានការងារធ្វើរៀងៗខ្លួន ដោយឡែកថ្នាក់បរិញ្ញាបត្រចំនួន ៩៦ ភាគរយ មានចំនួន១០.៥ ភាគរយ បាននិងកំពុងធ្វើអាជីវកម្មដោយខ្លួនឯង។ខាងក្រោមនេះជាប្រសាសន៍សំខាន់ៗរបស់សម្ដេចតេជោ ហ៊ុន សែន៖⁃ សម្តេចតេចតេជោ ហ៊ុន សែន នាយករដ្ឋមន្ត្រី បានសម្តែងសមានទុក្ខ និងស្មឹងស្មាត គោរពវិញ្ញាណក្ខន្ធកុមារា កុមារី ដែលទទួលមរណភាពដោយលិចទូក-ដចម្លង កាលពីថ្ងៃទី១៣ ខែតុលា ឆ្នាំ២០២២ នៅឃុំកំពង់ភ្នំ ស្រុកលើកដែក ខេត្តកណ្តាល។- សម្តេចតេជោ ហ៊ុន សែន បានបញ្ជាក់ថា នៅអាស៊ាន មានសោកនាថកម្មធំៗចំនួន៣រួចមកហើយ នៅឆ្នាំ២០២២នេះ ក្នុងនោះមានការរត់ជាន់គ្នានៅឥណ្ឌូនេស៊ី, ករណីបាញ់ប្រហារនៅប្រទេសថៃ និងករណីលិចទូកដចម្លង នៅប្រទេសកម្ពុជា ដែលទាមទារអោយយើងប្រុងប្រយ័ត្នខ្ពស់លើសុខសុវត្ថិភាពរបស់ប្រជាពលរដ្ឋ។- សម្តេចតេជោ ហ៊ុន សែន នៅតែបន្តអំពាវនាវដល់ប្រជាពលរដ្ឋប្រុងប្រយ័ត្នខ្ពស់ ចំពោះសុវត្ថិភាពខ្លួនឯង ហើយអាជ្ញាធរក៏ប្រឹងប្រែងដើម្បីប្រជាពលរដ្ឋ ជាពិសេសប្រជាពលរដ្ឋរស់នៅតាមដងទន្លេ ស្ទឹង ដែលត្រូវឆ្លងទឹកដើម្បីប្រកបរបរចិញ្ចឹមជីវិតប្រចាំថ្ងៃ។- សម្តេតេជោ ហ៊ុន សែន មានប្រសាសន៍ពីប្រវត្តិ នៃចាប់ផ្តើមវិស័យអប់រំនៅកម្ពុជាឡើងវិញ បន្ទាប់ពីញាំញីដោយសង្គ្រាម និងរបបប្រល័យពូជសាសន៍ខ្មែរក្រហម ដែលកាលនោះ ការស្វែងរកបណ្ឌិត ឬអ្នកចេះមកធ្វើការ មិនមែនជារឿងងាយស្រួលនោះទេ ដោយក្រសួងនីមួយៗប្រឹងប្រែងស្រូបទាញអ្នកចេះដឹងមកធ្វើការ។ - សម្តេចតេជោ ហ៊ុន សែន បានអំពាវនាវដល់ស្ត្រីដែលមានប្តី និងមានកូនហើយ សូមបន្តការសិក្សារបស់ខ្លួន ដើម្បីអោយមានតុល្យភាពរវាងបុរស និងស្ត្រី នាលើការបណ្តុះបណ្តាលកម្រិតឧត្តម អនុបណ្ឌិត និងបណ្ឌិត។- សម្តេចតេជោ ហ៊ុន សែន ប្រកាសថា កម្ពុជាបានចាប់ផ្តើមវិស័យអប់រំ សិក្សាធិការឡើងវិញពីការរស់រានមានជីវិត ដោយអ្នកចេះច្រើនបង្រៀនអ្នកចេះតិច ហើយអ្នកចេះតិចបង្រៀនអ្នកមិនចេះ។- សម្តេចតេជោ ហ៊ុន សែន បានហៅទណ្ឌិតរត់ចោលស្រុកម្នាក់ឈ្មោះ សម រង្ស៊ី គឺអាចោរក្បត់ជាតិ៣ជំនាន់ ដោយជីតាក្បត់ព្រះមហាក្សត្រ, ឪពុកក៏ក្បត់ព្រះមហាក្សត្រ ហើយខ្លួនឯងក៏ក្បត់ព្រះមហាក្សត្រថែមទៀត។- សម្តេចតេជោ ហ៊ុន សែន បានប្រកាសដល់បុគ្គលជាសង្ឃ ដែលសម្តេចហៅថា «អាខ្មៅ» សូមយកលុយ១០ម៉ឺនដុល្លារសហរដ្ឋអាមេរិក ដែលជាលុយខ្មោចរបស់លោកបណ្ឌិតកែមឡីទៅសងគេវិញ ហើយសម្តេចក៏ប្រកាសដល់ប្រជាពលរដ្ឋឱ្យដឹងពីពុតត្បត់ ខូចខិល បោកលុយកាក់ របស់ខូចតាំងខ្លួនជាសង្ឃនោះ។- សម្តេចតេជោ ហ៊ុន សែន បានប្រកាសដល់ក្រុមប្រឆាំងក្រៅស្រុកដឹកនាំដោយបុគ្គលទណ្ឌិតរត់ចោលស្រុកឈ្មោះ សម រង្ស៊ី បើចិត្តសឿងសូមតតាំងគ្នានៅអឺរ៉ុប ក្នុងពេលសម្តេចធ្វើដំណើរទៅព្រុចសែល ប្រទេសប៊ែលហ្សិក នាពេលឆាប់ៗខាងមុខនេះ។- សម្តេចតេជោ ហ៊ុន សែន បានប្រកាសអំពាវនាវដល់ប្រជាពលរដ្ឋគ្រប់អាយុបោះឆ្នោត សូមនាំគ្នាទៅចូលរួមចុះឈ្មោះបោះឆ្នោតនាពេលប៉ុន្មានថ្ងៃខាងមុខនេះ ដែលជាចំណុចចាប់ផ្តើម នៃសិទ្ធិបោះឆ្នោតតាមបែបប្រជាធិបតេយ្យ សេរី ពហុបក្ស ។- សម្តេចតេជោ ហ៊ុន សែន ប្រកាសដល់លោក សុខ លូ អភិបាលខេត្តបាត់ដំបង សូមកាត់ដីក្នុងដែនរដ្ឋបាលរបស់ខ្លួនជាប់នឹងខេត្តប៉ៃលិន(តំបន់សមាហរណកម្ម-អតីតសមរភូមិ)ទៅឱ្យរដ្ឋបាលខេត្តប៉ៃលិនគ្រប់គ្រងវិញដើម្បីមានភាពងាយស្រួល យើងមិនអាចធ្វើឱ្យប្រជាពលរដ្ឋរស់នៅក្នុងភាពមិនច្បាស់លាស់បាននោះទេ។ សម្តេចព្រមានថា «បើចៅហ្វាយខេត្តបាត់ដំបងធ្វើមិនកើត សម្តេចនឹងចុះទៅខ្លួនឯងតែម្តង»។- សម្តេចតេជោ ហ៊ុន សែន ប្រកាសថា សម្តេចមិនដែលហាមឃាត់មិនឱ្យមានយន្តហោះដឹកទណ្ឌិត សម រង្ស៊ី មកកម្ពុជានោះទេ តែបើមកដល់កម្ពុជាពេលណា ទណ្ឌិតរូបនោះនឹងត្រូវចាប់បញ្ជូនចូលគុកតែម្តង ព្រោះសាលក្រមតុលាការស្ថាបពរនៅមានជាធរមាននៅឡើយទេ។- សម្តេចតេជោ ហ៊ុន សែន ប្រកាសថា សម្តេចមិនចង់និយាយដល់បុគ្គលទណ្ឌិតរូបនោះឡើយ តែអ្វីដែលសម្តេចលើកឡើងនាពេលនេះ ដើម្បីពន្យល់ទៅកាន់ប្រជាពលរដ្ឋកម្ពុជា អំពីពុតត្បុតដ៏មហាអាក្រក់របស់បុគ្គលនោះចំពោះជាតិ និងប្រជាជនកម្ពុជាតែប៉ុណ្ណោះ។- សម្តេចតេជោ ហ៊ុន សែន នៅតែប្រកាសអំពាវនាវដល់ប្រជាពលរដ្ឋ សូមរក្សាការពារខ្លួន ពីការឆ្លងរីករាលដាលជាថ្មីជំងឺកូវីដ-១៩ ដោយរស់នៅតាមគន្លងប្រក្រតីភាពថ្មី ព្រមទាំងនាំគ្នាទៅទទួលយកការចាក់វ៉ាក់សាំងកូវីដ-១៩ទាំងដូលមូលដ្ឋាន និងដូសជំរុញនានា តាមការកំណត់របស់ក្រុមគ្រូពេទ្យឱ្យបានគ្រប់ៗគ្នា។- សម្តេចតេជោ ហ៊ុន សែន ប្រកាសផ្តាំផ្ញើដល់អ្នកនិយមការរិះគន់ទាំងឡាយ សូមមានសុទិដ្ឋិនិយមចំពោះការរីកចម្រើនរបស់កម្ពុជា ដោយមានការប្រៀបធៀបកម្ពុជាពីអតីតកាល និងបច្ចុប្បន្នកាល។- សម្តេចតេជោ ហ៊ុន សែន បានប្រកាសថា កម្ពុជាជាប្រទេសប្រើប្រាស់ប្រេងឥន្ធនៈក្នុងកម្រិតលេខ១០៧ ក្នុងចំណោមជាង ២០០លើពិភពលោក ក្នុងនោះសហរដ្ឋអាមេរិកប្រើប្រាស់ច្រើនជាងគេ ក្នុងរង្វង់ជា១៩លានប៉ារ៉ែលក្នុងមួយថ្ងៃ បន្ទាប់មកមានចិន ,ឥណ្ឌា..។ល។- សម្តេចតេជោ ហ៊ុន សែន ប្រកាលពីភាពអត់ចិត្ត អត់ថ្លើម នៃបក្សនយោបាយនានា ដែលមិនបានសម្តែងសមានទុក្ខ ឬសរសេរសាររំលែកមរណទុក្ខដល់ក្រុមគ្រួសារសព ដែលមានកូនៗស្លាប់ ដោយការលិចទូកនៅឃុំកំពង់ភ្នំ ស្រុកលើកដែល ខេត្តកណ្តាល។ សម្តេចបញ្ជាក់ថា «ឪពុកម្តាយក្មេងៗទាំងនោះ ក៏អាចមានអ្នកខ្លះបោះឆ្នោត ឱ្យបក្សនយោបាយទាំងនោះផងដែរ»។- សម្តេចតេជោ ហ៊ុន សែន បានប្រកាសពីវាយតម្លៃផលប៉ះពាលវិស័យកសិកម្ម ជាពិសេសដំណាំស្រូវដោយទឹកជំនន់ភ្លាមៗ ដោយគ្មានរារែក និងអន្តរាគមន៍បន្ទាន់ផ្តល់ពូជស្រូវដល់ប្រជាកសិករ ដើម្បីបន្តបង្កបង្កើនផលឱ្យទាន់ពេលវេលា។ សម្តេចបញ្ជាក់ថា «វាយតម្លៃបានប៉ុន្មាន ផ្តល់ពូជស្រូវដល់ប្រជាកសិករប៉ុណ្ណឹង កុំចាំសរុបរបាយការណ៍ទាំងមូល»។- សម្តេចតេជោ ហ៊ុន សែន បានប្រកាសដល់មន្ត្រីកសិកម្មទាំងអស់ ទាំងថ្នាក់ជាតិ និងមូលដ្ឋាន «សូមកុំនាំគ្នាជិះសេះ មើលផ្កា» ដោយត្រូវតាមដាន និងចុះជាប់ ជាមួយប្រជាកសិករ ពីការអន្តរាគមន៍ និងការផ្តល់ពូជស្រូវ និងពូជដំណាំផ្សេងៗដល់ពួកគាត់។- សម្តេចតេជោ ហ៊ុន សែន ប្រកាសថា កម្ពុជាមានប្រជាពលរដ្ឋក្នុងរង្វង់១៨ភាគរយរស់នៅក្នុងស្ថានភាពក្រីក្រ ដែលយើងត្រូវអន្តរាគមន៍បន្ទាន់ជួយដល់ពួកគាត់ ជាពិសេសប្រជាពលរដ្ឋក្នុងចំណោមនោះ ដែលរងផលប៉ះពាល់ដោយគ្រោះទឹកជំនន់ តាមរយៈការអន្តរាគមន៍របស់អាជ្ញាធរមូលដ្ឋាន និងថ្នាក់ជាតិ ព្រមទាំងក្រុមការងាររាជរដ្ឋាភិបាលចុះមូលដ្ឋាននីមួយៗ។- សម្តេចតេជោ ហ៊ុន សែន បានប្រកាសអំពាវដល់ធនាគារ និងគ្រឹះស្ថានមីក្រូហិរញ្ញវត្ថុទាំងអស់ សូមមានការអនុគ្រោះដល់ប្រជាពលរដ្ឋកម្ចីប្រាក់ ដែលរងផលប៉ះពាល់ដោយគ្រោះទឹកជំនន់ តាមរយៈការពន្យារបង់ប្រាក់សង, បន្ធូរបន្ថយអត្រាការប្រាក់ និងរៀបចំឥណទាន់កម្ចីដល់ពួកគាតឡើងវិញ ដើម្បីស្តារលទ្ធកម្ម។- សម្តេចតេជោ ហ៊ុន សែន បានប្រកាសថា ទោះជាកម្ពុជារងផលប៉ះពាល់ដោយទឹកជំនន់ទឹកភ្លៀងក៏ពិតមែន តែកម្រិតនៃផលប៉ះពាល់របស់កម្ពុជា នៅតិចជាងប្រទេសថៃ ដោយកម្ពុជា មិនរងជំនន់ក្នុងរាជធានីភ្នំពេញដូចនៅបាងកកឡើយ ហើយជំនន់បណ្តាលមកពីស្ទឹងព្រែកត្នោតក៏គ្មានអ្វីត្រូវព្រួយបារម្ភដែរ ទោះទឹកភ្លៀងនៅបន្តធ្លាក់ខ្លះៗក្តី។- សម្តេច ហ៊ុន សែន បានប្រកាសដល់មន្ត្រី ត្រូវវេចបាយ, វេចអង្ករ ចុះជាប់ជាមួយប្រជាពលរដ្ឋនៅមូលដ្ឋាន ដែលរងផលប៉ះពាល់ដោយទឹកជំនន់ និងអន្តរាគមន៍បន្ទាន់ជួយពួកគាត់ «ដោយមិនត្រូវទុកឱ្យប្រជាពលរដ្ឋណាម្នាក់ រងភាពអត់ឃ្លាន ដោយយើងមិនបានដឹង និងមិនបានដោះស្រាយនោះទេ»។- សម្តេចតេជោ ហ៊ុន សែន បានប្រកាសពីសិទ្ធិស្របតាមច្បាប់ ក្នុងការបញ្ចប់មុខតំណែងមន្ត្រីក្នុងតួនាទី និងដែនសមត្ថកិច្ច ដោយមិនរង់ចាំក្រុមអ្នកវិភាគ ឬក្រុមឧទ្ទាមទាំងឡាយទាំងពួងយល់ព្រម ឯកភាពនោះទេ។- សម្តេចតេជោ ហ៊ុន សែន ប្រកាសដល់មន្ត្រីរាជរដ្ឋាភិបាល ឬគណបក្សប្រជាជនកម្ពុជា ឱ្យចាំទុកក្នុងចិត្ត បើគូបក្ខដិបក្ខយើងជេរមានន័យថា «យើងកំពុងធ្វើរឿងត្រឹមត្រូវ» បើគេសរសើរមានន័យថា «យើងកំពុងដើរលើផ្លូវខុស»។ សម្តេចតេជោ ហ៊ុន សែន បញ្ជាក់ថា «អរ គឺជិតដល់ថ្ងៃងាប់»។- សម្តេចតេជោ ហ៊ុន សែន បានប្រកាសពីអំពើពុតត្បត់របស់ក្រុមប្រឆាំង ដឹកនាំដោយទណ្ឌិតរត់ចោលស្រុក សម រង្ស៊ី ដែលនៅលើលោកនេះ គ្មានប្រទេសណាដូចឡើយ។ សម្តេចបញ្ជាក់ថា «វាមិនដែលចាញ់ឆ្នោត តែចង់ធ្វើប្រធានរដ្ឋសភា»។- សម្តេចតេជោ ហ៊ុន សែន បានប្រកាសជាថ្មីដល់បក្សនយោបាយនានាក្នុងស្រុក ដែលភ្ជាប់ខ្លួនជាមួយជនមានទោស ឈ្មោះ សម រង្ស៊ី នឹងត្រូវមានវិធានការតាមច្បាប់ដោយគ្មានការលើកលែង។ សម្តេចតេជោ ហ៊ុន សែន បញ្ជាក់ថា «ត្រកូលអាក្បត់ជាតិ៣ជំនាន់ នឹងមិនត្រូវលើកលែង អត់ឱនឡើយ»។- សម្តេតេជោ ហ៊ុន សែន បានប្រកាសថា ទោះមានកាំភ្លើងទំនើប , មានរថក្រោះប៉ុន្មានគ្រឿងក៏ដោយ បើគ្មានការគាំទ្រពីប្រជាពលរដ្ឋទេ នឹងដួលរលំឆាប់ជាមិនខាន ដូចជាសម័យប៉ុលពតខ្មែរក្រហមដូច្នោះដែរ។- សម្តេចតេជោ ហ៊ុន សែន បានប្រកាសទប់ នឹងការប៉ោងចំណាយរបស់រដ្ឋ លើសហួសហេតុ ក្នុងនោះមានការរឹងបន្តឹងការចូលមន្ត្រីរាជការថ្មី ដើម្បីកុំឱ្យមានវាសនាដូចប្រទេសស្ត្រីលង្ការ ដែលកំពុងជួបវិបត្តិធ្ងន់ធ្ងរ។សង្កថាសម្ដេចតេជោ ហ៊ុន សែន ចប់នៅវេលាម៉ោង០៩ និង២៩នាទី។

សម្តេចតេជោ ហ៊ុន សែន នឹងអញ្ជើញទៅចុះឈ្មោះឡើងវិញ និងអំពាវនាវពលរដ្ឋគ្រប់អាយុឱ្យទៅចុះឈ្មោះបោះឆ្នោត

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីមានប្រសាសន៍ថា នៅថ្ងៃទី២០ ខែតុលាសម្តេច នឹងអញ្ជើញទៅចុះឈ្មោះបោះឆ្នោតឡើងវិញ ខណៈសម្តេចបានកែថ្ងៃ ខែ ឆ្នាំ កំណើត របស់សម្តេចកាលពីពេលថ្មីៗនេះ ហើយសម្តេចក៏បានអំពាវនាវឱ្យប្រជាពលេដ្ឋ ដែលមិនទាន់បានចុះឈ្មោះបោះឆ្នោត និងយុវជនដែលគ្រប់អាយុបោះឆ្នោត សូមទៅចុះឈ្មោះបោះឆ្នោតឱ្យបានគ្រប់ៗគ្នា។ថ្លែងក្នុងឱកាសប្រគល់សញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រងជាង៦ពាន់នាក់ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ នាព្រឹកថ្ងៃទី១៧ ខែតុលានេះ សម្តេចតេជោ ហ៊ុន សែន បានប្រកាសអំពាវនាវដល់ប្រជាពលរដ្ឋគ្រប់អាយុបោះឆ្នោត សូមនាំគ្នាទៅចូលរួមចុះឈ្មោះបោះឆ្នោតនាពេលប៉ុន្មានថ្ងៃខាងមុខនេះ ដែលជាចំណុចចាប់ផ្តើម នៃសិទ្ធិបោះឆ្នោតតាមបែបប្រជាធិបតេយ្យ សេរី ពហុបក្ស ។សូមបញ្ជាក់ថា អនុលោមតាមច្បាប់ស្ដីពីការបោះឆ្នោតជ្រើសតាំងតំណាងរាស្រ្ត និងសេចក្ដីសម្រេចលេខ ៤៦ សសរ ចុះថ្ងៃទី២៩ ខែមិថុនា ឆ្នាំ២០២២ របស់រាជរដ្ឋាភិបាលកម្ពុជា ស្ដីពីការប្រកាសកាលបរិច្ឆេទនៃការបោះឆ្នោតជ្រើសតាំងតំណាងរាស្រ្ត សម្រាប់នីតិកាលទី៧ នៃរដ្ឋសភា គណៈកម្មាធិការជាតិរៀបចំការបោះឆ្នោត (គ.ជ.ប) បានជម្រាបជូនក្រសួង-ស្ថាប័នពាក់ព័ន្ធ គណបក្សនយោបាយ សមាគម អង្គការមិនមែនរដ្ឋាភិបាលជាតិ-អន្តរជាតិ ប្រព័ន្ធផ្សព្វផ្សាយព័ត៌មានជាតិ-អន្តរជាតិ និងប្រជាពលរដ្ឋខ្មែរទាំងអស់ឱ្យបានជ្រាបថា កាលបរិច្ឆេទនៃការបោះឆ្នោតជ្រើសតាំងតំណាងរាស្រ្ត នីតិកាលទី៧ ត្រូវបានកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣។ ប្រជាពលរដ្ឋខ្មែរដែលមានឈ្មោះក្នុងបញ្ជីបោះឆ្នោតផ្លូវការ ឆ្នាំ២០២២ គឺជាអ្នកបោះឆ្នោតសម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។សូមជម្រាបជូនផងដែរថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២ នឹងប្រព្រឹត្តទៅចាប់ពីថ្ងៃទី២០ ខែតុលា រហូតដល់ថ្ងៃទី៨ ខែធ្នូ ឆ្នាំ២០២២ ខាងមុខនេះ៕

បណ្ដាញសង្គម

ព័ត៌មានថ្មីៗ

មនុស្ស៦នាក់ស្លាប់ និងម្នាក់រងរបួសធ្ងន់ក្នុងប្រតិបត្តិការបង្ក្រាបគ្រឿងញៀននៅវាលវែង

ពលរដ្ឋកូរ៉េខាងត្បូងស្វែងរកកន្លែងត្រជាក់នៅក្នុងរូងភ្នំក្រោមដី ខណៈរលកកកម្តៅវាយប្រហារប្រទេសមួយនេះ

បំណែកដំណាក់កាលទី ២នៃយានចម្លងរបស់ក្រុមហ៊ុន SpaceXនឹងធ្លាក់លើឋានព្រះចន្ទនៅថ្ងៃពុធនេះ

ពលរដ្ឋរស់នៅរដ្ឋ Assam ប្រទេសឥណ្ឌា បាត់បង់អ្វីៗគ្រប់បែបយ៉ាងដោយសារទឹកជំនន់

ការវាយប្រហារមីស៊ីលបាលីស្ទិករុស្ស៊ី បង្កជាអគ្គិភ័យជាច្រើនកន្លែងនៅទីក្រុងគីវ របស់អ៊ុយក្រែន

ជនអន្តោប្រវេសនាំគ្នាសម្រាកនៅលើឆ្នេរសមុទ្រស្ថិតក្នុងដែនដី Ceuta របស់អេស្ប៉ាញ ក្រោយការជាន់គ្នាស្លាប់មនុស្ស

សារព័ត៌មានរដ្ឋអ៊ីរ៉ង់បង្ហាញស្ពានរងការខូចខាត ក្រោយការវាយប្រហាររបស់សហរដ្ឋអាមេរិក

ពលរដ្ឋហ្គាតេម៉ាឡាជម្លៀសខ្លួនទៅកាន់ទីជម្រក ពេលភ្នំភ្លើងព្រួសកម្អែកាន់តែខ្លាំង

អគ្គិភ័យក្នុងរោងចក្រគីមី បង្ខំឲ្យជម្លៀសអ្នកស្រុក ១៥០នាក់នៅតំបន់ជាយក្រុង Sao Paulo ប្រទេសប្រេស៊ីល

លោក Macron បញ្ជាក់ថា EU នឹងបង្កើនសម្ពាធលើរុស្ស៊ី និងពង្រឹងការគាំទ្រផ្នែកយោធាដល់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

រុស្ស៊ី៖ ខ្លួនបានវាយប្រហារចំគោលដៅនៅអ៊ុយក្រែន ខណៈបេឡារុសនិយាយថា ទាហានរុស្ស៊ីនៅតែមកដល់ប្រទេសនេះ

ជនអន្តោប្រវេសន៍វេណេស៊ុយអេឡាដើរកាត់ព្រៃដ៏គ្រោះថ្នាក់ក្នុងបំណងទៅដល់សហរដ្ឋអាមេរិក

បាតុករនៅទីក្រុងប៉ារីសតវ៉ាប្រឆាំងតម្លៃទំនិញឡើងខ្ពស់ដែលធ្វើឲ្យប៉ះពាល់ដល់ជីវភាពរស់នៅ

លោក Biden នឹងចាត់វិធានការតាមវិធីសាស្ត្រវាយតម្លៃឡើងវិញលើទំនាក់ទំនងជាមួយអារ៉ាប៊ីសាអ៊ូឌីត

អ៊ីរ៉ង់ចោទប្រកាន់សហរដ្ឋអាមេរិកថា ជាសាតាំងដ៏ធំនៃការញុះញង់ឲ្យមានភាពចលាចល និងអំពើភេរវកម្ម

ថៅកែទូក និងអ្នកបើកបរទូក-ដ ត្រូវតំណាងអយ្យការឱ្យនៅក្រៅឃុំបណ្ដោះអាសន្ន

សម្តេចតេជោ ហ៊ុន សែន ហៅទណ្ឌិតរត់ចោលស្រុកជា«អាក្បត់ជាតិ ៣ជំនាន់»

លោក Xi Jinping និយាយថា ការគ្រប់គ្រងលើដែនដីហុងកុងសម្រេចបានហើយ និងប្តេជ្ញាបន្តលើកោះតៃវ៉ាន់

សម្តេចតេជោ ហ៊ុន សែន នឹងអញ្ជើញទៅចុះឈ្មោះឡើងវិញ និងអំពាវនាវពលរដ្ឋគ្រប់អាយុឱ្យទៅចុះឈ្មោះបោះឆ្នោត

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

ជនអន្តោប្រវេសន៍​វេ​ណេ​ស៊ុយ​អេ​ឡា​ដើរកាត់​ព្រៃ​ដ៏​គ្រោះថ្នាក់​ក្នុង​បំណង​ទៅដល់​សហរដ្ឋអាមេរិក

បាតុករ​នៅ​ទីក្រុង​ប៉ារីស​តវ៉ា​ប្រឆាំង​តម្លៃ​ទំនិញ​ឡើង​ខ្ពស់​ដែល​ធ្វើ​ឲ្យ​ប៉ះពាល់​ដល់​ជីវភាព​រស់នៅ​

លោក Biden នឹង​ចាត់វិធានការ​តាម​វិធីសាស្ត្រ​វាយតម្លៃ​ឡើងវិញ​លើ​ទំនាក់ទំនង​ជាមួយ​អារ៉ាប៊ីសាអ៊ូឌីត​

ថៅកែទូក និងអ្នកបើកបរទូក-ដ ត្រូវតំណាងអយ្យការឱ្យនៅក្រៅឃុំបណ្ដោះអាសន្ន

សម្តេចតេជោ ហ៊ុន សែន ហៅទណ្ឌិតរត់ចោលស្រុកជា«អាក្បត់ជាតិ ៣ជំនាន់»

លោក Xi Jinping និយាយថា ​ការគ្រប់គ្រង​លើ​ដែនដី​ហុងកុង​សម្រេចបាន​ហើយ និង​ប្តេជ្ញា​បន្ត​លើ​កោះ​តៃវ៉ាន់​

សម្តេចតេជោ ហ៊ុន សែន នឹងអញ្ជើញទៅចុះឈ្មោះឡើងវិញ និងអំពាវនាវពលរដ្ឋគ្រប់អាយុឱ្យទៅចុះឈ្មោះបោះឆ្នោត

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ជនអន្តោប្រវេសន៍វេណេស៊ុយអេឡាដើរកាត់ព្រៃដ៏គ្រោះថ្នាក់ក្នុងបំណងទៅដល់សហរដ្ឋអាមេរិក

បាតុករនៅទីក្រុងប៉ារីសតវ៉ាប្រឆាំងតម្លៃទំនិញឡើងខ្ពស់ដែលធ្វើឲ្យប៉ះពាល់ដល់ជីវភាពរស់នៅ

លោក Biden នឹងចាត់វិធានការតាមវិធីសាស្ត្រវាយតម្លៃឡើងវិញលើទំនាក់ទំនងជាមួយអារ៉ាប៊ីសាអ៊ូឌីត

លោក Xi Jinping និយាយថា ការគ្រប់គ្រងលើដែនដីហុងកុងសម្រេចបានហើយ និងប្តេជ្ញាបន្តលើកោះតៃវ៉ាន់