BTV NEWS

លោក Trump និយាយថា ក្រុមហ៊ុនប្រេងមិនបានបន្ទាបតម្លៃឧស្ម័នគ្រប់គ្រាន់ទេ និងបានបញ្ជាឱ្យស៊ើបអង្កេត

ការក្លែងបន្លំសុខុមាលភាពធ្វើឲ្យអង់គ្លេសខាតបង់ ១០ពាន់លានផោន ខណៈលោក Burnham ប្ដេជ្ញាបង្ក្រាប

លោក Trump បញ្ជាឲ្យក្រសួងយុត្តិធម៌ស៊ើបអង្កេតក្រុមហ៊ុនប្រេង ពាក់ព័ន្ធនឹងតម្លៃសាំង

ប្រមុខការទូតអ៊ីរ៉ង់និយាយជាមួយក្រុមហាម៉ាសអំពីការចរចារវាងទីក្រុងតេអេរ៉ង់ និងទីក្រុងវ៉ាស៊ីនតោន

ព័ត៌មានអន្តរជាតិ

រដ្ឋមន្ត្រីការបរទេសអ៊ីរ៉ង់៖ ចាកចេញពីតំបន់របស់យើង ប្រសិនបើអ្នកចង់មានសុវត្ថិភាព

រដ្ឋមន្ត្រីការបរទេសអ៊ីរ៉ង់ លោក Abbas Araqchi បានព្រមានសហរដ្ឋអាមេរិកនៅក្នុងការបង្ហោះសារមួយនៅលើបណ្តាញសង្គម X កាលពីថ្ងៃអង្គារ ទី៩ ខែមិថុនា ដោយនិយាយថា «ចាកចេញពីតំបន់របស់យើង ប្រសិនបើអ្នកចង់មានសុវត្ថិភាព» និងបានប្តេជ្ញាថា អ៊ីរ៉ង់ឆ្លើយតបទៅនឹងការវាយប្រហារ ឬការគំរាមកំហែងណាមួយយ៉ាងខ្លាំងក្លា។ សារនេះ បានធ្វើឡើងបន្ទាប់ពីការវាយប្រហាររបស់សហរដ្ឋអាមេរិកលើអ៊ីរ៉ង់ បន្ទាប់ពីប្រធានាធិបតី លោក Donald Trump បាននិយាយថា ទីក្រុងតេអេរ៉ង់បានបាញ់ទម្លាក់ឧទ្ធម្ភាគចក្រ Apache របស់សហរដ្ឋអាមេរិកនៅច្រកសមុទ្រ Hormuz ដែលធ្វើឲ្យមានមន្ទិលសង្ស័យកាន់តែខ្លាំងឡើងអំពីទស្សនវិស័យសម្រាប់សន្តិភាពរវាងប្រទេសទាំងពីរ។ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា កោះ Qeshm នៅក្នុងច្រកសមុទ្រ Hormuz ត្រូវបានវាយប្រហារ ហើយការបាញ់ផ្លោងត្រូវបានបញ្ជាក់នៅទីក្រុងកំពង់ផែ Sirik នៅច្រកសមុទ្រនោះ។ មន្ត្រីអាមេរិកម្នាក់ដែលបាននិយាយក្នុងលក្ខខណ្ឌមិនបញ្ចេញឈ្មោះថា លោក Trump បាននិយាយថា អ្នកបើកយន្តហោះអាមេរិកពីរនាក់ដែលពាក់ព័ន្ធនឹងឧបទ្ទវហេតុឧទ្ធម្ភាគចក្រពុំមានរងរបួសទេ ខណៈឧទ្ធម្ភាគចក្រ Apache ត្រូវបានបាញ់ទម្លាក់ដោយយានដ្រូនវាយប្រហាររបស់អ៊ីរ៉ង់។

ប្រជាជនបូលីវី ប្រមូលផ្តុំគ្នានៅទីក្រុងLa Paz ជំរុញឱ្យរដ្ឋាភិបាលអនុវត្តស្ថានភាពគ្រាអាសន្ន ជុំវិញការបិទផ្លូវ

ប្រជាជនរាប់រយនាក់នៅក្នុងទីក្រុងLa Paz និងទីក្រុង El Alto ដែលនៅជិតខាង បានប្រមូលផ្តុំគ្នា កាលពីថ្ងៃអង្គារ ទី៩ ខែមិថុនា ដោយទាមទារឱ្យរដ្ឋាភិបាលរបស់លោកប្រធានាធិបតី Rodrigo Paz ប្រកាសស្ថានភាពគ្រាអាសន្នបន្ទាប់ពីការបិទផ្លូវជាង៤០ថ្ងៃ ដែលបានធ្វើឲ្យរំខានដល់ការផ្គត់ផ្គង់ស្បៀងអាហារ ថ្នាំពេទ្យ និងប្រេងឥន្ធនៈ។ ការតវ៉ានេះ បានធ្វើឡើងបន្ទាប់ពីការអំពាវនាវពីគណៈកម្មាធិការស៊ីវិល Pro La Paz និងក្រុមស៊ីវិលផ្សេងទៀត ដោយមានការជួបជុំស្រដៀងគ្នា ត្រូវបានធ្វើឡើងនៅក្នុងទីក្រុងនានារបស់ប្រទេសបូលីវី។ ប្រជាជនបាននិយាយថា ការបិទផ្លូវ បានធ្វើឱ្យតម្លៃទំនិញជាមូលដ្ឋានកើនឡើងយ៉ាងខ្លាំង បញ្ឈប់ការដឹកជញ្ជូន និងធ្វើឱ្យជីវភាពប្រចាំថ្ងៃមានភាពតានតឹងនៅទូទាំងតំបន់ទីប្រជុំជនធំបំផុតរបស់ប្រទេសបូលីវី ដែលមានប្រជាជនជិត២លាននាក់រស់នៅ។ លោកPaz ដែលបានទទួលជ័យជម្នះក្នុងការបោះឆ្នោតកាលពី៧ខែកន្លងទៅនេះ បានស្តីបន្ទោសការហ៊ុមព័ទ្ធលើក្រុមបង្កភាពវឹកវរដែលត្រូវបានចោទប្រកាន់ថាទទួលបានហិរញ្ញវត្ថុពីបណ្តាញជួញដូរគ្រឿងញៀន និងមានទំនាក់ទំនងជាមួយអតីតប្រធានាធិបតី លោក Evo Morales ។ ការបិទផ្លូវ កំពុងកើតឡើងក្នុងពេលការតវ៉ាជាច្រើនសប្តាហ៍ដោយធ្វើឡើងដោយសហជីព និងអ្នកគាំទ្រអតីតប្រធានាធិបតីឆ្វេងនិយម លោក Evo Morales ដែលកំពុងទាមទារឱ្យប្រធានាធិបតី លោក Rodrigo Paz លាលែងពីតំណែង និងការកែប្រែវិធានការរឹតត្បិតថវិការបស់លោក។ យោងតាមលោក Mariano Machado មកពីក្រុមហ៊ុនស៊ើបការណ៍ពីហានិភ័យបានឲ្យដឹងថាភាពវឹកវរបង្ហាញពីភាពមិនពេញចិត្តកាន់តែទូលំទូលាយជុំវិញតម្លៃទំនិញកើនឡើង គុណភាពប្រេង គោលនយោបាដីធ្លី និងការសន្យាក្នុងយុទ្ធនាការដែលមិនទាន់ត្រូវបានបំពេញ។ លោក Morales បានគាំទ្រចលនាតវ៉ា ដោយអំពាវនាវឱ្យមានការបោះឆ្នោតមុនកាលកំណត់ និងចាត់ទុកភាពវឹកវរនេះ ថាជាការតតាំងប្រឆាំងនឹងគោលនយោបាយសេដ្ឋកិច្ចរបស់លោក Paz។

មេបញ្ជាការយោធាជាន់ខ្ពស់អ៊ុយក្រែន អនុម័តផែនការជំរុញសមត្ថភាពយោធា

មេបញ្ជាការយោធាជាន់ខ្ពស់អ៊ុយក្រែន បានអនុម័តផែនការដើម្បីបង្កើនសមត្ថភាពយោធារបស់ប្រទេស។ លោក Oleksandr Syrskyi បានប្រកាសពីការអនុម័តផែនការនេះរហូតដល់ឆ្នាំ ២០៣០ នៅក្នុងការបង្ហោះសារនៅលើបណ្តាញផ្សព្វផ្សាយសង្គម កាលពីថ្ងៃអង្គារ។លោក Syrskyi បានសង្កត់ធ្ងន់លើតម្រូវការក្នុងការកសាងយោធានាពេលអនាគត ខណៈកំពុងប្រយុទ្ធប្រឆាំងនឹងសង្គ្រាមដ៏លំបាក។ មេបញ្ជាការរូបនេះ បានចុះបញ្ជីការផលិតប្រព័ន្ធមីស៊ីលជាវិស័យសំខាន់ដែលត្រូវផ្តោតការយកចិត្តទុកដាក់។ លោកបាននិយាយថា អ៊ុយក្រែននឹងផលិតមីស៊ីលរយៈចម្ងាយឆ្ងាយដែលមានសមត្ថភាពវាយប្រហារគោលដៅក្នុងចម្ងាយរហូតដល់ ២.០០០ គីឡូម៉ែត្រ។លោក Syrskyi ក៏បាននិយាយផងដែរថា ប្រទេសរបស់លោក មានផែនការពង្រឹងអង្គភាពកាំភ្លើងធំដោយយុទ្ធោបករណ៍ផលិតក្នុងស្រុក និងតាមមធ្យោបាយផ្សេងៗទៀត។ លោកបាននិយាយថា អ្នកមួយចំនួនអាចគិតថាសម័យកាលនៃកាំភ្លើងធំកំពុងឈានដល់ទីបញ្ចប់ ប៉ុន្តែបទពិសោធន៍ប្រយុទ្ធបង្ហាញពីភាពផ្ទុយគ្នា។ បំណងរបស់អ៊ុយក្រែនក្នុងការផលិតមីស៊ីលរយៈចម្ងាយឆ្ងាយ និងបង្កើនអង្គភាពកាំភ្លើងធំ ជាក់ស្តែងបង្ហាញពីជំហររបស់ប្រទេសក្នុងការទប់ទល់នឹងរុស្ស៊ី មិនត្រឹមតែក្នុងអំឡុងពេលនៃការឈ្លានពានរបស់ប្រទេសប៉ុណ្ណោះទេ ប៉ុន្តែថែមទាំងក្នុងរយៈពេលពីមធ្យម ទៅរយៈពេលវែង ផងដែរ។

កូរ៉េខាងជើង៖ដំណើរទស្សនកិច្ចលោកXiបង្កើតបានផែនកាមេជាប្រយោជន៍វែងឆ្ងាយសម្រាប់ទំនាក់ទំនងក្រោយបញ្ចប់ជំនួបកំពូល

ទីភ្នាក់ងារសារព័ត៌មានកណ្តាលកូរ៉េ KCNA បាននិយាយនៅថ្ងៃពុធ១០ មិថុនានេះថា មេដឹកនាំកូរ៉េខាងជើង និងចិន បានអនុម័ត «ផែនការមេជាប្រយោជន៍វែងឆ្ងាយ» សម្រាប់ទំនាក់ទំនងទ្វេភាគី ក្នុងអំឡុងពេលដំណើរទស្សនកិច្ចថ្មីៗនេះរបស់លោក Xi Jinping ទៅកាន់ទីក្រុងព្យុងយ៉ាង។ លោក ស៊ី បានវិលត្រឡប់ទៅប្រទេសលោកវិញកាលពីថ្ងៃអង្គារ៩មិថុនា បន្ទាប់ពីដំណើរទស្សនកិច្ចដ៏កម្រមួយទៅកាន់ប្រទេសកូរ៉េខាងជើងរយៈពេល២ថ្ងៃគឺថ្ងៃទី ៨ និង៩ មិថុនា ដែលរួមមានកិច្ចប្រជុំទ្វេភាគី និងការបង្ហាញខ្លួនជាសាធារណៈជាមួយមេដឹកនាំលោក Kim Jong Un ដែលគូសបញ្ជាក់ពីការជំរុញរួមគ្នាដើម្បីបង្កើតសម្ព័ន្ធភាពឡើងវិញរវាងប្រទេសជិតខាងទាំងពីរ។ លោកប្រធានាធិបតីចិន បានធ្វើដំណើរទស្សនកិច្ចដ៏កម្រមួយទៅកាន់ប្រទេសកូរ៉េខាងជើង កាលពីថ្ងៃចន្ទដើមសប្ដាហ៍នេះ បន្ទាប់ពីបានទទួលស្វាគមន៍មេដឹកនាំពិភពលោកមួយចំនួន រួមទាំងប្រធានាធិបតីអាមេរិក Donald Trump និងមេដឹកនាំរុស្ស៊ី Vladimir Putin នៅទីក្រុងប៉េកាំង។ ដំណើរទស្សនកិច្ចនេះក៏បានកើតឡើងចំពេលទំនាក់ទំនងដ៏កក់ក្តៅមិនធម្មតារវាងកូរ៉េខាងជើង និងរុស្ស៊ី ជាទីដែលទីក្រុងព្យុងយ៉ាងបានបញ្ជូនទាហាន និងគ្រាប់រំសេវដើម្បីជួយដល់សង្គ្រាមរបស់ទីក្រុងមូស្គូលើអ៊ុយក្រែនផងដែរ។ KCNA បាននិយាយថា សមមិត្ត គីម ជុងអ៊ុន និងសមមិត្ត ស៊ី ជិនពីង បានសម្តែងការពេញចិត្ត និងអារម្មណ៍ជ្រាលជ្រៅចំពោះការពិតដែលថាមេដឹកនាំទាំងពីរបានផ្តល់នូវផែនការដ៏វែងឆ្ងាយសម្រាប់ការអភិវឌ្ឍទំនាក់ទំនង។ប្រភពខាងលើបានបន្ថែមថា ក្នុងអំឡុងដំណើរទស្សនកិច្ចរយៈពេលពីរថ្ងៃ ប្រទេសទាំងពីរបានពង្រឹងមិត្តភាពបដិវត្តន៍ និងទំនាក់ទំនងជិតស្និទ្ធជាសមមិត្តបន្ថែមទៀត ហើយបានបញ្ជាក់ពីឆន្ទៈដ៏មុតមាំរបស់មេដឹកនាំទាំងពីរក្នុងការអភិវឌ្ឍចំណងមិត្តភាពប្រពៃណីរវាងកូរ៉េខាងជើង និងចិន ទៅជាគំរូនៃទំនាក់ទំនងដ៏មានឥទ្ធិពល និងជាយុទ្ធសាស្ត្របំផុត៕

អ៊ីរ៉ង់៖ មីស៊ីល កំណត់គោលដៅទីតាំងទុកយន្តហោះចម្បាំង F-35 នៅមូលដ្ឋានទ័ពអាកាសហ្ស៊កដានី

កងឆ្មាំបដិវត្តន៍អ៊ីស្លាមអ៊ីរ៉ង់(IRGC) បានប្រកាសថា កងកម្លាំងទ័ពអាកាសរបស់ខ្លួនបានបាញ់មីស៊ីលរយៈចម្ងាយឆ្ងាយដែលប្រើប្រេងឥន្ធនៈរឹងទៅលើមូលដ្ឋានកងទ័ពអាកាសមួយកន្លែងក្នុងប្រទេសហ្ស៊កដានី ជាទីតាំងរបស់បុគ្គលិកយោធាសហរដ្ឋអាមេរិក។ យោងតាមសេចក្តីថ្លែងការណ៍បានឲ្យដឹងថា កងឆ្មាំបដិវត្តន៍អ៊ីស្លាមអ៊ីរ៉ង់(IRGC)បានអះអាងថា មីស៊ីលរបស់ខ្លួនបានវាយប្រហារ និងបំផ្លាញគោលដៅសំខាន់ៗចំនួនបួនកន្លែងនៅមូលដ្ឋាន រួមទាំងទីតាំងទុកយន្តហោះចម្បាំង F-35 និងមជ្ឈមណ្ឌលបញ្ជាការដ្ឋាននិងគ្រប់គ្រងធំមួយកន្លែង។ កងឆ្មាំបដិវត្តន៍អ៊ីស្លាមអ៊ីរ៉ង់(IRGC) បានកំណត់ការវាយប្រហារដោយមីស៊ីលនេះ ថាជាការបញ្ចប់ប្រតិបត្តិការសងសឹកដ៏ទូលំទូលាយដែលខ្លួនអះអាងថា រួមមានការវាយប្រហារគោលដៅចំនួន ២១កន្លែងនៅមូលដ្ឋានទ័ពអាកាសនិងកងទ័ពជើងទឹកអាមេរិកជាច្រើនកន្លែងនៅទូទាំងតំបន់ ព្រមទាំងការបាញ់ទម្លាក់យានដ្រូន MQ-9 របស់អាមេរិកនៅលើដែនអាកាសអ៊ីរ៉ង់។ កងឆ្មាំបដិវត្តន៍អ៊ីស្លាមអ៊ីរ៉ង់(IRGC) បានបញ្ចប់សេចក្តីថ្លែងការណ៍របស់ខ្លួនដោយមានការព្រមានថា កងកម្លាំងរបស់ខ្លួននៅតែត្រៀមជាស្រេចដើម្បីឆ្លើយតបយ៉ាងដាច់ខាតចំពោះសកម្មភាពយោធារបស់សហរដ្ឋអាមេរិកជាបន្តបន្ទាប់ ហើយទីក្រុងវ៉ាស៊ីនតោននឹងទទួលខុសត្រូវទាំងស្រុងចំពោះផលវិបាកនានានៃការធ្វើឲ្យរីកធំជម្លោះបន្ថែមទៀត។

មនុស្ស៨នាក់ស្លាប់ក្នុងការវាយប្រហារពីអ៊ីស្រាអែលនៅលីបង់ ខណៈព្រមានឲ្យពលរដ្ឋចាកចេញពីទីក្រុងTyre

អ្នកស្រុកនៃទីក្រុងបុរាណ Tyre និងកំពុងមានជម្លោះនេះ ត្រូវបានបង្ខំឱ្យជ្រើសរើសរវាងជម្រើសដ៏ជូរចត់ពីរគឺ បន្តស្នាក់នៅ និងប្រថុយនឹងការស្លាប់ដោយការវាយប្រហារតាមអាកាសរបស់អ៊ីស្រាអែល ឬចាកចេញ ហើយក្លាយជាជនភៀសខ្លួននៅក្នុងប្រទេសខ្លួនឯង។ អ៊ីស្រាអែលបានបើកការវាយប្រហារនៅទូទាំងភាគខាងត្បូងប្រទេសលីបង់ ទោះបីជាមានការព្រមានពីអ៊ីរ៉ង់មិនឱ្យបន្តការវាយប្រហារនៅក្នុងប្រទេសនេះក៏ដោយ។ ក្រសួងសុខាភិបាលលីបង់បាននិយាយថា មនុស្សប្រាំបីនាក់ត្រូវបានសម្លាប់ និងជាង៣០នាក់ បានរងរបួសនៅក្នុងទីក្រុTyre ជាទីដែលយោធាអ៊ីស្រាអែលបានចេញបទបញ្ជាថ្មីឱ្យអ្នកស្រុកចាកចេញពីទីក្រុងភាគខាងត្បូងមួយនេះ រួមទាំងតំបន់ពលរដ្ឋកាន់សាសនាគ្រីស្តរបស់ខ្លួនជាលើកដំបូង។ ប្រព័ន្ធផ្សព្វផ្សាយលីបង់បានរាយការណ៍ថា ការវាយប្រហារតាមអាកាស និងកាំភ្លើងធំរបស់អ៊ីស្រាអែលនៅទូទាំងភាគខាងត្បូងប្រទេសលីបង់បានសម្លាប់មនុស្សយ៉ាងហោចណាស់១៣ នាក់កាលពីថ្ងៃអង្គារ សប្ដាហ៍នេះ ។ ការវាយប្រហារនេះកើតឡើងខណៈយោធាអ៊ីស្រាអែលចេញការព្រមានជម្លៀសចេញសម្រាប់ពលរដ្ឋនៅទីក្រុង Tyre ទាំងមូល។ ហើយជាលើកដំបូងចាប់តាំងពីអ៊ីស្រាអែលបានចាប់ផ្តើមការឈ្លានពានចុងក្រោយរបស់ខ្លួននៅភាគខាងត្បូងប្រទេសលីបង់ដើម្បីកម្ចាត់ក្រុមហេសបូឡា។ បទបញ្ជាជម្លៀសរបស់អ៊ីស្រាអែលក៏រួមបញ្ចូលទាំងតំបន់អាល់ហារ៉ា ដែលជាតំបន់គ្រឹស្តសាសនាប្រវត្តិសាស្ត្រនៃទីក្រុងដែលមានអាយុកាលជាង៤.៧០០ ឆ្នាំ នេះផងដែរ។ អ្នកស្រុកម្នាក់ដែលជាម្តាយមានកូនបីនាក់ បានប្រាប់ទូរទស្សន៍ NBC News ថា អ្នកស្រីមិនដែលស្រមៃថានឹងចាកចេញពីតំបន់ អាល់ហារ៉ា ទេ។ វាជាតំបន់សុវត្ថិភាព ហើយពួកអ្នកស្រីក៏ជាពលរដ្ឋសាមញ្ញាគ្មានអាវុធក្នុងដៃដែរ៕

សហភាពអឺរ៉ុបកំណត់គោលដៅសេដ្ឋកិច្ច និងទាហានរុស្ស៊ី ក្នុងកញ្ចប់ទណ្ឌកម្មថ្មីបំផុតជុំវិញសង្គ្រាមអ៊ុយក្រែន

សហភាពអឺរ៉ុបបានបង្ហាញកញ្ចប់ទណ្ឌកម្មថ្មីដែលបានស្នើឡើងប្រឆាំងនឹងប្រទេសរុស្ស៊ីកាលពីថ្ងៃអង្គារ ៩មិថុនាសប្ដាហ៍នេះ ដោយកំណត់គោលដៅលើវិស័យធនាគារ រូបិយប័ណ្ណឌីជីថល ថាមពល និងពាណិជ្ជកម្ម និងវិស័យនេសាទរបស់ប្រទេសនេះ ក្នុងកិច្ចខិតខំប្រឹងប្រែងដើម្បីធ្វើឱ្យសេដ្ឋកិច្ចរបស់ខ្លួនចុះខ្សោយ។ លោកស្រី Ursula von der Leyen ប្រធានគណៈកម្មការអឺរ៉ុប បាននិយាយថា សេដ្ឋកិច្ចរបស់ប្រទេសរុស្ស៊ីកំពុង "ធ្លាក់ចុះយ៉ាងខ្លាំង" ខណៈលោកស្រីបានបង្ហាញកញ្ចប់ទណ្ឌកម្មលើកទី២១របស់ប្លុកនេះ ប្រាំពីរសប្តាហ៍បន្ទាប់ពីប្រធានក្រុមប្រឹក្សាលោក António Costa បានប្រកាសពីការចូលជាធរមាននៃកញ្ចប់ទណ្ឌកម្មមុន។លោកស្រីនិយាយថា បួនឆ្នាំបន្ទាប់ពីការចាប់ផ្តើមការវាយលុកទ្រង់ទ្រាយធំរបស់រុស្ស៊ី វិមានក្រឹមឡាំងបានបរាជ័យយ៉ាងច្បាស់ក្នុងការបង្ក្រាបអ៊ុយក្រែន។ លោកស្រីថា កញ្ចប់ទណ្ឌកម្មថ្មីនេះ ក៏នឹងផ្អាកការកំណត់តម្លៃរបស់សហភាពអឺរ៉ុបលើការនាំចេញប្រេងរបស់រុស្ស៊ីរហូតដល់ខែមករាឆ្នាំក្រោយផងដែរ។ វិធានការថ្មីឥឡូវនេះត្រូវការការអនុម័តជាឯកច្ឆ័ន្ទដោយបណ្តាប្រទេសសហភាពអឺរ៉ុប។ យោងតាមលោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប សហភាពអឺរ៉ុបចង់ហាមប្រាមអតីតទាហាន ឬបច្ចុប្បន្នដែលធ្លាប់បម្រើកងកម្លាំងប្រដាប់អាវុធរុស្ស៊ីមិនឱ្យចូលទៅក្នុងប្លុកនេះ។ លោកស្រីបានសរសេរនៅលើបណ្ដាញសង្គម X ថា ទ្វាររបស់អឺរ៉ុបមិនគួរបើកចំហសម្រាប់អតីតយុទ្ធជនរបស់រុស្ស៊ីទេ។ លោកស្រី von der Leyenបាននិយាយថា វិធានការទាំងនេះរួមមានការរឹតបន្តឹងការនាំចេញថ្មីលើទំនិញដែលអាចត្រូវបានប្រើប្រាស់ដោយឧស្សាហកម្មយោធារបស់រុស្ស៊ី ក៏ដូចជាការរឹតបន្តឹងការនាំចូលរបស់រុស្ស៊ីផងដែរ៕

អ៊ីស្រាអែល រារាំងពលរដ្ឋប៉ាឡេស្ទីនជាង១៦.៥០០នាក់ពីការទទួលបានការព្យាបាលផ្នែកវេជ្ជសាស្ត្រ

អាជ្ញាធរសុខាភិបាលតំបន់ហ្កាហ្សា បានចោទប្រកាន់អ៊ីស្រាអែលថាកំពុងរារាំងពលរដ្ឋប៉ាឡេស្ទីនជាង ១៦.៥០០នាក់ដែលត្រូវការការព្យាបាលផ្នែកវេជ្ជសាស្ត្រនៅបរទេសមិនឲ្យចាកចេញពីតំបន់ដែលត្រូវបានហ៊ុមព័ទ្ធនិងរហែកហួរដោយសង្គ្រាម ទោះបីជាមានបទឈប់បាញ់ដ៏ផុយស្រួយចាប់តាំងពីខែតុលា ឆ្នាំមុន ក៏ដោយ។ ក្រសួងបានព្រមាននៅក្នុងសេចក្តីថ្លែងការណ៍មួយកាលពីថ្ងៃអង្គារថា អ៊ីស្រាអែលកំពុងសម្លាប់អ្នកជំងឺដោយការពន្យារពេល បន្ទាប់ពីសង្គ្រាមប្រល័យពូជសាសន៍របស់ខ្លួននៅតំបន់ហ៊ុមព័ទ្ធនេះដែលបានសម្លាប់ពលរដ្ឋប៉ាឡេស្ទីនជិត ៧៣.០០០ នាក់ចាប់តាំងពីខែតុលា ឆ្នាំ ២០២៣។ ស្ថានភាពដ៏អាក្រក់នេះបង្ហាញពីការលំបាកនៃប្រព័ន្ធថែទាំសុខភាពនៅក្នុងតំបន់ហ៊ុមព័ទ្ធ ដែលអ្នកជំនាញនិងក្រុមជំនួយរបស់អង្គការសហប្រជាជាតិ បានចោទប្រកាន់អ៊ីស្រាអែលថា បានបំផ្លាញជាប្រព័ន្ធក្នុងបំណងធ្វើឱ្យតំបន់ហ្កាហ្សា មិនអាចរស់នៅបាន។ យោងតាមអាជ្ញាធរតំបន់ហ្កាហ្សាបានឲ្យដឹងថា អ៊ីស្រាអែល បានរឹតបន្តឹងពលរដ្ឋដែលចាកចេញពីតំបន់ហ៊ុមព័ទ្ធនេះសម្រាប់ការព្យាបាលផ្នែកវេជ្ជសាស្ត្រ។ ច្រកឆ្លងកាត់ Rafah រវាងតំបន់ហ្កាហ្សា និងប្រទេសអេហ្ស៊ីប ត្រូវបានអ៊ីស្រាអែលបើកឡើងវិញដោយផ្នែកកាលពីដើមខែកុម្ភៈ បន្ទាប់ពីបានបិទជិតពីរឆ្នាំ។ ចាប់តាំងពីពេលនោះមក អ៊ីស្រាអែលបានបិទច្រកឆ្លងកាត់ជាបណ្តោះអាសន្នជាច្រើនលើកច្រើនសារ។ លោក Maher Shamia អាជ្ញាធរសុខាភិបាលតំបន់ហ្កាហ្សា បាននិយាយថា ប្រជាជនប៉ាឡេស្ទីនត្រូវបានអនុញ្ញាឲ្យប្រើប្រាស់ច្រកដើម្បីចាកចេញពីដែនដីនេះត្រឹមតែបីថ្ងៃប៉ុណ្ណោះក្នុងមួយសប្តាហ៍ ខណៈត្រូវបានបែងចែកត្រឹមតែមួយថ្ងៃក្នុងមួយសប្តាហ៍សម្រាប់ការជម្លៀសអ្នកជំងឺនៅច្រក Karem Abu Salem ដែលភ្ជាប់តំបន់ហ្កាហ្សាទៅកាន់អ៊ីស្រាអែល។

អ៊ីរ៉ង់ ត្រូវបានរំពឹងថា នឹងសងសឹកប្រឆាំងការវាយប្រហាររបស់អាមេរិកដើម្បីរក្សាការរារាំង

អ៊ីរ៉ង់ បានបញ្ជាក់យ៉ាងច្បាស់អំពីបំណងដែលមិនទុកឲ្យ «ការឈ្លានពាន» ឬការវាយប្រហារណាមួយនៅលើទឹកដីរបស់ខ្លួនដោយគ្មានការឆ្លើយតបឡើយ។ ប្រភពប្រព័ន្ធផ្សព្វផ្សាយនិយាយថា យើងបានស្តាប់ឮពេញមួយថ្ងៃ និងសូម្បីតែពីប្រភពយោធាដោយនិយាយថា អ៊ីរ៉ង់នឹងសងសឹក។ នោះគឺជាការធ្វើឲ្យភាពស្មើរគ្នាដែលអ៊ីរ៉ង់ចង់រក្សាជាមួយសហរដ្ឋអាមេរិកនិងជាមួយអ៊ីស្រាអែល ដោយនិយាយថា ប្រសិនបើពួកគេមិនសងសឹកចំពោះការវាយប្រហារណាមួយទេ វាជាការបញ្ជូនសារនៃភាពទន់ខ្សោយទៅកាន់សត្រូវរបស់ខ្លួន ដែលនឹងមានន័យថាសត្រូវទាំងនោះនឹងព្យាយាមគ្រប់គ្រងជើងមេឃរបស់អ៊ីរ៉ង់ ហើយនឹងធ្វើនៅក្នុងប្រទេសអ៊ីរ៉ង់ ជាអ្វីដែលពួកគេកំពុងធ្វើនៅក្នុងប្រទេសលីបង់ និងនៅតំបន់ហ្កាហ្សា។ អ៊ីរ៉ង់ ជឿជាក់ថា ខ្លួនមានអ្វីដែលត្រូវការដើម្បីការពារខ្លួន និងដើម្បីរក្សាសមភាពនៃការរារាំងឱ្យនៅរស់រវើក ហើយជាការពិត អាមេរិកនិងអ៊ីស្រាអែល កំពុងព្យាយាមកម្ទេចការរារាំងនេះ។ ប្រភពព័ត៌មាននិយាយថា យើងមិនដឹងថា តើការសងសឹកបានកើតឡើងរួចហើយទាក់ទងនឹងការបាញ់តគ្នាជាមួយអាមេរិកក្នុងរយៈពេលពីរបីម៉ោងចុងក្រោយនេះ ឬថាតើនឹងមានអ្វីត្រូវបានគ្រោងទុកនៅយប់នេះ ឬថ្ងៃស្អែក នោះទេ។

នៅមិនច្បាស់នោះទេថាតើអាមេរិក និងអ៊ីរ៉ង់ នឹងឈានទៅរកប្រតិបត្តិការយោធាសងសឹកគ្នា ឬយ៉ាងណា

ឧបទ្ទវហេតុបានកើតឡើងប្រហែល២៤ម៉ោងកន្លងទៅនេះ នៅជិតឆ្នេរសមុទ្រអូម៉ង់ក្នុងច្រកសមុទ្រ Hormuz ដែលឧទ្ធម្ភាគចក្រ Apache ត្រូវបានបាញ់ទម្លាក់។ យានដ្រូនមួយគ្រឿងត្រូវបានបញ្ជូន ហើយក្នុងរយៈពេលពីរម៉ោង អ្នកបើកយន្តហោះទាំងពីរនាក់ត្រូវបានជួយសង្គ្រោះដោយសុវត្ថិភាព ដោយពុំមានអ្នករងរបួសឡើយ។ លោក Donald Trump នៅក្នុងបទសម្ភាសន៍មួយបាននិយាយថា នេះពុំមែនជារឿងធំដុំទេ ប៉ុន្តែជាក់ស្តែង លោកបាននិយាយថា មានការឆ្លើយតបពីសហរដ្ឋអាមេរិកយ៉ាងខ្លាំងក្លា។ នោះត្រូវបានគាំទ្រដោយសមាជិកគណបក្សសាធារណរដ្ឋមួយចំនួននៅវិមាន Capitol Hill ដែលបាននិយាយថា សហរដ្ឋអាមេរិក មិនអាចបណ្តោយឲ្យរឿងកន្លងទៅដោយគ្មានទោសទណ្ឌនោះទេ វាត្រូវតែបានឆ្លើយតបយ៉ាងខ្លាំងក្លា។ ប្រហែលបីម៉ោងកន្លងទៅ មានការបញ្ជាក់ពីបញ្ជាការដ្ឋានកណ្តាលសហរដ្ឋអាមេរិក(CENTCOM) ថា ប្រតិបត្តិការកំពុងធ្វើឡើង។ វាត្រូវបានគេប្រាប់ថា គោលដៅគឺទីតាំងរ៉ាដា និងទីតាំងការពារមីស៊ីល។ ជាការពិត នេះធ្វើឱ្យមានមន្ទិលសង្ស័យចំពោះការលើកឡើងដដែលៗរបស់លោក Donald Trump ដែលថា ទីតាំងទាំងនោះត្រូវបានបំផ្លាញ និងរុះរើស្ទើរតែទាំងអស់។ លោក Donald Trump បានផ្តល់បទសម្ភាសន៍យ៉ាងហោចណាស់ម្តងចាប់តាំងពីប្រតិបត្តិការ បានកើតឡើង។ លោកបាននិយាយថា នេះជាការឆ្លើយតបដ៏រឹងមាំនិងមានឥទ្ធិពល ប៉ុន្តែលោកមិនបានមើលឃើញថានេះជាការធ្វើឲ្យប៉ះពាល់ដល់ការចរចាសន្តិភាពដែលកំពុងដំណើរការនោះទេ។ លោកគិតថាពួកគេនៅតែអាចបន្តការចរចា។

បណ្ដាញសង្គម

ព័ត៌មានថ្មីៗ

នាយនាវីកម្ពុជាមួយរូបទៀតបានបញ្ចប់វគ្គហ្វឹកហ្វឺននាយនាវីប្រយុទ្ធលើលម្ហសមុទ្រពីប្រទេសអូស្រ្តាលី

អ.ន.ក ចាប់ឆ្នោតប្រគល់ផ្ទះជូនអតីតយុទ្ធជនចំនួន៥១គ្រួសារនៅភូមិប៊ុនរ៉ានីសែនជ័យដំណាក់ទ្រយឹង

មេឃុំបឹងណាយ បន្តប្តេជ្ញាបំរើសេវាសាធារណៈ និងប្រើប្រាស់ថវិកាជាតិឱ្យតម្លាភាព

គ្រឿងញៀនជាង១០គីឡូ ត្រូវអាជ្ញាធរខេត្តកំពង់ចាមដុតកម្ទេចចោលក្នុងទិវាអន្តរជាតិប្រយុទ្ធប្រឆាំងគ្រឿងញៀន

ប្រមុខណាតូ នឹងជួបលោក Trump ដោយមានបំណងសម្រាលភាពតានតឹង មុនកិច្ចប្រជុំកំពូលខែកក្កដា

វេទិកា Davos រដូវក្តៅ បើកនៅចិន ខណៈនាយករដ្ឋមន្ត្រីលើកពីនវានុវត្តន៍ និងសហប្រតិបត្តិការអន្តរជាតិ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877