BTV NEWS

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត «យើងទាំងអស់គ្នាបានដឹងហើយថា ការចូលរួមថែរក្សាសិល្បៈវប្បធម៌ដ៏ផូរផង់របស់ជាតិយើងនេះ គឺជាតួនាទីរបស់ពលរដ្ឋគ្រប់ៗគ្នាទាំងអស់»

ឯកឧត្តមសាស្រ្តាចារ្យ ឈាង រ៉ា «ត្រូវឈ្នះលើខ្លួនយើង ដើម្បីយើងឈ្នះលើការងារ មានប្រៀបលើការងារ និងទទួលបានជោគជ័យ»

លោកជំទាវបណ្ឌិត ពេជ ចន្ទមុន្នី អញ្ជើញជាអធិបតី កម្មវិធី «រាត្រីសមោសរសំពត់បត់ខ្មែរ» លើកទី២

សម្ដេចតេជោ ហ៊ុន សែន៖សម្រាប់កម្ពុជា ចិនគឺជាមិត្តដ៏ធំបំផុត ជាដៃគូ និងជាអ្នកគាំទ្រដ៏គួរទុកចិត្ត បំផុត

ព័ត៌មានជាតិ

ស្ត្រីជនជាតិវៀតណាម ដែលផលិតទឹកឃ្មុំក្លែងក្លាយត្រូវបានចៅក្រមស៊ើបសួរសម្រេចឃុំខ្លួនបណ្ដោះអាសន្ន

លោក អួង វុទ្ធា ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេចឃុំខ្លួនស្រ្តីជនត្រូវចោទ ដែលជាម្ចាស់ក្រុមហ៊ុន CHAN HONEY ដែលផលិតទឹកឃ្មុំក្លែងក្លាយ។យោងតាមដីការបង្គាបឲ្យឃុំខ្លួន លេខ១៣៤០ ង១ ដឃដ ចុះថ្ងៃទី១៥ ខែកុម្ភៈ ឆ្នាំ២០២៥ របស់ លោក អួង វុទ្ធា ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេចឃុំខ្លួនស្រ្តីជនត្រូវចោទ មានឈ្មោះ ង្វៀង ធីថាញ់ធឿន (NGUYEN THI THANH THIEN) ភេទស្រី អាយុ ៤០ឆ្នាំ ជនជាតិវៀតណាម មុខរបរ នាយកក្រុមហ៊ុន CHAN HONEY មានទីកន្លែងកំណើតនៅប្រទេសវៀតណាម ទៅមណ្ឌលអប់រំកែប្រែទី២ (ម២) ដោយអនុវត្តឲ្យបានត្រឹមត្រូវតាមច្បាប់ ពាក់ព័ន្ធករណីពីបទៈ ក្លែងបន្លំដើមកំណើតទំនិញ។គួរបញ្ជាក់ផងដែរកាលពីថ្ងៃទី១២ ខែកុម្ភៈ ឆ្នាំ២០២៥ ក្រោមការដឹកនាំសម្របសម្រួលនីតិវិធីផ្ទាល់ដោយលោក ឆាយ ហុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កម្លាំងជំនាញការិយាល័យប្រឆាំងបទល្មើសកម្មសិទ្ធិបញ្ញា នៃនាយកដ្ឋាននគរបាលប្រឆាំងបទល្មើសសេដ្ឋកិច្ច មន្រ្តីសាខា ក.ប.ប រាជធានីភ្នំពេញ, មន្ត្រីជំនាញ នៃស្នងការដ្ឋាននគរបាលរាជធានីភ្នំពេញរួមនឹងអាជ្ញាធរមូលដ្ឋាន បានចុះបង្រ្កាបទីតាំងក្រុមហ៊ុន CHAN HONEY IMPORT EXPORT CO.,LTD ស្ថិតនៅផ្ទះលេខ៧៦ ផ្លូវបេតុង ភូមិតាងៅកណ្តាល សង្កាត់និរោធ ខណ្ឌច្បារអំពៅ រាជធានីភ្នំពេញ។មន្រ្តីជំនាញបានឲ្យដឹងថា ក្នុងការត្រួតពិនិត្យជាក់ស្តែង សមត្ថកិច្ចចម្រុះបានរកឃើញ ទឹកឃ្មុំសរុបចំនួន ១៣០ធុង ដែលមានទំងន់សរុប១៩,៨៩០ គីឡូក្រាម ។ ដោយមានភាពសង្ស័យចំពោះទឹកឃ្មុំទាំងអស់អាចជាផលិតផលក្លែងបន្លំប្រភពដើម៕ អត្ថបទ៖ កុម្ភៈ

ក្រុមអ្នកជំនាញបរិស្ថានជាតិ-អន្តរជាតិ ជួបប្រជុំគ្នានៅកម្ពុជា ដើម្បីពង្រឹងការអភិរក្សសត្វត្មាត

ក្រុមអ្នកជំនាញជាតិ និងអន្តរជាតិ នៅថ្ងៃទី១៧ ខែកុម្ភៈ ឆ្នាំ២០២៥ បានដំណើរការពិភាក្សាគ្នា ដើម្បីពង្រឹងការអភិរក្សសត្វត្មាតនៅក្នុងពិភពលោក។នេះជាជំនួបសន្ទនាលើកដំបូងសម្រាប់កម្ពុជា ជាមួយក្រុមអ្នកជំនាញ និងអ្នកអភិរក្សនៃប្រទេសមានវត្តមានសត្វត្មាតដូចជា បង់ក្លាដេស ឥណ្ឌា នេប៉ាល់ ប៉ាគីស្ថាន និងមីយ៉ាន់ម៉ា។ ក្នុងឱកាសនេះ ក៏មានអ្នកជំនាញមកពីប្រទេសថៃ ដែលមានគម្រោងសិក្សាពីការត្រៀមបង្កាត់ពូជសត្វត្មាត ដើម្បីបង្កើតឱ្យមានវត្តមាននៅក្នុងប្រទេសរបស់ខ្លួនផងដែរ។ឯកឧត្តម ជា សំអាង រដ្ឋលេខាធិការក្រសួងបរិស្ថាន ចាត់ទុកថាវេទិកានេះ ជាឱកាសដ៏សំខាន់មួយ សម្រាប់អ្នកជំនាញ បានបង្ហាញពីវឌ្ឍនភាព បញ្ហាប្រឈម និងយុទ្ធសាស្រ្តនានា ដើម្បីធានាបាននូវអនាគតដ៏មានសុវត្ថិភាព សម្រាប់សត្វត្មាតដែលជិតផុតពូជនៅក្នុពិភពលោក។ ឯកឧត្តម មានប្រសាសន៍ថា កម្ពុជា គឺជាក្តីសង្ឃឹមចុងក្រោយ សម្រាប់ប្រភេទសត្វត្មាតនៅក្នុងតំបន់អាស៊ីអាគ្នេយ៍ ខណៈចំនួនបានធ្លាក់ចុះពាក់កណ្តាល ក្នុងរយៈពេល១០ឆ្នាំចុងក្រោយនេះ។ «អស់រយៈពេលជិតពីរទស្សវត្សមកហើយ ដែលក្រសួងបរិស្ថាន និងក្រុមការងារសត្វត្មាតកម្ពុជា បានធ្វើការក្នុងភាពជាដៃគូជិតស្និទ្ធ ដើម្បីការពារសត្វត្មាតរស់នៅទាំងបីប្រភេទរបស់កម្ពុជា។ តាមរយៈកិច្ចខិតខំប្រឹងប្រែងអភិរក្សរួមគ្នា យើងបានអនុវត្តកម្មវិធីជាច្រើននៅទូទាំងតំបន់ការពារជាច្រើន ដើម្បីដោះស្រាយការគំរាមកំហែងសំខាន់ៗ តាមដានចំនួនប្រជាសាស្ត្រ និងធានាការរស់រានមានជីវិតរយៈពេលវែងរបស់ពួកវា។» ឯកឧត្តមរដ្ឋលេខាធិការក្រសួងបរិស្ថានបានលើកឡើងបន្ថែម។ លោក ប៊ូ វរសក្ស នាយកអង្គការជិវិតធម្មជាតិនៅកម្ពុជា បានថ្លែងថា ប្រទេសកម្ពុជាជាប្រទេសមួយក្នុងចំណោមប្រទេសឥណ្ឌូចិន ដែលនៅមានសត្វត្មាតជិតផុតពូជចំនួនបីប្រភេទ គឺត្មាតភ្លើង ត្មាតផេះ និងត្មាតត្នោត។ លោកបញ្ជាក់ថា «ជាមួយនឹងការខិតខំប្រឹងប្រែងរបស់ក្រុមការងារ យើងអាចបញ្ជាក់បានថា ចំនួនប្រជាសាស្ត្រសត្វត្មាតនៅកម្ពុជា ស្ថិតក្នុងស្ថានភាពថេរ ដោយតាមទិន្នន័យជំរឿនចុងក្រោយនេះចំនួនរបស់ពួកវាទាំងបីប្រភេទ មានប្រហែល១៣០ក្បាល។ អ្នកជំនាញបានលើកឡើងថា សត្វត្មាត រងការគំរាមកំហែងដូចជា៖ ការពុល កង្វះចំណីអាហារ ការបាត់បង់ជម្រក និងសកម្មភាព រំខានដោយមនុស្ស ដែលការណ៍នេះ ត្រូវតែមានកិច្ចសហប្រតិបត្តិការពីបណ្តាអ្នកពាក់ព័ន្ធទាំងអស់។លោកស្រី Jemima Parry-Jones ប្រធានសមាគមនៃអង្គការមកពីប្រទេសចំនួនប្រាំមួយសម្រាប់ការសង្គ្រោះសត្វត្មាតអាស៊ីពីការផុតពូជ (SAVE) បានអំពាវនាវឱ្យមានការចូលរួមអភិរក្ស និងការពារសត្វត្មាត ដោយសារវាជាអ្នកដែលសម្អាតបរិស្ថានដោយស៊ីគម្រង់សាកសពសត្វផ្សេងទៀតជាអាហារ។ លោកស្រី ថ្លែងថា ការការពារ និងអភិរក្សសត្វត្មាត បានគង់វង្ស វាជាការថែរក្សាមរតកធម្មជាតិដ៏ មានតម្លៃមហាសាលសម្រាប់កម្ពុជា និងពិភពលោកទាំងមូល ព្រមទាំងជាតម្លៃសម្រាប់ការអភិរក្សជីវៈចម្រុះ និងការទាក់ទាញភ្ញៀវទេសចរ។សូមបញ្ជាក់ថា សត្វត្មាត មានតួនាទីសំខាន់ក្នុងធម្មជាតិនោះគឺជាអ្នកសម្អាតបរិស្ថាន និងត្រូវចាត់ទុកជាសត្វមានតម្លៃសម្រាប់វិស័យទេសចរណ៍ធម្មជាតិ។ ត្មាតត្រូវបានចាត់ថ្នាក់ជាប្រភេទសត្វជិតផុតពូជបំផុត ក្នុងបញ្ជីក្រហមនៃអង្គការសហភាពអន្ដរជាតិដើម្បីការអភិរក្សធម្មជាតិ(IUCN)។ បច្ចុប្បន្ន ក្រុមការងារអភិរក្សសត្វត្មាតនៅកម្ពុជា បានបង្កើតឡើងដោយរួមមាន តំណាងក្រសួង ស្ថាប័នរបស់រាជរដ្ឋាភិបាល អង្គការមិនមែនរដ្ឋាភិបាល និងគ្រឹះស្ថានសិក្សាជាន់ខ្ពស់ ក្នុងគោលបំណង ទប់ស្កាត់ការផុតពូជរបស់សត្វត្មាតនៅកម្ពុជា។ កិច្ចប្រជុំប្រចាំឆ្នាំស្តីពីការអភិរក្សសត្វត្មាតនេះ ធ្វើឡើងចាប់ពីថ្ងៃទី១៧ ដល់ថ្ងៃទី២១ ខែកុម្ភៈ ឆ្នាំ២០២៥ នឹងផ្តល់ឱកាសមួយឱ្យក្រុមអ្នកអភិរក្សបរិស្ថានជាតិនិងអន្តរជាតិបានរៀបចំផែនការសកម្មភាព ដើម្បីដោះស្រាយ ការគំរាមកំហែងដូចជា ចំណីពុលដល់សត្វត្មាត និងកម្ពុជាមានឱកាសចែករំលែកការអភិរក្សសត្វត្មាតជូនតំណាងប្រទេសនានាផងដែរ។ ក្នុងឱកាសនេះ ពួកគេនឹងមានឱកាសបង្ហាញ ពីកិច្ចខិតខំប្រឹងប្រែង អភិរក្សសត្វត្មាតរបស់ប្រទេសកម្ពុជា ក្នុងអំឡុងពេលទស្សនកិច្ចសិក្សា នៅដែនជម្រកសត្វព្រៃសៀមប៉ាង។ នៅទីនោះ គណៈប្រតិភូនឹងរៀនអំពីសារៈសំខាន់ នៃភោជនីយដ្ឋានសត្វត្មាត និងលទ្ធផលនៃវេទិកាសំបុកសិប្បនិម្មិត៕

ឯកឧត្តម ទេសរដ្ឋមន្រ្តី គន់ គីម អញ្ជើញប្រគល់ផ្ទះចំនួន១០០ខ្នងជូនអតីតយុទ្ធជនក្នុងខេត្តកំពង់ធំ ជាអំណោយរបស់សម្តេចធិបតី នាយករដ្ឋមន្ត្រី

កំពង់ធំ៖ នាថ្ងៃទី១៧ ខែកុម្ភៈ ឆ្នាំ២០២៥ ឯកឧត្តម ទេសរដ្ឋមន្រ្តី គន់ គីម អនុប្រធាន និងជាអគ្គលេខាធិការ សមាគមអតីតយុទ្ធជនកម្ពុជា បានអញ្ជើញក្នុងពិធីប្រគល់ផ្ទះចំនួន១០០ខ្នង ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងកសាងដោយក្រុមហ៊ុន ជីប ម៉ុង ដើម្បីចែកជូនអតីតយុទ្ធជន ស្ថិតក្នុងភូមិដងក្តា ឃុំក្រយា ស្រុកសន្ទុក ខេត្តកំពង់ធំ។ពិធីនេះមានការចូលរួមពីលោកអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុង, ឯកឧត្តម នួន ផារ័ត្ន អភិបាលខេត្តកំពង់ធំ, អភិបាលស្រុក, អាជ្ញាធរមូលដ្ឋាន សមត្ថកិច្ចពាក់ព័ន្ធ និងអង្គភាពជុំវិញខេត្ត។ នាឱកាសនោះ ក្នុងនាមសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា ឯកឧត្តមទេសរដ្ឋមន្ត្រី គន់ គីម មានប្រសាសន៍ថា អស់រយៈពេលជាង១៧ឆ្នាំមកហើយ ដែលសមាគមអតីតយុទ្ធជនកម្ពុជា ត្រូវបានបង្កើតឡើងដោយគំនិតផ្តួចផ្តើម ក្រោមការដឹកនាំរបស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា ជាអតីតនាយករដ្ឋមន្រ្តីដ៏ឈ្លាសវៃប្រកបដោយគតិបណ្ឌិត ធ្វើឲ្យប្រទេសជាតិមានសុខសន្តិភាព មានស្ថិរភាពនយោបាយ មានការអភិវឌ្ឍន៍ឥតឈប់ឈរលើគ្រប់វិស័យ និងមានកិត្យានុភាព ល្បីរន្ទឺនៅលើឆាកអន្តរជាតិ ។ ឯកឧត្តមទេសរដ្ឋមន្ត្រី មានប្រសាសន៍ទៀតថា ក្នុងន័យនេះ សម្តេចធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានសមាគមអតីតយុទ្ធជនកម្ពុជាជានិច្ចកាលតែងបានចុះជួបផ្ទាល់ជាមួយបងប្អូនអតីតយុទ្ធជននៅមូលដ្ឋាន ដើម្បីស្វែងយល់ពីសុខទុក្ខ និងការលំបាករបស់បងប្អូន ហើយបានរិះរកគ្រប់មធ្យោបាយ ដើម្បីជួយលើកស្ទួយជីវភាពអតីតយុទ្ធជនឱ្យទទួលបាននូវអត្ថប្រយោជន៍ជាច្រើន ដោយបានកែប្រែជីវភាពរស់នៅកាន់តែល្អប្រសើរឡើង។នាឱកាសនោះ ឯកឧត្តមទេសរដ្ឋមន្ត្រី ដោយមើលឃើញពីការលំបាក សម្តេចធិបតី ហ៊ុន ម៉ាណែត នាយករដ្ឋមន្រ្តី បានសម្រេចផ្តល់អំណោយជាផ្ទះចំនួន១០០ខ្នងបន្ថែមជូនអតីតយុទ្ធជនខេត្តកំពង់ធំ។ ក្នុងនោះ ក្រោមការដឹកនាំរបស់រាជរដ្ឋាភិបាល នីតិកាលទី៧ សម្តេចធិបតី នាយករដ្ឋមន្រ្តី បានបន្តអំពាវនាវដល់សប្បុរជនចូលរួមក្នុងការសាងសង់ផ្ទះដល់អតីតយុទ្ធជនផ្សេងទៀតដែលកំពុងមានតម្រូវការ។ថ្លែងក្នុងឱកាសនោះ ឯកឧត្តមទេសរដ្ឋមន្រ្តី រម្លឹកថា គិតមកដល់ថ្ងៃនេះមានរយៈពេល១ឆ្នាំហើយនៃរាជរដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី ដែលសមាគមអតីតយុទ្ធជនកម្ពុជា បានបន្តគោលការណ៍ និងប្រតិបត្តិយ៉ាងខ្ជាប់ខ្ជួនចំពោះសុខទុក្ខរបស់អតីតយុទ្ធជន ព្រមទាំងពិនិត្យ និងវាយតម្លៃដល់អតីតយុទ្ធជនដែលជួបការលំបាកឱ្យទទួលបានអាទិភាពមុនគេ ក្នុងការទទួលអំណោយផ្ទះ និងដីរបស់រាជរដ្ឋាភិបាល ក៏ដូចជាការចុះជួបសួរសុខទុក្ខជាប់ជាប្រចាំជាមួយបងប្អូនអតីតយុទ្ធជនគ្រប់បណ្តារាជធានី-ខេត្ត។ ឯកឧត្តមទេសរដ្ឋមន្រ្តី បានណែនាំ និងលើកទឹកចិត្តដល់អតីតយុទ្ធជនត្រូវខិតខំថែទាំផ្ទះ និងដីឱ្យបានល្អ ដើម្បីរក្សាបាននូវការរស់នៅល្អ និងជីវភាពប្រសើរជាងមុនតាមរយៈការដាំដុះ និងចិញ្ចឹមសត្វ ដើម្បីទទួលបានចំណូលក្នុងប្រចាំថ្ងៃ។ក្នុងឱកាសនោះ លោកអ្នកឧកញ៉ា លាង ឃុន ថ្លែងថា ប្រកាន់ខ្ជាប់នូវទស្សនវិស័យស្នេហាជាតិមាតុភូមិ ស្របតាមស្មារតី ខ្មែរជួយខ្មែរ ក្នុងនាមក្រុមហ៊ុន ជីប ម៉ុង ពិតជាមានមោទកភាពបំផុត ដែលបានចូលរួមចំណែកក្នុង ការជួយទៅដល់អតីតយុទ្ធជន ដែលជាជនមានគុណបំណាច់ និងបានធ្វើពលីកម្មបូជាសាច់ស្រស់ ឈាមស្រស់ ដើម្បីបុព្វហេតុជាតិ មាតុភូមិ និងប្រជាជន។ លោកអ្នកឧកញ៉ា លាង ឃុន បន្តថា អតីតយុទ្ធជនដែលជាប្រតិបត្តិកររបស់សម្តេចតេជោ ហ៊ុន សែន បានដឹងស្រាប់ហើយថា កម្ពុជាបានឆ្លងកាត់ការ លំបាកជាច្រើនដោយសារសង្គ្រាម ហើយទើបរយៈពេល២៦ ឆ្នាំចុងក្រោយ ទើបទទួលបានសុខសន្តិភាព និងការឯកភាព តាមរយៈនយោបាយឈ្នះ ឈ្នះរបស់ សម្តេចតេជោ ហ៊ុន សែន អតីតនាយករដ្ឋមន្ត្រី ដែលមានកម្ពុជាផ្ទាល់ជាអ្នកផ្តួចផ្តើម និងជាអ្នកប្រតិបត្តិដើម្បីបញ្ចប់សង្គ្រាម។ជាមួយគ្នា លោកអ្នកឧកញ៉ា លាង ឃុន សូមសម្តែងនូវការស្ងើចសរសើរលើចក្ខុវិស័យ ក្នុងភាពជាអ្នកដឹកនាំដ៏ ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានបន្តដឹកនាំ ផ្គត់ផ្គង់ឧបត្ថម្ភដល់ អតីតយុទ្ធជន ដែលលះបង់កាយចិត្ត ដោយក្តីស្នេហាជាតិ។បន្ថែមលើនេះ ក្នុងស្មារតី «ខ្មែរស្រលាញ់ខ្មែរ» លោកអ្នកឧកញ៉ា លាង ឃុន សូមប្រកាន់គោលជំហរបន្តសហការជាមួយរាជរដ្ឋាភិបាល ក្នុងកិច្ចការសង្គមទាំងឡាយយ៉ាងសកម្មបំផុត ជាពិសេសដើម្បីជំរុញកំណើនសេដ្ឋកិច្ចកម្ពុជាឱ្យរឹងមាំនៅក្នុងតំបន់៕

យុវសិស្សមកពីវិទ្យាល័យព្រះបាទសុរាម្រឹត ដណ្តើមបានជ័យលាភីលេខ១លើ វិញ្ញាសាតែងនិពន្ធ សម្រាប់ការប្រឡងប្រជែងថ្នាក់ខេត្តឆ្នាំ២០២៥

កំពង់ឆ្នាំង ៖ ម្ចាស់ជ័យលាភីលេខ១ វិញ្ញាសារតែងនិពន្ធថ្នាក់ខេត្តនាឆ្នាំ២០២៥នេះ បានទៅសាលាវិទ្យាល័យព្រះបាទសុរាម្រឹត ជាសិស្សថ្នាក់ទី១១ ឈ្មោះ រ៉េត ចំរើន ដែលបានតែងនិពន្ធអត្ថបទ លើប្រធានបទ " ការអានផ្សារភ្ជាប់អន្តរជំនាន់មនុស្សក្នុងសង្គម " ដែលមានបេក្ខជនចូលរួមប្រឡងប្រជែងមកពីក្រុងស្រុកទាំង៨របស់ខេត្តកំពង់ឆ្នាំង ។ យុវសិស្ស រ៉េត ចំរើន ជាបេក្ខជនតែម្នាក់គត់ ដែលបានយកឈ្នះជ័យលាភីនៅថ្នាក់ក្រុង ដែលបានធ្វើការប្រឡងប្រជែង មកពីសាលា រដ្ឋនិងឯកជន ក្នុងក្រុងកំពង់ឆ្នាំង ដែលគណ:កម្មការបានធ្វើការវាយតម្លៃជាប់ការតែងនិពន្ធនៅថ្នាក់ក្រុងកំពង់ឆ្នាំង ដែលបានអនុញ្ញាតអោយបន្តចូលរួមកប្រកួតនៅថ្នាក់ខេត្តសម្រាប់ឆ្នាំ២០២៥ ។ តាមរយៈសមត្ថភាព និង ភាពវ័យឆ្លាត ប្រកបដោយទេព្យកោសល្យ យុវសិស្ស រ៉េត ចំរើន បានយកឈ្នះបេក្ខភាពមកពីបណ្តាស្រុកទាំង៧ ហើយបានក្លាយជាម្ចាស់ជ័យលាភី១ ថ្នាក់ខេត្តសម្រាប់វិញ្ញាសារតែងនិពន្ធ ឆ្នាំ២០២៥ របស់ខេត្តកំពង់ឆ្នាំង ដែលនឹងត្រូវបន្តចូលរួមប្រឡងប្រជែងនៅថ្នាក់ជាតិបន្តទៀត នាពេលខាងមុខ ។ គណកម្មការកំពុងតែរំពឹងថា រ៉េត ចំរើន ជាសិស្សថ្នាក់ទី១១មកពីវិទ្យាល័យព្រះបាទសុរាម្រឹតក្រុងកំពង់ឆ្នាំង អាចនឹងដណ្តើមបានជ័យលភីថ្នាក់ជាតិបន្តទៀត ដោយសារតាមរយៈសមត្ថភាព ទេព្យកោសល្យ ដែលបានបង្ហាញក្នុងការប្រឡងប្រជែងនៅថ្នាក់ខេត្តនេះ រ៉េតចំរើនពិតជាអាចទទួលបានជ័យជំនះនាពេលខាងមុខ ។

ព្រះករុណា ព្រះមហាក្សត្រ យាងជាព្រះរាជាធិបតីដ៏ខ្ពង់ខ្ពស់បំផុតសម្ពោធសមិទ្ធផលនានានៅវត្តឧណ្ណាលោម

នៅព្រឹកថ្ងៃទី១៧ ខែកុម្ភៈ ឆ្នាំ២០២៥នេះ ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យ បានស្ដេចយាងជាព្រះរាជាធិបតីដ៏ខ្ពង់ខ្ពស់បំផុតក្នុងព្រះរាជពិធីសម្ពោធមហាកុដិសម្តេចព្រះសង្ឃរាជ ជួន ណាត និង វិទ្យាស្ថានស្រាវជ្រាវ និង អភិរក្សសាស្ត្រាស្លឹករឹតខ្មែរ ព្រមទាំង សមិទ្ធិនានា ស្ថិតក្នុងវត្តឧណ្ណាលោម សង្កាត់ជ័យជំនះ ខណ្ឌដូនពេញ រាជធានីភ្នំពេញ។ព្រះករុណាជាអម្ចាស់ជីវិតលើត្បូង ត្រូវបានសម្តចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភា នៃព្រះរាជាណាចក្រកម្ពុជា សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី សម្តេចពញាចក្រី ហេង សំរិន ប្រធានកិត្តិយសក្រុមឧត្តមប្រឹក្សាផ្ទាល់ព្រះមហាក្សត្រ សម្តេចឧត្តមប្រឹក្សាផ្ទាល់ព្រះមហាក្សត្រ និងឥស្សរជនសំខាន់ៗជាច្រើនទៀតបានអញ្ជើញដង្ហែអង្គព្រះមហាក្សត្រចូលរួមនៅក្នុងព្រះរាជពិធីនេះផងដែរ។សម្តេចព្រះមហាអរិយវង្ស បណ្ឌិត យ៉ន សេង យៀត សម្តេចព្រះចៅអធិការវត្តឧណ្ណាលោម បានទូលថ្វាយ និងជំរាបជូនថា វត្តឧណ្ណាលោម គឺជាវត្តដែលស្ថិតនៅក្នុងចំណោមវត្តទាំង៦ក្នុងរាជធានីភ្នំពេញដែលត្រូវបាន សាងសង់ឡើងក្នុងរាជ្ជកាលព្រះបាទចៅពញាយ៉ាត ក្នុងឆ្នាំ១៤៣៧ ហើយអ្វីដែលជាកត្តាប្រវត្តិសាស្ត្រនោះ គឺមានតែវត្ត ឧណ្ណាលោមមួយគត់ ដែលមានប្រាសាទសម័យអង្គរ ដោយយោងតាមការសិក្សាបង្ហាញថា ប្រាសាទនេះ សាងសង់ ឡើងក្នុងចន្លោះសវត្សទី១១ ទី១២ មានចរនាបថកោះកេរ ធ្វើពីថ្មភក់ បែរមុខទៅទិសខាងកើត និងបានប្រែក្លាយជាចេតិយនៅសម័យក្រោយអង្គរសម្រាប់ការគោរពបូជាក្នុងព្រះពុទ្ធសាសនា។វត្តនេះ មានមហាកុដិមួយដែលបាន ស្ថាបនាឡើងនៅក្នុងឆ្នាំ១៩៤៩ក្រោមព្រះរាជូបត្ថម្ភ របស់សម្តេចព្រះនរោត្តម សីហនុ ព្រះបរមរតនកោដ្ឋ ព្រះចៅក្រុងកម្ពុជាធិបតី និងរួមដោយសទ្ធាជ្រះថ្លាពីសំណាក់ពុទ្ធបរិស័ទក្រុងភ្នំពេញនិងខេត្តផ្សេងៗទៀត។មហាកុដិនេះទៀតសោត បានក្លាយជាព្រះរាជដំណាក់សម្តេចព្រះមហាសង្ឃរាជរហូតដល់៣ព្រះអង្គ មានសម្តេចព្រះសង្ឃរាជ ជួន ណាត សម្តេចព្រះសង្ឃរាជ ហួត តាត និងសម្តេចព្រះសង្ឃរាជ ទេព វង្ស។ព្រះករុណាជាអម្ចាស់ជីវិតលើត្បូង បានថ្លែងនូវអំណរព្រះគុណដ៏ជ្រាលជ្រៅ ប្រគេនសម្តេចព្រះមហាអរិយវង្ស បណ្ឌិត យ៉ន សេងយៀត ព្រះចៅអធិការវត្តឧណ្ណាលោមដែលបានធ្វើរបាយការណ៍រម្លឹកអំពីប្រវត្តិសាស្ត្រនិងគូសបញ្ជាក់អំពីការជួសជុលសមិទ្ធផលនានា និងតួនាទីដ៏សំខាន់មិនអាចកាត់ថ្លៃបាន របស់វត្តឧណ្ណាលោមប្រកបដោយលក្ខណៈវិសេសដ៏គួរឱ្យចាប់អារម្មណ៍ទាំងទិដ្ឋភាពព្រះពុទ្ធសាសនា វប្បធម៌ និងប្រពៃណី។ ព្រះអង្គមានមានព្រះរាជបន្ទូលថា អារាមនេះគឺជាទីបណ្តុះនូវព្រះធម៌របស់ព្រះសម្មាសម្ពុទ្ធដ៏ល្អឯក ហើយក៏ជាកន្លែង ដែលបានផ្តល់កំណើតដល់វចនានុក្រមខ្មែរ តាមរយៈការលះបង់ដ៏ធំធេងរបស់សម្តេចព្រះសង្ឃរាជ ជួន ណាត ពេញមួយព្រះជន្មរបស់ព្រះអង្គផងដែរ ។ក្នុងបរិការណ៍នេះព្រះអង្គបានលើកឡើងថា តួនាទីដ៏លេចធ្លោរបស់វត្តអារាមព្រះពុទ្ធសាសនា បានក្លាយទៅជាចលករមួយដែលមិនអាចកាត់ផ្តាច់ចេញបាន រវាងដំណើរជីវិតប្រជាពលរដ្ឋខ្មែរប្រចាំថ្ងៃ និងការអភិវឌ្ឍសង្គមជាតិ ដែលមានន័យថាវត្តអារាម និងសង្គមគឺតែមួយ ។ លើសពីនេះទៀត តួនាទីដ៏ពិសិដ្ឋរបស់វត្តអារាមព្រះពុទ្ធសាសនាខ្មែរបានរួមវិភាគទានដ៏សំខាន់ដល់សង្គម តាំងតែពីបុរាណកាល រហូតមកដល់បច្ចុប្បន្នកាល ក្នុងតួនាទីសំខាន់៤យ៉ាង៖ ទី១៖ វត្តអារាមខ្មែរ បានដើរតួនាទីជំរុញ បណ្តុះសីលធម៌ គុណធម៌ ដែលជាផ្នែកមួយនៃពុទ្ធ ចរិយាសាស្ត្រធ្វើឱ្យសង្គមខ្មែរ មានសុខដុមនីយកម្មទាំងសាសនា និងសង្គម ។ទី២៖ វត្តអារាមខ្មែរ បានក្លាយទៅជាទីកន្លែង អប់រំទាំងផ្លូវកាយ ផ្លូវចិត្ត កសាងធនធានមនុស្ស ឱ្យមានចំណេះដឹងគ្រប់បែបយ៉ាង ។ទី៣៖ វត្តអារាមខ្មែរ គឺជាឃ្លាំងសម្រាប់រក្សាទុកនូវ មត៌កវប្បធម៌ ប្រពៃណី ចំណេះដឹងដ៏សំបូរបែប ដែលផ្តល់គុណតម្លៃសម្រាប់ការសិក្សាស្រាវជ្រាវមិនចេះរីងស្ងួតឡើយ និង ទី៤៖ វត្តអារាមខ្មែរ គឺជាទីកន្លែងដ៏ទូលាយក្នុងការបញ្ជ្រាបនិងថែរក្សាអត្តសញ្ញាណ ព្រលឹង ជាតិ ដ៏សំខាន់តាំងតែពីបរមបុរាណដរាបរៀងមក ។ព្រះអង្គបានគូសបញ្ជាក់ថា តាំងពីអតីតកាល រហូតមកដល់បច្ចុប្បន្នកាល វត្តអារាមជួយផ្តល់កន្លែងស្នាក់នៅ បួសរៀន សូត្រចំណេះដឹងទូទៅដល់អ្នកដែលមានការខ្វះខាត ។ ក្នុងចំណោមនោះមានមួយចំនួនបានក្លាយ ទៅជាថ្នាក់ដឹកនាំគ្រប់ជាន់ថ្នាក់ក្នុងការបម្រើរដ្ឋ ។ ឆ្លៀតនៅក្នុងឱកាសដ៏ប្រពៃថ្លៃថ្លានេះ ព្រះករុណាជាអម្ចាស់ បានអរគុណ និងកោតសរសើរជាទីបំផុតចំពោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ដែលជាស្ថាបនិកដ៏ អស្ចារ្យ ប៉ិនប្រសប់ និងឈ្លាសវៃ ក្នុងការធ្វើឱ្យព្រះពុទ្ធសាសនា និងវត្តអារាមខ្មែរមានព្រលឹងរស់ឡើង វិញដូចសព្វថ្ងៃ ដែលនាំឱ្យមានស្ថិរភាពសង្គម សន្តិភាព ក្រោមបាវចនា ជាតិ សាសនា ព្រះមហាក្សត្រ។ក្នុងពេលបច្ចុប្បន្ននេះ រាជរដ្ឋាភិបាលកម្ពុជា អាណត្តិទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត មានភាពឈ្លាសវៃ មានគោលនយោបាយសមស្រប ទទួលបានការរីកចម្រើន និង ស្ថិរភាពសង្គមល្អប្រសើរ ។ អាស្រ័យហេតុនេះ មិនអាចមានបុគ្គលណាមួយប្រមាថ ឬប្រទូសរ៉ាយ ចំពោះព្រះពុទ្ធសាសនា នៅក្នុងសម័យកាលសន្តិភាពនេះបានឡើយ ។ព្រះអង្គបានយកនូវឱកាសនេះកោតសរសើរចំពោះសប្បុរសជននានារួម ទាំងពុទ្ធបរិស័ទ ដែលបានជួយកសាង និងជួសជុលមហាកុដិ សម្តេចព្រះសង្ឃរាជ ជូន ណាត និង វិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរ ព្រមទាំងសមិទ្ធផលនានាក្នុងវត្តឧណ្ណាលោមតាំងពីដំណាក់កាលដំបូង រហូតមកទល់នឹងថ្ងៃសម្ពោធនេះ បានល្អប្រពៃ៕ អត្ថបទ មុត សុទ្ធ

សហជីពប្រកាសចូលរួមជាមួយរដ្ឋាភិបាល បន្តផ្សព្វផ្សាយព័ត៌មាន ប.ស.ស. ដល់កម្មករនិយោជិត

លោកប្រធានសភាសម្ព័ន្ធសហជីពជាតិកម្ពុជា (NACC) បានឲ្យដឹងថា ក្នុងគោលបំណងបញ្រ្ជាបការយល់ដឹង ក៏ដូចជាផ្តល់នូវព័ត៌មានដែលពិតប្រាកដជូនដល់កម្មករ កម្មការិនី សហជីពលោកនឹងបង្កើនការផ្សព្វផ្សាយឲ្យកាន់តែទូលំទូលាយបន្ថែមទៀតទៅដល់កម្មករនិយោជិត អំពីអត្ថប្រយោជន៍បេឡាជាតិសន្តិសង្គម (ប.ស.ស.) ជាពិសេសការទទួលសេវាព្យាបាល និងថែទាំវេជ្ជសាស្រ្ត តាមរយៈប័ណ្ណ ប.ស.ស.។លោក គឹម ចាន់សំណាង ប្រធានសភាសម្ព័ន្ធសហជីពជាតិកម្ពុជា (NACC) បានមានប្រសាសន៍ប្រាប់ព័ត៌មាន ប៊ីធីវី ឲ្យដឹងថា ដើម្បីលើកកម្ពស់ការយល់ដឹងបន្ថែមទៅដល់កម្មករ កម្មការិនី លោកនឹងសហការជាមួយសហជីព សហភាព និងសហព័ន្ធសហជីពដទៃផ្សេងៗទៀត ក្នុងការផ្សព្វផ្សាយអត្ថប្រយោជន៍ពាក់ព័ន្ធវិស័យបេឡាជាតិសន្តិសង្គម (ប.ស.ស.) ក៏ដូចជាផ្តល់នូវព័ត៌មានថ្មីៗបន្ថែម ឲ្យកាន់តែខិតជិតដល់កម្មករ កម្មការិនី។លោកប្រធានសភាសម្ព័ន្ធសហជីពជាតិកម្ពុជា បានលើកឡើងបន្តថា គិតក្នុងរយៈពេលជាង ១ឆ្នាំ នៃការដឹកនាំអាណត្តិទី៧ របស់រាជរដ្ឋាភិបាល សម្រាប់វិស័យ ប.ស.ស. បានមើលឃើញថា ចំនួនសមាជិកថ្មី ប.ស.ស. បានកើនឡើងចំនួនជាង ១លាននាក់ សរុបមកដល់បច្ចុប្បន្ននេះប្រមាណ ២,៨លាននាក់ ហើយការងារដែលនឹងត្រូវចូលរួមផ្សព្វផ្សាយនេះ គឺពិតជាមានសារៈសំខាន់ណស់ ក្នុងផ្តល់ព័ត៌មានដែលពិតប្រាកដ និងច្បាស់លាស់ទៅកាន់មូលដ្ឋាននានា។ពាក់ព័ន្ធនឹងការប្រើប្រាស់សេវា ប.ស.ស. នៅតាមមូលដ្ឋានសុខាភិបាលនេះ ក្រុមប្រជាពលរដ្ឋ ដែលជាសមាជិក ប.ស.ស. ជាពិសេសប្រជាពលរដ្ឋមកពីគ្រួសារក្រីក្រ និងងាយរងហានិភ័យ បានបង្ហាញអារម្មណ៍សប្បាយរីករាយ និងលើកឡើងថា បណ្ណនេះពិតជាផ្តល់នូវអត្ថប្រយោជន៍ជាច្រើនដល់ពួកគាត់ ក្នុងការធានារ៉ាប់រងសុខភាព និងមិនគិតថ្លៃអ្វីទាំងអស់។ លើសពីនេះទៀត គឺពិតជាជួយសម្រាលបន្ទុកក្នុងការចំណាយបានយ៉ាងច្រើន នៅពេលមានបញ្ហាសុខភាពត្រូវទៅពេទ្យព្យាបាល។កាលពីថ្ងៃទី១៤ ខែកុម្ភៈ ឆ្នាំ២០២៥កន្លងទៅ ក្រសួងការងារ និងបណ្តុះបណ្តាលវិជ្ជាជីវៈ បានបើកកិច្ចប្រជុំប្រចាំខែ និង សំណេះសំណាលជាមួយថ្នាក់ដឹកនាំសហព័ន្ធសហជីព ដើម្បីបង្កើនភាពជាដៃគូ រវាងក្រសួង និងថ្នាក់ដឹកនាំសហព័ន្ធសហជីពក្នុងការពិនិត្យដោះស្រាយរាល់បញ្ហារបស់កម្មករនិយោជិត ក្ដាប់នូវបញ្ហាប្រឈមនានា ព្រមទាំងជាដៃគូក្នុងការផ្ដល់ព័ត៌មានផ្សេងៗដែលអាចអន្តរាគមន៍ និងដោះស្រាយរាល់បញ្ហាវិវាទការងារ បាតុភាពផ្សេងៗ ដែលអាចនឹងកើតមានឡើងជាយថាហេតុនៅកន្លែងធ្វើការងារ។ ក្នុងនោះ ថ្នាក់ដឹកនាំក្រសួងការងារ បានស្នើដល់ប្រធានសហព័ន្ធសហជីព ត្រូវធ្វើការឱ្យជិតស្និទ្ធជាមួយសហជីពមូលដ្ឋានរបស់ខ្លួន និងត្រូវផ្សព្វផ្សាយអំពីការប្រើប្រាស់បណ្ណ ប.ស.ស. និងណែនាំដល់កម្មករនិយោជិត ឲ្យរាយការណ៍មកក្រសួង ក្នុងករណីមានភាពមិនប្រក្រតី ឬមិនអាចប្រើប្រាស់បណ្ណ ប.ស.ស. បាន៕ អត្ថបទ ឈិត បូរ៉ាវី

ក្រសួងមុខងារសាធារណៈ និងក្រសួងប្រៃសណីយ៍ធ្វើសិក្ខាសា ពិនិត្យឡើងវិញ និងការវិភាគមុខងារ និងរចនាសម្ព័ន្ធនៃក្រសួងប្រៃសណីយ៍

នៅព្រឹកថ្ងៃទី១៧ ខែកុម្ភៈ ឆ្នាំ២០២៥នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ កំពុងអញ្ជើញជាអធិបតីដ៏ខ្ពង់ខ្ពស់ ក្នុងសិក្ខាសាលាស្តីពី «ការពិនិត្យឡើងវិញ និងការវិភាគមុខងារ និងរចនាសម្ព័ន្ធនៃក្រសួងប្រៃសណីយ៍ និងទូរគមនាគមន៍» ដោយមានវត្តមានអញ្ជើញចូលរួមដោយ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ ព្រមទាំងថថ្នាក់ដឹកនាំន និងមន្ត្រីជំនាញបច្ចេកទេសនៃក្រសួងទាំងពីរ។ក្នុងមតិស្វាគមន៍អង្គសិក្ខាសាលា ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគម បានជម្រាបជូនអង្គសិក្ខាសាលាថា ក្រសួងប្រៃសណីយ៍ និងទូរគមនាគមន៍ បាន និងកំពុងធ្វើការពិនិត្យឡើងវិញ ការវិភាគមុខងារ រចនាសម្ព័ន្ធក្រសួង ដែលបានកំណត់ដោយច្បាប់ និងលិខិតបទដ្ឋានគតិយុត្តពាក់ព័ន្ធ ព្រមទាំងពិនិត្យលើឯកសារគោលនយោបាយពាក់ព័ន្ធនានាបន្ថែមទៀត។ ក្រសួងក៏បានពិនិត្យឡើងវិញ និងវិភាគលើទិដ្ឋភាពពាក់ព័ន្ធសំខាន់ៗ មួយចំនួន ដូចជាការពង្រឹង ការអនុវត្តមុខងាររបស់ក្រសួង ទាំងអភិក្រមការងារ ធនធានមនុស្ស និងធនធានថវិកា ព្រមទាំងការផ្តល់សេវាសាធារណៈ ជូនដល់ប្រជាជន និងក្រសួង ស្ថាប័នផ្សេងៗ ក្នុងគោលបំណងរៀបចំរចនាសម្ព័ន្ធក្រសួងឱ្យមានរបៀបរៀបរយកាន់តែល្អប្រសើរ សំដៅធានាឱ្យបានការវិភាគមុខងារប្រកបដោយប្រសិទ្ធភាព និងស័ក្តិសិទ្ធិភាព។ ជាក់ស្តែងបច្ចុប្បន្ននេះ ក្រសួងប្រៃសណីយ៍ និងទូរគមនាគមន៍ បាន និងកំពុងអភិវឌ្ឍមុខងារ និងភារកិច្ចដែលមានចែងក្នុងអនុក្រឹត្យស្តីពី «ការរៀបចំ និងការប្រព្រឹត្តទៅរបស់ក្រសួងប្រៃសណីយ៍ និងទូរគមនាគមន៍» ហើយបន្ទាប់ពីបានពិនិត្យឡើងវិញ និងវិភាគមុខងាររចនាសម្ព័ន្ធ ដោយផ្អែកតាមយុទ្ធសាស្ត្របញ្ចកោណ ដំណាក់កាលទី១ នៃរដ្ឋសភា ស្របតាមគោលនយោបាយយុទ្ធសាស្ត្រ ច្បាប់ និងលិខិតបទដ្ឋានគតិយុត្តពាក់ព័ន្ធ ក្នុងវិស័យអភិបាលកិច្ច ក្រសួងប្រៃសណីយ៍ និងទូរគមនាគមន៍ បានស្វែងរកឃើញមុខងារគោលសំខាន់ៗ ដោយដកស្រង់ចេញពីគោលនយោបាយ និងបទដ្ឋានគតិយុត្តពាក់ព័ន្ធផង និងតាមរយៈការពិភាក្សាពិគ្រោះយោបល់ជាមួយក្រសួង ស្ថាប័ន្ធពាក់ព័ន្ធផង។ ឯកឧត្តមរដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានលើកឡើងថា បច្ចេកវិទ្យាពិតជាមានសារៈសំខាន់ណាស់ ក្នុងការងារប្រចាំថ្ងៃរបស់មន្ត្រីរាជការ និងរចនាសម្ព័ន្ធរបស់ក្រសួងប្រៃសណីយ៍ និងទូរគមនាគមន៍ ក៏ដូចជាក្រសួងស្ថាប័នដទៃទៀតផងដែរ។ ឯកឧត្តម ជា វ៉ាន់ដេត បានបន្ថែមថា បច្ចុប្បន្នក្រសួងបាន និងកំពុងរៀបចំសេចក្តីព្រាងអនុក្រឹត្យស្តីពី«ការរៀបចំនិងការប្រព្រឹត្តទៅរបស់ក្រសួងប្រៃសណីយ៍និងទូរគមនាគមន៍» ដែលកំណត់អំពីការរៀបចំនូវរចនាសម្ព័ន្ធថ្មី ដើម្បីឆ្លើយតបនឹងតម្រូវការ និងមុខងាររបស់អង្គភាពចំណុះ ប្រកបដោយប្រសិទ្ធភាពការងារនៃការចូលរួមការបដិវត្តសង្គមឌីជីថល ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្នុងនីតិកាលទី៧ នៃរដ្ឋសភា។ ឯកឧត្តមរដ្ឋមន្ត្រី បានបញ្ជាក់ថា ដោយសង្ឃឹមថាសិក្ខាសាលានាព្រឹកនេះ នឹងធ្វើឱ្យការរៀបចំមុខងារ រចនាសម្ព័ន្ធរបស់ក្រសួងប្រៃសណីយ៍ និងទូរគមនាគមន៍ ឱ្យកាន់តែប្រសើរឡើងបន្ថែមទៀត ដើម្បីបំពេញផលប្រយោជន៍ជូនជាតិមាតុភូមិ។សូមជម្រាបថា សិក្ខាសាលានាព្រឹកនេះ ត្រូវបានរៀបចំឡើងជាមួយបទបង្ហាញរបស់ថ្នាក់ដឹកនាំក្រសួងមុខងារសាធារណៈ ចំនួនពីររូបគឺ៖ (១) ការបង្ហាញពីដំណើរការ នៃការពិនិត្យឡើងវិញ និងការវិភាគមុខងារ និងរចនាសម្ព័ន្ធ របស់ក្រសួង ស្ថាប័ន ដោយលោកជំទាវ ឈី វិជ្ជរ៉ា រដ្ឋលេខាធិការក្រសួងមុខងារសាធារណៈ និង (២) ការបង្ហាញពីការងារបំពេញគ្នា គាំទ្រគ្នា និងជំរុញការអនុវត្តការងាររួមគ្នា ក្នុងក្របខណ្ឌការកែទម្រង់ និងពង្រឹងអភិបាលកិច្ច ដោយឯកឧត្តម យក់ ប៊ុនណា រដ្ឋលេខាធិការប្រចាំការ ក្រសួងមុខងារសាធារណៈ៕

សភាមុខរបរកំពុងគាំទ្រសកម្មភាពអាជីវកម្មក្នុងស្រុក ខណៈភ្ញៀវទេសចរកំពុងហូរចូលមកវិញ

សភាមុខរបរ និងមីក្រូសហគ្រាសកម្ពុជា បាននិងកំពុងផ្តោតយកចិត្តទុកដាក់ លើកកម្ពស់មុខរបរនៅតាមមូលដ្ឋានអាជីវកម្មទេសចរណ៍ក្នុងស្រុក តាមរយៈការផ្តល់នូវប្រឹក្សាយោបល់ គន្លឹះដឹកនាំ និងវិធីសាស្រ្តសំខាន់ៗ ដើម្បីជួយជ្រោមជ្រែងធ្វើឱ្យប្រសើរឡើង ខណៈកម្ពុជាកំពុងមានកំណើនភ្ញៀវទេសចរឡើងវិញ។លោក ដា សុធន់ ប្រធានគ្រប់គ្រងវិស័យទេសចរណ៍ និងបដិសណ្ឋាកិច្ច នៃសភាមុខរបរនិងមីក្រូសហគ្រាសកម្ពុជា លើកឡើង លើការចុះហត្ថលេខាប្រគល់សិទ្ធប្រកបអាជីវកម្មសាខាហ្គាឌ័រហ្គ្រោនស៍ ហ្រ្វេនឆាយ (Gather Grounds) នាចុងសប្តាហ៍ កន្លងមកថា ក្នុងឆ្នាំ២០២៥ នេះ សភាមុខរបរបាននិងកំពុងផ្តោតការយកចិត្តទុកដាក់ខ្ពស់ ជួយដល់មុខរបរនៅតាមមូលដ្ឋានអាជីវកម្មទេសចរណ៍ តាមរយៈការផ្តល់ពិគ្រោះយល់ គន្លឹះដឹកនាំ ជាពិសេសសមាជិកនៅក្នុងសភាមុខរបរ ដើម្បីជួយអភិវឌ្ឍន៍នៅលើចំណុចខ្វះខាត ។ លោក បន្តលើកឡើងថា នៅក្នុងស្ថានភាពនៃវិបត្តិដែលផ្ទុះឡើងនាពេលកន្លងមក ខណៈដែលចំនួនភ្ញៀវទេសចរណ៍ធ្លាក់ចុះ អាជីវកម្ម បម្រើ ឱ្យវិស័យទេសចរណ៍ជាច្រើនបានបិទទ្វារ បច្ចុប្បន្នស្របពេលវិស័យទេសចរណ៍នៅកម្ពុជាបានកំពុងងើបឡើង ការជួយដល់មូលដ្ឋាន អាជីវកម្មទេសចរណ៍គឺជារឿងសំខាន់ ដើម្បីលើកកម្ពស់មូលដ្ឋានអាជីវកម្មឱ្យប្រសើរឡើង និងការទាក់ទាញភ្ញៀវទេសចរណផងដែរ។លោកស្រី នី ប៉ាឡូណា សមាជិកសភាមុខរបរនិងមីក្រូសហគ្រាសកម្ពុជា លើកឡើងថា សភាមុខរបរបានកំពុងគាំទ្រដល់ការ រីកលូតលាស់ក្នុងវិស័យឧស្សាហកម្ម ពាណិជ្ជកម្ម និងអាជីវកម្មផ្សេងៗ ជាពិសេសសហគ្រាសធុនមីក្រូ និងតូច និងវិស័យម្ហូបអាហារ បច្ចុប្បន្នវិស័យទាំងនេះនៅកម្ពុជា បានកំពុងងើបឡើង និងបានកំពុងបង្កើតនូវហ្រ្វេនឆាយដែលជារបស់ខ្លួនឯង គាំទ្រដល់សកម្មភាព សេដ្ឋកិច្ចក្នុងស្រុក តាមរយៈការបង្កើតការងារ ប្រាក់ចំណូល និងការចូលរួមទាក់ទាញភ្ញៀវទេសចរណ៍ជាដើម។លោក នួន រស្មី ទីប្រឹក្សាបច្ចេកទេស នៃសភាមុខរបរនិងមីក្រូសហគ្រាសកម្ពុជា ថ្លែងថា បន្ទាប់ពីស្ថានភាពនៃសេដ្ឋកិច្ចក្នុង ប្រទេសបានកំពុងងើបឡើង និងស្របពេលភ្ញៀវទេសចរណ៍អន្តរជាតិកំពុងហូរចូលមកវិញ ចំពោះវិស័យម្អូបអាហារ យើងគួរធ្វើយ៉ាង មិច? នាំផលិតផលក្រៅស្រុកមកលក់ឬយ៉ាងណា? ដែលបញ្ហានេះ, យើងត្រូវតែជំរុញបង្កើតផលិតផលក្នុងស្រុកឱ្យបានច្រើន ជា ផលិតផលដែលមានគុណភាព បច្ចុប្បន្នយើងឃើញមានផលិតផលក្នុងស្រុកកាន់តែច្រើន បានបង្កើតនូវហ្រ្វេនឆាយថ្មីៗរបស់ខ្លួន រហូត មានការលក់សិទ្ធិទៅក្រៅប្រទេស នេះគឺជាការទាក់ទាញមួយ និងបានបង្ហាញពីអត្តសញ្ញាណរបស់ខ្មែរឱ្យបរទេសស្គាល់ផងដែរ។សូមបញ្ជាក់ថា នៅក្នុងឆ្នាំ ២០២៤ កម្ពុជាទទួលបានភ្ញៀវវទេសចរណ៍អន្តរជាតិបានជាង១ លាននាក់ ខណៈនៅឆ្នាំ២០២៣ កម្ពុជា ទទួលបានភ្ញៀវទេសចរណ៍អន្តរជាតិ ក្នុងរង្វង់ ៨០ ម៉ឺននាក់ប៉ុណ្ណោះ បច្ចុប្បន្នរាជរដ្ឋាភិបាលបន្តពិនិត្យលទ្ធភាព ក្នុងការបន្តលើវិធាន ការអន្តរាគមន៍ ដើម្បីជួយស្ដារក្នុងវិស័យទេសចរណ៍ ចំពោះសហគ្រាសដែលបានចុះបញ្ជីពន្ធដារ និងមានសកម្មភាពអាជីវកម្មនៅខេត្ត សៀមរាប ទោះបីបច្ចុប្បន្នចំនួនទេសចរណ៍នៅខេត្តសៀបរាប បានហក់ឡើងជាបណ្តើរៗវិញក៏ដោយ៕ អត្ថបទ៖ សុន រ៉ាឌី

សមាគមជាតិ-អន្តរជាតិ មើលឃើញបរិយាកាសវិនិយោគនៅកម្ពុជាមាននិន្នាការកើនឡើងជាបន្តបន្ទាប់

សមាគមជាតិនិងអន្តរជាតិ មើលឃើញពីបរិយាកាសវិនិយោគនៅកម្ពុជា នឹងមាននិន្នាការកើនឡើងជាបន្តបន្ទាប់ ក្រោមការខិតខំ ប្រឹងប្រែង និងការកែទម្រង់ដ៏មុតស្រួចនានារបស់រាជរដ្ឋាភិបាល ក្នុងការទាក់ទាញអ្នកវិនិយោគ និងជាប្រទេសមានសេដ្ឋកិច្ចបើកចំហរ បានផ្តល់ភាពអំណោយផលដល់បរិយាកាសវិនិយោគ។លោក សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងនៅក្នុងកិច្ចសម្ភាសន៍ជាមួយ BTV ស្តីពីអំពីរំហូរវិនិយោគនៅ កម្ពុជានេះថា សន្តិភាពបានផ្តល់នូវការអភិវឌ្ឍន៍គ្រប់យ៉ាង និងបានបង្កើនទំនុកចចិត្តយ៉ាងខ្លាំងលើបរិយាកាសវិនិយោគនៅកម្ពុជា ជាក់ ស្តែងនៅពេលមានវិបត្តិដែលប៉ះពាល់ជាអវិជ្ជមាន កម្ពុជាបានត្រៀមខ្លួន និងប្រែក្លាយបញ្ហាប្រឈមនានា ទៅជាកាលានុវត្តភាព ផ្តល់ ភាពអំណោយផល លើការលើកកម្ពស់ប្រសិទ្ធភាព និងភាពប្រកួតប្រជែងសេដ្ឋកិច្ច ដើម្បីទាក់ទាញវិនិយោគិន និងធុរកិច្ចបន្ថែម ជាពិសេសការហូរចូលមកពីតំបន់ជម្លោះពាណិជ្ជកម្ម បានធ្វើឱ្យរំហូរវិនិយោគនៅកម្ពុជាមានកំណើនជាបន្តបន្ទាប់។ចំណែកលោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃប្រចាំនៅកម្ពុជា ក៏មានក្តីរំពឹងខ្ពស់ ចំពោះការហូរចូល វិនិយោគិនពីបរទេសមកកម្ពុជាផងដែរ ជាក់ស្តែងនៅដើមឆ្នាំ២០២៥ នេះ ធុរជន និងវិនិយោគិនថៃ បានហូរចូលមកកម្ពុជាជាច្រើន ដើម្បីមកសិក្សាលទ្ធភាពអំពីការធ្វើពាណិជ្ជកម្ម និងការវិនិយោគផ្សេងៗ ខណៈដែលក្រុមហ៊ុនដែលកំពុងធ្វើអាជីវកម្មនៅកម្ពុជាមួយ ចំនួន ក៏មានផែនការពង្រីកអាជីវកម្មបន្ថែមផងដែរ ដែលទាំងនេះសុទ្ធតែជាការចូលរួមចំណែកគាំទ្រសកម្មភាពវិនិយោគ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លើកឡើងថា ជុំវិញឱកាសវិនិយោគ នេះ រាជរដ្ឋាភិបាលកម្ពុជាបានខិតខំប្រឹងប្រែងយ៉ាងខ្លាំង ដើម្បីទាក់ទាញអ្នកវិនិយោគដូចជា ដើរគោះទ្វារនៅតាមបណ្តាប្រទេសមួយ ចំនួន ការទាក់ម៉ូយ និងការកែទម្រង់ដ៏មុតស្រួចនានារបស់រាជរដ្ឋាភិបាលជាដើម គឺមានគោលបំណងរកការងារថ្មីៗជូនប្រជាពលរដ្ឋ ជាពិសេសការឈានទៅសម្រេចបានតាមចក្ខុវិស័យរបស់កម្ពុជានៅឆ្នាំ២០៥០។សូមបញ្ជាក់ថា នៅក្នុងឆ្នាំ២០២៤ កន្លងមកនេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបមានចំនួន ៤១៤ គម្រោង ក្នុងនោះគម្រោងវិនិយោគថ្មីចំនួន ៣៨៧ គម្រោង និងគម្រោងពង្រីកផលិតកម្មចំនួន ២៧ គម្រោង មានទុនវិនិយោគសរុប ប្រមាណ៦,៩ ពាន់លានដុល្លារអាមេរិក និងអាចបង្កើតការងារបានប្រមាណជិត៣២ ម៉ឺនកន្លែង។ ចំណែកនៅក្នុងខែមករា ឆ្នាំ២០២៥ នេះ CDC បានអនុម័តគម្រោងវិនិយោគក្នុងសរុបចំនួន ៦៨ គម្រោង មានទុនវិនិយោគប្រមាណ ៧៤៨ លានដុល្លារអាមេរិក ក្នុងនោះ គម្រោងវិនិយោគថ្មីមានចំនួន ៦៤ គម្រោង និងគម្រោងពង្រីកផលិតកម្មចំនួន ៤ គម្រោង៕ អត្ថបទ៖ សុន រ៉ាឌី

២សប្តាហ៍ សមត្ថកិច្ចបង្ក្រាបបទល្មើសក្មេងទំនើងជិត២០ករណី និងឃាត់ខ្លួនមនុស្សជាង៦០នាក់

ភ្នំពេញ៖ ក្នុងរយៈពេល២សប្តាហ៍ គិតចាប់ពីថ្ងៃទី១ ដល់ថ្ងៃទី១៤ ខែកុម្ភៈ ឆ្នាំ២០២៥ សមត្ថកិច្ចបានបង្ក្រាបក្រុម ក្មេងទំនើងទូទាំងប្រទេសជិត២០ករណី និងឃាត់ខ្លួនមនុស្សបានជាង៦០នាក់។ នេះបើតាមលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ។ បើតាមលោកបណ្ឌិត ទូច សុឃៈ ក្រុមក្មេងទំនើងដែលសមត្ថកិច្ចបង្ក្រាបបាន ភាគច្រើនត្រូវបញ្ជូនទៅពន្ធនាគារ ពោលគឺដាច់ខាតត្រូវតែអនុវត្តតាមនីតិវិធី ស្របតាមអនុសាសន៍ និងបទបញ្ជាដ៏ម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ សូមបញ្ជាក់ថាករណីក្មេងទំនើងដែលបង្ក្រាបបាននេះ មាននៅក្នុងមូលដ្ឋាន រាជធានីភ្នំពេញ កណ្តាល បាត់ដំបង ពោធិ៍សាត់ ក្រចេះ ខេត្តកំពត សៀមរាប កំពង់ស្ពឺ ត្បូងឃ្មុំ កំពង់ចាម ព្រះសីហនុ និងខេត្តតាកែវ៕

បណ្ដាញសង្គម

ព័ត៌មានថ្មីៗ

មេបញ្ជាការកងទ័ពជើងគោកសហរដ្ឋអាមេរិក ប្រចាំប៉ាស៊ីហ្វិក (USARPAC) វាយតម្លៃខ្ពស់ចំពោះកម្ពុជាដែលបញ្ជូនកងកម្លាំងថែរក្សាសន្តិភាពក្រោមឆ័ត្រអង្គការសហប្រជាជាតិ

ការិយាល័យនាយករដ្ឋមន្ត្រីអ៊ីស្រាអែល៖ អ្នកឈ្នះការបោះឆ្នោត អញ្ជើញលោក Netanyahu ទៅអាល្លឺម៉ង់

អ៊ុយក្រែន៖ កិច្ចពិភាក្សា ស្តីពីកិច្ចព្រមព្រៀងរ៉ែជាមួយអាមេរិក ស្ថិតក្នុងដំណាក់កាលចុងក្រោយ

នាយករដ្ឋមន្រ្តីអេស្ប៉ាញប្រកាសកញ្ចប់ជំនួយយោធាថ្មីជាង ១ពាន់លានដុល្លារដល់អ៊ុយក្រែន

រដ្ឋមន្រ្តីការបរទេសរុស្ស៊ី និងទួរគី ពិភាក្សាលើបញ្ហាសង្រ្គាមអ៊ុយក្រែនអំឡុងជំនួបនៅទីក្រុងអង់ការ៉ា

ព្រិលធ្លាក់យ៉ាងក្រាស់បានវាយប្រហារតំបន់ជាច្រើនរបស់ប្រទេសជប៉ុនម្តងទៀតនៅថ្ងៃចន្ទនេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ស្ត្រីជនជាតិវៀតណាម ដែលផលិតទឹកឃ្មុំក្លែងក្លាយត្រូវបានចៅក្រមស៊ើបសួរសម្រេចឃុំខ្លួនបណ្ដោះអាសន្ន

ក្រុមអ្នកជំនាញបរិស្ថានជាតិ-អន្តរជាតិ ជួបប្រជុំគ្នានៅកម្ពុជា ដើម្បីពង្រឹងការអភិរក្សសត្វត្មាត

ព្រះករុណា ព្រះមហាក្សត្រ យាងជាព្រះរាជាធិបតីដ៏ខ្ពង់ខ្ពស់បំផុតសម្ពោធសមិទ្ធផលនានានៅវត្តឧណ្ណាលោម

សហជីពប្រកាសចូលរួមជាមួយរដ្ឋាភិបាល បន្តផ្សព្វផ្សាយព័ត៌មាន ប.ស.ស. ដល់កម្មករនិយោជិត

សភាមុខរបរកំពុងគាំទ្រសកម្មភាពអាជីវកម្មក្នុងស្រុក ខណៈភ្ញៀវទេសចរកំពុងហូរចូលមកវិញ

សមាគមជាតិ-អន្តរជាតិ មើលឃើញបរិយាកាសវិនិយោគនៅកម្ពុជាមាននិន្នាការកើនឡើងជាបន្តបន្ទាប់

២សប្តាហ៍ សមត្ថកិច្ចបង្ក្រាបបទល្មើសក្មេងទំនើងជិត២០ករណី និងឃាត់ខ្លួនមនុស្សជាង៦០នាក់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ស្ត្រីជនជាតិវៀតណាម ដែលផលិតទឹកឃ្មុំក្លែងក្លាយត្រូវបានចៅក្រមស៊ើបសួរ​សម្រេចឃុំខ្លួន​បណ្ដោះ​អាសន្ន

ក្រុមអ្នកជំនាញបរិស្ថានជាតិ-អន្តរជាតិ ជួបប្រជុំគ្នានៅកម្ពុជា ដើម្បីពង្រឹងការអភិរក្សសត្វត្មាត

ព្រះករុណា ព្រះមហាក្សត្រ យាងជាព្រះរាជាធិបតី​ដ៏ខ្ពង់ខ្ពស់​បំផុត​សម្ពោធ​សមិទ្ធផល​នានា​នៅ​វត្តឧណ្ណាលោម

សហជីពប្រកាសចូលរួមជាមួយរដ្ឋាភិបាល បន្តផ្សព្វផ្សាយព័ត៌មាន ប.ស.ស. ដល់កម្មករនិយោជិត

សភាមុខរបរកំពុងគាំទ្រសកម្មភាពអាជីវកម្មក្នុងស្រុក ខណៈភ្ញៀវទេសចរកំពុងហូរចូលមកវិញ

សមាគមជាតិ-អន្តរជាតិ មើលឃើញបរិយាកាសវិនិយោគនៅកម្ពុជា​មាននិន្នាការកើនឡើង​ជាបន្តបន្ទាប់

២សប្តាហ៍ សមត្ថកិច្ចបង្ក្រាបបទល្មើសក្មេងទំនើងជិត២០ករណី និងឃាត់ខ្លួនមនុស្ស​ជាង៦០នាក់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ស្ត្រីជនជាតិវៀតណាម ដែលផលិតទឹកឃ្មុំក្លែងក្លាយត្រូវបានចៅក្រមស៊ើបសួរសម្រេចឃុំខ្លួនបណ្ដោះអាសន្ន

ព្រះករុណា ព្រះមហាក្សត្រ យាងជាព្រះរាជាធិបតីដ៏ខ្ពង់ខ្ពស់បំផុតសម្ពោធសមិទ្ធផលនានានៅវត្តឧណ្ណាលោម

សមាគមជាតិ-អន្តរជាតិ មើលឃើញបរិយាកាសវិនិយោគនៅកម្ពុជាមាននិន្នាការកើនឡើងជាបន្តបន្ទាប់

២សប្តាហ៍ សមត្ថកិច្ចបង្ក្រាបបទល្មើសក្មេងទំនើងជិត២០ករណី និងឃាត់ខ្លួនមនុស្សជាង៦០នាក់