BTV NEWS

ជនអន្តោប្រវេសន៍ជិត ៤០០នាក់ ត្រូវបានជួយសង្គ្រោះ នៅម្ដុំកោះរបស់ក្រិក

លោក Trump បញ្ជាក់ថា មិនគាំទ្រការទទួលស្គាល់សូម៉ាលីឡែន ក្រោយមានការប្រកាសពីសម្ព័ន្ធមិត្តអ៊ីស្រាអែល

មនុស្សម្នាក់ស្លាប់ និង ២៦នាក់រងរបួស ក្នុងឧបទ្ទវហេតុរថយន្ត ៥០គ្រឿងបុកតគ្នា នៅភាគពាយព្យក្រុងតូក្យូ

ភ្លៀងធ្លាក់ខ្លាំង និងទឹកជំនន់គំហុកភ្លាមៗ ធ្វើឲ្យផ្ទះសម្បែង នៅរដ្ឋ California ភាគខាងត្បូង លិចក្នុងល្បប់ភក់

ព័ត៌មានអន្តរជាតិ

កូរ៉េខាងត្បូង នឹងចេញសាលក្រម ជុំវិញសំណុំរឿងច្បាប់អាជ្ញាសឹករបស់លោក Yoon នៅដើមឆ្នាំក្រោយ

ប្រព័ន្ធផ្សព្វផ្សាយក្នុងស្រុកបានរាយការណ៍នៅថ្ងៃអង្គារ (១៦ ធ្នូ) នេះថា តុលាការកូរ៉េខាងត្បូង គ្រោងប្រកាសសាលក្រមនៅថ្ងៃទី១៦ ខែមករា ឆ្នាំ២០២៦ ខាងមុខនេះ លើបទចោទមួយចំនួនរបស់លោកអតីតប្រធានាធិបតី Yoon Suk Yeol ពាក់ព័ន្ធនឹងច្បាប់អាជ្ញាសឹកដ៏ចម្រូងចម្រាស។ជាមួយគ្នានេះ សារព័ត៌មានយ៉ុនហាប់ ក៏បានរាយការណ៍នៅថ្ងៃអង្គារដដែលនេះថា តុលាការនឹងប្រកាសសាលក្រមនៅខែមករា ឆ្នាំក្រោយ ទៅលើថា តើលោក Yoon បានរារាំងយុត្តិធម៌ឬទេ ដោយការមិនឱ្យអ្នកស៊ើបអង្កេតឃុំខ្លួនលោក ជុំវិញច្បាប់អាជ្ញាសឹកនោះ។ សវនាការកាត់ទោសនឹងត្រូវធ្វើឡើងនៅថ្ងៃទី១៦ ខែមករា ដោយលើកឡើងពីច្បាប់មួយ ដែលតម្រូវឱ្យសេចក្តីសម្រេចដំបូង ត្រូវដាក់ចេញក្នុងពេល ៦ខែ ក្រោយការចោទប្រកាន់ផ្លូវការពីរដ្ឋអាជ្ញាពិសេស ដែលស៊ើបអង្កេតករណីនេះ។ក្រុមមេធាវីរបស់លោក Yoon បានអះអាងថា សាលក្រមគួរតែដាក់ចេញ បន្ទាប់ពីតុលាការបានបញ្ចប់ការកាត់ក្តីដាច់ដោយឡែក លើការចោទប្រកាន់ពីបទបះបោរ និងរំលោភអំណាចរបស់លោក Yoon ពីការប្រកាសច្បាប់អាជ្ញាសឹកក្នុងខែធ្នូ ឆ្នាំ២០២៤។ ការកាត់ក្តីនោះត្រូវបានគ្រោងនឹងបញ្ចប់នៅដើមខែមករា ហើយចេញសាលក្រមនៅក្នុងខែកុម្ភៈ។ ប៉ុន្តែចៅក្រមបានច្រានចោលការអះអាងនេះ ដោយនិយាយថា សំណុំរឿងដែលកំពុងជំនុំជម្រះ មិនទាក់ទងនឹងថា តើការប្រកាសច្បាប់អាជ្ញាសឹកស្មើនឹងការបះបោរឬអត់នោះទេ៕

ស្ថានទូតចិនប្រចាំអង់គ្លេស ថ្កោលទោសការជ្រៀតជ្រែករបស់អង់គ្លេសលើកិច្ចការផ្ទៃក្នុងចិនពាក់ព័ន្ធលោក Jimmy Lai

ស្ថានទូតចិនប្រចាំចក្រភពអង់គ្លេសបានចេញសេចក្តីថ្លែងការណ៍មួយកាលពីថ្ងៃចន្ទដើមសប្ដាហ៍នេះ ដោយថ្កោលទោសការអត្ថាធិប្បាយរបស់រដ្ឋមន្ត្រីការបរទេសចក្រភពអង់គ្លេសលោកស្រី Yvette Cooper ជុំវិញការកាត់ទោសលោក Jimmy Lai និងហៅថាជា ការជ្រៀតជ្រែកដែលគ្មានការទទួលខុសត្រូវ និងជាក់ស្តែងនៅក្នុងកិច្ចការតុលាការរបស់ហុងកុង និងកិច្ចការផ្ទៃក្នុងរបស់ប្រទេសចិន។ សេចក្តីថ្លែងការណ៍នេះបានសរសេរថា រឿងនេះជ្រៀតជ្រែកយ៉ាងច្បាស់នៅក្នុងកិច្ចការផ្ទៃក្នុងរបស់ប្រទេសចិន និងជាន់ឈ្លីនីតិរដ្ឋ និងរំលោភយ៉ាងធ្ងន់ធ្ងរលើបទដ្ឋានជាមូលដ្ឋានដែលគ្រប់គ្រងទំនាក់ទំនងអន្តរជាតិ។ យើងប្រឆាំង និងថ្កោលទោសយ៉ាងខ្លាំងចំពោះសកម្មភាពមិនសមហេតុផលបែបនេះដោយភាគីចក្រភពអង់គ្លេស។ លោក Jimmy Lai ត្រូវបានកាត់ទោសពីបទឃុបឃិតជាមួយកងកម្លាំងបរទេសនៅក្នុងតុលាការជាន់ខ្ពស់របស់ហុងកុងកាលពីថ្ងៃចន្ទ។ ស្ថានទូតបាននិយាយក្នុងសេចក្តីថ្លែងការណ៍ថា ការពិតយ៉ាងទូលំទូលាយត្រូវបានបង្ហាញក្នុងអំឡុងពេលសវនាការ ដែលបង្ហាញយ៉ាងពេញលេញថា លោក Jimmy Lai គឺជាអ្នករៀបចំផែនការចម្បង និងជាអ្នកចូលរួមក្នុងកុបកម្មប្រឆាំងចិនជាបន្តបន្ទាប់នៅហុងកុង ជាកូនអុកសម្រាប់កងកម្លាំងប្រឆាំងចិនខាងក្រៅ និងជាអ្នកញុះញង់នៅពីក្រោយឆាកនៃភាពចលាចលលើសេចក្តីព្រាងច្បាប់វិសោធនកម្មនៅហុងកុង។ ស្ថានទូតនេះក៏បានជំរុញឱ្យភាគីចក្រភពអង់គ្លេសបញ្ឈប់ការប៉ុនប៉ងជ្រៀតជ្រែកបែបនេះ និងបញ្ឈប់ការដើរលើផ្លូវខុសបន្ថែមទៀត ដែលបានលាតត្រដាងពីចេតនាអាក្រក់របស់ចក្រភពអង់គ្លេសក្នុងការធ្វើឱ្យទីក្រុងហុងកុងអស្ថិរភាព៕

មន្រ្តីអាមេរិក៖ អ៊ុយក្រែន អាចនឹងទទួលបានការធានាសន្តិសុខដូចអង្គការណាតូ ក្នុងកិច្ចព្រមព្រៀងសន្តិភាព

ក្រុមមន្ត្រីសហរដ្ឋអាមេរិក បាននិយាយកាលពីថ្ងៃចន្ទ (១៥ ធ្នូ) ថា អ៊ុយក្រែន អាចនឹងទទួលបានការធានាសន្តិសុខដែលយកគំរូតាមមាត្រាទី៥ នៃការសន្យាការពារគ្នាទៅវិញទៅមក របស់សម្ព័ន្ធយោធាណាតូ ក្រោមកិច្ចព្រមព្រៀងសន្តិភាពដែលស្នើឡើងជាមួយរុស្ស៊ី ដែលនេះជាការផ្តល់ជូនមិនធ្លាប់មានពីមុនមក ក្នុងបំណងបញ្ចប់សង្គ្រាម ដែលបង្កឡើងដោយប្រតិបត្តិការយោធារបស់រុស្ស៊ី ក្នុងឆ្នាំ២០២២។មន្ត្រីអាមេរិកពីររូប បានពិពណ៌នាអំពីការធានាសន្តិសុខ ដែលបានស្នើឡើងនិងលើកយកទៅពិភាក្សាក្នុងអំឡុងកិច្ចចរចា ២ថ្ងៃនៅទីក្រុងប៊ែរឡាំង ថា «ដូចមាត្រាទី៥» របស់ណាតូ ដែលបង្ហាញពីការប្តេជ្ញាចិត្តយ៉ាងមុតមាំចំពោះសន្តិសុខអ៊ុយក្រែន ទោះជាទីក្រុងគីវ មិនមែនជាសមាជិកណាតូក៏ដោយ។ គួរឱ្យដឹងថា មាត្រាទី៥ នេះត្រូវបានចាត់ទុកថាជាមូលដ្ឋានគ្រឹះនៃសន្ធិសញ្ញាបង្កើតសម្ព័ន្ធការពារជាតិណាតូ ដែលបានចែងថា "ការវាយប្រហារប្រឆាំងនឹងសមាជិកម្នាក់របស់ណាតូ ត្រូវចាត់ទុកថាជាការវាយប្រហារប្រឆាំងនឹងសមាជិកទាំងអស់"។គេមិនច្បាស់ទេថា តើអាមេរិកនឹងប្រឹងប្រែងដល់កម្រិតណា ក្នុងការផ្តល់ការធានាសន្តិសុខបែបនេះដល់អ៊ុយក្រែន។ ក្រុមមន្ត្រីនិយាយថា ការធានាសន្តិសុខ នឹងរួមបញ្ចូលការត្រួតពិនិត្យយ៉ាងម៉ត់ចត់ និងវិធានការដោះស្រាយជម្លោះ ដើម្បីទប់ស្កាត់ជម្លោះតូចៗ មិនឱ្យរាលដាលក្លាយជាជម្លោះធំ។ទាក់ទងនឹងនឹងផែនការសន្តិភាព ក្រុមមន្ត្រីអាមេរិកទាំងនោះនិយាយថា កិច្ចព្រមព្រៀងយ៉ាងទូលំទូលាយលើបញ្ហាជាច្រើន សម្រេចបាន ៩០% ហើយរវាងអ៊ុយក្រែន និងរុស្ស៊ី ប៉ុន្តែបញ្ហាទឹកដី និងអធិបតេយ្យភាព នៅមិនទាន់មានការឯកភាពដោយភាគីទាំងពីរនៅឡើយ។ ការស្ទង់មតិនៅអ៊ុយក្រែន បង្ហាញថា ជនជាតិអ៊ុយក្រែនមួយចំនួនតូចប៉ុណ្ណោះ ដែលមានឆន្ទៈទទួលយកសម្បទានទឹកដី ដែលជាលក្ខខណ្ឌសំខាន់របស់រុស្ស៊ី សម្រាប់ការបញ្ចប់សង្គ្រាមរបស់ខ្លួន៕

បេឡារុស នឹងស្វាគមន៍មេដឹកនាំវ៉េណេស៊ុយអេឡា លោក Maduro ប្រសិនបើលោកចុះពីតំណែង

ប្រធានាធិបតីបេឡារុស លោក Alexander Lukashenko បាននិយាយក្នុងបទសម្ភាសន៍មួយ ជាមួយប្រព័ន្ធផ្សព្វផ្សាយអាមេរិក Newsmax កាលពីថ្ងៃចន្ទ (១៥ ធ្នូ) ថា ប្រធានាធិបតីវ៉េណេស៊ុយអេឡា លោក Nicolas Maduro នឹងត្រូវបានស្វាគមន៍ឱ្យចូលទៅប្រទេសបេឡារុស ប្រសិនបើលោកចុះចេញពីតំណែង ប៉ុន្តែក៏សង្កត់ធ្ងន់ថា កិច្ចពិភាក្សាបែបនេះមិនទាន់ធ្វើឡើងជាមួយលោក Maduro នោះទេ។គួរបញ្ជាក់ថា លោក Lukashenko គឺជាសម្ព័ន្ធមិត្តជិតស្និទ្ធរបស់លោកប្រធានាធិបតីរុស្ស៊ី Vladimir Putin។ ជាមួយគ្នានេះ វិមានក្រឹមឡាំង បាននិយាយកាលពីសប្ដាហ៍មុនថា លោក Putin បានបញ្ជាក់ជាថ្មីនូវការគាំទ្ររបស់លោក ចំពោះវ៉េណេស៊ុយអេឡា ក្នុងកិច្ចសន្ទនាតាមទូរសព្ទជាមួយលោក Maduro ដែលជាសម្ព័ន្ធមិត្តដ៏យូរអង្វែង។ការទទួលស្វាគមន៍នេះ កើតឡើងស្របពេលភាពតានតឹងខ្ពស់រវាងរដ្ឋាភិបាលសហរដ្ឋអាមេរិក និងវ៉ណេស៊ុយអេឡា ជាមួយនឹងវត្តមានយោធាទ្រង់ទ្រាយធំរបស់អាមេរិក នៅភាគខាងត្បូងតំបន់ការ៉ាអ៊ីប ការវាយប្រហារលើទូកដែលសង្ស័យថាជួញដូរគ្រឿងញៀន និងការព្រមានពីប្រធានាធិបតីអាមេរិក Donald Trump ដែលថា ប្រតិបត្តិការជើងគោក អាចនឹងចាប់ផ្តើមក្នុងពេលឆាប់ៗនៅវ៉េណេស៊ុយអេឡា។នៅក្នុងបទសម្ភាសន៍នោះ លោក Lukashenko បាននិយាយថា បេឡារុស និងវ៉េណេស៊ុយអេឡា មានទំនាក់ទំនងដ៏យូរអង្វែង ហើយលោក Maduro ត្រូវស្វាគមន៍ជានិច្ចក្នុងការទៅកាន់ទីក្រុងមីនស្កិ៍ ប្រសិនបើលោកចង់ធ្វើដូច្នេះ។ យ៉ាងណាក៏ដោយ លោក Lukashenko បានជំរុញឱ្យមានដំណោះស្រាយសន្តិវិធីជាមួយអាមេរិក លើបញ្ហាវ៉េណេស៊ុយអេឡា៕

អ៊ីស្រាអែល ស្តីបន្ទោសរដ្ឋាភិបាលអូស្ត្រាលីចំពោះការវាយប្រហារសម្លាប់មនុស្ស១៥នាក់អំឡុងបុណ្យសាសនា

នាយករដ្ឋមន្ត្រីអ៊ីស្រាអែល Benjamin Netanyahu បានភ្ជាប់គោលនយោបាយរបស់រដ្ឋាភិបាលអូស្ត្រាលីទៅនឹងការវាយប្រហារដ៏សាហាវលើការជួបជុំពិធីបុណ្យសាសនារបស់ជនជាតិជ្វីហ្វនៅទីក្រុងស៊ីដនី កាលពីចុងសប្តាហ៍នេះ ដោយអះអាងថាការគាំទ្ររបស់ទីក្រុងកង់បេរ៉ាចំពោះរដ្ឋប៉ាឡេស្ទីនបានជំរុញឱ្យមានភាពស្អប់ខ្ពើមប្រឆាំងនឹងជនជាតិជ្វីហ្វក្នុងស្រុក។ ខ្មាន់កាំភ្លើងពីរនាក់បានសម្លាប់មនុស្ស ១៥ នាក់ និងរាប់សិបនាក់ផ្សេងទៀតរងរបួសក្នុងអំឡុងពេលប្រារព្ធពិធីបុណ្យសាសនា Hanukkah នៅឆ្នេរសមុទ្រ Bondi ដ៏ល្បីល្បាញរបស់ទីក្រុងស៊ីដនីកាលពីថ្ងៃអាទិត្យ។ នគរបាលបានបាញ់សម្លាប់ជនវាយប្រហារម្នាក់ ដែលត្រូវបានគេស្គាល់ថាជនសង្ស័យទាំងពីរនាក់នោះគឺជាឪពុក និងកូនប្រុស។ លោក Netanyahu បានអះអាងថាអំពើហិង្សានេះគឺដោយសារគោលនយោបាយអនុវត្តដោយលោកនាយករដ្ឋមន្ត្រី Anthony Albanese ដែលលោកបានស្តីបន្ទោសចំពោះការ "លើកតម្កើង និងជំរុញឲ្យមានភាពស្អប់ខ្ពើមក្នុងប្រទេសអូស្ត្រាលី"។ មេដឹកនាំអ៊ីស្រាអែលរូបនេះ បាននិយាយថា លោកបានព្រមានរដ្ឋាភិបាលអូស្ត្រាលីកាលពីប៉ុន្មានខែមុនប្រឆាំងនឹងការគាំទ្ររដ្ឋប៉ាឡេស្ទីនលើហេតុផលទាំងនោះ។អូស្ត្រាលីបានទទួលស្គាល់ប៉ាឡេស្ទីនជាផ្លូវការនៅឯមហាសន្និបាតអង្គការសហប្រជាជាតិក្នុងខែកញ្ញា ដោយចូលរួមជាមួយប្រទេសជាច្រើនដែលកំពុងស្វែងរកការដាក់សម្ពាធអ៊ីស្រាអែលលើយុទ្ធនាការយោធារបស់ខ្លួននៅហ្កាហ្សា។ លោក Netanyahu បានប្ដេជ្ញាម្តងហើយម្តងទៀតថា នឹងទប់ស្កាត់ការបង្កើតរដ្ឋប៉ាឡេស្ទីនឲ្យបាន៕

ប្រធានាធិបតី ដូណាល់ ត្រាំ បង្ហាញការប្ដេជ្ញាចិត្តក្នុងការដោះស្រាយសង្រ្គាមកម្ពុជា និងថៃ ខណៈបច្ចុប្បន្នកំពុងមានមនុស្សស្លាប់ ដែលជារឿងមិនគួរកើតឡើងទេ ហើយលោកបញ្ជាក់ថានឹងដោះស្រាយបញ្ហានេះ

ប្រធានាធិបតីសហរដ្ឋអាមេរិកឯកឧត្តម ដូណាល់ ត្រាំ បានថ្លែងថា សង្រ្គាមរវាងកម្ពុជា និងថៃ កំពុងមានមនុស្សស្លាប់ដែលរឿងនេះមិនគួរកើតឡើងទេ។ ឯកឧត្តមប្រធានាធិបតីថ្លែងថា អាមេរិកនឹងចូលដោះស្រាយសង្រ្គាមនេះ។ ការថ្លែងរបស់ឯកឧត្តម ដូណាល់ ត្រាំ បែបនេះធ្វើឡើងនៅក្នុងកម្មវិធីមួយនៅក្នុងសេតវិមានកាលពីថ្ងៃទី១៥ ខែធ្នូ ឆ្នាំ២០២៥ (ម៉ោងនៅអាមេរិក)។ឯកឧត្តម ប្រធានាធិបតីសហរដ្ឋអាមេរិក បានថ្លែងថា៖ «សូមអរគុណច្រើន។ យើងមានកិច្ចសន្ទនាដ៏ល្អកាលពី១ម៉ោងមុន ជាមួយបណ្ដាមេដឹកនាំអឺរ៉ុប។ ភាគច្រើនក្នុងចំណោមពួកគេមានជាប់ពាក់ព័ន្ធនឹងសង្រ្គាមជាមួយរុស្ស៉ី និងអ៊ុយក្រែន។ យើងបានពិភាក្សាគ្នាយ៉ាងវែងអន្លាយ ហើយមានរឿងជាច្រើនមើលទៅហាក់ដូចជាដំណើរការល្អ ប៉ុន្តែយើងបាននិយាយតាំងពីយូរមកហើយៗវាជារឿងដ៏ពិបាក។ ដូចអ្នកទាំងអស់គ្នាដឹង យើងបានដោះស្រាយបញ្ចប់សង្រ្គាមចំនួន៨ហើយមានសង្រ្គាមមួយកំពុងមានបញ្ហាបន្តិចបន្តួចកាលពីម្សិលមិញនោះគឺរវាងថៃ និងកម្ពុជា តែយើងនឹងដោះស្រាយវា។ មានមនុស្សកំពុងស្លាប់។ រឿងបែបនេះមិនគួរកើតឡើងទេ ហើយសូមកោតសរសើរដល់ពួកគេដែលកំពុងធ្វើការដោះស្រាយជម្លោះនេះ»៕

អាមេរិកស្តីបន្ទោសលោក Netanyahu ចំពោះការរំលោភលើបទឈប់បាញ់នៅហ្កាហ្សា សម្លាប់មេបញ្ជាការយោធាហាម៉ាស

មន្ត្រីអាមេរិកពីររូបបានប្រាប់សារព័ត៌មាន Axios ថា សេតវិមានបានផ្ញើសារឯកជនដ៏ម៉ឺងម៉ាត់មួយទៅកាន់នាយករដ្ឋមន្ត្រីអ៊ីស្រាអែលលោក Benjamin Netanyahu ដោយសង្កត់ធ្ងន់ថា ការសម្លាប់មេបញ្ជាការយោធាជាន់ខ្ពស់ម្នាក់របស់ក្រុមហាម៉ាសកាលពីចុងសប្តាហ៍មុន គឺជាការរំលោភលើកិច្ចព្រមព្រៀងឈប់បាញ់សម្របសម្រួលដោយលោកប្រធានាធិបតី Trump ។ សារខឹងសម្បារពីសេតវិមាននេះកើតឡើងស្របពេលមានភាពតានតឹងកាន់តែខ្លាំងរវាងរដ្ឋបាលលោក Trump និងរដ្ឋាភិបាលលោក Netanyahu ជុំវិញដំណាក់កាលបន្ទាប់នៃកិច្ចព្រមព្រៀងដើម្បីបញ្ចប់សង្គ្រាមនៅដែនដីហ្កាហ្សា និងលើគោលនយោបាយតំបន់ដ៏ទូលំទូលាយរបស់អ៊ីស្រាអែល។យោងតាមមន្ត្រីអាមេរិកទាំងពីររូប បានឲ្យដឹងថា រដ្ឋមន្ត្រីការបរទេសអាមេរិកលោក Marco Rubio ប្រេសិតពិសេសរបស់សេតវិមានលោក Steve Witkoff និងទីប្រឹក្សា និងជាកូនប្រសាររបស់លោក Trump គឺលោក Jared Kushner មានការខកចិត្តយ៉ាងខ្លាំងចំពោះលោក Netanyahu។ លោក Netanyahu ត្រូវគេរំពឹងថានឹងជួបលោក Trump នៅគេហដ្ឋាន Mar-a-Lago របស់លោក នៅថ្ងៃទី២៩ ខែធ្នូខាងមុខនេះ ។លោក Trump បាននិយាយកាលពីថ្ងៃចន្ទដើមសប្ដាហ៍នេះថា សហរដ្ឋអាមេរិកកំពុង ស៊ើបអង្កេត ថាតើអ៊ីស្រាអែល បានរំលោភលើបទឈប់បាញ់នៅហ្កាហ្សាឬអត់ ប៉ុន្តែបានសង្កត់ធ្ងន់ក្នុងពេលជាមួយគ្នានេះថា ទំនាក់ទំនងរបស់លោកជាមួយលោក Netanyahu គឺល្អ៕

អឺរ៉ុប នឹងបង្កើតគណៈកម្មការអន្តរជាតិសម្រាប់ទាមទារសំណងពីសង្គ្រាមរបស់រុស្ស៊ី ឱ្យអ៊ុយក្រែន

បណ្ដាមេដឹកនាំអឺរ៉ុប រួមទាំងលោកប្រធានាធិបតីអ៊ុយក្រែន Volodymyr Zelenskyy កំពុងជួបប្រជុំគ្នានៅទីក្រុងឡាអេ នៅថ្ងៃអង្គារ (១៦ ធ្នូ) នេះ ដើម្បីបង្កើតគណៈកម្មការទាមទារសំណងអន្តរជាតិមួយ ដើម្បីផ្តល់សំណងដល់ទីក្រុងគីវ សម្រាប់ការខូចខាតតម្លៃរាប់រយពាន់លានដុល្លារ ពីការវាយប្រហាររបស់រុស្ស៊ី និងឧក្រិដ្ឋកម្មសង្គ្រាម ដែលត្រូវបានចោទប្រកាន់។សន្និសីទរយៈពេល ១ថ្ងៃនេះ ដែលរៀបចំរួមគ្នាដោយហូឡង់ និងក្រុមប្រឹក្សាអឺរ៉ុបចំនួន ៤៦ប្រទេស ដែលជាក្រុមសិទ្ធិមនុស្សជាន់ខ្ពស់របស់ទ្វីបអឺរ៉ុប នឹងមានការចូលរួមពីឥស្សរជនជាន់ខ្ពស់រាប់សិបនាក់ រួមទាំងប្រធានគោលនយោបាយការបរទេសសហភាពអឺរ៉ុប លោកស្រី Kaja Kallas ផងដែរ។រុស្ស៊ីមិនទាន់ធ្វើអត្ថាធិប្បាយលើផែនការនេះទេ ប៉ុន្តែតែងបដិសេធម្តងហើយម្តងទៀតចំពោះការចោទប្រកាន់ថា កងកម្លាំងរុស្ស៊ី ប្រព្រឹត្តឧក្រិដ្ឋកម្មសង្គ្រាមអំឡុងពេលជម្លោះ។ ប្រទេសរាប់សិបបានបង្ហាញពីការគាំទ្រចំពោះគណៈកម្មការទាមទារសំណងនេះរួចទៅហើយ ដែលទំនងជាមានមូលដ្ឋាននៅទីក្រុងឡាអេ ហើយប្រទេសចំនួន៣៥ គ្រោងចុះហត្ថលេខាលើអនុសញ្ញាមួយក្នុងកិច្ចប្រជុំថ្ងៃអង្គារនេះ។តម្លៃជាក់ស្ដែងនៃការខូចខាតក្នុងសង្រ្គាមអាយុកាលជាច្រើនឆ្នាំមកនេះ ពុំទាន់ច្បាស់នៅឡើយទេ ប៉ុន្តែធនាគារពិភពលោកបានប៉ាន់ប្រមាណក្នុងឆ្នាំ២០២៤ថា ថ្លៃចំណាយសម្រាប់ការកសាងឡើងវិញក្នុងទសវត្សរ៍ខាងមុខមានចំនួន ៥២៤ពាន់លានដុល្លារ (ប្រមាណ ៤៤៧ ពាន់លានអឺរ៉ូ) ឬជិត ៣ដងនៃទិន្នផលសេដ្ឋកិច្ចរបស់អ៊ុយក្រែន។ គួរបញ្ជាក់ថា តួលេខនោះគឺជាទិន្នន័យគិតរហូតដល់ខែធ្នូ ឆ្នាំ២០២៤ ប៉ុណ្ណោះ ហើយមិនរាប់បញ្ចូលការខូចខាតដែលបង្កឡើងនៅឆ្នាំ២០២៥នេះទេ នៅពេលការវាយប្រហាររបស់រុស្ស៊ី កើនឡើងកាន់តែកម្រោល ជាផ្នែកមួយនៃយុទ្ធនាការកំណត់គោលដៅលើសេវាប្រើប្រាស់ បណ្ដាញដឹកជញ្ជូន និងហេដ្ឋារចនាសម្ព័ន្ធស៊ីវិលរបស់អ៊ុយក្រែន៕

នគរបាលអាមេរិក នៅតែមិនទាន់ចាប់ខ្មាន់កាំភ្លើងបាន ក្នុងការបាញ់ប្រហារនៅសកលវិទ្យាល័យ Brown

ក្រុមមន្ត្រីនគរបាលសហរដ្ឋអាមេរិក កំពុងចុះសាកសួរពីផ្ទះមួយទៅផ្ទះមួយនៅថ្ងៃចន្ទ (១៥ ធ្នូ) ដើម្បីស្វះស្វែងរកវីដេអូពីកាមេរ៉ាសុវត្ថិភាពនៅតាមលំនៅឋានប្រជាជន ក្នុងក្ដីសង្ឃឹមថាអាចចាប់ខ្លួនជនសង្ស័យបាន ខណៈក្រុមអ្នកស៊ើបអង្កេតបន្តការតាមប្រមាញ់ខ្មាន់កាំភ្លើង ដែលបានសម្លាប់និស្សិត ២នាក់ និងបង្ករបួសជាច្រើននាក់ទៀត ក្នុងការបាញ់ប្រហារនៅថ្នាក់រៀនមួយពេលនិស្សិតកំពុងប្រឡង ក្នុងសកលវិទ្យាល័យ Brown រដ្ឋ Rhode Island។ការស្វែងរកជនសង្ស័យ រួមមានការបង្ហោះវីដេអូថ្មីរបស់ជនដែលអាចជាខ្មាន់កាំភ្លើង បានបន្តឡើងវិញ បន្ទាប់ពីអាជ្ញាធរដោះលែងបុរសម្នាក់ ដែលពួកគេបានឃុំខ្លួនកាលពីចុងសប្តាហ៍ក្នុងនាមជា «បុគ្គលជាប់ពាក់ព័ន្ធ»។ ព័ត៌មានដែលថា ខ្មាន់កាំភ្លើងនៅមិនទាន់ត្រូវចាប់ខ្លួនបាន ធ្វើឱ្យទីក្រុង Providence មានក្ដីបារម្ភឡើងវិញ ទោះបីជាក្រុមមន្ត្រីនិយាយថា មិនមានការគំរាមកំហែងដល់សហគមន៍ក៏ដោយ។លោក Ted Docks ភ្នាក់ងារពិសេសរបស់អង្គភាព FBI ទទួលបន្ទុកមកពីទីក្រុងបូស្តុន បាននិយាយថា ប្រាក់រង្វាន់ចំនួន ៥ម៉ឺនដុល្លារ កំពុងផ្តល់ជូន សម្រាប់អ្នកមានព័ត៌មានដែលនាំទៅដល់ការកំណត់អត្តសញ្ញាណ ការចាប់ខ្លួន និងការផ្តន្ទាទោសជនសង្ស័យ ខណៈជនដៃដល់រូបនោះ ត្រូវគេសន្មត់ថា នៅតែមានអាវុធ និងមានគ្រោះថ្នាក់។មន្ត្រីនគរបាលកំពុងគោះទ្វារផ្ទះអ្នកស្រុកដើម្បីសាកសួរថា តើមានអ្នកណាបានឃើញអ្វីខ្លះ ឬមានកាមេរ៉ាសុវត្ថិភាពណាមួយដែលអាចថតបានជនសង្ស័យដែរឬទេ ខណៈឧទ្ធម្ភាគចក្រនគរបាលបន្តហោះហើរជុំវិញតំបន់ស្វែងរក។ នគរបាលនិយាយថា ក្រោយបើកការបាញ់ប្រហារក្នុងអគារសិក្សាផ្នែកវិស្វកម្ម នៅក្នុងសកលវិទ្យាល័យ Brown កាលពីថ្ងៃសៅរ៍កន្លងទៅ ខ្មាន់កាំភ្លើងបានរត់គេចខ្លួនបាត់ស្រមោល៕

លោកTrump៖ កិច្ចព្រមព្រៀងបញ្ចប់សង្គ្រាមអ៊ុយក្រែនកាន់តែជិតជាងពេលណាៗទាំងអស់ ក្រោយការចរចានៅអាល្លឺម៉ង់

ប្រធានាធិបតីអាមេរិក លោក Donald Trump បាននិយាយថា កិច្ចព្រមព្រៀងបញ្ចប់សង្គ្រាមរបស់រុស្ស៊ីលើអ៊ុយក្រែន កាន់តែខិតជិតជាងពេលណាៗទាំងអស់ បន្ទាប់ពីក្រុមមេដឹកនាំសំខាន់ៗបានបើកកិច្ចចរចានៅទីក្រុងប៊ែរឡាំង ប្រទេសអាល្លឺម៉ង់ ប៉ុន្តែមន្ត្រីជាច្រើនបាននិយាយថា ការខ្វែងគំនិតគ្នាសំខាន់ៗនៅតែមានលើបញ្ហាទឹកដី។ លោក Trump បានប្រាប់ក្រុមអ្នកសារព័ត៌មាននៅវិមានប្រធានាធិបតី កាលពីថ្ងៃចន្ទដើមសប្ដាហ៍នេះថា លោកមានកិច្ចចរចាដ៏យូរ និងល្អណាស់ ជាមួយប្រធានាធិបតីអ៊ុយក្រែន លោក Volodymyr Zelenskyy និងមេដឹកនាំរបស់ប្រទេសបារាំង អាល្លឺម៉ង់ ចក្រភពអង់គ្លេស និងអង្គការណាតូ។លោកថា ពួកលោកកំពុងទទួលបានការគាំទ្រយ៉ាងខ្លាំងពីក្រុមមេដឹកនាំអឺរ៉ុប។ ពួកគេក៏ចង់បញ្ចប់សង្គ្រាមនេះដូចគ្នាដែរ។ ពួកលោកបានសន្ទនាជាច្រើនជាមួយប្រធានាធិបតី Vladimir Putin ហើយលោកគិតថាពួកលោកកាន់តែខិតជិតជាងពេលណាៗទាំងអស់ ហើយយើងនឹងមើលឃើញអ្វីដែលយើងអាចធ្វើបាន។លោក Zelenskyy បាននិយាយថ្មីៗនេះថា ការចរចាជាមួយមេដឹកនាំសហរដ្ឋអាមេរិក និងអឺរ៉ុបគឺពិបាក ប៉ុន្តែមានផ្លែផ្កា។ ការពិភាក្សាកម្រិតខ្ពស់ ដែលពាក់ព័ន្ធនឹងលោក Zelenskyy គណៈប្រតិភូអាមេរិកដឹកនាំដោយប្រេសិតពិសេសលោក Steve Witkoff កូនប្រសាររបស់លោក Trump គឺលោក Jared Kushner និងក្រុមមេដឹកនាំអឺរ៉ុប បានធ្វើឡើងនៅទីក្រុងប៊ែរឡាំងរយៈពេលពីរថ្ងៃ ស្របពេលមានសម្ពាធកាន់តែខ្លាំងពីទីក្រុងវ៉ាស៊ីនតោន ឲ្យទីក្រុងគីវធ្វើសម្បទានដល់ទីក្រុងមូស្គូ ដើម្បីបញ្ចប់ជម្លោះដ៏សាហាវបំផុតមួយរបស់អឺរ៉ុបចាប់តាំងពីសង្គ្រាមលោកលើកទីពីរ៕

បណ្ដាញសង្គម

ព័ត៌មានថ្មីៗ

យុវជន៥០០នាក់ បានជួបជុំគ្នាដើម្បីបង្ហាញការដឹងគុណវីរកងទ័ពចំពោះការលះបង់ដ៏ធំធេង ដើម្បីការពារបូរណភាពទឹកដី

ជនអន្តោប្រវេសន៍ជិត ៤០០នាក់ ត្រូវបានជួយសង្គ្រោះ នៅម្ដុំកោះរបស់ក្រិក

នគរបាលចាប់ខ្លួនជនសង្ស័យម្នាក់ ក្រោយស្ត្រី ៣នាក់ ត្រូវបានចាក់នៅរថភ្លើងក្រោមដីទីក្រុងប៉ារីស

បេក្ខជនជិត ៧០០នាក់ មានសិទ្ធិដើម្បីប្រឡងវគ្គចុងក្រោយធ្វើជាសិស្សមន្ត្រីក្រមការ

ឯកឧត្តមឧបនាយករដ្ឋមន្ដ្រី ហ៊ុន ម៉ានី ជួបសំណេះសំណាល សួរសុខទុក្ខ ជាមួយគ្រួសារវីរកងទ័ពឈរជើងការពារខ្សែបន្ទាត់ព្រំដែនកម្ពុជា-ថៃ ដែលមានទីលំនៅក្នុងមូលដ្ឋានខេត្តកំពង់ស្ពឺ

ឯកឧត្តម អាន់វ៉ា អ៊ីប្រាហ៊ីម ស្វាគមន៍ចំពោះបទឈប់បាញ់រវាងកម្ពុជា-ថៃ និងគាំទ្រកិច្ចខិតខំប្រឹងប្រែងទាំងអស់ដើម្បីធានាថា កិច្ចព្រមព្រៀងនេះត្រូវបានគោរព

ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងលោកជំទាវនាំយកអំណោយមនុស្សធម៌ចែកជូនដល់កងទ័ពជួរមុខ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877