BTV NEWS

ស៊ីរីបញ្ជាក់ថា មេដឹកនាំជាន់ខ្ពស់របស់ ISIS ត្រូវបានសម្លាប់

អារ៉ាប៊ីសាអ៊ូឌីត៖ ក្រុមបំបែកខ្លួនយេម៉ែន គួរតែដកកងកម្លាំងចេញពីខេត្តដែលដណ្ដើមបាន

ចិនជំរុញទីភ្នាក់ងារទេសចរណ៍កាត់បន្ថយភ្ញៀវទេសចរទៅជប៉ុនចំនួន ៤0ភាគរយ

យន្តហោះទម្លាក់គ្រាប់បែករុស្ស៊ី អនុវត្តការហោះហើរ «តាមការគ្រោងទុក» លើសមុទ្រន័រវ៉ែស និង Barents

ព័ត៌មានអន្តរជាតិ

សហរដ្ឋអាមេរិក អនុម័តកញ្ចប់សព្វាវុធដ៏ធំបំផុតតម្លៃ ១១,១ពាន់លានដុល្លារ ទៅឱ្យកោះតៃវ៉ាន់

សហរដ្ឋអាមេរិក នៅថ្ងៃពុធ (១៧ ធ្នូ) បានអនុម័តការលក់សព្វាវុធតម្លៃ ១១,១ ពាន់លានដុល្លារ ទៅឱ្យកោះតៃវ៉ាន់ ដែលជាកញ្ចប់អាវុធដ៏ធំបំផុតមិនធ្លាប់មានរបស់សហរដ្ឋអាមេរិកសម្រាប់កោះនេះ ដែលកំពុងស្ថិតនៅក្រោមសម្ពាធយោធាកាន់តែខ្លាំងឡើងពីប្រទេសចិន។ការប្រកាសលក់អាវុធឱ្យកោះតៃវ៉ាន់ចុងក្រោយបំផុតនេះ គឺជាលើកទីពីរហើយ ក្រោមរដ្ឋបាលបច្ចុប្បន្នរបស់លោកប្រធានាធិបតីអាមេរិក Donald Trump ហើយបានកើតឡើងនៅពេលទីក្រុងប៉េកាំង បង្កើនសម្ពាធយោធា និងការទូតលើកោះតៃវ៉ាន់ ដែលប្រទេសចិន អះអាងសិទ្ធិថាជាតំបន់មួយរបស់ខ្លួន។អាជ្ញាធរការពារជាតិតៃវ៉ាន់ បាននិយាយនៅក្នុងសេចក្តីថ្លែងការណ៍មួយថា កញ្ចប់សព្វាវុធនេះ គ្របដណ្តប់លើយុទ្ធោបករណ៍ចំនួន ៨មុខ រួមមានប្រព័ន្ធរ៉ូកែត HIMARS កាំភ្លើងធំ កាំភ្លើងធំប្រឆាំងរថក្រោះ Javelin យានដ្រូនរាវរកគោលដៅ Altius និងគ្រឿងបន្លាស់សម្រាប់យុទ្ធោបករណ៍ផ្សេងៗទៀត។នៅក្នុងសេចក្តីថ្លែងការណ៍ដាច់ដោយឡែកមួយចំនួន ដែលប្រកាសសេចក្ដីលម្អិតនៃកិច្ចព្រមព្រៀងអាវុធ មន្ទីរបញ្ចកោណបាននិយាយថា ការលក់អាវុធទាំងនេះ បម្រើផលប្រយោជន៍ជាតិ សេដ្ឋកិច្ច និងសន្តិសុខរបស់សហរដ្ឋអាមេរិក ដោយគាំទ្រដល់កិច្ចប្រឹងប្រែងជាបន្តបន្ទាប់របស់កោះតៃវ៉ាន់ ដើម្បីធ្វើទំនើបកម្មកងកម្លាំងប្រដាប់អាវុធរបស់ខ្លួន និងដើម្បីរក្សា «សមត្ថភាពការពារដ៏គួរឱ្យទុកចិត្តបាន»៕

ប្រមុខការពារជាតិរុស្ស៊ី ព្រមានបន្តសកម្មភាពយោធាដល់ឆ្នាំ២០២៦ និងចោទអឺរ៉ុបថា អូសបន្លាយជម្លោះ

រដ្ឋមន្ត្រីក្រសួងការពារជាតិរុស្ស៊ី លោក Andrei Belousov បាននិយាយកាលពីថ្ងៃពុធ (១៧ ធ្នូ) ថា ភារកិច្ចសម្រាប់ឆ្នាំ២០២៦ ខាងមុខនេះ គឺជាការបង្កើនល្បឿននៃប្រតិបត្តិការយោធារបស់រុស្ស៊ី ខណៈដែលលោកបានចោទប្រកាន់អឺរ៉ុប ថាកំពុងតែអូសបន្លាយជម្លោះនៅអ៊ុយក្រែន។ថ្លែងតាមកញ្ចក់ទូរទស្សន៍ក្នុងកិច្ចប្រជុំមន្ត្រីការពារជាតិជាន់ខ្ពស់រុស្ស៊ី លោក Belousov បាននិយាយថា រុស្ស៊ីបានដណ្តើមយកទឹកដីកាន់តែច្រើននៅអ៊ុយក្រែន ក្នុងឆ្នាំ២០២៥នេះ ពោលគឺមានចំនួន ១ភាគ៣ ច្រើនជាងឆ្នាំ២០២៤ ហើយការវាយប្រហាររបស់រុស្ស៊ី បានបំបាក់សមត្ថភាពផលិតថាមពលរបស់អ៊ុយក្រែន ដល់ទៅពាក់កណ្តាល។ ប្រមុខការពារជាតិរូបនេះក៏បានលើកឡើងផងដែរនូវអ្វីដែលលោកហៅថា កិច្ចប្រឹងប្រែងរបស់មេដឹកនាំអឺរ៉ុប ក្នុងការ «អូសបន្លាយជម្លោះ» ដែលជំហាននេះ ប្រឈមនឹងការពង្រីកចម្បាំងឱ្យកាន់តែធំនៅអ៊ុយក្រែន នៅឆ្នាំ២០២៦។ ស្លាយបទបង្ហាញមួយ ដែលបញ្ចាំងក្នុងអំឡុងពេលថ្លែងសុន្ទរកថារបស់លោក Belousov បានឱ្យដឹងថា រុស្ស៊ីបានចំណាយ ៥,១% នៃផលិតផលក្នុងស្រុកសរុប (GDP) លើសង្គ្រាមរបស់ខ្លួន ក្នុងឆ្នាំ២០២៥នេះ។រុស្ស៊ីបានចោទប្រកាន់ម្តងហើយម្តងទៀតថា បណ្តាប្រទេសនៅអឺរ៉ុប ព្យាយាមបំផ្លាញកិច្ចប្រឹងប្រែងសន្តិភាពរវាងសហរដ្ឋអាមេរិក និងរុស្ស៊ី។ បណ្ដាមេដឹកនាំអឺរ៉ុបបាននិយាយថា ពួកគេបន្តឈរនៅខាងទីក្រុងគីវ ហើយថា រុស្ស៊ីមិនគួរទទួលបានរង្វាន់សម្រាប់សង្គ្រាមនៅអ៊ុយក្រែននោះទេ ដែលកំពុងតែបន្តយ៉ាងក្ដៅគគុកអស់ជិត ៤ឆ្នាំមកហើយ៕

អ៊ុយក្រែនអះអាងថា ខ្លួនគ្រប់គ្រង ៩០% នៃទីក្រុងយុទ្ធសាស្រ្ត Kupiansk ប៉ុន្តែរុស្ស៊ីបដិសេធ

ប្រមុខយោធារបស់ទីក្រុងគីវ បាននិយាយកាលពីថ្ងៃពុធ (១៧ ធ្នូ) ថា អ៊ុយក្រែននៅតែបន្តគ្រប់គ្រងជិត ៩០% នៃទីក្រុងយុទ្ធសាស្ត្រ Kupiansk ភាគឦសានរបស់ប្រទេសនេះ ប៉ុន្តែរដ្ឋមន្ត្រីការពារជាតិរុស្ស៊ី បានបដិសេធថា ការវាយបករបស់អ៊ុយក្រែន ដើម្បីគ្រប់គ្រងលើទីក្រុងនេះមិនបានជោគជ័យទេ។កាលពីខែមុន នាយសេនាធិការរុស្ស៊ី បានប្រាប់លោកប្រធានាធិបតី Vladimir Putin ថា កងកម្លាំងរុស្ស៊ី បានគ្រប់គ្រងទីក្រុង Kupiansk ទាំងស្រុងហើយ។ ប៉ុន្តែទីក្រុងគីវច្រានចោល ដោយនិយាយថា ក្រុងនេះនៅតែស្ថិតក្នុងកណ្ដាប់ដៃខ្លួន ហើយមេបញ្ជាការអ៊ុយក្រែនបាននិយាយកាលពីសប្តាហ៍មុនថា កងកម្លាំងអ៊ុយក្រែន ដណ្តើមយកផ្នែកខ្លះនៃក្រុងនេះមកវិញ ក្នុងប្រតិបត្តិការមួយដែលឡោមព័ទ្ធកងទ័ពរុស្ស៊ី។លោក Oleksandr Syrskyi អគ្គមេបញ្ជាការកងកម្លាំងប្រដាប់អាវុធអ៊ុយក្រែន បានបង្ហោះលើកម្មវិធីផ្ញើសារតេលេក្រាមកាលពីថ្ងៃពុធថា៖ ដោយសារតែប្រតិបត្តិការស្វែងរក និងវាយប្រហារយ៉ាងសកម្ម អ៊ុយក្រែនបានវាយរុញទ័ពរុស្ស៊ី ចេញពីក្រុង Kupiansk និងគ្រប់គ្រងទឹកដីស្ទើរតែ ៩០% នៃទីក្រុងនេះ។ ក្រោយមក រដ្ឋមន្ត្រីក្រសួងការពារជាតិរុស្ស៊ី លោក Andrey Belousov បានប្រាប់កិច្ចប្រជុំរបស់មន្ត្រីការពារជាតិជាន់ខ្ពស់ថា កងកម្លាំងអ៊ុយក្រែន កំពុងព្យាយាមដណ្តើមយកក្រុង Kupiansk ទៅវិញ ប៉ុន្តែមិនបានជោគជ័យឡើយ។ពុំមានប្រភពណាមួយអាចផ្ទៀងផ្ទាត់ដោយឯករាជ្យនូវស្ថានភាពក្នុងទីក្រុង Kupiansk ទេ។ ក្រុងយុទ្ធសាស្រ្តនេះគឺជាមជ្ឈមណ្ឌលផ្លូវដែកដ៏សំខាន់មួយ ដែលត្រូវបានបំផ្លាញយ៉ាងខ្លាំងក្នុងសង្គ្រាមជិត ៤ឆ្នាំនៅអ៊ុយក្រែន ចាប់តាំងពីប្រតិបត្តិការយោធាទ្រង់ទ្រាយធំរបស់រុស្ស៊ី នៅក្នុងខែកុម្ភៈ ឆ្នាំ២០២២ មក៕

កញ្ចប់ថវិកាការពារជាតិឆ្នាំ២០២៦ តម្លៃជាង ៩០០ពាន់លានដុល្លារ របស់សហរដ្ឋអាមេរិក ឆ្លងផុតព្រឹទ្ធសភា

ព្រឹទ្ធសភាសហរដ្ឋអាមេរិក បានបោះឆ្នោតគាំទ្រយ៉ាងច្រើនលើសលប់ កាលពីថ្ងៃពុធ (១៧ ធ្នូ) ដើម្បីពន្លឿនសេចក្តីព្រាងច្បាប់នៃកញ្ចប់ថវិកាការពារជាតិចំនួន ៩០១ពាន់លានដុល្លារ សម្រាប់មន្ទីរបញ្ចកោណ ដោយបញ្ជូនច្បាប់ដ៏ធំសម្បើមមួយនេះទៅកាន់សេតវិមាន ដែលបន្ទាប់មក លោកប្រធានាធិបតី Donald Trump នឹងចុះហត្ថលេខាឱ្យក្លាយច្បាប់ពេញលេញ។ច្បាប់អនុញ្ញាតការពារជាតិ ឬហៅកាត់ថា NDAA ឆ្នាំសារពើពន្ធ២០២៦ គឺជាការសម្របសម្រួលរវាងវិធានការដាច់ដោយឡែកពីគ្នា ដែលបានអនុម័តកាលពីដើមឆ្នាំនេះ ក្នុងសភាតំណាងរាស្ត្រ និងព្រឹទ្ធសភា។ កញ្ចប់នេះអនុញ្ញាតឱ្យមានការចំណាយយោធាប្រចាំឆ្នាំចំនួន ៩០១ពាន់លានដុល្លារ ជាមួយនឹងការដំឡើងបៀវត្សរ៍ ៤% សម្រាប់កងទ័ព។ កញ្ចប់នេះក៏អនុញ្ញាតឱ្យមានកំណែទម្រង់ប្រព័ន្ធ សម្រាប់ការទទួលបានយុទ្ធោបករណ៍យោធា និងរួមបញ្ចូលទាំងកិច្ចប្រឹងប្រែងដើម្បីជំរុញការប្រកួតប្រជែង ជាមួយគូប្រជែងដ៏សំខាន់របស់សហរដ្ឋអាមេរិក គឺប្រទេសចិន និងរុស្ស៊ី។កញ្ចប់ NDAA ឆ្នាំសារពើពន្ធ២០២៦ ក៏ផ្តល់ជំនួយ ៨០០លានដុល្លារ សម្រាប់អ៊ុយក្រែន - ពោលគឺ ៤០០ លានដុល្លារក្នុងពេលពីរឆ្នាំបន្ទាប់ - ជាផ្នែកមួយនៃគំនិតផ្តួចផ្តើមជំនួយសន្តិសុខអ៊ុយក្រែន ដែលបង់ប្រាក់ឱ្យក្រុមហ៊ុនអាមេរិក ក្នុងការផលិតអាវុធសម្រាប់យោធាអ៊ុយក្រែន។ កញ្ចប់នេះក៏ផ្តល់សិទ្ធិអំណាចដល់គំនិតផ្តួចផ្តើមសន្តិសុខបាល់ទិក និងផ្តល់ប្រាក់ចំនួន ១៧៥លានដុល្លារ ដើម្បីគាំទ្រដល់ការការពារជាតិឡាតវី លីទុយអានី និងអេស្តូនី។ជាមួយគ្នានេះ ច្បាប់ NDAA កំណត់សមត្ថភាពរបស់ក្រសួងការពារជាតិ ក្នុងការកាត់បន្ថយកងកម្លាំងអាមេរិកនៅអឺរ៉ុប មកត្រឹមតិចជាង ៧៦.០០០ នាក់ និងហាមឃាត់មេបញ្ជាការអាមេរិកប្រចាំអឺរ៉ុប មិនឱ្យបោះបង់ចោលតំណែងជាមេបញ្ជាការកំពូលរបស់អង្គការណាតូ។ ក្នុងចំណោមចំណុចជាច្រើនទៀត សំណើច្បាប់នេះក៏មិនបានប្តូរឈ្មោះក្រសួងការពារជាតិអាមេរិក ទៅជាក្រសួងសង្គ្រាម តាមគំនិតរបស់លោក Trump ដែរ៕

ប្រមុខអង្គការសហប្រជាជាតិអំពាវនាវឱ្យមានការអត់ធ្មត់ និងកាត់បន្ថយភាពតានតឹងជាបន្ទាន់នៅក្នុងតំបន់ការ៉ាអ៊ីប

អ្នកនាំពាក្យអង្គការសហប្រជាជាតិមួយរូបបាននិយាយកាលពីថ្ងៃពុធ១៧ធ្នូសប្ដាហ៍នេះថា អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យមានការអត់ធ្មត់ និងកាត់បន្ថយភាពតានតឹងជាបន្ទាន់នៅក្នុងតំបន់ការ៉ាអ៊ីប។ ឆ្លើយតបទៅនឹងសំណួរពីសកម្មភាពចុងក្រោយបំផុតរបស់សហរដ្ឋអាមេរិកប្រឆាំងនឹងប្រទេសវ៉េណេស៊ុយអេឡា លោក Farhan Haq អ្នកនាំពាក្យរងរបស់ប្រមុខអង្គការសហប្រជាជាតិ បានប្រាប់ក្រុមអ្នកសារព័ត៌មាននៅក្នុងសន្និសីទសារព័ត៌មានប្រចាំថ្ងៃមួយថា លោក Guterres កំពុងតាមដានស្ថានភាពបច្ចុប្បន្នយ៉ាងយកចិត្តទុកដាក់ និងកំពុងចូលរួមជាមួយភាគីពាក់ព័ន្ធ។លោក Haq បាននិយាយថា លោកអគ្គលេខាធិការអំពាវនាវឱ្យភាគីពាក់ព័ន្ធទាំងអស់គោរពកាតព្វកិច្ចរបស់ខ្លួនក្រោមច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិ និងក្របខ័ណ្ឌច្បាប់ដែលអាចអនុវត្តបានផ្សេងទៀត ដើម្បីការពារសន្តិភាពនៅក្នុងតំបន់។ លោកបាននិយាយថា លោក Guterres ជឿជាក់ថាការខ្វែងគំនិតគ្នាណាមួយត្រូវតែ ត្រូវបានដោះស្រាយដោយសន្តិវិធី។លោក Haq បានបន្ថែមថា នៅដំណាក់កាលនេះ ពិតជាមានសារៈសំខាន់ណាស់ក្នុងការបន្តការចូលរួមការទូត និងបន្តផ្លូវសន្តិភាពទៅមុខតាមរយៈការសន្ទនា។ កាលពីថ្ងៃអង្គារសប្ដាហ៍នេះ ប្រធានាធិបតីសហរដ្ឋអាមេរិក លោក Donald Trump បានបញ្ជាឱ្យបិទផ្លូវទាំងស្រុងនៃនាវាដឹកប្រេងជាប់ទណ្ឌកម្មទាំងអស់ដែលធ្វើដំណើរទៅមកពីប្រទេសវ៉េណេស៊ុយអេឡា ជាការបង្កើនយុទ្ធនាការដាក់សម្ពាធរយៈពេលជាច្រើនខែប្រឆាំងនឹងប្រធានាធិបតីវ៉េណេស៊ុយអេឡា លោក Nicolas Maduro ដែលលោកថាប្រទេសនេះជាប្រភពនាំគ្រឿងញៀនចូលអាមេរិក៕

វ៉េណេស៊ុយអេឡា ស្នើឱ្យកោះប្រជុំក្រុមប្រឹក្សាសន្តិសុខ UN ជុំវិញភាពតានតឹងជាមួយសហរដ្ឋអាមេរិក

យោងតាមលិខិតមួយផ្ញើទៅកាន់ស្ថាប័នកិច្ចប្រជុំ ក្រុមប្រឹក្សាសន្តិសុខអង្គការសហប្រជាជាតិ (UNSC) ដែលមើលឃើញដោយសារព័ត៌មានរ៉យទ័រ បានឱ្យដឹងថា វ៉េណេស៊ុយអេឡា កាលពីថ្ងៃពុធ (១៧ ធ្នូ) បានស្នើឱ្យក្រុមប្រឹក្សាសន្តិសុខដែលមានសមាជិក ១៥ប្រទេសនេះ ជួបប្រជុំគ្នាដើម្បីពិភាក្សាអំពី ភាពតានតឹងដែលកំពុងបន្តរវាងសហរដ្ឋអាមេរិក ជាមួយនឹងប្រទេសនេះ។អ្នកការទូត UN មួយរូបបាននិយាយថា កិច្ចប្រជុំមួយទំនងជានឹងត្រូវកំណត់ពេលធ្វើឡើង នៅថ្ងៃអង្គារ សប្ដាហ៍ក្រោយ។ សំណើកោះប្រជុំ UNSC នេះ បានកើតឡើងបន្ទាប់ពីលោកប្រធានាធិបតីអាមេរិក Donald Trump កាលពីថ្ងៃអង្គារ បានបញ្ជាឱ្យ «ខ្ទប់ផ្លូវទាំងស្រុង» លើនាវាជាប់ទណ្ឌកម្មទាំងអស់ ដែលដឹកប្រេងចូល និងចាកពីវ៉េណេស៊ុយអេឡា នៅក្នុងជំហានចុងក្រោយបង្អស់របស់ទីក្រុងវ៉ាស៊ីនតោន ដើម្បីបង្កើនសម្ពាធលើរដ្ឋាភិបាលរបស់លោកប្រធានាធិបតី Nicolas Maduro ដោយកំណត់គោលដៅប្រភពចំណូលសំខាន់របស់ខ្លួន។ភាពតានតឹងកំពុងតែកើនឡើងខ្ពស់រវាងអាមេរិក និងវ៉ណេស៊ុយអេឡា ជាមួយនឹងវត្តមានយោធាទ្រង់ទ្រាយធំរបស់អាមេរិក នៅភាគខាងត្បូងតំបន់ការ៉ាអ៊ីប ការវាយប្រហារលើទូកដែលសង្ស័យថាជួញដូរគ្រឿងញៀន និងការព្រមានពីលោក Trump ដែលថា ប្រតិបត្តិការជើងគោក អាចនឹងចាប់ផ្តើមក្នុងពេលឆាប់ៗនេះនៅវ៉េណេស៊ុយអេឡា។រដ្ឋបាលលោក Trump បានថ្លឹងថ្លែងជម្រើសមួយចំនួនទាក់ទងនឹងវ៉េណេស៊ុយអេឡា ដើម្បីប្រយុទ្ធប្រឆាំងនឹងអ្វីដែលខ្លួនអះអាងថាជា តួនាទីរបស់លោក Maduro ក្នុងការផ្គត់ផ្គង់គ្រឿងញៀនខុសច្បាប់ ដែលសម្លាប់ជនជាតិអាមេរិកអស់ជាច្រើន។ មេដឹកនាំវ៉េណេស៊ុយអេឡារូបនេះបដិសេធម្ដងហើយម្ដងទៀតថា លោកពុំមានទំនាក់ទំនងជាមួយក្រុមគ្រឿងញៀនខុសច្បាប់ទាំងនោះឡើយ៕

ព្យុះរដូវរងាកាន់តែធ្ងន់ធ្ងរសម្រាប់វិបត្តិមនុស្សធម៌នៅហ្កាហ្សា ខណៈអង្គការសហប្រជាជាតិនិយាយថាជំនួយនៅតែត្រូវបានរារាំង

ព្យុះរដូវរងាកំពុងធ្វើឱ្យស្ថានភាពកាន់តែធ្ងន់ធ្ងរសម្រាប់ប្រជាជនប៉ាឡេស្ទីនរាប់ម៉ឺននាក់ដែលត្រូវបានភៀសខ្លួនចេញពីតំបន់ហ្កាហ្សា ខណៈភ្នាក់ងារជំនួយព្រមានថាការរឹតបន្តឹងរបស់អ៊ីស្រាអែលកំពុងរារាំងជំនួយជម្រកសង្គ្រោះជីវិតមិនឲ្យទៅដល់ដៃប្រជាជនទូទាំងតំបន់ដែលត្រូវបានឡោមព័ទ្ធនេះ។អង្គការសហប្រជាជាតិបាននិយាយថា ខ្លួនមានតង់ ភួយ និងសម្ភារៈចាំបាច់ផ្សេងទៀតរួចរាល់ដើម្បីចូលទៅក្នុងតំបន់ហ្កាហ្សា ប៉ុន្តែអាជ្ញាធរអ៊ីស្រាអែលនៅតែបន្តរារាំង ឬរឹតត្បិតការចូលតាមព្រំដែន។ ក្រុមអ្នកជួយសង្គ្រោះបាននិយាយកាលពីថ្ងៃពុធ១៧ធ្នូសប្ដាហ៍នេះថា នៅក្នុងជំរំជនភៀសខ្លួន Shati នៃទីក្រុងហ្កាហ្សា ដំបូលផ្ទះគ្រួសារដែលរងការខូចខាតដោយសង្គ្រាមបានដួលរលំក្នុងអំឡុងពេលព្យុះ ។ប្រជាជនប៉ាឡេស្ទីន៦នាក់ រួមទាំងកុមារពីរនាក់ ត្រូវបានទាញចេញពីគំនរកម្ទេចថ្មដោយនៅមានជីវិត។ នេះបានកើតឡើងបន្ទាប់ពីក្រសួងសុខាភិបាលហ្កាហ្សានិយាយថា ទារកប៉ាឡេស្ទីនអាយុពីរសប្តាហ៍ម្នាក់បានស្លាប់ដោយសារត្រជាក់ខ្លាំងពេក ដោយបានបង្ហាញពីហានិភ័យដែលមនុស្សវ័យក្មេង និងមនុស្សចាស់ប្រឈមនឹងការរស់នៅក្នុងជម្រកមិនត្រឹមត្រូវ។រហូតមកដល់ពេលនេះចំនួនអ្នកស្លាប់ ដោយសារភ្លៀងធ្លាក់ខ្លាំង ការជន់លិចជំរំជនភៀសខ្លួន និងការបាក់រលំអគារបានកើនឡើងដល់១៤នាក់។អ្នកនាំពាក្យរបស់អគ្គលេខាធិការអង្គការសហប្រជាជាតិ លោក Antonio Guterres បាននិយាយថា ព្យុះបានបំផ្លាញ ឬបង្កការខូចខាតជម្រក និងសម្ភារៈផ្ទាល់ខ្លួននៅទូទាំងដែនដីនេះ៕

លោក Putin និយាយថារុស្ស៊ីនឹងយកទឹកដីបន្ថែមទៀតនៅអ៊ុយក្រែន បើអឺរ៉ុបជាន់ពន្លិចកិច្ចខិតខំប្រឹងប្រែងសន្តិភាព

លោកប្រធានាធិបតីរុស្ស៊ី Vladimir Putin និយាយថា រុស្ស៊ីនឹងយកដីបន្ថែមទៀតក្នុងប្រទេសអ៊ុយក្រែនដោយកម្លាំង ប្រសិនបើទីក្រុងគីវ និងក្រុមអ្នកនយោបាយអឺរ៉ុប មិនបានចូលរួមពិភាក្សាលើសំណើរបស់សហរដ្ឋអាមេរិកសម្រាប់ការដោះស្រាយសន្តិភាពទេនោះ។សហរដ្ឋអាមេរិកបានរៀបចំកិច្ចពិភាក្សាជាមួយរុស្ស៊ី និងដោយឡែកពីគ្នាជាមួយអ៊ុយក្រែន និងបណ្ដាមេដឹកនាំអឺរ៉ុប លើសំណើបញ្ចប់សង្គ្រាមនៅអ៊ុយក្រែន ប៉ុន្តែមិនទាន់មានកិច្ចព្រមព្រៀងណាមួយត្រូវបានសម្រេចនៅឡើយទេ។ ទីក្រុងគីវ និងសម្ព័ន្ធមិត្តអឺរ៉ុបរបស់ខ្លួន មានការព្រួយបារម្ភអំពីការទាមទារសម្បទានទឹកដីអ៊ុយក្រែន ហើយអ៊ុយក្រែនចង់បានការធានាសន្តិសុខកាន់តែរឹងមាំ។ ក្នុងកិច្ចប្រជុំប្រចាំឆ្នាំរបស់ក្រសួងការពារជាតិ មេដឹកនាំកំពូលរុស្ស៊ីរូបនេះ បាននិយាយថា រុស្ស៊ី ដែលបានបញ្ជូនកងទ័ពរាប់ម៉ឺននាក់ចូលប្រទេសអ៊ុយក្រែនក្នុងឆ្នាំ ២០២២ កំពុងរុលទៅមុខគ្រប់ទិសទី ហើយនឹងសម្រេចគោលបំណងរបស់ខ្លួនដោយកម្លាំង ឬតាមរយៈការទូត។លោក Putin បានលើកឡើងថា ប្រសិនបើភាគីប្រឆាំង និងក្រុមអ្នកគាំទ្របរទេសរបស់ពួកគេបដិសេធមិនចូលរួមការពិភាក្សាដ៏សំខាន់ នោះរុស្ស៊ីនឹងសម្រេចបាននូវការរំដោះទឹកដីប្រវត្តិសាស្ត្ររបស់ខ្លួនដោយមធ្យោបាយយោធា។ រុស្ស៊ីបាននិយាយថា ខ្លួនគ្រប់គ្រងប្រហែល១៩%នៃប្រទេសអ៊ុយក្រែន រួមទាំងឧបទ្វីបគ្រីម៉េ ដែលខ្លួនបានបញ្ចូលក្នុងឧបសម្ព័ន្ធកាលពីឆ្នាំ ២០១៤ ក៏ដូចជាទឹកដីភាគច្រើនក្នុងតំបន់ Donbas ភាគខាងកើត តំបន់ Kherson និងតំបន់ Zaporizhzhia ភាគច្រើន និងផ្នែកខ្លះនៃតំបន់ចំនួន៤ផ្សេងទៀត។ រុស្ស៊ីបាននិយាយថា តំបន់ គ្រីម៉េ តំបន់ Donbas តំបន់ Kherson និងតំបន់ Zaporizhzhia ឥឡូវនេះជាផ្នែកមួយនៃប្រទេសរុស្ស៊ី។ អ៊ុយក្រែនបាននិយាយថា ខ្លួននឹងមិនទទួលយករឿងនោះទេ ហើយប្រទេសស្ទើរតែទាំងអស់ចាត់ទុកតំបន់ទាំងនោះជាផ្នែកមួយរបស់អ៊ុយក្រែន៕

លោក Putin៖ រុស្ស៊ីនឹងសម្រេចបានគោលដៅសង្គ្រាម ដោយបន្តពង្រីក «តំបន់ទ្រនាប់»

លោកប្រធានាធិបតី Vladimir Putin បានបញ្ជាក់នៅថ្ងៃពុធ (ទី១៧ ខែធ្នូ) នេះថា រុស្ស៊ីនឹងសម្រេចបាននូវគោលដៅរបស់ខ្លួន នៅក្នុងប្រទេសអ៊ុយក្រែន តាមរយៈមធ្យោបាយការទូត ឬយោធា ហើយនឹងប្រឹងប្រែងពង្រីក «តំបន់ទ្រនាប់សន្តិសុខ» នៅទីនោះ។លោក Putin បាននិយាយថា៖ «ទី១ គោលដៅនៃប្រតិបត្តិការយោធាពិសេស ប្រាកដជានឹងសម្រេចបាន។ យើងពេញចិត្តធ្វើរឿងនេះ និងដោះស្រាយបញ្ហាឫសគល់នៃជម្លោះនេះ តាមរយៈការទូតជាង»។លោកបានបន្ថែមថា៖ «ប្រសិនបើភាគីប្រឆាំង និងក្រុមអ្នកគាំទ្របរទេសរបស់ពួកគេ បដិសេធមិនចូលរួម ក្នុងការពិភាក្សាសំខាន់ៗទេនោះ រុស្ស៊ីនឹងសម្រេចបាននូវការរំដោះដែនដីប្រវត្តិសាស្ត្ររបស់ខ្លួន តាមមធ្យោបាយយោធា។ ភារកិច្ចបង្កើត និងពង្រីកតំបន់ទ្រនាប់សន្តិសុខ ក៏នឹងត្រូវបានដោះស្រាយយ៉ាងជាប់លាប់ផងដែរ»។គួរបញ្ជាក់ថា ក្នុងចំណោមតំបន់របស់ប្រទេសអ៊ុយក្រែន ដែលរុស្ស៊ីបានអះអាងថា ជាដែនដីរបស់ខ្លួននោះ នាពេលនេះ ខ្លួនកំពុងគ្រប់គ្រងតំបន់គ្រីម៉ា ប្រហែល ៩០ភាគរយនៃតំបន់ Donbas ហើយ ៧៥ភាគរយនៃតំបន់ Kherson និង Zaporizhzhia។លើសពីនេះទៀត រុស្ស៊ីកាន់កាប់ដែនដីមួយចំនួននៅក្នុងតំបន់ជាប់គ្នាជាច្រើននៃតំបន់ Kharkov, Sumy, Dnipropetrovsk និង Mykolaiv។ ហើយការអត្ថាធិប្បាយរបស់លោក Putin នេះ បានផ្តល់សញ្ញាថា ទីក្រុងមូស្គូនឹងប្រឹងប្រែងឲ្យមានប្រៀបបន្ថែមទៀត លើផ្នែកមួយចំនួននៃតំបន់សមរភូមិជួរមុខទាំងនេះ។ដោយសង្រ្គាមស្ថិតនៅក្នុងដំណាក់កាលសំខាន់មួយ ពីព្រោះលោកប្រធានាធិបតីអាមេរិក Donald Trump ជំរុញយ៉ាងខ្លាំង ដើម្បីឲ្យមានកិច្ចព្រមព្រៀងសន្តិភាពឆាប់រហ័សនោះ លោក Putin បាននិយាយថា រុស្ស៊ីកំពុងរុលទៅមុខនៅសមរភូមិជួរមុខទាំងអស់៕

បេសកជនបង់ក្លាដែស នៅឥណ្ឌា ត្រូវបានកោះអញ្ជើញ ពាក់ព័ន្ធបញ្ហាសន្តិសុខ នៅទីក្រុង Dhaka

នៅថ្ងៃពុធ (ទី១៧ ខែធ្នូ) នេះ ប្រទេសឥណ្ឌាបានកោះអញ្ជើញស្នងការជាន់ខ្ពស់បង់ក្លាដែស ប្រចាំនៅទីក្រុងញូវដេលី ដើម្បីបង្ហាញពីក្ដីបារម្ភយ៉ាងខ្លាំងរបស់ខ្លួន ជុំវិញអ្វីដែលខ្លួនបានពិពណ៌នាថា ជាស្ថានភាពសន្តិសុខកាន់តែអាក្រក់ឡើង នៅក្នុងប្រទេសបង់ក្លាដែស ជាពិសេសការគំរាមកំហែងដែលកំណត់គោលដៅលើបេសកកម្មឥណ្ឌា នៅទីក្រុង Dhaka។ចំណាត់ការនេះបានកើតឡើងក្នុងរយៈពេល ២ថ្ងៃបន្ទាប់ពីបង់ក្លាដែសបានកោះអញ្ជើញស្នងការជាន់ខ្ពស់ឥណ្ឌា ប្រចាំនៅទីក្រុង Dhaka ដើម្បីតវ៉ា ចំពោះអ្វីដែលខ្លួនហៅថា «សេចក្តីថ្លែងការណ៍បង្កហេតុ» ដែលធ្វើឡើងដោយអតីតនាយករដ្ឋមន្ត្រី លោកស្រី Sheikh Hasina ពីដែនដីរបស់ឥណ្ឌា ដោយព្រមានថា ការកត់សម្គាល់បែបនេះអាចធ្វើឲ្យខូចដល់ដំណើរការបោះឆ្នោតសភានាពេលខាងមុខរបស់ប្រទេស។បង់ក្លាដែសកំពុងរៀបចំ សម្រាប់ការបោះឆ្នោតជាតិ នៅថ្ងៃទី១២ ខែកុម្ភៈ ក្រោមរដ្ឋបាលបណ្តោះអាសន្នដែលដឹកនាំដោយម្ចាស់ជ័យលាភីរង្វាន់ណូបែល លោក Muhammad Yunus។ រដ្ឋាភិបាលបណ្តោះអាសន្ននេះ បានចូលកាន់តំណែងបន្ទាប់ពីលោកស្រី Hasina បានភៀសខ្លួនទៅឥណ្ឌា ក្នុងខែសីហា ឆ្នាំ២០២៤ អំឡុងពេលមានការតវ៉ាដ៏ធំ។ទំនាក់ទំនង រវាងប្រទេសជិតខាង ចាប់ផ្ដើមមានភាពតានតឹង ចាប់តាំងពីលោកស្រី Hasina បានភៀសខ្លួនទៅកាន់ទីក្រុងញូវដេលី ហើយទីក្រុង Dhaka បានស្នើសុំធ្វើបត្យាប័នលោកស្រីម្តងហើយម្តងទៀត។យោងតាមក្រសួងកិច្ចការបរទេសឥណ្ឌា (MEA) ស្នងការជាន់ខ្ពស់ លោក Riaz Hamidullah ត្រូវបានជូនដំណឹង អំពីសកម្មភាពរបស់ក្រុមជ្រុលនិយមមួយចំនួនដែលតាមសេចក្ដីរាយការណ៍ បានប្រកាសផែនការបង្កើតស្ថានភាពប៉ះពាល់ដល់សន្តិសុខ នៅជុំវិញបេសកកម្មឥណ្ឌា ក្នុងទីក្រុង Dhaka។ ទីក្រុងញូវដេលី បានបញ្ជាក់ថា ការវិវត្តទាំងនេះ គឺជាបញ្ហាដ៏គួរឲ្យព្រួយបារម្ភយ៉ាងខ្លាំង៕

បណ្ដាញសង្គម

ព័ត៌មានថ្មីៗ

ឯកឧត្តម ទេសរដ្ឋមន្រ្តី គន់ គីម ថ្លែងថា សម្តេចធិបតី ហ៊ុន ម៉ាណែត នាយករដ្ឋមន្រ្តី មានការប្តេជា្ញចិត្តខ្ពស់ចំពោះសុខទុក្ខជនភៀសសឹក។

ស៊ីរីបញ្ជាក់ថា មេដឹកនាំជាន់ខ្ពស់របស់ ISIS ត្រូវបានសម្លាប់

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

ចិនជំរុញទីភ្នាក់ងារទេសចរណ៍កាត់បន្ថយភ្ញៀវទេសចរទៅជប៉ុនចំនួន ៤0ភាគរយ

រដ្ឋមន្រ្តីសុខាភិបាល បានផ្តល់ការបូកសរុបការងារសុខាភិបាលសម្រាប់ឆ្នាំ២០២៥ មានលក្ខណៈល្អ និងកំពុងបន្តឈរលើផ្លូវនៃវឌ្ឍនភាពដ៏វិជ្ជមានជាបន្តបន្ទាប់

ប៉ូឡូញស្ទាក់យន្តហោះឈ្លបយកការណ៍រុស្ស៊ី នៅលើសមុទ្របាល់ទិក

នាយករដ្ឋមន្ត្រីជប៉ុន ធានាជាថ្មីដល់ទីផ្សារ ជាមួយនឹងការគ្រប់គ្រងសារពើពន្ធ ក្នុងថវិកាឆ្នាំក្រោយ

G7 នឹងពិភាក្សាអំពីខ្សែច្រវាក់ផ្គត់ផ្គង់រ៉ែសំខាន់ៗ ដើម្បីដោះស្រាយការពឹងផ្អែកលើចិន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877