BTV NEWS

គណបក្សប្រជាជនកម្ពុជាខេត្តកំពង់ស្ពឺ ប្រជុំបូកសរុបលទ្ធផលការងារខែកក្កដា ឆ្នាំ២០២៦ និងលើកទិសដៅភារកិច្ចខែបន្ទាប់

ក្រសួងអប់រំ ផ្ដល់ឱកាសឱ្យសិស្សធ្វើទស្សនកិច្ចសិក្សានៅសិង្ហបុរី តាមរយៈកម្មវិធី ME-NISTER

កម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យរបស់អង្គភាពអ្នកនាំពាក្យរាជរដ្ឋាភិបាល រកឃើញអ្នកទទួលបានជ័យលាភីហើយ

ក្រសួងបរិស្ថាន កំពុងរៀបចំហេដ្ឋារចនាសម្ព័ន្ធនៅសហគមន៍តំបន់ការពារធម្មជាតិកោដូន្តី ដើម្បីទាក់ទាញទេសចរ

ព័ត៌មានជាតិ

សម្តេចតេជោ ហ៊ុន សែន ផ្ញើសារជូនប្រធានាធិបតីបារាំងបង្ហាញជំនឿលើក្រុមបាល់ទាត់បារាំង និងជូនពរឱ្យលើកពានបាល់ទាត់ពិភពលោកឆ្នាំ២០២៦

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា នៅយប់ថ្ងៃទី១២ ខែកក្កដា ឆ្នាំ២០២៦នេះ បានបញ្ជាក់ឱ្យដឹងថា នៅថ្ងៃនេះសម្តេចបានផ្ញើសារជូនលោកប្រធានាធិបតីបារាំង ម៉ាក្រុង ដោយសម្តេចមានជំនឿទុកចិត្តលើក្រុមបាល់ទាត់បារាំង ហើយសម្ដេចបានជូនពរឱ្យក្រុមបាល់ទាត់បារាំងឱ្យទទួលបានជោគជ័យ លើកពានបាល់ទាត់ពិភពលោក ឆ្នាំ២០២៦។សម្តេចតេជោបានសរសេរសារថា៖«ថ្ងៃនេះខ្ញុំបានជូនសារមួយជូនម៉ាក្រុង ប្រធានាធិបតីបារាំងរឿងបាល់ទាត់។ តាំងពីចុងឆ្នាំ២០២២ មកប្រធាធិបតី ម៉ាក្រុងរបស់បារាំង និងខ្ញុំតែងឆ្លងឆ្លើយជាមួយគ្នាជាប្រចាំ ទោះខ្ញុំមិនធ្វើជានាយករដ្ឋមន្ត្រីទៀតក៏ដោយ ដែលសារនោះបញ្ជូនទៅមកតាម WhatsApp» សាររបស់ខ្ញុំថ្ងៃនេះក្រៅពីសួរសុខទុក្ខគាត់ និងគ្រួសារ ខ្ញុំបានបង្ហាញនូវជំនឿទុកចិត្តលើក្រុមបាល់ទាត់បារាំង និងជូនពរក្រុមបាល់ទាត់បារាំងទទួលជោគជ័យរហូតលើកពានក្នុងការប្រកួតបាល់ទាត់ពិភពលោកឆ្នាំ២០២៦នេះ»។សម្ដេចតេជោបានបន្តថា សាររបស់ខ្ញុំបញ្ចប់ដោយពាក្យ «Vive Les Bleus !!!» រូបថតខ្ញុំលើកពាននេះជារូបភាពដែលកីឡាករបារាំងក្នុងនាម FIFA នាំមកកម្ពុជានិងប្រទេសនានានៅអាស៊ីឆ្នាំ ២០២២។ ឯអាវលេខ៩ជាអាវរបស់ខ្ញុំ ដែលតែងពាក់លេខ៩ពេលចូលទាត់បាល់កាលពីពេលមុន»៕

កម្ពុជា បង្ហាញមហិច្ឆតាក្លាយជាប្រទេសគោលដៅផលិត និងផ្គត់ផ្គង់ផលិតផលស្បែកជើងក្នុងតំបន់អាស៊ី

កម្ពុជា បានបញ្ជាក់ជាថ្មីពីមហិច្ឆតារបស់ខ្លួន ក្នុងការក្លាយជាគោលដៅផលិត និងផ្គត់ផ្គង់ផលិតផលស្បែកជើងឈានមុខគេមួយនៅក្នុងតំបន់អាស៊ី ខណៈដែលក្រសួងពាណិជ្ជកម្មបានលើកឡើងពីកំណើនដ៏រឹងមាំនៃលទ្ធផលនាំចេញ និងសក្តានុពលវិនិយោគដ៏ខ្ពស់របស់ប្រទេសជាតិ។ក្នុងឱកាសអញ្ជើញចូលរួមជាអធិបតីក្នុងពិធីបើក «សន្និសីទស្បែកជើងអន្តរជាតិ លើកទី៤៣» និង «ការប្រារព្ធខួបអនុស្សាវរីយ៍លើកទី៥៥ នៃសហព័ន្ធសមាគមស្បែកជើងអន្តរជាតិ» កាលពីថ្ងៃទី១២ ខែកក្កដាកន្លងទៅ លោកជំទាវ ខា ឡេង រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា កម្ពុជាបានក្លាយជាមជ្ឈមណ្ឌលផលិតកម្មដ៏រស់រវើកមួយនៅក្នុងតំបន់អាស៊ី និងជាគោលដៅផ្គត់ផ្គង់កាន់តែសំខាន់សម្រាប់ម៉ាកយីហោល្បីៗ ដែលទទួលស្គាល់ជាអន្តរជាតិ។ លោកជំទាវបានឱ្យដឹងថា គិតក្នុងឆមាសទី១ នៃឆ្នាំ២០២៦នេះ ទំហំពាណិជ្ជកម្មអន្តរជាតិរបស់កម្ពុជាមានតម្លៃសរុបលើសពី ៣៨ពាន់លានដុល្លារអាម៉េរិក ខណៈដែលការនាំចេញផលិតផលស្បែកជើងមានតម្លៃរហូតដល់លើសពី ១,១ ពាន់លានដុល្លារអាម៉េរិក។ លោកជំទាវបានបន្តថា ក្រោមការដឹកនាំដ៏ឈ្លាសវៃរបស់សម្តេចនាយករដ្ឋមន្រ្តី ហ៊ុន ម៉ាណែត រាជរដ្ឋាភិបាលបន្តអនុវត្តនូវយុទ្ធសាស្ត្របញ្ចកោណ-ដំណាក់កាលទី១ ដើម្បីលើកកម្ពស់ផលិតភាព ភាពប្រកួតប្រជែង ការវិនិយោគប្រកបដោយគុណភាព មូលធនមនុស្ស និងបរិយាកាសធុរកិច្ច។ ឆ្លៀតក្នុងឱកាសនោះ លោកជំទាវ បានអំពាវនាវ និងស្វាគមន៍ការវិនិយោគពីបរទេសបន្ថែមទៀត មិនត្រឹមតែលើការផលិតស្បែកជើងប៉ុណ្ណោះទេ ប៉ុន្តែថែមទាំងលើផ្នែកភស្តុភារកម្ម, ស្វ័យប្រវត្តកម្ម, ការស្រាវជ្រាវនិងអភិវឌ្ឍន៍, ការច្នៃប្រឌិត, ចង្វាក់ផលិតកម្មបៃតងប្រកបដោយចីរភាព, បច្ចេកវិទ្យាឌីជីថល និងការអភិវឌ្ឍជំនាញកម្លាំងពលកម្មផងដែរ ដោយផ្អែកលើកត្តាអំណោយផលរបស់កម្ពុជា រួមមានស្ថិរភាពនយោបាយ ការចូលទៅកាន់ទីផ្សារជាយុទ្ធសាស្ត្រ ការអនុគ្រោះពាណិជ្ជកម្ម និងបរិយាកាសអំណោយផលខ្លាំងដល់ការវិនិយោគ។អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា និងជាប្រធានសហព័ន្ធសមាគមស្បែកជើងអន្តរជាតិ បានបញ្ជាក់ឱ្យដឹងថា គិតត្រឹមខែកុម្ភៈ ឆ្នាំ២០២៦ ប្រទេសកម្ពុជាមានរោងចក្រពាក់ព័ន្ធនឹងវិស័យស្បែកជើងចំនួន ២១៩រោងចក្រ និងផ្តល់ការងារដល់កម្មករនិយោជិតជិត ១៨ម៉ឺន ៥ពាន់នាក់ រួមទាំងទទួលបានការអនុគ្រោះពន្ធក្នុងការចូលទៅកាន់ទីផ្សារសកលសំខាន់ៗ រួមមាន សហរដ្ឋអាម៉េរិក សហភាពអឺរ៉ុប ចក្រភពអង់គ្លេស ប្រទេសចិន ប្រទេសជប៉ុន ប្រទេសកូរ៉េខាងត្បូង និងអាស៊ាន ដែលបង្កើតឱ្យមានឱកាសកាន់តែលេចធ្លោថែមទៀតសម្រាប់ការធ្វើពាណិជ្ជកម្ម និងការវិនិយោគ។សូមបញ្ជាក់ថា ព្រឹត្តការណ៍«សន្និសីទស្បែកជើងអន្តរជាតិ លើកទី៤៣» និង «ការប្រារព្ធខួបអនុស្សាវរីយ៍លើកទី៥៥ នៃសហព័ន្ធសមាគមស្បែកជើងអន្តរជាតិ» ដ៏មានសារៈសំខាន់នេះ បានទាក់ទាញប្រតិភូជាសមាជិកសហព័ន្ធសមាគមស្បែកជើងអន្តរជាតិ (CIFA) មកពី ១៩ប្រទេស និងតំបន់ រួមទាំងមន្ត្រីរាជរដ្ឋាភិបាល តំណាងស្ថានតំណាងការទូត អង្គការអន្តរជាតិ វិនិយោគិន ក្រុមហ៊ុនផលិត និងថ្នាក់ដឹកនាំធុរកិច្ចជាច្រើនរូប ដើម្បីជួបជុំគ្នាពិភាក្សាអំពីអនាគតនៃឧស្សាហកម្មស្បែកជើងសកល ចំពេលដែលមានការផ្លាស់ប្តូរយ៉ាងលឿនផ្នែកបច្ចេកវិទ្យា និងទីផ្សារ៕អត្ថបទ៖ ឈិត បូរ៉ាវី

អតីតសកម្មជនគណបក្សប្រឆាំងចំនួន ១០២នាក់ សុំចូលរួមជីវភាពនយោបាយជាមួយគណបក្សប្រជាជនកម្ពុជា

លោក រស់ ចំណាន ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា រួមដំណើរដោយ លោក សឿង ចក់ និងក្រុមការងារពិសេស នាព្រឹកថ្ងៃទី១២ ខែកក្កដា ឆ្នាំ២០២៦ បានអញ្ជើញចុះជួបសំណេះសំណាល និងទទួលស្វាគមន៍យ៉ាងកក់ក្តៅចំពោះបងប្អូនអតីតសកម្មជនរបស់គណបក្សភ្លើងទៀនសរុបចំនួន ១០២នាក់ ដែលបានស្ម័គ្រចិត្តចូលរួមរស់ក្នុងជីវភាពនយោបាយជាមួយគណបក្សប្រជាជនកម្ពុជា។ ពិធីជួបសំណេះសំណាល និងទទួលស្វាគមន៍នេះ ត្រូវបានរៀបចំឡើងនៅក្នុងខេត្តកណ្តាលក្រោមការចង្អុលបង្ហាញ និងយកចិត្តទុកដាក់ខ្ពស់ពីសំណាក់ឯកឧត្តម គួច ចំរើន ប្រធានគណៈកម្មាធិការគណបក្សប្រជាជនកម្ពុជាខេត្តកណ្តាលផងដែ។សកម្មជនទាំង១០២នាក់មកពីបណ្តាលឃុំនានាមានដូចជា៖ ឃុំស្វាយប្រទាល ឃុំត្រើយស្លា ឃុំខ្ពប ឃុំតាលន់ នៃស្រុកស្អាង និងឃុំកោះធំ(ក) នៃស្រុកកោះធំ ក្រោមបរិយាកាសដ៏ស្និទ្ធស្នាល និងរីករាយជាគ្រួសារខ្មែរតែមួយ។នៅក្នុងឱកាសដ៏មានអត្ថន័យនោះ លោក រស់ ចំណាន បានពាំនាំនូវប្រសាសន៍ផ្តាំផ្ញើសួរសុខទុក្ខ សេចក្តីនឹករលឹក និងការគិតគូរយ៉ាងជ្រាលជ្រៅបំផុតពីសំណាក់ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា សម្តេចធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម គួច ចំរើន ប្រធានគណៈកម្មាធិការគណបក្សប្រជាជនកម្ពុជាខេត្តកណ្តាល និងជាអភិបាលនៃគណៈអភិបាលខេត្តកណ្តាល ដែលជានិច្ចកាល លោកតែងតែយកចិត្តទុកដាក់ចំពោះសុខទុក្ខ និងជីវភាពរស់នៅរបស់បងប្អូនប្រជាពលរដ្ឋគ្រប់ពេលវេលា។លោក រស់ ចំណាន ក៏បានសម្តែងនូវការកោតសរសើរ និងវាយតម្លៃខ្ពស់ចំពោះការសម្រេចចិត្តដ៏ត្រឹមត្រូវរបស់បងប្អូនអតីតសកម្មជនទាំងអស់ ដែលបានមើលឃើញច្បាស់ពីតថភាពសង្គម នូវការអភិវឌ្ឍពិតប្រាកដ និងសុខសន្តិភាពពេញលេញ ក្រោមការដឹកនាំរបស់គណបក្សប្រជាជនកម្ពុជា។ លោកបានបញ្ជាក់ថាគណបក្សប្រជាជនកម្ពុជា គឺជាបក្សតែមួយគត់ដែលមានភាពចាស់ទុំខាងនយោបាយ មានរចនាសម្ព័ន្ធរឹងមាំ និងតែងតែនៅរួមសុខរួមទុក្ខជាមួយប្រជាពលរដ្ឋគ្រប់កាលៈទេសៈ។ លោកក៏បានអំពាវនាវ សូមបងប្អូនប្រជាពលរដ្ឋទាំងអស់ ត្រូវជឿជាក់ និងគាំទ្រលើការដឹកនាំរបស់សម្តេចតេជោ និងសម្តេចបវរធិបតី កុំជឿលើការញុះញង់ របស់ក្រុមជ្រុលនិយមមួយចំនួនដែលតែងតែលាបពណ៌មកលើថ្នាក់ដឹកនាំជារឿយៗ។តំណាងអតីតសកម្មជនដែលទើបចូលរួមជីវភាពនយោបាយថ្មី ក៏បានធ្វើការប្តេជ្ញាចិត្តយ៉ាងមុតមាំថានឹងស្មោះត្រង់ ការពារតម្លៃសន្តិភាព និងរួមរស់ជាមួយគណបក្សប្រជាជនកម្ពុជាជារៀងរហូត។បន្ទាប់ពីបញ្ចប់ពិធីទទួលស្វាគមន៍ លោក រស់ ចំណាន និងក្រុមការងារ ក៏បានបន្តដំណើរចុះសួរសុខទុក្ខដោយផ្ទាល់ និងនាំយកអំណោយសប្បុរសធម៌ទៅចែកជូនដល់គ្រួសារប្រជាពលរដ្ឋដែលមានជីវភាពខ្វះខាត និងចាស់ជរាគ្មានទីពឹង នៅក្នុងស្រុកស្អាង ចំនួន ៤គ្រួសាររួមមាន៖ - គ្រួសារទី១៖ អ្នកមីង ម៉ៅ ប៉ន រស់នៅភូមិកណ្តាលកោះតូច ឃុំតាលន់ ស្រុកស្អាង ខេត្តកណ្ដាល។ - គ្រួសារទី២៖ លោក លាប សំណាង រស់នៅភូមិកណ្តាលកោះតូច ឃុំតាលន់ ស្រុកស្អាង ខេត្តកណ្ដាល។ - គ្រួសារទី៣៖ លោកយាយ សោម វ៉ាត រស់នៅភូមិព្រែកតាសៅ ឃុំស្វាយប្រទាល ស្រុកស្អាង ខេត្តកណ្ដាល។ - គ្រួសារទី៤៖ លោកអ៊ំប្រុស ឆយ ឈុំ រស់នៅភូមិព្រៃទទឹង ឃុំខ្ពប ស្រុកស្អាង ខេត្តកណ្ដាល។ អំណោយដែលបានចែកជូនក្នុងមួយគ្រួសារៗទទួលបាន៖ អង្ករ, ត្រីខ, មី, ទឹកត្រី, ទឹកស៊ីអ៊ីវ ភួយ ព្រមទាំងថវិកាមួយចំនួន ដើម្បីជួយសម្រាលបន្ទុកជីវភាពប្រចាំថ្ងៃរបស់បងប្អូន។ ជាទីបញ្ចប់ បងប្អូនប្រជាពលរដ្ឋខ្វះខាត និងសមាជិកថ្មីទាំងអស់ បានសម្តែងនូវការដឹងគុណយ៉ាងជ្រាលជ្រៅបំផុត និងបានបួងសួងជូនពរដល់សម្តេចតេជោ ហ៊ុន សែន សម្តេចធិបតី ហ៊ុន ម៉ាណែត និងឯកឧត្តម គួច ចំរើន ព្រមទាំងក្រុមការងារ សូមឲ្យមានសុខភាពល្អបរិបូរណ៍ ដើម្បីបន្តដឹកនាំនាវាកម្ពុជាឆ្ពោះទៅរកភាពរុងរឿងជារៀងរហូតតទៅ៕ អត្ថបទ៖ វង្ស សុភាព

ពលរដ្ឋរងគ្រោះខ្យល់កន្រ្តាក់ ២៣គ្រួសារ ទទួលអំណោយពីសាខាកាកបាទក្រហមខេត្តបាត់ដំបង

អនុវត្តតាមអនុសាសន៍ដ៏ខ្ពង់ខ្ពស់របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា នៅថ្ងៃទី១២ ខែកក្កដា ឆ្នាំ២០២៦ ឯកឧត្តម សុខ លូ អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង បានអញ្ជើញជួបសំណេះសំណាល សួរសុខទុក្ខ និងនាំយកអំណោយមនុស្សធម៌ផ្តល់ជូនប្រជាពលរដ្ឋរងគ្រោះដោយខ្យល់កន្ត្រាក់ចំនួន ២៣គ្រួសារ នៅភូមិចំនួន២ នៃឃុំពេជ្រចិន្តា ស្រុកភ្នំព្រឹក។មានប្រសាសន៍សំណេះសំណាលនាឱកាសនោះ ឯកឧត្តម សុខ លូ បានពាំនាំនូវការផ្ដាំផ្ញើសាកសួរសុខទុក្ខ ប្រកបដោយក្ដីនឹករលឹក អាណិតអាសូរ និងសោកស្តាយជាទីបំផុតពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់គ្រួសាររងគ្រោះទាំងអស់។ ឯកឧត្តមប្រធាន បានបញ្ជាក់ថា ទុក្ខលំបាករបស់ប្រជាពលរដ្ឋគ្រប់រូប គឺជាក្តីកង្វល់របស់ថ្នាក់ដឹកនាំដែលត្រូវតែគិតគូរ និងស្វែងរកដំណោះស្រាយឱ្យបានល្អប្រសើរ។ ជាក់ស្តែងដូចជាការនាំយកអំណោយសង្គ្រោះបន្ទាន់មកចែកជូនដល់ប្រជាពលរដ្ឋរងគ្រោះនាពេលនេះជាដើម ទោះបីជាមិនអាចជួយបំពេញបានទាំងស្រុងទៅតាមតម្រូវការក៏ដោយ ក៏ប៉ុន្តែសាខាតែងតែបានចូលរួមចំណែកជួយដោះស្រាយ និងសម្រាលនូវការខ្វះខាតរបស់បងប្អូនបានមួយផ្នែក។ ម៉្យាងវិញទៀត អំណោយដែលសាខាបាននាំយកមកឧបត្ថម្ភជូនបងប្អូននាឱកាសនេះ គឺធ្វើឡើងដោយបេះដូង គ្មានការប្រកាន់ពូជសាសន៍ ពណ៌សម្បុរ សាសនា ឬនិន្នាការនយោបាយអ្វីឡើយ។ឯកឧត្តម បានអំពាវនាវដល់ប្រជាពលរដ្ឋទាំងអស់ សូមបង្កើនការប្រុងប្រយ័ត្នខ្ពស់ចំពោះបាតុភូតផ្គរ រន្ទះ និងខ្យល់កន្ត្រាក់ និងត្រូវថែទាំសុខភាពឱ្យបានល្អ ជាពិសេសត្រូវមើលថែកូនចៅតូចៗឱ្យបានដិតដល់ចៀសវាងគ្រោះថ្នាក់ផ្សេងៗ។ បន្ថែមពីនេះត្រូវរួមគ្នាបង្កើនការប្រុងប្រយ័ត្នចំពោះជំងឺគ្រុនឈាម ដោយសាររដូវនេះជារដូវវស្សា មានភ្លៀងធ្លាក់គ្រប់ទីកន្លែងដែលអាចបង្កើតជាជម្រកមូសខ្លា។ ឯកឧត្តម បានណែនាំដល់អាជ្ញាធរមូលដ្ឋានគ្រប់លំដាប់ថ្នាក់ត្រូវខិតខំដឹកនាំកម្លាំងចុះជួយអន្តរាគមន៍ជួយដល់ប្រជាពលរដ្ឋរងគ្រោះដោយគ្រោះធម្មជាតិឱ្យបានទាន់ពេលវេលា។ប្រជាពលរដ្ឋរងគ្រោះបានសម្តែងនូវក្តីរំភើបរីករាយ និងដឹងគុណយ៉ាងជ្រាលជ្រៅបំផុត ចំពោះសាខាកាកបាទក្រហមកម្ពុជាខេត្តដែលបាននាំយកអំណោយមនុស្សធម៌មកផ្តល់ជូនដល់ដៃពួកគាត់ទាន់ពេលវេលា ដែលនេះពិតជាមានតម្លៃមហាសាលក្នុងការជួយសម្រាលទុក្ខលំបាកក្នុងជីវភាពប្រចាំថ្ងៃ និងជួយឱ្យពួកគាត់មានកម្លាំងចិត្តក្នុងការជួសជុលផ្ទះសម្បែងឡើងវិញ។ ទន្ទឹមនឹងនេះបងប្អូនប្រជាពលរដ្ឋក៏បានលំឱនកាយវាចាចិត្តគោរពថ្លែងអំណរគុណយ៉ាងជ្រាលជ្រៅចំពោះ ឯកឧត្តម សុខ លូ ប្រធានគណៈកម្មាធិការសាខាខេត្ត និងជាពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូរពីសុខទុក្ខរបស់ប្រជាពលរដ្ឋនៅគ្រប់ទីកន្លែង ស្របតាមទិសស្លោក «ទីណាមានទុក្ខលំបាក ទីនោះមានកាកបាទក្រហមកម្ពុជា»៕

រដ្ឋមន្ត្រីក្រសួងអប់រំ យុវជន និងកីឡា អញ្ជើញបើកកម្មវិធីរត់ ដើម្បីការអប់រំកុមារព្រំដែន

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រី្ត រដ្ឋមន្រី្តក្រសួងអប់រំ យុវជន និងកីឡា បានអញ្ជើញជាអធិបតី បើកកម្មវិធីរត់ ដើម្បីការអប់រំកុមារព្រំដែន, ដើម្បីបំផុសឲ្យមានចលនាស្នេហាជាតិស្ថិតនៅទីតាំងផ្សារទំនើបជីបម៉ុង២៧១ មេហ្គាម៉ល, នាព្រឹកថ្ងៃទី១២ ខែកក្កដា ឆ្នាំ២០២៦នេះ។ លោកបណ្ឌិត ហុង លីម ប្រធានសហ័ពន្ធសេវាអប់រំនៅកម្ពុជា បានលើកឡើងថា ការអប់រំ គឺជាមូលដ្ឋានគ្រឹះដ៏សំខាន់សម្រាប់ការអភិវឌ្ឍធនធានមនុស្ស ការកាត់បន្ថយភាពក្រីក្រ និងការលើកកម្ពស់សុខុមាលភាពសង្គម។ កុមារគ្រប់រូបគួរតែទទួលបានឱកាសអប់រំប្រកបដោយសមធម៌ ដោយមិនគិតពីទីតាំងភូមិសាស្ត្រ ស្ថានភាពសេដ្ឋកិច្ច ឬបរិបទសង្គមរបស់ពួកគេ។ ទោះជាយ៉ាងណា កុមារជាច្រើនដែលរស់នៅតាមតំបន់ព្រំដែន ដែលរងផលប៉ះពាល់ពីសង្រ្គាមខ្មែរ-សៀម បាន និងកំពុង ជួបប្រទះបញ្ហា ប្រឈមជាច្រើនក្នុងការទទួលបានការអប់រំ សាលារៀនត្រូវបានបំផ្លាញ កង្វះគ្រូបង្រៀន សម្ភារសិក្សាមិនគ្រប់គ្រាន់ បច្ចេកវិទ្យាមានកម្រិត និងជីវភាពគ្រួសារដែលមិនអាចទ្រទ្រង់ការសិក្សា របស់កូនៗបាន។ បញ្ហាទាំងនេះបណ្តាលឱ្យកុមារមួយចំនួនបោះបង់ការសិក្សា ឬមិនអាចបន្តការសិក្សា រហូតដល់កម្រិតខ្ពស់បាន។ ដោយមើលឃើញពីសារៈសំខាន់នៃការអប់រំ និងស្ថានភាពជាក់ស្តែងនេះ គណៈកម្មការនៃសមាគមសហព័ន្ធសេវាអប់រំនៅកម្ពុជា បានផ្តួចផ្តើមកម្មវិធី «រត់ដើម្បីការអប់រំកុមារព្រំដែន» ក្នុងគោលបំណងលើកកម្ពស់ ការយល់ដឹងរបស់សាធារណជន អំពីសារៈសំខាន់នៃការគាំទ្រការអប់រំ និងប្រមូលធនធានពីសប្បុរសជន ស្ថាប័នរដ្ឋ វិស័យឯកជន អង្គការជាតិ និងអន្តរជាតិ ដើម្បីរួមចំណែកអភិវឌ្ឍវិស័យអប់រំនៅតំបន់ព្រំដែន។ កម្មវិធីនេះត្រូវបានបង្កើតឡើងដើម្បីប្រើប្រាស់កីឡារត់ជាសកម្មភាពសប្បុរសធម៌ដែលភ្ជាប់ការថែរក្សាសុខភាពជាមួយការចូលរួមក្នុងការងារសង្គម។ ការចូលរួមរបស់អ្នករត់ម្នាក់ៗ និងការគាំទ្រពីដៃគូឧបត្ថម្ភ នឹងក្លាយជាកម្លាំងសម្រាប់បង្កើតឱកាសអប់រំដល់កុមារដែលខ្វះខាត។ឆ្លៀតក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអរគុណដល់អស់លោក លោកស្រី បងប្អូនទាំងអស់ ដែលបានចូលរួមយ៉ាងច្រើនកុះករនាថ្ងៃនេះ ក្នុងកម្មវិធីរត់ ដើម្បីការអប់រំកុមារព្រំដែន និងសូមថ្លែងអំណរគុណដល់សមាគមសហព័ន្ធសេវាអប់រំនៅកម្ពុជា ដែលបានរៀបចំឲ្យមានការរត់នេះឡើង។ ក្នុងគោលដៅមិនត្រឹមតែប្រមូលថវិកា ដើម្បីជួយដល់កុមារ និងសាលារៀននៅតាមព្រំដែនប៉ុណ្ណោះទេ ប៉ុន្តែដើម្បីបំផុសឲ្យមានចលនាស្នេហាជាតិ ឲ្យមានចលនាមួយដើម្បីក្រើនរំលឹកដល់យើងទាំងអស់គ្នា បង្ហាញពីទឹកចិត្តឲ្យមានការឯកភាពជាតិ និងចេះសាមគ្គីភាពគ្នា។ឯកឧត្ដម សូមយកឱកាសនេះ គោរពថ្លែងអំណរគុណដល់ សម្តេចអគ្គមហាសេនាបតីតេជោ ហ៊ុន សែន និង សម្តេចមហាបវរធិបតី ហ៊ុន ម៉ាណែត ដែលតែងតែយកចិត្តទុកដាក់ដល់ប្រជាជនយើងដែលរស់នៅតាមតំបន់ព្រំដែន ជាពិសេសនៅក្នុងការការពារបូរណភាពទឹកដី និងអធិបតេយ្យភាពកម្ពុជា។ ឯកឧត្ដម អំពាវនាវសូមឲ្យបងប្អូនទាំងអស់ បន្តសហការគ្នា បន្តរួមកម្លាំងគ្នាជាធ្លុងមួយ ដើម្បីកម្ពុជា ដើម្បីកុមារកម្ពុជា និងដើម្បីបង្ហាញពីទឹកចិត្តរួមគ្នា និងសូមជូនពរឲ្យដំណើរការរត់នាថ្ងៃនេះ ទទួលបាននូវសុខភាពល្អ និងទទួលបានជោគជ័យគ្រប់ភារកិច្ច៕ អត្ថបទ រដ្ឋា

សម្តេចកិត្តិសង្គហបណ្ឌិត ម៉ែន សំអន អញ្ជើញសម្ពោធស្នាក់ការបក្សក្រុងបាវិតតម្លៃជាង ៥២ ម៉ឺនដុល្លារ

សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលគណបក្សចុះជួយខេត្ត បានអញ្ជើញសម្ពោធ ដាក់អោយប្រើប្រាស់ ស្នាក់ការគណបក្សប្រជាជនកម្ពុជាក្រុងបាវិត ខេត្តស្វាយរៀង នៅថ្ងៃទី១១ ខែកក្កដា ឆ្នាំ២០២៦។ស្នាក់ការនេះ មានទំហំ ២៦ម៉ែត្រ X ២៤ម៉ែត្រ កម្ពស់ ២ជាន់ មានបំពាក់នូវអេក្រង់ LED បំពាក់សម្ភារៈការិយាល័យគ្រប់ប្រភេទ និងមានបំពាក់នូវគ្រឿងបំពងសំឡេង នៅតាមសាលប្រជុំ សាងសង់ លើផ្ទៃដី ១ ៥០០ម៉ែត្រការ៉េ បំពាក់អំពូលសូឡា មានតម្លៃចំនួន ៤សែន ៨ម៉ឺន ៣ពាន់ ៦៣៥ដុល្លារ និង ១៥ លាន ៧សែន រៀល។មានប្រសាសន៍ ក្នុងឱកាសនោះ សម្តេចកិត្តិសង្គហបណ្ឌិត ម៉ែន សំអន បានសំដែងនូវការកោតសរសើរចំពោះថ្នាក់ដឹកនាំក្រុមការងារគណបក្សចុះជួយក្រុង និងមន្ត្រីបក្សនៅក្នុងមូលដ្ឋាន ពិសេសទឹកចិត្តដ៏សប្បុរសរបស់សប្បុរសជនទាំងអស់ ដែលបានលះបង់ធនធានផ្ទាល់ខ្លួនក្នុងការចូលរួមចំណែកកសាងសមិទ្ធផលប្រវត្តិសាស្ត្រមួយនេះ។ សម្តេចបានចាត់ទុកថា ទឹកចិត្តនិងការលះបង់ទាំងនេះ គឺជាកម្លាំងចលករដ៏រឹងមាំ ដែលមិនអាចខ្វះបាន ក្នុងការជួយជំរុញឲ្យរចនាសម្ព័ន្ធបក្សនៅមូលដ្ឋានកាន់តែមានភាពរឹងមាំ និងមានលទ្ធភាពកាន់តែទូលំទូលាយក្នុងការបម្រើពលរដ្ឋ។ឆ្លៀតក្នុងឱកាសនោះ សម្តេចកិត្តិសង្គហបណ្ឌិត បានលើកឡើងយ៉ាងច្បាស់ៗអំពីភាពចាស់ទុំខាងនយោបាយរបស់គណបក្សប្រជាជនកម្ពុជា ក្នុងការដឹកនាំប្រទេសជាតិ ក្រោមខ្សែបន្ទាត់នយោបាយដ៏ត្រឹមត្រូវ ជាពិសេសគឺ នយោបាយ ឈ្នះ-ឈ្នះ របស់ សម្តេចតេជោតេជោ ហ៊ុន សែន។សម្តេចកិត្តិសង្គហបណ្ឌិត បានបញ្ជាក់ថា ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន ប្រធានគណបក្ស បានប្រែក្លាយក្រុងបាវិតទាំងស្រុង ពីទឹកដីដែលធ្លាប់រងការបំផ្លិចបំផ្លាញដោយសារភ្លើងសង្គ្រាម និងការបែកបាក់ មកជាតំបន់អភិវឌ្ឍន៍ដ៏មានសក្តានុពល។ បច្ចុប្បន្ន បាវិតបានក្លាយជាមជ្ឈមណ្ឌលសេដ្ឋកិច្ចដ៏រស់រវើក ដែលសម្បូរទៅដោយតំបន់សេដ្ឋកិច្ចពិសេស រោងចក្រ សហគ្រាសធំៗ និងមានសមត្ថភាពខ្ពស់ក្នុងការស្រូបទាញកម្លាំងពលកម្មរាប់ម៉ឺនកន្លែង ជូនដល់បងប្អូនពលរដ្ឋ និងកូនចៅកសិកររបស់យើង ជួយលើកកម្ពស់ជីវភាពប្រចាំថ្ងៃនិងកាត់បន្ថយការចំណាកស្រុកយ៉ាងច្រើនសន្ធឹកសន្ធាប់»។សម្តេចក៏បានពាំនាំនូវមតិផ្តាំផ្ញើយ៉ាងម៉ឺងម៉ាត់ដល់ គណៈកម្មាធិការបក្សគ្រប់លំដាប់ថ្នាក់នៃក្រុងបាវិត ត្រូវរួមគ្នាបន្តថែរក្សាការពារសមិទ្ធផលអគារស្នាក់ការថ្មីនេះឲ្យបានល្អ និងត្រូវប្រើប្រាស់ទីតាំងនេះជាស្នូលក្នុងការបម្រើប្រជាពលរដ្ឋដោយភាពស្មោះត្រង់។ បន្ថែមលើនេះ ត្រូវបន្តខិតខំពង្រឹងសាមគ្គីភាពផ្ទៃក្នុង យកចិត្តទុកដាក់ដោះស្រាយរាល់ទុក្ខកង្វល់របស់ប្រជាពលរដ្ឋនៅមូលដ្ឋានឲ្យបានទាន់ពេលវេលា ព្រមទាំងចូលរួមសហការថែរក្សាសន្តិសុខ សណ្តាប់ធ្នាប់សាធារណៈ នៅក្នុងតំបន់សេដ្ឋកិច្ចពិសេស និងទូទាំងក្រុងបាវិត ឲ្យបានល្អប្រសើរ ដើម្បីបង្កបរិយាកាសកក់ក្តៅ និងផ្តល់ទំនុកចិត្តខ្ពស់ដល់វិនិយោគិនជាតិ និងអន្តរជាតិ ដែលមកបណ្តាក់ទុននៅក្នុងទឹកដីដ៏មានសក្តានុពលមួយនេះ។ជាពិសេស គ្រប់អង្គភាពពាក់ព័ន្ធត្រូវប្តេជ្ញារួមគ្នា បង្ក្រាបការឆបោកតាមបច្ចេកវិទ្យា (ស្គែមអនឡាញ)៕

អភិបាលខេត្តកោះកុង ចាត់ទុកបុណ្យពូនភ្នំទុរេន ជាកម្លាំងសាមគ្គី និងលើកស្ទួយទិន្នផលកសិកម្ម

លោកជំទាវអភិបាលខេត្តកោះកុង ល្ងាចថ្ងៃទី១១ ខែកក្កដា ឆ្នាំ២០២៦ បានចាត់ទុក ពិធីបុណ្យពូនភ្នំទុរេន នៅស្រុកថ្មបាំង ជាកម្លាំងសាមគ្គីក្នុងមូលដ្ឋានរវាងប្រជាកសិករ និងកសិករ ពិសេសជាការផ្សព្វផ្សាយលើកស្ទួយទិន្នផលកសិកម្មផងដែរ។ការប្រកាសបែបនេះរបស់ លោកជំទាវ ឈី វ៉ា បានធ្វើឡើងក្នុងពិធីបុណ្យពូនភ្នំទុរេនលើកទី២ នៅក្នុង ស្រុកថ្មបាំង ដោយមានអ្នកទេសចរ និងពលរដ្ឋជាច្រើនបានចូលរួមទស្សនា តាមរយៈធ្វើពិធីសាសនា និងសាករសជាតិទុរេន។លោកជំទាវអភិបាលខេត្តកោះកុង បានរំលេចថា ស្រុកថ្មបាំង សក្តានុពលទេសចរណ៍ និងសណ្ឋានដីមានជីវជាតិ សមស្របសម្រាប់ការអភិវឌ្ឍវិស័យកសិកម្ម និងកសិ-ទេសចរណ៍។ ដំណាំសាវម៉ាវ មង្ឃុត ល្ហុង ចេក កៅស៊ូ និងជាពិសេស ទុរេន បានក្លាយជាដំណាំដ៏មានតម្លៃ ទទួលបានការទទួលស្គាល់ពីគុណភាព និងរសជាតិ ព្រមទាំងមានការនាំចេញទៅកាន់ទីផ្សារប្រទេសចិនផងដែរ។លោកជំទាវ ឈី វ៉ា យល់ឃើញថា ការរៀបចំពិធីបុណ្យពូនភ្នំទុរេននេះ ជាចំណែកមួយបង្ហាញពីសាមគ្គីភាពរបស់ប្រជាកសិករពេលប្រមូលផល ហើយបានបរិច្ចាមកធ្វើបុណ្យ និងបង្កើការទាក់ទាញភ្ញៀវទេសចរមកលេងកម្សាន្តក្នុងមូលដ្ឋានកាន់តែច្រើន។លោកស្រី ទួត ហ្វាទីម៉ា អភិបាលស្រុកថ្មបាំង លើកឡើងថា ពិធីបុណ្យពូនភ្នំទុរេនសាមគ្គី ក៏ធ្វើឡើងគោលបំណងលើកកម្ពស់កេរ្តិ៍ឈ្មោះទុរេនឱ្យកាន់តែល្បីល្បាញ ផ្ដល់ឱកាសដល់កសិករ និង អាជីវករ ក្នុងការដាក់តាំងបង្ហាញ និងលក់ផលិតផលរបស់ខ្លួន ដើម្បីទាក់ទាញភ្ញៀវទេសចរជាតិ អន្តរជាតិ ដែលមកកម្សាន្ត និងបានភ្លក់រស់ជាតិទុរេននៅតំបន់ថ្មបាំង ហើយឈ្វេងយល់អំពីសក្តានុពលទេសចរណ៍ និងកសិកម្មក្នុងស្រុក។លោកស្រីអភិបាលស្រុកថ្មបាំង បង្ហាញថា ទិន្នផលទុរេនដែលបានមកពីការឧបត្ថម្ភរបស់ប្រជាកសិករ និងសប្បុរសជន សម្រាប់រៀបចំក្នុងពិធីបុណ្យពូនភ្នំទុរេន យកមកធ្វើបាយដំណើបទុរេន និងសម្រាប់ភ្ញៀវទេសចរភ្លក់ ក្រោយពេលចប់កម្មវិធី និងយកទៅឧបត្ថម្ភដល់វីរៈកងទ័ពជួរមុខ។គួរបញ្ជាក់ថា ពិធីបុណ្យពូនភ្នំទុរេន ត្រូវបានភ្ញៀវទេសចរក្នុងស្រុក និងប្រជាពលរដ្ឋ គាំទ្រពេញទំហឹង ដោយបានចូលរួមឧបត្ថម្ភជាផ្លែទុរេន និងផ្លែឈើផ្សេងៗ ព្រមទាំងភ្លក់រសជាតិផ្លែឈើចម្រុះដាក់បានដាក់តាំងបង្ហាញ។ ស្រុកថ្មបាំងជាស្រុកមួយសំបូរទៅដោយតំបន់អេកូទេសធម្មជាតិច្រើនដូចជា៖ ទឹកជ្រោះ ការបោះតង់ ជិះទូកតាមដងព្រែក មើលសត្វព្រៃ និងទិន្នផលកសិកម្មយ៉ាងសំបូរបែប៕ អត្តបទ៖ ឈឹម មករា

សភាប្រើភាសាបារាំងជិត ១០០ ប្រទេស ចេញមុខអំពាវនាវឲ្យភាគីថៃគោរពអធិបតេយ្យភាពកម្ពុជា

សភាប្រើភាសាបារាំងជិតមួយរយប្រទេស បានចេញមុខអំពាវនាវឲ្យភាគីថៃ គោរពនូវអធិបតេយ្យ និងបូរណភាពទឹកដីកម្ពុជា និងត្រូវគោរពបទឈប់បាញ់ និងកិច្ចព្រមព្រៀងនៃសេចក្តីថ្លែងការណ៍ ស្តីពី សន្តិភាព កូឡាឡាំពួ ហើយត្រូវបញ្ឈប់រាល់សកម្មភាពទាំងឡាយណាដែលបង្កឡើងជាឯកតោភាគីពីសំណាក់យោធាថៃជាដើម។យោងតាមសេចក្តីសម្រេចរបស់ សភាប្រើភាសាបារាំង ក្រោយកិច្ចប្រជុំពេញអង្គ នៅរដ្ឋធានីយុនដេ កាមេរូន កាលពីថ្ងៃទី១០ ដល់ថ្ងៃទី១១ ខែកក្កដា ឆ្នាំ២០២៦ បានលើកឡើងថា ភាពតានតឹងដែលនៅតែបន្តកើតមាននៅតាមព្រំដែនរវាងកម្ពុជា និងថៃ ចាប់តាំងពីខែកក្កដា ឆ្នាំ២០២៥ ដេលបានបណ្តាលឲ្យ មានការបាត់បង់ជីវិតមនុស្សយ៉ាងច្រើនសន្ធឹកសន្ធាប់ ការផ្លាស់ប្តូរទីលំនៅយ៉ាងច្រើននៃប្រជាជនស៊ីវិល និងរបាយការណ៍អំពីការរំលោភបំពានលើបទឈប់បាញ់ និងបូរណភាពទឹកដីកម្ពុជារួមទាំងការខូចខាត ដល់ទីតាំងវប្បធម៌ និងសាសនា ដែលទីតាំងមួយចំនួនត្រូវបានចុះបញ្ជីបេតិកភណ្ឌពិភពលោករបស់អង្គ ការយូណេស្កូជាដើម។បន្ទាប់ពីឃើញភាគីថៃនៅតែបង្ករឿងជាឯកតោភាគីមកលើកម្ពុជា ជាបន្តបន្ទាប់នោះ សភាប្រើភាសាបារាំង ដែលមានសមាជិកមួយរយប្រទេស បានអំពាវនាវឲ្យមានការគោរពអធិបតេយ្យ និងបូរណភាពទឹក ដីរបស់កម្ពុជា ក៏ដូចជាការគោរពតាមការប្តេជ្ញាចិត្តចំពោះសន្តិភាពប្រកបដោយនិរន្តភាព នៅតាមបណ្តោយព្រំដែន និងការជៀសវាងរាល់សកម្មភាពឯកតោភាគីណាមួយ ដែលអាចបង្កភាពតានតឹងកាន់តែ ធ្ងន់ធ្ងរនោះ។នៅក្នុងសេចក្តីសម្រេចរបស់ សភាប្រើភាសាបារាំងនេះដែរ ក៏បានអំពាវនាវឲ្យភាគីថៃ គោរពបទ ឈប់បាញ់ និងការអនុវត្តកិច្ចព្រមព្រៀងនៃសេចក្តីថ្លែងការណ៍ ដែលបានចុះហត្ថលេខាដោយនាយករដ្ឋមន្រ្តីកម្ពុជា និងនាយករដ្ឋមន្រ្តីថៃ នៅទីក្រុងកូឡាឡាំពួ កាលពីថ្ងៃទី២៦ ខែតុលា ឆ្នាំ២០២៥ផងដែរ។សភាប្រើភាសាបារាំង ក៏បានសម្តែងការព្រួយបារម្ភយ៉ាងខ្លាំងចំពោះការបន្តភាពតានតឹង និងសកម្មភាពនានាដែលត្រូវបានរាយការណ៍នៅក្នុងតំបន់ព្រំដែន ក្រោមការកាន់កាប់ដោយភាគីថៃ មានដូចជាអាទិ៍ ការសាងសង់ហេដ្ឋារចនាសម្ព័ន្ធស៊ីវិល និងយោធា ការរៀបចំពិធីសាសនានៅក្នុងទីតាំងវប្បធម៌ និងសាសនា ក៏ដូចជាគំនិតផ្តួចផ្តើមក្នុងការបែងចែកធីធ្លី នៅតំបន់ទាំងនោះ ផងដែរ។ មួយវិញទៀតសភាប្រើភាសាបារាំងទាំងនោះ ក៏មានការសោកស្តាយយ៉ាងជ្រាលជ្រៅចំពោះការរងទុក្ខវេទនារបស់ប្រជាជនស៊ីវិល ក៏ដូចជាការប៉ះពាល់ ឬការបំផ្លិតបំផ្លាញបេតិកភណ្ឌវប្បធម៌ ដែលជាកេរមរតរួមរបស់មនុស្សជាតិ តាមរបៀបមួយដែលអាចធ្វើឲ្យប៉ះពាល់ដល់ចក្ខុវិស័យនៃសន្តិភាពយូរអង្វែង និងការផ្សះផ្សារជាតិជាដើម។យ៉ាងណាក៏ដោយ សភាប្រើភាសាបារាំងទាំងនោះ ក៏បានអំពាវនាវ ឲ្យមានដំណោះស្រាយដោយ សន្តិវិធី ក្នុងរយៈពេលខ្លី តាមរយៈយន្តការទ្វេភាគីទាំងអស់ ដែលបានបង្កើតឡើងដោយ JBC និងធ្វើយ៉ាងណាឲ្យមានការបន្ធូរបន្ថយភាពតានតឹង ការបន្តកិច្ចសន្ទនារវាងភាគីពាក់ព័ន្ធ និងការដកកងកម្លាំងប្រដាប់ អាវុធទាំងអស់ជាបន្ទាន់ចេញពីតំបន់ជម្លោះផងដែរ៕ អត្ថបទ៖ បាន ចក់

គណៈចលនាមហាជន រៀបចំបាឋកថាស៊េរី «កេរដំណែលរស់៖ គុណតម្លៃ ៧ មករា» នៅវិមាន ៧ មករា”

នាព្រឹកថ្ងៃទី១២ ខែកក្កដា ឆ្នាំ២០២៦ គណៈចលនាមហាជន នៃគណបក្សប្រជាជនកម្ពុជា បានរៀបចំបាឋកថាស៊េរី «កេរដំណែលរស់៖ គុណតម្លៃ ៧ មករា» នៅវិមាន ៧ មករា ក្រោមវត្តមានដ៏ខ្ពង់ខ្ពស់របស់ សម្ដេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានគណៈចលនាមហាជន នៃគណៈកម្មាធិការកណ្ដាលគណបក្សប្រជាជនកម្ពុជា អញ្ជើញធ្វើបាឋកថាក្រោមប្រធានបទ «ដំណើរតស៊ូដើម្បីបុព្វហេតុជាតិ និងប្រជាជនកម្ពុជា»។ជាកិច្ចចាប់ផ្ដើមកម្មវិធី ឯកឧត្តម ហ៊ុន ម៉ានី សមាជិកគណៈអចិន្ត្រៃយ៍គណៈកម្មាធិការកណ្ដាល និងជាអគ្គលេខាធិការគណៈចលនាមហាជន នៃគណៈកម្មាធិការកណ្ដាលគណបក្សប្រជាជនកម្ពុជា បានថ្លែងអំណរគុណយ៉ាងជ្រាលជ្រៅចំពោះ សម្ដេចកិត្តិសង្គហបណ្ឌិត ដែលបានផ្ដល់កិត្តិយសអញ្ជើញចូលរួមជាវាគ្មិនក្នុងវេទិកាដ៏មានអត្ថន័យនេះ។ឯកឧត្តមបានមានប្រសាសន៍ថា បាឋកថាស៊េរី «កេរដំណែលរស់៖ គុណតម្លៃ ៧ មករា» ត្រូវបានរៀបចំឡើងក្នុងគោលបំណងបង្កើតវេទិកាជូនថ្នាក់ដឹកនាំជំនាន់មុន ដែលជាសាក្សីរស់នៃប្រវត្តិសាស្ត្រកម្ពុជា ចែករំលែកបទពិសោធន៍ផ្ទាល់អំពីដំណើរតស៊ូរំដោះជាតិ ការបង្រួបបង្រួមជាតិ និងការកសាងសុខសន្តិភាព។ ទន្ទឹមនឹងនេះ វេទិកានេះក៏មានគោលបំណងលើកកម្ពស់ស្មារតីយុវជនឱ្យយល់ដឹងពីតម្លៃនៃការលះបង់ វីរភាព និងស្នាដៃរបស់ថ្នាក់ដឹកនាំជំនាន់មុន ព្រមទាំងបណ្ដុះស្មារតីដឹងគុណ ការទទួលខុសត្រូវ និងការប្ដេជ្ញាចិត្តបម្រើជាតិមាតុភូមិ។ ជាមួយគ្នានេះ បាឋកថាស៊េរីនេះក៏ដើរតួនាទីជាស្ពានផ្សារភ្ជាប់អន្តរជំនាន់ រវាងថ្នាក់ដឹកនាំជំនាន់មុន និងជំនាន់ក្រោយ ដើម្បីពង្រឹងស្មារតីឯកភាព សាមគ្គីភាព និងការបន្តវេនក្នុងបុព្វហេតុកសាង និងអភិវឌ្ឍជាតិ។ក្នុងន័យនេះ ឯកឧត្តមបានគូសបញ្ជាក់ថា បទពិសោធន៍ និងការចែករំលែករបស់ សម្ដេចកិត្តិសង្គហបណ្ឌិត ម៉ែន សំអន គឺជាមេរៀនដ៏មានតម្លៃសម្រាប់ថ្នាក់ដឹកនាំ និងយុវជនជំនាន់ក្រោយ ក្នុងការសិក្សា ស្វែងយល់ និងយកជាគំរូសម្រាប់ការដឹកនាំ ការគ្រប់គ្រង និងការបម្រើប្រជាជន។ ឯកឧត្តមបានបន្ថែមថា“សម្តេចកិត្តិសង្គហបណ្ឌិត មិនត្រឹមតែជានិមិត្តរូបនៃភាពឆ្នើម និងសមត្ថភាពរបស់ស្ត្រីខ្មែរប៉ុណ្ណោះទេ ប៉ុន្តែគឺជាសាក្សីរស់នៃប្រវត្តិសាស្ត្រពិត ។ ក្នុងនាមជាសាក្សីរស់នៃដំណាក់កាលប្រវត្តិសាស្ត្រដ៏សំខាន់របស់កម្ពុជា សម្ដេចបានចូលរួមយ៉ាងសកម្មក្នុងបុព្វហេតុរំដោះជាតិ និងរួមចំណែកក្នុងការកសាង ស្ថិរភាព សុខសន្តិភាព និងការអភិវឌ្ឍប្រទេសជាតិ រហូតទទួលបានវឌ្ឍនភាពដូចសព្វថ្ងៃ។ក្នុងនាមជាយុវជនជំនាន់ក្រោយ ឯកឧត្តមសូមគោរពដឹងគុណយ៉ាងជ្រាលជ្រៅបំផុត ចំពោះគំរូវីរភាព ការលះបង់ ការខិតខំប្រឹងប្រែងរបស់អ្នកដឹកនាំជំនាន់មុន ដែលបានតស៊ូឥតស្រាកស្រាន្តក្នុងការបំពេញបេសកកម្មដើម្បីបុព្វហេតុជាតិ និងប្រជាជន។ ឯកឧត្តមបានបន្ថែមថា ការគោរពវិន័យ ការប្រកាន់ខ្ជាប់នូវគោលការណ៍ដឹកនាំ និងស្មារតីទទួលខុសត្រូវខ្ពង់ខ្ពស់បំផុតរបស់ពួកគាត់ គឺជាមូលដ្ឋានគ្រឹះដ៏សំខាន់ដែលបាននាំមកនូវសុខសន្តិភាព ស្ថិរភាព និងការអភិវឌ្ឍប្រទេសជាតិដូចសព្វថ្ងៃ។ បើគ្មានការលះបង់របស់អ្នកជំនាន់មុន ក៏គ្មានយើងនៅក្នុងពេលបច្ចុប្បន្ន និងតទៅអនាគត៕ អត្ថបទ៖ គឹមហុក

ឯកឧត្តម កែប ជុតិមា បង្ហាញពីផលប៉ះពាល់នៃជម្លោះព្រំដែនកម្ពុជា-ថៃ លើវិស័យអប់រំនិងវប្បធម៌ និងវឌ្ឍនភាពភាសាបារាំង ក្នុងមហាសន្និបាត APF នៅកាមេរូន

ក្នុងឱកាសចូលរួមសម័យប្រជុំប្រចាំឆ្នាំលើកទី៥១ នៃសភាប្រើភាសាបារាំង (APF) កាលពីពេលថ្មីៗកន្លងទៅនេះ ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា បានអញ្ជើញចូលរួមកិច្ចប្រជុំគណៈកម្មការអប់រំ វប្បធម៌ និងទំនាក់ទំនង នៅទីក្រុងយ៉ាអ៊ុនដេ សាធារណរដ្ឋកាមេរូន។កិច្ចប្រជុំនេះមានការអញ្ជើញចូលរួមពីសមាជិកសភាប្រមាណ ៣០រូប មកពី ២១ក្រុមសភាជាតិនៃបណ្តាប្រទេសប្រើប្រាស់ភាសាបារាំង រួមទាំងអ្នកជំនាញផ្នែកប្រព័ន្ធផ្សព្វផ្សាយ ដើម្បីពិភាក្សាលើរបៀបវារៈសំខាន់ៗ ដូចជា ស្ថានភាពគ្រូបង្រៀនភាសាបារាំងលើសកលលោក ការអប់រំឌីជីថល ការប្រយុទ្ធប្រឆាំងព័ត៌មានក្លែងក្លាយ ការចុះអត្រានុកូលដ្ឋាន និងការអភិរក្សខ្លឹមសារវប្បធម៌។នាឱកាសនោះ ឯកឧត្តម កែប ជុតិមា បានធ្វើបទអន្តរាគមន៍ដោយជម្រាបជូនអង្គប្រជុំអំពីផលប៉ះពាល់អវិជ្ជមាននៃជម្លោះព្រំដែនកម្ពុជា-ថៃ នាពេលកន្លងមក មកលើវិស័យអប់រំ និងវប្បធម៌នៅកម្ពុជា។ ក្នុងនោះ ជម្លោះប្រដាប់អាវុធបានបង្ខំឱ្យសាលារៀនតាមបណ្តោយព្រំដែនចំនួន ១,០១៧ខ្នង ត្រូវបិទទ្វារបណ្តោះអាសន្ន ដែលធ្វើឱ្យគ្រូ និងសិស្សានុសិស្សរងផលប៉ះពាល់យ៉ាងខ្លាំង ព្រមទាំងបង្កើតឱ្យមានហានិភ័យនៃការបោះបង់ការសិក្សា និងជំងឺថប់អារម្មណ៍។ ជាងនេះទៅទៀត ការវាយប្រហារតាមអាកាសពីសំណាក់យោធាថៃ នាពេលនោះ បានបង្កការខូចខាតយ៉ាងធ្ងន់ធ្ងរដល់បុរាណស្ថានចំនួន ៥៦២កន្លែង ជុំវិញតំបន់ប្រវត្តិសាស្ត្រ ជាពិសេសគឺប្រាសាទព្រះវិហារ ដែលជាសម្បត្តិបេតិកភណ្ឌពិភពលោក។ទន្ទឹមនឹងនេះ ឯកឧត្តមក៏បានជម្រាបជូនអំពីបច្ចុប្បន្នភាព និងវឌ្ឍនភាពនៃការសិក្សាភាសាបារាំងនៅកម្ពុជា ព្រមទាំងបានលើកឡើងពីបញ្ហាប្រឈម និងអនុសាសន៍មួយចំនួនដើម្បីជំរុញជំនួយបច្ចេកទេស និងហិរញ្ញវត្ថុពីដៃគូអន្តរជាតិ។ ឯកឧត្តមបានបង្ហើបឱ្យដឹងថា កម្ពុជានឹងបើកដំណើរការមហាវិទ្យាល័យភាសាបារាំង ជំនាញសេដ្ឋកិច្ចនិងការគ្រប់គ្រងកម្រិតពិភពលោក ក្នុងពេលឆាប់ៗខាងមុខនេះ។ជាទីបញ្ចប់ ឯកឧត្តមប្រធានគណៈកម្មការបានប្រកាសជូនអង្គប្រជុំដោយមោទនភាពថា ព្រះរាជាណាចក្រកម្ពុជានឹងទទួលធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី (Francophonie) លើកទី២០ នាថ្ងៃទី១៥-១៦ ខែវិច្ឆិកា ឆ្នាំ២០២៦។ ជាមួយគ្នានេះ ក្រុមសភាជាតិកម្ពុជានៃ APF ក៏នឹងទទួលធ្វើជាម្ចាស់ផ្ទះរៀបចំកិច្ចប្រជុំគណៈកម្មការអប់រំ វប្បធម៌ និងទំនាក់ទំនង នៃសភាប្រើភាសាបារាំង នាខែមេសា ឆ្នាំ២០២៧ ខាងមុខផងដែរ៕

បណ្ដាញសង្គម

ព័ត៌មានថ្មីៗ

ការលាលែងពីតំណែងរបស់រដ្ឋមន្ត្រីអប់រំឥណ្ឌា គឺជាជ័យជម្នះដ៏ធំ សម្រាប់ក្រុមបាតុករយុវជន

លោក Trump រិះគន់ព័ត៌មានក្លែងក្លាយ និងបង្កឱ្យមានភាពចម្រូងចម្រាស ជុំវិញការបោះឆ្នោតឆ្នាំ២០២៨

មនុស្សយ៉ាងតិច ៥នាក់ស្លាប់ ក្នុងហេតុការណ៍បាក់ដី នៅភាគខាងជើងចិន

ម៉ិកស៊ិកនឹងមិនតបតពន្ធរបស់លោក Trump ទេ ខណៈការនាំចេញត្រូវបានការពារដោយកិច្ចព្រមព្រៀងពាណិជ្ជកម្ម

ចិនតវ៉ាប្រឆាំងនឹងទណ្ឌកម្មរបស់សហភាពអឺរ៉ុប លើក្រុមហ៊ុនចិន ពាក់ព័ន្ធនឹងបញ្ហារុស្ស៊ី

មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ

ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោកជិតដល់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

កម្ពុជា បង្ហាញមហិច្ឆតាក្លាយជាប្រទេសគោលដៅផលិត និងផ្គត់ផ្គង់ផលិតផលស្បែកជើងក្នុងតំបន់អាស៊ី

អតីតសកម្មជនគណបក្សប្រឆាំងចំនួន ១០២នាក់ សុំចូលរួមជីវភាពនយោបាយជាមួយគណបក្សប្រជាជនកម្ពុជា

ពលរដ្ឋរងគ្រោះខ្យល់កន្រ្តាក់ ២៣គ្រួសារ ទទួលអំណោយពីសាខាកាកបាទក្រហមខេត្តបាត់ដំបង

រដ្ឋមន្ត្រីក្រសួងអប់រំ យុវជន និងកីឡា អញ្ជើញបើកកម្មវិធីរត់ ដើម្បីការអប់រំកុមារព្រំដែន

សម្តេចកិត្តិសង្គហបណ្ឌិត ម៉ែន សំអន អញ្ជើញសម្ពោធស្នាក់ការបក្សក្រុងបាវិតតម្លៃជាង ៥២ ម៉ឺនដុល្លារ

អភិបាលខេត្តកោះកុង ចាត់ទុកបុណ្យពូនភ្នំទុរេន ជាកម្លាំងសាមគ្គី និងលើកស្ទួយទិន្នផលកសិកម្ម

សភាប្រើភាសាបារាំងជិត ១០០ ប្រទេស ចេញមុខអំពាវនាវឲ្យភាគីថៃគោរពអធិបតេយ្យភាពកម្ពុជា

គណៈចលនាមហាជន រៀបចំបាឋកថាស៊េរី «កេរដំណែលរស់៖ គុណតម្លៃ ៧ មករា» នៅវិមាន ៧ មករា”

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

កម្ពុជា បង្ហាញមហិច្ឆតាក្លាយជាប្រទេសគោលដៅផលិត និងផ្គត់ផ្គង់ផលិតផលស្បែកជើងក្នុងតំបន់អាស៊ី

អតីតសកម្មជនគណបក្សប្រឆាំងចំនួន ១០២នាក់ សុំចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា

ពលរដ្ឋរងគ្រោះខ្យល់កន្រ្តាក់ ២៣គ្រួសារ ទទួលអំណោយពីសាខាកាកបាទក្រហមខេត្តបាត់ដំបង

រដ្ឋមន្ត្រីក្រសួងអប់រំ យុវជន និងកីឡា អញ្ជើញបើកកម្មវិធីរត់ ដើម្បីការអប់រំកុមារព្រំដែន

សម្តេចកិត្តិសង្គហបណ្ឌិត ម៉ែន សំអន អញ្ជើញសម្ពោធស្នាក់ការបក្សក្រុងបាវិតតម្លៃជាង ៥២ ម៉ឺនដុល្លារ

អភិបាលខេត្តកោះកុង ចាត់ទុកបុណ្យពូនភ្នំទុរេន ជាកម្លាំងសាមគ្គី និងលើកស្ទួយទិន្នផលកសិកម្ម

សភាប្រើភាសាបារាំងជិត ១០០ ប្រទេស ចេញមុខអំពាវនាវ​ឲ្យភាគី​ថៃ​គោរព​អធិបតេយ្យ​ភាព​កម្ពុជា

គណៈចលនាមហាជន រៀបចំបាឋកថាស៊េរី «កេរដំណែលរស់៖ គុណតម្លៃ ៧ មករា» នៅវិមាន ៧ មករា”

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

អតីតសកម្មជនគណបក្សប្រឆាំងចំនួន ១០២នាក់ សុំចូលរួមជីវភាពនយោបាយជាមួយគណបក្សប្រជាជនកម្ពុជា

សភាប្រើភាសាបារាំងជិត ១០០ ប្រទេស ចេញមុខអំពាវនាវឲ្យភាគីថៃគោរពអធិបតេយ្យភាពកម្ពុជា