នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំ​ចេញ​ដោយសុវត្ថិភាព
លោក Hegseth៖ យុគ​សម័យឧបត្ថម្ភធនការពារជាតិ​ពីអាមេរិក សម្រាប់ «ប្រទេសអ្នកមាន» ចប់ហើយ
មន្ត្រីជាន់ខ្ពស់អ៊ីរ៉ង់ និយាយ​ថា លោក Trump «ក្បត់ការទូត» ដោយបន្តបិទខ្ទប់​ដោយទ័ព​ជើង​ទឹក​​អាមេរិក
វេជ្ជបណ្ឌិត៖ សុខភាព​លោក Trump គឺ​ល្អប្រសើរណាស់​ ប៉ុន្តែ​គួរតែសម្រកទម្ងន់

ព័ត៌មានអន្តរជាតិ

ខ្មាន់កាំភ្លើងបើកការបាញ់ប្រហារនៅទីតាំង ២កន្លែង ក្នុងរដ្ឋធានីរបស់ក្រិក បណ្តាលឲ្យមនុស្សរងរបួសជាច្រើននាក់

2026/04/28 06:31:25 pm        43
Facebook Telegram Linkin
អាជ្ញាធរក្រិកបានឲ្យដឹងថា ខ្មាន់កាំភ្លើងមួយរូប បានបើកការបាញ់ប្រហារនៅការិយាល័យសន្តិសុខសង្គម និងនៅតុលាការមួយកន្លែង នៅកណ្តាលទីក្រុងអាតែន នាថ្ងៃអង្គារ (ទី២៨ ខែមេសា ឆ្នាំ២០២៦) នេះ បណ្តាលឲ្យមនុស្សជាច្រើននាក់រងរបួស។ ប្រតិបត្តិការរបស់នគរបាល កំពុងដំណើរការ ដើម្បីស្វែងរកជនល្មើស ដែលប្រព័ន្ធផ្សព្វផ្សាយក្រិក បានរាយការណ៍ថា ជាបុរសវ័យ ៨៩ឆ្នាំ។នគរបាលបានបញ្ជាក់ថា ជនសង្ស័យម្នាក់ដែលប្រដាប់ដោយកាំភ្លើងខ្លី ដំបូងឡើយបានបើកការបាញ់ប្រហារ នៅការិយាល័យសន្តិសុខសង្គម នៅកណ្តាលរដ្ឋធានីរបស់ប្រទេសក្រិក បណ្តាលឲ្យបុគ្គលិកម្នាក់រងរបួស។ មន្ត្រីនគរបាលដែលបានមកដល់កន្លែងកើតហេតុ បានព្យាបាលបុរសនោះ ប៉ុន្តែខ្មាន់កាំភ្លើង បានរត់គេចខ្លួន។នគរបាលបានឲ្យដឹងទៀតថា បុរសដដែល ត្រូវបានសង្ស័យថា ក្រោយមក បានបើកការបាញ់ប្រហារនៅជាន់ផ្ទាល់ដីនៃអគារតុលាការមួយកន្លែង នៅទីក្រុងអាតែន ដោយមានមនុស្សជាច្រើននាក់រងរបួសនៅទីនោះ ដោយបន្ថែមថា អាជ្ញាធរបានរកឃើញកាំភ្លើងខ្លីនោះ។វីដេអូពីប្រព័ន្ធផ្សព្វផ្សាយរដ្ឋ ERT News បានបង្ហាញបុគ្គលិករថយន្តសង្គ្រោះបន្ទាន់ កំពុងយកមនុស្សយ៉ាងហោចណាស់ ៣នាក់ ពីតុលាការ ទៅកាន់រថយន្តសង្គ្រោះបន្ទាន់។មូលហេតុនៃការបាញ់ប្រហារនេះ មិនទាន់ដឹងច្បាស់លាស់នៅឡើយទេ។ ប្រព័ន្ធផ្សព្វផ្សាយ ERT បានឲ្យដឹងថា ខ្មាន់កាំភ្លើងត្រូវបានគេរាយការណ៍ថា បានបោះស្រោមសំបុត្រដែលមានឯកសារទៅលើឥដ្ឋ ក្រោយការបាញ់ប្រហារនៅតុលាការ ដោយរៀបរាប់ថា ទាំងនោះជាមូលហេតុនៃការធ្វើសកម្មភាពរបស់គាត់៕

កូរ៉េខាងត្បូងអំពាវនាវឲ្យមានវិធានការសកលបន្ទាន់ ជុំវិញបញ្ហានុយក្លេអ៊ែរកូរ៉េខាងជើង

2026/04/28 05:58:23 pm        71
Facebook Telegram Linkin
ទីភ្នាក់ងារសារព័ត៌មាន Yonhap នៅថ្ងៃអង្គារ (ទី២៨ ខែមេសា ឆ្នាំ២០២៦) នេះ បានរាយការណ៍ថា ប្រទេសកូរ៉េខាងត្បូងបានអំពាវនាវឲ្យមានវិធានការជាអន្តរជាតិយ៉ាងឆាប់រហ័ស ដើម្បីដោះស្រាយបញ្ហានុយក្លេអ៊ែររបស់កូរ៉េខាងជើង ដោយចាត់ទុកថា នេះគឺជាការគំរាមកំហែងដ៏បន្ទាន់បំផុត ចំពោះប្រព័ន្ធមិនរីកសាយភាយអាវុធនុយក្លេអ៊ែរទូទាំងពិភពលោក។អនុរដ្ឋមន្ត្រីការបរទេស លោក Jeong Yeon-doo បានធ្វើការកត់សម្គាល់បែបនេះ ក្នុងអំឡុងពេលមានសន្និសីទ ស្តីពីសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) នៅទីក្រុងញូវយ៉ក សហរដ្ឋអាមេរិក ដោយសង្កត់ធ្ងន់ថា ទីក្រុងព្យុងយ៉ាង នៅតែជាបញ្ហាប្រឈមតែមួយគត់ បន្ទាប់ពីបានដកខ្លួនចេញពីសន្ធិសញ្ញា និងបន្តការអភិវឌ្ឍអាវុធនុយក្លេអ៊ែររបស់ខ្លួន។លោក Jeong បាននិយាយថា៖ «កូរ៉េខាងជើង គឺជាករណីតែមួយគត់ដែលទទួលបានអត្ថប្រយោជន៍ពីប្រព័ន្ធ NPT ប្រកាសដកខ្លួនចេញ និងបន្តការអភិវឌ្ឍអាវុធនុយក្លេអ៊ែរដោយបើកចំហ ដោយហេតុនេះ នេះនៅតែជាបញ្ហាប្រឈមដ៏បន្ទាន់បំផុត ចំពោះប្រព័ន្ធមិនរីកសាយភាយអាវុធនុយក្លេអ៊ែរ»។ជាមួយគ្នានេះ លោកបានជំរុញឲ្យសហគមន៍អន្តរជាតិផ្តល់សាររួមមួយ ដែលថា អនាគតសន្តិសុខ និងសេដ្ឋកិច្ចរបស់កូរ៉េខាងជើង ពឹងផ្អែកលើការវិលត្រឡប់ទៅរកក្របខ័ណ្ឌសន្ធិសញ្ញាវិញ៕

ដោយគ្មានកិច្ចប្រជុំផ្ទាល់ ក្រុមអ្នកសម្របសម្រួលព្យាយាមបំពេញចន្លោះប្រហោងរវាងអាមេរិក និងអ៊ីរ៉ង់

2026/04/28 05:55:30 pm        71
Facebook Telegram Linkin
ដោយគ្មានកិច្ចប្រជុំការទូតទល់មុខគ្នាបែបនេះ ក្តីសង្ឃឹមនៃការស្រោចស្រង់កិច្ចខិតខំសន្តិភាពហាក់លែងមាន ប៉ុន្តែប្រភពពីប៉ាគីស្ថាបបានឲ្យដឹងថា ការងារពុំទាន់បានបញ្ឈប់នោះទេ ក្នុងការព្យាយាមបំពេញចន្លោះប្រហោងរវាងទីក្រុងតេអេរ៉ង់ និងទីក្រុងវ៉ាស៊ីនតោន ។ ទោះបីជាយ៉ាងណាក៏ដោយ មន្រ្តីការទូតពុំមានវត្តមានៅប្រទេសប៉ាគីស្ថាននោះទេ សម្រាប់កិច្ចប្រជុំស្វែងរកសន្តិភាពជាមួយសហរដ្ឋអាមេរិក ក្រោយលោកប្រធានាធិបតី Donald Trump លុបចោលដំណើរទស្សនកិច្ចតាមការគ្រោងទុករបស់ប្រេសិតពិសេសរបស់លោកទៅកាន់ទីក្រុងអ៊ីស្លាម៉ាបាដ ។ រដ្ឋមន្រ្តីការបរទេសអ៊ីរ៉ង់លោក Abbas Araqchi បានបំពេញទស្សនកិច្ចទៅកាន់ទីក្រុង Saint Petersburg កាលពីថ្ងៃចន្ទ ជាទីដែលលោកបានជួបពិភាក្សាការងារជាមួយប្រធានាធិបតីរុស្ស៊ីលោក Vladimir Putin ។ លោកថា ប៉ាគីស្ថាន ដើរតួជាអ្នកសម្របសម្រួលដ៏សំខាន់ នៅក្នុងកិច្ចចរចាស្វែងរកសន្តិភាពរវាងអាមេរិក និងអ៊ីរ៉ង់ ។ ប្រភពអ៊ីរ៉ង់បានបញ្ចេញនូវសំណើចុងក្រោយរបស់ពួកគេកាលពីថ្ងៃចន្ទ ដែលដកចេញការជជែកគ្នាពីកម្មវិធីនុយក្លេអ៊ែរអ៊ីរ៉ង់ រហូតដល់សង្រ្គាមត្រូវបានបញ្ចប់ ហើយនិងជម្លោះជុំវិញការដឹកជញ្ជូនចេញពីតំបន់ឈូងសមុទ្រ ត្រូវបានដោះស្រាយរួចរាល់ ។ សំណើចុងក្រោយនេះ ទំនងជាធ្វើឲ្យទីក្រុងវ៉ាស៊ីនតោនមិនពេញចិត្តនោះទេដែលពួកគេធ្លាប់និយាយរួចហើយថា បញ្ហានុយក្លេអ៊ែរ ត្រូវតែដោះស្រាយគ្នាតាំងពីដើមទីមកម្ល៉េះ ។ សូមបញ្ជាក់ថា អ៊ីរ៉ង់ បានបិទការដឹកជញ្ជូនភាគច្រើនចេញពីកំពង់ផែនៅតំបន់ឈូងសមុទ្រ ឆ្លងកាត់ច្រកសមុទ្រ Hormuz ចាប់តាំងពីសង្រ្គាមផ្ទុះឡើង ៕

NGO៖ មនុស្សរាប់ពាន់នាក់ត្រូវបានឃុំខ្លួនដោយកងកម្លាំងប្រដាប់អាវុធ RSF នៅស៊ូដង់

2026/04/28 05:52:40 pm        60
Facebook Telegram Linkin
អង្គការមិនមែនរដ្ឋាភិបាលក្នុងស្រុកមួយបាននិយាយថា មនុស្សរាប់ពាន់នាក់នៅតែត្រូវបានឃុំខ្លួនក្នុងស្ថានភាពមិនល្អដោយកងកម្លាំងគាំទ្ររហ័សយោធាប៉ារ៉ា (RSF) នៅទីក្រុង el-Fasher ភាគខាងលិចប្រទេសស៊ូដង់ ។ បណ្តាញគ្រូពេទ្យស៊ូដង់ បាននិយាយកាលពីថ្ងៃចន្ទថា វេជ្ជបណ្ឌិតចំនួន២០នាក់ ជនស៊ីវិលជាង១.៤៧០នាក់ និងបុគ្គលិកយោធា៩០៧នាក់ កំពុងត្រូវបានឃុំខ្លួនក្នុងស្ថានភាព «ធ្ងន់ធ្ងរ» នៅក្នុងមណ្ឌលឃុំឃាំងជាច្រើនកន្លែងក្នុងទីក្រុង។ ក្រុមយោធាប៉ារ៉ា RSF ត្រូវបានចោទប្រកាន់ពីបទឧក្រិដ្ឋកម្មប្រឆាំងមនុស្សជាតិជាច្រើនករណីក្នុងអំឡុងពេលជម្លោះនៅក្នុងប្រទេសអាហ្វ្រិកខាងលិច ដែលបច្ចុប្បន្នបានឈានចូលដល់រយៈពេលបីឆ្នាំ។ រហូតដល់ធ្លាក់ចូលទៅក្នុងដៃរបស់កងកម្លាំងគាំទ្ររហ័ស(RSF) កាលពីចុងខែតុលា ទីក្រុងel-Fasher គឺជាទីតាំងលាក់ខ្លួនចុងក្រោយរបស់កងទ័ពស៊ូដង់នៅក្នុងតំបន់Darfurភាគខាងលិចដ៏ធំទូលាយ។ អង្គការសហប្រជាជាតិបាននិយាយថា កងកម្លាំងគាំទ្ររហ័ស(RSF) និងកងកម្លាំងប្រដាប់អាវុធស៊ូដង់(SAF) បានប្រយុទ្ធគ្នាក្នុងសង្គ្រាមស៊ីវិលដ៏បង្ហូរឈាមចាប់តាំងពីខែមេសា ឆ្នាំ២០២៣ ដែលបានសម្លាប់មនុស្សរាប់ម៉ឺននាក់ និងធ្វើឱ្យមនុស្សរាប់លាននាក់ជម្លៀសខ្លួន ដែលបានបង្កើតជា «វិបត្តិមនុស្សធម៌ដ៏អាក្រក់បំផុតរបស់ពិភពលោក»។ អង្គការមិនមែនរដ្ឋាភិបាល បាននិយាយនៅក្នុងសេចក្តីថ្លែងការណ៍ថា កងកម្លាំងគាំទ្ររហ័ស(RSF) ត្រូវបានគេរាយការណ៍ថា កំពុងប្រព្រឹត្ត «ការរំលោភបំពានធ្ងន់ធ្ងរ» នៅក្នុងមណ្ឌលឃុំឃាំង ក្នុងទីក្រុង el-Fasher «រួមមានទាំងការសម្លាប់ក្នុងអំឡុងពេលធ្វើទារុណកម្ម និងការសួរចម្លើយ ព្រមទាំងការសម្លាប់ដែលជំរុញដោយក្រុមកុលសម្ព័ន្ធ»។

រដ្ឋមន្រ្តីការបរទេសជប៉ុន និងអូស្រ្តាលី ពិភាក្សាលើខ្សែចង្វាក់ផ្គត់ផ្គង់ថាមពលនៅទីក្រុងតូក្យូ

2026/04/28 05:49:46 pm        56
Facebook Telegram Linkin
 រដ្ឋមន្រ្តីការបរទេសជប៉ុនលោក Toshimitsu Motegi បានជួបជាមួយសមភាគីអូស្រ្តាលីលោកស្រី Penny Wong នៅទីក្រុងតូក្យូនាថ្ងៃអង្គារនេះ ស្របពេលដែលកិច្ចប្រជុំសន្តិភាពជាប់គាំងរវាងអ៊ីរ៉ង់ និងសហរដ្ឋអាមេរិក នៅតែបន្តធ្វើឲ្យអាក់ខានដល់ខ្សែចង្វាក់ផ្គត់ផ្គង់ថាមពល ក្នុងតំបន់អាស៊ី-ប៉ាស៊ីហ្វិក ។ លោកស្រី Wongនិយាយថា ទំនាក់ទំនងរវាងអូស្រ្តាលី និងជប៉ុន នឹងដើរតួនាទីសំខាន់ ស្របពេលដែលច្រកសមុទ្រ Hormuz នៅតែបន្តបិទចំពោះការធ្វើនាវាចរណ៍តាមសមុទ្រ ។លោកស្រីបន្តថា ខ្សែចង្វាក់ផ្គត់ផ្គង់របស់ពួកយើង មានទំនាក់ទំនងយ៉ាងជិតស្និទ្ធ ។ ការនាំចូលប្រេងពីប្រទេសដៃគូដូចជាជប៉ុន នឹងជំរុញឲ្យអូស្រ្តាលីបន្តក្លាយជាប្រទេសនាំចេញថាមពល និងចំណីអាហារដ៏គួរឲ្យទុកចិត្តទៅកាន់ពិភពលោក ។ ជំនួបរដ្ឋមន្រ្តីការបរទេសនេះដែរ បានកើតមានឡើង មុនដំណើរទស្សនកិច្ចរបស់នាយករដ្ឋមន្រ្តីជប៉ុនលោកស្រី Sanae Takaichi ទៅកាន់ទីក្រុង Canberra នាសប្តាហ៍ក្រោយ ។ អូស្រ្តាលីដែលនាំចូលប្រេងភាគច្រើនរបស់ខ្លួននោះ បានជួបកង្វះខាតក្នុងស្រុក អំឡុងសង្រ្កាមតំបន់មជ្ឈិមបូព៌ា ដែលបានចាប់ផ្តើមកាលពីចុងខែកុម្ភៈ ពេលដែលសហរដ្ឋអាមេរិក និងអ៊ីស្រាអែល រួមដៃគ្នាបើកការវាយប្រហារលើអ៊ីរ៉ង់ ៕

យោធាប្រទេសនីហ្សេរីយ៉ា គាំទ្រក្រុមហ៊ុនបច្ចេកវិទ្យាការពារជាតិក្នុងស្រុក

2026/04/28 05:47:36 pm        65
Facebook Telegram Linkin
ក្រុមហ៊ុនបច្ចេកវិទ្យាការពារជាតិរបស់ប្រទេសនីហ្សេរីយ៉ា Terra Industries បានធ្វើឲ្យមានការទាក់ទាញចំណាប់អារម្មណ៍កាលពីថ្ងៃចន្ទដោយការបង្ហាញប្រព័ន្ធការពារជាតិស្វ័យប្រវត្តិចុងក្រោយរបស់ខ្លួន។ ការចាប់ផ្តើមដំណើរការនេះ បង្ហាញពីការផ្លាស់ប្តូរការផ្តោតសំខាន់របស់ក្រុមហ៊ុនពីសន្តិសុខហេដ្ឋារចនាសម្ព័ន្ធពាណិជ្ជកម្ម ទៅជាការអនុវត្តផ្នែកយោធាដោយផ្ទាល់ជាមួយកងកម្លាំងប្រដាប់អាវុធរបស់ប្រទេសនីហ្សេរីយ៉ា។លោក Nathan Nwachuku សហស្ថាបនិកនៃក្រុមហ៊ុន Terra Industries បាននិយាយថា «ថ្ងៃនេះ យើងកំពុងបង្ហាញប្រព័ន្ធការពារជាតិថ្មីៗដូចជា យានដ្រូនស្ទាក់ចាប់ ឧបករណ៍បោសសម្អាតគ្រាប់មីន យានដែលអាចរកឃើញឧបករណ៍បំផ្ទុះកែច្នៃនៅលើដី និងកម្មវិធី software ស៊ើបការណ៍សម្ងាត់នៅសមរភូមិរបស់យើង ដែលនឹងអាចធ្វើស្វ័យប្រវត្តិកម្មដំណើរការរៀបចំផែនការ និងសម្របសម្រួលយោធា។ ប៉ុន្តែហួសពីនេះ យើងក៏បានបង្ហាញពីការត្រៀមខ្លួនសម្រាប់ប្រតិបត្តិការនៅសមរភូមិ និងការដាក់ពង្រាយជាក់ស្តែងនៅសមរភូមិ»។ក្រុមហ៊ុន Terra Industries បានចុះហត្ថលេខាលើកិច្ចព្រមព្រៀងវិនិយោគរួមគ្នាជាមួយសាជីវកម្មឧស្សាហកម្មការពារជាតិ (DICON) គ្រប់គ្រងដោយរដ្ឋនីហ្សេរីយ៉ា កាលពីខែកុម្ភៈ។ លោក Babatunde Ayala អគ្គនាយកសាជីវកម្មនេះ បាននិយាយថា កិច្ចសហការគឺចាំបាច់។បច្ចុប្បន្នក្រុមហ៊ុន Terra Industries ការពារមូលដ្ឋានហេដ្ឋារចនាសម្ព័ន្ធមានតម្លៃប្រហែល ១១ ពាន់លានដុល្លារនៅទូទាំងទ្វីបអាហ្វ្រិក។

ប្រមុខអង្គការសមុទ្រអន្តរជាតិ អំពាវនាវឱ្យមានការគាំទ្រពីអន្តរជាតិសម្រាប់ការជម្លៀសនាវិកពីច្រកសមុទ្រ Hormuz

2026/04/28 05:45:19 pm        67
Facebook Telegram Linkin
លោក Arsenio Dominguez អគ្គលេខាធិការអង្គការសមុទ្រអន្តរជាតិ (IMO) បានអំពាវនាវឱ្យមានការគាំទ្រពីអន្តរជាតិសម្រាប់ការជម្លៀសនាវិកដែលជាប់ខ្លួននៅច្រកសមុទ្រ Hormuz។ នៅក្នុងសន្និសីទសារព័ត៌មានរបស់លោកទៅកាន់ក្រុមប្រឹក្សាសន្តិសុខស្តីពី «សុវត្ថិភាព និងការការពារផ្លូវទឹកនៅក្នុងដែនសមុទ្រ» លោក Dominguez បានស្នើសុំឱ្យរដ្ឋនានា គាំទ្រផែនការរបស់អង្គការសមុទ្រអន្តរជាតិ (IMO) ដើម្បីសម្រួលដល់ការជម្លៀសនាវិកដែលរងផលប៉ះពាល់។ជម្លោះភូមិសាស្ត្រនយោបាយជុំវិញច្រកសមុទ្រ Hormuz កំពុងមានផលប៉ះពាល់អវិជ្ជមានយ៉ាងខ្លាំងទៅលើនាវិក និងការដឹកជញ្ជូនទំនិញព្រមទាំងទៅលើប្រជាជន និងសេដ្ឋកិច្ចពិភពលោក។ លោក Dominguez បាននិយាយថា នាវិកប្រហែល ២០.០០០នាក់ និងនាវាជិត ២.០០០គ្រឿងនៅតែជាប់គាំងនៅឈូងសមុទ្រពែក្ស។លោកបានស្នើសុំឱ្យរដ្ឋនានាផ្តល់ជំនួយបច្ចេកទេស និងប្រតិបត្តិការស៊ីវិលណាមួយ ដើម្បីដំណើរការក្របខ័ណ្ឌជម្លៀសរបស់អង្គការសមុទ្រអន្តរជាតិ (IMO)។ លោកក៏បានស្នើសុំឱ្យរដ្ឋនានា ជួយបោសសំអាតគ្រោះថ្នាក់ចំពោះនាវាពាណិជ្ជកម្មដែលកំពុងធ្វើនាវាចរណ៍នៅច្រកសមុទ្រ Hormuz រួមទាំងបោសសម្អាតគ្រាប់មីនផងដែរ។លោក Dominguez បានស្នើសុំបន្ថែមទៀតថា រដ្ឋនានាត្រូវផ្តល់ការធានាជាក់ស្តែងដល់វិស័យដឹកជញ្ជូន រួមទាំងការទទួលបានធានារ៉ាប់រងក្នុងតម្លៃសមរម្យ ដើម្បីឱ្យអាចបន្តប្រតិបត្តិការជាប្រក្រតីឡើងវិញ បានកាន់តែឆាប់ តាមដែលអាចធ្វើទៅបាន។

នាយករដ្ឋមន្ត្រី៖ ការវាយប្រហារភេរវកម្ម មានគោលបំណងដណ្តើមអំណាច និងធ្វើឱ្យអន្តរកាលនៅម៉ាលីរង្គោះរង្គើ

2026/04/28 05:42:45 pm        73
Facebook Telegram Linkin
នាយករដ្ឋមន្ត្រីប្រទេសម៉ាលី លោក Abdoulaye Maiga បាននិយាយកាលពីថ្ងៃចន្ទថា ការវាយប្រហារភេរវកម្មដែលបានធ្វើឡើងកាលពីថ្ងៃសៅរ៍សប្តាហ៍កន្លងទៅនេះនៅក្នុងទីក្រុងជាច្រើននៅទូទាំងប្រទេស មិនត្រឹមតែជាឧប្បត្តិហេតុដាច់ដោយឡែកនោះទេ ប៉ុន្តែមានគោលបំណង «ដណ្តើមអំណាច រុះរើស្ថាប័នសាធារណៈរបស់ប្រទេស និងបញ្ចប់ដំណើរការអន្តរកាល»។ថ្លែងនៅក្នុងសន្និសីទសារព័ត៌មាន លោក Maiga បាននិយាយថា ប្រទេសម៉ាលី បានកាន់ទុក្ខដោយការវាយប្រហារក្នុងពេលដំណាលគ្នានៅក្នុងតំបន់ជាច្រើន ដែលបានសម្លាប់រដ្ឋមន្ត្រីក្រសួងការពារជាតិ លោក Sadio Camara រួមជាមួយជនរងគ្រោះស៊ីវិល និងយោធា និងបានបណ្តាលមនុស្សជាច្រើនទៀតរងរបួស។លោកបាននិយាយថា ក្រុមអ្នកវាយប្រហារបានព្យាយាមផ្សព្វផ្សាយការបំភិតបំភ័យ និងមន្ទិលសង្ស័យ ធ្វើឱ្យខូចដល់សាមគ្គីភាពជាតិ និងធ្វើឱ្យការតាំងចិត្តរបស់ប្រទេសម៉ាលីចុះខ្សោយ ដោយបញ្ជាក់ថា គោលបំណងទាំងនេះ បានបរាជ័យ។ លោក Maiga និយាយថា ក្រោមការដឹកនាំរបស់ប្រធានាធិបតីអន្តរកាល និងជាមេបញ្ជាការជាន់ខ្ពស់នៃកងកម្លាំងប្រដាប់អាវុធ យោធារបស់ប្រទេសម៉ាលី បាន «ឆ្លើយតបយ៉ាងខ្លាំងក្លា» ដោយកម្ទេចក្រុមភេរវកររាប់រយនាក់នៅទូទាំងប្រទេស។

ប្រទេសន័រវេស និងអ៊ុយក្រែន ចុះកិច្ចព្រមព្រៀងផលិតយានដ្រូនអ៊ុយក្រែន នៅន័រវេស

2026/04/28 05:39:57 pm        54
Facebook Telegram Linkin
រដ្ឋាភិបាលប្រទេសន័រវេស បាននិយាយកាលពីថ្ងៃចន្ទថា ប្រទេសន័រវេស និងអ៊ុយក្រែន បានចុះហត្ថលេខាលើកិច្ចព្រមព្រៀងមួយដើម្បីចាប់ផ្តើមការផលិតយានដ្រូនអ៊ុយក្រែនរួមគ្នានៅប្រទេសន័រវេស។សេចក្តីថ្លែងការណ៍ពីក្រសួងការពារជាតិន័រវេសបានឲ្យដឹងថា កិច្ចព្រមព្រៀងនេះ ត្រូវបានចុះហត្ថលេខានៅទីក្រុងគីវដោយឯកអគ្គរដ្ឋទូតន័រវេសប្រចាំប្រទេសអ៊ុយក្រែន និងអនុរដ្ឋមន្ត្រីក្រសួងការពារជាតិអ៊ុយក្រែន។ក្រុមហ៊ុនផលិតរបស់អ៊ុយក្រែន បានប្រាប់ក្រសួងការពារជាតិន័រវេសថា ខ្លួនរំពឹងថាប្រព័ន្ធផលិតដោយប្រទេសន័រវេសដំបូងនឹងត្រូវបានដឹកជញ្ជូនទៅឱ្យអ៊ុយក្រែននៅមុនរដូវក្តៅនេះ នេះបើយោងតាមសេចក្តីថ្លែងការណ៍។រដ្ឋមន្ត្រីក្រសួងការពារជាតិន័រវេស បាននិយាយថា កិច្ចសហប្រតិបត្តិការនេះគឺជា «ជំហានដ៏សំខាន់ និងជាក់ស្តែង» ឈានឆ្ពោះទៅរកកិច្ចសហប្រតិបត្តិការការពារជាតិន័រវេស-អ៊ុយក្រែន កាន់តែស៊ីជម្រៅ។កិច្ចព្រមព្រៀងនេះ ក៏នឹងជួយសម្រួលដល់កិច្ចសហប្រតិបត្តិការឧស្សាហកម្មទ្វេភាគី រួមទាំងកិច្ចខិតខំប្រឹងប្រែងដើម្បីពង្រឹងខ្សែច្រវ៉ាក់ផ្គត់ផ្គង់ និងបង្កើតកិច្ចសហប្រតិបត្តិការស្រាវជ្រាវ និងអភិវឌ្ឍន៍រួមគ្នា។

លោក Rubio ៖ អ៊ីរ៉ង់កំពុងប្រើប្រាស់ច្រកសមុទ្រ Hormuz ជាអាវុធនុយក្លេអ៊ែរសេដ្ឋកិច្ច

2026/04/28 05:37:05 pm        62
Facebook Telegram Linkin
 រដ្ឋមន្រ្តីការបរទេសសហរដ្ឋអាមេរិកលោក Marco Rubio និយាយនៅក្នុងបទសម្ភាសន៍ថា អ៊ីរ៉ង់កំពុងប្រើប្រាស់ការគំរាមកំហែងរបស់ខ្លួន ដើម្បីបង្អាក់ការដឹកជញ្ជូនឆ្លងកាត់ច្រកសមុទ្រ Hormuz ជាអាវុធនុយក្លេអ៊ែរសេដ្ឋកិច្ច ហើយលោកថា ទីក្រុងតេអេរ៉ង់ កំពុងព្យាយាមដាក់សម្ពាធពិភពលោក ខណៈពន្យាពេលកិច្ចប្រជុំលើកម្មវិធីនុយក្លេអ៊ែររបស់ខ្លួន ។ អំឡុងបទសម្ភាសន៍ជាមួយទូរទស្សន៍ Fox News Channel លោក Rubioនិយាយថា បញ្ហានុយក្លេអ៊ែរ នៅតែជាកិច្ចខិតខំស្នូលនៃគោលជំហររបស់សហរដ្ឋអាមេរិកចំពោះអ៊ីរ៉ង់ ហើយសម្ពាធលើរបបមួយនេះ បានតានតឹងរួចទៅហើយ ។ លោកថា សំនួរនុយក្លេអ៊ែរ គឺជាហេតុផលដែលពួកយើងស្ថិតនៅលើទីតាំងដំបូងគេបែបនេះ ។ គួរឲ្យដឹងថា ជម្លោះនុយក្លេអ៊ែរ រវាងសហរដ្ឋអាមេរិក និងអ៊ីរ៉ង់ បានក្លាយជាបញ្ហាជាយូរមកហើយ ក្នុងនោះ លោកប្រធានាធិបតីសហរដ្ឋអាមេរិក Donald Trump បានដកប្រទេសរបស់លោកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ហើយនិងគំរាមវាយប្រហារដោយយោធាលើកម្មវិធីនុយក្លេអ៊ែររបស់ទីក្រុងតេអេរ៉ង់ ។ មន្រ្តីសហរដ្ឋអាមេរិកមួយរូបនិយយថា លោក Trumpពុំសប្បាយចិត្តនោះទេចំពោះសំណើចុងក្រោយរបស់អ៊ីរ៉ង់ ក្នុងការដោះស្រាយសង្រ្គាមរយៈពេល ២ខែរបស់ពួកគេ ធ្វើឲ្យក្តីសង្ឃឹមកាន់តែបាត់ស្រមោលសម្រាប់ដំណោះស្រាយជម្លោះ ដែលបានធ្វើឲ្យអាក់ខានដល់ការផ្គត់ផ្គង់ថាមពល អតិផរណាហក់ឡើងខ្ពស់ និងសម្លាប់មនុស្សរាប់ពាន់នាក់ ។ សំណើចុងក្រោយរបស់អ៊ីរ៉ង់ដកចេញការជជែកគ្នាពីកម្មវិធីនុយក្លេអ៊ែរអ៊ីរ៉ង់ រហូតដល់សង្រ្គាមត្រូវបានបញ្ចប់ ហើយនិងជម្លោះជុំវិញការដឹកជញ្ជូនចេញពីតំបន់ឈូងសមុទ្រ ត្រូវបានដោះស្រាយរួចរាល់ ៕

បណ្ដាញសង្គម

ព័ត៌មានថ្មីៗ

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំ​ចេញ​ដោយសុវត្ថិភាព
05/30/2026 05:05 PM
Facebook Telegram Linkin
លោក Hegseth៖ យុគ​សម័យឧបត្ថម្ភធនការពារជាតិ​ពីអាមេរិក សម្រាប់ «ប្រទេសអ្នកមាន» ចប់ហើយ
05/30/2026 05:05 PM
Facebook Telegram Linkin
មន្ត្រីជាន់ខ្ពស់អ៊ីរ៉ង់ និយាយ​ថា លោក Trump «ក្បត់ការទូត» ដោយបន្តបិទខ្ទប់​ដោយទ័ព​ជើង​ទឹក​​អាមេរិក
05/30/2026 05:05 PM
Facebook Telegram Linkin
វេជ្ជបណ្ឌិត៖ សុខភាព​លោក Trump គឺ​ល្អប្រសើរណាស់​ ប៉ុន្តែ​គួរតែសម្រកទម្ងន់
05/30/2026 05:05 PM
Facebook Telegram Linkin
អ្នកនៅ​រស់​ពីការ​ជាប់​ក្នុង​រូងភ្នំ នៅ​ឡាវ បានបរិភោគ​ថាសឈើសម្រាប់រែង​​មាស ដើម្បីបន្ត​ជីវិត
05/30/2026 05:05 PM
Facebook Telegram Linkin
មនុស្ស​ ១៨នាក់ស្លាប់ និង ៣០នាក់រងរបួស ដោយសារ​រថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន
05/30/2026 05:05 PM
Facebook Telegram Linkin
សេតវិមាន៖ លោក Trump «នឹងធ្វើតែ​កិច្ចព្រមព្រៀងដែលល្អសម្រាប់អាមេរិកប៉ុណ្ណោះ​» ជាមួយអ៊ីរ៉ង់
05/30/2026 05:05 PM
Facebook Telegram Linkin
នាយករដ្ឋមន្ត្រី៖ កាណាដា និងចិន កំពុង​សាង​​ «ភាពជាដៃគូប្រកប​ដោយ​ស្ថិរភាព និងការ​ស្ថាបនាបន្ថែម​ទៀត​»
05/30/2026 05:05 PM
Facebook Telegram Linkin
រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប
05/30/2026 05:05 PM
Facebook Telegram Linkin
របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់​ៗ
05/30/2026 05:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.