BTV NEWS

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ព័ត៌មានអន្តរជាតិ

ប្រព័ន្ធផ្សព្វផ្សាយ៖ លោក TRUMP ចង់បញ្ចប់សង្គ្រាមជាមួយអ៊ីរ៉ង់ឲ្យបានឆាប់តាមដែលអាចធ្វើទៅបាន

ប្រធានាធិបតីអាមេរិក លោក ដូណាល់ ត្រាំ (Donald Trump) បាននិយាយក្នុងអំឡុងពេលអាហារពេលល្ងាចឯកជនជាមួយព្រះមហាក្សត្រ Willem-Alexander និងព្រះមហាក្សត្រី Maxima នៃប្រទេសហូឡង់ថា លោកចង់បញ្ចប់សង្គ្រាមជាមួយអ៊ីរ៉ង់ឲ្យបានឆាប់តាមដែលអាចធ្វើទៅបាន។ នេះបើយោងតាមសារព័ត៌មាន The Wall Street Journal។យោងតាមកាសែតនេះ មេដឹកនាំអាមេរិករូបនេះ បានលើកឡើងថា លោកជឿជាក់ថា មធ្យោបាយតែមួយគត់ ដើម្បីនាំអ៊ីរ៉ង់ត្រឡប់មកតុចរចាវិញ គឺត្រូវបង្កើនសម្ពាធលើប្រទេសនេះ។សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការទ្រង់ទ្រាយធំប្រឆាំងនឹងអ៊ីរ៉ង់ នៅថ្ងៃទី ២៨ ខែកុម្ភៈ។ នៅថ្ងៃទី ០៧ ខែមេសា សហរដ្ឋអាមេរិកបានប្រកាសពីបទឈប់បាញ់រយៈពេលពីរសប្តាហ៍ជាមួយអ៊ីរ៉ង់។ អ៊ីរ៉ង់ និងសហរដ្ឋអាមេរិក បានធ្វើកិច្ចចរចាជាច្រើនជុំនៅទីក្រុងអ៊ីស្លាម៉ាបាដ នៅថ្ងៃទី ១១ ខែមេសា។ គណៈប្រតិភូអ៊ីរ៉ង់ ត្រូវបានដឹកនាំដោយប្រធានសភា លោក Mohammad Bagher Ghalibaf គណៈប្រតិភូអាមេរិកដឹកនាំដោយអនុប្រធានាធិបតី លោក JD Vance។ ទាំងទីក្រុងតេអេរ៉ង់ និងទីក្រុងវ៉ាស៊ីនតោន បាននិយាយបន្ទាប់ពីការចរចាថា ពុំមានកិច្ចព្រមព្រៀងណាមួយលើការដោះស្រាយជម្លោះរយៈពេលវែង ត្រូវបានសម្រេចនោះទេ ដោយសារតែមានការមិនចុះសម្រុងគ្នាជាច្រើន។ ពុំទាន់ដឹងនៅឡើយទេថាតើការពិគ្រោះយោបល់ជុំថ្មីនឹងកើតឡើងឬអត់។ ទោះយ៉ាងណាក៏ដោយ រដ្ឋបាលសហរដ្ឋអាមេរិកអះអាងថា កិច្ចចរចាអាចនឹងបន្តឡើងវិញនៅទីក្រុងអ៊ីស្លាម៉ាបាដ ក្នុងរយៈពេលប៉ុន្មានថ្ងៃខាងមុខនេះ៕

អ៊ីស្រាអែលនិយាយថា ភាគខាងត្បូងប្រទេសលីបង់ជា «តំបន់សម្លាប់ក្រុមហេសបូឡា»

អ៊ីស្រាអែល បានប្រកាសថា ភាគខាងត្បូងប្រទេសលីបង់ជា «តំបន់សម្លាប់ក្រុមហេសបូឡា» កាលពីថ្ងៃពុធ មួយថ្ងៃបន្ទាប់ពីការចរចាសន្តិភាពជាប្រវត្តិសាស្ត្ររវាងប្រទេសទាំងពីរ នៅទីក្រុងវ៉ាស៊ីនតោន។លោក Eyal Zamir នាយសេនាធិការកងទ័ព បាននិយាយកាលពីថ្ងៃពុធថា តំបន់នេះ នឹងលាតសន្ធឹងពីព្រំដែនជាមួយអ៊ីស្រាអែលភាគខាងជើងដល់ទន្លេ Litani។ទន្ទឹមនឹងនេះ អ៊ីស្រាអែលបានសម្លាប់គ្រូពេទ្យសង្គ្រោះបន្ទាន់យ៉ាងហោចណាស់ បីនាក់ ដែលកំពុងព្យាយាមជួយសង្គ្រោះមនុស្សដែលរងរបួសនៅក្នុងការវាយប្រហារមុននេះ នៅក្នុងទីក្រុង Mayfadun ភាគខាងត្បូង។ ក្រសួងសុខាភិបាលនៅទីក្រុងបេរូត បាននិយាយថា ការវាយប្រហារដ៏សាហាវនេះ គឺជា «ឧក្រិដ្ឋកម្មដ៏ធ្ងន់ធ្ងរ ដែលឆ្លុះបញ្ចាំងពីការប្តេជ្ញាចិត្តរបស់សត្រូវអ៊ីស្រាអែលក្នុងការរារាំងគ្រូពេទ្យ បន្ទាន់ពីការអនុវត្តការងារជួយសង្គ្រោះជីវិតរបស់ពួកគេ តាមមធ្យោបាយរបស់ពួកគេ»។ក្រសួងបាននិយាយថា ចាប់តាំងពីការចាប់ផ្តើមសង្គ្រាមជាមួយក្រុមហេសបូឡា នៅថ្ងៃទី ០២ ខែមីនា អ៊ីស្រាអែលបានសម្លាប់បុគ្គលិកថែទាំសុខភាពចំនួន ៩១នាក់។ អំពើហិង្សានេះ បានសម្លាប់ប្រជាជនលីបង់ជាង ២.១00នាក់៕

អ្នកជំនាញUNព្រមានពីការបំផ្លិចបំផ្លាញរបស់អ៊ីស្រាអែលនៅលីបង់ ស្របនឹងគំរូនៃអំពើប្រល័យពូជសាសន៍នៅហ្កាហ្សា

អ្នកជំនាញសិទ្ធិមនុស្សមួយចំនួនធំរបស់អង្គការសហប្រជាជាតិកាលពីថ្ងៃពុធ បានថ្កោលទោសសកម្មភាពយោធាចុងក្រោយរបស់អ៊ីស្រាអែលនៅលីបង់ ដោយព្រមានថា ទំហំ និងលក្ខណៈនៃការបំផ្លិចបំផ្លាញឆ្លុះបញ្ចាំងពីគំរូដែលបានកត់ត្រាពីមុននៅតំបន់ហ្កាហ្សា ហើយអាចស្មើនឹងការរំលោភច្បាប់អន្តរជាតិយ៉ាងធ្ងន់ធ្ងរ។នៅក្នុងសេចក្តីថ្លែងការណ៍រួមមួយ អ្នកជំនាញឯករាជ្យបានថ្កោលទោសចំពោះអ្វីដែលពួកគេបានពិពណ៌នាថា ជា «ការឈ្លានពានខុសច្បាប់ និងយុទ្ធនាការទម្លាក់គ្រាប់បែកដោយមិនរើសអើង» របស់អ៊ីស្រាអែលដែលបានចាប់ផ្តើម នៅថ្ងៃទី ០៨ ខែមេសា ត្រឹមតែប៉ុន្មានម៉ោងបន្ទាប់ពីការប្រកាសពីកិច្ចព្រមព្រៀងឈប់បាញ់រវាងសហរដ្ឋអាមេរិក និងអ៊ីរ៉ង់ ដែលត្រូវបានសម្របសម្រួលដោយប៉ាគីស្ថាន។ក្រុមអ្នកជំនាញបានអំពាវនាវឲ្យបញ្ឈប់ជាបន្ទាន់នូវអរិភាពនៅលីបង់ ដោយលើកឡើងពីការស្លាប់ និងរបួសរបស់ជនស៊ីវិលកាន់តែច្រើនឡើង ការផ្លាស់ទីលំនៅយ៉ាងទូលំទូលាយ និងការបំផ្លិចបំផ្លាញបរិស្ថានដែលជម្លោះនេះ កំពុងបង្កឡើង។ពួកគេបាននិយាយថា៖«យើងកំពុងឃើញការមិនគោរពទាំងស្រុងចំពោះសណ្តាប់ធ្នាប់ផ្លូវច្បាប់អន្តរជាតិ សម្រាប់ការទូត និងជាពិសេសចំពោះជីវិតរបស់ជនស៊ីវិល និងបរិស្ថាននៅប្រទេសលីបង់»៕

សហរដ្ឋអាមេរិកកំណត់គោលដៅលើហេដ្ឋារចនាសម្ព័ន្ធដឹកជញ្ជូនប្រេងរបស់អ៊ីរ៉ង់ជាមួយនឹងទណ្ឌកម្ម

ក្រសួងរតនាគារសហរដ្ឋអាមេរិក បាននិយាយកាលពីថ្ងៃពុធថា ខ្លួនកំពុងកំណត់គោលដៅលើហេដ្ឋារចនាសម្ព័ន្ធដឹកជញ្ជូនប្រេងរបស់អ៊ីរ៉ង់ ដោយដាក់ទណ្ឌកម្មលើបុគ្គលជាង ២០រូប ក្រុមហ៊ុន និងនាវាជាច្រើន គ្រឿង។ក្រសួងរតនាគារ បាននិយាយនៅក្នុងសេចក្តីថ្លែងការណ៍មួយថា ទណ្ឌកម្មទាំងនេះ កំណត់គោលដៅលើបណ្តាញរបស់មហាសេដ្ឋីនៃក្រុមហ៊ុនដឹកជញ្ជូនប្រេងអ៊ីរ៉ង់លោក Mohammad Hossein Shamkhani។ លោក Hossein Shamkhani គឺជាកូនប្រុសរបស់ Ali Shamkhani ដែលជាឥស្សរជនសំខាន់ម្នាក់ ក្នុងការធ្វើគោលនយោបាយសន្តិសុខ និងនុយក្លេអ៊ែររបស់អ៊ីរ៉ង់ ដែលត្រូវបានសម្លាប់នៅក្នុងការវាយប្រហាររបស់សហរដ្ឋអាមេរិក-អ៊ីស្រាអែលលើទីក្រុងតេអេរ៉ង់ នៅថ្ងៃទី ២៨ ខែកុម្ភៈ។លោក Scott Bessent រដ្ឋមន្ត្រីក្រសួងរតនាគារ បាននិយាយនៅក្នុងសេចក្តីថ្លែងការណ៍ថា៖«ក្រសួងនេះ កំពុងធ្វើសកម្មភាពយ៉ាងខ្លាំងក្លាជាមួយនឹងការដាក់ទណ្ឌកម្មសេដ្ឋកិច្ច ដោយកំណត់គោលដៅលើឥស្សរជនរបបដូចជាគ្រួសារលោក Shamkhani ដែលព្យាយាមរកប្រាក់ចំណេញពីការចំណាយរបស់ប្រជាជនអ៊ីរ៉ង់»។ក្រសួងរតនាគារក៏កំពុងដាក់ទណ្ឌកម្មលើជនជាតិអ៊ីរ៉ង់ លោក Seyed Naimaeei Badroddin Moosavi ដែលខ្លួនអះអាងថាជាអ្នកផ្តល់ហិរញ្ញប្បទានដល់ក្រុមក្រុមហេសបូឡា និងក្រុមហ៊ុនចំនួនបីដែលមានទំនាក់ទំនងជាមួយគម្រោងលាងលុយកខ្វក់ពាក់ព័ន្ធនឹងការលក់ប្រេងអ៊ីរ៉ង់ ជាថ្នូរនឹងមាសវ៉េណេស៊ុយអេឡា៕

លោក STARMER នឹងមិនចុះចាញ់ ចំពោះការគំរាមកំហែងសង្គ្រាមមជ្ឈិមបូព៌ារបស់លោក TRUMP ទេ

នាយករដ្ឋមន្ត្រីអង់គ្លេស លោក Keir Starmer កាលពីថ្ងៃពុធ បាននិយាយថា លោកនឹងមិន «ចុះចាញ់» ទៅនឹងសម្ពាធ ដើម្បីចូលរួមក្នុងសង្គ្រាមអ៊ីរ៉ង់ទេ បន្ទាប់ពីប្រធានាធិបតីអាមេរិក លោក ដូណាល់ ត្រាំ ( Donald Trumpភ) បានគំរាមលុបចោលកិច្ចព្រមព្រៀងពាណិជ្ជកម្មរបស់ចក្រភពអង់គ្លេស។លោក Starmer បានថ្លែងប្រាប់សភាថា៖«យើងនឹងមិនត្រូវបានអូសទាញចូលទៅក្នុងសង្គ្រាមនេះទេ។ វាមិនមែនជាសង្គ្រាមរបស់យើងទេ»។មេដឹកនាំគណបក្សការងារនេះ បានបន្ថែមថា «ខ្ញុំមិននឹងផ្លាស់ប្តូរគំនិតរបស់ខ្ញុំទេ។ ខ្ញុំនឹងមិនចុះចាញ់ទេ។ វាពុំមែនជាផលប្រយោជន៍ជាតិរបស់យើង ក្នុងការចូលរួមសង្គ្រាមនេះទេ»។នៅក្នុងបទសម្ភាសន៍តាមទូរស័ព្ទជាមួយសារព័ត៌មាន Sky News លោក ត្រាំ បានគំរាមផ្លាស់ប្តូរកិច្ចព្រមព្រៀងដែលបានធ្វើឡើងជាមួយចក្រភពអង់គ្លេស ដែលកំណត់ផលប៉ះពាល់ពីការវាយប្រហារដោយពន្ធគយលើទំនិញនាំចូលច្រើនប្រភេទ នៅសហរដ្ឋអាមេរិក៕

ក្រុមហេសបូឡាយល់ព្រមឈប់បាញ់ជាមួយអ៊ីស្រាអែល ប៉ុន្តែនៅតែប្រុងប្រយ័ត្នចំពោះការអនុវត្ត

លោក Mahmoud Qomati អនុប្រធានក្រុមប្រឹក្សានយោបាយរបស់ក្រុមហេសបូឡា បាននិយាយកាលពីថ្ងៃពុធថា ក្រុមនេះបានយល់ព្រមឈប់បាញ់ជាមួយអ៊ីស្រាអែល ប៉ុន្តែនៅតែមានការប្រុងប្រយ័ត្នចំពោះការអនុវត្ត។ថ្លែងទៅកាន់ទូរទស្សន៍ Al Jadeed លោក Qomati បាននិយាយថា ក្រុមហេសបូឡា នឹងមិនទទួលយកការវិលត្រឡប់ទៅរកការរៀបចំឆ្នាំ ២០២៤ ដែលភាគីម្ខាងបានគោរពតាម ខណៈដែលអ៊ីស្រាអែលគេចវេសពីកាតព្វកិច្ចរបស់ខ្លួន។លោកបានបន្ថែមថា កិច្ចខិតខំប្រឹងប្រែងណាមួយឆ្ពោះទៅរកការឈានដល់បទឈប់បាញ់ ត្រូវបានកោតសរសើរ ខណៈពេលដែលព្រមានអំពីការរំលោភបំពានដែលអាចកើតមានរបស់អ៊ីស្រាអែល។លោក Qomati ក៏បានណែនាំប្រជាជនឲ្យជៀសវាងការធ្វើដំណើរទៅកាន់ភាគខាងត្បូងប្រទេសលីបង់សម្រាប់ពេលបច្ចុប្បន្ន ដោយលើកឡើងពីហានិភ័យសន្តិសុខដែលកំពុងបន្ត។អ៊ីស្រាអែលបានពិភាក្សាអំពីបទឈប់បាញ់ដែលអាចធ្វើទៅបាន ដោយគណៈរដ្ឋមន្ត្រីសន្តិសុខរបស់ខ្លួនត្រូវបានកំណត់ឲ្យពិនិត្យឡើងវិញនូវជម្រើសនេះ ខណៈពេលដែលការចរចាសម្របសម្រួលដោយសហរដ្ឋអាមេរិកដែលពាក់ព័ន្ធនឹងប្រទេសលីបង់ បានធ្វើឲ្យបទឈប់បាញ់ជាបញ្ហាសំខាន់មួយ ក្រោមការចរចា៕

របាយការណ៍៖ នាវាជាច្រើនគ្រឿងបំពានការបិទផ្លូវរបស់សហរដ្ឋអាមេរិកលើកំពង់ផែអ៊ីរ៉ង់

ក្រុមហ៊ុនវិភាគដែនសមុទ្រដែលមានទីស្នាក់ការកណ្តាលនៅទីក្រុងឡុងដ៍ បាននិយាយនៅក្នុងរបាយការណ៍មួយដែលចេញផ្សាយកាលពីថ្ងៃពុធថា នាវាមួយចំនួន បានបំពានការបិទផ្លូវរបស់សហរដ្ឋអាមេរិក ដែលដាក់លើនាវាដែលចូល និងចេញពីកំពង់ផែអ៊ីរ៉ង់។យោងតាមក្រុមហ៊ុន Windward នាវាដែលមានទង់ជាតិអ៊ីរ៉ង់មួយគ្រឿង បានចាកចេញពីកំពង់ផែ Bandar Abbas កាលពីថ្ងៃអង្គារ ឆ្លងកាត់ច្រកសមុទ្រហ័រមូស ហើយចូលទៅក្នុងឈូងសមុទ្រអូម៉ង់ ដែលជាឧទាហរណ៍ច្បាស់លាស់នៃការបំពានការបិទផ្លូវដោយជោគជ័យ។របាយការណ៍នេះ ក៏បានបញ្ជាក់ផងដែរថា ចន្លោះថ្ងៃអង្គារ និងថ្ងៃពុធ នាវាដឹកប្រេងឆៅដ៏ធំមួយគ្រឿង មានទង់ជាតិក្លែងក្លាយ និងរងទណ្ឌកម្មរបស់សហរដ្ឋអាមេរិក ត្រូវបានគេសង្កេតឃើញចូលទៅក្នុងច្រកសមុទ្រចូលតាមរយៈដែនទឹកអ៊ីរ៉ង់។ នាវានេះ ទំនងជាបានប្រើប្រាស់ផ្លូវឆ្នេរសមុទ្រ ដើម្បីកាត់បន្ថយការប៉ះពាល់ ហើយត្រូវបានវាយតម្លៃស្រដៀងគ្នាថា ជាការធ្វើនាវាចរណ៍បំពានការបិទផ្លូវ។ទោះបីជាមានការអនុវត្តកាន់តែខ្លាំងឡើងក៏ដោយ របាយការណ៍នេះបានឲ្យដឹងថា ការបិទផ្លូវរបស់សហរដ្ឋអាមេរិក បានចាប់ផ្តើមកំណត់ប្រតិបត្តិការរបស់នាវា នៅក្នុងពេលវេលាជាក់ស្តែង ប៉ុន្តែមិនទាន់បានបញ្ឈប់នាវាដែលធ្វើដំណើរឆ្លងកាត់ និងជុំវិញច្រកសមុទ្រហ័រមូសនៅឡើយទេ៕

សារព័ត៌មាន FT៖ អ៊ីរ៉ង់បានប្រើប្រាស់ផ្កាយរណបចារកម្មចិន ដើម្បីកំណត់គោលដៅមូលដ្ឋានទ័ពអាមេរិក

កាសែត Financial Times (FT) បានរាយការណ៍កាលពីថ្ងៃពុធថា អ៊ីរ៉ង់បានទិញផ្កាយរណបចារកម្មចិនដោយសម្ងាត់ នៅចុងឆ្នាំ ២០២៤ ដែលអនុញ្ញាតឲ្យប្រទេសនេះកំណត់គោលដៅមូលដ្ឋានទ័ពអាមេរិក នៅទូទាំងមជ្ឈិមបូព៌ា ក្នុងអំឡុងពេលសង្គ្រាមបច្ចុប្បន្ន ជាសេចក្តីរាយការណ៍មួយដែលទីក្រុងប៉េកាំង បានច្រានចោលថា មិនពិត។ដោយបានដកស្រង់ឯកសារយោធាអ៊ីរ៉ង់ដែលលេចធ្លាយ របាយការណ៍នោះ បានបញ្ជាក់ថា ផ្កាយរណប TEE-01B ដែលសាងសង់ និងបាញ់បង្ហោះដោយក្រុមហ៊ុនចិន Earth Eye Co. ត្រូវបានទិញដោយកងកម្លាំងអវកាសរបស់កងឆ្មាំបដិវត្តន៍ឥស្លាម បន្ទាប់ពីវាត្រូវបានបាញ់បង្ហោះទៅកាន់លំហអាកាសពីប្រទេសចិន។ សារព័ត៌មាននេះ បានលើកឡើងថា មេបញ្ជាការយោធាអ៊ីរ៉ង់ បានប្រើប្រាស់ផ្កាយរណបនេះ ដើម្បីត្រួតពិនិត្យទីតាំងយោធាសំខាន់ៗរបស់សហរដ្ឋអាមេរិក ដោយលើកឡើងពីបញ្ជីកូអរដោនេដែលបានកំណត់ពេលវេលា រូបភាពផ្កាយរណប និងការវិភាគគន្លងផ្លូវ។ តាមរបាយការណ៍របស់ FT រូបភាពទាំងនោះ ត្រូវបានថតនៅក្នុងខែមីនា មុន និងក្រោយការវាយប្រហារដោយយានដ្រូន និងមីស៊ីលលើទីតាំងទាំងនោះ។ ជាផ្នែកមួយនៃកិច្ចព្រមព្រៀងនេះ កងឆ្មាំបដិវត្តន៍ឥស្លាមអ៊ីរ៉ង់ (IRGC) បានទទួលសិទ្ធិចូលទៅកាន់ស្ថានីយ៍ពាណិជ្ជកម្មដែលដំណើរការដោយក្រុមហ៊ុនអាកាសចរណ៍ពាណិជ្ជកម្ម Emposat ដែលជាក្រុមហ៊ុន ផ្តល់សេវាគ្រប់គ្រងផ្កាយរណប និងទិន្នន័យដែលមានមូលដ្ឋាននៅទីក្រុងប៉េកាំង ជាមួយនឹងបណ្តាញដែលលាតសន្ធឹងពាសពេញអាស៊ី អាមេរិកឡាទីន និងតំបន់ផ្សេងៗទៀត។ នេះបើយោងតាមរបាយការណ៍៕

រុស្ស៊ី៖ ការផលិតយានដ្រូនរបស់អឺរ៉ុបសម្រាប់អ៊ុយក្រែន ប្រឈមនឹងហានិភ័យនៃជម្លោះកាន់តែធ្ងន់ធ្ងរឡើង

ក្រសួងការពារជាតិរុស្ស៊ី បាននិយាយកាលពីថ្ងៃពុធថា សកម្មភាពរបស់រដ្ឋាភិបាលអឺរ៉ុបក្នុងការផ្តលទីតាំងនិងពង្រីកការផលិតយានដ្រូនសម្រាប់អ៊ុយក្រែន កំពុង «ទាញទ្វីបនេះឲ្យចូលកាន់តែជ្រៅទៅក្នុងជម្លោះជាមួយរុស្ស៊ី»។ក្រសួងបាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើបណ្តាញTelegram របស់ខ្លួនថា៖«ជំនួសឲ្យការពង្រឹងសន្តិសុខរបស់រដ្ឋអឺរ៉ុប សកម្មភាពរបស់មេដឹកនាំអឺរ៉ុប កំពុងទាញប្រទេសទាំងនេះឲ្យចូលទៅក្នុងសង្គ្រាមជាមួយរុស្ស៊ី កាន់តែខ្លាំងឡើង»។ក្រសួងបានបន្ថែមថា ប្រទេសមួយចំនួននៅអឺរ៉ុប បានសម្រេចចិត្តនៅថ្ងៃទី២៦ ខែមីនា ដើម្បីបង្កើនការ ផលិត និងផ្គត់ផ្គង់ដ្រូនដល់អ៊ុយក្រែន «ស្របពេលការខាតបង់កាន់តែច្រើនឡើង និងខ្វះទាហានកាន់តែច្រើនឡើងៗ នៅក្នុងកងកម្លាំងប្រដាប់អាវុធអ៊ុយក្រែន»។ ការកើនឡើងនៃទិន្នផល ត្រូវបានគេរំពឹងថា នឹងត្រូវបានគាំទ្រដោយមូលនិធិដែលបានពង្រីកសម្រាប់សហគ្រាសអ៊ុយក្រែន និងសហគ្រាសរួមគ្នា ដែល ផលិតយានដ្រូនវាយប្រហារ និងសមាសធាតុរបស់ពួកវា នៅលើដីអឺរ៉ុប។ក្រសួងបាននិយាយថា សាខារបស់ក្រុមហ៊ុនដែលត្រូវបានពិពណ៌នាថា ជាក្រុមហ៊ុនផលិតយានដ្រូនរបស់អ៊ុយក្រែន កំពុងដំណើរការនៅក្នុងប្រទេសចំនួន ៨ នៅអឺរ៉ុប ដោយបន្ថែមថា សហគ្រាសមួយចំនួនពាក់ព័ន្ធនឹងការផលិតយានដ្រូនវាយប្រហារ រួមទាំងដ្រូនអត្តឃាតផងដែរ៕

UN៖ មនុស្សជាង ២៧៧.000នាក់ បានភៀសខ្លួនពីលីបង់ចូលទៅស៊ីរី ស្របពេលមានអរិភាពកាន់តែខ្លាំងឡើង

ទីភ្នាក់ងារជនភៀសខ្លួនរបស់អង្គការសហប្រជាជាតិ បាននិយាយកាលពីថ្ងៃពុធថា មនុស្សជាង ២៧៧.000នាក់ បានឆ្លងកាត់ពីប្រទេសលីបង់ចូលទៅក្នុងប្រទេសស៊ីរី ចាប់តាំងពីដើមខែមីនាមក ស្របពេលមានភាពតានតឹងក្នុងតំបន់ កើនឡើង និងអំពើហិង្សាឆ្លងដែន ដែលធ្វើឲ្យធនធានមានកំណត់ នៅក្នុងប្រទេសដែលរងការបំផ្លិចបំផ្លាញដោយសង្គ្រាមនេះ កាន់តែធ្ងន់ធ្ងរឡើង។ យោងតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) មនុស្សប្រហែល ២៧៧.000នាក់ បានចូលទៅក្នុងប្រទេសស៊ីរី ចន្លោះថ្ងៃទី ០២ ខែមីនា ដល់ថ្ងៃទី ១២ ខែមេសា។ ក្នុងចំណោមពួកគេ ប្រហែល ២៣៤.000នាក់ ជាជនជាតិស៊ីរី រួមទាំងប្រហែល ៦៧.៣០០នាក់ ដែលមានបំណងវិលត្រឡប់មកជាអចិន្ត្រៃយ៍ និងប្រហែល ៤៣.000នាក់ ជាជនជាតិលីបង់។គណៈកម្មការស៊ើបអង្កេតអន្តរជាតិឯករាជ្យរបស់អង្គការសហប្រជាជាតិលើសាធារណរដ្ឋអារ៉ាប់ស៊ីរី បាន សម្តែងការព្រួយបារម្ភអំពីផលប៉ះពាល់លើស្ថិរភាព និងសិទ្ធិមនុស្សនៅក្នុងប្រទេសនេះ ដោយកត់សម្គាល់ថា អ្នកមកដល់ជាច្រើន បានរងរបួសរួចទៅហើយដោយសង្គ្រាមរាប់ឆ្នាំ នៅក្នុងប្រទេសស៊ីរី និងការបាញ់ផ្លោងថ្មីៗនេះ នៅក្នុងប្រទេសលីបង់។គណៈកម្មការនេះ បាននិយាយថា ចំនួនអ្នកវិលត្រឡប់ និងជនភៀសខ្លួនដែលកំពុងកើនឡើង ធ្វើឲ្យហេដ្ឋារចនាសម្ព័ន្ធដ៏ផុយស្រួយរបស់ប្រទេសស៊ីរីកាន់តែយ៉ាប់យ៉ឺន និងសមត្ថភាពមនុស្សធម៌មានកម្រិត ខណៈដែលមនុស្សរាប់លាននាក់នៅទូទាំងប្រទេសនេះ បន្តពឹងផ្អែកលើជំនួយ៕

បណ្ដាញសង្គម

ព័ត៌មានថ្មីៗ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ

ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ

ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មានឱកាសការងារជាង ៨,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ នៅខេត្តជាប់សមុទ្រទាំង៤ មានឱកាសការងារជិត ៧,០០០កន្លែង ដែលកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877