BTV NEWS

សម្ដេចធិបតីផ្ដល់គោលការណ៍ដល់ក្រសួងអប់រំឱ្យផ្ដល់កិច្ចសន្យាដល់គ្រូកិច្ចសន្យាពី១ឆ្នាំឡើងទៅ២ឆ្នាំ

រដ្ឋាភិបាលអូស្ត្រាលី រក្សាជំហបន្តជំនួយ និងជួយពង្រឹងប្រព័ន្ធថែទាំសុខភាព និងភាពជាដៃគូរវាងវិស័យសាធារណៈ និងឯកជន ដើម្បីគាំទ្រនិងធ្វើឱ្យប្រសើរឡើង នូវសេវាសុខាភិបាលនៅកម្ពុជា

កម្ពុជាត្រូវពន្លឿនឧស្សាហូបនីយកម្ម និងរចនាសម្ព័ន្ធដែលទ្រទ្រង់ ដើម្បីចាកចេញពីប្រទេសអភិវឌ្ឍន៍តិចតួច

ព័ត៌មានជាតិ

លោកជំទាវ ពុំ ចន្ទីនី អញ្ជើញបិទវគ្គបណ្តុះបណ្តាលគ្រូបង្គោលវិជ្ជាសង្គ្រោះបឋម នៅសាកលវិទ្យាល័យ RULE

នារសៀលថ្ងៃទី១៥ ខែកុម្ភះ ឆ្នាំ២០២៥នេះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និង ឧត្តមបណ្ឌិត លុយ ចណ្ណា សាកលវិទ្យាធិការ និងជាប្រធានកិត្តិយសក្លឹបយុវជន កក្រក ប្រចាំសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច អញ្ជើញជាធិបតី ក្នុងពិធីបិទវគ្គបណ្តុះបណ្តាលវិជ្ជាសង្គ្រោះបឋម ដល់និស្សិតចំនួន២៥នាក់ នៅ សាកលវិទ្យាល័យភូមិន្ទនីតិសាស្រ្ត នឹងវិទ្យាសាស្ដ្រសេដ្ឋកិច្ច។ មានប្រសាសន៍នាឱកាសនេះ ឧត្តមបណ្ឌិត លុយ ចណ្ណា ប្រធានកិត្តិយសក្លឹបយុវជន កក្រក ប្រចាំសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានមានប្រសាសន៍ថា នេះជាកិត្តិយសណាស់ដែល សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនប្រធាន ចាត់ឱ្យមន្រ្តីជំនាញផ្នែកវិជ្ជាសង្គ្រោះបឋម បើកវគ្គបណ្តុះបណ្តាល ដល់និស្សិតចំនួន២៥នាក់ (ស្រី១៦នាក់) នៅក្នុងសាកលវិទ្យាល័យភូមិន្ទនីតិសាស្រ្ត បានចេះដឹងនៅជំនាញដ៏មានសារសំខាន់មួយនេះ។ ឧត្តមបណ្ឌិតបន្តថាជំនាញនេះ បានជួយសង្គ្រោះ ជនរងគ្រោះតាមសហគមន៍ដូចជា គ្រោះថ្នាក់ចរាចរណ៍ គ្រោះថ្នាក់ការងារ និងជំងឺផ្សេងៗទៀត។ដោយមើល នៅគុណប្រយោជន៍ទាំងនេះហើយ ទើបក្លឹបយុវជន កក្រក ប្រចាំសាកលវិទ្យាល័យភូមិន្ទនីតិសាស្រ្ត មានកិត្តិយសទទួលបាន ការចង្អុលបង្ហាញពីថ្នាក់ដឹកនាំ កក្រក ក្នុងការរៀបចំឱ្យមានវគ្គបណ្តុះបណ្តាលគ្រូបង្គោលវិជ្ជាសង្គ្រោះបឋម ដែលមានរយៈ ពេល ១ថ្ងៃកន្លះនេះ។ មានប្រសាសន៍ក្នុងឱកាស បិទវគ្គបណ្តុះបណ្តាលគ្រូបង្គោល វិជ្ជាសង្គ្រោះបឋមនាឱកាសនេះ លោកជំទាវ ពុំ ចន្ទីនី បានឱ្យដឹងថា នេះជាលើកទី១បន្ទាប់ពីអនុវត្តតាមយុទ្ធសាសន៍ដ៏ខ្ពង់ខ្ពស់របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាននិងអនុសាសន៍របស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍ នៃគណៈកម្មាធិការកណ្តាល កក្រក។ ព្រោះកន្លងមកលោកបានពិនិត្យឃើញថានៅតាមបណ្តាសាខា និងគ្រឹះស្ថានឧត្តមសិក្សាទាំង២៥ ក្នុងរាជធានីភ្នំពេញ នៅខ្វះគ្រូបង្គោលវិជ្ជាសង្គ្រោះបឋម ទើបសម្តេចប្រធាន និង លោកជំទាវបណ្ឌិត ស្នើរឱ្យមានការបង្រៀនវិជ្ជាសង្គ្រោះបឋម ទៅដល់គ្រឹះស្ថានឧត្តមសិក្សាទាំង២៥ ក្នុងរាជធានីភ្នំពេញ និងសាខាទាំងអស់ ទៅតាមពេលវេលាសមស្របណាមួយ។ ព្រោះលោកយល់ឃើញថា ការរៀបចំអោយមានវគ្គបណ្តុះបណ្តាលវិជ្ជាសង្គ្រោះបឋម ទៅដល់គ្រូបង្គោលនេះ គឺដើម្បីជាលើកកម្ពស់សុខភាពសាធារណៈ។ ជាពិសេសជាការបង្កើនការយល់ដឹង អំពីការសង្គ្រោះបឋម បង្កើនការត្រៀមលក្ខណៈ សង្គ្រោះបន្ទាន់ ទៅដល់ជនរងគ្រោះ វគ្គនេះដែរវាក៏ជាការផ្តល់ឱកាសឱ្យអ្នកស្ម័គ្រចិត្ត បានអនុវត្តផ្ទាល់ក្នុងការជួយសង្រ្គោះបឋម និងជំរុញឱ្យមានការលើកទឹកចិត្ត មានការចូលរួមពីសហគមន៍ និងសាធារណជនទូទៅបានយល់ដឹងផងដែរ។សូមជម្រាបថាថ្មីៗកន្លងមកនេះក្នុងឱកាសអញ្ជើញជាអធិបតីក្នុងពិធីបិទកិច្ចប្រជុំបូកសរុបលទ្ធផលការងារយុវជន និងអ្នកស្ម័គ្រចិត្ត កាកបាទក្រហមកម្ពុជា ឆ្នាំ២០២៤ និងលើកទិសដៅការងារបន្ត លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍ កក្រក បានឱ្យដឹងថា ដើម្បីលើកកម្ពស់សុខភាពប្រជាពលរដ្ឋ ឈានទៅសម្រេចបាន ស្របតាមយុទ្ធសាស្ត្រ កក្រក ឆ្នាំ២០២១-២០៣០ គ្រួសារ, ស្ថាប័នសាធារណៈ, ឬវិស័យឯកជន, ត្រូវមានមនុស្សម្នាក់ចេះវិជ្ជាសង្គ្រោះបឋម ក្នុងការសង្គ្រោះអាយុជីវិតមនុស្សបានទាន់ពេលវេលា៕ អត្ថៈ សំ ងីម

អន្តរក្រសួងចេញសេចក្ដីប្រកាសស្តីពីការគ្រប់គ្រងអាកាសយាន គ្មានមនុស្សបើក (ដ្រូន) ក្រោយលេចឡើងពីគម្រោងវាយប្រហារដោយដ្រូនចូលភូមិគ្រឹះសម្តេចតេជោ ហ៊ុន សែន

ភ្នំពេញ៖ ក្រសួងមហាផ្ទៃ ក្រសួងកសិកម្ម រុក្ខាប្រមាញ់និងនេសាទ និងរដ្ឋលេខាធិការដ្ឋានអាកាសចរណ៍ស៊ីវិល បានចេញប្រកាសអន្តរក្រសួង ស្តីពីការគ្រប់គ្រងអាកាសយាន គ្មានមនុស្សបើក (ដ្រូន)។ នេះបើតាមប្រកាសអន្តរក្រសួងចុះនៅថ្ងៃទី១៤ ខែកុម្ភៈ ឆ្នាំ២០២៥នេះ។តាមប្រការ១ របស់ប្រកាសអន្តរក្រសួងនេះកំណត់អំពីការគ្រប់គ្រងទិន្នន័យ តំបន់ហាមឃាត់ និងការប្រើប្រាស់អាកាសយានគ្មាន មនុស្សបើក (ដ្រូន) ព្រមទាំងកំណត់អំពីវិធានការសន្តិសុខ ក្នុងការប្រើប្រាស់អាកាសយានគ្មានមនុស្សបើក (ដ្រូន) ដើម្បីធានាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម នៅក្នុងព្រះរាជាណាចក្រកម្ពុជា។ប្រកាសអន្តរក្រសួងនេះមានវិសាលភាពអនុវត្ត ចំពោះអាកាសយានគ្មានមនុស្សបើក (ដ្រូន) ដែលអាចផ្ទុកទម្ងន់ចាប់ពី២ គីឡូក្រាមឡើង លើកលែងតែអាកាសយានគ្មានមនុស្សបើក (ដ្រូន) ដែលប្រើប្រាស់សម្រាប់បម្រើឱ្យវិស័យការពារជាតិ និងសន្តិសុខជាតិ ដែលត្រូវកំណត់ដោយលិខិតបទដ្ឋានគតិយុត្តដោយឡែក៕

ប្រធានក្រុមចលនាស្ត្រី ប្រកាសថ្កោលទោសយ៉ាងម៉ឺងម៉ាត់ដាច់ខាតចំពោះអំពេីស្មោគគ្រោករបស់ពួកជ្រុលនិយម

កណ្ដាល៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងជាប្រធានក្រុមចលនាស្ត្រី នៃក្រុមការងារគណបក្សចុះមូលដ្ឋានខេត្តកណ្តាល ប្រកាសថ្កោលទោសយ៉ាងម៉ឺងម៉ាត់ដាច់ខាតចំពោះអំពេីស្មោគគ្រោករបស់ពួកជ្រុលនិយមដែរបានរៀបគំរោងដេីម្បីមានបំណងធ្វេីឃាតសម្ដេចតេជោ ហ៊ុន សែន ក៏ដូចជាក្រុមគ្រួសាររបស់លោក ក៏ដូចជាសម្ដេចមហាបវធិបតី ហ៊ុន ម៉ាណែត ។ មានប្រសាសន៍ ក្នុងពិធីជួបសំណេះសំណាល និងប្រកាសទទួលស្គាល់សមាសភាពក្រុមការងារចលនាស្ដី នៃក្រុមការងារគណបក្សចុះមូលដ្ឋាន ស្រុកពញាឮ ខេត្តកណ្ដាល នាព្រឹកម៉ិញនេះថា៖ តាំងនាមអោយស្ត្រីទាំងអស់នៅទូទាំងស្រុកពញ្ញាឮ ទាំងបុរស ព្រមទាំងសមាជិកសមាជិកាទាំងអស់ ប្រកាសថ្កោលទោសយ៉ាងម៉ឺងម៉ាត់ដាច់ខាតចំពោះអំពេីស្មោគគ្រោករបស់ពួកជ្រុលនិយមដែរបានរៀបគំរោងដេីម្បីមានបំណងធ្វេីឃាតសម្ដេចតេជោ ហ៊ុន សែន ក៏ដូចជាក្រុមគ្រួសាររបស់លោក ក៏ដូចជាសម្ដេចមហាបវធិបតី ហ៊ុន ម៉ាណែត ដែលយេីងចាត់ទុកថានេះជាអំពេីភេរវកម្ម ដែលយេីងចាត់ទុកថាជាអំពេីដ៏ថោកទាបបំផុត ដែររាល់សមាជិកគណៈបក្សប្រជាជនកម្ពុជា ទាំងស្ត្រី ទាំងបុរសទាំងអស់យេីងត្រូវប្រឆាំងដាច់ខាត។ សម្តេចមហារដ្ឋសភាធិការធិបតីក្រុមណាដែលមានគម្រោងការ ឬអំពើឃុបឃិតបង្កើតចលនាប្រឆាំងជ្រុលនិយម បង្កភាពវឹកវរ អសន្តិសុខ ក្នុងសង្គម បង្កឱ្យមានជម្លោះជាមួយរដ្ឋដទៃ និងប៉ុនប៉ងផ្តួលរំលំរាជរដ្ឋាភិបាលស្របច្បាប់ គឺជាភេរវករ ដែលត្រូវតែនាំខ្លួនយកមកវិនិច្ឆ័យទោសដើម្បីការពារសន្តិភាព។ ដោយសារតែបច្ចុប្បន្ន យើងសង្កេតឃើញនៅតាមបណ្តាប្រទេសមួយចំនួនលើពិភពលោកកំពុងឆាបឆេះ ដោយសង្គ្រាមយ៉ាងសន្ធោរសន្ធៅ ពាក់ព័ន្ធនឹងតួអង្គប្រកបដោយសក្តានុពលជាច្រើន ដែលគម្រាមកំហែងដល់អរិយធម៌មនុស្សជាតិ ហើយប្រជាជនដែលរស់នៅក្នុងតំបន់សង្គ្រាមទាំងនោះកំពុងស្រែកដង្ហោយ រកសន្តិភាពដែលត្រូវធ្វើឱ្យបាត់បង់ទៅ ដោយមិនដឹងថាសន្តិភាពនឹងកើតមានវិញនៅពេលណានោះឡើយ។ សម្តេចមហារដ្ឋសភាធិការធិបតីបានបន្ដទៀតថា៖ កម្ពុជាយើងទើបមានសន្តិភាពរយៈ២៦ឆ្នាំមកនេះដោយសារនយោបាយឈ្នះឈ្នះរបស់សម្តេចតេជោហ៊ុន សែន ដែលជា ស្ថាននិងជាមគ្គុទ្ទេសក៍នៃសន្តិភាព ដែលសន្តិភាពនេះហើយបានផ្តល់ឱកាសឲ្យយើងអភិវឌ្ឍន៍សេដ្ឋកិច្ច សង្គម មានការរីកចម្រើនលើគ្រប់វិស័យ។ ប៉ុន្តែយ៉ាងណាក៏ដោយបើទោះបីជាយើងកំពុងរស់នៅក្រោមម្លប់សុខសន្តិភាព ប្រជាពលរដ្ឋកំពុងសប្បាយ រីករាយយ៉ាងនេះក្តី ក៍បច្ចុប្បន្នក៍នៅមានពួកជ្រុលនិយមមួយចំនួនតូច តែងព្យាយាមសាបព្រោះឥតឈប់ឈរនូវនយោបាយសតិអារម្មណ៍ជ្រុលនិយមមកលើសង្គមជាតិយើង សំដៅ អុជអាល ញុះញង់ បំផុសប្រជាជន កងកម្លាំងប្រដាប់អាវុធ មន្ត្រីរាជការឱ្យធ្វើការប្រឆាំងនឹងរាជរដ្ឋាភិបាល ស្របច្បាប់ ដែលនោះគឺ ជាការគម្រាមកំហែងពិតដល់សន្តិភាព។ អត្ថបទដោយ៖ សៅ យ៉ាម៉ង់

ព្រះសង្ឃនិងនិសិត្យសាកលវិទ្យាលយ័ស្វាយរៀងបរិច្ចាគឈាមក្នុងថ្ងៃក្តីស្រលាញ់១៤កុម្ភៈ

ស្វាយរៀង ៖ .ថ្ងៃទី ១៤ ខែកុម្ភៈឆ្នាំ២០២៥ បានដក់ជាប់នៅក្នុងស្រទាប់យុវវ័យ ពលរដ្ឋ ព្រះសង្ឃខេត្តស្វាយរៀង ហើយក៏បានចាត់ទុកថ្ងៃក្តីស្រឡាញ់ខាងលើទៅជាការរួមចំណែករំលែករាល់ការលំបាកដល់មនុស្សជាតិផងដែរ ដោយឡែក ព្រះសង្ឃ និងនិសិត្យសាកលវិទ្យាលយ័ស្វាយរៀងដឹកនាំដោយ ឯកឧត្តម ទុំ សារ៉ាវុធ សាកលវិទ្យាធិការសាកលវិទ្យាលយ័ នៅថ្ងៃទី ១៥ ខែកុម្ភៈឆ្នាំ ២០២៥ នេះបាននិមន្ត និងមកធ្វើការបរិច្ចាគឈាម ជូនដល់មន្ទីរពេទ្យបង្អែកខេត្ត ដើម្បីឧទ្ទិសដល់ថ្ងៃក្តីស្រលាញ់ជូនអ្នកជំងឺ សំរាកព្យាបាលនៅក្នុងមន្ទីរពេទ្យ ដែលកំពុងដង្ហើយរកអ្នកជួយសង្គ្រោះបញ្ជៀសនិងដកចេញពីចង្កូមមច្ចុរាជដើម្បីបន្តរស់រានមានជីវិតនៅលើភពផែនដី។ស្ថិតក្នុងពេលចូលរួមបរិចាកឈាម នាសាលប្រជុំសាកលវិទ្យាលយ័ស្វាយរៀង តំណាងយុវនិសិត្យ និងព្រះសង្ឃ បានមានចំណាប់អារម្មណ៏ ដោយធ្វើការបញ្ជាក់ថាការបរិចាកឈាមជូនដល់មន្ទីរពេទ្យនៅថ្ងៃនេះ ជាការចែករំលែកក្តីស្រលាញ់របស់ពួកគាត់ជូនដល់ជនរួមជាតិពិសេសអ្នកដែលកំពុងតែដង្ហើយហៅរកជំនួយឈាមដើម្បីធ្វើការសង្គ្រោះអាយុជីវិតឲ្យបានរស់រានមានជីវិតសារជាថ្មី បន្ទាប់ពីពួកគាត់បានមកសម្រាកនិងទទួលយកការព្យាបាលពីមន្ទីរពេទ្យ។លោកវេជ្ជបណ្ឌិតចាន់ ដារ៉ា ប្រធានមន្ទីរពេទ្យបង្អែកស្វាយរៀង ក្នុងនាមគណៈមន្ទីរសូមថ្លែងអំណរគុណយ៉ាងជ្រាលជ្រៅចំពោះសន្តានចិត្តមហាករុណាទុតិគុណ របស់ព្រះសង្ឃគ្រប់អង្គ និងយុវនិសិត្យក្នុងការបរិច្ចាគឈាមនៅក្នុងថ្ងៃក្តីស្រលាញ់នៅពេលនេះ ។ លោកបានចាត់ទុកថាការបរិច្ចាកឈាមរបស់ព្រះសង្ឃនិងនិសិត្យនៅពេលនេះជាការរួមចំណែកមួយយ៉ាងធំធេងជាមួយនឹងមន្ទីរពេទ្យក៏ដូចជាមួយនិងរាជរដ្ឋាភិបាលក្នុងការសង្គ្រោះពលរដ្ឋ ដែលកំពុងមានតម្រូវការឈាមដើម្បីសង្គ្រោះអាយុជីវិត ។ ដោយ ៖ ភា សារិទ្ធ

ឯកឧត្តមសាស្ត្រាចារ្យ ឈាង រ៉ា ផ្សព្វផ្សាយលទ្ធផលសន្និបាតគណៈកម្មាធិការកណ្តាលលើកទី៤៥ របស់គណបក្សប្រជាជនកម្ពុជា ជូនសមាជិកក្រសួងសុខាភិបាល

ភ្នំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ប្រធានក្រុមការងារគណបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខណ្ឌសែនសុខ បានអញ្ជើញជាអធិបតីផ្សព្វផ្សាយលទ្ធផលសន្និបាតគណៈកម្មាធិការកណ្តាលលើកទី៤៥ អាណត្តិទី៥ របស់គណបក្សប្រជាជនកម្ពុជា ជូនសមាជិក សមាជិកាគណបក្ស ទីស្តីការក្រសួងសុខាភិបាល, នាព្រឹកថ្ងៃទី១៥ ខែកុម្ភៈ ឆ្នាំ២០២៥នេះ នៅទីស្នាក់ការគណបក្សប្រជាជនកម្ពុជារាជធានីភ្នំពេញ។ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ប្រធានក្រុមការងារបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខណ្ឌសែនសុខ បានថ្លែងសេចក្តីសង្ខេបខ្លឹមសារ ក្នុងសន្និបាតគណៈកម្មាធិការកណ្ដាលលើកទី៤៥ អាណត្តិទី៥ បានប្រព្រឹត្តទៅក្នុងពេលដែលរាជរដ្ឋាភិបាល អាណត្តិទី៧ ខិតខំប្រឹងប្រែងអនុវត្តដោយរស់រវើកនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់ខ្លួន ធ្វើឲ្យសម្រេចជាបន្តបន្ទាប់នូវគោលដៅជាយុទ្ធសាស្ត្ររបស់គណបក្សប្រកបដោយជោគជ័យយ៉ាងត្រចះ ត្រចង់ ទោះបីសភាពការណ៍សកលលោកបាន និងកំពុងវិវត្តប្រែប្រួលដោយមិនប្រាកដប្រជាយ៉ាងណាក៏ដោយ។ អង្គសន្និបាតសម្តែងនូវការអបអរសាទរចំពោះសម្តេចអគ្គមហាសេនាបតីតេជោ ហ៊ុន សែន ដែលបានទទួលពានរង្វាន់ “មេដាយសន្តិភាពដើម្បីមនុស្សជាតិ និងភពផែនដី" ពីសម័យប្រជុំពេញអង្គ នៃសភាអន្តរជាតិដើម្បីភាពអត់ឱន និងសន្តិភាពលើកទី១១ និងចំពោះសម្តេចមហាបវរធិបតី ហ៊ុន ម៉ាណែត ដែលបានទទួលពានរង្វាន់ «ភាពជាអ្នកដឹកនាំឆ្នើមលើពិភពលោក» ពីមហាសន្និបាតសន្និសីទ អន្តរជាតិនៃបណ្ដាគណបក្ស នយោបាយនៅអាស៊ីលើកទី១២ និងកម្ពុជាជាប់ឆ្នោតជាសមាជិកនៃគណៈកម្មាធិការ ចាត់តាំងនៃគណៈកម្មការកសាង សន្តិភាពអង្គការសហប្រជាជាតិ សម្រាប់អាណត្តិ ២០២៥-២០២៦។ អង្គសន្និបាតសូមសម្ដែងនូវគារវភក្ដីភាពនិងកតញ្ញុតាធម៌ដ៏ស្មោះស្ម័គ្របំផុតថ្វាយព្រះមហាក្សត្រ និងសម្តេចព្រះមហាក្សត្រី និងថ្លែងអំណរគុណយ៉ាងជ្រាលជ្រៅបំផុតចំពោះជនរួមជាតិនៅគ្រប់ទិសទី ទាំងក្នុង និងក្រៅប្រទេស ដែលបានចូលរួមជួយកសាងការពារប្រទេសឲ្យមានការរីកចម្រើនជាលំដាប់។ឯកឧត្តមសាស្រ្តាចារ្យ ឈាង រ៉ា បន្តថា អង្គសន្និបាតធ្វើការពិភាក្សា និងអនុម័តលើការងារសំខាន់ៗ គឺ៖ ១.ពិនិត្យឆ្លងសេចក្តីព្រាង "របាយការណ៍ស្តីពីសភាពការណ៍ទូទៅ និងការងារគណបក្សឆ្នាំ២០២៤ និងទិសដៅភារកិច្ចការងារឆ្នាំ ២០២៥” ។ ២.បោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍នៃគណៈកម្មាធិការកណ្ដាលមួយចំនួន។ អង្គសន្និបាតដំណើរការរយៈពេល២ថ្ងៃ តាមរបៀបវារៈដែលបានកំណត់។ សមាជិក សមាជិកា គណៈកម្មាធិការកណ្តាលបានចូលរួមមានចំនួន ១១៩១រូប លើបរិមាណនៃរចនាសម្ព័ន្ធរួម ១៣១២រូប។ បន្ថែមលើនេះអង្គសន្និបាត បានបើកទូលាយដោយមានអញ្ជើញថែមឯកឧត្តម លោកជំទាវ លោក លោកស្រី ជាសមាជិក សមាជិការដ្ឋសភា ព្រឹទ្ធសភា មន្ត្រីជាន់ខ្ពស់នៅក្នុងរាជរដ្ឋាភិបាលក្រសួង ស្ថាប័ន រាជធានី ខេត្ត ក្រុង ស្រុក ខណ្ឌ ថ្នាក់ដឹកនាំក្រុមការងារចុះមូលដ្ឋានរាជធានី ខេត្ត និងថ្នាក់ដឹកនាំអង្គការមហាជនរបស់គណបក្ស ដែលធ្វើឲ្យសមាសភាពដែលអញ្ជើញចូលរួមសរុបមានចំនួន ៣៥៥៥រូប។ជាចុងក្រោយឯកឧត្តមសាស្រ្តាចារ្យ ឈាង រ៉ា បានជម្រុញឲ្យក្រុមការងារគណបក្ស និងគណបក្សគ្រប់ថ្នាក់ គ្រប់ផ្នែក ត្រូវតែប្រព្រឹត្តតែអំពើល្អ និងត្រូវផ្សារភ្ជាប់ជាមួយប្រជាពលរដ្ឋ បម្រើប្រជាពលរដ្ឋអស់ពីចិត្តពីថ្លើម ខិតខំចលនាប្រជាពលរដ្ឋ ជាពិសេស សមាជិក-សមាជិកា គណបក្សនៅមូលដ្ឋានឲ្យចូលរួមអនុវត្តទិសដៅភារកិច្ចរបស់គណបក្ស ព្រោះប្រជាពលរដ្ឋ និងសមាជិកគណបក្សនៅមូលដ្ឋានជាប្រភពកម្លាំងមិនចេះរីងស្ងួត និងជាកត្តាសម្រេច នៃជោគជ័យរបស់គណបក្សនៅគ្រប់កាលៈទេសៈ៕អត្ថបទ រដ្ឋា

សន្និបាតបូកសរុបសកម្មភាព និងលទ្ធផលការងារចុះមូលដ្ឋានប្រចាំខែមករាឆ្នាំ២០២៥ និងលើកទិសដៅបន្ត របស់ក្រុមការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំង

កំពង់ឆ្នាំង៖ នៅថ្ងៃទី១៥ ខែកុម្ភៈ ឆ្នាំ២០២៥នេះ ឯកឧត្តមបណ្ឌិតសភាចារ្យ អ៊ុក រ៉ាប៊ុន សមាជឹកគណៈអចិន្ត្រៃយ៍នៃគណៈកម្មាធិការកណ្តាល ប្រធានក្រុមការងារគណបក្សចុះមូលដ្ឋានខេត្តកំពង់ឆ្នាំង បានអញ្ជើញជាអធិបតីក្នុងសន្និបាតបូកសរុប សកម្មភាព និងលទ្ធផលការងារចុះមូលដ្ឋានប្រចាំខែមករាឆ្នាំ២០២៥ និងលើកទិសដៅបន្ត របស់ក្រុមការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំង និងគណៈកម្មាធិការគណបក្សខេត្តកំពង់ឆ្នាំង ផ្សព្វផ្សាយខ្លឹមសារលទ្ធផលនៃសន្និបាតគណៈកម្មាធិការកណ្តាលលើកទី៤៥ អាណត្តិទី៥។ ឯកឧត្តម ស៊ុន សុវណ្ណារិទ្ធិ ប្រធានគណៈកម្មាធិការគណបក្សខេត្ត បានឡើងអានរបាយការណ៍សង្ខេបអំពីសមិទ្ធផលសំខាន់ៗរបស់គណបក្ស និងក្រុមការងារគណបក្សចុះមូលដ្ឋានខេត្តកំពង់ឆ្នាំង ប្រចាំខែមករា ឆ្នាំ២០២៥ និងទិសដៅភារកិច្ចបន្ត។ ជាមួយគ្នានោះ ឯកឧត្តម ស៊ីវ រ៉ុន អនុប្រធានគណៈកម្មាធិការគណបក្សខេត្ត បានអានសេចក្ដីជូនដំណឹងស្ដីពីលទ្ធផល នៃសន្និបាតគណៈកម្មាធិការកណ្ដាលលើកទី៤៥ អាណត្តិទី៥ របស់គណបក្សប្រជាជនកម្ពុជា ជូនសមាជិក សមាជិកគណបក្សទាំងអស់ឲ្យបានជ្រួតជ្រាប។ឯកឧត្តមបណ្ឌិតសភាចារ្យ អ៊ុក រ៉ាប៊ុន បានថ្លែងនូវការកោតសរសើរ និងវាយតម្លៃខ្ពស់ចំពោះក្រុមការងារ និងមន្រ្តីគណបក្សគ្រប់ថ្នាក់នៅមូលដ្ឋាន ដែលបានខិតខំប្រឹងប្រែងយកអស់កម្លាំងកាយចិត្ត ស្មារតី និងធនធានផ្ទាល់ខ្លួន បម្រើប្រជាពលរដ្ឋសម្រេចបានសមិទ្ធផលគួរជាទីមោទនៈ ក្នុងរយៈពេលកន្លងមកនេះ។ ការដាក់ចេញទិសដៅរបស់សន្និបាតឆ្នាំ២០២៥ ក្នុងការពង្រឹងធ្លុងមហាសាមគ្គីជាតិក្រោមដំបូងរដ្ឋធម្មនុញ ការពាររឹងមាំឯករាជ្យ អធិបតេយ្យ និងបូរណភាពទឹកដីកម្ពុជា ការពារដាច់ខាត សុខសន្តិភាព ស្ថិរភាពនយោបាយ និងសន្តិសុខជាតិ មិនឲ្យកម្លាំងអមិត្ត ឬក្រុមជ្រុលនិយមណាមកបំផ្លាញការអភិវឌ្ឍ និងសេចក្តីសុខរបស់ប្រជាជនបានឡើយ។ គណៈកម្មាធិការបក្សស្រុក គណបក្សឃុំ ត្រូវបង្កើន និងពង្រឹងសមាជិកគណបក្សទាំងបរិមាណ គុណភាព ដោយឈរលើគោលការណ៍សាមគ្គីឯកភាពផ្ទៃក្នុង និងកិច្ចសហប្រតិបត្តិការល្អ បន្តការកសាង អភិវឌ្ឍន៍មាតុភូមិកម្ពុជា។ឯកឧត្តមបណ្ឌិតសភាចារ្យ ក៏បានផ្តាំផ្ញើមន្រ្តីបក្សចុះពង្រឹងមូលដ្ឋាន និងមន្រ្តីគណបក្សគ្រប់ថ្នាក់ បន្តធ្វើអំពើល្អ ខិតខំយកអស់កម្លាំងកាយចិត្តនិងស្មារតីទទួលខុសត្រូវ បម្រើប្រជាជន ការផ្តល់សេវាសាធារណៈប្រកបដោយគុណភាព និងបង្រ្កាបទាន់ពេលវេលារាល់បទល្មើស ការប្រើប្រាស់គ្រឿងញឿន ការបន្តថែរក្សាសុខសន្តិភាព អនុវត្តភូមិ-ឃុំ មានសុវត្ថិភាព និងលើកកម្ពស់ជីវភាពរស់នៅរបស់ប្រជាពលរដ្ឋ៕ កាំង ហុងវាស្នា

ឯកឧត្តម ហ៊ុល សំអុន ចុះផ្សព្វផ្សាយខ្លឹមសារសន្និបាតបក្សនៅឃុំត្រពាំងធំខាងត្បូង ស្រុកត្រាំកក់ ខេត្តតា កែវ

ឯកឧត្តម ហ៊ុល សំអុន សមាជិកគណកម្មាធិការកណ្តាល អនុប្រធានក្រុមការងារគណបក្សចុះមូលដ្ឋានស្រុកត្រាំកក់ និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានឃុំត្រពាំងធំខាងត្បូងនាព្រឹកថ្ងៃទី១៥ ខែកុម្ភៈ ឆ្នាំ២០២៥នេះ បានអញ្ជើញចូលរួមជាអធិបតី ក្នុងកិច្ចប្រជុំផ្សព្វផ្សាយខ្លឹមសារសន្និបាតគណៈកម្មាធិការកណ្តាលលើកទី៤៥អាណត្តិទី៥ និងបូកសរុបលទ្ធផលការងារគណបក្ស និងក្រុមការងារគណបក្សចុះមូលដ្ឋានឃុំត្រពាំងធំខាងត្បូងប្រចាំឆ្នាំ២០២៤ និងលើកទិសដៅភារកិច្ចឆ្នាំ២០២៥។ឆ្នាំ២០២៤កន្លងមកនេះ គឺជាឆ្នាំទី១ នៃការអនុវត្តកម្ម វិធីនយោបាយ របស់គណបក្សប្រជាជនកម្ពុជា ស្តីពីការកសាងការពារមាតុភូមិកម្ពុជា រយៈពេល ៥ឆ្នាំ (២០២៣ -២០២៨) និងយុទ្ធសាស្ត្របញ្ចកោណ តំណាក់កាលទី១ នៃរាជរដ្ឋាភិបាល នីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី សម្រេចបាននូវសមិទ្ធផលជាច្រើនជូនជាតិ រក្សាបានសុខសន្តិភាព ស្ថិរភាពនយោបាយ ខឿនឯករាជ្យ អធិបតេយ្យ បូរណ ភាពទឹកដី, សេដ្ឋកិច្ចជាតិសម្រេចបានកំណើនក្នុងរង្វង់ ៦%។បន្ទាប់ពីបានស្តាប់របាយការណ៍ របស់លោក សាន់ គឿន អនុប្រធានគណកម្មាធិការ នៃគណបក្សប្រជាជនកម្ពុជាឃុំត្រពាំងធំខាងត្បូងរួចមក ឯកឧត្តម ហ៊ុល សំអុន បានអានជូនសេចក្តីជូនដំណឹង ស្តីពីលទ្ធផលនៃសន្និបាតគណៈកម្មាធិការកណ្តាលលើកទី ៤៥ អាណត្តិទី៥ របស់គណបក្សប្រជាជនកម្ពុជា ។អង្គសន្និបាតបានប្រព្រឹត្តទៅតាមរបៀបវារៈដែលបានកំណត់ ក្នុងស្មារតីឯកភាព ប្រជាធិបតេយ្យ និងការ ទទួលខុសត្រូវខ្ពស់សម្រេចការងារដូចជា៖ (ទី១) ពិភាក្សា និងអនុម័តរបាយការណ៍ស្តីពីសភាពការណ៍ទូទៅ និងការងារគណបក្សឆ្នាំ២០២៤ និងទិសដៅភារកិច្ច ឆ្នាំ២០២៥។ (ទី២) បោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍នៃគណៈកម្មា ធិការកណ្តាល ចំនួន៤ រូប។(ទី៣)គាំទ្រទាំងស្រុងរបាយការណ៍បន្ថែមរបស់សម្តេចមហាបវរធិបតី ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រីនៃព្រះរាជាណាចក្រកម្ពុជាអំពី «ស្ថានការណ៍ទូទៅ ជា ពិសេសការងារសេដ្ឋកិច្ច សង្គម» (ទី៤) បានជ្រួតជ្រាបយ៉ាងស៊ីជម្រៅនូវមតិដឹកនាំដ៏ខ្ពង់ខ្ពស់របស់សម្តេចអគ្គ មហាសេនាបតីតេជោ ហ៊ុន សែន ប្រធានគណបក្សស្តីពីទស្សនៈសភាពការណ៍ជាតិសភាពការណ៍អន្តរជាតិ និងទិសដៅការងាររបស់គណបក្សសម្រាប់រយៈពេលបន្ត។អង្គសន្និបាតបានសម្តែងនូវការដឹងគុណយ៉ាងជ្រាល ជ្រៅបំផុតចំពោះបងប្អូនជនរួមជាតិនៅគ្រប់ទិសទី ដែលមានការជឿជាក់ និងការគាំទ្រយ៉ាងមុតមាំដល់ការដឹកនាំរបស់គណបក្សប្រជាជនកម្ពុជា រយៈពេល ៤៦ ឆ្នាំកន្លង មកនេះធ្វើឱ្យគណបក្សមានលទ្ធភាពពេញលេញក្នុងការបម្រើជាតិ និងប្រជាជនប្រកបដោយជោគជ័យ។ តាមរយៈសមិទ្ធផលធំៗលើគ្រប់វិស័យដែលសម្រេចបានកន្លងមក ក៏ដូចជាការអនុវត្តកម្មវិធីនយោបាយ និងយុទ្ធសាស្ត្របញ្ចកោណ-ដំណាក់កាលទី១ បានឆ្លុះ បញ្ចាំងច្បាស់អំពីការបន្តជំហានទៅមុខដ៏រឹងមាំរបស់ប្រជាជនកម្ពុជាលើមាគ៌ាសន្តិភាព ប្រជាធិបតេយ្យ នីតិរដ្ឋ និងអភិវឌ្ឍន៍ ព្រមទាំង ពង្រឹងបាននូវមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាជាប្រទេសមានចំណូលមធ្យមកម្រិតខ្ពស់ ឆ្នាំ ២០៣០ និងបន្តឈានទៅជាប្រទេសមានចំណូលខ្ពស់នៅឆ្នាំ ២០៥០។អង្គសន្និបាតសម្តែងការកោតសរសើរ និងវាយតម្លៃខ្ពស់ចំពោះគណៈកម្មាធិការគ្រប់ថ្នាក់ គ្រប់ផ្នែក គ្រប់ក្រុមការ ងារគណបក្សចុះមូលដ្ឋាន រាជធានី ខេត្ត អង្គការយុវជន បណ្តាអង្គការមហាជនរបស់គណបក្ស មន្ត្រី និង សមាជិក សមាជិកាគណបក្សនៅគ្រប់មូលដ្ឋាន ដែលបានរួមសាមគ្គីយ៉ាងរឹងមាំជុំវិញគណៈកម្មាធិការកណ្តាល យកអស់កម្លាំងកាយ កម្លាំងចិត្ត ខិតខំអនុវត្តកម្មវិធីនយោបាយ គោលការណ៍ គោលនយោបាយ និងសេចក្តីសម្រេចនានា របស់គណបក្សឱ្យសម្រេចបានលទ្ធផលល្អលើគ្រប់ផ្នែក។អង្គសន្និបាតសូមសម្តែងនូវការដឹងគុណយ៉ាងជ្រាលជ្រៅបំផុតចំពោះបងប្អូនជនរួមជាតិ នៅគ្រប់ទិសទី ដែល មានការជឿជាក់ និងការគាំទ្រយ៉ាងមុតមាំដល់ការដឹកនាំរបស់គណបក្សប្រជាជនកម្ពុជារយៈពេល ៤៦ ឆ្នាំ កន្លង មក នេះ ធ្វើឱ្យគណបក្សមានលទ្ធភាពពេញលេញក្នុងការបម្រើជាតិ និងប្រជាជន ប្រកបដោយជោគជ័យ។ គណបក្សប្រជាជនកម្ពុជាសូមអំពាវនាវដល់បងប្អូនជន រួមជាតិទាំងមូល សូមបន្តរួមសាមគ្គីគ្នាជាធ្លុងមួយ ដើម្បីសម្រេចសមិទ្ធផលធំៗថ្មីៗទៀតក្នុងការកសាង និងការ ពារមាតុភូមិកម្ពុជា ឆ្ពោះទៅរកអនាគតដ៏ សន្តិភាព ប្រជាធិបតេយ្យ នីតិរដ្ឋ និងអភិវឌ្ឍន៍៕ ដោយ ៖ បាន ចក់

សហគមន៍ខ្មែរក្រៅប្រទេសចាត់ទុកការប៉ងធ្វើឃាតសម្តេចតេជោជាទង្វើភេរវកម្មនិងមានគោលបំណងទាញកម្ពុជាឲ្យធ្លាក់ក្នុងភាពវឹកវរ

ភ្នំពេញ ៖ បងប្អូនសហគមន៍ខ្មែរ នៅប្រទសជប៉ុន ប្រទេសកូរ៉េ និងប្រទេសដទៃទៀតបាន បានចាត់ទុកការប៉ុនប៉ង ធ្វើឃាតសម្តេចតេជោ ហ៊ុន សែន តាមរយៈដ្រូននោះ គឺជាទង្វើភេរវកម្ម និងមានគោលបំណងបំផ្លិតបំផ្លាញ សន្តិសុខជាតិរបស់កម្ពុជា ដែលកំពុងមានសព្វថ្ងៃនេះ ខណៈការប៉ុនប៉ងរបស់ក្រុមឧទ្ទាមទាំងនោះមិនគួរ លើកលែង និងត្រូវចាប់ខ្លួនយកមកផ្តន្ទាទោសឲ្យខាងតែបាន។ តាមរយៈញត្តិរបស់បងប្អូនខ្មែរនៅឯនាយសមុទ្រទាំងនោះ បានលើកឡើងថា«យើងខ្ញុំតំណាងឲ្យ សហគមន៍ខ្មែរនៅប្រទេសជប៉ុន ប្រទេសកូរ៉េ និងតំណាងឲ្យសហគមន៍ស្រ្តីខ្មែរនៅកូរ៉េ សូមប្រកាសថ្កោល ទោសយ៉ាងដាច់អហង្ការចំពោះជនដែលរៀបចំគម្រោងវាយប្រហារដោយដ្រូនចូលភូមិគ្រឹះ សម្តេចតេជោ ដែលនេះជាអំពើភេរវកម្មប៉ុនប៉ងធ្វើឃាតថ្នាក់ដឹកនាំជាស្ថាបនិកបិតាសន្តិភាព ជាអគ្គមគ្គុទេសក៍ឯកដ៏ឆ្នើម និងជាឥស្សរជនជាន់ខ្ពស់របស់ជាតិ នេះជាអំពើខុសច្បាប់ យង់ឃ្នង និងឃោឃៅបំផុត ដោយមានគោលបំ ណងទាញកម្ពុជាឲ្យធ្លាក់ទៅក្នុងភាពវឹកវរ និងអសន្តិសុខសង្គម ប៉ុន្តែជាអកុសល គម្រោងនេះត្រូវបានធ្វើ ការទប់ស្កាត់ទាន់ពេលវេលា»។ តាមរយៈញត្តិរបស់បងប្អូនសហគមន៍ខ្មែរនៅក្រៅប្រទេសទាំងនោះ បានលើកឡើងទៀតថា សកម្ម ភាពដ៏ថោកទាបរបស់ក្រុមអគតិទាំងនោះ មិនត្រឹមតែធ្វើឲ្យបាត់បង់នូវសុខសន្តិភាព ស្ថិរភាព និងប៉ះពាល់ ដល់សេដ្ឋកិច្ចសង្គមជាតិទាំងមូលប៉ុណ្ណោះទេ ប៉ុន្តែនឹងនាំមកនូវឱភាពប្រទេសជាតិ បង្អាក់ការរីកចម្រើន និងការអភិវឌ្ឍជាតិ ព្រមទាំងធ្វើឲ្យបាត់បង់នូវសមិទ្ធផលដែល សម្តេចតេជោ ក៏ដូចជាប្រជាជនខ្មែរគ្រប់រូប ដែលបានខិតខំក៏សាងដោយលំបាករយៈពេលកន្លងមកផងដែរ។ បងប្អូនខ្មែរនៅឯក្រៅប្រទេសទាំងនោះក៏បានលើកឡើងផងដែរថា ទង្វើរបស់ក្រុមជនអន្ធពាល ដែលរៀបចំគម្រោងវាយប្រហារដោយដ្រូនចូលភូមិគ្រឹះរបស់ម្តេចតេជោ គឺជាការប៉ុនប៉ងធ្វើឃាតសម្តេចតេ ជោ និងក្រុមគ្រួសារនេះ ជាទង្វើដ៏ស្មោកគ្រោកជាទីបំផុត ក្នុងគោលដៅបំផ្លាញសុខសន្តិភាព សាមគ្គីភាព និងការអភិវឌ្ឍរបស់ប្រទេសជាតិទាំងមូល៕ ដោយ ៖ បាន ចក់

សមាជិក-សមាជិកាគណបក្សប្រជាជនកម្ពុជាគ្រប់មូលដ្ឋានទាំងអស់ចេញញត្តិថ្កោលទោសចំពោះការប៉ុនប៉ងធ្វើឃាតសម្តេចតេជោ

ភ្នំពេញ ៖ សមាជិក សមាជិការបស់គណបក្សប្រជាជនកម្ពុជានៅគ្រប់មូលដ្ឋានទាំងអស់បានចេញញត្តិថ្កោលទោស យ៉ាងដាច់អហង្ការចំពោះការប៉ុនប៉ងវាយប្រហារដោយដ្រូន ចូលភូមិគ្រឹះសម្តេចតេជោ ហ៊ុន សែន នៅក្រុង តាខ្មៅ ខេត្តកណ្តាលកាលពីកន្លងទៅថ្មីៗ ខណៈគម្រោងនេះត្រូវបានពួកគេចាត់ទុកថាជាអំពើភេរវកម្ម និង ជាទង្វើដែលមិនគួរលើកលែង។ តាមរយៈញត្តិសមាជិក សមាជិករបស់គណបក្សប្រជាជនកម្ពុជា ដែលបានចេញជាបន្តបន្ទាប់នោះ បានលើកឡើងថា«យើងខ្ញុំសូមប្រកាសថ្កោលទោស ប្រឆាំងដាច់អហង្ការចំពោះទង្វើទាំងឡាយ ដើម្បី ទាញកម្ពុជាឲ្យធ្លាក់ទៅក្នុងភាពវឹកវរសង្គមសង្រ្គាមសារជាថ្មី។ យើងខ្ញុំសូមថ្កោលទោសប្រឆាំងយ៉ាងដាច់ អហង្ការចំពោះទង្វើទាំងឡាយណា ដែលជាំអំពើភេរវកម្ម ដែលបង្ករឡើងដោយក្រុមឧទ្ទាមក្រៅច្បាប់»។ ញត្តិថ្កោលទោសរបស់បងប្អូនដែលជាសមាជិក សមាជិការបស់គណបក្សប្រជាជនកម្ពុជាទាំងអស់ នោះក៏បានលើកឡើងផងដែរថា ពួកគេកើតទុកមិនសុខចិត្តនោះឡើយចំពោះទង្វើរបស់ក្រុមឧទ្ទាមក្រៅ ច្បាប់ទាំងអស់នោះ ដែលជាទង្វើតិរិច្ឆានដ៏ស្មោកគ្រោក ហើយពួកគេទាមទារឲ្យសមត្ថកិច្ចធ្វើការស្រាវជ្រាវ ចាប់ខ្លួនក្រុមអគតិទាំងនោះមកផ្តន្ទាទោសឲ្យខាងតែបានផងដែរ។ ជាមួយគ្នានោះដែរ តាមរយៈញត្តទាំងអស់នោះ បងប្អូនជាសមាជិក សមាជិកាទាំងអស់ក៏បានប្រ កាសផ្តេជ្ញាការពារសន្តិភាព ស្ថិរភាពនយោបាយ សេចក្តីសុខសាន្ត និងអធិបតេយ្យភាពជាតិជាដាច់ខាត ផងដែរ ទោះស្ថិតក្នុងតម្លៃណាក៏ដោយ ហើយជាងនេះទៅទៀត ពួកគេប្រកាសជំហរយ៉ាងមោះមុត ម៉ឺងម៉ាត់ ប្តេជ្ញាការពារសម្តេចតេជោ ហ៊ុន សែន និងក្រុមគ្រួសារដើម្បីបន្តរក្សាសន្តិភាព ឯកភាពជាតិ និងបូរណ ភាពទឹកដីផងដែរ។ ដោយ ៖ បាន ចក់

នាវាទេសចរណ៍បរទេស ផ្ទុកអ្នកដំណើរចម្រុះជាតិសាសន៍ជាង ២.០០០នាក់ ចូលសំចតធ្វើទស្សនកិច្ចនៅកម្ពុជា

ព្រះសីហនុ ៖ នៅក្រុងព្រះសីហនុ ថ្ងៃទី១៥ ខែកុម្ភៈ ឆ្នាំ២០២៥ នាយនាវីទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្ដិសុខលម្ហសមុទ្រ ក្រុងព្រះសីហនុ ប្រាប់ថា នាវាទេសចរណ៍បរទេសមួយគ្រឿង ផ្ទុកអ្នកដំណើរចម្រុះជាតិសាសន៍ជាង ២.០០០នាក់ បានចូលសំចតនៅកំពង់ផែស្វយ័តអន្ដរជាតិក្រុងព្រះសីហនុ ដើម្បីធ្វើទស្សនកិច្ចនៅប្រទេសកម្ពុជា។ លោកឧត្ដមនាវីទោ បន្ដថា នាវាទេសចរណ៍បរទេសនេះ ឈ្មោះ AIDA STELLA សញ្ជាតិ ITALY បានចូលសំចតនៅកំពង់ផែស្វយ័តអន្ដរជាតិក្រុងព្រះសីហនុ ផ្ទុកអ្នកដំណើរចម្រុះជាតិសាសន៍សរុបចំនួន ២.៧៦០នាក់ ក្នុងនោះមានភ្ញៀវទេសចរចំនួន ២.១២៣នាក់ និងនាវិកចំនួន ៦៣៧នាក់។ ភ្ញៀវទេសចរដែលច្រើនជាងគេនៅលើនាវានេះ គឺជនជាតិអាឡឺម៉ង់ ក្នុងដំណើរទេសចរណ៍មកពីប្រទេសវៀតណាម ចូលសំចតនៅប្រទេសកម្ពុជា នឹងបន្ដដំណើរទេសចរណ៍ទៅប្រទេសថៃ នៅយប់ថ្ងៃដដែលនេះ។ នាវានេះ មានប្រវែងជាង ២៥០ម៉ែត្រ ទទឹងជាង ៣០ម៉ែត្រ និងជម្រៅទឹកជាង ៧ម៉ែត្រ។ រយៈពេលប៉ុន្មានឆ្នាំមុន និងក្រោយពេលវិបត្ដិជំងឺកូវីដ១៩ ប្រទេសកម្ពុជា ពិសេសខេត្ដព្រះសីហនុ ទទួលបាននាវាទេសចរណ៍បរទេស បានចូលសំចតធ្វើទស្សនកិច្ចជាបន្ដបន្ទាប់ ពីឆ្នាំ២០១៩-២០២៤ ចំនួនសរុបប្រមាណ ៩០គ្រឿង និងភ្ញៀវទេសចរចំនួនសរុបប្រមាណ ១០ម៉ឺននាក់ ។ ភាគច្រើនជាភ្ញៀវជនជាតិអាមេរិក អឺរ៉ុប អូស្រ្តាលី និងអាស៊ីមួយចំនួន ដែលទស្សនាកម្សាន្តក្នុងក្រុងព្រះសីហនុ ចូលចិត្តទៅតាមរមណីយដ្ឋានឆ្នេរ សហគមន៍នេសាទ វត្តទេសចរណ៍ក្រោម ផ្សារលើ និងសាលារៀនជាដើម។ ទន្ទឹមនេះ ក៏មានភ្ញៀវមួយចំនួនទៅកម្សាន្តនៅភ្នំពេញ សៀមរាប កែប និងកំពតផងដែរ។ នេះ គឺជាការបញ្ជាក់បន្ថែមពីលោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្ដព្រះសីហនុ ។

បណ្ដាញសង្គម

ព័ត៌មានថ្មីៗ

អាមេរិក និងអ៊ីរ៉ាក់ជួបពិភាក្សាគ្នា ជុំវិញការចាប់ផ្ដើមបន្តឡើងវិញនូវបំពង់បង្ហូរប្រេងដ៏សំខាន់

នាយករដ្ឋមន្ត្រីអ៊ីរ៉ាក់ពិភាក្សាជាមួយមន្ត្រីUN អំពីគោលដៅអភិវឌ្ឍន៍ប្រកបដោយចីរភាព

ទុយនីស៊ី បង្ហាញ«ការភ្ញាក់ផ្អើល»ចំពោះការរិះគន់របស់អង្គការសហប្រជាជាតិអំពីកំណត់ត្រាសិទ្ធិ

វិស័យចំនួន៤ កំពុងជំរុញសមាហរណកម្មសេដ្ឋកិច្ច ខ្សែច្រវាក់តម្លៃ និងភាពប្រកួតប្រជែងរបស់កម្ពុជា

ចិន៖ កោះតៃវ៉ាន់ព្យាយាមប្រគល់ឧស្សាហកម្មបន្ទះឈីបឲ្យទៅអាមេរិក

រដ្ឋមន្ត្រីបារាំង៖ ទីក្រុងប៉ារីស ប៊ែរឡាំង និងទីក្រុងឡុងដ៍ ត្រៀមបញ្ជូនទ័ព ទៅអ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877