BTV NEWS

វិបត្តិសុខភាពកាន់តែធ្ងន់ធ្ងរទៅនៅតំបន់ហ្កាហ្សា ដោយសារការដួលរលំនៃប្រព័ន្ធវេជ្ជសាស្រ្ត

លោកតាសាន់តាក្លូសជិះទូកចែកអំណោយដល់ក្មេងៗនៅតំបន់ព្រៃជប់ភ្លៀងអាម៉ាហ្សូន ប្រទេសប្រេស៊ីល

ព្រិលធ្លាក់បានប្រែក្លាយតំបន់ភាគខាងជើងប្រទេសឥណ្ឌាទៅជាដែនដីអច្ឆរិយៈ

កូសូវ៉ូឆ្ពោះទៅកាន់ការបោះឆ្នោត ខណៈភាពជាប់គាំងនយោបាយ គំរាមដល់មូលនិធិដ៏សំខាន់

ព័ត៌មានអន្តរជាតិ

ក្រសួងការពារជាតិកូរ៉េខាងត្បូង ស្វែងរកវិធានការដាក់ពិន័យ លើមន្ត្រី «១០នាក់» ជុំវិញច្បាប់អាជ្ញាសឹក

ក្រសួងការពារជាតិកូរ៉េខាងត្បូង នៅថ្ងៃចន្ទ (ទី២២ ខែធ្នូ) នេះ បានឲ្យដឹងថា ស្ថាប័នកំពុងស្វែងរកវិធានការដាក់វិន័យលើមន្ត្រីប្រហែល ១០នាក់ ក្នុងនោះរួមមានទាំងបុគ្គលិកយោធា ជុំវិញការជាប់ពាក់ព័ន្ធរបស់ពួកគេ នៅក្នុងការប្រកាសច្បាប់អាជ្ញាសឹក កាលពីថ្ងៃទី៣ ខែធ្នូ ឆ្នាំ២០២៤។ចំណាត់ការនេះ បានធ្វើឡើងបន្ទាប់ពីក្រសួង បានចាប់ផ្តើមនូវក្រុមការងារផ្ទាល់របស់ស្ថាប័ន ដែលជាផ្នែកមួយនៃការស៊ើបអង្កេតយ៉ាងទូលំទូលាយរបស់រដ្ឋបាល លោក Lee Jae Myung ដែលផ្តោតលើក្រសួង និងទីភ្នាក់ងារចំនួន ៤៩ស្ថាប័ន ជុំវិញការប្រព្រឹត្តិពុំត្រឹមត្រូវ ពាក់ព័ន្ធនឹងក្រឹត្យច្បាប់អាជ្ញាសឹករបស់ប្រធានាធិបតីដែលត្រូវបានបណ្តេញចេញ លោក Yoon Suk Yeol។នៅក្នុងសន្និសីទសារព័ត៌មានប្រចាំថ្ងៃ នាថ្ងៃទី២២ ខែធ្នូនេះ អ្នកនាំពាក្យក្រសួងការពារជាតិ លោកស្រី Chung Bin-na បាននិយាយថា៖ «ក្រុមពិសេសគ្រោងនឹងស្នើសុំវិធានការដាក់វិន័យ លើបុគ្គលប្រហែល ១០នាក់ នៅយប់ថ្ងៃនេះ ខណៈដែលអង្គភាពស៊ើបអង្កេត និងវិភាគ ក្រោមការគ្រប់គ្រងរបស់ក្រុមការងារក្រសួងការពារជាតិ ស្តីពីការគោរពរដ្ឋធម្មនុញ្ញ និងនវានុវត្តន៍រដ្ឋាភិបាល ពិនិត្យលើការរកឃើញនៃសវនកម្មផ្ទៃក្នុងរបស់ក្រសួង»។លោកស្រី Chung បានបញ្ជាក់ថា ក្រសួងការពារជាតិបានធ្វើសវនកម្មផ្ទៃក្នុងរបស់ខ្លួន នៅក្នុងខែសីហា ខែកញ្ញា និងខែតុលា មុនពេលចាប់ផ្តើមក្រុមពិសេស ហើយថា ការរកឃើញនេះកំពុងត្រូវបានពិនិត្យឡើងវិញម្តងទៀតដោយអង្គភាពស៊ើបអង្កេត និងវិភាគដែលដឹកនាំដោយលោកវរសេនីយ៍ឯក Park Jung-hoon។គួរបញ្ជាក់ថា អង្គភាពស៊ើបអង្កេត និងវិភាគ ត្រូវបានបង្កើតឡើង ក្រោមការគ្រប់គ្រងរបស់ក្រុមពិសេស ដើម្បីពិនិត្យមើលពីវិធានការតាមក្រោយ ដូចជានីតិវិធីដាក់ពិន័យវិន័យ និងលទ្ធភាពនៃការស៊ើបអង្កេត ផ្ទៀងផ្ទាត់ និងបន្ថែមការរកឃើញមុន និងពិនិត្យមើលការចោទប្រកាន់បន្ថែម អំពីភាពស្មុគស្មាញ នៅក្នុងសេចក្តីប្រកាសច្បាប់អាជ្ញាសឹកនោះ៕

ប្រព័ន្ធផ្សព្វផ្សាយ៖ កងកម្លាំងរុស្ស៊ី បានឆ្លងព្រំដែនទៅចាប់ខ្លួនអ្នកភូមិអ៊ុយក្រែន រាប់សិបនាក់

ប្រព័ន្ធផ្សព្វផ្សាយអ៊ុយក្រែន បានដកស្រង់សម្តីយោធា ដែលបាននិយាយកាលពីថ្ងៃអាទិត្យ (២១ ធ្នូ) ថា កងកម្លាំងរុស្ស៊ី បានឆ្លងព្រំដែនរុស្ស៊ី-អ៊ុយក្រែន នៅតំបន់ Sumy ភាគឦសាន ហើយបានចាប់ខ្លួនអ្នកភូមិព្រំដែនអ៊ុយក្រែនប្រហែល ៥០ នាក់ ចូលទៅក្នុងប្រទេសរុស្ស៊ី។ទូរទស្សន៍រដ្ឋ Suspilne របស់អ៊ុយក្រែន និងទីភ្នាក់ងារសារព័ត៌មាន Ukrainska Pravda បាននិយាយថា កងកម្លាំងរុស្ស៊ី បានទម្លុះចូលទឹកដីអ៊ុយក្រែន នៅយប់ថ្ងៃសៅរ៍កន្លងទៅ នៅក្នុងតំបន់ភូមិ Hrabovske។ របាយការណ៍បន្តថា ប្រជាជនភាគច្រើនក្នុងតំបន់នោះដែលត្រូវបានចាប់ខ្លួន គឺជាអ្នកភូមិវ័យចំណាស់។ភាគីរុស្ស៊ី មិនទាន់បានធ្វើអត្ថាធិប្បាយលើបញ្ហានេះនៅឡើយទេ។ កងកម្លាំងរុស្ស៊ី បានអះអាងថា ខ្លួនធានាបាននូវទីតាំងឈរជើងក្នុងភូមិជាច្រើននៅក្នុងតំបន់ Sumy ក្នុងរយៈពេលប៉ុន្មានខែថ្មីៗនេះ ហើយទីក្រុងជាច្រើនរងនូវការបាញ់ផ្លោងយ៉ាងធ្ងន់ធ្ងរ។លោក Oleh Hryhorov ប្រធានរដ្ឋបាលយោធាតំបន់ Sumy បាននិយាយលើកម្មវិធីផ្ញើសារតេលេក្រាមថា អាជ្ញាធរបានចាប់ផ្តើមជម្លៀសប្រជាជនតាមភូមិព្រំដែន ដែលពីមុនបានទទូចមិនព្រមផ្លាស់ទីលំនៅនោះទេ។ មន្រ្តីជាន់ខ្ពស់រូបនេះមិនបានកំណត់ទីតាំងដែលរងផលប៉ះពាល់ឡើយ ប៉ុន្តែបានជំរុញឱ្យប្រជាជននៅតំបន់ព្រំដែន យល់ព្រមជម្លៀសចេញដើម្បីសុត្ថិភាព៕

ក្រសួងការបរទេសរុស្ស៊ី៖ក្រិកបានចូលរួមជាមួយគំនិតផ្តួចផ្តើមរបស់EU ដើម្បីទិញអាវុធអាមេរិកសម្រាប់អ៊ុយក្រែន

លោក Yury Pilipson ប្រធាននាយកដ្ឋានអឺរ៉ុបទី ២ នៃក្រសួងការបរទេសរុស្ស៊ី បាននិយាយនៅក្នុងបទសម្ភាសន៍ជាមួយសារព័ត៌មាន TASS ថា ទីក្រុងអាថែនបានចូលរួមក្នុងកម្មវិធី PURL (បញ្ជីតម្រូវការអា ទិភាពរបស់អ៊ុយក្រែន) សម្រាប់ប្រទេសអឺរ៉ុប ដើម្បីទិញអាវុធរបស់អាមេរិកសម្រាប់កងកម្លាំងប្រដាប់អាវុធអ៊ុយក្រែន។ លោកបានកត់សម្គាល់ថា៖«តាមដែលយើងដឹង នាពេលថ្មីៗនេះ ទីក្រុងអាថែន បានចូលរួមក្នុងគំនិតផ្តួចផ្តើម PURL សម្រាប់ប្រទេសអឺរ៉ុបដើម្បីទិញអាវុធអាមេរិកសម្រាប់កងកម្លាំងប្រដាប់អាវុធអ៊ុយក្រែន ទោះបីជាក្រិកធ្លាប់ស្ទាក់ស្ទើរក្នុងការធ្វើដូច្នេះក៏ដោយ»។លោកបានធ្វើអត្ថាធិប្បាយអំពីរបាយការណ៍នៅក្នុងសារព័ត៌មានក្រិក Kathimeriniថា ប្រទេសនេះកំពុងស្ថិតនៅក្រោមសម្ពាធម្តងទៀតពីសហរដ្ឋអាមេរិក និងដៃគូណាតូ ដើម្បីប្រកាសពីការចូលរួមរបស់ខ្លួន នៅក្នុងគំនិតផ្តួចផ្តើម PURL។អ្នកការទូតរូបនេះ បានសង្កត់ធ្ងន់ថា ប្រទេសក្រិក តាំងពីដើមដំបូងនៃប្រតិបត្តិការយោធាពិសេស បាន «ជួយយ៉ាងសកម្មដល់របបទីក្រុងគីវ ជាមួយនឹងអាវុធ និងគ្រាប់រំសេវ»។ ទោះជាយ៉ាងណាក៏ដោយ លោកបាននិយាយថា ភាពសង្ស័យជាពិសេសពីសំណាក់អាជ្ញាធរអាថែនគឺថា ពួកគេដឹងយ៉ាងច្បាស់អំពីការប្រើប្រាស់អាវុធទាំងនេះជាបន្តបន្ទាប់របស់កងកម្លាំងប្រដាប់អាវុធអ៊ុយក្រែនប្រឆាំងនឹងជនស៊ីវិល នៅក្នុង តំបន់ Donbass តំបន់ Zaporozhye និង Kherson គី្រម៉េ (Crimea) និងតំបន់ភាគខាងត្បូងផ្សេងទៀតនៃប្រទេសរុស្ស៊ី «ជាកន្លែងដែលសហគមន៍ក្រិកដ៏ធំមួយបានរស់នៅជាយូរមកហើយ»។ យោងតាមអ្នកការទូតរូបនេះបានឲ្យដឹងថា ពុំមានការសង្ស័យទេអំពីការចូលរួមរបស់ «សមមិត្តជាន់ខ្ពស់» ក្នុងការចូលជាសមាជិករបស់ក្រិកចំពោះគំនិតផ្តួចផ្តើមដែលបានប្រកាសនេះទេ៕

UN៖ មនុស្សជាង ១សែននាក់ ភៀសខ្លួនពីក្រុង Al Fasher របស់ស៊ូដង់ បន្ទាប់ពីកងកម្លាំង RSF ចូលគ្រប់គ្រង

អង្គការទេសន្តរប្រវេសន៍អន្តរជាតិ (IOM) បាននិយាយថា ជនស៊ីវិលស៊ូដង់ លើសពី ១សែននាក់ ត្រូវបង្ខំចិត្តរត់ភៀសខ្លួនចេញពីទីក្រុង Al Fasher និងភូមិជុំវិញនោះ នៅក្នុងរដ្ឋ North Darfur របស់ប្រទេសស៊ូដង់ ដោយសារតែអសន្តិសុខកាន់តែអាក្រក់ទៅៗ ក្រោយកងកម្លាំងគាំទ្ររហ័សយោធាប៉ារ៉ា RSF ដណ្ដើមបានការគ្រប់គ្រងនៅទីនោះ។នៅក្នុងសេចក្តីថ្លែងការណ៍មួយកាលពីថ្ងៃអាទិត្យ (២១ ធ្នូ) ទីភ្នាក់ងារអន្តោប្រវេសន៍ UN មួយនេះបាននិយាយថា មនុស្សប្រមាណ ១០៧.២៩៤ នាក់ ឬប្រហែល ២៤.២២១ គ្រួសារ បានភៀសខ្លួនចេញពីទីក្រុង Al Fasher និងតំបន់ក្បែរៗនោះ ចន្លោះថ្ងៃទី២៦ ខែតុលា ដល់ថ្ងៃទី៨ ខែធ្នូ នៅពេលយោធាប៉ារ៉ា RSF បានចូលគ្រប់គ្រងទីក្រុង និងស្របពេលស្ថានភាពសន្តិសុខកាន់តែយ៉ាប់យ៉ឺនខ្លាំងឡើង។អង្គការ IOM បន្តថា អត្រាប្រហែល ៧២% នៃជនភៀសខ្លួនទាំងនោះ នៅតែស្ថិតនៅក្នុងតំបន់ North Darfur ដោយផ្ដោតជាចម្បងនៅក្នុងតំបន់ភាគខាងជើង និងភាគខាងលិចនៃរដ្ឋ ខណៈប្រហែល ១៩% បានផ្លាស់ទៅរដ្ឋផ្សេងទៀត។IOM ព្រមានថា តួលេខទាំងនេះគឺជាតួលេខបឋម ហើយអាចនឹងមានការផ្លាស់ប្តូរបានគ្រប់ពេល ដោយសារអសន្តិសុខនៅតែបន្ត និងលទ្ធភាពនៃការភៀសខ្លួនបន្ថែមយ៉ាងឆាប់រហ័ស ហើយស្ថានភាពនៅតែប្រែប្រួល និងតានតឹងខ្លាំង៕

កូរ៉េខាងត្បូង បើកការស៊ើបអង្កេតឯករាជ្យលើសោកនាដកម្មធ្លាក់យន្តហោះ Jeju Air ក្នុងឆ្នាំ២០២៤

សភាកូរ៉េខាងត្បូង បានអនុម័តសេចក្តីព្រាងច្បាប់មួយនៅថ្ងៃចន្ទ (២២ ធ្នូ) នេះ ដើម្បីបើកការស៊ើបអង្កេតឯករាជ្យ ទៅលើហេតុការណ៍ធ្លាក់យន្តហោះរបស់ក្រុមហ៊ុនអាកាសចរណ៍ Jeju Air កាលពីខែធ្នូ ឆ្នាំ២០២៤ ដែលបានសម្លាប់មនុស្ស ១៧៩នាក់ នៅក្នុងគ្រោះមហន្តរាយផ្លូវអាកាសដ៏អាក្រក់បំផុតនៅលើទឹកដីកូរ៉េខាងត្បូង។គណៈកម្មការមួយដែលមានសមាជិកសភាចំនួន ១៨រូប នឹងស៊ើបអង្កេតពីមូលហេតុដែលអាចកើតមាន នៃការធ្លាក់យន្តហោះនេះ រួមទាំងថា តើមានវិធានការគ្រប់គ្រាន់ដើម្បីទប់ទល់នឹងហានិភ័យនៃការបុកសត្វស្លាបលើអាកាស ការខូចម៉ាស៊ីន ឬបញ្ហាមេកានិកណាមួយដែរឬទេ រួមទាំងត្រួតពិនិត្យជញ្ជាំងទំនប់នៅចុងផ្លូវរត់ ដែលយន្តហោះបានបុករួចផ្ទុះឆេះ។យោងតាមសេចក្តីព្រាងច្បាប់នេះ ការស៊ើបអង្កេតក៏នឹងពិនិត្យមើលថា តើភ្នាក់ងាររដ្ឋាភិបាលបានព្យាយាមបិទបាំង ឬនិយាយសម្រាល លើអ្វីដែលត្រូវបានរកឃើញក្នុងអំឡុងពេលស៊ើបអង្កេតផ្លូវការដែរឬទេ។ គណៈកម្មការឯករាជ្យនេះត្រូវបង្កើតឡើង អំឡុងពេលដែលការស៊ើបអង្កេតដោយឡែកមួយ ដឹកនាំដោយរដ្ឋាភិបាល ពីក្រុមប្រឹក្សាស៊ើបអង្កេតគ្រោះថ្នាក់អាកាសចរណ៍និងផ្លូវដែក នៅតែបន្ត ដោយមិនទាន់បានចេញផ្សាយរបាយការណ៍ចុងក្រោយរបស់ខ្លួននៅឡើយទេ មកទល់ពេលនេះ។គួររម្លឹកថា យន្តហោះប៊ូអ៊ីង 737-800 មួយគ្រឿងរបស់ក្រុមហ៊ុនអាកាសចរណ៍ Jeju Air ដឹកអ្នកដំណើរសរុប ១៨១នាក់ បានចុះចតនៅអាកាសយានដ្ឋាន Muan របស់កូរ៉េខាងត្បូង ដោយគ្មានកង់ ហើយបានហោះហួសផ្លូវរត់ បុកនឹងជញ្ជាំងទំនប់របស់ព្រលានយន្តហោះ រួចហើយក៏ផ្ទុះឆេះ បណ្តាលឱ្យមនុស្ស ១៧៩នាក់ស្លាប់ និង ២នាក់រួចជីវិត៕

ប្រេងឡើងថ្លៃ បន្ទាប់ពីមានព័ត៌មានថា អាមេរិក ស្ទាក់ចាប់នាវាដឹកប្រេងមួយគ្រឿងទៀតរបស់វ៉េណេស៊ុយអេឡា

តម្លៃប្រេងបានបន្តកំណើនយ៉ាងល្អរបស់ខ្លួនជាថ្មីម្ដងទៀតនៅថ្ងៃចន្ទ (២២ ធ្នូ) នេះ បន្ទាប់ពីក្រុមមន្ត្រីទីក្រុងវ៉ាស៊ីនតោន បាននិយាយថា សហរដ្ឋអាមេរិក បានស្ទាក់ចាប់នាវាដឹកប្រេងមួយគ្រឿងទៀតហើយ ក្នុងដែនទឹកអន្តរជាតិ នៅឆ្នេរសមុទ្រវ៉េណេស៊ុយអេឡា ដែលបង្កើនភាពមិនប្រាកដប្រជានៃការផ្គត់ផ្គង់ថ្មី ខណៈការស្ទាក់ចាប់ចុងក្រោយបំផុតនេះ គឺជានាវាទីបីហើយ។សន្ទស្សន៍ប្រេងឆៅ Brent បានកើនឡើង ៤៦សេន ឬ ០,៨% ដល់តម្លៃ ៦០,៩៣ ដុល្លារក្នុងមួយបារ៉ែល គិតត្រឹមម៉ោងសកល ៤:០០នាទី ព្រឹកព្រលឹមថ្ងៃចន្ទនេះ ខណៈប្រេងឆៅ WTI របស់សហរដ្ឋអាមេរិក បានកើនឡើង ៤៦សេន ឬ ០,៨% ដល់តម្លៃ ៥៦,៩៨ ដុល្លារ។អ្នកវិភាគទីផ្សារប្រេងជាន់ខ្ពស់នៅស្ថាប័ន Sparta Commodities បានលើកឡើងថា “ទីផ្សារសកលកំពុងទទួលដឹងលឺចំពោះការពិតដែលថា រដ្ឋបាលលោកប្រធានាធិបតីអាមេរិក Donald Trump កំពុងប្រើវិធីសាស្រ្តដ៏តឹងរ៉ឹងបំផុតមួយចំពោះការជួញដូរប្រេងរបស់វ៉េណេស៊ុយអេឡា”។ទីភ្នាក់ងារព័ត៌មាន Bloomberg បានរាយការណ៍កាលពីថ្ងៃអាទិត្យ (២១ ធ្នូ) ថា កងឆ្មាំល្បាតឆ្នេរអាមេរិក បានស្ទាក់ចាប់នាវាដឹកប្រេងមួយគ្រឿងទៀតហើយ ក្នុងដែនទឹកអន្តរជាតិ នៅជិតវ៉េណេស៊ុយអេឡា ដោយធ្វើឱ្យចំនួនសរុបនៃនាវាដែលត្រូវបានរឹបអូស កើនដល់ ៣គ្រឿង គិតចាប់តាំងពីថ្ងៃទី១០ ខែធ្នូ មក។ យ៉ាងណាមិញ សេតវិមានមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ៕

លោក Trump អង្រួនពាណិជ្ជកម្មសកលនៅឆ្នាំនេះ ខណៈភាពមិនប្រាកដប្រជាអាចនៅតែបន្តដល់ឆ្នាំ២០២៦

អត្ថបទសង្ខេបព្រឹត្តិការណ៍ឆ្នាំ២០២៥ របស់សារព័ត៌មានរ៉យទ័រ បានចេញផ្សាយនៅថ្ងៃចន្ទ (២២ ធ្នូ) នេះថា ការវិលត្រឡប់របស់លោកប្រធានាធិបតី Donald Trump ទៅកាន់សេតវិមានវិញនៅក្នុងឆ្នាំនេះ បាននាំឱ្យមានឆ្នាំដ៏មមាញឹកមួយសម្រាប់ពាណិជ្ជកម្មពិភពលោក ជាមួយនឹងរលកពន្ធគយលើដៃគូពាណិជ្ជកម្មនានារបស់សហរដ្ឋអាមេរិក ដែលបានធ្វើឱ្យទីផ្សារហិរញ្ញវត្ថុរង្គោះរង្គើ ហើយនាំឱ្យមានការចរចាជាច្រើនជុំលើកិច្ចព្រមព្រៀងពាណិជ្ជកម្ម និងវិនិយោគ។គោលនយោបាយពាណិជ្ជកម្មរបស់លោក Trump - និងប្រតិកម្មសកលចំពោះគោលនយោបាយទាំងនោះ - នឹងនៅតែជាចំណុចសំខាន់នៅឆ្នាំ២០២៦ ដ៏ខ្លីខាងមុខ ប៉ុន្តែបញ្ហាប្រឈមធំៗមួយចំនួនក៏នៅតែមាន។ ភាពមិនប្រាកដប្រជាធំបំផុតសម្រាប់ឆ្នាំក្រោយនេះគឺថា តើពន្ធគយជាច្រើនរបស់លោក Trump នឹងត្រូវបានអនុញ្ញាតឱ្យបន្តមានដដែល ឬយ៉ាងណា។បញ្ហាប្រឈមចំពោះគោលការណ៍ផ្លូវច្បាប់ សម្រាប់អ្វីដែលលោក Trump ហៅថាជាពន្ធ "បដិការ" លើទំនិញពីប្រទេសនីមួយៗ កំពុងត្រូវជជែកវែកញែកក្នុងតុលាការកំពូលសហរដ្ឋអាមេរិក នៅចុងឆ្នាំ២០២៥ ហើយសេចក្ដីសម្រេចលើជោគវាសនាពន្ធនេះ ត្រូវរំពឹងថានឹងធ្វើឡើងនៅដើមឆ្នាំ២០២៦។រដ្ឋបាលលោក Trump ទទូចថា ខ្លួនអាចងាកទៅរកអាជ្ញាធរផ្នែកច្បាប់ផ្សេងទៀត ដើម្បីបន្តរក្សាពន្ធគយឱ្យនៅដដែល ប្រសិនបើខ្លួនចាញ់ក្ដីនៅតុលាការកំពូល។ ប៉ុន្តែចំណាត់ការទាំងនោះមានភាពស្មុគស្មាញខ្លាំង ហើយជារឿយៗ វិសាលភាពមានដែនកំណត់ ដូច្នេះបើរដ្ឋបាលលោក Trump ចាញ់ក្ដីពន្ធគយនេះនៅតុលាការជាន់ខ្ពស់ នោះអាចជំរុញឱ្យមានការចរចាឡើងវិញលើកិច្ចព្រមព្រៀងដែលបានឈានដល់រហូតមកទល់ពេលនេះ ឬនាំមកនូវយុគសម័យថ្មីនៃភាពមិនប្រាកដប្រជាអំពីថា តើពន្ធរបស់ទីក្រុងវ៉ាស៊ីនតោន នឹងបញ្ចប់នៅត្រង់ចំណុចណា៕

លោក ORBAN៖ ការបន្តជម្លោះនៅអ៊ុយក្រែនផ្តល់ផលប្រយោជន៍ដល់អ្នកនយោបាយ អ្នកជួញដូរអាវុធ និងវិនិយោគិន

នាយករដ្ឋមន្ត្រីហុងគ្រីលោក Viktor Orban បានថ្លែងថា ការបន្តជម្លោះនៅអ៊ុយក្រែនផ្តល់ផលប្រយោជន៍ដល់តែមនុស្សមួយចំនួនតូចប៉ុណ្ណោះ ខណៈដែលជនជាតិអឺរ៉ុប ត្រូវការសន្តិភាព។ លោកនាយករដ្ឋមន្ត្រីបានសរសេរនៅលើទំព័រ X របស់ខ្លួនថា៖«តើអ្នកណាចង់ឲ្យសង្គ្រាមនេះបន្តទៅទៀត? ទី១ អ្នកនយោបាយដែលគិតថា មហាអំណាចនុយក្លេអ៊ែរអាចចាញ់នៅសមរភូមិ។ ទី២ ក្រុមហ៊ុនផលិតអាវុធទទួលបានផលប្រយោជន៍ពីជម្លោះគ្មានទីបញ្ចប់។ ទី៣ វិនិយោគិន ដែលមានការជឿជាក់ថា យោធារបស់រុស្ស៊ីនឹងបរាជ័យ»។ លោក Orban បានសង្កត់ធ្ងន់ថា ជនជាតិអឺរ៉ុបសមនឹងទទួលបានអ្វីដែលប្រសើរជាងនេះ ពីព្រោះអឺរ៉ុបត្រូវការសន្តិភាព។ចាប់តាំងពីការចាប់ផ្តើមនៃជម្លោះអ៊ុយក្រែន រដ្ឋាភិបាលហុងគ្រីបានតស៊ូមតិជាប់លាប់សម្រាប់ការដោះស្រាយយ៉ាងឆាប់រហ័សរបស់ខ្លួន តាមរយៈមធ្យោបាយសន្តិភាព។ លោក Orban បានបញ្ជាក់ម្តងហើយម្តងទៀតថា សកម្មភាពយោធានៅអ៊ុយក្រែន និងទណ្ឌកម្មរបស់លោកខាងលិចប្រឆាំងនឹងរុស្ស៊ី បានបំផ្លាញសេដ្ឋកិច្ចហុងគ្រីចន្លោះពី ២០ ទៅ ៣០ ពាន់លានអឺរ៉ូ៕

ការប៉ុនប៉ងរបស់អ៊ុយក្រែនក្នុងការរំខានដល់កិច្ចចរចាសន្តិភាព គឺវាយប្រហារដោយដ្រូនលើនាវា នៅសមុទ្រខ្មៅ

លោក Yury Pilipson ប្រធាននាយកដ្ឋានអឺរ៉ុបទី២ នៃក្រសួងការបរទេសរុស្ស៊ី បាននិយាយនៅក្នុងបទសម្ភាសន៍ជាមួយសារព័ត៌មា TASS ថា របបទីក្រុងគីវកំពុងព្យាយាមរារាំងវឌ្ឍនភាពក្នុងកិច្ចចរចាសន្តិភាពដើម្បីដោះស្រាយវិបត្តិអ៊ុយក្រែន ដោយការវាយប្រហារលើនាវាពាណិជ្ជកម្មនៅសមុទ្រខ្មៅ ជាមួយនឹងការប្រើប្រាស់ទូកគ្មានមនុស្សបើក និងយានដ្រូន។ លោកបានរំលឹកថា ភាគីរុស្ស៊ី «បានចាត់ទុកការវាយប្រហារដោយដ្រូននិងទូកគ្មានមនុស្សបើករបស់អ៊ុយក្រែនលើនាវាពាណិជ្ជកម្មនៅសមុទ្រខ្មៅថា ជាចោរសមុទ្រ»។អ្នកការទូតរូបនេះ បានឆ្លើយតបទៅនឹងសំណួរមួយអំពីបញ្ហានេះថា «ការវាយលុករបស់របបទីក្រុងគីវ នៅសមុទ្រខ្មៅ មានគោលបំណងច្បាស់លាស់ក្នុងការរំខានដល់ការងារដ៏លំបាកដើម្បីឈានដល់ដំណោះស្រាយដែលអាចទទួលយកបានទៅវិញទៅមកចំពោះវិបត្តិអ៊ុយក្រែន និងរារាំងដល់វឌ្ឍនភាពនៃដំណើរការចរចា ដែលភាពជោគជ័យរបស់វាមានផលប្រយោជន៍ជាពិសេសចំពោះទីក្រុងអង់ការ៉ា»។លោក Pilipson ក៏បានសង្កត់ធ្ងន់ផងដែរថា ការវាយប្រហារជាប្រចាំរបស់កងកម្លាំងប្រដាប់អាវុធអ៊ុយក្រែនលើហេដ្ឋារចនាសម្ព័ន្ធថាមពល និងកំពង់ផែ «មិនត្រឹមតែបំផ្លាញផលប្រយោជន៍សេដ្ឋកិច្ចរបស់ប្រទេស រុស្ស៊ីនៅសមុទ្រខ្មៅប៉ុណ្ណោះទេ ប៉ុន្តែថែមទាំងធ្វើឲ្យទីផ្សារថាមពលសកលរង្គោះរង្គើផងដែរ»។ដោយធ្វើអត្ថាធិប្បាយអំពីសេចក្តីថ្លែងការណ៍ដ៏ម៉ឺងម៉ាត់របស់ប្រទេសទួរគីទៅកាន់សេវាសន្តិសុខអ៊ុយក្រែនទាក់ទងនឹងភាពមិនអាចទទួលយកបាននៃការវាយប្រហារលើនាវានៅក្នុងសមុទ្រខ្មៅ អ្នកការទូតរូបនេះបានកត់សម្គាល់ថា ទីក្រុងអង់ការ៉ាយកចិត្តទុកដាក់យ៉ាងខ្លាំងចំពោះការធានាសន្តិសុខនៃការដឹកជញ្ជូន ស៊ីវិល៕

គណៈរដ្ឋមន្ត្រីសន្តិសុខអ៊ីស្រាអែលអនុម័តកន្លែងតាំងទីលំនៅថ្មីចំនួន ១៩ កន្លែង នៅតំបន់វេសបែង

គណៈរដ្ឋមន្ត្រីសន្តិសុខអ៊ីស្រាអែលបានអនុម័តការបង្កើតកន្លែងតាំងទីលំនៅថ្មីចំនួន ១៩ កន្លែង នៅក្នុងតំបន់វេសបែង ( West Bank) ជាសម្រេចមួយដែលរដ្ឋមន្ត្រីក្រសួងហិរញ្ញវត្ថុស្តាំនិយមជ្រុលបស់ប្រទេសនេះ បាននិយាយកាលពីថ្ងៃអាទិត្យថា មានគោលបំណងទប់ស្កាត់ការបង្កើតរដ្ឋប៉ាឡេស្ទីន។យោងតាមសេចក្តីថ្លែងការណ៍មួយពីការិយាល័យរបស់រដ្ឋមន្ត្រីក្រសួងហិរញ្ញវត្ថុ លោក Bezalel Smotrich បានឲ្យដឹងថា ការសម្រេចចិត្តនេះ ធ្វើឲ្យចំនួនសរុបនៃកន្លែងតាំងលំនៅឋាន ដែលត្រូវបានអនុម័តក្នុងរយៈពេល បីឆ្នាំ កន្លងមកនេះ កើនដល់ ៦៩ កន្លែង។ការអនុម័តចុងក្រោយបំផុត បានកើតឡើងប៉ុន្មានថ្ងៃបន្ទាប់ពីអង្គការសហប្រជាជាតិ បាននិយាយថា ការពង្រីកការតាំងទីលំនៅរបស់អ៊ីស្រាអែល នៅក្នុងតំបន់វេសបែង ដែលទាំងអស់នេះត្រូវបានចាត់ទុកថា ខុសច្បាប់ ក្រោមច្បាប់អន្តរជាតិ បានឈានដល់កម្រិតខ្ពស់បំផុត ចាប់តាំងពីយ៉ាងហោចណាស់ឆ្នាំ ២០១៧។សេចក្តីថ្លែងការណ៍នេះ បានឲ្យដឹងថា៖«សំណើរបស់រដ្ឋមន្ត្រីក្រសួងហិរញ្ញវត្ថុ លោក Bezalel Smotrich និងរដ្ឋមន្ត្រីក្រសួងការពារជាតិ លោក Israel Katz ដើម្បីប្រកាស និងធ្វើឲ្យកន្លែងតាំងទីលំនៅថ្មីចំនួន ១៩ កន្លែង នៅតំបន់ Judea និង Samaria ត្រូវបានអនុម័តដោយគណៈរដ្ឋមន្ត្រី» ដោយមិនបានបញ្ជាក់ថាពេលណាដែលការសម្រេចចិត្ត ត្រូវបានធ្វើឡើងនោះទេ។ លោក Smotrich គឺជាអ្នកគាំទ្រដ៏ខ្លាំងក្លាម្នាក់នៃការពង្រីកការតាំងទីលំនៅ និងជាអ្នកតាំងលំនៅឋានខ្លួនឯងដែរ៕

បណ្ដាញសង្គម

ព័ត៌មានថ្មីៗ

គិតមកត្រឹមថ្ងៃនេះ អំណោយរបស់សម្ដេចតេជោ និងសម្ដេចកិត្តិព្រឹទ្ធបណ្ឌិត,សម្ដេចធិបតី និងលោកជំទាវបណ្ឌិត ចំនួន៣៦,២០០កញ្ចប់ ត្រូវបានចែកដល់ប្រជាពលរតាមជំរំភៀសសឹក

ព្រិលធ្លាក់បានប្រែក្លាយតំបន់ភាគខាងជើងប្រទេសឥណ្ឌាទៅជាដែនដីអច្ឆរិយៈ

វិមានក្រឹមឡាំង៖ ការសន្និដ្ឋានរបស់ចារកម្មអាមេរិកដកស្រង់ដោយសារព័ត៌មាន Reuters គឺ «មិនពិត»

នាយករដ្ឋមន្ត្រីបារាំងធ្វើការឥតឈប់ ដើម្បីអនុម័តច្បាប់ថវិកាបណ្ដោះអាសន្ន ក្នុងគោលបំណងបញ្ចៀសការបិទ

ការឡើងប្រជាប្រិយភាពរបស់ក្រុមស្តាំនិយមជ្រុល នៅភាគខាងលិចអេស្ប៉ាញ មានឥទ្ធិពលលើការបោះឆ្នោត ក្នុងតំបន់

ក្រសួងពាណិជ្ជកម្ម បង្ការ និងទប់ស្កាត់ការក្លែងបន្លំដើមកំណើតទំនិញនាំចេញទៅកាន់ទីផ្សារសហរដ្ឋអាម៉េរិក

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877