នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អ្នកជំនាញ៖ អាមេរិកអាចនឹងប្រើប្រាស់បទឈប់បាញ់ថ្មីជាមួយអ៊ីរ៉ង់ ដើម្បីរៀបចំផែនការប្រតិបត្តិការជើងគោក
ប្រធានសភា៖ គ្មានប្រទេសណាមួយក្នុងតំបន់នឹងត្រូវអនុញ្ញាតឲ្យលក់ប្រេងបានទេ ប្រសិនបើអ៊ីរ៉ង់ត្រូវបានបដិសេធឱកាសនេះ
មេដឹកនាំក្រុមហាម៉ាសបង្ហាញពីគោលដៅអាទិភាពរបស់ចលនានេះ
រុស្ស៊ីព្រមានអំពីហានិភ័យកាន់តែកើនឡើងចំពោះការដឹកជញ្ជូនតាមសមុទ្រ នៅច្រកសមុទ្រ និងសមុទ្រក្រហម

ព័ត៌មានអន្តរជាតិ

អ្នកជំនាញ៖ អាមេរិកអាចនឹងប្រើប្រាស់បទឈប់បាញ់ថ្មីជាមួយអ៊ីរ៉ង់ ដើម្បីរៀបចំផែនការប្រតិបត្តិការជើងគោក

2026/07/23 05:22:46 pm        8
Facebook Telegram Linkin
អ្នកវិទ្យាសាស្ត្រនយោបាយ និងអ្នកជំនាញកិច្ចការអន្តរជាតិអ៊ីរ៉ង់ លោក Ruhollah Modabber បានប្រាប់សារព័ត៌មាន TASS ថា ទីក្រុងវ៉ាស៊ីនតោន នឹងប្រើប្រាស់បទឈប់បាញ់រយៈពេល ១០ថ្ងៃ ដែលបានស្នើឡើងរវាងអ៊ីរ៉ង់ និងសហរដ្ឋអាមេរិក ដើម្បីរៀបចំផែនការប្រតិបត្តិការជើងគោក។ ដូច្នេះ អ៊ីរ៉ង់គួរតែបដិសេធសំណើនេះ។គេហទំព័រសារព័ត៌មាន Axios បានរាយការណ៍កាលពីថ្ងៃទី ២១ ខែកក្កដា ថា ប្រទេស កាតា អេហ្ស៊ីប ប៉ាគីស្ថាន និងអ្នកសម្របសម្រួលផ្សេងទៀត បានដាក់សំណើបទឈប់បាញ់រយៈពេល ១០ថ្ងៃ ទៅកាន់សហរដ្ឋអាមេរិក និងអ៊ីរ៉ង់។ សារព័ត៌មាននេះ បាននិយាយថា រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ កំពុងពិនិត្យមើលសំណើនេះ។អ្នកជំនាញរូបនេះបានលើកឡើងថា៖«បទឈប់បាញ់នេះ គ្រាន់តែជាល្បិចបំភាន់មួយទៀតរបស់អាមេរិកប៉ុណ្ណោះ។ និយាយម្យ៉ាងទៀត សហរដ្ឋអាមេរិកមានផែនការប្រើល្បិចថ្មីមួយ ដើម្បីបោកបញ្ឆោតក្រុមចរចារបស់អ៊ីរ៉ង់ និងរដ្ឋាភិបាលអ៊ីរ៉ង់»។ តាមទស្សនៈរបស់លោក សហរដ្ឋអាមេរិកកំពុងរៀបចំផែនការវាយប្រហារជើងគោកលើអ៊ីរ៉ង់ពីទិសដៅជាច្រើន ដែលជិតរួចរាល់ហើយ ហើយជម្រើសនេះ កំពុងត្រូវបានពិចារណាយ៉ាងយកចិត្តទុកដាក់។លោក Modabber ជឿថា រយៈពេលបទឈប់បាញ់ ១០ថ្ងៃ នឹងអនុញ្ញាតឲ្យសហរដ្ឋអាមេរិករៀបចំផ្លូវផ្គត់ផ្គង់ផ្នែកយោធា និងដាក់ពង្រាយកងទ័ពឡើងវិញ ដោយមិនចាំបាច់ព្រួយបារម្ភអំពីការវាយប្រហារដែលអាចកើតមានពីអ៊ីរ៉ង់លើគោលដៅរបស់ខ្លួន៕

ប្រធានសភា៖ គ្មានប្រទេសណាមួយក្នុងតំបន់នឹងត្រូវអនុញ្ញាតឲ្យលក់ប្រេងបានទេ ប្រសិនបើអ៊ីរ៉ង់ត្រូវបានបដិសេធឱកាសនេះ

2026/07/23 05:20:33 pm        14
Facebook Telegram Linkin
ប្រធានសភាអ៊ីរ៉ង់ លោក Mohammad Bagher Ghalibaf បាននិយាយថា ទីក្រុងតេអេរ៉ង់ (រដ្ឋាភិបាលអ៊ីរ៉ង់) នឹងមិនអនុញ្ញាតឲ្យប្រទេសណាមួយនៅក្នុងតំបន់លក់ប្រេងបានទេ ប្រសិនបើអ៊ីរ៉ង់ត្រូវបានបដិសេធឱកាស ក្នុងការលក់ប្រេងនេះ។ លោកបានសរសេរនៅលើបណ្តាញសង្គម Xថា៖«នៅក្នុងតំបន់ដែលយើងមិនអាចលក់ប្រេងបាន គ្មាននរណាម្នាក់ អាចលក់បានដែរ។ ប្រសិនបើសន្តិសុខរបស់យើង មិនត្រូវបានធានា នោះគ្មានហេដ្ឋារចនាសម្ព័ន្ធណាមួយនៅក្នុងតំបន់ អាចមានសុវត្ថិភាពឡើយ។ សន្តិសុខនៅក្នុងច្រកសមុទ្រហ័រមូស អាចកើតមានបាន លុះត្រាតែមិនមានកងកម្លាំងអាមេរិកនៅទីនោះ»។ លោក Ghalibaf បានសរសេរទៀតថា៖ «សមីការនៃជម្លោះនេះ» គឺ«មានអ្វីទាំងអស់ ឬ គ្មានអ្វីទាំងអស់»។ការកើនឡើងភាពតានតឹងថ្មីៗក្នុងជម្លោះរវាងសហរដ្ឋអាមេរិក និងអ៊ីរ៉ង់ បានចាប់ផ្តើម នៅថ្ងៃទី ០៨ ខែកក្កដា។ ជាលើកដំបូងចាប់តាំងពីការចុះហត្ថលេខាលើអនុស្សរណៈរវាងទីក្រុងវ៉ាស៊ីនតោន និងទីក្រុងតេអេរ៉ង់ សហរដ្ឋអាមេរិក បានបើកការវាយប្រហារជាច្រើនលើកទៅលើទឹកដីសាធារណរដ្ឋអ៊ិស្លាមអ៊ីរ៉ង់ ដោយអះអាងថា វាជាការឆ្លើយតបទៅនឹងការវាយប្រហារលើនាវាពាណិជ្ជកម្មមួយនៅច្រកសមុទ្រហ័រមូស។ នៅថ្ងៃដដែលនោះ ប្រធានាធិបតីអាមេរិក ដូណាល់ ត្រាំ បានបញ្ចប់បទឈប់បាញ់ជាមួយអ៊ីរ៉ង់។ ជាផ្នែកមួយនៃសកម្មភាពសងសឹករបស់ខ្លួន អ៊ីរ៉ង់បានចាប់ផ្តើមវាយប្រហារលើមូលដ្ឋានយោធារបស់សហរដ្ឋអាមេរិកនៅតំបន់មជ្ឈិមបូព៌ា រួមមាន បារ៉ែន ហ្សកដានី កាតា កូវ៉ែត អេមីរ៉ាតអារ៉ាប់រួម និងអូម៉ង់៕

មេដឹកនាំក្រុមហាម៉ាសបង្ហាញពីគោលដៅអាទិភាពរបស់ចលនានេះ

2026/07/23 05:08:46 pm        18
Facebook Telegram Linkin
លោក Khalil al-Hayya ប្រធានការិយាល័យនយោបាយនៃចលនាតស៊ូអ៊ិស្លាមហាម៉ាស បាននិយាយកាលពីថ្ងៃពុធថា គោលដៅអាទិភាពរបស់ចលនានេះ គឺការបញ្ចប់សង្គ្រាមនៅតំបន់ហ្កាហ្សា ការជំរុញការកសាងឡើងវិញ និងការទប់ស្កាត់ការផ្លាស់ទីលំនៅរបស់ប្រជាជនប៉ាឡេស្ទីន។នៅក្នុងសេចក្តីថ្លែងការណ៍តាមទូរទស្សន៍ លោក al-Hayya បាននិយាយថា ក្រុមហាម៉ាសស្វែងរកការបញ្ឈប់ទាំងស្រុងនូវការឈ្លានពាន និងការដកទ័ពទាំងអស់របស់អ៊ីស្រាអែលចេញពីតំបន់ហ្កាហ្សា។លោកបានបញ្ជាក់ថា ចលនានេះក៏មានគោលបំណងស្តារស្ថានភាពរស់នៅធម្មតាឡើងវិញ ទប់ស្កាត់ផែនការផ្លាស់ទីលំនៅ និងពន្លឿនការកសាងឡើងវិញ ដោយមិនធ្វើអ្វីដែលលោកពិពណ៌នាថា ជាសម្បទាននយោបាយទេ។លោក Al-Hayya បានពន្យល់ថា ក្រុមហាម៉ាសបានត្រៀមខ្លួនរួចជាស្រេចដើម្បីសហការជាមួយក្រុមប៉ាឡេស្ទីនទាំងអស់ ក្រោមកម្មវិធីជាតិដែលបានព្រមព្រៀងគ្នា ដែលរួមមានការសម្រេចបាននូវអាទិភាពរបស់ប្រជាជនប៉ាឡេស្ទីន ដោយសង្កត់ធ្ងន់ថា តំបន់ហ្កាហ្សា គឺជាផ្នែកមួយនៃ«អង្គភាពប៉ាឡេស្ទីន»៕

រុស្ស៊ីព្រមានអំពីហានិភ័យកាន់តែកើនឡើងចំពោះការដឹកជញ្ជូនតាមសមុទ្រ នៅច្រកសមុទ្រ និងសមុទ្រក្រហម

2026/07/23 04:58:15 pm        38
Facebook Telegram Linkin
អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានថ្លែងនៅក្នុងសេចក្តីថ្លែងការណ៍មួយថា ភាពតានតឹងនៅតំបន់ឈូងសមុទ្រពែក្ស កំពុងកើនឡើង ដោយបង្កឲ្យមានហានិភ័យនៃការរំខានដល់ការដឹកជញ្ជូនតាមសមុទ្រនៅច្រកសមុទ្រហ័រមូស និងសមុទ្រក្រហម។សេចក្តិថ្លែងការណ៍បានលើកឡើងថា៖«ជាអកុសល ភាពតានតឹងនៅក្នុងតំបន់ឈូងសមុទ្រពែក្ស នៅតែបន្តកើនឡើង។ ភាគីជម្លោះ នៅតែបន្តបាញ់ប្រហារគ្នាទៅវិញទៅមក ដែលបណ្តាលឲ្យមានការខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធស៊ីវិលនៅក្នុងប្រទេសអ៊ីរ៉ង់ និងប្រទេសអារ៉ាប់។ ហានិភ័យនៃការរំខានដល់ការដឹកជញ្ជូនតាមផ្លូវសមុទ្រនៅច្រកសមុទ្រហ័រមូស និងសមុទ្រក្រហម បានកើនឡើង។ ស្ថានការណ៍បច្ចុប្បន្ន កំពុងបង្កើតបញ្ហាប្រឈមបន្ថែមទៀតសម្រាប់កិច្ចខិតខំប្រឹងប្រែងសម្របសម្រួលក្នុងតំបន់ ដែលមានគោលបំណងស្តារដំណើរការចរចាឡើងវិញ ដោយផ្អែកលើអនុស្សរណៈអ៊ីស្លាម៉ាបាដ ដែលបានចុះហត្ថលេខាដោយសហរដ្ឋអាមេរិក និងអ៊ីរ៉ង់ កាលពីថ្ងៃទី១៧ ខែមិថុនា»៕

មនុស្សយន្ត​ស្រដៀង​​មនុស្ស ចូលរួមការប្រកួតបាល់ទាត់ដំបូងរបស់ចិន សម្រាប់ក្រុមរូបូតសិស្សអនុវិទ្យាល័យ

2026/07/23 04:55:52 pm        33
Facebook Telegram Linkin
វគ្គផ្តាច់ព្រ័ត្រនៃការ​ប្រកួត​បាល់ទាត់មនុស្ស​រូប​រាង​ស្រដៀង​មនុស្ស (Humanoid Robot) ដំបូងបង្អស់របស់ប្រទេសចិន សម្រាប់ក្រុមរូបូតសិស្សអនុវិទ្យាល័យ ត្រូវបានរៀបចំឡើងនៅរដ្ឋ​ធានីប៉េកាំង កាលពីថ្ងៃពុធ (ទី២២ ខែកក្កដា ឆ្នាំ២០២៦)។ មនុស្ស​យន្ត​រូបរាង​ដូច​មនុស្សទាំងនោះ បានចូល​ទៅក្នុង​ទីលាន នៅក្នុងព្រឹត្តិការ​ណ៍ប្រកួតកីឡាបាល់ទាត់នេះ។ដោយ​គ្មាន​ការ​បញ្ជា​ពីចម្ងាយ ឬ​ជំនួយ​ពី​ខាងក្រៅ មនុស្សយន្តទាំង​នេះ​​ត្រូវ​តែ «មើល» សម្រេចចិត្ត និង​ស៊ុត​បាល់​​ដោយ​ខ្លួនឯង ដោយ​ទាំងអស់នេះ​​ដំណើរការ​ដោយ​កូដ​ដែល​សរសេរ​ដោយ​សិស្ស។Zhang Huyu ដែលជាសិស្សមកពីសាលា Beijing National Day School Shijingshan បានប្រាប់អ្នកសារព័ត៌មាននៃទីភ្នាក់ងារសារព័ត៌មាន China News Service (CNS) ថា រូបគេចូលចិត្តទាំងមនុស្សយន្ត និងកីឡាបាល់ទាត់ ហើយពិតជាមានក្ដី​រីករាយខ្លាំងណាស់ ដែលបានរួម​បញ្ចូល​នូវ​ចំណង់ចំណូលចិត្តទាំង២ នេះជាមួយ​គ្នា​៕

មនុស្សជាង ១០០នាក់ស្លាប់ ក្នុងទឹកជំនន់នៅប្រទេសឥណ្ឌា ប៉ាគីស្ថាន និងអាហ្វហ្គានីស្ថាន

2026/07/23 11:53:03 pm        48
Facebook Telegram Linkin
មន្ត្រីបានប្រាប់​ឱ្យដឹង​កាលពីថ្ងៃពុធ (ទី២២ ខែកក្កដា ឆ្នាំ២០២៦) ថា ដោយមានអ្នកស្លាប់ថ្មី ១០​នាក់ ក្នុងរយៈពេល ២៤ម៉ោងចុងក្រោយនេះ ចំនួនអ្នកបាត់​បបង់​ជិវិត​ដោយសារទឹកជំនន់ ក្នុង​រដ្ឋ Assam នៅ​ភាគឦសាននៃ​ប្រទេសឥណ្ឌា បានកើនឡើងដល់ ៤១នាក់ហើយ ខណៈ​ភ្លៀងរដូវ​មូសុង បាន​បណ្ដាល​ឱ្យ​​មនុស្សជិត​ ៤០​នាក់សា្លប់ នៅទូទាំងប៉ាគីស្ថាន ហើយ​ទឹកជំនន់ និងបំណាក់​ដី បង្កជា​ការបំផ្លិចបំផ្លាញយ៉ាង​ធ្ងន់​ធ្ងរ​។សេចក្តីថ្លែងការណ៍មួយរបស់អាជ្ញាធរគ្រប់គ្រងគ្រោះមហន្តរាយរបស់​រដ្ឋនេះ​ បានឱ្យ​ដឹង​ថា ការស្លាប់ថ្មីត្រូវបានរាយការណ៍ពីតំបន់​ចំនួន ៥។ ជាមួយ​គ្នា​នេះ លោក Himanta Biswa Sarma រដ្ឋមន្ត្រី​ប្រចាំ​រដ្ឋ Assam បាននិយាយថា មនុស្សជាង ៧០០.០០០នាក់ បានរងផលប៉ះពាល់ នៅក្នុងគ្រោះមហន្តរាយនេះ ហើយមនុស្ស ៣នាក់នៅតែបាត់ខ្លួន។ លោកបានបន្ថែម​ថា «ភ្លៀងធ្លាក់ខ្លាំងភ្លាមៗ​ និង​ទឹកជំនន់ បានវាយប្រហារសូម្បីតែតំបន់​របស់​រដ្ឋ Assam ដែលមិនធ្លាប់រងគ្រោះ​បែបនេះពីមុនមក»។សម្រាប់​ប្រទេស​ប៉ាគីស្ថាន ឧប្បត្តិហេតុទាក់ទងនឹងភ្លៀង បាន​បណ្ដាល​ឱ្យ​មនុស្សយ៉ាង​តិច​ ៣៧នាក់​ស្លាប់​ ខណៈដែលរដូវមូសុង​ដែលកំពុង​បន្ត​មាន បង្កជា​ទឹកជំនន់គំហុក​ភ្លាមៗ និងបំណាញក់​ដី ដោយ​បាន​បំផ្លាញផ្ទះសម្បែង ដំណាំ សត្វពាហនៈ និងផ្លូវថ្នល់ នៅទូទាំងខេត្ត Khyber Pakhtunkhwa (KP) តំបន់​ Gilgit-Baltistan (GB) តំបន់​ Azad Jammu & Kashmir (AJK) និងរដ្ឋ​ Punjab។ចំនួនអ្នកស្លាប់ដោយសារទឹកជំនន់គំហុក​ភ្លាមៗ និងឧប្បត្តិហេតុផ្សេងទៀតដែលទាក់ទងនឹងភ្លៀង បានកើនឡើងដល់ ២០នាក់ នៅខេត្ត​ Khyber Pakhtunkhwa និង ១៧នាក់ នៅរដ្ឋ​ Punjab ខណៈដែលបំណាក់​ដីដែលបង្កឡើងដោយទឹក​ភ្លៀង នៅខេត្ត​ Khyber Pakhtunkhwa តំបន់ Gilgit-Baltistan និង Azad Jammu & Kashmir បានបំផ្លាញផ្លូវថ្នល់ ដំណាំ និងផ្ទះសម្បែង​។រីឯ​នៅទូទាំងភាគខាងកើតប្រទេសអាហ្វហ្គានីស្ថានវិញ​ ទឹក​ជំនន់គំហុក​ភ្លាមៗ បាន​ឆក់​យក​ជីវិតមនុស្ស​យ៉ាង​តិច ២៦នាក់ ​រួមទាំង ២៣នាក់នៅក្នុងខេត្ត Nuristan។ ក្រុមជួយសង្គ្រោះ​បានបន្តស្វែងរកមនុស្សដែលត្រូវបានគេរាយការណ៍ថា បាត់ខ្លួន ដោយសារ​គ្រោះធម្មជាតិនេះ​ ដែលបង្កឡើងដោយភ្លៀងធ្លាក់ខ្លាំងកាល​ថ្ងៃទី២០ ខែកក្កដា​៕

រដ្ឋមន្ត្រីការបរទេសចិន៖ ចិន និងឥណ្ឌាគួរតែពង្រឹងសន្ទុះវិជ្ជមាន ក្នុងទំនាក់ទំនងទ្វេភាគី

2026/07/23 11:43:21 pm        48
Facebook Telegram Linkin
នៅទីក្រុងម៉ានីល ប្រទេស​ហ្វីលីពីន នា​ថ្ងៃពុធ (ទី​២២ ខែកក្កដា ឆ្នាំ២០២៦) រដ្ឋមន្ត្រីការបរទេសចិន លោក Wang Yi បានលើក​ឡើង​ថា ប្រទេស​ចិន និងឥណ្ឌា គួរតែគិតគូរពីសុខុមាលភាពរបស់មនុស្សជាតិ បង្ហាញពីការទទួលខុសត្រូវ ក្នុងនាមជាប្រទេសធំ ពង្រឹងសន្ទុះវិជ្ជមាន ក្នុងទំនាក់ទំនងទ្វេភាគី និងជំរុញ​ការសម្របសម្រួល និងកិច្ចសហប្រតិបត្តិការ ក្នុងកិច្ចការអន្តរជាតិ និងតំបន់។លោក Wang ដែលក៏ជាសមាជិករបស់​ការិយាល័យនយោបាយនៃគណៈកម្មាធិការមជ្ឈិម​បក្សកុម្មុយនីស្តចិនផងដែរនោះ​ បានធ្វើការកត់សម្គាល់បែប​នេះ នៅពេលលោក​ជួបជាមួយរដ្ឋមន្ត្រីការបរទេសឥណ្ឌា លោក Subrahmanyam Jaishankar។ លោក Wang បានអំពាវនាវឱ្យប្រទេសទាំង២ ធ្វើការរួមចំណែកជាវិជ្ជមានដល់ការជំរុញពហុប៉ូល និងលទ្ធិប្រជាធិបតេយ្យកាន់តែទូលំទូលាយ ក្នុងទំនាក់ទំនងអន្តរជាតិ។ជាមួយ​គ្នានេះ លោក Wang បានបញ្ជាក់​បន្ថែម​ថា ប្រទេសចិនត្រៀមខ្លួនរួចជាស្រេច ក្នុង​ការ​ធ្វើការជាមួយឥណ្ឌា ដើម្បីអនុវត្តការយោគយល់គ្នាសំខាន់ៗដែលសម្រេចបានដោយមេដឹកនាំនៃប្រទេសទាំង២ រក្សាការផ្លាស់ប្តូរកម្រិតខ្ពស់យ៉ាងជិតស្និទ្ធ ពង្រឹងកិច្ចសហប្រតិបត្តិការ ក្នុងវិស័យនានា ក្នុង​នោះ​រួមទាំងសេដ្ឋកិច្ច និងពាណិជ្ជកម្មផង​ដែរ​ ប្រព័ន្ធផ្សព្វផ្សាយ និង​ការផ្លាស់ប្តូរប្រជាជន និង​ប្រជាជន​ និងវប្បធម៌ ហើយ​ដោះស្រាយបញ្ហារសើបឱ្យបានសមស្រប​។ចំពោះលោក Jaishankar លោក​បាន​ប្រាប់​ថា ជំហររបស់ប្រទេសឥណ្ឌា លើបញ្ហាទាក់ទងនឹងកោះ​តៃវ៉ាន់ និងតំបន់​ Xizang មិនមានការផ្លាស់ប្តូរឡើយ​ ហើយឥណ្ឌាគោរពអធិបតេយ្យភាពរបស់ចិន​។ លោកបានបន្ថែមថា ប្រទេសឥណ្ឌាបានជំរុញទំនាក់ទំនងទ្វេភាគីបែប​វិជ្ជមាន និងសហប្រតិបត្តិការជាប់លាប់ ជាមួយនឹងវិធីសាស្រ្តសម្លឹង​ទៅ​អនាគត​៕

ចិនចាប់ផ្តើមសមយុទ្ធបាញ់គ្រាប់ពិតរយៈពេល ២ថ្ងៃ នៅច្រកសមុទ្រតៃវ៉ាន់

2026/07/23 11:38:25 pm        51
Facebook Telegram Linkin
ប្រទេសចិនបានចាប់ផ្តើមសមយុទ្ធបាញ់គ្រាប់ពិតរយៈពេល ២ថ្ងៃ ចាប់ពីថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦ ក្នុងតំបន់មួយចំនួននៃច្រកសមុទ្រតៃវ៉ាន់ នៅ​ជិតឆ្នេរសមុទ្រនៃខេត្ត Fujian ភាគអាគ្នេយ៍​។ព័ត៌មាននៃ​សមយុទ្ធ​នេះបានកើតឡើងក្រោយ​មួយថ្ងៃបន្ទាប់ពីមាន​ការជួប​ពិភាក្សា រវាងរដ្ឋមន្ត្រីការបរទេសអាមេរិក លោក Marco Rubio និងរដ្ឋមន្ត្រីការបរទេសចិន លោក Wang Yi ស្ដី​ពី​បញ្ហាជាច្រើន ក្នុង​នោះ​រួមទាំងតៃវ៉ាន់ ជា​កោះ​ស្វ័យ​គ្រប់គ្រងដោយលទ្ធិប្រជាធិបតេយ្យ ដែលប្រទេសចិនអះអាងថា ជាទឹកដីរបស់ខ្លួន។អាជ្ញាធរដែនសមុទ្របានឱ្យដឹង​នៅក្នុងសេចក្តីជូនដំណឹងមួយថា សមយុទ្ធនេះនឹងប្រព្រឹត្តទៅ​ចាប់ពីម៉ោង ៦ព្រឹក ដល់ម៉ោង ៦ល្ងាច (ម៉ោង​ក្នុង​ស្រុក) ជារៀងរាល់ថ្ងៃ នៅជុំវិញកោះ Dongshan ដែលមានព្រំប្រទល់ជាប់នឹងខេត្ត Guangdong។គួរ​បញ្ជាក់ថា ប្រទេសចិនបានធ្វើសមយុទ្ធទ្រង់ទ្រាយធំបំផុតរបស់ខ្លួន ដោយឡោមព័ទ្ធកោះតៃវ៉ាន់ កាលពីខែធ្នូឆ្នាំមុន​ បន្ទាប់ពីសហរដ្ឋអាមេរិកបានប្រកាសកញ្ចប់លក់​អាវុធតម្លៃខ្ពស់បំផុត​ ១១,១ពាន់លាន​ដុល្លារ សម្រាប់កោះនេះ ដែលរដ្ឋបាលរបស់កោះ​​បដិសេធការអះអាង​សិទ្ធិ​អធិបតេយ្យរបស់ចិន៕

ចិនបញ្ជាក់​ថា ខ្លួនបានបណ្តេញនាវាហ្វីលីពីន ជា​ឧប្បត្តិហេតុ​​​ថ្មី នៅសមុទ្រចិនខាងត្បូង

2026/07/23 11:35:31 pm        52
Facebook Telegram Linkin
ប្រទេសចិន បាន​ឱ្យ​ដឹង​នៅ​ថ្ងៃព្រហស្បតិ៍ (ទី​២៣ ខែកក្កដា ឆ្នាំ២០២៦) នេះ​ថា ខ្លួនបានតាមដាន និងបណ្តេញនាវាហ្វីលីពីន ២គ្រឿង ដែលខ្លួនចោទប្រកាន់ថា បាន «រំលោភបំពាន» ចូលទៅក្នុងដែនទឹក នៅជិតតំបន់មាន​ជម្លោះ​ Scarborough Shoal ទោះបីជាមានការព្រមានក៏ដោយ ដោយ​នេះគឺ​ជាឧប្បត្តិហេតុលើក​ទី២ ក្នុងសប្តាហ៍នេះ នៅក្នុងសមុទ្រចិនខាងត្បូងដែលពាក់ព័ន្ធនឹងប្រទេសទាំង២។ចំណុចប្រឈម​មុខ​ដាក់​គ្នា​ក្ដៅ​គគុក​ ដែល​ជាទីតាំងសមុទ្រមានជម្លោះបំផុតមួយ នៅអាស៊ី គឺតំបន់ថ្មប៉ប្រះទឹក​ Scarborough Shoal ត្រូវបានទាមទារ ទាំងពី​ហ្វីលីពីន និងចិន ដែលហៅវាថា «Huangyan Dao»។ខណៈពេលដែលបញ្ជាក់ជាថ្មី អំពីអធិបតេយ្យភាព លើតំបន់មានជម្លោះ ឆ្មាំល្បាត​ឆ្នេរចិន បានឱ្យដឹង​នៅក្នុងសេចក្តីថ្លែងការណ៍មួយថា៖ «យើងសូមអំពាវនាវឱ្យហ្វីលីពីនបញ្ឈប់ជាបន្ទាន់​នូវ​សកម្មភាពរំលោភបំពាន និងបង្ក​ហេតុ​របស់ខ្លួន»។សេចក្ដី​ថ្លែង​ការណ៍​បាន​បន្ថែម​ថា ឆ្មាំសមុទ្របានចាត់វិធានការចាំបាច់ ដូចជាការតាមដាន ការត្រួតពិនិត្យ និងការស្ទាក់ ដើម្បីបណ្តេញនាវាហ្វីលីពីនចេញ ដោយហៅសកម្មភាពទាំងនោះថា ជាការ​ធ្វើ​ប្រកប​ដោយ​ «ស្តង់ដារ វិជ្ជាជីវៈ និងស្របច្បាប់»។ឆ្មាំល្បាត​ឆ្នេរ​ហ្វីលីពីន និងស្ថានទូតហ្វីលីពីន នៅទីក្រុងប៉េកាំងមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ។គួរ​បញ្ជាក់​ថា ការកត់សម្គាល់នេះបានកើតឡើងក្រោយ​​ការតវ៉ារបស់ភាគីទាំង២ នៅសប្តាហ៍នេះ បន្ទាប់​ពី​មាន​​ការប៉ះទង្គិចគ្នា រវាងទីក្រុងប៉េកាំង និងម៉ានីល នៅក្នុងតំបន់ថ្ម​ប៉ប្រះ​ទឹក​ Second Thomas Shoal ដែលជាទីតាំងមួយផ្សេងទៀត នៅក្នុងផ្លូវទឹកដ៏មមាញឹកនៃសមុទ្រចិនខាងត្បូង៕

អ៊ីរ៉ង់ព្រមានកំណត់គោលដៅទីតាំង​ថាមពលក្នុង​តំបន់ បើអាមេរិកវាយប្រហារហេដ្ឋារចនាសម្ព័ន្ធរបស់ខ្លួន​​

2026/07/23 11:32:20 pm        57
Facebook Telegram Linkin
យោធាអ៊ីរ៉ង់ កាលពីល្ងាចថ្ងៃពុធ (ទី២២ ខែកក្កដា ឆ្នាំ​២០២៦) បាន​បញ្ជាក់​ថា ខ្លួននឹងកំណត់គោលដៅទី​តាំង​ថាមពល នៅទូទាំងតំបន់មជ្ឈិម​បូព៌ា ប្រសិនបើសហរដ្ឋអាមេរិកវាយប្រហារហេដ្ឋារចនាសម្ព័ន្ធរបស់ប្រទេស។ទីស្នាក់ការកណ្តាល Khatam al-Anbiya បានប្រាប់​ថា ប្រសិនបើទីក្រុងវ៉ាស៊ីនតោនអនុវត្តការគំរាមកំហែងរបស់ខ្លួន កងកម្លាំងប្រដាប់អាវុធអ៊ីរ៉ង់ «នឹងមិនអនុញ្ញាតឱ្យមាន​ការ​នាំចេញប្រេងសូម្បីតែមួយដំណក់» ដោយបាន​បន្ថែមថា ទីតាំង​ប្រេង ឧស្ម័ន អគ្គិសនី និងសេដ្ឋកិច្ច នៅទូទាំងតំបន់ នឹងក្លាយជាគោលដៅ។ជាមួយ​គ្នានេះ ទីស្នាក់ការកណ្តាលយោធា​នេះ បានឱ្យដឹង​ទៀត​ថា ច្រកសមុទ្រ Hormuz នៅតែបិទដដែល​ ដោយព្រមានថា គ្មាននាវាណាមួយអាចឆ្លងកាត់ផ្លូវទឹកយុទ្ធសាស្ត្រនេះ​បានទេ លើកលែងតែឆ្លងកាត់ផ្លូវដែលត្រូវ​បានកំណត់ក្រោមនីតិវិធីប្រកាសពីមុន។ជាង​នេះ​ទៀត ទីស្នាក់ការកណ្តាលកងកម្លាំងប្រដាប់អាវុធមួយ​នេះ ក៏បានព្រមានផងដែរថា ការគំរាមកំហែង និងសកម្មភាពរបស់សហរដ្ឋអាមេរិកជាបន្តបន្ទាប់ នឹងពង្រីកវិសាលភាពនៃជម្លោះ «ដល់តំបន់ទាំងមូល និងសូម្បីតែលើសពីនេះ»។គួរបញ្ជាក់ថា សហរដ្ឋអាមេរិកបានធ្វើការវាយប្រហារជាបន្តបន្ទាប់ នៅទូទាំងប្រទេស​អ៊ីរ៉ង់ ចាប់តាំងពីសប្តាហ៍មុន ខណៈពេលដែលទីក្រុងតេអេរ៉ង់បានឆ្លើយតបជាមួយនឹងការវាយប្រហារដែលកំណត់គោលដៅលើ​ទីតាំង​ និងមូលដ្ឋាន ដែលខ្លួនចាត់ទុក​ថា ត្រូវបានប្រើប្រាស់ដោយយោធាអាមេរិកក្នុងប្រទេសជាច្រើន នៅទូទាំងតំបន់៕

បណ្ដាញសង្គម

ព័ត៌មានថ្មីៗ

អ្នកជំនាញ៖ អាមេរិកអាចនឹងប្រើប្រាស់បទឈប់បាញ់ថ្មីជាមួយអ៊ីរ៉ង់ ដើម្បីរៀបចំផែនការប្រតិបត្តិការជើងគោក
07/23/2026 05:07 PM
Facebook Telegram Linkin
MLS បើកការស៊ើបអង្កេតលើ Inter Miami ជុំវិញការចោទប្រកាន់ថាបានទាក់ទង Casemiro ដោយមិនគោរពបទប្បញ្ញត្តិ
07/23/2026 05:07 PM
Facebook Telegram Linkin
ប្រធានសភា៖ គ្មានប្រទេសណាមួយក្នុងតំបន់នឹងត្រូវអនុញ្ញាតឲ្យលក់ប្រេងបានទេ ប្រសិនបើអ៊ីរ៉ង់ត្រូវបានបដិសេធឱកាសនេះ
07/23/2026 05:07 PM
Facebook Telegram Linkin
មេដឹកនាំក្រុមហាម៉ាសបង្ហាញពីគោលដៅអាទិភាពរបស់ចលនានេះ
07/23/2026 05:07 PM
Facebook Telegram Linkin
រុស្ស៊ីព្រមានអំពីហានិភ័យកាន់តែកើនឡើងចំពោះការដឹកជញ្ជូនតាមសមុទ្រ នៅច្រកសមុទ្រ និងសមុទ្រក្រហម
07/23/2026 04:07 PM
Facebook Telegram Linkin
មនុស្សយន្ត​ស្រដៀង​​មនុស្ស ចូលរួមការប្រកួតបាល់ទាត់ដំបូងរបស់ចិន សម្រាប់ក្រុមរូបូតសិស្សអនុវិទ្យាល័យ
07/23/2026 04:07 PM
Facebook Telegram Linkin
មនុស្សជាង ១០០នាក់ស្លាប់ ក្នុងទឹកជំនន់នៅប្រទេសឥណ្ឌា ប៉ាគីស្ថាន និងអាហ្វហ្គានីស្ថាន
07/23/2026 04:07 PM
Facebook Telegram Linkin
រដ្ឋមន្ត្រីការបរទេសចិន៖ ចិន និងឥណ្ឌាគួរតែពង្រឹងសន្ទុះវិជ្ជមាន ក្នុងទំនាក់ទំនងទ្វេភាគី
07/23/2026 04:07 PM
Facebook Telegram Linkin
គណៈកម្មាធិការសិទ្ធិមនុស្សកម្ពុជា ជួបជាមួយអ្នករាយការណ៍ពិសេស អ.ស.ប បន្ទុក​ស្ថានភាព​សិទ្ធិ​មនុស្ស​នៅកម្ពុជា
07/23/2026 04:07 PM
Facebook Telegram Linkin
ចិនចាប់ផ្តើមសមយុទ្ធបាញ់គ្រាប់ពិតរយៈពេល ២ថ្ងៃ នៅច្រកសមុទ្រតៃវ៉ាន់
07/23/2026 04:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.