BTV NEWS

ស៊ីរីបញ្ជាក់ថា មេដឹកនាំជាន់ខ្ពស់របស់ ISIS ត្រូវបានសម្លាប់

អារ៉ាប៊ីសាអ៊ូឌីត៖ ក្រុមបំបែកខ្លួនយេម៉ែន គួរតែដកកងកម្លាំងចេញពីខេត្តដែលដណ្ដើមបាន

ចិនជំរុញទីភ្នាក់ងារទេសចរណ៍កាត់បន្ថយភ្ញៀវទេសចរទៅជប៉ុនចំនួន ៤0ភាគរយ

យន្តហោះទម្លាក់គ្រាប់បែករុស្ស៊ី អនុវត្តការហោះហើរ «តាមការគ្រោងទុក» លើសមុទ្រន័រវ៉ែស និង Barents

ព័ត៌មានអន្តរជាតិ

ឯកអគ្គរដ្ឋទូតអាមេរិកប្រចាំUN៖ លោក TRUMP នឹងមិនអនុញ្ញាតឲ្យអ៊ីស្រាអែលដាក់បញ្ចូលវេសបែងជាឧបសម្ព័ន្ធទេ

លោកស្រី Jennifer Locetta ឯកអគ្គរដ្ឋទូតរងសហរដ្ឋអាមេរិកប្រចាំអង្គការសហប្រជាជាតិ បានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារថា លោកប្រធានាធិបតី ដូណាល់ ត្រាំ ( Donald Trump) នឹងមិនអនុញ្ញាតឲ្យអ៊ីស្រាអែលដាក់បញ្ចូលតំបន់វេសបែង ( West Bank)ជាឧបសម្ព័ន្ធរបស់ខ្លួនឡើយ។លោកស្រីបាននិយាយថា៖«លោកប្រធានាធិបតី ត្រាំ បានបញ្ជាក់យ៉ាងច្បាស់ថា សហរដ្ឋអាមេរិករំពឹងថាអំពើហិង្សានៅក្នុងតំបន់វេសបែង នឹងត្រូវបញ្ចប់ ហើយសហរដ្ឋអាមេរិកនឹងមិនអនុញ្ញាតឲ្យដាក់បញ្ចូលតំបន់វេសបែងជាឧបសម្ព័ន្ធទេ»។តំបន់វេសបែង គឺជាទីជម្រករបស់ប្រជាជនប៉ាឡេស្ទីនចំនួន ២,៧ លាននាក់ ដែលមានការគ្រប់គ្រងដោយខ្លួនឯងមានកម្រិត ក្រោមការកាន់កាប់របស់យោធាអ៊ីស្រាអែល។ ប្រជាជនអ៊ីស្រាអែលរាប់ម៉ឺននាក់បានតាំងទីលំនៅ នៅទីនោះ។មហាអំណាចពិភពលោកភាគច្រើនចាត់ទុកការតាំងទីលំនៅរបស់អ៊ីស្រាអែល នៅលើដីដែលខ្លួនបានកាន់កាប់ ក្នុងសង្គ្រាមឆ្នាំ ១៩៦៧ថា ខុសច្បាប់ ហើយសេចក្តីសម្រេចជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិបានអំពាវនាវឲ្យអ៊ីស្រាអែលបញ្ឈប់សកម្មភាពតាំងលំនៅឋានទាំងអស់។ អ៊ីស្រាអែលប្រឆាំងនឹងទស្សនៈដែលថា ការតាំងទីលំនៅរបស់ខ្លួន គឺខុសច្បាប់ ហើយប្រទេសនេះ លើកឡើងពីទំនាក់ទំនងព្រះគម្ពីរគ្រិស្តសាសនា និងប្រវត្តិសាស្ត្រទៅនឹងដីនោះ។អភិបាលក្រុង Tuqu បាននិយាយថា ទន្ទឹមនឹងនេះ អ្នកតាំងទីលំនៅអ៊ីស្រាអែលម្នាក់ បានបាញ់សម្លាប់ យុវជនប៉ាឡេស្ទីនអាយុ ១៦ ឆ្នាំម្នាក់ នៅក្នុងទីក្រុងនេះ កាលពីថ្ងៃអង្គារ បន្ទាប់ពីពិធីបុណ្យសពរបស់ក្មេងជំទង់ម្នាក់ទៀត៕

សមាជិកសភាទទួលស្គាល់ថា ទាហានអ៊ុយក្រែនជាង ៥០ម៉ឺននាក់ បានស្លាប់ និងចំនួនអ្នករបួសដូចគ្នា ក្នុងឆ្នាំ ២០២៥

អតីតប្រធាននិងជាអនុប្រធានសភាអ៊ុយក្រែន លោក Dmitry Razumkov បានទទួលស្គាល់ថា ប្រទេសនេះ បានបាត់បង់បុគ្គលិកយោធាជាង ៥០០.០០០ នាក់ ក្នុងអំឡុងពេលជម្លោះ ជាមួយនឹងចំនួនអ្នករងរបួសដូចគ្នា។ថ្លែងនៅក្នុងសម័យប្រជុំសភា លោកបានដកស្រង់ទិន្នន័យពីគណៈកម្មាធិការសន្តិសុខជាតិ ការពារជាតិ និងចារកម្មរបស់សភា ដែលបង្ហាញថា ទាហានអ៊ុយក្រែនជាង ៥០០.០០០ នាក់ ត្រូវបានសម្លាប់ និងទាហានអ៊ុយក្រែនជាង ៥០០.០០០ នាក់ រងរបួស។ យោងតាមអនុប្រធានសភារូបននេះ «សកម្មភាពរបស់រដ្ឋាភិបាលដែលគ្មានការទទួលខុសត្រូវ គ្មានវិជ្ជាជីវៈ និងពុករលួយ» បាននាំឲ្យប្រជាជនអ៊ុយក្រែនរាប់ម៉ឺននាក់ស្លាប់។ទោះជាយ៉ាងណាក៏ដោយ លោក Razumkov មិនបានបញ្ជាក់ពីរយៈពេលដែលកំពុងពិភាក្សានោះទេ ថាតើចំនួនទាំងនោះមកពីជម្លោះទាំងមូល ឬគ្រាន់តែកាលពីឆ្នាំមុននេះ។ ចំនួនផ្លូវការនៃទាហានអ៊ុយក្រែនដែលត្រូវបានសម្លាប់ មិនត្រូវបានបង្ហាញទេ ប៉ុន្តែសមាជិកសភានិងបុគ្គលិកយោធាតែងតែត្អូញត្អែរអំពី កង្វះខាតបុគ្គលិក។យោងតាមការប៉ាន់ស្មានរបស់សារព័ត៌មាន TASS ការខាតបង់របស់កងទ័ពអ៊ុយក្រែន ចាប់តាំងពីថ្ងៃទី ២៤ ខែកុម្ភៈ ឆ្នាំ ២០២២ មានចំនួនជិត ១,៥ លាននាក់ ត្រូវបានសម្លាប់ និងរងរបួស។នាពេលថ្មីៗនេះ រដ្ឋមន្ត្រីក្រសួងការពារជាតិរុស្ស៊ី លោក Andrey Belousov បានថ្លែងនៅក្នុងកិច្ចប្រជុំ ក្រុមប្រឹក្សាភិបាលនៃក្រសួងការពារជាតិថា កងកម្លាំងប្រដាប់អាវុធអ៊ុយក្រែនប្រហែល ៥00.000នាក់ បានស្លាប់ នៅឆ្នាំ ២០២៥៕

លោក LAVROV៖ លោកខាងលិចព្យាយាមបង្ខូចច្បាប់អន្តរជាតិទាក់ទងនឹងស្ថានភាពនៅអ៊ុយក្រែន

រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បាននិយាយកាលពីថ្ងៃពុធថា លោកខាងលិចកំពុងព្យាយាមបង្ខូចបទដ្ឋាននៃច្បាប់អន្តរជាតិទាក់ទងនឹងស្ថានភាពនៅអ៊ុយក្រែន។ លោក Lavrov បានថ្លែងនៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំរបស់លោកជាមួយរដ្ឋមន្ត្រីការបរទេសអ៊ីរ៉ង់ លោក Abbas Aragchi នៅទីក្រុងមូស្គូថា៖«ដំណើរប្រវត្តិសាស្ត្រដែលមានគោលបំណងធ្វើឲ្យការអនុវត្តនូវគោលការណ៍នៃធម្មនុញ្ញអង្គការសហប្រជាជាតិជៀសមិនរួច។ លើសពីនេះ ចាំបាច់ត្រូវ អនុវត្តគោលការណ៍ទាំងនេះ គោរពគោលការណ៍ទាំងនោះ និងអនុវត្តពួកវាជាក់ស្តែង មិនមែនផ្អែកលើ ករណីនីមួយៗនោះទេ ប៉ុន្តែត្រូវអនុវត្តទាំងស្រុងលើភាពពេញលេញ គ្រប់ជ្រុងជ្រោយ និងទំនាក់ទំនងគ្នាទៅវិញទៅមក»។លោកបានបន្តថា៖«នេះជាការពិតជាពិសេសទាក់ទងនឹងជម្លោះអ៊ុយក្រែន ដែលលោកខាងលិចរួមកំពុងព្យាយាមបង្ខូចបទដ្ឋានច្បាប់អន្តរជាតិទាំងអស់ ដើម្បីជំនួសវាដោយច្បាប់ផ្ទាល់ខ្លួន ដែលមិនសមនឹងគោលការណ៍ណែនាំដែលទទួលយកជាទូទៅនៃច្បាប់អន្តរជាតិឡើយ»។យោងតាមលោក ឡាវរ៉ូវ បានឲ្យដឹងថា ដោយមាន«ច្បាប់» ទាំងនេះ លោកខាងលិច ជាពិសេសជនជាតិអឺរ៉ុប ចង់បន្តគោលនយោបាយអាណានិគមនិយមថ្មីរបស់ពួកគេ «ដែលមានគោលបំណងរស់នៅដោយរង់ចំាទទួលផលប្រយោជន៍ពីអ្នកដទៃ ដូចដែលវាបានកើតឡើងក្នុងរយៈពេល ៥០០ឆ្នាំ ចុងក្រោយនេះ»។ បន្ទាប់ពីការពិភាក្សារបស់ពួកគេនៅទីក្រុងមូស្គូកាលពីព្រឹកថ្ងៃពុធ លោក ឡាវរ៉ូវ និងសមភាគីអ៊ីរ៉ង់របស់លោកគឺលោក Araghchi បានចុះហត្ថលេខាលើផែនការសម្រាប់ការពិគ្រោះយោបល់រវាងភ្នាក់ងារការទូតសម្រាប់ឆ្នាំ ២០២៦-២០២៨។ ពិធីចុះហត្ថលេខាបានធ្វើឡើង នៅអគារទទួលភ្ញៀវរបស់ក្រសួងការបរទេសរុស្ស៊ី នៅកណ្តាលទីក្រុងមូស្គូ៕

ជនជាតិប៉ាឡេស្ទីន ៤នាក់ រងរបួស និង ៤០នាក់ ត្រូវបានចាប់ខ្លួនដោយកងទ័ពអ៊ីស្រាអែល នៅតំបន់វេសបែង

ជនជាតិប៉ាឡេស្ទីន ៤នាក់ បានរងរបួសកាលពីថ្ងៃពុធ ក្នុងអំឡុងពេលប៉ះទង្គិចជាមួយកងទ័ពអ៊ីស្រាអែល ដែលក៏បានចាប់ខ្លួនមនុស្ស ៤០នាក់ផ្សេងទៀត នៅក្នុងតំបន់វេសបែង (West Bank)។ នេះបើយោងតាមប្រភពព័ត៌មានប៉ាឡេស្ទីន។ប្រភពសន្តិសុខប៉ាឡេស្ទីនបានប្រាប់សារព័ត៌មានស៊ីនហួថា កងកម្លាំងអ៊ីស្រាអែលបានវាយលុកលើទីក្រុង Nablus ហើយបានវាយឆ្មក់ទីក្រុងចាស់ ដែលបានបង្កឲ្យមានការប៉ះទង្គិចគ្នាដោយហិង្សា ជាមួយយុវជនប៉ាឡេស្ទីន។ប្រភពព័ត៌មានបាននិយាយថា កងកម្លាំងអ៊ីស្រាអែលបានបាញ់គ្រាប់ពិត និងឧស្ម័នបង្ហូរទឹកភ្នែក ទៅលើយុវជនទាំងនោះ ដែលបានឆ្លើយតបដោយការគប់ដុំថ្ម និងដបទទេយ៉ាងច្រើន។នៅក្នុងសេចក្តីថ្លែងការណ៍សារព័ត៌មានមួយ ក្រសួងសុខាភិបាលប៉ាឡេស្ទីនដែលមានមូលដ្ឋាននៅទីក្រុង រ៉ាម៉ាឡា (Ramallah) បាននិយាយថា មនុស្ស ៤នាក់ ដែលបានរងរបួសដោយគ្រាប់កាំភ្លើង ដោយម្នាក់ក្នុងចំណោមពួកគេ មានរបួសទ្រូងយ៉ាងធ្ងន់ធ្ងរ ត្រូវបានបញ្ជូនទៅមន្ទីរពេទ្យរដ្ឋាភិបាល Rafidia ក្នុងទីក្រុង Nablus។ទន្ទឹមនឹងនេះ ក្លិបអ្នកទោសប៉ាឡេស្ទីនបាននិយាយថា កងកម្លាំងអ៊ីស្រាអែលបានបើកយុទ្ធនាការចាប់ខ្លួន និងសួរចម្លើយយ៉ាងទូលំទូលាយនៅទូទាំងតំបន់វេសបែង កាលពីយប់ថ្ងៃអង្គារ និងព្រឹកថ្ងៃពុធ ដោយបានឃុំខ្លួនមនុស្ស ៤០នាក់ ក្នុងនោះមានកុមារម្នាក់ និងអតីតអ្នកទោសផងដែរ៕

រដ្ឋមន្ត្រីការបរទេសអ៊ីរ៉ង់៖ ប្រសិនបើអាមេរិកវាយប្រហារលើអ៊ីរ៉ង់ម្តងទៀត មូលដ្ឋានយោធានៅមជ្ឈិមបូព៌ា គឺជាគោលដៅ

រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បាននិយាយថា ប្រសិនបើសហរដ្ឋអាមេរិកបើកការវាយប្រហារលើអ៊ីរ៉ង់ម្តងទៀត មូលដ្ឋានយោធារបស់ទីក្រុងវ៉ាស៊ីនតោននៅមជ្ឈិមបូព៌ា នឹងត្រូវបានកំណត់គោលដៅ។លោក Araghchi បានលើកឡើងនៅក្នុងបទសម្ភាសន៍ជាមួយទូរទស្សន៍ Al Jazeera របស់ប្រទេសកាតាកាលពីថ្ងៃអង្គារ ខណៈពេលដែលកំពុងធ្វើអត្ថាធិប្បាយអំពីការវាយប្រហារដោយមីស៊ីលសងសឹករបស់អ៊ីរ៉ង់កាលពីខែមិថុនា លើមូលដ្ឋានទ័ពអាកាសអាមេរិកនៅក្នុងប្រទេសកាតា បន្ទាប់ពីសហរដ្ឋអាមេរិកបានទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់។លោក Araghchi បានបញ្ជាក់ថា៖«យើងមិនបានវាយប្រហារប្រទេសកាតាទេ ប៉ុន្តែមូលដ្ឋានអាមេរិកនៅប្រទេសនេះ ។ ប្រសិនបើសង្គ្រាមផ្ទុះឡើងរវាងយើង និងសហរដ្ឋអាមេរិក ហើយអាមេរិកវាយប្រហារទីតាំងនុយក្លេអ៊ែររបស់យើង ពួកគេប្រាកដជារំពឹងថា យើងវាយប្រហារមូលដ្ឋានយោធារបស់ពួកគេ។ ពុំមានអ្វី ខុសគ្នាទេថា មូលដ្ឋានទាំងនោះ ស្ថិតនៅកន្លែងណា។លោកបានបន្ថែមថា៖យើងរស់នៅដោយមិត្តភាពទាំងស្រុងជាមួយប្រទេសជិតខាងរបស់យើង ហើយមិនមានបញ្ហាជាមួយកាតា និងប្រទេសក្នុងតំបន់ផ្សេងទៀតទេ។ ទោះជាយ៉ាងណាក៏ដោយ មូលដ្ឋានយោធា អាមេរិកមានទីតាំងនៅលើទឹកដីរបស់ប្រទេសមួយចំនួន»។លោក Araghchi បានបញ្ជាក់ជាថ្មីថា ដំណោះស្រាយដោយសន្តិវិធីចំពោះបញ្ហានុយក្លេអ៊ែររបស់អ៊ីរ៉ង់ គឺអាចសម្រេចបានទាំងស្រុង ដរាបណាភាគីទាំងពីរគោរពសិទ្ធិគ្នាទៅវិញទៅមក និងត្រៀមខ្លួនរួចជាស្រេចដើម្បីសម្រេចបានកិច្ចព្រមព្រៀង ដោយផ្អែកលើផលប្រយោជន៍ទៅវិញទៅមក៕

ប្រមុខអង្គការសហប្រជាជាតិថ្កោលទោសការបន្តឃុំខ្លួនបុគ្គលិកUNដោយក្រុមហ៊ួទី នៅក្នុងប្រទេសយេម៉ែន

អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេសកាលពីថ្ងៃពុធ បានថ្កោលទោសការបន្តឃុំខ្លួនតាមអំពើចិត្តនូវបុគ្គលិកUN ដោយក្រុមហ៊ួទី នៅក្នុងប្រទេសយេម៉ែន។លោកបានប្រាប់អ្នកយកព័ត៌មានបន្ទាប់ពីបានជម្រាបជូនក្រុមប្រឹក្សាសន្តិសុខអំពីស្ថានភាពនៅក្នុងប្រទេសយេម៉ែន ក្នុងការពិគ្រោះយោបល់បិទទ្វារថា៖«ខ្ញុំថ្កោលទោសយ៉ាងដាច់អហង្ការចំពោះការឃុំខ្លួនបុគ្គលិក UN និងបុគ្គលិកដៃគូចំនួន ៥៩នាក់ ក៏ដូចជាបុគ្គលិកមកពីអង្គការមិនមែនរដ្ឋាភិបាល អង្គការសង្គមស៊ីវិល និងបេសកកម្មការទូតជាបន្តបន្ទាប់។ «ខ្ញុំសូមអំពាវនាវឲ្យមានការដោះលែងពួកគេជាបន្ទាន់ និងដោយគ្មានលក្ខខណ្ឌ ស្របតាមច្បាប់អន្តរជាតិ»។ក្នុងរយៈពេលប៉ុន្មានថ្ងៃថ្មីៗនេះ អាជ្ញាធរហ៊ួទី បានបញ្ជូនបុគ្គលិកUNបីនាក់ទៅកាន់តុលាការព្រហ្មទណ្ឌពិសេសមួយ។ លោក ហ្គុយតឺរេស បាននិយាយថា ការបញ្ជូននេះ ត្រូវតែលុបចោល។ ពួកគេត្រូវបានចោទប្រកាន់ទាក់ទងនឹងការបំពេញកាតព្វកិច្ចផ្លូវការរបស់អង្គការសហប្រជាជាតិ។ លោកបានទទូចថា ការចោទប្រកាន់ទាំងនេះ ត្រូវតែទម្លាក់ចោល។លោក ហ្គុយតឺរេស បានបន្ថែមថា៖«ការបន្តការឃុំខ្លួននូវសហការីរបស់យើង គឺជាអយុត្តិធម៌ដ៏ធ្ងន់ធ្ងរ ចំពោះអ្នកទាំងអស់ដែលបានលះបង់ជីវិតរបស់ពួកគេ ដើម្បីជួយប្រជាជនយេម៉ែន។ អង្គការសហប្រជាជាតិ និងដៃគូរបស់ខ្លួន មិនត្រូវត្រូវបានកំណត់គោលដៅ ចាប់ខ្លួន ឬឃុំខ្លួនទាក់ទងនឹងកាតព្វកិច្ចផ្លូវការរបស់ពួកគេឡើយ។ យើងត្រូវតែត្រូវបានអនុញ្ញាតឲ្យបំពេញការងាររបស់យើង ដោយគ្មានការជ្រៀតជ្រែក»។នៅក្នុងសន្និសីទសារព័ត៌មាន លោក ហ្គុយតឺរេស បានអំពាវនាវឲ្យមានការបន្ធូរបន្ថយភាពតានតឹង នៅក្នុងប្រទេសយេម៉ែន៕

ប្រេងឡើងថ្លៃទៀតហើយ ក្រោយមានរបាយការណ៍អំពីទណ្ឌកម្មថ្មីរបស់សហរដ្ឋអាមេរិក លើរុស្ស៊ី

តម្លៃទីផ្សារប្រេងបានមើលឃើញកំណើនជាថ្មីម្ដងទៀតនៅថ្ងៃព្រហស្បតិ៍ (១៨ ធ្នូ) នេះ បន្ទាប់ពីមានរបាយការណ៍ថា សហរដ្ឋអាមេរិក កំពុងរៀបចំកញ្ចប់ទណ្ឌកម្មថ្មីលើប្រេងរបស់រុស្ស៊ី ប្រសិនបើទីក្រុងមូស្គូ មិនយល់ព្រមលើកិច្ចព្រមព្រៀងសន្តិភាពអ៊ុយក្រែន ស្របពេលទីផ្សារសកលក៏កំពុងវាយតម្លៃហានិភ័យផ្គត់ផ្គង់ ដែលបង្កឡើងដោយការបិទផ្លូវទាំងស្រុងលើនាវាដឹកប្រេងរបស់វ៉េណេស៊ុយអេឡា។សន្ទស្សន៍ប្រេងឆៅ WTI របស់សហរដ្ឋអាមេរិក បានកើនឡើង ៤៤សេន ឬ ០,៧៩% ដល់តម្លៃ ៥៦,៣៨ ដុល្លារក្នុងមួយបារ៉ែល គិតត្រឹមម៉ោងសកល ០២:៥៦នាទី ព្រឹកព្រលឹមថ្ងៃព្រហស្បតិ៍ ចំណែកប្រេងឆៅ Brent បានកើនឡើង ៤២សេន ឬ ០,៧% ដល់ ៦០,១០ ដុល្លារក្នុងមួយបារ៉ែល។កំណើននេះកើតឡើងបន្ទាប់ពីទីភ្នាក់ងារសារព័ត៌មាន Bloomberg បានរាយការណ៍កាលពីថ្ងៃពុធ ដោយសម្អាងដល់ប្រភពមួយចំនួនថា សហរដ្ឋអាមេរិក កំពុងរៀបចំកញ្ចប់ទណ្ឌកម្មថ្មីមួយជុំទៀត លើវិស័យថាមពលរបស់រុស្ស៊ី ក្នុងករណីដែលទីក្រុងមូស្គូ មិនយល់ព្រមលើកិច្ចព្រមព្រៀងសន្តិភាពជាមួយអ៊ុយក្រែន។ យ៉ាងណាមិញ មន្ត្រីសេតវិមានម្នាក់បានប្រាប់សារព័ត៌មានរ៉យទ័រថា លោកប្រធានាធិបតី ដូណាល់ ត្រាំ មិនទាន់ធ្វើការសម្រេចចិត្តណាមួយលើទណ្ឌកម្មរុស្ស៊ី នៅឡើយទេ។អ្នកវិភាគទីផ្សារនៅស្ថាប័ន ING បាននិយាយក្នុងកំណត់ត្រាមួយថា វិធានការបន្ថែមទៀតដែលដាក់គោលដៅលើប្រេងរបស់រុស្ស៊ី អាចបង្កហានិភ័យនៃការផ្គត់ផ្គង់ដល់ទីផ្សារកាន់តែធំ ជាងការប្រកាសរបស់លោក Trump កាលពីថ្ងៃអង្គារសប្ដាហ៍នេះ លើការបិទផ្លូវនាវាដឹកប្រេងដែលជាប់ទណ្ឌកម្ម មិនឱ្យចូល និងចាកចេញពីវ៉េណេស៊ុយអេឡា៕

អតិផរណានៅចក្រភពអង់គ្លេសធ្លាក់ចុះជាងការរំពឹងទុកដល់៣,២% ក្នុងខែធ្នូ២០២៥នេះ

អតិផរណារបស់ចក្រភពអង់គ្លេសបានធ្លាក់ចុះជាងក្រុមសេដ្ឋវិទូបានរំពឹងទុកក្នុងខែវិច្ឆិកាឆ្នាំ២០២៥នេះដល់៣,២% ចុះពី៣,៦%ក្នុងខែតុលា ដោយបង្កើនក្ដីរំពឹងថាធនាគារអង់គ្លេស នឹងកាត់បន្ថយអត្រាការប្រាក់នៅឯកិច្ចប្រជុំរបស់ខ្លួននៅថ្ងៃព្រហស្បតិ៍សប្ដាហ៍នេះ។ យោងតាមទិន្នន័យចេញផ្សាយកាលពីថ្ងៃពុធ១៧ធ្នូសប្ដាហ៍នេះ ដោយការិយាល័យសម្រាប់ស្ថិតិជាតិ(ONS) អតិផរណានៃកម្រិតតម្លៃទំនិញសម្រាប់អ្នកប្រើប្រាស់ បានធ្លាក់ចុះយ៉ាងខ្លាំងជាងការព្យាករណ៍។ ខណៈក្រុមសេដ្ឋវិទូ បានមើលឃើញការធ្លាក់ចុះជាងការរំពឹងទុក ភាគច្រើនបានរំពឹងថាអតិផរណានឹងធ្លាក់រហូតដល់៣,៥ % ។ អតិផរណាស្នូល ដែលមិនរាប់បញ្ចូលតម្លៃអាហារ និងថាមពលដែលមានការប្រែប្រួលខ្លាំង ក៏បានថយចុះច្រើនជាងការរំពឹងទុកផងដែរ ដោយធ្លាក់ចុះពី ៣,៤% មកនៅ ៣,២ ។ អតិផរណាសេវាកម្ម ដែលជារង្វាស់សំខាន់សម្រាប់ធនាគារអង់គ្លេស ខណៈវាយតម្លៃសម្ពាធតម្លៃក្នុងស្រុក បានធ្លាក់ចុះពី៤,៥% មកនៅ៤,៤%។លោក Grant Fitzner ប្រធានសេដ្ឋវិទូនៅការិយាល័យសម្រាប់ស្ថិតិជាតិ ONS បានលើកឡើងថា អតិផរណាបានធ្លាក់ចុះគួរឱ្យកត់សម្គាល់នៅក្នុងខែវិច្ឆិកា ដល់អត្រាប្រចាំឆ្នាំទាបបំផុតចាប់តាំងពីខែមីនាកន្លងទៅ ។ តម្លៃអាហារដែលបានកើនឡើងនៅពេលនេះក្នុងឆ្នាំនេះ គឺជាកត្តាជំរុញដ៏សំខាន់នៃការធ្លាក់ចុះនេះ ដែលគេបានមើលឃើញជាពិសេសសម្រាប់នំខេក ប្រភេទនំជាដុំរឹងៗ ឬនំប៊ីស្គីត និងគ្រាប់ធញ្ញជាតិសម្រាប់អាហារពេលព្រឹកជាដើម៕

ប្រមុខUN ជំរុញឱ្យមានភាពអត់ធ្មត់ខ្ពស់នៅយេម៉ែនបន្ទាប់ពីការរុលទៅមុខរបស់ក្រុមផ្តាច់ខ្លួន

លោក Antonio Guterres អគ្គលេខាធិការអង្គការសហប្រជាជាតិ កាលពីថ្ងៃពុធ ទី១៧ ខែធ្នូ បានជំរុញឱ្យគ្រប់ភាគីទាំងអស់នៅក្នុងប្រទេសយេម៉ែនអនុវត្តភាពអត់ធ្មត់ខ្ពស់បន្ទាប់ពីការរុលទៅមុខដោយក្រុមផ្តាច់ខ្លួនភាគខាងត្បូងដែលប្រឈមហានិភ័យនៃការផ្ទុះឡើងជាថ្មីសង្គ្រាមស៊ីវិលរយៈពេល១០ឆ្នាំ បន្ទាប់ពីភាពស្ងប់ស្ងាត់ជាយូរមកហើយ។ លោកក៏បាននិយាយផងដែរថា បរិយាកាសប្រតិបត្តិការបានប្រែក្លាយមិនអាចទប់ស្កាត់បាននៅក្នុងតំបន់នានាគ្រប់គ្រងដោយចលនាក្រុមហ៊ូទីមានសម្ព័ន្ធភាពជាមួយប្រទេសអ៊ីរ៉ង់ មានរដ្ឋធានីសាណានៅប្រទេសយេម៉ែន និងភាគពាយ័ព្យដែលមានប្រជាជនរស់នៅច្រើន។ក្រុមប្រឹក្សាអន្តរកាលភាគខាងត្បូងរបស់ក្រុមផ្តាច់ខ្លួន ដែលគាំទ្រកាលពីពេលមុនដោយប្រទេសអារ៉ាប់រួម បាននិយាយថា ខ្លួនដណ្តើមបានខេត្ត Hadhramaut និងខេត្ត Mahra ភាគខាងកើត ហើយពេលនេះត្រូវបានបង្កើតឡើងយ៉ាងរឹងមាំនៅទូទាំងខេត្តទាំងអស់នៃអតីតរដ្ឋយេម៉ែនខាងត្បូង។ លោក Guterres បាននិយាយថា «ខ្ញុំសូមអំពាវនាវដល់គ្រប់ភាគីទាំងអស់ឱ្យអនុវត្តភាពអត់ធ្មត់ជាអតិបរមា បន្ធូរបន្ថយភាពតានតឹង និងដោះស្រាយភាពខ្វែងគំនិតគ្នាតាមរយៈការសន្ទនា»។ «នេះរួមទាំងភាគីពាក់ព័ន្ធក្នុងតំបន់ ដែលការចូលរួមនិងការសម្របសម្រួលប្រកបដោយការស្ថាបនាក្នុងការគាំទ្រដល់កិច្ចខិតខំប្រឹងប្រែងសម្របសម្រួលរបស់អង្គការសហប្រជាជាតិ គឺមានសារៈសំខាន់សម្រាប់ធានាបានផលប្រយោជន៍សន្តិសុខរួម»។

លោកZelenskyy ប្រាប់អឺរ៉ុបថា ប្រើប្រាស់ទ្រព្យសកម្មដែលត្រូវបានបង្កក ដើម្បីបញ្ចប់ការស្រេកឃ្លានសង្គ្រាមរបស់រុស្ស៊ី

ប្រធានាធិបតី លោក Volodymyr Zelenskyy បានអំពាវនាវដល់សម្ព័ន្ធមិត្តរបស់អ៊ុយក្រែនកាលពីថ្ងៃពុធ ទី១៧ ខែធ្នូ ឱ្យធានាដល់ការគាំទ្រសម្រាប់ទីក្រុងគីវ និងបង្ហាញដល់រុស្ស៊ីថាការបន្តសង្គ្រាមរបស់ខ្លួនគឺ «គ្មានន័យ»។ ថ្លែងនៅក្នុងសុន្ទរកថាតាមវីដេអូដែលចេញផ្សាយមុនកិច្ចប្រជុំកំពូលសហភាពអឺរ៉ុបដ៏សំខាន់ ស្តីពីទ្រព្យសកម្មដែលត្រូវបានបង្កករបស់ទីក្រុងមូស្គូ លោក Zelenskyy បាននិយាយថាកិច្ចប្រជុំគួរតែផ្តល់លទ្ធផលសម្រាប់អឺរ៉ុបដែលធ្វើឱ្យរុស្ស៊ីមើលឃើញថា ការបន្តសង្គ្រាមនៅឆ្នាំក្រោយគឺគ្មានន័យ។ មេដឹកនាំសហភាពអឺរ៉ុបនឹងជួបប្រជុំគ្នានៅទីក្រុងព្រុចសែលនៅថ្ងៃព្រហស្បតិ៍ ទី១៨ ខែធ្នូនេះ ដើម្បីពិភាក្សាបន្ថែមទៀតអំពីការប្រើប្រាស់ទ្រព្យសកម្មរបស់រុស្ស៊ីដែលត្រូវបានបង្កកដើម្បីផ្តល់ហិរញ្ញប្បទានដល់ប្រទេសអ៊ុយក្រែន។ មន្ត្រីសហភាពអឺរ៉ុបម្នាក់បាននិយាយកាលពីថ្ងៃពុធថា លោក Zelenskyy នឹងចូលរួមក្នុងក្រុមប្រឹក្សាសហភាពអឺរ៉ុបនៅថ្ងៃព្រហស្បតិ៍នេះក្នុងទីក្រុងព្រុចសែលដោយផ្ទាល់។ នៅទីក្រុងមូស្គូ ប្រធានាធិបតី លោក វ្ល៉ាឌីមៀ ពូទីន បាននិយាយថា រុស្ស៊ីនឹងដណ្តើមយកទឹកដីបន្ថែមទៀតនៅអ៊ុយក្រែនដោយប្រើប្រាស់កម្លាំង ប្រសិនបើទីក្រុងគីវនិងអ្នកនយោបាយអឺរ៉ុប ជាអ្នកដែលលោកចាត់ទុកថាជាក្រុម«ជ្រូកស្ទាវ» មិនចូលរួមក្នុងសំណើរបស់សហរដ្ឋអាមេរិកសម្រាប់ដំណោះស្រាយសន្តិភាព។

បណ្ដាញសង្គម

ព័ត៌មានថ្មីៗ

ឯកឧត្តម ទេសរដ្ឋមន្រ្តី គន់ គីម ថ្លែងថា សម្តេចធិបតី ហ៊ុន ម៉ាណែត នាយករដ្ឋមន្រ្តី មានការប្តេជា្ញចិត្តខ្ពស់ចំពោះសុខទុក្ខជនភៀសសឹក។

ស៊ីរីបញ្ជាក់ថា មេដឹកនាំជាន់ខ្ពស់របស់ ISIS ត្រូវបានសម្លាប់

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

ចិនជំរុញទីភ្នាក់ងារទេសចរណ៍កាត់បន្ថយភ្ញៀវទេសចរទៅជប៉ុនចំនួន ៤0ភាគរយ

រដ្ឋមន្រ្តីសុខាភិបាល បានផ្តល់ការបូកសរុបការងារសុខាភិបាលសម្រាប់ឆ្នាំ២០២៥ មានលក្ខណៈល្អ និងកំពុងបន្តឈរលើផ្លូវនៃវឌ្ឍនភាពដ៏វិជ្ជមានជាបន្តបន្ទាប់

ប៉ូឡូញស្ទាក់យន្តហោះឈ្លបយកការណ៍រុស្ស៊ី នៅលើសមុទ្របាល់ទិក

នាយករដ្ឋមន្ត្រីជប៉ុន ធានាជាថ្មីដល់ទីផ្សារ ជាមួយនឹងការគ្រប់គ្រងសារពើពន្ធ ក្នុងថវិកាឆ្នាំក្រោយ

G7 នឹងពិភាក្សាអំពីខ្សែច្រវាក់ផ្គត់ផ្គង់រ៉ែសំខាន់ៗ ដើម្បីដោះស្រាយការពឹងផ្អែកលើចិន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877