BTV NEWS

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

ព័ត៌មានអន្តរជាតិ

លោកTrump៖ មានតែ «ការចុះចាញ់ដោយគ្មានលក្ខខណ្ឌ» របស់អ៊ីរ៉ង់ប៉ុណ្ណោះ ទើបអាចបញ្ចប់សង្គ្រាមបាន

ប្រធានាធិបតីសហរដ្ឋអាមេរិក លោក Donald Trump កាលពីថ្ងៃសុក្រ ទី៧ ខែមីនា បានទាមទារ «ការចុះចាញ់ដោយគ្មានលក្ខខណ្ឌ» របស់អ៊ីរ៉ង់ ជាលទ្ធផលតែមួយគត់ដែលអាចទទួលយកបាន ដើម្បីបញ្ចប់អរិភាព ខណៈសន្យាថានឹងជួយកសាងសេដ្ឋកិច្ចរបស់ប្រទេសនេះឡើងវិញ ប្រសិនបើទីក្រុងតេអេរ៉ង់គោរពតាម។ ការទាមទាររបស់លោក Trump ទំនងជាការពង្រីកគោលដៅដ៏សំខាន់របស់សហរដ្ឋអាមេរិកសម្រាប់សង្គ្រាម ដែលទីក្រុងវ៉ាស៊ីនតោនកាលពីពេលមុនបាននិយាយថា ផ្តោតសំខាន់លើកម្មវិធីមីស៊ីល និងកងកម្លាំងជើងទឹករបស់អ៊ីរ៉ង់។លោក Trump បានសរសេរនៅលើវេទិកា Truth Social របស់លោកថា «នឹងគ្មានកិច្ចព្រមព្រៀងជាមួយអ៊ីរ៉ង់ទេ លើកលែងតែការចុះចាញ់ដោយគ្មានលក្ខខណ្ឌ»។ ការបង្ហោះនេះ បានធ្វើឡើង នៅពេលដែលអ៊ីស្រាអែល បានទម្លាក់គ្រាប់បែកលើគោលដៅរបបនេះនៅក្នុងទីក្រុងតេអេរ៉ង់ និងទីតាំងក្រុមហេសបូឡា ក្នុងទីក្រុងបេរូត ប្រទេសលីបង់ និងខណៈរដ្ឋមន្ត្រីក្រសួងការពារជាតិ លោក Pete Hegseth បាននិយាយថា ការវាយប្រហាររបស់សហរដ្ឋអាមេរិកលើអ៊ីរ៉ង់ «ប្រហែលជាកើនឡើងខ្លាំង»។លោក Trump បាននិយាយថា បន្ទាប់ពីការចុះចាញ់ណាមួយធ្វើឡើងដោយសាធារណរដ្ឋអ៊ីស្លាម សហរដ្ឋអាមេរិក និងសម្ព័ន្ធមិត្តរបស់ខ្លួននឹងធ្វើការដើម្បីនាំអ៊ីរ៉ង់ «ត្រឡប់ចេញពីមាត់ជ្រោះនៃការបំផ្លិចបំផ្លាញ ដោយធ្វើឱ្យប្រទេសនេះមានសេដ្ឋកិច្ចកាន់តែធំ ប្រសើរជាងមុន និងរឹងមាំជាងពេលណាៗទាំងអស់»។ នេះនឹងអាស្រ័យលើការតែងតាំងអ្វីដែលលោកហៅថា «មេដឹកនាំដ៏អស្ចារ្យ និងអាចទទួលយកបាន»។

កងទ័ពស៊ូដង់ដណ្តើមបានមកវិញទីក្រុង Bara ស្ថិតក្នុងរដ្ឋNorth Kordofan

កងកម្លាំងប្រដាប់អាវុធស៊ូដង់(SAF)ចំណុះរដ្ឋាភិបាល បានប្រកាសថា ពួកគេដណ្តើមបានមកវិញទីក្រុង Bara ដែលជាទីក្រុងធំបំផុតទី ១ របស់រដ្ឋ North Kordofan ស្ថិតនៅតំបន់ភាគខាងលិចប្រទេសហែកហួរដោយសារភ្លើងសង្រ្គាមមួយនេះ បន្ទាប់ពីប្រតិបត្តិការយោធាដែលពួកគេនិយាយថា បានបណ្តេញកងកម្លាំងគាំទ្ររហ័ស(RSF) ចេញពីទីក្រុង និងបង្កការបាត់បង់អាយុជីវិតមនុស្សជាច្រើន និងគ្រឿងយុទ្ធោបករណ៍ ។ប្រភពមន្រ្តីកងទ័ពជាន់ខ្ពស់ស៊ូដង់ បាននិយាយប្រាប់កាសែត Al Jazeera ថា កងទ័ពអាកាស បានបើកការវាយប្រហារយ៉ាងសន្ធាប់កាលពីព្រឹកថ្ងៃព្រហស្បតិ៍លើទីតាំងឈរជើងរបស់កងកម្លាំង RSF នៅក្នុងទីក្រុង Bara ។ពួកគេកត់សំគាល់ឃើញថា ការវាយប្រហារត្រូវចំរថយន្តយោធា និងការប្រមូលផ្តុំរបស់ទាហាន ដោយបានសម្លាប់កងកម្លាំង RSF ជាច្រើននាក់ និងបំផ្លាញរថពាសដែកធន់ធ្ងន់ជាច្រើនគ្រឿង ។ប្រភពបន្តថា ការវាយប្រហារតាមច្រកអាកាស ត្រូវបានធ្វើឡើងតាមក្រោយដោយការវាយប្រហារតាមជើងគោកដ៏គួរភ្ញាក់ផ្អើលរបស់កងទ័ពស៊ូដង់ ចេញពីទីតាំងឈរជើងរបស់ពួកគេ នៅភាគខាងជើងទីក្រុង el-Obeid ដែលជារដ្ឋធានីរបស់រដ្ឋ North Kordofan ជាពិសេសចេញពីរដ្ឋធានី al-Dankoj មុនពេលទាហានរុលចូលទៅកាន់ទីក្រុង និងដណ្តើមបានការគ្រប់គ្រងច្រកចូលសំខាន់របស់ទីក្រុងមួយនេះ ។ប្រភពនិយាយទៀតថា អំឡុងប្រតិបត្តិការ កងកម្លាំងវាយប្រហារ អាចបំផ្លាញរថពាសដែក ៣២គ្រឿងរបស់កងកម្លាំង RSF និងរឹបអូសបានរថពាសដែកនៅល្អ ១០គ្រឿងទៀត បន្ថែមពីលើការសម្លាប់យុទ្ធជនរាប់សិបនាក់ នៅក្នុងការប៉ះទង្គិចគ្នាដោយផ្ទាល់ និងនៅក្នុងការវាយប្រហារតាមយានដ្រូន ។ក្រោយកងកម្លាំង RSF ត្រូវបានរុញច្រានឲ្យចាកចេញពីរដ្ឋធានី Khartoum កាលពីខែមីនា ឆ្នាំ ២០២៥ ក្រុមទាហានប៉ារ៉ាមួយនេះ ផ្លាស់ប្តូរយុទ្ធនាការរបស់ពួកគេទៅកាន់តំបន់ Kordofan និងទីក្រុង el-Fasher ស្ថិតក្នុងរដ្ឋ North Darfur ដែលជាបន្ទាយចុងក្រោយរបស់កងទ័ពស៊ូដង់ នៅតំបន់ធំល្វឹងល្វើយ Darfur រហូតដល់វាធ្លាក់ក្នុងកណ្តាប់ដៃកងកម្លាំង RSF កាលពីខែតុលា ឆ្នាំ ២០២៥ ៕

អាល្លឺម៉ង់ប្រាប់អ៊ីរ៉ង់ឲ្យឈប់វាយប្រហារប្រទេសទី៣ ខណៈមិនឃើញការគំរាមកំហែង ចំពោះណាតូ

រដ្ឋមន្ត្រីការបរទេសអាល្លឺម៉ង់ លោក Johann Wadephul នៅថ្ងៃសុក្រ (ទី៦ ខែមីនា ឆ្នាំ២០២៦) នេះ បានអំពាវនាវឲ្យអ៊ីរ៉ង់ឈប់វាយប្រហារ «ដោយមិនទទួលខុសត្រូវ» ទៅលើប្រទេសទី៣ ប៉ុន្តែបានបន្ថែមថា លោកមិនបានឃើញការគំរាមកំហែងណាមួយ ដែលមានចំពោះសម្ព័ន្ធមិត្តណាតូ (NATO) នោះទេ។ជាមួយគ្នានេះ លោក Wadephul ក៏បានប្រកាសពីការផ្ដល់ជំនួយមនុស្សធម៌បន្ថែមជិត ១០០លានអឺរ៉ូ (១១៥,៦៤លានដុល្លារ) ហើយបាននិយាយថា ប្រទេសនានាត្រូវតែធានាថា ការបម្លាស់ទីលំនៅរបស់ប្រជាជន នៅតំបន់មជ្ឈិមបូព៌ា មិនប្រែក្លាយទៅជា «រលកថ្មីនៃជនភៀសខ្លួន» នោះទេ។លោកបានបញ្ជាក់ថា៖ «វាមិនសមហេតុផលទាំងស្រុងនោះទេដែលអ៊ីរ៉ង់កំពុងវាយប្រហាររដ្ឋដែលមិនបានចូលរួមនៅក្នុងការវាយប្រហារប្រឆាំងនឹងអ៊ីរ៉ង់»។លើសពីនោះ អំឡុងពេលថ្លែងជាមួយសមភាគីហូឡង់របស់លោក លោក Wadephul ក៏បាននិយាយផងដែរថា អ៊ុយក្រែននៅតែជាអាទិភាពសន្តិសុខកំពូលរបស់អាល្លឺម៉ង់ និងបានអំពាវនាវឲ្យហុងគ្រីបញ្ឈប់ការរារាំងជំនួយដល់ប្រទេសនេះ៕

សង្រ្គាមនៅអ៊ីរ៉ង-ឈូងសមុទ្រ បិទផ្ទប់ច្រករបៀងជំនួយ និងពន្យឺតដល់កិច្ចខិតខំជួយសង្រ្គោះសកល

ក្រុមមន្រ្តីជំនួយ ៩រូប និយាយប្រាប់ទីភ្នាក់ងារព័ត៌មានរ៉យទ័រថា ផ្លូវអាកាស ផ្លូវទឹក និងផ្លូវគោកមនុស្សធម៌សំខាន់ៗ ត្រូវបានរឹតត្បិតដោយសារការរំខានដល់ខ្សែចង្វាក់ផ្គត់ផ្គង់ និងដោយសារសង្រ្គាមនៅអ៊ីរ៉ង់-ឈូងសមុទ្រ ធ្វើឲ្យពន្យាពេលការដឹកជញ្ជូនសង្រ្គោះអាយុជីវិត ដល់មនុស្សជួបវិបត្តិដ៏អាក្រក់បំផុតរបស់ពិភពលោក ។យុទ្ធនាការរបស់សហរដ្ឋអាមេរិក-អ៊ីស្រាអែលលើអ៊ីរ៉ង់ បានចូលដល់ថ្ងៃទី ៧ហើយ នៅថ្ងៃសុក្រនេះ ធ្វើឲ្យរង្គោះរង្គើរដល់ទីផ្សារសកលលោក និងកាត់ផ្តាច់ខ្សែចង្វាក់ផ្គត់ផ្គង់ ស្របពេលមានការបិទច្រកសមុទ្រ Hormuz និងដែនអាកាសក្នុងតំបន់ ។ ការរំខានទាំងនេះ កំពុងពន្យាពេលជំនួយនៅតាមតំបន់មួយចំនួន ហើយជំរុញឲ្យតម្លៃកើនឡើង ស្របពេលមនុស្សរាប់រយលាននាក់នៅទូទាំងពិភពលោកប្រឈមនឹងភាពអត់ឃ្លានកម្រិតវិបត្តិ ឬធ្ងន់ធ្ងរជាងនេះ ។លោក Jean-Martin Bauer គឺជាប្រធានសន្តិសុខស្បៀងនៅកម្មវិធីស្បៀងអាហារពិភពលោក និយាយប្រាប់ទីភ្នាក់ងារព័ត៌មានរ៉យទ័រថា ស្ថានភាពបែបនេះ ច្បាស់ជាបង្កើនហានិភ័យនៃភាពអត់ឃ្លានទូទាំងពិភពលោក ហើយអ្វីដែលនឹងកើតឡើង គឺមនុស្សដែលត្រូវការជំនួយខ្លាំងបំផុត នឹងលែងទទួលបានស្បៀងទៀតហើយ ។ក្រុមជំនួយនិយាយថា ការកើនឡើងខ្លាំងតម្លៃប្រតិបត្តិការ នឹងស្រូបយកថវិកាដែលបានជាប់គាំងរួចទៅហើយដោយសារការកាត់បន្ថយជំនួយទ្រង់ទ្រាយធំ ។អង្គការអន្តោប្រវេសន៍អន្តរជាតិ(IOM) និយាយប្រាប់ទីភ្នាក់ងារព័ត៌មានរ៉យទ័រថា ក្រុមហ៊ុនដឹកជញ្ជូនសកលធំៗ បានប្រកាសពីការបង់ថ្លៃបន្ថែមបន្ទាន់ចំនួន ៣ពាន់ដុល្លារ ក្នុង ១ទូកុងតឺន័រ ។អង្គការ IOM, UNHCR, IFRC, WFP, WHO និងទីភ្នាក់ងារកុមារអង្គការសហប្រជាជាតិ ដែលប្រើប្រាស់ឃ្លាំងនៅមជ្ឈមណ្ឌលមនុស្សធម៌ទំហំ ១៥ម៉ឺនម៉ែត្រក្រឡារបស់ទីក្រុង Dubai អារ៉ាប់រួម ដើម្បីស្តុកទំនិញសម្រាប់ការបញ្ជូនឆាប់រហ័ស ប្រឈមនឹងការងារលំបាក ក្នុងការនាំគ្រឿងផ្គត់ផ្គង់របស់ពួកគេចូលផ្លូវឆ្លងកាត់ ។ ពួកគេនិយាយថា នៅក្នុងតំបន់ ការពឹងផ្អែកលើការនាំចូលស្បៀងអាហារប្រហែល ៩០ភាគរយ តម្លៃហក់ឡើងខ្ពស់ និងភាពខ្សត់ខ្សោយទំនិញមួយចំនួន ត្រូវបានគេរំពឹងថានឹងកើតមាន ។អ្នកស្រី Cecile Terraz គឺជាប្រធានសេវាកម្មមនុស្សធម៌សកល និងខ្សែចង្វាក់ផ្គត់ផ្គង់សម្រាប់កាកបាទក្រហម និងអឌ្ឍចន្ទក្រហមអន្តរជាតិ និយាយថា បើសិនជាពួកយើងមិនចែកចាយទំនិញពីទំនិញមនុស្សធម៌ទេនោះ ផលប៉ះពាល់របស់វាមិនអាចសង្រ្គោះអាយុជីវិតមនុស្សបានឡើយ ។ ដូច្នេះហើយ ពួកយើងពិតជាមានការព្រួយបារម្ភយ៉ាងខ្លាំងចំពោះស្ថានភាពមួយនេះ ៕

ប្រជាជនអ៊ីរ៉ង់ជួបជុំដើម្បីអធិដ្ឋានថ្ងៃសុក្រ ជាលើកដំបូងតាំងពីផ្ទុះសង្គ្រាមជាមួយអាមេរិក និងអ៊ីស្រាអែល

ប្រជាជនអ៊ីរ៉ង់យ៉ាងច្រើន បានជួបជុំគ្នានៅកណ្តាលទីក្រុងតេអេរ៉ង់ និងកន្លែងផ្សេងទៀត នៅថ្ងៃសុក្រ (ទី៦ ខែមីនា ឆ្នាំ២០២៦) នេះ ដើម្បីធ្វើការអធិដ្ឋានថ្ងៃសុក្រ ដែលជាលើកដំបូង ចាប់តាំងពីការចាប់ផ្តើមសង្គ្រាមជាមួយសហរដ្ឋអាមេរិក និងអ៊ីស្រាអែល។រូបភាពវីដេអូអនឡាញដែលត្រូវបានចែករំលែកដោយប្រព័ន្ធផ្សព្វផ្សាយអ៊ីរ៉ង់ បានបង្ហាញឲ្យឃើញក្រុមមនុស្សមានទាំងបុរស និងស្ត្រីស្លៀកពាក់ពណ៌ខ្មៅ ដោយអ្នកខ្លះកាន់ទង់ជាតិអ៊ីរ៉ង់ បន្តធ្វើដំណើរទៅកាន់ទីធ្លាបើកចំហរមួយ នៅខាងក្រៅវិហារឥស្លាមធំរបស់មេដឹកនាំសាសនា Imam Khomeini ក្នុងរដ្ឋធានី។ការអធិដ្ឋានថ្ងៃសុក្រសប្តាហ៍នេះ ក៏ជាលើកទី១ ផងដែរ ចាប់តាំងពីការសម្លាប់មេដឹកនាំកំពូលរបស់អ៊ីរ៉ង់ លោក Ayatollah Ali Khamenei អំឡុងការវាយប្រហារជាបន្តបន្ទាប់របស់សហរដ្ឋអាមេរិក និងអ៊ីស្រាអែលដែលបានបង្កឲ្យមានសង្គ្រាម នៅតំបន់មជ្ឈិមបូព៌ា។នៅក្នុងផ្ទៃខាងក្រោយនៃវីដេអូមួយ បុរសម្នាក់ដែលនិយាយតាមរយៈឧបករណ៍បំពងសំឡេង បានកាន់ទុក្ខដល់សពមេដឹកនាំកំពូល។ ក្រោយមក ការសូត្រខនានាពីគម្ពីរកូរ៉ាន បានបន្លឺឡើងពីឧបករណ៍បំពងសំឡេង នៅក្នុងការជួបជុំគ្នានោះ ដែលបានកើតឡើង ក្នុងអំឡុងពេលមានការដាក់ពង្រាយកងកម្លាំងសន្តិសុខយ៉ាងតឹងរ៉ឹងនៅតំបន់នោះ។វីដេអូពីទីក្រុងផ្សេងទៀតនៅទូទាំងប្រទេសអ៊ីរ៉ង់ រួមទាំង Ilam និង Borujerd នៅភាគខាងលិច និង Zahedan នៅភាគអាគ្នេយ៍ បានបង្ហាញឲ្យឃើញនូវទិដ្ឋភាពស្រដៀងគ្នានេះ ដោយអ្នកគោរពបូជាជាច្រើនកាន់ទង់ជាតិអ៊ីរ៉ង់។សង្គ្រាមបានចាប់ផ្តើមនៅថ្ងៃទី២៨ ខែកុម្ភៈ នៅពេលដែលសហរដ្ឋអាមេរិក និងអ៊ីស្រាអែលវាយប្រហារលើអ៊ីរ៉ង់ ដែលបានឆ្លើយតបដោយការវាយប្រហារមូលដ្ឋានទ័ពអាមេរិក នៅក្នុងប្រទេសឈូងសមុទ្រ និងដីគោកអ៊ីស្រាអែល ដោយប្រើប្រាស់យានដ្រូន និងមីស៊ីល៕

ទីក្រុងមូស្គូមើលឃើញកំណើនតម្រូវការខ្ពស់សម្រាប់ប្រេង និងឧស្ម័នធម្មជាតិរុស្ស៊ី ស្របពេលសង្រ្គាមអ៊ីរ៉ង់

វិមានក្រឹមឡាំង និយាយថា សង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ បានជំរុញឲ្យមានកំណើនតម្រូវការខ្ពស់ សម្រាប់ផលិតថាមពលរុស្ស៊ី រយៈពេល ១ថ្ងៃ ក្រោយរតនាគារសហរដ្ឋអាមេរិក ចេញការលើកលែងពេល ៣០ថ្ងៃ ដើម្បីអនុញ្ញាតឲ្យឥណ្ឌាទិញប្រេងរុស្ស៊ីដែលបច្ចុប្បន្នកំពុងជាប់នៅក្នុងសមុទ្រ ។ជម្លោះដែលបានឈានចូលដល់ថ្ងៃទី ៧នាថ្ងៃសុក្រនេះ បណ្តាលឲ្យច្រកសមុទ្រ Hormuz ដែលជាផ្លូវដឹកជញ្ជូនដ៏សំខាន់ បិទទាំងអស់ ក្នុងនោះប្រទេសនៅជុំវិញពិភពលោក ជួបការលំបាកចំពោះការផ្គត់ផ្គង់ប្រេង និងឧស្ម័នធម្មជាតិរាវ ។រុស្ស៊ីដែលនៅជាប់ដៃធ្វើសង្រ្គាមផ្ទាល់ខ្លួននៅអ៊ុយក្រែនដែរនោះ អាចនឹងទទួលបានអត្ថប្រយោជន៍ពីសង្រ្គាមថ្មីនៅមជ្ឈិមបូព៌ា ។អ្នកនាំពាក្យវិមានក្រឹមឡាំងលោក Dmitry Peskov និយាយប្រាប់ក្រុមអ្នកសារព័ត៌មាននាថ្ងៃសុក្រនេះថា រុស្ស៊ីនៅតែជាប្រទេសផ្គត់ផ្គង់ឧស្ម័ន និងប្រេងដែលអាចទុកចិត្តបានដដែល តាមរយៈបំពង់បង្ហូរឧស្ម័ន និងឧស្ម័នធម្មជាតិរាវ ។លោកបន្តថា ពួកយើងបានមើលឃើញកំណើនខ្លាំងលើតម្រូវការសម្រាប់ធនធានធម្មជាតិរបស់រុស្ស៊ី ពាក់ព័ន្ធនឹងសង្រ្គាមនៅអ៊ីរ៉ង់ ។ រុស្ស៊ីនៅតែអាចធានាដល់និរន្តរភាពការចែកចាយទាំងអស់ដែលកិច្ចសន្យាត្រូវបានបញ្ចប់ ៕

ក្រិកនឹងដាក់ពង្រាយប្រព័ន្ធ Patriot ដើម្បីការពារប៊ុលហ្គារី ខណៈសង្គ្រាមមជ្ឈិមបូព៌ាកាន់តែអាក្រក់ទៅៗ

រដ្ឋមន្ត្រីក្រសួងការពារជាតិក្រិក នៅថ្ងៃសុក្រ (ទី៦ ខែមីនា ឆ្នាំ២០២៦) នេះ បាននិយាយថា ប្រព័ន្ធមីស៊ីល Patriot ១គ្រឿង និងយន្តហោះចម្បាំង F-16 ចំនួន ២គ្រឿង នឹងត្រូវបានដាក់ពង្រាយនៅភាគខាងជើងប្រទេស ដើម្បីជួយការពារប៊ុលហ្គារីពីការវាយប្រហារដោយអ៊ីរ៉ង់ ខណៈភ្លើងសង្គ្រាម នៅតំបន់មជ្ឈិមបូព៌ា ឆាបឆេះយ៉ាងសន្ធោសន្ធៅខ្លាំងឡើងៗ។លោក Nikos Dendias បាននិយាយតាមរយៈកញ្ចក់ទូរទស្សន៍ថា៖ «ប្រព័ន្ធមីស៊ីល Patriot ១គ្រឿង នឹងត្រូវបានផ្ទេរក្នុងរយៈពេលប៉ុន្មានម៉ោងខាងមុខនេះ ទៅកាន់ភាគខាងជើងនៃប្រទេសក្រិក ដើម្បីធានាជួយលើកកម្ពស់សមត្ថភាព ប្រឆាំងនឹងមីស៊ីលបាលីស្ទិក សម្រាប់ផ្នែកធំមួយនៃទឹកដីប៊ុលហ្គារី”។លោកបាននិយាយថា ប្រទេសក្រិកនឹងផ្តល់ «ជំនួយដែលអាចធ្វើទៅបានទាំងអស់ ដើម្បីជួយប៊ុលហ្គារីការពារមីស៊ីលបាលីស្ទិករបស់អ៊ីរ៉ង់» ប៉ុន្តែមិនបានផ្តល់ព័ត៌មានលម្អិតបន្ថែម អំពីការគំរាមកំហែងណាមួយឡើយ។លោក Dendias បានបញ្ជាក់ថា លោកបានទាក់ទងក្នុងរយៈពេល ២ថ្ងៃកន្លងមកនេះ ជាមួយរដ្ឋមន្ត្រីក្រសួងការពារជាតិប៊ុលហ្គារី លោក Atanas Zapryanov បន្ទាប់ពីមានសំណើជាផ្លូវការពីទីក្រុង Sofia សម្រាប់ជំនួយឲ្យជួយបង្កើនសមត្ថភាពការពារ។បន្ថែមពីលើនោះ យន្តហោះចម្បាំង F-16 ២គ្រឿង នឹងត្រូវផ្ទេរទៅកាន់អាកាសយានដ្ឋានមួយ នៅភាគខាងជើងប្រទេសក្រិក ជាមួយនឹងបេសកកម្មជាក់លាក់ ក្នុងការផ្តល់ការលើកកម្ពស់សមត្ថភាពបន្ថែម សម្រាប់ប្រទេសប៊ុលហ្គារី៕

ឧស្សាហកម្មក្បឿង និងសេរ៉ាមិចឥណ្ឌា ប្រឈមនឹងការបិទផលិតកម្ម ខណៈជម្លោះមជ្ឈិមបូព៌ាបង្អាក់ប្រេង

ក្រុមមន្រ្តីឧស្សាហកម្មនិយាយថា ឧស្សាហកម្មក្បឿង និងសេរ៉ាមិចតម្លៃ ៧ពាន់លានដុល្លាររបស់ឥណ្ឌា ប្រឈមនឹងការបិទផលិតកម្ម ស្របពេលជម្លោះកើនឡើងនៅតំបន់មជ្ឈិមបូព៌ា បានបង្អាក់ដល់ការផ្គត់ផ្គង់ប្រេងឥន្ធនៈ គំរាមកំហែងដល់ការរស់នៅរបស់ពលរដ្ឋរាប់ម៉ឺននាក់ ។ទីក្រុង Morbi ស្ថិតក្នុងរដ្ឋកំណើត Gujarat របស់លោកនាយករដ្ឋមន្រ្តី Narendra Modi នៅភាគខាងលិចប្រទេសឥណ្ឌា ស្ថិតក្នុងចំណោមមជ្ឈមណ្ឌលផលិតសេរ៉ាមិចធំជាងគេបំផុតរបស់ពិភពលោក ហើយនិងជាឆ្អឹងខ្នងនៃឧស្សាហកម្មក្បឿងរបស់ឥណ្ឌា ។សង្រ្គាមសហរដ្ឋអាមេរិក និងអ៊ីស្រាអែលលើអីរ៉ង់ បានបង្អាក់ដល់ការដឹកជញ្ជូនប្រេងឥន្ធនៈចេញពីតំបន់មជ្ឈិមបូព៌ា ធ្វើឲ្យប៉ះពាល់ដល់ឧស្សាហកម្មដែលពឹងផ្អែកលើប្រូប៉ែន និងឧស្ម័នធម្មជាតិ ដើម្បីដុតឡរបស់ខ្លួន ។ក្រុមមន្រ្តីនិយាយថា ភាគច្រើននៃក្រុមហ៊ុនផលិតសេរ៉ាមិចប្រហែល ៨០០ក្រុមហ៊ុន ដែលផលិតក្បឿង សម្ភារៈអនាម័យ និងផលិតផលផ្សេងៗទៀត បានរងផលប៉ះពាល់ដោយសារការកាត់ផ្តាច់ការផ្គត់ផ្គង់ប្រេងឥន្ធនៈ ហើយនិងការផ្អាកការនាំចេញទៅកាន់តំបន់មជ្ឈិមបូព៌ា ៕

UN៖ ជនស៊ីវិលអាហ្វហ្គានីស្ថាន ៥៦នាក់ ត្រូវបានសម្លាប់នៅក្នុងជម្លោះជាមួយប៉ាគីស្ថាន ចាប់តាំងពីសប្តាហ៍មុន

លោក Volker Turk គឺជាប្រធានសិទ្ធិមនុស្សអង្គការសហប្រជាជាតិនិយាយនៅថ្ងៃសុក្រនេះថា ជនស៊ីវិលអាហ្វហ្គានីស្ថាន ៥៦នាក់ ត្រូវបានសម្លាប់ ដែលជិតពាក់កណ្តាលនៃពួកគេគឺជាកុមារ ចាប់តាំងពីអរិភាពជាមួយប្រទេសជិតខាងប៉ាគីស្ថាន កើនឡើងខ្លាំង កាលពីសប្តាហ៍មុន ។លោក Turk និយាយនៅក្នុងសេចក្តីថ្លែងការណ៍ថា លោកសូមលន់តួរដល់ភាគីទាំងអស់ ឲ្យបញ្ចប់ជម្លោះមួយនេះ និងផ្តល់អាទិភាពលើការជួយអ្នកដែលកំពុងជួបការលំបាកខ្លាំង ។ប្រទេសជិតខាងទាំង ២ បានប៉ះទង្គិចគ្នាតាមបណ្តោយព្រំដែន ចាប់តាំងពីថ្ងៃទី ២៦ ខែកុម្ភៈរហូតមក ពេលដែលអាហ្វហ្គានីស្ថាន បើកការវាយប្រហារតាមព្រំដែន ជាការសងសឹកចំពោះការវាយប្រហារតាមច្រកអាកាសរបស់ប៉ាគីស្ថាន ។ទីក្រុងអ៊ីស្លាម៉ាបាដ បានបើកការវាយប្រហារតាមព្រំដែនជាមួយនឹងការទម្លាក់គ្រាប់បែកលើទីតាំងជាច្រើន រួមទាំងអតីតមូលដ្ឋានទ័ពអាកាសសហរដ្ឋអាមេរិក ស្ថិតក្នុងទីក្រុង Bagram រដ្ឋធានីកាប៊ុល និងទីក្រុងភាគខាងត្បូង Kandahar ។លោក Turk និយាយថា ចាប់តាំងពីការកើនឡើងអរិភាព ជនស៊ីវិល ៥៦នាក់ រួមទាំងកុមារ ២៤នាក់ និងស្រ្តី ៦នាក់ ត្រូវបានសម្លាប់ ។ លោកបន្តថា មនុស្ស ១២៩នាក់បន្ថែមទៀត រួមទាំងកុមារ ៤១នាក់ និងស្រ្តី ៣១នាក់ បានរងរបួស ហើយចាប់តាំងពីដើមឆ្នាំនេះរហូតមក ចំនួនគ្រោះថ្នាក់កាន់តែខ្ពស់ ក្នុងនោះជនស៊ីវិល ៦៩នាក់ ត្រូវបានសម្លាប់នៅអាហ្វហ្គានីស្ថាន ហើយមនុស្ស ១៤១នាក់ បានរងរបួស ៕

ប្រមុខសិទ្ធិមនុស្ស UN៖ ពិភពលោកត្រូវតែទប់ស្កាត់បន្ទាន់នូវការកើនឡើងភាពតានតឹង នៅមជ្ឈិមបូព៌ា

នៅថ្ងៃសុក្រ (ទី៦ ខែមីនា ឆ្នាំ២០២៦) នេះ ប្រមុខសិទ្ធិមនុស្សអង្គការសហប្រជាជាតិ (UN) បាននិយាយថា ពិភពលោក ត្រូវការទប់ស្កាត់ជាបន្ទាន់នូវការកើនឡើងភាពតានតឹង នៅតំបន់មជ្ឈិមបូព៌ា ស្របពេលមានការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ និងការវាយប្រហារសងសឹករបស់ទីក្រុងតេអេរ៉ង់។អំឡុងពេលថ្លែងទៅកាន់អ្នកសារព័ត៌មាន នៅទីក្រុងហ្សឺណែវ ប្រទេសស្វីស លោក Volker Turk បានលើកឡើងថា ជំនួសឲ្យការថយចុះនូវភាពតានតឹង ពិភពលោកកំពុងឃើញ «វោហាសាស្ត្រញុះញង់ និងបង្កសង្គ្រាមថែមទៀត ការទម្លាក់គ្រាប់បែកបន្ថែមទៀត ការបំផ្លិចបំផ្លាញបន្ថែមទៀត ការសម្លាប់បន្ថែមទៀត និងការកើនឡើងនូវភាពតានតឹងដែលជំរុញដល់ស្ថានភាពនោះបន្ថែមទៀត»។លោក Turk បានបង្ហាញ «ក្ដីបារម្ភយ៉ាងខ្លាំង» អំពីការគោរពច្បាប់មនុស្សធម៌អន្តរជាតិ ជាពិសេសទាក់ទងនឹងការបង្កអរិភាព។ លោកក៏បានគូសបញ្ជាក់ពីរបាយការណ៍នៃការវាយប្រហារលើសាលារៀនមួយ ដោយសង្កត់ធ្ងន់ថា ទីតាំងស៊ីវិលត្រូវតែការពារ។ លោកបាននិយាយថា «ជាក់ស្តែង នេះគឺជាស្ថាប័នស៊ីវិលដែលមិនគួរត្រូវបានវាយប្រហារឡើយ»។ជាមួយគ្នានេះ លោក Turk បានអំពាវនាវឲ្យមានការទទួលខុសត្រូវ និងការស៊ើបអង្កេត លើការរំលោភបំពានដែលត្រូវបានចោទប្រកាន់។ ប្រមុខសិទ្ធិមនុស្ស UN រូបនេះ បាននិយាយថា «អ្វីដែលយើងបានស្នើសុំ គឺការស៊ើបអង្កេតរហ័ស មានតម្លាភាព និងមិនលម្អៀងដោយជាក់ស្ដែង ដែលយើងដឹងថា ត្រូវបានប្រកាសដោយសហរដ្ឋអាមេរិក»។នៅពេលត្រូវបានសួរអំពីសាររបស់លោកទៅកាន់សហរដ្ឋអាមេរិក និងអ៊ីស្រាអែល លោកបានឆ្លើយថា៖ «សារទាំងនោះ គឺថា បន្ថយភាពតានតឹង ត្រឡប់ទៅតុចរចាវិញ ហើយស្វែងរកវិធីមិនប្រើវិធីសាស្ត្រសង្គ្រាម និងវិធានការយោធា ជាមធ្យោបាយរបស់អ្នក ដើម្បីសម្រេចបានអ្វីមួយ»៕

បណ្ដាញសង្គម

ព័ត៌មានថ្មីៗ

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877