នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណៈកម្មាធិការសិទ្ធិមនុស្សកម្ពុជា ជួបជាមួយអ្នករាយការណ៍ពិសេស អ.ស.ប បន្ទុក​ស្ថានភាព​សិទ្ធិ​មនុស្ស​នៅកម្ពុជា
មន្ត្រីជំនាញចុះផ្សព្វផ្សាយពីសុវត្ថិភាពចរាចរណ៍ផ្លូវគោក ការពាក់មួកសុវត្ថិភាព និងការប្រើភ្លើងស្វ័យប្រវត្តិឲ្យបានត្រឹមត្រូវ
World Vision International ប្តេជ្ញាបន្តកិច្ច​សហប្រតិបត្តិការ​ជិតស្និទ្ធ​ជាមួយ​ក្រសួង​សុខាភិបាល​កម្ពុជា
កម្ពុជា ស្វាគមន៍យ៉ាងកក់ក្តៅបំផុតចំពោះប្រទេសឡាវចាត់បញ្ជូននាយទាហានប្តូរវេនចំនួនពីររូប មកចូលរួមជាមួយក្រុមអ្នកសង្កេតការណ៍អាស៊ាន (AOT) ប្រចាំកម្ពុជា

ព័ត៌មានជាតិ

គណៈកម្មាធិការសិទ្ធិមនុស្សកម្ពុជា ជួបជាមួយអ្នករាយការណ៍ពិសេស អ.ស.ប បន្ទុក​ស្ថានភាព​សិទ្ធិ​មនុស្ស​នៅកម្ពុជា

2026/07/23 11:43:19 pm        118
Facebook Telegram Linkin
ឯកឧត្តម កែវ សុទ្ធិ អនុប្រធានគណៈកម្មាធិការសិទ្ធិមនុស្សកម្ពុជា ទទួលជួបពិភាក្សា​ការងារ​ជា​មួយ​ លោក Thomas Andrews អ្នករាយការណ៍​ពិសេស​អង្គការ​សហ​ប្រជាជា​តិ​ទទួល​បន្ទុក​ស្ថាន​ភាព​សិទ្ធិ​មនុស្សនៅកម្ពុជា នាព្រឹកថ្ងៃទី២៣ ខែកកក្កដា ឆ្នាំ២០២៦ នៅទីស្ដីការគណៈរដ្ឋមន្រ្តី ព្រម​ទាំង​មានការអញ្ជើញចូលរួមពីតំណាងក្រសួងស្ថាប័នពាក់ព័ន្ធផងដែរ។អ្នករាយការណ៍​ពិសេសរបស់អង្គការសហប្រជាជាតិស្តីពីស្ថានភាពសិទិ្ធមនុស្សនៅប្រទេសកម្ពុជា លោក Thomas Andrews ធ្វើទស្សនកិច្ចជាផ្លូវការនៅកម្ពុជា ចាប់ពីថ្ងៃទី២០ ខែកក្កដា ដល់​ថ្ងៃ​ទី​៣១​ ខែកក្កដា ឆ្នាំ២០២៦។ក្នុងអំឡុងពេលទស្សនកិច្ចនេះ លោក Thomas Andrews នឹងវាយ​តម្លៃ​អំពី​ស្ថាន​ភា​ព​សិទ្ធិ​មនុស្ស ​នៅប្រទេសកម្ពុជា រួមទាំងបញ្ហាពាក់ព័ន្ធនឹងការជួញដូរមនុស្ស ជម្លោះព្រំដែន សេរី​ភាព​បញ្ចេញ​មតិ សេរីភាពបង្កើតសមាគម និងការជួបប្រជុំដោយសន្តិវិធី ព្រមទាំងសិទ្ធិ​របស់​ក្រុម​ជន​ដែល​សិ្ថត​នៅក្នុងស្ថានភាពងាយរងគ្រោះ៕

មន្ត្រីជំនាញចុះផ្សព្វផ្សាយពីសុវត្ថិភាពចរាចរណ៍ផ្លូវគោក ការពាក់មួកសុវត្ថិភាព និងការប្រើភ្លើងស្វ័យប្រវត្តិឲ្យបានត្រឹមត្រូវ

2026/07/23 11:32:14 pm        111
Facebook Telegram Linkin
កំពង់ស្ពឺ៖ មន្ត្រីជំនាញ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) ចុះធ្វើយុទ្ធនាការអប់រំផ្សព្វផ្សាយ អំពីសុវត្ថិភាពចរាចរណ៍ផ្លូវគោក តាមរយៈការពាក់មួកសុវត្ថិភាព និងការបើកភ្លើងស្វ័យប្រវត្តិពេលថ្ងៃ (AHO) នៅតាមបណ្តោយកំណាត់ផ្លូវជាតិលេខ៤ ស្ថិតក្នុងភូមិហ្លួង សង្កាត់ច្បារមន ក្រុងច្បារមន ខេត្តកំពង់ស្ពឺ ។ ក្នុងពិធីបើកយុទ្ធនាការ ធ្វើឡើងក្រោមកិច្ចសហការរវាង នៃគណៈកម្មាធិការជាតិសុវត្ថិភាពចរាចរណ៍ផ្លូវគោក និងក្រុមហ៊ុន អិន ស៊ី អិច ហុងដា សាខាខេត្តកំពង់ស្ពឺ នៅថ្ងៃទី២៣ ខែកក្កដា ឆ្នាំ២០២៦ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គ.ស.ច.គ មានប្រសាសន៍ថា យុទ្ធនាការអប់រំ ផ្សព្វផ្សាយស្តីពីសុវត្ថិភាពចរាចរណ៍ផ្លូវគោក ធ្វើឡើងមានគោលបំណង ដាស់តឿនស្មារតីអ្នកបើកបរម៉ូតូទាំងអស់ ឱ្យយកចិត្តទុកដាក់លើកត្តាសុវត្ថិភាពចម្បងចំនួន២ គឺការពាក់មួកឱ្យបានត្រឹមត្រូវ និងការយល់ដឹងពីប្រព័ន្ធបើកភ្លើងចង្កៀងមុខដោយស្វ័យប្រវត្តិ ឬហៅថាការប្រើភ្លើងពេលថ្ងៃ (AHO-Automatic Headlight On) ដែលអាចបង្កើនលទ្ធភាពមើលឃើញ រវាងអ្នកបើកបរ និងអ្នកប្រើប្រាស់ផ្លូវ ។ លោកជំទាវ បានបន្ថែមថា ធម្មតាម៉ូតូមានភ្លើងសម្រាប់ពេលថ្ងៃ ដែលភ្លើងនេះចាប់ផ្តើមភ្លឺពេលកាច់សោមុននឹងបញ្ឆេះ ដែលអាចធ្វើឱ្យអ្នកមកពីទិសផ្ទុយ ងាយមើលឃើញនៅតំបន់ចុះអ័ព្ទ ធ្លាក់ព្រិល ឬក្នុងរូងដី ហើយសមត្ថកិច្ចដែលមានភារកិច្ចអនុវត្តច្បាប់ចរាចរណ៍ នៅតាមដងផ្លូវ មិនពិន័យចំពោះការប្រើភ្លើងនេះទេ។ ផ្ទុយទៅវិញសូមលើកទឹកចិត្តឱ្យអ្នកបើកបរទាំង ឡាយអនុវត្តឱ្យបានខ្ជាប់ខ្ជួនទាំងអស់គ្នា ពិសេសគឺការគោរពច្បាប់ចរាចរណ៍ផ្លូវគោក ឱ្យបានម៉ឺងម៉ាត់ ដើម្បីជាការចូលរួមជាមួយរាជរដ្ឋាភិបាល ឱ្យសម្រេចផែនការជាតិទសវត្សសកម្មភាពសុវត្ថិភាពចរាចរណ៍ផ្លូវគោក ឆ្នាំ២០២១-ឆ្នាំ២០៣០ ធ្វើយ៉ាងណាកាត់បន្ថយករណីគ្រោះថ្នាក់ចរាចរណ៍ មកនៅកម្រិតអប្បបរមា ។លោកជំទាវ មឹន មាណវី បានគូសបញ្ជាក់ថា ការជិះម៉ូតូដោយបើកភ្លើងបំភ្លឺនៅពេលថ្ងៃ មិនមែនជាការខុសច្បាប់ចរាចរណ៍នោះឡើយ ហើយមន្ត្រីនគរបាលចរាចរមិនមានសិទ្ធិធ្វើការផាកពិន័យនោះទេ។ ផ្ទុយទៅវិញ យន្តការនេះ បានជួយបង្កើនសុវត្ថិភាពខ្ពស់ដល់អ្នកបើកបរទាំងឡាយលើដងផ្លូវ ព្រោះវាធ្វើឱ្យអ្នកបើកបរផ្សេងៗទៀត ដែលមានទិសស្រប ឬផ្ទុយអាចមើលឃើញម៉ូតូរបស់អ្នក បានច្បាស់នៅគ្រប់ស្ថានភាព ។ ក្នុងយុទ្ធនាការនោះ លោក សូ ឃុនវីរក្ស អភិបាលរងខេត្តកំពង់ស្ពឺ ក៏បានប្ដេជ្ញាចិត្តខ្ពស់ផងដែរ ក្នុងការចូលរួមកាត់បន្ថយអត្រាគ្រោះថ្នាក់ចរាចរណ៍ តាមរយៈការដាក់ចេញបទបញ្ជាយ៉ាងម៉ឺងម៉ាត់ ក៏ដូចជាការបន្តពង្រឹងការអនុវត្តច្បាប់ ការចាត់វិធានការទប់ស្កាត់យានយន្តកែច្នៃខុសលក្ខណៈបច្ចេកទេស ការអប់រំផ្សព្វផ្សាយដល់ប្រជាពលរដ្ឋ និងការដំឡើងភ្លើងសញ្ញា ឬស្លាកសញ្ញាចរាចរណ៍បន្ថែម នៅតាមតំបន់ដែលមានហានិភ័យខ្ពស់ ៕ អត្ថបទ បាន សុខរិទ្ធិ

World Vision International ប្តេជ្ញាបន្តកិច្ច​សហប្រតិបត្តិការ​ជិតស្និទ្ធ​ជាមួយ​ក្រសួង​សុខាភិបាល​កម្ពុជា

2026/07/23 11:24:53 pm        110
Facebook Telegram Linkin
រសៀលថ្ងៃទី២២ ខែកក្កដា ឆ្នាំ២០២៦ នាទីស្តីការក្រសួងសុខាភិបាល ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអនុញ្ញាត​ឱ្យ​គណៈប្រតិភូ​អង្គការ​ទស្សនៈ​ពិភព​លោក​អន្តរ​ជាតិ​ប្រចាំ​កម្ពុជា ​(World Vision International) ដឹកនាំដោយ លោកស្រីបណ្ឌិត Than Thi Ha នាយិកាស្តីទីប្រចាំប្រទេស ចូលជួបសម្តែងការគួរសម និងពិភាក្សាការងារ ដើម្បី​បន្ត​ពង្រីក​កិច្ច​សហប្រតិបត្តិការដ៏យូរអង្វែង រាយការណ៍អំពីវឌ្ឍនភាពនៃការអនុវត្តការងារ និង​ស្វែង​រក​អនុសាសន៍ណែនាំដ៏ខ្ពង់ខ្ពស់ពី ឯកឧត្តមសាស្ត្រាចារ្យរដ្ឋមន្ត្រី ដើម្បីតម្រង់​ទិស​ក្នុង​ការ​រៀប​ចំ​ផែន​ការ​យុទ្ធសាស្ត្ររបស់អង្គការ ឆ្នាំ២០២៨-២០៣២ ឱ្យឆ្លើយតបតាម​អាទិភាព​សុខាភិបាល​ជាតិ​។ ក្នុងឱកាសនោះ ឯកឧត្តមសាស្ត្រាចារ្យរដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅ និង​វាយ​តម្លៃ​ខ្ពស់​ចំពោះកិច្ចសហប្រតិបត្តិការជាង ៥៦ឆ្នាំ រវាងរាជរដ្ឋាភិបាលកម្ពុជា និងអង្គការ ក្នុង​ការ​ចូល​រួម​អភិវឌ្ឍប្រព័ន្ធ សុខាភិបាលជាតិ ជាពិសេសលើសុខភាពមាតា-កុមារ និងអាហារូបត្ថម្ភ។ លោក​ស្រីបណ្ឌិត Than Thi Ha បានថ្លែងអំណរគុណយ៉ាងជ្រាលជ្រៅ និងបាន​រាយការណ៍​ជូន​អំពី​សមិទ្ធ​ផលនៃការអនុវត្តយុទ្ធសាស្ត្រជាតិ ឆ្នាំ២០២៣-២០២៧ ដែលបានគ្របដណ្តប់លើ ២០ រាជធានី-ខេត្ត (៨៤% នៃផ្ទៃប្រទេស) ជាមួយថវិកាវិនិយោគជាង ១៣ លានដុល្លារអាមេរិក។ លោកស្រីបណ្ឌិត បានបញ្ជាក់​ពី​ការ​ប្តេជ្ញា​ចិត្ត​យ៉ាង​មុត​មាំ​ក្នុង​ការ​បន្ត​កិច្ច​សហប្រតិបត្តិ​ការ​ជិត​ស្និទ្ធ​ជា​មួយ​ក្រសួងសុខាភិបាល ដើម្បីលើកកម្ពស់សុខុមាលភាពមាតា ទារក និងកុមារនៅកម្ពុជា។ ឯកឧត្តមសាស្ត្រាចារ្យរដ្ឋមន្ត្រី បានផ្តល់អនុសាសន៍ណែនាំគន្លឹះចំនួន ៥ ចំណុច ដើម្បី​តម្រង់​ទិស​ការងារ៖ ១. ប្រែក្លាយគំរូសហគមន៍ជោគជ័យ ឱ្យទៅជាគំរូ​ស្តង់​ដារ​សម្រាប់​អនុវត្ត​នៅ​ទូទាំង​ប្រទេស​។ ២. ពង្រឹងសមត្ថភាពមន្ត្រីសុខាភិបាល ឆ្មប និងក្រុមទ្រទ្រង់សុខភាពភូមិ (VHSG)។ ៣. ពង្រីកគំរូសេវាសុខភាពដែលមានភាពធន់ និងនិរន្តរភាព។ ៤. ធ្វើបរិយាបន្ន​ទិន្នន័យ​តាម​ដាន​អាហា​រូបត្ថម្ភ ទៅក្នុងប្រព័ន្ធទិន្នន័យឌីជីថលសុខាភិបាលជាតិ។ ៥. រៀបចំផែនកា​រ​យុទ្ធ​សាស្ត្រ​អង្គ​ការ ​ឆ្នាំ២០២៨-២០៣២ ដោយពិគ្រោះយោបល់ និងសហការ​យ៉ាង​ជិត​ស្និទ្ធ​ជាមួ​យ​ក្រសួង​សុខាភិបាល​៕

កម្ពុជា ស្វាគមន៍យ៉ាងកក់ក្តៅបំផុតចំពោះប្រទេសឡាវចាត់បញ្ជូននាយទាហានប្តូរវេនចំនួនពីររូប មកចូលរួមជាមួយក្រុមអ្នកសង្កេតការណ៍អាស៊ាន (AOT) ប្រចាំកម្ពុជា

2026/07/23 11:09:44 pm        114
Facebook Telegram Linkin
ភ្នំពេញ៖ នៅថ្ងៃទី២៣ ខែកក្កដា ឆ្នាំ២០២៦ វេលាម៉ោង ១៣:០០នាទីរសៀល នាយទាហាន នៃនាយកដ្ឋានទាក់ទងអន្តរជាតិ នៃក្រសួងការពារជាតិ និងក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា បានស្វាគមន៍យ៉ាងកក់ក្តៅបំផុតចំពោះសាធារណរដ្ឋប្រជាធិបតេយ្យប្រជាមានិតឡាវ ដែលបានចាត់បញ្ជូននាយទាហានប្តូរវេនចំនួនពីររូបគឺ វរសេនីយ៍ទោ KHAMPHET FONGLAMAY និងវរសេនីយ៍ទោ SINGSAVAN VONGSOUVANH ចូលរួមជាមួយក្រុមអ្នកសង្កេតការណ៍អាស៊ាន (AOT) ប្រចាំព្រះរាជាណាចក្រកម្ពុជា ដែលដឹកនាំដោយប្រទេសហ្វីលីពីន ជាប្រធានប្តូរវេនអាស៊ាន ក្នុងការចុះសង្កេតការណ៍ និងផ្ទៀងផ្ទាត់ស្ថានភាពព្រំដែនកម្ពុជា-ថៃ ក្រោយបទឈប់បាញ់ចូលជាធរមាន។ នេះបើតាមសេចក្តីប្រកាសព័ត៌មាន អ្នកនាំពាក្យក្រសួងការពារជាតិកម្ពុជា។អ្នកនាំពាក្យក្រសួងការពារជាតិកម្ពុជា បានបញ្ជាក់ថា កម្ពុជាតែងតែផ្តល់ការគាំទ្រយ៉ាងពេញទំហឹង និងពង្រឹងតួនាទីដល់ក្រុមអ្នកសង្កេតការណ៍អាស៊ាន (AOT) ក្នុងការធានាការអនុវត្តបទឈប់បាញ់រវាងកម្ពុជានិងថៃ ដើម្បីលើកកម្ពស់តម្លាភាព ការជឿទុកចិត្តគ្នា និងការពារអាយុជីវិតប្រជាពលរដ្ឋ។ ព្រមជាមួយគ្នានេះ កម្ពុជាស្វាគមន៍ជានិច្ចចំពោះបណ្តាប្រទេសជាមិត្តក្នុងការបញ្ជូនអ្នកសង្កេតការណ៍ ឬចូលរួមជួយលើកិច្ចការសន្តិភាព។អ្នកនាំពាក្យក្រសួងការពារជាតិកម្ពុជាលើកឡើងថា រាជរដ្ឋាភិបាល និងក្រសួងការពារជាតិកម្ពុជា នៅតែបន្តការប្តេជ្ញាចិត្តយ៉ាងម៉ឺងម៉ាត់ ស្មោះត្រង់ ប្រកបដោយការទទួលខុសត្រូវខ្ពស់ក្នុងការគោរព និងអនុវត្តយ៉ាងពេញលេញ និងខ្ជាប់ខ្ជួនបំផុតនូវសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងទៀត ដើម្បីឆ្ពោះទៅការធ្វើឱ្យប្រសើរឡើងវិញឆាប់រហ័ស និងការវិលត្រឡប់ទៅរកប្រក្រតីភាព សន្តិភាព ស្ថិរភាព យូរអង្វែង៕

ធុរកិច្ចអាមេរិក-អាស៊ាន សន្យានាំព័ត៌មាន​អំពី​បរិយាកាស​ធុរកិច្ច​នៅ​កម្ពុជា​ផ្សព្វ​ផ្សាយ​បន្ត​នៅ​អាមេរិក

2026/07/23 10:33:13 pm        179
Facebook Telegram Linkin
ប្រធានក្រុមប្រឹក្សាធុរកិច្ចអាមេរិក-អាស៊ាន សន្យាពាំនាំនូវព័ត៌មាន និង​ការ​មើល​ឃើញ​ដោយ​ផ្ទាល់​អំពី​ស្ថាន​ភាព​សេដ្ឋកិច្ច ជាពិសេសអំពីបរិយាកាសធុរកិច្ចនៅកម្ពុជា ជួយបន្តផ្សព្វ​ផ្សាយ​នៅ​សហ​រដ្ឋ​អាមេរិក ដើម្បីឆ្លុះបញ្ចាំងពីការវិវឌ្ឍជាវិជ្ជមាន និងជវភាព ជាក់ស្ដែងនៅកម្ពុជា សំដៅ​ទាក់​ទាញ​វិនិយោគ និងធុរកិច្ចពីសហរដ្ឋអាមេរិក​មកកម្ពុជា។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង​ហិរញ្ញ​វត្ថុ នៅក្នុងជំនួប សម្ដែងការគួរសម និងពិភាក្សាការងារជាមួយ ឯកអគ្គរដ្ឋទូត Brian D. McFeeters ប្រធាននិងជានាយកប្រតិបត្តិ នៃក្រុមប្រឹក្សាធុរកិច្ច សហរដ្ឋអាមេរិក-អាស៊ាន (US-ABC) នៅថ្ងៃទី២២ ខែកក្កដា ឆ្នាំ២០២៦ ឯកឧត្តមអគ្គបណ្ឌិតសភាចារ្យ បានថ្លែងអំណរគុណ និង​វាយតម្លៃខ្ពស់ ចំពោះកិច្ចសហប្រតិបត្តិការរវាងកម្ពុជា និងសហរដ្ឋ​អាមេរិក​ក្នុង​ការ​បន្ត​ពង្រឹង​ទំនាក់​ទំនងពាណិជ្ជកម្ម និងការបន្ត វិនិយោគរបស់ក្រុមហ៊ុនពហុជាតិអាមេរិកជាច្រើននៅកម្ពុជា ។ ជាក់ស្ដែងក្នុងឆ្នាំ២០២៥នេះ, ទំហំពាណិជ្ជកម្មសរុបរវាងកម្ពុជា និង សហរដ្ឋអាមេរិក សម្រេច​បាន​​ប្រមាណ ១៣ ប៊ីលានដុល្លារអាមេរិក ខណៈទុន​វិនិយោគ​ពី​សហរដ្ឋ​អាមេរិក​បាន​កើន​ដល់​ប្រមាណ ១ ប៊ីលានដុល្លារអាមេរិក ដែលឆ្លុះបញ្ចាំពីភាពរឹងមាំ នៃចំណងមិត្តភាពសេដ្ឋកិច្ច ពាណិ​ជ្ជ​កម្ម រួមចំណែកក្នុងកិច្ចគ្រប់គ្រងស្ថិរភាពម៉ាក្រូ សេដ្ឋកិច្ច និងការ​រក្សា​បាន​នូវ​ចីរភាព​ហិរញ្ញ​វត្ថុ​សាធារណៈ​របស់កម្ពុជាសម្រាប់រយៈពេលមធ្យមទៅវែង ។ ឯកឧត្តមអគ្គបណ្ឌិតសភាចារ្យ ក៏បានកត់សម្គាល់ពីការបើកទ្វារស្វាគមន៍ រាល់កាលានុវត្ត​វិនិយោគ​ដែល​ជា​ការ​វិនិយោគមាន តម្លៃបន្ថែមខ្ពស់ ជាពិសេសចំពោះវិស័យអាទិភាព និងមាន​សក្ដា​នុពល​ខ្ពស់​រួម​មាន វិស័យកសិ-ឧស្សាហកម្ម, ថាមពលស្អាត, ឌីជីថល, ឡូជីស្ទីក, សុខាភិបាល, អប់រំ និង​បច្ចេកវិទ្យាទំនើប ជាដើម ។ ឯកអគ្គរដ្ឋទូត ក៏បានកោតសរសើរ និងវាយតម្លៃខ្ពស់ចំពោះកិច្ចខិតខំរបស់រាជរដ្ឋាភិបាលកម្ពុជា ក្នុង​ការបន្តដោះស្រាយរាល់ បញ្ហាប្រឈម ពាក់ព័ន្ធនានាកន្លងមក ដោយធ្វើ​ការ​កត់​សម្គាល់​អំពី​ការ​រីក​ចម្រើនខ្លាំងគួរឱ្យកត់សម្គាល់នៃបរិយាកាសវិនិយោគ និង ធុរកិច្ច នៅកម្ពុជា​ក្នុង​រយៈ​ពេល​២​ឆ្នាំ ​នៃការបំពេញការងាររបស់លោក, បើទោះបីកម្ពុជាបន្តទទួលរងនូវបញ្ហាប្រឈមជាបន្តបន្ទាប់ យ៉ាង​នេះ​ក្តី។ ឯកអគ្គរដ្ឋទូត ក៏បានស្នើឱ្យក្រុមហ៊ុនដែលកំពុងមានប្រតិបត្តិការនៅកម្ពុជាទាំងអស់ លើក​ឡើងអំពីបញ្ហាប្រឈមថ្មី ដែល កំពុងជួបប្រទះ និងស្នើ​ឱ្យ​ក្រុម​ហ៊ុន​ដែល​កំពុង​ស្វែង​រក​ឱកាស​វិនិយោគសាកសួរអំពីសក្កានុពលវិនិយោគនៅកម្ពុជាផងដែរ។ ឯកឧត្តម​អគ្គបណ្ឌិតសភាចារ្យ ក៏បានឆ្លើយតបទៅនឹងការស្នើសុំជាក់លាក់ និងបញ្ហាប្រឈមនានា ដែល​លើកឡើងដោយ តំណាងក្រុមហ៊ុនទាំង១៣ ក៏ដូចជាបាន​ជម្រាប​ពី​ដំណើរ​ការ​កែ​ទម្រង់​ជា​រចនា​សម្ព័ន្ធ​សំខាន់ៗរបស់រាជរដ្ឋាភិបាលកម្ពុជា សំដៅកាត់ បន្ថយនីតិវិធីរដ្ឋបាលដែលស្មុគស្មាញ ដើម្បី​បង្កភាពងាយស្រួលដល់ការធ្វើធុរកិច្ច, ជំរុញការធ្វើឌីជីថលូបនីយកម្មសេវាសាធារណៈ, ពង្រឹង​អនុលោមភាព ដើម្បីធានានូវការប្រកួតប្រជែងដោយយុត្តិធម៌និងស្មើភាព និងជា​ពិសេស​ជំរុញ​ការ​ចូលរួមសហការជាមួយ រាជរដ្ឋាភិបាលតាមរយៈយន្តការ «ក្រុម “ឃ” ផ្នែកនីតិកម្ម ពន្ធដារ និងអភិបាលកិច្ច» នៃវេទិការាជរដ្ឋាភិបាល-ផ្នែកឯកជន សំដៅដោះ ស្រាយ​នូវ​បញ្ហា​ប្រឈម​ពាក់​ព័ន្ធប្រកបដោយប្រសិទ្ធភាពភាពទាន់ពេល និងភាពព្យាករ​បាន​នៃកា​រ​ប្រែ​ប្រួល​គោល​នយោបាយ​នានា។ ក្រោយកិច្ចពិភាក្សា, ឯកអគ្គរដ្ឋទូត សន្យាពាំនាំនូវព័ត៌មាន និងការមើលឃើញ​ដោយ​ផ្ទាល់​អំពី​ស្ថានភាព​សេដ្ឋកិច្ចជាពិសេស អំពីបរិយាកាសធុរកិច្ចនៅកម្ពុជា ទៅបន្តផ្សព្វផ្សាយ​នៅ​ទីក្រុង​វ៉ាស៊ីន​តោន​សហរដ្ឋអាមេរិក ដើម្បីឆ្លុះបញ្ចាំងពីការវិវឌ្ឍជាវិជ្ជមាន និង ជវភាពជាក់ស្ដែងនៅកម្ពុជា សំដៅ​ទាក់ទាញវិនិយោគ និងធុរកិច្ចពីសហរដ្ឋអាមេរិក​ ព្រមទាំងរឹតចំណងមិត្តភាពសេដ្ឋកិច្ច និង ពាណិជ្ជកម្មរវាងប្រទេសទាំងពីរឱ្យកាន់តែជិតស្និទ្ធបន្ថែមទៀត៕ អត្ថបទ៖ សុន រ៉ាឌី

គោលនយោបាយទាក់ទាញវិនិយោគរបស់រាជរដ្ឋាភិបាលកំពុងបន្តស្រូបយកវិនិយោគបរទេសចូលកម្ពុជា​

2026/07/23 10:06:29 pm        127
Facebook Telegram Linkin
គោលនយោបាយទាក់ទាញវិនិយោគរបស់រាជរដ្ឋាភិបាល បានផ្តោតលើការកែទម្រង់មុតស្រួច និង​មាន​លក្ខណៈ​បើ​កចំហ តម្លាភាព និងការប្រកួតប្រជែង ការលើកទឹកចិត្តលើវិស័យអាទិភាព ជា​ពិសេស​លើក​កម្ពស់​ដល់វិស័យឯកជនលើការធ្វើធុរកិច្ចផ្សេងនៅកម្ពុជា។ ជុំវិញបរិយាកាសវិនិយោគ, នៅប៉ុន្មានឆ្នាំចុងក្រោយនេះ កម្ពុជា​បាន​បន្ត​ទាក់​ទាញ​រំហូរ​ទុន​វិនិយោគ​ផ្ទាល់ (FDI) បានយ៉ាងសន្ធឹកសន្ធាប់ពីបណ្តាប្រទេសនានា ដោយគ្រប​ដណ្តប់​លើ​គម្រោង​រាប់​រយ និងមានទំហំទឹកប្រាក់រាប់ពាន់លានដុល្លារអាមេរិក។ ការបណ្តាក់ទុន​ទាំង​នេះ​បាន​ផ្តោត​សំខាន់​លើវិស័យសក្តានុពលដូចជា ផលិតកម្ម ឧស្សាហកម្មធុនធ្ងន់ និងការអភិវឌ្ឍ​ហេដ្ឋា​រចនា​សម្ព័ន្ធ​ជា​ដើម​។ ឯកឧត្តម ផែ ច័ន្ទត្រាវុឌ្ឍ អគ្គនាយកឧស្សាហកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ លើកឡើងថា ទាក់ទិនការវិយោគនេះ នៅក្នុងឆ្នាំ២០២៥ កន្លងមក កម្ពុជា​បាន​ស្រូប​យក​គម្រោង​វិនិយោគជិត ៧០០ គម្រោង មានទំហំទុនវិនិយោគ​រាប់​ពាន់​លាន​ដុល្លារ​អាមេរិក​, ​កំណើនល្អប្រសើរនេះ ស្របពេលសហរដ្ឋ​អាមេរិក​បាន​ដាក់​ពន្ធគយ​បដិការ​ទៅ​លើ​ប្រទេស​ផ្សេង​ៗ ​ធ្វើឱ្យវិនិយោគិនមួយចំនួនបានបង្វែរទិសដៅមកកម្ពុជា បង្កើត​រោង​ចក្រ​សហ​គ្រាស​ផលិត​សម្រាប់​បម្រើ​ទីផ្សារនាំចេញ ស្របតាមការកែទម្រង់មុតស្រួចរបស់រាជរដ្ឋាភិបាល ដែល​បាន​ផ្តល់​ការ​លើក​ទឹកចិត្ត រួមទាំងការលើកលែងពន្ធលើប្រាក់ចំណូល និងការលើកលែងពន្ធគយនាំចូល ច្បាប់​ស្តីពីវិនិយោគថ្មីជាដើម រោមជាមួយការយកចិត្តទុកដាក់ការរបស់ក្រសួងឧស្សាហកម្ម វិទ្យា​សាស្ត្រ​ បច្ចេកវិទ្យា និងនវានុវត្តន៍ ដែលជាសេនាធិការរបស់រាជរដ្ឋាភិបាល ដែលបានកំពុងគាំទ្រ បង្កើត​បរិយាកាសវិនិយោគនៅកម្ពុជា។ សូមបញ្ជាក់ថា គោលនយោបាយទាក់ទាញវិនិយោគរបស់រាជរដ្ឋាភិបាលកម្ពុជា បានផ្តោត​លើ​ការ​កែ​ទម្រង់​មុតស្រួច ដើម្បីធានានូវភាពបើកចំហ តម្លាភាព និងការប្រកួតប្រជែង ក្នុងនោះ​តាមរយៈ​ច្បាប់​ស្តីពី​វិនិយោគថ្មី រដ្ឋាភិបាលផ្តល់ការលើកទឹកចិត្ត រួមទាំងការលើក លែងពន្ធលើប្រាក់ចំណូល និង​ការលើកលែងពន្ធគយនាំចូល សម្រាប់គម្រោងវិនិយោគលើវិស័យអាទិភាព។ យុទ្ធសាស្ត្រ​ស្នូល និងការ លើកទឹកចិត្តរបស់រាជរដ្ឋាភិបាលលើកត្តាសំខាន់ៗរួមមាន៖ ការ​លើក​ទឹក​ចិត្ត​លើ​វិស័យ​អាទិភាព​: ផ្តោតខ្លាំងលើឧស្សាហកម្មបច្ចេក វទ្យា ខ្ពស់ ឧស្សាហកម្មបង្កើតតម្លៃបន្ថែម កសិកម្ម កសិ-ឧស្សាហកម្ម ហេដ្ឋារចនាសម្ព័ន្ធ បៃតង និងការច្នៃប្រឌិត។ កិច្ចការពារវិនិយោគិន: ការ​ធានាការពារមិនឱ្យមានការធ្វើជាតូបនីយកម្ម ការរើសអើង និងការ​អនុញ្ញាត​ឱ្យ​វិនិយោគិន​អាច​ទូទាត់ ​និងបញ្ជូនប្រាក់ចំណូលជា រូបិយប័ណ្ណបរទេសទៅក្រៅប្រទេសវិញដោយសេរី។ ភាព​ងាយ​ស្រួល​នៃ​ការ​ធ្វើធុរកិច្ច: ការរៀបចំប្រព័ន្ធច្រកចេញចូលតែមួយ និងកិច្ច សម្រួលនីតិវិធីផ្សេងៗ តាម​រយៈ​វេទិកា​រាជរដ្ឋាភិបាល-វិស័យឯកជន ដើម្បីដោះស្រាយរាល់ការលំបាកជូនវិនិយោគិន។ កិច្ច​ព្រម​ព្រៀង ​ពាណិជ្ជកម្មសេរី: កម្ពុជាមានកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី (ដូចជា RCEP, CCFTA) ដែលជួយពង្រីកទីផ្សារ នាំចេញទំនិញ​របស់​​អ្នក​វិនិយោគ​ទៅ​កាន់​ពិភព​លោក​។ ការលើកកម្ពស់វិស័យឯកជន (IDP): តាមរយៈគោលនយោបាយអភិវឌ្ឍន៍ វិស័យ​ឧស្សាហ​កម្ម កម្ពុជាកំពុងពង្រឹងការតភ្ជាប់ខ្សែច្រវាក់ផ្គត់ផ្គង់ និងលើកកម្ពស់សហគ្រាសធុនតូច និង​មធ្យម (SMEs) ឱ្យក្លាយ ជាដៃគូរបស់ក្រុមហ៊ុនធំៗជាដើម៕ អត្ថបទ៖ សុន រ៉ាឌី

សមាគមអតីតយុទ្ធជន និងនិវត្តជនកម្ពុជា ចុះអនុស្សរណៈយោគយល់​ជាមួយ​សមាគម​អតីត​យុទ្ធ​ជន​ខេត្ត​ហ្គ័ងស៊ី នៃសាធារណរដ្ឋប្រជាមានិតចិន

2026/07/23 09:48:12 pm        138
Facebook Telegram Linkin
ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការ សមាគម​អតីត​យុទ្ធជន និងនិវត្តជនកម្ពុជា តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា និងជាប្រធានសមាគម អញ្ជើញ​ចុះហត្ថ​លេខា​លើ​អនុស្ស​រណៈ​យោគយល់​គ្នា​រវាង​សមាគម​អតីតយុទ្ធជន និងនិវត្តជនកម្ពុជា និងសមាគមអតីតយុទ្ធជនខេត្តហ្គ័ងស៊ី នៃ​សាធារណ​រដ្ឋ​ប្រជាមានិតចិន ក្នុងគោលបំណងរឹតចំណងនៃកិច្ចសហការធុរកិច្ចជាមួយគ្នា បន្ត​ជួយ​គាំ​ទ្រគ្នា​ក្នុងស្មារតីជាភាតរភាព និងដើម្បលើកកម្ពស់វិស័យអតីតយុទ្ធជននៃប្រទេសទាំងពីរ។ ពិធីចុះអនុស្សរណៈនៃការយោគយល់គ្នានេះ ធ្វើឡើងនាព្រឹកថ្ងៃ២៣ ខែកក្កដា ឆ្នាំ២០២៦ នៅ​សណ្ឋាគារ Fairfield by Marriott រាជធានីភ្នំពេញ៕

សមត្ថកិច្ចជំនាញ កម្ទេចចោលមីន១គ្រាប់នៅចំណុចទឹកជ្រោះដំណាក់ក្បូន ស្រុកមណ្ឌលសីមា ខេត្តកោះកុង

2026/07/23 08:50:59 pm        102
Facebook Telegram Linkin
កោះកុង៖ មន្រ្តីនគរបាលស្រុកមណ្ឌលសីមា មន្រ្តីបរិស្ថាន និងបុគ្គលិកអង្គការហេឡូត្រាស់ បាន​បំផ្ទុះ​កម្ទេច​មីន១គ្រាប់នៅចំណុចទឹកជ្រោះដំណាក់ក្បូន ឃុំប៉ាក់ខ្លង ក្រោយហ៊ុំព័ន្ធ​ជា​សញ្ញា​ប្រុង​ប្រយ័ត្ន​កន្លង​ទៅ។ លោកវរៈសេនីយ៍ទោ ស្រីន សុខលីន អធិការនគរបាលស្រុកមណ្ឌលសីមា បានឱ្យដឹង​នៅ​ថ្ងៃ​ទី​២៣ ​ខែកក្កដា ឆ្នាំ២០២៦នេះថា វេលាម៉ោង១០និង៤០នាទីព្រឹកនេះ ក្រុម​បុគ្គលិក​អង្គការ​ហេឡូ​ត្រាស់​ សហការជាមួយកម្លាំងនគរបាលស្រុក ព្រមទាំងមន្រ្តីបរិស្ថាន បានបោស​សម្អាត​គ្រាប់​មីន​១​គ្រាប់​ដែល​នៅ​គាប​ថ្មីជាប់នឹងគល់ឈើមួយក្បែរមាត់ទឹកជ្រោះដំណាក់ក្បូន ស្ថិតនៅភូមិកោះប៉ោ។លោកអធិការនគរបាលស្រុកមណ្ឌលសីមា ថ្លែងទៀតថា សកម្មភាព​នៃ​ការ​បំផ្ទុះ​គ្រាប់​មីន​នេះ​មិន​បង្ក​ការ​ភ័យខ្លាចដល់ប្រជាពលរដ្ឋ ឬអ្នកទេសចរណាម្នាក់ឡើយ ដោយមានការ​រៀបចំ​សុវត្ថិភាព​តាម​គោល​ដៅនី​មួយៗក្នុងតំបន់នោះមិនមានការឆ្លងកាត់ អំឡុងធ្វើសកម្មភាពបោសសម្អាត។លោក សុខ សុជា ប្រធានក្រុមកម្ទេចគ្រាប់ និងស្រាវជ្រាវនៃអង្គការហេឡូត្រាស់ ឱ្យដឹងដែរថា គ្រាប់​មីន​ដែលកម្ទេចនេះ ជាប្រភេទសម័យសង្រ្គាមរបបខ្មែរក្រហម គ្រាក្រុមទាហាន​ខ្មែរ​ក្រហម​សម្រាក​បាត់​ការ​ហត់​នឿយ​ដោយ​មិន​ទ្រ​នឹង​ទម្ងង់​បាន​ច្រើន​ក៏​រំលែក​ទម្លាក់​ទុក​១​គ្រាប់​ចោល​ក្បែរ​គល់​ដើម​ឈើ ​ដើម្បីបន្តដំណើរទៅមុខទៀត។ មីននេះប្រភេទPNN2 ផលិតនៅប្រទេសសូវៀត។ កម្លាំងផ្ទុះរបស់មិនធ្ងន់ធ្ងរប៉ុន្មានដែរទេ ចម្ងាយគេច១០០ម៉ែត្រ៤ជ្រុង។ ជាក់ស្តែង ទោះបី​ជា​ឃើញ​វា​មាន​សភាព​ថ្មី​ក៏​ពិត​​មែនប៉ុន្តែជាកាវពណ៌ខៀវដែលមិនចេះចាស់ឡើយ។លោក សុខ សុជា ក៏អំពាវនាវដល់ប្រជាពលរដ្ឋ ករណីប្រទះឃើញគ្រាប់មីន ឬ​គ្រាប់​មិន​ទាន់​ផ្ទុះ​នៅ​កន្លែង​ណា សុំកុំទៅប៉ះពាល់វា ដោយរាយការណ៍មកកាន់អាជ្ញាធរសមត្ថកិច្ចមូលដ្ឋាន ដើម្បី​រង់​ចាំ​មន្រ្តី​ជំនាញចុះពិនិត្យបន្ថែម និងកម្ទេចតាម​លក្ខណ​បច្ចេកទេស។ បន្ទាប់​ពី​ប្រជា​ពលរដ្ឋ​រាយ​ការណ៍​មន្ត្រី​បរិស្ថាន និងនគរបាលស្រុកមណ្ឌលសីមា កាលពីថ្ងៃទី១៨ ខែកក្កដា កន្លងទៅ ចុះ​ទៅ​ហ៊ុំ​ព័ទ្ធ​ទីតាំង​ដែល​ប្រទះ​ឃើញ​គ្រាប់​មីន​មិន​ទាន់​ផ្ទុះក្បែ​រ​មាត់​ទឹក​គៀប​ក្រោម​ដើម​ឈើ​នៅ​ចំណុច​ទឹក​ជ្រោះ​ដំណាក់ក្បូន ភូមិកោះប៉ោ ឃុំប៉ាក់ខ្លង ស្រុកមណ្ឌលសីមា ដើម្បីជាសញ្ញាបង្ហាញ​ដល់​ពលរដ្ឋ និងអ្នកទេសចរ ប្រុងប្រយ័ត្នមិនត្រូវទៅប៉ះពាល់ទីតាំងនោះ៕ អត្តបទ៖ ឈឹម មករា

សមត្ថកិច្ចភ្នំពេញ បង្ក្រាបទីតាំងលួចលាក់ប្រព្រឹត្តបទល្មើសឆបោកតាមប្រព័ន្ធអនឡាញ ក្រោមរូបភាពវិនិយោគ ឃាត់ខ្លួនជនបរទេស២៥នាក់

2026/07/23 08:34:27 pm        214
Facebook Telegram Linkin
ភ្នំពេញ៖ គណ:បញ្ជាការឯកភាពរាជធានីភ្នំពេញបានចុះត្រួតពិនិត្យ និងឆែកឆេរទីតាំងផ្ទះមួយកន្លែង នៅក្នុងមូលដ្ឋានខណ្ឌទួលគោក បានរកឃើញពាក់ព័ន្ធលួចលាក់ប្រព្រឹត្តបទល្មើសឆបោកតាមប្រព័ន្ធអនឡាញ ក្រោមរូបភាពវិនិយោគ (Investment Scams) ដោយបានឃាត់ខ្លួនជនសង្ស័យ២៥នាក់ព្រមទាំងដកហូតបានវត្ថុតាងសម្រាប់ប្រព្រឹត្តបទល្មើសមួយចំនួន។លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញបានឱ្យដឹងថា នៅរាត្រីថ្ងៃទី២២ ខែកក្កដា ឆ្នាំ២០២៦ វេលាម៉ោង១៩និង២០នាទី គណ:បញ្ជាការឯកភាពរាជធានីភ្នំពេញ ក្រោមការបញ្ជា និងដឹកនាំផ្ទាល់ដោយឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ លោក ហ៊ុន សុរិទ្ធី និងលោក សុខ ពេញវុធ អភិបាលររាជធានី ដោយមានកិច្ចសម្របសម្រួលពីលោក តូច ឧត្តម ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានដឹកនាំកម្លាំងចម្រុះចុះត្រួតពិនិត្យ និងឆែកឆេរទីតាំងផ្ទះលេខ០០៦ ផ្លូវលេខ៥៦៨ ភូមិ៤ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។ ជាលទ្ធផលក្នុងប្រតិបត្តិការនេះ កម្លាំងសមត្ថកិច្ចចម្រុះបានត្រួតពិនិត្យរកឃើញមានលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ដោយបានឃាត់ខ្លួនជនសង្ស័យសរុបចំនួន២៥នាក់ មានស្រី៤នាក់ មាន២សញ្ជាតិ ក្នុងនោះជនជាតិចិនចំនួន ២១នាក់ ដោយរកឃើញគ្មានលិខិតឆ្លងដែន ១៧នាក់ ប្រើប្រាស់លិខិតឆ្លងដែនក្លែងក្លាយចំនួន ២នាក់ និងជនជាតិមីយ៉ាន់ម៉ា ៤នាក់ ព្រមទាំងបានរឹបអូសសម្ភារៈជាវត្ថុតាងសម្រាប់ប្រព្រឹត្តបទល្មើសមួយចំនួន រួមមាន កុំព្យូទ័រយួរដៃចំនួន ១៣គ្រឿង កុំព្យូទ័រ All In One ចំនួន ១៦គ្រឿង ទូរស័ព្ទចំនួន៧គ្រឿង ដុំ Wi-Fi ចំនួន៥គ្រឿង ម៉ូនីទ័រ ចំនួន ១គ្រឿង លិខិតឆ្លងដែនចំនួន ៦ច្បាប់ និងលិខិតឆ្លងដែនក្លែងក្លាយចំនួន ៣ច្បាប់។លោកស្រី ដោ សម្ផស្ស បានបញ្ជាក់ថា យោងតាមការធ្វើកោសល្យវិច្ឆ័យរបស់ការិយាល័យប្រឆាំងបទល្មើសបច្ចេកវិទ្យានៃស្នងការដ្ឋាននគរបាលរាជធានីភ្នំពេញលើសម្ភារៈជាកំព្យូទ័រ និងទូរស័ព្ទ ក្រុមការងារបានសន្និដ្ឋានថា ជាករណីលួចលាក់ប្រព្រឹត្តបទល្មើសឆបោកតាមប្រព័ន្ធអនឡាញ Online Scams ក្រោមរូបភាពវិនិយោគ (Investment Scams)។ ដោយទទួលបានគោលការណ៍ណែនាំពីឯកឧត្តមអភិបាលរាជធានីភ្នំពេញ និងឧត្តមសេនីយ៍ឯក ស្នងការនគរបាលរាជធានីភ្នំពេញ និងបានការឯកភាពពីលោកព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ជនសង្ស័យ និងវត្ថុតាងត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តនិតីវិធីជំនាញ ចំណែកឯផ្ទះវីឡាត្រូវបានបិទឃ្លុំជាបណ្ដោះអាសន្ន៕អត្ថបទ ៖ ប្រាក់ វ៉ាន់ដា 

សម្តេចប្រធានរដ្ឋសភា៖ ក្នុងបរិបទពិភពលោកស្មុគស្មាញ និងមានវិបត្តិធាតុអាកាសផងស្រ្តីមានតួនាទីសំខាន់ ក្នុងការធានាសុខសន្តិភាព និងការអភិវឌ្ឍប្រកបដោយចីរភាព

2026/07/23 08:24:00 pm        179
Facebook Telegram Linkin
ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នៅព្រឹកថ្ងៃទី២៣ ខែកក្កដា ឆ្នាំ២០២៦ បានអនុញ្ញាតជូន លោកជំទាវ អាលី វង្សណរប៊ុនថាំ ប្រធានសហព័ន្ធនារីឡាវ នៃសាធារណរដ្ឋប្រជាធិបតេយ្យប្រជាមានិតឡាវ ចូលជួបសម្តែងការគួរសម និងពិភាក្សាការងារក្នុងឱកាសបំពេញទស្សនកិច្ចការងារនៅព្រះរាជាណាចក្រកម្ពុជា។ សម្តេចប្រធានរដ្ឋសភា មានក្តីសោមនស្សរីករាយ សូមស្វាគមន៍យ៉ាងកក់ក្តៅបំផុតចំពោះវត្តមានរបស់ លោកជំទាវ អាលី វង្សណរប៊ុនថាំ និងគណៈប្រតិភូជាន់ខ្ពស់នៃសហព័ន្ធនារីឡាវ ដែលបានអញ្ជើញមកបំពេញទស្សនកិច្ចការងារ និងឆ្លៀតពេលវេលាដ៏មមាញឹកមកជួបសម្តែងការគួរសម និងពិភាក្សាការងារជាមួយសម្តេចនាឱកាសនេះ។ ដំណើរទស្សនកិច្ចរបស់លោកជំទាវនាពេលនេះ គឺជាជំហានដ៏មានសារៈសំខាន់់មួយទៀត ក្នុងការបន្តពង្រឹងកិច្ចសហប្រតិបត្តិការគ្រប់ជ្រុងជ្រោយ និងភាពជាដៃគូយូរអង្វែង ដែលបានចាក់ឬសយ៉ាងជ្រៅក្នុងប្រវត្តិសាស្ត្រ រវាងងប្រទេស និងប្រជាជនយើងទាំងពីរ។ សម្តេចប្រធានរដ្ឋសភាបានអបអរសាទរចំពោះកិច្ចសហប្រតិបត្តិការដ៏ល្អរវាងសហព័ន្ធនារីឡាវ និងសមាគមនារីដើម្បីសន្តិភាព និងអភិវឌ្ឍន៍របស់កម្ពុជា។ ទំនាក់ទំនងនិងកិច្ចសហប្រតិបត្តិការនេះ បានបង្ហាញឱ្យឃើញថាវប្បធម៌ និងប្រពៃណីនៃកិច្ចសហប្រតិបត្តិការដ៏ល្អរវាងប្រទេសទាំងពីរទាំងក្នុងក្របខ័ណ្ឌ បក្ស រដ្ឋ រដ្ឋសភា និងប្រជាជននិងប្រជាជន។ ប្រទេសទំាងពីរក៏មានទំនាក់ទំនងស៊ីជ្រៅនៅក្នុងអង្គការមហាជនផងដែរ ធ្វើយ៉ាងណាដើម្បីលើកកម្ពស់ផលប្រយោជន៍នៃប្រទេសទាំងពីរឱ្យកាន់មានច្រើន។ សម្តេចរដ្ឋសភាធិបតី ឃួន សុដារី បានមានប្រសាសន៍បន្ថែមថា ដើម្បីកសាងអនាគតដ៏រឹងមាំ យើងត្រូវតែធ្វើការរួមគ្នាដើម្បីលើកកម្ពស់តួនាទីរបស់ស្ត្រីក្នុងសេដ្ឋកិច្ចឌីជីថល និងនវានុវត្តន៍។ ការពង្រឹងសមត្ថភាពរបស់ស្ត្រីដឹកនាំនៅក្នុងវិស័យដែលកំពុងលេចធ្លោទាំងនេះ នឹងធានាថា សង្គមរបស់យើងរក្សាបាននូវភាពប្រកួតប្រជែង និងមានបរិយាបន្ន។ ស្ត្រីដើរតួនាទីកាន់តែសំខាន់ឡើង ក្នុងការលើកកម្ពស់សន្តិភាព ការអភិវឌ្ឍ និងកិច្ចសហប្រតិបត្តិការអន្តរជាតិ ជាពិសេសនៅក្នុងបរិបទដែលសកលលោកកំពុងប្រឈមនូវស្ថានការណ៍ស្មុគស្មាញ សណ្តាប់ធ្នាប់សកលនិងច្បាប់អន្តរជាតិធ្លាក់ចុះ ក៏ដូចជាការប្រឈមនឹងវិបត្តិនៃការប្រែប្រួលអាកាសធាតុ បន្ថែមទៀតនោះ។ បក្សនិងរដ្ឋនៃប្រទេសទាំងពីរមានឆន្ទៈមោះមុតក្នុងការលើកកម្ពស់សមភាពយេនឌ័រ។ សម្តេចប្រធានរដ្ឋសភាបានគូសបញ្ជាក់ថា យេនឌ័រនៅកម្ពុជាបានលើកកម្ពស់តាំងពីសម័យ សម្តេចតេជោ ហ៊ុន សែន ជានាយករដ្ឋមន្រ្តី។ សម្តេចតេជោ បានកំណត់ទស្សនៈវិស័យថា ស្រ្តីជាឆ្អឹងខ្នងសង្គមនិងសេដ្ឋកិច្ច ការវិនិយោគលើស្រ្តីដូចវិនិយោគលើខ្លួនឯង។ ចំណែកនៅក្នុងនីតិកាលទី៧ នៃរដ្ឋសភានេះ កម្ពុជាក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តី ប្រកបដោយចក្ខុវិស័យវែងឆ្ងាយនិងច្បាប់លាស់ បានលើកឡើងថា ពិភពលោកកាន់តែស្រស់បំព្រងនិងកក់ក្តៅ បើមានស្រ្តីជាច្រើនចូលរួមក្នុងការដឹកនាំ។ លោកជំទាវ អាលី វង្សណរប៊ុនថាំ គោរពថ្លែងអំណរគុណជ្រាលជ្រៅជូនសម្តេចប្រធានរដ្ឋសភា ដែលបានចំណាយពេលដ៏មានតម្លៃនិងមមាញឹកទទួលជួបពិភាក្សាការងារនិងផ្តល់អនុសាសន៍ដល់គណៈប្រតិភូនាឱកាសនេះ។ លោកជំទាវចាត់ទុកឱកាសនេះ ប្រៀបដូចជាប្អូនស្រី ដែលទទួលបានការចង្អុលបង្ហាញដ៏មានអត្ថន័យ និងមានសារៈសំខាន់ ពីបងស្រី ។ លោកជំទាវប្រធានគណៈប្រតិភូមានប្រសាសន៍ថា នឹងទទួលយកការចង្អុលបង្ហាញរបស់សម្តេចប្រធានរដ្ឋសភាទៅអនុវត្ត ឱ្យចេញជាលទ្ធផលក្នុងការបម្រើសង្គមជាតិ។ លោកជំទាវ ប្រធានសហព័ន្ធនារីឡាវ បានថ្លែងកោតសរសើរនិងវាយតម្លៃខ្ពស់ចំពោះការរីកចម្រើនយ៉ាងឆាប់រហ័សរបស់កម្ពុជា។ នេះជាលើកទី៣ នៃដំណើរទស្សនកិច្ចរបស់លោកជំទាវមកកម្ពុជា ហើយគ្រប់ដំណើរទស្សនកិច្ច រាជធានីភ្នំពេញតែងមានការរីកលូតលាស់ និងអភិវឌ្ឍជាលំដាប់ ដែលបង្ហាញពីការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ជានិច្ចកាលទទួលបានការគាំទ្រពីប្រជាពលរដ្ឋក្នុងការដឹកនាំប្រទេស។ លោកជំទាវ អាលី វង្សណរប៊ុនថាំ បានចែករំលែកពីស្ថានភាពនយោបាយ និងសន្តិសុខ ការអភិវឌ្ឍរបស់ប្រទេសឡាវ និងបេសកកម្ម របស់សហព័ន្ធនារីឡាវជូនសម្តេចរដ្ឋសភាធិបតី ឃួន សុដារី ផងដែរ។ សម្តេចប្រធានរដ្ឋសភា និងលោកជំទាវ បានពិភាក្សា ផ្លាស់ប្តូរយោបល់គ្នា ប្រកបដោយភាពរាក់ទាក់និងស្និទ្ធស្នាលប្រៀបដូចជាប្អូនក្នុងគ្រួសារនោះដែរ។ សម្តេចប្រធានរដ្ឋសភា និងលោកជំទាវ ប្រធានគណប្រតិភូបានលើកឡើងស្រដៀងគ្នាថា សំឡេង និងភាពជាអ្នកដឹកនាំរបស់ស្ត្រី គឺមានសារៈសំខាន់់ខ្លាំងណាស់ ក្នុងការកសាងភាពជាដៃគូឱ្យកាន់តែរឹងមាំរវាងប្រទេសយើងទាំងពីរ។ ស្ត្រីកម្ពុជា និងស្ត្រីឡាវ គឺប្រៀបដូចជាបងប្អូនបង្កើតនឹងគ្នា។ សម្តេចប្រធានរដ្ឋសភាបានគូសបញ្ជាក់ថាទំនាក់ទំនងស្អិតល្មួត ភាពជាដៃគូយុទ្ធសាស្រ្តគ្រប់ជ្រុងជ្រោយ នៃប្រទេសទាំងពីរកើតចេញពីការជឿជាក់គ្នាជាយុទ្ធសាស្រ្ត និងស្មោះត្រង់។ ក្នុងនាមជាប្រទេសជិតខាង និងជារដ្ឋតូច កម្ពុជា និងឡាវ មានចក្ខុវិស័យរួមគ្នាក្នុងការលើកកម្ពស់សណ្តាប់ធ្នាប់អន្តរជាតិផ្អែកលើវិធានច្បាប់ ក៏ដូចជាការគាំទ្រប្រព័ន្ធពហុភាគីនិយម ដែលមានលក្ខណៈបើកចំហ និងបរិយាបន្ន។ យើងបានប្តេជ្ញាចិត្តយ៉ាងមុតមាំរួមគ្នា ចំពោះមជ្ឈភាពអាស៊ាន និងស្ថាបត្យកម្មតំបន់ដែលមានអាស៊ានជាស្នូល។ បន្តធ្វើការរួមគ្នា ដើម្បីពង្រឹងតួនាទីរបស់អាស៊ាន ក្នុងការលើកកម្ពស់សន្តិភាព ស្ថិរភាព និងវិបុលភាពនៅក្នុងតំបន់៕ 

បណ្ដាញសង្គម

ព័ត៌មានថ្មីៗ

អ្នកជំនាញ៖ អាមេរិកអាចនឹងប្រើប្រាស់បទឈប់បាញ់ថ្មីជាមួយអ៊ីរ៉ង់ ដើម្បីរៀបចំផែនការប្រតិបត្តិការជើងគោក
07/23/2026 05:07 PM
Facebook Telegram Linkin
MLS បើកការស៊ើបអង្កេតលើ Inter Miami ជុំវិញការចោទប្រកាន់ថាបានទាក់ទង Casemiro ដោយមិនគោរពបទប្បញ្ញត្តិ
07/23/2026 05:07 PM
Facebook Telegram Linkin
ប្រធានសភា៖ គ្មានប្រទេសណាមួយក្នុងតំបន់នឹងត្រូវអនុញ្ញាតឲ្យលក់ប្រេងបានទេ ប្រសិនបើអ៊ីរ៉ង់ត្រូវបានបដិសេធឱកាសនេះ
07/23/2026 05:07 PM
Facebook Telegram Linkin
មេដឹកនាំក្រុមហាម៉ាសបង្ហាញពីគោលដៅអាទិភាពរបស់ចលនានេះ
07/23/2026 05:07 PM
Facebook Telegram Linkin
រុស្ស៊ីព្រមានអំពីហានិភ័យកាន់តែកើនឡើងចំពោះការដឹកជញ្ជូនតាមសមុទ្រ នៅច្រកសមុទ្រ និងសមុទ្រក្រហម
07/23/2026 04:07 PM
Facebook Telegram Linkin
មនុស្សយន្ត​ស្រដៀង​​មនុស្ស ចូលរួមការប្រកួតបាល់ទាត់ដំបូងរបស់ចិន សម្រាប់ក្រុមរូបូតសិស្សអនុវិទ្យាល័យ
07/23/2026 04:07 PM
Facebook Telegram Linkin
មនុស្សជាង ១០០នាក់ស្លាប់ ក្នុងទឹកជំនន់នៅប្រទេសឥណ្ឌា ប៉ាគីស្ថាន និងអាហ្វហ្គានីស្ថាន
07/23/2026 04:07 PM
Facebook Telegram Linkin
រដ្ឋមន្ត្រីការបរទេសចិន៖ ចិន និងឥណ្ឌាគួរតែពង្រឹងសន្ទុះវិជ្ជមាន ក្នុងទំនាក់ទំនងទ្វេភាគី
07/23/2026 04:07 PM
Facebook Telegram Linkin
គណៈកម្មាធិការសិទ្ធិមនុស្សកម្ពុជា ជួបជាមួយអ្នករាយការណ៍ពិសេស អ.ស.ប បន្ទុក​ស្ថានភាព​សិទ្ធិ​មនុស្ស​នៅកម្ពុជា
07/23/2026 04:07 PM
Facebook Telegram Linkin
ចិនចាប់ផ្តើមសមយុទ្ធបាញ់គ្រាប់ពិតរយៈពេល ២ថ្ងៃ នៅច្រកសមុទ្រតៃវ៉ាន់
07/23/2026 04:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.