BTV NEWS

វិបត្តិសុខភាពកាន់តែធ្ងន់ធ្ងរទៅនៅតំបន់ហ្កាហ្សា ដោយសារការដួលរលំនៃប្រព័ន្ធវេជ្ជសាស្រ្ត

លោកតាសាន់តាក្លូសជិះទូកចែកអំណោយដល់ក្មេងៗនៅតំបន់ព្រៃជប់ភ្លៀងអាម៉ាហ្សូន ប្រទេសប្រេស៊ីល

ព្រិលធ្លាក់បានប្រែក្លាយតំបន់ភាគខាងជើងប្រទេសឥណ្ឌាទៅជាដែនដីអច្ឆរិយៈ

កូសូវ៉ូឆ្ពោះទៅកាន់ការបោះឆ្នោត ខណៈភាពជាប់គាំងនយោបាយ គំរាមដល់មូលនិធិដ៏សំខាន់

ព័ត៌មានអន្តរជាតិ

ឯកអគ្គរដ្ឋទូតរុស្ស៊ី៖ កងទ័ពសាធារណរដ្ឋអាហ្វ្រិកកណ្តាលបំពាក់អាវុធយ៉ាងល្អ និងកំពុងពង្រឹងឥតឈប់ឈរ

ឯកអគ្គរដ្ឋទូតរុស្ស៊ីប្រចាំនៅសាធារណរដ្ឋអាហ្វ្រិកកណ្តាល (CAR) លោក Alexander Bikantov បានប្រាប់ សារព័ត៌មានTASSថា កងទ័ពរបស់ប្រទេសនេះ ត្រូវបានបំពាក់អាវុធយ៉ាងល្អ និងបន្តការពង្រឹង ដោយមានការគាំទ្រពីរុស្ស៊ី ដោយសារទីក្រុងមូស្គូនៅតែជាដៃគូបច្ចេកទេសយោធាដ៏សំខាន់របស់សាធារណរដ្ឋនេះ។ លោក Bikantov បាននិយាយថា៖«កងទ័ពសាធារណរដ្ឋអាហ្វ្រិកកណ្តាល (CAR)មានកម្លាំងកើនឡើង មានបំពាក់អាវុធយ៉ាងល្អ មានរចនាសម្ព័ន្ធអង្គការទំនើប និងកំពុងពង្រឹងឥតឈប់ឈរ។ អង្គភាពថ្មីៗកំពុងលេចចេញឡើង ដែលឆ្លុះបញ្ចាំងពីសាខាផ្សេងៗនៃកងកម្លាំងប្រដាប់អាវុធ ក្នុងទ្រង់ទ្រាយតូចជាង។ ទាំងនេះរួមមានអង្គភាពទំនាក់ទំនង កងវិស្វកម្ម និងអាកាសចរណ៍ប្រយុទ្ធ រួមទាំងឧទ្ធម្ភាគចក្រ និងយន្តហោះចម្បាំង ដែលមានសមត្ថភាពបំពេញភារកិច្ចជាច្រើន ចាប់ពីការឈ្លបយកការណ៍រហូតដល់ការទម្លាក់គ្រាប់បែកលើគោលដៅលើដី»។លោកបានបន្ថែមថា ទស្សនវិស័យសម្រាប់កិច្ចសហប្រតិបត្តិការរវាងរុស្ស៊ី និងសាធារណរដ្ឋនេះ ក្នុងឧស្សាហកម្មការពារជាតិ គឺមានសង្ឃឹមខ្ពស់។ យោងតាមលោកឯកអគ្គរដ្ឋទូត បានឲ្យដឹងថា រុស្ស៊ីគឺជាដៃគូឈានមុខគេរបស់សាធារណរដ្ឋអាហ្វ្រិកកណ្តាល ក្នុងវិស័យនេះ ដោយជួយក្នុងការកសាងកងកម្លាំងប្រដាប់អាវុធរបស់ប្រទេសនេះ និងផ្លាស់ប្តូរពួកគេទៅជាកងទ័ពទំនើប អាចបត់បែនបាន និងមានសមត្ថភាពគ្រប់គ្រាន់ដោយខ្លួនឯង។នាពេលថ្មីៗនេះ លោក Faustin-Archange Touadera ប្រធានាធិបតីនៃសាធារណរដ្ឋអាហ្វ្រិកកណ្តាល បានថ្លែងនៅក្នុងសុន្ទរកថាមួយទៅកាន់រដ្ឋសភាថា៖ កងទ័ពរបស់ប្រទេសនេះ បានពង្រីកពីកងទ័ពចំនួន ៦.០០០ នាក់ដល់ ២៦.០០០ នាក់ ក្នុងរយៈពេល ៩ ឆ្នាំកន្លងមកនេះ ដោយមានផែនការបង្កើនកម្លាំងរបស់ខ្លួន ដល់ ៥០.០០០នាក់៕

អ្នកជួយសង្គ្រោះ៖ ឧបទ្ទវហេតុរថយន្តក្រុង នៅឥណ្ឌូនេស៊ី បណ្ដាលឲ្យមនុស្ស ១៦នាក់ស្លាប់

បុគ្គលិកនៃក្រុមជួយសង្គ្រោះម្នាក់ បានប្រាប់ឲ្យដឹងថា រថយន្តក្រុងដឹកអ្នកដំណើរ ១គ្រឿង បានបុករបាំងផ្លូវពេញទំហឹង នៅលើផ្លូវហាយវេរបស់ប្រទេសឥណ្ឌូនេស៊ី នាព្រឹកថ្ងៃចន្ទ (ទី២២ ខែធ្នូ) ដោយបានបណ្ដាលឲ្យក្រឡាប់ ជាឧបទ្ទវហេតុដែលបាននាំឲ្យមនុស្សយ៉ាងហោចណាស់ ១៦នាក់បាត់បង់ជីវិត។ប្រធានទីភ្នាក់ងារស្វែងរក និងជួយសង្គ្រោះ លោក Budiono បានឲ្យដឹងនៅក្នុងសេចក្តីថ្លែងការណ៍មួយថា រថយន្តក្រុងដែលធ្វើដំណើរពីរដ្ឋធានីហ្សាការតា ទៅកាន់ទីក្រុង Yogyakarta បានបើកបរក្នុងល្បឿន «លឿនគួរសម» នៅពេលដែលរថយន្តនោះបានទៅដល់ផ្លូវកោង នៅផ្លូវបំបែកលើផ្លូវហាយវេនោះ។លោកបានប្រាប់ទៀតថា ឡានបានក្រឡាប់ក្រោយបុករបាំងផ្លូវនោះ។ លោក Budiono បាននិយាយថា៖ «យើងបានជម្លៀសមនុស្ស ៣៤នាក់ចេញ»។លោកបានបន្ថែមថា មនុស្ស ១៥នាក់ ត្រូវបានប្រកាសថា ស្លាប់នៅកន្លែងកើតហេតុ ខណៈម្នាក់ទៀតបាត់បង់ជីវិតនៅឯមន្ទីរពេទ្យ។ លោកបានឲ្យដឹងទៀតថា អ្នករងរបួសជាច្រើននាក់ត្រូវបានដឹកទៅទីក្រុង Semarang ដើម្បីព្យាបាល ។វីដេអូដែលចែករំលែកដោយទីភ្នាក់ងារនេះ បានបង្ហាញឲ្យឃើញក្រុមជួយសង្រ្គោះ លើកជនរងគ្រោះដាក់ចូលទៅក្នុងថង់សាកសព ខណៈដែលរថយន្តក្រុងក្រឡាប់នៅក្បែរនោះ៕

ជប៉ុនត្រៀមបើករោងចក្រនុយក្លេអ៊ែរធំបំផុតរបស់ពិភពលោកឡើងវិញ ១៥ឆ្នាំក្រោយមហន្តរាយ នៅ Fukushima

ប្រទេសជប៉ុន បានចាត់វិធានការចុងក្រោយ ដើម្បីអនុញ្ញាតឲ្យចាប់ផ្តើមឡើងវិញនូវរោងចក្រថាមពលនុយក្លេអ៊ែរដ៏ធំបំផុតរបស់ពិភពលោក នៅថ្ងៃចន្ទ (ទី២២ ខែធ្នូ) ខណៈដែលតំបន់ Niigata បានបោះឆ្នោតឲ្យដំណើរការឡើងវិញ ដែលជាពេលវេលានៃការវិលត្រឡប់របស់ប្រទេសនេះទៅកាន់ថាមពលនុយក្លេអ៊ែរវិញ ដោយមានរយៈពេលជិត ១៥ឆ្នាំបន្ទាប់ពីមានគ្រោះមហន្តរាយ នៅ Fukushima។រោងចក្រ Kashiwazaki-Kariwa ដែលស្ថិតនៅចម្ងាយប្រហែល ២២០គីឡូម៉ែត្រ នៅភាគពាយព្យនៃទីក្រុងតូក្យូ ស្ថិតក្នុងចំណោមម៉ាស៊ីនរ៉េអាក់ទ័រចំនួន ៥៤ ដែលត្រូវបានបិទ បន្ទាប់ពីការរញ្ជួយដីដ៏ធំ និងរលកយក្សស៊ូណាមិ បានបំផ្លាញរោងចក្រ Fukushima Daiichi ដែលជាគ្រោះមហន្តរាយនុយក្លេអ៊ែរដ៏អាក្រក់បំផុត គិតចាប់តាំងពីមានហេតុការណ៍ Chernobyl នៅប្រទេសអ៊ុយក្រែន។ចាប់តាំងពីពេលនោះមក ជប៉ុនបានចាប់ផ្តើមឡើងវិញចំនួន ១៤ម៉ាស៊ីនរ៉េអាក់ទ័រ ក្នុងចំណោម ៣៣ ដែលនៅតែអាចដំណើរការបាន ខណៈដែលខ្លួនប្រឹងប្រែងបញ្ឈប់ការពឹងផ្អែកលើឥន្ធនៈហ្វូស៊ីលដែលនាំចូល។ រោងចក្រ Kashiwazaki-Kariwa នឹងក្លាយជារោងចក្រដំបូងគេ ដែលដំណើរការដោយក្រុមហ៊ុន Tokyo Electric Power Co (TEPCO) ជាក្រុមហ៊ុនដែលគ្រប់គ្រងរោងចក្ររងវិនាសកម្ម Fukushima។នៅថ្ងៃចន្ទនេះ សភារបស់ខេត្ត Niigata បានអនុម័តការបោះឆ្នោតផ្ដល់ទំនុកចិត្ត ចំបោះអភិបាលខេត្ត Niigata លោក Hideyo Hanazumi ដែលបានគាំទ្រការចាប់ផ្តើមឡើងវិញ កាលពីខែមុន ដោយអនុញ្ញាតឲ្យរោងចក្រនេះអាចចាប់ផ្តើមដំណើរការឡើងវិញម្តងទៀតប្រកបដោយប្រសិទ្ធភាព៕

កងកម្លាំងព្រំដែនហ្ស៊កដានីស្ទាក់ចាប់យានដ្រូនដែលផ្ទុកគ្រឿងញៀន នៅតំបន់ភាគខាងត្បូង

កងកម្លាំងព្រំដែនហ្ស៊កដានីបានរារាំងការប៉ុនប៉ងរត់ពន្ធគ្រឿងញៀន ចូលទៅក្នុងប្រទេសនេះ តាមរយៈ ដ្រូន តាមបណ្តោយតំបន់ភាគខាងត្បូង និងនៅជិតព្រំដែនខាងលិច នៅថ្ងៃអាទិត្យ។ឆ្មាំព្រំដែននៅក្នុងតំបន់យោធាភាគខាងត្បូង ដែលត្រួតពិនិត្យតំបន់ Aqaba, Ma’an, Tafilah និងតំបន់ Al-Karak បានតាមដានយានដ្រូន ដែលផ្ទុកគ្រឿងញៀន ដោយស្ទាក់ចាប់ និងបាញ់ទម្លាក់វា នៅក្នុងទឹកដីហ្ស៊កដានី។យោងតាមទីភ្នាក់ងារសារព័ត៌មាន Petra បានឲ្យដឹងថា គ្រឿងញៀនដែលរឹបអូសបានត្រូវបានប្រគល់ឲ្យ អាជ្ញាធរមានសមត្ថកិច្ច ដើម្បីចាត់វិធានការផ្លូវច្បាប់។ហ្ស៊កដានីត្រូវបានគេស្គាល់ថា ជាចំណុចឆ្លងកាត់សម្រាប់ការរត់ពន្ធគ្រឿងញៀន ដែលជាធម្មតាត្រូវបានតម្រង់គោលដៅទៅប្រទេសឈូងសមុទ្រនេះ ពីប្រទេសស៊ីរី លីបង់ និងអ៊ីរ៉ាក់។ក្រុមអ្នករត់ពន្ធកំពុងប្រើប្រាស់យានដ្រូន និងបាឡុងកាន់តែច្រើនឡើង ដែលត្រូវបាននាំផ្លូវដោយឧបករណ៍មូលដ្ឋាន ដើម្បីដឹកជញ្ជូនគ្រឿងញៀនចូលទៅក្នុងប្រទេសហ្ស៊កដានីពីប្រទេសជិតខាង៕

ឧត្តមសេនីយ៍ឯកម្នាក់របស់រុស្ស៊ីត្រូវបានសម្លាប់ក្នុងហេតុការណ៍ផ្ទុះរថយន្តបង្កប់គ្រាប់បែកនៅទីក្រុងមូស្គូ

ក្រុមមន្រ្តីនិយាយថា ឧត្តមសេនីយ៍ឯកម្នាក់របស់រុស្ស៊ី ត្រូវបានសម្លាប់នៅក្នុងហេតុការណ៍ផ្ទុះរថយន្តបង្កប់គ្រាប់បែកនៅទីក្រុងមូស្គូ ។គណៈកម្មាធិការស៊ើបអង្កេតរុស្ស៊ី និយាយថា លោកឧត្តមសេនីយ៍ឯក Fanil Sarvarov បានស្លាប់នៅព្រឹកថ្ងៃចន្ទនេះ ក្រោយគ្រឿងផ្ទុះបង្កប់នៅក្រោមរថយន្ត បានផ្ទុះឡើង ។ពួកគេបន្តថា លោក Sarvarov គឺជាប្រធាននាយកដ្ឋានហ្វឹកហ្វឺនប្រតិបត្តិការនៃកងកម្លាំងប្រដាប់អាវុធរុស្ស៊ី ។ ការស៊ើបអង្កេតបង្ហាញថា វាអាចជាប់ពាក់ព័ន្ធនឹងសេវាកម្មចារកម្មអ៊ុយក្រែន ។ អ៊ុយក្រែនពុំបានធ្វើសេចក្តីអត្ថាធិប្បាយនោះទេ ចំពោះឧបទ្ទេហេតុមួយនេះ ។អ្នកស្រី Svetlana Petrenko គឺជាអ្នកនាំពាក្យគណៈកម្មាធិការស៊ើបអង្កេតរុស្ស៊ី និយាយថា ការពិនិត្យកន្លែងកើតហេតុកំពុងបន្ត ។ ក្រុមអ្នកស៊ើបអង្កេតនឹងបញ្ជាឲ្យមានការពិនិត្យចាំបាច់ រួមទាំងការធ្វើ កោសល្យវិច្ច័យ និងការវិភាគគ្រឿងផ្ទុះ ។ សាក្សីត្រូវបានសាកសួរ ហើយរូបភាពវីដេអូឃ្លីបរបស់កាមេរ៉ាសុវត្ថិភាព ត្រូវបានពិនិត្យមើល ។ក្រុមស៊ើបអង្កេតត្រូវបានបញ្ជូនទៅកាន់កន្លែងកើតហេតុ ស្ថិតនៅភាគខាងត្បូងរដ្ឋធានីមូស្គូ ។ សារព័ត៌មានរុស្ស៊ី រាយការណ៍ថា ហេតុការណ៍ផ្ទុះគ្រាប់បែកនេះ បានកើតមាននៅចំណតរថយន្ត ស្ថិតនៅជិតអគារផ្ទះល្វែង ៕

ការពិភាក្សាជ្រើសរើសថ្នាក់ដឹកនាំកំពូលវៀតណាម កាន់តែតានតឹង ខណៈបក្សកុម្មុយនីស្តជួបប្រជុំ

មន្ត្រីជាន់ខ្ពស់នៃបក្សកុម្មុយនីស្តដែលកំពុងកាន់អំណាចរបស់ប្រទេសវៀតណាម បានចាប់ផ្តើមកិច្ចប្រជុំរយៈពេល ២ថ្ងៃ នៅថ្ងៃចន្ទ (ទី២២ ខែធ្នូ) ជាការជួបជុំពិភាក្សាដែលនឹងជ្រើសរើសបេក្ខជនកាន់តំណែងដឹកនាំប្រទេស សម្រាប់រយៈពេល ៥ឆ្នាំខាងមុខ។ការជួបជុំនេះកើតឡើងមុនសមាជរបស់គណបក្សរៀងរាល់ ៥ឆ្នាំម្ដង ដែលគ្រោងនឹងធ្វើនៅថ្ងៃទី១៩ ដល់ថ្ងៃទី២៥ ខែមករា ឆ្នាំ២០២៦ ជាពេលវេលាដែលនឹងមានការតែងតាំងមេដឹកនាំផ្លូវការ ហើយកំណត់គោលនយោបាយ និងគោលដៅសេដ្ឋកិច្ចសំខាន់ៗ សម្រាប់រយៈពេលដែលនៅសល់នៃទសវត្សរ៍នេះ។ប្រធានបក្ស លោក To Lam បានបើកកិច្ចប្រជុំ ដោយនិយាយថា កិច្ចប្រជុំពេញអង្គនៃគណៈកម្មាធិការមជ្ឈិមរបស់គណបក្ស មានភារកិច្ចក្នុងការបញ្ចប់ដំណើរការជ្រើសរើសមេដឹកនាំរដ្ឋ និងគណបក្ស។ នេះបើយោងតាមសុន្ទរកថារបស់លោកដែលបានចេញផ្សាយនៅលើគេហទំព័ររដ្ឋាភិបាល។លោក Lam បានប្រាប់សមាជិកបក្សប្រហែលជា ២០០នាក់ ដែលចូលរួមកិច្ចប្រជុំនេះថា៖ «ខ្ញុំស្នើឲ្យអ្នកទាំងអស់គ្នាផ្តោតទៅលើបញ្ញាដ៏ជ្រៅជ្រះ និងការទទួឡខុសត្រូវរបស់អ្នក ដើម្បីជ្រើសរើសបុគ្គល ដែលត្រូវតែងតាំងសម្រាប់សមាជបក្សលើកទី១៤ ប្រកបដោយភាពស្មោះត្រង់ គោលបំណង និងមិនលម្អៀង»។យ៉ាងណាក្ដី ឈ្មោះបេក្ខជនដែលត្រូវបានជ្រើសរើស អំឡុងការប្រជុំរបស់គណបក្សនៅមុននេះ មិនត្រូវបានគេបញ្ចេញឲ្យដឹងនោះឡើយ។ គណបក្សបានឲ្យដឹងនៅក្នុងគេហទំព័ររបស់ខ្លួនថា កិច្ចប្រជុំនេះនឹងបញ្ចប់នៅថ្ងៃទី២៣ ខែធ្នូ ប៉ុន្តែអាជ្ញាធរមិនបានបញ្ជាក់ថា តើការសម្រេចរបស់កិច្ចប្រជុំពេញអង្គនេះ នឹងត្រូវបានបង្ហាញជាសាធារណៈ បន្ទាប់ពីបានបញ្ចប់ដែរ ឬទេ។គួរបញ្ជាក់ថា លោក Lam ដែលមានវ័យ ៦៨ឆ្នាំ កំពុងស្វែងរកអាណត្តិទី២ ជាប្រធានបក្ស ដែលជាការងារដ៏មានឥទ្ធិពលបំផុតរបស់ប្រទេស ដែលរូបលោកទទួលបាន កាលពីខែសីហា ឆ្នាំ២០២៤ បន្ទាប់ពីអ្នកស្នងតំណែងមុនរបស់លោក គឺលោក Nguyen Phu Trong បានទទួលមរណភាព៕

ស្លូវ៉ាគីគាំទ្រកិច្ចចរចាសន្តិភាពអ៊ុយក្រែន និងព្រមានថា តំបន់បាល់កង់ខាងលិចអាចនឹងលែងជឿជាក់ EU

ប្រធានាធិបតីស្លូវ៉ាគី លោក Peter Pellegrini បាននិយាយកាលពីថ្ងៃអាទិត្យ (ទី២១ ខែធ្នូ) ថា ប្រទេសរបស់លោកគាំទ្រការបញ្ចប់ជម្លោះក្នុងប្រទេសអ៊ុយក្រែន តាមរយៈការចរចា និងស្វាគមន៍ការពាក់ព័ន្ធរបស់លោក Donald Trump នៅក្នុងដំណើរការនេះ ដោយបង្ហាញក្តីសង្ឃឹមថា ឆ្នាំ២០២៦ នឹងក្លាយជាឆ្នាំនៃសន្តិភាព។ជាមួយគ្នានេះ អំឡុងពេលថ្លែងនៅឯសន្និសីទសារព័ត៌មានរួមមួយ ក្នុងទីក្រុង Belgrade ប្រទេសស៊ែរប៊ី បន្ទាប់ពីមានកិច្ចពិភាក្សាជាមួយប្រធានាធិបតីស៊ែរប៊ី លោក Aleksandar Vucic លោក Pellegrini បានព្រមានថា ការបន្តពន្យារពេលរបស់សហភាពអឺរ៉ុប (EU) ក្នុងដំណើរការបន្ថែមសមាជិករបស់ប្លុក ប្រឈមនឹងហានិភ័យធ្វើឲ្យតំបន់បាល់កង់ខាងលិចលែងមានការជឿជាក់។លោក Pellegrini បានបញ្ជាក់ថា «EU កំពុងប្រឈមនឹងហានិភ័យធ្វើឲ្យបាត់ការជឿទុកចិត្តរបស់ពលរដ្ឋនៃបណ្ដាប្រទេសបាល់កង់លោកខាងលិច» ដោយលោកបានបន្ថែមថា ការពន្យារពេលការបើកដំណើរការក្រុមចរចារបស់ EU សម្រាប់ប្រទេសស៊ែរប៊ី បង្ហាញពី «ល្បែងនយោបាយរបស់រដ្ឋសមាជិកមួយចំនួន»។លោក Pellegrini បានព្រមានថា ការពន្យារពេលយូរ អាចនាំឲ្យប្រជាជនក្នុងតំបន់ បោះបង់ទស្សនៈរួបរួមជាមួយអឺរ៉ុបទាំងស្រុង ជាការវិវត្តន៍ដែលលោកបាននិយាយថា នឹងធ្វើឲ្យសន្តិសុខ និងភាពជឿជាក់យូរអង្វែងរបស់ EU ចុះខ្សោយ។សម្រាប់ការដោះស្រាយជម្លោះ នៅអ៊ុយក្រែន លោកបានបញ្ជាក់ពីជំហររបស់ស្លូវ៉ាគីថា សង្រ្គាមគួរត្រូវបានដោះស្រាយនៅតុចរចា។ ហើយលោកបានកោតសរសើរ ចំពោះការចូលរួមពាក់ព័ន្ធរបស់លោក Trump ក្នុងគំនិតផ្តួចផ្តើមសន្តិភាព និងបានសង្កត់ធ្ងន់លើសារៈសំខាន់នៃការបង្កើនកិច្ចប្រឹងប្រែងការទូត ដើម្បីបញ្ចប់ជម្លោះនេះ។ លោកបាននិយាយថា «ខ្ញុំសង្ឃឹមថា ឆ្នាំ២០២៦ អាចជាឆ្នាំនៃសន្តិភាព»៕

ប្រធានាធិបតីអារ៉ាប់រួម ជួបពិភាក្សាជាមួយលោក Elon Musk អំពី AI និងកិច្ចសហប្រតិបត្តិការផ្នែកបច្ចេកវិទ្យា

ប្រធានាធិបតីអារ៉ាប់រួម លោក Sheikh Mohamed bin Zayed Al Nahyan បានជួបពិភាក្សាជាមួយលោក Elon Musk កាលពីថ្ងៃអាទិត្យ ដោយបានផ្តោតលើបញ្ញាសិប្បនិម្មិត (AI) បច្ចេកវិទ្យាទំនើប និងកិច្ចសហប្រតិបត្តិការអន្តរជាតិ នៅក្នុងវិស័យមួយដែលកំពុងរីកចម្រើន។យោងតាមសារព័ត៌មាន WAM បានឲ្យដឹងថា លោកទាំងពីរ បានពិភាក្សាអំពីការអភិវឌ្ឍជាបន្តបន្ទាប់នៅក្នុង AI និងបច្ចេកវិទ្យាជំនាន់ក្រោយ និងរបៀបដែលឧបករណ៍បែបនេះ អាចត្រូវបានដាក់ពង្រាយ ដើម្បីកែលម្អគុណភាពជីវិត បង្កើនល្បឿននវានុវត្តន៍សកល និងគាំទ្រដល់ការអភិវឌ្ឍសេដ្ឋកិច្ចរយៈពេលវែង។ភាគីទាំងពីរបានសង្កត់ធ្ងន់លើសារៈសំខាន់នៃភាពជាដៃគូអន្តរជាតិ និងការផ្លាស់ប្តូរចំណេះដឹង ដើម្បី ពន្លឿនការទទួលយកបច្ចេកវិទ្យា និងពង្រឹងសមត្ថភាពរបស់ប្រទេសនានា ក្នុងការឆ្លើយតបទៅនឹងបញ្ហាប្រឈម នាពេលអនាគត។កិច្ចប្រជុំនេះមានការចូលរួមពីមេដឹកនាំជាន់ខ្ពស់របស់ប្រទេសអារ៉ាប់រួម រួមទាំងព្រះអង្គម្ចាស់រាជទាយាទនៃទីក្រុងឌូបៃ និងអាប៊ូដាប៊ី។លោក Musk បានរក្សាទំនាក់ទំនងយ៉ាងកក់ក្តៅជាមួយប្រទេសអារ៉ាប់រួម ក្នុងប៉ុន្មានឆ្នាំថ្មីៗនេះ ដោយបានបង្ហាញខ្លួននៅក្នុងវេទិកាបច្ចេកវិទ្យាដែលគាំទ្រដោយរដ្ឋាភិបាល និងដាក់ក្រុមហ៊ុន Tesla និង SpaceX ជាដៃគូ ក្នុងការជំរុញនវានុវត្តន៍របស់តំបន់នេះ។លោកបានថ្លែងនៅក្នុងកិច្ចប្រជុំកំពូលរដ្ឋាភិបាលពិភពលោក នៅទីក្រុងឌូបៃក្នុងឆ្នាំ ២០១៧ និងម្តងទៀតនៅឆ្នាំ ២០២៣ ជាកន្លែងដែលលោកបានសរសើរការផ្តោតអារម្មណ៍របស់របស់ប្រទេសអារ៉ាប់រួម ទៅលើការផ្លាស់ប្តូរឌីជីថល៕

លោក PUTIN៖ ឥណ្ឌាត្រៀមខ្លួនរួចជាស្រេច ដើម្បីបង្កើនការងារលើកិច្ចព្រមព្រៀងពាណិជ្ជកម្មជាមួយ EAEU

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រាប់កិច្ចប្រជុំកំពូលសហភាពសេដ្ឋកិច្ចអឺរ៉ុប-អាស៊ីថា EAEU កំពុងរៀបចំកិច្ចព្រមព្រៀងពាណិជ្ជកម្មជាមួយឥណ្ឌា ហើយទីក្រុងញូវដែលី បានបង្ហាញពីការត្រៀមខ្លួនរួចជាស្រេច ដើម្បីបង្កើនការងារលើកិច្ចព្រមព្រៀងនេះ។ ប្រមុខរដ្ឋរុស្ស៊ីរូបនេះ បាននិយាយថា៖«កិច្ចព្រមព្រៀងអនុគ្រោះមួយក៏កំពុងត្រូវបានដំណើរការជាមួយប្រទេសឥណ្ឌា ជាប្រទេសមួយដែលបន្តគោលនយោបាយការបរទេសអធិបតេយ្យភាព ដែលជាដៃគូដែលអាចទុកចិត្តបានជាមួយនឹងទីផ្សារដែលមានប្រជាជនចំនួន ១,៥ ពាន់លាននាក់ និងផលិតផលក្នុងស្រុកសរុបប្រហែល ៤ ពាន់ពាន់លានដុល្លារ» ដោយបន្ថែមថា៖«ការពិគ្រោះយោបល់ជុំទី ១ លើអត្ថបទនៃកិច្ចព្រមព្រៀងនេះ ត្រូវបានធ្វើឡើងកាលពីមួយខែមុន»។លោកប្រធានាធិបតីបានបញ្ជាក់ថា៖«ក្នុងអំឡុងពេលដំណើរទស្សនកិច្ចផ្លូវរដ្ឋរបស់យើងទៅកាន់ទីក្រុងញូវដែលីថ្មីៗនេះ ភាគីឥណ្ឌាបានបង្ហាញពីការត្រៀមខ្លួនរួចជាស្រេច ដើម្បីបង្កើនដំណើរការនៃការយល់ព្រមលើឯកសារសំខាន់នេះ»៕

ការគាំទ្រ ចំពោះនាយករដ្ឋមន្ត្រីជប៉ុន នៅតែខ្លាំងក្លា ខណៈជម្លោះជាមួយចិននៅតែមិនថយកម្ដៅ

យោងទៅតាមការស្ទង់មតិដែលត្រូវបានធ្វើឡើងកាលពីចុងសប្តាហ៍ បានបង្ហាញថា ការគាំទ្រ ចំពោះនាយករដ្ឋមន្ត្រីជប៉ុន លោកស្រី Sanae Takaichi បានបន្តរក្សាលំនឹងក្នុងកម្រិតខ្ពស់ជាប្រវត្តិសាស្ត្រ ដែលជាសញ្ញានៃការបន្តការមានប្រជាប្រិយភាពរបស់លោកស្រីយ៉ាងល្អប្រសើរ បើទោះបីជាត្រូវបានប៉ះពាល់ដោយសារជម្លោះជាមួយប្រទេសចិន ជុំវិញការអត្ថាធិប្បាយរបស់លោកស្រី ពាក់ព័ន្ធនឹងកោះតៃវ៉ាន់ កាលពីខែវិច្ឆិកាក៏ដោយ។ការស្ទង់មតិដែលត្រូវបានធ្វើឡើងកាលពីចុងសប្តាហ៍នេះ បានបង្ហាញថា អ្នកឆ្លើយតបប្រហែល ៧០ភាគរយ គឺនៅតែគាំទ្រដល់រដ្ឋបាលរបស់លោកស្រី Takaichi។ សារព័ត៌មាន Nikkei បានដាក់កម្រិតប្រជាប្រិយភាពរបស់លោកស្រី ៧៥ភាគរយ Yomiuri ៧៣ភាគរយ និង Kyodo ៦៧,៥ភាគរយ ខណៈដែលសារព័ត៌មាន Asahi និង Mainichi បានដាក់តួលេខក្នុងកម្រិត ៦៨ភាគរយនិង ៦៧ភាគរយ រៀងគ្នា។លទ្ធផលនៃការស្ទង់មតិ បានតាមដានការបន្តនិន្នាការនេះ ចាប់តាំងពីលោកស្រីបានក្លាយជាស្ត្រីដំបូងគេដែលបានទទួលកាន់តួនាទីកំពូលរបស់ប្រទេសនៅក្នុងខែតុលា។ លោកស្រីបានចូលកាន់តំណែង ស្របពេលដែលឥទ្ធិពលរបស់ប្លុកដែលកំពុងកាន់អំណាច បានចុះខ្សោយដោយសារការបាត់បង់សំឡេងភាគច្រើនក្នុងសភាទាំង២។ខណៈពេលដែលបន្តរកវិធីបញ្ចប់បញ្ហានានាក្នុងស្រុក ជាពិសេសសេដ្ឋកិច្ច លោកស្រី Takaichi ក៏ត្រូវស្វែងរករបៀបដោះស្រាយជាមួយការខឹងសម្បារបស់ប្រទេសចិនផងដែរ បន្ទាប់ពីលោកស្រីបាននិយាយថា ការលុកលុយរបស់ចិន លើកោះតៃវ៉ាន់ អាចជា «ស្ថានភាពគំរាមកំហែងដល់ការរស់រានមានជីវិត» ដែលជាហេតុផលស្របច្បាប់ ដើម្បីឲ្យប្រទេសជប៉ុនដាក់ពង្រាយកងទ័ព ក្នុងគោលបំណងជួយប្រទេសផ្សេងទៀតក្នុងគ្រាអាសន្ន។ប្រទេសចិនបានប្រឹងប្រែងឲ្យមានការដកការអត្ថាធិប្បាយនោះ ប៉ុន្តែលោកស្រី Takaichi បានបដិសេធមិនធ្វើដូច្នេះទេ ដោយនិយាយថា គោលនយោបាយរបស់ជប៉ុន ចំពោះកោះតៃវ៉ាន់ នៅតែមិនផ្លាស់ប្តូរ។ ចាប់តាំងពីពេលនោះមក ទីក្រុងប៉េកាំងបានរិះគន់ខ្លាំងៗលើទីក្រុងតូក្យូ ដោយបានបង្កការគំរាមកំហែងផ្នែកសេដ្ឋកិច្ច និងការទូត ដោយព្រមានពលរដ្ឋរបស់ខ្លួនកុំឲ្យការធ្វើដំណើរទៅជប៉ុន និងបានផ្ញើលិខិតតវ៉ាទៅកាន់អង្គការសហប្រជាជាតិ៕

បណ្ដាញសង្គម

ព័ត៌មានថ្មីៗ

គិតមកត្រឹមថ្ងៃនេះ អំណោយរបស់សម្ដេចតេជោ និងសម្ដេចកិត្តិព្រឹទ្ធបណ្ឌិត,សម្ដេចធិបតី និងលោកជំទាវបណ្ឌិត ចំនួន៣៦,២០០កញ្ចប់ ត្រូវបានចែកដល់ប្រជាពលរតាមជំរំភៀសសឹក

ព្រិលធ្លាក់បានប្រែក្លាយតំបន់ភាគខាងជើងប្រទេសឥណ្ឌាទៅជាដែនដីអច្ឆរិយៈ

វិមានក្រឹមឡាំង៖ ការសន្និដ្ឋានរបស់ចារកម្មអាមេរិកដកស្រង់ដោយសារព័ត៌មាន Reuters គឺ «មិនពិត»

នាយករដ្ឋមន្ត្រីបារាំងធ្វើការឥតឈប់ ដើម្បីអនុម័តច្បាប់ថវិកាបណ្ដោះអាសន្ន ក្នុងគោលបំណងបញ្ចៀសការបិទ

ការឡើងប្រជាប្រិយភាពរបស់ក្រុមស្តាំនិយមជ្រុល នៅភាគខាងលិចអេស្ប៉ាញ មានឥទ្ធិពលលើការបោះឆ្នោត ក្នុងតំបន់

ក្រសួងពាណិជ្ជកម្ម បង្ការ និងទប់ស្កាត់ការក្លែងបន្លំដើមកំណើតទំនិញនាំចេញទៅកាន់ទីផ្សារសហរដ្ឋអាម៉េរិក

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877