BTV NEWS

មន្ត្រីស៊ីរីព្រមានកងកម្លាំង SDF ដឹកនាំដោយឃើដអំពីកិច្ចព្រមព្រៀងធ្វើសមាហរណកម្មដែលពន្យារពេល

ជប៉ុន ត្រៀមទប់ទល់ការរំខានចុងសប្តាហ៍នេះ ខណៈខ្យល់ខ្លាំង និងព្យុះព្រិល ត្រូវព្យាករទុកទូទាំងប្រទេស

ជប៉ុន អនុម័តកញ្ចប់ថវិកាឆ្នាំ២០២៦ ក្នុងទំហំយ៉ាងច្រើនប្រមាណ ៧៨៥ពាន់លានដុល្លារអាមេរិក

របាយការណ៍៖ រដ្ឋអាជ្ញាកូរ៉េខាងត្បូង ស្វះស្វែងរកការកាត់ទោសលោក Yoon ឱ្យជាប់ពន្ធនាគារ ១០ឆ្នាំ

ព័ត៌មានអន្តរជាតិ

ការស្ទង់មតិ៖ ប្រជាប្រិយភាពរបស់លោក Trump ធ្លាក់ចុះដល់ ៣៩% ខណៈសេដ្ឋកិច្ចមានផលប៉ះពាល់អវិជ្ជមាន

យោងតាមការស្ទង់មតិថ្មីរបស់អង្គភាព Reuters/Ipsos បានបង្ហាញឲ្យឃើញថា ក្នុងរយៈពេលប៉ុន្មានថ្ងៃថ្មីៗនេះ ប្រជាប្រិយភាពរបស់លោកប្រធានាធិបតីធាមេរិក Donald Trump បានធ្លាក់ចុះដល់កម្រិតទាបបំផុតនៃអាណត្តិបច្ចុប្បន្នរបស់លោក ខណៈដែលអ្នកបោះឆ្នោតមកពីគណបក្សសាធារណរដ្ឋរបស់លោក បានធុញទ្រាន់ ចំពោះការដោះស្រាយសេដ្ឋកិច្ចរបស់លោក។ការស្ទង់មតិរយៈពេល ៣ថ្ងៃ ដែលបានបញ្ចប់នៅថ្ងៃទី១៤ ខែធ្នូ បានបង្ហាញថា មនុស្សពេញវ័យអាមេរិកក ៣៩ភាគរយ បានគាំទ្រការអនុវត្តការងាររបស់លោក Trump ដោយធ្លាក់ចុះពីកម្រិត ៤១ភាគរយ កាលពីដើមខែធ្នូ ហើយស្ថិតនៅក្នុងរង្វង់ ៣៨ភាគរយ ចាប់ពីពាក់កណ្តាលខែវិច្ឆិកា ដែលជាកម្រិតគាំទ្រទាបបំផុតចំពោះលោក Trump នៅឆ្នាំនេះ។មេដឹកនាំទៅពីគណបក្សសាធារណរដ្ឋរូបនេះ បានវិលទៅកាន់អំណាចវិញ ក្នុងខែមករា ជាមួយនឹងអត្រាគាំទ្រ ៤៧ភាគរយ ប៉ុន្តែប្រជាប្រិយភាពរបស់លោក បានធ្លាក់ចុះចាប់តាំងពីពេលនោះមក ជាពិសេសទាក់ទងនឹងការគ្រប់គ្រងសេដ្ឋកិច្ចរបស់លោក។ការបិទរដ្ឋាភិបាលកន្លងទៅថ្មីៗនេះ បានរំខានដល់ការប្រមូលទិន្នន័យ ស្តីពីសេដ្ឋកិច្ចអាមេរិក ប៉ុន្តែសេដ្ឋកិច្ចវិទូជាច្រើន គិតថា និយោជកបានបន្ថយសកម្មភាពជួលបុគ្គលិកធ្វើការងារ ដោយសារតែអ្វីដែលអ្នកខ្លះ បានពិពណ៌នាថា ជាគោលនយោបាយដំឡើងពន្ធគួរឲ្យភា្ញក់ផ្អើលរបស់លោក Trump លើការនាំចូល៕

អង្គការ WHO មានការព្រួយបារម្ភចំពោះបុគ្គលិកសុខាភិបាល និងជនស៊ីវិល «ត្រូវបានឃុំខ្លួនដោយបង្ខំ» នៅស៊ូដង់

អង្គការសុខភាពពិភពលោកកាលពីថ្ងៃអង្គារ បានសម្តែងការព្រួយបារម្ភចំពោះរបាយការណ៍ដែលថា បុគ្គលិកសុខាភិបាលជាង ៧០ នាក់ និងជនស៊ីវិលប្រហែល ៥០០០ នាក់ កំពុងត្រូវបានឃុំខ្លួន នៅទីក្រុង Nyala ភាគនិរតីនៃប្រទេសស៊ូដង់។ចាប់តាំងពីខែមេសា ឆ្នាំ ២០២៣ កងទ័ពធម្មតារបស់ប្រទេសស៊ូដង់ និងកងកម្លាំងគាំទ្ររហ័ស (RSF) ត្រូវបានជាប់គាំងនៅក្នុងជម្លោះដ៏ឃោរឃៅមួយ ដែលបានសម្លាប់មនុស្សរាប់ម៉ឺននាក់ ធ្វើឲ្យមនុស្ស ១២ លាននាក់ផ្សេងទៀតត្រូវផ្លាស់ទីលំនៅ និងបំផ្លាញហេដ្ឋារចនាសម្ព័ន្ធ។លោក Tedros Adhanom Ghebreyesus ប្រធានអង្គការសុខភាពពិភពលោក (WHO) បាននិយាយនៅលើបណ្តាញសង្គម X ថា៖«យើងមានការព្រួយបារម្ភចំពោះរបាយការណ៍ពីទីក្រុង Nyala ដែលជារដ្ឋធានីនៃរដ្ឋ South Darfur របស់ប្រទេសស៊ូដង់ ដែលថា បុគ្គលិកសុខាភិបាលជាង ៧០ នាក់ កំពុងត្រូវបានឃុំខ្លួនដោយបង្ខំ រួមជាមួយជនស៊ីវិលប្រហែល ៥.០០០ នាក់ផងដែរ»។ប្រធានទីភ្នាក់ងារសុខភាពUNរូបនេះ បាននិយាយថា៖«យោងតាមបណ្តាញវេជ្ជបណ្ឌិតស៊ូដង់បានឲ្យដឹងថា អ្នកដែលជាប់ឃុំទាំងអស់នោះ កំពុងត្រូវបានឃុំខ្លួនក្នុងស្ថានភាពចង្អៀត និងមិនល្អ ហើយមានរបាយការណ៍អំពីការផ្ទុះឡើងនៃជំងឺផ្សេងៗ»។កងកម្លាំងគាំទ្ររហ័ស (RSF) និងក្រុមចលនារំដោះប្រជាជនស៊ូដង់ខាងជើង បានរួបរួមគ្នា កាលពីដើមឆ្នាំនេះ ដោយបង្កើតសម្ព័ន្ធភាពមួយ ដែលមានមូលដ្ឋាននៅក្នុងទីក្រុង Nyala៕

UN ជំរុញឲ្យមានការដោះលែងសកម្មជនវ៉េណេស៊ុយអេឡាទាំងអស់ «ដែលត្រូវបានឃុំខ្លួនដោយបំពាន»

លោក Volker Turk ប្រធានសិទ្ធិមនុស្សអង្គការសហប្រជាជាតិកាលពីថ្ងៃអង្គារបានជំរុញឲ្យប្រទេសវ៉េណេស៊ុយអេឡាដោះលែងសកម្មជនទាំងអស់ដែលត្រូវបានឃុំខ្លួនដោយបំពានដោយអាជ្ញាធរជុំវិញ«ការចូលរួមកិច្ចការសង្គមរបស់»របស់ពួកគេ។លោក Turk បានប្រាប់ក្រុមប្រឹក្សាសិទ្ធិមនុស្សថា ចាប់តាំងពីលោកបានធ្វើបច្ចុប្បន្នភាពចុងក្រោយដល់ ស្ថាប័នសិទ្ធិមនុស្សកំពូលរបស់អង្គការសហប្រជាជាតិ ក្នុងខែមិថុនា ស្ថានភាពនៅក្នុងប្រទេសវ៉េណេស៊ុយអេឡា មិនបានប្រសើរឡើងទេ។លោកបាននិយាយថា៖«ខ្ញុំសូមអំពាវនាវឲ្យមានការដោះលែងដោយគ្មានលក្ខខណ្ឌនូវអ្នកដែលត្រូវបានឃុំខ្លួនដោយបំពានទាំងអស់ជុំវិញការចូលរួមសកម្មភាពសង្គមរបស់ពួកគេ ក្នុងនោះមានអ្នកស្រី Rocio San Miguel លោក Javier Tarazona លោក Carlos Julio Rojas លោក Eduardo Torres និង លោក Kennedy Tejeda រួមទាំងសមាជិកគ្រួសាររបស់ពួកគេ និងក្មេងជំទង់ ៤នាក់ ដែលនៅតែជាប់ឃុំឃាំងបន្ទាប់ពីការបោះឆ្នោតឆ្នាំ ២០២៤»។ការតវ៉ាដែលបានធ្វើឡើង បន្ទាប់ពីការបោះឆ្នោតប្រធានាធិបតីខែកក្កដា នៅពេលដែលប្រធានាធិបតី នីកូឡាស ម៉ាឌូរ៉ូ (Nicolas Maduro) បានឈ្នះអាណត្តិទី ៣ ទោះបីជាមានការចោទប្រកាន់ពីបទក្លែងបន្លំពីគណបក្សប្រឆាំង និងប្រទេសជាច្រើនក៏ដោយ បានបណ្តាលឲ្យមនុស្សចំនួន ២៨នាក់ ស្លាប់ និង ប្រហែល ២.៤០០នាក់ ត្រូវចាប់ខ្លួន ដោយមានមនុស្សជិត ២.000នាក់ ត្រូវបានដោះលែង ចាប់តាំងពីពេលនោះ មក។ក្រុមសិទ្ធិមនុស្ស Foro Penal ប៉ាន់ប្រមាណថា មាន «អ្នកទោសនយោបាយ» យ៉ាងហោចណាស់ ៨៨៩ នាក់ នៅក្នុងពន្ធនាគាររបស់ប្រទេសនេះ៕

សពជនជាតិប៉ាឡេស្ទីនតែ១គ្រួសារចំនួន ៣០នាក់ ត្រូវបានទាញយកពីក្រោមកម្ទេចថ្ម នៅទីក្រុងហ្កាហ្សា

ក្រុមការពារជនស៊ីវិល កាលពីថ្ងៃអង្គារ (ទី១៦ ខែធ្នូ) បានទាញយកសាកសពជនរងគ្រោះចំនួន ៣០នាក់ ដែលជាសមាជិកនៃគ្រួសារតែមួយ ពីគំនរបាក់បែកនៃលំនៅឋានរបស់ពួកគេ នៅភាគខាងលិចនៃទីក្រុងហ្កាហ្សា។ក្រុមការពារជនស៊ីវិលនេះ បានឲ្យដឹងនៅក្នុងសេចក្តីថ្លែងការណ៍មួយថា ជនរងគ្រោះ គឺជាសមាជិកនៃគ្រួសារត្រកូល Salem ដែលត្រូវបានសម្លាប់ កាលពីថ្ងៃទី១៩ ខែធ្នូ ឆ្នាំ២០២៣ ក្នុងអំឡុងពេលមានការវាយប្រហារតាមអាកាសរបស់អ៊ីស្រាអែលលើផ្ទះសម្បែងរបស់ពួកគេ នៅក្នុងសង្កាត់ al-Rimal ក្នុងទីក្រុងហ្កាហ្សា។សមាជិកគ្រួសារចំនួន ៦០នាក់ ត្រូវបានគេជឿថា បានបាត់បង់ជីវិត អំឡុងការវាយប្រហារ នាពេលនោះ។ លំនៅឋាននេះ គឺជាទីតាំងដំបូងដែលរួមបញ្ចូលនៅក្នុងយុទ្ធនាការ ដែលធ្វើឡើងដោយអង្គភាពការពារជនស៊ីវិលនេះ ដើម្បីស្វែងរកជនជាតិប៉ាឡេស្ទីនរាប់ពាន់នាក់ ដែលត្រូវបានគេជឿថា ជាប់នៅក្រោមគំនរបាក់បែកនៃអគារដែលត្រូវបានបំផ្លាញនៅតំបន់ហ្កាហ្សាស្ទ្រីប។ទីភ្នាក់ងារនេះបានបញ្ជាក់ថា ប្រតិបត្តិការស្វែងរក នឹងបន្តប្រើប្រាស់ឧបករណ៍ដែលមានតិចតួច ក្នុងនោះរួមទាំងអេស្កាវ៉ាទ័រផងដែរ ដើម្បីជីកកកាយទាញយកសាកសពចេញពីគំនរបាក់បែក។ យោងតាមអាជ្ញាធរប៉ាឡេស្ទីន បានឲ្យដឹងថា អ៊ីស្រាអែលកាន់កាប់ជាងពាក់កណ្តាលនៃតំបន់ហ្កាហ្សា ហើយបន្តកំណត់គោលដៅលើជនជាតិប៉ាឡេស្ទីន នៅក្នុងតំបន់ផ្សេងទៀតដែលនៅក្រៅការគ្រប់គ្រងរបស់ខ្លួន។គួរបញ្ជាក់ថា ប្រតិបត្តិការរបស់អ៊ីស្រាអែល បានឆក់យកជីវិតមនុស្សជិត ៧០.៧០០នាក់ហើយ ដែលភាគច្រើនជាស្ត្រី និងកុមារ ហើយជាង ១៧១.០០០នាក់ទៀតរងរបួសនៅតំបន់ហ្កាហ្សា ចាប់តាំងពីខែតុលា ឆ្នាំ២០២៣ ខណៈបានធ្វើឲ្យដែនដីនេះប្រែជាទៅទីនៃគំនរកម្ទេចថ្ម៕

របាយការណ៍៖ កិច្ចប្រជុំកំពូល Trump-Kim ទំនងមាននៅឆ្នាំ២០២៦ ខណៈទីក្រុងសេអ៊ូលមិនពាក់ព័ន្ធ

ឱកាសនៃការមានកិច្ចប្រជុំកំពូលកូរ៉េខាងជើង-អាមេរិក នៅឆ្នាំ២០២៦ ហាក់ដូចជាលេចរូបភាពកាន់តែខ្ពស់ត្រដែតជាងមុន ប៉ុន្តែការរស់ឡើងវិញនូវកិច្ចសន្ទនាអន្តរកូរ៉េ ទំនងមិនកើតឡើងក្នុងពេលខាងមុខដ៏ខ្លីនោះឡើយ។ នេះបើយោងតាមការចេញរបាយការណ៍ទស្សនវិស័យឆ្នាំ២០២៦ ដោយវិទ្យាស្ថានស្រាវជ្រាវដែលពាក់ព័ន្ធជាមួយរដ្ឋាភិបាល។កាលពីថ្ងៃអង្គារ (ទី១៦ ខែធ្នូ) វិទ្យាស្ថានកិច្ចការបរទេស និងសន្តិសុខជាតិ (IFANS) បានឲ្យដឹងនៅក្នុងការព្យាករប្រចាំឆ្នាំរបស់ខ្លួនថា ទំនាក់ទំនងកាន់តែស៊ីជម្រៅរបស់ទីក្រុងព្យុងយ៉ាង ជាមួយប្រទេសចិន និងរុស្ស៊ី កំពុងធ្វើឲ្យប៉ះពាល់បន្តិចម្ដងៗដល់ការបំផុសទឹកចិត្តរបស់ប្រទេសនេះ ក្នុងការពាក់ព័ន្ធជាមួយទីក្រុងសេអ៊ូល បើទោះបីជាការជាប់គាំង រវាងសហរដ្ឋអាមេរិក និងកូរ៉េខាងជើង ដែលបន្តមានរហូតដល់ឆ្នាំ២០២៥ មិនចាំបាច់ឆ្លងចូលដល់ឆ្នាំ២០២៦ ក៏ដោយ។របាយការណ៍បានលើកឡើងអំពីកិច្ចប្រជុំកំពូល Trump-Kim (Donald Trump- Kim Jong Un) ថា៖ «លទ្ធភាពនៃកាមានកិច្ចប្រជុំកម្រិតមេដឹកនាំជាថ្មី បានឡើងខ្ពស់ដល់កម្រិតជាក់លាក់មួយ ដោយមេដឹកនាំទាំង ២ បានចែករំលែកចំណុចរួម ដែលមានរួមទាំងបំណងប្រាថ្នាទៅវិញទៅមក ដើម្បីឲ្យមានកិច្ចប្រជុំកំពូលនេះ ក្របខ័ណ្ឌនៃការរួមរស់ដោយសន្តិភាព និងការកាត់ចោលរបៀបវារៈនៃការរំសាយអាវុធនុយក្លេអ៊ែរទៅដំណាក់កាលក្រោយ»។របាយការណ៍បានបញ្ជាក់បន្ថែមថា ជាពិសេស ដំណើរទស្សនកិច្ចរបស់ប្រធានាធិបតីអាមេរិក លោក Trump ទៅកាន់ប្រទេសចិន នៅខែមេសា ឆ្នាំ២០២៦ អាចបើកឧកាស ដើម្បីធ្វើឲ្យមានឡើងវិញនូវកិច្ចពិភាក្សា Trump-Kim ដែលមិនមានសកម្មភាព ចាប់តាំងពីខែមិថុនា ឆ្នាំ២០២៦ តែកិច្ចប្រជុំកំពូលបែបនេះ នឹងមិនចាំបាច់ធ្វើឡើងតែនៅក្នុងប្រទេសចិននោះឡើយ៕

អារ៉ាប៊ីសាអ៊ូឌីតផ្អាកការអនុញ្ញាតឲ្យនាវាចូលកំពង់ផែ Aden របស់ប្រទេសយេម៉ែន ចំពេលភាពតានតឹងកើនឡើង

មន្ត្រីមូលដ្ឋានម្នាក់មកពីក្រសួងដឹកជញ្ជូនយេម៉ែន បាននិយាយកាលពីថ្ងៃអង្គារថា អារ៉ាប៊ីសាអ៊ូឌីតបានផ្អាកការចេញការអនុញ្ញាតឲ្យនាវាចូលកំពង់ផែ Aden នៅភាគខាងត្បូងប្រទេសយេម៉ែន ចំពេលមានភាពតានតឹងផ្នែកនយោបាយ និងយោធាកាន់តែខ្លាំងឡើង។ មន្ត្រីរូបនោះ ដែលបាននិយាយក្នុងលក្ខខណ្ឌមិនបញ្ចេញឈ្មោះ បានបញ្ជាក់ថា ការផ្អាកនេះប៉ះពាល់ដល់កំពង់ផែ Aden ដែលត្រូវបានគ្រប់គ្រងដោយក្រុមប្រឹក្សាអន្តរកាលភាគខាងត្បូង (STC) ប៉ុន្តែបានសង្កត់ធ្ងន់ថា ហេតុផលនៅពីក្រោយចលនានេះ នៅតែមិនច្បាស់លាស់។មន្ត្រីនោះបាននិយាយថា៖«ការផ្អាកនេះ បានបន្តរយៈពេលបីថ្ងៃជាប់ៗគ្នា ដោយគ្មានការពន្យល់ជាផ្លូវការណាមួយឡើយ» ដោយបន្ថែមថា៖«ពុំមានការចង្អុលបង្ហាញច្បាស់លាស់អំពីមូលហេតុនៃការសម្រេចចិត្តនេះទេ»។លោកបានកត់សម្គាល់ថា វានៅតែមិនប្រាកដប្រជាថាតើចំណាត់ការនេះ ត្រូវបានបម្រុងទុកជាសម្ពាធបណ្តោះអាសន្នលើក្រុមប្រឹក្សាអន្តរកាលភាគខាងត្បូង (STC) ឬជាការផ្លាស់ប្តូរគោលនយោបាយរយៈពេលវែង។កំពង់ផែ Aden មានតួនាទីដ៏សំខាន់សម្រាប់ប្រទេសយេម៉ែន ដោយសម្រួលដល់ការនាំចូលអាហារ ប្រេងឥន្ធនៈ និងសម្ភារៈវេជ្ជសាស្ត្រសម្រាប់មនុស្សរាប់លាននាក់នៅទូទាំងប្រទេសដែលមានជម្លោះនេះ រួមទាំងតំបន់ភាគខាងជើង ដែលស្ថិតនៅក្រោមការគ្រប់គ្រងរបស់ក្រុមហ៊ួទី។ មន្ត្រីដដែលបានព្រមានថា ការរំខានណាមួយចំពោះប្រតិបត្តិការកំពង់ផែ អាចមានផលវិបាកមនុស្សធម៌ធ្ងន់ធ្ងរ៕

UN៖ ជនស៊ីវិលជាង ១០០នាក់ បានស្លាប់ក្នុងការវាយប្រហារយានដ្រូននៅតំបន់សង្រ្គាមស៊ូដង់ ក្នុងខែនេះ

ការិយាល័យសិទ្ធិមនុស្ស របស់អង្គការសហប្រជាជាតិ បាននិយាយកាលពីថ្ងៃអង្គារ (១៦ ធ្នូ) ថា មានជនស៊ីវិលយ៉ាងហោច ១០៤នាក់ រួមទាំងកុមារ ៤៣នាក់ ត្រូវបានសម្លាប់ នៅក្នុងការវាយប្រហារដោយយានដ្រូនជាច្រើនលើកច្រើនសារ នៅក្នុងតំបន់សង្រ្គាម Kordofan របស់ប្រទេសស៊ូដង់ ចាប់តាំងពីថ្ងៃទី៤ ខែធ្នូ ឆ្នាំ២០២៥ នេះមក។លោក Volker Turk ប្រធានទីភ្នាក់ងារសិទ្ធិមនុស្ស UN បានសម្ដែងក្ដីបារម្ភពីកំណើនអរិភាពកាន់តែអាក្រក់ក្នុងប្រទេសនេះ ដោយសំដៅលើការប៉ះទង្គិចយ៉ាងហិង្សារវាងភាគីជម្លោះនៅតំបន់ Kordofan ដែលជាតំបន់មួយមានរដ្ឋចំនួន៣ នៅភាគកណ្តាល និងភាគខាងត្បូងប្រទេសស៊ូដង់។លោក Turk មិនបានផ្តល់ព័ត៌មានលម្អិតជាក់លាក់បន្ថែមទៀតអំពីអ្នកដែលនៅពីក្រោយការវាយប្រហារដោយយានដ្រូនទាំងនោះទេ ដោយគ្រាន់តែនិយាយថា ការវាយប្រហារកើតឡើងលើមន្ទីរពេទ្យ សាលាមត្តេយ្យ និងមូលដ្ឋានរបស់អង្គការសហប្រជាជាតិ។កងកម្លាំងគាំទ្ររហ័សយោធាប៉ារ៉ា (RSF) កំពុងតែធ្វើសង្រ្គាមទល់នឹងយោធាស៊ូដង់ អស់ជាង ២ឆ្នាំមកហើយ ហើយថ្មីៗនេះ ការប្រយុទ្ធផ្ដោតទៅកាន់តំបន់ Kordofan ដែលសម្បូរដោយប្រេង បន្ទាប់ពីយោធាប៉ារ៉ា RSF បានកាន់កាប់ក្រុង Al-Fasher នៅតំបន់ Darfur។ យោងតាមអង្គការសហប្រជាជាតិ ជម្លោះនៅស៊ូដង់ បានសម្លាប់មនុស្សយ៉ាងតិច ៤ម៉ឺននាក់ហើយ និងបង្កើតវិបត្តិមនុស្សធម៌ដ៏អាក្រក់បំផុតរបស់ពិភពលោក ជាមួយនឹងមនុស្សជាង ១៤លាននាក់ រត់ភៀសខ្លួនពីអំពើហិង្សា៕

នាវាផ្ទុកយន្តហោះទំនើបបំផុតរបស់ប្រទេសចិន បើកឆ្លងកាត់ច្រកសមុទ្រតៃវ៉ាន់ដ៏រសើប

អាជ្ញាធរការពារជាតិរបស់កោះតៃវ៉ាន់ បាននិយាយនៅថ្ងៃពុធ (១៧ ធ្នូ) នេះថា នាវាផ្ទុកយន្តហោះថ្មីបំផុត និងទំនើបបំផុតរបស់ប្រទេសចិន ឈ្មោះថានាវា ហ៊្វូជាន បានធ្វើដំណើរឆ្លងកាត់ច្រកសមុទ្រតៃវ៉ាន់ កាលពីថ្ងៃអង្គារកន្លងទៅ ដែលជាការបើកឆ្លងកាត់ផ្លូវទឹកដ៏រសើបនេះជាលើកដំបូង ចាប់តាំងពីនាវាហ្វ៊ូជាន ចូលបម្រើការជាផ្លូវការក្នុងយោធាជើងទឹកចិន កាលពីខែមុន។តំបន់តៃវ៉ាន់ ដែលប្រទេសចិន ចាត់ទុកថាជាទឹកដីរបស់ខ្លួន បានរាយការណ៍ពីសកម្មភាពយោធាចិនស្ទើរតែរាល់ថ្ងៃនៅជុំវិញកោះ ក្នុងយុទ្ធនាការដាក់សម្ពាធជាបន្តបន្ទាប់។ ក្នុងសេចក្តីថ្លែងការណ៍មួយ អាជ្ញាធរការពារជាតិតៃវ៉ាន់បាននិយាយថា នាវាចម្បាំង ហ៊្វូជាន បានបើកឆ្លងកាត់ច្រកសមុទ្រ ហើយកងកម្លាំងកោះតៃវ៉ាន់ ក៏បានតាមដានដែរ។ទីក្រុងប៉េកាំងនិយាយថា មានតែចិនទេដែលមានអធិបតេយ្យភាពលើច្រកសមុទ្រនេះ ដែលជាសរសៃឈាមផ្លូវសមុទ្រដ៏សំខាន់សម្រាប់ចរាចរណ៍ទំនិញ។ កាលពីខែកញ្ញាកន្លងទៅ នាវាផ្ទុកយន្តហោះហ៊្វូជាន ដដែលនេះ បានឆ្លងកាត់ច្រកសមុទ្រតៃវ៉ាន់ ម្ដងរួចមកហើយ និងចូលទៅក្នុងសមុទ្រចិនខាងត្បូងដែលមានជម្លោះ ក្នុងអំឡុងពេលសាកល្បង។ហ៊្វូជានគឺជានាវាផ្ទុកយន្តហោះទី៣ របស់ចិន ដែលមានផ្ទៃបន្ទុករាបស្មើ និងឧបករណ៍អេឡិចត្រូម៉ាញ៉េទិច ដើម្បីងាយស្រួលបង្ហោះយន្តហោះ ដែលធ្វើឱ្យនាវានេះ ក្លាយជាអាវុធកងទ័ពជើងទឹកដ៏មានអានុភាពជាងនាវាផ្ទុកយន្តហោះ ២គ្រឿងដំបូងរបស់ចិន ដែលរចនាឡើងដោយរុស្ស៊ី៕

សកម្មភាពមនុស្សធម៌ត្រូវបានផ្អាកក្នុងក្រុងចំនួន២ក្រោយការប៉ះទង្គិចនៅSouth Kivu ប្រទេសកុងហ្គោ

អ្នកនាំពាក្យអង្គការសហប្រជាជាតិបាននិយាយកាលពីថ្ងៃអង្គារថា បន្ទាប់ពីការប៉ះទង្គិចគ្នានៅក្នុងតំបន់ជាច្រើននៃខេត្ត South Kivu ភាគខាងកើតសាធារណរដ្ឋប្រជាធិបតេយ្យកុងហ្គោ(DRC) សកម្មភាពមនុស្សធម៌ទាំងអស់នៅតែត្រូវបានផ្អាកនៅក្នុងក្រុង Fizi និងក្រុង Baraka។លោក Farhan Haq អ្នកនាំពាក្យរងរបស់អគ្គលេខាធិការអង្គការសហប្រជាជាតិ បាននិយាយនៅក្នុងសន្និសីទសារព័ត៌មានប្រចាំថ្ងៃ ដោយដកស្រង់សម្តីពីការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌(OCHA)ថា អំពើហិង្សាចុងក្រោយ បានបង្កឲ្យមានការភ័យខ្លាចក្នុងចំណោមជនស៊ីវិល ហើយដៃគូរបស់អង្គការសហប្រជាជាតិ បានរាយការណ៍ពីការចូលលួចជំនួយដោយក្រុមជនប្រដាប់អាវុធ។អាជ្ញាធរតំបន់បានប៉ាន់ប្រមាណថា ចាប់តាំងពីថ្ងៃទី៨ ខែធ្នូមក មនុស្សប្រហែល ១១០.០០០នាក់ បានភៀសខ្លួនទៅកាន់តំបន់ផ្សេងៗនៃខេត្ត South Kivu ខណៈអ្នកផ្សេងទៀតបានឆ្លងកាត់ចូលទៅក្នុងប្រទេសប៊ូរុនឌី។ លោក Haq និយាយថា អង្គការ OCHA បន្តចូលរួមជាមួយគ្រប់ភាគីទាំងអស់ ដើម្បីសម្រួលដល់សកម្មភាពសុវត្ថិភាពរបស់ក្រុមមនុស្សធម៌ និងបន្តប្រតិបត្តិការជំនួយ។ទន្ទឹមនឹងនេះ មនុស្សជាង ៧៨.០០០ នាក់ រួមទាំងអ្នកស្វែងរកសិទ្ធិជ្រកកោន អ្នកវិលត្រឡប់ និងជនអន្តោប្រវេសន៍ បានឆ្លងចូលទៅក្នុងប្រទេសប៊ូរុនឌីពីខេត្តSouth Kivu ចាប់តាំងពីថ្ងៃទី ៥ ខែធ្នូ នេះបើយោងតាមអ្នកនាំពាក្យរបស់ទីភ្នាក់ងារជនភៀសខ្លួនអង្គការសហប្រជាជាតិ។យោងតាមអ្នកនាំពាក្យបានឲ្យដឹងថា ករណីជំងឺអាសន្នរោគរាប់សិបករណី និងករណីជំងឺអុតស្វាយពីរករណី ត្រូវបានរាយការណ៍នៅក្នុងតំបន់ភៀសខ្លួន Gatumba ដែលនៅជិតព្រំដែនជាមួយសាធារណរដ្ឋប្រជាធិបតេយ្យកុងហ្គោ ហើយដៃគូអង្គការសហប្រជាជាតិដែលធ្វើការក្នុងវិស័យសុខាភិបាល កំពុងព្យាយាមទប់ស្កាត់ និងគ្រប់គ្រងការផ្ទុះឡើងជំងឺនេះ។

អូស្ត្រាលី ចោទខ្មាន់កាំភ្លើងក្នុងការបាញ់ប្រហារនៅឆ្នេរស៊ីដនី ពីបទព្រហ្មទណ្ឌ ៥៩ករណី រួមទាំងភេរវកម្ម

អូស្ត្រាលី បាននិយាយនៅថ្ងៃពុធ (១៧ ធ្នូ) នេះថា ពួកគេបានសម្រេចចោទប្រកាន់ជាផ្លូវការលើបុរសខ្មាន់កាំភ្លើងម្នាក់ ក្នុងការការបាញ់ប្រហារទ្រង់ទ្រាយធំលើព្រឹត្តិការណ៍ជនជាតិជ្វីហ្វមួយ នៅឆ្នេរ Bondi ទីក្រុងស៊ីដនី ពីបទព្រហ្មទណ្ឌចំនួន ៥៩ករណី រួមទាំង ១៥ករណីពីបទឃាតកម្ម និងប្រព្រឹត្តអំពើភេរវកម្ម ស្របពេលពិធីបុណ្យសពជនរងគ្រោះក្នុងការវាយប្រហារកាលពីថ្ងៃអាទិត្យកន្លងទៅ បានចាប់ផ្តើម។ខ្មាន់កាំភ្លើង ២នាក់ ដែលជាឪពុកនិងកូនប្រុស បានបើកការបាញ់ប្រហារនៅក្នុងពិធីបុណ្យ Hanukkah របស់ជនជាតិជ្វីហ្វ នៅលើឆ្នេរដ៏ល្បីល្បាញរបស់ទីក្រុងស៊ីដនី កាលពីថ្ងៃអាទិត្យចុងសប្ដាហ៍មុន សម្លាប់មនុស្សជាច្រើន ដោយនោះជាការវាយប្រហារដ៏កក្រើកនៅអូស្រ្តាលី និងបង្កើនភាពភ័យខ្លាចនៃទំនោរប្រឆាំងជនជាតិជ្វីហ្វ និងភាពជ្រុលនិយមហិង្សា។ជនល្មើសដែលជាឪពុក ឈ្មោះ Sajid Akram វ័យ ៥០ឆ្នាំ ត្រូវបាននគរបាលបាញ់សម្លាប់ នៅនឹងកន្លែង ខណៈកូនប្រុសអាយុ ២៤ ឆ្នាំរបស់ជននោះ ដែលប្រព័ន្ធផ្សព្វផ្សាយក្នុងស្រុកដាក់ឈ្មោះថា Naveed បានភ្ញាក់ដឹងខ្លួនពីសន្លប់នៅថ្ងៃពុធនេះ ហើយក្រុមស៊ើបអង្កេតនឹងធ្វើការសាកសួរចម្លើយ។ជនត្រូវចោទ នៅក្នុងការបាញ់ប្រហារកាលពីថ្ងៃអាទិត្យនោះ ធ្លាប់បានធ្វើដំណើរទៅភាគខាងត្បូងហ្វីលីពីន ជាតំបន់មួយដែលរួមរឹតដោយក្រុមសកម្មប្រយុទ្ធអ៊ិស្លាមនិយមជាយូរមកហើយ។ ការធ្វើដំណើរនេះកើតឡើងត្រឹមតែប៉ុន្មានសប្តាហ៍ប៉ុណ្ណោះ មុនការបាញ់ប្រហារ ដែលនគរបាលអូស្ត្រាលីនិយាយថា ហាក់ដូចជាត្រូវបានជំរុញដោយក្រុមរដ្ឋអ៊ិស្លាម៕

បណ្ដាញសង្គម

ព័ត៌មានថ្មីៗ

បច្ចុប្បន្នភាពអំពីស្ថានការណ៍ព្រំដែនកម្ពុជា-ថៃ ករណីយោធាថៃបន្តការបាញ់ប្រហារឈ្លានពានមកលើដែនអធិបតេយ្យកម្ពុជា ក្នុងយោធភូមិភាគទី៤ និងទី៥ គិតមកដល់ថ្ងៃទី២៦ធ្នូនេះ

ពលរដ្ឋខ្មែររស់នៅក្នុងទីក្រុងក្រៃឈើច ប្រទេសនូវ៉ែលហ្សេឡង់ ប្រមាណជាង ៣០០នាក់ បានជួបជុំគ្នានៅក្នុងទីក្រុងក្រៃឈើច ប្រទេសនូវ៉ែលហ្សេឡង់

ក្រុមការងារស្រ្តីគណបក្សប្រជាជនកម្ពុជាអគ្គលេខាធិការដ្ឋានរដ្ឋសភានាំថវិកាជូនសម្តេចប្រធានរដ្ឋសភា ក្នុងការចូលរួមឧបត្ថម្ភគំាទ្រដល់វីរយុទ្ធជន និងពលរដ្ឋភៀសសឹក

អតីតពលករ ៥០០នាក់បន្ថែមទៀតចុះឈ្មោះរៀនជំនាញដេរដោយឥតគិតថ្លៃរៀបចំដោយក្រសួងការងារ

សហគមន៍អន្តរជាតិកំពុងយកចិត្តទុកដាក់ខ្លាំងចំពោះផលប៉ះពាល់ នៃទង្វើឈ្លានពានរបស់ថៃមកលើកម្ពុជា

ប្រេងឡើងថ្លៃ ខណៈទីផ្សារសកលថ្លឹងថ្លែងពីហានិភ័យផ្គត់ផ្គង់របស់ប្រទេសវ៉េណេស៊ុយអេឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877