BTV NEWS

សម្ដេចតេជោ ហ៊ុន សែន ចែករំលែកអត្ថបទអ្នកស្រាវជ្រាវថៃ ក្រោមចំណងជើងថា «មនុស្សធម៌ខ្វះការអាណិតអាសូរ»

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញប្រគេនទៀនព្រះវស្សា និងនាំយកទេយ្យវត្ថុ ប្រគេនវត្តចំនួន១២វត្ត និងចែកអំណោយដល់យាយជីតាជី នៅស្រុកក្រគរ និងស្រុកភ្នំក្រវាញ ខេត្តពោធិ៍សាត់

គណៈប្រតិភូធុរកិច្ចមកពីហុងកុង ក្វាងទុង និងម៉ាកាវ បង្ហាញចំណាប់អារម្មណ៍ក្នុងការស្វែងរកឱកាសវិនិយោគលើវិស័យសក្តានុពលនៅកម្ពុជា

សម្តេចតេជោ ហ៊ុន សែន ចែករំលែកអត្ថបទវិភាគរបស់អ្នកជំនាញផ្នែកទំនាក់ទំនងអន្តរជាតិ និងសន្តិសុខរបស់ប្រទេសថៃ ដែលមានចំណងជើងថា «ស្វាដោះសំណាញ់!»

ព័ត៌មានសំខាន់ៗ

អង្គការសុខភាពពិភពលោកនិយាយថា វីរុស Omicron មាននៅក្នុងប្រទេសភាគច្រើន

WHO៖ ប្រធានអង្គការសុខភាពពិភពលោក កាលពីថ្ងៃអង្គារបានជំរុញឱ្យប្រជាជនមិនត្រូវបោះបង់ក្តីបារម្ភ អំពីវីរុសបម្លែងខ្លួនថ្មី Omicron ដែលអាចចម្លងខ្ពស់ ខណៈវាបង្ហាញរោគសញ្ញាស្រាលនោះទេ ហើយបានរំលឹកឡើងវិញនូវការសូមអង្វររបស់លោក សម្រាប់ការបែងចែកវ៉ាក់សាំងជាសកលដោយយុត្តិធម៌។ លោកវេជ្ជបណ្ឌិត Tedros Ghebreyesus បាននិយាយក្នុងអំឡុងពេលថ្លែងសុន្ទរកថាតាមទូរទស្សន៍ពីទីក្រុងហ្សឺណែវប្រទេសស្វីសថា វីរុសបម្លែងខ្លួនថ្មី Omicron ទំនងជាមាននៅក្នុងប្រទេសភាគច្រើន ទោះបីជាវាមិនទាន់ត្រូវបានរកឃើញក៏ដោយ។លោក Tedros បាននិយាយថា ទោះបីជាវីរុសបម្លែងខ្លួនថ្មីនេះមិនបានបង្កឱ្យមានជំងឺធ្ងន់ធ្ងរក៏ដោយ ករណីមួយចំនួនអាចគ្របដណ្ដប់លើប្រព័ន្ធសុខាភិបាលដែលមិនបានត្រៀមទុកជាមុន។ ប្រធានទីភ្នាក់ងារអង្គការសហប្រជាជាតិបានអំពាវនាវ ដល់កម្មវិធីចាក់វ៉ាក់សាំងដូសជំរុញដែលកំពុងត្រូវបានដាក់ឱ្យប្រើប្រាស់ សម្រាប់ប្រជាជនពេញវ័យនៅក្នុងប្រទេសមួយចំនួន ដោយលោកបាននិយាយថា អង្គការសុខភាពពិភពលោកមានការព្រួយបារម្ភថា កម្មវិធីបែបនេះនឹងមានការរក្សាទុកវ៉ាក់សាំងដែលយើងបានឃើញនៅឆ្នាំនេះ និងធ្វើឱ្យមានវិសមភាពកាន់តែធ្ងន់ធ្ងរឡើង។ លោកបានស្នើថា ការផ្តល់វ៉ាក់សាំងដូសជំរុញដល់ក្រុមដែលមានហានិភ័យទាបពីជំងឺធ្ងន់ធ្ងរ ឬការស្លាប់គឺបង្កគ្រោះថ្នាក់ដល់អាយុជីវិតអ្នកដែលមានហានិភ័យខ្ពស់ ដែលកំពុងរង់ចាំវ៉ាក់សាំងដំបូង ឬលើកទីពីរ។លោកបានបញ្ជាក់ច្បាស់ថា អង្គការសុខភាពពិភលោក (WHO) មិនប្រឆាំងទៅនឹងការចាក់វ៉ាក់សាំងដូសជំរុញនោះទេ យើងប្រឆាំងទៅនឹងវិសមភាព ហើយកង្វល់ចម្បងរបស់យើងគឺការសង្គ្រោះជីវិតនៅគ្រប់ទីកន្លែង។ យោងតាមអង្គការសុខភាពពិភពលោកបានឲ្យដឹងថា វីរុសបម្លែងខ្លួនថ្មី Omicron រហូតមកដល់ពេលនេះត្រូវបានរកឃើញ ៧៧ប្រទេសនៅលើពិភពលោក៕អត្ថបទ៖ ប៊ុនថន

ក្រុមហ៊ុន Pfizer និយាយថា ឱសថគ្រាប់ COVID-19 មានប្រសិទ្ធភាពប្រឆាំងវីរុស Omicron

អាមេរិក៖ ក្រុមហ៊ុន Pfizer បាននិយាយកាលពីថ្ងៃអង្គារថា ឱសថគ្រាប់ដែលបានពិសោធន៍របស់ក្រុមហ៊ុនក្នុងការព្យាបាលវីរុស COVID-19 ហាក់ដូចជាមានប្រសិទ្ធភាពប្រឆាំងទៅនឹងវីរុសបម្លែងខ្លួនថ្មី Omicron។ ក្រុមហ៊ុននិយាយថា លទ្ធផលពេញលេញនៃការសិក្សាលើមនុស្ស ២,២៥០នាក់របស់ខ្លួន បានបញ្ជាក់ពីលទ្ធផលដំបូងដ៏ជោគជ័យនៃឱសថគ្រាប់ប្រឆាំងនឹងវីរុស។ឱសថនេះកាត់បន្ថយការចូលសម្រាកនៅមន្ទីរពេទ្យ រួមទាំងការស្លាប់ប្រមាណ 89% ក្នុងចំណោមមនុស្សពេញវ័យដែលមានហានិភ័យខ្ពស់ នៅពេលដែលបានលេបភ្លាមៗបន្ទាប់ពីមានរោគសញ្ញាដំបូងនៃវីរុស COVID-19។ ក្រុមហ៊ុនប្រកាសការធ្វើតេស្តនៅមន្ទីរពិសោធន៍ដាច់ដោយឡែកបង្ហាញថា ឱសថរក្សាបាននូវប្រសិទ្ធភាពប្រឆាំងវីរុសបម្លែងខ្លួនថ្មី Omicron ដូចដែលអ្នកជំនាញជាច្រើនបានព្យាករណ៍។ បច្ចុប្បន្នភាពត្រូវបានធ្វើឡើងនៅពេលដែលករណីឆ្លងវីរុស COVID-19 ករណីស្លាប់ និងការសម្រាកព្យាបាលនៅមន្ទីរពេទ្យកំពុងកើនឡើងម្តងទៀត ហើយសហរដ្ឋអាមេរិកមានអ្នកស្លាប់ដោយសារជំងឺឆ្លងនេះជាង 800,000នាក់។ ការកើនឡើងថ្មីត្រូវបានជំរុញដោយវីរុសបម្លែងខ្លួនថ្មី Delta ដែលកំពុងឡើងខ្ពស់ដោយសារតែអាកាសធាតុកាន់តែត្រជាក់ និងការជួបជុំគ្នានៅបរិវេណខាងក្នុងដែលបិទជិតកាន់តែច្រើន ទោះបីមន្ត្រីសុខាភិបាលកំពុងទប់ស្កាត់ផលប៉ះពាល់ដោយវីរុសបម្លែងខ្លួនថ្មី Omicron ប្រែប្រួលខ្លាំងកំពុងតែលេចចេញមកក៏ដោយ។រដ្ឋបាលចំណីអាហារ និងឱសថត្រូវបានគេរំពឹងថានឹងមានវិធានការក្នុងពេលឆាប់ៗនេះ ជុំវិញការផ្តល់ការអនុញ្ញាតឱ្យឱសថគ្រាប់របស់ក្រុម Pfizer និងឱសថគ្រាប់ដែលប្រជែងពីក្រុមហ៊ុន Merck ខណៈបានដាក់ជូននិយតករសម្រេច។ ប្រសិនបើត្រូវបានអនុញ្ញាត ឱសថគ្រាប់នឹងក្លាយជាឱសថព្យាបាលជំងឺ COVID-19 ដំបូងបង្អស់ដែលជនជាតិអាមេរិកអាចរកបាននៅតាមឱសថស្ថាន និងលេបនៅផ្ទះ។ ទិន្នន័យរបស់ក្រុមហ៊ុន Pfizer អាចជួយធានាដល់និយតករអំពីអត្ថប្រយោជន៍ឱសថរបស់ក្រុមហ៊ុន បន្ទាប់ពីក្រុមហ៊ុន Merck បានបង្ហាញអត្ថប្រយោជន៍តិចជាងការរំពឹងទុក សម្រាប់ឱសថរបស់ខ្លួនក្នុងការធ្វើតេស្តចុងក្រោយ។ កាលពីចុងខែមុន ក្រុមហ៊ុន Merck បាននិយាយថា ឱសថគ្រាប់របស់ក្រុមហ៊ុនកាត់បន្ថយការចូលព្យាបាលនៅមន្ទីរពេទ្យ និងស្លាប់បានចំនួន 30% ចំពោះមនុស្សពេញវ័យដែលមានហានិភ័យខ្ពស់៕អត្ថបទ៖ ប៊ុនថន

ប្រសាសន៍សំខាន់ៗសម្ដេចតេជោ ហ៊ុន សែន ក្នុងឱកាសអញ្ជើញសម្ពោធជាផ្លូវការ សណ្ឋាគារ ហៃយ៉ាត់ រីជិនស៊ី ភ្នំពេញ

ភ្នំពេញ៖ នៅព្រឹកថ្ងៃទី១៥ ខែធ្នូ ឆ្នាំ២០២១នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធជាផ្លូវការសណ្ឋាគារ ហៃយ៉ាត់ រីជិនស៊ី ភ្នំពេញ (HYATT Regency Phnom Penh) ដែលជាការវិនិយោគរបស់ក្រុមហ៊ុន ជីប ម៉ុង ក្នុងថវិកាវិនិយោគសរុប ១៨០លានដុល្លារអាមេរិក។ដើម្បីទទួលបានព័ត៌មានថ្មី លឿន សូមចុច Join Channel Telegram BTV Newsខាងក្រោមនេះជាប្រសាសន៍សំខាន់ៗរបស់សម្ដេចតេជោ ហ៊ុន សែន នាយករដ្ឋមន្ត្រី ថ្ងៃទី១៥ធ្នូ ២០២១៖- ការបើកសម្ពោធឲ្យប្រើប្រាស់ជាផ្លូវការនូវ សណ្ឋាគារហៃយ៉ាត់ រីជិនស៊ី ភ្នំពេញ គឺជាសមិទ្ធផលមួយទៀតសម្រាប់សង្គមខ្មែរទាំងមូល ខណៈសណ្ឋាគារនេះ នឹងផ្តល់ផលប្រយោជន៍ជាច្រើនដល់ប្រជាជនកម្ពុជា។- សម្តេចតេជោ មានមោទនភាពចំពោះក្រុមហ៊ុន ជីប ម៉ុង និងក្រុមហ៊ុនដទៃទៀត ដែលបានចូលរួមចំណែកក្នុងការវិនិយោគ ដើម្បីការរីកចំរើននិងអភិវឌ្ឍនៅកម្ពុជា។- សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា សន្តិភាពគឺជាកត្តាធំបំផុត ដែលមិនអាចឲ្យអ្នកណាបំផ្លិចបំផ្លាញ នូវសន្តិភាពដែលកម្ពុជារកបានដោយលំបាកនោះឡើយ ហើយសន្តិភាពនេះបានធ្វើឲ្យប្រទេសកម្ពុជាទាំងមូលមានការអភិវឌ្ឍគ្រប់បែបយ៉ាងរហូតដល់សព្វថ្ងៃនេះ ជាក់ស្តែងរាជធានីភ្នំពេញនេះតែម្តង។- សម្តេចតេជោ ហ៊ុន សែន បញ្ជាក់ថា វត្តមានអ៊ុនតាក់នៅកម្ពុជា មិនទាន់អាចពន្លត់ភ្លើងសង្គ្រាមនៅកម្ពុជាបាននោះទេ។ ក្រោយអ៊ុនតាក់ដកចេញ កម្ពុជាត្រូវដោះស្រាយបញ្ហាជាច្រើន ក្នុងនោះក៏រាប់បញ្ចូលរឿងសង្គ្រាមមិនទាន់ចប់ផងដែរ។ សង្គ្រាមនៅកម្ពុជា បានបញ្ចប់នៅឆ្នាំ១៩៩៨ ដែលជាស្មារតីរួមរវាងខ្មែរនិងខ្មែរ។- សម្តេចតេជោបានបញ្ជាក់យ៉ាងច្បាស់ថា សន្តិភាពគឺត្រូវតែពង្រឹង មិនត្រូវឲ្យប្រទេសប្រតិកិរិយាណា មកបំផ្លាញបាននោះឡើយ ហើយអ្នកណាថាអ្វីក៏ថាទៅចុះ ការធ្វើនេះគឺដើម្បីភាពសុខសាន្តរបស់ប្រជាពលខ្មែរតែមួយគត់។- សម្តេចតេជោ បានថ្លែងបញ្ជាក់ថា ដើម្បីរក្សាបាននូវសិទ្ធិរស់រានមានជីវិត គឺត្រូវធ្វើយ៉ាងណាកុំអោយមានសង្រ្គាមកើតឡើង ព្រោះសិទ្ធិនេះគឺជាសេចក្តីត្រូវការរបស់មនុស្សជាតិនៅលើពិភពលោក។- សម្តេចតេជោបញ្ជាក់ថា ភាពសាំក្នុងសហគមន៍កម្ពុជា អត្រាគ្របដណ្តប់ក្បែរ៨៩ភាគរយ ខណៈកម្ពុជាបានចាក់ស្រោចវ៉ាក់សាំងលើពលរដ្ឋតាមយុទ្ធសាស្ត្រផ្ការីក។- សម្តេចតេជោ ពេញចិត្តលើភាពក្លាហានរបស់កុមារនិងយុវវ័យលើការចាក់វ៉ាក់សាំងបានច្រើននិងមានរបៀបរៀបរយ ដែលគួរអោយសរសើរ។- សម្តេចតេជោ បញ្ជាក់ជាថ្មីថា វ៉ាក់សាំងតែមួយមុខមិនទាន់គ្រប់គ្រាន់នោះទេ វិធានការ៣កុំ ៣ការពារនៅតែជាការចាំបាច់ និងយើងត្រូវរៀនរស់ជាមួយកូវីដ១៩។- សម្តេចតេជោ ហ៊ុន សែន នាយករដ្ឋមន្រ្តី បានថ្លែងថា ករណីដំបូងនៃមេរោគកូវីដ១៩ បំប្លែងថ្មីប្រភេទអូមីក្រុង លើស្រ្តីខ្មែរម្នាក់ដែលកំពុងមានផ្ទៃពោះ ធ្វើដំណើរពីប្រទេសហ្គាណាមកកម្ពុជាដើម្បីសម្រាលកូន ប៉ុន្តែទោះជាយ៉ាងណាសុខភាពរបស់ស្រ្តីរូបនេះគឺមានអាការៈធម្មតា គ្រាន់តែមានការព្រួយបារម្ភបន្តិចបន្តួចចំពោះសុខភាពកូនក្នុងផ្ទៃរបស់គាត់តែប៉ុណ្ណោះ។- សម្តេចតេជោ ហ៊ុន សែន ប្រកាសថា កំណើនសេដ្ឋកិច្ចកម្ពុជាបានបន្តងើបឡើងជាដំណាក់កាលៗ ក្រោយវិបត្តិធ្ងន់ធ្ងរនៃជំងឺកូវីដ-១៩។ សម្តេចបញ្ជាក់ថា វិស័យកសិកម្ម និងឧស្សាហកម្មនៅកម្ពុជាមិនមានការធ្លាក់ចុះនោះទេ។- សម្តេចតេជោ នៅតែរក្សាការព្យាករណ៍កំណើនសេដ្ឋកិច្ចកម្ពុជានៅ ឆ្នាំ២០២១នេះ នឹងមានកំណើនជិត៣ភាគរយ។- សម្តេចតេជោបានថ្លែងថា បើគិតតាំងពីថ្ងៃភ្ជុំបិណ្ឌរហូតមកដល់ពេលនេះ មានភ្ញៀវប្រមាណ២លាននាក់ដែលបានដើរកម្សាន្តនៅទូទាំងប្រទេសកម្ពុជា។- សម្តេចតេជោបានថ្លែងបញ្ជាក់ថា ចំណូលជាតិកើនឡើង ទោះបីជាមិនទាន់ងើបស្មើមុនកូវីដក៏ដោយ ពេលនេះយើងទទួលបាន៥០០ ទៅ៧០០ លានដុល្លារក្នុងមួយខែ ពេលកូវីដផ្ទុះខ្លាំងគឺធ្លាក់ចុះក្រោម៤០០លានដុល្លារ។- សម្តេចតេជោបានថ្លែងថា សណ្ឋាគារហៃយ៉ាត់ រីជិនស៊ី អាចនឹងទទួលថ្នាក់ដឹកនាំប្រមុខរដ្ឋ ប្រមុខរដ្ឋាភិបាល ក្នុងក្របខណ្ឌអាស៊ាន និង ដៃគូអាស៊ាន នៅពេលកម្ពុជាធ្វើជាប្រធានអាស៊ាននៅឆ្នាំ២០២២ ខាងមុខនេះ។- សម្តេចតេជោ បានអំពាវនាវអោយម្ចាស់រថយន្តដែលជ្រកក្រោមផ្លាករដ្ឋ រថយន្តចង្កូតស្តាំ មិនទាន់បានបង់ពន្ធ ត្រូវរួសរាន់មកបង់ពន្ធ ដែលនឹងទទួលបានការបញ្ចុះតម្លៃ១០ភាគរយ ប៉ុន្តែបើបង់ក្រោយថ្ងៃទី៣១ ខែធ្នូ ឆ្នាំ២០២១ គឺមិនបានទទួលការបញ្ចុះតម្លៃនោះទេ។- សម្តេចតេជោ ហ៊ុន សែន ប្រកាសថា សម្តេចនឹងសរសេរពីជីវិតនាយករដ្ឋមន្ត្រី ឲ្យសាធារណជន និងក្មេងជំនាន់ក្រោយបានដឹង ខណៈដែលជីវិតអ្នកចំការ វាសនាអ្នកស្រែ សម្តេចបានរៀបចំរួចរាល់ហើយ មានទាំងចម្រៀងថែមទៀត។- សម្តេចតេជោ ហ៊ុន សែន ប្រកាសថា ធ្វើម៉េចក៏ដោយត្រូវរក្សាឲ្យបានកំណើនសេដ្ឋកិច្ច ដើម្បីវឌ្ឍនភាពកម្ពុជា។ សម្តេចតេជោ ហ៊ុន សែនបញ្ជាក់ថា គ្រាប់បែកធ្វើឲ្យប៉ះពាល់តែមនុស្សនៅក្បែរៗនោះប៉ុណ្ណោះ តែគ្រាប់បែកសេដ្ឋកិច្ច នឹងធ្វើឲ្យប៉ះពាល់ដល់មនុស្សទូទាំងប្រទេស រាប់ទាំងក្មេងៗផងដែរ។- សម្តេចតេជោ ហ៊ុន សែន ប្រកាសថា សម្តេចនឹងដឹកនាំគណៈប្រតិភូទស្សនកិច្ចផ្លូវការនៅមីយ៉ាន់ម៉ា ដោយគ្មានការប្រែប្រួលឡើយនៅអំឡុងខែមករា ឆ្នាំ២០២២។ សម្តេចបញ្ជាក់ថា យើងមិនអាចបង្កើតទម្លាប់អាក្រក់របស់អាស៊ាននោះទេ ពេលដែលមិនពេញចិត្តសមាជិកណា មិនហៅគេចូលប្រជុំ។- សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា គោលជំហរបស់កម្ពុជាគឺនៅដដែល ទាក់ទងនឹងសមុទ្រចិនខាងត្បូង ដោយក្នុងនោះទី១ សម្តេចអំពាវនាវឲ្យភាគីពាក់ព័ន្ធទាំងអស់អនុវត្តឲ្យបាននូវកិច្ចព្រមព្រៀងនូវDOC, ទី២ ប្រទេសដែលពាក់ព័ន្ធត្រូវរកដំណោះស្រាយគ្នាដោយសន្តិវិធី និងទី៣ត្រូវខិតខំប្រឹងប្រែងសម្រេចឲ្យបាន នូវក្រមប្រតិបត្តិសមុទ្រចិនខាងត្បូងCOC ជាដើមនោះ។-សម្តេចតេជោ សម្រេចតែងតាំងឯកឧត្តមឧបនាយករដ្ឋមន្ត្រី ប្រាក់សុខុន រដ្ឋមន្ត្រីក្រសួងការបរទេស និងសហប្រតិបត្តិការធ្វើជាបេសកជន របស់ប្រធានអាស៊ាន។- សម្តេចតេជោ ហ៊ុន សែន បានបញ្ជាក់ថា ការដែលកម្ពុជាមិនអាចចេញនូវសេចក្តីថ្លែការណ៍បានកាលពីឆ្នាំ២០១២ក្នុងអំឡុងពេលដែលកម្ពុជាធ្វើជាម្ចាស់ផ្ទះនៃកិច្ចប្រជុំអាស៊ាន។ ទាក់ទងនឹងសមុទ្រចិនខាងត្បូង គឺដោយសារតែប្រទេសខ្លះបានបង្ខិតបង្ខំឲ្យកម្ពុជាទទួលស្គាល់កោះនេះជាប្រទេសនេះ កោះនោះជារបស់ប្រទេសនោះជាដើម ហើយបែជាចោទប្រកាន់កម្ពុជាថាបានកាន់ជើងចិនទៅវិញ។

សម្តេចព្រះមហាក្សត្រី ព្រះវររាជមាតាជាតិខ្មែរ ប្រោសព្រះរាជទានព្រះរាជសារប្រទានពរជ័យ ព្រមទាំងព្រះរាជទ្រព្យ ២ម៉ឺនដុល្លារ ជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱកាសថ្ងៃខួបកំណើត

សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ នៃព្រះរាជាណាចក្រកម្ពុជា បានសព្វព្រះរាជហឫទ័យប្រោសព្រះរាជទាន ព្រះរាជសារប្រទានពរជ័យ ព្រមទាំងព្រះរាជទ្រព្យចំនួន ២ម៉ឺនដុល្លារអាមេរិក និងបាច់ផ្កាស្រស់ល្អ១កន្ត្រកជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសថ្ងៃខួបកំណើតរបស់ សម្តេចកិត្តិព្រឹទ្ធបណ្ឌិត នៅថ្ងៃទី ១៥ ខែធ្នូ ឆ្នាំ២០២១នេះ។ដោយនៅក្នុងព្រះរាជសាររបស់ សម្តេចព្រះមហាក្សត្រី ព្រះវររាជមាតាជាតិខ្មែរ មានខ្លឹមសារថា៖ « នៅក្នុងឱកាសដ៏នក្ខត្តឫក្សនៃខួបចម្រើនជន្មាយុរបស់ សម្តេចកិត្តិព្រឹទ្ធបណ្ឌិត នៅថ្ងៃទី១៥ ខែធ្នូ ឆ្នាំ២០២១ នេះ ខ្ញុំមានហឫទ័យរីករាយ សូមចូលរួមអបអរសាទរ និងសូមសម្តែងនូវការកោតសរសើរដ៏កក់ក្តៅជាទីបំផុត ជូន សម្តេចកិត្តិព្រឹទ្ធបណ្ឌិត ដែលបានបរិច្ចាគកម្លាំងកាយ-ចិត្ត និងធនធានចូលរួមក្នុងសកម្មភាពមនុស្សធម៌ កសាងជាតិ មាតុភូមិ និងប្រជារាស្ត្រកម្ពុជា។ កាយវិការដ៏ឧត្តុង្គឧត្តម ប្រកបដោយស្មារតីស្នេហាជាតិ មាតុភូមិ និងប្រជារាស្ត្រនេះ កិត្តិនាមរបស់ សម្តេចកិត្តិព្រឹទ្ធបណ្ឌិត បានល្បីរន្ទឺទទួលបានការកោតសរសើរ និងអំណរសាទរ ទាំងនៅលើឆាកជាតិ និងអន្តរជាតិ ។នៅក្នុងឱកាសដ៏ថ្លៃថ្លានេះ ខ្ញុំសូមប្រសិទ្ធពរជ័យមហាបវរសួស្តី សិរីមង្គលគ្រប់ប្រការ ជូន សម្តេចកិត្តិព្រឹទ្ធបណ្ឌិត សូមទទួលបានមហាជោគជ័យថ្មីៗទៀត ក្នុងការបម្រើជាតិ មាតុភូមិ និងប្រជារាស្ត្រកម្ពុជា និងសូមបានប្រកបតែនឹងព្រះពុទ្ធពរ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។» ។

ព្រះមហាក្សត្រ ប្រោសព្រះរាជទានព្រះរាជសារប្រទានពរជ័យជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱកាសថ្ងៃខួបកំណើត

នាព្រឹកថ្ងៃទី១៤ ខែធ្នូ ២០២១ នេះ ឯកឧត្តម គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រីទទួលបន្ទុកកិច្ចការទូទៅអមក្រសួងព្រះបរមរាជវាំងបាននាំយកនូវ ព្រះរាជសារ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលព្រះអង្គបានសព្វព្រះរាជហឫទ័យប្រោសព្រះរាជទាន ព្រះរាជសារប្រទានពរជ័យ និងបាច់ផ្កាស្រស់ល្អ១កន្ត្រក ជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសថ្ងៃខួបកំណើតរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី ១៥ ខែធ្នូ ឆ្នាំ២០២១នេះ។នៅក្នុងព្រះរាជសារ របស់ព្រះករុណា ព្រះមហាក្សត្រ មានខ្លឹមសារថា៖ «ក្នុងឱកាសដ៏នក្ខត្តឫក្ស នៃខួបចម្រើនជន្មាយុ សម្តេចកិត្តិព្រឹទ្ធបណ្ឌិត នៅថ្ងៃទី១៥ ខែធ្នូ ឆ្នាំ២០២១ នេះ ខ្ញុំមានហឫទ័យរីករាយ យ៉ាងក្រៃលែង សូមអបអរសាទរជូនពរ និងកោតសរសើរ ដ៏កក់ក្តៅជាទីបំផុត ជូន សម្តេចកិត្តិព្រឹទ្ធបណ្ឌិត ដែលជាមគ្គទេសក៍ដ៏ល្អឆ្នើមមួយរូប បានដឹកនាំសកម្មភាពកាកបាទក្រហមកម្ពុជាទទួលបានជោគជ័យល្អប្រសើរ។ ជានិច្ចកាលសម្តេចកិត្តិព្រឹទ្ធបណ្ឌិត តែងតែបំពេញការងារមនុស្សធម៌ប្រកបដោយស្មារតីទទួលខុសត្រូវខ្ពស់ បានខិតខំអស់ពីកម្លាំងកាយ-ចិត្ត បំពេញភារកិច្ចជូនប្រជាជាតិ និងប្រជារាស្ត្រកម្ពុជា ដែលទទួលរងគ្រោះដោយគ្រោះមហន្តរាយផ្សេងៗ នៅទូទាំងព្រះរាជាណាចក្រកម្ពុជា។ ខ្ញុំសូមជូនពរបវរមហាប្រសើរ ជូន សម្តេចកិត្តិព្រឹទ្ធបណ្ឌិត សូមទទួលបានជោគជ័យថ្មីៗ បន្ថែមទៀត ក្នុងបេសកកម្មដ៏ឧត្តុង្គឧត្តមបម្រើប្រជាជាតិ មាតុភូមិ និងប្រជារាស្ត្រកម្ពុជា និងសូមបានប្រកបតែនឹងព្រះពុទ្ធពរ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។»

សម្តេចតេជោ ហ៊ុន សែន អញ្ជើញចូលរួមក្នុងពិធីក្រុងពាលីបួងសួង និងសំណេះសំណាលជាមួយក្រុមការងារថតខ្សែភាគយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មី

ភ្នំពេញ ៖ ខ្សែភាគយន្តភាគខ្នាតធំ រឿងកូនប្រុសក្រោមពន្លឺព្រះចន្ទពេញបូណ៌មី ត្រូវបានប្រារព្វពិធីក្រុងពាលី ចំរើនព្រះបរិត្តតាមទំនៀមទម្លាប់ប្រពៃណីព្រះពុទ្ធសាសនា នៅព្រឹកថ្ងៃចន្ទ ខែមគិសិរ ឆ្នាំឆ្លូវ ត្រីស័ក ពុទ្ធសករាជ២៥៦៥ ត្រូវនឹងថ្ងៃទី១៣ ខែធ្នូ ឆ្នាំ២០២១ ដើម្បីសុំសេចក្តីសុខសេចក្តីចម្រើនដល់អ្នកចូលរួមទាំងអស់ និងជាកិច្ចចាប់ផ្តើមដំណើរការផលិតខ្សែភាពយន្តខ្នាតធំនេះជាផ្លូវការ។សូមបញ្ជាក់ថា ក្រោយទទួលបានការអនុញ្ញាតដ៏ខ្ពងខ្ពស់ពីសម្តេចតេជោ ហ៊ុន សែន នាយករដ្ឋមន្រ្តី គណះកម្មការបានជ្រើសរើសអ្នកនិពន្ធចំនួន៥រូប ដើម្បីរៀបចំកែសំរួលខ្លឹមសារអត្ថបទនិពន្ធ ល្ខោនវិទ្យុ ទៅជាអត្ថបទនិពន្ធភាពយន្តសរុបមាន ៤៤ភាគ ស្មើនិង៦៥៣ឆាក។ បន្ទាប់ពីបញ្ចប់ការងារនេះ គណះកម្មការបានបង្កើតក្រុមការងារពិនិត្យ កែលម្អ ដោយបន្សីនឹងសាច់រឿងឲ្យស្របទៅនឹងបរិបទសម័យកាល។ ដើម្បីក្តាប់បានពីកត្តាប្រវត្តិសាស្រ្ត និងភូមិសាស្រ្ត តួអង្គសំខាន់ៗ ពាក់ព័ន្ធ ក្រុមការងារបានប្រឹក្សាយោបល់នៅក្នុងគណះកម្មការ ដើម្បីជាការបំពេញនូវកង្វះខាត និងប្រសិទ្ធភាពក្នុងការអនុវត្តផលិត។ ក្រុមការងារគ្រប់គ្រងការផលិត បានចុះសិក្សាពិនិត្យជ្រើសរើសទីតាំងសម្រាប់ថតចំនួន ១០២ទីតាំង ដែលស្ថិតនៅក្នុងខេត្តកំពង់ធំ កំពង់ចាម ត្បូងឃ្មុំ កំពង់ស្ពឺ និងរាជធានីភ្នំពេញ ដើម្បីរៀបចំតុបតែងបន្ថែមជាទីតាំងថត ឲ្យស្របនឹង បរិយាកាស ស្ថានភាពភូមិសាស្រ្ត និងជីវភាពរស់នៅនាសម័យកាលនោះ។ លើសពីនេះ យោងតាមអនុសាសន៍ដ៏ខ្ពង់ខ្ពស់របស់ សម្តេចតេជោនាយករដ្ឋមន្រ្តី គណះកម្មការបានរៀបចំ សាងសង់បន្ទាយកោះថ្ម បន្ទាយទ័ពលន់នល់នៅទន្លេបិទ និងភូមិប្រជាជន នៅមជ្ឈមណ្ឌលហ្វឹកហ្វឺន បញ្ជាការដ្ឋានអង្គរក្ស (ភ្នំស្រង់) ដែលសំណង់ទាំងនោះ មិនត្រឹមតែសម្រាប់ថតប៉ុណ្ណោះទេ តែជាសំណង់ដែលមានលក្ខណៈរឹងមាំ ដើម្បីទុកជាទីតាំងប្រវត្តិសាស្រ្ត ក្នុងការសិក្សា ស្រាវជ្រាវរបស់សិក្ខាកាម បញ្ជាការដ្ឋានអង្គរក្ស និងកងយោធពលខេមរភូមិន្ទ នៅពេលអនាគត។ពិធីក្រុងពាលីតាមទំនៀមទម្លាប់បានប្រព្រឹត្តិទៅតាមគន្លងព្រះពុទ្ធសាសនាដោយមានការបូងសួងសុំសេចក្តីសុខ សេចក្តីចំរើន ពីម្ចាស់ទឹកម្ចាស់ដីនៅគ្រប់ទីកន្លែងបំពេញការងារ ក៏ដូចជាសិល្បករជាតួសម្តែងទាំងអស់ចាប់ផ្តើមដំណើរការថតចាប់ពីពេលនេះតទៅទទួលបានជោគជ័យដោយមានការអញ្ជើញជាអធិបតីដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។ បើតាមរបាយការណ៍របស់ ឯកឧត្តមហ៊ឹម សុទិត្យា រដ្ឋលេខាធិការក្រសួងព័ត៌មាន និងជាប្រធានគណះកម្មការផលិតភាពយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មី បានឲ្យដឹងថា ក្រុមការងារបានជ្រើសរើសតួសំដែងសំខាន់ៗចំនួន ១០៣នាក់ តួប្រជាជនយ៉ាងតិច៥០០នាក់ ព្រមទាំងកងកម្លាំង៥០០នាក់ផ្សេងទៀត ដើម្បីចូលរួមសំដែងក្នុងឈុតឆាកធំៗ ។ ចំពោះឧបករណ៍បច្ចេកទេសថត មានការគាំទ្រពីលោកជំទាវ ហ៊ុន ម៉ាណា អគ្គនាយិកា អគ្គនាយកដ្ឋានវិទ្យុ និងទូរទស្សន៍បាយ័ន។តាមផែនការការងារផលិតរបស់គណះកម្មការ ការផលិតភាពយន្តភាគ ទាំង៤៤ភាគនេះ ប្រើពេលរយៈពេល១២ខែកន្លះយ៉ាងតិច ហើយការកាត់តដំឡើងរូបភាព និងត្រូវបញ្ចប់មុនពាក់កណ្តាលឆ្នាំ២០២៣ខាងមុខ។(ប្រសាសន៍សម្តេច)សំណេះសំណាលជាមួយ ផលិតករ សិល្បះករ សិល្បះការិនីជាតួសម្តែង និងក្រុមការងារបច្ចេកទេសទាំងអស់ សម្តេចតេជោ ហ៊ុន សែន បានវាយតម្លៃខ្ពស់ចំពោះក្រុមការងារគ្រប់ផ្នែកទាំងអស់ ដែលបានខិតខំសំរិទ្ធសំរាំងចងក្រងកែលម្អខ្លឹមសារសាច់រឿង ដែលផ្តើមចេញពីល្ខោននិយាយមកកាន់ការផលិតភាពយន្តរឿងភាគ ការខិតខំរកតួសម្តែង ការសិក្សាស្រាវជ្រាវរកនូវសម្ភារៈយុទ្ធោបរណ៍ ទីតាំងភូមិសាស្រ្តប្រវត្តសាស្រ្ត ដើម្បីឈានទៅថតភាពយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មី នាពេលដ៏ខ្លីខាងមុខ ។ សម្តេចតេជោ បានរម្លឹកថា កន្លងមកមានថ្នាក់ដឹកនាំក្រុមហ៊ុនផលិតកុន ហូលីវូដ បានមកស្នើសុំសម្តេចដើម្បផលិតភាពយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មី នេះម្តងរួចមកហើយ ប៉ុន្តែសម្តេចមិនអនុញ្ញាតឲ្យផលិតនោះទេ ដោយសាតែមិនអាចយល់បានស៊ីជម្រៅដល់ដំណើរសាច់រឿងពិត និងប្រវត្តិសាស្រ្តរបស់ប្រទេស ពិសេសទាក់ទិនទៅនឹងខ្សែជីវិតដ៏ជ្រាលជ្រៅ និងភាពជាក់ស្តែងរបស់លោកទាំងពីរតែម្តង។ ទោះយ៉ាងណាសម្តេចតេជោ ស្នើដល់អ្នកដឹកនាំរឿង និងក្រុមការងារបច្ចេកទេសទាំងអស់ ត្រូវបន្តសិក្សាស្រាវជ្រាវឲ្យបានល្អិតល្អន់ថែមទៀត ព្រោះសាច់រឿងទាំងមូលវាផ្តោត ទៅលើប្រវត្តិសាស្រ្តពិតៗរបស់ប្រទេស ពោលគឺឲ្យសមស្របនឹងអ្វីដែលកើតឡើងពិតក្នុងសម័យកាលនោះ បើទោះបីជាខ្លឹមសារទាំងស្រុងនៃផលិតភាពយន្តនេះ សម្តេចតេជោ វាយតម្លៃថា អាចគ្របដណ្តប់បាននូវដំណើររឿង និងខ្លឹមសារពិតជាក់ស្តែងបានត្រឹមតែប្រមាណ ៦០ភាគរយ ក៏ដោយ។សូមបញ្ជាក់ថា រឿងកូនប្រុសក្រោមពន្លឺព្រះចន្ទពេញបូណ៌មី ដែលចាត់ទុកថា ជាខ្សែភាពយន្តរឿងភាគខ្នាតធំដំបូងបំផុតក្នុងប្រវត្តិសាស្រ្តរបស់ប្រទេសកម្ពុជា ដែលឆ្លុះបញ្ចាំងពីតថភាពជាក់ស្តែងក្នុងសម័យកាលមួយដែលប្រទេសកម្ពុជាកំពុងរងវិនាសកម្មដោយសារសង្រ្គាម កាប់សម្លាប់ និងក៏បានបង្ហាញឲ្យឃើញពីខ្សែជីវិតពិតនៃដំណើរតស៊ូរបស់សម្តេចតេជោ ហ៊ុន សែន ក្នុងដំណើរសង្រ្គោះជាតិមាតុភូមិ និងរឿងរ៉ាវជីវិតគូរនៃសម្តេចទាំងទ្វេរផងដែរ ក្នុងគ្រាប្រទេសកម្ពុជាជួបគ្រោះកលយុគ ។ចំពោះការចំណាយក្នុងការផលិតភាពយន្តដែលត្រូវបាននិពន្ធ និងដឹកនាំ ផលិតឡើងដោយស្នាដៃកូនខ្មែរទាំងអស់នេះផងដែរ ក៏បានចូលរួមឧបត្តម្ភគាំទ្រដោយស្ម័គ្រចិត្តពីសប្បុរសជនមួយចំនួន ដែលកំពុងបំពេញការងារ រកស៊ីក្នុងស្រុក ដើម្បីបង្ហាញពីការគោរព ស្រលាញ់ និងដឹងគុណចំពោះតម្លៃនៃសុខសន្តិភាពរបស់ប្រទេសដែលមេដឹកនាំកម្ពុជារូបនេះបានរកមកបានដោយលំបាក និងត្រូវបានការពារយ៉ាងរឹងមាំ នៅក្នុងពេលបច្ចុប្បន្ន ជាមួយនឹងការជឿងជាក់ទៅអនាគតនូវការបន្តរីកចំរើនរបស់ប្រទេសមួយនេះ។ហើយស្នាដៃថ្មីដែលផលិតឡើងជាខ្សែវីដេអូនេះផងដែរ គឺជាការឆ្លើយតបតាមសំណូមពរដ៏ច្រើនលើសលុបពីអ្នក និយមតាមដានស្តាប់ការចាក់ផ្សាយតាមវិទ្យុនាពេលកន្លងមកនូវភាគនិទានដែលបានផលិតជាល្ខោននិយាយរឿង «កូនប្រុសក្រោមពន្លឺព្រះចន្ទពេញបូណ៍មី» ។

កំណើនអ្នកស្លាប់ដោយព្យុះថូណាដូនៅ Kentucky នឹងកើនដល់ ១០០នាក់

អាមេរិក៖ អភិបាលរដ្ឋបាននិយាយថា ចំនួនអ្នកស្លាប់ដោយសារខ្យល់ព្យុះថូណាដូដ៏មានឥទ្ធិពល ដែលបានបំផ្លាញទីក្រុងនានាក្នុងរដ្ឋ Kentucky ទំនងជាកើនឡើងដល់ ១០០នាក់ ខណៈក្តីសង្ឃឹមនៃការស្វែងរកអ្នកនៅរស់រានមានជីវិតកាន់តែតិច។ លោក Andy Beshear បាននិយាយថា នេះគឺជាព្រឹត្តិការណ៍ព្យុះថូណាដូបំផ្លាញខ្លាំងបំផុតនៅក្នុងប្រវត្តិសាស្ត្ររបស់រដ្ឋ ដោយមានអ្នកស្លាប់យ៉ាងហោចណាស់ ៨០នាក់ត្រូវបានបញ្ជាក់។មនុស្ស ១៤នាក់ផ្សេងទៀតត្រូវបានរាយការណ៍ថាបានស្លាប់នៅក្នុងរដ្ឋចំនួន ៤ផ្សេងទៀត។ នៅរដ្ឋ Kentucky ក្រុមអ្នកជួយសង្គ្រោះបានស្វែងរុករកក្នុងកម្ទេចកំទីបាក់បែកសម្រាប់អ្នកនៅរស់រានមានជីវិត ខណៈក្រុមជាច្រើនទៀតបានចែកចាយទឹក និងម៉ាស៊ីនភ្លើងដល់ប្រជាជន។ សមាជិកឆ្មាំជាតិជាង ៣០០នាក់បានធ្វើដំណើរចេញពីលំនៅឋានមួយទៅលំនៅឋានមួយ ដើម្បីរើកកាយកម្ទេចកំទីបែកបាក់ចេញ។អភិបាលរដ្ឋបាននិយាយក្នុងអំឡុងដំណើរចុះពិនិត្យទៅកាន់ទីក្រុង Mayfield ជាទីក្រុងរងការបំផ្លាញខ្លាំងបំផុតថា យើងនៅតែសង្ឃឹមនៅពេលដែលយើងឆ្ពោះទៅមុខ សម្រាប់អព្ភូតហេតុមួយចំនួននឹងរកឃើញមនុស្សបន្ថែមទៀត។ ទោះយ៉ាងណាគ្មានអ្នកណាម្នាក់ត្រូវបានគេរកឃើញនៅរស់នោះទេចាប់តាំងពីថ្ងៃសៅរ៍មក។ លោក Beshear បាននិយាយថា លំនៅឋានរបស់ប្រជាជនរាប់ពាន់នាក់ត្រូវបានបំផ្លាញផ្ទះ ទោះបីជាចំនួនពិតប្រាកដនៅមិនទាន់បានដឹងច្បាស់នៅឡើយក៏ដោយ៕អត្ថបទ៖ ប៊ុនថន

ករណីវីរុស COVID-19 បានចុះបញ្ជីនៅប្រទេសរុស្ស៊ីកើនលើស ១០លាននាក់

រុស្ស៊ី៖ ទិន្នន័យរបស់រដ្ឋាភិបាលបានបង្ហាញកាលពីថ្ងៃអាទិត្យថា ចំនួនករណីឆ្លងវីរុស COVID-19 ដែលបានចុះបញ្ជីនៅក្នុងប្រទេសរុស្ស៊ីបច្ចុប្បន្ននេះមានលើសពី ១០លាននាក់ ប៉ុន្តែរលកថ្មីនៃជំងឺរាតត្បាតបានថយចុះ ហើយចំនួនអ្នកស្លាប់កំពុងធ្លាក់ចុះ។ ចំនួននៃករណីឆ្លងប្រចាំថ្ងៃ និងចំនួនអ្នកស្លាប់បានធ្លាក់ចុះនាពេលថ្មីៗនេះ បន្ទាប់ពីប្រទេសរុស្ស៊ីបានកត់ត្រានូវខែដែលមានអ្នកស្លាប់ច្រើនបំផុតមកដល់ពេលនេះនៅក្នុងខែតុលា។កាលពីថ្ងៃអាទិត្យ ប្រទេសរុស្ស៊ីបានរាយការណ៍ពីករណីឆ្លងវីរុស COVID-19 ថ្មីចំនួន ២៩,៩២៩ករណីក្នុងរយៈពេល ២៤ម៉ោងចុងក្រោយ ដែលជាចំនួនករណីប្រចាំថ្ងៃទាបបំផុតចាប់តាំងពីថ្ងៃទី១៣ ខែតុលា ដោយធ្វើឱ្យចំនួនអ្នកឆ្លងចាប់តាំងពីការចាប់ផ្តើមនៃជំងឺរាតត្បាតសរុបចំនួន ១០,០១៦,៨៩៦ករណី។ ប្រទេសរុស្ស៊ីបានរាយការណ៍អំពីអ្នកស្លាប់សរុបមានចំនួន ២៨៩,៤៨៣នាក់។ ចំនួនប្រជាជនសរុបរបស់ប្រទេសរុស្ស៊ីមានប្រមាណ ១៤៤លាននាក់។ ប្រទេសនេះកំពុងត្រៀមខ្លួនសម្រាប់ការកើនឡើងបន្ថែមទៀត នៃករណីឆ្លងវីរុសដែលទាក់ទងនឹងវីរុសបម្លែងខ្លួនថ្មី Omicron។កាលពីចុងខែវិច្ឆិកា ប្រធានាធិបតីលោក វ្ល៉ាឌីមៀ ពូទីន បានបញ្ជាឱ្យរដ្ឋាភិបាលធានាឲ្យបានគ្រប់ គ្រាន់ការផ្គត់ផ្គង់ឱសថ អុកស៊ីហ្សែន និងគ្រែមន្ទីរពេទ្យដើម្បីប្រយុទ្ធប្រឆាំងទៅនឹងវីរុសបម្លែងខ្លួនថ្មី Omicron ដែលឆ្លងខ្ពស់។ ទីភ្នាក់ងារសារព័ត៌មាន RIA បានរាយការណ៍កាលពីថ្ងៃអាទិត្យថា លោក អាឡិចសានឌ័រ ហ្គីនស្បឺក ប្រធានវិទ្យាស្ថានហ្គាម៉ាឡេយ៉ា (Gamaleya) ដែលផលិតវ៉ាក់សាំង Sputnik V បាននិយាយថា រយៈពេល ១០ថ្ងៃនឹងគ្រប់គ្រាន់ដើម្បីសាកល្បងប្រសិទ្ធភាពវ៉ាក់សាំងរបស់ប្រទេសរុស្ស៊ី ប្រឆាំងវីរុសបម្លែងខ្លួនថ្មី Omicron៕អត្ថបទ៖ ប៊ុនថន

ករណីឆ្លងវីរុសនៅកូរ៉េខាងត្បូងមានលើសពី ៧០០០ករណីសម្រាប់ ៣ថ្ងៃជាប់ៗគ្នា

កូរ៉េខាងត្បូង៖ ករណីឆ្លងវីរុសកូរ៉ូណាថ្មីនៅក្នុងប្រទេសកូរ៉េខាងត្បូងបានកើនឡើងលើសពី ៧០០០ករណីសម្រាប់រយៈពេល ៣ថ្ងៃជាប់ៗគ្នាកាលពីថ្ងៃសុក្រ នៅក្នុងការកើនឡើងដល់កំណត់ត្រាដែលបានធ្វើឲ្យប៉ះពាល់ដល់មន្ទីរពេទ្យ និងគំរាមដល់គោលដៅរបស់ប្រទេសក្នុងការទប់ស្កាត់ជំងឺរាតត្បាតដោយគ្មានវិធានការបិទខ្ទប់។លោក Lee Ki-il មន្ត្រីជាន់ខ្ពស់ក្រសួងសុខាភិបាលកូរ៉េខាងត្បូងបាននិយាយថា រដ្ឋាភិបាលរំពឹងថាស្ថានភាពនឹងកាន់តែធ្ងន់ធ្ងរទៅៗ ក្នុងរយៈពេលប៉ុន្មានសប្តាហ៍ខាងមុខនេះដោយសារអាកាសធាតុរដូវរងា និងការរាលដាលវីរុសបម្លែងខ្លួនថ្មី omicron។ ដើម្បីដោះស្រាយវិបត្តិនេះ រដ្ឋាភិបាលនឹងពន្លឿនការផ្តល់ការចាក់វ៉ាក់សាំងបង្ការវីរុស ដោយកាត់បន្ថយចន្លោះរយៈពេលរវាងការចាក់វ៉ាក់សាំងលើកទី២ និងទី៣ ពីចន្លោះរយៈពេល ៤ ឬ ៥ខែ បច្ចុប្បន្នមកនៅត្រឹម ៣ខែចាប់ពីសប្តាហ៍ក្រោយ។ ប្រជាជនប្រមាណ ៤១.៥លាននាក់ ឬ ៨១% នៃចំនួនប្រជាជនជាង ៥១លាននាក់បានចាក់វ៉ាក់សាំងពេញលេញ ប៉ុន្តែមានតែ ១០% ប៉ុណ្ណោះដែលបានចាក់វ៉ាក់សាំងដូសជំរុញ។ការរាលដាលករណីឆ្លងដែលជំរុញដោយវីរុសបម្លែងខ្លួនថ្មី Delta ក្នុងប៉ុន្មានសប្តាហ៍ថ្មីៗនេះ រួមជាមួយការកើនឡើងនៃការចូលសម្រាកព្យាបាលនៅមន្ទីរពេទ្យ និងករណីស្លាប់ដែលភាគច្រើនក្នុងចំណោមប្រជាជនមានអាយុ ៦០ឆ្នាំ ឬចាស់ជាងនេះ ខណៈភាពស៊ាំរបស់ពួកគេបានធ្លាក់ចុះ បន្ទាប់ពីបានចាក់វ៉ាក់សាំងក្នុងដំណាក់កាលដំបូង ដែលបានចាប់ផ្តើមកាលពីខែកុម្ភៈ។ ប្រទេសកូរ៉េខាងត្បូងមានករណីឆ្លងវីរុសកូវីត-១៩ សរុប ៥០៣,៦០៦ករណី និងមានអ្នកស្លាប់ ៤,១៣០នាក់៕អត្ថបទ៖ ប៊ុនថន

ករណីវីរុស COVID-19 ថ្មីនៅអាហ្វ្រិកខាងត្បូងបន្តកើនឡើង

អាហ្វ្រិកខាងត្បូង៖ ករណីឆ្លងវីរុស COVID-19 ថ្មីនៅប្រទេសអាហ្វ្រិកខាងត្បូងបន្តកើនឡើង ខណៈដែលប្រទេសនេះស្វែងរកការគ្រប់គ្រងការកើនឡើងករណីឆ្លងជំរុញដោយវីរុសបម្លែងខ្លួនថ្មី omicron។ អាជ្ញាធរនិយតកម្មរបស់អាហ្វ្រិកខាងត្បូងបានអនុម័តវ៉ាក់សាំង Pfizer-BioNTech ជាវ៉ាក់សាំងដូសជំរុញ ដោយបើកផ្លូវសម្រាប់ការចាក់វ៉ាក់សាំងលើកទីបី ដើម្បីទប់ស្កាត់ទៅនឹងការកើនឡើងករណីឆ្លងនាពេលបច្ចុប្បន្ន ដែលជំរុញដោយវីរុសបម្លែងខ្លួនថ្មី omicron។ការអនុម័តនេះបានធ្វើឡើងកាលពីថ្ងៃពុធ បន្ទាប់ពីក្រុមហ៊ុន Pfizer បានប្រកាសថា ការសិក្សានៅមន្ទីរពិសោធន៍បង្ហាញពីវ៉ាក់សាំងវីរុស COVID-19 ពីរកម្រិតចំនួន ២ដូសរបស់ខ្លួនបានថយចុះប្រសិទ្ធភាពក្នុងការទប់ស្កាត់វីរុសបម្លែងខ្លួនថ្មី omicron ប៉ុន្តែបាននិយាយថា ការចាក់វាក់សាំងដូសជំរុញនៅតែមានប្រសិទ្ធភាពទប់ស្កាត់វីរុសបម្លែងខ្លួនថ្មី omicron។ ប្រធានាធិបតីអាហ្វ្រិកខាងត្បូងលោក Cyril Ramaphosa បានជួបជាមួយគណៈកម្មការធិការប្រឹក្សាថ្នាក់រដ្ឋមន្ត្រីនៃវីរុស COVID-19 ដើម្បីពិភាក្សាអំពីការកើនឡើងនៃករណីឆ្លង និងផលប៉ះពាល់នៃការរាលដាលវីរុសបម្លែងខ្លួនថ្មី omicron។ លោក Ramaphosa និងទីប្រឹក្សាអ្នកជំនាញរបស់លោកត្រូវបានគេរំពឹងថា នឹងពិភាក្សាអំពីបញ្ហាថា តើរដ្ឋាភិបាលគួរតែបង្កើតវ៉ាក់សាំងកាតព្វកិច្ចដែរឬទេ។ ក្រុមហ៊ុនឯកជន និងសាកលវិទ្យាល័យមួយចំនួនបានប្រកាសរួចហើយថា ពួកគេនឹងអនុវត្តកាតព្វកិច្ចវ៉ាក់សាំង។ទោះបីជាមានការផ្គត់ផ្គង់គ្រប់គ្រាន់នៃវ៉ាក់សាំងជាង ១៩លានដូសក៏ដោយ យុទ្ធនាការចាក់វ៉ាក់សាំងនៅប្រទសអាហ្វ្រិកខាងត្បូងមានភាពយឺតយ៉ាវ។ ប្រជាជនអាហ្វ្រិកខាងត្បូងជាង ១៤លាននាក់បានចាក់វ៉ាក់សាំងពេញលេញដែលបានបង្ហាញថា មានត្រឹមតែ ៣៦% នៃចំនួនប្រជាជនពេញវ័យ និងប្រមាណ ២៤% នៃចំនួនប្រជាជនសរុបជាង ៦០លាននាក់បានចាក់វ៉ាក់សាំង។ អត្រានៃការចាក់វ៉ាក់សាំងយឺតធ្វើឱ្យគោលដៅរបស់រដ្ឋាភិបាលក្នុងការចាក់វ៉ាក់សាំង ៦៧% នៃចំនួនប្រជាជននៅខែកុម្ភៈទំនងជាមិនប្រាកដប្រជា។ រហូតមកដល់ពេលនេះ ប្រទេសអាហ្វ្រិកខាងត្បូងមានករណីឆ្លងវីរុសកូវីត-១៩ សរុប ៣.១១២.៤៦៩ករណី និងមានអ្នកស្លាប់ ៩០,080នាក់៕អត្ថបទ៖ ប៊ុនថន

បណ្ដាញសង្គម

ព័ត៌មានថ្មីៗ

Romelu Lukaku ខិតជិតផ្ទេរចេញពី Napoli ទៅ Fenerbahçe

រាជរដ្ឋាភិបាលទម្លាក់ការព្យាករសេដ្ឋកិច្ចនៅត្រឹម ៤,១% ក្រោមសម្មតិកម្ម និងសូចនាករម៉ាក្រូសេដ្ឋកិច្ចឆមាសទី១

Diego Forlan ត្រូវបានតែងតាំងជាគ្រូបង្វឹកថ្មីរបស់ក្រុមជម្រើសជាតិអ៊ុយរូហ្គាយ

សម្តេចធិបតីដាស់តឿនឲ្យអាជ្ញាធរខេត្តស្ទឹងត្រែង ត្រូវបន្តពង្រឹងទប់ស្កាត់បទល្មើសនានាពាក់ព័ន្ធនឹងឧក្រិដ្ឋកម្មឆ្លងដែន

ខេត្តទិសឦសានទទួលបានការស្នើសុំវិនិយោគចំនួន ៧២គម្រោងមានទឹកប្រាក់ជិត ៣ពាន់លានដុល្លារ និងបង្កើតការងារបានជាង ៨ម៉ឺននាក់

ឱកាសល្អ! វិទ្យាស្ថាន TVET នានា ប្រកាសផ្តល់អាហារូបករណ៍១០០% ដល់យុវជនលើជំនាញបច្ចេកទេស និងវិជ្ជាជីវៈ

ការវាយប្រហារដោយយានដ្រូនបានបង្កឲ្យឆេះរោងចក្រចម្រាញ់ប្រេងធំជាងគេលំដាប់ទី២របស់ប្រទេស លីប៊ី

អ៊ីរ៉ង់ថ្កោលទោសការវាយប្រហារថ្មីៗរបស់អ៊ីស្រាអែលនៅភាគខាងត្បូងប្រទេសលីបង់

ក្រុមហ៊ូទីអះអាងថា ខ្លួនបានវាយប្រហារនាវាអារ៉ាប៊ីសាអ៊ូឌីត និងតំបន់ដែលរដ្ឋាភិបាលគ្រប់គ្រង នៅយេម៉ែន

បេសកជនUN៖ ស្ថានការណ៍នៅតំបន់វេសបែង ទាមទារឲ្យមានចាត់វិធានការជាបន្ទាន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

អង្គការសុខភាពពិភពលោកនិយាយថា វីរុស Omicron មាននៅក្នុងប្រទេសភាគច្រើន

ក្រុមហ៊ុន Pfizer និយាយថា ឱសថគ្រាប់ COVID-19 មានប្រសិទ្ធភាពប្រឆាំងវីរុស Omicron

ប្រសាសន៍សំខាន់ៗសម្ដេចតេជោ ហ៊ុន សែន ក្នុងឱកាសអញ្ជើញសម្ពោធជាផ្លូវការ សណ្ឋាគារ ហៃយ៉ាត់ រីជិនស៊ី ភ្នំពេញ

កំណើនអ្នកស្លាប់ដោយព្យុះថូណាដូនៅ Kentucky នឹងកើនដល់ ១០០នាក់

ករណីវីរុស COVID-19 បានចុះបញ្ជីនៅប្រទេសរុស្ស៊ីកើនលើស ១០លាននាក់

ករណីឆ្លងវីរុសនៅកូរ៉េខាងត្បូងមានលើសពី ៧០០០ករណីសម្រាប់ ៣ថ្ងៃជាប់ៗគ្នា

ករណីវីរុស COVID-19 ថ្មីនៅអាហ្វ្រិកខាងត្បូងបន្តកើនឡើង

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

អង្គការ​សុខភាព​ពិភពលោក​និយាយ​ថា វីរុស Omicron មាននៅ​ក្នុង​ប្រទេស​ភាគ​ច្រើន

ក្រុមហ៊ុន Pfizer​ និយាយ​ថា ឱសថ​គ្រាប់ COVID-19 មាន​ប្រសិទ្ធភាព​ប្រឆាំង​វីរុស Omicron

ប្រសាសន៍សំខាន់ៗសម្ដេចតេជោ​ ហ៊ុន​ សែន​ ក្នុងឱកាសអញ្ជើញសម្ពោធជាផ្លូវការ សណ្ឋាគារ ហៃយ៉ាត់ រីជិនស៊ី ភ្នំពេញ

កំណើន​អ្នក​ស្លាប់​ដោយ​ព្យុះ​ថូណា​ដូ​នៅ Kentucky នឹង​កើន​ដល់ ​១០០​នាក់

ករណី​វីរុស​ ​COVID-19 បាន​ចុះបញ្ជី​នៅ​ប្រទេស​រុស្ស៊ី​កើន​លើស ១០​លាន​នាក់​

ករណី​ឆ្លង​វីរុស​នៅ​កូរ៉េខាងត្បូង​មាន​លើស​ពី ៧០០០​ករណី​សម្រាប់​ ៣​ថ្ងៃ​ជាប់ៗ​គ្នា​

ករណី​វីរុស COVID-19 ថ្មី​នៅ​អាហ្វ្រិក​ខាងត្បូង​បន្ត​កើន​ឡើង

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

អង្គការសុខភាពពិភពលោកនិយាយថា វីរុស Omicron មាននៅក្នុងប្រទេសភាគច្រើន

ក្រុមហ៊ុន Pfizer និយាយថា ឱសថគ្រាប់ COVID-19 មានប្រសិទ្ធភាពប្រឆាំងវីរុស Omicron

ប្រសាសន៍សំខាន់ៗសម្ដេចតេជោ ហ៊ុន សែន ក្នុងឱកាសអញ្ជើញសម្ពោធជាផ្លូវការ សណ្ឋាគារ ហៃយ៉ាត់ រីជិនស៊ី ភ្នំពេញ

កំណើនអ្នកស្លាប់ដោយព្យុះថូណាដូនៅ Kentucky នឹងកើនដល់ ១០០នាក់

ករណីវីរុស COVID-19 បានចុះបញ្ជីនៅប្រទេសរុស្ស៊ីកើនលើស ១០លាននាក់

ករណីឆ្លងវីរុសនៅកូរ៉េខាងត្បូងមានលើសពី ៧០០០ករណីសម្រាប់ ៣ថ្ងៃជាប់ៗគ្នា

ករណីវីរុស COVID-19 ថ្មីនៅអាហ្វ្រិកខាងត្បូងបន្តកើនឡើង